੭. ਇਦ੍ਧਿਪਾਦਸਂਯੁਤ੍ਤਂ
੧. ਚਾਪਾਲਵਗ੍ਗੋ
੧. ਅਪਾਰਸੁਤ੍ਤਵਣ੍ਣਨਾ
੮੧੩. ਇਦ੍ਧਿਪਾਦਸਂਯੁਤ੍ਤਸ੍ਸ ਪਠਮੇ ਛਨ੍ਦਂ ਨਿਸ੍ਸਾਯ ਪਵਤ੍ਤੋ ਸਮਾਧਿ ਛਨ੍ਦਸਮਾਧਿ. ਪਧਾਨਭੂਤਾ ਸਙ੍ਖਾਰਾ ਪਧਾਨਸਙ੍ਖਾਰਾ. ਸਮਨ੍ਨਾਗਤਨ੍ਤਿ ਤੇਹਿ ਧਮ੍ਮੇਹਿ ਉਪੇਤਂ. ਇਦ੍ਧਿਯਾ ਪਾਦਂ, ਇਦ੍ਧਿਭੂਤਂ ਵਾ ਪਾਦਨ੍ਤਿ ਇਦ੍ਧਿਪਾਦਂ. ਸੇਸੇਸੁਪਿ ਏਸੇਵ ਨਯੋ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਇਦ੍ਧਿਪਾਦਵਿਭਙ੍ਗੇ (ਵਿਭ. ੪੩੧ ਆਦਯੋ) ਆਗਤੋਵ. ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੨.੩.੬੯ ਆਦਯੋ) ਪਨਸ੍ਸ ਅਤ੍ਥੋ ਦੀਪਿਤੋ. ਤਥਾ ਮਗ੍ਗਬੋਜ੍ਝਙ੍ਗਸਤਿਪਟ੍ਠਾਨਸਂਯੁਤ੍ਤੇਸੁ ਚੇਵ ਇਧ ਚ ਏਕਪਰਿਚ੍ਛੇਦੋਵ.
੫. ਇਦ੍ਧਿਪਦੇਸਸੁਤ੍ਤਵਣ੍ਣਨਾ
੮੧੭. ਪਞ੍ਚਮੇ ਇਦ੍ਧਿਪਦੇਸਨ੍ਤਿ ਤਯੋ ਚ ਮਗ੍ਗੇ ਤੀਣਿ ਚ ਫਲਾਨਿ.
੬. ਸਮਤ੍ਤਸੁਤ੍ਤਵਣ੍ਣਨਾ
੮੧੮. ਛਟ੍ਠੇ ਸਮਤ੍ਤਂ ਇਦ੍ਧਿਨ੍ਤਿ ਅਰਹਤ੍ਤਫਲਮੇਵ. ਆਦਿਤੋ ਪਟ੍ਠਾਯ ਪਨ ਨਵਸੁਪਿ ਸੁਤ੍ਤੇਸੁ ਵਿਵਟ੍ਟਪਾਦਕਾ ਏਵ ਇਦ੍ਧਿਪਾਦਾ ਕਥਿਤਾ.
੧੦. ਚੇਤਿਯਸੁਤ੍ਤਵਣ੍ਣਨਾ
੮੨੨. ਦਸਮੇ ਨਿਸੀਦਨਨ੍ਤਿ ਚਮ੍ਮਖਣ੍ਡਂ ਅਧਿਪ੍ਪੇਤਂ. ਉਦੇਨਂ ਚੇਤਿਯਨ੍ਤਿ ਉਦੇਨਯਕ੍ਖਸ੍ਸ ਚੇਤਿਯਟ੍ਠਾਨੇ ਕਤਵਿਹਾਰੋ ਵੁਚ੍ਚਤਿ. ਗੋਤਮਕਾਦੀਸੁਪਿ ਏਸੇਵ ਨਯੋ. ਭਾਵਿਤਾਤਿ ਵਡ੍ਢਿਤਾ. ਬਹੁਲੀਕਤਾਤਿ ਪੁਨਪ੍ਪੁਨਂ ਕਤਾ. ਯਾਨੀਕਤਾਤਿ ਯੁਤ੍ਤਯਾਨਂ ਵਿਯ ਕਤਾ. ਵਤ੍ਥੁਕਤਾਤਿ ਪਤਿਟ੍ਠਾਨਟ੍ਠੇਨ ਵਤ੍ਥੁ ਵਿਯ ਕਤਾ. ਅਨੁਟ੍ਠਿਤਾਤਿ ਅਧਿਟ੍ਠਿਤਾ. ਪਰਿਚਿਤਾਤਿ ਸਮਨ੍ਤਤੋ ਚਿਤਾ ਸੁਵਡ੍ਢਿਤਾ. ਸੁਸਮਾਰਦ੍ਧਾਤਿ ਸੁਟ੍ਠੁ ਸਮਾਰਦ੍ਧਾ.
ਇਤਿ ਅਨਿਯਮੇਨ ਕਥੇਤ੍ਵਾ ਪੁਨ ਨਿਯਮੇਤ੍ਵਾ ਦਸ੍ਸੇਨ੍ਤੋ ਤਥਾਗਤਸ੍ਸ ਖੋਤਿਆਦਿਮਾਹ. ਏਤ੍ਥ ਚ ਕਪ੍ਪਨ੍ਤਿ ਆਯੁਕਪ੍ਪਂ, ਤਸ੍ਮਿਂ ਤਸ੍ਮਿਂ ਕਾਲੇ ਯਂ ਮਨੁਸ੍ਸਾਨਂ ਆਯੁਪ੍ਪਮਾਣਂ, ਤਂ ਪਰਿਪੁਣ੍ਣਂ ਕਰੋਨ੍ਤੋ ਤਿਟ੍ਠੇਯ੍ਯ. ਕਪ੍ਪਾਵਸੇਸਂ ਵਾਤਿ ‘‘ਅਪ੍ਪਂ ਵਾ ਭਿਯ੍ਯੋ’’ਤਿ ਵੁਤ੍ਤਵਸ੍ਸਸਤਤੋ ਅਤਿਰੇਕਂ ਵਾ. ਮਹਾਸੀਵਤ੍ਥੇਰੋ ਪਨਾਹ ‘‘ਬੁਦ੍ਧਾਨਂ ਅਟ੍ਠਾਨੇ ਗਜ੍ਜਿਤਂ ਨਾਮ ਨਤ੍ਥਿ. ਯਥੇਵ ਹਿ ਵੇਲ਼ੁਵਗਾਮਕੇ ਉਪ੍ਪਨ੍ਨਂ ਮਾਰਣਨ੍ਤਿਕਵੇਦਨਂ ਦਸ ਮਾਸੇ ਵਿਕ੍ਖਮ੍ਭੇਸਿ, ਏਵਂ ਪੁਨਪ੍ਪੁਨਂ ਤਂ ਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਦਸ ਦਸ ਮਾਸੇਪਿ ਵਿਕ੍ਖਮ੍ਭੇਨ੍ਤੋ ਇਮਂ ਭਦ੍ਦਕਪ੍ਪਮੇਵ ਤਿਟ੍ਠੇਯ੍ਯਾ’’ਤਿ.
ਕਸ੍ਮਾ ਪਨ ਨ ਠਿਤੋਤਿ? ਉਪਾਦਿਣ੍ਣਕਸਰੀਰਂ ਨਾਮ ਖਣ੍ਡਿਚ੍ਚਾਦੀਹਿ ਅਭਿਭੁਯ੍ਯਤਿ, ਬੁਦ੍ਧਾ ਨਾਮ ਖਣ੍ਡਿਚ੍ਚਾਦਿਭਾਵਂ ਅਪਤ੍ਵਾਵ ਪਞ੍ਚਮੇ ਆਯੁਕੋਟ੍ਠਾਸੇ ਬਹੁਜਨਸ੍ਸ ਪਿਯਮਨਾਪਕਾਲੇਯੇਵ ਪਰਿਨਿਬ੍ਬਾਯਨ੍ਤਿ. ਬੁਦ੍ਧਾਨੁਬੁਦ੍ਧੇਸੁ ਚ ਮਹਾਸਾਵਕੇਸੁ ਪਰਿਨਿਬ੍ਬੁਤੇਸੁ ਏਕਕੇਨ ਖਾਣੁਕੇਨ ਵਿਯ ਠਾਤਬ੍ਬਂ ਹੋਤਿ, ਦਹਰਸਾਮਣੇਰਪਰਿਵਾਰਿਤੇਨ ਵਾ, ਤਤੋ – ‘‘ਅਹੋ ਬੁਦ੍ਧਾਨਂ ਪਰਿਸਾ’’ਤਿ ਹੀਲ਼ੇਤਬ੍ਬਤਂ ਆਪਜ੍ਜੇਯ੍ਯ, ਤਸ੍ਮਾ ਨ ਠਿਤੋਤਿ. ਏਵਂ ਵੁਤ੍ਤੇਪਿ ਸੋ ਪਨ ਨ ਰੁਚ੍ਚਤਿ, ‘‘ਆਯੁਕਪ੍ਪੋ’’ਤਿ ਇਦਮੇਵ ਅਟ੍ਠਕਥਾਯਂ ਨਿਯਮਿਤਂ.
ਯਥਾ ਤਂ ਮਾਰੇਨ ਪਰਿਯੁਟ੍ਠਿਤਚਿਤ੍ਤੋਤਿ ਏਤ੍ਥ ਤਨ੍ਤਿ ਨਿਪਾਤਮਤ੍ਤਂ. ਯਥਾ ਮਾਰੇਨ ਪਰਿਯੁਟ੍ਠਿਤਚਿਤ੍ਤੋ ਅਜ੍ਝੋਤ੍ਥਟਚਿਤ੍ਤੋ ਅਞ੍ਞੋਪਿ ਕੋਚਿ ਪੁਥੁਜ੍ਜਨੋ ਪਟਿਵਿਜ੍ਝਿਤੁਂ ਨ ਸਕ੍ਕੁਣੇਯ੍ਯ, ਏਵਮੇਵ ਨਾਸਕ੍ਖਿ ਪਟਿਵਿਜ੍ਝਿਤੁਨ੍ਤਿ ਅਤ੍ਥੋ. ਮਾਰੋ ਹਿ ਯਸ੍ਸ ਸਬ੍ਬੇਨ ਸਬ੍ਬਂ ਦ੍ਵਾਦਸ ਵਿਪਲ੍ਲਾਸਾ ਅਪ੍ਪਹੀਨਾ, ਤਸ੍ਸ ਚਿਤ੍ਤਂ ਪਰਿਯੁਟ੍ਠਾਤਿ. ਥੇਰਸ੍ਸ ਚ ਚਤ੍ਤਾਰੋ ਵਿਪਲ੍ਲਾਸਾ ਅਪ੍ਪਹੀਨਾ, ਤੇਨਸ੍ਸ ਮਾਰੋ ਚਿਤ੍ਤਂ ਪਰਿਯੁਟ੍ਠਾਸਿ. ਸੋ ਪਨ ਚਿਤ੍ਤਪਰਿਯੁਟ੍ਠਾਨਂ ਕਰੋਨ੍ਤੋ ਕਿਂ ਕਰੋਤੀਤਿ? ਭੇਰਵਂ ਰੂਪਾਰਮ੍ਮਣਂ ਵਾ ਦਸ੍ਸੇਤਿ, ਸਦ੍ਦਾਰਮ੍ਮਣਂ ਵਾ ਸਾਵੇਤਿ, ਤਤੋ ਸਤ੍ਤਾ ਤਂ ਦਿਸ੍ਵਾ ਵਾ ਸੁਤ੍ਵਾ ਵਾ ਸਤਿਂ ਵਿਸ੍ਸਜ੍ਜੇਤ੍ਵਾ ਵਿਵਟਮੁਖਾ ਹੋਨ੍ਤਿ, ਤੇਸਂ ਮੁਖੇਨ ਹਤ੍ਥਂ ਪਵੇਸੇਤ੍ਵਾ ਹਦਯਂ ਮਦ੍ਦਤਿ, ਤੇ ਵਿਸਞ੍ਞੀ ਹੁਤ੍ਵਾ ਤਿਟ੍ਠਨ੍ਤਿ. ਥੇਰਸ੍ਸ ਪਨੇਸ ਮੁਖੇ ਹਤ੍ਥਂ ਪਵੇਸੇਤੁਂ ਕਿਂ ਸਕ੍ਖਿਸ੍ਸਤਿ? ਭੇਰਵਾਰਮ੍ਮਣਂ ਪਨ ਦਸ੍ਸੇਤਿ, ਤਂ ਦਿਸ੍ਵਾ ਥੇਰੋ ਨਿਮਿਤ੍ਤੋਭਾਸਂ ਨ ਪਟਿਵਿਜ੍ਝਿ. ਜਾਨਨ੍ਤੋਯੇਵ ਭਗਵਾ ਕਿਮਤ੍ਥਂ ਯਾਵਤਤਿਯਕਂ ਆਮਨ੍ਤੇਸੀਤਿ. ਪਰਤੋ ‘‘ਤਿਟ੍ਠਤੁ, ਭਨ੍ਤੇ, ਭਗਵਾ’’ਤਿ ਯਾਚਿਤੇ ‘‘ਤੁਯ੍ਹੇਵੇਤਂ ਦੁਕ੍ਕਟਂ, ਤੁਯ੍ਹੇਵੇਤਂ ਅਪਰਦ੍ਧ’’ਨ੍ਤਿ ਦੋਸਾਰੋਪਨੇਨ ਸੋਕਤਨੁਕਰਣਤ੍ਥਂ.
ਮਾਰੋ ਪਾਪਿਮਾਤਿ ਏਤ੍ਥ ਸਤ੍ਤੇ ਅਨਤ੍ਥੇ ਨਿਯੋਜੇਨ੍ਤੋ ਮਾਰੇਤੀਤਿ ਮਾਰੋ. ਪਾਪਿਮਾਤਿ ਤਸ੍ਸੇਵ ਵੇਵਚਨਂ. ਸੋ ਹਿ ਪਾਪਧਮ੍ਮਸਮਨ੍ਨਾਗਤਤ੍ਤਾ ‘‘ਪਾਪਿਮਾ’’ਤਿ ਵੁਚ੍ਚਤਿ. ਕਣ੍ਹੋ, ਅਨ੍ਤਕੋ, ਨਮੁਚਿ, ਪਮਤ੍ਤਬਨ੍ਧੂਤਿਪਿ ਤਸ੍ਸੇਵ ਨਾਮਾਨਿ. ਭਾਸਿਤਾ ਖੋ ਪਨੇਸਾਤਿ ਅਯਞ੍ਹਿ ਭਗਵਤੋ ਸਮ੍ਬੋਧਿਪਤ੍ਤਿਯਾ ਅਟ੍ਠਮੇ ਸਤ੍ਤਾਹੇ ਬੋਧਿਮਣ੍ਡਂਯੇਵ ਆਗਨ੍ਤ੍ਵਾ – ‘‘ਭਗਵਾ ਯਦਤ੍ਥਂ ਤੁਮ੍ਹੇਹਿ ਪਾਰਮਿਯੋ ਪੂਰਿਤਾ, ਸੋ ਵੋ ਅਤ੍ਥੋ ਅਨੁਪ੍ਪਤ੍ਤੋ, ਪਟਿਵਿਦ੍ਧਂ ਸਬ੍ਬਞ੍ਞੁਤਞ੍ਞਾਣਂ, ਕਿਂ ਵੋ ਲੋਕਵਿਚਰਣੇਨਾ’’ਤਿ ਵਤ੍ਵਾ ਯਥਾ ਅਜ੍ਜ, ਏਵਮੇਵ – ‘‘ਪਰਿਨਿਬ੍ਬਾਤੁ ਦਾਨਿ, ਭਨ੍ਤੇ, ਭਗਵਾ, ਪਰਿਨਿਬ੍ਬਾਤੁ, ਸੁਗਤੋ,’’ਤਿ ਯਾਚਿ. ਭਗਵਾ ਚਸ੍ਸ ‘‘ਨ ਤਾਵਾਹ’’ਨ੍ਤਿਆਦੀਨਿ ਵਤ੍ਵਾ ਪਟਿਕ੍ਖਿਪਿ. ਤਂ ਸਨ੍ਧਾਯ ‘‘ਭਾਸਿਤਾ ਖੋ ਪਨੇਸਾ, ਭਨ੍ਤੇ,’’ਤਿਆਦਿਮਾਹ.
ਤਤ੍ਥ ਵਿਯਤ੍ਤਾਤਿ ਮਗ੍ਗਵਸੇਨ ਬ੍ਯਤ੍ਤਾ. ਤਥੇਵ ਵਿਨੀਤਾ. ਤਥਾ ਵਿਸਾਰਦਾ. ਬਹੁਸ੍ਸੁਤਾਤਿ ਤੇਪਿਟਕਵਸੇਨ ਬਹੁ ਸੁਤਮੇਤੇਸਨ੍ਤਿ ਬਹੁਸ੍ਸੁਤਾ. ਤਦੇਵ ਧਮ੍ਮਂ ਧਾਰੇਨ੍ਤੀਤਿ ਧਮ੍ਮਧਰਾ. ਅਥ ਵਾ ਪਰਿਯਤ੍ਤਿਬਹੁਸ੍ਸੁਤਾ ਚੇਵ ਪਟਿਵੇਧਬਹੁਸ੍ਸੁਤਾ ਚ, ਪਰਿਯਤ੍ਤਿਪਟਿਵੇਧਧਮ੍ਮਾਨਂਯੇਵ ਧਾਰਣਤੋ ਧਮ੍ਮਧਰਾਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਧਮ੍ਮਾਨੁਧਮ੍ਮਪ੍ਪਟਿਪਨ੍ਨਾਤਿ ਅਰਿਯਧਮ੍ਮਸ੍ਸ ਅਨੁਧਮ੍ਮਭੂਤਂ ਵਿਪਸ੍ਸਨਾਧਮ੍ਮਂ ਪਟਿਪਨ੍ਨਾ. ਸਾਮੀਚਿਪ੍ਪਟਿਪਨ੍ਨਾਤਿ ਅਨੁਚ੍ਛਵਿਕਪਟਿਪਦਂ ਪਟਿਪਨ੍ਨਾ. ਅਨੁਧਮ੍ਮਚਾਰਿਨੋਤਿ ਅਨੁਧਮ੍ਮਚਰਣਸੀਲਾ. ਸਕਂ ਆਚਰਿਯਕਨ੍ਤਿ ਅਤ੍ਤਨੋ ਆਚਰਿਯਵਾਦਂ. ਆਚਿਕ੍ਖਿਸ੍ਸਨ੍ਤੀਤਿਆਦੀਨਿ ਸਬ੍ਬਾਨਿ ਅਞ੍ਞਮਞ੍ਞਸ੍ਸੇਵ ਵੇਵਚਨਾਨਿ. ਸਹਧਮ੍ਮੇਨਾਤਿ ਸਹੇਤੁਕੇਨ ਸਕਾਰਣੇਨ ਵਚਨੇਨ. ਸਪ੍ਪਾਟਿਹਾਰਿਯਨ੍ਤਿ ਯਾਵ ਨਿਯ੍ਯਾਨਿਕਂ ਕਤ੍ਵਾ ਧਮ੍ਮਂ ਦੇਸੇਸ੍ਸਨ੍ਤਿ.
ਬ੍ਰਹ੍ਮਚਰਿਯਨ੍ਤਿ ਸਿਕ੍ਖਤ੍ਤਯਸਙ੍ਗਹਿਤਂ ਸਕਲਂ ਸਾਸਨਬ੍ਰਹ੍ਮਚਰਿਯਂ. ਇਦ੍ਧਨ੍ਤਿ ਸਮਿਦ੍ਧਂ ਝਾਨਸ੍ਸਾਦਵਸੇਨ. ਫੀਤਨ੍ਤਿ ਵੁਡ੍ਢਿਪਤ੍ਤਂ ਸਬ੍ਬਪਾਲਿਫੁਲ੍ਲਂ ਵਿਯ ਅਭਿਞ੍ਞਾਸਮ੍ਪਤ੍ਤਿਵਸੇਨ. ਵਿਤ੍ਥਾਰਿਕਨ੍ਤਿ ਵਿਤ੍ਥਤਂ ਤਸ੍ਮਿਂ ਤਸ੍ਮਿਂ ਦਿਸਾਭਾਗੇ ਪਤਿਟ੍ਠਿਤਵਸੇਨ. ਬਾਹੁਜਞ੍ਞਨ੍ਤਿ ਬਹੂਹਿ ਞਾਤਂ ਪਟਿਵਿਦ੍ਧਂ ਮਹਾਜਨਾਭਿਸਮਯਵਸੇਨ. ਪੁਥੁਭੂਤਨ੍ਤਿ ਸਬ੍ਬਾਕਾਰੇਨ ਪੁਥੁਲਭਾਵਪਤ੍ਤਂ. ਕਥਂ? ਯਾਵ ਦੇਵਮਨੁਸ੍ਸੇਹਿ ਸੁਪ੍ਪਕਾਸਿਤਂ, ਯਤ੍ਤਕਾ ਵਿਞ੍ਞੁਜਾਤਿਕਾ ਦੇਵਾ ਚੇਵ ਮਨੁਸ੍ਸਾ ਚ ਅਤ੍ਥਿ, ਸਬ੍ਬੇਹਿ ਸੁਟ੍ਠੁ ਪਕਾਸਿਤਨ੍ਤਿ ਅਤ੍ਥੋ.
ਅਪ੍ਪੋਸ੍ਸੁਕ੍ਕੋਤਿ ਨਿਰਾਲਯੋ. ਤ੍ਵਞ੍ਹਿ ਪਾਪਿਮ ਅਟ੍ਠਮਸਤ੍ਤਾਹਤੋ ਪਟ੍ਠਾਯ ‘‘ਪਰਿਨਿਬ੍ਬਾਤੁ ਦਾਨਿ, ਭਨ੍ਤੇ, ਭਗਵਾ, ਪਰਿਨਿਬ੍ਬਾਤੁ ਸੁਗਤੋ’’ਤਿ ਵਿਰਵਨ੍ਤੋ ਆਹਿਣ੍ਡਿਤ੍ਥ, ਅਜ੍ਜ ਦਾਨਿ ਪਟ੍ਠਾਯ ਵਿਗਤੁਸ੍ਸਾਹੋ ਹੋਹਿ, ਮਾ ਮਯ੍ਹਂ ਪਰਿਨਿਬ੍ਬਾਨਤ੍ਥਂ ਵਾਯਾਮਂ ਕਰੋਹੀਤਿ ਵਦਤਿ.
ਸਤੋ ਸਮ੍ਪਜਾਨੋ ਆਯੁਸਙ੍ਖਾਰਂ ਓਸ੍ਸਜੀਤਿ ਸਤਿਂ ਸੂਪਟ੍ਠਿਤਂ ਕਤ੍ਵਾ ਞਾਣੇਨ ਪਰਿਚ੍ਛਿਨ੍ਦਿਤ੍ਵਾ ਆਯੁਸਙ੍ਖਾਰਂ ਵਿਸ੍ਸਜਿ ਪਜਹਿ. ਤਤ੍ਥ ਨ ਭਗਵਾ ਹਤ੍ਥੇਨ ਲੇਡ੍ਡੁਂ ਵਿਯ ਆਯੁਸਙ੍ਖਾਰਂ ਓਸ੍ਸਜਿ, ਤੇਮਾਸਮਤ੍ਤਮੇਵ ਪਨ ਫਲਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਤਤੋ ਪਰਂ ਨ ਸਮਾਪਜ੍ਜਿਸ੍ਸਾਮੀਤਿ ਚਿਤ੍ਤਂ ਉਪ੍ਪਾਦੇਸਿ. ਤਂ ਸਨ੍ਧਾਯ ਵੁਤ੍ਤਂ ‘‘ਓਸ੍ਸਜੀ’’ਤਿ. ਉਸ੍ਸਜੀਤਿਪਿ ਪਾਠੋ. ਮਹਾਭੂਮਿਚਾਲੋਤਿ ਮਹਨ੍ਤੋ ਪਥਵਿਕਮ੍ਪੋ. ਤਦਾ ਕਿਰ ਦਸਸਹਸ੍ਸਿਲੋਕਧਾਤੁ ਅਕਮ੍ਪਿਤ੍ਥ. ਭਿਂਸਨਕੋਤਿ ਭਯਜਨਕੋ. ਦੇਵਦੁਨ੍ਦੁਭਿਯੋ ਚ ਫਲਿਂਸੂਤਿ ਦੇਵਭੇਰਿਯੋ ਫਲਿਂਸੁ, ਦੇਵੋ ਸੁਕ੍ਖਗਜ੍ਜਿਤਂ ਗਜ੍ਜਿ, ਅਕਾਲਵਿਜ੍ਜੁਲਤਾ ਨਿਚ੍ਛਰਿਂਸੁ, ਖਣਿਕਵਸ੍ਸਂ ਵਸ੍ਸੀਤਿ ਵੁਤ੍ਤਂ ਹੋਤਿ.
ਉਦਾਨਂ ਉਦਾਨੇਸੀਤਿ ਕਸ੍ਮਾ ਉਦਾਨੇਸਿ? ਕੋਚਿ ਨਾਮ ਵਦੇਯ੍ਯ ‘‘ਭਗਵਾ ਪਚ੍ਛਤੋ ਪਚ੍ਛਤੋ ਅਨੁਬਨ੍ਧਿਤ੍ਵਾ – ‘ਪਰਿਨਿਬ੍ਬਾਯਥ, ਭਨ੍ਤੇ, ਪਰਿਨਿਬ੍ਬਾਯਥ, ਭਨ੍ਤੇ’ਤਿ ਉਪਦ੍ਦੁਤੋ ਭਯੇਨ ਆਯੁਸਙ੍ਖਾਰਂ ਵਿਸ੍ਸਜ੍ਜੇਸੀ’’ਤਿ. ਤਸ੍ਸੋਕਾਸੋ ਮਾ ਹੋਤੂਤਿ. ਭੀਤਸ੍ਸ ਹਿ ਉਦਾਨਂ ਨਾਮ ਨਤ੍ਥੀਤਿ ਪੀਤਿਵੇਗਵਿਸ੍ਸਟ੍ਠਂ ਉਦਾਨੇਸਿ.
ਤਤ੍ਥ ਸਬ੍ਬੇਸਂ ਸੋਣਸਿਙ੍ਗਾਲਾਦੀਨਮ੍ਪਿ ਪਚ੍ਚਕ੍ਖਭਾਵਤੋ ਤੁਲਿਤਂ ਪਰਿਚ੍ਛਿਨ੍ਨਨ੍ਤਿ ਤੁਲਂ. ਕਿਂ ਤਂ? ਕਾਮਾਵਚਰਕਮ੍ਮਂ. ਨ ਤੁਲਂ, ਨ ਵਾ ਤੁਲਂ ਸਦਿਸਮਸ੍ਸ ਅਞ੍ਞਂ ਲੋਕਿਯਕਮ੍ਮਂ ਅਤ੍ਥੀਤਿ ਅਤੁਲਂ. ਕਿਂ ਤਂ? ਮਹਗ੍ਗਤਕਮ੍ਮਂ. ਅਥ ਵਾ ਕਾਮਾਵਚਰਂ ਰੂਪਾਵਚਰਞ੍ਚ ਤੁਲਂ, ਅਰੂਪਾਵਚਰਂ ਅਤੁਲਂ. ਅਪ੍ਪਵਿਪਾਕਂ ਤੁਲਂ, ਬਹੁਵਿਪਾਕਂ ਅਤੁਲਂ. ਸਮ੍ਭਵਨ੍ਤਿ ਸਮ੍ਭਵਹੇਤੁਭੂਤਂ, ਪਿਣ੍ਡਕਾਰਕਂ ਰਾਸਿਕਾਰਕਨ੍ਤਿ ਅਤ੍ਥੋ. ਭਵਸਙ੍ਖਾਰਨ੍ਤਿ ਪੁਨਬ੍ਭਵਸ੍ਸ ਸਙ੍ਖਾਰਂ. ਅਵਸ੍ਸਜੀਤਿ ਵਿਸ੍ਸਜ੍ਜੇਸਿ. ਮੁਨੀਤਿ ਬੁਦ੍ਧਮੁਨਿ. ਅਜ੍ਝਤ੍ਤਰਤੋਤਿ ਨਿਯਕਜ੍ਝਤ੍ਤਰਤੋ. ਸਮਾਹਿਤੋਤਿ ਉਪਚਾਰਪ੍ਪਨਾਸਮਾਧਿਵਸੇਨ ਸਮਾਹਿਤੋ. ਅਭਿਨ੍ਦਿ ਕਵਚਮਿਵਾਤਿ ਕਵਚਂ ਵਿਯ ਅਭਿਨ੍ਦਿ. ਅਤ੍ਤਸਮ੍ਭਵਨ੍ਤਿ ਅਤ੍ਤਨਿ ਜਾਤਕਿਲੇਸਂ. ਇਦਂ ਵੁਤ੍ਤਂ ਹੋਤਿ – ਸਵਿਪਾਕਟ੍ਠੇਨ ਸਮ੍ਭਵਂ ਭਵਾਭਿਸਙ੍ਖਣਟ੍ਠੇਨ ਭਵਸਙ੍ਖਾਰਨ੍ਤਿ ਚ ਲਦ੍ਧਨਾਮਂ ਤੁਲਾਤੁਲਸਙ੍ਖਾਤਂ ਲੋਕਿਯਕਮ੍ਮਞ੍ਚ ਓਸ੍ਸਜਿ, ਸਙ੍ਗਾਮਸੀਸੇ ਮਹਾਯੋਧੋ ਕਵਚਂ ਵਿਯ ਅਤ੍ਤਸਮ੍ਭਵਂ ਕਿਲੇਸਞ੍ਚ ਅਜ੍ਝਤ੍ਤਰਤੋ ਸਮਾਹਿਤੋ ਹੁਤ੍ਵਾ ਅਭਿਨ੍ਦੀਤਿ.
ਅਥ ਵਾ ਤੁਲਨ੍ਤਿ ਤੁਲੇਨ੍ਤੋ ਤੀਰੇਨ੍ਤੋ. ਅਤੁਲਞ੍ਚ ਸਮ੍ਭਵਨ੍ਤਿ ਨਿਬ੍ਬਾਨਞ੍ਚੇਵ ਭਵਞ੍ਚ. ਭਵਸਙ੍ਖਾਰਨ੍ਤਿ ਭਵਗਾਮਿਕਮ੍ਮਂ. ਅਵਸ੍ਸਜਿ ਮੁਨੀਤਿ ‘‘ਪਞ੍ਚਕ੍ਖਨ੍ਧਾ ਅਨਿਚ੍ਚਾ, ਪਞ੍ਚਨ੍ਨਂ ਖਨ੍ਧਾਨਂ ਨਿਰੋਧੋ ਨਿਬ੍ਬਾਨਂ ਨਿਚ੍ਚ’’ਨ੍ਤਿਆਦਿਨਾ ਨਯੇਨ ਤੁਲਯਨ੍ਤੋ ਬੁਦ੍ਧਮੁਨਿ ਭਵੇ ਆਦੀਨਵਂ ਨਿਬ੍ਬਾਨੇ ਚਾਨਿਸਂਸਂ ਦਿਸ੍ਵਾ ਤਂ ਖਨ੍ਧਾਨਂ ਮੂਲਭੂਤਂ ਭਵਸਙ੍ਖਾਰਂ ‘‘ਕਮ੍ਮਕ੍ਖਯਾਯ ਸਂਵਤ੍ਤਤੀ’’ਤਿ ਏਵਂ ਵੁਤ੍ਤੇਨ ਕਮ੍ਮਕ੍ਖਯਕਰੇਨ ਅਰਿਯਮਗ੍ਗੇਨ ਅਵਸ੍ਸਜਿ. ਕਥਂ? ਅਜ੍ਝਤ੍ਤਰਤੋ ਸਮਾਹਿਤੋ ਅਭਿਨ੍ਦਿ ਕਵਚਮਿਵਤ੍ਤਸਮ੍ਭਵਂ. ਸੋ ਹਿ ਵਿਪਸ੍ਸਨਾਵਸੇਨ ਅਜ੍ਝਤ੍ਤਰਤੋ, ਸਮਥਵਸੇਨ ਸਮਾਹਿਤੋਤਿ ਏਵਂ ਪੁਬ੍ਬਭਾਗਤੋ ਪਟ੍ਠਾਯ ਸਮਥਵਿਪਸ੍ਸਨਾਬਲੇਨ ਕਵਚਮਿਵ ਅਤ੍ਤਭਾਵਂ ਪਰਿਯੋਨਨ੍ਧਿਤ੍ਵਾ ਠਿਤਂ, ਅਤ੍ਤਨਿ ਸਮ੍ਭਵਤ੍ਤਾ ਅਤ੍ਤਸਮ੍ਭਵਨ੍ਤਿ ਲਦ੍ਧਨਾਮਂ ਸਬ੍ਬਂ ਕਿਲੇਸਜਾਤਂ ਅਭਿਨ੍ਦਿ. ਕਿਲੇਸਾਭਾਵੇਨ ਚ ਕਮ੍ਮਂ ਅਪ੍ਪਟਿਸਨ੍ਧਿਕਤ੍ਤਾ ਅਵਸ੍ਸਟ੍ਠਂ ਨਾਮ ਹੋਤੀਤਿ ਏਵਂ ਕਿਲੇਸਪ੍ਪਹਾਨੇਨ ਕਮ੍ਮਂ ਜਹਿ. ਪਹੀਨਕਿਲੇਸਸ੍ਸ ਭਯਂ ਨਾਮ ਨਤ੍ਥਿ. ਤਸ੍ਮਾ ਅਭੀਤੋਵ ਆਯੁਸਙ੍ਖਾਰਂ ਓਸ੍ਸਜਿ. ਅਭੀਤਭਾਵਞਾਪਨਤ੍ਥਞ੍ਚ ਉਦਾਨਂ ਉਦਾਨੇਸੀਤਿ ਵੇਦਿਤਬ੍ਬੋ.
ਚਾਪਾਲਵਗ੍ਗੋ ਪਠਮੋ.
੨. ਪਾਸਾਦਕਮ੍ਪਨਵਗ੍ਗੋ
੧-੨. ਪੁਬ੍ਬਸੁਤ੍ਤਾਦਿਵਣ੍ਣਨਾ
੮੨੩-੮੨੪. ਦੁਤਿਯਵਗ੍ਗਸ੍ਸ ਪਠਮੇ ਨ ਚ ਅਤਿਲੀਨੋਤਿਆਦੀਨਿ ਪਰਤੋ ਆਵਿ ਭਵਿਸ੍ਸਨ੍ਤਿ. ਇਮਸ੍ਮਿਂ ਸੁਤ੍ਤੇ ਛਅਭਿਞ੍ਞਾਪਾਦਕਾ ਇਦ੍ਧਿਪਾਦਾ ਕਥਿਤਾ, ਤਥਾ ਦੁਤਿਯੇ ਚ.
੩. ਛਨ੍ਦਸਮਾਧਿਸੁਤ੍ਤਵਣ੍ਣਨਾ
੮੨੫. ਤਤਿਯੇ ਛਨ੍ਦਨ੍ਤਿ ਕਤ੍ਤੁਕਮ੍ਯਤਾਛਨ੍ਦਂ. ਨਿਸ੍ਸਾਯਾਤਿ ਨਿਸ੍ਸਯਂ ਕਤ੍ਵਾ, ਅਧਿਪਤਿਂ ਕਤ੍ਵਾਤਿ ਅਤ੍ਥੋ. ਪਧਾਨਸਙ੍ਖਾਰਾਤਿ ਪਧਾਨਭੂਤਾ ਸਙ੍ਖਾਰਾ, ਚਤੁਕਿਚ੍ਚਸਾਧਕਸਮ੍ਮਪ੍ਪਧਾਨਵੀਰਿਯਸ੍ਸੇਤਂ ਅਧਿਵਚਨਂ. ਇਤਿ ਅਯਞ੍ਚ ਛਨ੍ਦੋਤਿਆਦੀਸੁ ਛਨ੍ਦੋ ਛਨ੍ਦਸਮਾਧਿਨਾ ਚੇਵ ਪਧਾਨਸਙ੍ਖਾਰੇਹਿ ਚ, ਛਨ੍ਦਸਮਾਧਿ ਛਨ੍ਦੇਨ ਚੇਵ ਪਧਾਨਸਙ੍ਖਾਰੇਹਿ ਚ, ਪਧਾਨਸਙ੍ਖਾਰਾਪਿ ਛਨ੍ਦੇਨ ਚੇਵ ਛਨ੍ਦਸਮਾਧਿਨਾ ਚ ਸਮਨ੍ਨਾਗਤਾ. ਤਸ੍ਮਾ ਸਬ੍ਬੇ ਤੇ ਧਮ੍ਮੇ ਏਕਤੋ ਕਤ੍ਵਾ ਅਯਂ ਵੁਚ੍ਚਤਿ, ਭਿਕ੍ਖਵੇ, ਛਨ੍ਦਸਮਾਧਿਪ੍ਪਧਾਨਸਙ੍ਖਾਰਸਮਨ੍ਨਾਗਤੋ ਇਦ੍ਧਿਪਾਦੋਤਿ ਵੁਤ੍ਤਂ. ਇਦ੍ਧਿਪਾਦਵਿਭਙ੍ਗੇ (ਵਿਭ. ੪੩੭) ਪਨ ‘‘ਯੋ ਤਥਾਭੂਤਸ੍ਸ ਵੇਦਨਾਕ੍ਖਨ੍ਧੋ ਤਿਆਦਿਨਾ ਨਯੇਨ ਇਮੇਹਿ ਧਮ੍ਮੇਹਿ ਸਮਨ੍ਨਾਗਤਾ ਸੇਸਅਰੂਪਿਨੋ ਧਮ੍ਮਾ ਇਦ੍ਧਿਪਾਦਾਤਿ ਵੁਤ੍ਤਾ.
ਅਪਿਚ ਇਮੇਪਿ ਤਯੋ ਧਮ੍ਮਾ ਇਦ੍ਧੀਪਿ ਹੋਨ੍ਤਿ ਇਦ੍ਧਿਪਾਦਾਪਿ. ਕਥਂ? ਛਨ੍ਦਞ੍ਹਿ ਭਾਵਯਤੋ ਛਨ੍ਦੋ ਇਦ੍ਧਿ ਨਾਮ ਹੋਤਿ, ਸਮਾਧਿਪ੍ਪਧਾਨਸਙ੍ਖਾਰਾ ਛਨ੍ਦਿਦ੍ਧਿਪਾਦੋ ਨਾਮ. ਸਮਾਧਿਂ ਭਾਵੇਨ੍ਤਸ੍ਸ ਸਮਾਧਿ ਇਦ੍ਧਿ ਨਾਮ ਹੋਤਿ, ਛਨ੍ਦਪ੍ਪਧਾਨਸਙ੍ਖਾਰਾ ਸਮਾਧਿਦ੍ਧਿਯਾ ਪਾਦੋ ਨਾਮ. ਪਧਾਨਸਙ੍ਖਾਰੇ ਭਾਵੇਨ੍ਤਸ੍ਸ ਪਧਾਨਸਙ੍ਖਾਰਾ ਇਦ੍ਧਿ ਨਾਮ ਹੋਤਿ, ਛਨ੍ਦਸਮਾਧਿ ਪਧਾਨਸਙ੍ਖਾਰਿਦ੍ਧਿਯਾ ਪਾਦੋ ਨਾਮ, ਸਮ੍ਪਯੁਤ੍ਤਧਮ੍ਮੇਸੁ ਹਿ ਏਕਸ੍ਮਿਂ ਇਜ੍ਝਮਾਨੇ ਸੇਸਾਪਿ ਇਜ੍ਝਨ੍ਤਿਯੇਵ.
ਅਪਿਚ ਤੇਸਂ ਤੇਸਂ ਧਮ੍ਮਾਨਂ ਪੁਬ੍ਬਭਾਗਵਸੇਨਾਪਿ ਏਤੇਸਂ ਇਦ੍ਧਿਪਾਦਤਾ ਵੇਦਿਤਬ੍ਬਾ. ਪਠਮਜ੍ਝਾਨਞ੍ਹਿ ਇਦ੍ਧਿ ਨਾਮ, ਪਠਮਜ੍ਝਾਨਸ੍ਸ ਪੁਬ੍ਬਭਾਗਪਰਿਕਮ੍ਮਸਮ੍ਪਯੁਤ੍ਤਾ ਛਨ੍ਦਾਦਯੋ ਇਦ੍ਧਿਪਾਦੋ ਨਾਮ. ਏਤੇਨੁਪਾਯੇਨ ਯਾਵ ਨੇਵਸਞ੍ਞਾਨਾਸਞ੍ਞਾਯਤਨਾ, ਇਦ੍ਧਿਵਿਧਂ ਆਦਿਂ ਕਤ੍ਵਾ ਯਾਵ ਦਿਬ੍ਬਚਕ੍ਖੁਅਭਿਞ੍ਞਾ, ਸੋਤਾਪਤ੍ਤਿਮਗ੍ਗਂ ਆਦਿਂ ਕਤ੍ਵਾ ਯਾਵ ਅਰਹਤ੍ਤਮਗ੍ਗਾ ਨਯੋ ਨੇਤਬ੍ਬੋ. ਸੇਸਿਦ੍ਧਿਪਾਦੇਸੁਪਿ ਏਸੇਵ ਨਯੋ.
ਕੇਚਿ ਪਨ ‘‘ਅਨਿਬ੍ਬਤ੍ਤੋ ਛਨ੍ਦੋ ਇਦ੍ਧਿਪਾਦੋ’’ਤਿ ਵਦਨ੍ਤਿ. ਇਧ ਤੇਸਂ ਵਾਦਮਦ੍ਦਨਤ੍ਥਾਯ ਅਭਿਧਮ੍ਮੇ ਉਤ੍ਤਰਚੂਲ਼ਵਾਰੋ ਨਾਮ ਆਗਤੋ –
‘‘ਚਤ੍ਤਾਰੋ ਇਦ੍ਧਿਪਾਦਾ – ਛਨ੍ਦਿਦ੍ਧਿਪਾਦੋ, ਵੀਰਿਯਿਦ੍ਧਿਪਾਦੋ, ਚਿਤ੍ਤਿਦ੍ਧਿਪਾਦੋ, ਵੀਮਂਸਿਦ੍ਧਿਪਾਦੋ. ਤਤ੍ਥ ਕਤਮੋ ਛਨ੍ਦਿਦ੍ਧਿਪਾਦੋ? ਇਧ, ਭਿਕ੍ਖੁ, ਯਸ੍ਮਿਂ ਸਮਯੇ ਲੋਕੁਤ੍ਤਰਂ ਝਾਨਂ ਭਾਵੇਤਿ ਨਿਯ੍ਯਾਨਿਕਂ ਅਪਚਯਗਾਮਿਂ ਦਿਟ੍ਠਿਗਤਾਨਂ ਪਹਾਨਾਯ ਪਠਮਾਯ ਭੂਮਿਯਾ ਪਤ੍ਤਿਯਾ ਵਿਵਿਚ੍ਚੇਵ ਕਾਮੇਹਿ…ਪੇ… ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ ਦੁਕ੍ਖਾਪਟਿਪਦਂ ਦਨ੍ਧਾਭਿਞ੍ਞਂ, ਯੋ ਤਸ੍ਮਿਂ ਸਮਯੇ ਛਨ੍ਦੋ ਛਨ੍ਦਿਕਤਾ ਕਤ੍ਤੁਕਮ੍ਯਤਾ ਕੁਸਲੋ ਧਮ੍ਮਚ੍ਛਨ੍ਦੋ, ਅਯਂ ਵੁਚ੍ਚਤਿ ਛਨ੍ਦਿਦ੍ਧਿਪਾਦੋ. ਅਵਸੇਸਾ ਧਮ੍ਮਾ ਛਨ੍ਦਿਦ੍ਧਿਪਾਦਸਮ੍ਪਯੁਤ੍ਤਾ’’ਤਿ (ਵਿਭ. ੪੫੭-੪੫੮).
ਇਮੇ ਪਨ ਲੋਕੁਤ੍ਤਰਵਸੇਨੇਵ ਆਗਤਾ.
ਤਤ੍ਥ ਰਟ੍ਠਪਾਲਤ੍ਥੇਰੋ ਛਨ੍ਦਂ ਧੁਰਂ ਕਤ੍ਵਾ ਲੋਕੁਤ੍ਤਰਧਮ੍ਮਂ ਨਿਬ੍ਬਤ੍ਤੇਸਿ. ਸੋਣਤ੍ਥੇਰੋ ਵੀਰਿਯਂ ਧੁਰਂ ਕਤ੍ਵਾ; ਸਮ੍ਭੁਤਤ੍ਥੇਰੋ ਚਿਤ੍ਤਂ ਧੁਰਂ ਕਤ੍ਵਾ, ਆਯਸ੍ਮਾ ਮੋਘਰਾਜਾ ਵੀਮਂਸਂ ਧੁਰਂ ਕਤ੍ਵਾਤਿ. ਤਤ੍ਥ ਯਥਾ ਚਤੂਸੁ ਅਮਚ੍ਚਪੁਤ੍ਤੇਸੁ ਠਾਨਨ੍ਤਰਂ ਪਤ੍ਥੇਤ੍ਵਾ ਰਾਜਾਨਂ ਉਪਨਿਸ੍ਸਾਯ ਵਿਹਰਨ੍ਤੇਸੁ ਏਕੋ ਉਪਟ੍ਠਾਨੇ ਛਨ੍ਦਜਾਤੋ ਰਞ੍ਞੋ ਅਜ੍ਝਾਸਯਞ੍ਚ ਰੁਚਿਞ੍ਚ ਞਤ੍ਵਾ ਦਿਵਾ ਚ ਰਤ੍ਤੋ ਚ ਉਪਟ੍ਠਹਨ੍ਤੋ ਰਾਜਾਨਂ ਆਰਾਧੇਤ੍ਵਾ ਠਾਨਨ੍ਤਰਂ ਪਾਪੁਣਿ. ਏਵਂ ਛਨ੍ਦਧੁਰੇਨ ਲੋਕੁਤ੍ਤਰਧਮ੍ਮਨਿਬ੍ਬਤ੍ਤਕੋ ਵੇਦਿਤਬ੍ਬੋ.
ਏਕੋ ਪਨ – ‘‘ਦਿਵਸੇ ਦਿਵਸੇ ਉਪਟ੍ਠਾਤੁਂ ਨ ਸਕ੍ਕੋਮਿ, ਉਪ੍ਪਨ੍ਨੇ ਕਿਚ੍ਚੇ ਪਰਕ੍ਕਮੇਨ ਆਰਾਧੇਸ੍ਸਾਮੀ’’ਤਿ ਕੁਪਿਤੇ ਪਚ੍ਚਨ੍ਤੇ ਰਞ੍ਞਾ ਪਹਿਤੋ ਪਰਕ੍ਕਮੇਨ ਸਤ੍ਤੁਮਦ੍ਦਨਂ ਕਤ੍ਵਾ ਪਾਪੁਣਿ. ਯਥਾ ਸੋ, ਏਵਂ ਵੀਰਿਯਧੁਰੇਨ ਲੋਕੁਤ੍ਤਰਧਮ੍ਮਨਿਬ੍ਬਤ੍ਤਕੋ ਵੇਦਿਤਬ੍ਬੋ. ਏਕੋ ‘‘ਦਿਵਸੇ ਦਿਵਸੇ ਉਪਟ੍ਠਾਨਮ੍ਪਿ ਉਰੇਨ ਸਤ੍ਤਿਸਰਸਮ੍ਪਟਿਚ੍ਛਨਮ੍ਪਿ ਭਾਰੋਯੇਵ, ਮਨ੍ਤਬਲੇਨ ਆਰਾਧੇਸ੍ਸਾਮੀ’’ਤਿ ਖਤ੍ਤਵਿਜ੍ਜਾਯ ਕਤਪਰਿਚਯਤ੍ਤਾ ਮਨ੍ਤਸਂਵਿਧਾਨੇਨ ਰਾਜਾਨਂ ਆਰਾਧੇਤ੍ਵਾ ਪਾਪੁਣਿ. ਯਥਾ ਸੋ, ਏਵਂ ਚਿਤ੍ਤਧੁਰੇਨ ਲੋਕੁਤ੍ਤਰਧਮ੍ਮਨਿਬ੍ਬਤ੍ਤਕੋ ਵੇਦਿਤਬ੍ਬੋ.
ਅਪਰੋ – ‘‘ਕਿਂ ਇਮੇਹਿ ਉਪਟ੍ਠਾਨਾਦੀਹਿ, ਰਾਜਾਨੋ ਨਾਮ ਜਾਤਿਸਮ੍ਪਨ੍ਨਸ੍ਸ ਠਾਨਨ੍ਤਰਂ ਦੇਨ੍ਤਿ, ਤਾਦਿਸਸ੍ਸ ਦੇਨ੍ਤੋ ਮਯ੍ਹਂ ਦਸ੍ਸਤੀ’’ਤਿ ਜਾਤਿਸਮ੍ਪਤ੍ਤਿਮੇਵ ਨਿਸ੍ਸਾਯ ਠਾਨਨ੍ਤਰਂ ਪਾਪੁਣਿ. ਯਥਾ ਸੋ, ਏਵਂ ਸੁਪਰਿਸੁਦ੍ਧਂ ਵੀਮਂਸਂ ਨਿਸ੍ਸਾਯ ਵੀਮਂਸਧੁਰੇਨ ਲੋਕੁਤ੍ਤਰਧਮ੍ਮਨਿਬ੍ਬਤ੍ਤਕੋ ਵੇਦਿਤਬ੍ਬੋਤਿ. ਇਮਸ੍ਮਿਂ ਸੁਤ੍ਤੇ ਵਿਵਟ੍ਟਪਾਦਕਇਦ੍ਧਿ ਕਥਿਤਾ.
੪. ਮੋਗ੍ਗਲ੍ਲਾਨਸੁਤ੍ਤਵਣ੍ਣਨਾ
੮੨੬. ਚਤੁਤ੍ਥੇ ਉਦ੍ਧਤਾਤਿ ਉਦ੍ਧਚ੍ਚਪਕਤਿਕਾ ਵਿਪ੍ਫਨ੍ਦਮਾਨਚਿਤ੍ਤਾ. ਉਦ੍ਧਚ੍ਚੇਨ ਹਿ ਏਕਾਰਮ੍ਮਣੇ ਚਿਤ੍ਤਂ ਵਿਪ੍ਫਨ੍ਦਤਿ ਧਜਯਟ੍ਠਿਯਂ ਵਾਤੇਨ ਪਹਤਧਜੋ ਵਿਯ. ਉਨ੍ਨਲ਼ਾਤਿ ਉਗ੍ਗਤਨਲ਼ਾ, ਉਟ੍ਠਿਤਤੁਚ੍ਛਮਾਨਾਤਿ ਵੁਤ੍ਤਂ ਹੋਤਿ. ਚਪਲਾਤਿ ਪਤ੍ਤਚੀਵਰਮਣ੍ਡਨਾਦਿਚਾਪਲ੍ਲੇਨ ਯੁਤ੍ਤਾ. ਮੁਖਰਾਤਿ ਮੁਖਖਰਾ, ਖਰਵਚਨਾਤਿ ਵੁਤ੍ਤਂ ਹੋਤਿ. ਵਿਕਿਣ੍ਣਵਾਚਾਤਿ ਅਸਂਯਤਵਚਨਾ ਦਿਵਸਮ੍ਪਿ ਨਿਰਤ੍ਥਕਵਚਨਪ੍ਪਲਾਪਿਨੋ. ਮੁਟ੍ਠਸ੍ਸਤੀਤਿ ਨਟ੍ਠਸ੍ਸਤਿਨੋ. ਅਸਮ੍ਪਜਾਨਾਤਿ ਪਞ੍ਞਾਰਹਿਤਾ. ਅਸਮਾਹਿਤਾਤਿ ਉਪਚਾਰਪ੍ਪਨਾਸਮਾਧਿਵਿਰਹਿਤਾ. ਭਨ੍ਤਚਿਤ੍ਤਾਤਿ ਉਬ੍ਭਨ੍ਤਚਿਤ੍ਤਾ ਸਮਾਧਿਵਿਰਹੇਨ ਲਦ੍ਧੋਕਾਸੇਨ ਉਦ੍ਧਚ੍ਚੇਨ. ਪਾਕਤਿਨ੍ਦ੍ਰਿਯਾਤਿ ਅਸਂਵੁਤਿਨ੍ਦ੍ਰਿਯਾ. ਇਦ੍ਧਾਭਿਸਙ੍ਖਾਰਨ੍ਤਿ ਆਪੋਕਸਿਣਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਪਾਸਾਦਪਤਿਟ੍ਠਿਤਂ ਪਥਵਿਭਾਗਂ ‘‘ਉਦਕ’’ਨ੍ਤਿ ਅਧਿਟ੍ਠਾਯ, ਉਦਕਪਿਟ੍ਠੇ ਠਿਤਪਾਸਾਦਂ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਅਙ੍ਗੁਟ੍ਠਕੇਨ ਪਹਰਿ. ਗਮ੍ਭੀਰਨੇਮੋਤਿ ਗਮ੍ਭੀਰਆਵਾਟੋ, ਗਮ੍ਭੀਰਭੂਮਿਭਾਗਂ ਅਨੁਪਵਿਟ੍ਠੋਤਿ ਅਤ੍ਥੋ. ਸੁਨਿਖਾਤੋਤਿ ਸੁਟ੍ਠੁ ਨਿਖਾਤੋ, ਕੋਟ੍ਟੇਤ੍ਵਾ ਸੁਟ੍ਠੁ ਠਪਿਤੋ. ਇਧ ਅਭਿਞ੍ਞਾਪਾਦਕਿਦ੍ਧਿ ਕਥਿਤਾ.
੫. ਉਣ੍ਣਾਭਬ੍ਰਾਹ੍ਮਣਸੁਤ੍ਤਵਣ੍ਣਨਾ
੮੨੭. ਪਞ੍ਚਮੇ ਛਨ੍ਦਪ੍ਪਹਾਨਤ੍ਥਨ੍ਤਿ ਤਣ੍ਹਾਛਨ੍ਦਸ੍ਸ ਪਹਾਨਤ੍ਥਂ. ਇਧਾਪਿ ਵਿਵਟ੍ਟਪਾਦਕਿਦ੍ਧਿ ਕਥਿਤਾ.
੯. ਇਦ੍ਧਾਦਿਦੇਸਨਾਸੁਤ੍ਤਵਣ੍ਣਨਾ
੮੩੧. ਨਵਮੇ ਯੋ ਸੋ ਭਿਕ੍ਖਵੇ ਮਗ੍ਗੋਤਿ ਅਭਿਞ੍ਞਾਪਾਦਕਂ ਚਤੁਤ੍ਥਜ੍ਝਾਨਂ ਅਧਿਪ੍ਪੇਤਂ.
੧੦. ਵਿਭਙ੍ਗਸੁਤ੍ਤਵਣ੍ਣਨਾ
੮੩੨. ਦਸਮੇ ਕੋਸਜ੍ਜਸਹਗਤੋਤਿ ਇਧ ਭਿਕ੍ਖੁ ਛਨ੍ਦਂ ਉਪ੍ਪਾਦੇਤ੍ਵਾ ਕਮ੍ਮਟ੍ਠਾਨਂ ਮਨਸਿਕਰੋਨ੍ਤੋ ਨਿਸੀਦਤਿ. ਅਥਸ੍ਸ ਚਿਤ੍ਤੇ ਲੀਨਾਕਾਰੋ ਓਕ੍ਕਮਤਿ, ਸੋ ‘‘ਲੀਨਾਕਾਰੋ ਮੇ ਓਕ੍ਕਨ੍ਤੋ’’ਤਿ ਞਤ੍ਵਾ ਅਪਾਯਭਯੇਨ ਚਿਤ੍ਤਂ ਤਜ੍ਜੇਤ੍ਵਾ ਪੁਨ ਛਨ੍ਦਂ ਉਪ੍ਪਾਦੇਤ੍ਵਾ ਕਮ੍ਮਟ੍ਠਾਨਂ ਮਨਸਿ ਕਰੋਤਿ. ਅਥਸ੍ਸ ਪੁਨ ਲੀਨਾਕਾਰੋ ਓਕ੍ਕਮਤਿ. ਸੋ ਪੁਨ ਅਪਾਯਭਯੇਨ ਚਿਤ੍ਤਂ ਤਜ੍ਜੇਤ੍ਵਾ ਛਨ੍ਦਂ ਉਪ੍ਪਾਦੇਤ੍ਵਾ ਕਮ੍ਮਟ੍ਠਾਨਂ ਮਨਸਿ ਕਰੋਤੀਤਿ ਏਵਮਸ੍ਸ ਕੋਸਜ੍ਜੇਨ ਵੋਕਿਣ੍ਣਤ੍ਤਾ ਛਨ੍ਦੋ ਕੋਸਜ੍ਜਸਹਗਤੋ ਨਾਮ ਹੋਤਿ. ਕੋਸਜ੍ਜਸਮ੍ਪਯੁਤ੍ਤੋਤਿ ਤਸ੍ਸੇਵ ਵੇਵਚਨਂ.
ਉਦ੍ਧਚ੍ਚਸਹਗਤੋਤਿ ਇਧ ਭਿਕ੍ਖੁ ਛਨ੍ਦਂ ਉਪ੍ਪਾਦੇਤ੍ਵਾ ਕਮ੍ਮਟ੍ਠਾਨਂ ਮਨਸਿਕਰੋਨ੍ਤੋ ਨਿਸੀਦਤਿ. ਅਥਸ੍ਸ ਚਿਤ੍ਤਂ ਉਦ੍ਧਚ੍ਚੇ ਪਤਤਿ. ਸੋ ਬੁਦ੍ਧਧਮ੍ਮਸਙ੍ਘਗੁਣੇ ਆਵਜ੍ਜੇਤ੍ਵਾ ਚਿਤ੍ਤਂ ਹਾਸੇਤ੍ਵਾ ਤੋਸੇਤ੍ਵਾ ਕਮ੍ਮਨਿਯਂ ਕਤ੍ਵਾ ਪੁਨ ਛਨ੍ਦਂ ਉਪ੍ਪਾਦੇਤ੍ਵਾ ਕਮ੍ਮਟ੍ਠਾਨਂ ਮਨਸਿ ਕਰੋਤਿ. ਅਥਸ੍ਸ ਪੁਨ ਚਿਤ੍ਤਂ ਉਦ੍ਧਚ੍ਚੇ ਪਤਤਿ. ਸੋ ਪੁਨ ਬੁਦ੍ਧਧਮ੍ਮਸਙ੍ਘਗੁਣੇ ਆਵਜ੍ਜੇਤ੍ਵਾ ਚਿਤ੍ਤਂ ਹਾਸੇਤ੍ਵਾ ਤੋਸੇਤ੍ਵਾ ਕਮ੍ਮਨਿਯਂ ਕਤ੍ਵਾ ਛਨ੍ਦਂ ਉਪ੍ਪਾਦੇਤ੍ਵਾ ਕਮ੍ਮਟ੍ਠਾਨਂ ਮਨਸਿ ਕਰੋਤੀਤਿ ਏਵਮਸ੍ਸ ਉਦ੍ਧਚ੍ਚੇਨ ਵੋਕਿਣ੍ਣਤ੍ਤਾ ਛਨ੍ਦੋ ਉਦ੍ਧਚ੍ਚਸਹਗਤੋ ਨਾਮ ਹੋਤਿ.
ਥਿਨਮਿਦ੍ਧਸਹਗਤੋਤਿ ਇਧ ਭਿਕ੍ਖੁ ਛਨ੍ਦਂ ਉਪ੍ਪਾਦੇਤ੍ਵਾ ਕਮ੍ਮਟ੍ਠਾਨਂ ਮਨਸਿਕਰੋਨ੍ਤੋ ਨਿਸੀਦਤਿ. ਅਥਸ੍ਸ ਥਿਨਮਿਦ੍ਧਂ ਉਪ੍ਪਜ੍ਜਤਿ. ਸੋ ‘‘ਉਪ੍ਪਨ੍ਨਂ ਮੇ ਥਿਨਮਿਦ੍ਧ’’ਨ੍ਤਿ ਞਤ੍ਵਾ ਉਦਕੇਨ ਮੁਖਂ ਪੁਞ੍ਛਿਤ੍ਵਾ, ਕਣ੍ਣੇ ਆਕਡ੍ਢਿਤ੍ਵਾ ਪਗੁਣਂ ਧਮ੍ਮਂ ਸਜ੍ਝਾਯਿਤ੍ਵਾ ਦਿਵਾ ਗਹਿਤਂ ਵਾ ਆਲੋਕਸਞ੍ਞਂ ਮਨਸਿਕਰਿਤ੍ਵਾ ਥਿਨਮਿਦ੍ਧਂ ਵਿਨੋਦੇਤ੍ਵਾ ਪੁਨ ਛਨ੍ਦਂ ਉਪ੍ਪਾਦੇਤ੍ਵਾ ਕਮ੍ਮਟ੍ਠਾਨਂ ਮਨਸਿ ਕਰੋਤਿ. ਅਥਸ੍ਸ ਪੁਨ ਥਿਨਮਿਦ੍ਧਂ ਉਪ੍ਪਜ੍ਜਤਿ. ਸੋ ਵੁਤ੍ਤਨਯੇਨੇਵ ਪੁਨ ਥਿਨਮਿਦ੍ਧਂ ਵਿਨੋਦੇਤ੍ਵਾ ਛਨ੍ਦਂ ਉਪ੍ਪਾਦੇਤ੍ਵਾ ਕਮ੍ਮਟ੍ਠਾਨਂ ਮਨਸਿ ਕਰੋਤੀਤਿ ਏਵਮਸ੍ਸ ਥਿਨਮਿਦ੍ਧੇਨ ਵੋਕਿਣ੍ਣਤ੍ਤਾ ਛਨ੍ਦੋ ਥਿਨਮਿਦ੍ਧਸਹਗਤੋ ਨਾਮ ਹੋਤਿ.
ਅਨੁਵਿਕ੍ਖਿਤ੍ਤੋਤਿ ਇਧ ਭਿਕ੍ਖੁ ਛਨ੍ਦਂ ਉਪ੍ਪਾਦੇਤ੍ਵਾ ਕਮ੍ਮਟ੍ਠਾਨਂ ਮਨਸਿਕਰੋਨ੍ਤੋ ਨਿਸੀਦਤਿ. ਅਥਸ੍ਸ ਕਾਮਗੁਣਾਰਮ੍ਮਣੇ ਚਿਤ੍ਤਂ ਵਿਕ੍ਖਿਪਤਿ. ਸੋ ‘‘ਬਹਿਦ੍ਧਾ ਵਿਕ੍ਖਿਤ੍ਤਂ ਮੇ ਚਿਤ੍ਤ’’ਨ੍ਤਿ ਞਤ੍ਵਾ ਅਨਮਤਗ੍ਗ (ਸਂ. ਨਿ. ੨.੧੨੪-੧੨੫) ਦੇਵਦੂਤ- (ਮ. ਨਿ. ੩.੨੬੧) ਚੇਲੋਪਮ (ਸਂ. ਨਿ. ੫.੧੧੦੪) ਅਨਾਗਤਭਯਸੁਤ੍ਤਾਦੀਨਿ (ਅ. ਨਿ. ੫.੭੭) ਆਵਜ੍ਜੇਨ੍ਤੋ ਸੁਤ੍ਤਦਣ੍ਡੇਨ ਚਿਤ੍ਤਂ ਤਜ੍ਜੇਤ੍ਵਾ ਕਮ੍ਮਨਿਯਂ ਕਤ੍ਵਾ ਪੁਨ ਛਨ੍ਦਂ ਉਪ੍ਪਾਦੇਤ੍ਵਾ ਕਮ੍ਮਟ੍ਠਾਨਂ ਮਨਸਿ ਕਰੋਤਿ. ਅਥਸ੍ਸ ਪੁਨ ਚਿਤ੍ਤਂ ਵਿਕ੍ਖਿਪਤਿ. ਸੋ ਪੁਨ ਸੁਤ੍ਤਦਣ੍ਡੇਨ ਚਿਤ੍ਤਂ ਕਮ੍ਮਨਿਯਂ ਕਤ੍ਵਾ ਛਨ੍ਦਂ ਉਪ੍ਪਾਦੇਤ੍ਵਾ ਕਮ੍ਮਟ੍ਠਾਨਂ ਮਨਸਿ ਕਰੋਤੀਤਿ ਏਵਮਸ੍ਸ ਕਾਮਵਿਤਕ੍ਕਵੋਕਿਣ੍ਣਤ੍ਤਾ ਛਨ੍ਦੋ ਬਹਿਦ੍ਧਾ ਪਞ੍ਚ ਕਾਮਗੁਣੇ ਆਰਬ੍ਭ ਅਨੁਵਿਕ੍ਖਿਤ੍ਤੋ ਅਨੁਵਿਸਟੋ ਹੋਤਿ.
ਯਥਾ ਪੁਰੇ ਤਥਾ ਪਚ੍ਛਾਤਿ ਕਮ੍ਮਟ੍ਠਾਨਵਸੇਨਪਿ ਦੇਸਨਾਵਸੇਨਪਿ ਪੁਰਿਮਪਚ੍ਛਿਮਤਾ ਵੇਦਿਤਬ੍ਬਾ. ਕਥਂ? ਕਮ੍ਮਟ੍ਠਾਨੇ ਤਾਵ ਕਮ੍ਮਟ੍ਠਾਨਸ੍ਸ ਅਭਿਨਿਵੇਸੋ ਪੁਰੇ ਨਾਮ, ਅਰਹਤ੍ਤਂ ਪਚ੍ਛਾ ਨਾਮ. ਤਤ੍ਥ ਯੋ ਭਿਕ੍ਖੁ ਮੂਲਕਮ੍ਮਟ੍ਠਾਨੇ ਅਭਿਨਿਵਿਸਿਤ੍ਵਾ ਅਤਿਲੀਨਾਦੀਸੁ ਚਤੂਸੁ ਠਾਨੇਸੁ ਚਿਤ੍ਤਸ੍ਸ ਓਕ੍ਕਮਨਂ ਪਟਿਸੇਧੇਤ੍ਵਾ, ਦੁਟ੍ਠਗੋਣੇ ਯੋਜੇਤ੍ਵਾ ਸਾਰੇਨ੍ਤੋ ਵਿਯ ਚਤੁਰਸ੍ਸਘਟਿਕਂ ਓਤਾਰੇਨ੍ਤੋ ਵਿਯ ਚਤੁਨ੍ਨਂ ਠਾਨਾਨਂ ਏਕਟ੍ਠਾਨੇਪਿ ਅਸਜ੍ਜਨ੍ਤੋ ਸਙ੍ਖਾਰੇ ਸਮ੍ਮਸਿਤ੍ਵਾ ਅਰਹਤ੍ਤਂ ਪਾਪੁਣਾਤਿ. ਅਯਮ੍ਪਿ ਯਥਾ ਪੁਰੇ ਤਥਾ ਪਚ੍ਛਾ ਵਿਹਰਤਿ ਨਾਮ. ਅਯਂ ਕਮ੍ਮਟ੍ਠਾਨਵਸੇਨ ਪੁਰਿਮਪਚ੍ਛਿਮਤਾ. ਦੇਸਨਾਵਸੇਨ ਪਨ ਕੇਸਾ ਪੁਰੇ ਨਾਮ, ਮਤ੍ਥਲੁਙ੍ਗਂ ਪਚ੍ਛਾ ਨਾਮ. ਤਤ੍ਥ ਯੋ ਭਿਕ੍ਖੁ ਕੇਸੇਸੁ ਅਭਿਨਿਵਿਸਿਤ੍ਵਾ ਵਣ੍ਣਸਣ੍ਠਾਨਾਦਿਵਸੇਨ ਕੇਸਾਦਯੋ ਪਰਿਗ੍ਗਣ੍ਹਨ੍ਤੋ ਚਤੂਸੁ ਠਾਨੇਸੁ ਅਸਜ੍ਜਨ੍ਤੋ ਯਾਵ ਮਤ੍ਥਲੁਙ੍ਗਾ ਭਾਵਨਂ ਪਾਪੇਤਿ, ਅਯਮ੍ਪਿ ਯਥਾ ਪੁਰੇ ਤਥਾ ਪਚ੍ਛਾ ਵਿਹਰਤਿ ਨਾਮ. ਏਵਂ ਦੇਸਨਾਵਸੇਨ ਪੁਰਿਮਪਚ੍ਛਿਮਤਾ ਵੇਦਿਤਬ੍ਬਾ. ਯਥਾ ਪਚ੍ਛਾ ਤਥਾ ਪੁਰੇਤਿ ਇਦਂ ਪੁਰਿਮਸ੍ਸੇਵ ਵੇਵਚਨਂ.
ਯਥਾ ਅਧੋ ਤਥਾ ਉਦ੍ਧਨ੍ਤਿ ਇਦਂ ਸਰੀਰਵਸੇਨ ਵੇਦਿਤਬ੍ਬਂ. ਤੇਨੇਵਾਹ ‘‘ਉਦ੍ਧਂ ਪਾਦਤਲਾ ਅਧੋ ਕੇਸਮਤ੍ਥਕਾ’’ਤਿ. ਤਤ੍ਥ ਯੋ ਭਿਕ੍ਖੁ ਪਾਦਤਲਤੋ ਪਟ੍ਠਾਯ ਯਾਵ ਕੇਸਮਤ੍ਥਕਾ ਦ੍ਵਤ੍ਤਿਂਸਾਕਾਰਵਸੇਨ ਵਾ ਪਾਦਙ੍ਗੁਲਿਅਗ੍ਗਪਬ੍ਬਟ੍ਠਿਤੋ ਯਾਵ ਸੀਸਕਟਾਹਂ, ਸੀਸਕਟਾਹਤੋ ਯਾਵ ਪਾਦਙ੍ਗੁਲੀਨਂ ਅਗ੍ਗਪਬ੍ਬਟ੍ਠੀਨਿ, ਤਾਵ ਅਟ੍ਠਿਵਸੇਨ ਵਾ ਭਾਵਨਂ ਪਾਪੇਤਿ ਚਤੂਸੁ ਠਾਨੇਸੁ ਏਕਟ੍ਠਾਨੇਪਿ ਅਸਜ੍ਜਨ੍ਤੋ. ਅਯਂ ਯਥਾ ਉਦ੍ਧਂ ਤਥਾ ਅਧੋ, ਯਥਾ ਅਧੋ ਤਥਾ ਉਦ੍ਧਂ ਵਿਹਰਤਿ ਨਾਮ.
ਯੇਹਿ ਆਕਾਰੇਹੀਤਿ ਯੇਹਿ ਕੋਟ੍ਠਾਸੇਹਿ. ਯੇਹਿ ਲਿਙ੍ਗੇਹੀਤਿ ਯੇਹਿ ਸਣ੍ਠਾਨੇਹਿ. ਯੇਹਿ ਨਿਮਿਤ੍ਤੇਹੀਤਿ ਯੇਹਿ ਉਪਟ੍ਠਾਨੇਹਿ. ਆਲੋਕਸਞ੍ਞਾ ਸੁਗ੍ਗਹਿਤਾ ਹੋਤੀਤਿ ਯੋ ਭਿਕ੍ਖੁ ਅਙ੍ਗਣੇ ਨਿਸੀਦਿਤ੍ਵਾ ਆਲੋਕਸਞ੍ਞਂ ਮਨਸਿ ਕਰੋਤਿ, ਕਾਲੇਨ ਨਿਮੀਲੇਤਿ, ਕਾਲੇਨ ਉਮ੍ਮੀਲੇਤਿ. ਅਥਸ੍ਸ ਯਦਾ ਨਿਮੀਲੇਨ੍ਤਸ੍ਸਾਪਿ ਉਮ੍ਮੀਲੇਤ੍ਵਾ ਓਲੋਕੇਨ੍ਤਸ੍ਸ ਵਿਯ ਏਕਸਦਿਸਮੇਵ ਉਪਟ੍ਠਾਤਿ, ਤਦਾ ਆਲੋਕਸਞ੍ਞਾ ਜਾਤਾ ਨਾਮ ਹੋਤਿ. ‘‘ਦਿਵਾਸਞ੍ਞਾ’’ਤਿਪਿ ਤਸ੍ਸੇਵ ਨਾਮਂ. ਸਾ ਚ ਪਨ ਰਤ੍ਤਿਂ ਉਪ੍ਪਜ੍ਜਮਾਨਾ ਸੁਗ੍ਗਹਿਤਾ ਨਾਮ ਹੋਤਿ. ਸ੍ਵਾਧਿਟ੍ਠਿਤਾਤਿਪਿ ਤਸ੍ਸੇਵ ਵੇਵਚਨਂ. ਸੁਟ੍ਠੁ ਅਧਿਟ੍ਠਿਤਾ ਸੁਟ੍ਠੁ ਠਪਿਤਾ ਸ੍ਵਾਧਿਟ੍ਠਿਤਾ ਨਾਮ ਵੁਚ੍ਚਤਿ. ਸਾ ਅਤ੍ਥਤੋ ਸੁਗ੍ਗਹਿਤਾਯੇਵ. ਯੋ ਵਾ ਆਲੋਕੇਨ ਥਿਨਮਿਦ੍ਧਂ ਵਿਨੋਦੇਤ੍ਵਾ ਛਨ੍ਦਂ ਉਪ੍ਪਾਦੇਤ੍ਵਾ ਕਮ੍ਮਟ੍ਠਾਨਂ ਮਨਸਿ ਕਰੋਤਿ, ਤਸ੍ਸ ਦਿਵਾਪਿ ਆਲੋਕਸਞ੍ਞਾ ਸੁਗ੍ਗਹਿਤਾ ਸ੍ਵਾਧਿਟ੍ਠਿਤਾ ਨਾਮ. ਰਤ੍ਤਿ ਵਾ ਹੋਤੁ ਦਿਵਾ ਵਾ ਯੇਨ ਆਲੋਕੇਨ ਥਿਨਮਿਦ੍ਧਂ ਵਿਨੋਦੇਤ੍ਵਾ ਕਮ੍ਮਟ੍ਠਾਨਂ ਮਨਸਿ ਕਰੋਤਿ, ਤਸ੍ਮਿਂ ਥਿਨਮਿਦ੍ਧਵਿਨੋਦਨੇ ਆਲੋਕੇ ਉਪ੍ਪਨ੍ਨਾ ਸਞ੍ਞਾ ਸੁਗ੍ਗਹਿਤਾਯੇਵ ਨਾਮ. ਵੀਰਿਯਾਦੀਸੁਪਿ ਏਸੇਵ ਨਯੋ. ਇਮਸ੍ਮਿਂ ਸੁਤ੍ਤੇ ਛਨ੍ਨਂ ਅਭਿਞ੍ਞਾਨਂ ਪਾਦਕਿਦ੍ਧਿ ਕਥਿਤਾ.
ਪਾਸਾਦਕਮ੍ਪਨਵਗ੍ਗੋ ਦੁਤਿਯੋ.
੩. ਅਯੋਗੁਲ਼ਵਗ੍ਗੋ
੨. ਅਯੋਗੁਲ਼ਸੁਤ੍ਤਵਣ੍ਣਨਾ
੮੩੪. ਤਤਿਯਵਗ੍ਗਸ੍ਸ ਦੁਤਿਯੇ ਇਮਿਨਾ ਚਾਤੁਮਹਾਭੂਤਿਕੇਨਾਤਿ ਇਮਿਨਾ ਚਤੁਮਹਾਭੂਤਮਯੇਨ ਏਵਂ ਭਾਰਿਕੇਨ ਗਰੁਕੇਨ ਸਮਾਨੇਨਾਪਿ. ਓਮਾਤੀਤਿ ਪਹੋਤਿ ਸਕ੍ਕੋਤਿ, ਇਦਂ ਤੇਪਿਟਕੇ ਬੁਦ੍ਧਵਚਨੇ ਅਸਮ੍ਭਿਨ੍ਨਪਦਂ. ਕਾਯਮ੍ਪਿ ਚਿਤ੍ਤੇ ਸਮੋਦਹਤੀਤਿ ਕਾਯਂ ਗਹੇਤ੍ਵਾ ਚਿਤ੍ਤੇ ਆਰੋਪੇਤਿ, ਚਿਤ੍ਤਸਨ੍ਨਿਸ੍ਸਿਤਂ ਕਰੋਤਿ, ਚਿਤ੍ਤਗਤਿਯਾ ਪੇਸੇਤਿ. ਚਿਤ੍ਤਂ ਨਾਮ ਮਹਗ੍ਗਤਚਿਤ੍ਤਂ, ਚਿਤ੍ਤਗਤਿਗਮਨਂ ਲਹੁਕਂ ਹੋਤਿ. ਚਿਤ੍ਤਮ੍ਪਿ ਕਾਯੇ ਸਮੋਦਹਤੀਤਿ ਚਿਤ੍ਤਂ ਗਹੇਤ੍ਵਾ ਕਾਯੇ ਆਰੋਪੇਤਿ, ਕਾਯਸਨ੍ਨਿਸ੍ਸਿਤਂ ਕਰੋਤਿ, ਕਾਯਗਤਿਯਾ ਪੇਸੇਤਿ, ਕਾਯੋ ਨਾਮ ਕਰਜਕਾਯੋ, ਕਾਯਗਤਿਗਮਨਂ ਦਨ੍ਧਂ ਹੋਤਿ. ਸੁਖਸਞ੍ਞਞ੍ਚ ਲਹੁਸਞ੍ਞਞ੍ਚਾਤਿ ਅਭਿਞ੍ਞਾਚਿਤ੍ਤਸਹਜਾਤਸਞ੍ਞਾ. ਸਾ ਹਿ ਸਨ੍ਤਸੁਖਸਮਨ੍ਨਾਗਤਤ੍ਤਾ ਸੁਖਸਞ੍ਞਾ ਨਾਮ ਹੋਤਿ, ਕਿਲੇਸਦਨ੍ਧਾਯਿਤਤ੍ਤਸ੍ਸ ਚ ਅਭਾਵਾ ਲਹੁਸਞ੍ਞਾ ਨਾਮ.
ਅਯੋਗੁਲ਼ੋ ਦਿਵਸਂ ਸਨ੍ਤਤ੍ਤੋ ਲਹੁਤਰੋ ਚੇਵ ਹੋਤੀਤਿ ਸੋ ਹਿ ਦ੍ਵੀਹਿ ਤੀਹਿ ਜਨੇਹਿ ਉਕ੍ਖਿਪਿਤ੍ਵਾ ਕਮ੍ਮਾਰੁਦ੍ਧਨੇ ਪਕ੍ਖਿਤ੍ਤੋਪਿ ਦਿਵਸਂ ਪਚ੍ਚਮਾਨੋ ਵਿਵਰਾਨੁਪਵਿਟ੍ਠੇਨ ਤੇਜੇਨ ਚੇਵ ਵਾਯੇਨ ਚ ਵਾਯੋਸਹਗਤੋ ਚ ਉਸ੍ਮਾਸਹਗਤੋ ਚ ਤੇਜੋਸਹਗਤੋ ਚ ਹੁਤ੍ਵਾ ਏਵਂ ਲਹੁਕੋ ਹੋਤਿ, ਯਥਾ ਨਂ ਕਮ੍ਮਾਰੋ ਮਹਾਸਣ੍ਡਾਸੇਨ ਗਹੇਤ੍ਵਾ ਏਕਤੋ ਪਰਿਵਤ੍ਤੇਤਿ ਉਕ੍ਖਿਪਤਿ ਬਹਿ ਨੀਹਰਤਿ. ਏਵਂ ਪਨ ਮੁਦੁ ਚ ਹੋਤਿ ਕਮ੍ਮਨਿਯੋ ਚ. ਯਥਾ ਨਂ ਸੋ ਖਣ੍ਡਂ ਖਣ੍ਡਂ ਵਿਚ੍ਛਿਨ੍ਦਤਿ, ਕੂਟੇਨ ਹਨਨ੍ਤੋ ਦੀਘਚਤੁਰਸ੍ਸਾਦਿਭੇਦਂ ਕਰੋਤਿ. ਇਮਸ੍ਮਿਂ ਸੁਤ੍ਤੇ ਵਿਕੁਬ੍ਬਨਿਦ੍ਧਿ ਕਥਿਤਾ.
੩-੧੦. ਭਿਕ੍ਖੁਸੁਤ੍ਤਾਦਿਵਣ੍ਣਨਾ
੮੩੫-੮੪੨. ਤਤਿਯੇ ਵਿਵਟ੍ਟਪਾਦਕਿਦ੍ਧਿ ਕਥਿਤਾ, ਤਥਾ ਚਤੁਤ੍ਥੇ. ਅਪਿਚ ਦ੍ਵੇ ਫਲਾਨਿ ਆਦਿਂ ਕਤ੍ਵਾ ਹੇਟ੍ਠਾ ਮਿਸ੍ਸਕਿਦ੍ਧਿਪਾਦਾ ਕਥਿਤਾ, ਸਤ੍ਤਸੁ ਫਲੇਸੁ ਪੁਬ੍ਬਭਾਗਾ. ਸਤ੍ਤਮਾਦੀਨਿ ਚਤ੍ਤਾਰਿ ਹੇਟ੍ਠਾ ਕਥਿਤਨਯਾਨੇਵ.
੧੧-੧੨. ਮੋਗ੍ਗਲ੍ਲਾਨਸੁਤ੍ਤਾਦਿਵਣ੍ਣਨਾ
੮੪੩-੮੪੪. ਏਕਾਦਸਮਦ੍ਵਾਦਸਮੇਸੁ ਛ ਅਭਿਞ੍ਞਾ ਕਥਿਤਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
ਇਦ੍ਧਿਪਾਦਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.