੨. ਨਾਲਨ੍ਦਵਗ੍ਗੋ

੨. ਨਾਲਨ੍ਦਸੁਤ੍ਤਵਣ੍ਣਨਾ

੩੭੮. ਦੁਤਿਯਵਗ੍ਗਸ੍ਸ ਦੁਤਿਯੇ ਨਾਲਨ੍ਦਾਯਨ੍ਤਿ ਨਾਲਨ੍ਦਾਤਿ ਏਵਂਨਾਮਕੇ ਨਗਰੇ, ਤਂ ਨਗਰਂ ਗੋਚਰਗਾਮਂ ਕਤ੍ਵਾ. ਪਾਵਾਰਿਕਮ੍ਬਵਨੇਤਿ ਦੁਸ੍ਸਪਾਵਾਰਿਕਸੇਟ੍ਠਿਨੋ ਅਮ੍ਬਵਨੇ. ਤਂ ਕਿਰ ਤਸ੍ਸ ਉਯ੍ਯਾਨਂ ਅਹੋਸਿ. ਸੋ ਭਗਵਤੋ ਧਮ੍ਮਦੇਸਨਂ ਸੁਤ੍ਵਾ ਭਗਵਤਿ ਪਸਨ੍ਨੋ ਤਸ੍ਮਿਂ ਉਯ੍ਯਾਨੇ ਕੁਟਿਲੇਣਮਣ੍ਡਪਾਦਿਪਟਿਮਣ੍ਡਿਤਂ ਭਗਵਤੋ ਵਿਹਾਰਂ ਕਤ੍ਵਾ ਨਿਯ੍ਯਾਤੇਸਿ. ਸੋ ਵਿਹਾਰੋ ਜੀਵਕਮ੍ਬਵਨਂ ਵਿਯ ਪਾਵਾਰਿਕਮ੍ਬਵਨਨ੍ਤ੍ਵੇਵ ਸਙ੍ਖਂ ਗਤੋ. ਤਸ੍ਮਿਂ ਪਾਵਾਰਿਕਮ੍ਬਵਨੇ ਵਿਹਰਤੀਤਿ ਅਤ੍ਥੋ.

ਏਵਂਪਸਨ੍ਨੋਤਿ ਏਵਂ ਉਪ੍ਪਨ੍ਨਸਦ੍ਧੋ, ਏਵਂ ਸਦ੍ਦਹਾਮੀਤਿ ਅਤ੍ਥੋ. ਭਿਯ੍ਯੋਭਿਞ੍ਞਤਰੋਤਿ ਭਿਯ੍ਯਤਰੋ ਅਭਿਞ੍ਞਾਤੋ ਭਿਯ੍ਯਤਰਾਭਿਯ੍ਯੋ ਵਾ, ਉਤ੍ਤਰਿਤਰਞਾਣੋਤਿ ਅਤ੍ਥੋ. ਸਮ੍ਬੋਧਿਯਨ੍ਤਿ ਸਬ੍ਬਞ੍ਞੁਤਞ੍ਞਾਣੇ ਅਰਹਤ੍ਤਮਗ੍ਗਞਾਣੇ ਵਾ ਅਰਹਤ੍ਤਮਗ੍ਗੇਨੇਵ ਹਿ ਬੁਦ੍ਧਗੁਣਾ ਨਿਪ੍ਪਦੇਸਾ ਗਹਿਤਾ ਹੋਨ੍ਤਿ, ਦ੍ਵੇਪਿ ਅਗ੍ਗਸਾਵਕਾ ਅਰਹਤ੍ਤਮਗ੍ਗੇਨੇਵ ਸਾਵਕਪਾਰਮੀਞਾਣਂ ਪਟਿਲਭਨ੍ਤਿ, ਪਚ੍ਚੇਕਬੁਦ੍ਧਾ ਪਚ੍ਚੇਕਬੋਧਿਞਾਣਂ, ਬੁਦ੍ਧਾ ਸਬ੍ਬਞ੍ਞੁਤਞ੍ਞਾਣਞ੍ਚੇਵ ਸਕਲੇ ਚ ਬੁਦ੍ਧਗੁਣੇ. ਸਬ੍ਬਮ੍ਪਿ ਨੇਸਂ ਅਰਹਤ੍ਤਮਗ੍ਗੇਨੇਵ ਇਜ੍ਝਤਿ. ਤਸ੍ਮਾ ਅਰਹਤ੍ਤਮਗ੍ਗਞਾਣਂ ਸਮ੍ਬੋਧਿ ਨਾਮ ਹੋਤਿ. ਤੇਨ ਉਤ੍ਤਰਿਤਰੋ ਚ ਭਗਵਤਾ ਨਤ੍ਥਿ. ਤੇਨਾਹ ‘‘ਭਗਵਤਾ ਭਿਯ੍ਯੋਭਿਞ੍ਞਤਰੋ, ਯਦਿਦਂ ਸਮ੍ਬੋਧਿਯ’’ਨ੍ਤਿ.

ਉਲ਼ਾਰਾਤਿ ਸੇਟ੍ਠਾ. ਅਯਞ੍ਹਿ ਉਲ਼ਾਰਸਦ੍ਦੋ ‘‘ਉਲ਼ਾਰਾਨਿ ਖਾਦਨੀਯਾਨਿ ਖਾਦਨ੍ਤੀ’’ਤਿਆਦੀਸੁ (ਮ. ਨਿ. ੧.੩੬੬) ਮਧੁਰੇ ਆਗਚ੍ਛਤਿ. ‘‘ਉਲ਼ਾਰਾਯ ਖਲੁ ਭਵਂ ਵਚ੍ਛਾਯਨੋ ਸਮਣਂ ਗੋਤਮਂ ਪਸਂਸਾਯ ਪਸਂਸਤੀ’’ਤਿਆਦੀਸੁ (ਮ. ਨਿ. ੧.੨੮੮) ਸੇਟ੍ਠੇ. ‘‘ਅਪ੍ਪਮਾਣੋ ਉਲ਼ਾਰੋ ਓਭਾਸੋ’’ਤਿਆਦੀਸੁ (ਦੀ. ਨਿ. ੨.੩੨; ਮ. ਨਿ. ੩.੨੦੧) ਵਿਪੁਲੇ. ਸ੍ਵਾਯਮਿਧ ਸੇਟ੍ਠੇ ਆਗਤੋ. ਤੇਨ ਵੁਤ੍ਤਂ ‘‘ਉਲ਼ਾਰਾਤਿ ਸੇਟ੍ਠਾ’’ਤਿ. ਆਸਭੀਤਿ ਉਸਭਸ੍ਸ ਵਾਚਾਸਦਿਸੀ ਅਚਲਾ ਅਸਮ੍ਪਵੇਧੀ. ਏਕਂਸੋ ਗਹਿਤੋਤਿ ਅਨੁਸ੍ਸਵੇਨ ਵਾ ਆਚਰਿਯਪਰਮ੍ਪਰਾਯ ਵਾ ਇਤਿਕਿਰਾਯ ਵਾ ਪਿਟਕਸਮ੍ਪਦਾਨੇਨ ਵਾ ਆਕਾਰਪਰਿਵਿਤਕ੍ਕੇਨ ਵਾ ਦਿਟ੍ਠਿਨਿਜ੍ਝਾਨਕ੍ਖਨ੍ਤਿਯਾ ਵਾ ਤਕ੍ਕਹੇਤੁ ਵਾ ਨਯਹੇਤੁ ਵਾ ਅਕਥੇਤ੍ਵਾ ਪਚ੍ਚਕ੍ਖਤੋ ਞਾਣੇਨ ਪਟਿਵਿਜ੍ਝਿਤ੍ਵਾ ਵਿਯ ਏਕਂਸੋ ਗਹਿਤੋ, ਸਨ੍ਨਿਟ੍ਠਾਨਕਥਾਵ ਕਥਿਤਾਤਿ ਅਤ੍ਥੋ. ਸੀਹਨਾਦੋਤਿ ਸੇਟ੍ਠਨਾਦੋ, ਵਨੇ ਉਨ੍ਨਾਦਯਨ੍ਤੇਨ ਸੀਹੇਨ ਵਿਯ ਉਤ੍ਤਮਨਾਦੋ ਨਦਿਤੋਤਿ ਅਤ੍ਥੋ.

ਕਿਂ ਨੁ ਤੇ ਸਾਰਿਪੁਤ੍ਤਾਤਿ ਇਮਂ ਦੇਸਨਂ ਕਸ੍ਮਾ ਆਰਭਿ? ਅਨੁਯੋਗਦਾਪਨਤ੍ਥਂ. ਏਕਚ੍ਚੋ ਹਿ ਸੀਹਨਾਦਂ ਨਦਿਤ੍ਵਾ ਅਤ੍ਤਨੋ ਸੀਹਨਾਦੇ ਅਨੁਯੋਗਂ ਦਾਤੁਂ ਨ ਸਕ੍ਕੋਤਿ, ਨਿਘਂਸਨਂ ਨ ਖਮਤਿ, ਸਿਲੇਸੇ ਪਤਿਤਮਕ੍ਕਟੋ ਵਿਯ ਹੋਤਿ. ਯਥਾ ਧਮਮਾਨਂ ਅਪਰਿਸੁਦ੍ਧਂ ਲੋਹਂ ਝਾਯਿਤ੍ਵਾ ਅਙ੍ਗਾਰੋ ਹੋਤਿ, ਏਵਂ ਝਾਮਙ੍ਗਾਰੋ ਵਿਯ ਹੋਤਿ. ਏਕੋ ਸੀਹਨਾਦੇ ਅਨੁਯੋਗਂ ਦਾਪਿਯਮਾਨੋ ਦਾਤੁਂ ਸਕ੍ਕੋਤਿ, ਨਿਘਂਸਨਂ ਖਮਤਿ, ਧਮਮਾਨਂ ਨਿਦ੍ਦੋਸਜਾਤਰੂਪਂ ਵਿਯ ਅਧਿਕਤਰਂ ਸੋਭਤਿ, ਤਾਦਿਸੋ ਥੇਰੋ. ਤੇਨ ਨਂ ਭਗਵਾ ‘‘ਅਨੁਯੋਗਕ੍ਖਮੋ ਅਯ’’ਨ੍ਤਿ ਞਤ੍ਵਾ ਸੀਹਨਾਦੇ ਅਨੁਯੋਗਦਾਪਨਤ੍ਥਂ ਇਮਂ ਦੇਸਨਂ ਆਰਭਿ.

ਤਤ੍ਥ ਸਬ੍ਬੇ ਤੇਤਿ ਸਬ੍ਬੇ ਤੇ ਤਯਾ. ਏਵਂਸੀਲਾਤਿ ਮਗ੍ਗਸੀਲੇਨ ਫਲਸੀਲੇਨ ਲੋਕਿਯਲੋਕੁਤ੍ਤਰਸੀਲੇਨ ਏਵਂਸੀਲਾ. ਏਵਂਧਮ੍ਮਾਤਿ ਏਤ੍ਥ ਸਮਾਧਿਪਕ੍ਖਾ ਧਮ੍ਮਾ ਅਧਿਪ੍ਪੇਤਾ, ਮਗ੍ਗਸਮਾਧਿਨਾ ਫਲਸਮਾਧਿਨਾ ਲੋਕਿਯਲੋਕੁਤ੍ਤਰੇਨ ਸਮਾਧਿਨਾ ਏਵਂਸਮਾਧੀਤਿ ਅਤ੍ਥੋ. ਏਵਂਪਞ੍ਞਾਤਿ ਮਗ੍ਗਪਞ੍ਞਾਦਿਵਸੇਨੇਵ ਏਵਂਪਞ੍ਞਾ. ਏਵਂਵਿਹਾਰਿਨੋਤਿ ਏਤ੍ਥ ਪਨ ਹੇਟ੍ਠਾ ਸਮਾਧਿਪਕ੍ਖਾਨਂ ਧਮ੍ਮਾਨਂ ਗਹਿਤਤ੍ਤਾ ਵਿਹਾਰੋ ਗਹਿਤੋਪਿ ਪੁਨ ਕਸ੍ਮਾ ਗਹਿਤਮੇਵ ਗਣ੍ਹਤੀਤਿ ਚੇ. ਥੇਰੇਨ ਇਦਂ ਗਹਿਤਮੇਵ. ਇਦਞ੍ਹਿ ਨਿਰੋਧਸਮਾਪਤ੍ਤਿਦੀਪਨਤ੍ਥਂ ਵੁਤ੍ਤਂ. ਤਸ੍ਮਾ ਏਵਂ ਨਿਰੋਧਸਮਾਪਤ੍ਤਿਵਿਹਾਰਿਨੋ ਤੇ ਭਗਵਨ੍ਤੋ ਅਹੇਸੁਨ੍ਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ.

ਏਵਂਵਿਮੁਤ੍ਤਾਤਿ ਏਤ੍ਥ ਵਿਕ੍ਖਮ੍ਭਨਵਿਮੁਤ੍ਤਿ, ਤਦਙ੍ਗਵਿਮੁਤ੍ਤਿ, ਸਮੁਚ੍ਛੇਦਵਿਮੁਤ੍ਤਿ, ਪਟਿਪਸ੍ਸਦ੍ਧਿਵਿਮੁਤ੍ਤਿ, ਨਿਸ੍ਸਰਣਵਿਮੁਤ੍ਤੀਤਿ ਪਞ੍ਚਵਿਧਾ ਵਿਮੁਤ੍ਤਿ. ਤਤ੍ਥ ਅਟ੍ਠ ਸਮਾਪਤ੍ਤਿਯੋ ਸਯਂ ਵਿਕ੍ਖਮ੍ਭਿਤੇਹਿ ਨੀਵਰਣਾਦੀਹਿ ਵਿਮੁਤ੍ਤਤ੍ਤਾ ਵਿਕ੍ਖਮ੍ਭਨਵਿਮੁਤ੍ਤੀਤਿ ਸਙ੍ਖਂ ਗਚ੍ਛਨ੍ਤਿ. ਅਨਿਚ੍ਚਾਨੁਪਸ੍ਸਨਾਦਿਕਾ ਸਤ੍ਤ ਅਨੁਪਸ੍ਸਨਾ ਸਯਂ ਤਸ੍ਸ ਤਸ੍ਸ ਪਚ੍ਚਨੀਕਵਸੇਨ ਪਰਿਚ੍ਚਤ੍ਤਾਹਿ ਨਿਚ੍ਚਸਞ੍ਞਾਦੀਹਿ ਵਿਮੁਤ੍ਤਤ੍ਤਾ ਤਦਙ੍ਗਵਿਮੁਤ੍ਤੀਤਿ ਸਙ੍ਖਂ ਗਚ੍ਛਨ੍ਤਿ. ਚਤ੍ਤਾਰੋ ਅਰਿਯਮਗ੍ਗਾ ਸਯਂ ਸਮੁਚ੍ਛਿਨ੍ਨੇਹਿ ਕਿਲੇਸੇਹਿ ਵਿਮੁਤ੍ਤਤ੍ਤਾ ਸਮੁਚ੍ਛੇਦਵਿਮੁਤ੍ਤੀਤਿ ਸਙ੍ਖਂ ਗਚ੍ਛਨ੍ਤਿ. ਚਤ੍ਤਾਰਿ ਸਾਮਞ੍ਞਫਲਾਨਿ ਮਗ੍ਗਾਨੁਭਾਵੇਨ ਕਿਲੇਸਾਨਂ ਪਟਿਪਸ੍ਸਦ੍ਧਨ੍ਤੇ ਉਪ੍ਪਨ੍ਨਤ੍ਤਾ ਪਟਿਪਸ੍ਸਦ੍ਧਿਵਿਮੁਤ੍ਤੀਤਿ ਸਙ੍ਖਂ ਗਚ੍ਛਨ੍ਤਿ. ਨਿਬ੍ਬਾਨਂ ਸਬ੍ਬਕਿਲੇਸੇਹਿ ਨਿਸ੍ਸਟਤ੍ਤਾ ਅਪਗਤਤ੍ਤਾ ਦੂਰੇ ਠਿਤਤ੍ਤਾ ਨਿਸ੍ਸਰਣਵਿਮੁਤ੍ਤੀਤਿ ਸਙ੍ਖਂ ਗਤਂ. ਇਤਿ ਇਮਾਸਂ ਪਞ੍ਚਨ੍ਨਂ ਵਿਮੁਤ੍ਤੀਨਂ ਵਸੇਨ ਏਵਂ ਵਿਮੁਤ੍ਤਾਤਿ ਏਤ੍ਥ ਅਤ੍ਥੋ ਦਟ੍ਠਬ੍ਬੋ.

ਕਿਂ ਪਨ ਤੇ ਸਾਰਿਪੁਤ੍ਤ ਯੇ ਤੇ ਭਵਿਸ੍ਸਨ੍ਤੀਤਿ ਅਤੀਤਾ ਤਾਵ ਨਿਰੁਦ੍ਧਾ ਅਪਣ੍ਣਤ੍ਤਿਕਭਾਵਂ ਗਤਾ ਦੀਪਸਿਖਾ ਵਿਯ ਨਿਬ੍ਬੁਤਾ, ਏਵਂ ਨਿਰੁਦ੍ਧੇ ਅਪਣ੍ਣਤ੍ਤਿਕਭਾਵਂ ਗਤੇ ਤ੍ਵਂ ਕਥਂ ਜਾਨਿਸ੍ਸਸਿ, ਅਨਾਗਤਬੁਦ੍ਧਾਨਂ ਪਨ ਗੁਣਾ ਕਿਂ ਤਯਾ ਅਤ੍ਤਨੋ ਚਿਤ੍ਤੇਨ ਪਰਿਚ੍ਛਿਨ੍ਦਿਤ੍ਵਾ ਵਿਦਿਤਾਤਿ ਪੁਚ੍ਛਨ੍ਤੋ ਏਵਮਾਹ.

ਕਿਂ ਪਨ ਤ੍ਯਾਹਂ ਸਾਰਿਪੁਤ੍ਤ ਏਤਰਹੀਤਿ ਅਨਾਗਤਾਪਿ ਬੁਦ੍ਧਾ ਅਜਾਤਾ ਅਨਿਬ੍ਬਤ੍ਤਾ ਅਨੁਪ੍ਪਨ੍ਨਾ, ਤੇ ਕਥਂ ਜਾਨਿਸ੍ਸਸਿ. ਤੇਸਞ੍ਹਿ ਜਾਨਨਂ ਅਪਦੇ ਆਕਾਸੇ ਪਦਦਸ੍ਸਨਂ ਵਿਯ ਹੋਤਿ. ਇਦਾਨਿ ਮਯਾ ਸਦ੍ਧਿਂ ਏਕਵਿਹਾਰੇ ਵਸਸਿ, ਏਕਤੋ ਭਿਕ੍ਖਾਯ ਚਰਸਿ, ਧਮ੍ਮਦੇਸਨਾਕਾਲੇ ਦਕ੍ਖਿਣਪਸ੍ਸੇ ਨਿਸੀਦਸਿ, ਕਿਂ ਪਨ ਮਯ੍ਹਂ ਗੁਣਾ ਅਤ੍ਤਨੋ ਚੇਤਸਾ ਪਰਿਚ੍ਛਿਨ੍ਦਿਤ੍ਵਾ ਵਿਦਿਤਾ ਤਯਾਤਿ ਅਨੁਯੁਞ੍ਜਨ੍ਤੋ ਏਵਮਾਹ. ਥੇਰੋ ਪਨ ਪੁਚ੍ਛਿਤਪੁਚ੍ਛਿਤੇ ‘‘ਨੋ ਹੇਤਂ ਭਨ੍ਤੇ’’ਤਿ ਪਟਿਕ੍ਖਿਪਤਿ.

ਥੇਰਸ੍ਸ ਚ ਵਿਦਿਤਮ੍ਪਿ ਅਤ੍ਥਿ, ਅਵਿਦਿਤਮ੍ਪਿ. ਕਿਂ ਸੋ ਅਤ੍ਤਨੋ ਵਿਦਿਤਟ੍ਠਾਨੇ ਪਟਿਕ੍ਖੇਪਂ ਕਰੋਤਿ, ਅਵਿਦਿਤਟ੍ਠਾਨੇਤਿ? ਵਿਦਿਤਟ੍ਠਾਨੇ ਨ ਕਰੋਤਿ, ਅਵਿਦਿਤਟ੍ਠਾਨੇਯੇਵ ਕਰੋਤਿ. ਥੇਰੋ ਕਿਰ ਅਨੁਯੋਗੇ ਆਰਦ੍ਧੇ ਏਵਂ ਅਞ੍ਞਾਸਿ ‘‘ਨਾਯਂ ਅਨੁਯੋਗੋ ਸਾਵਕਪਾਰਮੀਞਾਣੇ, ਸਬ੍ਬਞ੍ਞੁਤਞ੍ਞਾਣੇ ਪਨ ਅਯਂ ਅਨੁਯੋਗੋ’’ਤਿ ਅਤ੍ਤਨੋ ਸਾਵਕਪਾਰਮੀਞਾਣੇ ਪਟਿਕ੍ਖੇਪਂ ਅਕਤ੍ਵਾਵ ਅਵਿਦਿਤਟ੍ਠਾਨੇ ਸਬ੍ਬਞ੍ਞੁਤਞ੍ਞਾਣੇ ਪਟਿਕ੍ਖੇਪਂ ਕਰੋਤਿ. ਤੇਨ ਇਦਮ੍ਪਿ ਦੀਪੇਤਿ – ਭਗਵਾ ਮਯ੍ਹਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾਨਂ ਬੁਦ੍ਧਾਨਂ ਸੀਲਸਮਾਧਿਪਞ੍ਞਾਵਿਮੁਤ੍ਤਿਕਾਰਣਜਾਨਨਸਮਤ੍ਥਂ ਸਬ੍ਬਞ੍ਞੁਤਞ੍ਞਾਣਂ ਨਤ੍ਥੀਤਿ.

ਏਤ੍ਥਾਤਿ ਏਤੇਸੁ ਅਤੀਤਾਦਿਭੇਦੇਸੁ ਬੁਦ੍ਧੇਸੁ. ਅਥ ਕਿਞ੍ਚਰਹੀਤਿ ਅਥ ਕਸ੍ਮਾ ਏਵਂ ਞਾਣੇ ਅਸਤਿ ਤਯਾ ਏਵਂ ਕਥਿਤਨ੍ਤਿ ਵਦਤਿ. ਧਮ੍ਮਨ੍ਵਯੋਤਿ ਧਮ੍ਮਸ੍ਸ ਪਚ੍ਚਕ੍ਖਤੋ ਞਾਣਸ੍ਸ ਅਨੁਯੋਗਂ ਅਨੁਗਨ੍ਤ੍ਵਾ ਉਪ੍ਪਨ੍ਨਂ ਅਨੁਮਾਨਞਾਣਂ ਨਯਗ੍ਗਾਹੋ ਵਿਦਿਤੋ, ਸਾਵਕਪਾਰਮੀਞਾਣੇ ਠਤ੍ਵਾਵ ਇਮਿਨਾ ਆਕਾਰੇਨ ਜਾਨਾਮਿ ਭਗਵਾਤਿ ਵਦਤਿ. ਥੇਰਸ੍ਸ ਹਿ ਨਯਗ੍ਗਾਹੋ ਅਪ੍ਪਮਾਣੋ ਅਪਰਿਯਨ੍ਤੋ. ਯਥਾ ਚ ਸਬ੍ਬਞ੍ਞੁਤਞ੍ਞਾਣਸ੍ਸ ਪਮਾਣਂ ਵਾ ਪਰਿਯਨ੍ਤੋ ਵਾ ਨਤ੍ਥਿ, ਏਵਂ ਧਮ੍ਮਸੇਨਾਪਤਿਨੋ ਨਯਗ੍ਗਾਹਸ੍ਸ. ਤੇਨ ਸੋ – ‘‘ਇਮਿਨਾ ਏਵਂਵਿਧੋ ਇਮਿਨਾ ਏਵਂਵਿਧੋ, ਇਮਿਨਾ ਅਨੁਤ੍ਤਰੋ ਇਮਿਨਾ ਅਨੁਤ੍ਤਰੋ ਸਤ੍ਥਾ’’ਤਿ ਜਾਨਾਤਿ. ਥੇਰਸ੍ਸ ਹਿ ਨਯਗ੍ਗਾਹੋ ਸਬ੍ਬਞ੍ਞੁਤਞ੍ਞਾਣਗਤਿਕੋ ਏਵ.

ਇਦਾਨਿ ਤਂ ਨਯਗ੍ਗਾਹਂ ਪਾਕਟਂ ਕਾਤੁਂ ਉਪਮਂ ਦਸ੍ਸੇਨ੍ਤੋ ਸੇਯ੍ਯਥਾਪਿ ਭਨ੍ਤੇਤਿਆਦਿਮਾਹ. ਤਤ੍ਥ ਯਸ੍ਮਾ ਮਜ੍ਝਿਮਦੇਸੇ ਨਗਰਸ੍ਸ ਉਦ੍ਧਾਪਪਾਕਾਰਾਦੀਨਿ ਥਿਰਾਨਿ ਵਾ ਹੋਨ੍ਤੁ ਦੁਬ੍ਬਲਾਨਿ ਵਾ, ਸਬ੍ਬਸੋ ਵਾ ਪਨ ਮਾ ਹੋਨ੍ਤੁ, ਚੋਰਾਨਂ ਆਸਙ੍ਕਾ ਨ ਹੋਤਿ. ਤਸ੍ਮਾ ਤਂ ਅਗ੍ਗਹੇਤ੍ਵਾ ਪਚ੍ਚਨ੍ਤਿਮਂ ਨਗਰਨ੍ਤਿ ਆਹ. ਦਲ਼੍ਹੁਦ੍ਧਾਪਨ੍ਤਿ ਥਿਰਮੂਲਪਾਕਾਰਂ. ਦਲ਼੍ਹਪਾਕਾਰਤੋਰਣਨ੍ਤਿ ਥਿਰਪਾਕਾਰਞ੍ਚੇਵ ਥਿਰਪਿਟ੍ਠਸਙ੍ਘਾਟਞ੍ਚ. ਏਕਦ੍ਵਾਰਨ੍ਤਿ ਕਸ੍ਮਾ ਆਹ? ਬਹੁਦ੍ਵਾਰੇ ਹਿ ਨਗਰੇ ਬਹੂਹਿ ਪਣ੍ਡਿਤਦੋਵਾਰਿਕੇਹਿ ਭਵਿਤਬ੍ਬਂ, ਏਕਦ੍ਵਾਰੇਵ ਏਕੋ ਵਟ੍ਟਤਿ. ਥੇਰਸ੍ਸ ਚ ਪਞ੍ਞਾਯ ਸਦਿਸੋ ਅਞ੍ਞੋ ਨਤ੍ਥਿ, ਤਸ੍ਮਾ ਅਤ੍ਤਨੋ ਪਣ੍ਡਿਤਭਾਵਸ੍ਸ ਓਪਮ੍ਮਤ੍ਥਂ ਏਕਂਯੇਵ ਦੋਵਾਰਿਕਂ ਦਸ੍ਸੇਤੁਂ ‘‘ਏਕਦ੍ਵਾਰ’’ਨ੍ਤਿ ਆਹ.

ਪਣ੍ਡਿਤੋਤਿ ਪਣ੍ਡਿਚ੍ਚੇਨ ਸਮਨ੍ਨਾਗਤੋ. ਬ੍ਯਤ੍ਤੋਤਿ ਵੇਯ੍ਯਤ੍ਤਿਯੇਨ ਸਮਨ੍ਨਾਗਤੋ ਵਿਸਦਞਾਣੋ. ਮੇਧਾਵੀਤਿ ਠਾਨੁਪ੍ਪਤ੍ਤਿਕਪਞ੍ਞਾਸਙ੍ਖਾਤਾਯ ਮੇਧਾਯ ਸਮਨ੍ਨਾਗਤੋ. ਅਨੁਪਰਿਯਾਯਪਥਨ੍ਤਿ ਅਨੁਪਰਿਯਾਯਨਾਮਕਂ ਪਾਕਾਰਮਗ੍ਗਂ. ਪਾਕਾਰਸਨ੍ਧਿਨ੍ਤਿ ਦ੍ਵਿਨ੍ਨਂ ਇਟ੍ਠਕਾਨਂ ਅਪਗਤਟ੍ਠਾਨਂ. ਪਾਕਾਰਵਿਵਰਨ੍ਤਿ ਪਾਕਾਰਸ੍ਸ ਛਿਨ੍ਨਟ੍ਠਾਨਂ. ਚੇਤਸੋ ਉਪਕ੍ਕਿਲੇਸੇਤਿ ਪਞ੍ਚਨੀਵਰਣਾ ਚਿਤ੍ਤਂ ਉਪਕ੍ਕਿਲਿਸ੍ਸਨ੍ਤਿ ਕਿਲਿਟ੍ਠਂ ਕਰੋਨ੍ਤਿ ਉਪਤਾਪੇਨ੍ਤਿ ਵਿਹੇਠੇਨ੍ਤਿ, ਤਸ੍ਮਾ ‘‘ਚੇਤਸੋ ਉਪਕ੍ਕਿਲੇਸਾ’’ਤਿ ਵੁਚ੍ਚਨ੍ਤਿ. ਪਞ੍ਞਾਯ ਦੁਬ੍ਬਲੀਕਰਣੇਤਿ ਨੀਵਰਣਾ ਉਪ੍ਪਜ੍ਜਮਾਨਾ ਅਨੁਪ੍ਪਨ੍ਨਾਯ ਪਞ੍ਞਾਯ ਉਪ੍ਪਜ੍ਜਿਤੁਂ ਨ ਦੇਨ੍ਤਿ, ਤਸ੍ਮਾ ‘‘ਪਞ੍ਞਾਯ ਦੁਬ੍ਬਲੀਕਰਣਾ’’ਤਿ ਵੁਚ੍ਚਨ੍ਤਿ. ਸੁਪਤਿਟ੍ਠਿਤਚਿਤ੍ਤਾਤਿ ਚਤੂਸੁ ਸਤਿਪਟ੍ਠਾਨੇਸੁ ਸੁਟ੍ਠੁ ਠਪਿਤਚਿਤ੍ਤਾ ਹੁਤ੍ਵਾ. ਸਤ੍ਤ ਬੋਜ੍ਝਙ੍ਗੇ ਯਥਾਭੂਤਨ੍ਤਿ ਸਤ੍ਤ ਬੋਜ੍ਝਙ੍ਗੇ ਯਥਾਸਭਾਵੇਨ ਭਾਵੇਤ੍ਵਾ. ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਨ੍ਤਿ ਅਰਹਤ੍ਤਂ ਸਬ੍ਬਞ੍ਞੁਤਞ੍ਞਾਣਂ ਪਟਿਵਿਜ੍ਝਿਂਸੂਤਿ ਦਸ੍ਸੇਤਿ.

ਅਪਿਚੇਤ੍ਥ ਸਤਿਪਟ੍ਠਾਨਾਤਿ ਵਿਪਸ੍ਸਨਾ, ਬੋਜ੍ਝਙ੍ਗਾ ਮਗ੍ਗੋ, ਅਨੁਤ੍ਤਰਸਮ੍ਮਾਸਮ੍ਬੋਧਿ ਅਰਹਤ੍ਤਂ. ਸਤਿਪਟ੍ਠਾਨਾਤਿ ਵਾ ਵਿਪਸ੍ਸਨਾ, ਬੋਜ੍ਝਙ੍ਗਾਮਿਸ੍ਸਕਾ, ਸਮ੍ਮਾਸਮ੍ਬੋਧਿ ਅਰਹਤ੍ਤਮੇਵ. ਦੀਘਭਾਣਕਮਹਾਸੀਵਤ੍ਥੇਰੋ ਪਨਾਹ ‘‘ਸਤਿਪਟ੍ਠਾਨੇ ਵਿਪਸ੍ਸਨਂ ਗਹੇਤ੍ਵਾ ਬੋਜ੍ਝਙ੍ਗੇ ਮਗ੍ਗੋ ਚ ਸਬ੍ਬਞ੍ਞੁਤਞ੍ਞਾਣਞ੍ਚਾਤਿ ਗਹਿਤੇ ਸੁਨ੍ਦਰੋ ਪਞ੍ਹੋ ਭਵੇਯ੍ਯ, ਨ ਪਨੇਵਂ ਗਹਿਤ’’ਨ੍ਤਿ. ਇਤਿ ਥੇਰੋ ਸਬ੍ਬਬੁਦ੍ਧਾਨਂ ਨੀਵਰਣਪ੍ਪਹਾਨੇ ਸਤਿਪਟ੍ਠਾਨਭਾਵਨਾਯ ਸਮ੍ਬੋਧਿਯਞ੍ਚ ਮਜ੍ਝੇ ਭਿਨ੍ਨਸੁਵਣ੍ਣਰਜਤਾਨਂ ਵਿਯ ਨਾਨਤ੍ਤਾਭਾਵਂ ਦਸ੍ਸੇਤਿ.

ਇਧ ਠਤ੍ਵਾ ਉਪਮਾ ਸਂਸਨ੍ਦੇਤਬ੍ਬਾ – ਆਯਸ੍ਮਾ ਹਿ ਸਾਰਿਪੁਤ੍ਤੋ ਪਚ੍ਚਨ੍ਤਨਗਰਂ ਦਸ੍ਸੇਸਿ, ਪਾਕਾਰਂ ਦਸ੍ਸੇਸਿ, ਅਨੁਪਰਿਯਾਯਪਥਂ ਦਸ੍ਸੇਸਿ, ਦ੍ਵਾਰਂ ਦਸ੍ਸੇਸਿ, ਪਣ੍ਡਿਤਦੋਵਾਰਿਕਂ ਦਸ੍ਸੇਸਿ, ਨਗਰਂ ਪਵਿਸਨਕਨਿਕ੍ਖਮਨਕੇ ਓਲ਼ਾਰਿਕੇ ਪਾਣੇ ਦਸ੍ਸੇਸਿ, ਦੋਵਾਰਿਕਸ੍ਸ ਤੇਸਂ ਪਾਣਾਨਂ ਪਾਕਟਭਾਵਂ ਦਸ੍ਸੇਸਿ. ਤਤ੍ਥ ਕਿਂ ਕੇਨ ਸਦਿਸਨ੍ਤਿ ਚੇ? ਨਗਰਂ ਵਿਯ ਹਿ ਨਿਬ੍ਬਾਨਂ, ਪਾਕਾਰੋ ਵਿਯ ਸੀਲਂ, ਅਨੁਪਰਿਯਾਯਪਥੋ ਵਿਯ ਹਿਰੀ, ਦ੍ਵਾਰਂ ਵਿਯ ਅਰਿਯਮਗ੍ਗੋ, ਪਣ੍ਡਿਤਦੋਵਾਰਿਕੋ ਵਿਯ ਧਮ੍ਮਸੇਨਾਪਤਿ, ਨਗਰਂ ਪਵਿਸਨਕਨਿਕ੍ਖਮਨਕਾ ਓਲ਼ਾਰਿਕਪਾਣਾ ਵਿਯ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾ ਬੁਦ੍ਧਾ, ਦੋਵਾਰਿਕਸ੍ਸ ਤੇਸਂ ਪਾਣਾਨਂ ਪਾਕਟਭਾਵੋ ਵਿਯ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾਨਂ ਬੁਦ੍ਧਾਨਂ ਸੀਲਸਮਥਾਦੀਹਿ ਪਾਕਟਭਾਵੋ. ਏਤ੍ਤਾਵਤਾ ਥੇਰੇਨ ਭਗਵਤੋ – ‘‘ਏਵਮਹਂ ਸਾਵਕਪਾਰਮੀਞਾਣੇ ਠਤ੍ਵਾ ਧਮ੍ਮਨ੍ਵਯੇਨ ਨਯਗ੍ਗਾਹੇਨ ਜਾਨਾਮੀ’’ਤਿ ਅਤ੍ਤਨੋ ਸੀਹਨਾਦਸ੍ਸ ਅਨੁਯੋਗੋ ਦਿਨ੍ਨੋ ਹੋਤਿ.

ਤਸ੍ਮਾਤਿ ਯਸ੍ਮਾ ‘‘ਨ ਖੋ ਮੇਤਂ, ਭਨ੍ਤੇ, ਅਤੀਤਾਨਾਗਤਪਚ੍ਚੁਪ੍ਪਨ੍ਨੇਸੁ ਅਰਹਨ੍ਤੇਸੁ ਸਮ੍ਮਾਸਮ੍ਬੁਦ੍ਧੇਸੁ ਚੇਤੋਪਰਿਯਞਾਣਂ ਅਤ੍ਥਿ, ਅਪਿਚ ਧਮ੍ਮਨ੍ਵਯੋ ਵਿਦਿਤੋ’’ਤਿ ਵਦਤਿ, ਤਸ੍ਮਾ. ਅਭਿਕ੍ਖਣਂ ਭਾਸੇਯ੍ਯਾਸੀਤਿ ਪੁਨਪ੍ਪੁਨਂ ਭਾਸੇਯ੍ਯਾਸਿ, ‘‘ਪੁਬ੍ਬਣ੍ਹੇ ਮੇ ਕਥਿਤ’’ਨ੍ਤਿ ਮਾ ਮਜ੍ਝਨ੍ਹਿਕਾਦੀਸੁ ਨ ਕਥਯਿਤ੍ਥ, ‘‘ਅਜ੍ਜ ਵਾ ਮੇ ਕਥਿਤ’’ਨ੍ਤਿ ਮਾ ਪਰਦਿਵਸਾਦੀਸੁ ਨ ਕਥਯਿਤ੍ਥਾਤਿ ਅਤ੍ਥੋ. ਸਾ ਪਹੀਯਿਸ੍ਸਤੀਤਿ ‘‘ਸਾਰਿਪੁਤ੍ਤਸਦਿਸੋਪਿ ਨਾਮ ਞਾਣਜਵਨਸਮ੍ਪਨ੍ਨੋ ਸਾਵਕੋ ਬੁਦ੍ਧਾਨਂ ਚਿਤ੍ਤਾਚਾਰਂ ਜਾਨਿਤੁਂ ਨ ਸਕ੍ਕੋਤਿ, ਏਵਂ ਅਪ੍ਪਮੇਯ੍ਯਾ ਤਥਾਗਤਾ’’ਤਿ ਚਿਨ੍ਤੇਨ੍ਤਾਨਂ ਯਾ ਤਥਾਗਤੇ ਕਙ੍ਖਾ ਵਾ ਵਿਮਤਿ ਵਾ, ਸਾ ਪਹੀਯਿਸ੍ਸਤੀਤਿ.

੩. ਚੁਨ੍ਦਸੁਤ੍ਤਵਣ੍ਣਨਾ

੩੭੯. ਤਤਿਯੇ ਮਗਧੇਸੂਤਿ ਏਵਂਨਾਮਕੇ ਜਨਪਦੇ. ਨਾਲਕਗਾਮਕੇਤਿ ਰਾਜਗਹਸ੍ਸ ਅਵਿਦੂਰੇ ਅਤ੍ਤਨੋ ਕੁਲਸਨ੍ਤਕੇ ਏਵਂਨਾਮਕੇ ਗਾਮੇ. ਚੁਨ੍ਦੋ ਸਮਣੁਦ੍ਦੇਸੋਤਿ ਅਯਂ ਥੇਰੋ ਧਮ੍ਮਸੇਨਾਪਤਿਸ੍ਸ ਕਨਿਟ੍ਠਭਾਤਿਕੋ, ਤਂ ਭਿਕ੍ਖੂ ਅਨੁਪਸਮ੍ਪਨ੍ਨਕਾਲੇ ‘‘ਚੁਨ੍ਦੋ ਸਮਣੁਦ੍ਦੇਸੋ’’ਤਿ ਸਮੁਦਾਚਰਿਤ੍ਵਾ ਥੇਰਕਾਲੇਪਿ ਤਥੇਵ ਸਮੁਦਾਚਰਿਂਸੁ. ਤੇਨ ਵੁਤ੍ਤਂ ‘‘ਚੁਨ੍ਦੋ ਸਮਣੁਦ੍ਦੇਸੋ’’ਤਿ. ਉਪਟ੍ਠਾਕੋ ਹੋਤੀਤਿ ਮੁਖੋਦਕਦਨ੍ਤਕਟ੍ਠਦਾਨੇਨ ਚੇਵ ਪਰਿਵੇਣਸਮ੍ਮਜ੍ਜਨ-ਪਿਟ੍ਠਿਪਰਿਕਮ੍ਮਕਰਣ-ਪਤ੍ਤਚੀਵਰਗ੍ਗਹਣੇਨ ਚ ਉਪਟ੍ਠਾਨਕਰੋ ਹੋਤਿ. ਪਰਿਨਿਬ੍ਬਾਯੀਤਿ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬੁਤੋ. ਕਤਰਸ੍ਮਿਂ ਕਾਲੇਤਿ? ਭਗਵਤੋ ਪਰਿਨਿਬ੍ਬਾਨਸਂਵਚ੍ਛਰੇ.

ਤਤ੍ਰਾਯਂ ਅਨੁਪੁਬ੍ਬਿਕਥਾ – ਭਗਵਾ ਕਿਰ ਵੁਤ੍ਥਵਸ੍ਸੋ ਵੇਲ਼ੁਵਗਾਮਕਾ ਨਿਕ੍ਖਮਿਤ੍ਵਾ ‘‘ਸਾਵਤ੍ਥਿਂ ਗਮਿਸ੍ਸਾਮੀ’’ਤਿ ਆਗਤਮਗ੍ਗੇਨੇਵ ਪਟਿਨਿਵਤ੍ਤਨ੍ਤੋ ਅਨੁਪੁਬ੍ਬੇਨ ਸਾਵਤ੍ਥਿਂ ਪਤ੍ਵਾ ਜੇਤਵਨਂ ਪਾਵਿਸਿ. ਧਮ੍ਮਸੇਨਾਪਤਿ ਭਗਵਤੋ ਵਤ੍ਤਂ ਦਸ੍ਸੇਤ੍ਵਾ ਦਿਵਾਟ੍ਠਾਨਂ ਗਤੋ, ਸੋ ਤਤ੍ਥ ਅਨ੍ਤੇਵਾਸਿਕੇਸੁ ਵਤ੍ਤਂ ਦਸ੍ਸੇਤ੍ਵਾ ਪਟਿਕ੍ਕਨ੍ਤੇਸੁ ਦਿਵਾਟ੍ਠਾਨਂ ਸਮ੍ਮਜ੍ਜਿਤ੍ਵਾ ਚਮ੍ਮਖਣ੍ਡਂ ਪਞ੍ਞਾਪੇਤ੍ਵਾ ਪਾਦੇ ਪਕ੍ਖਾਲੇਤ੍ਵਾ ਪਲ੍ਲਙ੍ਕਂ ਆਭੁਜਿਤ੍ਵਾ ਫਲਸਮਾਪਤ੍ਤਿਂ ਪਾਵਿਸਿ. ਅਥਸ੍ਸ ਯਥਾ ਪਰਿਚ੍ਛੇਦੇਨ ਤਤੋ ਵੁਟ੍ਠਿਤਸ੍ਸ ਅਯਂ ਪਰਿਵਿਤਕ੍ਕੋ ਉਦਪਾਦਿ ‘‘ਬੁਦ੍ਧਾ ਨੁ ਖੋ ਪਠਮਂ ਪਰਿਨਿਬ੍ਬਾਯਨ੍ਤਿ, ਉਦਾਹੁ ਅਗ੍ਗਸਾਵਕਾਤਿ, ਤਤੋ ‘‘ਅਗ੍ਗਸਾਵਕਾ ਪਠਮ’’ਨ੍ਤਿ ਞਤ੍ਵਾ ਅਤ੍ਤਨੋ ਆਯੁਸਙ੍ਖਾਰਂ ਓਲੋਕੇਸਿ. ਸੋ ‘‘ਸਤ੍ਤਾਹਮੇਵ ਮੇ ਆਯੁਸਙ੍ਖਾਰਾ ਪਵਤ੍ਤਿਸ੍ਸਨ੍ਤੀ’’ਤਿ ਞਤ੍ਵਾ ‘‘ਕਤ੍ਥ ਪਰਿਨਿਬ੍ਬਾਯਿਸ੍ਸਾਮੀ’’ਤਿ ਚਿਨ੍ਤੇਸਿ.

ਤਤੋ ‘‘ਰਾਹੁਲੋ ਤਾਵਤਿਂਸੇਸੁ ਪਰਿਨਿਬ੍ਬੁਤੋ, ਅਞ੍ਞਾਸਿਕੋਣ੍ਡਞ੍ਞਤ੍ਥੇਰੋ ਛਦ੍ਦਨ੍ਤਦਹੇ, ਅਹਂ ਕਤ੍ਥ ਪਰਿਨਿਬ੍ਬਾਯਿਸ੍ਸਾਮੀ’’ਤਿ ਪੁਨਪ੍ਪੁਨਂ ਚਿਨ੍ਤੇਨ੍ਤੋ ਮਾਤਰਂ ਆਰਬ੍ਭ ਸਤਿਂ ਉਪ੍ਪਾਦੇਸਿ – ‘‘ਮਯ੍ਹਂ ਮਾਤਾ ਸਤ੍ਤਨ੍ਨਂ ਅਰਹਨ੍ਤਾਨਂ ਮਾਤਾ ਹੁਤ੍ਵਾਪਿ ਬੁਦ੍ਧਧਮ੍ਮਸਙ੍ਘੇਸੁ ਅਪ੍ਪਸਨ੍ਨਾ, ਅਤ੍ਥਿ ਨੁ ਖੋ ਤਸ੍ਸਾ ਉਪਨਿਸ੍ਸਯੋ, ਨਤ੍ਥਿ ਨੁ ਖੋ’’ਤਿ. ਸੋਤਾਪਤ੍ਤਿਮਗ੍ਗਸ੍ਸ ਉਪਨਿਸ੍ਸਯਂ ਦਿਸ੍ਵਾ ‘‘ਕਸ੍ਸ ਦੇਸਨਾਯ ਅਭਿਸਮਯੋ ਭਵਿਸ੍ਸਤੀ’’ਤਿ ਓਲੋਕੇਨ੍ਤੋ ‘‘ਮਮੇਵ ਧਮ੍ਮਦੇਸਨਾਯ ਭਵਿਸ੍ਸਤਿ, ਨ ਅਞ੍ਞਸ੍ਸ. ਸਚੇ ਖੋ ਪਨਾਹਂ ਅਪ੍ਪੋਸ੍ਸੁਕ੍ਕੋ ਭਵੇਯ੍ਯਂ, ਭਵਿਸ੍ਸਨ੍ਤਿ ਮੇ ਵਤ੍ਤਾਰੋ – ‘‘ਸਾਰਿਪੁਤ੍ਤਤ੍ਥੇਰੋ ਅਵਸੇਸਜਨਾਨਮ੍ਪਿ ਅਵਸ੍ਸਯੋ ਹੋਤਿ. ਤਥਾ ਹਿਸ੍ਸ ਸਮਚਿਤ੍ਤਸੁਤ੍ਤਨ੍ਤਦੇਸਨਾਦਿਵਸੇ (ਅ. ਨਿ. ੨.੩੩-੩੭) ਕੋਟਿਸਤਸਹਸ੍ਸਦੇਵਤਾ ਅਰਹਤ੍ਤਂ ਪਤ੍ਤਾ, ਤਯੋ ਮਗ੍ਗੇ ਪਟਿਵਿਦ੍ਧਦੇਵਤਾਨਂ ਗਣਨਾ ਨਤ੍ਥਿ, ਅਞ੍ਞੇਸੁ ਚ ਠਾਨੇਸੁ ਅਨੇਕਾ ਅਭਿਸਮਯਾ ਦਿਸ੍ਸਨ੍ਤਿ, ਥੇਰੇ ਚ ਚਿਤ੍ਤਂ ਪਸਾਦੇਤ੍ਵਾ ਸਗ੍ਗੇ ਨਿਬ੍ਬਤ੍ਤਾਨੇਵ ਅਸੀਤਿ ਕੁਲਸਹਸ੍ਸਾਨਿ, ਸੋ ਦਾਨਿ ਸਕਮਾਤੁਮਿਚ੍ਛਾਦਸ੍ਸਨਮਤ੍ਤਮ੍ਪਿ ਹਰਿਤੁਂ ਨਾਸਕ੍ਖੀ’’ਤਿ. ਤਸ੍ਮਾ ਮਾਤਰਂ ਮਿਚ੍ਛਾਦਸ੍ਸਨਾ ਮੋਚੇਤ੍ਵਾ ਜਾਤੋਵਰਕੇਯੇਵ ਪਰਿਨਿਬ੍ਬਾਯਿਸ੍ਸਾਮੀ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ‘‘ਅਜ੍ਜੇਵ ਭਗਵਨ੍ਤਂ ਅਨੁਜਾਨਾਪੇਤ੍ਵਾ ਨਿਕ੍ਖਮਿਸ੍ਸਾਮੀ’’ਤਿ ਚੁਨ੍ਦਤ੍ਥੇਰਂ ਆਮਨ੍ਤੇਸਿ – ‘‘ਆਵੁਸੋ, ਚੁਨ੍ਦ, ਅਮ੍ਹਾਕਂ ਪਞ੍ਚਸਤਾਯ ਭਿਕ੍ਖੁਪਰਿਸਾਯ ਸਞ੍ਞਂ ਦੇਹਿ. ‘ਗਣ੍ਹਥਾਵੁਸੋ ਪਤ੍ਤਚੀਵਰਾਨਿ, ਧਮ੍ਮਸੇਨਾਪਤਿ ਨਾਲਕਗਾਮਂ ਗਨ੍ਤੁਕਾਮੋ’’’ਤਿ. ਥੇਰੋ ਤਥਾ ਅਕਾਸਿ.

ਭਿਕ੍ਖੂ ਸੇਨਾਸਨਂ ਸਂਸਾਮੇਤ੍ਵਾ ਪਤ੍ਤਚੀਵਰਮਾਦਾਯ ਥੇਰਸ੍ਸ ਸਨ੍ਤਿਕਂ ਅਗਮਂਸੁ. ਥੇਰੋ ਸੇਨਾਸਨਂ ਸਂਸਾਮੇਤ੍ਵਾ ਦਿਵਾਟ੍ਠਾਨਂ ਸਮ੍ਮਜ੍ਜਿਤ੍ਵਾ ਦਿਵਾਟ੍ਠਾਨਦ੍ਵਾਰੇ ਠਤ੍ਵਾ ਦਿਵਾਟ੍ਠਾਨਂ ਓਲੋਕੇਤ੍ਵਾ ‘‘ਇਦਂ ਦਾਨਿ ਪਚ੍ਛਿਮਦਸ੍ਸਨਂ, ਪੁਨ ਆਗਮਨਂ ਨਤ੍ਥੀ’’ਤਿ ਪਞ੍ਚਸਤਭਿਕ੍ਖੂਹਿ ਪਰਿਵੁਤੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਭਗਵਨ੍ਤਂ ਏਤਦਵੋਚ ‘‘ਅਨੁਜਾਨਾਤੁ ਮੇ ਭਨ੍ਤੇ ਭਗਵਾ, ਅਨੁਜਾਨਾਤੁ ਸੁਗਤੋ. ਪਰਿਨਿਬ੍ਬਾਨਕਾਲੋ ਮੇ, ਓਸ੍ਸਟ੍ਠੋ ਮੇ ਆਯੁਸਙ੍ਖਾਰੋ’’ਤਿ. ਬੁਦ੍ਧਾ ਪਨ ਯਸ੍ਮਾ ‘‘ਪਰਿਨਿਬ੍ਬਾਹੀ’’ਤਿ ਵੁਤ੍ਤੇ ਮਰਣਵਣ੍ਣਂ ਸਂਵਣ੍ਣੇਨ੍ਤੀਤਿ, ‘‘ਮਾ ਪਰਿਨਿਬ੍ਬਾਹੀ’’ਤਿ ਵੁਤ੍ਤੇ ਵਟ੍ਟਸ੍ਸ ਗੁਣਂ ਕਥੇਨ੍ਤੀਤਿ ਮਿਚ੍ਛਾਦਿਟ੍ਠਿਕਾ ਦੋਸਂ ਆਰੋਪੇਸ੍ਸਨ੍ਤਿ, ਤਸ੍ਮਾ ਤਦੁਭਯਮ੍ਪਿ ਨ ਵਦਨ੍ਤਿ. ਤੇਨ ਨਂ ਭਗਵਾ – ‘‘ਕਤ੍ਥ ਪਰਿਨਿਬ੍ਬਾਯਿਸ੍ਸਸਿ ਸਾਰਿਪੁਤ੍ਤਾ’’ਤਿ ਵਤ੍ਵਾ – ‘‘ਅਤ੍ਥਿ, ਭਨ੍ਤੇ, ਮਗਧੇਸੁ ਨਾਲਕਗਾਮੇ ਜਾਤੋਵਰਕੋ, ਤਤ੍ਥਾਹਂ ਪਰਿਨਿਬ੍ਬਾਯਿਸ੍ਸਾਮੀ’’ਤਿ ਵੁਤ੍ਤੇ – ‘‘ਯਸ੍ਸ ਦਾਨਿ ਤ੍ਵਂ, ਸਾਰਿਪੁਤ੍ਤ, ਕਾਲਂ ਮਞ੍ਞਸਿ, ਇਦਾਨਿ ਪਨ ਤੇ ਜੇਟ੍ਠਕਨਿਟ੍ਠਭਾਤਿਕਾਨਂ ਤਾਦਿਸਸ੍ਸ ਭਿਕ੍ਖੁਨੋ ਦਸ੍ਸਨਂ ਦੁਲ੍ਲਭਂ ਭਵਿਸ੍ਸਤਿ, ਦੇਸੇਹਿ ਨੇਸਂ ਧਮ੍ਮ’’ਨ੍ਤਿ ਆਹ.

ਥੇਰੋ – ‘‘ਸਤ੍ਥਾ ਮਯ੍ਹਂ ਇਦ੍ਧਿਵਿਕੁਬ੍ਬਨਪੁਬ੍ਬਙ੍ਗਮਂ ਧਮ੍ਮਦੇਸਨਂ ਪਚ੍ਚਾਸੀਸਤੀ’’ਤਿ ਞਤ੍ਵਾ ਭਗਵਨ੍ਤਂ ਵਨ੍ਦਿਤ੍ਵਾ ਤਾਲਪ੍ਪਮਾਣਂ ਆਕਾਸਂ ਅਬ੍ਭੁਗ੍ਗਨ੍ਤ੍ਵਾ ਓਰੁਯ੍ਹ ਦਸਬਲਸ੍ਸ ਪਾਦੇ ਵਨ੍ਦਿ, ਪੁਨ ਦ੍ਵਿਤਾਲਪ੍ਪਮਾਣਂ ਅਬ੍ਭੁਗ੍ਗਨ੍ਤ੍ਵਾ ਓਰੁਯ੍ਹ ਦਸਬਲਸ੍ਸ ਪਾਦੇ ਵਨ੍ਦਿ, ਏਤੇਨੁਪਾਯੇਨ ਸਤ੍ਤਤਾਲਪ੍ਪਮਾਣਂ ਅਬ੍ਭੁਗ੍ਗਨ੍ਤ੍ਵਾ ਅਨੇਕਾਨਿ ਪਾਟਿਹਾਰਿਯਸਤਾਨਿ ਦਸ੍ਸੇਨ੍ਤੋ ਧਮ੍ਮਕਥਂ ਆਰਭਿ. ਦਿਸ੍ਸਮਾਨੇਨਪਿ ਕਾਯੇਨ ਕਥੇਤਿ, ਅਦਿਸ੍ਸਮਾਨੇਨਪਿ. ਉਪਰਿਮੇਨ ਵਾ ਹੇਟ੍ਠਿਮੇਨ ਵਾ ਉਪਡ੍ਢਕਾਯੇਨ ਕਥੇਤਿ ਅਦਿਸ੍ਸਮਾਨੇਨਪਿ ਦਿਸ੍ਸਮਾਨੇਨਪਿ, ਕਾਲੇਨ ਚਨ੍ਦਵਣ੍ਣਂ ਦਸ੍ਸੇਤਿ, ਕਾਲੇਨ ਸੂਰਿਯਵਣ੍ਣਂ, ਕਾਲੇਨ ਪਬ੍ਬਤਵਣ੍ਣਂ, ਕਾਲੇਨ ਸਮੁਦ੍ਦਵਣ੍ਣਂ, ਕਾਲੇਨ ਚਕ੍ਕਵਤ੍ਤਿਰਾਜਾ ਹੋਤਿ, ਕਾਲੇਨ ਵੇਸ੍ਸਵਣਮਹਾਰਾਜਾ, ਕਾਲੇਨ ਸਕ੍ਕੋ ਦੇਵਰਾਜਾ, ਕਾਲੇਨ ਮਹਾਬ੍ਰਹ੍ਮਾਤਿ ਏਵਂ ਅਨੇਕਾਨਿ ਪਾਟਿਹਾਰਿਯਸਤਾਨਿ ਦਸ੍ਸੇਨ੍ਤੋ ਧਮ੍ਮਕਥਂ ਕਥੇਸਿ. ਸਕਲਨਗਰਂ ਸਨ੍ਨਿਪਤਿ. ਥੇਰੋ ਓਰੁਯ੍ਹ ਦਸਬਲਸ੍ਸ ਪਾਦੇ ਵਨ੍ਦਿਤ੍ਵਾ ਅਟ੍ਠਾਸਿ. ਅਥ ਨਂ ਸਤ੍ਥਾ ਆਹ – ‘‘ਕੋ ਨਾਮੋ ਅਯਂ ਸਾਰਿਪੁਤ੍ਤ ਧਮ੍ਮਪਰਿਯਾਯੋ’’ਤਿ. ਸੀਹਵਿਕੀਲ਼ਿਤੋ ਨਾਮ, ਭਨ੍ਤੇਤਿ. ਤਗ੍ਘ, ਸਾਰਿਪੁਤ੍ਤ, ਸੀਹਵਿਕੀਲ਼ਿਤੋ ਤਗ੍ਘ, ਸਾਰਿਪੁਤ੍ਤ, ਸੀਹਵਿਕੀਲ਼ਿਤੋਤਿ.

ਥੇਰੋ ਅਲਤ੍ਤਕਵਣ੍ਣੇ ਹਤ੍ਥੇ ਪਸਾਰੇਤ੍ਵਾ ਸਤ੍ਥੁ ਸੁਵਣ੍ਣਕਚ੍ਛਪਸਦਿਸੇ ਪਾਦੇ ਗੋਪ੍ਫਕੇਸੁ ਗਹੇਤ੍ਵਾ – ‘‘ਭਨ੍ਤੇ, ਇਮੇਸਂ ਪਾਦਾਨਂ ਵਨ੍ਦਨਤ੍ਥਾਯ ਕਪ੍ਪਸਤਸਹਸ੍ਸਾਧਿਕਂ ਅਸਙ੍ਖ੍ਯੇਯ੍ਯਂ ਪਾਰਮਿਯੋ ਪੂਰਿਤਾ, ਸੋ ਮੇ ਮਨੋਰਥੋ ਮਤ੍ਥਕਂ ਪਤ੍ਤੋ, ਇਤੋ ਦਾਨਿ ਪਟ੍ਠਾਯ ਪਟਿਸਨ੍ਧਿਵਸੇਨ ਨ ਪੁਨ ਏਕਟ੍ਠਾਨੇ ਸਨ੍ਨਿਪਾਤੋ ਸਮਾਗਮੋ ਅਤ੍ਥਿ, ਛਿਨ੍ਨੋ ਏਸ ਵਿਸ੍ਸਾਸੋ, ਅਨੇਕੇਹਿ ਬੁਦ੍ਧਸਤਸਹਸ੍ਸੇਹਿ ਪਵਿਟ੍ਠਂ ਅਜਰਂ ਅਮਰਂ ਖੇਮਂ ਸੁਖਂ ਸੀਤਲਂ ਅਭਯਂ ਨਿਬ੍ਬਾਨਪੁਰਂ ਪਵਿਸਿਸ੍ਸਾਮਿ, ਸਚੇ ਮੇ ਕਿਞ੍ਚਿ ਕਾਯਿਕਂ ਵਾ ਵਾਚਸਿਕਂ ਵਾ ਨ ਰੋਚੇਥ, ਖਮਥ ਤਂ ਭਗਵਾ, ਗਮਨਕਾਲੋ ਮਯ੍ਹ’’ਨ੍ਤਿ. ਖਮਾਮਿ ਤੇ, ਸਾਰਿਪੁਤ੍ਤ, ਨ ਖੋ ਪਨ ਤੇ ਕਿਞ੍ਚਿ ਕਾਯਿਕਂ ਵਾ ਵਾਚਸਿਕਂ ਵਾ ਮਯ੍ਹਂ ਅਰੁਚ੍ਚਨਕਂ ਅਤ੍ਥਿ, ਯਸ੍ਸ ਦਾਨਿ ਤ੍ਵਂ, ਸਾਰਿਪੁਤ੍ਤ, ਕਾਲਂ ਮਞ੍ਞਸੀਤਿ.

ਇਤਿ ਭਗਵਤਾ ਅਨੁਞ੍ਞਾਤਸਮਨਨ੍ਤਰਂ ਸਤ੍ਥੁ ਪਾਦੇ ਵਨ੍ਦਿਤ੍ਵਾ ਉਟ੍ਠਿਤਮਤ੍ਤੇ ਆਯਸ੍ਮਨ੍ਤੇ ਸਾਰਿਪੁਤ੍ਤੇ ਸਿਨੇਰੁਚਕ੍ਕਵਾਲ਼ਹਿਮਵਨ੍ਤਪਰਿਭਣ੍ਡਪਬ੍ਬਤੇ ਧਾਰਯਮਾਨਾਪਿ – ‘‘ਅਜ੍ਜ ਇਮਂ ਗੁਣਰਾਸਿਂ ਧਾਰੇਤੁਂ ਨ ਸਕ੍ਕੋਮੀ’’ਤਿ ਵਦਨ੍ਤੀ ਵਿਯ ਏਕਪ੍ਪਹਾਰੇਨੇਵ ਵਿਰਵਮਾਨਾ ਮਹਾਪਥਵੀ ਯਾਵ ਉਦਕਪਰਿਯਨ੍ਤਾ ਅਕਮ੍ਪਿ, ਆਕਾਸੇ ਦੇਵਦੁਨ੍ਦੁਭਿਯੋ ਫਲਿਂਸੁ, ਮਹਾਮੇਘੋ ਉਟ੍ਠਹਿਤ੍ਵਾ ਪੋਕ੍ਖਰਵਸ੍ਸਂ ਵਸ੍ਸਿ.

ਸਤ੍ਥਾ – ‘‘ਧਮ੍ਮਸੇਨਾਪਤਿਂ ਪਟਿਪਾਦੇਸ੍ਸਾਮੀ’’ਤਿ ਧਮ੍ਮਾਸਨਾ ਵੁਟ੍ਠਾਯ ਗਨ੍ਧਕੁਟਿਅਭਿਮੁਖੋ ਗਨ੍ਤ੍ਵਾ ਮਣਿਫਲਕੇ ਅਟ੍ਠਾਸਿ. ਥੇਰੋ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਚਤੂਸੁ ਠਾਨੇਸੁ ਵਨ੍ਦਿਤ੍ਵਾ – ‘‘ਭਗਵਾ ਇਤੋ ਕਪ੍ਪਸਤਸਹਸ੍ਸਾਧਿਕਸ੍ਸ ਅਸਙ੍ਖ੍ਯੇਯ੍ਯਸ੍ਸ ਉਪਰਿ ਅਨੋਮਦਸ੍ਸੀਸਮ੍ਮਾਸਮ੍ਬੁਦ੍ਧਸ੍ਸ ਪਾਦਮੂਲੇ ਨਿਪਜ੍ਜਿਤ੍ਵਾ ਤੁਮ੍ਹਾਕਂ ਦਸ੍ਸਨਂ ਪਤ੍ਥੇਸਿਂ, ਸਾ ਮੇ ਪਤ੍ਥਨਾ ਸਮਿਦ੍ਧਾ, ਦਿਟ੍ਠਾ ਤੁਮ੍ਹੇ, ਤਂ ਪਠਮਦਸ੍ਸਨਂ, ਇਦਂ ਪਚ੍ਛਿਮਦਸ੍ਸਨਂ. ਪੁਨ ਤੁਮ੍ਹਾਕਂ ਦਸ੍ਸਨਂ ਨਤ੍ਥੀ’’ਤਿ ਵਤ੍ਵਾ ਦਸਨਖਸਮੋਧਾਨਸਮੁਜ੍ਜਲਂ ਅਞ੍ਜਲਿਂ ਪਗ੍ਗਯ੍ਹ ਯਾਵ ਦਸ੍ਸਨਵਿਸਯਾ ਅਭਿਮੁਖੋਵ ਪਟਿਕ੍ਕਮਿਤ੍ਵਾ ਵਨ੍ਦਿਤ੍ਵਾ ਪਕ੍ਕਾਮਿ. ਪੁਨ ਮਹਾਪਥਵੀ ਧਾਰੇਤੁਂ ਅਸਕ੍ਕੋਨ੍ਤੀ ਉਦਕਪਰਿਯਨ੍ਤਂ ਕਤ੍ਵਾ ਅਕਮ੍ਪਿ.

ਭਗਵਾ ਪਰਿਵਾਰੇਤ੍ਵਾ ਠਿਤੇ ਭਿਕ੍ਖੂ ਆਹ – ‘‘ਅਨੁਗਚ੍ਛਥ, ਭਿਕ੍ਖਵੇ, ਤੁਮ੍ਹਾਕਂ ਜੇਟ੍ਠਭਾਤਿਕ’’ਨ੍ਤਿ. ਤਸ੍ਮਿਂ ਖਣੇ ਚਤਸ੍ਸੋਪਿ ਪਰਿਸਾ ਸਮ੍ਮਾਸਮ੍ਬੁਦ੍ਧਂ ਏਕਕਂਯੇਵ ਜੇਤਵਨੇ ਓਹਾਯ ਨਿਰਵਸੇਸਾ ਨਿਕ੍ਖਮਿਂਸੁ. ਸਾਵਤ੍ਥਿਨਗਰਵਾਸਿਨੋਪਿ – ‘‘ਸਾਰਿਪੁਤ੍ਤਤ੍ਥੇਰੋ ਕਿਰ ਸਮ੍ਮਾਸਮ੍ਬੁਦ੍ਧਂ ਆਪੁਚ੍ਛਿਤ੍ਵਾ ਪਰਿਨਿਬ੍ਬਾਯਿਤੁਕਾਮੋ ਨਿਕ੍ਖਨ੍ਤੋ, ਪਸ੍ਸਿਸ੍ਸਾਮ ਨ’’ਨ੍ਤਿ ਨਗਰਦ੍ਵਾਰਾਨਿ ਨਿਰੋਕਾਸਾਨਿ ਕਰੋਨ੍ਤਾ ਨਿਕ੍ਖਮਿਤ੍ਵਾ ਗਨ੍ਧਮਾਲਾਦਿਹਤ੍ਥਾ ਕੇਸੇ ਵਿਕਿਰਿਤ੍ਵਾ – ‘‘ਇਦਾਨਿ ਮਯਂ ਕਹਂ ਮਹਾਪਞ੍ਞੋ ਨਿਸਿਨ੍ਨੋ, ਕਹਂ ਧਮ੍ਮਸੇਨਾਪਤਿ ਨਿਸਿਨ੍ਨੋ’’ਤਿ ਪੁਚ੍ਛਨ੍ਤਾ – ‘‘ਕਸ੍ਸ ਸਨ੍ਤਿਕਂ ਗਮਿਸ੍ਸਾਮ, ਕਸ੍ਸ ਹਤ੍ਥੇ ਸਤ੍ਥਾਰਂ ਠਪੇਤ੍ਵਾ ਥੇਰੋ ਪਕ੍ਕਨ੍ਤੋ’’ਤਿਆਦਿਨਾ ਨਯੇਨ ਪਰਿਦੇਵਨ੍ਤਾ ਰੋਦਨ੍ਤਾ ਥੇਰਂ ਅਨੁਬਨ੍ਧਿਂਸੁ.

ਥੇਰੋ ਮਹਾਪਞ੍ਞਾਯ ਠਿਤਤ੍ਤਾ – ‘‘ਸਬ੍ਬੇਸਂ ਅਨਤਿਕ੍ਕਮਨੀਯੋ ਏਸ ਮਗ੍ਗੋ’’ਤਿ ਮਹਾਜਨਂ ਓਵਦਿਤ੍ਵਾ – ‘‘ਤੁਮ੍ਹੇਪਿ, ਆਵੁਸੋ, ਤਿਟ੍ਠਥ, ਮਾ ਦਸਬਲੇ ਪਮਾਦਂ ਆਪਜ੍ਜਿਤ੍ਥਾ’’ਤਿ ਭਿਕ੍ਖੁਸਙ੍ਘਮ੍ਪਿ ਨਿਵਤ੍ਤੇਤ੍ਵਾ ਅਤ੍ਤਨੋ ਪਰਿਸਾਯੇਵ ਸਦ੍ਧਿਂ ਪਕ੍ਕਾਮਿ. ਯੇਪਿ ਮਨੁਸ੍ਸਾ – ‘‘ਪੁਬ੍ਬੇ ਅਯ੍ਯੋ ਪਚ੍ਚਾਗਮਨਚਾਰਿਕਂ ਚਰਤਿ, ਇਦਂ ਇਦਾਨਿ ਗਮਨਂ ਨ ਪੁਨ ਪਚ੍ਚਾਗਮਨਾਯਾ’’ਤਿ ਪਰਿਦੇਵਨ੍ਤਾ ਅਨੁਬਨ੍ਧਿਂਸੁਯੇਵ. ਤੇਪਿ – ‘‘ਅਪ੍ਪਮਤ੍ਤਾ, ਆਵੁਸੋ, ਹੋਥ, ਏਵਂਭਾਵਿਨੋ ਨਾਮ ਸਙ੍ਖਾਰਾ’’ਤਿ ਨਿਵਤ੍ਤੇਸਿ.

ਅਥ ਖੋ ਆਯਸ੍ਮਾ ਸਾਰਿਪੁਤ੍ਤੋ ਸਬ੍ਬਤ੍ਥ ਏਕਰਤ੍ਤਿਵਾਸੇਨ ਅਨ੍ਤਰਾਮਗ੍ਗੇ ਸਤ੍ਤਾਹਂ ਮਨੁਸ੍ਸਾਨਂ ਸਙ੍ਗਹਂ ਕਰੋਨ੍ਤੋ ਸਾਯਂ ਨਾਲਕਗਾਮਂ ਪਤ੍ਵਾ ਗਾਮਦ੍ਵਾਰੇ ਨਿਗ੍ਰੋਧਰੁਕ੍ਖਮੂਲੇ ਅਟ੍ਠਾਸਿ. ਅਥ ਉਪਰੇਵਤੋ ਨਾਮ ਥੇਰਸ੍ਸ ਭਾਗਿਨੇਯ੍ਯੋ ਬਹਿਗਾਮਂ ਗਚ੍ਛਨ੍ਤੋ ਥੇਰਂ ਦਿਸ੍ਵਾ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਅਟ੍ਠਾਸਿ. ਥੇਰੋ ਤਂ ਆਹ – ‘‘ਅਤ੍ਥਿ ਗੇਹੇ ਤੇ ਅਯ੍ਯਿਕਾ’’ਤਿ. ਆਮ ਭਨ੍ਤੇਤਿ. ਗਚ੍ਛ ਅਮ੍ਹਾਕਂ ਇਧਾਗਤਭਾਵਂ ਆਰੋਚੇਹਿ. ‘‘ਕਸ੍ਮਾ ਆਗਤੋ’’ਤਿ ਚ ਵੁਤ੍ਤੇ – ‘‘ਅਜ੍ਜ ਕਿਰ ਏਕਦਿਵਸਂ ਅਨ੍ਤੋਗਾਮੇ ਵਸਿਸ੍ਸਤਿ, ਜਾਤੋਵਰਕਂ ਪਟਿਜਗ੍ਗਥ, ਪਞ੍ਚਨ੍ਨਞ੍ਚ ਕਿਰ ਭਿਕ੍ਖੁਸਤਾਨਂ ਵਸਨਟ੍ਠਾਨਂ ਜਾਨਾਥਾ’’ਤਿ. ਸੋ ਗਨ੍ਤ੍ਵਾ – ‘‘ਅਯ੍ਯਿਕੇ ਮਯ੍ਹਂ ਮਾਤੁਲੋ ਆਗਤੋ’’ਤਿ ਆਹ. ਇਦਾਨਿ ਕੁਹਿਨ੍ਤਿ? ਗਾਮਦ੍ਵਾਰੇਤਿ. ਏਕਕੋਵ, ਅਞ੍ਞੋਪਿ ਕੋਚਿ ਅਤ੍ਥੀਤਿ? ਅਤ੍ਥਿ ਪਞ੍ਚਸਤਾ ਭਿਕ੍ਖੂਤਿ. ਕਿਂਕਾਰਣਾ ਆਗਤੋਤਿ? ਸੋ ਤਂ ਪਵਤ੍ਤਿਂ ਆਰੋਚੇਸਿ. ਬ੍ਰਾਹ੍ਮਣੀ – ‘‘ਕਿਂ ਨੁ ਖੋ ਏਤ੍ਤਕਾਨਂ ਵਸਨਟ੍ਠਾਨਂ ਪਟਿਜਗ੍ਗਾਪੇਤਿ, ਦਹਰਕਾਲੇ ਪਬ੍ਬਜਿਤ੍ਵਾ ਮਹਲ੍ਲਕਕਾਲੇ ਗਿਹੀ ਹੋਤੁਕਾਮੋ’’ਤਿ ਚਿਨ੍ਤੇਨ੍ਤੀ ਜਾਤੋਵਰਕਂ ਪਟਿਜਗ੍ਗਾਪੇਤ੍ਵਾ ਪਞ੍ਚਸਤਾਨਂ ਵਸਨਟ੍ਠਾਨਂ ਕਾਰੇਤ੍ਵਾ ਦਣ੍ਡਦੀਪਿਕਾ ਜਾਲੇਤ੍ਵਾ ਥੇਰਸ੍ਸ ਪਾਹੇਸਿ.

ਥੇਰੋ ਭਿਕ੍ਖੂਹਿ ਸਦ੍ਧਿਂ ਪਾਸਾਦਂ ਆਰੁਯ੍ਹ ਜਾਤੋਵਰਕਂ ਪਵਿਸਿਤ੍ਵਾ ਨਿਸੀਦਿ, ਨਿਸੀਦਿਤ੍ਵਾ ‘‘ਤੁਮ੍ਹਾਕਂ ਵਸਨਟ੍ਠਾਨਂ ਗਚ੍ਛਥਾ’’ਤਿ ਭਿਕ੍ਖੂ ਉਯ੍ਯੋਜੇਸਿ. ਤੇਸੁ ਗਤਮਤ੍ਤੇਸੁਯੇਵ ਥੇਰਸ੍ਸ ਖਰੋ ਆਬਾਧੋ ਉਪ੍ਪਜ੍ਜਿ, ਲੋਹਿਤਪਕ੍ਖਨ੍ਦਿਕਾ ਮਾਰਣਨ੍ਤਿਕਾ ਵੇਦਨਾ ਵਤ੍ਤਨ੍ਤਿ. ਏਕਂ ਭਾਜਨਂ ਪਵਿਸਤਿ, ਏਕਂ ਨਿਕ੍ਖਮਤਿ. ਬ੍ਰਾਹ੍ਮਣੀ – ‘‘ਮਮ ਪੁਤ੍ਤਸ੍ਸ ਪਵਤ੍ਤਿ ਮਯ੍ਹਂ ਨ ਰੁਚ੍ਚਤੀ’’ਤਿ ਅਤ੍ਤਨੋ ਵਸਨਗਬ੍ਭਦ੍ਵਾਰਂ ਨਿਸ੍ਸਾਯ ਅਟ੍ਠਾਸਿ.

ਚਤ੍ਤਾਰੋ ਮਹਾਰਾਜਾਨੋ ‘‘ਧਮ੍ਮਸੇਨਾਪਤਿ ਕੁਹਿਂ ਵਿਹਰਤੀ’’ਤਿ ਓਲੋਕੇਨ੍ਤਾ ਨਾਲਕਗਾਮੇ ਜਾਤੋਵਰਕੇ ਪਰਿਨਿਬ੍ਬਾਨਮਞ੍ਚੇ ਨਿਪਨ੍ਨੋ, ਪਚ੍ਛਿਮਦਸ੍ਸਨਂ ਗਮਿਸ੍ਸਾਮਾ’’ਤਿ ਆਗਮ੍ਮ ਵਨ੍ਦਿਤ੍ਵਾ ਅਟ੍ਠਂਸੁ. ਕੇ ਤੁਮ੍ਹੇਤਿ? ਮਹਾਰਾਜਾਨੋ ਭਨ੍ਤੇਤਿ. ਕਸ੍ਮਾ ਆਗਤਤ੍ਥਾਤਿ? ਗਿਲਾਨੁਪਟ੍ਠਾਕਾ ਭਵਿਸ੍ਸਾਮਾਤਿ. ‘‘ਹੋਤੁ, ਅਤ੍ਥਿ ਗਿਲਾਨੁਪਟ੍ਠਾਕੋ, ਗਚ੍ਛਥ ਤੁਮ੍ਹੇ’’ਤਿ ਉਯ੍ਯੋਜੇਸਿ. ਤੇਸਂ ਗਤਾਵਸਾਨੇ ਤੇਨੇਵ ਨਯੇਨ ਸਕ੍ਕੋ ਦੇਵਾਨਮਿਨ੍ਦੋ. ਤਸ੍ਮਿਂ ਗਤੇ ਮਹਾਬ੍ਰਹ੍ਮਾ ਚ ਆਗਮਿਂਸੁ. ਤੇਪਿ ਤਥੇਵ ਥੇਰੋ ਉਯ੍ਯੋਜੇਸਿ.

ਬ੍ਰਾਹ੍ਮਣੀ ਦੇਵਤਾਨਂ ਆਗਮਨਞ੍ਚ ਗਮਨਞ੍ਚ ਦਿਸ੍ਵਾ ‘‘ਕੇ ਨੁ ਖੋ ਏਤੇ ਮਮ ਪੁਤ੍ਤਂ ਵਨ੍ਦਿਤ੍ਵਾ ਗਚ੍ਛਨ੍ਤੀ’’ਤਿ ਥੇਰਸ੍ਸ ਗਬ੍ਭਦ੍ਵਾਰਂ ਗਨ੍ਤ੍ਵਾ ‘‘ਤਾਤ, ਚੁਨ੍ਦ, ਕਾ ਪਵਤ੍ਤੀ’’ਤਿ ਪੁਚ੍ਛਿ. ਸੋ ਤਂ ਪਵਤ੍ਤਿਂ ਆਚਿਕ੍ਖਿਤ੍ਵਾ ‘‘ਮਹਾਉਪਾਸਿਕਾ, ਭਨ੍ਤੇ, ਆਗਤਾ’’ਤਿ ਆਹ. ਥੇਰੋ ‘‘ਕਸ੍ਮਾ ਅਵੇਲਾਯ ਆਗਤਾ’’ਤਿ ਪੁਚ੍ਛਿ. ਸਾ ‘‘ਤੁਯ੍ਹਂ, ਤਾਤ, ਦਸ੍ਸਨਤ੍ਥਾਯਾ’’ਤਿ ਵਤ੍ਵਾ ‘‘ਤਾਤ, ਪਠਮਂ ਕੇ ਆਗਤਾ’’ਤਿ ਪੁਚ੍ਛਿ. ਚਤ੍ਤਾਰੋ ਮਹਾਰਾਜਾਨੋ ਉਪਾਸਿਕੇਤਿ. ਤਾਤ, ਤ੍ਵਂ ਚਤੂਹਿ ਮਹਾਰਾਜੇਹਿ ਮਹਨ੍ਤਤਰੋਤਿ? ਆਰਾਮਿਕਸਦਿਸਾ ਏਤੇ ਉਪਾਸਿਕੇ, ਅਮ੍ਹਾਕਂ ਸਤ੍ਥੁ ਪਟਿਸਨ੍ਧਿਗ੍ਗਹਣਤੋ ਪਟ੍ਠਾਯ ਖਗ੍ਗਹਤ੍ਥਾ ਹੁਤ੍ਵਾ ਆਰਕ੍ਖਂ ਅਕਂਸੂਤਿ. ਤੇਸਂ ਤਾਤ ਗਤਾਵਸਾਨੇ ਕੋ ਆਗਤੋਤਿ? ਸਕ੍ਕੋ ਦੇਵਾਨਮਿਨ੍ਦੋਤਿ. ਦੇਵਰਾਜਤੋਪਿ ਤ੍ਵਂ ਤਾਤ ਮਹਨ੍ਤਤਰੋਤਿ? ਭਣ੍ਡਗ੍ਗਾਹਕਸਾਮਣੇਰਸਦਿਸੋ ਏਸ ਉਪਾਸਿਕੇ, ਅਮ੍ਹਾਕਂ ਸਤ੍ਥੁ ਤਾਵਤਿਂਸਤੋ ਓਤਰਣਕਾਲੇ ਪਤ੍ਤਚੀਵਰਂ ਗਹੇਤ੍ਵਾ ਓਤਿਣ੍ਣੋਤਿ. ਤਸ੍ਸ ਤਾਤ ਗਤਾਵਸਾਨੇ ਜੋਤਯਮਾਨੋ ਵਿਯ ਕੋ ਆਗਤੋਤਿ? ਉਪਾਸਿਕੇ, ਤੁਯ੍ਹਂ ਭਗਵਾ ਚ ਸਤ੍ਥਾ ਚ ਮਹਾਬ੍ਰਹ੍ਮਾ ਨਾਮ ਏਸੋਤਿ. ਮਯ੍ਹਂ ਭਗਵਤੋ ਮਹਾਬ੍ਰਹ੍ਮਤੋਪਿ ਤ੍ਵਂ, ਤਾਤ, ਮਹਨ੍ਤਤਰੋਤਿ? ਆਮ ਉਪਾਸਿਕੇ, ਏਤੇ ਨਾਮ ਕਿਰ ਅਮ੍ਹਾਕਂ ਸਤ੍ਥੁ ਜਾਤਦਿਵਸੇ ਚਤ੍ਤਾਰੋ ਮਹਾਬ੍ਰਹ੍ਮਾਨੋ ਮਹਾਪੁਰਿਸਂ ਸੁਵਣ੍ਣਜਾਲੇਨ ਪਟਿਗ੍ਗਣ੍ਹਿਂਸੂਤਿ.

ਅਥ ਬ੍ਰਾਹ੍ਮਣਿਯਾ – ‘‘ਪੁਤ੍ਤਸ੍ਸ ਤਾਵ ਮੇ ਅਯਂ ਆਨੁਭਾਵੋ, ਕੀਦਿਸੋ ਵਤ ਮਯ੍ਹਂ ਪੁਤ੍ਤਸ੍ਸ ਭਗਵਤੋ ਸਤ੍ਥੁ ਆਨੁਭਾਵੋ ਭਵਿਸ੍ਸਤੀ’’ਤਿ ਚਿਨ੍ਤਯਨ੍ਤਿਯਾ ਸਹਸਾ ਪਞ੍ਚਵਣ੍ਣਾ ਪੀਤਿ ਉਪ੍ਪਜ੍ਜਿਤ੍ਵਾ ਸਕਲਸਰੀਰਂ ਫਰਿ. ਥੇਰੋ – ‘‘ਉਪ੍ਪਨ੍ਨਂ ਮੇ ਮਾਤੁ ਪੀਤਿਸੋਮਨਸ੍ਸਂ, ਅਯਂ ਦਾਨਿ ਕਾਲੋ ਧਮ੍ਮਦੇਸਨਾਯਾ’’ਤਿ ਚਿਨ੍ਤੇਤ੍ਵਾ ‘‘ਕਿਂ ਚਿਨ੍ਤੇਸਿ ਮਹਾਉਪਾਸਿਕੇ’’ਤਿ ਆਹ. ਸਾ ‘‘ਪੁਤ੍ਤਸ੍ਸ ਤਾਵ ਮੇ ਅਯਂ ਗੁਣੋ, ਸਤ੍ਥੁ ਪਨਸ੍ਸ ਕੀਦਿਸੋ ਭਵਿਸ੍ਸਤੀਤਿ ਇਦਂ, ਤਾਤ, ਚਿਨ੍ਤੇਮੀ’’ਤਿ ਆਹ. ਮਹਾਉਪਾਸਿਕੇ, ਮਯ੍ਹਂ ਸਤ੍ਥੁਜਾਤਕ੍ਖਣੇ ਮਹਾਭਿਨਿਕ੍ਖਮਨੇ ਸਮ੍ਬੋਧਿਯਂ ਧਮ੍ਮਚਕ੍ਕਪ੍ਪਵਤ੍ਤਨੇ ਚ ਦਸਸਹਸ੍ਸਿਲੋਕਧਾਤੁ ਕਮ੍ਪਿਤ੍ਥ. ਸੀਲੇਨ ਸਮਾਧਿਨਾ ਪਞ੍ਞਾਯ ਵਿਮੁਤ੍ਤਿਯਾ ਵਿਮੁਤ੍ਤਿਞਾਣਦਸ੍ਸਨੇਨ ਸਮੋ ਨਾਮ ਨਤ੍ਥਿ, ਇਤਿਪਿ ਸੋ ਭਗਵਾਤਿ ਵਿਤ੍ਥਾਰੇਤ੍ਵਾ ਬੁਦ੍ਧਗੁਣਪਟਿਸਂਯੁਤ੍ਤਂ ਧਮ੍ਮਦੇਸਨਂ ਕਥੇਸਿ.

ਬ੍ਰਾਹ੍ਮਣੀ ਪਿਯਪੁਤ੍ਤਸ੍ਸ ਧਮ੍ਮਦੇਸਨਾਪਰਿਯੋਸਾਨੇ ਸੋਤਾਪਤ੍ਤਿਫਲੇ ਪਤਿਟ੍ਠਾਯ ਪੁਤ੍ਤਂ ਆਹ – ‘‘ਤਾਤ ਉਪਤਿਸ੍ਸ, ਕਸ੍ਮਾ ਏਵਮਕਾਸਿ, ਏਵਰੂਪਂ ਨਾਮ ਅਮਤਂ ਮਯ੍ਹਂ ਏਤ੍ਤਕਂ ਕਾਲਂ ਨ ਅਦਾਸੀ’’ਤਿ. ਥੇਰੋ – ‘‘ਦਿਨ੍ਨਂ ਦਾਨਿ ਮੇ ਮਾਤੁ ਰੂਪਸਾਰਿਯਾ ਬ੍ਰਾਹ੍ਮਣਿਯਾ ਪੋਸਾਵਨਿਕਮੂਲਂ, ਏਤ੍ਤਕੇਨ ਵਟ੍ਟਿਸ੍ਸਤੀ’’ਤਿ ਚਿਨ੍ਤੇਤ੍ਵਾ – ‘‘ਗਚ੍ਛ ਮਹਾਉਪਸਿਕੇ’’ਤਿ ਬ੍ਰਾਹ੍ਮਣਿਂ ਉਯ੍ਯੋਜੇਤ੍ਵਾ – ‘‘ਚੁਨ੍ਦ ਕਾ ਵੇਲਾ’’ਤਿ ਆਹ. ਬਲਵਪਚ੍ਚੂਸਕਾਲੋ, ਭਨ੍ਤੇਤਿ. ਭਿਕ੍ਖੁਸਙ੍ਘਂ ਸਨ੍ਨਿਪਾਤੇਹੀਤਿ. ਸਨ੍ਨਿਪਤਿਤੋ ਭਨ੍ਤੇ ਭਿਕ੍ਖੁਸਙ੍ਘੋਤਿ. ‘‘ਮਂ ਉਕ੍ਖਿਪਿਤ੍ਵਾ ਨਿਸੀਦਾਪੇਹਿ ਚੁਨ੍ਦਾ’’ਤਿ ਉਕ੍ਖਿਪਿਤ੍ਵਾ ਨਿਸੀਦਾਪੇਸਿ.

ਥੇਰੋ ਭਿਕ੍ਖੂ ਆਮਨ੍ਤੇਸਿ – ‘‘ਆਵੁਸੋ ਚਤੁਚਤ੍ਤਾਲੀਸਂ ਵੋ ਵਸ੍ਸਾਨਿ ਮਯਾ ਸਦ੍ਧਿਂ ਵਿਚਰਨ੍ਤਾਨਂ ਯਂ ਮੇ ਕਾਯਿਕਂ ਵਾ ਵਾਚਸਿਕਂ ਵਾ ਨ ਰੋਚੇਥ, ਤਂ ਖਮਥ ਆਵੁਸੋ’’ਤਿ. ਏਤ੍ਤਕਂ, ਭਨ੍ਤੇ, ਅਮ੍ਹਾਕਂ ਛਾਯਾ ਵਿਯ ਤੁਮ੍ਹੇ ਅਮੁਞ੍ਚਿਤ੍ਵਾ ਵਿਚਰਨ੍ਤਾਨਂ ਅਰੁਚ੍ਚਨਕਂ ਨਾਮ ਨਤ੍ਥਿ, ਤੁਮ੍ਹੇ ਪਨ ਅਮ੍ਹਾਕਂ ਖਮਥਾਤਿ. ਅਥ ਥੇਰੋ ਮਹਾਚੀਵਰਂ ਸਙ੍ਕਡ੍ਢਿਤ੍ਵਾ ਮੁਖਂ ਪਿਧਾਯ ਦਕ੍ਖਿਣੇਨ ਪਸ੍ਸੇਨ ਨਿਪਨ੍ਨੋ ਸਤ੍ਥਾ ਵਿਯ ਨਵ ਅਨੁਪੁਬ੍ਬਸਮਾਪਤ੍ਤਿਯੋ ਅਨੁਲੋਮਪਟਿਲੋਮਤੋ ਸਮਾਪਜ੍ਜਿਤ੍ਵਾ ਪੁਨ ਪਠਮਜ੍ਝਾਨਂ ਆਦਿਂ ਕਤ੍ਵਾ ਯਾਵ ਚਤੁਤ੍ਥਜ੍ਝਾਨਾ ਸਮਾਪਜ੍ਜਿ. ਤਤੋ ਵੁਟ੍ਠਾਯ ਅਨਨ੍ਤਰਂਯੇਵ ਮਹਾਪਥਵਿਂ ਉਨ੍ਨਾਦੇਨ੍ਤੋ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਿ.

ਉਪਾਸਿਕਾ – ‘‘ਕਿਂ ਨੁ ਖੋ ਮੇ ਪੁਤ੍ਤੋ, ਨ ਕਿਞ੍ਚਿ ਕਥੇਤੀ’’ਤਿ ਉਟ੍ਠਾਯ ਪਿਟ੍ਠਿਪਾਦੇ ਪਰਿਮਜ੍ਜਨ੍ਤੀ ਪਰਿਨਿਬ੍ਬੁਤਭਾਵਂ ਞਤ੍ਵਾ ਮਹਾਸਦ੍ਦਂ ਕੁਰੁਮਾਨਾ ਪਾਦੇਸੁ ਨਿਪਤਿਤ੍ਵਾ – ‘‘ਤਾਤ ਮਯਂ ਇਤੋ ਪੁਬ੍ਬੇ ਤਵ ਗੁਣਂ ਨ ਜਾਨਿਮ੍ਹਾ, ਇਦਾਨਿ ਪਨ ਤਂ ਆਦਿਂ ਕਤ੍ਵਾ ਅਨੇਕਸਤੇ ਅਨੇਕਸਹਸ੍ਸੇ ਅਨੇਕਸਤਸਹਸ੍ਸੇ ਭਿਕ੍ਖੂ ਇਮਸ੍ਮਿਂ ਨਿਵੇਸਨੇ ਨਿਸੀਦਾਪੇਤ੍ਵਾ ਭੋਜੇਤੁਂ ਨ ਲਭਿਮ੍ਹਾ, ਚੀਵਰੇਹਿ ਅਚ੍ਛਾਦੇਤੁਂ ਨ ਲਭਿਮ੍ਹਾ, ਵਿਹਾਰਸਤਂ ਵਿਹਾਰਸਹਸ੍ਸਂ ਕਾਰੇਤੁਂ ਨ ਲਭਿਮ੍ਹਾ’’ਤਿ ਯਾਵ ਅਰੁਣੁਗ੍ਗਮਨਾ ਪਰਿਦੇਵਿ. ਅਰੁਣੇ ਉਗ੍ਗਤਮਤ੍ਤੇਯੇਵ ਸੁਵਣ੍ਣਕਾਰੇ ਪਕ੍ਕੋਸਾਪੇਤ੍ਵਾ ਸੁਵਣ੍ਣਗਬ੍ਭਂ ਵਿਵਰਾਪੇਤ੍ਵਾ ਸੁਵਣ੍ਣਘਟਿਯੋ ਮਹਾਤੁਲਾਯ ਤੁਲਾਪੇਤ੍ਵਾ – ‘‘ਪਞ੍ਚ ਕੂਟਾਗਾਰਸਤਾਨਿ ਪਞ੍ਚ ਅਗ੍ਘਿਕਸਤਾਨਿ ਕਰੋਥਾ’’ਤਿ ਦਾਪੇਤਿ.

ਸਕ੍ਕੋਪਿ ਦੇਵਰਾਜਾ ਵਿਸ੍ਸਕਮ੍ਮਦੇਵਪੁਤ੍ਤਂ ਆਮਨ੍ਤੇਤ੍ਵਾ – ‘‘ਤਾਤ ਧਮ੍ਮਸੇਨਾਪਤਿ ਪਰਿਨਿਬ੍ਬੁਤੋ, ਪਞ੍ਚ ਕੂਟਾਗਾਰਸਤਾਨਿ ਪਞ੍ਚ ਅਗ੍ਘਿਕਸਤਾਨਿ ਚ ਮਾਪੇਹੀ’’ਤਿ ਆਹ. ਇਤਿ ਉਪਾਸਿਕਾਯ ਕਾਰਿਤਾਨਿ ਚ ਵਿਸ੍ਸਕਮ੍ਮੇਨ ਨਿਮ੍ਮਿਤਾਨਿ ਚ ਸਬ੍ਬਾਨਿਪਿ ਦ੍ਵੇਸਹਸ੍ਸਾਨਿ ਅਹੇਸੁਂ. ਤਤੋ ਨਗਰਮਜ੍ਝੇ ਸਾਰਮਯਂ ਮਹਾਮਣ੍ਡਪਂ ਕਾਰੇਤ੍ਵਾ ਮਣ੍ਡਪਮਜ੍ਝੇ ਮਹਾਕੂਟਾਗਾਰਂ ਠਪੇਤ੍ਵਾ ਸੇਸਾਨਿ ਪਰਿਵਾਰਸਙ੍ਖੇਪੇਨ ਠਪੇਤ੍ਵਾ ਸਾਧੁਕੀਲ਼ਿਕਂ ਆਰਭਿਂਸੁ. ਦੇਵਾਨਂ ਅਨ੍ਤਰੇ ਮਨੁਸ੍ਸਾ, ਮਨੁਸ੍ਸਾਨਂ ਅਨ੍ਤਰੇ ਦੇਵਾ ਅਹੇਸੁਂ.

ਰੇਵਤੀ ਨਾਮ ਏਕਾ ਥੇਰਸ੍ਸ ਉਪਟ੍ਠਾਯਿਕਾ – ‘‘ਅਹਂ ਥੇਰਸ੍ਸ ਪੂਜਂ ਕਰਿਸ੍ਸਾਮੀ’’ਤਿ ਸੁਵਣ੍ਣਪੁਪ੍ਫਾਨਂ ਤਯੋ ਕੁਮ੍ਭੇ ਕਾਰੇਸਿ. ‘‘ਥੇਰਸ੍ਸ ਪੂਜਂ ਕਰਿਸ੍ਸਾਮੀ’’ਤਿ ਸਕ੍ਕੋ ਦੇਵਰਾਜਾ ਅਡ੍ਢਤੇਯ੍ਯਕੋਟਿਨਾਟਕੇਹਿ ਪਰਿਵਾਰਿਤੋ ਓਤਰਿ. ‘‘ਸਕ੍ਕੋ ਓਤਰਤੀ’’ਤਿ ਮਹਾਜਨੋ ਪਚ੍ਛਾਮੁਖੋ ਪਟਿਕ੍ਕਮਿ. ਤਤ੍ਥ ਸਾਪਿ ਉਪਾਸਿਕਾ ਪਟਿਕ੍ਕਮਮਾਨਾ ਗਰੁਭਾਰਤ੍ਤਾ ਏਕਮਨ੍ਤਂ ਅਪਸਕ੍ਕਿਤੁਂ ਅਸਕ੍ਕੋਨ੍ਤੀ ਮਨੁਸ੍ਸਾਨਂ ਅਨ੍ਤਰੇ ਪਤਿ. ਮਨੁਸ੍ਸਾ ਅਪਸ੍ਸਨ੍ਤਾ ਤਂ ਮਦ੍ਦਿਤ੍ਵਾ ਅਗਮਿਂਸੁ. ਸਾ ਤਤ੍ਥੇਵ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਕਨਕਵਿਮਾਨੇ ਨਿਬ੍ਬਤ੍ਤਿ. ਨਿਬ੍ਬਤ੍ਤਕ੍ਖਣੇਯੇਵਸ੍ਸਾ ਰਤਨਕ੍ਖਨ੍ਧੋ ਵਿਯ ਤਿਗਾਵੁਤਪ੍ਪਮਾਣੋ ਅਤ੍ਤਭਾਵੋ ਅਹੋਸਿ ਸਟ੍ਠਿਸਕਟਪੂਰਪ੍ਪਮਾਣਅਲਙ੍ਕਾਰਪਟਿਮਣ੍ਡਿਤਾ ਅਚ੍ਛਰਾਸਹਸ੍ਸਪਰਿਵਾਰਿਤਾ. ਅਥਸ੍ਸਾ ਦਿਬ੍ਬਂ ਸਬ੍ਬਕਾਯਿਕਾਦਾਸਂ ਪੁਰਤੋ ਠਪਯਿਂਸੁ. ਸਾ ਅਤ੍ਤਨੋ ਸਿਰਿਸਮ੍ਪਤ੍ਤਿਂ ਦਿਸ੍ਵਾ – ‘‘ਉਲ਼ਾਰਾ ਅਯਂ ਸਮ੍ਪਤ੍ਤਿ, ਕਿਂ ਨੁ ਖੋ ਮੇ ਕਮ੍ਮਂ ਕਤ’’ਨ੍ਤਿ ਚਿਨ੍ਤਯਮਾਨਾ ਅਦ੍ਦਸ – ‘‘ਮਯਾ ਸਾਰਿਪੁਤ੍ਤਤ੍ਥੇਰਸ੍ਸ ਪਰਿਨਿਬ੍ਬੁਤਟ੍ਠਾਨੇ ਤੀਹਿ ਸੁਵਣ੍ਣਪੁਪ੍ਫਕੁਮ੍ਭੇਹਿ ਪੂਜਾ ਕਤਾ, ਮਹਾਜਨੋ ਮਂ ਮਦ੍ਦਿਤ੍ਵਾ ਗਤੋ, ਸਾਹਂ ਤਤ੍ਥ ਕਾਲਂ ਕਤ੍ਵਾ ਇਧੂਪਪਨ੍ਨਾ, ਥੇਰਂ ਨਿਸ੍ਸਾਯ ਲਦ੍ਧਂ ਇਦਾਨਿ ਪੁਞ੍ਞਵਿਪਾਕਂ ਮਨੁਸ੍ਸਾਨਂ ਕਥੇਸ੍ਸਾਮੀ’’ਤਿ ਸਹ ਵਿਮਾਨੇਨੇਵ ਓਤਰਿ.

ਮਹਾਜਨੋ ਦੂਰਤੋਵ ਦਿਸ੍ਵਾ – ‘‘ਕਿਂ ਨੁ ਖੋ ਦ੍ਵੇ ਸੂਰਿਯਾ ਉਟ੍ਠਿਤਾ’’ਤਿ? ਓਲੋਕੇਨ੍ਤੋ – ‘‘ਵਿਮਾਨੇ ਆਗਚ੍ਛਨ੍ਤੇ ਕੂਟਾਗਾਰਸਣ੍ਠਾਨਂ ਪਞ੍ਞਾਯਤਿ, ਨਾਯਂ ਸੂਰਿਯੋ, ਵਿਮਾਨਮੇਤਂ ਏਕ’’ਨ੍ਤਿ ਆਹ. ਤਮ੍ਪਿ ਵਿਮਾਨਂ ਤਾਵਦੇਵ ਆਗਨ੍ਤ੍ਵਾ ਥੇਰਸ੍ਸ ਦਾਰੁਚਿਤਕਮਤ੍ਥਕੇ ਵੇਹਾਸਂ ਅਟ੍ਠਾਸਿ. ਦੇਵਧੀਤਾ ਵਿਮਾਨਂ ਆਕਾਸੇਯੇਵ ਠਪੇਤ੍ਵਾ ਪਥਵਿਂ ਓਤਰਿ. ਮਹਾਜਨੋ – ‘‘ਕਾ ਤ੍ਵਂ, ਅਯ੍ਯੇ’’ਤਿ? ਪੁਚ੍ਛਿ. ‘‘ਨ ਮਂ ਤੁਮ੍ਹੇ ਜਾਨਾਥ, ਰੇਵਤੀ ਨਾਮਾਹਂ, ਤੀਹਿ ਸੁਵਣ੍ਣਪੁਪ੍ਫਕੁਮ੍ਭੇਹਿ ਥੇਰਂ ਪੂਜਂ ਕਤ੍ਵਾ ਮਨੁਸ੍ਸੇਹਿ ਮਦ੍ਦਿਤਾ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਾ, ਪਸ੍ਸਥ ਮੇ ਸਿਰਿਸਮ੍ਪਤ੍ਤਿਂ, ਤੁਮ੍ਹੇਪਿ ਦਾਨਿ ਦਾਨਾਨਿ ਦੇਥ, ਪੁਞ੍ਞਾਨਿ ਕਰੋਥਾ’’ਤਿ ਕੁਸਲਕਿਰਿਯਾਯ ਵਣ੍ਣਂ ਕਥੇਤ੍ਵਾ ਥੇਰਸ੍ਸ ਚਿਤਕਂ ਪਦਕ੍ਖਿਣਂ ਕਤ੍ਵਾ ਵਨ੍ਦਿਤ੍ਵਾ ਅਤ੍ਤਨੋ ਦੇਵਟ੍ਠਾਨਂਯੇਵ ਗਤਾ.

ਮਹਾਜਨੋਪਿ ਸਤ੍ਤਾਹਂ ਸਾਧੁਕੀਲ਼ਿਕਂ ਕੀਲ਼ਿਤ੍ਵਾ ਸਬ੍ਬਗਨ੍ਧੇਹਿ ਚਿਤਕਂ ਅਕਾਸਿ, ਚਿਤਕਾ ਏਕੂਨਰਤਨਸਤਿਕਾ ਅਹੋਸਿ. ਥੇਰਸ੍ਸ ਸਰੀਰਂ ਚਿਤਕਂ ਆਰੋਪੇਤ੍ਵਾ ਉਸੀਰਕਲਾਪਕੇਹਿ ਆਲਿਮ੍ਪੇਸੁਂ. ਆਲ਼ਾਹਨੇ ਸਬ੍ਬਰਤ੍ਤਿਂ ਧਮ੍ਮਸ੍ਸਵਨਂ ਪਵਤ੍ਤਿ. ਅਨੁਰੁਦ੍ਧਤ੍ਥੇਰੋ ਸਬ੍ਬਗਨ੍ਧੋਦਕੇਨ ਥੇਰਸ੍ਸ ਚਿਤਕਂ ਨਿਬ੍ਬਾਪੇਸਿ. ਚੁਨ੍ਦਤ੍ਥੇਰੋ ਧਾਤੁਯੋ ਪਰਿਸ੍ਸਾਵਨੇ ਪਕ੍ਖਿਪਿਤ੍ਵਾ – ‘‘ਨ ਦਾਨਿ ਮਯਾ ਇਧੇਵ ਸਕ੍ਕਾ ਠਾਤੁਂ, ਮਯ੍ਹਂ ਜੇਟ੍ਠਭਾਤਿਕਸ੍ਸ ਧਮ੍ਮਸੇਨਾਪਤਿਸਾਰਿਪੁਤ੍ਤਤ੍ਥੇਰਸ੍ਸ ਪਰਿਨਿਬ੍ਬੁਤਭਾਵਂ ਸਮ੍ਮਾਸਮ੍ਬੁਦ੍ਧਸ੍ਸ ਆਰੋਚੇਸ੍ਸਾਮੀ’’ਤਿ ਧਾਤੁਪਰਿਸ੍ਸਾਵਨਂ ਥੇਰਸ੍ਸ ਚ ਪਤ੍ਤਚੀਵਰਂ ਗਹੇਤ੍ਵਾ ਸਾਵਤ੍ਥਿਂ ਅਗਮਾਸਿ. ਏਕਟ੍ਠਾਨੇਪਿ ਚ ਦ੍ਵੇ ਰਤ੍ਤਿਯੋ ਅਵਸਿਤ੍ਵਾ ਸਬ੍ਬਤ੍ਥ ਏਕਰਤ੍ਤਿਵਾਸੇਨੇਵ ਸਾਵਤ੍ਥਿਂ ਪਾਪੁਣਿ. ਤਮਤ੍ਥਂ ਦਸ੍ਸੇਤੁਂ ਅਥ ਖੋ ਚੁਨ੍ਦੋ ਸਮਣੁਦ੍ਦੇਸੋਤਿਆਦਿ ਵੁਤ੍ਤਂ.

ਤਤ੍ਥ ਯੇਨਾਯਸ੍ਮਾ ਆਨਨ੍ਦੋਤਿ ਯੇਨ ਅਤ੍ਤਨੋ ਉਪਜ੍ਝਾਯੋ ਧਮ੍ਮਭਣ੍ਡਾਗਾਰਿਕੋ ਆਯਸ੍ਮਾ ਆਨਨ੍ਦੋ, ਤੇਨੁਪਸਙ੍ਕਮਿ. ਕਸ੍ਮਾ ਪਨੇਸ ਉਜੁਕਂ ਸਤ੍ਥੁ ਸਨ੍ਤਿਕਂ ਅਗਨ੍ਤ੍ਵਾ ਥੇਰਸ੍ਸ ਸਨ੍ਤਿਕਂ ਅਗਮਾਸੀਤਿ? ਸਤ੍ਥਰਿ ਚ ਥੇਰੇ ਚ ਗਾਰਵੇਨ. ਜੇਤਵਨਮਹਾਵਿਹਾਰੇ ਪੋਕ੍ਖਰਣਿਯਂ ਕਿਰਸ੍ਸ ਨ੍ਹਤ੍ਵਾ ਪਚ੍ਚੁਤ੍ਤਰਿਤ੍ਵਾ ਸੁਨਿਵਤ੍ਥਸੁਪਾਰੁਤਸ੍ਸ ਏਤਦਹੋਸਿ – ‘‘ਬੁਦ੍ਧਾ ਨਾਮ ਮਹਾਪਾਸਾਣਚ੍ਛਤ੍ਤਂ ਵਿਯ ਗਰੁਨੋ, ਫਣਕਤਸਪ੍ਪ ਸੀਹਬ੍ਯਗ੍ਘਮਤ੍ਤਵਰਵਾਰਣਾਦਯੋ ਵਿਯ ਚ ਦੁਰਾਸਦਾ, ਨ ਸਕ੍ਕਾ ਮਯਾ ਉਜੁਕਮੇਵ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਕਥੇਤੁਂ, ਕਸ੍ਸ ਨੁ ਖੋ ਸਨ੍ਤਿਕਂ ਗਨ੍ਤਬ੍ਬ’’ਨ੍ਤਿ. ਤਤੋ ਚਿਨ੍ਤੇਸਿ – ‘‘ਉਪਜ੍ਝਾਯੋ ਮੇ ਧਮ੍ਮਭਣ੍ਡਾਗਾਰਿਕੋ ਜੇਟ੍ਠਭਾਤਿਕਤ੍ਥੇਰਸ੍ਸ ਉਤ੍ਤਮਸਹਾਯੋ, ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਂ ਆਦਾਯ ਸਤ੍ਥਾਰਾ ਸਦ੍ਧਿਂ ਕਥੇਸ੍ਸਾਮੀ’’ਤਿ ਸਤ੍ਥਰਿ ਚੇਵ ਥੇਰੇ ਚ ਗਾਰਵੇਨ ਉਪਸਙ੍ਕਮਿ.

ਇਦਮਸ੍ਸ ਪਤ੍ਤਚੀਵਰਨ੍ਤਿ ‘‘ਅਯਮਸ੍ਸ ਪਰਿਭੋਗਪਤ੍ਤੋ, ਇਦਂ ਧਾਤੁਪਰਿਸ੍ਸਾਵਨ’’ਨ੍ਤਿ ਏਵਂ ਏਕੇਕਂ ਆਚਿਕ੍ਖਿ. ਪਾਲ਼ਿਯਂ ਪਨ ‘‘ਇਦਮਸ੍ਸ ਪਤ੍ਤਚੀਵਰ’’ਨ੍ਤਿ ਏਤ੍ਤਕਮੇਵ ਵੁਤ੍ਤਂ. ਕਥਾਪਾਭਤਨ੍ਤਿ ਕਥਾਮੂਲਂ. ਮੂਲਞ੍ਹਿ ਪਾਭਤਨ੍ਤਿ ਵੁਚ੍ਚਤਿ. ਯਥਾਹ –

‘‘ਅਪ੍ਪਕੇਨਪਿ ਮੇਧਾਵੀ, ਪਾਭਤੇਨ ਵਿਚਕ੍ਖਣੋ;

ਸਮੁਟ੍ਠਾਪੇਤਿ ਅਤ੍ਤਾਨਂ, ਅਣੁਂ ਅਗ੍ਗਿਂਵ ਸਨ੍ਧਮ’’ਨ੍ਤਿ. (ਜਾ. ੧.੧.੪);

ਭਗਵਨ੍ਤਂ ਦਸ੍ਸਨਾਯਾਤਿ ਭਗਵਨ੍ਤਂ ਦਸ੍ਸਨਤ੍ਥਾਯ. ਕਿਂ ਪਨਿਮਿਨਾ ਭਗਵਾ ਨ ਦਿਟ੍ਠਪੁਬ੍ਬੋਤਿ? ਨੋ ਨ ਦਿਟ੍ਠਪੁਬ੍ਬੋ. ਅਯਞ੍ਹਿ ਆਯਸ੍ਮਾ ਦਿਵਾ ਨਵ ਵਾਰੇ, ਰਤ੍ਤਿਂ ਨਵ ਵਾਰੇਤਿ ਏਕਾਹਂ ਅਟ੍ਠਾਰਸ ਵਾਰੇ ਉਪਟ੍ਠਾਨਮੇਵ ਗਚ੍ਛਤਿ. ਦਿਵਸਸ੍ਸ ਪਨ ਸਤਵਾਰਂ ਵਾ ਸਹਸ੍ਸਵਾਰਂ ਵਾ ਗਨ੍ਤੁਕਾਮੋ ਸਮਾਨੋਪਿ ਨ ਅਕਾਰਣਾ ਗਚ੍ਛਤਿ, ਏਕਂ ਪਞ੍ਹਦ੍ਵਾਰਂ ਗਹੇਤ੍ਵਾਵ ਗਚ੍ਛਤਿ. ਸੋ ਤਂਦਿਵਸਂ ਤੇਨ ਕਥਾਪਾਭਤੇਨ ਗਨ੍ਤੁਕਾਮੋ ਏਵਮਾਹ. ਇਦਮਸ੍ਸ ਪਤ੍ਤਚੀਵਰਨ੍ਤਿ ਥੇਰੋਪਿ – ‘‘ਇਦਂ ਤਸ੍ਸ ਪਤ੍ਤਚੀਵਰਂ, ਇਦਞ੍ਚ ਧਾਤੁਪਰਿਸ੍ਸਾਵਨ’’ਨ੍ਤਿ ਪਾਟਿਯੇਕ੍ਕਂਯੇਵ ਦਸ੍ਸੇਤ੍ਵਾ ਆਚਿਕ੍ਖਿ.

ਸਤ੍ਥਾ ਹਤ੍ਥਂ ਪਸਾਰੇਤ੍ਵਾ ਧਾਤੁਪਰਿਸ੍ਸਾਵਨਂ ਗਹੇਤ੍ਵਾ ਹਤ੍ਥਤਲੇ ਠਪੇਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਯੋ ਸੋ, ਭਿਕ੍ਖਵੇ, ਭਿਕ੍ਖੁ ਪੁਰਿਮਦਿਵਸੇ ਅਨੇਕਾਨਿ ਪਾਟਿਹਾਰਿਯਸਤਾਨਿ ਕਤ੍ਵਾ ਪਰਿਨਿਬ੍ਬਾਨਂ ਅਨੁਜਾਨਾਪੇਸਿ, ਤਸ੍ਸ ਇਦਾਨਿ ਇਮਾ ਸਙ੍ਖਵਣ੍ਣਸਨ੍ਨਿਭਾ ਧਾਤੁਯੋਵ ਪਞ੍ਞਾਯਨ੍ਤਿ, ਕਪ੍ਪਸਤਸਹਸ੍ਸਾਧਿਕਂ ਅਸਙ੍ਖ੍ਯੇਯ੍ਯਂ ਪੂਰਿਤਪਾਰਮੀ ਏਸ, ਭਿਕ੍ਖਵੇ, ਭਿਕ੍ਖੁ, ਮਯਾ ਪਵਤ੍ਤਿਤਂ ਧਮ੍ਮਚਕ੍ਕਂ ਅਨੁਪਵਤ੍ਤਕੋ ਏਸ ਭਿਕ੍ਖੁ, ਪਟਿਲਦ੍ਧਦੁਤਿਯਆਸਨੋ ਏਸ ਭਿਕ੍ਖੁ, ਪੂਰਿਤਸਾਵਕਸਨ੍ਨਿਪਾਤੋ ਏਸ ਭਿਕ੍ਖੁ, ਠਪੇਤ੍ਵਾ ਮਂ ਦਸਸੁ ਚਕ੍ਕਵਾਲ਼ਸਹਸ੍ਸੇਸੁ ਪਞ੍ਞਾਯ ਅਸਦਿਸੋ ਏਸ ਭਿਕ੍ਖੁ, ਮਹਾਪਞ੍ਞੋ ਏਸ ਭਿਕ੍ਖੁ, ਪੁਥੁਪਞ੍ਞੋ ਹਾਸਪਞ੍ਞੋ ਜਵਨਪਞ੍ਞੋ ਤਿਕ੍ਖਪਞ੍ਞੋ ਨਿਬ੍ਬੇਧਿਕਪਞ੍ਞੋ ਏਸ ਭਿਕ੍ਖੁ, ਅਪ੍ਪਿਚ੍ਛੋ ਏਸ ਭਿਕ੍ਖੁ, ਸਨ੍ਤੁਟ੍ਠੋ ਪਵਿਵਿਤ੍ਤੋ ਅਸਂਸਟ੍ਠੋ ਆਰਦ੍ਧਵੀਰਿਯੋ ਚੋਦਕੋ ਪਾਪਗਰਹੀ ਏਸ ਭਿਕ੍ਖੁ, ਪਞ੍ਚ ਜਾਤਿਸਤਾਨਿ ਪਟਿਲਦ੍ਧਮਹਾਸਮ੍ਪਤ੍ਤਿਯੋ ਪਹਾਯ ਪਬ੍ਬਜਿਤੋ ਏਸ ਭਿਕ੍ਖੁ, ਮਮ ਸਾਸਨੇ ਪਥਵੀਸਮਖਨ੍ਤਿਕੋ ਏਸ ਭਿਕ੍ਖੁ, ਛਿਨ੍ਨਵਿਸਾਣਉਸਭਸਦਿਸੋ ਏਸ ਭਿਕ੍ਖੁ, ਚਣ੍ਡਾਲਪੁਤ੍ਤਸਦਿਸਨੀਚਚਿਤ੍ਤੋ ਏਸ ਭਿਕ੍ਖੁ. ਪਸ੍ਸਥ, ਭਿਕ੍ਖਵੇ, ਮਹਾਪਞ੍ਞਸ੍ਸ ਧਾਤੁਯੋ, ਪਸ੍ਸਥ, ਭਿਕ੍ਖਵੇ, ਪੁਥੁਪਞ੍ਞਸ੍ਸ ਹਾਸਪਞ੍ਞਸ੍ਸ ਜਵਨਪਞ੍ਞਸ੍ਸ ਤਿਕ੍ਖਪਞ੍ਞਸ੍ਸ ਨਿਬ੍ਬੇਧਿਕਪਞ੍ਞਸ੍ਸ ਅਪ੍ਪਿਚ੍ਛਸ੍ਸ ਸਨ੍ਤੁਟ੍ਠਸ੍ਸ ਪਵਿਵਿਤ੍ਤਸ੍ਸ ਅਸਂਸਟ੍ਠਸ੍ਸ ਆਰਦ੍ਧਵੀਰਿਯਸ੍ਸ, ਚੋਦਕਸ੍ਸ, ਪਸ੍ਸਥ, ਭਿਕ੍ਖਵੇ, ਪਾਪਗਰਹਿਸ੍ਸ ਧਾਤੁਯੋਤਿ.

‘‘ਯੋ ਪਬ੍ਬਜੀ ਜਾਤਿਸਤਾਨਿ ਪਞ੍ਚ,

ਪਹਾਯ ਕਾਮਾਨਿ ਮਨੋਰਮਾਨਿ;

ਤਂ ਵੀਤਰਾਗਂ ਸੁਸਮਾਹਿਤਿਨ੍ਦ੍ਰਿਯਂ,

ਪਰਿਨਿਬ੍ਬੁਤਂ ਵਨ੍ਦਥ ਸਾਰਿਪੁਤ੍ਤਂ.

‘‘ਖਨ੍ਤਿਬਲੋ ਪਥਵਿਸਮੋ ਨ ਕੁਪ੍ਪਤਿ,

ਨ ਚਾਪਿ ਚਿਤ੍ਤਸ੍ਸ ਵਸੇਨ ਵਤ੍ਤਤਿ;

ਅਨੁਕਮ੍ਪਕੋ ਕਾਰੁਣਿਕੋ ਚ ਨਿਬ੍ਬੁਤੋ,

ਪਰਿਨਿਬ੍ਬੁਤਂ ਵਨ੍ਦਥ ਸਾਰਿਪੁਤ੍ਤਂ.

‘‘ਚਣ੍ਡਾਲਪੁਤ੍ਤੋ ਯਥਾ ਨਗਰਂ ਪਵਿਟ੍ਠੋ,

ਨੀਚਮਨੋ ਚਰਤਿ ਕਲ਼ੋਪਿਹਤ੍ਥੋ;

ਤਥਾ ਅਯਂ ਵਿਹਰਤਿ ਸਾਰਿਪੁਤ੍ਤੋ,

ਪਰਿਨਿਬ੍ਬੁਤਂ ਵਨ੍ਦਥ ਸਾਰਿਪੁਤ੍ਤਂ.

‘‘ਉਸਭੋ ਯਥਾ ਛਿਨ੍ਨਵਿਸਾਣਕੋ,

ਅਹੇਠਯਨ੍ਤੋ ਚਰਤਿ ਪੁਰਨ੍ਤਰੇ ਵਨੇ;

ਤਥਾ ਅਯਂ ਵਿਹਰਤਿ ਸਾਰਿਪੁਤ੍ਤੋ,

ਪਰਿਨਿਬ੍ਬੁਤਂ ਵਨ੍ਦਥ ਸਾਰਿਪੁਤ੍ਤ’’ਨ੍ਤਿ.

ਇਤਿ ਭਗਵਾ ਪਞ੍ਚਹਿ ਗਾਥਾਸਤੇਹਿ ਥੇਰਸ੍ਸ ਵਣ੍ਣਂ ਕਥੇਸਿ. ਯਥਾ ਯਥਾ ਭਗਵਾ ਥੇਰਸ੍ਸ ਵਣ੍ਣਂ ਕਥੇਸਿ, ਤਥਾ ਤਥਾ ਆਨਨ੍ਦਤ੍ਥੇਰੋ ਸਨ੍ਧਾਰੇਤੁਂ ਨ ਸਕ੍ਕੋਤਿ, ਬਿਲ਼ਾਰਮੁਖੇ ਪਕ੍ਖਨ੍ਤਕੁਕ੍ਕੁਟੋ ਵਿਯ ਪਵੇਧਤਿ. ਤੇਨਾਹ ਅਪਿਚ ਮੇ, ਭਨ੍ਤੇ, ਮਧੁਰਕਜਾਤੋ ਵਿਯ ਕਾਯੋਤਿ ਸਬ੍ਬਂ ਵਿਤ੍ਥਾਰੇਤਬ੍ਬਂ. ਤਤ੍ਥ ਮਧੁਰਕਜਾਤੋਤਿਆਦੀਨਂ ਅਤ੍ਥੋ ਵੁਤ੍ਤੋਯੇਵ. ਇਧ ਪਨ ਧਮ੍ਮਾਤਿ ਉਦ੍ਦੇਸਪਰਿਪੁਚ੍ਛਾਧਮ੍ਮਾ ਅਧਿਪ੍ਪੇਤਾ. ਤਸ੍ਸ ਹਿ ਉਦ੍ਦੇਸਪਰਿਪੁਚ੍ਛਾਧਮ੍ਮੇ ਅਗਹਿਤੇ ਵਾ ਗਹੇਤੁਂ, ਗਹਿਤੇ ਵਾ ਸਜ੍ਝਾਯਂ ਕਾਤੁਂ ਚਿਤ੍ਤਂ ਨ ਪਵਤ੍ਤਤਿ. ਅਥ ਸਤ੍ਥਾ ਪਞ੍ਚਪਸਾਦਵਿਚਿਤ੍ਰਾਨਿ ਅਕ੍ਖੀਨਿ ਉਮ੍ਮੀਲੇਤ੍ਵਾ ਥੇਰਂ ਓਲੋਕੇਨ੍ਤੋ ‘‘ਅਸ੍ਸਾਸੇਸ੍ਸਾਮਿ ਨ’’ਨ੍ਤਿ ਅਸ੍ਸਾਸੇਨ੍ਤੋ ਕਿਂ ਨੁ ਖੋ ਤੇ, ਆਨਨ੍ਦ, ਸਾਰਿਪੁਤ੍ਤੋਤਿਆਦਿਮਾਹ.

ਤਤ੍ਥ ਸੀਲਕ੍ਖਨ੍ਧਨ੍ਤਿ ਲੋਕਿਯਲੋਕੁਤ੍ਤਰਸੀਲਂ. ਸਮਾਧਿਪਞ੍ਞਾਸੁਪਿ ਏਸੇਵ ਨਯੋ. ਵਿਮੁਤ੍ਤਿ ਪਨ ਲੋਕੁਤ੍ਤਰਾਵ. ਵਿਮੁਤ੍ਤਿਞਾਣਦਸ੍ਸਨਂ ਪਚ੍ਚਵੇਕ੍ਖਣਞਾਣਂ, ਤਂ ਲੋਕਿਯਮੇਵ. ਓਵਾਦਕੋਤਿ ਓਵਾਦਦਾਯਕੋ. ਓਤਿਣ੍ਣੋਤਿ ਓਤਿਣ੍ਣੇਸੁ ਵਤ੍ਥੂਸੁ ਨਾਨਪ੍ਪਕਾਰੇਨ ਓਤਰਣਸੀਲੋ. ਵਿਞ੍ਞਾਪਕੋਤਿ ਧਮ੍ਮਕਥਾਕਾਲੇ ਅਤ੍ਥਞ੍ਚ ਕਾਰਣਞ੍ਚ ਵਿਞ੍ਞਾਪੇਤਾ. ਸਨ੍ਦਸ੍ਸਕੋਤਿ ਖਨ੍ਧਧਾਤੁਆਯਤਨਵਸੇਨ ਤੇਸਂ ਤੇਸਂ ਧਮ੍ਮਾਨਂ ਦਸ੍ਸੇਤਾ. ਸਮਾਦਪਕੋਤਿ ‘‘ਇਦਞ੍ਚਿਦਞ੍ਚ ਗਣ੍ਹਥਾ’’ਤਿ ਏਵਂ ਗਣ੍ਹਾਪਕੋ. ਸਮੁਤ੍ਤੇਜਕੋਤਿ ਅਬ੍ਭੁਸ੍ਸਾਹਕੋ. ਸਮ੍ਪਹਂਸਕੋਤਿ ਪਟਿਲਦ੍ਧਗੁਣੇਹਿ ਮੋਦਾਪਕੋ ਜੋਤਾਪਕੋ.

ਅਕਿਲਾਸੁ ਧਮ੍ਮਦੇਸਨਾਯਾਤਿ ਧਮ੍ਮਦੇਸਨਂ ਆਰਭਿਤ੍ਵਾ ‘‘ਸੀਸਂ ਵਾ ਮੇ ਰੁਜ੍ਜਤਿ, ਹਦਯਂ ਵਾ ਕੁਚ੍ਛਿ ਵਾ ਪਿਟ੍ਠਿ ਵਾ’’ਤਿ ਏਵਂ ਓਸਕ੍ਕਨਾਕਾਰਵਿਰਹਿਤੋ ਨਿਕ੍ਕਿਲਾਸੁ ਵਿਸਾਰਦੋ ਏਕਸ੍ਸਾਪਿ ਦ੍ਵਿਨ੍ਨਮ੍ਪਿ ਸੀਹਵੇਗੇਨੇਵ ਪਕ੍ਖਨ੍ਦਤਿ. ਅਨੁਗ੍ਗਾਹਕੋ ਸਬ੍ਰਹ੍ਮਚਾਰੀਨਨ੍ਤਿ ਪਦਸ੍ਸ ਅਤ੍ਥੋ ਖਨ੍ਧਕਵਗ੍ਗੇ ਵਿਤ੍ਥਾਰਿਤੋਵ. ਧਮ੍ਮੋਜਂ ਧਮ੍ਮਭੋਗਨ੍ਤਿ ਉਭਯੇਨਪਿ ਧਮ੍ਮਪਰਿਭੋਗੋਵ ਕਥਿਤੋ. ਧਮ੍ਮਾਨੁਗ੍ਗਹਨ੍ਤਿ ਧਮ੍ਮੇਨ ਅਨੁਗ੍ਗਹਣਂ.

ਸਤ੍ਥਾ ‘‘ਅਤਿਵਿਯ ਅਯਂ ਭਿਕ੍ਖੁ ਕਿਲਮਤੀ’’ਤਿ ਪੁਨ ਤਂ ਅਸ੍ਸਾਸੇਨ੍ਤੋ ਨਨੁ ਤਂ, ਆਨਨ੍ਦ, ਮਯਾਤਿਆਦਿਮਾਹ. ਤਤ੍ਥ ਪਿਯੇਹਿ ਮਨਾਪੇਹੀਤਿ ਮਾਤਾਪਿਤਾਭਾਤਾਭਗਿਨੀਆਦਿਕੇਹਿ ਜਾਤਿਯਾ ਨਾਨਾਭਾਵੋ, ਮਰਣੇਨ ਵਿਨਾਭਾਵੋ, ਭਵੇਨ ਅਞ੍ਞਥਾਭਾਵੋ. ਤਂ ਕੁਤੇਤ੍ਥ, ਆਨਨ੍ਦ, ਲਬ੍ਭਾਤਿ ਤਨ੍ਤਿ ਤਸ੍ਮਾ. ਯਸ੍ਮਾ ਸਬ੍ਬੇਹਿ ਪਿਯੇਹਿ ਮਨਾਪੇਹਿ ਨਾਨਾਭਾਵੋ, ਤਸ੍ਮਾ ਦਸ ਪਾਰਮਿਯੋ ਪੂਰੇਤ੍ਵਾਪਿ ਸਮ੍ਬੋਧਿਂ ਪਤ੍ਵਾਪਿ ਧਮ੍ਮਚਕ੍ਕਂ ਪਵਤ੍ਤੇਤ੍ਵਾਪਿ ਯਮਕਪਾਟਿਹਾਰਿਯਂ ਦਸ੍ਸੇਤ੍ਵਾਪਿ ਦੇਵੋਰੋਹਨਂ ਕਤ੍ਵਾਪਿ ਯਂ ਤਂ ਜਾਤਂ ਭੂਤਂ ਸਙ੍ਖਤਂ ਪਲੋਕਧਮ੍ਮਂ, ਤਂ ਤਥਾਗਤਸ੍ਸਾਪਿ ਸਰੀਰਂ ਮਾ ਪਲੁਜ੍ਜੀਤਿ ਨੇਤਂ ਠਾਨਂ ਵਿਜ੍ਜਤਿ, ਰੋਦਨ੍ਤੇਨਪਿ ਕਨ੍ਦਨ੍ਤੇਨਪਿ ਨ ਸਕ੍ਕਾ ਤਂ ਕਾਰਣਂ ਲਦ੍ਧੁਨ੍ਤਿ. ਸੋ ਪਲੁਜ੍ਜੇਯ੍ਯਾਤਿ ਸੋ ਭਿਜ੍ਜੇਯ੍ਯ.

ਏਵਮੇਵ ਖੋਤਿ ਏਤ੍ਥ ਯੋਜਨਸਤੁਬ੍ਬੇਧੋ ਮਹਾਜਮ੍ਬੁਰੁਕ੍ਖੋ ਵਿਯ ਭਿਕ੍ਖੁਸਙ੍ਘੋ ਤਸ੍ਸ ਦਕ੍ਖਿਣਦਿਸਂ ਗਤੋ ਪਞ੍ਞਾਸਯੋਜਨਿਕੋ ਮਹਾਖਨ੍ਧੋ ਵਿਯ ਧਮ੍ਮਸੇਨਾਪਤਿ. ਤਸ੍ਮਿਂ ਮਹਾਖਨ੍ਧੇ ਭਿਨ੍ਨੇ ਤਤੋ ਪਟ੍ਠਾਯ ਅਨੁਪੁਬ੍ਬੇਨ ਵਡ੍ਢਿਤ੍ਵਾ ਪੁਪ੍ਫਫਲਾਦੀਹਿ ਤਂ ਠਾਨਂ ਪੂਰੇਤੁਂ ਸਮਤ੍ਥਸ੍ਸ ਅਞ੍ਞਸ੍ਸ ਖਨ੍ਧਸ੍ਸ ਅਭਾਵੋ ਵਿਯ ਥੇਰੇ ਪਰਿਨਿਬ੍ਬੁਤੇ ਸੋਲ਼ਸਨ੍ਨਂ ਪਞ੍ਞਾਨਂ ਮਤ੍ਥਕਂ ਪਤ੍ਤਸ੍ਸ ਅਞ੍ਞਸ੍ਸ ਦਕ੍ਖਿਣਾਸਨੇ ਨਿਸੀਦਨਸਮਤ੍ਥਸ੍ਸ ਸਾਰਿਪੁਤ੍ਤਸਦਿਸਸ੍ਸ ਭਿਕ੍ਖੁਨੋ ਅਭਾਵੋ. ਤਾਯ ਪਰਿਭਿਨ੍ਨਾਯ ਸੋ ਰੁਕ੍ਖੋ ਵਿਯ ਭਿਕ੍ਖੁਸਙ੍ਘੋ ਖਨ੍ਧੋਤ੍ਵੇਵ ਜਾਤੋਤਿ ਵੇਦਿਤਬ੍ਬੋ. ਤਸ੍ਮਾਤਿ ਯਸ੍ਮਾ ਸਬ੍ਬਂ ਸਙ੍ਖਤਂ ਪਲੋਕਧਮ੍ਮਂ, ਤਂ ਮਾ ਪਲੁਜ੍ਜੀਤਿ ਨ ਸਕ੍ਕਾ ਲਦ੍ਧੁਂ, ਤਸ੍ਮਾ.

੪-੫. ਉਕ੍ਕਚੇਲਸੁਤ੍ਤਾਦਿਵਣ੍ਣਨਾ

੩੮੦-੩੮੧. ਚਤੁਤ੍ਥੇ ਅਚਿਰਪਰਿਨਿਬ੍ਬੁਤੇਸੁ ਸਾਰਿਪੁਤ੍ਤਮੋਗ੍ਗਲ੍ਲਾਨੇਸੂਤਿ ਨਚਿਰਪਰਿਨਿਬ੍ਬੁਤੇਸੁ ਦ੍ਵੀਸੁ ਅਗ੍ਗਸਾਵਕੇਸੁ. ਤੇਸਞ੍ਹਿ ਧਮ੍ਮਸੇਨਾਪਤਿ ਕਤ੍ਤਿਕਮਾਸਪੁਣ੍ਣਮਾਯ ਪਰਿਨਿਬ੍ਬੁਤੋ, ਮਹਾਮੋਗ੍ਗਲ੍ਲਾਨੋ ਤਤੋ ਅਡ੍ਢਮਾਸਂ ਅਤਿਕ੍ਕਮ੍ਮ ਅਮਾਵਸੁਪੋਸਥੇ. ਸਤ੍ਥਾ ਦ੍ਵੀਸੁ ਅਗ੍ਗਸਾਵਕੇਸੁ ਪਰਿਨਿਬ੍ਬੁਤੇਸੁ ਮਹਾਭਿਕ੍ਖੁਸਙ੍ਘਪਰਿਵਾਰੋ ਮਹਾਮਣ੍ਡਲੇ ਚਾਰਿਕਂ ਚਰਮਾਨੋ ਅਨੁਪੁਬ੍ਬੇਨ ਉਕ੍ਕਚੇਲਨਗਰਂ ਪਤ੍ਵਾ ਤਤ੍ਥ ਪਿਣ੍ਡਾਯ ਚਰਿਤ੍ਵਾ ਗਙ੍ਗਾਪਿਟ੍ਠੇ ਰਜਤਪਟ੍ਟਵਣ੍ਣਵਾਲਿਕਾਪੁਲਿਨੇ ਵਿਹਾਸਿ. ਤੇਨ ਵੁਤ੍ਤਂ ‘‘ਅਚਿਰਪਰਿਨਿਬ੍ਬੁਤੇਸੁ ਸਾਰਿਪੁਤ੍ਤਮੋਗ੍ਗਲ੍ਲਾਨੇਸੂ’’ਤਿ. ਯੇ ਮਹਨ੍ਤਤਰਾ ਖਨ੍ਧਾ ਤੇ ਪਲੁਜ੍ਜੇਯ੍ਯੁਨ੍ਤਿ ਇਧਾਪਿ ਯੋਜਨਸਤੁਬ੍ਬੇਧੋ ਮਹਾਜਮ੍ਬੁਰੁਕ੍ਖੋ ਵਿਯ ਭਿਕ੍ਖੁਸਙ੍ਘੋ, ਤਸ੍ਸ ਦਕ੍ਖਿਣਤੋ ਚ ਉਤ੍ਤਰਤੋ ਚ ਗਤਾ ਪਣ੍ਣਾਸਯੋਜਨਿਕਾ ਦ੍ਵੇ ਮਹਾਖਨ੍ਧਾ ਵਿਯ ਦ੍ਵੇ ਅਗ੍ਗਸਾਵਕਾਤਿ. ਸੇਸਂ ਪੁਰਿਮਨਯੇਨੇਵ ਯੋਜੇਤਬ੍ਬਂ. ਪਞ੍ਚਮੇ ਦਿਟ੍ਠੀਤਿ ਕਮ੍ਮਸ੍ਸਕਦਿਟ੍ਠਿ.

੬. ਉਤ੍ਤਿਯਸੁਤ੍ਤਵਣ੍ਣਨਾ

੩੮੨. ਛਟ੍ਠੇ ਮਚ੍ਚੁਧੇਯ੍ਯਸ੍ਸ ਪਾਰਨ੍ਤਿ ਤੇਭੂਮਕਵਟ੍ਟਸ੍ਸ ਪਾਰਭੂਤਂ, ਨਿਬ੍ਬਾਨਂ.

੮. ਬ੍ਰਹ੍ਮਸੁਤ੍ਤਵਣ੍ਣਨਾ

੩੮੪. ਅਟ੍ਠਮੇ ਕਾਯੇ ਵਾ ਭਿਕ੍ਖੂਤਿ ਤਸ੍ਮਿਂ ਕਾਲੇ ਭਿਕ੍ਖੁਯੇਵ ਨਤ੍ਥਿ, ਏਵਂ ਸਨ੍ਤੇਪਿ ਯੋ ਸਤਿਪਟ੍ਠਾਨੇ ਭਾਵੇਤਿ, ਸੋ ਕਿਲੇਸਭਿਨ੍ਦਨੇਨ ਭਿਕ੍ਖੁਯੇਵਾਤਿ ਦਸ੍ਸੇਨ੍ਤੋ ਏਵਮਾਹ. ਏਕਾਯਨਨ੍ਤਿ ਏਕਮਗ੍ਗਂ. ਜਾਤਿਕ੍ਖਯਨ੍ਤਦਸ੍ਸੀਤਿ ਜਾਤਿਯਾ ਖਯੋਤਿ ਚ ਅਨ੍ਤੋਤਿ ਚ ਨਿਬ੍ਬਾਨਂ, ਤਂ ਪਸ੍ਸਤੀਤਿ ਅਤ੍ਥੋ. ਮਗ੍ਗਂ ਪਜਾਨਾਤੀਤਿ ਏਕਾਯਨਸਙ੍ਖਾਤਂ ਏਕਮਗ੍ਗਭੂਤਂ ਮਗ੍ਗਂ ਪਜਾਨਾਤਿ. ਏਕਾਯਨਮਗ੍ਗੋ ਵੁਚ੍ਚਤਿ ਪੁਬ੍ਬਭਾਗਸਤਿਪਟ੍ਠਾਨਮਗ੍ਗੋ, ਤਂ ਪਜਾਨਾਤੀਤਿ ਅਤ੍ਥੋ.

੯. ਸੇਦਕਸੁਤ੍ਤਵਣ੍ਣਨਾ

੩੮੫. ਨਵਮੇ ਸੁਮ੍ਭੇਸੂਤਿ ਏਵਂਨਾਮਕੇ ਜਨਪਦੇ. ਮੇਦਕਥਾਲਿਕਾਤਿ ਏਵਂ ਇਤ੍ਥਿਲਿਙ੍ਗਵਸੇਨ ਲਦ੍ਧਨਾਮਂ. ਮਮਂ ਰਕ੍ਖ, ਅਹਂ ਤਂ ਰਕ੍ਖਿਸ੍ਸਾਮੀਤਿ ਏਤ੍ਥ ਅਯਂ ਤਸ੍ਸ ਲਦ੍ਧਿ – ਆਚਰਿਯੋ ਉਕ੍ਖਿਤ੍ਤਵਂਸਂ ਸੁਗ੍ਗਹਿਤਂ ਅਗਣ੍ਹਨ੍ਤੋ, ਅਨ੍ਤੇਵਾਸਿਕੇਨ ਪਕ੍ਖਨ੍ਤਪਕ੍ਖਨ੍ਤਦਿਸਂ ਅਗਚ੍ਛਨ੍ਤੋ, ਸਬ੍ਬਕਾਲਞ੍ਚ ਵਂਸਗ੍ਗਂ ਅਨੁਲ੍ਲੋਕੇਨ੍ਤੋ ਅਨ੍ਤੇਵਾਸਿਕਂ ਨ ਰਕ੍ਖਤਿ ਨਾਮ, ਏਵਂ ਅਰਕ੍ਖਿਤੋ ਅਨ੍ਤੇਵਾਸਿਕੋ ਪਤਿਤ੍ਵਾ ਚੁਣ੍ਣਵਿਚੁਣ੍ਣਂ ਹੋਤਿ. ਵਂਸਂ ਪਨ ਸੁਗ੍ਗਹਿਤਂ ਗਣ੍ਹਨ੍ਤੋ, ਤੇਨ ਪਕ੍ਖਨ੍ਤਪਕ੍ਖਨ੍ਤਦਿਸਂ ਗਚ੍ਛਨ੍ਤੋ, ਸਬ੍ਬਕਾਲਞ੍ਚ ਵਂਸਗ੍ਗਂ ਉਲ੍ਲੋਕੇਨ੍ਤੋ ਤਂ ਰਕ੍ਖਤਿ ਨਾਮ. ਅਨ੍ਤੇਵਾਸਿਕੋਪਿ ਇਤੋ ਚਿਤੋ ਚ ਪਕ੍ਖਨ੍ਦਿਤ੍ਵਾ ਮਿਗੋ ਵਿਯ ਕੀਲ਼ਨ੍ਤੋ ਆਚਰਿਯਂ ਨ ਰਕ੍ਖਤਿ ਨਾਮ. ਏਵਞ੍ਹਿ ਸਤਿ ਤਿਖਿਣਵਂਸਕੋਟਿ ਆਚਰਿਯਸ੍ਸ ਗਲਵਾਟਕੇ ਵਾ ਨਲਾਟੇ ਵਾ ਠਪਿਤਾ ਠਿਤਟ੍ਠਾਨਂ ਭਿਨ੍ਦਿਤ੍ਵਾ ਗਚ੍ਛੇਯ੍ਯ. ਆਚਾਰਸਮ੍ਪਨ੍ਨਤਾਯ ਪਨ ਯਤੋ ਵਂਸੋ ਨਮਤਿ, ਤਤੋ ਅਨਾਮੇਨ੍ਤੋ ਤਂ ਆਕਡ੍ਢੇਨ੍ਤੋ ਵਿਯ ਏਕਤੋਭਾਗਿਯਂ ਕਤ੍ਵਾ ਵਾਤੂਪਥਮ੍ਭਂ ਗਾਹਾਪੇਤ੍ਵਾ ਸਤਿਂ ਸੂਪਟ੍ਠਿਤਂ ਕਤ੍ਵਾ ਨਿਚ੍ਚਲੋਵ ਨਿਸੀਦਨ੍ਤੋ ਆਚਰਿਯਂ ਰਕ੍ਖਤਿ ਨਾਮਾਤਿ.

ਤ੍ਵਂ ਆਚਰਿਯ ਅਤ੍ਤਾਨਂ ਰਕ੍ਖ, ਅਹਂ ਅਤ੍ਤਾਨਂ ਰਕ੍ਖਿਸ੍ਸਾਮੀਤਿ ਏਤ੍ਥ ਅਯਮਧਿਪ੍ਪਾਯੋ – ਆਚਰਿਯੋ ਵਂਸਂ ਸੁਗ੍ਗਹਿਤਂ ਗਣ੍ਹਨ੍ਤੋ, ਅਨ੍ਤੇਵਾਸਿਕੇਨ ਪਕ੍ਖਨ੍ਤਪਕ੍ਖਨ੍ਤਦਿਸਂਗਚ੍ਛਨ੍ਤੋ, ਸਬ੍ਬਕਾਲਞ੍ਚ ਵਂਸਗ੍ਗਂ ਉਲ੍ਲੋਕੇਨ੍ਤੋ, ਅਤ੍ਤਾਨਮੇਵ ਰਕ੍ਖਤਿ, ਨ ਅਨ੍ਤੇਵਾਸਿਕਂ. ਅਨ੍ਤੇਵਾਸਿਕੋਪਿ ਕਾਯਮ੍ਪਿ ਏਕਤੋਭਾਗਿਯਂ ਕਤ੍ਵਾ ਵਾਤੂਪਥਮ੍ਭਂ ਗਾਹਾਪੇਤ੍ਵਾ ਸਤਿਂ ਸੂਪਟ੍ਠਿਤਂ ਕਤ੍ਵਾ ਨਿਚ੍ਚਲੋਵ ਨਿਸੀਦਮਾਨੋ ਅਤ੍ਤਾਨਂਯੇਵ ਰਕ੍ਖਤਿ ਨਾਮ, ਨ ਆਚਰਿਯਂ.

ਸੋ ਤਤ੍ਥ ਞਾਯੋਤਿ ਯਂ ਮੇਦਕਥਾਲਿਕਾ ਆਹ. ਸੋ ਤਤ੍ਥ ਞਾਯੋ, ਸੋ ਉਪਾਯੋ, ਤਂ ਕਾਰਣਨ੍ਤਿ ਅਤ੍ਥੋ. ਸਤਿਪਟ੍ਠਾਨਂ ਸੇਵਿਤਬ੍ਬਨ੍ਤਿ ਚਤੁਬ੍ਬਿਧਂ ਸਤਿਪਟ੍ਠਾਨਂ ਸੇਵਿਤਬ੍ਬਂ. ਆਸੇਵਨਾਯਾਤਿ ਕਮ੍ਮਟ੍ਠਾਨਾਸੇਵਨਾਯ. ਏਵਂ ਖੋ, ਭਿਕ੍ਖਵੇ, ਅਤ੍ਤਾਨਂ ਰਕ੍ਖਨ੍ਤੋ ਪਰਂ ਰਕ੍ਖਤੀਤਿ ਯੋ ਭਿਕ੍ਖੁ ਕਮ੍ਮਾਰਾਮਤਾਦੀਨਿ ਪਹਾਯ ਰਤ੍ਤਿਟ੍ਠਾਨਦਿਵਾਟ੍ਠਾਨੇਸੁ ਮੂਲਕਮ੍ਮਟ੍ਠਾਨਂ ਆਸੇਵਨ੍ਤੋ ਭਾਵੇਨ੍ਤੋ ਅਰਹਤ੍ਤਂ ਪਾਪੁਣਾਤਿ, ਅਥ ਨਂ ਪਰੋ ਦਿਸ੍ਵਾ – ‘‘ਭਦ੍ਦਕੋ ਵਤਾਯਂ, ਭਿਕ੍ਖੁ, ਸਮ੍ਮਾਪਟਿਪਨ੍ਨੋ’’ਤਿ ਤਸ੍ਮਿਂ ਚਿਤ੍ਤਂ ਪਸਾਦੇਤ੍ਵਾ ਸਗ੍ਗਪਰਾਯਣੋ ਹੋਤਿ. ਅਯਂ ਅਤ੍ਤਾਨਂ ਰਕ੍ਖਨ੍ਤੋ ਪਰਂ ਰਕ੍ਖਤਿ ਨਾਮ.

ਖਨ੍ਤਿਯਾਤਿ ਅਧਿਵਾਸਨਖਨ੍ਤਿਯਾ. ਅਵਿਹਿਂਸਾਯਾਤਿ ਸਪੁਬ੍ਬਭਾਗਾਯ ਕਰੁਣਾਯ. ਮੇਤ੍ਤਚਿਤ੍ਤਤਾਯਾਤਿ ਸਪੁਬ੍ਬਭਾਗਾਯ ਮੇਤ੍ਤਾਯ. ਅਨੁਦਯਤਾਯਾਤਿ ਅਨੁਵਡ੍ਢਿਯਾ, ਸਪੁਬ੍ਬਭਾਗਾਯ ਮੁਦਿਤਾਯਾਤਿ ਅਤ੍ਥੋ. ਪਰਂ ਰਕ੍ਖਨ੍ਤੋ ਅਤ੍ਤਾਨਂ ਰਕ੍ਖਤੀਤਿ ਏਤ੍ਥ ਯੋ ਭਿਕ੍ਖੁ ਰਤ੍ਤਿਟ੍ਠਾਨਦਿਵਾਟ੍ਠਾਨਂ ਗਤੋ ਤੀਸੁ ਬ੍ਰਹ੍ਮਵਿਹਾਰੇਸੁ ਤਿਕਚਤੁਕ੍ਕਜ੍ਝਾਨਾਨਿ ਨਿਬ੍ਬਤ੍ਤੇਤ੍ਵਾ ਝਾਨਂ ਪਾਦਕਂ ਕਤ੍ਵਾ ਸਙ੍ਖਾਰੇ ਸਮ੍ਮਸਨ੍ਤੋ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਾਤਿ. ਅਯਂ ਪਰਂ ਰਕ੍ਖਨ੍ਤੋ ਅਤ੍ਤਾਨਂ ਰਕ੍ਖਤਿ ਨਾਮਾਤਿ ਵੇਦਿਤਬ੍ਬੋ.

੧੦. ਜਨਪਦਕਲ੍ਯਾਣੀਸੁਤ੍ਤਵਣ੍ਣਨਾ

੩੮੬. ਦਸਮੇ ਜਨਪਦਕਲ੍ਯਾਣੀਤਿ ਜਨਪਦਮ੍ਹਿ ਕਲ੍ਯਾਣੀ ਉਤ੍ਤਮਾ ਛਸਰੀਰਦੋਸਰਹਿਤਾ ਪਞ੍ਚਕਲ੍ਯਾਣਸਮਨ੍ਨਾਗਤਾ. ਸਾ ਹਿ ਯਸ੍ਮਾ ਨਾਤਿਦੀਘਾ ਨਾਤਿਰਸ੍ਸਾ, ਨਾਤਿਕਿਸਾ ਨਾਤਿਥੂਲਾ, ਨਾਤਿਕਾਲ਼ਾ ਨਾਚ੍ਚੋਦਾਤਾ, ਅਤਿਕ੍ਕਨ੍ਤਾ, ਮਾਨੁਸਵਣ੍ਣਂ ਅਪ੍ਪਤ੍ਤਾ ਦਿਬ੍ਬਵਣ੍ਣਂ, ਤਸ੍ਮਾ ਛਸਰੀਰਦੋਸਰਹਿਤਾ. ਛਵਿਕਲ੍ਯਾਣਂ, ਮਂਸਕਲ੍ਯਾਣਂ, ਨ੍ਹਾਰੁਕਲ੍ਯਾਣਂ, ਅਟ੍ਠਿਕਲ੍ਯਾਣਂ, ਵਯਕਲ੍ਯਾਣਨ੍ਤਿ ਇਮੇਹਿ ਪਨ ਕਲ੍ਯਾਣੇਹਿ ਸਮਨ੍ਨਾਗਤਤ੍ਤਾ ਪਞ੍ਚਕਲ੍ਯਾਣੇਹਿ ਸਮਨ੍ਨਾਗਤਾ ਨਾਮ. ਤਸ੍ਸਾ ਹਿ ਆਗਨ੍ਤੁਕੋਭਾਸਕਿਚ੍ਚਂ ਨਤ੍ਥਿ, ਅਤ੍ਤਨੋ ਸਰੀਰੋਭਾਸੇਨੇਵ ਦ੍ਵਾਦਸਹਤ੍ਥਟ੍ਠਾਨੇ ਆਲੋਕਂ ਕਰੋਤਿ, ਪਿਯਙ੍ਗੁਸਾਮਾ ਵਾ ਹੋਤਿ, ਸੁਵਣ੍ਣਸਾਮਾ ਵਾ, ਅਯਮਸ੍ਸਾ ਛਵਿਕਲ੍ਯਾਣਤਾ. ਚਤ੍ਤਾਰੋ ਪਨਸ੍ਸਾ ਹਤ੍ਥਪਾਦਾ ਮੁਖਪਰਿਯੋਸਾਨਞ੍ਚ ਲਾਖਾਰਸਪਰਿਕਮ੍ਮਕਤਂ ਵਿਯ ਰਤ੍ਤਪਵਾਲ਼ਰਤ੍ਤਕਮ੍ਬਲਸਦਿਸਂ ਹੋਤਿ, ਅਯਮਸ੍ਸਾ ਮਂਸਕਲ੍ਯਾਣਤਾ. ਵੀਸਤਿ ਪਨ ਨਖਪਤ੍ਤਾਨਿ ਮਂਸਤੋ ਅਮੁਤ੍ਤਟ੍ਠਾਨੇ ਲਾਖਾਰਸਪੂਰਿਤਾਨਿ ਵਿਯ, ਮੁਤ੍ਤਟ੍ਠਾਨੇ ਖੀਰਧਾਰਾਸਦਿਸਾਨਿ, ਹੋਨ੍ਤਿ ਅਯਮਸ੍ਸਾ ਨ੍ਹਾਰੁਕਲ੍ਯਾਣਕਤਾ. ਦ੍ਵਤ੍ਤਿਂਸ ਦਨ੍ਤਾ ਸੁਫੁਸਿਤਾ ਸੁਧੋਤਵਜਿਰਪਨ੍ਤਿ ਵਿਯ ਖਾਯਨ੍ਤਿ, ਅਯਮਸ੍ਸਾ ਅਟ੍ਠਿਕਲ੍ਯਾਣਤਾ. ਵੀਸਤਿਵਸ੍ਸਸਤਿਕਾਪਿ ਪਨ ਸਮਾਨਾ ਸੋਲ਼ਸਵਸ੍ਸੁਦ੍ਦੇਸਿਕਾ ਵਿਯ ਹੋਤਿ ਨਿਪ੍ਪਲਿਤਾ, ਅਯਮਸ੍ਸਾ ਵਯਕਲ੍ਯਾਣਤਾ.

ਪਰਮਪਾਸਾਵਿਨੀਤਿ ਏਤ੍ਥ ਪਸਵਨਂ ਪਸਾਵੋ, ਪਵਤ੍ਤੀਤਿ ਅਤ੍ਥੋ. ਪਸਾਵੋ ਏਵ ਪਾਸਾਵੋ. ਪਰਮੋ ਪਾਸਾਵੋ ਪਰਮਪਾਸਾਵੋ, ਸੋ ਅਸ੍ਸਾ ਅਤ੍ਥੀਤਿ ਪਰਮਪਾਸਾਵਿਨੀ. ਨਚ੍ਚੇ ਚ ਗੀਤੇ ਚ ਉਤ੍ਤਮਪਵਤ੍ਤਿ ਸੇਟ੍ਠਕਿਰਿਯਾ, ਉਤ੍ਤਮਮੇਵ ਨਚ੍ਚਂ ਨਚ੍ਚਤਿ, ਗੀਤਂ ਵਾ ਗਾਯਤੀਤਿ ਵੁਤ੍ਤਂ ਹੋਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵ. ਇਮੇਸੁ ਪਨ ਦ੍ਵੀਸੁ ਸੁਤ੍ਤੇਸੁ ਪੁਬ੍ਬਭਾਗਵਿਪਸ੍ਸਨਾਵ ਕਥਿਤਾਤਿ.

ਨਾਲਨ੍ਦਵਗ੍ਗੋ ਦੁਤਿਯੋ.