੮. ਗਾਮਣਿਸਂਯੁਤ੍ਤਂ

੧. ਚਣ੍ਡਸੁਤ੍ਤਵਣ੍ਣਨਾ

੩੫੩. ਗਾਮਣਿਸਂਯੁਤ੍ਤਸ੍ਸ ਪਠਮੇ ਚਣ੍ਡੋ ਗਾਮਣੀਤਿ ਧਮ੍ਮਸਙ੍ਗਾਹਕਤ੍ਥੇਰੇਹਿ ਚਣ੍ਡੋਤਿ ਗਹਿਤਨਾਮੋ ਏਕੋ ਗਾਮਣਿ. ਪਾਤੁਕਰੋਤੀਤਿ ਭਣ੍ਡਨ੍ਤਂ ਪਟਿਭਣ੍ਡਨ੍ਤੋ ਅਕ੍ਕੋਸਨ੍ਤਂ ਪਚ੍ਚਕ੍ਕੋਸਨ੍ਤੋ ਪਹਰਨ੍ਤਂ ਪਟਿਪਹਰਨ੍ਤੋ ਪਾਕਟਂ ਕਰੋਤੀਤਿ ਦਸ੍ਸੇਤਿ. ਨ ਪਾਤੁਕਰੋਤੀਤਿ ਅਕ੍ਕੁਟ੍ਠੋਪਿ ਪਹਟੋਪਿ ਕਿਞ੍ਚਿ ਪਚ੍ਚਨੀਕਂ ਅਕਰੋਨ੍ਤੋਤਿ ਦਸ੍ਸੇਤਿ.

੨. ਤਾਲਪੁਟਸੁਤ੍ਤਵਣ੍ਣਨਾ

੩੫੪. ਦੁਤਿਯੇ ਤਾਲਪੁਟੋਤਿ ਏਵਂਨਾਮਕੋ. ਤਸ੍ਸ ਕਿਰ ਬਨ੍ਧਨਾ ਪਮੁਤ੍ਤਤਾਲਪਕ੍ਕਵਣ੍ਣੋ ਵਿਯ ਮੁਖਵਣ੍ਣੋ ਵਿਪ੍ਪਸਨ੍ਨੋ ਅਹੋਸਿ, ਤੇਨਸ੍ਸ ਤਾਲਪੁਟੋਤਿ ਨਾਮਂ ਅਕਂਸੁ. ਸ੍ਵਾਯਂ ਅਭਿਨੀਹਾਰਸਮ੍ਪਨ੍ਨੋ ਪਚ੍ਛਿਮਭਵਿਕਪੁਗ੍ਗਲੋ. ਯਸ੍ਮਾ ਪਨ ਪਟਿਸਨ੍ਧਿ ਨਾਮ ਅਨਿਯਤਾ ਆਕਾਸੇ ਖਿਤ੍ਤਦਣ੍ਡਸਦਿਸਾ, ਤਸ੍ਮਾ ਏਸ ਨਟਕੁਲੇ ਨਿਬ੍ਬਤ੍ਤਿ. ਵੁਡ੍ਢਿਪ੍ਪਤ੍ਤੋ ਪਨ ਨਟਸਿਪ੍ਪੇ ਅਗ੍ਗੋ ਹੁਤ੍ਵਾ ਸਕਲਜਮ੍ਬੁਦੀਪੇ ਪਾਕਟੋ ਜਾਤੋ. ਤਸ੍ਸ ਪਞ੍ਚ ਸਕਟਸਤਾਨਿ ਪਞ੍ਚ ਮਾਤੁਗਾਮਸਤਾਨਿ ਪਰਿਵਾਰੋ, ਭਰਿਯਾਯਪਿਸ੍ਸ ਤਾਵਤਕਾਵਾਤਿ ਮਾਤੁਗਾਮਸਹਸ੍ਸੇਨ ਚੇਵ ਸਕਟਸਹਸ੍ਸੇਨ ਚ ਸਦ੍ਧਿਂ ਯਂ ਯਂ ਨਗਰਂ ਵਾ ਨਿਗਮਂ ਵਾ ਪਵਿਸਤਿ, ਤਤ੍ਥਸ੍ਸ ਪੁਰੇਤਰਮੇਵ ਸਤਸਹਸ੍ਸਂ ਦੇਨ੍ਤਿ. ਸਮਜ੍ਜਵੇਸਂ ਗਣ੍ਹਿਤ੍ਵਾ ਪਨ ਮਾਤੁਗਾਮਸਹਸ੍ਸੇਨ ਸਦ੍ਧਿਂ ਕੀਲ਼ਂ ਕਰੋਨ੍ਤਸ੍ਸ ਯਂ ਹਤ੍ਥੂਪਗਪਾਦੂਪਗਾਦਿਆਭਰਣਜਾਤਂ ਖਿਪਨ੍ਤਿ, ਤਸ੍ਸ ਪਰਿਯਨ੍ਤੋ ਨਤ੍ਥਿ. ਸੋ ਤਂਦਿਵਸਂ ਮਾਤੁਗਾਮਸਹਸ੍ਸਪਰਿਵਾਰਿਤੋ ਰਾਜਗਹੇ ਕੀਲ਼ਂ ਕਤ੍ਵਾ ਪਰਿਪਕ੍ਕਞਾਣਤ੍ਤਾ ਸਪਰਿਵਾਰੋਵ ਯੇਨ ਭਗਵਾ ਤੇਨੁਪਸਙ੍ਕਮਿ.

ਸਚ੍ਚਾਲਿਕੇਨਾਤਿ ਸਚ੍ਚੇਨ ਚ ਅਲਿਕੇਨ ਚ. ਤਿਟ੍ਠਤੇਤਨ੍ਤਿ ਤਿਟ੍ਠਤੁ ਏਤਂ. ਰਜਨੀਯਾਤਿ ਰਾਗਪ੍ਪਚ੍ਚਯਾ ਮੁਖਤੋ ਪਞ੍ਚਵਣ੍ਣਸੁਤ੍ਤਨੀਹਰਣਵਾਤਵੁਟ੍ਠਿਦਸ੍ਸਨਾਦਯੋ ਅਞ੍ਞੇ ਚ ਕਾਮਸ੍ਸਾਦਸਂਯੁਤ੍ਤਾਕਾਰਦਸ੍ਸਨਕਾ ਅਭਿਨਯਾ. ਭਿਯ੍ਯੋਸੋਮਤ੍ਤਾਯਾਤਿ ਅਧਿਕਪ੍ਪਮਾਣਤ੍ਤਾਯ. ਦੋਸਨੀਯਾਤਿ ਦੋਸਪ੍ਪਚ੍ਚਯਾ ਹਤ੍ਥਪਾਦਚ੍ਛੇਦਾਦਿਦਸ੍ਸਨਾਕਾਰਾ. ਮੋਹਨੀਯਾਤਿ ਮੋਹਪ੍ਪਚ੍ਚਯਾ ਉਦਕਂ ਗਹੇਤ੍ਵਾ ਤੇਲਕਰਣਂ, ਤੇਲਂ ਗਹੇਤ੍ਵਾ ਉਦਕਕਰਣਨ੍ਤਿ ਏਵਮਾਦਯੋ ਮਾਯਾਪਭੇਦਾ.

ਪਹਾਸੋ ਨਾਮ ਨਿਰਯੋਤਿ ਵਿਸੁਂ ਪਹਾਸਨਾਮਕੋ ਨਿਰਯੋ ਨਾਮ ਨਤ੍ਥਿ, ਅਵੀਚਿਸ੍ਸੇਵ ਪਨ ਏਕਸ੍ਮਿਂ ਕੋਟ੍ਠਾਸੇ ਨਚ੍ਚਨ੍ਤਾ ਵਿਯ ਗਾਯਨ੍ਤਾ ਵਿਯ ਚ ਨਟਵੇਸਂ ਗਹੇਤ੍ਵਾਵ ਪਚ੍ਚਨ੍ਤਿ, ਤਂ ਸਨ੍ਧਾਯੇਤਂ ਵੁਤ੍ਤਂ. ਨਾਹਂ, ਭਨ੍ਤੇ, ਏਤਂ ਰੋਦਾਮੀਤਿ ਅਹਂ, ਭਨ੍ਤੇ, ਏਤਂ ਭਗਵਤੋ ਬ੍ਯਾਕਰਣਂ ਨ ਰੋਦਾਮੀਤਿ ਏਵਂ ਸਕਮ੍ਮਕਵਸੇਨੇਤ੍ਥ ਅਤ੍ਥੋ ਵੇਦਿਤਬ੍ਬੋ, ਨ ਅਸ੍ਸੁਵਿਮੋਚਨਮਤ੍ਤੇਨ. ‘‘ਮਤਂ ਵਾ ਅਮ੍ਮਰੋਦਨ੍ਤੀ’’ਤਿਆਦਯੋ ਚੇਤ੍ਥ ਅਞ੍ਞੇਪਿ ਵੋਹਾਰਾ ਵੇਦਿਤਬ੍ਬਾ.

੩-੫. ਯੋਧਾਜੀਵਸੁਤ੍ਤਾਦਿਵਣ੍ਣਨਾ

੩੫੫-੩੫੭. ਤਤਿਯੇ ਯੋਧਾਜੀਵੋਤਿ ਯੁਦ੍ਧੇਨ ਜੀਵਿਕਂ ਕਪ੍ਪਨਕੋ ਧਮ੍ਮਸਙ੍ਗਾਹਕਤ੍ਥੇਰੇਹਿ ਏਵਂ ਗਹਿਤਨਾਮੋ. ਉਸ੍ਸਹਤਿ ਵਾਯਮਤੀਤਿ ਉਸ੍ਸਾਹਂ ਵਾਯਾਮਂ ਕਰੋਤਿ. ਪਰਿਯਾਪਾਦੇਨ੍ਤੀਤਿ ਮਰਣਂ ਪਟਿਪਜ੍ਜਾਪੇਨ੍ਤਿ. ਦੁਕ੍ਕਟਨ੍ਤਿ ਦੁਟ੍ਠੁ ਕਤਂ. ਦੁਪ੍ਪਣਿਹਿਤਨ੍ਤਿ ਦੁਟ੍ਠੁ ਠਪਿਤਂ. ਪਰਜਿਤੋ ਨਾਮ ਨਿਰਯੋਤਿ ਅਯਮ੍ਪਿ ਨ ਵਿਸੁਂ ਏਕੋ ਨਿਰਯੋ, ਅਵੀਚਿਸ੍ਸੇਵ ਪਨ ਏਕਸ੍ਮਿਂ ਕੋਟ੍ਠਾਸੇ ਪਞ੍ਚਾਵੁਧਸਨ੍ਨਦ੍ਧਾ ਫਲਕਹਤ੍ਥਾ ਹਤ੍ਥਿਅਸ੍ਸਰਥੇ ਆਰੁਯ੍ਹ ਸਙ੍ਗਾਮੇ ਯੁਜ੍ਝਨ੍ਤਾ ਵਿਯ ਪਚ੍ਚਨ੍ਤਿ, ਤਂ ਸਨ੍ਧਾਯੇਤਂ ਵੁਤ੍ਤਂ. ਚਤੁਤ੍ਥਪਞ੍ਚਮੇਸੁਪਿ ਏਸੇਵ ਨਯੋ.

੬. ਅਸਿਬਨ੍ਧਕਪੁਤ੍ਤਸੁਤ੍ਤਵਣ੍ਣਨਾ

੩੫੮. ਛਟ੍ਠੇ ਪਚ੍ਛਾਭੂਮਕਾਤਿ ਪਚ੍ਛਾਭੂਮਿਵਾਸਿਨੋ. ਕਾਮਣ੍ਡਲੁਕਾਤਿ ਸਕਮਣ੍ਡਲੁਨੋ. ਸੇਵਾਲਮਾਲਿਕਾਤਿ ਪਾਤੋਵ ਉਦਕਤੋ ਸੇਵਾਲਞ੍ਚੇਵ ਉਪ੍ਪਲਾਦੀਨਿ ਚ ਗਹੇਤ੍ਵਾ ਉਦਕਸੁਦ੍ਧਿਕਭਾਵਜਾਨਨਤ੍ਥਾਯ ਮਾਲਂ ਕਤ੍ਵਾ ਪਿਲ਼ਨ੍ਧਨਕਾ. ਉਦਕੋਰੋਹਕਾਤਿ ਸਾਯਂਪਾਤਂ ਉਦਕਂ ਓਰੋਹਨਕਾ. ਉਯ੍ਯਾਪੇਨ੍ਤੀਤਿ ਉਪਰਿ ਯਾਪੇਨ੍ਤਿ. ਸਞ੍ਞਾਪੇਨ੍ਤੀਤਿ ਸਮ੍ਮਾ ਞਾਪੇਨ੍ਤਿ. ਸਗ੍ਗਂ ਨਾਮ ਓਕ੍ਕਾਮੇਨ੍ਤੀਤਿ ਪਰਿਵਾਰੇਤ੍ਵਾ ਠਿਤਾ ‘‘ਗਚ੍ਛ, ਭੋ, ਬ੍ਰਹ੍ਮਲੋਕਂ, ਗਚ੍ਛ, ਭੋ, ਬ੍ਰਹ੍ਮਲੋਕ’’ਨ੍ਤਿ ਵਦਨ੍ਤਾ ਸਗ੍ਗਂ ਪਵੇਸੇਨ੍ਤਿ. ਅਨੁਪਰਿਸਕ੍ਕੇਯ੍ਯਾਤਿ ਅਨੁਪਰਿਗਚ੍ਛੇਯ੍ਯ. ਉਮ੍ਮੁਜ੍ਜਾਤਿ ਉਮ੍ਮੁਜ੍ਜ ਉਟ੍ਠਹ. ਥਲਮੁਪ੍ਲਵਾਤਿ ਥਲਮਭਿਰੁਹ. ਤਤ੍ਰ ਯਾਸ੍ਸਾਤਿ ਤਤ੍ਰ ਯਾ ਭਵੇਯ੍ਯ. ਸਕ੍ਖਰਾ ਵਾ ਕਠਲਾ ਵਾਤਿ ਸਕ੍ਖਰਾ ਚ ਕਠਲਾ ਚ. ਸਾ ਅਧੋਗਾਮੀ ਅਸ੍ਸਾਤਿ ਸਾ ਅਧੋ ਗਚ੍ਛੇਯ੍ਯ, ਹੇਟ੍ਠਾਗਾਮੀ ਭਵੇਯ੍ਯ. ਅਧੋਗਚ੍ਛਾਤਿ ਹੇਟ੍ਠਾ ਗਚ੍ਛ.

੭. ਖੇਤ੍ਤੂਪਮਸੁਤ੍ਤਵਣ੍ਣਨਾ

੩੫੯. ਸਤ੍ਤਮੇ ਜਙ੍ਗਲਨ੍ਤਿ ਥਦ੍ਧਂ ਨ ਮੁਦੁ. ਊਸਰਨ੍ਤਿ ਸਞ੍ਜਾਤਲੋਣਂ. ਪਾਪਭੂਮੀਤਿ ਲਾਮਕਭੂਮਿਭਾਗਂ. ਮਂਦੀਪਾਤਿਆਦੀਸੁ ਅਹਂ ਦੀਪੋ ਪਤਿਟ੍ਠਾ ਏਤੇਸਨ੍ਤਿ ਮਂਦੀਪਾ. ਅਹਂ ਲੇਣੋ ਅਲ੍ਲੀਯਨਟ੍ਠਾਨਂ ਏਤੇਸਨ੍ਤਿ ਮਂਲੇਣਾ. ਅਹਂ ਤਾਣਂ ਰਕ੍ਖਾ ਏਤੇਸਨ੍ਤਿ ਮਂਤਾਣਾ. ਅਹਂ ਸਰਣਂ ਭਯਨਾਸਨਂ ਏਤੇਸਨ੍ਤਿ ਮਂਸਰਣਾ. ਵਿਹਰਨ੍ਤੀਤਿ ਮਂ ਏਵਂ ਕਤ੍ਵਾ ਵਿਹਰਨ੍ਤਿ.

ਗੋਭਤ੍ਤਮ੍ਪੀਤਿ ਧਞ੍ਞਫਲਸ੍ਸ ਅਭਾਵੇਨ ਲਾਯਿਤ੍ਵਾ ਕਲਾਪਕਲਾਪਂ ਬਨ੍ਧਿਤ੍ਵਾ ਠਪਿਤਂ ਗਿਮ੍ਹਕਾਲੇ ਗੁਨ੍ਨਮ੍ਪਿ ਖਾਦਨਂ ਭਵਿਸ੍ਸਤੀਤਿ ਅਤ੍ਥੋ. ਉਦਕਮਣਿਕੋਤਿ ਕੁਚ੍ਛਿਯਂ ਮਣਿਕਮੇਖਲਾਯ ਏਵਂ ਲਦ੍ਧਨਾਮੋ ਭਾਜਨਵਿਸੇਸੋ. ਅਹਾਰੀ ਅਪਰਿਹਾਰੀਤਿ ਉਦਕਂ ਨ ਹਰਤਿ ਨ ਪਰਿਹਰਤਿ, ਨ ਪਰਿਯਾਦਿਯਤੀਤਿ ਅਤ੍ਥੋ. ਇਤਿ ਇਮਸ੍ਮਿਂ ਸੁਤ੍ਤੇ ਸਕ੍ਕਚ੍ਚਧਮ੍ਮਦੇਸਨਾਵ ਕਥਿਤਾ. ਬੁਦ੍ਧਾਨਞ੍ਹਿ ਅਸਕ੍ਕਚ੍ਚਧਮ੍ਮਦੇਸਨਾ ਨਾਮ ਨਤ੍ਥਿ. ਸੀਹਸਮਾਨਵੁਤ੍ਤਿਨੋ ਹਿ ਬੁਦ੍ਧਾ, ਯਥਾ ਸੀਹੋ ਪਭਿਨ੍ਨਵਰਵਾਰਣਸ੍ਸਪਿ ਸਸਬਿਲ਼ਾਰਾਦੀਨਮ੍ਪਿ ਗਹਣਤ੍ਥਾਯ ਏਕਸਦਿਸਮੇਵ ਵੇਗਂ ਕਰੋਤਿ, ਏਵਂ ਬੁਦ੍ਧਾਪਿ ਏਕਸ੍ਸ ਦੇਸੇਨ੍ਤਾਪਿ ਦ੍ਵਿਨ੍ਨਂ ਬਹੂਨਂ ਭਿਕ੍ਖੁਪਰਿਸਾਯ ਭਿਕ੍ਖੁਨਿਉਪਾਸਕਉਪਾਸਿਕਾਪਰਿਸਾਯਪਿ ਤਿਤ੍ਥਿਯਾਨਮ੍ਪਿ ਦੇਸੇਨ੍ਤਾ ਸਕ੍ਕਚ੍ਚਮੇਵ ਦੇਸੇਨ੍ਤਿ. ਚਤਸ੍ਸੋ ਪਨ ਪਰਿਸਾ ਸਦ੍ਦਹਿਤ੍ਵਾ ਓਕਪ੍ਪੇਤ੍ਵਾ ਸੁਣਨ੍ਤੀਤਿ ਤਾਸਂ ਦੇਸਨਾ ਸਕ੍ਕਚ੍ਚਦੇਸਨਾ ਨਾਮ ਜਾਤਾ.

੮. ਸਙ੍ਖਧਮਸੁਤ੍ਤਵਣ੍ਣਨਾ

੩੬੦. ਅਟ੍ਠਮੇ ਯਂਬਹੁਲਂ ਯਂਬਹੁਲਨ੍ਤਿ ਇਮਿਨਾ ਨਿਗਣ੍ਠੋ ਅਤ੍ਤਨਾਵ ਅਤ੍ਤਨੋ ਵਾਦਂ ਭਿਨ੍ਦਤਿ. ਤਸ੍ਮਾ ਭਗਵਾ ਏਵਂ ਸਨ੍ਤੇ ਨ ਕੋਚਿ ਆਪਾਯਿਕੋਤਿਆਦਿਮਾਹ. ਪੁਰਿਮਾਨਿ ਪਨ ਚਤ੍ਤਾਰਿ ਪਦਾਨਿ ਦਿਟ੍ਠਿਯਾ ਪਚ੍ਚਯਾ ਹੋਨ੍ਤਿ. ਤਸ੍ਮਾ ਤੇਸੁਪਿ ਆਦੀਨਵਂ ਦਸ੍ਸੇਨ੍ਤੋ ਇਧ, ਗਾਮਣਿ, ਏਕਚ੍ਚੋ ਸਤ੍ਥਾ ਏਵਂਵਾਦੀ ਹੋਤੀਤਿਆਦਿਮਾਹ. ਤਤ੍ਥ ਅਹਮ੍ਪਮ੍ਹੀਤਿ ਅਹਮ੍ਪਿ ਅਮ੍ਹਿ.

ਮੇਤ੍ਤਾਸਹਗਤੇਨਾਤਿਆਦੀਸੁ ਯਂ ਵਤ੍ਤਬ੍ਬਂ, ਤਂ ਸਬ੍ਬਂ ਸਦ੍ਧਿਂ ਭਾਵਨਾਨਯੇਨ ਵਿਸੁਦ੍ਧਿਮਗ੍ਗੇ ਵੁਤ੍ਤਮੇਵ. ਸੇਯ੍ਯਥਾਪਿ, ਗਾਮਣਿ, ਬਲਵਾ ਸਙ੍ਖਧਮੋਤਿਆਦਿ ਪਨ ਇਧ ਅਪੁਬ੍ਬਂ. ਤਤ੍ਥ ਬਲਵਾਤਿ ਬਲਸਮ੍ਪਨ੍ਨੋ. ਸਙ੍ਖਧਮੋਤਿ ਸਙ੍ਖਧਮਕੋ. ਅਪ੍ਪਕਸਿਰੇਨਾਤਿ ਅਕਿਚ੍ਛੇਨ ਅਦੁਕ੍ਖੇਨ. ਦੁਬ੍ਬਲੋ ਹਿ ਸਙ੍ਖਧਮੋ ਸਙ੍ਖਂ ਧਮਨ੍ਤੋਪਿ ਨ ਸਕ੍ਕੋਤਿ ਚਤਸ੍ਸੋ ਦਿਸਾ ਸਰੇਨ ਵਿਞ੍ਞਾਪੇਤੁਂ, ਨਾਸ੍ਸ ਸਙ੍ਖਸਦ੍ਦੋ ਸਬ੍ਬਤੋ ਫਰਤਿ, ਬਲਵਤੋ ਪਨ ਵਿਪ੍ਫਾਰਿਕੋ ਹੋਤਿ, ਤਸ੍ਮਾ ‘‘ਬਲਵਾ’’ਤਿ ਆਹ.

ਮੇਤ੍ਤਾਯ ਚੇਤੋਵਿਮੁਤ੍ਤਿਯਾਤਿ ਏਤ੍ਥ ‘‘ਮੇਤ੍ਤਾ’’ਤਿ ਵੁਤ੍ਤੇ ਉਪਚਾਰੋਪਿ ਅਪ੍ਪਨਾਪਿ ਵਟ੍ਟਤਿ, ‘‘ਚੇਤੋਵਿਮੁਤ੍ਤੀ’’ਤਿ ਵੁਤ੍ਤੇ ਪਨ ਅਪ੍ਪਨਾਵ ਵਟ੍ਟਤਿ. ਯਂ ਪਮਾਣਕਤਂ ਕਮ੍ਮਨ੍ਤਿ ਪਮਾਣਕਤਂ ਕਮ੍ਮਂ ਨਾਮ ਕਾਮਾਵਚਰਂ ਵੁਚ੍ਚਤਿ, ਅਪ੍ਪਮਾਣਕਤਂ ਕਮ੍ਮਂ ਨਾਮ ਰੂਪਾਵਚਰਂ. ਤਞ੍ਹਿ ਪਮਾਣਂ ਅਤਿਕ੍ਕਮਿਤ੍ਵਾ ਓਧਿਸਕਅਨੋਧਿਸਕਦਿਸਾਫਰਣਵਸੇਨ ਵਡ੍ਢੇਤ੍ਵਾ ਕਤਤ੍ਤਾ ਅਪ੍ਪਮਾਣਕਤਨ੍ਤਿ ਵੁਚ੍ਚਤਿ.

ਨ ਤਂ ਤਤ੍ਰਾਵਸਿਸ੍ਸਤਿ, ਨ ਤਂ ਤਤ੍ਰਾਵਤਿਟ੍ਠਤੀਤਿ ਤਂ ਕਾਮਾਵਚਰਕਮ੍ਮਂ ਤਸ੍ਮਿਂ ਰੂਪਾਰੂਪਾਵਚਰਕਮ੍ਮੇ ਨ ਓਹੀਯਤਿ ਨ ਤਿਟ੍ਠਤਿ. ਕਿਂ ਵੁਤ੍ਤਂ ਹੋਤਿ? ਤਂ ਕਾਮਾਵਚਰਕਮ੍ਮਂ ਤਸ੍ਸ ਰੂਪਾਰੂਪਾਵਚਰਕਮ੍ਮਸ੍ਸ ਅਨ੍ਤਰਾ ਲਗ੍ਗਿਤੁਂ ਵਾ ਠਾਤੁਂ ਵਾ ਰੂਪਾਰੂਪਾਵਚਰਕਮ੍ਮਂ ਫਰਿਤ੍ਵਾ ਪਰਿਯਾਦਿਯਿਤ੍ਵਾ ਅਤ੍ਤਨੋ ਓਕਾਸਂ ਗਹੇਤ੍ਵਾ ਪਤਿਟ੍ਠਾਤੁਂ ਵਾ ਨ ਸਕ੍ਕੋਤਿ. ਅਥ ਖੋ ਰੂਪਾਰੂਪਾਵਚਰਕਮ੍ਮਮੇਵ ਕਾਮਾਵਚਰਂ ਮਹੋਘੋ ਵਿਯ ਪਰਿਤ੍ਤਂ ਉਦਕਂ ਫਰਿਤ੍ਵਾ ਪਰਿਯਾਦਿਯਿਤ੍ਵਾ ਅਤ੍ਤਨੋ ਓਕਾਸਂ ਕਤ੍ਵਾ ਤਿਟ੍ਠਤਿ, ਤਸ੍ਸ ਵਿਪਾਕਂ ਪਟਿਬਾਹਿਤ੍ਵਾ ਸਯਮੇਵ ਬ੍ਰਹ੍ਮਸਹਬ੍ਯਤਂ ਉਪਨੇਤੀਤਿ. ਇਤਿ ਇਦਂ ਸੁਤ੍ਤਂ ਆਦਿਮ੍ਹਿ ਕਿਲੇਸਵਸੇਨ ਵੁਟ੍ਠਾਯ ਅਵਸਾਨੇ ਬ੍ਰਹ੍ਮਵਿਹਾਰਵਸੇਨ ਗਹਿਤਤ੍ਤਾ ਯਥਾਨੁਸਨ੍ਧਿਨਾਵ ਗਤਂ.

੯. ਕੁਲਸੁਤ੍ਤਵਣ੍ਣਨਾ

੩੬੧. ਨਵਮੇ ਦੁਬ੍ਭਿਕ੍ਖਾਤਿ ਦੁਲ੍ਲਭਭਿਕ੍ਖਾ. ਦ੍ਵੀਹਿਤਿਕਾਤਿ ‘‘ਜੀਵਿਸ੍ਸਾਮ ਨੁ ਖੋ ਨ ਨੁ ਖੋ’’ਤਿ ਏਵਂ ਪਵਤ੍ਤਈਹਿਤਿਕਾ. ‘‘ਦੁਹਿਤਿਕਾ’’ਤਿਪਿ ਪਾਠੋ. ਅਯਮੇਵ ਅਤ੍ਥੋ. ਦੁਕ੍ਖਾ ਈਹਿਤਿ ਏਤ੍ਥ ਨ ਸਕ੍ਕਾ ਕੋਚਿ ਪਯੋਗੋ ਸੁਖੇਨ ਕਾਤੁਨ੍ਤਿ ਦੁਹਿਤਿਕਾ. ਤਤ੍ਥ ਤਤ੍ਥ ਮਤਮਨੁਸ੍ਸਾਨਂ ਵਿਪ੍ਪਕਿਣ੍ਣਾਨਿ ਸੇਤਾਨਿ ਅਟ੍ਠਿਕਾਨਿ ਏਤ੍ਥਾਤਿ ਸੇਤਟ੍ਠਿਕਾ. ਸਲਾਕਾਵੁਤ੍ਤਾਤਿ ਸਲਾਕਮਤ੍ਤਵੁਤ੍ਤਾ, ਯਂ ਤਤ੍ਥ ਵੁਤ੍ਤਂ ਵਾਪਿਤਂ, ਤਂ ਸਲਾਕਮਤ੍ਤਮੇਵ ਅਹੋਸਿ, ਫਲੇ ਨ ਜਨਯਤੀਤਿ ਅਤ੍ਥੋ.

ਉਗ੍ਗਿਲਿਤੁਨ੍ਤਿ ਦ੍ਵੇ ਅਨ੍ਤੇ ਮੋਚੇਤ੍ਵਾ ਕਥੇਤੁਂ ਅਸਕ੍ਕੋਨ੍ਤੋ ਉਗ੍ਗਿਲਿਤੁਂ ਬਹਿ ਨੀਹਰਿਤੁਂ ਨ ਸਕ੍ਖੀਤਿ. ਓਗਿਲਿਤੁਨ੍ਤਿ ਪੁਚ੍ਛਾਯ ਦੋਸਂ ਦਿਸ੍ਵਾ ਹਾਰੇਤੁਂ ਅਸਕ੍ਕੋਨ੍ਤੋ ਓਗਿਲਿਤੁਂ ਅਨ੍ਤੋ ਪਵੇਸੇਤੁਂ ਨ ਸਕ੍ਖੀਤਿ.

ਇਤੋ ਸੋ ਗਾਮਣਿ ਏਕਨਵੁਤਿਕਪ੍ਪੇਤਿ ਭਗਵਾ ਕਥਯਮਾਨੋਵ ਯਾਵ ਨਿਕ੍ਖਨ੍ਤੋ ਨਾਸਿਕਵਾਤੋ ਨ ਪੁਨ ਪਵਿਸਤਿ, ਤਾਵਤਕੇਨ ਕਾਲੇਨ ਏਕਨਵੁਤਿਕਪ੍ਪੇ ਅਨੁਸ੍ਸਰਿ ‘‘ਅਤ੍ਥਿ ਨੁ ਖੋ ਕਿਞ੍ਚਿ ਕੁਲੇ ਪਕ੍ਕਭਿਕ੍ਖਾਦਾਨੇਨ ਉਪਹਤਪੁਬ੍ਬ’’ਨ੍ਤਿ ਪਰਿਜਾਨਨਤ੍ਥਂ. ਅਥੇਕਮ੍ਪਿ ਅਪਸ੍ਸਨ੍ਤੋ ‘‘ਇਤੋ ਸੋ, ਗਾਮਣੀ’’ਤਿਆਦਿਮਾਹ. ਇਦਾਨਿ ਦਾਨਾਦੀਨਂ ਆਨਿਸਂਸਂ ਕਥੇਨ੍ਤੋ ਅਥ ਖੋ ਯਾਨਿ ਤਾਨਿ ਕੁਲਾਨਿ ਅਡ੍ਢਾਨੀਤਿ ਧਮ੍ਮਦੇਸਨਂ ਆਰਭਿ. ਤਤ੍ਥ ਦਾਨਸਮ੍ਭੂਤਾਨੀਤਿ ਦਾਨੇਨ ਸਮ੍ਭੂਤਾਨਿ ਨਿਬ੍ਬਤ੍ਤਾਨਿ. ਸੇਸਪਦਦ੍ਵਯੇਪਿ ਏਸੇਵ ਨਯੋ. ਏਤ੍ਥ ਪਨ ਸਚ੍ਚਂ ਨਾਮ ਸਚ੍ਚਵਾਦਿਤਾ. ਸਾਮਞ੍ਞਂ ਨਾਮ ਸੇਸਸੀਲਂ. ਵਿਕਿਰਤੀਤਿ ਅਯੋਗੇਨ ਵਲ਼ਞ੍ਜੇਨ੍ਤੋ ਵਿਪ੍ਪਕਿਰਤਿ. ਵਿਧਮਤੀਤਿ ਧਮੇਨ੍ਤੋ ਵਿਯ ਨਾਸੇਤਿ. ਵਿਦ੍ਧਂਸੇਤੀਤਿ ਨਾਸੇਤਿ. ਅਨਿਚ੍ਚਤਾਤਿ ਹੁਤ੍ਵਾ ਅਭਾਵੋ ਬਹੁਨਾਪਿ ਕਾਲੇਨ ਸਙ੍ਗਤਾਨਂ ਖਣੇਨੇਵ ਅਨ੍ਤਰਧਾਨਂ.

੧੦. ਮਣਿਚੂਲ਼ਕਸੁਤ੍ਤਵਣ੍ਣਨਾ

੩੬੨. ਦਸਮੇ ਤਂ ਪਰਿਸਂ ਏਤਦਵੋਚਾਤਿ ਤਸ੍ਸ ਕਿਰ ਏਵਂ ਅਹੋਸਿ ‘‘ਕੁਲਪੁਤ੍ਤਾ ਪਬ੍ਬਜਨ੍ਤਾ ਪੁਤ੍ਤਦਾਰਞ੍ਚੇਵ ਜਾਤਰੂਪਰਜਤਞ੍ਚ ਪਹਾਯੇਵ ਪਬ੍ਬਜਨ੍ਤਿ, ਨ ਚ ਸਕ੍ਕਾ ਯਂ ਪਹਾਯ ਪਬ੍ਬਜਿਤਾ, ਤਂ ਤੇਹਿ ਗਹੇਤੁ’’ਨ੍ਤਿ ਨਯਗ੍ਗਾਹੇ ਠਤ੍ਵਾ ‘‘ਮਾ ਅਯ੍ਯੋ’’ਤਿਆਦਿਵਚਨਂ ਅਵੋਚ. ਏਕਂਸੇਨੇਤਨ੍ਤਿ ਏਤਂ ਪਞ੍ਚਕਾਮਗੁਣਕਪ੍ਪਨਂ ਅਸ੍ਸਮਣਧਮ੍ਮੋ ਅਸਕ੍ਯਪੁਤ੍ਤਿਯਧਮ੍ਮੋਤਿ ਏਕਂਸੇਨ ਧਾਰੇਯ੍ਯਾਸਿ.

ਤਿਣਨ੍ਤਿ ਸੇਨਾਸਨਚ੍ਛਦਨਤਿਣਂ. ਪਰਿਯੇਸਿਤਬ੍ਬਨ੍ਤਿ ਤਿਣਚ੍ਛਦਨੇ ਵਾ ਇਟ੍ਠਕਚ੍ਛਦਨੇ ਵਾ ਗੇਹੇ ਪਲੁਜ੍ਜਨ੍ਤੇ ਯੇਹਿ ਤਂ ਕਾਰਿਤਂ, ਤੇਸਂ ਸਨ੍ਤਿਕਂ ਗਨ੍ਤ੍ਵਾ ‘‘ਤੁਮ੍ਹੇਹਿ ਕਾਰਿਤਸੇਨਾਸਨਂ ਓਵਸ੍ਸਤਿ, ਨ ਸਕ੍ਕਾ ਤਤ੍ਥ ਵਸਿਤੁ’’ਨ੍ਤਿ ਆਚਿਕ੍ਖਿਤਬ੍ਬਂ. ਮਨੁਸ੍ਸਾ ਸਕ੍ਕੋਨ੍ਤਾ ਕਰਿਸ੍ਸਨ੍ਤਿ, ਅਸਕ੍ਕੋਨ੍ਤਾ ‘‘ਤੁਮ੍ਹੇ ਵਡ੍ਢਕਿਂ ਗਹੇਤ੍ਵਾ ਕਾਰਾਪੇਥ, ਮਯਂ ਤੇ ਸਞ੍ਞਾਪੇਸ੍ਸਾਮਾ’’ਤਿ ਵਕ੍ਖਨ੍ਤਿ. ਏਵਂ ਵੁਤ੍ਤੇ ਕਾਰੇਤ੍ਵਾ ਤੇਸਂ ਆਚਿਕ੍ਖਿਤਬ੍ਬਂ. ਮਨੁਸ੍ਸਾ ਵਡ੍ਢਕੀਨਂ ਦਾਤਬ੍ਬਂ ਦਸ੍ਸਨ੍ਤਿ. ਸਚੇ ਆਵਾਸਸਾਮਿਕਾ ਨਤ੍ਥਿ, ਅਞ੍ਞੇਸਮ੍ਪਿ ਭਿਕ੍ਖਾਚਾਰਵਤ੍ਤੇਨ ਆਰੋਚੇਤ੍ਵਾ ਕਾਰੇਤੁਂ ਵਟ੍ਟਤਿ. ਇਦਂ ਸਨ੍ਧਾਯ ‘‘ਪਰਿਯੇਸਿਤਬ੍ਬ’’ਨ੍ਤਿ ਵੁਤ੍ਤਂ.

ਦਾਰੁਨ੍ਤਿ ਸੇਨਾਸਨੇ ਗੋਪਾਨਸਿਆਦੀਸੁ ਪਲੁਜ੍ਜਮਾਨੇਸੁ ਤਦਤ੍ਥਾਯ ਦਾਰੁਂ. ਸਕਟਨ੍ਤਿ ਗਿਹਿਵਿਕਤਂ ਕਤ੍ਵਾ ਤਾਵਕਾਲਿਕਸਕਟਂ. ਨ ਕੇਵਲਞ੍ਚ ਸਕਟਮੇਵ, ਅਞ੍ਞਮ੍ਪਿ ਵਾਸਿਫਰਸੁਕੁਦ੍ਦਾਲਾਦਿਉਪਕਰਣਂ ਏਵਂ ਪਰਿਯੇਸਿਤੁਂ ਵਟ੍ਟਤਿ. ਪੁਰਿਸੋਤਿ ਹਤ੍ਥਕਮ੍ਮਵਸੇਨ ਪੁਰਿਸੋ ਪਰਿਯੇਸਿਤਬ੍ਬੋ. ਯਂਕਿਞ੍ਚਿ ਹਿ ਪੁਰਿਸਂ ‘‘ਹਤ੍ਥਕਮ੍ਮਂ, ਆਵੁਸੋ, ਕਤ੍ਵਾ ਦਸ੍ਸਸੀ’’ਤਿ ਵਤ੍ਵਾ ‘‘ਦਸ੍ਸਾਮਿ, ਭਨ੍ਤੇ,’’ਤਿ ਵੁਤ੍ਤੇ ‘‘ਇਦਞ੍ਚਿਦਞ੍ਚ ਕਰੋਹੀ’’ਤਿ ਯਂ ਇਚ੍ਛਤਿ, ਤਂ ਕਾਰੇਤੁਂ ਵਟ੍ਟਤਿ. ਨ ਤ੍ਵੇਵਾਹਂ, ਗਾਮਣਿ, ਕੇਨਚਿ ਪਰਿਯਾਯੇਨਾਤਿ ਜਾਤਰੂਪਰਜਤਂ ਪਨਾਹਂ ਕੇਨਚਿਪਿ ਕਾਰਣੇਨ ਪਰਿਯੇਸਿਤਬ੍ਬਨ੍ਤਿ ਨ ਵਦਾਮਿ.

੧੧. ਭਦ੍ਰਕਸੁਤ੍ਤਵਣ੍ਣਨਾ

੩੬੩. ਏਕਾਦਸਮੇ ਮਲ੍ਲੇਸੂਤਿ ਏਵਂਨਾਮਕੇ ਜਨਪਦੇ. ਵਧੇਨਾਤਿ ਮਾਰਣੇਨ. ਜਾਨਿਯਾਤਿ ਧਨਜਾਨਿਯਾ. ਅਕਾਲਿਕੇਨ ਪਤ੍ਤੇਨਾਤਿ ਨ ਕਾਲਨ੍ਤਰੇਨ ਪਤ੍ਤੇਨ, ਕਾਲਂ ਅਨਤਿਕ੍ਕਮਿਤ੍ਵਾਵ ਪਤ੍ਤੇਨਾਤਿ ਅਤ੍ਥੋ. ਚਿਰਵਾਸੀ ਨਾਮ ਕੁਮਾਰੋਤਿ ਏਵਂਨਾਮਕੋ ਤਸ੍ਸ ਪੁਤ੍ਤੋ. ਬਹਿ ਆਵਸਥੇ ਪਟਿਵਸਤੀਤਿ ਬਹਿਨਗਰੇ ਕਿਞ੍ਚਿਦੇਵ ਸਿਪ੍ਪਂ ਉਗ੍ਗਣ੍ਹਨ੍ਤੋ ਵਸਤਿ. ਇਮਸ੍ਮਿਂ ਸੁਤ੍ਤੇ ਵਟ੍ਟਦੁਕ੍ਖਂ ਕਥਿਤਂ.

੧੨. ਰਾਸਿਯਸੁਤ੍ਤਵਣ੍ਣਨਾ

੩੬੪. ਦ੍ਵਾਦਸਮੇ ਰਾਸਿਯੋਤਿ ਰਾਸਿਂ ਕਤ੍ਵਾ ਪਞ੍ਹਸ੍ਸ ਪੁਚ੍ਛਿਤਤ੍ਤਾ ਰਾਸਿਯੋਤਿ ਏਵਂ ਧਮ੍ਮਸਙ੍ਗਾਹਕਤ੍ਥੇਰੇਹਿ ਗਹਿਤਨਾਮੋ. ਤਪਸ੍ਸਿਨ੍ਤਿ ਤਪਨਿਸ੍ਸਿਤਕਂ. ਲੂਖਜੀਵਿਨ੍ਤਿ ਲੂਖਜੀਵਿਕਂ. ਅਨ੍ਤਾਤਿ ਕੋਟ੍ਠਾਸਾ. ਗਾਮੋਤਿ ਗਾਮ੍ਮੋ. ਗਮ੍ਮੋਤਿਪਿ ਪਾਠੋ, ਗਾਮਵਾਸੀਨਂ ਧਮ੍ਮੋਤਿ ਅਤ੍ਥੋ. ਅਤ੍ਤਕਿਲਮਥਾਨੁਯੋਗੋਤਿ ਅਤ੍ਤਨੋ ਕਿਲਮਥਾਨੁਯੋਗੋ, ਸਰੀਰਦੁਕ੍ਖਕਰਣਨ੍ਤਿ ਅਤ੍ਥੋ.

ਕਸ੍ਮਾ ਪਨੇਤ੍ਥ ਕਾਮਸੁਖਲ੍ਲਿਕਾਨੁਯੋਗੋ ਗਹਿਤੋ, ਕਸ੍ਮਾ ਅਤ੍ਤਕਿਲਮਥਾਨੁਯੋਗੋ, ਕਸ੍ਮਾ ਮਜ੍ਝਿਮਾ ਪਟਿਪਦਾਤਿ? ਕਾਮਸੁਖਲ੍ਲਿਕਾਨੁਯੋਗੋ ਤਾਵ ਕਾਮਭੋਗੀਨਂ ਦਸ੍ਸਨਤ੍ਥਂ ਗਹਿਤੋ, ਅਤ੍ਤਕਿਲਮਥਾਨੁਯੋਗੋ ਤਪਨਿਸ੍ਸਿਤਕਾਨਂ, ਮਜ੍ਝਿਮਾ ਪਟਿਪਦਾ ਤਿਣ੍ਣਂ ਨਿਜ੍ਜਰਵਤ੍ਥੂਨਂ ਦਸ੍ਸਨਤ੍ਥਂ ਗਹਿਤਾ. ਕਿਂ ਏਤੇਸਂ ਦਸ੍ਸਨੇ ਪਯੋਜਨਨ੍ਤਿ? ਇਮੇ ਦ੍ਵੇ ਅਨ੍ਤੇ ਪਹਾਯ ਤਥਾਗਤੋ ਮਜ੍ਝਿਮਾਯ ਪਟਿਪਦਾਯ ਸਮ੍ਮਾਸਮ੍ਬੋਧਿਂ ਪਤ੍ਤੋ. ਸੋ ਕਾਮਭੋਗਿਨੋਪਿ ਨ ਸਬ੍ਬੇ ਗਰਹਤਿ ਨ ਪਸਂਸਤਿ, ਤਪਨਿਸ੍ਸਿਤਕੇਪਿ ਨ ਸਬ੍ਬੇ ਗਰਹਤਿ ਨ ਪਸਂਸਤਿ, ਗਰਹਿਤਬ੍ਬਯੁਤ੍ਤਕੇਯੇਵ ਗਰਹਤਿ, ਪਸਂਸਿਤਬ੍ਬਯੁਤ੍ਤਕੇ ਪਸਂਸਤੀਤਿ ਇਮਸ੍ਸਤ੍ਥਸ੍ਸ ਪਕਾਸਨਂ ਏਤੇਸਂ ਦਸ੍ਸਨੇ ਪਯੋਜਨਨ੍ਤਿ ਵੇਦਿਤਬ੍ਬਂ.

ਇਦਾਨਿ ਤਮਤ੍ਥਂ ਪਕਾਸੇਨ੍ਤੋ ਤਯੋ ਖੋਮੇ, ਗਾਮਣਿ, ਕਾਮਭੋਗਿਨੋਤਿਆਦਿਮਾਹ. ਤਤ੍ਥ ਸਾਹਸੇਨਾਤਿ ਸਾਹਸਿਕਕਮ੍ਮੇਨ. ਨ ਸਂਵਿਭਜਤੀਤਿ ਮਿਤ੍ਤਸਹਾਯਸਨ੍ਦਿਟ੍ਠਸਮ੍ਭਤ੍ਤਾਨਂ ਸਂਵਿਭਾਗਂ ਨ ਕਰੋਤਿ. ਨ ਪੁਞ੍ਞਾਨਿ ਕਰੋਤੀਤਿ ਅਨਾਗਤਭਵਸ੍ਸ ਪਚ੍ਚਯਭੂਤਾਨਿ ਪੁਞ੍ਞਾਨਿ ਨ ਕਰੋਤਿ. ਧਮ੍ਮਾਧਮ੍ਮੇਨਾਤਿ ਧਮ੍ਮੇਨ ਚ ਅਧਮ੍ਮੇਨ ਚ. ਠਾਨੇਹੀਤਿ ਕਾਰਣੇਹਿ. ਸਚ੍ਛਿਕਰੋਤੀਤਿ ਕਥਂ ਅਤ੍ਤਾਨਂ ਆਤਾਪੇਨ੍ਤੋ ਪਰਿਤਾਪੇਨ੍ਤੋ ਸਚ੍ਛਿਕਰੋਤਿ? ਚਤੁਰਙ੍ਗਵੀਰਿਯਵਸੇਨ ਚ ਧੁਤਙ੍ਗਵਸੇਨ ਚ. ਤਿਸ੍ਸੋ ਸਨ੍ਦਿਟ੍ਠਿਕਾ ਨਿਜ੍ਜਰਾਤਿ ਏਤ੍ਥ ਏਕੋਪਿ ਮਗ੍ਗੋ ਤਿਣ੍ਣਂ ਕਿਲੇਸਾਨਂ ਨਿਜ੍ਜਰਣਤਾਯ ਤਿਸ੍ਸੋ ਨਿਜ੍ਜਰਾਤਿ ਵੁਤ੍ਤੋਤਿ.

੧੩. ਪਾਟਲਿਯਸੁਤ੍ਤਵਣ੍ਣਨਾ

੩੬੫. ਤੇਰਸਮੇ ਦੂਤੇਯ੍ਯਾਨੀਤਿ ਦੂਤਕਮ੍ਮਾਨਿ ਪਣ੍ਣਾਨਿ ਚੇਵ ਮੁਖਸਾਸਨਾਨਿ ਚ. ਪਾਣਾਤਿਪਾਤਞ੍ਚਾਹਨ੍ਤਿ ਇਦਂ ਕਸ੍ਮਾ ਆਰਦ੍ਧਂ? ਨ ਕੇਵਲਂ ਅਹਂ ਮਾਯਂ ਜਾਨਾਮਿ, ਅਞ੍ਞਮ੍ਪਿ ਇਦਞ੍ਚਿਦਞ੍ਚ ਜਾਨਾਮੀਤਿ ਸਬ੍ਬਞ੍ਞੁਭਾਵਦਸ੍ਸਨਤ੍ਥਂ ਆਰਦ੍ਧਂ. ਸਨ੍ਤਿ ਹਿ, ਗਾਮਣਿ, ਏਕੇ ਸਮਣਬ੍ਰਾਹ੍ਮਣਾਤਿ ਇਦਂ ਸੇਸਸਮਣਬ੍ਰਾਹ੍ਮਣਾਨਂ ਲਦ੍ਧਿਂ ਦਸ੍ਸੇਤ੍ਵਾ ਤਸ੍ਸਾ ਪਜਹਾਪਨਤ੍ਥਂ ਆਰਦ੍ਧਂ.

ਮਾਲੀ ਕੁਣ੍ਡਲੀਤਿ ਮਾਲਾਯ ਮਾਲੀ, ਕੁਣ੍ਡਲੇਹਿ ਕੁਣ੍ਡਲੀ. ਇਤ੍ਥਿਕਾਮੇਹੀਤਿ ਇਤ੍ਥੀਹਿ ਸਦ੍ਧਿਂ ਕਾਮਾ ਇਤ੍ਥਿਕਾਮਾ, ਤੇਹਿ ਇਤ੍ਥਿਕਾਮੇਹਿ. ਆਵਸਥਾਗਾਰਨ੍ਤਿ ਕੁਲਘਰਸ੍ਸ ਏਕਸ੍ਮਿਂ ਠਾਨੇ ਏਕੇਕਸ੍ਸੇਵ ਸੁਖਨਿਵਾਸਤ੍ਥਾਯ ਕਤਂ ਵਾਸਾਗਾਰਂ. ਤੇਨਾਹਂ ਯਥਾਸਤ੍ਤਿ ਯਥਾਬਲਂ ਸਂਵਿਭਜਾਮੀਤਿ ਤਸ੍ਸਾਹਂ ਅਤ੍ਤਨੋ ਸਤ੍ਤਿਅਨੁਰੂਪੇਨ ਚੇਵ ਬਲਾਨੁਰੂਪੇਨ ਚ ਸਂਵਿਭਾਗਂ ਕਰੋਮਿ. ਅਲਨ੍ਤਿ ਯੁਤ੍ਤਂ. ਕਙ੍ਖਨਿਯੇ ਠਾਨੇਤਿ ਕਙ੍ਖਿਤਬ੍ਬੇ ਕਾਰਣੇ. ਚਿਤ੍ਤਸਮਾਧਿਨ੍ਤਿ ਤਸ੍ਮਿਂ ਧਮ੍ਮਸਮਾਧਿਸ੍ਮਿਂ ਠਿਤੋ ਤ੍ਵਂ ਸਹ ਵਿਪਸ੍ਸਨਾਯ ਚਤੁਨ੍ਨਂ ਮਗ੍ਗਾਨਂ ਵਸੇਨ ਚਿਤ੍ਤਸਮਾਧਿਂ ਸਚੇ ਪਟਿਲਭੇਯ੍ਯਾਸੀਤਿ ਦਸ੍ਸੇਤਿ. ਅਪਣ੍ਣਕਤਾਯ ਮਯ੍ਹਨ੍ਤਿ ਅਯਂ ਪਟਿਪਦਾ ਮਯ੍ਹਂ ਅਪਣ੍ਣਕਤਾਯ ਅਨਪਰਾਧਕਤਾਯ ਏਵ ਸਂਵਤ੍ਤਤੀਤਿ ਅਤ੍ਥੋ. ਕਟਗ੍ਗਾਹੋਤਿ ਜਯਗ੍ਗਾਹੋ.

ਅਯਂ ਖੋ, ਗਾਮਣਿ, ਧਮ੍ਮਸਮਾਧਿ, ਤਤ੍ਰ ਚੇ ਤ੍ਵਂ ਚਿਤ੍ਤਸਮਾਧਿਂ ਪਟਿਲਭੇਯ੍ਯਾਸੀਤਿ ਏਤ੍ਥ ਧਮ੍ਮਸਮਾਧੀਤਿ ਦਸਕੁਸਲਕਮ੍ਮਪਥਧਮ੍ਮਾ, ਚਿਤ੍ਤਸਮਾਧੀਤਿ ਸਹ ਵਿਪਸ੍ਸਨਾਯ ਚਤ੍ਤਾਰੋ ਮਗ੍ਗਾ. ਅਥ ਵਾ ‘‘ਪਾਮੋਜ੍ਜਂ ਜਾਯਤਿ, ਪਮੁਦਿਤਸ੍ਸ ਪੀਤਿ ਜਾਯਤੀ’’ਤਿ (ਅ. ਨਿ. ੫.੨੬) ਏਵਂ ਵੁਤ੍ਤਾ ਪਾਮੋਜ੍ਜਪੀਤਿਪਸ੍ਸਦ੍ਧਿਸੁਖਸਮਾਧਿਸਙ੍ਖਾਤਾ ਪਞ੍ਚ ਧਮ੍ਮਾ ਧਮ੍ਮਸਮਾਧਿ ਨਾਮ, ਚਿਤ੍ਤਸਮਾਧਿ ਪਨ ਸਹ ਵਿਪਸ੍ਸਨਾਯ ਚਤ੍ਤਾਰੋ ਮਗ੍ਗਾਵ. ਅਥ ਵਾ ਦਸਕੁਸਲਕਮ੍ਮਪਥਾ ਚਤ੍ਤਾਰੋ ਬ੍ਰਹ੍ਮਵਿਹਾਰਾ ਚਾਤਿ ਅਯਂ ਧਮ੍ਮਸਮਾਧਿ ਨਾਮ, ਤਂ ਧਮ੍ਮਸਮਾਧਿਂ ਪੂਰੇਨ੍ਤਸ੍ਸ ਉਪ੍ਪਨ੍ਨਾ ਚਿਤ੍ਤੇਕਗ੍ਗਤਾ ਚਿਤ੍ਤਸਮਾਧਿ ਨਾਮ. ਏਵਂ ਤ੍ਵਂ ਇਮਂ ਕਙ੍ਖਾਧਮ੍ਮਂ ਪਜਹੇਯ੍ਯਾਸੀਤਿ ਏਵਂ ਤ੍ਵਂ ਇਮਸ੍ਮਿਂ ਵੁਤ੍ਤਪ੍ਪਭੇਦੇ ਧਮ੍ਮਸਮਾਧਿਸ੍ਮਿਂ ਠਿਤੋ ਸਚੇ ਏਵਂ ਚਿਤ੍ਤਸਮਾਧਿਂ ਪਟਿਲਭੇਯ੍ਯਾਸਿ, ਏਕਂਸੇਨੇਤਂ ਕਙ੍ਖਂ ਪਜਹੇਯ੍ਯਾਸੀਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਵੁਤ੍ਤਨਯਮੇਵਾਤਿ.

ਗਾਮਣਿਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.