੧੨. ਸਤ੍ਤਸਤਿਕਕ੍ਖਨ੍ਧਕਂ
ਦਸਵਤ੍ਥੁਕਥਾ
੪੪੬. ਸਤ੍ਤਸਤਿਕਕ੍ਖਨ੍ਧਕੇ – ਭਿਕ੍ਖਗ੍ਗੇਨਾਤਿ ਭਿਕ੍ਖੁਅਗ੍ਗੇਨ, ਭਿਕ੍ਖੂ ਗਣੇਤ੍ਵਾ ਤਤ੍ਤਕੇ ਪਟਿਵੀਸੇ ਠਪੇਸੁਨ੍ਤਿ ਅਤ੍ਥੋ. ਮਹਿਯਾਤਿ ਹਿਮਪਾਤਸਮਯੇ ਹਿਮਵਲਾਹਕਾ.
੪੪੭. ਅਵਿਜ੍ਜਾਨਿਵੁਟਾਤਿ ਅਵਿਜ੍ਜਾਪਟਿਚ੍ਛਨ੍ਨਾ. ਪੋਸਾਤਿ ਪੁਰਿਸਾ. ਪਿਯਰੂਪਂ ਅਭਿਨਨ੍ਦਨ੍ਤਿ ਪਤ੍ਥੇਨ੍ਤੀਤਿ ਪਿਯਰੂਪਾਭਿਨਨ੍ਦਿਨੋ. ਅਵਿਦ੍ਦਸੂਤਿ ਅਵਿਜਾਨਨ੍ਤਾ. ਰਾਗਰਜੇਹਿ ਸਰਜਾ. ਮਗਸਦਿਸਾਤਿ ਮਗਾ. ਸਹ ਨੇਤ੍ਤਿਯਾਤਿ ਸਨੇਤ੍ਤਿਕਾ. ਵਡ੍ਢੇਨ੍ਤਿ ਕਟਸਿਨ੍ਤਿ ਪੁਨਪ੍ਪੁਨਂ ਕਲ਼ੇਵਰਂ ਨਿਕ੍ਖਿਪਮਾਨਾ ਭੂਮਿਂ ਵਡ੍ਢੇਨ੍ਤਿ. ਏਵਂ ਵਡ੍ਢੇਨ੍ਤਾਵ ਘੋਰਂ ਆਦਿਯਨ੍ਤਿ ਪੁਨਬ੍ਭਵਂ.
੪੫੪. ਪਾਪਕਂ ਨੋ ਆਵੁਸੋ ਕਤਨ੍ਤਿ ਆਵੁਸੋ ਅਮ੍ਹੇਹਿ ਪਾਪਕਂ ਕਤਨ੍ਤਿ ਅਤ੍ਥੋ.
੪੫੫. ਕਤਮੇਨ ਤ੍ਵਂ ਭੂਮਿ ਵਿਹਾਰੇਨਾਤਿ ਏਤ੍ਥ ਭੂਮੀਤਿ ਪਿਯਵਚਨਮੇਤਂ. ਪਿਯਂ ਵਤ੍ਤੁਕਾਮੋ ਕਿਰ ਆਯਸ੍ਮਾ ਸਬ੍ਬਕਾਮੀ ਨਵਕੇ ਭਿਕ੍ਖੂ ਏਵਂ ਆਮਨ੍ਤੇਤਿ. ਕੁਲ੍ਲਕਵਿਹਾਰੇਨਾਤਿ ਉਤ੍ਤਾਨਵਿਹਾਰੇਨ.
੪੫੭. ਸਾਵਤ੍ਥਿਯਾ ਸੁਤ੍ਤਵਿਭਙ੍ਗੇਤਿ ਕਥਂ ਸੁਤ੍ਤਵਿਭਙ੍ਗੇ ਪਟਿਕ੍ਖਿਤ੍ਤਂ ਹੋਤਿ? ਤਤ੍ਰ ਹਿ ‘‘ਸਨ੍ਨਿਧਿ ਨਾਮ ਅਜ੍ਜ ਪਟਿਗ੍ਗਹਿਤਂ ਅਪਰਜ੍ਜੂ’’ਤਿ ਵਤ੍ਵਾ ਪੁਨ ‘‘ਸਨ੍ਨਿਧਿਕਾਰਕੇ ਅਸਨ੍ਨਿਧਿਕਾਰਕਸਞ੍ਞੀ ਖਾਦਨੀਯਂ ਵਾ ਭੋਜਨੀਯਂ ਵਾ ਖਾਦਤਿ ਵਾ ਭੁਞ੍ਜਤਿ ਵਾ ਆਪਤ੍ਤਿ ਪਾਚਿਤ੍ਤਿਯਸ੍ਸਾ’’ਤਿ ਆਪਤ੍ਤਿਂ ਵਦਨ੍ਤੇਨ ਪਟਿਕ੍ਖਿਤ੍ਤਂ ਹੋਤਿ. ਤਤ੍ਰੇਕੇ ਮਞ੍ਞਨ੍ਤਿ ‘‘ਯੋ ਪਨ ਭਿਕ੍ਖੁ ਸਨ੍ਨਿਧਿਕਾਰਕਂ ਖਾਦਨੀਯਂ ਵਾ ਭੋਜਨੀਯਂ ਵਾ’’ਤਿ ਹਿ ਵੁਤ੍ਤਂ, ਇਦਞ੍ਚ ਲੋਣਂ ਨਾਮ ਯਾਵਜੀਵਿਕਤ੍ਤਾ ਸਨ੍ਨਿਧਿਭਾਵਂ ਨਾਪਜ੍ਜਤਿ. ਯਮ੍ਪਿ ਅਲੋਣਕਂ ਆਮਿਸਂ ਪਟਿਗ੍ਗਹੇਤ੍ਵਾ ਤੇਨ ਸਦ੍ਧਿਂ ਪਰਿਭੁਞ੍ਜਤਿ, ਤਂ ਤਦਹੁਪਟਿਗ੍ਗਹਿਤਮੇਵ, ਤਸ੍ਮਾ ‘‘‘ਯਾਵਕਾਲਿਕੇਨ, ਭਿਕ੍ਖਵੇ, ਯਾਵਜੀਵਿਕਂ ਤਦਹੁਪਟਿਗ੍ਗਹਿਤਂ ਕਾਲੇ ਕਪ੍ਪਤਿ, ਵਿਕਾਲੇ ਨ ਕਪ੍ਪਤੀ’ਤਿ ਵਚਨਤੋ ਦੁਕ੍ਕਟੇਨੇਤ੍ਥ ਭਵਿਤਬ੍ਬ’’ਨ੍ਤਿ. ਤੇ ਵਤ੍ਤਬ੍ਬਾ – ‘‘ਤੁਮ੍ਹਾਕਂ ਮਤੇਨ ਦੁਕ੍ਕਟੇਨਪਿ ਨ ਭਵਿਤਬ੍ਬਂ, ਨ ਹਿ ਏਤ੍ਥ ਯਾਵਜੀਵਿਕਂ ਤਦਹੁਪਟਿਗ੍ਗਹਿਤਂ, ਯਾਵਕਾਲਿਕਮੇਵ ਤਦਹੁਪਟਿਗ੍ਗਹਿਤਂ, ਨ ਚ ਤਂ ਵਿਕਾਲੇ ਪਰਿਭੁਤ੍ਤਂ. ਯਦਿ ਵਾ ‘‘ਵਿਕਾਲੇ ਨ ਕਪ੍ਪਤੀ’’ਤਿ ਵਚਨੇਨ ਤੁਮ੍ਹੇ ਦੁਕ੍ਕਟਂ ਮਞ੍ਞੇਥ, ਯਾਵਜੀਵਿਕਮਿਸ੍ਸਂ ਯਾਵਕਾਲਿਕਂ ਵਿਕਾਲੇ ਭੁਞ੍ਜਨ੍ਤਸ੍ਸ ਵਿਕਾਲਭੋਜਨਪਾਚਿਤ੍ਤਿਯਂ ਨ ਭਵੇਯ੍ਯ. ਤਸ੍ਮਾ ਨ ਬ੍ਯਞ੍ਜਨਮਤ੍ਤਂ ਗਹੇਤਬ੍ਬਂ, ਅਤ੍ਥੋ ਉਪਪਰਿਕ੍ਖਿਤਬ੍ਬੋ.
ਅਯਞ੍ਹੇਤ੍ਥ ਅਤ੍ਥੋ – ਯਾਵਕਾਲਿਕੇਨ ਯਾਵਜੀਵਿਕਂ ਤਦਹੁਪਟਿਗ੍ਗਹਿਤਂ ਯਦਿ ਸਮ੍ਭਿਨ੍ਨਰਸਂ ਹੋਤਿ, ਯਾਵਕਾਲਿਕਗਤਿਕਮੇਵ ਹੋਤਿ. ਤਸ੍ਮਾ ‘‘ਯੋ ਪਨ ਭਿਕ੍ਖੁ ਵਿਕਾਲੇ ਖਾਦਨੀਯਂ ਵਾ ਭੋਜਨੀਯਂ ਵਾ’’ਤਿ ਇਮਿਨਾ ਸਿਕ੍ਖਾਪਦੇਨ ਕਾਲੇ ਕਪ੍ਪਤਿ, ਵਿਕਾਲੇ ਨ ਕਪ੍ਪਤਿ. ਨ ਇਧ ‘‘ਨ ਕਪ੍ਪਤੀ’’ਤਿ ਵਚਨਮਤ੍ਤੇਨੇਤ੍ਥ ਦੁਕ੍ਕਟਂ ਹੋਤਿ. ਯਥੇਵ ਯਾਵਜੀਵਿਕਂ ਤਦਹੁਪਟਿਗ੍ਗਹਿਤਂ ਯਾਵਕਾਲਿਕੇਨ ਸਮ੍ਭਿਨ੍ਨਰਸਂ ਵਿਕਾਲੇ ਨ ਕਪ੍ਪਤਿ, ਵਿਕਾਲਭੋਜਨਪਾਚਿਤ੍ਤਿਯਾਵਹਂ ਹੋਤਿ. ਏਵਂ ਅਜ੍ਜ ਪਟਿਗ੍ਗਹਿਤਮ੍ਪਿ ਅਪਰਜ੍ਜੁ ਯਾਵਕਾਲਿਕੇਨ ਸਮ੍ਭਿਨ੍ਨਰਸਂ ਨ ਕਪ੍ਪਤਿ, ਸਨ੍ਨਿਧਿਭੋਜਨਪਾਚਿਤ੍ਤਿਯਾਵਹਂ ਹੋਤਿ. ਤਂ ‘‘ਸਨ੍ਨਿਧਿਕਤਂ ਇਦ’’ਨ੍ਤਿ ਅਜਾਨਨ੍ਤੋਪਿ ਨ ਮੁਚ੍ਚਤਿ. ਵੁਤ੍ਤਞ੍ਹੇਤਂ – ‘‘ਸਨ੍ਨਿਧਿਕਾਰਕੇ ਅਸਨ੍ਨਿਧਿਕਾਰਕਸਞ੍ਞੀ ਖਾਦਨੀਯਂ ਵਾ ਭੋਜਨੀਯਂ ਵਾ ਖਾਦਤਿ ਵਾ ਭੁਞ੍ਜਤਿ ਵਾ ਆਪਤ੍ਤਿ ਪਾਚਿਤ੍ਤਿਯਸ੍ਸਾ’’ਤਿ. ਤਸ੍ਮਾ ‘‘ਕਤ੍ਥ ਪਟਿਕ੍ਖਿਤ੍ਤ’’ਨ੍ਤਿ ਇਮਿਸ੍ਸਾ ਪੁਚ੍ਛਾਯ ‘‘ਪਰਿਸੁਦ੍ਧਮਿਦਂ ਬ੍ਯਾਕਰਣਂ ਸਾਵਤ੍ਥਿਯਾ ਸੁਤ੍ਤਵਿਭਙ੍ਗੇ’’ਤਿ.
ਰਾਜਗਹੇ ਉਪੋਸਥਸਂਯੁਤ੍ਤੇਤਿ ਇਦਂ ‘‘ਨ ਭਿਕ੍ਖਵੇ ਏਕਸ੍ਮਿਂ ਆਵਾਸੇ ਦ੍ਵੇ ਉਪੋਸਥਾਗਾਰਾਨਿ ਸਮ੍ਮਨ੍ਨਿਤਬ੍ਬਾਨਿ; ਯੋ ਸਮ੍ਮਨ੍ਨੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਏਤਂ ਸਨ੍ਧਾਯ ਵੁਤ੍ਤਂ. ਵਿਨਯਾਤਿਸਾਰੇ ਦੁਕ੍ਕਟਨ੍ਤਿ ‘‘ਨ ਭਿਕ੍ਖਵੇ ਏਕਸ੍ਮਿਂ ਆਵਾਸੇ ਦ੍ਵੇ ਉਪੋਸਥਾਗਾਰਾਨਿ ਸਮ੍ਮਨ੍ਨਿਤਬ੍ਬਾਨੀ’’ਤਿ ਏਤਸ੍ਸ ਵਿਨਯਸ੍ਸ ਅਤਿਸਾਰੇ ਦੁਕ੍ਕਟਂ. ਚਮ੍ਪੇਯ੍ਯਕੇ ਵਿਨਯਵਤ੍ਥੁਸ੍ਮਿਨ੍ਤਿ ਇਦਂ ‘‘ਅਧਮ੍ਮੇਨ ਚੇ ਭਿਕ੍ਖਵੇ ਵਗ੍ਗਕਮ੍ਮਂ, ਅਕਮ੍ਮਂ ਨ ਚ ਕਰਣੀਯ’’ਨ੍ਤਿ ਏਵਮਾਦਿਂ ਕਤ੍ਵਾ ਚਮ੍ਪੇਯ੍ਯਕ੍ਖਨ੍ਧਕੇ ਆਗਤਂ ਵਿਨਯਵਤ੍ਥੁਂ ਸਨ੍ਧਾਯ ਵੁਤ੍ਤਂ.
ਏਕਚ੍ਚੋ ਕਪ੍ਪਤੀਤਿ ਇਦਂ ਧਮ੍ਮਿਕਂ ਆਚਿਣ੍ਣਂ ਸਨ੍ਧਾਯ ਵੁਤ੍ਤਂ. ਛੇਦਨਕੇ ਪਾਚਿਤ੍ਤਿਯਨ੍ਤਿ ਸੁਤ੍ਤਵਿਭਙ੍ਗੇ ਹਿ ‘‘ਨਿਸੀਦਨਂ ਨਾਮ ਸਦਸਂ ਵੁਚ੍ਚਤੀ’’ਤਿ ਆਗਤਂ, ਤਸ੍ਮਾ ਦ੍ਵਿਨ੍ਨਂ ਸੁਗਤਵਿਦਤ੍ਥੀਨਂ ਉਪਰਿ ਦਸਾਯੇਵ ਵਿਦਤ੍ਥਿਮਤ੍ਤਾ ਲਬ੍ਭਤਿ. ਦਸਾਯ ਵਿਨਾ ਤਂ ਪਮਾਣਂ ਕਰੋਨ੍ਤਸ੍ਸ ਇਦਂ ਆਗਤਮੇਵ ਹੋਤਿ – ‘‘ਤਂ ਅਤਿਕ੍ਕਾਮਯਤੋ ਛੇਦਨਕਂ ਪਾਚਿਤ੍ਤਿਯ’’ਨ੍ਤਿ. ਤਸ੍ਮਾ ‘‘ਕਿਂ ਆਪਜ੍ਜਤੀ’’ਤਿ ਪੁਟ੍ਠੋ ‘‘ਛੇਦਨਕੇ ਪਾਚਿਤ੍ਤਿਯ’’ਨ੍ਤਿ ਆਹ. ਛੇਦਨਕਸਿਕ੍ਖਾਪਦੇ ਵੁਤ੍ਤਪਾਚਿਤ੍ਤਿਯਂ ਆਪਜ੍ਜਤੀਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਦਸਵਤ੍ਥੁਕਥਾ ਨਿਟ੍ਠਿਤਾ.
ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ
ਸਤ੍ਤਸਤਿਕਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.
ਦ੍ਵਿਵਗ੍ਗਸਙ੍ਗਹਾ ਵੁਤ੍ਤਾ, ਦ੍ਵਾਵੀਸਤਿਪਭੇਦਨਾ;
ਖਨ੍ਧਕਾ ਸਾਸਨੇ ਪਞ੍ਚਕ੍ਖਨ੍ਧਦੁਕ੍ਖਪ੍ਪਹਾਯਿਨੋ.
ਯਾ ਤੇਸਂ ਵਣ੍ਣਨਾ ਏਸਾ, ਅਨ੍ਤਰਾਯਂ ਵਿਨਾ ਯਥਾ;
ਸਿਦ੍ਧਾ ਸਿਜ੍ਝਨ੍ਤੁ ਕਲ੍ਯਾਣਾ, ਏਵਂ ਆਸਾਪਿ ਪਾਣਿਨਨ੍ਤਿ.
ਚੂਲ਼ਵਗ੍ਗ-ਅਟ੍ਠਕਥਾ ਨਿਟ੍ਠਿਤਾ.