੧੦. ਅਬ੍ਯਾਕਤਸਂਯੁਤ੍ਤਂ
੧. ਖੇਮਾਸੁਤ੍ਤਵਣ੍ਣਨਾ
੪੧੦. ਅਬ੍ਯਾਕਤਸਂਯੁਤ੍ਤਸ੍ਸ ਪਠਮੇ ਖੇਮਾਤਿ ਗਿਹਿਕਾਲੇ ਬਿਮ੍ਬਿਸਾਰਸ੍ਸ ਉਪਾਸਿਕਾ ਸਦ੍ਧਾਪਬ੍ਬਜਿਤਾ ਮਹਾਥੇਰੀ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਿਕਾਨਂ ਭਿਕ੍ਖੁਨੀਨਂ ਮਹਾਪਞ੍ਞਾਨਂ ਯਦਿਦਂ ਖੇਮਾ’’ਤਿ ਏਵਂ ਭਗਵਤਾ ਮਹਾਪਞ੍ਞਤਾਯ ਏਤਦਗ੍ਗੇ ਠਪਿਤਾ. ਪਣ੍ਡਿਤਾਤਿ ਪਣ੍ਡਿਚ੍ਚੇਨ ਸਮਨ੍ਨਾਗਤਾ. ਵਿਯਤ੍ਤਾਤਿ ਵੇਯ੍ਯਤ੍ਤਿਯੇਨ ਸਮਨ੍ਨਾਗਤਾ. ਮੇਧਾਵਿਨੀਤਿ ਮੇਧਾਯ ਪਞ੍ਞਾਯ ਸਮਨ੍ਨਾਗਤਾ. ਬਹੁਸ੍ਸੁਤਾਤਿ ਪਰਿਯਤ੍ਤਿਬਾਹੁਸਚ੍ਚੇਨਪਿ ਪਟਿਵੇਧਬਾਹੁਸਚ੍ਚੇਨਪਿ ਸਮਨ੍ਨਾਗਤਾ.
ਗਣਕੋਤਿ ਅਚ੍ਛਿਦ੍ਦਕਗਣਨਾਯ ਕੁਸਲੋ. ਮੁਦ੍ਦਿਕੋਤਿ ਅਙ੍ਗੁਲਿਮੁਦ੍ਦਾਯ ਗਣਨਾਯ ਕੁਸਲੋ. ਸਙ੍ਖਾਯਕੋਤਿ ਪਿਣ੍ਡਗਣਨਾਯ ਕੁਸਲੋ. ਗਮ੍ਭੀਰੋਤਿ ਚਤੁਰਾਸੀਤਿਯੋਜਨਸਹਸ੍ਸਗਮ੍ਭੀਰੋ. ਅਪ੍ਪਮੇਯ੍ਯੋਤਿ ਆਲ਼੍ਹਕਗਣਨਾਯ ਅਪ੍ਪਮੇਯ੍ਯੋ. ਦੁਪ੍ਪਰਿਯੋਗਾਹੋਤਿ ਆਲ਼੍ਹਕਗਣਨਾਯ ਪਮਾਣਗਹਣਤ੍ਥਂ ਦੁਰੋਗਾਹੋ. ਯੇਨ ਰੂਪੇਨ ਤਥਾਗਤਨ੍ਤਿ ਯੇਨ ਰੂਪੇਨ ਦੀਘੋ ਰਸ੍ਸੋ ਸਾਮੋ ਓਦਾਤੋਤਿ ਸਤ੍ਤਸਙ੍ਖਾਤਂ ਤਥਾਗਤਂ ਪਞ੍ਞਪੇਯ੍ਯ. ਤਂ ਰੂਪਂ ਤਥਾਗਤਸ੍ਸ ਪਹੀਨਨ੍ਤਿ ਤਂ ਵੁਤ੍ਤਪ੍ਪਕਾਰਰੂਪਂ ਸਮੁਦਯਪ੍ਪਹਾਨੇਨ ਸਬ੍ਬਞ੍ਞੁਤਥਾਗਤਸ੍ਸ ਪਹੀਨਂ. ਰੂਪਸਙ੍ਖਾਯ ਵਿਮੁਤ੍ਤੋਤਿ ਆਯਤਿਂ ਰੂਪਸ੍ਸ ਅਨੁਪ੍ਪਤ੍ਤਿਯਾ ਰੂਪਾਰੂਪਕੋਟ੍ਠਾਸੇਨਪਿ ਏਵਰੂਪੋ ਨਾਮ ਭਵਿਸ੍ਸਤੀਤਿ ਵੋਹਾਰਸ੍ਸਪਿ ਪਟਿਪਸ੍ਸਦ੍ਧਤ੍ਤਾ ਰੂਪਪਣ੍ਣਤ੍ਤਿਯਾਪਿ ਵਿਮੁਤ੍ਤੋ. ਗਮ੍ਭੀਰੋਤਿ ਅਜ੍ਝਾਸਯ ਗਮ੍ਭੀਰਤਾਯ ਚ ਗੁਣਗਮ੍ਭੀਰਤਾਯ ਚ ਗਮ੍ਭੀਰੋ. ਤਸ੍ਸ ਏਵਂ ਗੁਣਗਮ੍ਭੀਰਸ੍ਸ ਸਤੋ ਸਬ੍ਬਞ੍ਞੁਤਥਾਗਤਸ੍ਸ ਯਂ ਉਪਾਦਾਯ ਸਤ੍ਤਸਙ੍ਖਾਤੋ ਤਥਾਗਤੋਤਿ ਪਞ੍ਞਤ੍ਤਿ ਹੋਤਿ, ਤਦਭਾਵੇਨ ਤਸ੍ਸਾ ਪਞ੍ਞਤ੍ਤਿਯਾ ਅਭਾਵਂ ਪਸ੍ਸਨ੍ਤਸ੍ਸ ਅਯਂ ਸਤ੍ਤਸਙ੍ਖਾਤੋ ਹੋਤਿ ਤਥਾਗਤੋ ਪਰਂ ਮਰਣਾਤਿ ਇਦਂ ਵਚਨਂ ਨ ਉਪੇਤਿ ਨ ਯੁਜ੍ਜਤਿ, ਨ ਹੋਤਿ ਤਥਾਗਤੋ ਪਰਂ ਮਰਣਾਤਿਆਦਿਵਚਨਮ੍ਪਿ ਨ ਉਪੇਤਿ ਨ ਯੁਜ੍ਜਤੀਤਿ ਅਤ੍ਥੋ.
ਸਂਸਨ੍ਦਿਸ੍ਸਤੀਤਿ ਏਕਂ ਭਵਿਸ੍ਸਤਿ. ਸਮੇਸ੍ਸਤੀਤਿ ਨਿਰਨ੍ਤਰਂ ਭਵਿਸ੍ਸਤਿ. ਨ ਵਿਰੋਧਯਿਸ੍ਸਤੀਤਿ ਨ ਵਿਰੁਦ੍ਧਂ ਪਦਂ ਭਵਿਸ੍ਸਤਿ. ਅਗ੍ਗਪਦਸ੍ਮਿਨ੍ਤਿ ਦੇਸਨਾਯ. ਦੇਸਨਾ ਹਿ ਇਧ ਅਗ੍ਗਪਦਨ੍ਤਿ ਅਧਿਪ੍ਪੇਤਾ.
੨. ਅਨੁਰਾਧਸੁਤ੍ਤਵਣ੍ਣਨਾ
੪੧੧. ਦੁਤਿਯਂ ਖਨ੍ਧਿਯਵਗ੍ਗੇ ਵਿਤ੍ਥਾਰਿਤਮੇਵ, ਅਬ੍ਯਾਕਤਾਧਿਕਾਰਤੋ ਪਨ ਇਧ ਵੁਤ੍ਤਂ.
੩-੮. ਪਠਮਸਾਰਿਪੁਤ੍ਤਕੋਟ੍ਠਿਕਸੁਤ੍ਤਾਦਿਵਣ੍ਣਨਾ
੪੧੨-੪੧੭. ਤਤਿਯੇ ਰੂਪਗਤਮੇਤਨ੍ਤਿ ਰੂਪਮਤ੍ਤਮੇਤਂ. ਏਤ੍ਥ ਰੂਪਤੋ ਅਞ੍ਞੋ ਕੋਚਿ ਸਤ੍ਤੋ ਨਾਮ ਨ ਉਪਲਬ੍ਭਤਿ, ਰੂਪੇ ਪਨ ਸਤਿ ਨਾਮਮਤ੍ਤਂ ਏਤਂ ਹੋਤੀਤਿ ਦਸ੍ਸੇਤਿ. ਵੇਦਨਾਗਤਮੇਤਨ੍ਤਿਆਦੀਸੁਪਿ ਏਸੇਵ ਨਯੋ. ਅਯਂ ਖੋ ਆਵੁਸੋ ਹੇਤੂਤਿ ਅਯਂ ਰੂਪਾਦੀਨਿ ਮੁਞ੍ਚਿਤ੍ਵਾ ਅਨੁਪਲਬ੍ਭਿਯਸਭਾਵੋ ਹੇਤੁ, ਯੇਨੇਤਂ ਅਬ੍ਯਾਕਤਂ ਭਗਵਤਾਤਿ. ਚਤੁਤ੍ਥਾਦੀਨਿ ਉਤ੍ਤਾਨਤ੍ਥਾਨੇਵ.
੯. ਕੁਤੂਹਲਸਾਲਾਸੁਤ੍ਤਵਣ੍ਣਨਾ
੪੧੮. ਨਵਮੇ ਕੁਤੂਹਲਸਾਲਾਯਨ੍ਤਿ ਕੁਤੂਹਲਸਾਲਾ ਨਾਮ ਪਚ੍ਚੇਕਸਾਲਾ ਨਤ੍ਥਿ, ਯਤ੍ਥ ਪਨ ਨਾਨਾਤਿਤ੍ਥਿਯਾ ਸਮਣਬ੍ਰਾਹ੍ਮਣਾ ਨਾਨਾਵਿਧਂ ਕਥਂ ਪਵਤ੍ਤੇਨ੍ਤਿ, ਸਾ ਬਹੂਨਂ ‘‘ਅਯਂ ਕਿਂ ਵਦਤਿ, ਅਯਂ ਕਿਂ ਵਦਤੀ’’ਤਿ ਕੁਤੂਹਲੁਪ੍ਪਵਤ੍ਤਿਟ੍ਠਾਨਤੋ ਕੁਤੂਹਲਸਾਲਾਤਿ ਵੁਚ੍ਚਤਿ. ਦੂਰਮ੍ਪਿ ਗਚ੍ਛਤੀਤਿ ਯਾਵ ਆਭਸ੍ਸਰਬ੍ਰਹ੍ਮਲੋਕਾ ਗਚ੍ਛਤਿ. ਇਮਞ੍ਚ ਕਾਯਂ ਨਿਕ੍ਖਿਪਤੀਤਿ ਚੁਤਿਚਿਤ੍ਤੇਨ ਨਿਕ੍ਖਿਪਤਿ. ਅਨੁਪਪਨ੍ਨੋ ਹੋਤੀਤਿ ਚੁਤਿਕ੍ਖਣੇਯੇਵ ਪਟਿਸਨ੍ਧਿਚਿਤ੍ਤਸ੍ਸ ਅਨੁਪ੍ਪਨ੍ਨਤ੍ਤਾ ਅਨੁਪਪਨ੍ਨੋ ਹੋਤਿ.
੧੦. ਆਨਨ੍ਦਸੁਤ੍ਤਵਣ੍ਣਨਾ
੪੧੯. ਦਸਮੇ ਤੇਸਮੇਤਂ ਸਦ੍ਧਿਂ ਅਭਵਿਸ੍ਸਾਤਿ ਤੇਸਂ ਲਦ੍ਧਿਯਾ ਸਦ੍ਧਿਂ ਏਤਂ ਅਭਵਿਸ੍ਸ. ਅਨੁਲੋਮਂ ਅਭਵਿਸ੍ਸ ਞਾਣਸ੍ਸ ਉਪ੍ਪਾਦਾਯ ਸਬ੍ਬੇ ਧਮ੍ਮਾ ਅਨਤ੍ਤਾਤਿ ਯਂ ਏਤਂ ‘‘ਸਬ੍ਬੇ ਧਮ੍ਮਾ ਅਨਤ੍ਤਾ’’ਤਿ ਵਿਪਸ੍ਸਨਾਞਾਣਂ ਉਪ੍ਪਜ੍ਜਤਿ, ਅਪਿ ਨੁ ਮੇ ਤਸ੍ਸ ਅਨੁਲੋਮਂ ਅਭਵਿਸ੍ਸਾਤਿ ਅਤ੍ਥੋ.
੧੧. ਸਭਿਯਕਚ੍ਚਾਨਸੁਤ੍ਤਵਣ੍ਣਨਾ
੪੨੦. ਏਕਾਦਸਮੇ ਏਤਮੇਤ੍ਤਕੇਨ ਏਤ੍ਤਕਮੇਵਾਤਿ ਆਵੁਸੋ ਯਸ੍ਸਾਪਿ ਏਤਂ ਏਤ੍ਤਕੇਨ ਕਾਲੇਨ ‘‘ਹੇਤੁਮ੍ਹਿ ਸਤਿ ਰੂਪੀਤਿਆਦਿ ਪਞ੍ਞਾਪਨਾ ਹੋਤਿ, ਅਸਤਿ ਨ ਹੋਤੀ’’ਤਿ ਬ੍ਯਾਕਰਣਂ ਭਵੇਯ੍ਯ, ਤਸ੍ਸ ਏਤ੍ਤਕਮੇਵ ਬਹੁ. ਕੋ ਪਨ ਵਾਦੋ ਅਤਿਕ੍ਕਨ੍ਤੇਤਿ ਅਤਿਕ੍ਕਨ੍ਤੇ ਪਨ ਅਤਿਮਨਾਪੇ ਧਮ੍ਮਦੇਸਨਾਨਯੇ ਵਾਦੋਯੇਵ ਕੋ, ਨਤ੍ਥਿ ਵਾਦੋ, ਛਿਨ੍ਨਾ ਕਥਾਤਿ.
ਅਬ੍ਯਾਕਤਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.