੨. ਪਠਮਇਸਿਦਤ੍ਤਸੁਤ੍ਤਵਣ੍ਣਨਾ

੩੪੪. ਦੁਤਿਯੇ ਆਯਸ੍ਮਨ੍ਤਂ ਥੇਰਨ੍ਤਿ ਤੇਸੁ ਥੇਰੇਸੁ ਜੇਟ੍ਠਕਂ ਮਹਾਥੇਰਂ. ਤੁਣ੍ਹੀ ਅਹੋਸੀਤਿ ਜਾਨਨ੍ਤੋਪਿ ਅਵਿਸਾਰਦਤ੍ਤਾ ਨ ਕਿਞ੍ਚਿ ਬ੍ਯਾਹਰਿ. ਬ੍ਯਾਕਰੋਮਹਂ ਭਨ੍ਤੇਤਿ ‘‘ਅਯਂ ਥੇਰੋ ਨੇਵ ਅਤ੍ਤਨਾ ਬ੍ਯਾਕਰੋਤਿ, ਨ ਅਞ੍ਞੇ ਅਜ੍ਝੇਸਤਿ, ਉਪਾਸਕੋਪਿ ਭਿਕ੍ਖੁਸਙ੍ਘਂ ਵਿਹੇਸੇਤਿ, ਅਹਮੇਤਂ ਬ੍ਯਾਕਰਿਤ੍ਵਾ ਫਾਸੁਵਿਹਾਰਂ ਕਤ੍ਵਾ ਦਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਆਸਨਤੋ ਵੁਟ੍ਠਾਯ ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਏਵਂ ਓਕਾਸਮਕਾਸਿ, ਕਤਾਵਕਾਸੋ ਪਨ ਅਤ੍ਤਨੋ ਆਸਨੇ ਨਿਸੀਦਿਤ੍ਵਾ ਬ੍ਯਾਕਾਸਿ.

ਸਹਤ੍ਥਾਤਿ ਸਹਤ੍ਥੇਨ. ਸਨ੍ਤਪ੍ਪੇਸੀਤਿ ਯਾਵਦਿਚ੍ਛਕਂ ਦੇਨ੍ਤੋ ਸੁਟ੍ਠੁ ਤਪ੍ਪੇਸਿ. ਸਮ੍ਪਵਾਰੇਸੀਤਿ ‘‘ਅਲਂ ਅਲ’’ਨ੍ਤਿ ਹਤ੍ਥਸਞ੍ਞਾਯ ਚੇਵ ਵਾਚਾਯ ਚ ਪਟਿਕ੍ਖਿਪਾਪੇਸਿ. ਓਨੀਤਪਤ੍ਤਪਾਣਿਨੋਤਿ ਪਾਣਿਤੋ ਅਪਨੀਤਪਤ੍ਤਾ ਧੋਵਿਤ੍ਵਾ ਥਵਿਕਾਯ ਓਸਾਪੇਤ੍ਵਾ ਅਂਸੇ ਲਗ੍ਗਿਤਪਤ੍ਤਾਤਿ ਅਤ੍ਥੋ.