੧. ਆਵਸਥਪਿਣ੍ਡਸਿਕ੍ਖਾਪਦਵਣ੍ਣਨਾ

੨੦੩. ਭੋਜਨਵਗ੍ਗਸ੍ਸ ਪਠਮਸਿਕ੍ਖਾਪਦੇ – ਆਵਸਥਪਿਣ੍ਡੋਤਿ ਆਵਸਥੇ ਪਿਣ੍ਡੋ. ਸਮਨ੍ਤਾ ਪਰਿਕ੍ਖਿਤ੍ਤਂ ਅਦ੍ਧਿਕਗਿਲਾਨਗਬ੍ਭਿਨਿਪਬ੍ਬਜਿਤਾਨਂ ਯਥਾਨੁਰੂਪਂ ਪਞ੍ਞਤ੍ਤਮਞ੍ਚਪੀਠਂ ਅਨੇਕਗਬ੍ਭਪਮੁਖਪਰਿਚ੍ਛੇਦਂ ਆਵਸਥਂ ਕਤ੍ਵਾ ਤਤ੍ਥ ਪੁਞ੍ਞਕਾਮਤਾਯ ਪਿਣ੍ਡੋ ਪਞ੍ਞਤ੍ਤੋ ਹੋਤਿ, ਯਾਗੁਭਤ੍ਤਭੇਸਜ੍ਜਾਦਿ ਸਬ੍ਬਂ ਤੇਸਂ ਤੇਸਂ ਦਾਨਤ੍ਥਾਯ ਠਪਿਤਂ ਹੋਤੀਤਿ ਅਤ੍ਥੋ. ਹਿਯ੍ਯੋਪੀਤਿ ਸ੍ਵੇਪਿ. ਅਪਸਕ੍ਕਨ੍ਤੀਤਿ ਅਪਗਚ੍ਛਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤੀਤਿ ਤਿਤ੍ਥਿਯੇ ਅਪਸ੍ਸਨ੍ਤਾ ‘‘ਤਿਤ੍ਥਿਯਾ ਕੁਹਿਂ ਗਤਾ’’‘‘ਇਮੇ ਪਸ੍ਸਿਤ੍ਵਾ ਪਕ੍ਕਨ੍ਤਾ’’ਤਿ ਸੁਤ੍ਵਾ ਉਜ੍ਝਾਯਨ੍ਤਿ. ਕੁਕ੍ਕੁਚ੍ਚਾਯਨ੍ਤੋਤਿ ਕੁਕ੍ਕੁਚ੍ਚਂ ਕਰੋਨ੍ਤੋ, ਅਕਪ੍ਪਿਯਸਞ੍ਞਂ ਉਪ੍ਪਾਦੇਨ੍ਤੋਤਿ ਅਤ੍ਥੋ.

੨੦੬. ਸਕ੍ਕੋਤਿ ਤਮ੍ਹਾ ਆਵਸਥਾ ਪਕ੍ਕਮਿਤੁਨ੍ਤਿ ਅਦ੍ਧਯੋਜਨਂ ਵਾ ਯੋਜਨਂ ਵਾ ਗਨ੍ਤੁਂ ਸਕ੍ਕੋਤਿ. ਨ ਸਕ੍ਕੋਤੀਤਿ ਏਤ੍ਤਕਮੇਵ ਨ ਸਕ੍ਕੋਤਿ. ਅਨੋਦਿਸ੍ਸਾਤਿ ਇਮੇਸਂਯੇਵ ਵਾ ਏਤ੍ਤਕਾਨਂਯੇਵ ਵਾਤਿ ਏਕਂ ਪਾਸਣ੍ਡਂ ਅਨੁਦ੍ਦਿਸਿਤ੍ਵਾ ਸਬ੍ਬੇਸਂ ਪਞ੍ਞਤ੍ਤੋ ਹੋਤਿ. ਯਾਵਦਤ੍ਥੋਤਿ ਭੋਜਨਮ੍ਪਿ ਏਤ੍ਤਕਨ੍ਤਿ ਅਪਰਿਚ੍ਛਿਨ੍ਦਿਤ੍ਵਾ ਯਾਵਦਤ੍ਥੋ ਪਞ੍ਞਤ੍ਤੋ ਹੋਤਿ. ਸਕਿਂ ਭੁਞ੍ਜਿਤਬ੍ਬਨ੍ਤਿ ਏਕਦਿਵਸਂ ਭੁਞ੍ਜਿਤਬ੍ਬਂ, ਦੁਤਿਯਦਿਵਸਤੋ ਪਟ੍ਠਾਯ ਪਟਿਗ੍ਗਹਣੇ ਦੁਕ੍ਕਟਂ, ਅਜ੍ਝੋਹਾਰੇ ਅਜ੍ਝੋਹਾਰੇ ਪਾਚਿਤ੍ਤਿਯਂ.

ਅਯਂ ਪਨੇਤ੍ਥ ਵਿਨਿਚ੍ਛਯੋ – ਏਕਕੁਲੇਨ ਵਾ ਨਾਨਾਕੁਲੇਹਿ ਵਾ ਏਕਤੋ ਹੁਤ੍ਵਾ ਏਕਸ੍ਮਿਂ ਠਾਨੇ ਵਾ ਨਾਨਾਠਾਨੇਸੁ ਵਾ ‘‘ਅਜ੍ਜ ਏਕਸ੍ਮਿਂ; ਸ੍ਵੇ ਏਕਸ੍ਮਿ’’ਨ੍ਤਿ ਏਵਂ ਅਨਿਯਮਿਤਟ੍ਠਾਨੇ ਵਾ ਪਞ੍ਞਤ੍ਤਂ ਏਕਸ੍ਮਿਂ ਠਾਨੇ ਏਕਦਿਵਸਂ ਭੁਞ੍ਜਿਤ੍ਵਾ ਦੁਤਿਯਦਿਵਸੇ ਤਸ੍ਮਿਂ ਠਾਨੇ ਅਞ੍ਞਸ੍ਮਿਂ ਵਾ ਭੁਞ੍ਜਿਤੁਂ ਨ ਵਟ੍ਟਤਿ. ਨਾਨਾਕੁਲੇਹਿ ਪਨ ਨਾਨਾਠਾਨੇਸੁ ਪਞ੍ਞਤ੍ਤਂ ਏਕਸ੍ਮਿਂ ਠਾਨੇ ਏਕਦਿਵਸਂ ਭੁਞ੍ਜਿਤ੍ਵਾ ਦੁਤਿਯਦਿਵਸੇ ਅਞ੍ਞਤ੍ਥ ਭੁਞ੍ਜਿਤੁਂ ਵਟ੍ਟਤਿ. ਪਟਿਪਾਟਿਂ ਪਨ ਖੇਪੇਤ੍ਵਾ ਪੁਨ ਆਦਿਤੋ ਪਟ੍ਠਾਯ ਭੁਞ੍ਜਿਤੁਂ ਨ ਵਟ੍ਟਤੀਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਏਕਪੂਗਨਾਨਾਪੂਗਏਕਗਾਮਨਾਨਾਗਾਮੇਸੁਪਿ ਏਸੇਵ ਨਯੋ. ਯੋਪਿ ਏਕਕੁਲਸ੍ਸ ਵਾ ਨਾਨਾਕੁਲਾਨਂ ਵਾ ਏਕਤੋ ਪਞ੍ਞਤ੍ਤੋ ਤਣ੍ਡੁਲਾਦੀਨਂ ਅਭਾਵੇਨ ਅਨ੍ਤਰਨ੍ਤਰਾ ਛਿਜ੍ਜਤਿ, ਸੋਪਿ ਨ ਭੁਞ੍ਜਿਤਬ੍ਬੋ. ਸਚੇ ਪਨ ‘‘ਨ ਸਕ੍ਕੋਮ ਦਾਤੁ’’ਨ੍ਤਿ ਉਪਚ੍ਛਿਨ੍ਦਿਤ੍ਵਾ ਪੁਨ ਕਲ੍ਯਾਣਚਿਤ੍ਤੇ ਉਪ੍ਪਨ੍ਨੇ ਦਾਤੁਂ ਆਰਭਨ੍ਤਿ, ਏਤਂ ਪੁਨ ਏਕਦਿਵਸਂ ਭੁਞ੍ਜਿਤੁਂ ਵਟ੍ਟਤੀਤਿ ਮਹਾਪਚ੍ਚਰਿਯਂ ਵੁਤ੍ਤਂ.

੨੦੮. ਅਨਾਪਤ੍ਤਿ ਗਿਲਾਨਸ੍ਸਾਤਿ ਗਿਲਾਨਸ੍ਸ ਅਨੁਵਸਿਤ੍ਵਾ ਭੁਞ੍ਜਨ੍ਤਸ੍ਸ ਅਨਾਪਤ੍ਤਿ. ਗਚ੍ਛਨ੍ਤੋ ਵਾਤਿ ਯੋ ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਏਕਦਿਵਸਂ ਗਤਟ੍ਠਾਨੇ ਚ ਏਕਦਿਵਸਂ ਭੁਞ੍ਜਤਿ, ਤਸ੍ਸਾਪਿ ਅਨਾਪਤ੍ਤਿ. ਆਗਚ੍ਛਨ੍ਤੇਪਿ ਏਸੇਵ ਨਯੋ. ਗਨ੍ਤ੍ਵਾ ਪਚ੍ਚਾਗਚ੍ਛਨ੍ਤੋਪਿ ਅਨ੍ਤਰਾਮਗ੍ਗੇ ਏਕਦਿਵਸਂ ਆਗਤਟ੍ਠਾਨੇ ਚ ਏਕਦਿਵਸਂ ਭੁਞ੍ਜਿਤੁਂ ਲਭਤਿ. ਗਚ੍ਛਿਸ੍ਸਾਮੀਤਿ ਭੁਞ੍ਜਿਤ੍ਵਾ ਨਿਕ੍ਖਨ੍ਤਸ੍ਸ ਨਦੀ ਵਾ ਪੂਰਤਿ ਚੋਰਾਦਿਭਯਂ ਵਾ ਹੋਤਿ, ਸੋ ਨਿਵਤ੍ਤਿਤ੍ਵਾ ਖੇਮਭਾਵਂ ਞਤ੍ਵਾ ਗਚ੍ਛਨ੍ਤੋ ਪੁਨ ਏਕਦਿਵਸਂ ਭੁਞ੍ਜਿਤੁਂ ਲਭਤੀਤਿ ਸਬ੍ਬਮਿਦਂ ਮਹਾਪਚ੍ਚਰਿਯਾਦੀਸੁ ਵੁਤ੍ਤਂ. ਓਦਿਸ੍ਸ ਪਞ੍ਞਤ੍ਤੋ ਹੋਤੀਤਿ ਭਿਕ੍ਖੂਨਂਯੇਵ ਅਤ੍ਥਾਯ ਉਦ੍ਦਿਸਿਤ੍ਵਾ ਪਞ੍ਞਤ੍ਤੋ ਹੋਤਿ. ਨ ਯਾਵਦਤ੍ਥੋਤਿ ਯਾਵਦਤ੍ਥਂ ਪਞ੍ਞਤ੍ਤੋ ਨ ਹੋਤਿ, ਥੋਕਂ ਥੋਕਂ ਲਬ੍ਭਤਿ, ਤਾਦਿਸਂ ਨਿਚ੍ਚਮ੍ਪਿ ਭੁਞ੍ਜਿਤੁਂ ਵਟ੍ਟਤਿ. ਪਞ੍ਚ ਭੋਜਨਾਨਿ ਠਪੇਤ੍ਵਾ ਸਬ੍ਬਤ੍ਥਾਤਿ ਯਾਗੁਖਜ੍ਜਕਫਲਾਫਲਾਦਿਭੇਦੇ ਸਬ੍ਬਤ੍ਥ ਅਨਾਪਤ੍ਤਿ. ਯਾਗੁਆਦੀਨਿ ਹਿ ਨਿਚ੍ਚਮ੍ਪਿ ਭੁਞ੍ਜਿਤੁਂ ਵਟ੍ਟਤਿ. ਸੇਸਂ ਉਤ੍ਤਾਨਮੇਵ. ਏਲ਼ਕਲੋਮਸਮੁਟ੍ਠਾਨਂ – ਕਾਯਤੋ ਚ ਕਾਯਚਿਤ੍ਤਤੋ ਚ ਸਮੁਟ੍ਠਾਤਿ, ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ ਤਿਚਿਤ੍ਤਂ, ਤਿਵੇਦਨਨ੍ਤਿ.

ਆਵਸਥਪਿਣ੍ਡਸਿਕ੍ਖਾਪਦਂ ਪਠਮਂ.