੯. ਅਸਙ੍ਖਤਸਂਯੁਤ੍ਤਂ

੧. ਪਠਮਵਗ੍ਗੋ

੧-੧੧. ਕਾਯਗਤਾਸਤਿਸੁਤ੍ਤਾਦਿਵਣ੍ਣਨਾ

੩੬੬-੩੭੬. ਅਸਙ੍ਖਤਸਂਯੁਤ੍ਤੇ ਅਸਙ੍ਖਤਨ੍ਤਿ ਅਕਤਂ. ਹਿਤੇਸਿਨਾਤਿ ਹਿਤਂ ਏਸਨ੍ਤੇਨ. ਅਨੁਕਮ੍ਪਕੇਨਾਤਿ ਅਨੁਕਮ੍ਪਮਾਨੇਨ. ਅਨੁਕਮ੍ਪਂ ਉਪਾਦਾਯਾਤਿ ਅਨੁਕਮ੍ਪਂ ਚਿਤ੍ਤੇਨ ਪਰਿਗ੍ਗਹੇਤ੍ਵਾ, ਪਟਿਚ੍ਚਾਤਿਪਿ ਵੁਤ੍ਤਂ ਹੋਤਿ. ਕਤਂ ਵੋ ਤਂ ਮਯਾਤਿ ਤਂ ਮਯਾ ਇਮਂ ਅਸਙ੍ਖਤਞ੍ਚ ਅਸਙ੍ਖਤਮਗ੍ਗਞ੍ਚ ਦੇਸੇਨ੍ਤੇਨ ਤੁਮ੍ਹਾਕਂ ਕਤਂ. ਏਤ੍ਤਕਮੇਵ ਹਿ ਅਨੁਕਮ੍ਪਕਸ੍ਸ ਸਤ੍ਥੁ ਕਿਚ੍ਚਂ, ਯਦਿਦਂ ਅਵਿਪਰੀਤਧਮ੍ਮਦੇਸਨਾ. ਇਤੋ ਪਰਂ ਪਨ ਪਟਿਪਤ੍ਤਿ ਨਾਮ ਸਾਵਕਾਨਂ ਕਿਚ੍ਚਂ. ਤੇਨਾਹ ਏਤਾਨਿ, ਭਿਕ੍ਖਵੇ, ਰੁਕ੍ਖਮੂਲਾਨਿ…ਪੇ… ਅਮ੍ਹਾਕਂ ਅਨੁਸਾਸਨੀਤਿ ਇਮਿਨਾ ਰੁਕ੍ਖਮੂਲਸੇਨਾਸਨਂ ਦਸ੍ਸੇਤਿ. ਸੁਞ੍ਞਾਗਾਰਾਨੀਤਿ ਇਮਿਨਾ ਜਨਵਿਵਿਤ੍ਤਂ ਠਾਨਂ. ਉਭਯੇਨ ਚ ਯੋਗਾਨੁਰੂਪਂ ਸੇਨਾਸਨਂ ਆਚਿਕ੍ਖਤਿ, ਦਾਯਜ੍ਜਂ ਨਿਯ੍ਯਾਤੇਤਿ.

ਝਾਯਥਾਤਿ ਆਰਮ੍ਮਣੂਪਨਿਜ੍ਝਾਨੇਨ ਅਟ੍ਠਤਿਂਸਾਰਮ੍ਮਣਾਨਿ, ਲਕ੍ਖਣੂਪਨਿਜ੍ਝਾਨੇਨ ਚ ਅਨਿਚ੍ਚਾਦਿਤੋ ਖਨ੍ਧਾਯਤਨਾਦੀਨਿ ਉਪਨਿਜ੍ਝਾਯਥ, ਸਮਥਞ੍ਚ ਵਿਪਸ੍ਸਨਞ੍ਚ ਵਡ੍ਢੇਥਾਤਿ ਵੁਤ੍ਤਂ ਹੋਤਿ. ਮਾ ਪਮਾਦਤ੍ਥਾਤਿ ਮਾ ਪਮਜ੍ਜਿਤ੍ਥ. ਮਾ ਪਚ੍ਛਾ ਵਿਪ੍ਪਟਿਸਾਰਿਨੋ ਅਹੁਵਤ੍ਥਾਤਿ ਯੇ ਹਿ ਪੁਬ੍ਬੇ ਦਹਰਕਾਲੇ ਅਰੋਗਕਾਲੇ ਸਤ੍ਤਸਪ੍ਪਾਯਾਦਿਸਮ੍ਪਤ੍ਤਿਕਾਲੇ ਸਤ੍ਥੁ ਸਮ੍ਮੁਖੀਭਾਵਕਾਲੇ ਚ ਯੋਨਿਸੋਮਨਸਿਕਾਰਰਹਿਤਾ ਰਤ੍ਤਿਨ੍ਦਿਵਂ ਮਙ੍ਕੁਲਭਤ੍ਤਂ ਹੁਤ੍ਵਾ ਸੇਯ੍ਯਸੁਖਂ ਮਿਦ੍ਧਸੁਖਂ ਅਨੁਭੋਨ੍ਤਾ ਪਮਜ੍ਜਨ੍ਤਿ, ਤੇ ਪਚ੍ਛਾ ਜਰਾਕਾਲੇ ਰੋਗਕਾਲੇ ਮਰਣਕਾਲੇ ਵਿਪਤ੍ਤਿਕਾਲੇ ਸਤ੍ਥੁ ਪਰਿਨਿਬ੍ਬੁਤਕਾਲੇ ਚ ਤਂ ਪੁਬ੍ਬੇ ਪਮਾਦਵਿਹਾਰਂ ਅਨੁਸ੍ਸਰਨ੍ਤਾ ਸਪ੍ਪਟਿਸਨ੍ਧਿਕਾਲਕਿਰਿਯਞ੍ਚ ਭਾਰਿਯਂ ਸਮ੍ਪਸ੍ਸਮਾਨਾ ਵਿਪ੍ਪਟਿਸਾਰਿਨੋ ਹੋਨ੍ਤਿ. ਤੁਮ੍ਹੇ ਪਨ ਤਾਦਿਸਾ ਮਾ ਅਹੁਵਤ੍ਥਾਤਿ ਦਸ੍ਸੇਨ੍ਤੋ ਆਹ ‘‘ਮਾ ਪਚ੍ਛਾ ਵਿਪ੍ਪਟਿਸਾਰਿਨੋ ਅਹੁਵਤ੍ਥਾ’’ਤਿ.

ਅਯਂ ਵੋ ਅਮ੍ਹਾਕਂ ਅਨੁਸਾਸਨੀਤਿ ਅਯਂ ਅਮ੍ਹਾਕਂ ਸਨ੍ਤਿਕਾ ‘‘ਝਾਯਥ ਮਾ ਪਮਾਦਤ੍ਥਾ’’ਤਿ ਤੁਮ੍ਹਾਕਂ ਅਨੁਸਾਸਨੀ, ਓਵਾਦੋਤਿ ਵੁਤ੍ਤਂ ਹੋਤਿ.

੨. ਦੁਤਿਯਵਗ੍ਗੋ

੧-੩੩. ਅਸਙ੍ਖਤਸੁਤ੍ਤਾਦਿਵਣ੍ਣਨਾ

੩੭੭-੪੦੯. ਕਾਯੇ ਕਾਯਾਨੁਪਸ੍ਸੀਤਿਆਦੀਸੁ ਯਂ ਵਤ੍ਤਬ੍ਬਂ, ਤਂ ਪਰਤੋ ਵਕ੍ਖਾਮ.

ਅਨਤਨ੍ਤਿਆਦੀਸੁ ਤਣ੍ਹਾਨਤਿਯਾ ਅਭਾਵੇਨ ਅਨਤਂ. ਚਤੁਨ੍ਨਂ ਆਸਵਾਨਂ ਅਭਾਵੇਨ ਅਨਾਸਵਂ. ਪਰਮਤ੍ਥਸਚ੍ਚਤਾਯ ਸਚ੍ਚਂ. ਵਟ੍ਟਸ੍ਸ ਪਰਭਾਗਟ੍ਠੇਨ ਪਾਰਂ. ਸਣ੍ਹਟ੍ਠੇਨ ਨਿਪੁਣਂ. ਸੁਟ੍ਠੁ ਦੁਦ੍ਦਸਤਾਯ ਸੁਦੁਦ੍ਦਸਂ. ਜਰਾਯ ਅਜਰਿਤਤ੍ਤਾ ਅਜਜ੍ਜਰਂ. ਥਿਰਟ੍ਠੇਨ ਧੁਵਂ. ਅਪਲੁਜ੍ਜਨਤਾਯ ਅਪਲੋਕਿਤਂ. ਚਕ੍ਖੁਵਿਞ੍ਞਾਣੇਨ ਅਪਸ੍ਸਿਤਬ੍ਬਤ੍ਤਾ ਅਨਿਦਸ੍ਸਨਂ. ਤਣ੍ਹਾਮਾਨਦਿਟ੍ਠਿਪਪਞ੍ਚਾਨਂ ਅਭਾਵੇਨ ਨਿਪ੍ਪਪਞ੍ਚਂ.

ਸਨ੍ਤਭਾਵਟ੍ਠੇਨ ਸਨ੍ਤਂ. ਮਰਣਾਭਾਵੇਨ ਅਮਤਂ. ਉਤ੍ਤਮਟ੍ਠੇਨ ਪਣੀਤਂ. ਸਸ੍ਸਿਰਿਕਟ੍ਠੇਨ ਸਿਵਂ. ਨਿਰੁਪਦ੍ਦਵਤਾਯ ਖੇਮਂ. ਤਣ੍ਹਾਕ੍ਖਯਸ੍ਸ ਪਚ੍ਚਯਤ੍ਤਾ ਤਣ੍ਹਕ੍ਖਯਂ.

ਵਿਮ੍ਹਾਪਨੀਯਟ੍ਠੇਨ ਅਚ੍ਛਰਂ ਪਹਰਿਤਬ੍ਬਯੁਤ੍ਤਕਨ੍ਤਿ ਅਚ੍ਛਰਿਯਂ. ਅਭੂਤਮੇਵ ਭੂਤਂ ਅਜਾਤਂ ਹੁਤ੍ਵਾ ਅਤ੍ਥੀਤਿ ਵਾ ਅਬ੍ਭੁਤਂ. ਨਿਦ੍ਦੁਕ੍ਖਤ੍ਤਾ ਅਨੀਤਿਕਂ. ਨਿਦ੍ਦੁਕ੍ਖਸਭਾਵਤ੍ਤਾ ਅਨੀਤਿਕਧਮ੍ਮਂ. ਵਾਨਾਭਾਵੇਨ ਨਿਬ੍ਬਾਨਂ. ਬ੍ਯਾਬਜ੍ਝਾਭਾਵੇਨੇਵ ਅਬ੍ਯਾਬਜ੍ਝਂ. ਵਿਰਾਗਾਧਿਗਮਸ੍ਸ ਪਚ੍ਚਯਤੋ ਵਿਰਾਗਂ. ਪਰਮਤ੍ਥਸੁਦ੍ਧਿਤਾਯ ਸੁਦ੍ਧਿ. ਤੀਹਿ ਭਵੇਹਿ ਮੁਤ੍ਤਤਾਯ ਮੁਤ੍ਤਿ. ਕਾਮਾਲਯਾਨਂ ਅਭਾਵੇਨ ਅਨਾਲਯਂ. ਪਤਿਟ੍ਠਟ੍ਠੇਨ ਦੀਪਂ. ਅਲ੍ਲੀਯਿਤਬ੍ਬਯੁਤ੍ਤਟ੍ਠੇਨ ਲੇਣਂ. ਤਾਯਨਟ੍ਠੇਨ ਤਾਣਂ. ਭਯਸਰਣਟ੍ਠੇਨ ਸਰਣਂ, ਭਯਨਾਸਨਨ੍ਤਿ ਅਤ੍ਥੋ. ਪਰਂ ਅਯਨਂ ਗਤਿ ਪਤਿਟ੍ਠਾਤਿ ਪਰਾਯਣਂ. ਸੇਸਮੇਤ੍ਥ ਵੁਤ੍ਤਨਯਮੇਵਾਤਿ.

ਅਸਙ੍ਖਤਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.