੪. ਇਨ੍ਦ੍ਰਿਯਸਂਯੁਤ੍ਤਂ
੧. ਸੁਦ੍ਧਿਕਵਗ੍ਗੋ
੧. ਸੁਦ੍ਧਿਕਸੁਤ੍ਤਵਣ੍ਣਨਾ
੪੭੧. ਇਨ੍ਦ੍ਰਿਯਸਂਯੁਤ੍ਤਸ੍ਸ ਪਠਮੇ ਸਦ੍ਧਿਨ੍ਦ੍ਰਿਯਂ ਸਤਿਨ੍ਦ੍ਰਿਯਂ ਪਞ੍ਞਿਨ੍ਦ੍ਰਿਯਨ੍ਤਿ ਇਮਾਨਿ ਤੀਣਿ ਚਤੁਭੂਮਕਕੁਸਲਵਿਪਾਕੇਸੁ ਚੇਵ ਕਿਰਿਯਾਸੁ ਚ ਲਬ੍ਭਨ੍ਤਿ. ਵੀਰਿਯਿਨ੍ਦ੍ਰਿਯਸਮਾਧਿਨ੍ਦ੍ਰਿਯਾਨਿ ਚਤੁਭੂਮਕਕੁਸਲੇ ਅਕੁਸਲੇ ਵਿਪਾਕੇ ਕਿਰਿਯਾਯਾਤਿ ਸਬ੍ਬਤ੍ਥ ਲਬ੍ਭਨ੍ਤਿ. ਇਤਿ ਇਦਂ ਸੁਤ੍ਤਂ ਚਤੁਭੂਮਕਸਬ੍ਬਸਙ੍ਗਾਹਕਧਮ੍ਮਪਰਿਚ੍ਛੇਦਵਸੇਨ ਵੁਤ੍ਤਨ੍ਤਿ ਵੇਦਿਤਬ੍ਬਂ.
੭. ਦੁਤਿਯਸਮਣਬ੍ਰਾਹ੍ਮਣਸੁਤ੍ਤਵਣ੍ਣਨਾ
੪੭੭. ਸਤ੍ਤਮੇ ਸਦ੍ਧਿਨ੍ਦ੍ਰਿਯਂ ਨਪ੍ਪਜਾਨਨ੍ਤੀਤਿ ਦੁਕ੍ਖਸਚ੍ਚਵਸੇਨ ਨ ਪਜਾਨਨ੍ਤਿ. ਸਦ੍ਧਿਨ੍ਦ੍ਰਿਯਸਮੁਦਯਂ ਨਪ੍ਪਜਾਨਨ੍ਤੀਤਿ ਸਮੁਦਯਸਚ੍ਚਵਸੇਨ ਨ ਪਜਾਨਨ੍ਤਿ. ਏਵਂ ਨਿਰੋਧਂ ਨਿਰੋਧਸਚ੍ਚਵਸੇਨ, ਪਟਿਪਦਂ ਮਗ੍ਗਸਚ੍ਚਵਸੇਨਾਤਿ. ਸੇਸੇਸੁਪਿ ਏਸੇਵ ਨਯੋ.
ਸੁਕ੍ਕਪਕ੍ਖੇ ਪਨ ਅਧਿਮੋਕ੍ਖਵਸੇਨ ਆਵਜ੍ਜਨਸਮੁਦਯਾ ਸਦ੍ਧਿਨ੍ਦ੍ਰਿਯਸਮੁਦਯੋ ਹੋਤਿ, ਪਗ੍ਗਹਵਸੇਨ ਆਵਜ੍ਜਨਸਮੁਦਯਾ ਵੀਰਿਯਿਨ੍ਦ੍ਰਿਯਸਮੁਦਯੋ, ਉਪਟ੍ਠਾਨਵਸੇਨ ਆਵਜ੍ਜਨਸਮੁਦਯਾ ਸਤਿਨ੍ਦ੍ਰਿਯਸਮੁਦਯੋ, ਅਵਿਕ੍ਖੇਪਵਸੇਨ ਆਵਜ੍ਜਨਸਮੁਦਯਾ ਸਮਾਧਿਨ੍ਦ੍ਰਿਯਸਮੁਦਯੋ, ਦਸ੍ਸਨਵਸੇਨ ਆਵਜ੍ਜਨਸਮੁਦਯਾ ਪਞ੍ਞਿਨ੍ਦ੍ਰਿਯਸਮੁਦਯੋ ਹੋਤਿ. ਤਥਾ ਛਨ੍ਦਵਸੇਨ ਆਵਜ੍ਜਨਸਮੁਦਯਾ ਸਦ੍ਧਿਨ੍ਦ੍ਰਿਯਸਮੁਦਯੋ ਹੋਤਿ, ਛਨ੍ਦਵਸੇਨ ਆਵਜ੍ਜਨਸਮੁਦਯਾ ਵੀਰਿਯਸਤਿਸਮਾਧਿਪਞ੍ਞਿਨ੍ਦ੍ਰਿਯਸਮੁਦਯੋ ਹੋਤਿ. ਮਨਸਿਕਾਰਵਸੇਨ ਆਵਜ੍ਜਨਸਮੁਦਯਾ ਸਦ੍ਧਿਨ੍ਦ੍ਰਿਯਸਮੁਦਯੋ ਹੋਤਿ. ਮਨਸਿਕਾਰਵਸੇਨ ਆਵਜ੍ਜਨਸਮੁਦਯਾ ਵੀਰਿਯਸਤਿਸਮਾਧਿਪਞ੍ਞਿਨ੍ਦ੍ਰਿਯਸਮੁਦਯੋ ਹੋਤੀਤਿ ਏਵਮ੍ਪਿ ਅਤ੍ਥੋ ਵੇਦਿਤਬ੍ਬੋ. ਇਮੇਸੁ ਪਟਿਪਾਟਿਯਾ ਛਸੁ ਸੁਤ੍ਤੇਸੁ ਚਤੁਸਚ੍ਚਮੇਵ ਕਥਿਤਂ.
੮. ਦਟ੍ਠਬ੍ਬਸੁਤ੍ਤਵਣ੍ਣਨਾ
੪੭੮. ਅਟ੍ਠਮੇ ਕਤ੍ਥ ਚ, ਭਿਕ੍ਖਵੇ, ਸਦ੍ਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਚਤੂਸੁ ਸੋਤਾਪਤ੍ਤਿਯਙ੍ਗੇਸੂਤਿਆਦਿ ਇਮੇਸਂ ਇਨ੍ਦ੍ਰਿਯਾਨਂ ਸਵਿਸਯੇ ਜੇਟ੍ਠਕਭਾਵਦਸ੍ਸਨਤ੍ਥਂ ਵੁਤ੍ਤਂ. ਯਥਾ ਹਿ ਚਤ੍ਤਾਰੋ ਸੇਟ੍ਠਿਪੁਤ੍ਤਾ ਰਾਜਾਤਿ ਰਾਜਪਞ੍ਚਮੇਸੁ ਸਹਾਯੇਸੁ ‘‘ਨਕ੍ਖਤ੍ਤਂ ਕੀਲ਼ਿਸ੍ਸਾਮਾ’’ਤਿ ਵੀਥਿਂ ਓਤਿਣ੍ਣੇਸੁ ਏਕਸ੍ਸ ਸੇਟ੍ਠਿਪੁਤ੍ਤਸ੍ਸ ਗੇਹਂ ਗਤਕਾਲੇ ਇਤਰੇ ਚਤ੍ਤਾਰੋ ਤੁਣ੍ਹੀ ਨਿਸੀਦਨ੍ਤਿ, ਗੇਹਸਾਮਿਕੋਵ – ‘‘ਇਮੇਸਂ ਖਾਦਨੀਯਂ ਭੋਜਨੀਯਂ ਦੇਥ, ਗਨ੍ਧਮਾਲਾਲਙ੍ਕਾਰਾਦੀਨਿ ਦੇਥਾ’’ਤਿ ਗੇਹੇ ਵਿਚਾਰੇਤਿ. ਦੁਤਿਯਸ੍ਸ, ਤਤਿਯਸ੍ਸ, ਚਤੁਤ੍ਥਸ੍ਸ ਗੇਹਂ ਗਤਕਾਲੇ ਇਤਰੇ ਚਤ੍ਤਾਰੋ ਤੁਣ੍ਹੀ ਨਿਸੀਦਨ੍ਤਿ, ਗੇਹਸਾਮਿਕੋਵ – ‘‘ਇਮੇਸਂ ਖਾਦਨੀਯਂ ਭੋਜਨੀਯਂ ਦੇਥ, ਗਨ੍ਧਮਾਲਾਲਙ੍ਕਾਰਾਦੀਨਿ ਦੇਥਾ’’ਤਿ ਗੇਹੇ ਵਿਚਾਰੇਤਿ. ਅਥ ਸਬ੍ਬਪਚ੍ਛਾ ਰਞ੍ਞੋ ਗੇਹਂ ਗਤਕਾਲੇ ਕਿਞ੍ਚਾਪਿ ਰਾਜਾ ਸਬ੍ਬਤ੍ਥ ਇਸ੍ਸਰੋ, ਇਮਸ੍ਮਿਂ ਪਨ ਕਾਲੇ ਅਤ੍ਤਨੋ ਗੇਹੇਯੇਵ – ‘‘ਇਮੇਸਂ ਖਾਦਨੀਯਂ ਭੋਜਨੀਯਂ ਦੇਥ, ਗਨ੍ਧਮਾਲਾਲਙ੍ਕਾਰਾਦੀਨਿ ਦੇਥਾ’’ਤਿ ਗੇਹੇ ਵਿਚਾਰੇਤਿ. ਏਵਮੇਵ ਸਦ੍ਧਾਪਞ੍ਚਮਕੇਸੁ ਇਨ੍ਦ੍ਰਿਯੇਸੁ ਤੇਸੁ ਸਹਾਯੇਸੁ ਏਕਤੋ ਵੀਥਿਂ ਓਤਰਨ੍ਤੇਸੁ ਵਿਯ ਏਕਾਰਮ੍ਮਣੇ ਉਪ੍ਪਜ੍ਜਮਾਨੇਸੁਪਿ ਯਥਾ ਪਠਮਸ੍ਸ ਗੇਹੇ ਇਤਰੇ ਚਤ੍ਤਾਰੋ ਤੁਣ੍ਹੀ ਨਿਸੀਦਨ੍ਤਿ, ਗੇਹਸਾਮਿਕੋਵ ਵਿਚਾਰੇਤਿ, ਏਵਂ ਸੋਤਾਪਤ੍ਤਿਯਙ੍ਗਾਨਿ ਪਤ੍ਵਾ ਅਧਿਮੋਕ੍ਖਲਕ੍ਖਣਂ ਸਦ੍ਧਿਨ੍ਦ੍ਰਿਯਮੇਵ ਜੇਟ੍ਠਕਂ ਹੋਤਿ ਪੁਬ੍ਬਙ੍ਗਮਂ, ਸੇਸਾਨਿ ਤਦਨ੍ਵਯਾਨਿ ਹੋਨ੍ਤਿ. ਯਥਾ ਦੁਤਿਯਸ੍ਸ ਗੇਹੇ ਇਤਰੇ ਚਤ੍ਤਾਰੋ ਤੁਣ੍ਹੀ ਨਿਸੀਦਨ੍ਤਿ, ਗੇਹਸਾਮਿਕੋਵ ਵਿਚਾਰੇਤਿ, ਏਵਂ ਸਮ੍ਮਪ੍ਪਧਾਨਾਨਿ ਪਤ੍ਵਾ ਪਗ੍ਗਹਲਕ੍ਖਣਂ ਵੀਰਿਯਿਨ੍ਦ੍ਰਿਯਮੇਵ ਜੇਟ੍ਠਕਂ ਹੋਤਿ ਪੁਬ੍ਬਙ੍ਗਮਂ, ਸੇਸਾਨਿ ਤਦਨ੍ਵਯਾਨਿ ਹੋਨ੍ਤਿ. ਯਥਾ ਤਤਿਯਸ੍ਸ ਗੇਹੇ ਇਤਰੇ ਚਤ੍ਤਾਰੋ ਤੁਣ੍ਹੀ ਨਿਸੀਦਨ੍ਤਿ, ਗੇਹਸਾਮਿਕੋਵ ਵਿਚਾਰੇਤਿ, ਏਵਂ ਸਤਿਪਟ੍ਠਾਨਾਨਿ ਪਤ੍ਵਾ ਉਪਟ੍ਠਾਨਲਕ੍ਖਣਂ ਸਤਿਨ੍ਦ੍ਰਿਯਮੇਵ ਜੇਟ੍ਠਕਂ ਹੋਤਿ ਪੁਬ੍ਬਙ੍ਗਮਂ, ਸੇਸਾਨਿ ਤਦਨ੍ਵਯਾਨਿ ਹੋਨ੍ਤਿ. ਯਥਾ ਚਤੁਤ੍ਥਸ੍ਸ ਗੇਹੇ ਇਤਰੇ ਚਤ੍ਤਾਰੋ ਤੁਣ੍ਹੀ ਨਿਸੀਦਨ੍ਤਿ, ਗੇਹਸਾਮਿਕੋਵ ਵਿਚਾਰੇਤਿ, ਏਵਂ ਝਾਨਵਿਮੋਕ੍ਖੇ ਪਤ੍ਵਾ ਅਵਿਕ੍ਖੇਪਲਕ੍ਖਣਂ ਸਮਾਧਿਨ੍ਦ੍ਰਿਯਮੇਵ ਜੇਟ੍ਠਕਂ ਹੋਤਿ ਪੁਬ੍ਬਙ੍ਗਮਂ, ਸੇਸਾਨਿ ਤਦਨ੍ਵਯਾਨਿ ਹੋਨ੍ਤਿ. ਸਬ੍ਬਪਚ੍ਛਾ ਰਞ੍ਞੋ ਗੇਹਂ ਗਤਕਾਲੇ ਪਨ ਯਥਾ ਇਤਰੇ ਚਤ੍ਤਾਰੋ ਤੁਣ੍ਹੀ ਨਿਸੀਦਨ੍ਤਿ, ਰਾਜਾਵ ਗੇਹੇ ਵਿਚਾਰੇਤਿ, ਏਵਮੇਵ ਅਰਿਯਸਚ੍ਚਾਨਿ ਪਤ੍ਵਾ ਪਜਾਨਨਲਕ੍ਖਣਂ ਪਞ੍ਞਿਨ੍ਦ੍ਰਿਯਮੇਵ ਜੇਟ੍ਠਕਂ ਹੋਤਿ ਪੁਬ੍ਬਙ੍ਗਮਂ, ਸੇਸਾਨਿ ਤਦਨ੍ਵਯਾਨਿ ਹੋਨ੍ਤੀਤਿ.
੯-੧੦. ਪਠਮਵਿਭਙ੍ਗਸੁਤ੍ਤਾਦਿਵਣ੍ਣਨਾ
੪੭੯-੪੮੦. ਨਵਮੇ ਸਤਿਨੇਪਕ੍ਕੇਨਾਤਿ ਏਤ੍ਥ ਨਿਪਕਸ੍ਸ ਭਾਵੋ ਨੇਪਕ੍ਕਂ, ਪਞ੍ਞਾਯੇਤਂ ਨਾਮਂ. ਕਸ੍ਮਾ ਪਨ ਸਤਿਭਾਜਨੇ ਪਞ੍ਞਾ ਵੁਤ੍ਤਾਤਿ? ਸਤਿਯਾ ਬਲਵਭਾਵਦਸ੍ਸਨਤ੍ਥਂ. ਬਲਵਸਤਿ ਹਿ ਇਧ ਅਧਿਪ੍ਪੇਤਾ. ਸਾ ਚ ਪਞ੍ਞਾਸਮ੍ਪਯੁਤ੍ਤਾਵ ਬਲਵਤੀ ਹੋਤਿ, ਨ ਵਿਪ੍ਪਯੁਤ੍ਤਾਤਿ ਪਞ੍ਞਾਸਮ੍ਪਯੁਤ੍ਤਸਤਿਂ ਦਸ੍ਸੇਨ੍ਤੋ ਏਵਮਾਹ. ਚਿਰਕਤਨ੍ਤਿ ਚਿਰਕਾਲਂ ਕਤਂ ਦਾਨਂ ਵਾ ਸੀਲਂ ਵਾ ਉਪੋਸਥਕਮ੍ਮਂ ਵਾ. ਚਿਰਭਾਸਿਤਨ੍ਤਿ ‘‘ਅਸੁਕਸ੍ਮਿਂ ਠਾਨੇ ਅਸੁਕਂ ਨਾਮ ਭਾਸਿਤ’’ਨ੍ਤਿ ਏਵਂ ਚਿਰਕਾਲੇ ਭਾਸਿਤਂ. ਵੋਸ੍ਸਗ੍ਗਾਰਮ੍ਮਣਂ ਕਤ੍ਵਾਤਿ ਨਿਬ੍ਬਾਨਾਰਮ੍ਮਣਂ ਕਤ੍ਵਾ. ਉਦਯਤ੍ਥਗਾਮਿਨਿਯਾਤਿ ਉਦਯਞ੍ਚ ਅਤ੍ਥਞ੍ਚ ਗਚ੍ਛਨ੍ਤਿਯਾ, ਉਦਯਬ੍ਬਯਪਰਿਗ੍ਗਹਿਕਾਯਾਤਿ ਅਤ੍ਥੋ. ਇਮਸ੍ਮਿਂ ਸੁਤ੍ਤੇ ਸਦ੍ਧਾਸਤਿਪਞ੍ਞਿਨ੍ਦ੍ਰਿਯਾਨਿ ਪੁਬ੍ਬਭਾਗਾਨਿ, ਵੀਰਿਯਿਨ੍ਦ੍ਰਿਯਂ ਮਿਸ੍ਸਕਂ, ਸਮਾਧਿਨ੍ਦ੍ਰਿਯਂ ਨਿਬ੍ਬਤ੍ਤਿਤਲੋਕੁਤ੍ਤਰਮੇਵ ਕਥਿਤਂ. ਦਸਮੇਪਿ ਅਯਮੇਵ ਧਮ੍ਮਪਰਿਚ੍ਛੇਦੋਤਿ.
ਸੁਦ੍ਧਿਕਵਗ੍ਗੋ ਪਠਮੋ.
੨. ਮੁਦੁਤਰਵਗ੍ਗੋ
੧. ਪਟਿਲਾਭਸੁਤ੍ਤਵਣ੍ਣਨਾ
੪੮੧. ਦੁਤਿਯਵਗ੍ਗਸ੍ਸ ਪਠਮੇ ਸਮ੍ਮਪ੍ਪਧਾਨੇ ਆਰਬ੍ਭਾਤਿ ਸਮ੍ਮਪ੍ਪਧਾਨੇ ਪਟਿਚ੍ਚ, ਸਮ੍ਮਪ੍ਪਧਾਨੇ ਭਾਵੇਨ੍ਤੋਤਿ ਅਤ੍ਥੋ. ਸਤਿਨ੍ਦ੍ਰਿਯੇਪਿ ਏਸੇਵ ਨਯੋ.
੨. ਪਠਮਸਂਖਿਤ੍ਤਸੁਤ੍ਤਵਣ੍ਣਨਾ
੪੮੨. ਦੁਤਿਯੇ ਤਤੋਤਿ ਵਿਪਸ੍ਸਨਾਮਗ੍ਗਫਲਵਸੇਨ ਨਿਸ੍ਸਕ੍ਕਂ ਵੇਦਿਤਬ੍ਬਂ. ਸਮਤ੍ਤਾਨਿ ਹਿ ਪਰਿਪੁਣ੍ਣਾਨਿ ਪਞ੍ਚਿਨ੍ਦ੍ਰਿਯਾਨਿ ਅਰਹਤ੍ਤਮਗ੍ਗਸ੍ਸ ਵਿਪਸ੍ਸਨਿਨ੍ਦ੍ਰਿਯਾਨਿ ਨਾਮ ਹੋਨ੍ਤਿ. ਤਤੋ ਮੁਦੁਤਰੇਹੀਤਿ ਤੇਹਿ ਅਰਹਤ੍ਤਮਗ੍ਗਸ੍ਸ ਵਿਪਸ੍ਸਨਿਨ੍ਦ੍ਰਿਯੇਹਿ ਮੁਦੁਤਰਾਨਿ ਅਨਾਗਾਮਿਮਗ੍ਗਸ੍ਸ ਵਿਪਸ੍ਸਨਿਨ੍ਦ੍ਰਿਯਾਨਿ ਨਾਮ ਹੋਨ੍ਤਿ, ਤਤੋ ਮੁਦੁਤਰਾਨਿ ਸਕਦਾਗਾਮਿਮਗ੍ਗਸ੍ਸ, ਤਤੋ ਮੁਦੁਤਰਾਨਿ ਸੋਤਾਪਤ੍ਤਿਮਗ੍ਗਸ੍ਸ ਵਿਪਸ੍ਸਨਿਨ੍ਦ੍ਰਿਯਾਨਿ ਨਾਮ ਹੋਨ੍ਤਿ, ਤਤੋ ਮੁਦੁਤਰਾਨਿ ਧਮ੍ਮਾਨੁਸਾਰਿਮਗ੍ਗਸ੍ਸ, ਤਤੋ ਮੁਦੁਤਰਾਨਿ ਸਦ੍ਧਾਨੁਸਾਰਿਮਗ੍ਗਸ੍ਸ ਵਿਪਸ੍ਸਨਿਨ੍ਦ੍ਰਿਯਾਨਿ ਨਾਮ ਹੋਨ੍ਤਿ.
ਤਥਾ ਸਮਤ੍ਤਾਨਿ ਪਰਿਪੁਣ੍ਣਾਨਿ ਪਞ੍ਚਿਨ੍ਦ੍ਰਿਯਾਨਿ ਅਰਹਤ੍ਤਮਗ੍ਗਿਨ੍ਦ੍ਰਿਯਾਨਿ ਨਾਮ ਹੋਨ੍ਤਿ, ਤਤੋ ਮੁਦੁਤਰਾਨਿ ਅਨਾਗਾਮਿਮਗ੍ਗਿਨ੍ਦ੍ਰਿਯਾਨਿ ਨਾਮ ਹੋਨ੍ਤਿ, ਤਤੋ ਮੁਦੁਤਰਾਨਿ ਸਕਦਾਗਾਮਿਮਗ੍ਗਿਨ੍ਦ੍ਰਿਯਾਨਿ ਨਾਮ ਹੋਨ੍ਤਿ, ਤਤੋ ਮੁਦੁਤਰਾਨਿ ਸੋਤਾਪਤ੍ਤਿਮਗ੍ਗਿਨ੍ਦ੍ਰਿਯਾਨਿ ਨਾਮ ਹੋਨ੍ਤਿ, ਤਤੋ ਮੁਦੁਤਰਾਨਿ ਧਮ੍ਮਾਨੁਸਾਰਿਮਗ੍ਗਿਨ੍ਦ੍ਰਿਯਾਨਿ, ਤਤੋ ਮੁਦੁਤਰਾਨਿ ਸਦ੍ਧਾਨੁਸਾਰਿਮਗ੍ਗਿਨ੍ਦ੍ਰਿਯਾਨਿ ਨਾਮ ਹੋਨ੍ਤਿ.
ਸਮਤ੍ਤਾਨਿ ਪਰਿਪੁਣ੍ਣਾਨਿ ਪਞ੍ਚਿਨ੍ਦ੍ਰਿਯਾਨਿ ਅਰਹਤ੍ਤਫਲਿਨ੍ਦ੍ਰਿਯਾਨਿ ਨਾਮ ਹੋਨ੍ਤਿ, ਤਤੋ ਮੁਦੁਤਰਾਨਿ ਅਨਾਗਾਮਿਫਲਿਨ੍ਦ੍ਰਿਯਾਨਿ, ਤਤੋ ਮੁਦੁਤਰਾਨਿ ਸਕਦਾਗਾਮਿਫਲਿਨ੍ਦ੍ਰਿਯਾਨਿ, ਤਤੋ ਮੁਦੁਤਰਾਨਿ ਸੋਤਾਪਤ੍ਤਿਫਲਿਨ੍ਦ੍ਰਿਯਾਨਿ ਨਾਮ ਹੋਨ੍ਤਿ. ਧਮ੍ਮਾਨੁਸਾਰਿਸਦ੍ਧਾਨੁਸਾਰਿਨੋ ਪਨ ਦ੍ਵੇਪਿ ਸੋਤਾਪਤ੍ਤਿਮਗ੍ਗਟ੍ਠਪੁਗ੍ਗਲਾ, ਮਗ੍ਗਟ੍ਠਪੁਗ੍ਗਲਵਸੇਨ ਨੇਸਂ ਨਾਨਤ੍ਤਂ ਜਾਤਨ੍ਤਿ ਆਗਮਨੇਨਪਿ ਮਗ੍ਗੇਨਪਿ. ਸਦ੍ਧਾਨੁਸਾਰੀ ਪੁਗ੍ਗਲੋ ਹਿ ਉਦ੍ਦਿਸਾਪੇਨ੍ਤੋ ਪਰਿਪੁਚ੍ਛਨ੍ਤੋ ਅਨੁਪੁਬ੍ਬੇਨ ਮਗ੍ਗਂ ਪਾਪੁਣਾਤਿ, ਧਮ੍ਮਾਨੁਸਾਰੀ ਏਕੇਨ ਵਾ ਦ੍ਵੀਹਿ ਵਾ ਸਵਨੇਹਿ. ਏਵਂ ਤਾਵ ਨੇਸਂ ਆਗਮਨੇਨ ਨਾਨਤ੍ਤਂ ਵੇਦਿਤਬ੍ਬਂ.
ਧਮ੍ਮਾਨੁਸਾਰਿਸ੍ਸ ਪਨ ਮਗ੍ਗੋ ਤਿਕ੍ਖੋ ਹੋਤਿ, ਸੂਰਂ ਞਾਣਂ ਵਹਤਿ, ਅਸਙ੍ਖਾਰੇਨ ਅਪ੍ਪਯੋਗੇਨ ਕਿਲੇਸੇ ਛਿਨ੍ਦਤਿ ਕਦਲਿਕ੍ਖਨ੍ਧਂ ਵਿਯ ਤਿਖਿਣਾ ਅਸਿਧਾਰਾ. ਸਦ੍ਧਾਨੁਸਾਰਿਸ੍ਸ ਨ ਤਸ੍ਸ ਵਿਯ ਮਗ੍ਗੋ ਤਿਕ੍ਖੋ ਹੋਤਿ, ਨ ਸੂਰਂ ਞਾਣਂ ਵਹਤਿ, ਸਸਙ੍ਖਾਰੇਨ ਸਪ੍ਪਯੋਗੇਨ ਕਿਲੇਸੇ ਛਿਨ੍ਦਤਿ ਕਦਲਿਕ੍ਖਨ੍ਧਂ ਵਿਯ ਅਤਿਖਿਣਾ ਅਸਿਧਾਰਾ. ਕਿਲੇਸਕ੍ਖਯੇ ਪਨ ਤੇਸਂ ਨਾਨਤ੍ਤਂ ਨਤ੍ਥਿ. ਅਵਸੇਸਾ ਚ ਕਿਲੇਸਾ ਖੀਯਨ੍ਤਿ.
੩. ਦੁਤਿਯਸਂਖਿਤ੍ਤਸੁਤ੍ਤਵਣ੍ਣਨਾ
੪੮੩. ਤਤਿਯੇ ਤਤੋਤਿ ਫਲਵਸੇਨ ਨਿਸ੍ਸਕ੍ਕਂ ਵੇਦਿਤਬ੍ਬਂ. ਸਮਤ੍ਤਾਨਿ ਹਿ ਪਰਿਪੁਣ੍ਣਾਨਿ ਪਞ੍ਚਿਨ੍ਦ੍ਰਿਯਾਨਿ ਅਰਹਤ੍ਤਫਲਿਨ੍ਦ੍ਰਿਯਾਨਿ ਨਾਮ ਹੋਨ੍ਤਿ, ਅਰਹਤ੍ਤਫਲੇਨ ਸਮਨ੍ਨਾਗਤੋ ਪੁਗ੍ਗਲੋ ਅਰਹਾ ਨਾਮ ਹੋਤਿ. ਅਰਹਤ੍ਤਫਲਤੋ ਮੁਦੁਤਰਾਨਿ ਅਨਾਗਾਮਿਫਲਿਨ੍ਦ੍ਰਿਯਾਨਿ ਨਾਮ ਹੋਨ੍ਤਿ, ਤਤੋ ਮੁਦੁਤਰਾਨਿ ਸਕਦਾਗਾਮਿਫਲਿਨ੍ਦ੍ਰਿਯਾਨਿ, ਤਤੋ ਮੁਦੁਤਰਾਨਿ ਸੋਤਾਪਤ੍ਤਿਫਲਿਨ੍ਦ੍ਰਿਯਾਨਿ, ਸੋਤਾਪਤ੍ਤਿਫਲੇਨ ਸਮਨ੍ਨਾਗਤੋ ਪੁਗ੍ਗਲੋ ਸੋਤਾਪਨ੍ਨੋ ਨਾਮ ਹੋਤਿ. ਇਨ੍ਦ੍ਰਿਯਵੇਮਤ੍ਤਤਾ ਫਲਵੇਮਤ੍ਤਤਾ ਹੋਤੀਤਿ ਇਨ੍ਦ੍ਰਿਯਨਾਨਤ੍ਤੇਨ ਫਲਨਾਨਤ੍ਤਂ, ਫਲਨਾਨਤ੍ਤੇਨ ਪੁਗ੍ਗਲਨਾਨਤ੍ਤਨ੍ਤਿ.
੪. ਤਤਿਯਸਂਖਿਤ੍ਤਸੁਤ੍ਤਵਣ੍ਣਨਾ
੪੮੪. ਚਤੁਤ੍ਥੇ ਪਰਿਪੂਰਂ ਪਰਿਪੂਰਕਾਰੀ ਆਰਾਧੇਤੀਤਿ ਪਰਿਪੂਰਂ ਅਰਹਤ੍ਤਮਗ੍ਗਂ ਕਰੋਨ੍ਤੋ ਅਰਹਤ੍ਤਫਲਂ ਆਰਾਧੇਤਿ. ਪਦੇਸਂ ਪਦੇਸਕਾਰੀਤਿ ਅਵਸੇਸੇ ਤਯੋ ਪਦੇਸਮਗ੍ਗੇ ਕਰੋਨ੍ਤੋ ਪਦੇਸਂ ਫਲਤ੍ਤਯਮਤ੍ਤਮੇਵ ਆਰਾਧੇਤਿ. ਇਤਿ ਇਮੇਸੁ ਚਤੂਸੁਪਿ ਸੁਤ੍ਤੇਸੁ ਮਿਸ੍ਸਕਾਨੇਵ ਇਨ੍ਦ੍ਰਿਯਾਨਿ ਕਥਿਤਾਨਿ.
੫-੭. ਪਠਮਵਿਤ੍ਥਾਰਸੁਤ੍ਤਾਦਿਵਣ੍ਣਨਾ
੪੮੫-੪੮੭. ਪਞ੍ਚਮੇ ਤਤੋ ਮੁਦੁਤਰੇਹੀਤਿ ਵਿਪਸ੍ਸਨਾਵਸੇਨ ਨਿਸ੍ਸਕ੍ਕਂ ਵੇਦਿਤਬ੍ਬਂ. ਪਰਿਪੁਣ੍ਣਾਨਿ ਹਿ ਪਞ੍ਚਿਨ੍ਦ੍ਰਿਯਾਨਿ ਅਰਹਤ੍ਤਮਗ੍ਗਸ੍ਸ ਵਿਪਸ੍ਸਨਿਨ੍ਦ੍ਰਿਯਾਨਿ ਹੋਨ੍ਤਿ, ਤਤੋ ਮੁਦੁਤਰਾਨਿ ਅਨ੍ਤਰਾਪਰਿਨਿਬ੍ਬਾਯਿਸ੍ਸ ਵਿਪਸ੍ਸਨਿਨ੍ਦ੍ਰਿਯਾਨਿ, ਤਤੋ ਮੁਦੁਤਰਾਨਿ ਉਪਹਚ੍ਚਪਰਿਨਿਬ੍ਬਾਯਿਸ੍ਸ, ਤਤੋ ਮੁਦੁਤਰਾਨਿ ਅਸਙ੍ਖਾਰਪਰਿਨਿਬ੍ਬਾਯਿਸ੍ਸ, ਤਤੋ ਮੁਦੁਤਰਾਨਿ ਸਸਙ੍ਖਾਰਪਰਿਨਿਬ੍ਬਾਯਿਸ੍ਸ, ਤਤੋ ਮੁਦੁਤਰਾਨਿ ਉਦ੍ਧਂਸੋਤਅਕਨਿਟ੍ਠਗਾਮਿਸ੍ਸ ਵਿਪਸ੍ਸਨਿਨ੍ਦ੍ਰਿਯਾਨਿ ਨਾਮ ਹੋਨ੍ਤਿ.
ਇਮਸ੍ਮਿਂ ਪਨ ਠਾਨੇ ਅਰਹਤ੍ਤਮਗ੍ਗੇਯੇਵ ਠਤ੍ਵਾ ਪਞ੍ਚ ਨਿਸ੍ਸਕ੍ਕਾਨਿ ਨੀਹਰਿਤਬ੍ਬਾਨਿ. ਅਰਹਤ੍ਤਮਗ੍ਗਸ੍ਸ ਹਿ ਵਿਪਸ੍ਸਨਿਨ੍ਦ੍ਰਿਯੇਹਿ ਮੁਦੁਤਰਾਨਿ ਪਠਮਅਨ੍ਤਰਾਪਰਿਨਿਬ੍ਬਾਯਿਸ੍ਸ ਵਿਪਸ੍ਸਨਿਨ੍ਦ੍ਰਿਯਾਨਿ, ਤਤੋ ਮੁਦੁਤਰਾਨਿ ਦੁਤਿਯਅਨ੍ਤਰਾਪਰਿਨਿਬ੍ਬਾਯਿਸ੍ਸ, ਤਤੋ ਮੁਦੁਤਰਾਨਿ ਤਤਿਯਅਨ੍ਤਰਾਪਰਿਨਿਬ੍ਬਾਯਿਸ੍ਸ, ਤਤੋ ਮੁਦੁਤਰਾਨਿ ਉਪਹਚ੍ਚਪਰਿਨਿਬ੍ਬਾਯਿਸ੍ਸ, ਤਤੋ ਮੁਦੁਤਰਾਨਿ ਉਦ੍ਧਂਸੋਤਅਕਨਿਟ੍ਠਗਾਮਿਸ੍ਸ ਵਿਪਸ੍ਸਨਿਨ੍ਦ੍ਰਿਯਾਨਿ. ਅਸਙ੍ਖਾਰਪਰਿਨਿਬ੍ਬਾਯਿਸ੍ਸ ਸਸਙ੍ਖਾਰਪਰਿਨਿਬ੍ਬਾਯਿਨੋਪਿ ਏਤੇਵ ਪਞ੍ਚ ਜਨਾ.
ਇਦਾਨਿ ਤੀਣਿ ਨਿਸ੍ਸਕ੍ਕਾਨਿ. ਸਕਦਾਗਾਮਿਮਗ੍ਗਸ੍ਸ ਹਿ ਇਨ੍ਦ੍ਰਿਯੇਹਿ ਮੁਦੁਤਰਾਨਿ ਸੋਤਾਪਤ੍ਤਿਮਗ੍ਗਿਨ੍ਦ੍ਰਿਯਾਨਿ, ਸੋਤਾਪਤ੍ਤਿਮਗ੍ਗੇਯੇਵ ਇਨ੍ਦ੍ਰਿਯੇਹਿ ਮੁਦੁਤਰਾਨਿ ਧਮ੍ਮਾਨੁਸਾਰਿਮਗ੍ਗਿਨ੍ਦ੍ਰਿਯਾਨਿ. ਤੇਹਿਪਿ ਮੁਦੁਤਰਾਨਿ ਸਦ੍ਧਾਨੁਸਾਰਿਮਗ੍ਗਿਨ੍ਦ੍ਰਿਯਾਨਿ. ਛਟ੍ਠਸਤ੍ਤਮਾਨਿ ਵੁਤ੍ਤਨਯਾਨੇਵ. ਇਮੇਸੁ ਪਨ ਤੀਸੁਪਿ ਸੁਤ੍ਤੇਸੁ ਪੁਬ੍ਬਭਾਗਵਿਪਸ੍ਸਨਿਨ੍ਦ੍ਰਿਯਾਨੇਵ ਕਥਿਤਾਨਿ.
੮. ਪਟਿਪਨ੍ਨਸੁਤ੍ਤਵਣ੍ਣਨਾ
੪੮੮. ਅਟ੍ਠਮੇ ਤਤੋ ਮੁਦੁਤਰੇਹੀਤਿ ਮਗ੍ਗਫਲਵਸੇਨ ਨਿਸ੍ਸਕ੍ਕਂ ਵੇਦਿਤਬ੍ਬਂ. ਤਂ ਪਾਲ਼ਿਯਂ ਵੁਤ੍ਤਮੇਵ. ਬਾਹਿਰੋਤਿ ਇਮੇਹਿ ਅਟ੍ਠਹਿ ਪੁਗ੍ਗਲੇਹਿ ਬਹਿਭੂਤੋ. ਪੁਥੁਜ੍ਜਨਪਕ੍ਖੇ ਠਿਤੋਤਿ ਪੁਥੁਜ੍ਜਨਕੋਟ੍ਠਾਸੇ ਠਿਤੋ. ਇਮਸ੍ਮਿਂ ਸੁਤ੍ਤੇ ਲੋਕੁਤ੍ਤਰਾਨੇਵ ਇਨ੍ਦ੍ਰਿਯਾਨਿ ਕਥਿਤਾਨਿ.
੯-੧੦. ਸਮ੍ਪਨ੍ਨਸੁਤ੍ਤਾਦਿਵਣ੍ਣਨਾ
੪੮੯-੪੯੦. ਨਵਮੇ ਇਨ੍ਦ੍ਰਿਯਸਮ੍ਪਨ੍ਨੋਤਿ ਪਰਿਪੁਣ੍ਣਿਨ੍ਦ੍ਰਿਯੋ. ਦਸਮਂ ਉਤ੍ਤਾਨਮੇਵ. ਇਮਸ੍ਮਿਂ ਸੁਤ੍ਤਦ੍ਵਯੇ ਮਿਸ੍ਸਕਾਨਿ ਇਨ੍ਦ੍ਰਿਯਾਨਿ ਕਥਿਤਾਨੀਤਿ.
ਮੁਦੁਤਰਵਗ੍ਗੋ ਦੁਤਿਯੋ.
੩. ਛਲ਼ਿਨ੍ਦ੍ਰਿਯਵਗ੍ਗੋ
੨. ਜੀਵਿਤਿਨ੍ਦ੍ਰਿਯਸੁਤ੍ਤਵਣ੍ਣਨਾ
੪੯੨. ਤਤਿਯਵਗ੍ਗਸ੍ਸ ਦੁਤਿਯੇ ਇਤ੍ਥਿਨ੍ਦ੍ਰਿਯਨ੍ਤਿਆਦੀਸੁ ਇਤ੍ਥਿਭਾਵੇ ਇਨ੍ਦਟ੍ਠਂ ਕਰੋਤੀਤਿ ਇਤ੍ਥਿਨ੍ਦ੍ਰਿਯਂ. ਪੁਰਿਸਭਾਵੇ ਇਨ੍ਦਟ੍ਠਂ ਕਰੋਤੀਤਿ ਪੁਰਿਸਿਨ੍ਦ੍ਰਿਯਂ. ਜੀਵਿਤੇ ਇਨ੍ਦਟ੍ਠਂ ਕਰੋਤੀਤਿ ਜੀਵਿਤਿਨ੍ਦ੍ਰਿਯਂ. ਅਤ੍ਥੁਪ੍ਪਤ੍ਤਿਕਂ ਕਿਰੇਤਂ ਸੁਤ੍ਤਂ. ਸਙ੍ਘਮਜ੍ਝਸ੍ਮਿਞ੍ਹਿ ‘‘ਕਤਿ ਨੁ ਖੋ ਵਟ੍ਟਿਨ੍ਦ੍ਰਿਯਾਨੀ’’ਤਿ ਕਥਾ ਉਦਪਾਦਿ, ਅਥ ਭਗਵਾ ਵਟ੍ਟਿਨ੍ਦ੍ਰਿਯਾਨਿ ਦਸ੍ਸੇਨ੍ਤੋ ਤੀਣਿਮਾਨਿ ਭਿਕ੍ਖਵੇਤਿਆਦਿਮਾਹ.
੩. ਅਞ੍ਞਿਨ੍ਦ੍ਰਿਯਸੁਤ੍ਤਵਣ੍ਣਨਾ
੪੯੩. ਤਤਿਯੇ ਅਨਞ੍ਞਾਤਞ੍ਞਸ੍ਸਾਮੀਤਿਨ੍ਦ੍ਰਿਯਨ੍ਤਿ ‘‘ਅਨਮਤਗ੍ਗੇ ਸਂਸਾਰੇ ਅਜਾਨਿਤਪੁਬ੍ਬਂ ਧਮ੍ਮਂ ਜਾਨਿਸ੍ਸਾਮੀ’’ਤਿ ਪਟਿਪਨ੍ਨਸ੍ਸ ਸੋਤਾਪਤ੍ਤਿਮਗ੍ਗਕ੍ਖਣੇ ਉਪ੍ਪਨ੍ਨਂ ਇਨ੍ਦ੍ਰਿਯਂ. ਅਞ੍ਞਿਨ੍ਦ੍ਰਿਯਨ੍ਤਿ ਤੇਸਂਯੇਵ ਞਾਤਧਮ੍ਮਾਨਂ ਆਜਾਨਨਾਕਾਰੇਨ ਸੋਤਾਪਤ੍ਤਿਫਲਾਦੀਸੁ ਛਸੁ ਠਾਨੇਸੁ ਉਪ੍ਪਨ੍ਨਂ ਇਨ੍ਦ੍ਰਿਯਂ. ਅਞ੍ਞਾਤਾਵਿਨ੍ਦ੍ਰਿਯਨ੍ਤਿ ਅਞ੍ਞਾਤਾਵੀਸੁ ਅਰਹਤ੍ਤਫਲਧਮ੍ਮੇਸੁ ਉਪ੍ਪਨ੍ਨਂ ਇਨ੍ਦ੍ਰਿਯਂ. ਤਤ੍ਥ ਤਤ੍ਥ ਤੇਨ ਤੇਨਾਕਾਰੇਨ ਉਪ੍ਪਨ੍ਨਸ੍ਸ ਞਾਣਸ੍ਸੇਵੇਤਂ ਅਧਿਵਚਨਂ. ਇਦਮ੍ਪਿ ਸੁਤ੍ਤਂ ਅਤ੍ਥੁਪ੍ਪਤ੍ਤਿਕਮੇਵ. ਸਙ੍ਘਮਜ੍ਝਸ੍ਮਿਞ੍ਹਿ ‘‘ਕਤਿ ਨੁ ਖੋ ਲੋਕੁਤ੍ਤਰਿਨ੍ਦ੍ਰਿਯਾਨੀ’’ਤਿ ਕਥਾ ਉਦਪਾਦਿ, ਅਥ ਭਗਵਾ ਤਾਨਿ ਦਸ੍ਸੇਨ੍ਤੋ ਤੀਣਿਮਾਨਿ, ਭਿਕ੍ਖਵੇ, ਇਨ੍ਦ੍ਰਿਯਾਨੀਤਿਆਦਿਮਾਹ.
੪. ਏਕਬੀਜੀਸੁਤ੍ਤਵਣ੍ਣਨਾ
੪੯੪. ਚਤੁਤ੍ਥੇ ਤਤੋ ਮੁਦੁਤਰੇਹੀਤਿ ਵਿਪਸ੍ਸਨਤੋ ਨਿਸ੍ਸਕ੍ਕਂ ਵੇਦਿਤਬ੍ਬਂ. ਸਮਤ੍ਤਾਨਿ ਹਿ ਪਞ੍ਚਿਨ੍ਦ੍ਰਿਯਾਨਿ ਅਰਹਤ੍ਤਮਗ੍ਗਸ੍ਸ ਵਿਪਸ੍ਸਨਿਨ੍ਦ੍ਰਿਯਾਨਿ ਨਾਮ ਹੋਨ੍ਤਿ, ਤਤੋ ਮੁਦੁਤਰਾਨਿ ਅਨ੍ਤਰਾਪਰਿਨਿਬ੍ਬਾਯਿਸ੍ਸ ਵਿਪਸ੍ਸਨਿਨ੍ਦ੍ਰਿਯਾਨਿ, ਤਤੋ ਮੁਦੁਤਰਾਨਿ ਉਪਹਚ੍ਚਪਰਿਨਿਬ੍ਬਾਯਿਸ੍ਸ, ਤਤੋ ਮੁਦੁਤਰਾਨਿ ਅਸਙ੍ਖਾਰਪਰਿਨਿਬ੍ਬਾਯਿਸ੍ਸ, ਤਤੋ ਮੁਦੁਤਰਾਨਿ ਸਸਙ੍ਖਾਰਪਰਿਨਿਬ੍ਬਾਯਿਸ੍ਸ, ਤਤੋ ਮੁਦੁਤਰਾਨਿ ਉਦ੍ਧਂਸੋਤਅਕਨਿਟ੍ਠਗਾਮਿਸ੍ਸ ਵਿਪਸ੍ਸਨਿਨ੍ਦ੍ਰਿਯਾਨਿ ਨਾਮ. ਇਧਾਪਿ ਪੁਰਿਮਨਯੇਨੇਵ ਅਰਹਤ੍ਤਮਗ੍ਗੇ ਠਤ੍ਵਾ ਪਞ੍ਚ ਨਿਸ੍ਸਕ੍ਕਾਨਿ ਨੀਹਰਿਤਬ੍ਬਾਨਿ.
ਯਥਾ ਪਨ ਪੁਰਿਮਨਯੇ ਸਕਦਾਗਾਮਿਮਗ੍ਗੇ ਠਤ੍ਵਾ ਤੀਣਿ ਨਿਸ੍ਸਕ੍ਕਾਨਿ, ਏਵਮਿਧ ਪਞ੍ਚ ਨੀਹਰਿਤਬ੍ਬਾਨਿ. ਸਕਦਾਗਾਮਿਮਗ੍ਗਸ੍ਸ ਹਿ ਵਿਪਸ੍ਸਨਿਨ੍ਦ੍ਰਿਯੇਹਿ ਮੁਦੁਤਰਾਨਿ ਸੋਤਾਪਤ੍ਤਿਮਗ੍ਗਸ੍ਸ ਵਿਪਸ੍ਸਨਿਨ੍ਦ੍ਰਿਯਾਨਿ, ਸੋਤਾਪਤ੍ਤਿਮਗ੍ਗਸ੍ਸ ਚ ਤੇਹਿ ਵਿਪਸ੍ਸਨਿਨ੍ਦ੍ਰਿਯੇਹਿ ਮੁਦੁਤਰਾਨਿ ਏਕਬੀਜਿਆਦੀਨਂ ਮਗ੍ਗਸ੍ਸ ਵਿਪਸ੍ਸਨਿਨ੍ਦ੍ਰਿਯਾਨਿ.
ਏਤ੍ਥ ਚ ਏਕਬੀਜੀਤਿਆਦੀਸੁ ਯੋ ਸੋਤਾਪਨ੍ਨੋ ਹੁਤ੍ਵਾ ਏਕਮੇਵ ਅਤ੍ਤਭਾਵਂ ਜਨੇਤ੍ਵਾ ਅਰਹਤ੍ਤਂ ਪਾਪੁਣਾਤਿ, ਅਯਂ ਏਕਬੀਜੀ ਨਾਮ. ਯਥਾਹ ‘‘ਕਤਮੋ ਚ ਪੁਗ੍ਗਲੋ ਏਕਬੀਜੀ, ਇਧੇਕਚ੍ਚੋ ਪੁਗ੍ਗਲੋ ਤਿਣ੍ਣਂ ਸਂਯੋਜਨਾਨਂ ਪਰਿਕ੍ਖਯਾ ਸੋਤਾਪਨ੍ਨੋ ਹੋਤਿ ਅਵਿਨਿਪਾਤਧਮ੍ਮੋ ਨਿਯਤੋ ਸਮ੍ਬੋਧਿਪਰਾਯਣੋ, ਸੋ ਏਕਞ੍ਞੇਵ ਮਾਨੁਸਕਂ ਭਵਂ ਸਨ੍ਧਾਵਿਤ੍ਵਾ ਸਂਸਰਿਤ੍ਵਾ ਦੁਕ੍ਖਸ੍ਸਨ੍ਤਂ ਕਰੋਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਏਕਬੀਜੀ’’ਤਿ (ਪੁ. ਪ. ੩੩).
ਯੋ ਪਨ ਦ੍ਵੇ ਤਯੋ ਭਵੇ ਸਂਸਰਿਤ੍ਵਾ ਦੁਕ੍ਖਸ੍ਸਨ੍ਤਂ ਕਰੋਤਿ, ਅਯਂ ਕੋਲਂਕੋਲੋ ਨਾਮ. ਯਥਾਹ ‘‘ਕਤਮੋ ਚ ਪੁਗ੍ਗਲੋ ਕੋਲਂਕੋਲੋ. ਇਧੇਕਚ੍ਚੋ ਪੁਗ੍ਗਲੋ ਤਿਣ੍ਣਂ ਸਂਯੋਜਨਾਨਂ ਪਰਿਕ੍ਖਯਾ ਸੋਤਾਪਨ੍ਨੋ ਹੋਤਿ ਅਵਿਨਿਪਾਤਧਮ੍ਮੋ ਨਿਯਤੋ ਸਮ੍ਬੋਧਿਪਰਾਯਣੋ, ਸੋ ਦ੍ਵੇ ਵਾ ਤੀਣਿ ਵਾ ਕੁਲਾਨਿ ਸਨ੍ਧਾਵਿਤ੍ਵਾ ਸਂਸਰਿਤ੍ਵਾ ਦੁਕ੍ਖਸ੍ਸਨ੍ਤਂ ਕਰੋਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਕੋਲਂਕੋਲੋ’’ਤਿ (ਪੁ. ਪ. ੩੨). ਤਤ੍ਥ ਕੁਲਾਨੀਤਿ ਭਵਾ ਵੇਦਿਤਬ੍ਬਾ. ‘‘ਦ੍ਵੇ ਵਾ ਤੀਣਿ ਵਾ’’ਤਿ ਇਦਂ ਦੇਸਨਾਮਤ੍ਤਮੇਵ, ਯਾਵ ਛਟ੍ਠਭਵਾ ਸਂਸਰਨ੍ਤੋ ਪਨ ਕੋਲਂਕੋਲੋਵ ਹੋਤਿ.
ਯਸ੍ਸ ਸਤ੍ਤਕ੍ਖਤ੍ਤੁਂ ਪਰਮਾ ਉਪਪਤ੍ਤਿ, ਅਟ੍ਠਮਂ ਭਵਂ ਨਾਦਿਯਤਿ, ਅਯਂ ਸਤ੍ਤਕ੍ਖਤ੍ਤੁਪਰਮੋ ਨਾਮ. ਯਥਾਹ ‘‘ਕਤਮੋ ਚ ਪੁਗ੍ਗਲੋ ਸਤ੍ਤਕ੍ਖਤ੍ਤੁਪਰਮੋ. ਇਧੇਕਚ੍ਚੋ ਪੁਗ੍ਗਲੋ ਤਿਣ੍ਣਂ ਸਂਯੋਜਨਾਨਂ ਪਰਿਕ੍ਖਯਾ ਸੋਤਾਪਨ੍ਨੋ ਹੋਤਿ ਅਵਿਨਿਪਾਤਧਮ੍ਮੋ ਨਿਯਤੋ ਸਮ੍ਬੋਧਿਪਰਾਯਣੋ, ਸੋ ਸਤ੍ਤਕ੍ਖਤ੍ਤੁਂ ਦੇਵੇ ਚ ਮਨੁਸ੍ਸੇ ਚ ਸਨ੍ਧਾਵਿਤ੍ਵਾ ਸਂਸਰਿਤ੍ਵਾ ਦੁਕ੍ਖਸ੍ਸਨ੍ਤਂ ਕਰੋਤਿ, ਅਯਂ ਵੁਚ੍ਚਤਿ ਪੁਗ੍ਗਲੋ ਸਤ੍ਤਕ੍ਖਤ੍ਤੁਪਰਮੋ’’ਤਿ (ਪੁ. ਪ. ੩੧).
ਭਗਵਤਾ ਗਹਿਤਨਾਮਵਸੇਨੇਵ ਚੇਤਾਨਿ ਤੇਸਂ ਨਾਮਾਨਿ. ‘‘ਏਤ੍ਤਕਞ੍ਹਿ ਠਾਨਂ ਗਤੋ ਏਕਬੀਜੀ ਨਾਮ ਹੋਤਿ, ਏਤ੍ਤਕਂ ਕੋਲਂਕੋਲੋ, ਏਤ੍ਤਕਂ ਸਤ੍ਤਕ੍ਖਤ੍ਤੁਪਰਮੋ’’ਤਿ ਭਗਵਤਾ ਏਤੇਸਂ ਨਾਮਂ ਗਹਿਤਂ. ਨਿਯਮਤੋ ਪਨ ‘‘ਅਯਂ ਏਕਬੀਜੀ, ਅਯਂ ਕੋਲਂਕੋਲੋ, ਅਯਂ ਸਤ੍ਤਕ੍ਖਤ੍ਤੁਪਰਮੋ’’ਤਿ ਨਤ੍ਥਿ.
ਕੋ ਪਨ ਨੇਸਂ ਏਤਂ ਪਭੇਦਂ ਨਿਯਮੇਤੀਤਿ? ਕੇਚਿ ਪਨ ਥੇਰਾ ‘‘ਪੁਬ੍ਬਹੇਤੁ ਨਿਯਮੇਤੀ’’ਤਿ ਵਦਨ੍ਤਿ, ਕੇਚਿ ‘‘ਪਠਮਮਗ੍ਗੋ’’, ਕੇਚਿ ‘‘ਉਪਰਿਮ ਤਯੋ ਮਗ੍ਗਾ’’, ਕੇਚਿ ‘‘ਤਿਣ੍ਣਂ ਮਗ੍ਗਾਨਂ ਵਿਪਸ੍ਸਨਾ’’ਤਿ. ਤਤ੍ਥ ‘‘ਪੁਬ੍ਬਹੇਤੁ ਨਿਯਮੇਤੀ’’ਤਿ ਵਾਦੇ ਪਠਮਮਗ੍ਗਸ੍ਸ ਉਪਨਿਸ੍ਸਯੋ ਕਤੋ ਨਾਮ ਹੋਤਿ, ਉਪਰਿ ਤਯੋ ਮਗ੍ਗਾ ਅਨੁਪਨਿਸ੍ਸਯਾ ਉਪ੍ਪਨ੍ਨਾਤਿ ਵਚਨਂ ਆਪਜ੍ਜਤਿ. ‘‘ਪਠਮਮਗ੍ਗੋ ਨਿਯਮੇਤੀ’’ਤਿ ਵਾਦੇ ਉਪਰਿ ਤਿਣ੍ਣਂ ਮਗ੍ਗਾਨਂ ਨਿਰਤ੍ਥਕਤਾ ਆਪਜ੍ਜਤਿ. ‘‘ਉਪਰਿ ਤਯੋ ਮਗ੍ਗਾ ਨਿਯਮੇਨ੍ਤੀ’’ਤਿ ਵਾਦੇ ਪਠਮਮਗ੍ਗੇ ਅਨੁਪ੍ਪਨ੍ਨੇਵ ਉਪਰਿ ਤਯੋ ਮਗ੍ਗਾ ਉਪ੍ਪਨ੍ਨਾਤਿ ਆਪਜ੍ਜਤਿ. ‘‘ਤਿਣ੍ਣਂ ਮਗ੍ਗਾਨਂ ਵਿਪਸ੍ਸਨਾ ਨਿਯਮੇਤੀ’’ਤਿ ਵਾਦੋ ਪਨ ਯੁਜ੍ਜਤਿ. ਸਚੇ ਹਿ ਉਪਰਿ ਤਿਣ੍ਣਂ ਮਗ੍ਗਾਨਂ ਵਿਪਸ੍ਸਨਾ ਬਲਵਤੀ ਹੋਤਿ, ਏਕਬੀਜੀ ਨਾਮ ਹੋਤਿ, ਤਤੋ ਮਨ੍ਦਤਰਾਯ ਕੋਲਂਕੋਲੋ, ਤਤੋ ਮਨ੍ਦਤਰਾਯ ਸਤ੍ਤਕ੍ਖਤ੍ਤੁਪਰਮੋਤਿ.
ਏਕਚ੍ਚੋ ਹਿ ਸੋਤਾਪਨ੍ਨੋ ਵਟ੍ਟਜ੍ਝਾਸਯੋ ਹੋਤਿ ਵਟ੍ਟਾਭਿਰਤੋ ਪੁਨਪ੍ਪੁਨਂ ਵਟ੍ਟਸ੍ਮਿਂਯੇਵ ਵਿਚਰਤਿ ਸਨ੍ਦਿਸ੍ਸਤਿ. ਅਨਾਥਪਿਣ੍ਡਿਕੋ ਸੇਟ੍ਠਿ, ਵਿਸਾਖਾ ਉਪਾਸਿਕਾ, ਚੂਲ਼ਰਥਮਹਾਰਥਾ ਦੇਵਪੁਤ੍ਤਾ, ਅਨੇਕਵਣ੍ਣੋ ਦੇਵਪੁਤ੍ਤੋ, ਸਕ੍ਕੋ ਦੇਵਰਾਜਾ, ਨਾਗਦਤ੍ਤੋ ਦੇਵਪੁਤ੍ਤੋਤਿ ਇਮੇ ਹਿ ਏਤ੍ਤਕਾ ਜਨਾ ਵਟ੍ਟਜ੍ਝਾਸਯਾ ਵਟ੍ਟਾਭਿਰਤਾ ਆਦਿਤੋ ਪਟ੍ਠਾਯ ਛ ਦੇਵਲੋਕੇ ਸੋਧੇਤ੍ਵਾ ਅਕਨਿਟ੍ਠੇ ਠਤ੍ਵਾ ਪਰਿਨਿਬ੍ਬਾਯਿਸ੍ਸਨ੍ਤਿ, ਇਮੇ ਇਧ ਨ ਗਹਿਤਾ. ਨ ਕੇਵਲਞ੍ਚਿਮੇ, ਯੋਪਿ ਮਨੁਸ੍ਸੇਸੁਯੇਵ ਸਤ੍ਤਕ੍ਖਤ੍ਤੁਂ ਸਂਸਰਿਤ੍ਵਾ ਅਰਹਤ੍ਤਂ ਪਾਪੁਣਾਤਿ, ਯੋਪਿ ਦੇਵਲੋਕੇ ਨਿਬ੍ਬਤ੍ਤੋ ਦੇਵੇਸੁਯੇਵ ਸਤ੍ਤਕ੍ਖਤ੍ਤੁਂ ਅਪਰਾਪਰਂ ਸਂਸਰਿਤ੍ਵਾ ਅਰਹਤ੍ਤਂ ਪਾਪੁਣਾਤਿ, ਇਮੇਪਿ ਇਧ ਨ ਗਹਿਤਾ. ਕਾਲੇਨ ਦੇਵੇ, ਕਾਲੇਨ ਮਨੁਸ੍ਸੇ ਸਂਸਰਿਤ੍ਵਾ ਪਨ ਅਰਹਤ੍ਤਂ ਪਾਪੁਣਨ੍ਤੋਵ ਇਧ ਗਹਿਤੋ. ਤਸ੍ਮਾ ਸਤ੍ਤਕ੍ਖਤ੍ਤੁਪਰਮੋਤਿ ਇਦਂ ਇਧਟ੍ਠਕਵੋਕਿਣ੍ਣਸੁਕ੍ਖਵਿਪਸ੍ਸਕਸ੍ਸ ਨਾਮਂ ਕਥਿਤਨ੍ਤਿ ਵੇਦਿਤਬ੍ਬਂ.
ਧਮ੍ਮਾਨੁਸਾਰੀ ਸਦ੍ਧਾਨੁਸਾਰੀਤਿ ਏਤ੍ਥ ਪਨ ਇਮਸ੍ਮਿਂ ਸਾਸਨੇ ਲੋਕੁਤ੍ਤਰਧਮ੍ਮਂ ਨਿਬ੍ਬਤ੍ਤੇਨ੍ਤਸ੍ਸ ਦ੍ਵੇ ਧੁਰਾਨਿ, ਦ੍ਵੇ ਸੀਸਾਨਿ, ਦ੍ਵੇ ਅਭਿਨਿਵੇਸਾ – ਸਦ੍ਧਾਧੁਰਂ, ਪਞ੍ਞਾਧੁਰਂ, ਸਦ੍ਧਾਸੀਸਂ, ਪਞ੍ਞਾਸੀਸਂ, ਸਦ੍ਧਾਭਿਨਿਵੇਸੋ, ਪਞ੍ਞਾਭਿਨਿਵੇਸੋਤਿ. ਤਤ੍ਥ ਯੋ ਭਿਕ੍ਖੁ ‘‘ਸਚੇ ਸਦ੍ਧਾਯ ਸਕ੍ਕਾ ਨਿਬ੍ਬਤ੍ਤੇਤੁਂ, ਨਿਬ੍ਬਤ੍ਤੇਸ੍ਸਾਮਿ ਲੋਕੁਤ੍ਤਰਮਗ੍ਗ’’ਨ੍ਤਿ ਸਦ੍ਧਂ ਧੁਰਂ ਕਤ੍ਵਾ ਸੋਤਾਪਤ੍ਤਿਮਗ੍ਗਂ ਨਿਬ੍ਬਤ੍ਤੇਤਿ, ਸੋ ਮਗ੍ਗਕ੍ਖਣੇ ਸਦ੍ਧਾਨੁਸਾਰੀ ਨਾਮ ਹੋਤਿ. ਫਲਕ੍ਖਣੇ ਪਨ ਸਦ੍ਧਾਵਿਮੁਤ੍ਤੋ ਨਾਮ ਹੁਤ੍ਵਾ ਏਕਬੀਜੀ ਕੋਲਂਕੋਲੋ ਸਤ੍ਤਕ੍ਖਤ੍ਤੁਪਰਮੋਤਿ ਤਿਵਿਧੋ ਹੋਤਿ. ਤਤ੍ਥ ਏਕੇਕੋ ਦੁਕ੍ਖਾਪਟਿਪਦਾਦਿਵਸੇਨ ਚਤੁਬ੍ਬਿਧਭਾਵਂ ਆਪਜ੍ਜਤੀਤਿ ਸਦ੍ਧਾਧੁਰੇਨ ਦ੍ਵਾਦਸ ਜਨਾ ਹੋਨ੍ਤਿ.
ਯੋ ਪਨ ‘‘ਸਚੇ ਪਞ੍ਞਾਯ ਸਕ੍ਕਾ ਨਿਬ੍ਬਤ੍ਤੇਤੁਂ, ਨਿਬ੍ਬਤ੍ਤੇਸ੍ਸਾਮਿ ਲੋਕੁਤ੍ਤਰਮਗ੍ਗ’’ਨ੍ਤਿ ਪਞ੍ਞਂ ਧੁਰਂ ਕਤ੍ਵਾ ਸੋਤਾਪਤ੍ਤਿਮਗ੍ਗਂ ਨਿਬ੍ਬਤ੍ਤੇਤਿ, ਸੋ ਮਗ੍ਗਕ੍ਖਣੇ ਧਮ੍ਮਾਨੁਸਾਰੀ ਨਾਮ ਹੋਤਿ. ਫਲਕ੍ਖਣੇ ਪਨ ਪਞ੍ਞਾਵਿਮੁਤ੍ਤੋ ਨਾਮ ਹੁਤ੍ਵਾ ਏਕਬੀਜਿਆਦਿਭੇਦੇਨ ਦ੍ਵਾਦਸਭੇਦੋਵ ਹੋਤਿ. ਏਵਂ ਦ੍ਵੇ ਮਗ੍ਗਟ੍ਠਾ ਫਲਕ੍ਖਣੇ ਚਤੁਵੀਸਤਿ ਸੋਤਾਪਨ੍ਨਾ ਹੋਨ੍ਤੀਤਿ.
ਤਿਪਿਟਕਤਿਸ੍ਸਤ੍ਥੇਰੋ ਕਿਰ ‘‘ਤੀਣਿ ਪਿਟਕਾਨਿ ਸੋਧੇਸ੍ਸਾਮੀ’’ਤਿ ਪਰਤੀਰਂ ਗਤੋ. ਤਂ ਏਕੋ ਕੁਟੁਮ੍ਬਿਕੋ ਚਤੂਹਿ ਪਚ੍ਚਯੇਹਿ ਉਪਟ੍ਠਾਸਿ, ਥੇਰੋ ਆਗਮਨਕਾਲੇ ‘‘ਗਚ੍ਛਾਮਿ ਉਪਾਸਕਾ’’ਤਿ ਆਹ. ‘‘ਕਹਂ ਭਨ੍ਤੇ’’ਤਿ? ‘‘ਅਮ੍ਹਾਕਂ ਆਚਰਿਯੁਪਜ੍ਝਾਯਾਨਂ ਸਨ੍ਤਿਕ’’ਨ੍ਤਿ. ‘‘ਨ ਸਕ੍ਕਾ, ਭਨ੍ਤੇ, ਮਯਾ ਗਨ੍ਤੁਂ, ਭਦ੍ਦਨ੍ਤਂ ਪਨ ਨਿਸ੍ਸਾਯ ਮਯਾ ਸਾਸਨਸ੍ਸ ਗੁਣੋ ਞਾਤੋ, ਤੁਮ੍ਹਾਕਂ ਪਰਮ੍ਮੁਖਾ ਕੀਦਿਸਂ ਭਿਕ੍ਖੁਂ ਉਪਸਙ੍ਕਮਾਮੀ’’ਤਿ? ਅਥ ਨਂ ਥੇਰੋ ਆਹ – ‘‘ਯੋ ਭਿਕ੍ਖੁ ਚਤੁਵੀਸਤਿ ਸੋਤਾਪਨ੍ਨੇ ਦ੍ਵਾਦਸ ਸਕਦਾਗਾਮੀ ਅਟ੍ਠਚਤ੍ਤਾਲੀਸ ਅਨਾਗਾਮੀ ਦ੍ਵਾਦਸ ਅਰਹਨ੍ਤੇ ਦਸ੍ਸੇਤ੍ਵਾ ਧਮ੍ਮਕਥਂ ਕਥੇਤੁਂ ਸਕ੍ਕੋਤਿ, ਏਵਰੂਪਂ ਭਿਕ੍ਖੁਂ ਉਪਟ੍ਠਾਤੁਂ ਵਟ੍ਟਤੀ’’ਤਿ. ਇਮਸ੍ਮਿਂ ਸੁਤ੍ਤੇ ਵਿਪਸ੍ਸਨਾ ਕਥਿਤਾਤਿ.
੫-੧੦. ਸੁਦ੍ਧਕਸੁਤ੍ਤਾਦਿਵਣ੍ਣਨਾ
੪੯੫-੫੦੦. ਪਞ੍ਚਮੇ ਚਕ੍ਖੁ ਚ ਤਂ ਚਕ੍ਖੁਦ੍ਵਾਰੇ ਨਿਬ੍ਬਤ੍ਤਾਨਂ ਧਮ੍ਮਾਨਂ ਆਧਿਪਤੇਯ੍ਯਸਙ੍ਖਾਤੇਨ ਇਨ੍ਦਟ੍ਠੇਨ ਇਨ੍ਦ੍ਰਿਯਞ੍ਚਾਤਿ ਚਕ੍ਖੁਨ੍ਦ੍ਰਿਯਂ. ਸੋਤਿਨ੍ਦ੍ਰਿਯਾਦੀਸੁਪਿ ਏਸੇਵ ਨਯੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵ. ਇਮਸ੍ਮਿਂ ਵਗ੍ਗੇ ਪਠਮਸੁਤ੍ਤਞ੍ਚੇਵ ਛਟ੍ਠਾਦੀਨਿ ਚ ਪਞ੍ਚਾਤਿ ਛ ਸੁਤ੍ਤਾਨਿ ਚਤੁਸਚ੍ਚਵਸੇਨ ਕਥਿਤਾਨੀਤਿ.
ਛਲ਼ਿਨ੍ਦ੍ਰਿਯਵਗ੍ਗੋ ਤਤਿਯੋ.
੪. ਸੁਖਿਨ੍ਦ੍ਰਿਯਵਗ੍ਗੋ
੧-੫. ਸੁਦ੍ਧਿਕਸੁਤ੍ਤਾਦਿਵਣ੍ਣਨਾ
੫੦੧-੫੦੫. ਚਤੁਤ੍ਥਵਗ੍ਗਸ੍ਸ ਪਠਮੇ ਸੁਖਞ੍ਚ ਤਂ ਸਹਜਾਤਾਨਂ ਆਧਿਪਤੇਯ੍ਯਸਙ੍ਖਾਤੇਨ ਇਨ੍ਦਟ੍ਠੇਨ ਇਨ੍ਦ੍ਰਿਯਞ੍ਚਾਤਿ ਸੁਖਿਨ੍ਦ੍ਰਿਯਂ. ਦੁਕ੍ਖਿਨ੍ਦ੍ਰਿਯਾਦੀਸੁਪਿ ਏਸੇਵ ਨਯੋ. ਏਤ੍ਥ ਚ ਸੁਖਿਨ੍ਦ੍ਰਿਯਦੁਕ੍ਖਿਨ੍ਦ੍ਰਿਯਦੋਮਨਸ੍ਸਿਨ੍ਦ੍ਰਿਯਾਨਿ ਕਾਮਾਵਚਰਾਨੇਵ, ਸੋਮਨਸ੍ਸਿਨ੍ਦ੍ਰਿਯਂ ਠਪੇਤ੍ਵਾ ਅਰੂਪਾਵਚਰਂ ਸੇਸਂ ਤੇਭੂਮਕਂ, ਉਪੇਕ੍ਖਿਨ੍ਦ੍ਰਿਯਂ ਚਤੁਭੂਮਕਂ. ਦੁਤਿਯਾਦੀਨਿ ਚਤ੍ਤਾਰਿ ਚਤੁਸਚ੍ਚਵਸੇਨੇਵ ਕਥਿਤਾਨਿ.
੬. ਪਠਮਵਿਭਙ੍ਗਸੁਤ੍ਤਵਣ੍ਣਨਾ
੫੦੬. ਛਟ੍ਠੇ ਕਾਯਿਕਨ੍ਤਿ ਕਾਯਪਸਾਦਵਤ੍ਥੁਕਂ. ਸੁਖਨ੍ਤਿ ਅਯਮਸ੍ਸ ਸਰੂਪਨਿਦ੍ਦੇਸੋ. ਸਾਤਨ੍ਤਿ ਤਸ੍ਸੇਵ ਵੇਵਚਨਂ, ਮਧੁਰਨ੍ਤਿ ਵੁਤ੍ਤਂ ਹੋਤਿ. ਕਾਯਸਮ੍ਫਸ੍ਸਜਨ੍ਤਿ ਕਾਯਸਮ੍ਫਸ੍ਸਤੋ ਜਾਤਂ. ਸੁਖਂ ਸਾਤਨ੍ਤਿ ਵੁਤ੍ਤਨਯਮੇਵ. ਵੇਦਯਿਤਨ੍ਤਿ ਅਯਮਸ੍ਸ ਸਬ੍ਬਵੇਦਨਾਸਾਧਾਰਣੋ ਅਞ੍ਞਧਮ੍ਮਵਿਸਿਟ੍ਠੋ ਸਭਾਵਨਿਦ੍ਦੇਸੋ. ਇਮਿਨਾ ਨਯੇਨ ਸੇਸੇਸੁਪਿ ਅਤ੍ਥੋ ਵੇਦਿਤਬ੍ਬੋ. ਕਾਯਿਕਂ ਵਾ ਚੇਤਸਿਕਂ ਵਾਤਿ ਏਤ੍ਥ ਪਨ ਚਕ੍ਖਾਦਯੋ ਚਤ੍ਤਾਰੋ ਪਸਾਦਕਾਯੇ ਵਤ੍ਥੁਂ ਕਤ੍ਵਾ ਉਪ੍ਪਤ੍ਤਿਵਸੇਨ ਕਾਯਿਕਨ੍ਤਿ ਵੁਤ੍ਤਂ. ਕਾਯਪਸਾਦਵਤ੍ਥੁਕਂ ਪਨ ਅਦੁਕ੍ਖਮਸੁਖਂ ਨਾਮ ਨਤ੍ਥਿ.
੯. ਕਟ੍ਠੋਪਮਸੁਤ੍ਤਵਣ੍ਣਨਾ
੫੦੯. ਨਵਮੇ ਦ੍ਵਿਨ੍ਨਂ ਕਟ੍ਠਾਨਨ੍ਤਿ ਦ੍ਵਿਨ੍ਨਂ ਅਰਣੀਨਂ. ਸਙ੍ਘਟ੍ਟਨਸਮੋਧਾਨਾਤਿ ਸਙ੍ਘਟ੍ਟਨੇਨ ਚੇਵ ਸਮੋਧਾਨੇਨ ਚ. ਉਸ੍ਮਾਤਿ ਉਸੁਮਾਕਾਰੋ. ਤੇਜੋਤਿ ਅਗ੍ਗਿਧੂਮੋ. ਏਤ੍ਥ ਚ ਅਧਰਾਰਣੀ ਵਿਯ ਵਤ੍ਥਾਰਮ੍ਮਣਂ, ਉਤ੍ਤਰਾਰਣੀ ਵਿਯ ਫਸ੍ਸੋ, ਸਙ੍ਘਟ੍ਟੋ ਵਿਯ ਫਸ੍ਸਸਙ੍ਘਟ੍ਟਨਂ, ਅਗ੍ਗਿ ਵਿਯ ਵੇਦਨਾ ਦਟ੍ਠਬ੍ਬਾ. ਵਤ੍ਥਾਰਮ੍ਮਣਂ ਵਾ ਉਤ੍ਤਰਾਰਣੀ ਵਿਯ, ਫਸ੍ਸੋ ਅਧਰਾਰਣੀ ਵਿਯ ਦਟ੍ਠਬ੍ਬੋ.
੧੦. ਉਪ੍ਪਟਿਪਾਟਿਕਸੁਤ੍ਤਵਣ੍ਣਨਾ
੫੧੦. ਦਸਮਂ ਯਥਾਧਮ੍ਮਰਸੇਨ ਪਟਿਪਾਟਿਯਾ ਵੁਤ੍ਤਮ੍ਪਿ ਇਮਸ੍ਮਿਂ ਇਨ੍ਦ੍ਰਿਯਵਿਭਙ੍ਗੇ ਸੇਸਸੁਤ੍ਤਾਨਿ ਵਿਯ ਅਦੇਸਿਤਤ੍ਤਾ ਉਪ੍ਪਟਿਪਾਟਿਕਸੁਤ੍ਤਂ ਨਾਮਾਤਿ ਵੇਦਿਤਬ੍ਬਂ. ਤਤ੍ਥ ਨਿਮਿਤ੍ਤਨ੍ਤਿਆਦੀਨਿ ਸਬ੍ਬਾਨਿ ਪਚ੍ਚਯਵੇਵਚਨਾਨੇਵ. ਦੁਕ੍ਖਿਨ੍ਦ੍ਰਿਯਞ੍ਚ ਪਜਾਨਾਤੀਤਿ ਦੁਕ੍ਖਸਚ੍ਚਵਸੇਨੇਵ ਪਜਾਨਾਤਿ. ਦੁਕ੍ਖਿਨ੍ਦ੍ਰਿਯਸਮੁਦਯਨ੍ਤਿ ਕਣ੍ਟਕੇਨ ਵਾ ਵਿਦ੍ਧਸ੍ਸ ਮਙ੍ਕੁਲੇਨ ਵਾ ਦਟ੍ਠਸ੍ਸ ਪਚ੍ਚਤ੍ਥਰਣੇ ਵਾ ਵਲਿਯਾ ਫੁਟ੍ਠਸ੍ਸ ਦੁਕ੍ਖਸਹਗਤਂ ਕਾਯਵਿਞ੍ਞਾਣਂ ਉਪ੍ਪਜ੍ਜਤਿ, ਤਂ ਏਤਸ੍ਸ ਸਮੁਦਯੋਤਿ ਪਜਾਨਾਤਿ.
ਪਰਤੋ ਦੋਮਨਸ੍ਸਿਨ੍ਦ੍ਰਿਯਸਮੁਦਯਨ੍ਤਿਆਦੀਸੁਪਿ ਤੇਸਂ ਤੇਸਂ ਕਾਰਣਵਸੇਨੇਵ ਸਮੁਦਯੋ ਵੇਦਿਤਬ੍ਬੋ. ਪਤ੍ਤਚੀਵਰਾਦੀਨਂ ਵਾ ਹਿ ਸਙ੍ਖਾਰਾਨਂ ਸਦ੍ਧਿਵਿਹਾਰਿਕਾਦੀਨਂ ਵਾ ਸਤ੍ਤਾਨਂ ਵਿਨਾਸੇਨ ਦੋਮਨਸ੍ਸਿਨ੍ਦ੍ਰਿਯਂ ਉਪ੍ਪਜ੍ਜਤੀਤਿ ਤੇਸਂ ਵਿਨਾਸਂ ਤਸ੍ਸ ਸਮੁਦਯੋਤਿ ਪਜਾਨਾਤਿ. ਸੁਭੋਜਨਂ ਭੁਞ੍ਜਿਤ੍ਵਾ ਵਰਸਯਨੇ ਨਿਪਨ੍ਨਸ੍ਸ ਹਤ੍ਥਪਾਦਸਮ੍ਬਾਹਨਤਾਲਵਣ੍ਟਵਾਤਾਦਿਸਮ੍ਫਸ੍ਸੇਨ ਸੁਖਿਨ੍ਦ੍ਰਿਯਂ ਉਪ੍ਪਜ੍ਜਤਿ, ਤਂ ਫਸ੍ਸਂ ਤਸ੍ਸ ਸਮੁਦਯੋਤਿ ਪਜਾਨਾਤਿ. ਵੁਤ੍ਤਪ੍ਪਕਾਰਾਨਂ ਪਨ ਸਤ੍ਤਸਙ੍ਖਾਰਾਨਂ ਮਨਾਪਾਨਂ ਪਟਿਲਾਭਵਸੇਨ ਸੋਮਨਸ੍ਸਿਨ੍ਦ੍ਰਿਯਂ ਉਪ੍ਪਜ੍ਜਤਿ, ਤਂ ਪਟਿਲਾਭਂ ਤਸ੍ਸ ਸਮੁਦਯੋਤਿ ਪਜਾਨਾਤਿ. ਮਜ੍ਝਤ੍ਤਾਕਾਰੇਨ ਪਨ ਉਪੇਕ੍ਖਿਨ੍ਦ੍ਰਿਯਂ ਉਪ੍ਪਜ੍ਜਤਿ, ਤਂ ਸਤ੍ਤਸਙ੍ਖਾਰੇਸੁ ਮਜ੍ਝਤ੍ਤਾਕਾਰਂ ਤਸ੍ਸ ਸਮੁਦਯੋਤਿ ਪਜਾਨਾਤਿ.
ਕਤ੍ਥ ਚੁਪ੍ਪਨ੍ਨਂ ਦੁਕ੍ਖਿਨ੍ਦ੍ਰਿਯਂ ਅਪਰਿਸੇਸਂ ਨਿਰੁਜ੍ਝਤਿ, ਇਧ, ਭਿਕ੍ਖਵੇ, ਭਿਕ੍ਖੁ ਵਿਵਿਚ੍ਚੇਵ ਕਾਮੇਹੀਤਿਆਦੀਸੁ ਪਨ ਅਯਂ ਏਕਤੋਵ ਵਿਨਿਚ੍ਛਯਕਥਾ – ਦੁਕ੍ਖਿਨ੍ਦ੍ਰਿਯਞ੍ਹਿ ਪਠਮਜ੍ਝਾਨਸ੍ਸ ਉਪਚਾਰਕ੍ਖਣੇਯੇਵ ਨਿਰੁਜ੍ਝਤਿ ਪਹੀਨਂ ਹੋਤਿ, ਦੋਮਨਸ੍ਸਾਦੀਨਿ ਦੁਤਿਯਜ੍ਝਾਨਾਦੀਨਂ. ਏਵਂ ਸਨ੍ਤੇਪਿ ਤੇਸਂ ਅਤਿਸਯਨਿਰੋਧਤ੍ਤਾ ਅਯਂ ਝਾਨੇਸੁਯੇਵ ਨਿਰੋਧੋ ਵੁਤ੍ਤੋ. ਅਤਿਸਯਨਿਰੋਧੋ ਹਿ ਤੇਸਂ ਪਠਮਜ੍ਝਾਨਾਦੀਸੁ, ਨ ਨਿਰੋਧੋਯੇਵ, ਨਿਰੋਧੋਯੇਵ ਪਨ ਉਪਚਾਰਕ੍ਖਣੇ, ਨਾਤਿਸਯਨਿਰੋਧੋ. ਤਥਾ ਹਿ ਨਾਨਾਵਜ੍ਜਨੇ ਪਠਮਜ੍ਝਾਨੁਪਚਾਰੇ ਨਿਰੁਦ੍ਧਸ੍ਸਾਪਿ ਦੁਕ੍ਖਿਨ੍ਦ੍ਰਿਯਸ੍ਸ ਡਂਸਮਕਸਾਦਿਸਮ੍ਫਸ੍ਸੇਨ ਵਾ ਵਿਸਮਾਸਨੁਪਤਾਪੇਨ ਵਾ ਸਿਯਾ ਉਪ੍ਪਤ੍ਤਿ, ਨ ਤ੍ਵੇਵ ਅਨ੍ਤੋਅਪ੍ਪਨਾਯਂ. ਉਪਚਾਰੇ ਵਾ ਨਿਰੁਦ੍ਧਮ੍ਪੇਤਂ ਨ ਸੁਟ੍ਠੁ ਨਿਰੁਦ੍ਧਂ ਹੋਤਿ ਪਟਿਪਕ੍ਖੇਨ ਅਵਿਹਤਤ੍ਤਾ. ਅਨ੍ਤੋਅਪ੍ਪਨਾਯਂ ਪਨ ਪੀਤਿਫਰਣੇਨ ਸਬ੍ਬੋ ਕਾਯੋ ਸੁਖੋਕ੍ਕਨ੍ਤੋ ਹੋਤਿ, ਸੁਖੋਕ੍ਕਨ੍ਤਕਾਯਸ੍ਸ ਚ ਸੁਟ੍ਠੁ ਨਿਰੁਦ੍ਧਂ ਹੋਤਿ ਦੁਕ੍ਖਿਨ੍ਦ੍ਰਿਯਂ ਪਟਿਪਕ੍ਖੇਨ ਵਿਹਤਤ੍ਤਾ. ਨਾਨਾਵਜ੍ਜਨੇਯੇਵ ਚ ਦੁਤਿਯਜ੍ਝਾਨੁਪਚਾਰੇ ਪਹੀਨਸ੍ਸ ਦੋਮਨਸ੍ਸਿਨ੍ਦ੍ਰਿਯਸ੍ਸ ਯਸ੍ਮਾ ਏਤਂ ਵਿਤਕ੍ਕਵਿਚਾਰਪਚ੍ਚਯੇਪਿ ਕਾਯਕਿਲਮਥੇ ਚਿਤ੍ਤੁਪਘਾਤੇ ਚ ਸਤਿ ਉਪ੍ਪਜ੍ਜਤਿ, ਵਿਤਕ੍ਕਵਿਚਾਰਾਭਾਵੇ ਨੇਵ ਉਪ੍ਪਜ੍ਜਤਿ. ਯਤ੍ਥ ਪਨ ਉਪ੍ਪਜ੍ਜਤਿ, ਤਤ੍ਥ ਵਿਤਕ੍ਕਵਿਚਾਰਭਾਵੇ, ਅਪ੍ਪਹੀਨਾ ਏਵ ਚ ਦੁਤਿਯਜ੍ਝਾਨੁਪਚਾਰੇ ਵਿਤਕ੍ਕਵਿਚਾਰਾਤਿ ਤਤ੍ਥਸ੍ਸ ਸਿਯਾ ਉਪ੍ਪਤ੍ਤਿ. ਨ ਤ੍ਵੇਵ ਦੁਤਿਯਜ੍ਝਾਨੇ ਪਹੀਨਪਚ੍ਚਯਤ੍ਤਾ. ਤਥਾ ਤਤਿਯਜ੍ਝਾਨੁਪਚਾਰੇ ਪਹੀਨਸ੍ਸਾਪਿ ਸੁਖਿਨ੍ਦ੍ਰਿਯਸ੍ਸ ਪੀਤਿਸਮੁਟ੍ਠਾਨਪਣੀਤਰੂਪਫੁਟ੍ਠਕਾਯਸ੍ਸ ਸਿਯਾ ਉਪ੍ਪਤ੍ਤਿ, ਨ ਤ੍ਵੇਵ ਤਤਿਯਜ੍ਝਾਨੇ. ਤਤਿਯਜ੍ਝਾਨੇ ਹਿ ਸੁਖਸ੍ਸ ਪਚ੍ਚਯਭੂਤਾ ਪੀਤਿ ਸਬ੍ਬਸੋ ਨਿਰੁਦ੍ਧਾ. ਤਥਾ ਚਤੁਤ੍ਥਜ੍ਝਾਨੁਪਚਾਰੇ ਪਹੀਨਸ੍ਸਾਪਿ ਸੋਮਨਸ੍ਸਿਨ੍ਦ੍ਰਿਯਸ੍ਸ ਆਸਨ੍ਨਤ੍ਤਾ ਅਪ੍ਪਨਾਪ੍ਪਤ੍ਤਾਯ ਉਪੇਕ੍ਖਾਯ ਅਭਾਵੇਨ ਸਮ੍ਮਾ ਅਨਤਿਕ੍ਕਨ੍ਤਤ੍ਤਾ ਚ ਸਿਯਾ ਉਪ੍ਪਤ੍ਤਿ, ਨ ਤ੍ਵੇਵ ਚਤੁਤ੍ਥਜ੍ਝਾਨੇ. ਤਸ੍ਮਾ ‘‘ਏਤ੍ਥ ਚੁਪ੍ਪਨ੍ਨਂ ਦੁਕ੍ਖਿਨ੍ਦ੍ਰਿਯਂ ਅਪਰਿਸੇਸਂ ਨਿਰੁਜ੍ਝਤੀ’’ਤਿ ਤਤ੍ਥ ਤਤ੍ਥ ਅਪਰਿਸੇਸਗ੍ਗਹਣਂ ਕਤਂ.
ਯਂ ਪਨੇਤ੍ਥ ਤਦਤ੍ਥਾਯ ਚਿਤ੍ਤਂ ਉਪਸਂਹਰਤੀਤਿ ਵੁਤ੍ਤਂ, ਤਤ੍ਥ ਅਲਾਭੀ ਸਮਾਨੋ ਉਪ੍ਪਾਦਨਤ੍ਥਾਯ ਚਿਤ੍ਤਂ ਉਪਸਂਹਰਤਿ, ਲਾਭੀ ਸਮਾਨੋ ਸਮਾਪਜ੍ਜਨਤ੍ਥਾਯਾਤਿ ਏਵਮਤ੍ਥੋ ਵੇਦਿਤਬ੍ਬੋ. ਇਮੇਸੁ ਦ੍ਵੀਸੁਪਿ ਸੁਤ੍ਤੇਸੁ ਸਮ੍ਮਸਨਵਾਰੋਵ ਕਥਿਤੋਤਿ.
ਸੁਖਿਨ੍ਦ੍ਰਿਯਵਗ੍ਗੋ ਚਤੁਤ੍ਥੋ.
੫. ਜਰਾਵਗ੍ਗੋ
੧. ਜਰਾਧਮ੍ਮਸੁਤ੍ਤਵਣ੍ਣਨਾ
੫੧੧. ਪਞ੍ਚਮਵਗ੍ਗਸ੍ਸ ਪਠਮੇ ਪਚ੍ਛਾਤਪੇਤਿ ਪਾਸਾਦਚ੍ਛਾਯਾਯ ਪੁਰਤ੍ਥਿਮਦਿਸਂ ਪਟਿਚ੍ਛਨ੍ਨਤ੍ਤਾ ਪਾਸਾਦਸ੍ਸ ਪਚ੍ਛਿਮਦਿਸਾਭਾਗੇ ਆਤਪੋ ਹੋਤਿ, ਤਸ੍ਮਿਂ ਠਾਨੇ ਪਞ੍ਞਤ੍ਤਵਰਬੁਦ੍ਧਾਸਨੇ ਨਿਸਿਨ੍ਨੋਤਿ ਅਤ੍ਥੋ. ਪਿਟ੍ਠਿਂ ਓਤਾਪਯਮਾਨੋਤਿ ਯਸ੍ਮਾ ਸਮ੍ਮਾਸਮ੍ਬੁਦ੍ਧਸ੍ਸਪਿ ਉਪਾਦਿਨ੍ਨਕਸਰੀਰੇ ਉਣ੍ਹਕਾਲੇ ਉਣ੍ਹਂ ਹੋਤਿ, ਸੀਤਕਾਲੇ ਸੀਤਂ, ਅਯਞ੍ਚ ਹਿਮਪਾਤਸੀਤਸਮਯੋ. ਤਸ੍ਮਾ ਮਹਾਚੀਵਰਂ ਓਤਾਰੇਤ੍ਵਾ ਸੂਰਿਯਰਸ੍ਮੀਹਿ ਪਿਟ੍ਠਿਂ ਓਤਾਪਯਮਾਨੋ ਨਿਸੀਦਿ.
ਕਿਂ ਪਨ ਬੁਦ੍ਧਰਸ੍ਮਿਯੋ ਮਦ੍ਦਿਤ੍ਵਾ ਸੂਰਿਯਰਸ੍ਮਿ ਅਨ੍ਤੋ ਪਵਿਸਿਤੁਂ ਸਕ੍ਕੋਤੀਤਿ? ਨ ਸਕ੍ਕੋਤਿ. ਏਵਂ ਸਨ੍ਤੇ ਕਿਂ ਤਾਪੇਤੀਤਿ? ਰਸ੍ਮਿਤੇਜਂ. ਯਥੇਵ ਹਿ ਠਿਤਮਜ੍ਝਨ੍ਹਿਕੇ ਪਰਿਮਣ੍ਡਲਾਯ ਛਾਯਾਯ ਰੁਕ੍ਖਮੂਲੇ ਨਿਸਿਨ੍ਨਸ੍ਸ ਕਿਞ੍ਚਾਪਿ ਸੂਰਿਯਰਸ੍ਮਿਯੋ ਸਰੀਰਂ ਨ ਫੁਸਨ੍ਤਿ, ਸਬ੍ਬਦਿਸਾਸੁ ਪਨ ਤੇਜੋ ਫਰਤਿ, ਅਗ੍ਗਿਜਾਲਾਹਿ ਪਰਿਕ੍ਖਿਤ੍ਤੋ ਵਿਯ ਹੋਤਿ, ਏਵਂ ਸੂਰਿਯਰਸ੍ਮੀਸੁ ਬੁਦ੍ਧਰਸ੍ਮਿਯੋ ਮਦ੍ਦਿਤ੍ਵਾ ਅਨ੍ਤੋ ਪਵਿਸਿਤੁਂ ਅਸਕ੍ਕੁਣਨ੍ਤੀਸੁਪਿ ਸਤ੍ਥਾ ਤੇਜਂ ਤਾਪੇਨ੍ਤੋ ਨਿਸਿਨ੍ਨੋਤਿ ਵੇਦਿਤਬ੍ਬੋ.
ਅਨੋਮਜ੍ਜਨ੍ਤੋਤਿ ਪਿਟ੍ਠਿਪਰਿਕਮ੍ਮਕਰਣਵਸੇਨ ਅਨੁਮਜ੍ਜਨ੍ਤੋ. ਅਚ੍ਛਰਿਯਂ ਭਨ੍ਤੇਤਿ ਥੇਰੋ ਭਗਵਤੋ ਪਿਟ੍ਠਿਤੋ ਮਹਾਚੀਵਰਂ ਓਤਾਰੇਤ੍ਵਾ ਨਿਸਿਨ੍ਨਸ੍ਸ ਦ੍ਵਿਨ੍ਨਂ ਅਂਸਕੂਟਾਨਂ ਅਨ੍ਤਰੇ ਸੁਵਣ੍ਣਾਵਟ੍ਟਂ ਵਿਯ ਕੇਸਗ੍ਗਪ੍ਪਮਾਣਂ ਵਲਿਯਾਵਟ੍ਟਂ ਦਿਸ੍ਵਾ – ‘‘ਏਵਰੂਪੇਪਿ ਨਾਮ ਸਰੀਰੇ ਜਰਾ ਪਞ੍ਞਾਯਤੀ’’ਤਿ ਸਞ੍ਜਾਤਸਂਵੇਗੋ ਜਰਂ ਗਰਹਨ੍ਤੋ ਏਵਮਾਹ. ਗਰਹਨਚ੍ਛਰਿਯਂ ਨਾਮ ਕਿਰੇਤਂ.
ਨ ਚੇਵਂ ਦਾਨਿ, ਭਨ੍ਤੇ, ਭਗਵਤੋ ਤਾਵ ਪਰਿਸੁਦ੍ਧੋਤਿ ਯਥਾ ਪਕਤਿਯਾ ਛਵਿਵਣ੍ਣੋ ਪਰਿਸੁਦ੍ਧੋ, ਨ ਏਵਮੇਤਰਹੀਤਿ ਦੀਪੇਨ੍ਤੋ ਏਵਮਾਹ. ਤਥਾਗਤਸ੍ਸ ਹਿ ਦਹਰਕਾਲੇ ਸਙ੍ਕੁਸਤਸਮਬ੍ਭਾਹਤਂ ਉਸਭਚਮ੍ਮਂ ਵਿਯ ਵਿਹਤਵਲਿਕੋ ਕਾਯੋ ਹੋਤਿ, ਤਸ੍ਮਿਂ ਠਪਿਤੋ ਹਤ੍ਥੋ ਭਸ੍ਸਤੇਵ, ਨ ਸਨ੍ਤਿਟ੍ਠਤਿ, ਤੇਲਪੁਞ੍ਛਨਾਕਾਰਪ੍ਪਤ੍ਤੋ ਵਿਯ ਹੋਤਿ. ਮਹਲ੍ਲਕਕਾਲੇ ਪਨ ਸਿਰਾਜਾਲਾ ਮਿਲਾਯਨ੍ਤਿ, ਸਨ੍ਧਿਪਬ੍ਬਾਨਿ ਸਿਥਿਲਾਨਿ ਹੋਨ੍ਤਿ, ਮਂਸਂ ਅਟ੍ਠਿਤੋ ਮੁਚ੍ਚਿਤ੍ਵਾ ਸਿਥਿਲਭਾਵਂ ਆਪਜ੍ਜਿਤ੍ਵਾ ਤਤ੍ਥ ਤਤ੍ਥ ਓਲਮ੍ਬਤਿ. ਬੁਦ੍ਧਾਨਂ ਪਨ ਏਵਰੂਪਂ ਨ ਹੋਤਿ. ਅਞ੍ਞੇਸਂ ਅਪਾਕਟਂ, ਸਨ੍ਤਿਕਾਵਚਰਤ੍ਤਾ ਆਨਨ੍ਦਤ੍ਥੇਰਸ੍ਸੇਵ ਪਾਕਟਂ ਹੋਤਿ, ਤਸ੍ਮਾ ਏਵਮਾਹ.
ਸਿਥਿਲਾਨਿ ਚ ਗਤ੍ਤਾਨੀਤਿ ਅਞ੍ਞੇਸਂ ਮੁਖੇ ਅਂਸਕੂਟਨ੍ਤਰੇਹਿ ਤੇਸੁ ਤੇਸੁ ਠਾਨੇਸੁ ਵਲਿਯੋ ਸਨ੍ਤਿਟ੍ਠਨ੍ਤਿ, ਸਤ੍ਥੁ ਪਨੇਤਂ ਨਤ੍ਥਿ, ਥੇਰੋ ਚ ਦ੍ਵਿਨ੍ਨਂ ਅਂਸਕੂਟਾਨਂ ਅਨ੍ਤਰੇ ਵਲਿਯਾਵਟ੍ਟਕਂ ਦਿਸ੍ਵਾ ਏਵਮਾਹ. ਸਬ੍ਬਾਨਿ ਵਲਿਯਜਾਤਾਨੀਤਿ ਇਦਮ੍ਪਿ ਅਤ੍ਤਨੋ ਪਾਕਟਵਸੇਨ ਏਵਮਾਹ – ਸਤ੍ਥੁ ਪਨ ਅਞ੍ਞੇਸਂ ਵਿਯ ਵਲਿਯੋ ਨਾਮ ਨਤ੍ਥਿ. ਪੁਰਤੋ ਪਬ੍ਭਾਰੋ ਚ ਕਾਯੋਤਿ ਸਤ੍ਥਾ ਬ੍ਰਹ੍ਮੁਜੁਗਤ੍ਤੋ, ਦੇਵਨਗਰੇ ਸਮੁਸ੍ਸਿਤਸੁਵਣ੍ਣਤੋਰਣਂ ਵਿਯਸ੍ਸ ਕਾਯੋ ਉਜੁਕਮੇਵ ਉਗ੍ਗਤੋ. ਮਹਲ੍ਲਕਕਾਲੇ ਪਨ ਕਾਯੋ ਪੁਰਤੋ ਵਙ੍ਕੋ ਹੋਤਿ, ਸ੍ਵਾਯਂ ਅਞ੍ਞੇਸਂ ਅਪਾਕਟੋ, ਸਨ੍ਤਿਕਾਵਚਰਤ੍ਤਾ ਪਨ ਥੇਰਸ੍ਸੇਵ ਪਾਕਟੋ, ਤਸ੍ਮਾ ਏਵਮਾਹ. ਦਿਸ੍ਸਤਿ ਚ ਇਨ੍ਦ੍ਰਿਯਾਨਂ ਅਞ੍ਞਥਤ੍ਤਨ੍ਤਿ ਇਨ੍ਦ੍ਰਿਯਾਨਿ ਨਾਮ ਨ ਚਕ੍ਖੁਵਿਞ੍ਞੇਯ੍ਯਾਨਿ. ਯਤੋ ਪਨ ਪਕਤਿਯਾ ਪਰਿਸੁਦ੍ਧੋ ਛਵਿਵਣ੍ਣੋ, ਇਦਾਨਿ ਨ ਤਥਾ ਪਰਿਸੁਦ੍ਧੋ, ਅਂਸਕੂਟਨ੍ਤਰੇ ਵਲਿ ਪਞ੍ਞਾਯਤਿ, ਬ੍ਰਹ੍ਮੁਜੁਕਾਯੋ ਪੁਰਤੋ ਵਙ੍ਕੋ, ਇਮਿਨਾਵ ਕਾਰਣੇਨ ਚਕ੍ਖਾਦੀਨਞ੍ਚ ਇਨ੍ਦ੍ਰਿਯਾਨਂ ਅਞ੍ਞਥਤ੍ਤੇਨ ਭਵਿਤਬ੍ਬਨ੍ਤਿ ਨਯਗ੍ਗਾਹਤੋ ਏਵਮਾਹ. ਧੀ ਤਂ ਜਮ੍ਮਿ ਜਰੇ ਅਤ੍ਥੂਤਿ ਲਾਮਕੇ ਜਰੇ ਧੀ ਤਂ ਤੁਯ੍ਹਂ ਹੋਤੁ, ਧਿਕ੍ਕਾਰੋ ਤਂ ਫੁਸਤੁ. ਬਿਮ੍ਬਨ੍ਤਿ ਅਤ੍ਤਭਾਵੋ.
੨. ਉਣ੍ਣਾਭਬ੍ਰਾਹ੍ਮਣਸੁਤ੍ਤਵਣ੍ਣਨਾ
੫੧੨. ਦੁਤਿਯੇ ਗੋਚਰਵਿਸਯਨ੍ਤਿ ਗੋਚਰਭੂਤਂ ਵਿਸਯਂ. ਅਞ੍ਞਮਞ੍ਞਸ੍ਸਾਤਿ ਚਕ੍ਖੁ ਸੋਤਸ੍ਸ, ਸੋਤਂ ਵਾ ਚਕ੍ਖੁਸ੍ਸਾਤਿ ਏਵਂ ਏਕਂ ਏਕਸ੍ਸ ਗੋਚਰਵਿਸਯਂ ਨ ਪਚ੍ਚਨੁਭੋਤਿ. ਸਚੇ ਹਿ ਨੀਲਾਦਿਭੇਦਂ ਰੂਪਾਰਮ੍ਮਣਂ ਸਮੋਧਾਨੇਤ੍ਵਾ ਸੋਤਿਨ੍ਦ੍ਰਿਯਸ੍ਸ ਉਪਨੇਯ੍ਯ – ‘‘ਇਙ੍ਘ ਤ੍ਵਂ ਤਾਵ ਨਂ ਵਵਤ੍ਥਪੇਹਿ ਵਿਭਾਵੇਹਿ ‘ਕਿਨ੍ਨਾਮੇਤਂ ਆਰਮ੍ਮਣ’’’ਨ੍ਤਿ. ਚਕ੍ਖੁਵਿਞ੍ਞਾਣਂ ਵਿਨਾਪਿ ਮੁਖੇਨ ਅਤ੍ਤਨੋ ਧਮ੍ਮਤਾਯ ਏਵਂ ਵਦੇਯ੍ਯ – ‘‘ਅਰੇ, ਅਨ੍ਧਬਾਲ, ਵਸ੍ਸਸਤਮ੍ਪਿ ਵਸ੍ਸਸਹਸ੍ਸਮ੍ਪਿ ਵਸ੍ਸਸਤਸਹਸ੍ਸਮ੍ਪਿ ਪਰਿਧਾਵਮਾਨੋ ਅਞ੍ਞਤ੍ਰ ਮਯਾ ਕੁਹਿਂ ਏਤਸ੍ਸ ਜਾਨਨਕਂ ਲਭਿਸ੍ਸਸਿ, ਤਂ ਆਹਰ, ਚਕ੍ਖੁਪਸਾਦੇ ਉਪਨੇਹਿ, ਅਹਮੇਤਂ ਆਰਮ੍ਮਣਂ ਜਾਨਿਸ੍ਸਾਮਿ – ਯਦਿ ਵਾ ਨੀਲਂ, ਯਦਿ ਵਾ ਪੀਤਕਂ. ਨ ਹਿ ਏਸੋ ਅਞ੍ਞਸ੍ਸ ਵਿਸਯੋ, ਮਯ੍ਹਮੇਵੇਸੋ ਵਿਸਯੋ’’ਤਿ. ਸੇਸਦ੍ਵਾਰੇਸੁਪਿ ਏਸੇਵ ਨਯੋ. ਏਵਮੇਤਾਨਿ ਅਞ੍ਞਮਞ੍ਞਸ੍ਸ ਗੋਚਰਵਿਸਯਂ ਨ ਪਚ੍ਚਨੁਭੋਨ੍ਤਿ ਨਾਮ.
ਕਿਂ ਪਟਿਸਰਣਨ੍ਤਿ ਏਤੇਸਂ ਕਿਂ ਪਟਿਸਰਣਂ, ਕਿਂ ਏਤਾਨਿ ਪਟਿਸਰਨ੍ਤੀਤਿ ਪੁਚ੍ਛਤਿ. ਮਨੋ ਪਟਿਸਰਣਨ੍ਤਿ ਜਵਨਮਨੋ ਪਟਿਸਰਣਂ. ਮਨੋਵ ਨੇਸਨ੍ਤਿ ਮਨੋਦ੍ਵਾਰਿਕਜਵਨਮਨੋਵ ਏਤੇਸਂ ਗੋਚਰਵਿਸਯਂ ਰਜ੍ਜਨਾਦਿਵਸੇਨ ਅਨੁਭੋਤਿ. ਚਕ੍ਖੁਵਿਞ੍ਞਾਣਞ੍ਹਿ ਰੂਪਦਸ੍ਸਨਮਤ੍ਤਮੇਵ, ਏਤ੍ਥ ਰਜ੍ਜਨਂ ਵਾ ਦੁਸ੍ਸਨਂ ਵਾ ਮੁਯ੍ਹਨਂ ਵਾ ਨਤ੍ਥਿ. ਏਕਸ੍ਮਿਂ ਪਨ ਦ੍ਵਾਰੇ ਜਵਨਂ ਰਜ੍ਜਤਿ ਵਾ ਦੁਸ੍ਸਤਿ ਵਾ ਮੁਯ੍ਹਤਿ ਵਾ. ਸੋਤਵਿਞ੍ਞਾਣਾਦੀਸੁਪਿ ਏਸੇਵ ਨਯੋ.
ਤਤ੍ਰਾਯਂ ਉਪਮਾ – ਪਞ੍ਚ ਕਿਰ ਦੁਬ੍ਬਲਭੋਜਕਾ ਰਾਜਾਨਂ ਸੇਵਿਤ੍ਵਾ ਕਿਚ੍ਛੇਨ ਕਸਿਰੇਨ ਏਕਸ੍ਮਿਂ ਪਞ੍ਚਕੁਲਿਕੇ ਗਾਮੇ ਪਰਿਤ੍ਤਕਂ ਆਯਂ ਲਭਿਂਸੁ. ਤੇਸਂ ਤਤ੍ਥ ਮਚ੍ਛਭਾਗੋ ਮਂਸਭਾਗੋ, ਅਦ੍ਦੁਕਹਾਪਣੋ ਵਾ ਯੋਤ੍ਤਕਹਾਪਣੋ ਵਾ ਮਾਸਕਹਾਪਣੋ ਵਾ ਅਟ੍ਠਕਹਾਪਣੋ ਵਾ ਸੋਲ਼ਸਕਹਾਪਣੋ ਵਾ ਚਤੁਸਟ੍ਠਿਕਹਾਪਣੋ ਵਾ ਦਣ੍ਡੋਤਿ ਏਤ੍ਤਕਮਤ੍ਤਮੇਵ ਪਾਪੁਣਾਤਿ, ਸਤਵਤ੍ਥੁਕਂ ਪਞ੍ਚਸਤਵਤ੍ਥੁਕਂ ਸਹਸ੍ਸਵਤ੍ਥੁਕਂ ਮਹਾਬਲਿਂ ਰਾਜਾਵ ਗਣ੍ਹਾਤਿ.
ਤਤ੍ਥ ਪਞ੍ਚਕੁਲਿਕਗਾਮਾ ਵਿਯ ਪਞ੍ਚਪਸਾਦਾ ਦਟ੍ਠਬ੍ਬਾ, ਪਞ੍ਚ ਦੁਬ੍ਬਲਭੋਜਕਾ ਵਿਯ ਪਞ੍ਚਵਿਞ੍ਞਾਣਾਨਿ; ਰਾਜਾ ਵਿਯ ਜਵਨਂ, ਦੁਬ੍ਬਲਭੋਜਕਾਨਂ ਪਰਿਤ੍ਤਕਆਯਪਾਪੁਣਨਂ ਵਿਯ ਚਕ੍ਖੁਵਿਞ੍ਞਾਣਾਦੀਨਂ ਰੂਪਦਸ੍ਸਨਾਦਿਮਤ੍ਤਂ, ਰਜ੍ਜਨਾਦਿ ਪਨ ਏਤੇਸੁ ਨਤ੍ਥਿ. ਰਞ੍ਞੋ ਮਹਾਬਲਿਗ੍ਗਹਣਂ ਵਿਯ ਤੇਸੁ ਦ੍ਵਾਰੇਸੁ ਜਵਨਸ੍ਸ ਰਜ੍ਜਨਾਦੀਨਿ ਵੇਦਿਤਬ੍ਬਾਨਿ. ਏਵਮੇਤ੍ਥ ਮਨੋਤਿ ਕੁਸਲਾਕੁਸਲਜਵਨਂ ਵੁਤ੍ਤਂ.
ਸਤਿ ਪਟਿਸਰਣਨ੍ਤਿ ਮਗ੍ਗਸਤਿ ਪਟਿਸਰਣਂ. ਜਵਨਮਨੋ ਹਿ ਮਗ੍ਗਸਤਿਂ ਪਟਿਸਰਤਿ. ਵਿਮੁਤ੍ਤੀਤਿ ਫਲਵਿਮੁਤ੍ਤਿ. ਪਟਿਸਰਣਨ੍ਤਿ ਫਲਵਿਮੁਤ੍ਤਿਯਾ ਨਿਬ੍ਬਾਨਂ ਪਟਿਸਰਣਂ. ਤਞ੍ਹਿ ਸਾ ਪਟਿਸਰਤਿ. ਨਾਸਕ੍ਖਿ ਪਞ੍ਹਸ੍ਸ ਪਰਿਯਨ੍ਤਂ ਗਹੇਤੁਨ੍ਤਿ ਪਞ੍ਹਸ੍ਸ ਪਰਿਚ੍ਛੇਦਂ ਪਮਾਣਂ ਗਹੇਤੁਂ ਨਾਸਕ੍ਖਿ, ਅਪ੍ਪਟਿਸਰਣਂ ਧਮ੍ਮਂ ‘‘ਸਪ੍ਪਟਿਸਰਣ’’ਨ੍ਤਿ ਪੁਚ੍ਛਿ. ਨਿਬ੍ਬਾਨਂ ਨਾਮੇਤਂ ਅਪ੍ਪਟਿਸਰਣਂ, ਨ ਕਿਞ੍ਚਿ ਪਟਿਸਰਤਿ. ਨਿਬ੍ਬਾਨੋਗਧਨ੍ਤਿ ਨਿਬ੍ਬਾਨਬ੍ਭਨ੍ਤਰਂ ਨਿਬ੍ਬਾਨਂ ਅਨੁਪਵਿਟ੍ਠਂ. ਬ੍ਰਹ੍ਮਚਰਿਯਨ੍ਤਿ ਮਗ੍ਗਬ੍ਰਹ੍ਮਚਰਿਯਂ. ਨਿਬ੍ਬਾਨਪਰਾਯਣਨ੍ਤਿ ਨਿਬ੍ਬਾਨਂ ਪਰਂ ਅਯਨਮਸ੍ਸ ਪਰਾ ਗਤਿ, ਨ ਤਤੋ ਪਰਂ ਗਚ੍ਛਤੀਤਿ ਅਤ੍ਥੋ. ਨਿਬ੍ਬਾਨਂ ਪਰਿਯੋਸਾਨਂ ਅਵਸਾਨਂ ਅਸ੍ਸਾਤਿ ਨਿਬ੍ਬਾਨਪਰਿਯੋਸਾਨਂ.
ਮੂਲਜਾਤਾ ਪਤਿਟ੍ਠਿਤਾਤਿ ਮਗ੍ਗੇਨ ਆਗਤਸਦ੍ਧਾ ਵੁਚ੍ਚਤਿ. ਇਮਮ੍ਹਿ ਚੇ, ਭਿਕ੍ਖਵੇ, ਸਮਯੇਤਿ ਕਿਂ ਸਨ੍ਧਾਯਾਹ? ਝਾਨਅਨਾਗਾਮਿਤਂ. ਤਸ੍ਮਿਞ੍ਹਿ ਸਮਯੇ ਬ੍ਰਾਹ੍ਮਣਸ੍ਸ ਪਠਮਮਗ੍ਗੇਨ ਪਞ੍ਚ ਅਕੁਸਲਚਿਤ੍ਤਾਨਿ ਪਹੀਨਾਨਿ, ਪਠਮਜ੍ਝਾਨੇਨ ਪਞ੍ਚ ਨੀਵਰਣਾਨੀਤਿ ਝਾਨਅਨਾਗਾਮਿਟ੍ਠਾਨੇ ਠਿਤੋ. ਸੋ ਅਪਰਿਹੀਨਜ੍ਝਾਨੋ ਕਾਲਂ ਕਤ੍ਵਾ ਤਤ੍ਥੇਵ ਪਰਿਨਿਬ੍ਬਾਯੇਯ੍ਯ. ਸਚੇ ਪਨਸ੍ਸ ਪੁਤ੍ਤਦਾਰਂ ਅਨੁਸਾਸਨ੍ਤਸ੍ਸ ਕਮ੍ਮਨ੍ਤੇ ਵਿਚਾਰੇਨ੍ਤਸ੍ਸ ਝਾਨਂ ਨਸ੍ਸਤਿ, ਨਟ੍ਠੇ ਝਾਨੇ ਗਤਿ ਅਨਿਬਦ੍ਧਾ ਹੋਤਿ, ਅਨਟ੍ਠੇ ਪਨ ਨਿਬਦ੍ਧਾਤਿ ਇਮਂ ਝਾਨਅਨਾਗਾਮਿਤਂ ਸਨ੍ਧਾਯ ਏਵਮਾਹ.
੩. ਸਾਕੇਤਸੁਤ੍ਤਵਣ੍ਣਨਾ
੫੧੩. ਤਤਿਯੇ ਅਞ੍ਜਨਵਨੇਤਿ ਅਞ੍ਜਨਵਣ੍ਣਪੁਪ੍ਫਾਨਂ ਰੁਕ੍ਖਾਨਂ ਰੋਪਿਤਵਨੇ. ਯਂ, ਭਿਕ੍ਖਵੇ, ਸਦ੍ਧਿਨ੍ਦ੍ਰਿਯਂ, ਤਂ ਸਦ੍ਧਾਬਲਨ੍ਤਿ ਤਞ੍ਹਿ ਅਧਿਮੋਕ੍ਖਲਕ੍ਖਣੇ ਇਨ੍ਦਟ੍ਠੇਨ ਸਦ੍ਧਿਨ੍ਦ੍ਰਿਯਂ, ਅਸ੍ਸਦ੍ਧਿਯੇ ਅਕਮ੍ਪਨੇਨ ਸਦ੍ਧਾਬਲਂ. ਇਤਰੇਸਂ ਪਗ੍ਗਹਉਪਟ੍ਠਾਨਅਵਿਕ੍ਖੇਪਪਜਾਨਨਲਕ੍ਖਣੇਸੁ ਇਨ੍ਦਟ੍ਠੇਨ ਇਨ੍ਦ੍ਰਿਯਭਾਵੋ, ਕੋਸਜ੍ਜਮੁਟ੍ਠਸਚ੍ਚਵਿਕ੍ਖੇਪਾਵਿਜ੍ਜਾਸੁ ਅਕਮ੍ਪਨੇਨ ਬਲਭਾਵੋ ਵੇਦਿਤਬ੍ਬੋ. ਏਵਮੇਵ ਖੋਤਿ ਤਸ੍ਸਾ ਨਦਿਯਾ ਏਕਸੋਤਂ ਵਿਯ ਸਦ੍ਧਾਵੀਰਿਯਸਤਿਸਮਾਧਿਪਞ੍ਞਾਵਸੇਨ ਏਤੇਸਂ ਨਿਨ੍ਨਾਨਾਕਰਣਂ ਵੇਦਿਤਬ੍ਬਂ, ਦ੍ਵੇ ਸੋਤਾਨਿ ਵਿਯ ਇਨ੍ਦਟ੍ਠਅਕਮ੍ਪਨਟ੍ਠੇਹਿ ਇਨ੍ਦ੍ਰਿਯਬਲਵਸੇਨ ਨਾਨਾਕਰਣਂ ਵੇਦਿਤਬ੍ਬਂ.
੪. ਪੁਬ੍ਬਕੋਟ੍ਠਕਸੁਤ੍ਤਵਣ੍ਣਨਾ
੫੧੪. ਚਤੁਤ੍ਥੇ ਅਮਤੋਗਧਨ੍ਤਿ ਅਮਤਬ੍ਭਨ੍ਤਰਂ. ਅਮਤਪਰਾਯਣਨ੍ਤਿ ਅਮਤਨਿਬ੍ਬਤ੍ਤਿਕਂ. ਅਮਤਪਰਿਯੋਸਾਨਨ੍ਤਿ ਅਮਤਨਿਟ੍ਠਂ. ਸਾਧੁ ਸਾਧੂਤਿ ਥੇਰਸ੍ਸ ਬ੍ਯਾਕਰਣਂ ਪਸਂਸਨ੍ਤੋ ਸਾਧੁਕਾਰਂ ਦੇਤਿ.
੫. ਪਠਮਪੁਬ੍ਬਾਰਾਮਸੁਤ੍ਤਵਣ੍ਣਨਾ
੫੧੫. ਪਞ੍ਚਮੇ ਤਦਨ੍ਵਯਾਤਿ ਤਂ ਅਨੁਗਚ੍ਛਮਾਨਾ, ਅਨੁਵਤ੍ਤਮਾਨਾਤਿ ਅਤ੍ਥੋ. ਪੁਬ੍ਬਕੋਟ੍ਠਕਂ ਆਦਿਂ ਕਤ੍ਵਾ ਪਟਿਪਾਟਿਯਾ ਛਸੁ ਸੁਤ੍ਤੇਸੁ ਫਲਿਨ੍ਦ੍ਰਿਯਾਨੇਵ ਕਥਿਤਾਨਿ.
੧੦. ਆਪਣਸੁਤ੍ਤਵਣ੍ਣਨਾ
੫੨੦. ਦਸਮੇ ਇਮੇ ਖੋ ਤੇ ਧਮ੍ਮਾਤਿ ਉਪਰਿ ਸਹ ਵਿਪਸ੍ਸਨਾਯ ਤਯੋ ਮਗ੍ਗਾ. ਯੇ ਮੇ ਪੁਬ੍ਬੇ ਸੁਤਾਵ ਅਹੇਸੁਨ੍ਤਿ ਯੇ ਧਮ੍ਮਾ ਮਯਾ ਪੁਬ੍ਬੇ ‘‘ਅਰਹਤ੍ਤਫਲਿਨ੍ਦ੍ਰਿਯਂ ਨਾਮ ਅਤ੍ਥੀ’’ਤਿ ਕਥੇਨ੍ਤਾਨਂਯੇਵ ਸੁਤਾ ਅਹੇਸੁਂ. ਕਾਯੇਨ ਚ ਫੁਸਿਤ੍ਵਾਤਿ ਨਾਮਕਾਯੇਨ ਚ ਫੁਸਿਤ੍ਵਾ ਪਟਿਲਭਿਤ੍ਵਾ. ਪਞ੍ਞਾਯ ਚ ਅਤਿਵਿਜ੍ਝ ਪਸ੍ਸਾਮੀਤਿ ਪਚ੍ਚਵੇਕ੍ਖਣਪਞ੍ਞਾਯ ਚ ਅਤਿਵਿਜ੍ਝਿਤ੍ਵਾ ਪਸ੍ਸਾਮਿ. ਯਾ ਹਿਸ੍ਸ, ਭਨ੍ਤੇ, ਸਦ੍ਧਾਤਿ ਅਯਂ ਕਤਰਸਦ੍ਧਾ? ਚਤੂਹਿ ਇਨ੍ਦ੍ਰਿਯੇਹਿ ਸਮ੍ਪਯੁਤ੍ਤਾ ਸਦ੍ਧਾ ਹੇਟ੍ਠਾ ਕਥਿਤਾਵ, ਅਯਂ ਪਨ ਪਚ੍ਚਵੇਕ੍ਖਣਸਦ੍ਧਾ. ਸਮ੍ਪਯੁਤ੍ਤਸਦ੍ਧਾ ਹਿ ਮਿਸ੍ਸਕਾ, ਪਚ੍ਚਵੇਕ੍ਖਣਸਦ੍ਧਾ ਲੋਕਿਯਾਵ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਜਰਾਵਗ੍ਗੋ ਪਞ੍ਚਮੋ.
੬. ਸੂਕਰਖਤਵਗ੍ਗੋ
੧. ਸਾਲਸੁਤ੍ਤਵਣ੍ਣਨਾ
੫੨੧. ਛਟ੍ਠਵਗ੍ਗਸ੍ਸ ਪਠਮੇ ਸੂਰੇਨਾਤਿ ਸੂਰਭਾਵੇਨ. ਬੋਧਾਯਾਤਿ ਬੁਜ੍ਝਨਤ੍ਥਾਯ.
੨. ਮਲ੍ਲਿਕਸੁਤ੍ਤਵਣ੍ਣਨਾ
੫੨੨. ਦੁਤਿਯੇ ਮਲ੍ਲੇਸੂਤਿ ਏਵਂਨਾਮਕੇ ਜਨਪਦੇ. ਇਮਸ੍ਮਿਂ ਸੁਤ੍ਤੇ ਚਤ੍ਤਾਰਿ ਇਨ੍ਦ੍ਰਿਯਾਨਿ ਮਿਸ੍ਸਕਾਨਿ, ਅਰਿਯਞਾਣਂ ਲੋਕੁਤ੍ਤਰਂ. ਤਮ੍ਪਿ ਪਨ ਚਤੁਕ੍ਕਿਨ੍ਦ੍ਰਿਯਨਿਸ੍ਸਿਤਂ ਕਤ੍ਵਾ ਮਿਸ੍ਸਕਨ੍ਤਿ ਭਾਜੇਤੁਂ ਵਟ੍ਟਤਿ.
੩. ਸੇਖਸੁਤ੍ਤਵਣ੍ਣਨਾ
੫੨੩. ਤਤਿਯੇ ਨ ਹੇਵ ਖੋ ਕਾਯੇਨ ਫੁਸਿਤ੍ਵਾ ਵਿਹਰਤੀਤਿ ਨ ਨਾਮਕਾਯੇਨ ਫੁਸਿਤ੍ਵਾ ਪਟਿਲਭਿਤ੍ਵਾ ਵਿਹਰਤਿ, ਫੁਸਿਤੁਂ ਪਟਿਲਭਿਤੁਂ ਨ ਸਕ੍ਕੋਤਿ. ਪਞ੍ਞਾਯ ਚ ਅਤਿਵਿਜ੍ਝ ਪਸ੍ਸਤੀਤਿ ਪਚ੍ਚਵੇਕ੍ਖਣਪਞ੍ਞਾਯ ਪਨ ‘‘ਉਪਰਿ ਅਰਹਤ੍ਤਫਲਿਨ੍ਦ੍ਰਿਯਂ ਨਾਮ ਅਤ੍ਥੀ’’ਤਿ ਪਜਾਨਾਤਿ. ਅਸੇਖਭੂਮਿਯਂ ਫੁਸਿਤ੍ਵਾ ਵਿਹਰਤੀਤਿ ਪਟਿਲਭਿਤ੍ਵਾ ਵਿਹਰਤਿ. ਪਞ੍ਞਾਯਾਤਿ ਪਚ੍ਚਵੇਕ੍ਖਣਪਞ੍ਞਾਯ ‘‘ਅਰਹਤ੍ਤਫਲਿਨ੍ਦ੍ਰਿਯਂ ਨਾਮ ਅਤ੍ਥੀ’’ਤਿ ਪਜਾਨਾਤਿ. ਨ ਕੁਹਿਞ੍ਚਿ ਕਿਸ੍ਮਿਞ੍ਚੀਤਿ ਦ੍ਵੇਪਿ ਅਞ੍ਞਮਞ੍ਞਵੇਵਚਨਾਨੇਵ, ਕਿਸ੍ਮਿਞ੍ਚਿ ਭਵੇ ਨ ਉਪ੍ਪਜ੍ਜਿਸ੍ਸਨ੍ਤੀਤਿ ਅਤ੍ਥੋ. ਇਮਸ੍ਮਿਂ ਸੁਤ੍ਤੇ ਪਞ੍ਚਿਨ੍ਦ੍ਰਿਯਾਨਿ ਲੋਕੁਤ੍ਤਰਾਨਿ, ਛ ਲੋਕਿਕਾਨਿ ਵਟ੍ਟਨਿਸ੍ਸਿਤਾਨੇਵ ਕਥਿਤਾਨਿ.
੪-੫. ਪਦਸੁਤ੍ਤਾਦਿਵਣ੍ਣਨਾ
੫੨੪-੫੨੫. ਚਤੁਤ੍ਥੇ ਯਾਨਿ ਕਾਨਿਚਿ ਪਦਾਨਿ ਬੋਧਾਯ ਸਂਵਤ੍ਤਨ੍ਤੀਤਿ ਯਾਨਿ ਕਾਨਿਚਿ ਧਮ੍ਮਪਦਾਨਿ, ਯੇ ਕੇਚਿ ਧਮ੍ਮਕੋਟ੍ਠਾਸਾ, ਬੁਜ੍ਝਨਤ੍ਥਾਯ ਸਂਵਤ੍ਤਨ੍ਤਿ. ਪਞ੍ਚਮਂ ਉਤ੍ਤਾਨਮੇਵ.
੬-੭. ਪਤਿਟ੍ਠਿਤਸੁਤ੍ਤਾਦਿਵਣ੍ਣਨਾ
੫੨੬-੫੨੭. ਛਟ੍ਠੇ ਚਿਤ੍ਤਂ ਰਕ੍ਖਤਿ ਆਸਵੇਸੁ ਚ ਸਾਸਵੇਸੁ ਚ ਧਮ੍ਮੇਸੂਤਿ ਤੇਭੂਮਕਧਮ੍ਮੇ ਆਰਬ੍ਭ ਆਸਵੁਪ੍ਪਤ੍ਤਿਂ ਵਾਰੇਨ੍ਤੋ ਆਸਵੇਸੁ ਚ ਸਾਸਵੇਸੁ ਚ ਧਮ੍ਮੇਸੁ ਚਿਤ੍ਤਂ ਰਕ੍ਖਤਿ ਨਾਮ. ਸਤ੍ਤਮਂ ਉਤ੍ਤਾਨਮੇਵ.
੮. ਸੂਕਰਖਤਸੁਤ੍ਤਵਣ੍ਣਨਾ
੫੨੮. ਅਟ੍ਠਮੇ ਸੂਕਰਖਤਾਯਨ੍ਤਿ ਸੂਕਰਖਤਲੇਣੇ. ਕਸ੍ਸਪਬੁਦ੍ਧਕਾਲੇ ਕਿਰ ਤਂ ਲੇਣਂ ਏਕਸ੍ਮਿਂ ਬੁਦ੍ਧਨ੍ਤਰੇ ਪਥਵਿਯਾ ਵਡ੍ਢਮਾਨਾਯ ਅਨ੍ਤੋਭੂਮਿਗਤਂ ਜਾਤਂ. ਅਥੇਕਦਿਵਸਂ ਏਕੋ ਸੂਕਰੋ ਤਸ੍ਸ ਛਦਨਪਰਿਯਨ੍ਤਸਮੀਪੇ ਪਂਸੁਂ ਖਣਿ. ਦੇਵੇ ਵੁਟ੍ਠੇ ਪਂਸੁ ਧੋਤਾ, ਛਦਨਪਰਿਯਨ੍ਤੋ ਪਾਕਟੋ ਅਹੋਸਿ. ਏਕੋ ਵਨਚਰਕੋ ਦਿਸ੍ਵਾ ‘‘ਪੁਬ੍ਬੇ ਸੀਲਵਨ੍ਤੇਹਿ ਪਰਿਭੁਤ੍ਤਟ੍ਠਾਨੇਨ ਭਵਿਤਬ੍ਬਂ, ਪਟਿਜਗ੍ਗਿਸ੍ਸਾਮਿ ਨ’’ਨ੍ਤਿ ਸਮਨ੍ਤਤੋ ਪਂਸੁਂ ਅਪਨੇਤ੍ਵਾ ਲੇਣਂ ਸੋਧੇਤ੍ਵਾ ਕੁਟਿਪਰਿਕ੍ਖੇਪਂ ਕਤ੍ਵਾ ਦ੍ਵਾਰਵਾਤਪਾਨਂ ਯੋਜੇਤ੍ਵਾ ਸੁਪਰਿਨਿਟ੍ਠਿਤਸੁਧਾਕਮ੍ਮਚਿਤ੍ਤਕਮ੍ਮਂ ਰਜਤਪਟ੍ਟਸਦਿਸਾਯ ਵਾਲਿਕਾਯ ਸਨ੍ਥਰਿਤਂ ਪਰਿਵੇਣਂ ਕਤ੍ਵਾ ਮਞ੍ਚਪੀਠਂ ਪਞ੍ਞਾਪੇਤ੍ਵਾ ਭਗਵਤੋ ਵਸਨਤ੍ਥਾਯ ਅਦਾਸਿ, ਲੇਣਂ ਗਮ੍ਭੀਰਂ ਅਹੋਸਿ ਓਤਰਿਤ੍ਵਾ ਆਰੁਹਿਤਬ੍ਬਂ. ਤਂ ਸਨ੍ਧਾਯੇਤਂ ਵੁਤ੍ਤਂ. ਪਰਮਨਿਪਚ੍ਚਕਾਰਨ੍ਤਿ ਭਾਵਨਪੁਂਸਕਂ, ਪਰਮਨਿਪਚ੍ਚਕਾਰੀ ਹੁਤ੍ਵਾ ਪਵਤ੍ਤਮਾਨੋ ਪਵਤ੍ਤਤੀਤਿ ਵੁਤ੍ਤਂ ਹੋਤਿ. ਅਨੁਤ੍ਤਰਂ ਯੋਗਕ੍ਖੇਮਨ੍ਤਿ ਅਰਹਤ੍ਤਂ. ਸਪ੍ਪਤਿਸ੍ਸੋਤਿ ਸਜੇਟ੍ਠਕੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
ਸੂਕਰਖਤਵਗ੍ਗੋ ਛਟ੍ਠੋ.
੭. ਬੋਧਿਪਕ੍ਖਿਯਵਗ੍ਗੋ
੫੩੧-੬੫੦. ਸਤ੍ਤਮਵਗ੍ਗੇ ਸਤ੍ਤ ਫਲਾਨਿ ਪੁਬ੍ਬਭਾਗਾਨਿ, ਤੇਸਂ ਹੇਟ੍ਠਾ ਦ੍ਵੇ ਫਲਾਨਿ ਆਦਿਂ ਕਤ੍ਵਾ ਮਿਸ੍ਸਕਾਨਿ. ਸੇਸਮੇਤ੍ਥ ਇਤੋ ਪਰਞ੍ਚ ਸਬ੍ਬਂ ਉਤ੍ਤਾਨਮੇਵਾਤਿ.
ਇਨ੍ਦ੍ਰਿਯਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.