੨. ਉਪੋਸਥਕ੍ਖਨ੍ਧਕਂ

ਸਨ੍ਨਿਪਾਤਾਨੁਜਾਨਨਾਦਿਕਥਾ

੧੩੨. ਉਪੋਸਥਕ੍ਖਨ੍ਧਕੇ – ਅਞ੍ਞਤਿਤ੍ਥਿਯਾਤਿ ਏਤ੍ਥ ਤਿਤ੍ਥਂ ਵੁਚ੍ਚਤਿ ਲਦ੍ਧਿ; ਅਞ੍ਞਂ ਤਿਤ੍ਥਂ ਅਞ੍ਞਤਿਤ੍ਥਂ; ਅਞ੍ਞਤਿਤ੍ਥਂ ਏਤੇਸਂ ਅਤ੍ਥੀਤਿ ਅਞ੍ਞਤਿਤ੍ਥਿਯਾ; ਇਤੋ ਅਞ੍ਞਲਦ੍ਧਿਕਾਤਿ ਵੁਤ੍ਤਂ ਹੋਤਿ. ਧਮ੍ਮਂ ਭਾਸਨ੍ਤੀਤਿ ਯਂ ਤੇਸਂ ਕਤ੍ਤਬ੍ਬਾਕਤ੍ਤਬ੍ਬਂ, ਤਂ ਕਥੇਨ੍ਤਿ. ਤੇ ਲਭਨ੍ਤੀਤਿ ਤੇ ਮਨੁਸ੍ਸਾ ਲਭਨ੍ਤਿ. ਮੂਗਸੂਕਰਾਤਿ ਥੂਲਸਰੀਰਸੂਕਰਾ.

੧੩੫. ਅਨਜ੍ਝਾਪਨ੍ਨੋ ਵਾ ਹੋਤਿ ਆਪਜ੍ਜਿਤ੍ਵਾ ਵਾ ਵੁਟ੍ਠਿਤੋਤਿ ਏਤ੍ਥ ਯਂ ਆਪਤ੍ਤਿਂ ਭਿਕ੍ਖੁ ਅਨਜ੍ਝਾਪਨ੍ਨੋ ਵਾ ਹੋਤਿ, ਆਪਜ੍ਜਿਤ੍ਵਾ ਵਾ ਵੁਟ੍ਠਿਤੋ, ਅਯਂ ਅਸਨ੍ਤੀ ਨਾਮ ਆਪਤ੍ਤੀਤਿ ਏਵਮਤ੍ਥੋ ਵੇਦਿਤਬ੍ਬੋ. ਸਮ੍ਪਜਾਨਮੁਸਾਵਾਦੇ ਕਿਂ ਹੋਤੀਤਿ ਯ੍ਵਾਯਂ ਸਮ੍ਪਜਾਨਮੁਸਾਵਾਦੋ ਅਸ੍ਸ ਹੋਤੀਤਿ ਵੁਤ੍ਤੋ, ਸੋ ਆਪਤ੍ਤਿਤੋ ਕਿਂ ਹੋਤਿ, ਕਤਰਾ ਆਪਤ੍ਤਿ ਹੋਤੀਤਿ ਅਤ੍ਥੋ. ਦੁਕ੍ਕਟਂ ਹੋਤੀਤਿ ਦੁਕ੍ਕਟਾਪਤ੍ਤਿ ਹੋਤਿ; ਸਾ ਚ ਖੋ ਨ ਮੁਸਾਵਾਦਲਕ੍ਖਣੇਨ; ਭਗਵਤੋ ਪਨ ਵਚਨੇਨ ਵਚੀਦ੍ਵਾਰੇ ਅਕਿਰਿਯਸਮੁਟ੍ਠਾਨਾ ਆਪਤ੍ਤਿ ਹੋਤੀਤਿ ਵੇਦਿਤਬ੍ਬਾ. ਵਕ੍ਖਤਿ ਹਿ –

‘‘ਅਨਾਲਪਨ੍ਤੋ ਮਨੁਜੇਨ ਕੇਨਚਿ,

ਵਾਚਾਗਿਰਂ ਨੋ ਚ ਪਰੇ ਭਣੇਯ੍ਯ;

ਆਪਜ੍ਜੇਯ੍ਯ ਵਾਚਸਿਕਂ ਨ ਕਾਯਿਕਂ,

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ’’ਤਿ. (ਪਰਿ. ੪੭੯);

ਅਨ੍ਤਰਾਯਿਕੋਤਿ ਅਨ੍ਤਰਾਯਕਰੋ. ਕਿਸ੍ਸ ਫਾਸੁ ਹੋਤੀਤਿ ਕਿਮਤ੍ਥਾਯ ਫਾਸੁ ਹੋਤਿ. ਪਠਮਸ੍ਸ ਝਾਨਸ੍ਸ ਅਧਿਗਮਾਯਾਤਿ ਪਠਮਸ੍ਸ ਝਾਨਸ੍ਸ ਅਧਿਗਮਨਤ੍ਥਾਯ ਤਸ੍ਸ ਭਿਕ੍ਖੁਨੋ ਫਾਸੁ ਹੋਤਿ ਸੁਖਂ ਹੋਤਿ. ਏਸ ਨਯੋ ਸਬ੍ਬਤ੍ਥ. ਇਤਿ ਭਗਵਾ ਉਦ੍ਦੇਸਤੋ ਚ ਨਿਦ੍ਦੇਸਤੋ ਚ ਪਠਮਂ ਪਾਤਿਮੋਕ੍ਖੁਦ੍ਦੇਸਂ ਦਸ੍ਸੇਸਿ.

੧੩੬. ਦੇਵਸਿਕਨ੍ਤਿ ਦਿਵਸੇ ਦਿਵਸੇ. ਚਾਤੁਦ੍ਦਸੇ ਵਾ ਪਨ੍ਨਰਸੇ ਵਾਤਿ ਏਕਸ੍ਸ ਉਤੁਨੋ ਤਤਿਯੇ ਚ ਸਤ੍ਤਮੇ ਚ ਪਕ੍ਖੇ ਦ੍ਵਿਕ੍ਖਤ੍ਤੁਂ ਚਾਤੁਦ੍ਦਸੇ ਅਵਸੇਸੇ ਛਕ੍ਖਤ੍ਤੁਂ ਪਨ੍ਨਰਸੇ; ਅਯਂ ਤਾਵ ਏਕੋ ਅਤ੍ਥੋ. ਅਯਂ ਪਨ ਪਕਤਿਚਾਰਿਤ੍ਤਵਸੇਨ ਵੁਤ੍ਤੋ ‘‘ਸਕਿਂ ਪਕ੍ਖਸ੍ਸ ਚਾਤੁਦ੍ਦਸੇ ਵਾ ਪਨ੍ਨਰਸੇ ਵਾ’’ਤਿ ਵਚਨਤੋ ਪਨ ਤਥਾਰੂਪੇ ਪਚ੍ਚਯੇ ਸਤਿ ਯਸ੍ਮਿਂ ਤਸ੍ਮਿਂ ਚਾਤੁਦ੍ਦਸੇ ਵਾ ਪਨ੍ਨਰਸੇ ਵਾ ਉਦ੍ਦਿਸਿਤੁਂ ਵਟ੍ਟਤਿ, ਆਵਾਸਿਕਾਨਂ ਭਿਕ੍ਖੂਨਂ ਚਾਤੁਦ੍ਦਸੋ ਹੋਤਿ, ਆਗਨ੍ਤੁਕਾਨਂ ਪਨ੍ਨਰਸੋ. ਸਚੇ ਆਵਾਸਿਕਾ ਬਹੁਤਰਾ ਹੋਨ੍ਤਿ, ਆਗਨ੍ਤੁਕੇਹਿ ਆਵਾਸਿਕਾਨਂ ਅਨੁਵਤ੍ਤਿਤਬ੍ਬ’’ਨ੍ਤਿ ਵਚਨਤੋਪਿ ਚੇਤਂ ਵੇਦਿਤਬ੍ਬਂ.

ਸੀਮਾਨੁਜਾਨਨਕਥਾ

੧੩੮. ਪਠਮਂ ਨਿਮਿਤ੍ਤਾ ਕਿਤ੍ਤੇਤਬ੍ਬਾਤਿ ਵਿਨਯਧਰੇਨ ਪੁਚ੍ਛਿਤਬ੍ਬਂ ‘‘ਪੁਰਤ੍ਥਿਮਾਯ ਦਿਸਾਯ ਕਿਂ ਨਿਮਿਤ੍ਤ’’ਨ੍ਤਿ? ਪਬ੍ਬਤੋ ਭਨ੍ਤੇਤਿ. ਪੁਨ ਵਿਨਯਧਰੇਨ ‘‘ਏਸੋ ਪਬ੍ਬਤੋ ਨਿਮਿਤ੍ਤ’’ਨ੍ਤਿ ਏਵਂ ਨਿਮਿਤ੍ਤਂ ਕਿਤ੍ਤੇਤਬ੍ਬਂ. ‘‘ਏਤਂ ਪਬ੍ਬਤਂ ਨਿਮਿਤ੍ਤਂ ਕਰੋਮ, ਕਰਿਸ੍ਸਾਮ, ਨਿਮਿਤ੍ਤਂ ਕਤੋ, ਨਿਮਿਤ੍ਤਂ ਹੋਤੁ, ਹੋਤਿ ਭਵਿਸ੍ਸਤੀ’’ਤਿ ਏਵਂ ਪਨ ਕਿਤ੍ਤੇਤੁਂ ਨ ਵਟ੍ਟਤਿ. ਪਾਸਾਣਾਦੀਸੁਪਿ ਏਸੇਵ ਨਯੋ. ਪੁਰਤ੍ਥਿਮਾਯ ਅਨੁਦਿਸਾਯ, ਦਕ੍ਖਿਣਾਯ ਦਿਸਾਯ, ਦਕ੍ਖਿਣਾਯ ਅਨੁਦਿਸਾਯ, ਪਚ੍ਛਿਮਾਯ ਦਿਸਾਯ, ਪਚ੍ਛਿਮਾਯ ਅਨੁਦਿਸਾਯ, ਉਤ੍ਤਰਾਯ ਦਿਸਾਯ, ਉਤ੍ਤਰਾਯ ਅਨੁਦਿਸਾਯ, ਕਿਂ ਨਿਮਿਤ੍ਤਂ? ਉਦਕਂ ਭਨ੍ਤੇ. ਏਤਂ ਉਦਕਂ ਨਿਮਿਤ੍ਤਨ੍ਤਿ ਏਤ੍ਥ ਪਨ ਅਟ੍ਠਤ੍ਵਾ ਪੁਨ ਪੁਰਤ੍ਥਿਮਾਯ ਦਿਸਾਯ ਕਿਂ ਨਿਮਿਤ੍ਤਂ. ਪਬ੍ਬਤੋ ਭਨ੍ਤੇ. ਏਸੋ ਪਬ੍ਬਤੋ ਨਿਮਿਤ੍ਤਨ੍ਤਿ ਏਵਂ ਪਠਮਂ ਕਿਤ੍ਤਿਤਨਿਮਿਤ੍ਤਂ ਕਿਤ੍ਤੇਤ੍ਵਾਵ ਠਪੇਤਬ੍ਬਂ. ਏਵਞ੍ਹਿ ਨਿਮਿਤ੍ਤੇਨ ਨਿਮਿਤ੍ਤਂ ਘਟਿਤਂ ਹੋਤਿ. ਏਵਂ ਨਿਮਿਤ੍ਤਾਨਿ ਕਿਤ੍ਤੇਤ੍ਵਾ ਅਥਾਨਨ੍ਤਰਂ ਵੁਤ੍ਤਾਯ ਕਮ੍ਮਵਾਚਾਯ ਸੀਮਾ ਸਮ੍ਮਨ੍ਨਿਤਬ੍ਬਾ. ਕਮ੍ਮਵਾਚਾਪਰਿਯੋਸਾਨੇ ਨਿਮਿਤ੍ਤਾਨਂ ਅਨ੍ਤੋ ਸੀਮਾ ਹੋਤਿ, ਨਿਮਿਤ੍ਤਾਨਿ ਸੀਮਤੋ ਬਹਿ ਹੋਨ੍ਤਿ. ਤਤ੍ਥ ਨਿਮਿਤ੍ਤਾਨਿ ਸਕਿਂ ਕਿਤ੍ਤਿਤਾਨਿਪਿ ਕਿਤ੍ਤਿਤਾਨੇਵ ਹੋਨ੍ਤਿ. ਅਨ੍ਧਕਟ੍ਠਕਥਾਯਂ ਪਨ ਤਿਕ੍ਖਤ੍ਤੁਂ ਸੀਮਮਣ੍ਡਲਂ ਸਮ੍ਬਨ੍ਧਨ੍ਤੇਨ ਨਿਮਿਤ੍ਤਂ ਕਿਤ੍ਤੇਤਬ੍ਬਨ੍ਤਿ ਵੁਤ੍ਤਂ. ‘‘ਪਬ੍ਬਤੋ ਭਨ੍ਤੇਤਿ…ਪੇ… ਉਦਕਂ ਭਨ੍ਤੇ’’ਤਿ ਏਵਂ ਪਨ ਉਪਸਮ੍ਪਨ੍ਨੋ ਵਾ ਆਚਿਕ੍ਖਤੁ ਅਨੁਪਸਮ੍ਪਨ੍ਨੋ ਵਾ ਵਟ੍ਟਤਿਯੇਵ.

ਇਦਾਨਿ ਪਬ੍ਬਤਨਿਮਿਤ੍ਤਾਦੀਸੁ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋ – ਤਿਵਿਧੋ ਪਬ੍ਬਤੋ, ਸੁਦ੍ਧਪਂਸੁਪਬ੍ਬਤੋ, ਸੁਦ੍ਧਪਾਸਾਣਪਬ੍ਬਤੋ, ਉਭਯਮਿਸ੍ਸਕੋਤਿ. ਸੋ ਤਿਵਿਧੋਪਿ ਵਟ੍ਟਤਿ. ਵਾਲਿਕਰਾਸਿ ਪਨ ਨ ਵਟ੍ਟਤਿ. ਇਤਰੋਪਿ ਹਤ੍ਥਿਪ੍ਪਮਾਣਤੋ ਓਮਕਤਰੋ ਨ ਵਟ੍ਟਤਿ. ਹਤ੍ਥਿਪ੍ਪਮਾਣਤੋ ਪਨ ਪਟ੍ਠਾਯ ਸਿਨੇਰੁਪ੍ਪਮਾਣੋਪਿ ਵਟ੍ਟਤਿ. ਸਚੇ ਚਤੂਸੁ ਦਿਸਾਸੁ ਚਤ੍ਤਾਰੋ ਤੀਸੁ ਵਾ ਤਯੋ ਪਬ੍ਬਤਾ ਹੋਨ੍ਤਿ, ਚਤੂਹਿ ਵਾ ਤੀਹਿ ਵਾ ਪਬ੍ਬਤਨਿਮਿਤ੍ਤੇਹਿ ਏਵ ਸਮ੍ਮਨ੍ਨਿਤੁਂ ਵਟ੍ਟਤਿ. ਦ੍ਵੀਹਿ ਪਨ ਨਿਮਿਤ੍ਤੇਹਿ ਏਕੇਨ ਵਾ ਸਮ੍ਮਨ੍ਨਿਤੁਂ ਨ ਵਟ੍ਟਤਿ. ਇਤੋ ਪਰੇਸੁ ਪਾਸਾਣਨਿਮਿਤ੍ਤਾਦੀਸੁਪਿ ਏਸੇਵ ਨਯੋ. ਤਸ੍ਮਾ ਪਬ੍ਬਤਨਿਮਿਤ੍ਤਂ ਕਰੋਨ੍ਤੇਨ ਪੁਚ੍ਛਿਤਬ੍ਬਂ ‘‘ਏਕਾਬਦ੍ਧੋ ਨ ਏਕਾਬਦ੍ਧੋ’’ਤਿ. ਸਚੇ ਏਕਾਬਦ੍ਧੋ ਹੋਤਿ, ਨ ਕਾਤਬ੍ਬੋ. ਤਞ੍ਹਿ ਚਤੂਸੁ ਵਾ ਅਟ੍ਠਸੁ ਵਾ ਦਿਸਾਸੁ ਕਿਤ੍ਤੇਨ੍ਤੇਨਾਪਿ ਏਕਮੇਵ ਨਿਮਿਤ੍ਤਂ ਕਿਤ੍ਤਿਤਂ ਹੋਤਿ, ਤਸ੍ਮਾ ਯੋ ਏਵਂ ਚਕ੍ਕਸਣ੍ਠਾਨੇਨ ਵਿਹਾਰਂ ਪਰਿਕ੍ਖਿਪਿਤ੍ਵਾ ਠਿਤੋ ਪਬ੍ਬਤੋ, ਤਂ ਏਕਦਿਸਾਯ ਕਿਤ੍ਤੇਤ੍ਵਾ ਅਞ੍ਞਾਸੁ ਦਿਸਾਸੁ ਤਂ ਬਹਿਦ੍ਧਾ ਕਤ੍ਵਾ ਅਨ੍ਤੋ ਅਞ੍ਞਾਨਿ ਨਿਮਿਤ੍ਤਾਨਿ ਕਿਤ੍ਤੇਤਬ੍ਬਾਨਿ.

ਸਚੇ ਪਬ੍ਬਤਸ੍ਸ ਤਤਿਯਭਾਗਂ ਵਾ ਉਪਡ੍ਢਂ ਵਾ ਅਨ੍ਤੋਸੀਮਾਯ ਕਤ੍ਤੁਕਾਮਾ ਹੋਨ੍ਤਿ, ਪਬ੍ਬਤਂ ਅਕਿਤ੍ਤੇਤ੍ਵਾ ਯਤ੍ਤਕਂ ਪਦੇਸਂ ਅਨ੍ਤੋ ਕਤ੍ਤੁਕਾਮਾ, ਤਸ੍ਸ ਪਰਤੋ ਤਸ੍ਮਿਂਯੇਵ ਪਬ੍ਬਤੇ ਜਾਤਰੁਕ੍ਖਵਮ੍ਮਿਕਾਦੀਸੁ ਅਞ੍ਞਤਰਂ ਨਿਮਿਤ੍ਤਂ ਕਿਤ੍ਤੇਤਬ੍ਬਂ. ਸਚੇ ਏਕਯੋਜਨਦ੍ਵਿਯੋਜਨਪ੍ਪਮਾਣਂ ਸਬ੍ਬਂ ਪਬ੍ਬਤਂ ਅਨ੍ਤੋ ਕਤ੍ਤੁਕਾਮਾ ਹੋਨ੍ਤਿ, ਪਬ੍ਬਤਸ੍ਸ ਪਰਤੋ ਭੂਮਿਯਂ ਜਾਤਰੁਕ੍ਖਵਮ੍ਮਿਕਾਦੀਨਿ ਨਿਮਿਤ੍ਤਾਨਿ ਕਿਤ੍ਤੇਤਬ੍ਬਾਨਿ.

ਪਾਸਾਣਨਿਮਿਤ੍ਤੇ – ਅਯਗੁਲ਼ੋਪਿ ਪਾਸਾਣਸਙ੍ਖ੍ਯਮੇਵ ਗਚ੍ਛਤਿ, ਤਸ੍ਮਾ ਯੋ ਕੋਚਿ ਪਾਸਾਣੋ ਵਟ੍ਟਤਿ. ਪਮਾਣਤੋ ਪਨ ਹਤ੍ਥਿਪ੍ਪਮਾਣੋ ਪਬ੍ਬਤਸਙ੍ਖ੍ਯਂ ਗਤੋ, ਤਸ੍ਮਾ ਸੋ ਨ ਵਟ੍ਟਤਿ. ਮਹਾਗੋਣਮਹਾਮਹਿਂਸਪ੍ਪਮਾਣੋ ਪਨ ਵਟ੍ਟਤਿ. ਹੇਟ੍ਠਿਮਪਰਿਚ੍ਛੇਦੇਨ ਦ੍ਵਤ੍ਤਿਂਸਪਲਗੁਲ਼ਪਿਣ੍ਡਪਰਿਮਾਣੋ ਵਟ੍ਟਤਿ. ਤਤੋ ਖੁਦ੍ਦਕਤਰੋ ਇਟ੍ਠਕਾ ਵਾ ਮਹਨ੍ਤੀਪਿ ਨ ਵਟ੍ਟਤਿ. ਅਨਿਮਿਤ੍ਤੁਪਗਪਾਸਾਣਰਾਸਿਪਿ ਨ ਵਟ੍ਟਤਿ, ਪਗੇਵ ਪਂਸੁਵਾਲਿਕਰਾਸਿ. ਭੂਮਿਸਮੋ ਖਲਮਣ੍ਡਲਸਦਿਸੋ ਪਿਟ੍ਠਿਪਾਸਾਣੋ ਵਾ ਭੂਮਿਤੋ ਖਾਣੁਕੋ ਵਿਯ ਉਟ੍ਠਿਤਪਾਸਾਣੋ ਵਾ ਹੋਤਿ, ਸੋਪਿ ਪਮਾਣੁਪਗੋ ਚੇ ਵਟ੍ਟਤਿ. ਪਿਟ੍ਠਿਪਾਸਾਣੋ ਅਤਿਮਹਨ੍ਤੋਪਿ ਪਾਸਾਣਸਙ੍ਖ੍ਯਮੇਵ ਗਚ੍ਛਤਿ, ਤਸ੍ਮਾ ਸਚੇ ਮਹਤੋ ਪਿਟ੍ਠਿਪਾਸਾਣਸ੍ਸ ਏਕਪ੍ਪਦੇਸਂ ਅਨ੍ਤੋਸੀਮਾਯ ਕਤ੍ਤੁਕਾਮਾ ਹੋਨ੍ਤਿ, ਤਂ ਅਕਿਤ੍ਤੇਤ੍ਵਾ ਤਸ੍ਸੁਪਰਿ ਅਞ੍ਞੋ ਪਾਸਾਣੋ ਕਿਤ੍ਤੇਤਬ੍ਬੋ. ਸਚੇ ਪਿਟ੍ਠਿਪਾਸਾਣੁਪਰਿ ਵਿਹਾਰਂ ਕਰੋਨ੍ਤਿ, ਵਿਹਾਰਮਜ੍ਝੇਨ ਵਾ ਪਿਟ੍ਠਿਪਾਸਾਣੋ ਵਿਨਿਵਿਜ੍ਝਿਤ੍ਵਾ ਗਚ੍ਛਤਿ, ਏਵਰੂਪੋ ਪਿਟ੍ਠਿਪਾਸਾਣੋ ਨ ਵਟ੍ਟਤਿ. ਸਚੇ ਹਿ ਤਂ ਕਿਤ੍ਤੇਨ੍ਤਿ, ਨਿਮਿਤ੍ਤਸ੍ਸ ਉਪਰਿ ਵਿਹਾਰੋ ਹੋਤਿ, ਨਿਮਿਤ੍ਤਞ੍ਚ ਨਾਮ ਬਹਿਸੀਮਾਯ ਹੋਤਿ, ਵਿਹਾਰੋਪਿ ਬਹਿਸੀਮਾਯਂ ਆਪਜ੍ਜਤਿ. ਵਿਹਾਰਂ ਪਰਿਕ੍ਖਿਪਿਤ੍ਵਾ ਠਿਤਪਿਟ੍ਠਿਪਾਸਾਣੋ ਏਕਤ੍ਥ ਕਿਤ੍ਤੇਤ੍ਵਾ ਅਞ੍ਞਤ੍ਥ ਨ ਕਿਤ੍ਤੇਤਬ੍ਬੋ.

ਵਨਨਿਮਿਤ੍ਤੇ – ਤਿਣਵਨਂ ਵਾ ਤਚਸਾਰਤਾਲਨਾਲ਼ਿਕੇਰਾਦਿਰੁਕ੍ਖਵਨਂ ਵਾ ਨ ਵਟ੍ਟਤਿ. ਅਨ੍ਤੋਸਾਰਾਨਂ ਪਨ ਸਾਕਸਾਲਾਦੀਨਂ ਅਨ੍ਤੋਸਾਰਮਿਸ੍ਸਕਾਨਂ ਵਾ ਰੁਕ੍ਖਾਨਂ ਵਨਂ ਵਟ੍ਟਤਿ, ਤਞ੍ਚ ਖੋ ਹੇਟ੍ਠਿਮਪਰਿਚ੍ਛੇਦੇਨ ਚਤੁਪਞ੍ਚਰੁਕ੍ਖਮਤ੍ਤਮ੍ਪਿ ਤਤੋ ਓਰਂ ਨ ਵਟ੍ਟਤਿ, ਪਰਂ ਯੋਜਨਸਤਿਕਮ੍ਪਿ ਵਟ੍ਟਤਿ. ਸਚੇ ਪਨ ਵਨਮਜ੍ਝੇ ਵਿਹਾਰਂ ਕਰੋਨ੍ਤਿ, ਵਨਂ ਨ ਕਿਤ੍ਤੇਤਬ੍ਬਂ. ਏਕਦੇਸਂ ਅਨ੍ਤੋਸੀਮਾਯ ਕਤ੍ਤੁਕਾਮੇਹਿਪਿ ਵਨਂ ਅਕਿਤ੍ਤੇਤ੍ਵਾ ਤਤ੍ਥ ਰੁਕ੍ਖਪਾਸਾਣਾਦਯੋ ਕਿਤ੍ਤੇਤਬ੍ਬਾ. ਵਿਹਾਰਂ ਪਰਿਕ੍ਖਿਪਿਤ੍ਵਾ ਠਿਤਵਨਂ ਏਕਤ੍ਥ ਕਿਤ੍ਤੇਤ੍ਵਾ ਅਞ੍ਞਤ੍ਥ ਨ ਕਿਤ੍ਤੇਤਬ੍ਬਂ.

ਰੁਕ੍ਖਨਿਮਿਤ੍ਤੇ – ਤਚਸਾਰੋ ਤਾਲਨਾਲ਼ਿਕੇਰਾਦਿਰੁਕ੍ਖੋ ਨ ਵਟ੍ਟਤਿ, ਅਨ੍ਤੋਸਾਰੋ ਜੀਵਮਾਨਕੋ ਅਨ੍ਤਮਸੋ ਉਬ੍ਬੇਧਤੋ ਅਟ੍ਠਙ੍ਗੁਲੋ ਪਰਿਣਾਹਤੋ ਸੂਚਿਦਣ੍ਡਕਪ੍ਪਮਾਣੋਪਿ ਵਟ੍ਟਤਿ, ਤਤੋ ਓਰਂ ਨ ਵਟ੍ਟਤਿ, ਪਰਂ ਦ੍ਵਾਦਸਯੋਜਨੋ ਸੁਪ੍ਪਤਿਟ੍ਠਿਤਨਿਗ੍ਰੋਧੋਪਿ ਵਟ੍ਟਤਿ. ਵਂਸਨਲ਼ਕਸਰਾਵਾਦੀਸੁ ਬੀਜਂ ਰੋਪੇਤ੍ਵਾ ਵਡ੍ਢਾਪਿਤੋ ਪਮਾਣੁਪਗੋਪਿ ਨ ਵਟ੍ਟਤਿ. ਤਤੋ ਅਪਨੇਤ੍ਵਾ ਪਨ ਤਙ੍ਖਣਮ੍ਪਿ ਭੂਮਿਯਂ ਰੋਪੇਤ੍ਵਾ ਕੋਟ੍ਠਕਂ ਕਤ੍ਵਾ ਉਦਕਂ ਆਸਿਞ੍ਚਿਤ੍ਵਾ ਕਿਤ੍ਤੇਤੁਂ ਵਟ੍ਟਤਿ. ਨਵਮੂਲਸਾਖਾਨਿਗ੍ਗਮਨਂ ਅਕਾਰਣਂ. ਖਨ੍ਧਂ ਛਿਨ੍ਦਿਤ੍ਵਾ ਰੋਪਿਤੇ ਪਨ ਏਤਂ ਯੁਜ੍ਜਤਿ. ਕਿਤ੍ਤੇਨ੍ਤੇਨ ਚ ‘‘ਰੁਕ੍ਖੋ’’ਤਿਪਿ ਵਤ੍ਤੁਂ ਵਟ੍ਟਤਿ, ‘‘ਸਾਕਰੁਕ੍ਖੋਤਿਪਿ ਸਾਲਰੁਕ੍ਖੋ’’ਤਿਪਿ. ਏਕਾਬਦ੍ਧਂ ਪਨ ਸੁਪ੍ਪਤਿਟ੍ਠਿਤਨਿਗ੍ਰੋਧਸਦਿਸਂ ਏਕਤ੍ਥ ਕਿਤ੍ਤੇਤ੍ਵਾ ਅਞ੍ਞਤ੍ਥ ਕਿਤ੍ਤੇਤੁਂ ਨ ਵਟ੍ਟਤਿ.

ਮਗ੍ਗਨਿਮਿਤ੍ਤੇ – ਅਰਞ੍ਞਖੇਤ੍ਤਨਦੀਤਲ਼ਾਕਮਗ੍ਗਾਦਯੋ ਨ ਵਟ੍ਟਨ੍ਤਿ, ਜਙ੍ਘਮਗ੍ਗੋ ਵਾ ਸਕਟਮਗ੍ਗੋ ਵਾ ਵਟ੍ਟਤਿ, ਯੋ ਨਿਬ੍ਬਿਜ੍ਝਿਤ੍ਵਾ ਦ੍ਵੇ ਤੀਣਿ ਗਾਮਨ੍ਤਰਾਨਿ ਗਚ੍ਛਤਿ. ਯੋ ਪਨ ਜਙ੍ਘਮਗ੍ਗੋ ਸਕਟਮਗ੍ਗਤੋ ਓਕ੍ਕਮਿਤ੍ਵਾ ਪੁਨ ਸਕਟਮਗ੍ਗਮੇਵ ਓਤਰਤਿ, ਯੇ ਵਾ ਜਙ੍ਘਮਗ੍ਗਸਕਟਮਗ੍ਗਾ ਅਵਲ਼ਞ੍ਜਾ, ਤੇ ਨ ਵਟ੍ਟਨ੍ਤਿ. ਜਙ੍ਘਸਤ੍ਥਸਕਟਸਤ੍ਥੇਹਿ ਵਲ਼ਞ੍ਜਿਯਮਾਨਾਯੇਵ ਵਟ੍ਟਨ੍ਤਿ. ਸਚੇ ਦ੍ਵੇ ਮਗ੍ਗਾ ਨਿਕ੍ਖਮਿਤ੍ਵਾ ਪਚ੍ਛਾ ਸਕਟਧੁਰਮਿਵ ਏਕੀਭਵਨ੍ਤਿ, ਦ੍ਵਿਧਾ ਭਿਨ੍ਨਟ੍ਠਾਨੇ ਵਾ ਸਮ੍ਬਨ੍ਧਟ੍ਠਾਨੇ ਵਾ ਸਕਿਂ ਕਿਤ੍ਤੇਤ੍ਵਾ ਪੁਨ ਨ ਕਿਤ੍ਤੇਤਬ੍ਬਾ, ਏਕਾਬਦ੍ਧਨਿਮਿਤ੍ਤਞ੍ਹੇਤਂ ਹੋਤਿ.

ਸਚੇ ਵਿਹਾਰਂ ਪਰਿਕ੍ਖਿਪਿਤ੍ਵਾ ਚਤ੍ਤਾਰੋ ਮਗ੍ਗਾ ਚਤੂਸੁ ਦਿਸਾਸੁ ਗਚ੍ਛਨ੍ਤਿ, ਮਜ੍ਝੇ ਏਕਂ ਕਿਤ੍ਤੇਤ੍ਵਾ ਅਪਰਂ ਕਿਤ੍ਤੇਤੁਂ ਨ ਵਟ੍ਟਤਿ. ਏਕਾਬਦ੍ਧਨਿਮਿਤ੍ਤਞ੍ਹੇਤਂ ਹੋਤਿ. ਕੋਣਂ ਨਿਬ੍ਬਿਜ੍ਝਿਤ੍ਵਾ ਗਤਮਗ੍ਗਂ ਪਨ ਪਰਭਾਗੇ ਕਿਤ੍ਤੇਤੁਂ ਵਟ੍ਟਤਿ. ਵਿਹਾਰਮਜ੍ਝੇਨ ਨਿਬ੍ਬਿਜ੍ਝਿਤ੍ਵਾ ਗਤਮਗ੍ਗੋ ਪਨ ਨ ਕਿਤ੍ਤੇਤਬ੍ਬੋ. ਕਿਤ੍ਤਿਤੇ ਨਿਮਿਤ੍ਤਸ੍ਸ ਉਪਰਿ ਵਿਹਾਰੋ ਹੋਤਿ. ਸਚੇ ਸਕਟਮਗ੍ਗਸ੍ਸ ਅਨ੍ਤਿਮਚਕ੍ਕਮਗ੍ਗਂ ਨਿਮਿਤ੍ਤਂ ਕਰੋਨ੍ਤਿ, ਮਗ੍ਗੋ ਬਹਿਸੀਮਾਯ ਹੋਤਿ. ਸਚੇ ਬਾਹਿਰਚਕ੍ਕਮਗ੍ਗਂ ਨਿਮਿਤ੍ਤਂ ਕਰੋਨ੍ਤਿ, ਬਾਹਿਰਚਕ੍ਕਮਗ੍ਗੋਵ ਬਹਿਸੀਮਾਯ ਹੋਤਿ, ਸੇਸਂ ਅਨ੍ਤੋਸੀਮਂ ਭਜਤਿ. ਮਗ੍ਗਂ ਕਿਤ੍ਤੇਨ੍ਤੇਨ ‘‘ਮਗ੍ਗੋ ਪਨ੍ਥੋ ਪਥੋ ਪਜ੍ਜੋ’’ਤਿ ਦਸਸੁ ਯੇਨ ਕੇਨਚਿ ਨਾਮੇਨ ਕਿਤ੍ਤੇਤੁਂ ਵਟ੍ਟਤਿ. ਪਰਿਖਾਸਣ੍ਠਾਨੇਨ ਵਿਹਾਰਂ ਪਰਿਕ੍ਖਿਪਿਤ੍ਵਾ ਗਤਮਗ੍ਗੋ ਏਕਤ੍ਥ ਕਿਤ੍ਤੇਤ੍ਵਾ ਅਞ੍ਞਤ੍ਥ ਕਿਤ੍ਤੇਤੁਂ ਨ ਵਟ੍ਟਤਿ.

ਵਮ੍ਮਿਕਨਿਮਿਤ੍ਤੇ – ਹੇਟ੍ਠਿਮਪਰਿਚ੍ਛੇਦੇਨ ਤਂ ਦਿਵਸਂ ਜਾਤੋ ਅਟ੍ਠਙ੍ਗੁਲੁਬ੍ਬੇਧੋ ਗੋਵਿਸਾਣਪ੍ਪਮਾਣੋਪਿ ਵਮ੍ਮਿਕੋ ਵਟ੍ਟਤਿ, ਤਤੋ ਓਰਂ ਨ ਵਟ੍ਟਤਿ, ਪਰਂ ਹਿਮਵਨ੍ਤਪਬ੍ਬਤਸਦਿਸੋਪਿ ਵਟ੍ਟਤਿ. ਵਿਹਾਰਂ ਪਰਿਕ੍ਖਿਪਿਤ੍ਵਾ ਠਿਤਂ ਪਨ ਏਕਾਬਦ੍ਧਂ ਏਕਤ੍ਥ ਕਿਤ੍ਤੇਤ੍ਵਾ ਅਞ੍ਞਤ੍ਥ ਕਿਤ੍ਤੇਤੁਂ ਨ ਵਟ੍ਟਤਿ.

ਨਦੀਨਿਮਿਤ੍ਤੇ – ਯਸ੍ਸਾ ਧਮ੍ਮਿਕਾਨਂ ਰਾਜੂਨਂ ਕਾਲੇ ਅਨ੍ਵਦ੍ਧਮਾਸਂ ਅਨੁਦਸਾਹਂ ਅਨੁਪਞ੍ਚਾਹਨ੍ਤਿ ਏਵਂ ਅਨਤਿਕ੍ਕਮਿਤ੍ਵਾ ਦੇਵੇ ਵਸ੍ਸਨ੍ਤੇ ਵਲਾਹਕੇਸੁ ਵਿਗਤਮਤ੍ਤੇਸੁ ਸੋਤਂ ਪਚ੍ਛਿਜ੍ਜਤਿ, ਅਯਂ ਨਦੀਸਙ੍ਖ੍ਯਂ ਨ ਗਚ੍ਛਤਿ. ਯਸ੍ਸਾ ਪਨ ਈਦਿਸੇ ਸੁਵੁਟ੍ਠਿਕਾਲੇ ਵਸ੍ਸਾਨਸ੍ਸ ਚਾਤੁਮਾਸੇ ਸੋਤਂ ਨ ਪਚ੍ਛਿਜ੍ਜਤਿ, ਤਿਮਣ੍ਡਲਂ ਪਟਿਚ੍ਛਾਦੇਤ੍ਵਾ ਯਤ੍ਥ ਕਤ੍ਥਚਿ ਉਤ੍ਤਰਨ੍ਤਿਯਾ ਭਿਕ੍ਖੁਨਿਯਾ ਅਨ੍ਤਰਵਾਸਕੋ ਤੇਮਿਯਤਿ, ਅਯਂ ਨਦੀਸਙ੍ਖ੍ਯਂ ਗਚ੍ਛਤਿ, ਸੀਮਂ ਬਨ੍ਧਨ੍ਤਾਨਂ ਨਿਮਿਤ੍ਤਂ ਹੋਤਿ. ਭਿਕ੍ਖੁਨਿਯਾ ਨਦੀਪਾਰਗਮਨੇਪਿ ਉਪੋਸਥਾਦਿਸਙ੍ਘਕਮ੍ਮਕਰਣੇਪਿ ਨਦੀਪਾਰਸੀਮਸਮ੍ਮਨ੍ਨਨੇਪਿ ਅਯਮੇਵ ਨਦੀ.

ਯਾ ਪਨ ਮਗ੍ਗੋ ਵਿਯ ਸਕਟਧੁਰਸਣ੍ਠਾਨੇਨ ਵਾ ਪਰਿਖਾਸਣ੍ਠਾਨੇਨ ਵਾ ਵਿਹਾਰਂ ਪਰਿਕ੍ਖਿਪਿਤ੍ਵਾ ਗਤਾ, ਤਂ ਏਕਤ੍ਥ ਕਿਤ੍ਤੇਤ੍ਵਾ ਅਞ੍ਞਤ੍ਥ ਕਿਤ੍ਤੇਤੁਂ ਨ ਵਟ੍ਟਤਿ. ਵਿਹਾਰਸ੍ਸ ਚਤੂਸੁ ਦਿਸਾਸੁ ਅਞ੍ਞਮਞ੍ਞਂ ਵਿਨਿਬ੍ਬਿਜ੍ਝਿਤ੍ਵਾ ਗਤੇ ਨਦਿਚਤੁਕ੍ਕੇਪਿ ਏਸੇਵ ਨਯੋ. ਅਸਮ੍ਮਿਸ੍ਸਨਦਿਯੋ ਪਨ ਚਤਸ੍ਸੋਪਿ ਕਿਤ੍ਤੇਤੁਂ ਵਟ੍ਟਤਿ. ਸਚੇ ਵਤਿਂ ਕਰੋਨ੍ਤੋ ਵਿਯ ਰੁਕ੍ਖਪਾਦੇ ਨਿਖਣਿਤ੍ਵਾ ਵਲ੍ਲਿਪਲਾਲਾਦੀਹਿ ਨਦਿਸੋਤਂ ਰੁਮ੍ਭਨ੍ਤਿ, ਉਦਕਞ੍ਚ ਅਜ੍ਝੋਤ੍ਥਰਿਤ੍ਵਾ ਆਵਰਣਂ ਪਵਤ੍ਤਤਿਯੇਵ, ਨਿਮਿਤ੍ਤਂ ਕਾਤੁਂ ਵਟ੍ਟਤਿ. ਯਥਾ ਪਨ ਉਦਕਂ ਨਪ੍ਪਵਤ੍ਤਤਿ, ਏਵਂ ਸੇਤੁਮ੍ਹਿ ਕਤੇ ਅਪ੍ਪਵਤ੍ਤਮਾਨਾ ਨਦੀ ਨਿਮਿਤ੍ਤਂ ਕਾਤੁਂ ਨ ਵਟ੍ਟਤਿ. ਪਵਤ੍ਤਨਟ੍ਠਾਨੇ ਨਦਿਨਿਮਿਤ੍ਤਂ, ਅਪ੍ਪਵਤ੍ਤਨਟ੍ਠਾਨੇ ਉਦਕਨਿਮਿਤ੍ਤਂ ਕਾਤੁਂ ਵਟ੍ਟਤਿ.

ਯਾ ਪਨ ਦੁਬ੍ਬੁਟ੍ਠਿਕਾਲੇ ਵਾ ਗਿਮ੍ਹੇ ਵਾ ਨਿਰੁਦਕਭਾਵੇਨ ਨਪ੍ਪਵਤ੍ਤਤਿ, ਸਾ ਵਟ੍ਟਤਿ. ਮਹਾਨਦਿਤੋ ਉਦਕਮਾਤਿਕਂ ਨੀਹਰਨ੍ਤਿ, ਸਾ ਕੁਨ੍ਨਦਿਸਦਿਸਾ ਹੁਤ੍ਵਾ ਤੀਣਿ ਸਸ੍ਸਾਨਿ ਸਮ੍ਪਾਦੇਨ੍ਤੀ ਨਿਚ੍ਚਂ ਪਵਤ੍ਤਤਿ, ਕਿਞ੍ਚਾਪਿ ਪਵਤ੍ਤਤਿ, ਨਿਮਿਤ੍ਤਂ ਕਾਤੁਂ ਨ ਵਟ੍ਟਤਿ. ਯਾ ਪਨ ਮੂਲੇ ਮਹਾਨਦਿਤੋ ਨਿਗ੍ਗਤਾਪਿ ਕਾਲਨ੍ਤਰੇਨ ਤੇਨੇਵ ਨਿਗ੍ਗਤਮਗ੍ਗੇਨ ਨਦਿਂ ਭਿਨ੍ਦਿਤ੍ਵਾ ਸਯਞ੍ਚ ਗਚ੍ਛਤਿ, ਗਚ੍ਛਨ੍ਤੀ ਪਰਤੋ ਸੁਸੁਮਾਰਾਦਿਸਮਾਕਿਣ੍ਣਾ ਨਾਵਾਦੀਹਿ ਸਞ੍ਚਰਿਤਬ੍ਬਾ ਨਦੀ ਹੋਤਿ, ਤਂ ਨਿਮਿਤ੍ਤਂ ਕਾਤੁਂ ਵਟ੍ਟਤਿ.

ਉਦਕਨਿਮਿਤ੍ਤੇ – ਨਿਰੁਦਕੇ ਠਾਨੇ ਨਾਵਾਯ ਵਾ ਚਾਟਿਆਦੀਸੁ ਵਾ ਉਦਕਂ ਪੂਰੇਤ੍ਵਾ ਉਦਕਨਿਮਿਤ੍ਤਂ ਕਿਤ੍ਤੇਤੁਂ ਨ ਵਟ੍ਟਤਿ, ਭੂਮਿਗਤਮੇਵ ਵਟ੍ਟਤਿ. ਤਞ੍ਚ ਖੋ ਅਪ੍ਪਵਤ੍ਤਨਉਦਕਂ ਆਵਾਟਪੋਕ੍ਖਰਣਿਤਲ਼ਾਕਜਾਤਸ੍ਸਰਲੋਣਿਸਮੁਦ੍ਦਾਦੀਸੁ ਠਿਤਂ, ਅਟ੍ਠਿਤਂ ਪਨ ਓਘਨਦਿਉਦਕਵਾਹਕਮਾਤਿਕਾਦੀਸੁ ਉਦਕਂ ਨ ਵਟ੍ਟਤਿ. ਅਨ੍ਧਕਟ੍ਠਕਥਾਯਂ ਪਨ ‘‘ਗਮ੍ਭੀਰੇਸੁ ਆਵਾਟਾਦੀਸੁ ਉਕ੍ਖੇਪਿਮਂ ਉਦਕਂ ਨਿਮਿਤ੍ਤਂ ਨ ਕਾਤਬ੍ਬ’’ਨ੍ਤਿ ਵੁਤ੍ਤਂ, ਤਂ ਦੁਵੁਤ੍ਤਂ ਅਤ੍ਤਨੋਮਤਿਮਤ੍ਤਮੇਵ. ਠਿਤਂ ਪਨ ਅਨ੍ਤਮਸੋ ਸੂਕਰਖਤਾਯਪਿ ਗਾਮਦਾਰਕਾਨਂ ਕੀਲ਼ਨਵਾਪਿਯਮ੍ਪਿ ਤਙ੍ਖਣਞ੍ਞੇਵ ਪਥਵਿਯਂ ਆਵਾਟਕਂ ਕਤ੍ਵਾ ਕੁਟੇਹਿ ਆਹਰਿਤ੍ਵਾ ਪੂਰਿਤਉਦਕਮ੍ਪਿ ਸਚੇ ਯਾਵ ਕਮ੍ਮਵਾਚਾਪਰਿਯੋਸਾਨਾ ਤਿਟ੍ਠਤਿ, ਅਪ੍ਪਂ ਵਾ ਹੋਤੁ ਬਹੁ ਵਾ, ਵਟ੍ਟਤਿ. ਤਸ੍ਮਿਂ ਪਨ ਠਾਨੇ ਨਿਮਿਤ੍ਤਸਞ੍ਞਾਕਰਣਤ੍ਥਂ ਪਾਸਾਣਵਾਲਿਕਾਪਂਸੁਆਦਿਰਾਸਿ ਵਾ ਪਾਸਾਣਤ੍ਥਮ੍ਭੋ ਵਾ ਦਾਰੁਤ੍ਥਮ੍ਭੋ ਵਾ ਕਾਤਬ੍ਬੋ. ਤਂ ਕਾਤੁਞ੍ਚ ਕਾਰੇਤੁਞ੍ਚ ਭਿਕ੍ਖੁਸ੍ਸ ਵਟ੍ਟਤਿ. ਲਾਭਸੀਮਾਯਂ ਪਨ ਨ ਵਟ੍ਟਤਿ. ਸਮਾਨਸਂਵਾਸਕਸੀਮਾ ਕਸ੍ਸਚਿ ਪੀਲ਼ਨਂ ਨ ਕਰੋਤਿ, ਕੇਵਲਂ ਭਿਕ੍ਖੂਨਂ ਵਿਨਯਕਮ੍ਮਮੇਵ ਸਾਧੇਤਿ, ਤਸ੍ਮਾ ਏਤ੍ਥ ਵਟ੍ਟਤਿ.

ਇਮੇਹਿ ਚ ਅਟ੍ਠਹਿ ਨਿਮਿਤ੍ਤੇਹਿ ਅਸਮ੍ਮਿਸ੍ਸੇਹਿਪਿ ਅਞ੍ਞਮਞ੍ਞਂ ਸਮ੍ਮਿਸ੍ਸੇਹਿਪਿ ਸੀਮਂ ਸਮ੍ਮਨ੍ਨਿਤੁਂ ਵਟ੍ਟਤਿਯੇਵ. ਸਾ ਏਵਂ ਸਮ੍ਮਨ੍ਨਿਤ੍ਵਾ ਬਜ੍ਝਮਾਨਾ ਏਕੇਨ ਦ੍ਵੀਹਿ ਵਾ ਨਿਮਿਤ੍ਤੇਹਿ ਅਬਦ੍ਧਾ ਹੋਤਿ, ਤੀਣਿ ਪਨ ਆਦਿਂ ਕਤ੍ਵਾ ਵੁਤ੍ਤਪ੍ਪਕਾਰਾਨਂ ਨਿਮਿਤ੍ਤਾਨਂ ਸਤੇਨਾਪਿ ਬਦ੍ਧਾ ਹੋਤਿ. ਸਾ ਤੀਹਿ ਸਿਙ੍ਘਾਟਕਸਣ੍ਠਾਨਾ ਹੋਤਿ, ਚਤੂਹਿ ਚਤੁਰਸ੍ਸਾ ਵਾ ਸਿਙ੍ਘਾਟਕਅਡ੍ਢਚਨ੍ਦਮੁਦਿਙ੍ਗਾਦਿਸਣ੍ਠਾਨਾ ਵਾ, ਤਤੋ ਅਧਿਕੇਹਿ ਨਾਨਾਸਣ੍ਠਾਨਾ. ਤਂ ਬਨ੍ਧਿਤੁਕਾਮੇਹਿ ਸਾਮਨ੍ਤਵਿਹਾਰੇਸੁ ਭਿਕ੍ਖੂ ਤਸ੍ਸ ਤਸ੍ਸ ਵਿਹਾਰਸ੍ਸ ਸੀਮਾਪਰਿਚ੍ਛੇਦਂ ਪੁਚ੍ਛਿਤ੍ਵਾ, ਬਦ੍ਧਸੀਮਵਿਹਾਰਾਨਂ ਸੀਮਾਯ ਸੀਮਨ੍ਤਰਿਕਂ, ਅਬਦ੍ਧਸੀਮਵਿਹਾਰਾਨਂ ਸੀਮਾਯ ਉਪਚਾਰਂ ਠਪੇਤ੍ਵਾ ਦਿਸਾਚਾਰਿਕਭਿਕ੍ਖੂਨਂ ਨਿਸ੍ਸਞ੍ਚਾਰਸਮਯੇ ਸਚੇ ਏਕਸ੍ਮਿਂ ਗਾਮਖੇਤ੍ਤੇ ਸੀਮਂ ਬਨ੍ਧਿਤੁਕਾਮਾ, ਯੇ ਤਤ੍ਥ ਬਦ੍ਧਸੀਮਵਿਹਾਰਾ, ਤੇਸੁ ਭਿਕ੍ਖੂਨਂ ‘‘ਮਯਂ ਅਜ੍ਜ ਸੀਮਂ ਬਨ੍ਧਿਸ੍ਸਾਮ, ਤੁਮ੍ਹੇ ਸਕਸੀਮਾਪਰਿਚ੍ਛੇਦਤੋ ਮਾ ਨਿਕ੍ਖਮਿਤ੍ਥਾ’’ਤਿ ਪੇਸੇਤਬ੍ਬਂ. ਯੇ ਅਬਦ੍ਧਸੀਮਵਿਹਾਰਾ, ਤੇਸੁ ਭਿਕ੍ਖੂ ਏਕਜ੍ਝਂ ਸਨ੍ਨਿਪਾਤੇਤਬ੍ਬਾ, ਛਨ੍ਦਾਰਹਾਨਂ ਛਨ੍ਦੋ ਆਹਰਾਪੇਤਬ੍ਬੋ. ਸਚੇ ਅਞ੍ਞਾਨਿਪਿ ਗਾਮਕ੍ਖੇਤ੍ਤਾਨਿ ਅਨ੍ਤੋਕਾਤੁਕਾਮਾ, ਤੇਸੁ ਗਾਮੇਸੁ ਯੇ ਭਿਕ੍ਖੂ ਵਸਨ੍ਤਿ, ਤੇਹਿਪਿ ਆਗਨ੍ਤਬ੍ਬਂ. ਅਨਾਗਚ੍ਛਨ੍ਤਾਨਂ ਛਨ੍ਦੋ ਆਹਰਿਤਬ੍ਬੋਤਿ ਮਹਾਸੁਮਤ੍ਥੇਰੋ ਆਹ. ਮਹਾਪਦੁਮਤ੍ਥੇਰੋ ਪਨ ‘‘ਨਾਨਾਗਾਮਖੇਤ੍ਤਾਨਿ ਨਾਮ ਪਾਟੇਕ੍ਕਂ ਬਦ੍ਧਸੀਮਾਸਦਿਸਾਨਿ, ਨ ਤਤੋ ਛਨ੍ਦਪਾਰਿਸੁਦ੍ਧਿ ਆਗਚ੍ਛਤਿ. ਅਨ੍ਤੋਨਿਮਿਤ੍ਤਗਤੇਹਿ ਪਨ ਭਿਕ੍ਖੂਹਿ ਆਗਨ੍ਤਬ੍ਬ’’ਨ੍ਤਿ ਵਤ੍ਵਾ ਪੁਨ ਆਹ – ‘‘ਸਮਾਨਸਂਵਾਸਕਸੀਮਾਸਮ੍ਮਨ੍ਨਨਕਾਲੇ ਆਗਮਨਮ੍ਪਿ ਅਨਾਗਮਨਮ੍ਪਿ ਵਟ੍ਟਤਿ. ਅਵਿਪ੍ਪਵਾਸਸੀਮਾਸਮ੍ਮਨ੍ਨਨਕਾਲੇ ਪਨ ਅਨ੍ਤੋਨਿਮਿਤ੍ਤਗਤੇਹਿ ਆਗਨ੍ਤਬ੍ਬਂ, ਅਨਾਗਚ੍ਛਨ੍ਤਾਨਂ ਛਨ੍ਦੋ ਆਹਰਿਤਬ੍ਬੋ’’ਤਿ.

ਏਵਂ ਸਨ੍ਨਿਪਤਿਤੇਸੁ ਪਨ ਭਿਕ੍ਖੂਸੁ ਛਨ੍ਦਾਰਹਾਨਂ ਛਨ੍ਦੇ ਆਹਟੇ ਤੇਸੁ ਤੇਸੁ ਮਗ੍ਗੇਸੁ ਨਦੀਤਿਤ੍ਥਗਾਮਦ੍ਵਾਰਾਦੀਸੁ ਚ ਆਗਨ੍ਤੁਕਭਿਕ੍ਖੂਨਂ ਸੀਘਂ ਸੀਘਂ ਹਤ੍ਥਪਾਸਾਨਯਨਤ੍ਥਞ੍ਚ ਬਹਿਸੀਮਾਕਰਣਤ੍ਥਞ੍ਚ ਆਰਾਮਿਕੇ ਚੇਵ ਸਮਣੁਦ੍ਦੇਸੇ ਚ ਠਪੇਤ੍ਵਾ ਭੇਰਿਸਞ੍ਞਂ ਵਾ ਸਙ੍ਖਸਞ੍ਞਂ ਵਾ ਕਤ੍ਵਾ ਨਿਮਿਤ੍ਤਕਿਤ੍ਤਨਾਨਨ੍ਤਰਂ ਵੁਤ੍ਤਾਯ ‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ’’ਤਿਆਦਿਕਾਯ ਕਮ੍ਮਵਾਚਾਯ ਸੀਮਾ ਬਨ੍ਧਿਤਬ੍ਬਾ. ਕਮ੍ਮਵਾਚਾਪਰਿਯੋਸਾਨੇਯੇਵ ਨਿਮਿਤ੍ਤਾਨਿ ਬਹਿ ਕਤ੍ਵਾ ਹੇਟ੍ਠਾ ਪਥਵਿਸਨ੍ਧਾਰਕਂ ਉਦਕਂ ਪਰਿਯਨ੍ਤਂ ਕਤ੍ਵਾ ਸੀਮਾ ਗਤਾ ਹੋਤਿ.

ਇਮਂ ਪਨ ਸਮਾਨਸਂਵਾਸਕਸੀਮਂ ਸਮ੍ਮਨ੍ਨਨ੍ਤੇਹਿ ਪਬ੍ਬਜ੍ਜੁਪਸਮ੍ਪਦਾਦੀਨਂ ਸਙ੍ਘਕਮ੍ਮਾਨਂ ਸੁਖਕਰਣਤ੍ਥਂ ਪਠਮਂ ਖਣ੍ਡਸੀਮਾ ਬਨ੍ਧਿਤਬ੍ਬਾ. ਤਂ ਪਨ ਬਨ੍ਧਨ੍ਤੇਹਿ ਵਤ੍ਤਂ ਜਾਨਿਤਬ੍ਬਂ. ਸਚੇ ਹਿ ਬੋਧਿਚੇਤਿਯਭਤ੍ਤਸਾਲਾਦੀਨਿ ਸਬ੍ਬਵਤ੍ਥੂਨਿ ਪਤਿਟ੍ਠਾਪੇਤ੍ਵਾ ਕਤਵਿਹਾਰੇ ਬਨ੍ਧਨ੍ਤਿ, ਵਿਹਾਰਮਜ੍ਝੇ ਬਹੂਨਂ ਸਮੋਸਰਣਟ੍ਠਾਨੇ ਅਬਨ੍ਧਿਤ੍ਵਾ ਵਿਹਾਰਪਚ੍ਚਨ੍ਤੇ ਵਿਵਿਤ੍ਤੋਕਾਸੇ ਬਨ੍ਧਿਤਬ੍ਬਾ. ਅਕਤਵਿਹਾਰੇ ਬਨ੍ਧਨ੍ਤੇਹਿ ਬੋਧਿਚੇਤਿਯਾਦੀਨਂ ਸਬ੍ਬਵਤ੍ਥੂਨਂ ਠਾਨਂ ਸਲ੍ਲਕ੍ਖੇਤ੍ਵਾ ਯਥਾ ਪਤਿਟ੍ਠਿਤੇਸੁ ਵਤ੍ਥੂਸੁ ਵਿਹਾਰਪਚ੍ਚਨ੍ਤੇ ਵਿਵਿਤ੍ਤੋਕਾਸੇ ਹੋਤਿ, ਏਵਂ ਬਨ੍ਧਿਤਬ੍ਬਾ. ਸਾ ਹੇਟ੍ਠਿਮਪਰਿਚ੍ਛੇਦੇਨ ਸਚੇ ਏਕਵੀਸਤਿ ਭਿਕ੍ਖੂ ਗਣ੍ਹਾਤਿ, ਵਟ੍ਟਤਿ. ਤਤੋ ਓਰਂ ਨ ਵਟ੍ਟਤਿ, ਪਰਂ ਭਿਕ੍ਖੁਸਹਸ੍ਸਂ ਗਣ੍ਹਨ੍ਤੀਪਿ ਵਟ੍ਟਤਿ. ਤਂ ਬਨ੍ਧਨ੍ਤੇਹਿ ਸੀਮਾਮਾਲ਼ਕਸ੍ਸ ਸਮਨ੍ਤਾ ਨਿਮਿਤ੍ਤੁਪਗਾ ਪਾਸਾਣਾ ਠਪੇਤਬ੍ਬਾ, ਨ ਖਣ੍ਡਸੀਮਾਯ ਠਿਤੇਹਿ ਮਹਾਸੀਮਾ ਬਨ੍ਧਿਤਬ੍ਬਾ, ਨ ਮਹਾਸੀਮਾਯ ਠਿਤੇਹਿ ਖਣ੍ਡਸੀਮਾ, ਖਣ੍ਡਸੀਮਾਯਮੇਵ ਪਨ ਠਤ੍ਵਾ ਖਣ੍ਡਸੀਮਾ ਬਨ੍ਧਿਤਬ੍ਬਾ, ਮਹਾਸੀਮਾਯਮੇਵ ਠਤ੍ਵਾ ਮਹਾਸੀਮਾ.

ਤਤ੍ਰਾਯਂ ਬਨ੍ਧਨਵਿਧਿ – ਸਮਨ੍ਤਾ ‘‘ਏਸੋ ਪਾਸਾਣੋ ਨਿਮਿਤ੍ਤ’’ਨ੍ਤਿ ਏਵਂ ਨਿਮਿਤ੍ਤਾਨਿ ਕਿਤ੍ਤੇਤ੍ਵਾ ਕਮ੍ਮਵਾਚਾਯ ਸੀਮਾ ਸਮ੍ਮਨ੍ਨਿਤਬ੍ਬਾ. ਅਥ ਤਸ੍ਸਾ ਏਵ ਦਲ਼੍ਹੀਕਮ੍ਮਤ੍ਥਂ ਅਵਿਪ੍ਪਵਾਸਕਮ੍ਮਵਾਚਾ ਕਾਤਬ੍ਬਾ. ਏਵਞ੍ਹਿ ਸੀਮਂ ਸਮੂਹਨਿਸ੍ਸਾਮਾਤਿ ਆਗਤਾ ਸਮੂਹਨਿਤੁਂ ਨ ਸਕ੍ਖਿਸ੍ਸਨ੍ਤਿ. ਸੀਮਂ ਸਮ੍ਮਨ੍ਨਿਤ੍ਵਾ ਬਹਿਸੀਮਨ੍ਤਰਿਕਪਾਸਾਣਾ ਠਪੇਤਬ੍ਬਾ. ਸੀਮਨ੍ਤਰਿਕਾ ਪਚ੍ਛਿਮਕੋਟਿਯਾ ਏਕਰਤਨਪ੍ਪਮਾਣਾ ਵਟ੍ਟਤਿ. ਵਿਦਤ੍ਥਿਪ੍ਪਮਾਣਾਪਿ ਵਟ੍ਟਤੀਤਿ ਕੁਰੁਨ੍ਦਿਯਂ, ਚਤੁਰਙ੍ਗੁਲਪ੍ਪਮਾਣਾਪਿ ਵਟ੍ਟਤੀਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਸਚੇ ਪਨ ਵਿਹਾਰੋ ਮਹਾ ਹੋਤਿ, ਦ੍ਵੇਪਿ ਤਿਸ੍ਸੋਪਿ ਤਤੁਤ੍ਤਰਿਪਿ ਖਣ੍ਡਸੀਮਾਯੋ ਬਨ੍ਧਿਤਬ੍ਬਾ.

ਏਵਂ ਖਣ੍ਡਸੀਮਂ ਸਮ੍ਮਨ੍ਨਿਤ੍ਵਾ ਮਹਾਸੀਮਾਸਮ੍ਮੁਤਿਕਾਲੇ ਖਣ੍ਡਸੀਮਤੋ ਨਿਕ੍ਖਮਿਤ੍ਵਾ ਮਹਾਸੀਮਾਯ ਠਤ੍ਵਾ ਸਮਨ੍ਤਾ ਅਨੁਪਰਿਯਾਯਨ੍ਤੇਹਿ ਸੀਮਨ੍ਤਰਿਕਪਾਸਾਣਾ ਕਿਤ੍ਤੇਤਬ੍ਬਾ. ਤਤੋ ਅਵਸੇਸਨਿਮਿਤ੍ਤਾਨਿ ਕਿਤ੍ਤੇਤ੍ਵਾ ਹਤ੍ਥਪਾਸਂ ਅਵਿਜਹਨ੍ਤੇਹਿ ਕਮ੍ਮਵਾਚਾਯ ਸਮਾਨਸਂਵਾਸਕਸੀਮਂ ਸਮ੍ਮਨ੍ਨਿਤ੍ਵਾ ਤਸ੍ਸਾ ਦਲ਼੍ਹੀਕਮ੍ਮਤ੍ਥਂ ਅਵਿਪ੍ਪਵਾਸਕਮ੍ਮਵਾਚਾਪਿ ਕਾਤਬ੍ਬਾ. ਏਵਞ੍ਹਿ ‘‘ਸੀਮਂ ਸਮੂਹਨਿਸ੍ਸਾਮਾ’’ਤਿ ਆਗਤਾ ਸਮੂਹਨਿਤੁਂ ਨ ਸਕ੍ਖਿਸ੍ਸਨ੍ਤਿ. ਸਚੇ ਪਨ ਖਣ੍ਡਸੀਮਾਯ ਨਿਮਿਤ੍ਤਾਨਿ ਕਿਤ੍ਤੇਤ੍ਵਾ ਤਤੋ ਸੀਮਨ੍ਤਰਿਕਾਯ ਨਿਮਿਤ੍ਤਾਨਿ ਕਿਤ੍ਤੇਤ੍ਵਾ ਮਹਾਸੀਮਾਯ ਨਿਮਿਤ੍ਤਾਨਿ ਕਿਤ੍ਤੇਨ੍ਤਿ, ਏਵਂ ਤੀਸੁ ਠਾਨੇਸੁ ਨਿਮਿਤ੍ਤਾਨਿ ਕਿਤ੍ਤੇਤ੍ਵਾ ਯਂ ਸੀਮਂ ਇਚ੍ਛਨ੍ਤਿ, ਤਂ ਪਠਮਂ ਬਨ੍ਧਿਤੁਂ ਵਟ੍ਟਤਿ. ਏਵਂ ਸਨ੍ਤੇਪਿ ਯਥਾਵੁਤ੍ਤੇਨਯੇਨ ਖਣ੍ਡਸੀਮਤੋਵ ਪਟ੍ਠਾਯ ਬਨ੍ਧਿਤਬ੍ਬਾ. ਏਵਂ ਬਦ੍ਧਾਸੁ ਪਨ ਸੀਮਾਸੁ ਖਣ੍ਡਸੀਮਾਯ ਠਿਤਾ ਭਿਕ੍ਖੂ ਮਹਾਸੀਮਾਯ ਕਮ੍ਮਂ ਕਰੋਨ੍ਤਾਨਂ ਨ ਕੋਪੇਨ੍ਤਿ, ਮਹਾਸੀਮਾਯ ਵਾ ਠਿਤਾ ਖਣ੍ਡਸੀਮਾਯ ਕਮ੍ਮਂ ਕਰੋਨ੍ਤਾਨਂ ਸੀਮਨ੍ਤਰਿਕਾਯ ਪਨ ਠਿਤਾ ਉਭਿਨ੍ਨਮ੍ਪਿ ਨ ਕੋਪੇਨ੍ਤਿ. ਗਾਮਖੇਤ੍ਤੇ ਠਤ੍ਵਾ ਕਮ੍ਮਂ ਕਰੋਨ੍ਤਾਨਂ ਪਨ ਸੀਮਨ੍ਤਰਿਕਾਯ ਠਿਤਾ ਕੋਪੇਨ੍ਤਿ. ਸੀਮਨ੍ਤਰਿਕਾ ਹਿ ਗਾਮਖੇਤ੍ਤਂ ਭਜਤਿ.

ਸੀਮਾ ਚ ਨਾਮੇਸਾ ਨ ਕੇਵਲਂ ਪਥਵਿਤਲੇਯੇਵ ਬਦ੍ਧਾ ਬਦ੍ਧਾ ਨਾਮ ਹੋਤਿ. ਅਥ ਖੋ ਪਿਟ੍ਠਿਪਾਸਾਣੇਪਿ ਕੁਟਿਗੇਹੇਪਿ ਲੇਣੇਪਿ ਪਾਸਾਦੇਪਿ ਪਬ੍ਬਤਮਤ੍ਥਕੇਪਿ ਬਦ੍ਧਾ ਬਦ੍ਧਾਯੇਵ ਹੋਤਿ. ਤਤ੍ਥ ਪਿਟ੍ਠਿਪਾਸਾਣੇ ਬਨ੍ਧਨ੍ਤੇਹਿ ਪਾਸਾਣਪਿਟ੍ਠਿਯਂ ਰਾਜਿਂ ਵਾ ਕੋਟ੍ਟੇਤ੍ਵਾ ਉਦੁਕ੍ਖਲਂ ਵਾ ਖਣਿਤ੍ਵਾ ਨਿਮਿਤ੍ਤਂ ਨ ਕਾਤਬ੍ਬਂ, ਨਿਮਿਤ੍ਤੁਪਗਪਾਸਾਣੇ ਠਪੇਤ੍ਵਾ ਨਿਮਿਤ੍ਤਾਨਿ ਕਿਤ੍ਤੇਤਬ੍ਬਾਨਿ. ਕਮ੍ਮਵਾਚਾਪਰਿਯੋਸਾਨੇ ਸੀਮਾ ਪਥਵਿਸਨ੍ਧਾਰਕਂ ਉਦਕਂ ਪਰਿਯਨ੍ਤਂ ਕਤ੍ਵਾ ਓਤਰਤਿ. ਨਿਮਿਤ੍ਤਪਾਸਾਣਾ ਯਥਾਠਾਨੇ ਨ ਤਿਟ੍ਠਨ੍ਤਿ, ਤਸ੍ਮਾ ਸਮਨ੍ਤਤੋ ਰਾਜਿ ਵਾ ਉਟ੍ਠਾਪੇਤਬ੍ਬਾ, ਚਤੂਸੁ ਵਾ ਕੋਣੇਸੁ ਪਾਸਾਣਾ ਵਿਜ੍ਝਿਤਬ੍ਬਾ, ‘‘ਅਯਂ ਸੀਮਾਪਰਿਚ੍ਛੇਦੋ’’ਤਿ ਵਤ੍ਵਾ ਅਕ੍ਖਰਾਨਿ ਵਾ ਛਿਨ੍ਦਿਤਬ੍ਬਾਨਿ. ਕੇਚਿ ਉਸੂਯਕਾ ਸੀਮਂ ਝਾਪੇਸ੍ਸਾਮਾਤਿ ਅਗ੍ਗਿਂ ਦੇਨ੍ਤਿ, ਪਾਸਾਣਾਵ ਝਾਯਨ੍ਤਿ, ਨ ਸੀਮਾ.

ਕੁਟਿਗੇਹੇਪਿ ਬਨ੍ਧਨ੍ਤੇਹਿ ਭਿਤ੍ਤਿਂ ਅਕਿਤ੍ਤੇਤ੍ਵਾ ਏਕਵੀਸਤਿਯਾ ਭਿਕ੍ਖੂਨਂ ਓਕਾਸਟ੍ਠਾਨਂ ਅਨ੍ਤੋ ਕਰਿਤ੍ਵਾ ਪਾਸਾਣਨਿਮਿਤ੍ਤਾਨਿ ਠਪੇਤ੍ਵਾ ਸੀਮਾ ਸਮ੍ਮਨ੍ਨਿਤਬ੍ਬਾ, ਅਨ੍ਤੋਕੁਟ੍ਟਮੇਵ ਸੀਮਾ ਹੋਤਿ. ਸਚੇ ਅਨ੍ਤੋਕੁਟ੍ਟੇ ਏਕਵੀਸਤਿਯਾ ਭਿਕ੍ਖੂਨਂ ਓਕਾਸੋ ਨਤ੍ਥਿ, ਪਮੁਖੇ ਨਿਮਿਤ੍ਤਪਾਸਾਣੇ ਠਪੇਤ੍ਵਾ ਸਮ੍ਮਨ੍ਨਿਤਬ੍ਬਾ. ਸਚੇ ਏਵਮ੍ਪਿ ਨਪ੍ਪਹੋਤਿ, ਬਹਿਨਿਬ੍ਬੋਦਕਪਤਨਟ੍ਠਾਨੇਪਿ ਨਿਮਿਤ੍ਤਾਨਿ ਠਪੇਤ੍ਵਾ ਸਮ੍ਮਨ੍ਨਿਤਬ੍ਬਾ. ਏਵਂ ਸਮ੍ਮਤਾਯ ਪਨ ਸਬ੍ਬਂ ਕੁਟਿਗੇਹਂ ਸੀਮਟ੍ਠਮੇਵ ਹੋਤਿ.

ਚਤੁਭਿਤ੍ਤਿਯਲੇਣੇਪਿ ਬਨ੍ਧਨ੍ਤੇਹਿ ਕੁਟ੍ਟਂ ਅਕਿਤ੍ਤੇਤ੍ਵਾ ਪਾਸਾਣਾਵ ਕਿਤ੍ਤੇਤਬ੍ਬਾ. ਸਚੇ ਅਨ੍ਤੋ ਓਕਾਸੋ ਨਤ੍ਥਿ, ਪਮੁਖੇਪਿ ਨਿਮਿਤ੍ਤਾਨਿ ਠਪੇਤਬ੍ਬਾਨਿ. ਸਚੇ ਨਪ੍ਪਹੋਤਿ, ਬਹਿ ਨਿਬ੍ਬੋਦਕਪਤਨਟ੍ਠਾਨੇਪਿ ਨਿਮਿਤ੍ਤਪਾਸਾਣੇ ਠਪੇਤ੍ਵਾ ਨਿਮਿਤ੍ਤਾਨਿ ਕਿਤ੍ਤੇਤ੍ਵਾ ਸੀਮਾ ਸਮ੍ਮਨ੍ਨਿਤਬ੍ਬਾ. ਏਵਂ ਲੇਣਸ੍ਸ ਅਨ੍ਤੋ ਚ ਬਹਿ ਚ ਸੀਮਾ ਹੋਤਿ.

ਉਪਰਿਪਾਸਾਦੇਪਿ ਭਿਤ੍ਤਿਂ ਅਕਿਤ੍ਤੇਤ੍ਵਾ ਅਨ੍ਤੋ ਪਾਸਾਣੇ ਠਪੇਤ੍ਵਾ ਸੀਮਾ ਸਮ੍ਮਨ੍ਨਿਤਬ੍ਬਾ. ਸਚੇ ਨਪ੍ਪਹੋਤਿ, ਪਮੁਖੇਪਿ ਪਾਸਾਣੇ ਠਪੇਤ੍ਵਾ ਸਮ੍ਮਨ੍ਨਿਤਬ੍ਬਾ. ਏਵਂ ਸਮ੍ਮਤਾ ਉਪਰਿਪਾਸਾਦੇਯੇਵ ਹੋਤਿ, ਹੇਟ੍ਠਾ ਨ ਓਤਰਤਿ. ਸਚੇ ਪਨ ਬਹੂਸੁ ਥਮ੍ਭੇਸੁ ਤੁਲਾਨਂ ਉਪਰਿ ਕਤਪਾਸਾਦਸ੍ਸ ਹੇਟ੍ਠਿਮਤਲੇ ਕੁਟ੍ਟੋ ਯਥਾ ਨਿਮਿਤ੍ਤਾਨਂ ਅਨ੍ਤੋ ਹੋਤਿ, ਏਵਂ ਉਟ੍ਠਹਿਤ੍ਵਾ ਤੁਲਾਰੁਕ੍ਖੇਹਿ ਏਕਸਮ੍ਬਦ੍ਧੋ ਠਿਤੋ, ਹੇਟ੍ਠਾਪਿ ਓਤਰਤਿ. ਏਕਥਮ੍ਭਪਾਸਾਦਸ੍ਸ ਪਨ ਉਪਰਿਮਤਲੇ ਬਦ੍ਧਾ ਸੀਮਾ ਸਚੇ ਥਮ੍ਭਮਤ੍ਥਕੇ ਏਕਵੀਸਤਿਯਾ ਭਿਕ੍ਖੂਨਂ ਓਕਾਸੋ ਹੋਤਿ, ਹੇਟ੍ਠਾ ਓਤਰਤਿ. ਸਚੇ ਪਾਸਾਦਭਿਤ੍ਤਿਤੋ ਨਿਗ੍ਗਤੇਸੁ ਨਿਯ੍ਯੂਹਕਾਦੀਸੁ ਪਾਸਾਣੇ ਠਪੇਤ੍ਵਾ ਸੀਮਂ ਬਨ੍ਧਨ੍ਤਿ, ਪਾਸਾਦਭਿਤ੍ਤਿ ਅਨ੍ਤੋਸੀਮਾਯਂ ਹੋਤਿ. ਹੇਟ੍ਠਾ ਪਨਸ੍ਸਾ ਓਤਰਣਾਨੋਤਰਣਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਹੇਟ੍ਠਾਪਾਸਾਦੇ ਕਿਤ੍ਤੇਨ੍ਤੇਹਿਪਿ ਭਿਤ੍ਤਿ ਚ ਰੁਕ੍ਖਤ੍ਥਮ੍ਭਾ ਚ ਨ ਕਿਤ੍ਤੇਤਬ੍ਬਾ. ਭਿਤ੍ਤਿਲਗ੍ਗੇ ਪਨ ਪਾਸਾਣਤ੍ਥਮ੍ਭੇ ਕਿਤ੍ਤੇਤੁਂ ਵਟ੍ਟਤਿ. ਏਵਂ ਕਿਤ੍ਤਿਤਾ ਸੀਮਾ ਹੇਟ੍ਠਾ ਪਾਸਾਦਸ੍ਸ ਪਰਿਯਨ੍ਤਥਮ੍ਭਾਨਂ ਅਨ੍ਤੋਯੇਵ ਹੋਤਿ. ਸਚੇ ਪਨ ਹੇਟ੍ਠਾਪਾਸਾਦਸ੍ਸ ਕੁਡ੍ਡੋ ਉਪਰਿਮਤਲੇਨ ਸਮ੍ਬਦ੍ਧੋ ਹੋਤਿ, ਉਪਰਿਪਾਸਾਦਮ੍ਪਿ ਅਭਿਰੁਹਤਿ. ਸਚੇ ਪਾਸਾਦਸ੍ਸ ਬਹਿ ਨਿਬ੍ਬੋਦਕਪਤਨਟ੍ਠਾਨੇ ਨਿਮਿਤ੍ਤਾਨਿ ਕਰੋਨ੍ਤਿ, ਸਬ੍ਬੋ ਪਾਸਾਦੋ ਸੀਮਟ੍ਠੋ ਹੋਤਿ.

ਪਬ੍ਬਤਮਤ੍ਥਕੇ ਤਲਂ ਹੋਤਿ ਏਕਵੀਸਤਿਯਾ ਭਿਕ੍ਖੂਨਂ ਓਕਾਸਾਰਹਂ, ਤਤ੍ਥ ਪਿਟ੍ਠਿਪਾਸਾਣੇ ਵਿਯ ਸੀਮਂ ਬਨ੍ਧਨ੍ਤਿ. ਹੇਟ੍ਠਾਪਬ੍ਬਤੇਪਿ ਤੇਨੇਵ ਪਰਿਚ੍ਛੇਦੇਨ ਸੀਮਾ ਓਤਰਤਿ. ਤਾਲਮੂਲਕਪਬ੍ਬਤੇਪਿ ਉਪਰਿ ਸੀਮਾ ਬਦ੍ਧਾ ਹੇਟ੍ਠਾ ਓਤਰਤੇਵ. ਯੋ ਪਨ ਵਿਤਾਨਸਣ੍ਠਾਨੋ ਹੋਤਿ, ਉਪਰਿ ਏਕਵੀਸਤਿਯਾ ਭਿਕ੍ਖੂਨਂ ਓਕਾਸੋ ਅਤ੍ਥਿ, ਹੇਟ੍ਠਾ ਨਤ੍ਥਿ, ਤਸ੍ਸ ਉਪਰਿ ਬਦ੍ਧਾ ਸੀਮਾ ਹੇਟ੍ਠਾ ਨ ਓਤਰਤਿ. ਏਵਂ ਮੁਦਿਙ੍ਗਸਣ੍ਠਾਨੋ ਵਾ ਹੋਤੁ ਪਣਵਸਣ੍ਠਾਨੋ ਵਾ, ਯਸ੍ਸ ਹੇਟ੍ਠਾ ਵਾ ਮਜ੍ਝੇ ਵਾ ਸੀਮਪ੍ਪਮਾਣਂ ਨਤ੍ਥਿ, ਤਸ੍ਸੁਪਰਿ ਬਦ੍ਧਾ ਸੀਮਾ ਹੇਟ੍ਠਾ ਨੇਵ ਓਤਰਤਿ. ਯਸ੍ਸ ਪਨ ਦ੍ਵੇ ਕੂਟਾਨਿ ਆਸਨ੍ਨੇ ਠਿਤਾਨਿ, ਏਕਸ੍ਸਪਿ ਉਪਰਿ ਸੀਮਪ੍ਪਮਾਣਂ ਨਪ੍ਪਹੋਤਿ, ਤਸ੍ਸ ਕੂਟਨ੍ਤਰਂ ਚਿਨਿਤ੍ਵਾ ਵਾ ਪੂਰੇਤ੍ਵਾ ਵਾ ਏਕਾਬਦ੍ਧਂ ਕਤ੍ਵਾ ਉਪਰਿ ਸੀਮਾ ਸਮ੍ਮਨ੍ਨਿਤਬ੍ਬਾ.

ਏਕੋ ਸਪ੍ਪਫਣਸਦਿਸੋ ਪਬ੍ਬਤੋ, ਤਸ੍ਸੁਪਰਿ ਸੀਮਪ੍ਪਮਾਣਸ੍ਸ ਅਤ੍ਥਿਤਾਯ ਸੀਮਂ ਬਨ੍ਧਨ੍ਤਿ, ਤਸ੍ਸ ਚੇ ਹੇਟ੍ਠਾ ਆਕਾਸਪਬ੍ਭਾਰਂ ਹੋਤਿ, ਸੀਮਾ ਨ ਓਤਰਤਿ. ਸਚੇ ਪਨਸ੍ਸ ਵੇਮਜ੍ਝੇ ਸੀਮਪ੍ਪਮਾਣੋ ਸੁਸਿਰਪਾਸਾਣੋ ਹੋਤਿ, ਓਤਰਤਿ. ਸੋ ਚ ਪਾਸਾਣੋ ਸੀਮਟ੍ਠੋਯੇਵ ਹੋਤਿ. ਅਥਾਪਿਸ੍ਸ ਹੇਟ੍ਠਾ ਲੇਣਸ੍ਸ ਕੁਟ੍ਟੋ ਅਗ੍ਗਕੋਟਿਂ ਆਹਚ੍ਚ ਤਿਟ੍ਠਤਿ, ਓਤਰਤਿ, ਹੇਟ੍ਠਾ ਚ ਉਪਰਿ ਚ ਸੀਮਾਯੇਵ ਹੋਤਿ. ਸਚੇ ਪਨ ਹੇਟ੍ਠਾ ਉਪਰਿਮਸ੍ਸ ਸੀਮਾਪਰਿਚ੍ਛੇਦਸ੍ਸ ਪਾਰਤੋ ਅਨ੍ਤੋ-ਲੇਣਂ ਹੋਤਿ, ਬਹਿ ਸੀਮਾ ਨ ਓਤਰਤਿ. ਅਥਾਪਿ ਉਪਰਿਮਸ੍ਸ ਸੀਮਾਪਰਿਚ੍ਛੇਦਸ੍ਸ ਓਰਤੋ ਬਹਿਲੇਣਂ ਹੋਤਿ, ਅਨ੍ਤੋ ਸੀਮਾ ਨ ਓਤਰਤਿ. ਅਥਾਪਿ ਉਪਰਿ ਸੀਮਾਯ ਪਰਿਚ੍ਛੇਦੋ ਖੁਦ੍ਦਕੋ, ਹੇਟ੍ਠਾ ਲੇਣਂ ਮਹਨ੍ਤਂ ਸੀਮਾਪਰਿਚ੍ਛੇਦਮਤਿਕ੍ਕਮਿਤ੍ਵਾ ਠਿਤਂ, ਸੀਮਾ ਉਪਰਿਯੇਵ ਹੋਤਿ, ਹੇਟ੍ਠਾ ਨ ਓਤਰਤਿ. ਯਦਿ ਪਨ ਲੇਣਂ ਖੁਦ੍ਦਕਂ ਸਬ੍ਬਪਚ੍ਛਿਮਸੀਮਾਪਰਿਮਾਣਂ, ਉਪਰਿ ਸੀਮਾ ਮਹਤੀ ਤਂ ਅਜ੍ਝੋਤ੍ਥਰਿਤ੍ਵਾ ਠਿਤਾ, ਸੀਮਾ ਓਤਰਤਿ. ਅਥ ਲੇਣਂ ਅਤਿਖੁਦ੍ਦਕਂ ਸੀਮਪ੍ਪਮਾਣਂ ਨ ਹੋਤਿ, ਸੀਮਾ ਉਪਰਿਯੇਵ ਹੋਤਿ, ਹੇਟ੍ਠਾ ਨ ਓਤਰਤਿ. ਸਚੇ ਤਤੋ ਉਪਡ੍ਢਂ ਭਿਜ੍ਜਿਤ੍ਵਾ ਪਤਤਿ, ਸੀਮਪ੍ਪਮਾਣਂ ਚੇਪਿ ਹੋਤਿ, ਬਹਿ ਪਤਿਤਂ ਅਸੀਮਾ. ਅਪਤਿਤਂ ਪਨ ਯਦਿ ਸੀਮਪ੍ਪਮਾਣਂ, ਸੀਮਾ ਹੋਤਿਯੇਵ.

ਖਣ੍ਡਸੀਮਾ ਨੀਚਵਤ੍ਥੁਕਾ ਹੋਤਿ, ਤਂ ਪੂਰੇਤ੍ਵਾ ਉਚ੍ਚਵਤ੍ਥੁਕਂ ਕਰੋਨ੍ਤਿ, ਸੀਮਾਯੇਵ. ਸੀਮਾਯ ਗੇਹਂ ਕਰੋਨ੍ਤਿ, ਸੀਮਟ੍ਠਕਮੇਵ ਹੋਤਿ. ਸੀਮਾਯ ਪੋਕ੍ਖਰਣਿਂ ਖਣਨ੍ਤਿ, ਸੀਮਾਯੇਵ. ਓਘੋ ਸੀਮਾਮਣ੍ਡਲਂ ਓਤ੍ਥਰਿਤ੍ਵਾ ਗਚ੍ਛਤਿ, ਸੀਮਾਮਾਲ਼ਕੇ ਅਟ੍ਟਂ ਬਨ੍ਧਿਤ੍ਵਾ ਕਮ੍ਮਂ ਕਾਤੁਂ ਵਟ੍ਟਤਿ. ਸੀਮਾਯ ਹੇਟ੍ਠਾ ਉਮਙ੍ਗਨਦੀ ਹੋਤਿ, ਇਦ੍ਧਿਮਾ ਭਿਕ੍ਖੁ ਤਤ੍ਥ ਨਿਸੀਦਤਿ, ਸਚੇ ਸਾ ਨਦੀ ਪਠਮਂ ਗਤਾ, ਸੀਮਾ ਪਚ੍ਛਾ ਬਦ੍ਧਾ, ਕਮ੍ਮਂ ਨ ਕੋਪੇਤਿ. ਅਥ ਪਠਮਂ ਸੀਮਾ ਬਦ੍ਧਾ, ਪਚ੍ਛਾ ਨਦੀ ਗਤਾ, ਕਮ੍ਮਂ ਕੋਪੇਤਿ. ਹੇਟ੍ਠਾਪਥਵਿਤਲੇ ਠਿਤੋ ਪਨ ਕੋਪੇਤਿਯੇਵ.

ਸੀਮਾਮਾਲ਼ਕੇ ਵਟਰੁਕ੍ਖੋ ਹੋਤਿ, ਤਸ੍ਸ ਸਾਖਾ ਵਾ ਤਤੋ ਨਿਗ੍ਗਤਪਾਰੋਹੋ ਵਾ ਮਹਾਸੀਮਾਯ ਪਥਵਿਤਲਂ ਵਾ ਤਤ੍ਥਜਾਤਰੁਕ੍ਖਾਦੀਨਿ ਵਾ ਆਹਚ੍ਚ ਤਿਟ੍ਠਤਿ, ਮਹਾਸੀਮਂ ਸੋਧੇਤ੍ਵਾ ਵਾ ਕਮ੍ਮਂ ਕਾਤਬ੍ਬਂ, ਤੇ ਵਾ ਸਾਖਾਪਾਰੋਹਾ ਛਿਨ੍ਦਿਤ੍ਵਾ ਬਹਿਟ੍ਠਕਾ ਕਾਤਬ੍ਬਾ. ਅਨਾਹਚ੍ਚ ਠਿਤਸਾਖਾਦੀਸੁ ਆਰੁਲ਼੍ਹਭਿਕ੍ਖੁ ਹਤ੍ਥਪਾਸਂ ਆਨੇਤਬ੍ਬੋ. ਏਵਂ ਮਹਾਸੀਮਾਯ ਜਾਤਰੁਕ੍ਖਸ੍ਸ ਸਾਖਾ ਵਾ ਪਾਰੋਹੋ ਵਾ ਵੁਤ੍ਤਨਯੇਨੇਵ ਸੀਮਾਮਾਲ਼ਕੇ ਪਤਿਟ੍ਠਾਤਿ, ਵੁਤ੍ਤਨਯੇਨੇਵ ਸੀਮਂ ਸੋਧੇਤ੍ਵਾ ਵਾ ਕਮ੍ਮਂ ਕਾਤਬ੍ਬਂ, ਤੇ ਵਾ ਸਾਖਾਪਾਰੋਹਾ ਛਿਨ੍ਦਿਤ੍ਵਾ ਬਹਿਟ੍ਠਕਾ ਕਾਤਬ੍ਬਾ.

ਸਚੇ ਸੀਮਾਮਾਲ਼ਕੇ ਕਮ੍ਮੇ ਕਰਿਯਮਾਨੇ ਕੋਚਿ ਭਿਕ੍ਖੁ ਸੀਮਾਮਾਲ਼ਕਸ੍ਸ ਅਨ੍ਤੋ ਪਵਿਸਿਤ੍ਵਾ ਵੇਹਾਸਟ੍ਠਿਤਸਾਖਾਯ ਨਿਸੀਦਤਿ, ਪਾਦਾ ਵਾਸ੍ਸ ਭੂਮਿਗਤਾ ਹੋਨ੍ਤਿ, ਨਿਵਾਸਨਪਾਰੁਪਨਂ ਵਾ ਭੂਮਿਂ ਫੁਸਤਿ, ਕਮ੍ਮਂ ਕਾਤੁਂ ਨ ਵਟ੍ਟਤਿ. ਪਾਦੇ ਪਨ ਨਿਵਾਸਨਪਾਰੁਪਨਞ੍ਚ ਉਕ੍ਖਿਪਾਪੇਤ੍ਵਾ ਕਾਤੁਂ ਵਟ੍ਟਤਿ. ਇਦਞ੍ਚ ਲਕ੍ਖਣਂ ਪੁਰਿਮਨਯੇਪਿ ਵੇਦਿਤਬ੍ਬਂ. ਅਯਂ ਪਨ ਵਿਸੇਸੋ – ਤਤ੍ਰ ਉਕ੍ਖਿਪਾਪੇਤ੍ਵਾ ਕਾਤੁਂ ਨ ਵਟ੍ਟਤਿ, ਹਤ੍ਥਪਾਸਮੇਵ ਆਨੇਤਬ੍ਬੋ. ਸਚੇ ਅਨ੍ਤੋਸੀਮਤੋ ਪਬ੍ਬਤੋ ਅਬ੍ਭੁਗਚ੍ਛਤਿ, ਤਤ੍ਰਟ੍ਠੋ ਭਿਕ੍ਖੁ ਹਤ੍ਥਪਾਸਂ ਆਨੇਤਬ੍ਬੋ. ਇਦ੍ਧਿਯਾ ਅਨ੍ਤੋਪਬ੍ਬਤਂ ਪਵਿਟ੍ਠੇਪਿ ਏਸੇਵ ਨਯੋ. ਬਜ੍ਝਮਾਨਾ ਏਵ ਹਿ ਸੀਮਾ ਪਮਾਣਰਹਿਤਂ ਪਦੇਸਂ ਨ ਓਤਰਤਿ. ਬਦ੍ਧਸੀਮਾਯ ਜਾਤਂ ਯਂਕਿਞ੍ਚਿ ਯਤ੍ਥ ਕਤ੍ਥਚਿ ਏਕਸਮ੍ਬਦ੍ਧੇਨ ਗਤਂ ਸੀਮਾਸਙ੍ਖ੍ਯਮੇਵ ਗਚ੍ਛਤੀਤਿ.

੧੪੦. ਤਿਯੋਜਨਪਰਮਨ੍ਤਿ ਏਤ੍ਥ ਤਿਯੋਜਨਂ ਪਰਮਂ ਪਮਾਣਮੇਤਿਸ੍ਸਾਤਿ ਤਿਯੋਜਨਪਰਮਾ; ਤਂ ਤਿਯੋਜਨਪਰਮਂ. ਸਮ੍ਮਨ੍ਨਨ੍ਤੇਨ ਪਨ ਮਜ੍ਝੇ ਠਤ੍ਵਾ ਯਥਾ ਚਤੂਸੁਪਿ ਦਿਸਾਸੁ ਦਿਯਡ੍ਢਦਿਯਡ੍ਢਯੋਜਨਂ ਹੋਤਿ, ਏਵਂ ਸਮ੍ਮਨ੍ਨਿਤਬ੍ਬਾ. ਸਚੇ ਪਨ ਮਜ੍ਝੇ ਠਤ੍ਵਾ ਏਕੇਕਦਿਸਤੋ ਤਿਯੋਜਨਂ ਕਰੋਨ੍ਤਿ, ਛਯੋਜਨਂ ਹੋਤੀਤਿ ਨ ਵਟ੍ਟਤਿ. ਚਤੁਰਸ੍ਸਂ ਵਾ ਤਿਕੋਣਂ ਵਾ ਸਮ੍ਮਨ੍ਨਨ੍ਤੇਨ ਯਥਾ ਕੋਣਤੋ ਕੋਣਂ ਤਿਯੋਜਨਂ ਹੋਤਿ, ਏਵਂ ਸਮ੍ਮਨ੍ਨਿਤਬ੍ਬਾ. ਸਚੇ ਹਿ ਯੇਨ ਕੇਨਚਿ ਪਰਿਯਨ੍ਤੇਨ ਕੇਸਗ੍ਗਮਤ੍ਤਮ੍ਪਿ ਤਿਯੋਜਨਂ ਅਤਿਕ੍ਕਾਮੇਤਿ, ਆਪਤ੍ਤਿਞ੍ਚ ਆਪਜ੍ਜਤਿ ਸੀਮਾ ਚ ਅਸੀਮਾ ਹੋਤਿ.

ਨਦੀਪਾਰਨ੍ਤਿ ਏਤ੍ਥ ਪਾਰਯਤੀਤਿ ਪਾਰਾ. ਕਿਂ ਪਾਰਯਤਿ? ਨਦਿਂ. ਨਦਿਯਾ ਪਾਰਾ ਨਦੀਪਾਰਾ, ਤਂ ਨਦੀਪਾਰਂ; ਨਦਿਂ ਅਜ੍ਝੋਤ੍ਥਰਮਾਨਨ੍ਤਿ ਅਤ੍ਥੋ. ਏਤ੍ਥ ਚ ਨਦਿਯਾ ਲਕ੍ਖਣਂ ਨਦੀਨਿਮਿਤ੍ਤੇ ਵੁਤ੍ਤਨਯਮੇਵ. ਯਤ੍ਥਸ੍ਸ ਧੁਵਨਾਵਾ ਵਾਤਿ ਯਤ੍ਥ ਨਦਿਯਾ ਸੀਮਾਬਨ੍ਧਨਟ੍ਠਾਨਗਤੇਸੁ ਤਿਤ੍ਥੇਸੁ ਨਿਚ੍ਚਸਞ੍ਚਰਣਨਾਵਾ ਅਸ੍ਸ, ਯਾ ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਪਾਜਨਪੁਰਿਸੇਨ ਸਦ੍ਧਿਂ ਤਯੋ ਜਨੇ ਵਹਤਿ. ਸਚੇ ਪਨ ਸਾ ਨਾਵਾ ਉਦ੍ਧਂ ਵਾ ਅਧੋ ਵਾ ਕੇਨਚਿਦੇਵ ਕਰਣੀਯੇਨ ਪੁਨ ਆਗਮਨਤ੍ਥਾਯ ਨੀਤਾ, ਚੋਰੇਹਿ ਵਾ ਹਟਾ, ਅਵਸ੍ਸਂ ਲਬ੍ਭਨੇਯ੍ਯਾ, ਯਾ ਪਨ ਵਾਤੇਨ ਵਾ ਛਿਨ੍ਨਬਨ੍ਧਨਾ ਵੀਚੀਹਿ ਨਦਿਮਜ੍ਝਂ ਨੀਤਾ ਅਵਸ੍ਸਂ ਆਹਰਿਤਬ੍ਬਾ, ਪੁਨ ਧੁਵਨਾਵਾਵ ਹੋਤਿ. ਉਦਕੇ ਓਗਤੇ ਥਲਂ ਉਸ੍ਸਾਰਿਤਾਪਿ ਸੁਧਾਕਸਟਾਦੀਹਿ ਪੂਰੇਤ੍ਵਾ ਠਪਿਤਾਪਿ ਧੁਵਨਾਵਾਵ. ਸਚੇ ਭਿਨ੍ਨਾ ਵਾ ਵਿਸਙ੍ਖਤਪਦਰਾ ਵਾ ਨ ਵਟ੍ਟਤਿ. ਮਹਾਪਦੁਮਤ੍ਥੇਰੋ ਪਨਾਹ – ‘‘ਸਚੇਪਿ ਤਾਵਕਾਲਿਕਂ ਨਾਵਂ ਆਨੇਤ੍ਵਾ ਸੀਮਾਬਨ੍ਧਨਟ੍ਠਾਨੇ ਠਪੇਤ੍ਵਾ ਨਿਮਿਤ੍ਤਾਨਿ ਕਿਤ੍ਤੇਨ੍ਤਿ, ਧੁਵਨਾਵਾਵ ਹੋਤੀ’’ਤਿ. ਤਤ੍ਰ ਮਹਾਸੁਮਤ੍ਥੇਰੋ ਆਹ – ‘‘ਨਿਮਿਤ੍ਤਂ ਵਾ ਸੀਮਾ ਵਾ ਕਮ੍ਮਵਾਚਾਯ ਗਚ੍ਛਤਿ ਨ ਨਾਵਾਯ. ਭਗਵਤਾ ਚ ਧੁਵਨਾਵਾ ਅਨੁਞ੍ਞਾਤਾ, ਤਸ੍ਮਾ ਨਿਬਦ੍ਧਨਾਵਾਯੇਵ ਵਟ੍ਟਤੀ’’ਤਿ.

ਧੁਵਸੇਤੁ ਵਾਤਿ ਯਤ੍ਥ ਰੁਕ੍ਖਸਙ੍ਘਾਟਮਯੋ ਵਾ ਪਦਰਬਦ੍ਧੋ ਵਾ ਜਙ੍ਘਸਤ੍ਥਸੇਤੁ ਵਾ ਹਤ੍ਥਿਸ੍ਸਾਦੀਨਂ ਸਞ੍ਚਰਣਯੋਗ੍ਗੋ ਮਹਾਸੇਤੁ ਵਾ ਅਤ੍ਥਿ; ਅਨ੍ਤਮਸੋ ਤਙ੍ਖਣਞ੍ਞੇਵ ਰੁਕ੍ਖਂ ਛਿਨ੍ਦਿਤ੍ਵਾ ਮਨੁਸ੍ਸਾਨਂ ਸਞ੍ਚਰਣਯੋਗ੍ਗੋ ਏਕਪਦਿਕਸੇਤੁਪਿ ਧੁਵਸੇਤੁਤ੍ਵੇਵ ਸਙ੍ਖ੍ਯਂ ਗਚ੍ਛਤਿ. ਸਚੇ ਪਨ ਉਪਰਿ ਬਦ੍ਧਾਨਿ ਵੇਤ੍ਤਲਤਾਦੀਨਿ ਹਤ੍ਥੇਨ ਗਹੇਤ੍ਵਾਪਿ ਨ ਸਕ੍ਕਾ ਹੋਤਿ ਤੇਨ ਸਞ੍ਚਰਿਤੁਂ, ਨ ਵਟ੍ਟਤਿ.

ਏਵਰੂਪਂ ਨਦੀਪਾਰਸੀਮਂ ਸਮ੍ਮਨ੍ਨਿਤੁਨ੍ਤਿ ਯਤ੍ਥਾਯਂ ਵੁਤ੍ਤਪ੍ਪਕਾਰਾ ਧੁਵਨਾਵਾ ਵਾ ਧੁਵਸੇਤੁ ਵਾ ਅਭਿਮੁਖਤਿਤ੍ਥੇਯੇਵ ਅਤ੍ਥਿ, ਏਵਰੂਪਂ ਨਦੀਪਾਰਸੀਮਂ ਸਮ੍ਮਨ੍ਨਿਤੁਂ ਅਨੁਜਾਨਾਮੀਤਿ ਅਤ੍ਥੋ. ਸਚੇ ਧੁਵਨਾਵਾ ਵਾ ਧੁਵਸੇਤੁ ਵਾ ਅਭਿਮੁਖਤਿਤ੍ਥੇ ਨਤ੍ਥਿ, ਈਸਕਂ ਉਦ੍ਧਂ ਅਭਿਰੁਹਿਤ੍ਵਾ ਅਧੋ ਵਾ ਓਰੋਹਿਤ੍ਵਾ ਅਤ੍ਥਿ, ਏਵਮ੍ਪਿ ਵਟ੍ਟਤਿ. ਕਰਵੀਕਤਿਸ੍ਸਤ੍ਥੇਰੋ ਪਨ ‘‘ਗਾਵੁਤਮਤ੍ਤਬ੍ਭਨ੍ਤਰੇਪਿ ਵਟ੍ਟਤੀ’’ਤਿ ਆਹ.

ਇਮਞ੍ਚ ਪਨ ਨਦੀਪਾਰਸੀਮਂ ਸਮ੍ਮਨ੍ਨਨ੍ਤੇਨ ਏਕਸ੍ਮਿਂ ਤੀਰੇ ਠਤ੍ਵਾ ਉਪਰਿਸੋਤੇ ਨਦੀਤੀਰੇ ਨਿਮਿਤ੍ਤਂ ਕਿਤ੍ਤੇਤ੍ਵਾ ਤਤੋ ਪਟ੍ਠਾਯ ਅਤ੍ਤਾਨਂ ਪਰਿਕ੍ਖਿਪਨ੍ਤੇਨ ਯਤ੍ਤਕਂ ਪਰਿਚ੍ਛੇਦਂ ਇਚ੍ਛਤਿ, ਤਸ੍ਸ ਪਰਿਯੋਸਾਨੇ ਅਧੋਸੋਤੇਪਿ ਨਦੀਤੀਰੇ ਨਿਮਿਤ੍ਤਂ ਕਿਤ੍ਤੇਤ੍ਵਾ ਪਰਤੀਰੇ ਸਮ੍ਮੁਖਟ੍ਠਾਨੇ ਨਦੀਤੀਰੇ ਨਿਮਿਤ੍ਤਂ ਕਿਤ੍ਤੇਤਬ੍ਬਂ. ਤਤੋ ਪਟ੍ਠਾਯ ਯਤ੍ਤਕਂ ਪਰਿਚ੍ਛੇਦਂ ਇਚ੍ਛਤਿ, ਤਸ੍ਸ ਵਸੇਨ ਯਾਵ ਉਪਰਿਸੋਤੇ ਪਠਮਕਿਤ੍ਤਿਤਨਿਮਿਤ੍ਤਸ੍ਸ ਸਮ੍ਮੁਖਾ ਨਦੀਤੀਰੇ ਨਿਮਿਤ੍ਤਂ, ਤਾਵ ਕਿਤ੍ਤੇਤ੍ਵਾ ਪਚ੍ਚਾਹਰਿਤ੍ਵਾ ਪਠਮਕਿਤ੍ਤਿਤਨਿਮਿਤ੍ਤੇਨ ਸਦ੍ਧਿਂ ਘਟੇਤਬ੍ਬਂ. ਅਥ ਸਬ੍ਬਨਿਮਿਤ੍ਤਾਨਂ ਅਨ੍ਤੋ ਠਿਤੇ ਭਿਕ੍ਖੂ ਹਤ੍ਥਪਾਸਗਤੇ ਕਤ੍ਵਾ ਕਮ੍ਮਵਾਚਾਯ ਸੀਮਾ ਸਮ੍ਮਨ੍ਨਿਤਬ੍ਬਾ. ਨਦਿਯਂ ਠਿਤਾ ਅਨਾਗਤਾਪਿ ਕਮ੍ਮਂ ਨ ਕੋਪੇਨ੍ਤਿ. ਸਮ੍ਮੁਤਿਪਰਿਯੋਸਾਨੇ ਠਪੇਤ੍ਵਾ ਨਦਿਂ ਨਿਮਿਤ੍ਤਾਨਂ ਅਨ੍ਤੋ ਪਾਰਤੀਰੇ ਚ ਓਰਿਮਤੀਰੇ ਚ ਏਕਸੀਮਾ ਹੋਤਿ. ਨਦੀ ਪਨ ਬਦ੍ਧਸੀਮਾਸਙ੍ਖ੍ਯਂ ਨ ਗਚ੍ਛਤਿ, ਵਿਸੁਂ ਨਦਿਸੀਮਾ ਏਵ ਹਿ ਸਾ.

ਸਚੇ ਅਨ੍ਤੋਨਦਿਯਂ ਦੀਪਕੋ ਹੋਤਿ, ਤਂ ਅਨ੍ਤੋਸੀਮਾਯ ਕਾਤੁਕਾਮੇਨ ਪੁਰਿਮਨਯੇਨੇਵ ਅਤ੍ਤਨਾ ਠਿਤਤੀਰੇ ਨਿਮਿਤ੍ਤਾਨਿ ਕਿਤ੍ਤੇਤ੍ਵਾ ਦੀਪਕਸ੍ਸ ਓਰਿਮਨ੍ਤੇ ਚ ਪਾਰਿਮਨ੍ਤੇ ਚ ਨਿਮਿਤ੍ਤਂ ਕਿਤ੍ਤੇਤਬ੍ਬਂ. ਅਥ ਪਰਤੀਰੇ ਨਦਿਯਾ ਓਰਿਮਤੀਰੇ ਨਿਮਿਤ੍ਤਸ੍ਸ ਸਮ੍ਮੁਖਟ੍ਠਾਨੇ ਨਿਮਿਤ੍ਤਂ ਕਿਤ੍ਤੇਤ੍ਵਾ ਤਤੋ ਪਟ੍ਠਾਯ ਪੁਰਿਮਨਯੇਨੇਵ ਯਾਵ ਉਪਰਿਸੋਤੇ ਪਠਮਕਿਤ੍ਤਿਤਨਿਮਿਤ੍ਤਸ੍ਸ ਸਮ੍ਮੁਖਾ ਨਿਮਿਤ੍ਤਂ, ਤਾਵ ਕਿਤ੍ਤੇਤਬ੍ਬਂ. ਅਥ ਦੀਪਕਸ੍ਸ ਪਾਰਿਮਨ੍ਤੇ ਚ ਓਰਿਮਨ੍ਤੇ ਚ ਨਿਮਿਤ੍ਤਂ ਕਿਤ੍ਤੇਤ੍ਵਾ ਪਚ੍ਚਾਹਰਿਤ੍ਵਾ ਪਠਮਕਿਤ੍ਤਿਤਨਿਮਿਤ੍ਤੇਨ ਸਦ੍ਧਿਂ ਘਟੇਤਬ੍ਬਂ. ਅਥ ਦ੍ਵੀਸੁ ਤੀਰੇਸੁ ਦੀਪਕੇ ਚ ਭਿਕ੍ਖੂ ਸਬ੍ਬੇਵ ਹਤ੍ਥਪਾਸਗਤੇ ਕਤ੍ਵਾ ਕਮ੍ਮਵਾਚਾਯ ਸੀਮਾ ਸਮ੍ਮਨ੍ਨਿਤਬ੍ਬਾ. ਨਦਿਯਂ ਠਿਤਾ ਅਨਾਗਚ੍ਛਨ੍ਤਾਪਿ ਕਮ੍ਮਂ ਨ ਕੋਪੇਨ੍ਤਿ. ਸਮ੍ਮੁਤਿਪਰਿਯੋਸਾਨੇ ਠਪੇਤ੍ਵਾ ਨਦਿਂ ਨਿਮਿਤ੍ਤਾਨਂ ਅਨ੍ਤੋ ਤੀਰਦ੍ਵਯਞ੍ਚ ਦੀਪਕੋ ਚ ਏਕਸੀਮਾ ਹੋਤਿ, ਨਦੀ ਪਨ ਨਦਿਸੀਮਾਯੇਵ.

ਸਚੇ ਪਨ ਦੀਪਕੋ ਵਿਹਾਰਸੀਮਾਪਰਿਚ੍ਛੇਦਤੋ ਉਦ੍ਧਂ ਵਾ ਅਧੋ ਵਾ ਅਧਿਕਤਰੋ ਹੋਤਿ, ਅਥ ਵਿਹਾਰਸੀਮਾਪਰਿਚ੍ਛੇਦਨਿਮਿਤ੍ਤਸ੍ਸ ਉਜੁਕਮੇਵ ਸਮ੍ਮੁਖਿਭੂਤੇ ਦੀਪਕਸ੍ਸ ਸੋਰਿਮਨ੍ਤੇ ਨਿਮਿਤ੍ਤਂ ਕਿਤ੍ਤੇਤ੍ਵਾ ਤਤੋ ਪਟ੍ਠਾਯ ਦੀਪਕਸਿਖਰਂ ਪਰਿਕ੍ਖਿਪਨ੍ਤੋਨ ਪੁਨ ਦੀਪਕਸ੍ਸ ਸੋਰਿਮਨ੍ਤੇ ਨਿਮਿਤ੍ਤਸਮ੍ਮੁਖੇ ਪਾਰਿਮਨ੍ਤੇ ਨਿਮਿਤ੍ਤਂ ਕਿਤ੍ਤੇਤਬ੍ਬਂ. ਤਤੋ ਪਰਂ ਪੁਰਿਮਨਯੇਨੇਵ ਪਾਰਤੀਰੇ ਸਮ੍ਮੁਖਨਿਮੀਤ੍ਤਮਾਦਿਂਕਤ੍ਵਾ ਪਾਰਤੀਰਨਿਮਿਤ੍ਤਾਨਿ ਚ ਦੀਪਕਸ੍ਸ ਪਾਰਿਮਨ੍ਤਸੋਰਿਮਨ੍ਤਨਿਮਿਤ੍ਤਾਨਿ ਚ ਕਿਤ੍ਤੇਤ੍ਵਾ ਪਠਮਕਿਤ੍ਤਿਤਨਿਮਿਤ੍ਤੇਨ ਸਦ੍ਧਿਂ ਘਟਨਾ ਕਾਤਬ੍ਬਾ. ਏਵਂ ਕਿਤ੍ਤੇਤ੍ਵਾ ਸਮ੍ਮਤਾ ਸੀਮਾ ਪਬ੍ਬਤਸਣ੍ਡਾਨਾ ਹੋਤਿ.

ਸਚੇ ਪਨ ਦੀਪਕੋ ਵਿਹਾਰਸੀਮਾਪਰਿਚ੍ਛੇਦਤੋ ਉਦ੍ਧਮ੍ਪਿ ਅਧੋਪਿ ਅਧਿਕਤਰੋ ਹੋਤਿ. ਪੁਰਿਮਨਯੇਨੇਵ ਦੀਪਕਸ੍ਸ ਉਭੋਪਿ ਸੀਖਰਾਨਿ ਪਰਿਕ੍ਖਿਪਿਤ੍ਵਾ ਨਿਮਿਤ੍ਤਾਨਿ ਕਿਤ੍ਤੇਨ੍ਤੇਨ ਨਿਮਿਤ੍ਤਘਟਨਾ ਕਾਤਬ੍ਬਾ. ਏਵਂ ਕਿਤ੍ਤੇਤ੍ਵਾ ਸਮ੍ਮਤਾ ਸੀਮਾ ਮੁਦਿਙ੍ਗਸਣ੍ਠਾਨਾ ਹੋਤਿ.

ਸਚੇ ਦੀਪਕੋ ਵਿਹਾਰਸੀਮਾਪਰਿਚ੍ਛੇਦਸ੍ਸ ਅਨ੍ਤੋ ਖੁਦ੍ਦਕੋ ਹੋਤਿ, ਸਬ੍ਬਪਠਮਨਯੇਨ ਦੀਪਕੇ ਨਿਮਿਤ੍ਤਾਨਿ ਕਿਤ੍ਤੇਤਬ੍ਬਾਨਿ. ਏਵਂ ਕਿਤ੍ਤੇਤ੍ਵਾ ਸਮ੍ਮਤਾ ਸੀਮਾ ਪਣਵਸਣ੍ਠਾਨਾ ਹੋਤਿ.

ਸੀਮਾਨੁਜਾਨਨਕਥਾ ਨਿਟ੍ਠਿਤਾ.

ਉਪੋਸਥਾਗਾਰਾਦਿਕਥਾ

੧੪੧. ਅਨੁਪਰਿਵੇਣਿਯਨ੍ਤਿ ਏਕਸੀਮਮਹਾਵਿਹਾਰੇ ਤਸ੍ਮਿਂ ਤਸ੍ਮਿਂ ਪਰਿਵੇਣੇ. ਅਸਙ੍ਕੇਤੇਨਾਤਿ ਸਙ੍ਕੇਤਂ ਅਕਤ੍ਵਾ. ਏਕਂ ਸਮੂਹਨਿਤ੍ਵਾਤਿ ਕਮ੍ਮਵਾਚਾਯ ਸਮੂਹਨਿਤ੍ਵਾ.

੧੪੨. ਯਤੋ ਪਾਤਿਮੋਕ੍ਖਂ ਸੁਣਾਤੀਤਿ ਯਤ੍ਥ ਕਤ੍ਥਚਿ ਭਿਕ੍ਖੂਨਂ ਹਤ੍ਥਪਾਸੇ ਨਿਸਿਨ੍ਨੋ ਯਸ੍ਮਾ ਪਾਤਿਮੋਕ੍ਖਂ ਸੁਣਾਤਿ; ਕਤੋਵਸ੍ਸ ਉਪੋਸਥੋਤਿ ਅਤ੍ਥੋ. ਇਦਞ੍ਚ ਵਤ੍ਥੁਵਸੇਨ ਵੁਤ੍ਤਂ, ਹਤ੍ਥਪਾਸੇ ਨਿਸਿਨ੍ਨਸ੍ਸ ਪਨ ਅਸੁਣਨ੍ਤਸ੍ਸਾਪਿ ਕਤੋਵ ਹੋਤਿ ਉਪੋਸਥੋ. ਨਿਮਿਤ੍ਤਾ ਕਿਤ੍ਤੇਤਬ੍ਬਾਤਿ ਉਪੋਸਥਪਮੁਖਸ੍ਸ ਖੁਦ੍ਦਕਾਨਿ ਵਾ ਮਹਨ੍ਤਾਨਿ ਵਾ ਪਾਸਾਣਇਟ੍ਠਕਦਾਰੁਖਣ੍ਡਦਣ੍ਡਕਾਦੀਨਿ ਯਾਨਿ ਕਾਨਿਚਿ ਨਿਮਿਤ੍ਤਾਨਿ ਅਬ੍ਭੋਕਾਸੇ ਵਾ ਮਾਲ਼ਕਾਦੀਸੁ ਵਾ ਯਤ੍ਥ ਕਤ੍ਥਚਿ ਸਞ੍ਞਂ ਕਤ੍ਵਾ ਕਿਤ੍ਤੇਤੁਂ ਵਟ੍ਟਤਿ. ਅਥ ਵਾ ਨਿਮਿਤ੍ਤਾ ਕਿਤ੍ਤੇਤਬ੍ਬਾਤਿ ਨਿਮਿਤ੍ਤੁਪਗਾ ਵਾ ਅਨਿਮਿਤ੍ਤੁਪਗਾ ਵਾ ਪਰਿਚ੍ਛੇਦਜਾਨਨਤ੍ਥਂ ਕਿਤ੍ਤੇਤਬ੍ਬਾ.

ਥੇਰੇਹਿ ਭਿਕ੍ਖੂਹਿ ਪਠਮਤਰਂ ਸਨ੍ਨਿਪਤਿਤੁਨ੍ਤਿ ਏਤ੍ਥ ਸਚੇ ਮਹਾਥੇਰੋ ਪਠਮਤਰਂ ਨ ਆਗਚ੍ਛਤਿ, ਦੁਕ੍ਕਟਂ. ਸਬ੍ਬੇਹੇਵ ਏਕਜ੍ਝਂ ਸਨ੍ਨਿਪਤਿਤ੍ਵਾ ਉਪੋਸਥੋ ਕਾਤਬ੍ਬੋਤਿ ਏਤ੍ਥ ਸਚੇ ਪੋਰਾਣਕੋ ਆਵਾਸੋ ਮਜ੍ਝੇ ਵਿਹਾਰਸ੍ਸ ਹੋਤਿ, ਪਹੋਤਿ ਚੇਤ੍ਥ ਭਿਕ੍ਖੂਨਂ ਨਿਸਜ੍ਜਟ੍ਠਾਨਂ, ਤਤ੍ਥ ਸਨ੍ਨਿਪਤਿਤ੍ਵਾ ਉਪੋਸਥੋ ਕਾਤਬ੍ਬੋ. ਸਚੇ ਪੋਰਾਣਕੋ ਪਰਿਦੁਬ੍ਬਲੋ ਚੇਵ ਸਮ੍ਬਾਧੋ ਚ ਅਞ੍ਞੋ ਪਚ੍ਛਾ ਉਟ੍ਠਿਤਾਵਾਸੋ ਅਸਮ੍ਬਾਧੋ, ਤਤ੍ਥ ਉਪੋਸਥੋ ਕਾਤਬ੍ਬੋ.

ਯਤ੍ਥ ਵਾ ਪਨ ਥੇਰੋ ਭਿਕ੍ਖੁ ਵਿਹਰਤੀਤਿ ਏਤ੍ਥਾਪਿ ਸਚੇ ਥੇਰਸ੍ਸ ਵਿਹਾਰੋ ਸਬ੍ਬੇਸਂ ਪਹੋਤਿ, ਫਾਸੁਕੋ ਹੋਤਿ, ਤਤ੍ਥ ਉਪੋਸਥੋ ਕਾਤਬ੍ਬੋ. ਸਚੇ ਪਨ ਸੋ ਪਚ੍ਚਨ੍ਤੇ ਵਿਸਮਪ੍ਪਦੇਸੇ ਹੋਤਿ, ਥੇਰਸ੍ਸ ਵਤ੍ਤਬ੍ਬਂ – ‘‘ਭਨ੍ਤੇ, ਤੁਮ੍ਹਾਕਂ ਵਿਹਾਰੋ ਅਫਾਸੁਕਦੇਸੋ, ਨਤ੍ਥਿ ਏਤ੍ਥ ਸਬ੍ਬੇਸਂ ਓਕਾਸੋ, ਅਸੁਕਸ੍ਮਿਂ ਨਾਮ ਆਵਾਸੇ ਓਕਾਸੋ ਅਤ੍ਥਿ, ਤਤ੍ਥ ਗਨ੍ਤੁਂ ਵਟ੍ਟਤੀ’’ਤਿ. ਸਚੇ ਥੇਰੋ ਨਾਗਚ੍ਛਤਿ, ਤਸ੍ਸ ਛਨ੍ਦਪਾਰਿਸੁਦ੍ਧਿਂ ਆਨੇਤ੍ਵਾ ਸਬ੍ਬੇਸਂ ਪਹੋਨਕੇ ਫਾਸੁਕਟ੍ਠਾਨੇ ਉਪੋਸਥੋ ਕਾਤਬ੍ਬੋ.

ਅਵਿਪ੍ਪਵਾਸਸੀਮਾਨੁਜਾਨਨਕਥਾ

੧੪੩. ਅਨ੍ਧਕਵਿਨ੍ਦਾਤਿ ਰਾਜਗਹਤੋ ਗਾਵੁਤਤ੍ਤਯੇ ਅਨ੍ਧਕਵਿਨ੍ਦਂ ਨਾਮ, ਤਂ ਉਪਨਿਸ੍ਸਾਯ ਥੇਰੋ ਵਸਤਿ; ਤਤੋ ਰਾਜਗਹਂ ਉਪੋਸਥਂ ਆਗਚ੍ਛਨ੍ਤੋ. ਰਾਜਗਹਞ੍ਹਿ ਪਰਿਕ੍ਖਿਪਿਤ੍ਵਾ ਅਟ੍ਠਾਰਸ ਮਹਾਵਿਹਾਰਾ ਸਬ੍ਬੇ ਏਕਸੀਮਾ, ਧਮ੍ਮਸੇਨਾਪਤਿਨਾ ਨੇਸਂ ਸੀਮਾ ਬਦ੍ਧਾ, ਤਸ੍ਮਾ ਵੇਲ਼ੁਵਨੇ ਸਙ੍ਘਸ੍ਸ ਸਾਮਗ੍ਗੀਦਾਨਤ੍ਥਂ ਆਗਚ੍ਛਨ੍ਤੋਤਿ ਅਤ੍ਥੋ. ਨਦਿਂ ਤਰਨ੍ਤੋਤਿ ਸਿਪ੍ਪਿਨਿਯਂ ਨਾਮ ਨਦਿਂ ਅਤਿਕ੍ਕਮਨ੍ਤੋ. ਮਨਂ ਵੁਲ਼੍ਹੋ ਅਹੋਸੀਤਿ ਈਸਕਂ ਅਪ੍ਪਤ੍ਤਵੁਲ਼੍ਹਭਾਵੋ ਅਹੋਸਿ. ਸਾ ਕਿਰ ਨਦੀ ਗਿਜ੍ਝਕੂਟਤੋ ਓਤਰਿਤ੍ਵਾ ਚਣ੍ਡੇਨ ਸੋਤੇਨ ਵਹਤਿ. ਤਤ੍ਥ ਵੇਗੇਨ ਆਗਚ੍ਛਨ੍ਤਂ ਉਦਕਂ ਅਮਨਸਿਕਰੋਨ੍ਤੋ ਥੇਰੋ ਮਨਂ ਵੁਲ਼੍ਹੋ ਅਹੋਸਿ, ਨ ਪਨ ਵੁਲ਼੍ਹੋ, ਉਦਕਬ੍ਭਾਹਤਾਨਿਸ੍ਸ ਚੀਵਰਾਨਿ ਅਲ੍ਲਾਨਿ ਜਾਤਾਨਿ.

੧੪੪. ਸਮ੍ਮਤਾ ਸਾ ਸੀਮਾ ਸਙ੍ਘੇਨ ਤਿਚੀਵਰੇਨ ਅਵਿਪ੍ਪਵਾਸਾ ਠਪੇਤ੍ਵਾ ਗਾਮਞ੍ਚ ਗਾਮੂਪਚਾਰਞ੍ਚਾਤਿ ਇਮਿਸ੍ਸਾ ਕਮ੍ਮਵਾਚਾਯ ਉਪ੍ਪਨ੍ਨਕਾਲਤੋ ਪਟ੍ਠਾਯ ਭਿਕ੍ਖੂਨਂ ਪੁਰਿਮਕਮ੍ਮਵਾਚਾ ਨ ਵਟ੍ਟਤਿ. ਅਯਮੇਵ ਹਿ ਥਾਵਰਾ ਹੋਤਿ. ਭਿਕ੍ਖੁਨੀਨਂ ਪਨ ਅਯਂ ਨ ਵਟ੍ਟਤਿ, ਪੁਰਿਮਾਯੇਵ ਵਟ੍ਟਤਿ. ਕਸ੍ਮਾ? ਭਿਕ੍ਖੁਨਿਸਙ੍ਘੋ ਹਿ ਅਨ੍ਤੋਗਾਮੇ ਵਸਤਿ. ਯਦਿ ਏਵਂ ਸਿਯਾ, ਸੋ ਏਤਾਯ ਕਮ੍ਮਵਾਚਾਯ ਤਿਚੀਵਰਪਰਿਹਾਰਂ ਨ ਲਭੇਯ੍ਯ, ਅਤ੍ਥਿ ਚਸ੍ਸ ਪਰਿਹਾਰੋ, ਤਸ੍ਮਾ ਪੁਰਿਮਾਯੇਵ ਵਟ੍ਟਤਿ. ਭਿਕ੍ਖੁਨਿਸਙ੍ਘਸ੍ਸ ਹਿ ਦ੍ਵੇਪਿ ਸੀਮਾਯੋ ਲਬ੍ਭਨ੍ਤਿ. ਤਤ੍ਥ ਭਿਕ੍ਖੂਨਂ ਸੀਮਂ ਅਜ੍ਝੋਤ੍ਥਰਿਤ੍ਵਾਪਿ ਤਸ੍ਸਾ ਅਨ੍ਤੋਪਿ ਭਿਕ੍ਖੁਨੀਨਂ ਸੀਮਂ ਸਮ੍ਮਨ੍ਨਿਤੁਂ ਵਟ੍ਟਤਿ. ਭਿਕ੍ਖੂਨਮ੍ਪਿ ਭਿਕ੍ਖੁਨਿਸੀਮਾਯ ਏਸੇਵ ਨਯੋ. ਨ ਹਿ ਤੇ ਅਞ੍ਞਮਞ੍ਞਸ੍ਸ ਕਮ੍ਮੇ ਗਣਪੂਰਕਾ ਹੋਨ੍ਤਿ, ਨ ਕਮ੍ਮਵਾਚਂ ਵਗ੍ਗਂ ਕਰੋਨ੍ਤਿ. ਏਤ੍ਥ ਚ ਨਿਗਮਨਗਰਾਨਮ੍ਪਿ ਗਾਮੇਨੇਵ ਸਙ੍ਗਹੋ ਵੇਦਿਤਬ੍ਬੋ.

ਗਾਮੂਪਚਾਰੋਤਿ ਪਰਿਕ੍ਖਿਤ੍ਤਸ੍ਸ ਪਰਿਕ੍ਖੇਪੋ, ਅਪਰਿਕ੍ਖਿਤ੍ਤਸ੍ਸ ਪਰਿਕ੍ਖੇਪੋਕਾਸੋ. ਤੇਸੁ ਅਧਿਟ੍ਠਿਤਤੇਚੀਵਰਿਕੋ ਭਿਕ੍ਖੁ ਪਰਿਹਾਰਂ ਨ ਲਭਤਿ. ਇਤਿ ਭਿਕ੍ਖੂਨਂ ਅਵਿਪ੍ਪਵਾਸਸੀਮਾ ਗਾਮਞ੍ਚ ਗਾਮੂਪਚਾਰਞ੍ਚ ਨ ਓਤ੍ਥਰਤਿ, ਸਮਾਨਸਂਵਾਸਕਸੀਮਾਵ ਓਤ੍ਥਰਤਿ. ਸਮਾਨਸਂਵਾਸਕਸੀਮਾ ਚੇਤ੍ਥ ਅਤ੍ਤਨੋ ਧਮ੍ਮਤਾਯ ਗਚ੍ਛਤਿ. ਅਵਿਪ੍ਪਵਾਸਸੀਮਾ ਪਨ ਯਤ੍ਥ ਸਮਾਨਸਂਵਾਸਕਸੀਮਾ, ਤਤ੍ਥੇਵ ਗਚ੍ਛਤਿ. ਨ ਹਿ ਤਸ੍ਸਾ ਵਿਸੁਂ ਨਿਮਿਤ੍ਤਕਿਤ੍ਤਨਂ ਅਤ੍ਥਿ, ਤਤ੍ਥ ਸਚੇ ਅਵਿਪ੍ਪਵਾਸਾਯ ਸਮ੍ਮੁਤਿਕਾਲੇ ਗਾਮੋ ਅਤ੍ਥਿ, ਤਂ ਸਾ ਨ ਓਤ੍ਥਰਤਿ. ਸਚੇ ਪਨ ਸਮ੍ਮਤਾਯ ਸੀਮਾਯ ਪਚ੍ਛਾ ਗਾਮੋ ਨਿਵਿਸਤਿ, ਸੋਪਿ ਸੀਮਾਸਙ੍ਖ੍ਯਮੇਵ ਗਚ੍ਛਤਿ. ਯਥਾ ਚ ਪਚ੍ਛਾ ਨਿਵਿਟ੍ਠੋ, ਏਵਂ ਪਠਮਂ ਨਿਵਿਟ੍ਠਸ੍ਸ ਪਚ੍ਛਾ ਵਡ੍ਢਿਤਪ੍ਪਦੇਸੋਪਿ ਸੀਮਾਸਙ੍ਖ੍ਯਮੇਵ ਗਚ੍ਛਤਿ. ਸਚੇਪਿ ਸੀਮਾਸਮ੍ਮੁਤਿਕਾਲੇ ਗੇਹਾਨਿ ਕਤਾਨਿ, ਪਵਿਸਿਸ੍ਸਾਮਾਤਿ ਆਲਯੋਪਿ ਅਤ੍ਥਿ, ਮਨੁਸ੍ਸਾ ਪਨ ਅਪ੍ਪਵਿਟ੍ਠਾ, ਪੋਰਾਣਕਗਾਮਂ ਵਾ ਸਗੇਹਮੇਵ ਛਡ੍ਡੇਤ੍ਵਾ ਅਞ੍ਞਤ੍ਥ ਗਤਾ, ਅਗਾਮੋਯੇਵ ਏਸ, ਸੀਮਾ ਓਤ੍ਥਰਤਿ. ਸਚੇ ਪਨ ਏਕਮ੍ਪਿ ਕੁਲਂ ਪਵਿਟ੍ਠਂ ਵਾ ਆਗਤਂ ਵਾ ਅਤ੍ਥਿ, ਗਾਮੋਯੇਵ ਸੀਮਾ ਨ ਓਤ੍ਥਰਤਿ.

ਏਵਞ੍ਚ ਪਨ ਭਿਕ੍ਖਵੇ ਤਿਚੀਵਰੇਨ ਅਵਿਪ੍ਪਵਾਸੋ ਸਮੂਹਨ੍ਤਬ੍ਬੋਤਿ ਏਤ੍ਥ ਸਮੂਹਨਨ੍ਤੇਨ ਭਿਕ੍ਖੁਨਾ ਵਤ੍ਤਂ ਜਾਨਿਤਬ੍ਬਂ. ਤਤ੍ਰਿਦਂ ਵਤ੍ਤਂ – ਖਣ੍ਡਸੀਮਾਯ ਠਤ੍ਵਾ ਅਵਿਪ੍ਪਵਾਸਸੀਮਾ ਨ ਸਮੂਹਨ੍ਤਬ੍ਬਾ, ਤਥਾ ਅਵਿਪ੍ਪਵਾਸਸੀਮਾਯ ਠਤ੍ਵਾ ਖਣ੍ਡਸੀਮਾਪਿ. ਖਣ੍ਡਸੀਮਾਯਂ ਪਨ ਠਿਤੇਨ ਖਣ੍ਡਸੀਮਾਵ ਸਮੂਹਨਿਤਬ੍ਬਾ, ਤਥਾ ਇਤਰਾਯ ਠਿਤੇਨ ਇਤਰਾ. ਸੀਮਂ ਨਾਮ ਦ੍ਵੀਹਿ ਕਾਰਣੇਹਿ ਸਮੂਹਨਨ੍ਤਿ ਪਕਤਿਯਾ ਖੁਦ੍ਦਕਂ ਪੁਨ ਆਵਾਸਵਡ੍ਢਨਤ੍ਥਾਯ ਮਹਤਿਂ ਵਾ ਕਾਤੁਂ; ਪਕਤਿਯਾ ਮਹਤਿਂ ਪੁਨ ਅਞ੍ਞੇਸਂ ਵਿਹਾਰੋਕਾਸਦਾਨਤ੍ਥਾਯ ਖੁਦ੍ਦਕਂ ਵਾ ਕਾਤੁਂ. ਤਤ੍ਥ ਸਚੇ ਖਣ੍ਡਸੀਮਞ੍ਚ ਅਵਿਪ੍ਪਵਾਸਸੀਮਞ੍ਚ ਜਾਨਨ੍ਤਿ, ਸਮੂਹਨਿਤੁਞ੍ਚੇਵ ਬਨ੍ਧਿਤੁਞ੍ਚ ਸਕ੍ਖਿਸ੍ਸਨ੍ਤਿ. ਖਣ੍ਡਸੀਮਂ ਪਨ ਜਾਨਨ੍ਤਾ ਅਵਿਪ੍ਪਵਾਸਂ ਅਜਾਨਨ੍ਤਾਪਿ ਸਮੂਹਨਿਤੁਞ੍ਚੇਵ ਬਨ੍ਧਿਤੁਞ੍ਚ ਸਕ੍ਖਿਸ੍ਸਨ੍ਤਿ. ਖਣ੍ਡਸੀਮਂ ਅਜਾਨਨ੍ਤਾ ਅਵਿਪ੍ਪਵਾਸਂਯੇਵ ਜਾਨਨ੍ਤਾ ਚੇਤਿਯਙ੍ਗਣਬੋਧਿਯਙ੍ਗਣਉਪੋਸਥਾਗਾਰਾਦੀਸੁ ਨਿਰਾਸਙ੍ਕਟ੍ਠਾਨੇਸੁ ਠਤ੍ਵਾ ਅਪ੍ਪੇਵ ਨਾਮ ਸਮੂਹਨਿਤੁਂ ਸਕ੍ਖਿਸ੍ਸਨ੍ਤਿ, ਪਟਿਬਨ੍ਧਿਤੁਂ ਪਨ ਨ ਸਕ੍ਖਿਸ੍ਸਨ੍ਤੇਵ. ਸਚੇ ਬਨ੍ਧੇਯ੍ਯੁਂ, ਸੀਮਾਸਮ੍ਭੇਦਂ ਕਤ੍ਵਾ ਵਿਹਾਰਂ ਅਵਿਹਾਰਂ ਕਰੇਯ੍ਯੁਂ, ਤਸ੍ਮਾ ਨ ਸਮੂਹਨਿਤਬ੍ਬਾ. ਯੇ ਪਨ ਉਭੋਪਿ ਨ ਜਾਨਨ੍ਤਿ, ਤੇਨੇਵ ਸਮੂਹਨਿਤੁਂ ਨ ਬਨ੍ਧਿਤੁਂ ਸਕ੍ਖਿਸ੍ਸਨ੍ਤਿ. ਅਯਞ੍ਹਿ ਸੀਮਾ ਨਾਮ ਕਮ੍ਮਵਾਚਾਯ ਵਾ ਅਸੀਮਾ ਹੋਤਿ ਸਾਸਨਨ੍ਤਰਧਾਨੇਨ ਵਾ, ਨ ਚ ਸਕ੍ਕਾ ਸੀਮਂ ਅਜਾਨਨ੍ਤੇਹਿ ਕਮ੍ਮਵਾਚਾ ਕਾਤੁਂ, ਤਸ੍ਮਾ ਨ ਸਮੂਹਨਿਤਬ੍ਬਾ. ਸਾਧੁਕਂ ਪਨ ਞਤ੍ਵਾਯੇਵ ਸਮੂਹਨਿਤਬ੍ਬਾ ਚ ਬਨ੍ਧਿਤਬ੍ਬਾ ਚਾਤਿ.

ਗਾਮਸੀਮਾਦਿਕਥਾ

੧੪੭. ਏਵਂ ਬਦ੍ਧਸੀਮਾਵਸੇਨ ਸਮਾਨਸਂਵਾਸਞ੍ਚ ਏਕੂਪੋਸਥਭਾਵਞ੍ਚ ਦਸ੍ਸੇਤ੍ਵਾ ਇਦਾਨਿ ਅਬਦ੍ਧਸੀਮੇਸੁਪਿ ਓਕਾਸੇਸੁ ਤਂ ਦਸ੍ਸੇਨ੍ਤੋ ‘‘ਅਸਮ੍ਮਤਾਯ, ਭਿਕ੍ਖਵੇ, ਸੀਮਾਯ ਅਟ੍ਠਪਿਤਾਯਾ’’ਤਿਆਦਿਮਾਹ. ਤਤ੍ਥ ਅਟ੍ਠਪਿਤਾਯਾਤਿ ਅਪਰਿਚ੍ਛਿਨ੍ਨਾਯ. ਗਾਮਗ੍ਗਹਣੇਨ ਚੇਤ੍ਥ ਨਗਰਮ੍ਪਿ ਗਹਿਤਮੇਵ ਹੋਤਿ. ਤਤ੍ਥ ਯਤ੍ਤਕੇ ਪਦੇਸੇ ਤਸ੍ਸ ਗਾਮਸ੍ਸ ਭੋਜਕਾ ਬਲਿਂ ਲਭਨ੍ਤਿ, ਸੋ ਪਦੇਸੋ ਅਪ੍ਪੋ ਵਾ ਹੋਤੁ ਮਹਨ੍ਤੋ ਵਾ, ਗਾਮਸੀਮਾਤ੍ਵੇਵ ਸਙ੍ਖ੍ਯਂ ਗਚ੍ਛਤਿ. ਨਗਰਨਿਗਮਸੀਮਾਸੁਪਿ ਏਸੇਵ ਨਯੋ. ਯਮ੍ਪਿ ਏਕਸ੍ਮਿਂਯੇਵ ਗਾਮਖੇਤ੍ਤੇ ਏਕਂ ਪਦੇਸਂ ‘‘ਅਯਂ ਵਿਸੁਂ ਗਾਮੋ ਹੋਤੂ’’ਤਿ ਪਰਿਚ੍ਛਿਨ੍ਦਿਤ੍ਵਾ ਰਾਜਾ ਕਸ੍ਸਚਿ ਦੇਤਿ, ਸੋਪਿ ਵਿਸੁਂਗਾਮਸੀਮਾ ਹੋਤਿਯੇਵ. ਤਸ੍ਮਾ ਸਾ ਚ ਇਤਰਾ ਚ ਪਕਤਿਗਾਮਨਗਰਨਿਗਮਸੀਮਾ ਬਦ੍ਧਸੀਮਾਸਦਿਸਾਯੇਵ ਹੋਨ੍ਤਿ, ਕੇਵਲਂ ਪਨ ਤਿਚੀਵਰਵਿਪ੍ਪਵਾਸਪਰਿਹਾਰਂ ਨ ਲਭਨ੍ਤਿ.

ਏਵਂ ਗਾਮਨ੍ਤਵਾਸੀਨਂ ਸੀਮਾਪਰਿਚ੍ਛੇਦਂ ਦਸ੍ਸੇਤ੍ਵਾ ਇਦਾਨਿ ਆਰਞ੍ਞਕਾਨਂ ਸੀਮਾਪਰਿਚ੍ਛੇਦਂ ਦਸ੍ਸੇਨ੍ਤੋ ‘‘ਅਗਾਮਕੇ ਚੇ’’ਤਿਆਦਿਮਾਹ. ਤਤ੍ਥ ਅਗਾਮਕੇ ਚੇਤਿ ਗਾਮਨਿਗਮਨਗਰਸੀਮਾਹਿ ਅਪਰਿਚ੍ਛਿਨ੍ਨੇ ਅਟਵਿਪ੍ਪਦੇਸੇ. ਅਥ ਵਾ ਅਗਾਮਕੇ ਚੇਤਿ ਵਿਜ੍ਝਾਟਵਿਸਦਿਸੇ ਅਰਞ੍ਞੇ ਭਿਕ੍ਖੁ ਵਸਤਿ, ਅਥਸ੍ਸ ਠਿਤੋਕਾਸਤੋ ਸਮਨ੍ਤਾ ਸਤ੍ਤਬ੍ਭਨ੍ਤਰਾ ਸਮਾਨਸਂਵਾਸਕਸੀਮਾਤਿ ਅਤ੍ਥੋ. ਅਯਂ ਸੀਮਾ ਤਿਚੀਵਰਵਿਪ੍ਪਵਾਸਪਰਿਹਾਰਮ੍ਪਿ ਲਭਤਿ. ਤਤ੍ਥ ਏਕਂ ਅਬ੍ਭਨ੍ਤਰਂ ਅਟ੍ਠਵੀਸਤਿ ਹਤ੍ਥਪ੍ਪਮਾਣਂ ਹੋਤਿ. ਮਜ੍ਝੇ ਠਿਤਸ੍ਸ ਸਮਨ੍ਤਾ ਸਤ੍ਤਬ੍ਭਨ੍ਤਰਾ ਵਿਨਿਬ੍ਬੇਧੇਨ ਚੁਦ੍ਦਸ ਹੋਨ੍ਤਿ. ਸਚੇ ਦ੍ਵੇ ਸਙ੍ਘਾ ਵਿਸੁਂ ਵਿਨਯਕਮ੍ਮਾਨਿ ਕਰੋਨ੍ਤਿ, ਦ੍ਵਿਨ੍ਨਂ ਸਤ੍ਤਬ੍ਭਨ੍ਤਰਾਨਂ ਅਨ੍ਤਰੇ ਅਞ੍ਞਂ ਏਕਂ ਸਤ੍ਤਬ੍ਭਨ੍ਤਰਂ ਉਪਚਾਰਤ੍ਥਾਯ ਠਪੇਤਬ੍ਬਂ. ਸੇਸਾ ਸਤ੍ਤਬ੍ਭਨ੍ਤਰਸੀਮਕਥਾ ਮਹਾਵਿਭਙ੍ਗੇ ਉਦੋਸਿਤਸਿਕ੍ਖਾਪਦਵਣ੍ਣਨਾਯਂ ਵੁਤ੍ਤਨਯੇਨ ਗਹੇਤਬ੍ਬਾ.

ਸਬ੍ਬਾ ਭਿਕ੍ਖਵੇ ਨਦੀ ਅਸੀਮਾਤਿ ਯਾ ਕਾਚਿ ਨਦੀਲਕ੍ਖਣਪ੍ਪਤ੍ਤਾ ਨਦੀ ਨਿਮਿਤ੍ਤਾਨਿ ਕਿਤ੍ਤੇਤ੍ਵਾ ‘‘ਏਤਂ ਬਦ੍ਧਸੀਮਂ ਕਰੋਮਾ’’ਤਿ ਕਤਾਪਿ ਅਸੀਮਾਵ ਹੋਤਿ, ਸਾ ਪਨ ਅਤ੍ਤਨੋ ਸਭਾਵੇਨੇਵ ਬਦ੍ਧਸੀਮਾਸਦਿਸਾ, ਸਬ੍ਬਮੇਤ੍ਥ ਸਙ੍ਘਕਮ੍ਮਂ ਕਾਤੁਂ ਵਟ੍ਟਤਿ. ਸਮੁਦ੍ਦਜਾਤਸ੍ਸਰੇਸੁਪਿ ਏਸੇਵ ਨਯੋ. ਏਤ੍ਥ ਚ ਜਾਤਸ੍ਸਰੋ ਨਾਮ ਯੇਨ ਕੇਨਚਿ ਖਣਿਤ੍ਵਾ ਅਕਤੋ ਸਯਂਜਾਤਸੋਬ੍ਭੋ ਸਮਨ੍ਤਤੋ ਆਗਤੇਨ ਉਦਕੇਨ ਪੂਰਿਤੋ ਤਿਟ੍ਠਤਿ.

ਏਵਂ ਨਦੀਸਮੁਦ੍ਦਜਾਤਸ੍ਸਰਾਨਂ ਬਦ੍ਧਸੀਮਾਭਾਵਂ ਪਟਿਕ੍ਖਿਪਿਤ੍ਵਾ ਪੁਨ ਤਤ੍ਥ ਅਬਦ੍ਧਸੀਮਾਪਅਚ੍ਛੇਦਂ ਦਸ੍ਸੇਨ੍ਤੋ ‘‘ਨਦਿਯਾ ਵਾ ਭਿਕ੍ਖਵੇ’’ਤਿਆਦਿਮਾਹ. ਤਤ੍ਥ ਯਂ ਮਜ੍ਝਿਮਸ੍ਸ ਪੁਰਿਸਸ੍ਸ ਸਮਨ੍ਤਾ ਉਦਕੁਕ੍ਖੇਪਾਤਿ ਯਂ ਠਾਨਂ ਮਜ੍ਝਿਮਸ੍ਸ ਪੁਰਿਸਸ੍ਸ ਸਮਨ੍ਤਤੋ ਉਦਕੁਕ੍ਖੇਪੇਨ ਪਰਿਚ੍ਛਿਨ੍ਨਂ. ਕਥਂ ਪਨ ਉਦਕਂ ਉਕ੍ਖਿਪਿਤਬ੍ਬਂ? ਯਥਾ ਅਕ੍ਖਧੁਤ੍ਤਾ ਦਾਰੁਗੁਲ਼ਂ ਖਿਪਨ੍ਤਿ, ਏਵਂ ਉਦਕਂ ਵਾ ਵਾਲਿਕਂ ਵਾ ਹਤ੍ਥੇਨ ਗਹੇਤ੍ਵਾ ਥਾਮਮਜ੍ਝਿਮੇਨ ਪੁਰਿਸੇਨ ਸਬ੍ਬਥਾਮੇਨ ਖਿਪਿਤਬ੍ਬਂ. ਯਤ੍ਥ ਏਵਂ ਖਿਤ੍ਤਂ ਉਦਕਂ ਵਾ ਵਾਲਿਕਾ ਵਾ ਪਤਤਿ, ਅਯਮੇਕੋ ਉਦਕੁਕ੍ਖੇਪੋ. ਤਸ੍ਸ ਅਨ੍ਤੋ ਹਤ੍ਥਪਾਸਂ ਵਿਜਹਿਤ੍ਵਾ ਠਿਤੋ ਕਮ੍ਮਂ ਕੋਪੇਤਿ. ਯਾਵ ਪਰਿਸਾ ਵਡ੍ਢਤਿ, ਤਾਵ ਸੀਮਾਪਿ ਵਡ੍ਢਤਿ. ਪਰਿਸਪਰਿਯਨ੍ਤਤੋ ਉਦਕੁਕ੍ਖੇਪੋਯੇਵ ਪਮਾਣਂ. ਜਾਤਸ੍ਸਰਸਮੁਦ੍ਦੇਸੁਪਿ ਏਸੇਵ ਨਯੋ.

ਏਤ੍ਥ ਚ ਸਚੇ ਨਦੀ ਨਾਤਿਦੀਘਾ ਹੋਤਿ, ਪਭਵਤੋ ਪਟ੍ਠਾਯ ਯਾਵ ਮੁਖਦ੍ਵਾਰਾ ਸਬ੍ਬਤ੍ਥ ਸਙ੍ਘੋ ਨਿਸੀਦਤਿ, ਉਦਕੁਕ੍ਖੇਪਸੀਮਾਕਮ੍ਮਂ ਨਤ੍ਥਿ, ਸਕਲਾਪਿ ਨਦੀ ਏਤੇਸਂਯੇਵ ਭਿਕ੍ਖੂਨਂ ਪਹੋਤਿ. ਯਂ ਪਨ ਮਹਾਸੁਮਤ੍ਥੇਰੇਨ ਵੁਤ੍ਤਂ ‘‘ਯੋਜਨਂ ਪਵਤ੍ਤਮਾਨਾਯੇਵ ਨਦੀ, ਤਤ੍ਰਾਪਿ ਉਪਰਿ ਅਦ੍ਧਯੋਜਨਂ ਪਹਾਯ ਹੇਟ੍ਠਾ ਅਦ੍ਧਯੋਜਨੇ ਕਮ੍ਮਂ ਕਾਤੁਂ ਵਟ੍ਟਤੀ’’ਤਿ, ਤਂ ਮਹਾਪਦੁਮਤ੍ਥੇਰੇਨੇਵ ਪਟਿਕ੍ਖਿਤ੍ਤਂ. ਭਗਵਤਾ ਹਿ ‘‘ਤਿਮਣ੍ਡਲਂ ਪਟਿਚ੍ਛਾਦੇਤ੍ਵਾ ਯਤ੍ਥ ਕਤ੍ਥਚਿ ਉਤ੍ਤਰਨ੍ਤਿਯਾ ਭਿਕ੍ਖੁਨਿਯਾ ਅਨ੍ਤਰਵਾਸਕੋ ਤੇਮਿਯਤੀ’’ਤਿ ਇਦਂ ਨਦਿਯਾ ਪਮਾਣਂ ਵੁਤ੍ਤਂ, ਨ ਯੋਜਨਂ ਵਾ ਅਦ੍ਧਯੋਜਨਂ ਵਾ. ਤਸ੍ਮਾ ਯਾ ਇਮਸ੍ਸ ਸੁਤ੍ਤਸ੍ਸ ਵਸੇਨ ਪੁਬ੍ਬੇ ਵੁਤ੍ਤਲਕ੍ਖਣਾ ਨਦੀ, ਤਸ੍ਸਾ ਪਭਵਤੋ ਪਟ੍ਠਾਯ ਸਙ੍ਘਕਮ੍ਮਂ ਕਾਤੁਂ ਵਟ੍ਟਤੀਤਿ. ਸਚੇ ਪਨੇਤ੍ਥ ਬਹੂ ਭਿਕ੍ਖੂ ਵਿਸੁਂ ਵਿਸੁਂ ਕਮ੍ਮਂ ਕਰੋਨ੍ਤਿ, ਸਬ੍ਬੇਹਿ ਅਤ੍ਤਨੋ ਚ ਅਞ੍ਞੇਸਞ੍ਚ ਉਦਕੁਕ੍ਖੇਪਪਰਿਚ੍ਛੇਦਸ੍ਸ ਅਨ੍ਤਰਾ ਅਞ੍ਞੋ ਉਦਕੁਕ੍ਖੇਪੋ ਸੀਮਨ੍ਤਰਿਕਤ੍ਥਾਯ ਠਪੇਤਬ੍ਬੋ. ਤਤੋ ਅਧਿਕਂ ਵਟ੍ਟਤਿਯੇਵ, ਊਨਕਂ ਪਨ ਨ ਵਟ੍ਟਤੀਤਿ ਵੁਤ੍ਤਂ. ਜਾਤਸ੍ਸਰਸਮੁਦ੍ਦੇਸੁਪਿ ਏਸੇਵ ਨਯੋ.

ਨਦਿਯਾ ਪਨ ਕਮ੍ਮਂ ਕਰਿਸ੍ਸਾਮਾਤਿ ਗਤੇਹਿ ਸਚੇ ਨਦੀ ਪਰਿਪੁਣ੍ਣਾ ਹੋਤਿ ਸਮਤਿਤ੍ਤਿਕਾ, ਉਦਕਸਾਟਿਕਂ ਨਿਵਾਸੇਤ੍ਵਾਪਿ ਅਨ੍ਤੋਨਦਿਯਂਯੇਵ ਕਮ੍ਮਂ ਕਾਤਬ੍ਬਂ. ਸਚੇ ਨ ਸਕ੍ਕੋਨ੍ਤਿ, ਨਾਵਾਯਪਿ ਠਤ੍ਵਾ ਕਾਤਬ੍ਬਂ. ਗਚ੍ਛਨ੍ਤਿਯਾ ਪਨ ਨਾਵਾਯ ਕਾਤੁਂ ਨ ਵਟ੍ਟਤਿ. ਕਸ੍ਮਾ? ਉਦਕੁਕ੍ਖੇਪਮਤ੍ਤਮੇਵ ਹਿ ਸੀਮਾ, ਤਂ ਨਾਵਾ ਸੀਘਮੇਵ ਅਤਿਕ੍ਕਾਮੇਤਿ. ਏਵਂ ਸਤਿ ਅਞ੍ਞਿਸ੍ਸਾ ਸੀਮਾਯ ਞਤ੍ਤਿ ਅਞ੍ਞਿਸ੍ਸਾ ਅਨੁਸਾਵਨਾ ਹੋਤਿ, ਤਸ੍ਮਾ ਨਾਵਂ ਅਰਿਤ੍ਤੇਨ ਵਾ ਠਪੇਤ੍ਵਾ ਪਾਸਾਣੇ ਵਾ ਲਮ੍ਬਿਤ੍ਵਾ ਅਨ੍ਤੋਨਦਿਯਂ ਜਾਤਰੁਕ੍ਖੇ ਵਾ ਬਨ੍ਧਿਤ੍ਵਾ ਕਮ੍ਮਂ ਕਾਤਬ੍ਬਂ. ਅਨ੍ਤੋਨਦਿਯਂ ਬਦ੍ਧਅਟ੍ਟਕੇਪਿ ਅਨ੍ਤੋਨਦਿਯਂ ਜਾਤਰੁਕ੍ਖੇਪਿ ਠਿਤੇਹਿ ਕਾਤੁਂ ਵਟ੍ਟਤਿ.

ਸਚੇ ਪਨ ਰੁਕ੍ਖਸ੍ਸ ਸਾਖਾ ਵਾ ਤਤੋ ਨਿਕ੍ਖਨ੍ਤਪਾਰੋਹੋ ਵਾ ਬਹਿਨਦੀਤੀਰੇ ਵਿਹਾਰਸੀਮਾਯ ਵਾ ਗਾਮਸੀਮਾਯ ਵਾ ਪਤਿਟ੍ਠਿਤੋ, ਸੀਮਂ ਵਾ ਸੋਧੇਤ੍ਵਾ ਸਾਖਂ ਵਾ ਛਿਨ੍ਦਿਤ੍ਵਾ ਕਮ੍ਮਂ ਕਾਤਬ੍ਬਂ. ਬਹਿਨਦੀਤੀਰੇ ਜਾਤਰੁਕ੍ਖਸ੍ਸ ਅਨ੍ਤੋਨਦਿਯਂ ਪਵਿਟ੍ਠਸਾਖਾਯ ਵਾ ਪਾਰੋਹੇ ਵਾ ਨਾਵਂ ਬਨ੍ਧਿਤ੍ਵਾ ਕਮ੍ਮਂ ਕਾਤੁਂ ਨ ਵਟ੍ਟਤਿ. ਕਰੋਨ੍ਤੇਹਿ ਸੀਮਾ ਵਾ ਸੋਧੇਤਬ੍ਬਾ, ਛਿਨ੍ਦਿਤ੍ਵਾ ਵਾਸ੍ਸ ਬਹਿਪਤਿਟ੍ਠਿਤਭਾਵੋ ਨਾਸੇਤਬ੍ਬੋ. ਨਦੀਤੀਰੇ ਪਨ ਖਾਣੁਕਂ ਕੋਟ੍ਟੇਤ੍ਵਾ ਤਤ੍ਥ ਬਦ੍ਧਨਾਵਾਯ ਨ ਵਟ੍ਟਤਿਯੇਵ.

ਨਦਿਯਂ ਸੇਤੁਂ ਕਰੋਨ੍ਤਿ, ਸਚੇ ਅਨ੍ਤੋਨਦਿਯਂਯੇਵ ਸੇਤੁ ਵਾ ਸੇਤੁਪਾਦਾ ਵਾ, ਸੇਤੁਮ੍ਹਿ ਠਿਤੇਹਿ ਕਮ੍ਮਂ ਕਾਤੁਂ ਵਟ੍ਟਤਿ. ਸਚੇ ਪਨ ਸੇਤੁ ਵਾ ਸੇਤੁਪਾਦਾ ਵਾ ਬਹਿਤੀਰੇ ਪਤਿਟ੍ਠਿਤਾ, ਕਮ੍ਮਂ ਕਾਤੁਂ ਨ ਵਟ੍ਟਤਿ, ਸੀਮਂ ਸੋਧੇਤ੍ਵਾ ਕਾਤਬ੍ਬਂ. ਅਥ ਸੇਤੁਪਾਦਾ ਅਨ੍ਤੋ, ਸੇਤੁ ਪਨ ਉਭਿਨ੍ਨਮ੍ਪਿ ਤੀਰਾਨਂ ਉਪਰਿਆਕਾਸੇ ਠਿਤੋ, ਵਟ੍ਟਤਿ. ਅਨ੍ਤੋਨਦਿਯਂ ਪਾਸਾਣੋ ਵਾ ਦੀਪਕੋ ਵਾ ਹੋਤਿ, ਤਸ੍ਸ ਯਤ੍ਤਕਂ ਪਦੇਸਂ ਪੁਬ੍ਬੇ ਵੁਤ੍ਤਪ੍ਪਕਾਰੇ ਪਕਤਿਵਸ੍ਸਕਾਲੇ ਵਸ੍ਸਾਨਸ੍ਸ ਚਤੂਸੁ ਮਾਸੇਸੁ ਉਦਕਂ ਓਤ੍ਥਰਤਿ, ਸੋ ਨਦੀਸਙ੍ਖ੍ਯਮੇਵ ਗਚ੍ਛਤਿ. ਅਤਿਵੁਟ੍ਠਿਕਾਲੇ ਪਨ ਓਘੇਨ ਓਤ੍ਥਟੋਕਾਸੋ ਨ ਗਹੇਤਬ੍ਬੋ, ਸੋ ਹਿ ਗਾਮਸੀਮਾਸਙ੍ਖ੍ਯਮੇਵ ਗਚ੍ਛਤਿ.

ਨਦਿਤੋ ਮਾਤਿਕਂ ਨੀਹਰਨ੍ਤਾ ਨਦਿਯਂ ਆਵਰਣਂ ਕਰੋਨ੍ਤਿ, ਤਞ੍ਚੇ ਓਤ੍ਥਰਿਤ੍ਵਾ ਵਾ ਵਿਨਿਬ੍ਬਿਜ੍ਝਿਤ੍ਵਾ ਵਾ ਉਦਕਂ ਗਚ੍ਛਤਿ, ਸਬ੍ਬਤ੍ਥ ਪਵਤ੍ਤਨਟ੍ਠਾਨੇ ਕਮ੍ਮਂ ਕਾਤੁਂ ਵਟ੍ਟਤਿ. ਸਚੇ ਪਨ ਆਵਰਣੇਨ ਵਾ ਕੋਟ੍ਟਕਬਨ੍ਧਨੇਨ ਵਾ ਸੋਤਂ ਪਚ੍ਛਿਜ੍ਜਤਿ, ਉਦਕਂ ਨਪ੍ਪਵਤ੍ਤਤਿ, ਅਪ੍ਪਵਤ੍ਤਨਟ੍ਠਾਨੇ ਕਮ੍ਮਂ ਕਾਤੁਂ ਨ ਵਟ੍ਟਤਿ. ਆਵਰਣਮਤ੍ਥਕੇਪਿ ਕਾਤੁਂ ਨ ਵਟ੍ਟਤਿ. ਸਚੇ ਕੋਚਿ ਆਵਰਣਪ੍ਪਦੇਸੋ ਪੁਬ੍ਬੇ ਵੁਤ੍ਤਪਾਸਾਣਦੀਪਕਪ੍ਪਦੇਸੋ ਵਿਯ ਉਦਕੇਨ ਅਜ੍ਝੋਤ੍ਥਰਿਯਤਿ, ਤਤ੍ਥ ਵਟ੍ਟਤਿ. ਸੋ ਹਿ ਨਦੀਸਙ੍ਖ੍ਯਮੇਵ ਗਚ੍ਛਤਿ. ਨਦਿਂ ਵਿਨਾਸੇਤ੍ਵਾ ਤਲ਼ਾਕਂ ਕਰੋਨ੍ਤਿ, ਹੇਟ੍ਠਾ ਪਾਲ਼ਿ ਬਦ੍ਧਾ, ਉਦਕਂ ਆਗਨ੍ਤ੍ਵਾ ਤਲ਼ਾਕਂ ਪੂਰੇਤ੍ਵਾ ਤਿਟ੍ਠਤਿ, ਏਤ੍ਥ ਕਮ੍ਮਂ ਕਾਤੁਂ ਨ ਵਟ੍ਟਤਿ. ਉਪਰਿ ਪਵਤ੍ਤਨਟ੍ਠਾਨੇ ਹੇਟ੍ਠਾ ਚ ਛਡ੍ਡਿਤਮੋਦਕਂ ਨਦਿਂ ਓਤ੍ਥਰਿਤ੍ਵਾ ਸਨ੍ਦਨਟ੍ਠਾਨਤੋ ਪਟ੍ਠਾਯ ਵਟ੍ਟਤਿ. ਦੇਵੇ ਅਵਸ੍ਸਨ੍ਤੇ ਹੇਮਨ੍ਤਗਿਮ੍ਹੇਸੁ ਵਾ ਸੁਕ੍ਖਨਦਿਯਾਪਿ ਵਟ੍ਟਤਿ. ਨਦਿਤੋ ਨੀਹਟਮਾਤਿਕਾਯ ਨ ਵਟ੍ਟਤਿ. ਸਚੇ ਸਾ ਕਾਲਨ੍ਤਰੇਨ ਭਿਜ੍ਜਿਤ੍ਵਾ ਨਦੀ ਹੋਤਿ, ਵਟ੍ਟਤਿ. ਕਾਚਿ ਨਦੀ ਕਾਲਨ੍ਤਰੇਨ ਉਪ੍ਪਤਿਤ੍ਵਾ ਗਾਮਨਿਗਮਸੀਮਂ ਓਤ੍ਥਰਿਤ੍ਵਾ ਪਵਤ੍ਤਤਿ, ਨਦੀਯੇਵ ਹੋਤਿ, ਕਮ੍ਮਂ ਕਾਤੁਂ ਵਟ੍ਟਤਿ. ਸਚੇ ਪਨ ਵਿਹਾਰਸੀਮਂ ਓਤ੍ਥਰਤਿ, ਵਿਹਾਰਸੀਮਾਤ੍ਵੇਵ ਸਙ੍ਖ੍ਯਂ ਗਚ੍ਛਤਿ.

ਸਮੁਦ੍ਦੇਪਿ ਕਮ੍ਮਂ ਕਰੋਨ੍ਤੇਹਿ ਯਂ ਪਦੇਸਂ ਉਦ੍ਧਂ ਵਡ੍ਢਨਉਦਕਂ ਵਾ ਪਕਤਿਵੀਚਿ ਵਾ ਵੇਗੇਨ ਆਗਨ੍ਤ੍ਵਾ ਓਤ੍ਥਰਤਿ, ਤਤ੍ਥ ਕਾਤੁਂ ਨ ਵਟ੍ਟਤਿ. ਯਸ੍ਮਿਂ ਪਨ ਪਦੇਸੇ ਪਕਤਿਵੀਚਿਯੋ ਓਤ੍ਥਰਿਤ੍ਵਾ ਸਣ੍ਠਹਨ੍ਤਿ, ਸੋ ਉਦਕਨ੍ਤਤੋ ਪਟ੍ਠਾਯ ਅਨ੍ਤੋਸਮੁਦ੍ਦੋ ਨਾਮ, ਤਤ੍ਥ ਠਿਤੇਹਿ ਕਮ੍ਮਂ ਕਾਤਬ੍ਬਂ. ਸਚੇ ਊਮਿਵੇਗੋ ਬਾਧਤਿ, ਨਾਵਾਯ ਵਾ ਅਟ੍ਟਕੇ ਵਾ ਠਤ੍ਵਾ ਕਾਤਬ੍ਬਂ. ਤੇਸੁ ਵਿਨਿਚ੍ਛਯੋ ਨਦਿਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਸਮੁਦ੍ਦੇ ਪਿਟ੍ਠਿਪਾਸਾਣੋ ਹੋਤਿ, ਤਂ ਕਦਾਚਿ ਊਮਿਯੋ ਆਗਨ੍ਤ੍ਵਾ ਓਤ੍ਥਰਨ੍ਤਿ, ਕਦਾਚਿ ਨ ਓਤ੍ਥਰਨ੍ਤਿ, ਤਤ੍ਥ ਕਮ੍ਮਂ ਕਾਤੁਂ ਨ ਵਟ੍ਟਤਿ, ਸੋ ਹਿ ਗਾਮਸੀਮਾਸਙ੍ਖ੍ਯਮੇਵ ਗਚ੍ਛਤਿ. ਸਚੇ ਪਨ ਵੀਚੀਸੁ ਆਗਤਾਸੁਪਿ ਅਨਾਗਤਾਸੁਪਿ ਪਕਤਿਉਦਕੇਨੇਵ ਓਤ੍ਥਰਿਯਤਿ, ਵਟ੍ਟਤਿ. ਦੀਪਕੋ ਵਾ ਪਬ੍ਬਤੋ ਵਾ ਹੋਤਿ, ਸੋ ਚੇ ਦੂਰੇ ਹੋਤਿ ਮਚ੍ਛਬਨ੍ਧਾਨਂ ਅਗਮਨਪਥੇ, ਅਰਞ੍ਞਸੀਮਾਸਙ੍ਖ੍ਯਮੇਵ ਗਚ੍ਛਤਿ. ਤੇਸਂ ਗਮਨਪਰਿਯਨ੍ਤਸ੍ਸ ਓਰਤੋ ਪਨ ਗਾਮਸੀਮਾਸਙ੍ਖ੍ਯਂ ਗਚ੍ਛਤਿ. ਤਤ੍ਥ ਗਾਮਸੀਮਂ ਅਸੋਧੇਤ੍ਵਾ ਕਮ੍ਮਂ ਕਾਤੁਂ ਨ ਵਟ੍ਟਤਿ. ਸਮੁਦ੍ਦੋ ਗਾਮਸੀਮਂ ਵਾ ਨਿਗਮਸੀਮਂ ਵਾ ਓਤ੍ਥਰਿਤ੍ਵਾ ਤਿਟ੍ਠਤਿ, ਸਮੁਦ੍ਦੋਵ ਹੋਤਿ, ਤਤ੍ਥ ਕਮ੍ਮਂ ਕਾਤੁਂ ਵਟ੍ਟਤਿ. ਸਚੇ ਪਨ ਵਿਹਾਰਸੀਮਂ ਓਤ੍ਥਰਤਿ, ਵਿਹਾਰਸੀਮਾਤ੍ਵੇਵ ਸਙ੍ਖ੍ਯਂ ਗਚ੍ਛਤਿ.

ਜਾਤਸ੍ਸਰੇ ਕਮ੍ਮਂ ਕਰੋਨ੍ਤੇਹਿਪਿ ਯਤ੍ਥ ਪੁਬ੍ਬੇ ਵੁਤ੍ਤਪ੍ਪਕਾਰੇ ਵਸ੍ਸਕਾਲੇ ਵਸ੍ਸੇ ਪਚ੍ਛਿਨ੍ਨਮਤ੍ਤੇ ਪਿਵਿਤੁਂ ਵਾ ਹਤ੍ਥਪਾਦੇ ਵਾ ਧੋਵਿਤੁਂ ਉਦਕਂ ਨ ਹੋਤਿ, ਸੁਕ੍ਖਤਿ, ਅਯਂ ਨ ਜਾਤਸ੍ਸਰੋ, ਗਾਮਖੇਤ੍ਤਸਙ੍ਖ੍ਯਮੇਵ ਗਚ੍ਛਤਿ, ਤਤ੍ਥ ਕਮ੍ਮਂ ਨ ਕਾਤਬ੍ਬਂ. ਯਤ੍ਥ ਪਨ ਵੁਤ੍ਤਪ੍ਪਕਾਰੇ ਵਸ੍ਸਕਾਲੇ ਉਦਕਂ ਸਨ੍ਤਿਟ੍ਠਤਿ, ਅਯਮੇਵ ਜਾਤਸ੍ਸਰੋ. ਤਸ੍ਸ ਯਤ੍ਤਕੇ ਪਦੇਸੇ ਵਸ੍ਸਾਨਂ ਚਾਤੁਮਾਸੇ ਉਦਕਂ ਤਿਟ੍ਠਤਿ, ਤਤ੍ਥ ਕਮ੍ਮਂ ਕਾਤੁਂ ਵਟ੍ਟਤਿ. ਸਚੇ ਗਮ੍ਭੀਰਂ ਉਦਕਂ, ਅਟ੍ਟਕਂ ਬਨ੍ਧਿਤ੍ਵਾ ਤਤ੍ਥ ਠਿਤੇਹਿਪਿ ਜਾਤਸ੍ਸਰਸ੍ਸ ਅਨ੍ਤੋ ਜਾਤਰੁਕ੍ਖਮ੍ਹਿ ਬਦ੍ਧਅਟ੍ਟਕੇਪਿ ਕਾਤੁਂ ਵਟ੍ਟਤਿ. ਪਿਟ੍ਠਿਪਾਸਾਣਦੀਪਕੇਸੁ ਪਨੇਤ੍ਥ ਨਦਿਯਂ ਵੁਤ੍ਤਸਦਿਸੋਵ ਵਿਨਿਚ੍ਛਯੋ. ਸਮਵਸ੍ਸਦੇਵਕਾਲੇ ਪਹੋਨਕਜਾਤਸ੍ਸਰੋ ਪਨ ਸਚੇਪਿ ਦੁਬ੍ਬੁਟ੍ਠਿਕਾਲੇ ਵਾ ਗਿਮ੍ਹਹੇਮਨ੍ਤੇਸੁ ਵਾ ਸੁਕ੍ਖਤਿ, ਨਿਰੁਦਕੋ ਹੋਤਿ, ਤਤ੍ਥ ਸਙ੍ਘਕਮ੍ਮਂ ਕਾਤੁਂ ਵਟ੍ਟਤਿ. ਯਂ ਅਨ੍ਧਕਟ੍ਠਕਥਾਯਂ ਵੁਤ੍ਤਂ ‘‘ਸਬ੍ਬੋ ਜਾਤਸ੍ਸਰੋ ਸੁਕ੍ਖੋ ਅਨੋਦਕੋ, ਗਾਮਖੇਤ੍ਤਂਯੇਵ ਭਜਤੀ’’ਤਿ, ਤਂ ਨ ਗਹੇਤਬ੍ਬਂ. ਸਚੇ ਪਨੇਤ੍ਥ ਉਦਕਤ੍ਥਾਯ ਆਵਾਟਂ ਵਾ ਪੋਕ੍ਖਰਣੀਆਦੀਨਿ ਵਾ ਖਣਨ੍ਤਿ, ਤਂ ਠਾਨਂ ਅਜਾਤਸ੍ਸਰੋ ਹੋਤਿ, ਗਾਮਸੀਮਾਸਙ੍ਖ੍ਯਂ ਗਚ੍ਛਤਿ. ਲਾਬੁਤਿਪੁਸਕਾਦਿਵਪ੍ਪੇ ਕਤੇਪਿ ਏਸੇਵ ਨਯੋ.

ਸਚੇ ਪਨ ਤਂ ਪੂਰੇਤ੍ਵਾ ਥਲਂ ਵਾ ਕਰੋਨ੍ਤਿ, ਏਕਸ੍ਮਿਂ ਦਿਸਾਭਾਗੇ ਪਾਲ਼ਿਂ ਬਨ੍ਧਿਤ੍ਵਾ ਸਬ੍ਬਮੇਵ ਤਂ ਮਹਾਤਲ਼ਾਕਂ ਵਾ ਕਰੋਨ੍ਤਿ, ਸਬ੍ਬੋਪਿ ਅਜਾਤਸ੍ਸਰੋ ਹੋਤਿ, ਗਾਮਸੀਮਾਸਙ੍ਖ੍ਯਮੇਵ ਗਚ੍ਛਤਿ. ਲੋਣੀਪਿ ਜਾਤਸ੍ਸਰਸਙ੍ਖ੍ਯਮੇਵ ਗਚ੍ਛਤਿ. ਵਸ੍ਸਿਕੇ ਚਤ੍ਤਾਰੋ ਮਾਸੇ ਉਦਕਟ੍ਠਾਨੋਕਾਸੇ ਕਮ੍ਮਂ ਕਾਤੁਂ ਵਟ੍ਟਤੀਤਿ.

੧੪੮. ਸੀਮਾਯ ਸੀਮਂ ਸਮ੍ਭਿਨ੍ਦਨ੍ਤੀਤਿ ਅਤ੍ਤਨੋ ਸੀਮਾਯ ਪਰੇਸਂ ਬਦ੍ਧਸੀਮਂ ਸਮ੍ਭਿਨ੍ਦਨ੍ਤਿ. ਸਚੇ ਹਿ ਪੋਰਾਣਕਸ੍ਸ ਵਿਹਾਰਸ੍ਸ ਪੁਰਤ੍ਥਿਮਾਯ ਦਿਸਾਯ ਅਮ੍ਬੋ ਚੇਵ ਜਮ੍ਬੂ ਚਾਤਿ ਦ੍ਵੇ ਰੁਕ੍ਖਾ ਅਞ੍ਞਮਞ੍ਞਂ ਸਂਸਟ੍ਠਵਿਟਪਾ ਹੋਨ੍ਤਿ, ਤੇਸੁ ਅਮ੍ਬਸ੍ਸ ਪਚ੍ਛਿਮਦਿਸਾਭਾਗੇ ਜਮ੍ਬੂ. ਵਿਹਾਰਸੀਮਾ ਚ ਜਮ੍ਬੁਂ ਅਨ੍ਤੋ ਕਤ੍ਵਾ ਅਮ੍ਬਂ ਕਿਤ੍ਤੇਤ੍ਵਾ ਬਦ੍ਧਾ ਹੋਤਿ, ਅਥ ਪਚ੍ਛਾ ਤਸ੍ਸ ਵਿਹਾਰਸ੍ਸ ਪੁਰਤ੍ਥਿਮਾਯ ਦਿਸਾਯ ਵਿਹਾਰਂ ਕਤ੍ਵਾ ਸੀਮਂ ਬਨ੍ਧਨ੍ਤਾ ਤਂ ਅਮ੍ਬਂ ਅਨ੍ਤੋ ਕਤ੍ਵਾ ਜਮ੍ਬੁਂ ਕਿਤ੍ਤੇਤ੍ਵਾ ਬਨ੍ਧਨ੍ਤਿ, ਸੀਮਾਯ ਸੀਮਾ ਸਮ੍ਭਿਨ੍ਨਾ ਹੋਤਿ. ਏਵਂ ਛਬ੍ਬਗ੍ਗਿਯਾ ਅਕਂਸੁ, ਤੇਨਾਹ – ‘‘ਸੀਮਾਯ ਸੀਮਂ ਸਮ੍ਭਿਨ੍ਦਨ੍ਤੀ’’ਤਿ.

ਸੀਮਾਯ ਸੀਮਂ ਅਜ੍ਝੋਤ੍ਥਰਨ੍ਤੀਤਿ ਅਤ੍ਤਨੋ ਸੀਮਾਯ ਪਰੇਸਂ ਬਦ੍ਧਸੀਮਂ ਅਜ੍ਝੋਤ੍ਥਰਨ੍ਤਿ;

ਪਰੇਸਂ ਬਦ੍ਧਸੀਮਂ ਸਕਲਂ ਵਾ ਤਸ੍ਸਾ ਪਦੇਸਂ ਵਾ ਅਨ੍ਤੋ ਕਤ੍ਵਾ ਅਤ੍ਤਨੋ ਸੀਮਂ ਬਨ੍ਧਨ੍ਤਿ. ਸੀਮਨ੍ਤਰਿਕਂ ਠਪੇਤ੍ਵਾ ਸੀਮਂ ਸਮ੍ਮਨ੍ਨਿਤੁਨ੍ਤਿ ਏਤ੍ਥ ਸਚੇ ਪਠਮਤਰਂ ਕਤਸ੍ਸ ਵਿਹਾਰਸ੍ਸ ਸੀਮਾ ਅਸਮ੍ਮਤਾ ਹੋਤਿ, ਸੀਮਾਯ ਉਪਚਾਰੋ ਠਪੇਤਬ੍ਬੋ. ਸਚੇ ਸਮ੍ਮਤਾ ਹੋਤਿ, ਪਚ੍ਛਿਮਕੋਟਿਯਾ ਹਤ੍ਥਮਤ੍ਤਾ ਸੀਮਨ੍ਤਰਿਕਾ ਠਪੇਤਬ੍ਬਾ. ਕੁਰੁਨ੍ਦਿਯਂ ਵਿਦਤ੍ਥਿਮਤ੍ਤਮ੍ਪਿ, ਮਹਾਪਚ੍ਚਰਿਯਂ ਚਤੁਰਙ੍ਗੁਲਮਤ੍ਤਮ੍ਪਿ ਵਟ੍ਟਤੀਤਿ ਵੁਤ੍ਤਂ. ਏਕਰੁਕ੍ਖੋਪਿ ਚ ਦ੍ਵਿਨ੍ਨਂ ਸੀਮਾਨਂ ਨਿਮਿਤ੍ਤਂ ਹੋਤਿ, ਸੋ ਪਨ ਵਡ੍ਢਨ੍ਤੋ ਸੀਮਾਸਙ੍ਕਰਂ ਕਰੋਤਿ, ਤਸ੍ਮਾ ਨ ਕਾਤਬ੍ਬੋ.

ਉਪੋਸਥਭੇਦਾਦਿਕਥਾ

੧੪੯. ਚਾਤੁਦ੍ਦਸਿਕੋ ਚ ਪਨ੍ਨਰਸਿਕੋ ਚਾਤਿ ਏਤ੍ਥ ਚਾਤੁਦ੍ਦਸਿਕਸ੍ਸ ਪੁਬ੍ਬਕਿਚ੍ਚੇ ‘‘ਅਜ੍ਜੁਪੋਸਥੋ ਚਾਤੁਦ੍ਦਸੋ’’ਤਿ ਵਤ੍ਤਬ੍ਬਂ.

ਅਧਮ੍ਮੇਨ ਵਗ੍ਗਨ੍ਤਿਆਦੀਸੁ ਸਚੇ ਏਕਸ੍ਮਿਂ ਵਿਹਾਰੇ ਚਤੂਸੁ ਭਿਕ੍ਖੂਸੁ ਵਸਨ੍ਤੇਸੁ ਏਕਸ੍ਸ ਛਨ੍ਦਪਾਰਿਸੁਦ੍ਧਿਂ ਆਹਰਿਤ੍ਵਾ ਤਯੋ ਪਾਰਿਸੁਦ੍ਧਿਉਪੋਸਥਂ ਕਰੋਨ੍ਤਿ, ਤੀਸੁ ਵਾ ਵਸਨ੍ਤੇਸੁ ਏਕਸ੍ਸ ਛਨ੍ਦਪਾਰਿਸੁਦ੍ਧਿਂ ਆਹਰਿਤ੍ਵਾ ਦ੍ਵੇ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ, ਅਧਮ੍ਮੇਨ ਵਗ੍ਗਂ ਉਪੋਸਥਕਮ੍ਮਂ ਹੋਤਿ. ਸਚੇ ਪਨ ਚਤ੍ਤਾਰੋਪਿ ਸਨ੍ਨਿਪਤਿਤ੍ਵਾ ਪਾਰਿਸੁਦ੍ਧਿਉਪੋਸਥਂ ਕਰੋਨ੍ਤਿ, ਤਯੋ ਵਾ ਦ੍ਵੇ ਵਾ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ, ਅਧਮ੍ਮੇਨ ਸਮਗ੍ਗਂ ਨਾਮ ਹੋਤਿ. ਸਚੇ ਚਤੂਸੁ ਜਨੇਸੁ ਏਕਸ੍ਸ ਪਾਰਿਸੁਦ੍ਧਿਂ ਆਹਰਿਤ੍ਵਾ ਤਯੋ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ, ਤੀਸੁ ਵਾ ਜਨੇਸੁ ਏਕਸ੍ਸ ਪਾਰਿਸੁਦ੍ਧਿਂ ਆਹਰਿਤ੍ਵਾ ਦ੍ਵੇ ਪਾਰਿਸੁਦ੍ਧਿਉਪੋਸਥਂ ਕਰੋਨ੍ਤਿ, ਧਮ੍ਮੇਨ ਵਗ੍ਗਂ ਨਾਮ ਹੋਤਿ. ਸਚੇ ਪਨ ਚਤ੍ਤਾਰੋ ਏਕਤ੍ਥ ਵਸਨ੍ਤਾ ਸਬ੍ਬੇਵ ਸਨ੍ਨਿਪਤਿਤ੍ਵਾ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ, ਤਯੋ ਪਾਰਿਸੁਦ੍ਧਿਉਪੋਸਥਂ ਕਰੋਨ੍ਤਿ, ਦ੍ਵੇ ਅਞ੍ਞਮਞ੍ਞਂ ਪਾਰਿਸੁਦ੍ਧਿਉਪੋਸਥਂ ਕਰੋਨ੍ਤਿ, ਧਮ੍ਮੇਨ ਸਮਗ੍ਗਂ ਨਾਮ ਹੋਤੀਤਿ.

ਪਾਤਿਮੋਕ੍ਖੁਦ੍ਦੇਸਕਥਾ

੧੫੦. ਨਿਦਾਨਂ ਉਦ੍ਦਿਸਿਤ੍ਵਾ ਅਵਸੇਸਂ ਸੁਤੇਨ ਸਾਵੇਤਬ੍ਬਨ੍ਤਿ ‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ…ਪੇ… ਆਵਿਕਤਾ ਹਿਸ੍ਸ ਫਾਸੁ ਹੋਤੀ’’ਤਿ ਇਮਂ ਨਿਦਾਨਂ ਉਦ੍ਦਿਸਿਤ੍ਵਾ ‘‘ਉਦ੍ਦਿਟ੍ਠਂ ਖੋ ਆਯਸ੍ਮਨ੍ਤੋ ਨਿਦਾਨਂ, ਤਤ੍ਥਾਯਸ੍ਮਨ੍ਤੇ ਪੁਚ੍ਛਾਮਿ – ਕਚ੍ਚਿਤ੍ਥ ਪਰਿਸੁਦ੍ਧਾ, ਦੁਤਿਯਮ੍ਪਿ ਪੁਚ੍ਛਾਮਿ…ਪੇ… ਏਵਮੇਤਂ ਧਾਰਯਾਮੀਤਿ. ਸੁਤਾ ਖੋ ਪਨਾਯਸ੍ਮਨ੍ਤੇਹਿ ਚਤ੍ਤਾਰੋ ਪਾਰਾਜਿਕਾ ਧਮ੍ਮਾ…ਪੇ… ਅਵਿਵਦਮਾਨੇਹਿ ਸਿਕ੍ਖਿਤਬ੍ਬ’’ਨ੍ਤਿ ਏਵਂ ਅਵਸੇਸਂ ਸੁਤੇਨ ਸਾਵੇਤਬ੍ਬਂ. ਏਤੇਨ ਨਯੇਨ ਸੇਸਾਪਿ ਚਤ੍ਤਾਰੋ ਪਾਤਿਮੋਕ੍ਖੁਦ੍ਦੇਸਾ ਵੇਦਿਤਬ੍ਬਾ.

ਸਵਰਭਯਨ੍ਤਿ ਅਟਵਿਮਨੁਸ੍ਸਭਯਂ. ਰਾਜਨ੍ਤਰਾਯੋਤਿਆਦੀਸੁ ਸਚੇ ਭਿਕ੍ਖੂਸੁ ‘‘ਉਪੋਸਥਂ ਕਰਿਸ੍ਸਾਮਾ’’ਤਿ ਨਿਸਿਨ੍ਨੇਸੁ ਰਾਜਾ ਆਗਚ੍ਛਤਿ, ਅਯਂ ਰਾਜਨ੍ਤਰਾਯੋ. ਚੋਰਾ ਆਗਚ੍ਛਨ੍ਤਿ, ਅਯਂ ਚੋਰਨ੍ਤਰਾਯੋ. ਦਵਦਾਹੋ ਵਾ ਆਗਚ੍ਛਤਿ, ਆਵਾਸੇ ਵਾ ਅਗ੍ਗਿ ਉਟ੍ਠਹਤਿ, ਅਯਂ ਅਗ੍ਗਨ੍ਤਰਾਯੋ. ਮੇਘੋ ਵਾ ਉਟ੍ਠੇਤਿ, ਓਘੋ ਵਾ ਆਗਚ੍ਛਤਿ, ਅਯਂ ਉਦਕਨ੍ਤਰਾਯੋ. ਬਹੂ ਮਨੁਸ੍ਸਾ ਆਗਚ੍ਛਨ੍ਤਿ, ਅਯਂ ਮਨੁਸ੍ਸਨ੍ਤਰਾਯੋ. ਭਿਕ੍ਖੁਂ ਯਕ੍ਖੋ ਗਣ੍ਹਾਤਿ, ਅਯਂ ਅਮਨੁਸ੍ਸਨ੍ਤਰਾਯੋ. ਬ੍ਯਗ੍ਘਾਦਯੋ ਚਣ੍ਡਮਿਗਾ ਆਗਚ੍ਛਨ੍ਤਿ, ਅਯਂ ਵਾਲ਼ਨ੍ਤਰਾਯੋ. ਭਿਕ੍ਖੁਂ ਸਪ੍ਪਾਦਯੋ ਡਂਸਨ੍ਤਿ, ਅਯਂ ਸਰੀਸਪਨ੍ਤਰਾਯੋ. ਭਿਕ੍ਖੁ ਗਿਲਾਨੋ ਵਾ ਹੋਤਿ, ਕਾਲਂ ਵਾ ਕਰੋਤਿ, ਵੇਰਿਨੋ ਵਾ ਤਂ ਮਾਰੇਤੁਕਾਮਾ ਗਣ੍ਹਨ੍ਤਿ, ਅਯਂ ਜੀਵਿਤਨ੍ਤਰਾਯੋ. ਮਨੁਸ੍ਸਾ ਏਕਂ ਵਾ ਬਹੂ ਵਾ ਭਿਕ੍ਖੂ ਬ੍ਰਹ੍ਮਚਰਿਯਾ ਚਾਵੇਤੁਕਾਮਾ ਗਣ੍ਹਨ੍ਤਿ, ਅਯਂ ਬ੍ਰਹ੍ਮਚਰਿਯਨ੍ਤਰਾਯੋ. ਏਵਰੂਪੇਸੁ ਅਨ੍ਤਰਾਯੇਸੁ ਸਂਖਿਤ੍ਤੇਨ ਪਾਤਿਮੋਕ੍ਖੋ ਉਦ੍ਦਿਸਿਤਬ੍ਬੋ, ਪਠਮੋ ਵਾ ਉਦ੍ਦੇਸੋ ਉਦ੍ਦਿਸਿਤਬ੍ਬੋ, ਆਦਿਮ੍ਹਿ ਦ੍ਵੇ ਤਯੋ ਚਤ੍ਤਾਰੋ ਵਾ. ਏਤ੍ਥ ਚ ਦੁਤਿਯਾਦੀਸੁ ਉਦ੍ਦੇਸੇਸੁ ਯਸ੍ਮਿਂ ਅਪਰਿਯੋਸਿਤੇ ਅਨ੍ਤਰਾਯੋ ਹੋਤਿ, ਸੋਪਿ ਸੁਤੇਨੇਵ ਸਾਵੇਤਬ੍ਬੋ.

ਅਨਜ੍ਝਿਟ੍ਠਾਤਿ ਅਨਾਣਤ੍ਤਾ ਅਯਾਚਿਤਾ ਵਾ. ਅਜ੍ਝੇਸਨਾ ਚੇਤ੍ਥ ਸਙ੍ਘੇਨ ਸਮ੍ਮਤਧਮ੍ਮਜ੍ਝੇਸਕਾਯਤ੍ਤਾ ਵਾ ਸਙ੍ਘਤ੍ਥੇਰਾਯਤ੍ਤਾ ਵਾ, ਤਸ੍ਮਿਂ ਧਮ੍ਮਜ੍ਝੇਸਕੇ ਅਸਤਿ ਸਙ੍ਘਤ੍ਥੇਰਂ ਆਪੁਚ੍ਛਿਤ੍ਵਾ ਵਾ ਤੇਨ ਯਾਚਿਤੋ ਵਾ ਭਾਸਿਤੁਂ ਲਭਤਿ. ਸਙ੍ਘਤ੍ਥੇਰੇਨਾਪਿ ਸਚੇ ਵਿਹਾਰੇ ਬਹੂ ਧਮ੍ਮਕਥਿਕਾ ਹੋਨ੍ਤਿ, ਵਾਰਪਟਿਪਾਟਿਯਾ ਵਤ੍ਤਬ੍ਬਾ – ‘‘ਤ੍ਵਂ ਧਮ੍ਮਂ ਭਣ, ਧਮ੍ਮਂ ਕਥੇਹਿ, ਧਮ੍ਮਦਾਨਂ ਦੇਹੀ’’ਤਿ ਵਾ ਵੁਤ੍ਤੇਨ ਤੀਹਿਪਿ ਵਿਧੀਹਿ ਧਮ੍ਮੋ ਭਾਸਿਤਬ੍ਬੋ. ‘‘ਓਸਾਰੇਹੀ’’ਤਿ ਵੁਤ੍ਤੋ ਪਨ ਓਸਾਰੇਤੁਮੇਵ ਲਭਤਿ, ‘‘ਕਥੇਹੀ’’ਤਿ ਵੁਤ੍ਤੋ ਕਥੇਤੁਮੇਵ, ‘‘ਸਰਭਞ੍ਞਂ ਭਣਾਹੀ’’ਤਿ ਵੁਤ੍ਤੋ ਸਰਭਞ੍ਞਮੇਵ. ਸਙ੍ਘਤ੍ਥੇਰੋਪਿ ਚ ਉਚ੍ਚਤਰੇ ਆਸਨੇ ਨਿਸਿਨ੍ਨੋ ਯਾਚਿਤੁਂ ਨ ਲਭਤਿ. ਸਚੇ ਉਪਜ੍ਝਾਯੋ ਚੇਵ ਸਦ੍ਧਿਵਿਹਾਰਿਕੋ ਚ ਹੋਨ੍ਤਿ, ਉਪਜ੍ਝਾਯੋ ਚ ਨਂ ਉਚ੍ਚਾਸਨੇ ਨਿਸਿਨ੍ਨੋ ‘‘ਭਣਾਹੀ’’ਤਿ ਵਦਤਿ, ਸਜ੍ਝਾਯਂ ਅਧਿਟ੍ਠਹਿਤ੍ਵਾ ਭਣਿਤਬ੍ਬਂ. ਸਚੇ ਪਨੇਤ੍ਥ ਦਹਰਾ ਭਿਕ੍ਖੂ ਹੋਨ੍ਤਿ, ਤੇਸਂ ‘‘ਭਣਾਮੀ’’ਤਿ ਭਣਿਤਬ੍ਬਂ.

ਸਚੇ ਵਿਹਾਰੇ ਸਙ੍ਘਤ੍ਥੇਰੋ ਅਤ੍ਤਨੋਯੇਵ ਨਿਸ੍ਸਿਤਕੇ ਭਣਾਪੇਤਿ, ਅਞ੍ਞੇ ਮਧੁਰਭਾਣਕੇਪਿ ਨਾਜ੍ਝੇਸਤਿ, ਸੋ ਅਞ੍ਞੇਹਿ ਵਤ੍ਤਬ੍ਬੋ – ‘‘ਭਨ੍ਤੇ ਅਸੁਕਂ ਨਾਮ ਭਣਾਪੇਮਾ’’ਤਿ. ਸਚੇ ‘‘ਭਣਾਪੇਥਾ’’ਤਿ ਵਾ ਵਦਤਿ, ਤੁਣ੍ਹੀ ਵਾ ਹੋਤਿ, ਭਣਾਪੇਤੁਂ ਵਟ੍ਟਤਿ. ਸਚੇ ਪਨ ਪਟਿਬਾਹਤਿ, ਨ ਭਣਾਪੇਤਬ੍ਬਂ. ਯਦਿ ਅਨਾਗਤੇਯੇਵ ਸਙ੍ਘਤ੍ਥੇਰੇ ਧਮ੍ਮਸਵਨਂ ਆਰਦ੍ਧਂ, ਪੁਨ ਆਗਤੇ ਠਪੇਤ੍ਵਾ ਆਪੁਚ੍ਛਨਕਿਚ੍ਚਂ ਨਤ੍ਥਿ. ਓਸਾਰੇਤ੍ਵਾ ਪਨ ਕਥੇਨ੍ਤੇਨ ਆਪੁਚ੍ਛਿਤ੍ਵਾ ਵਾ ਅਟ੍ਠਪੇਤ੍ਵਾਯੇਵ ਵਾ ਕਥੇਤਬ੍ਬਂ, ਕਥੇਨ੍ਤਸ੍ਸ ਪੁਨ ਆਗਤੇਪਿ ਏਸੇਵ ਨਯੋ.

ਉਪਨਿਸਿਨ੍ਨਕਥਾਯਪਿ ਸਙ੍ਘਤ੍ਥੇਰੋਵ ਸਾਮੀ, ਤਸ੍ਮਾ ਤੇਨ ਸਯਂ ਵਾ ਕਥੇਤਬ੍ਬਂ, ਅਞ੍ਞੋ ਵਾ ਭਿਕ੍ਖੁ ‘‘ਕਥੇਹੀ’’ਤਿ ਵਤ੍ਤਬ੍ਬੋ, ਨੋ ਚ ਖੋ ਉਚ੍ਚਤਰੇ ਆਸਨੇ ਨਿਸਿਨ੍ਨੇਨ. ਮਨੁਸ੍ਸਾਨਂ ਪਨ ‘‘ਭਣਾਹੀ’’ਤਿ ਵਤ੍ਤੁਂ ਵਟ੍ਟਤਿ. ਮਨੁਸ੍ਸਾ ਅਤ੍ਤਨੋ ਜਾਨਨਕਭਿਕ੍ਖੁਂ ਆਪੁਚ੍ਛਨ੍ਤਿ, ਤੇਨ ਥੇਰਂ ਆਪੁਚ੍ਛਿਤ੍ਵਾ ਕਥੇਤਬ੍ਬਂ. ਸਚੇ ਸਙ੍ਘਤ੍ਥੇਰੋ ‘‘ਭਨ੍ਤੇ ਇਮੇ ਪਞ੍ਹਂ ਪੁਚ੍ਛਨ੍ਤੀ’’ਤਿ ਪੁਟ੍ਠੋ ‘‘ਕਥੇਹੀ’’ਤਿ ਵਾ ਭਣਤਿ, ਤੁਣ੍ਹੀ ਵਾ ਹੋਤਿ, ਕਥੇਤੁਂ ਵਟ੍ਟਤਿ. ਅਨ੍ਤਰਘਰੇ ਅਨੁਮੋਦਨਾਦੀਸੁਪਿ ਏਸੇਵ ਨਯੋ. ਸਚੇ ਸਙ੍ਘਤ੍ਥੇਰੋ ਵਿਹਾਰੇ ਵਾ ਅਨ੍ਤਰਘਰੇ ਵਾ ‘‘ਮਂ ਅਨਾਪੁਚ੍ਛਿਤ੍ਵਾਪਿ ਕਥੇਯ੍ਯਾਸੀ’’ਤਿ ਅਨੁਜਾਨਾਤਿ, ਲਦ੍ਧਕਪ੍ਪਿਯਂ ਹੋਤਿ, ਸਬ੍ਬਤ੍ਥ ਵਤ੍ਤੁਂ ਵਟ੍ਟਤਿ.

ਸਜ੍ਝਾਯਂ ਕਰੋਨ੍ਤੇਨਾਪਿ ਥੇਰੋ ਆਪੁਚ੍ਛਿਤਬ੍ਬੋਯੇਵ. ਏਕਂ ਆਪੁਚ੍ਛਿਤ੍ਵਾ ਸਜ੍ਝਾਯਨ੍ਤਸ੍ਸ ਅਪਰੋ ਆਗਚ੍ਛਤਿ, ਪੁਨ ਆਪੁਚ੍ਛਨਕਿਚ੍ਚਂ ਨਤ੍ਥਿ. ਸਚੇ ਵਿਸ੍ਸਮਿਸ੍ਸਾਮੀਤਿ ਠਪਿਤਸ੍ਸ ਆਗਚ੍ਛਤਿ, ਪੁਨ ਆਰਭਨ੍ਤੇਨਾਪਿ ਆਪੁਚ੍ਛਿਤਬ੍ਬਂ. ਸਙ੍ਘਤ੍ਥੇਰੇ ਅਨਾਗਤੇਯੇਵ ਆਰਦ੍ਧਂ ਸਜ੍ਝਾਯਨ੍ਤਸ੍ਸਾਪਿ ਏਸੇਵ ਨਯੋ. ਏਕੇਨ ਸਙ੍ਘਤ੍ਥੇਰੇਨ ‘‘ਮਂ ਅਨਾਪੁਚ੍ਛਾਪਿ ਯਥਾਸੁਖਂ ਸਜ੍ਝਾਯਾਹੀ’’ਤਿ ਅਨੁਞ੍ਞਾਤੇ ਯਥਾਸੁਖਂ ਸਜ੍ਝਾਯਿਤੁਂ ਵਟ੍ਟਤਿ. ਅਞ੍ਞਸ੍ਮਿਂ ਪਨ ਆਗਤੇ ਤਂ ਆਪੁਚ੍ਛਿਤ੍ਵਾਵ ਸਜ੍ਝਾਯਿਤਬ੍ਬਂ.

੧੫੧. ਅਤ੍ਤਨਾ ਵਾ ਅਤ੍ਤਾਨਂ ਸਮ੍ਮਨ੍ਨਿਤਬ੍ਬਂਤਿ ਅਤ੍ਤਨਾ ਵਾ ਅਤ੍ਤਾ ਸਮ੍ਮਨ੍ਨਿਤਬ੍ਬੋ; ਪੁਚ੍ਛਨ੍ਤੇਨ ਪਨ ਪਰਿਸਂ ਓਲੋਕੇਤ੍ਵਾ ਸਚੇ ਅਤ੍ਤਨੋ ਉਪਦ੍ਦਵੋ ਨਤ੍ਥਿ, ਵਿਨਯੋ ਪੁਚ੍ਛਿਤਬ੍ਬੋ.

੧੫੩. ਕਤੇਪਿ ਓਕਾਸੇ ਪੁਗ੍ਗਲਂ ਤੁਲਯਿਤ੍ਵਾਤਿ ‘‘ਅਤ੍ਥਿ ਨੁ ਖੋ ਮੇ ਇਤੋ ਉਪਦ੍ਦਵੋ, ਨਤ੍ਥੀ’’ਤਿ ਏਵਂ ਉਪਪਰਿਕ੍ਖਿਤ੍ਵਾ. ਪੁਰਮ੍ਹਾਕਨ੍ਤਿ ਪਠਮਂ ਅਮ੍ਹਾਕਂ. ਪਟਿਕਚ੍ਚੇਵਾਤਿ ਪਠਮਤਰਮੇਵ. ਪੁਗ੍ਗਲਂ ਤੁਲਯਿਤ੍ਵਾ ਓਕਾਸਂ ਕਾਤੁਨ੍ਤਿ ‘‘ਭੂਤਮੇਵ ਨੁ ਖੋ ਆਪਤ੍ਤਿਂ ਵਦਤਿ, ਅਭੂਤ’’ਨ੍ਤਿ ਏਵਂ ਉਪਪਰਿਕ੍ਖਿਤ੍ਵਾ ਓਕਾਸਂ ਕਾਤੁਂ ਅਨੁਜਾਨਾਮੀਤਿ ਅਤ੍ਥੋ.

ਅਧਮ੍ਮਕਮ੍ਮਪਟਿਕ੍ਕੋਸਨਾਦਿਕਥਾ

੧੫੪. ਅਧਮ੍ਮਕਮ੍ਮਂ ਵੁਤ੍ਤਨਯਮੇਵ. ਪਟਿਕ੍ਕੋਸਿਤੁਨ੍ਤਿ ਵਾਰੇਤੁਂ. ਦਿਟ੍ਠਿਮ੍ਪਿ ਆਵਿਕਾਤੁਨ੍ਤਿ ‘‘ਅਧਮ੍ਮਕਮ੍ਮਂ ਇਦਂ ਨ ਮੇ ਖਮਤੀ’’ਤਿ ਏਵਂ ਅਞ੍ਞਸ੍ਸ ਸਨ੍ਤਿਕੇ ਅਤ੍ਤਨੋ ਦਿਟ੍ਠਿਂ ਪਕਾਸੇਤੁਂ. ਚਤੂਹਿ ਪਞ੍ਚਹੀਤਿਆਦਿ ਤੇਸਂ ਅਨੁਪਦ੍ਦਵਤ੍ਥਾਯ ਵੁਤ੍ਤਂ. ਸਞ੍ਚਿਚ੍ਚ ਨ ਸਾਵੇਨ੍ਤੀਤਿ ਯਥਾ ਨ ਸੁਣਨ੍ਤਿ ਏਵਂ ਭਣਿਸ੍ਸਾਮਾਤਿ ਸਞ੍ਚਿਚ੍ਚ ਸਣਿਕਂ ਉਦ੍ਦਿਸਨ੍ਤਿ.

੧੫੫. ਥੇਰਾਧਿਕਨ੍ਤਿ ਥੇਰਾਧੀਨਂ; ਥੇਰਾਯਤ੍ਤਂ ਭਵਿਤੁਨ੍ਤਿ ਅਤ੍ਥੋ. ‘‘ਥੇਰਾਧੇਯ੍ਯ’’ਨ੍ਤਿਪਿ ਪਾਠੋ, ਤਸ੍ਮਾ ਥੇਰੇਨ ਸਯਂ ਵਾ ਉਦ੍ਦਿਸਿਤਬ੍ਬਂ, ਅਞ੍ਞੋ ਵਾ ਅਜ੍ਝੇਸਿਤਬ੍ਬੋ. ਅਜ੍ਝੇਸਨਵਿਧਾਨਞ੍ਚੇਤ੍ਥ ਧਮ੍ਮਜ੍ਝੇਸਨੇ ਵੁਤ੍ਤਨਯਮੇਵ. ਸੋ ਨ ਜਾਨਾਤਿ ਉਪੋਸਥਂ ਵਾਤਿਆਦੀਸੁ ਚਾਤੁਦ੍ਦਸਿਕਪਨ੍ਨਰਸਿਕਭੇਦੇਨ ਦੁਵਿਧਂ, ਸਙ੍ਘਉਪੋਸਥਾਦਿਭੇਦੇਨ ਨਵਵਿਧਞ੍ਚ ਉਪੋਸਥਂ ਨ ਜਾਨਾਤਿ, ਚਤੁਬ੍ਬਿਧਂ ਉਪੋਸਥਕਮ੍ਮਂ ਨ ਜਾਨਾਤਿ, ਦੁਵਿਧਂ ਪਾਤਿਮੋਕ੍ਖਂ ਨ ਜਾਨਾਤਿ, ਨਵਵਿਧਂ ਪਾਤਿਮੋਕ੍ਖੁਦ੍ਦੇਸਂ ਨ ਜਾਨਾਤਿ. ਯੋ ਤਤ੍ਥ ਭਿਕ੍ਖੁ ਬ੍ਯਤ੍ਤੋ ਪਟਿਬਲੋਤਿ ਏਤ੍ਥ ਕਿਞ੍ਚਾਪਿ ਦਹਰਸ੍ਸਾਪਿ ਬ੍ਯਤ੍ਤਸ੍ਸ ਪਾਤਿਮੋਕ੍ਖੋ ਅਨੁਞ੍ਞਾਤੋ. ਅਥ ਖੋ ਏਤ੍ਥ ਅਯਮਧਿਪ੍ਪਾਯੋ. ਸਚੇ ਥੇਰਸ੍ਸ ਪਞ੍ਚ ਵਾ ਚਤ੍ਤਾਰੋ ਵਾ ਤਯੋ ਵਾ ਪਾਤਿਮੋਕ੍ਖੁਦ੍ਦੇਸਾ ਨਾਗਚ੍ਛਨ੍ਤਿ; ਦ੍ਵੇ ਪਨ ਅਖਣ੍ਡਾ ਸੁਵਿਸਦਾ ਵਾਚੁਗ੍ਗਤਾ ਹੋਨ੍ਤਿ, ਥੇਰਾਯਤ੍ਤੋਵ ਪਾਤਿਮੋਕ੍ਖਾ. ਸਚੇ ਪਨ ਏਤ੍ਤਕਮ੍ਪਿ ਵਿਸਦਂ ਕਾਤੁਂ ਨ ਸਕ੍ਕੋਤਿ, ਬ੍ਯਤ੍ਤਸ੍ਸ ਭਿਕ੍ਖੁਨੋ ਆਯਤ੍ਤੋ ਹੋਤਿ.

ਸਾਮਨ੍ਤਾ ਆਵਾਸਾਤਿ ਸਾਮਨ੍ਤਂ ਆਵਾਸਂ. ਸਜ੍ਜੁਕਨ੍ਤਿ ਤਦਹੇਵ ਆਗਮਨਤ੍ਥਾਯ. ਨਵਂ ਭਿਕ੍ਖੁਂ ਆਣਾਪੇਤੁਨ੍ਤਿ ਏਤ੍ਥ ਯੋ ਸਕ੍ਕੋਤਿ ਉਗ੍ਗਹੇਤੁਂ, ਏਵਰੂਪੋ ਆਣਾਪੇਤਬ੍ਬੋ, ਨ ਬਾਲੋ.

ਪਕ੍ਖਗਣਨਾਦਿਉਗ੍ਗਹਣਾਨੁਜਾਨਨਕਥਾ

੧੫੬. ਕਤਿਮੀ ਭਨ੍ਤੇਤਿ ਏਤ੍ਥ ਕਤੀਨਂ ਪੂਰਣੀਤਿ ਕਤਿਮੀ. ਕਾਲਵਤੋਤਿ ਕਾਲਸ੍ਸੇਵ; ਪਗੇਵਾਤਿ ਅਤ੍ਥੋ.

੧੫੮. ਯਂ ਕਾਲਂ ਸਰਤੀਤਿ ਏਤ੍ਥ ਸਾਯਮ੍ਪਿ ‘‘ਅਜ੍ਜੁਪੋਸਥੋ ਸਮਨ੍ਨਾਹਰਥਾ’’ਤਿ ਆਰੋਚੇਤੁਂ ਵਟ੍ਟਤਿ.

੧੫੯. ਥੇਰੇਨ ਭਿਕ੍ਖੁਨਾ ਨਵਂ ਭਿਕ੍ਖੁਂ ਆਣਾਪੇਤੁਨ੍ਤਿ ਏਤ੍ਥਾਪਿ ਕਿਞ੍ਚਿ ਕਮ੍ਮਂ ਕਰੋਨ੍ਤੋ ਵਾ ਸਦਾਕਾਲਮੇਵ ਏਕੋ ਵਾ ਭਾਰਨਿਤ੍ਥਰਣਕੋ ਵਾ ਸਰਭਾਣਕਧਮ੍ਮਕਥਿਕਾਦੀਸੁ ਅਞ੍ਞਤਰੋ ਵਾ ਨ ਉਪੋਸਥਾਗਾਰਸਮ੍ਮਜ੍ਜਨਤ੍ਥਂ ਆਣਾਪੇਤਬ੍ਬੋ, ਅਵਸੇਸਾ ਪਨ ਵਾਰੇਨ ਆਣਾਪੇਤਬ੍ਬਾ. ਸਚੇ ਆਣਤ੍ਤੋ ਸਮ੍ਮੁਞ੍ਜਨਿਂ ਤਾਵਕਾਲਿਕਮ੍ਪਿ ਨ ਲਭਤਿ, ਸਾਖਾਭਙ੍ਗਂ ਕਪ੍ਪਿਯਂ ਕਾਰੇਤ੍ਵਾ ਸਮ੍ਮਜ੍ਜਿਤਬ੍ਬਂ, ਤਮ੍ਪਿ ਅਲਭਨ੍ਤਸ੍ਸ ਲਦ੍ਧਕਪ੍ਪਿਯਂ ਹੋਤਿ.

੧੬੦. ਆਸਨਪਞ੍ਞਾਪਨਾਣਤ੍ਤਿਯਮ੍ਪਿ ਵੁਤ੍ਤਨਯੇਨੇਵ ਆਣਾਪੇਤਬ੍ਬੋ. ਆਣਤ੍ਤੇਨ ਚ ਸਚੇ ਉਪੋਸਥਾਗਾਰੇ ਆਸਨਾਨਿ ਨਤ੍ਥਿ, ਸਙ੍ਘਿਕਾਵਾਸਤੋਪਿ ਆਹਰਿਤ੍ਵਾ ਪਞ੍ਞਪੇਤ੍ਵਾ ਪੁਨ ਆਹਰਿਤਬ੍ਬਾਨਿ. ਆਸਨੇਸੁ ਅਸਤਿ ਕਟਸਾਰਕੇਪਿ ਤਟ੍ਟਿਕਾਯੋਪਿ ਪਞ੍ਞਪੇਤੁਂ ਵਟ੍ਟਤਿ, ਤਟ੍ਟਿਕਾਸੁਪਿ ਅਸਤਿ ਸਾਖਾਭਙ੍ਗਾਨਿ ਕਪ੍ਪਿਯਂ ਕਾਰੇਤ੍ਵਾ ਪਞ੍ਞਪੇਤਬ੍ਬਾਨਿ, ਕਪ੍ਪਿਯਕਾਰਕਂ ਅਲਭਨ੍ਤਸ੍ਸ ਲਦ੍ਧਕਪ੍ਪਿਯਂ ਹੋਤਿ.

੧੬੧. ਪਦੀਪਕਰਣੇਪਿ ਵੁਤ੍ਤਨਯੇਨੇਵ ਆਣਾਪੇਤਬ੍ਬੋ. ਆਣਾਪੇਨ੍ਤੇਨ ਚ ‘‘ਅਮੁਕਸ੍ਮਿਂ ਨਾਮ ਓਕਾਸੇ ਤੇਲਂ ਵਾ ਵਟ੍ਟਿ ਵਾ ਕਪਲ੍ਲਿਕਾ ਵਾ ਅਤ੍ਥਿ, ਤਂ ਗਹੇਤ੍ਵਾ ਕਰੋਹੀ’’ਤਿ ਵਤ੍ਤਬ੍ਬੋ. ਸਚੇ ਤੇਲਾਦੀਨਿ ਨਤ੍ਥਿ, ਪਰਿਯੇਸਿਤਬ੍ਬਾਨਿ, ਪਰਿਯੇਸਿਤ੍ਵਾ ਅਲਭਨ੍ਤਸ੍ਸ ਲਦ੍ਧਕਪ੍ਪਿਯਂ ਹੋਤਿ. ਅਪਿਚ ਕਪਾਲੇ ਅਗ੍ਗਿਪਿ ਜਾਲੇਤਬ੍ਬੋ.

ਦਿਸਂਗਮਿਕਾਦਿਵਤ੍ਥੁਕਥਾ

੧੬੩. ਸਙ੍ਗਹੇਤਬ੍ਬੋਤਿ ‘‘ਸਾਧੁ ਭਨ੍ਤੇ ਆਗਤਾਤ੍ਥ, ਇਧ ਭਿਕ੍ਖਾ ਸੁਲਭਾ ਸੂਪਬ੍ਯਞ੍ਜਨਂ ਅਤ੍ਥਿ, ਵਸਥ ਅਨੁਕ੍ਕਣ੍ਠਮਾਨਾ’’ਤਿ ਏਵਂ ਪਿਯਵਚਨੇਨ ਸਙ੍ਗਹੇਤਬ੍ਬੋ. ਪੁਨਪ੍ਪੁਨਂ ਤਥਾਕਰਣਵਸੇਨ ਅਨੁਗ੍ਗਹੇਤਬ੍ਬੋ. ‘‘ਆਮ ਵਸਿਸ੍ਸਾਮੀ’’ਤਿ ਪਟਿਵਚਨਦਾਪਨੇਨ ਉਪਲਾਪੇਤਬ੍ਬੋ. ਅਥ ਵਾ ਚਤੂਹਿ ਪਚ੍ਚਯੇਹਿ ਸਙ੍ਗਹੇਤਬ੍ਬੋ ਚੇਵ ਅਨੁਗ੍ਗਹੇਤਬ੍ਬੋ ਚ. ਪਿਯਵਚਨੇਨ ਉਪਲਾਪੇਤਬ੍ਬੋ, ਕਣ੍ਣਸੁਖਂ ਆਲਪਿਤਬ੍ਬੋਤਿ ਅਤ੍ਥੋ. ਚੁਣ੍ਣਾਦੀਹਿ ਉਪਟ੍ਠਾਪੇਤਬ੍ਬੋ. ਆਪਤ੍ਤਿ ਦੁਕ੍ਕਟਸ੍ਸਾਤਿ ਸਚੇ ਸਕਲੋਪਿ ਸਙ੍ਘੋ ਨ ਕਰੋਤਿ, ਸਬ੍ਬੇਸਂ ਦੁਕ੍ਕਟਂ. ਇਧ ਨੇਵ ਥੇਰਾ ਨ ਦਹਰਾ ਮੁਚ੍ਚਨ੍ਤਿ, ਸਬ੍ਬੇਹਿ ਵਾਰੇਨ ਉਪਟ੍ਠਾਪੇਤਬ੍ਬੋ. ਅਤ੍ਤਨੋ ਵਾਰੇ ਅਨੁਪਟ੍ਠਹਨ੍ਤਸ੍ਸ ਆਪਤ੍ਤਿ. ਤੇਨ ਪਨ ਮਹਾਥੇਰਾਨਂ ਪਰਿਵੇਣਸਮ੍ਮਜ੍ਜਨਦਨ੍ਤਕਟ੍ਠਦਾਨਾਦੀਨਿ ਨ ਸਾਦਿਤਬ੍ਬਾਨਿ. ਏਵਮ੍ਪਿ ਸਤਿ ਮਹਾਥੇਰੇਹਿ ਸਾਯਂਪਾਤਂ ਉਪਟ੍ਠਾਨਂ ਆਗਨ੍ਤਬ੍ਬਂ. ਤੇਨ ਪਨ ਤੇਸਂ ਆਗਮਨਂ ਞਤ੍ਵਾ ਪਠਮਤਰਂ ਮਹਾਥੇਰਾਨਂ ਉਪਟ੍ਠਾਨਂ ਗਨ੍ਤਬ੍ਬਂ. ਸਚਸ੍ਸ ਸਦ੍ਧਿਂਚਰਾ ਭਿਕ੍ਖੁਉਪਟ੍ਠਾਕਾ ਅਤ੍ਥਿ, ‘‘ਮਯ੍ਹਂ ਉਪਟ੍ਠਾਕਾ ਅਤ੍ਥਿ, ਤੁਮ੍ਹੇ ਅਪ੍ਪੋਸ੍ਸੁਕ੍ਕਾ ਵਿਹਰਥਾ’’ਤਿ ਵਤ੍ਤਬ੍ਬਂ. ਅਥਾਪਿਸ੍ਸ ਸਦ੍ਧਿਂਚਰਾ ਨਤ੍ਥਿ, ਤਸ੍ਮਿਂਯੇਵ ਪਨ ਵਿਹਾਰੇ ਏਕੋ ਵਾ ਦ੍ਵੇ ਵਾ ਵਤ੍ਤਸਮ੍ਪਨ੍ਨਾ ਵਦਨ੍ਤਿ ‘‘ਮਯਂ ਥੇਰਸ੍ਸ ਕਤ੍ਤਬ੍ਬਂ ਕਰਿਸ੍ਸਾਮ, ਅਵਸੇਸਾ ਫਾਸੁ ਵਿਹਰਨ੍ਤੂ’’ਤਿ ਸਬ੍ਬੇਸਂ ਅਨਾਪਤ੍ਤਿ.

ਸੋ ਆਵਾਸੋ ਗਨ੍ਤਬ੍ਬੋਤਿ ਉਪੋਸਥਕਰਣਤ੍ਥਾਯ ਅਨ੍ਵਦ੍ਧਮਾਸਂ ਗਨ੍ਤਬ੍ਬੋ. ਸੋ ਚ ਖੋ ਉਤੁਵਸ੍ਸੇਯੇਵ, ਵਸ੍ਸਾਨੇ ਪਨ ਯਂ ਕਤ੍ਤਬ੍ਬਂ, ਤਂ ਦਸ੍ਸੇਤੁਂ ‘‘ਵਸ੍ਸਂ ਵਸਨ੍ਤਿ ਬਾਲਾ ਅਬ੍ਯਤ੍ਤਾ’’ਤਿਆਦਿਮਾਹ. ਤਤ੍ਥ ਨ ਭਿਕ੍ਖਵੇ ਤੇਹਿ ਭਿਕ੍ਖੂਹਿ ਤਸ੍ਮਿਂ ਆਵਾਸੇ ਵਸ੍ਸਂ ਵਸਿਤਬ੍ਬਨ੍ਤਿ ਪੁਰਿਮਿਕਾਯ ਪਾਤਿਮੋਕ੍ਖੁਦ੍ਦੇਸਕੇਨ ਵਿਨਾ ਨ ਵਸ੍ਸਂ ਉਪਗਨ੍ਤਬ੍ਬਂ. ਸਚੇ ਸੋ ਵਸ੍ਸੂਪਗਤਾਨਂ ਪਕ੍ਕਮਤਿ ਵਾ, ਵਿਬ੍ਭਮਤਿ ਵਾ, ਕਾਲਂ ਵਾ ਕਰੋਤਿ, ਅਞ੍ਞਸ੍ਮਿਂ ਸਤਿਯੇਵ ਪਚ੍ਛਿਮਿਕਾਯ ਵਸਿਤੁਂ ਵਟ੍ਟਤਿ, ਅਸਤਿ ਅਞ੍ਞਤ੍ਥ ਗਨ੍ਤਬ੍ਬਂ, ਅਗਚ੍ਛਨ੍ਤਾਨਂ ਦੁਕ੍ਕਟਂ. ਸਚੇ ਪਨ ਪਚ੍ਛਿਮਿਕਾਯ ਪਕ੍ਕਮਤਿ ਵਾ ਵਿਬ੍ਭਮਤਿ ਵਾ ਕਾਲਂ ਵਾ ਕਰੋਤਿ, ਮਾਸਦ੍ਵਯਂ ਵਸਿਤਬ੍ਬਂ.

ਪਾਰਿਸੁਦ੍ਧਿਦਾਨਕਥਾ

੧੬੪. ਕਾਯੇਨ ਵਿਞ੍ਞਾਪੇਤੀਤਿ ਪਾਰਿਸੁਦ੍ਧਿਦਾਨਂ ਯੇਨ ਕੇਨਚਿ ਅਙ੍ਗਪਚ੍ਚਙ੍ਗੇਨ ਵਿਞ੍ਞਾਪੇਤਿ ਜਾਨਾਪੇਤਿ; ਵਾਚਂ ਪਨ ਨਿਚ੍ਛਾਰੇਤੁਂ ਸਕ੍ਕੋਨ੍ਤੋ ਵਾਚਾਯ ਵਿਞ੍ਞਾਪੇਤਿ; ਉਭਯਥਾ ਸਕ੍ਕੋਨ੍ਤੋ ਕਾਯਵਾਚਾਹਿ. ਸਙ੍ਘੇਨ ਤਤ੍ਥ ਗਨ੍ਤ੍ਵਾ ਉਪੋਸਥੋ ਕਾਤਬ੍ਬੋਤਿ ਸਚੇ ਬਹੂ ਤਾਦਿਸਾ ਗਿਲਾਨਾ ਹੋਨ੍ਤਿ, ਸਙ੍ਘੇਨ ਪਟਿਪਾਟਿਯਾ ਠਤ੍ਵਾ ਸਬ੍ਬੇ ਹਤ੍ਥਪਾਸੇ ਕਾਤਬ੍ਬਾ. ਸਚੇ ਦੂਰੇ ਦੂਰੇ ਹੋਨ੍ਤਿ, ਸਙ੍ਘੋ ਨਪ੍ਪਹੋਤਿ, ਤਂ ਦਿਵਸਂ ਉਪੋਸਥੋ ਨ ਕਾਤਬ੍ਬੋ, ਨਤ੍ਵੇਵ ਵਗ੍ਗੇਨ ਸਙ੍ਘੇਨ ਉਪੋਸਥੋ ਕਾਤਬ੍ਬੋ.

ਤਤ੍ਥੇਵ ਪਕ੍ਕਮਤੀਤਿ ਸਙ੍ਘਮਜ੍ਝਂ ਅਨਾਗਨ੍ਤ੍ਵਾ ਤਤੋਵ ਕਤ੍ਥਚਿ ਗਚ੍ਛਤਿ. ਸਾਮਣੇਰੋ ਪਟਿਜਾਨਾਤੀਤਿ ‘‘ਸਾਮਣੇਰੋ ਅਹ’’ਨ੍ਤਿ ਏਵਂ ਪਟਿਜਾਨਾਤਿ; ਭੂਤਂਯੇਵ ਵਾ ਸਾਮਣੇਰਭਾਵਂ ਆਰੋਚੇਤਿ, ਪਚ੍ਛਾ ਵਾ ਸਾਮਣੇਰਭੂਮਿਯਂ ਤਿਟ੍ਠਤੀਤਿ ਅਤ੍ਥੋ. ਏਸ ਨਯੋ ਸਬ੍ਬਤ੍ਥ.

ਸਙ੍ਘਪ੍ਪਤ੍ਤੋ ਪਕ੍ਕਮਤੀਤਿ ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਉਪੋਸਥਤ੍ਥਾਯ ਸਨ੍ਨਿਪਤਿਤਾਨਂ ਚਤੁਨ੍ਨਂ ਭਿਕ੍ਖੂਨਂ ਹਤ੍ਥਪਾਸਂ ਪਤ੍ਵਾ ਪਕ੍ਕਮਤਿ. ਏਸ ਨਯੋ ਸਬ੍ਬਤ੍ਥ. ਏਤ੍ਥ ਚ ਏਕੇਨ ਬਹੂਨਮ੍ਪਿ ਆਹਟਾ ਪਾਰਿਸੁਦ੍ਧਿ ਆਹਟਾਵ ਹੋਤਿ. ਸਚੇ ਪਨ ਸੋ ਅਨ੍ਤਰਾਮਗ੍ਗੇ ਅਞ੍ਞਂ ਭਿਕ੍ਖੁਂ ਦਿਸ੍ਵਾ ਯੇਸਂ ਅਨੇਨ ਪਾਰਿਸੁਦ੍ਧਿ ਗਹਿਤਾ, ਤੇਸਞ੍ਚ ਅਤ੍ਤਨੋ ਚ ਪਾਰਿਸੁਦ੍ਧਿਂ ਦੇਤਿ, ਤਸ੍ਸੇਵ ਪਾਰਿਸੁਦ੍ਧਿ ਆਗਚ੍ਛਤਿ, ਇਤਰਾ ਪਨ ਬਿਲਾਲ਼ਸਙ੍ਖਲਿਕਪਾਰਿਸੁਦ੍ਧਿ ਨਾਮ ਹੋਤਿ. ਸਾ ਨ ਆਗਚ੍ਛਤਿ.

ਸੁਤ੍ਤੋ ਨ ਆਰੋਚੇਤੀਤਿ ਆਗਨ੍ਤ੍ਵਾ ਸੁਪਤਿ, ‘‘ਅਸੁਕੇਨ ਪਾਰਿਸੁਦ੍ਧਿ ਦਿਨ੍ਨਾ’’ਤਿ ਨ ਆਰੋਚੇਤਿ. ਪਾਰਿਸੁਦ੍ਧਿਹਾਰਕਸ੍ਸ ਅਨਾਪਤ੍ਤੀਤਿ ਏਤ੍ਥ ਸਚੇ ਸਞ੍ਚਿਚ੍ਚ ਨਾਰੋਚੇਤਿ, ਦੁਕ੍ਕਟਂ ਆਪਜ੍ਜਤਿ, ਪਾਰਿਸੁਦ੍ਧਿ ਪਨ ਆਹਟਾਵ ਹੋਤਿ. ਅਸਞ੍ਚਿਚ੍ਚ ਅਨਾਰੋਚਿਤਤ੍ਤਾ ਪਨਸ੍ਸ ਅਨਾਪਤ੍ਤਿ, ਉਭਿਨ੍ਨਮ੍ਪਿ ਚ ਉਪੋਸਥੋ ਕਤੋਯੇਵ ਹੋਤਿ.

ਛਨ੍ਦਦਾਨਕਥਾ

੧੬੫. ਛਨ੍ਦਦਾਨੇਪਿ ਪਾਰਿਸੁਦ੍ਧਿਦਾਨੇ ਵੁਤ੍ਤਸਦਿਸੋਯੇਵ ਵਿਨਿਚ੍ਛਯੋ. ਪਾਰਿਸੁਦ੍ਧਿਂ ਦੇਨ੍ਤੇਨ ਛਨ੍ਦਮ੍ਪਿ ਦਾਤੁਨ੍ਤਿ ਏਤ੍ਥ ਸਚੇ ਪਾਰਿਸੁਦ੍ਧਿਮੇਵ ਦੇਤਿ ਨ ਛਨ੍ਦਂ, ਉਪੋਸਥੋ ਕਤੋ ਹੋਤਿ. ਯਂ ਪਨ ਸਙ੍ਘੋ ਅਞ੍ਞਂ ਕਮ੍ਮਂ ਕਰੋਤਿ, ਤਂ ਅਕਤਂ ਹੋਤਿ. ਛਨ੍ਦਮੇਵ ਦੇਤਿ ਨ ਪਾਰਿਸੁਦ੍ਧਿਂ, ਭਿਕ੍ਖੁਸਙ੍ਘਸ੍ਸ ਉਪੋਸਥੋਪਿ ਕਮ੍ਮਮ੍ਪਿ ਕਤਮੇਵ ਹੋਤਿ, ਛਨ੍ਦਦਾਯਕਸ੍ਸ ਪਨ ਉਪੋਸਥੋ ਅਕਤੋ ਹੋਤਿ. ਸਚੇਪਿ ਕੋਚਿ ਭਿਕ੍ਖੁ ਨਦਿਯਾ ਵਾ ਸੀਮਾਯ ਵਾ ਉਪੋਸਥਂ ਅਧਿਟ੍ਠਹਿਤ੍ਵਾ ਆਗਚ੍ਛਤਿ, ‘‘ਕਤੋ ਮਯਾ ਉਪੋਸਥੋ’’ਤਿ ਅਚ੍ਛਿਤੁਂ ਨ ਲਭਤਿ, ਸਾਮਗ੍ਗੀ ਵਾ ਛਨ੍ਦੋ ਵਾ ਦਾਤਬ੍ਬੋ.

੧੬੭. ਸਰਤਿਪਿ ਉਪੋਸਥਂ ਨਪਿ ਸਰਤੀਤਿ ਏਕਦਾ ਸਰਤਿ, ਏਕਦਾ ਨ ਸਰਤਿ. ਅਤ੍ਥਿ ਨੇਵ ਸਰਤੀਤਿ ਯੋ ਏਕਨ੍ਤਂ ਨੇਵ ਸਰਤਿ, ਤਸ੍ਸ ਸਮ੍ਮੁਤਿਦਾਨਕਿਚ੍ਚਂ ਨਤ੍ਥਿ. ਅਨਾਗਚ੍ਛਨ੍ਤੋਪਿ ਕਮ੍ਮਂ ਨ ਕੋਪੇਤਿ.

ਸਙ੍ਘੁਪੋਸਥਾਦਿਕਥਾ

੧੬੮. ਸੋ ਦੇਸੋ ਸਮ੍ਮਜ੍ਜਿਤ੍ਵਾਤਿ ਤਂ ਦੇਸਂ ਸਮ੍ਮਜ੍ਜਿਤ੍ਵਾ, ਉਪਯੋਗਤ੍ਥੇ ਪਚ੍ਚਤ੍ਤਂ. ਪਾਨੀਯਂ ਪਰਿਭੋਜਨੀਯਨ੍ਤਿਆਦਿ ਪਨ ਉਤ੍ਤਾਨਤ੍ਥਮੇਵ. ਕਸ੍ਮਾ ਪਨੇਤਂ ਵੁਤ੍ਤਂ? ਉਪੋਸਥਸ੍ਸ ਪੁਬ੍ਬਕਰਣਾਦਿਦਸ੍ਸਨਤ੍ਥਂ. ਤੇਨਾਹੁ ਅਟ੍ਠਕਥਾਚਰਿਯਾ –

‘‘ਸਮ੍ਮਜ੍ਜਨੀ ਪਦੀਪੋ ਚ, ਉਦਕਂ ਆਸਨੇਨ ਚ;

ਉਪੋਸਥਸ੍ਸ ਏਤਾਨਿ, ਪੁਬ੍ਬਕਰਣਨ੍ਤਿ ਵੁਚ੍ਚਤਿ’’.

ਇਤਿ ਇਮਾਨਿ ਚਤ੍ਤਾਰਿ ‘‘ਪੁਬ੍ਬਕਰਣ’’ਨ੍ਤਿ ਅਕ੍ਖਾਤਾਨਿ.

‘‘ਛਨ੍ਦਪਾਰਿਸੁਦ੍ਧਿਉਤੁਕ੍ਖਾਨਂ, ਭਿਕ੍ਖੁਗਣਨਾ ਚ ਓਵਾਦੋ;

ਉਪੋਸਥਸ੍ਸ ਏਤਾਨਿ, ਪੁਬ੍ਬਕਿਚ੍ਚਨ੍ਤਿ ਵੁਚ੍ਚਤਿ.

ਇਤਿ ਇਮਾਨਿ ਪਞ੍ਚ ਪੁਬ੍ਬਕਰਣਤੋ ਪਚ੍ਛਾ ਕਤ੍ਤਬ੍ਬਾਨਿ ‘‘ਪੁਬ੍ਬਕਿਚ੍ਚ’’ਨ੍ਤਿ ਅਕ੍ਖਾਤਾਨਿ.

‘‘ਉਪੋਸਥੋ ਯਾਵਤਿਕਾ ਚ ਭਿਕ੍ਖੂ ਕਮ੍ਮਪ੍ਪਤ੍ਤਾ,

ਸਭਾਗਾਪਤ੍ਤਿਯੋ ਚ ਨ ਵਿਜ੍ਜਨ੍ਤਿ;

ਵਜ੍ਜਨੀਯਾ ਚ ਪੁਗ੍ਗਲਾ ਤਸ੍ਮਿਂ ਨ ਹੋਨ੍ਤਿ,

ਪਤ੍ਤਕਲ੍ਲਨ੍ਤਿ ਵੁਚ੍ਚਤਿ’’.

ਇਤਿ ਇਮਾਨਿ ਚਤ੍ਤਾਰਿ ‘‘ਪਤ੍ਤਕਲ੍ਲ’’ਨ੍ਤਿ ਅਕ੍ਖਾਤਾਨੀਤਿ.

ਤੇਹਿ ਸਦ੍ਧਿਨ੍ਤਿ ਤੇਹਿ ਆਗਤੇਹਿ ਸਦ੍ਧਿਂ ਏਤਾਨਿ ਪੁਬ੍ਬਕਰਣਾਦੀਨਿ ਕਤ੍ਵਾ ਉਪੋਸਥੋ ਕਾਤਬ੍ਬੋ. ਅਜ੍ਜ ਮੇ ਉਪੋਸਥੋਤਿ ਏਤ੍ਥ ਸਚੇ ਪਨ੍ਨਰਸੋ ਹੋਤਿ, ‘‘ਅਜ੍ਜ ਮੇ ਉਪੋਸਥੋ ਪਨ੍ਨਰਸੋ’’ਤਿਪਿ ਅਧਿਟ੍ਠਾਤੁਂ ਵਟ੍ਟਤਿ. ਚਾਤੁਦ੍ਦਸਿਕੇਪਿ ਏਸੇਵ ਨਯੋ.

ਆਪਤ੍ਤਿਪਟਿਕਮ੍ਮਵਿਧਿਕਥਾ

੧੬੯. ਭਗਵਤਾ ਪਞ੍ਞਤ੍ਤਂ ‘‘ਨ ਸਾਪਤ੍ਤਿਕੇਨ ਉਪੋਸਥੋ ਕਾਤਬ੍ਬੋ’’ਤਿ ਇਦਂ ‘‘ਯਸ੍ਸ ਸਿਯਾ ਆਪਤ੍ਤੀ’’ਤਿਆਦਿਵਚਨੇਨੇਵ ਪਾਰਿਸੁਦ੍ਧਿਦਾਨਪਞ੍ਞਾਪਨੇਨ ਚ ਪਾਰਿਸੁਦ੍ਧਿਉਪੋਸਥਪਞ੍ਞਾਪਨੇਨ ਚ ਪਞ੍ਞਤ੍ਤਂ ਹੋਤੀਤਿ ਵੇਦਿਤਬ੍ਬਂ. ਇਤ੍ਥਨ੍ਨਾਮਂ ਆਪਤ੍ਤਿਨ੍ਤਿ ਥੁਲ੍ਲਚ੍ਚਯਾਦੀਸੁ ਏਕਿਸ੍ਸਾ ਨਾਮਂ ਗਹੇਤ੍ਵਾ ‘‘ਥੁਲ੍ਲਚ੍ਚਯਂ ਆਪਤ੍ਤਿਂ ਪਾਚਿਤ੍ਤਿਯਂ ਆਪਤ੍ਤਿ’’ਨ੍ਤਿ ਏਵਂ ਵਤ੍ਤਬ੍ਬਂ. ਤਂ ਪਟਿਦੇਸੇਮੀਤਿ ਇਦਂ ‘‘ਤਂ ਤੁਮ੍ਹਮੂਲੇ, ਤਂ ਤੁਯ੍ਹਮੂਲੇ ਪਟਿਦੇਸੇਮੀ’’ਤਿ ਵੁਤ੍ਤੇਪਿ ਸੁਵੁਤ੍ਤਮੇਵ ਹੋਤਿ. ਪਸ੍ਸਸੀਤਿ ਇਦਞ੍ਚ ‘‘ਪਸ੍ਸਸਿ ਆਵੁਸੋ ਤਂ ਆਪਤ੍ਤਿਂ, ਪਸ੍ਸਥ ਭਨ੍ਤੇ ਤਂ ਆਪਤ੍ਤਿ’’ਨ੍ਤਿ ਏਵਂ ਵਤ੍ਤਬ੍ਬਂ. ਆਮ ਪਸ੍ਸਾਮੀਤਿ ਇਦਂ ਪਨ ‘‘ਆਮ ਭਨ੍ਤੇ ਪਸ੍ਸਾਮਿ, ਆਮ ਆਵੁਸੋ ਪਸ੍ਸਾਮੀ’’ਤਿ ਏਵਂ ਵੁਤ੍ਤਮ੍ਪਿ ਸੁਵੁਤ੍ਤਮੇਵ ਹੋਤਿ. ਆਯਤਿਂ ਸਂਵਰੇਯ੍ਯਾਸੀਤਿ ਏਤ੍ਥ ਪਨ ਸਚੇ ਵੁਡ੍ਢਤਰੋ ‘‘ਆਯਤਿਂ ਸਂਵਰੇਯ੍ਯਾਥਾ’’ਤਿ ਵਤ੍ਤਬ੍ਬੋ. ਏਵਂ ਵੁਤ੍ਤੇਨ ਪਨ ‘‘ਸਾਧੁ ਸੁਟ੍ਠੁ ਸਂਵਰਿਸ੍ਸਾਮੀ’’ਤਿ ਵਤ੍ਤਬ੍ਬਮੇਵ.

ਯਦਾ ਨਿਬ੍ਬੇਮਤਿਕੋਤਿ ਏਤ੍ਥ ਸਚੇ ਪਨੇਸ ਨਿਬ੍ਬੇਮਤਿਕੋ ਨ ਹੋਤਿ, ਵਤ੍ਥੁਂ ਕਿਤ੍ਤੇਤ੍ਵਾਵ ਦੇਸੇਤੁਂ ਵਟ੍ਟਤੀਤਿ ਅਨ੍ਧਕਟ੍ਠਕਥਾਯਂ ਵੁਤ੍ਤਂ. ਤਤ੍ਰਾਯਂ ਦੇਸਨਾਵਿਧਿ – ਸਚੇ ਮੇਘਚ੍ਛਨ੍ਨੇ ਸੂਰਿਯੇ ‘‘ਕਾਲੋ ਨੁ ਖੋ ਨੋ’’ਤਿ ਵੇਮਤਿਕੋ ਭੁਞ੍ਜਤਿ, ਤੇਨ ਭਿਕ੍ਖੁਨਾ ‘‘ਅਹਂ ਭਨ੍ਤੇ ਵੇਮਤਿਕੋ ਭੁਞ੍ਜਿਂ’’, ਸਚੇ ਕਾਲੋ ਅਤ੍ਥਿ, ‘‘ਸਮ੍ਬਹੁਲਾ ਦੁਕ੍ਕਟਾ ਆਪਤ੍ਤਿਯੋ ਆਪਨ੍ਨੋਮ੍ਹਿ, ਨੋ ਚੇ ਅਤ੍ਥਿ, ‘‘ਸਮ੍ਬਹੁਲਾ ਪਾਚਿਤ੍ਤਿਯਾ ਆਪਨ੍ਨੋਮ੍ਹੀ’’ਤਿ ਏਵਂ ਵਤ੍ਥੁਂ ਕਿਤ੍ਤੇਤ੍ਵਾ ‘‘ਅਹਂ ਭਨ੍ਤੇ ਯਾ ਤਸ੍ਮਿਂ ਵਤ੍ਥੁਸ੍ਮਿਂ ਸਮ੍ਬਹੁਲਾ ਦੁਕ੍ਕਟਾ ਵਾ ਪਾਚਿਤ੍ਤਿਯਾ ਵਾ ਆਪਤ੍ਤਿਯੋ ਆਪਨ੍ਨੋ, ਤਾ ਤੁਮ੍ਹਮੂਲੇ ਪਟਿਦੇਸੇਮੀ’’ਤਿ ਵਤ੍ਤਬ੍ਬਂ. ਏਸ ਨਯੋ ਸਬ੍ਬਾਪਤ੍ਤੀਸੁ.

ਨ ਭਿਕ੍ਖਵੇ ਸਭਾਗਾ ਆਪਤ੍ਤੀਤਿ ਏਤ੍ਥ ਯਂ ਦ੍ਵੇਪਿ ਜਨਾ ਵਿਕਾਲਭੋਜਨਾਦਿਨਾ ਸਭਾਗਵਤ੍ਥੁਨਾ ਆਪਤ੍ਤਿਂ ਆਪਜ੍ਜਨ੍ਤਿ, ਏਵਰੂਪਾ ਵਤ੍ਥੁਸਭਾਗਾ ‘‘ਸਭਾਗਾ’’ਤਿ ਵੁਚ੍ਚਤਿ. ਵਿਕਾਲਭੋਜਨਪ੍ਪਚ੍ਚਯਾ ਆਪਨ੍ਨਂ ਪਨ ਅਨਤਿਰਿਤ੍ਤਭੋਜਨਪਚ੍ਚਯਾ ਆਪਨ੍ਨਸ੍ਸ ਸਨ੍ਤਿਕੇ ਦੇਸੇਤੁਂ ਵਟ੍ਟਤਿ. ਯਾਪਿ ਚਾਯਂ ਵਤ੍ਥੁਸਭਾਗਾ, ਸਾਪਿ ਦੇਸਿਤਾ ਸੁਦੇਸਿਤਾਵ. ਅਞ੍ਞਂ ਪਨ ਦੇਸਨਪਚ੍ਚਯਾ ਦੇਸਕੋ, ਪਟਿਗ੍ਗਹਣਪ੍ਪਚ੍ਚਯਾ ਪਟਿਗ੍ਗਹਕੋ ਚਾਤਿ ਉਭੋਪਿ ਦੁਕ੍ਕਟਂ ਆਪਜ੍ਜਨ੍ਤਿ, ਤਂ ਨਾਨਾਵਤ੍ਥੁਕਂ ਹੋਤਿ, ਤਸ੍ਮਾ ਅਞ੍ਞਮਞ੍ਞਂ ਦੇਸੇਤੁਂ ਵਟ੍ਟਤਿ.

੧੭੦. ਸਾਮਨ੍ਤੋ ਭਿਕ੍ਖੁ ਏਵਮਸ੍ਸ ਵਚਨੀਯੋਤਿ ਏਤ੍ਥ ਸਭਾਗੋਯੇਵ ਵਤ੍ਤਬ੍ਬੋ. ਵਿਸਭਾਗਸ੍ਸ ਹਿ ਵੁਚ੍ਚਮਾਨੇ ਭਣ੍ਡਨਕਲਹਸਙ੍ਘਭੇਦਾਦੀਨਿਪਿ ਹੋਨ੍ਤਿ, ਤਸ੍ਮਾ ਤਸ੍ਸ ਅਵਤ੍ਵਾ ‘‘ਇਤੋ ਵੁਟ੍ਠਹਿਤ੍ਵਾ ਪਟਿਕਰਿਸ੍ਸਾਮੀ’’ਤਿ ਆਭੋਗਂ ਕਤ੍ਵਾ ਉਪੋਸਥੋ ਕਾਤਬ੍ਬੋਤਿ ਅਨ੍ਧਕਟ੍ਠਕਥਾਯਂ ਵੁਤ੍ਤਂ.

ਅਨਾਪਤ੍ਤਿਪਨ੍ਨਰਸਕਾਦਿਕਥਾ

੧੭੨. ਅਨਾਪਤ੍ਤਿਪਨ੍ਨਰਸਕੇ – ਤੇ ਨ ਜਾਨਿਂਸੂਤਿ ਸੀਮਂ ਓਕ੍ਕਨ੍ਤਾਤਿ ਵਾ ਓਕ੍ਕਮਨ੍ਤੀਤਿ ਵਾਤਿ ਨ ਜਾਨਿਂਸੁ. ਅਥਞ੍ਞੇ ਆਵਾਸਿਕਾ ਭਿਕ੍ਖੂ ਆਗਚ੍ਛਨ੍ਤੀਤਿ ਗਾਮਂ ਵਾ ਅਰਞ੍ਞਂ ਵਾ ਕੇਨਚਿ ਕਰਣੀਯੇਨ ਗਨ੍ਤ੍ਵਾ ਤੇਸਂ ਨਿਸਿਨ੍ਨਟ੍ਠਾਨਂ ਆਗਚ੍ਛਨ੍ਤਿ. ਵਗ੍ਗਾ ਸਮਗ੍ਗਸਞ੍ਞਿਨੋਤਿ ਤੇਸਂ ਸੀਮਂ ਓਕ੍ਕਨ੍ਤਤ੍ਤਾ ਵਗ੍ਗਾ; ਸੀਮਂ ਓਕ੍ਕਨ੍ਤਭਾਵਸ੍ਸ ਅਜਾਨਨਤੋ ਸਮਗ੍ਗਸਞ੍ਞਿਨੋ.

੧੭੩. ਵਗ੍ਗਾਵਗ੍ਗਸਞ੍ਞਿਪਨ੍ਨਰਸਕੇ – ਤੇ ਜਾਨਨ੍ਤੀਤਿ ਪਬ੍ਬਤੇ ਵਾ ਥਲੇ ਵਾ ਠਿਤਾ ਸੀਮਂ ਓਕ੍ਕਨ੍ਤੇ ਵਾ ਓਕ੍ਕਮਨ੍ਤੇ ਵਾ ਪਸ੍ਸਨ੍ਤਿ. ਵੇਮਤਿਕਪਨ੍ਨਰਸਕਂ ਉਤ੍ਤਾਨਮੇਵ.

੧੭੫. ਕੁਕ੍ਕੁਚ੍ਚਪਕਤਪਨ੍ਨਰਸਕੇ – ਯਥਾ ਇਚ੍ਛਾਯ ਅਭਿਭੂਤੋ ‘‘ਇਚ੍ਛਾਪਕਤੋ’’ਤਿ ਵੁਚ੍ਚਤਿ, ਏਵਂ ਪੁਬ੍ਬਭਾਗੇ ਸਨ੍ਨਿਟ੍ਠਾਨਂ ਕਤ੍ਵਾਪਿ ਕਰਣਕ੍ਖਣੇ ਅਕਪ੍ਪਿਯੇ ਅਕਪ੍ਪਿਯਸਞ੍ਞਿਤਾਸਙ੍ਖਾਤੇਨ ਕੁਕ੍ਕੁਚ੍ਚੇਨ ਅਭਿਭੂਤਾ ‘‘ਕੁਕ੍ਕੁਚ੍ਚਪਕਤਾ’’ਤਿ ਵੇਦਿਤਬ੍ਬਾ.

੧੭੬. ਭੇਦਪੁਰੇਕ੍ਖਾਰਪਨ੍ਨਰਸਕੇ – ਅਕੁਸਲਬਲਵਤਾਯ ਥੁਲ੍ਲਚ੍ਚਯਂ ਵੁਤ੍ਤਂ.

ਸੀਮੋਕ੍ਕਨ੍ਤਿਕਪੇਯ੍ਯਾਲਕਥਾ

੧੭੭. ਆਵਾਸਿਕੇਨਆਗਨ੍ਤੁਕਪੇਯ੍ਯਾਲੇ – ਯਥਾ ਪੁਰਿਮੇ ਆਵਾਸਿਕੇਨਆਵਾਸਿਕਪੇਯ੍ਯਾਲੇ ‘‘ਤੇ ਨ ਜਾਨਨ੍ਤਿ ਅਥਞ੍ਞੇ ਆਵਾਸਿਕਾ’’ਤਿਆਦਿ ਵੁਤ੍ਤਂ, ਏਵਂ ‘‘ਤੇ ਨ ਜਾਨਨ੍ਤਿ ਅਥਞ੍ਞੇ ਆਗਨ੍ਤੁਕਾ’’ਤਿਆਦਿਨਾ ਨਯੇਨ ਸਬ੍ਬਂ ਵੇਦਿਤਬ੍ਬਂ. ਆਗਨ੍ਤੁਕੇਨਆਵਾਸਿਕਪੇਯ੍ਯਾਲੇ ਪਨ – ਯਥਾ ਪੁਰਿਮਪੇਯ੍ਯਾਲੇ ‘‘ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤੀ’’ਤਿ ਆਗਤਂ, ਏਵਂ ‘‘ਆਗਨ੍ਤੁਕਾ ਭਿਕ੍ਖੂ ਸਨ੍ਨਿਪਤਨ੍ਤੀ’’ਤਿ ਆਨੇਤਬ੍ਬਂ. ਆਗਨ੍ਤੁਕੇਨਆਗਨ੍ਤੁਕਪੇਯ੍ਯਾਲੇ ਪਨ – ਉਭਯਪਦੇਸੁ ਆਗਨ੍ਤੁਕਵਸੇਨ ਯੋਜੇਤਬ੍ਬੋਤਿ.

੧੭੮. ਆਵਾਸਿਕਾਨਂ ਭਿਕ੍ਖੂਨਂ ਚਾਤੁਦ੍ਦਸੋ ਹੋਤਿ, ਆਗਨ੍ਤੁਕਾਨਂ ਪਨ੍ਨਰਸੋਤਿ ਏਤ੍ਥ ਯੇਸਂ ਪਨ੍ਨਰਸੋ, ਤੇ ਤਿਰੋਰਟ੍ਠਤੋ ਵਾ ਆਗਤਾ, ਅਤੀਤਂ ਵਾ ਉਪੋਸਥਂ ਚਾਤੁਦ੍ਦਸਿਕਂ ਅਕਂਸੂਤਿ ਵੇਦਿਤਬ੍ਬਾ. ਆਵਾਸਿਕਾਨਂ ਅਨੁਵਤ੍ਤਿਤਬ੍ਬਨ੍ਤਿ ਆਵਾਸਿਕੇਹਿ ‘‘ਅਜ੍ਜੁਪੋਸਥੋ ਚਾਤੁਦ੍ਦਸੋ’’ਤਿ ਪੁਬ੍ਬਕਿਚ੍ਚੇ ਕਰਿਯਮਾਨੇ ਅਨੁਵਤ੍ਤਿਤਬ੍ਬਂ, ਨ ਪਟਿਕ੍ਕੋਸਿਤਬ੍ਬਂ. ਨ ਅਕਾਮਾ ਦਾਤਬ੍ਬਾਤਿ ਨ ਅਨਿਚ੍ਛਾਯ ਦਾਤਬ੍ਬਾ.

ਲਿਙ੍ਗਾਦਿਦਸ੍ਸਨਕਥਾ

੧੭੯. ਆਵਾਸਿਕਾਕਾਰਨ੍ਤਿ ਆਵਾਸਿਕਾਨਂ ਆਕਾਰਂ. ਏਸ ਨਯੋ ਸਬ੍ਬਤ੍ਥ. ਆਕਾਰੋ ਨਾਮ ਯੇਨ ਤੇਸਂ ਵਤ੍ਤਸਮ੍ਪਨ੍ਨਾ ਵਾ ਨ ਵਾਤਿ ਆਚਾਰਸਣ੍ਠਾਨਂ ਗਯ੍ਹਤਿ. ਲਿਙ੍ਗਂ ਨਾਮ ਯਂ ਤੇ ਤਤ੍ਥ ਤਤ੍ਥ ਲੀਨੇ ਗਮਯਤਿ; ਅਦਿਸ੍ਸਮਾਨੇਪਿ ਜਾਨਾਪੇਤੀਤਿ ਅਤ੍ਥੋ. ਨਿਮਿਤ੍ਤਂ ਨਾਮ ਯਂ ਦਿਸ੍ਵਾ ਤੇ ਅਤ੍ਥੀਤਿ ਞਾਯਨ੍ਤਿ. ਉਦ੍ਦੇਸੋ ਨਾਮ ਯੇਨ ਤੇ ਏਵਰੂਪਪਰਿਕ੍ਖਾਰਾਤਿ ਉਦ੍ਦਿਸਨ੍ਤਿ; ਅਪਦੇਸਂ ਲਭਨ੍ਤੀਤਿ ਅਤ੍ਥੋ. ਸਬ੍ਬਮੇਤਂ ਸੁਪਞ੍ਞਤ੍ਤਮਞ੍ਚਪੀਠਾਦੀਨਞ੍ਚੇਵ ਪਦਸਦ੍ਦਾਦੀਨਞ੍ਚ ਅਧਿਵਚਨਂ, ਯਥਾਯੋਗਂ ਪਨ ਯੋਜੇਤਬ੍ਬਂ. ਆਗਨ੍ਤੁਕਾਕਾਰਾਦੀਸੁਪਿ ਏਸੇਵ ਨਯੋ. ਤਤ੍ਥ ਅਞ੍ਞਾਤਕਨ੍ਤਿ ਅਞ੍ਞੇਸਂ ਸਨ੍ਤਕਂ. ਪਾਦਾਨਂ ਧੋਤਂ ਉਦਕਨਿਸ੍ਸੇਕਨ੍ਤਿ ਪਾਦਾਨਂ ਧੋਤਾਨਂ ਉਦਕਨਿਸ੍ਸੇਕਂ. ਬਹੁਵਚਨਸ੍ਸ ਏਕਵਚਨਂ ਵੇਦਿਤਬ੍ਬਂ. ‘‘ਪਾਦਾਨਂ ਧੋਤਉਦਕਨਿਸ੍ਸੇਕ’’ਨ੍ਤਿ ਵਾ ਪਾਠੋ; ਪਾਦਾਨਂ ਧੋਵਨਉਦਕਨਿਸ੍ਸੇਕਨ੍ਤਿ ਅਤ੍ਥੋ.

੧੮੦. ਨਾਨਾਸਂਵਾਸਕਾਦਿਵਤ੍ਥੂਸੁ – ਸਮਾਨਸਂਵਾਸਕਦਿਟ੍ਠਿਨ੍ਤਿ ‘‘ਸਮਾਨਸਂਵਾਸਕਾ ਏਤੇ’’ਤਿ ਦਿਟ੍ਠਿਂ. ਨ ਪੁਚ੍ਛਨ੍ਤੀਤਿ ਤੇਸਂ ਲਦ੍ਧਿਂ ਨ ਪੁਚ੍ਛਨ੍ਤਿ; ਅਪੁਚ੍ਛਿਤ੍ਵਾਵ ਵਤ੍ਤਪਟਿਵਤ੍ਤਿਂ ਕਤ੍ਵਾ ਏਕਤੋ ਉਪੋਸਥਂ ਕਰੋਨ੍ਤਿ. ਨਾਭਿਵਿਤਰਨ੍ਤੀਤਿ ਨਾਨਾਸਂਵਾਸਕਭਾਵਂ ਮਦ੍ਦਿਤੁਂ ਅਭਿਭਵਿਤੁਂ ਨ ਸਕ੍ਕੋਨ੍ਤਿ; ਤਂ ਦਿਟ੍ਠਿਂ ਨ ਨਿਸ੍ਸਜ੍ਜਾਪੇਨ੍ਤੀਤਿ ਅਤ੍ਥੋ.

ਨਗਨ੍ਤਬ੍ਬਗਨ੍ਤਬ੍ਬਵਾਰਕਥਾ

੧੮੧. ਸਭਿਕ੍ਖੁਕਾ ਆਵਾਸਾਤਿ ਯਸ੍ਮਿਂ ਆਵਾਸੇ ਉਪੋਸਥਕਾਰਕਾ ਭਿਕ੍ਖੂ ਅਤ੍ਥਿ, ਤਮ੍ਹਾ ਆਵਾਸਾ ਯਂ ਨ ਸਕ੍ਕੋਤਿ ਤਦਹੇਵ ਆਗਨ੍ਤੁਂ, ਸੋ ਆਵਾਸੋ ਉਪੋਸਥਂ ਅਕਤ੍ਵਾ ਨ ਗਨ੍ਤਬ੍ਬੋ. ਅਞ੍ਞਤ੍ਰ ਸਙ੍ਘੇਨਾਤਿ ਸਙ੍ਘਪ੍ਪਹੋਨਕੇਹਿ ਭਿਕ੍ਖੂਹਿ ਵਿਨਾ. ਅਞ੍ਞਤ੍ਰ ਅਨ੍ਤਰਾਯਾਤਿ ਪੁਬ੍ਬੇ ਵੁਤ੍ਤਂ ਦਸਵਿਧਂ ਅਨ੍ਤਰਾਯਂ ਵਿਨਾ. ਸਬ੍ਬਨ੍ਤਿਮੇਨ ਪਨ ਪਰਿਚ੍ਛੇਦੇਨ ਅਤ੍ਤਚਤੁਤ੍ਥੇਨ ਅਨ੍ਤਰਾਯੇ ਵਾ ਸਤਿ ਗਨ੍ਤੁਂ ਵਟ੍ਟਤਿ. ਅਨਾਵਾਸੋਤਿ ਨਵਕਮ੍ਮਸਾਲਾਦਿਕੋ ਯੋ ਕੋਚਿ ਪਦੇਸੋ. ਯਥਾ ਚ ਆਵਾਸਾਦਯੋ ਨ ਗਨ੍ਤਬ੍ਬਾ; ਏਵਂ ਸਚੇ ਵਿਹਾਰੇ ਉਪੋਸਥਂ ਕਰੋਨ੍ਤਿ, ਉਪੋਸਥਾਧਿਟ੍ਠਾਨਤ੍ਥਂ ਸੀਮਾਪਿ ਨਦੀਪਿ ਨ ਗਨ੍ਤਬ੍ਬਾ. ਸਚੇ ਪਨੇਤ੍ਥ ਕੋਚਿ ਭਿਕ੍ਖੁ ਹੋਤਿ, ਤਸ੍ਸ ਸਨ੍ਤਿਕਂ ਗਨ੍ਤੁਂ ਵਟ੍ਟਤਿ. ਵਿਸ੍ਸਟ੍ਠਉਪੋਸਥਾਪਿ ਆਵਾਸਾ ਗਨ੍ਤੁਂ ਵਟ੍ਟਤਿ; ਏਵਂ ਗਤੋ ਅਧਿਟ੍ਠਾਤੁਮ੍ਪਿ ਲਭਤਿ. ਆਰਞ੍ਞਕੇਨਾਪਿ ਭਿਕ੍ਖੁਨਾ ਉਪੋਸਥਦਿਵਸੇ ਗਾਮੇ ਪਿਣ੍ਡਾਯ ਚਰਿਤ੍ਵਾ ਅਤ੍ਤਨੋ ਵਿਹਾਰਮੇਵ ਆਗਨ੍ਤਬ੍ਬਂ. ਸਚੇ ਅਞ੍ਞਂ ਵਿਹਾਰਂ ਓਕ੍ਕਮਤਿ, ਤਤ੍ਥ ਉਪੋਸਥਂ ਕਤ੍ਵਾਵ ਆਗਨ੍ਤਬ੍ਬਂ, ਅਕਤ੍ਵਾ ਨ ਵਟ੍ਟਤਿ.

੧੮੨. ਯਂ ਜਞ੍ਞਾ ਸਕ੍ਕੋਮਿ ਅਜ੍ਜੇਵ ਗਨ੍ਤੁਨ੍ਤਿ ਯਂ ਜਾਨੇਯ੍ਯ ਅਜ੍ਜੇਵ ਤਤ੍ਥ ਗਨ੍ਤੁਂ ਸਕ੍ਕੋਮੀਤਿ; ਏਵਰੂਪੋ ਆਵਾਸੋ ਗਨ੍ਤਬ੍ਬੋ. ਤਤ੍ਥ ਭਿਕ੍ਖੂਹਿ ਸਦ੍ਧਿਂ ਉਪੋਸਥਂ ਕਰੋਨ੍ਤੇਨਾਪਿ ਹਿ ਇਮਿਨਾ ਨੇਵ ਉਪੋਸਥਨ੍ਤਰਾਯੋ ਕਤੋ ਭਵਿਸ੍ਸਤੀਤਿ.

ਵਜ੍ਜਨੀਯਪੁਗ੍ਗਲਸਨ੍ਦਸ੍ਸਨਕਥਾ

੧੮੩. ਭਿਕ੍ਖੁਨਿਯਾ ਨਿਸਿਨ੍ਨਪਰਿਸਾਯਾਤਿਆਦੀਸੁ ਹਤ੍ਥਪਾਸੁਪਗਮਨਮੇਵ ਪਮਾਣਂ. ਅਞ੍ਞਤ੍ਰ ਅਵੁਟ੍ਠਿਤਾਯ ਪਰਿਸਾਯਾਤਿ ਇਦਞ੍ਹਿ ਪਾਰਿਵਾਸਿਯਪਾਰਿਸੁਦ੍ਧਿਦਾਨਂ ਨਾਮ ਪਰਿਸਾਯ ਵੁਟ੍ਠਿਤਕਾਲਤੋ ਪਟ੍ਠਾਯ ਨ ਵਟ੍ਟਤਿ, ਅਵੁਟ੍ਠਿਤਾਯ ਪਨ ਵਟ੍ਟਤਿ. ਤੇਨਾਹ – ‘‘ਅਞ੍ਞਤ੍ਰ ਅਵੁਟ੍ਠਿਤਾਯ ਪਰਿਸਾਯਾ’’ਤਿ. ਤਸ੍ਸ ਲਕ੍ਖਣਂ ਭਿਕ੍ਖੁਨਿਵਿਭਙ੍ਗੇ ਪਰਿਵਾਸਿਯਛਨ੍ਦਦਾਨਵਣ੍ਣਨਤੋ ਗਹੇਤਬ੍ਬਂ. ਅਨੁਪੋਸਥੇਤਿ ਚਾਤੁਦ੍ਦਸਿਕੋ ਚ ਪਨ੍ਨਰਸਿਕੋ ਚਾਤਿ ਇਮੇ ਦ੍ਵੇ ਉਪੋਸਥੇ ਠਪੇਤ੍ਵਾ ਅਞ੍ਞਸ੍ਮਿਂ ਦਿਵਸੇ. ਅਞ੍ਞਤ੍ਰ ਸਙ੍ਘਸਾਮਗ੍ਗਿਯਾਤਿ ਯਾ ਕੋਸਮ੍ਬਕਭਿਕ੍ਖੂਨਂ ਵਿਯ ਭਿਨ੍ਨੇ ਸਙ੍ਘੇ ਪੁਨ ਸਙ੍ਘਸਾਮਗ੍ਗੀ ਕਰਿਯਤਿ, ਤਥਾਰੂਪਿਂ ਸਙ੍ਘਸਾਮਗ੍ਗਿਂ ਠਪੇਤ੍ਵਾ. ਤਦਾ ਚ ‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ ਅਜ੍ਜੁਪੋਸਥੋ ਸਾਮਗ੍ਗੀ’’ਤਿ ਵਤ੍ਵਾ ਕਾਤਬ੍ਬੋ. ਯੇ ਪਨ ਕਿਸ੍ਮਿਞ੍ਚਿਦੇਵ ਅਪ੍ਪਮਤ੍ਤਕੇ ਉਪੋਸਥਂ ਠਪੇਤ੍ਵਾ ਪੁਨ ਸਮਗ੍ਗਾ ਹੋਨ੍ਤਿ, ਤੇਹਿ ਉਪੋਸਥੇਯੇਵ ਕਾਤਬ੍ਬੋਤਿ.

ਉਪੋਸਥਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.