੭. ਚਿਤ੍ਤਸਂਯੁਤ੍ਤਂ

੧. ਸਂਯੋਜਨਸੁਤ੍ਤਵਣ੍ਣਨਾ

੩੪੩. ਚਿਤ੍ਤਸਂਯੁਤ੍ਤਸ੍ਸ ਪਠਮੇ ਮਚ੍ਛਿਕਾਸਣ੍ਡੇਤਿ ਏਵਂਨਾਮਕੇ ਵਨਸਣ੍ਡੇ. ਅਯਮਨ੍ਤਰਾਕਥਾ ਉਦਪਾਦੀਤਿ ਪੋਰਾਣਕਤ੍ਥੇਰਾ ਅਤਿਰਚ੍ਛਾਨਕਥਾ ਹੋਨ੍ਤਿ, ਨਿਸਿਨ੍ਨਨਿਸਿਨ੍ਨਟ੍ਠਾਨੇ ਪਞ੍ਹਂ ਸਮੁਟ੍ਠਾਪੇਤ੍ਵਾ ਅਜਾਨਨ੍ਤਾ ਪੁਚ੍ਛਨ੍ਤਿ, ਜਾਨਨ੍ਤਾ ਵਿਸ੍ਸਜ੍ਜੇਨ੍ਤਿ, ਤੇਨ ਨੇਸਂ ਅਯਂ ਕਥਾ ਉਦਪਾਦਿ. ਮਿਗਪਥਕਨ੍ਤਿ ਏਵਂਨਾਮਕਂ ਅਤ੍ਤਨੋ ਭੋਗਗਾਮਂ. ਸੋ ਕਿਰ ਅਮ੍ਬਾਟਕਾਰਾਮਸ੍ਸ ਪਿਟ੍ਠਿਭਾਗੇ ਹੋਤਿ. ਤੇਨੁਪਸਙ੍ਕਮੀਤਿ ‘‘ਥੇਰਾਨਂ ਪਞ੍ਹਂ ਵਿਸ੍ਸਜ੍ਜੇਤ੍ਵਾ ਫਾਸੁਵਿਹਾਰਂ ਕਤ੍ਵਾ ਦਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਉਪਸਙ੍ਕਮਿ. ਗਮ੍ਭੀਰੇ ਬੁਦ੍ਧਵਚਨੇਤਿ ਅਤ੍ਥਗਮ੍ਭੀਰੇ ਚੇਵ ਧਮ੍ਮਗਮ੍ਭੀਰੇ ਚ ਬੁਦ੍ਧਵਚਨੇ. ਪਞ੍ਞਾਚਕ੍ਖੁ ਕਮਤੀਤਿ ਞਾਣਚਕ੍ਖੁ ਵਹਤਿ ਪਵਤ੍ਤਤਿ.

੨. ਪਠਮਇਸਿਦਤ੍ਤਸੁਤ੍ਤਵਣ੍ਣਨਾ

੩੪੪. ਦੁਤਿਯੇ ਆਯਸ੍ਮਨ੍ਤਂ ਥੇਰਨ੍ਤਿ ਤੇਸੁ ਥੇਰੇਸੁ ਜੇਟ੍ਠਕਂ ਮਹਾਥੇਰਂ. ਤੁਣ੍ਹੀ ਅਹੋਸੀਤਿ ਜਾਨਨ੍ਤੋਪਿ ਅਵਿਸਾਰਦਤ੍ਤਾ ਨ ਕਿਞ੍ਚਿ ਬ੍ਯਾਹਰਿ. ਬ੍ਯਾਕਰੋਮਹਂ ਭਨ੍ਤੇਤਿ ‘‘ਅਯਂ ਥੇਰੋ ਨੇਵ ਅਤ੍ਤਨਾ ਬ੍ਯਾਕਰੋਤਿ, ਨ ਅਞ੍ਞੇ ਅਜ੍ਝੇਸਤਿ, ਉਪਾਸਕੋਪਿ ਭਿਕ੍ਖੁਸਙ੍ਘਂ ਵਿਹੇਸੇਤਿ, ਅਹਮੇਤਂ ਬ੍ਯਾਕਰਿਤ੍ਵਾ ਫਾਸੁਵਿਹਾਰਂ ਕਤ੍ਵਾ ਦਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਆਸਨਤੋ ਵੁਟ੍ਠਾਯ ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਏਵਂ ਓਕਾਸਮਕਾਸਿ, ਕਤਾਵਕਾਸੋ ਪਨ ਅਤ੍ਤਨੋ ਆਸਨੇ ਨਿਸੀਦਿਤ੍ਵਾ ਬ੍ਯਾਕਾਸਿ.

ਸਹਤ੍ਥਾਤਿ ਸਹਤ੍ਥੇਨ. ਸਨ੍ਤਪ੍ਪੇਸੀਤਿ ਯਾਵਦਿਚ੍ਛਕਂ ਦੇਨ੍ਤੋ ਸੁਟ੍ਠੁ ਤਪ੍ਪੇਸਿ. ਸਮ੍ਪਵਾਰੇਸੀਤਿ ‘‘ਅਲਂ ਅਲ’’ਨ੍ਤਿ ਹਤ੍ਥਸਞ੍ਞਾਯ ਚੇਵ ਵਾਚਾਯ ਚ ਪਟਿਕ੍ਖਿਪਾਪੇਸਿ. ਓਨੀਤਪਤ੍ਤਪਾਣਿਨੋਤਿ ਪਾਣਿਤੋ ਅਪਨੀਤਪਤ੍ਤਾ ਧੋਵਿਤ੍ਵਾ ਥਵਿਕਾਯ ਓਸਾਪੇਤ੍ਵਾ ਅਂਸੇ ਲਗ੍ਗਿਤਪਤ੍ਤਾਤਿ ਅਤ੍ਥੋ.

੩. ਦੁਤਿਯਇਸਿਦਤ੍ਤਸੁਤ੍ਤਵਣ੍ਣਨਾ

੩੪੫. ਤਤਿਯੇ ਅਵਨ੍ਤਿਯਾਤਿ ਦਕ੍ਖਿਣਾਪਥੇ ਅਵਨ੍ਤਿਰਟ੍ਠੇ. ਕਲ੍ਯਾਣਂ ਵੁਚ੍ਚਤੀਤਿ ‘‘ਚਤੂਹਿ ਪਚ੍ਚਯੇਹਿ ਪਟਿਜਗ੍ਗਿਸ੍ਸਾਮੀ’’ਤਿ ਵਚਨਂ ਨਿਦ੍ਦੋਸਂ ਅਨਵਜ੍ਜਂ ਵੁਚ੍ਚਤਿ ਤਯਾ ਉਪਾਸਕਾਤਿ ਅਧਿਪ੍ਪਾਯੇਨ ਵਦਤਿ.

੪. ਮਹਕਪਾਟਿਹਾਰਿਯਸੁਤ੍ਤਵਣ੍ਣਨਾ

੩੪੬. ਚਤੁਤ੍ਥੇ ਸੇਸਕਂ ਵਿਸ੍ਸਜ੍ਜੇਥਾਤਿ ਤਸ੍ਸ ਕਿਰ ਥੇਰੇਹਿ ਸਦ੍ਧਿਂਯੇਵ ਕਂਸਥਾਲਂ ਪਮਜ੍ਜਿਤ੍ਵਾ ਪਾਯਾਸਂ ਵਡ੍ਢੇਤ੍ਵਾ ਅਦਂਸੁ. ਸੋ ਭੁਤ੍ਤਪਾਯਾਸੋ ਥੇਰੇਹਿਯੇਵ ਸਦ੍ਧਿਂ ਗਨ੍ਤੁਕਾਮੋ ਚਿਨ੍ਤੇਸਿ ‘‘ਘਰੇ ਤਾਵ ਉਪਾਸਿਕਾ ਸੇਸਕਂ ਵਿਚਾਰੇਤਿ, ਇਧ ਪਨਿਮੇ ਦਾਸਕਮ੍ਮਕਾਰਾ ਮਯਾ ਅਵੁਤ੍ਤਾ ਨ ਵਿਚਾਰੇਸ੍ਸਨ੍ਤਿ, ਏਵਾਯਂ ਪਣੀਤਪਾਯਾਸੋ ਨਸ੍ਸਿਸ੍ਸਤੀ’’ਤਿ ਤੇਸਂ ਅਨੁਜਾਨਨ੍ਤੋ ਏਵਮਾਹ. ਕੁਥਿਤਨ੍ਤਿ ਕੁਧਿਤਂ, ਹੇਟ੍ਠਾ ਸਨ੍ਤਤ੍ਤਾਯ ਵਾਲਿਕਾਯ ਉਪਰਿ ਆਤਪੇਨ ਚ ਅਤਿਤਿਖਿਣਨ੍ਤਿ ਅਤ੍ਥੋ. ਇਦਂ ਪਨ ਤੇਪਿਟਕੇ ਬੁਦ੍ਧਵਚਨੇ ਅਸਮ੍ਭਿਨ੍ਨਪਦਂ. ਪਵੇਲਿਯਮਾਨੇਨਾਤਿ ਪਟਿਲਿਯਮਾਨੇਨ ਸਾਧੁ ਖ੍ਵਸ੍ਸ ਭਨ੍ਤੇਤਿ ‘‘ਫਾਸੁਵਿਹਾਰਂ ਕਰਿਸ੍ਸਾਮਿ ਨੇਸ’’ਨ੍ਤਿ ਚਿਨ੍ਤੇਤ੍ਵਾ ਏਵਮਾਹ.

ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਰੀਤਿ ਅਧਿਟ੍ਠਾਨਿਦ੍ਧਿਂ ਅਕਾਸਿ. ਏਤ੍ਥ ਚ ‘‘ਮਨ੍ਦਮਨ੍ਦੋ ਸੀਤਕਵਾਤੋ ਵਾਯਤੁ, ਅਬ੍ਭਮਣ੍ਡਪਂ ਕਤ੍ਵਾ ਦੇਵੋ ਏਕਮੇਕਂ ਫੁਸਾਯਤੂ’’ਤਿ ਏਵਂ ਨਾਨਾਪਰਿਕਮ੍ਮਂ – ‘‘ਸਵਾਤੋ ਦੇਵੋ ਵਸ੍ਸਤੂ’’ਤਿ ਏਵਂ ਅਧਿਟ੍ਠਾਨਂ ਏਕਤੋਪਿ ਹੋਤਿ. ‘‘ਸਵਾਤੋ ਦੇਵੋ ਵਸ੍ਸਤੂਤਿ ਏਕਤੋਪਰਿਕਮ੍ਮਂ, ਮਨ੍ਦਮਨ੍ਦੋ ਸੀਤਕਵਾਤੋ ਵਾਯਤੁ, ਅਬ੍ਭਮਣ੍ਡਪਂ ਕਤ੍ਵਾ ਦੇਵੋ ਏਕਮੇਕਂ ਫੁਸਾਯਤੂ’’ਤਿ ਏਵਂ ਨਾਨਾਅਧਿਟ੍ਠਾਨਂ ਹੋਤਿ. ਵੁਤ੍ਤਨਯੇਨੇਵ ਨਾਨਾਪਰਿਕਮ੍ਮਂ ਨਾਨਾਧਿਟ੍ਠਾਨਂ, ਏਕਤੋ ਪਰਿਕਮ੍ਮਂ ਏਕਤੋ ਅਧਿਟ੍ਠਾਨਮ੍ਪਿ ਹੋਤਿਯੇਵ. ਯਥਾ ਤਥਾ ਕਰੋਨ੍ਤਸ੍ਸ ਪਨ ਪਾਦਕਜ੍ਝਾਨਤੋ ਵੁਟ੍ਠਾਯ ਕਤਪਰਿਕਮ੍ਮਸ੍ਸ ਪਰਿਕਮ੍ਮਾਨਨ੍ਤਰੇਨ ਮਹਗ੍ਗਤਅਧਿਟ੍ਠਾਨਚਿਤ੍ਤੇਨੇਵ ਤਂ ਇਜ੍ਝਤਿ. ਓਕਾਸੇਸੀਤਿ ਵਿਪ੍ਪਕਿਰਿ.

੫. ਪਠਮਕਾਮਭੂਸੁਤ੍ਤਵਣ੍ਣਨਾ

੩੪੭. ਪਞ੍ਚਮੇ ਨੇਲਙ੍ਗੋਤਿ ਨਿਦ੍ਦੋਸੋ. ਸੇਤਪਚ੍ਛਾਦੋਤਿ ਸੇਤਪਟਿਚ੍ਛਾਦਨੋ. ਅਨੀਘਨ੍ਤਿ ਨਿਦ੍ਦੁਕ੍ਖਂ. ਮੁਹੁਤ੍ਤਂ ਤੁਣ੍ਹੀ ਹੁਤ੍ਵਾਤਿ ਤਸ੍ਸ ਅਤ੍ਥਪੇਕ੍ਖਨਤ੍ਥਂ ਤੀਣਿ ਪਿਟਕਾਨਿ ਕਣ੍ਣੇ ਕੁਣ੍ਡਲਂ ਵਿਯ ਸਞ੍ਚਾਲੇਨ੍ਤੋ ‘‘ਅਯਂ ਇਮਸ੍ਸ ਅਤ੍ਥੋ, ਅਯਂ ਇਮਸ੍ਸ ਅਤ੍ਥੋ’’ਤਿ ਉਪਪਰਿਕ੍ਖਣਤ੍ਥਂ ਮੁਹੁਤ੍ਤਂ ਤੁਣ੍ਹੀ ਹੁਤ੍ਵਾ. ਵਿਮੁਤ੍ਤਿਯਾਤਿ ਅਰਹਤ੍ਤਫਲਵਿਮੁਤ੍ਤਿਯਾ. ਇਮਂ ਪਨ ਪਞ੍ਹਂ ਕਥੇਨ੍ਤੋ ਉਪਾਸਕੋ ਦੁਕ੍ਕਰਂ ਅਕਾਸਿ. ਸਮ੍ਮਾਸਮ੍ਬੁਦ੍ਧੋ ਹਿ ‘‘ਪਸ੍ਸਥ ਨੋ ਤੁਮ੍ਹੇ, ਭਿਕ੍ਖਵੇ, ਏਤਂ ਭਿਕ੍ਖੁਂ ਆਗਚ੍ਛਨ੍ਤਂ ਓਦਾਤਕਂ ਤਨੁਕਂ ਤੁਙ੍ਗਨਾਸਿਕ’’ਨ੍ਤਿ (ਸਂ. ਨਿ. ੨.੨੪੫) ਅਤ੍ਤਨੋ ਦਿਟ੍ਠੇਨ ਕਥੇਸਿ. ਅਯਂ ਪਨ ਨਯਗ੍ਗਾਹੇਨ ‘‘ਅਰਹਤੋ ਏਤਂ ਅਧਿਵਚਨ’’ਨ੍ਤਿ ਆਹ.

੬. ਦੁਤਿਯਕਾਮਭੂਸੁਤ੍ਤਵਣ੍ਣਨਾ

੩੪੮. ਛਟ੍ਠੇ ਕਤਿ ਨੁ ਖੋ ਭਨ੍ਤੇ ਸਙ੍ਖਾਰਾਤਿ ਅਯਂ ਕਿਰ, ਗਹਪਤਿ, ਨਿਰੋਧਂ ਵਲਞ੍ਜੇਤਿ, ਤਸ੍ਮਾ ‘‘ਨਿਰੋਧਪਾਦਕੇ ਸਙ੍ਖਾਰੇ ਪੁਚ੍ਛਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਏਵਮਾਹ. ਥੇਰੋਪਿਸ੍ਸ ਅਧਿਪ੍ਪਾਯਂ ਞਤ੍ਵਾ ਪੁਞ੍ਞਾਭਿਸਙ੍ਖਾਰਾਦੀਸੁ ਅਨੇਕੇਸੁ ਸਙ੍ਖਾਰੇਸੁ ਵਿਜ੍ਜਮਾਨੇਸੁਪਿ ਕਾਯਸਙ੍ਖਾਰਾਦਯੋਵ ਆਚਿਕ੍ਖਨ੍ਤੋ ਤਯੋ ਖੋ ਗਹਪਤੀਤਿਆਦਿਮਾਹ. ਤਤ੍ਥ ਕਾਯਪ੍ਪਟਿਬਦ੍ਧਤ੍ਤਾ ਕਾਯੇਨ ਸਙ੍ਖਰੀਯਤਿ ਨਿਬ੍ਬਤ੍ਤੀਯਤੀਤਿ ਕਾਯਸਙ੍ਖਾਰੋ. ਵਾਚਾਯ ਸਙ੍ਖਰੋਤਿ ਨਿਬ੍ਬਤ੍ਤੇਤੀਤਿ ਵਚੀਸਙ੍ਖਾਰੋ. ਚਿਤ੍ਤਪ੍ਪਟਿਬਦ੍ਧਤ੍ਤਾ ਚਿਤ੍ਤੇਨ ਸਙ੍ਖਰੀਯਤਿ ਨਿਬ੍ਬਤ੍ਤੀਯਤੀਤਿ ਚਿਤ੍ਤਸਙ੍ਖਾਰੋ.

ਕਤਮੋ ਪਨ ਭਨ੍ਤੇਤਿ ਇਧ ਕਿਂ ਪੁਚ੍ਛਤਿ? ‘‘ਇਮੇ ਸਙ੍ਖਾਰਾ ਅਞ੍ਞਮਞ੍ਞਂ ਮਿਸ੍ਸਾ ਆਲੁਲ਼ਿਤਾ ਅਵਿਭੂਤਾ ਦੁਦ੍ਦੀਪਨਾ. ਤਥਾ ਹਿ ਕਾਯਦ੍ਵਾਰੇ ਆਦਾਨਗ੍ਗਹਣਮੁਞ੍ਚਨਚੋਪਨਾਨਿ ਪਾਪੇਤ੍ਵਾ ਉਪ੍ਪਨ੍ਨਾ ਅਟ੍ਠ ਕਾਮਾਵਚਰਕੁਸਲਚੇਤਨਾ ਦ੍ਵਾਦਸ ਅਕੁਸਲਚੇਤਨਾਤਿ ਏਵਂ ਕੁਸਲਾਕੁਸਲਾ ਵੀਸਤਿ ਚੇਤਨਾਪਿ, ਅਸ੍ਸਾਸਪਸ੍ਸਾਸਾਪਿ ਕਾਯਸਙ੍ਖਾਰੋਤ੍ਵੇਵ ਵੁਚ੍ਚਨ੍ਤਿ. ਵਚੀਦ੍ਵਾਰੇ ਹਨੁਸਞ੍ਚੋਪਨਂ ਵਚੀਭੇਦਂ ਪਾਪੇਤ੍ਵਾ ਉਪ੍ਪਨ੍ਨਾ ਵੁਤ੍ਤਪ੍ਪਕਾਰਾਵ ਵੀਸਤਿ ਚੇਤਨਾਪਿ ਵਿਤਕ੍ਕਵਿਚਾਰਾਪਿ ਵਚੀਸਙ੍ਖਾਰੋਤ੍ਵੇਵ ਵੁਚ੍ਚਨ੍ਤਿ. ਕਾਯਵਚੀਦ੍ਵਾਰੇਸੁ ਚੋਪਨਂ ਅਪਤ੍ਵਾ ਰਹੋ ਨਿਸਿਨ੍ਨਸ੍ਸ ਚਿਨ੍ਤਯਤੋ ਉਪ੍ਪਨ੍ਨਾ ਕੁਸਲਾਕੁਸਲਾ ਏਕੂਨਤਿਂਸਚੇਤਨਾਪਿ, ਸਞ੍ਞਾ ਚ ਵੇਦਨਾ ਚਾਤਿ ਇਮੇ ਦ੍ਵੇ ਧਮ੍ਮਾਪਿ ਚਿਤ੍ਤਸਙ੍ਖਾਰੋਤ੍ਵੇਵ ਵੁਚ੍ਚਨ੍ਤਿ. ਏਵਂ ਇਮੇ ਸਙ੍ਖਾਰਾ ਅਞ੍ਞਮਞ੍ਞਂ ਮਿਸ੍ਸਾ ਆਲੁਲ਼ਿਤਾ ਅਵਿਭੂਤਾ ਦੁਦ੍ਦੀਪਨਾ, ਤੇ ਪਾਕਟੇ ਵਿਭੂਤੇ ਕਤ੍ਵਾ ਕਥਾਪੇਸ੍ਸਾਮੀ’’ਤਿ ਪੁਚ੍ਛਿ.

ਕਸ੍ਮਾ ਪਨ ਭਨ੍ਤੇਤਿ ਇਧ ਕਾਯਸਙ੍ਖਾਰਾਦਿਨਾਮਸ੍ਸ ਪਦਤ੍ਥਂ ਪੁਚ੍ਛਤਿ. ਤਸ੍ਸ ਵਿਸ੍ਸਜ੍ਜਨੇ ਕਾਯਪ੍ਪਟਿਬਦ੍ਧਾਤਿ ਕਾਯਨਿਸ੍ਸਿਤਾ. ਕਾਯੇ ਸਤਿ ਹੋਨ੍ਤਿ, ਅਸਤਿ ਨ ਹੋਨ੍ਤਿ. ਚਿਤ੍ਤਪ੍ਪਟਿਬਦ੍ਧਾਤਿ ਚਿਤ੍ਤਨਿਸ੍ਸਿਤਾ. ਚਿਤ੍ਤੇ ਸਤਿ ਹੋਨ੍ਤਿ, ਅਸਤਿ ਨ ਹੋਨ੍ਤਿ.

ਇਦਾਨਿ ‘‘ਕਿਂ ਨੁ ਖੋ ਏਸ ਸਞ੍ਞਾਵੇਦਯਿਤਨਿਰੋਧਂ ਵਲਞ੍ਜੇਤਿ, ਨੋ ਵਲਞ੍ਜੇਤਿ, ਚਿਣ੍ਣਵਸੀ ਵਾ ਤਤ੍ਥ ਨੋ ਚਿਣ੍ਣਵਸੀ’’ਤਿ ਜਾਨਨਤ੍ਥਂ ਪੁਚ੍ਛਨ੍ਤੋ ਕਥਂ ਪਨ ਭਨ੍ਤੇ ਸਞ੍ਞਾਵੇਦਯਿਤਨਿਰੋਧਸਮਾਪਤ੍ਤਿ ਹੋਤੀਤਿ ਆਹ. ਤਸ੍ਸ ਵਿਸ੍ਸਜ੍ਜਨੇ ਸਮਾਪਜ੍ਜਿਸ੍ਸਨ੍ਤਿ ਵਾ ਸਮਾਪਜ੍ਜਾਮੀਤਿ ਵਾ ਪਦਦ੍ਵਯੇਨ ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਤ੍ਤਿਕਾਲੋ ਕਥਿਤੋ. ਸਮਾਪਨ੍ਨੋਤਿ ਪਦੇਨ ਅਨ੍ਤੋਨਿਰੋਧੋ. ਤਥਾ ਪੁਰਿਮੇਹਿ ਦ੍ਵੀਹਿ ਪਦੇਹਿ ਸਚਿਤ੍ਤਕਕਾਲੋ ਕਥਿਤੋ, ਪਚ੍ਛਿਮੇਨ ਅਚਿਤ੍ਤਕਕਾਲੋ.

ਪੁਬ੍ਬੇਵ ਤਥਾ ਚਿਤ੍ਤਂ ਭਾਵਿਤਂ ਹੋਤੀਤਿ ਨਿਰੋਧਸਮਾਪਤ੍ਤਿਤੋ ਪੁਬ੍ਬੇ ਅਦ੍ਧਾਨਪਰਿਚ੍ਛੇਦਕਾਲੇਯੇਵ ‘‘ਏਤ੍ਤਕਂ ਕਾਲਂ ਅਚਿਤ੍ਤਕੋ ਭਵਿਸ੍ਸਾਮੀ’’ਤਿ ਅਦ੍ਧਾਨਪਰਿਚ੍ਛੇਦਂ ਚਿਤ੍ਤਂ ਭਾਵਿਤਂ ਹੋਤਿ. ਯਂ ਤਂ ਤਥਤ੍ਤਾਯ ਉਪਨੇਤੀਤਿ ਯਂ ਪਨ ਏਵਂ ਭਾਵਿਤਂ ਚਿਤ੍ਤਂ, ਤਂ ਪੁਗ੍ਗਲਂ ਤਥਤ੍ਤਾਯ ਅਚਿਤ੍ਤਕਭਾਵਾਯ ਉਪਨੇਤਿ. ਵਚੀਸਙ੍ਖਾਰੋ ਪਠਮਂ ਨਿਰੁਜ੍ਝਤੀਤਿ ਸੇਸਸਙ੍ਖਾਰੇਹਿ ਪਠਮਂ ਦੁਤਿਯਜ੍ਝਾਨੇਯੇਵ ਨਿਰੁਜ੍ਝਤਿ. ਤਤੋ ਕਾਯਸਙ੍ਖਾਰੋਤਿ ਤਤੋ ਪਰਂ ਕਾਯਸਙ੍ਖਾਰੋ ਚਤੁਤ੍ਥਜ੍ਝਾਨੇ ਨਿਰੁਜ੍ਝਤਿ. ਤਤੋ ਚਿਤ੍ਤਸਙ੍ਖਾਰੋਤਿ ਤਤੋ ਪਰਂ ਚਿਤ੍ਤਸਙ੍ਖਾਰੋ ਅਨ੍ਤੋਨਿਰੋਧੇ ਨਿਰੁਜ੍ਝਤਿ. ਆਯੂਤਿ ਰੂਪਜੀਵਿਤਿਨ੍ਦ੍ਰਿਯਂ. ਵਿਪਰਿਭਿਨ੍ਨਾਨੀਤਿ ਉਪਹਤਾਨਿ ਵਿਨਟ੍ਠਾਨਿ.

ਤਤ੍ਥ ਕੇਚਿ ‘‘ਨਿਰੋਧਸਮਾਪਨ੍ਨਸ੍ਸ ‘ਚਿਤ੍ਤਸਙ੍ਖਾਰੋ ਚ ਨਿਰੁਦ੍ਧੋ’ਤਿ ਵਚਨਤੋ ਚਿਤ੍ਤਂ ਅਨਿਰੁਦ੍ਧਂ ਹੋਤਿ, ਤਸ੍ਮਾ ਸਚਿਤ੍ਤਕਾਪਿ ਅਯਂ ਸਮਾਪਤ੍ਤੀ’’ਤਿ ਵਦਨ੍ਤਿ. ਤੇ ਵਤ੍ਤਬ੍ਬਾ – ‘‘ਵਚੀਸਙ੍ਖਾਰੋਪਿਸ੍ਸ ਨਿਰੁਦ੍ਧੋ’’ਤਿ ਵਚਨਤੋ ਵਾਚਾ ਅਨਿਰੁਦ੍ਧਾ ਹੋਤਿ, ਤਸ੍ਮਾ ਨਿਰੋਧਸਮਾਪਨ੍ਨੇਨ ਧਮ੍ਮਮ੍ਪਿ ਕਥੇਨ੍ਤੇਨ ਸਜ੍ਝਾਯਮ੍ਪਿ ਕਰੋਨ੍ਤੇਨ ਨਿਸੀਦਿਤਬ੍ਬਂ ਸਿਯਾ. ਯੋ ਚਾਯਂ ਮਤੋ ਕਾਲਙ੍ਕਤੋ, ਤਸ੍ਸਾਪਿ ਚਿਤ੍ਤਸਙ੍ਖਾਰੋ ਨਿਰੁਦ੍ਧੋਤਿ ਵਚਨਤੋ ਚਿਤ੍ਤਂ ਅਨਿਰੁਦ੍ਧਂ ਭਵੇਯ੍ਯ, ਤਸ੍ਮਾ ਕਾਲਙ੍ਕਤੇ ਮਾਤਾਪਿਤਰੋ ਵਾ ਅਰਹਨ੍ਤੇ ਵਾ ਝਾਪੇਨ੍ਤੇਨ ਆਨਨ੍ਤਰਿਯਕਮ੍ਮਂ ਕਤਂ ਭਵੇਯ੍ਯ. ਇਤਿ ਬ੍ਯਞ੍ਜਨੇ ਅਭਿਨਿਵੇਸਂ ਅਕਤ੍ਵਾ ਆਚਰਿਯਾਨਂ ਨਯੇ ਠਤ੍ਵਾ ਅਤ੍ਥੋ ਉਪਪਰਿਕ੍ਖਿਤਬ੍ਬੋ. ਅਤ੍ਥੋ ਹਿ ਪਟਿਸਰਣਂ, ਨ ਬ੍ਯਞ੍ਜਨਂ.

ਇਨ੍ਦ੍ਰਿਯਾਨਿ ਵਿਪ੍ਪਸਨ੍ਨਾਨੀਤਿ ਕਿਰਿਯਮਯਪਵਤ੍ਤਸ੍ਮਿਞ੍ਹਿ ਵਤ੍ਤਮਾਨੇ ਬਹਿਦ੍ਧਾਰਮ੍ਮਣੇਸੁ ਪਸਾਦੇ ਘਟ੍ਟੇਨ੍ਤੇਸੁ ਇਨ੍ਦ੍ਰਿਯਾਨਿ ਕਿਲਮਨ੍ਤਿ, ਉਪਹਤਾਨਿ ਮਕ੍ਖਿਤ੍ਤਾਨਿ ਵਿਯ ਹੋਨ੍ਤਿ ਵਾਤਾਦੀਹਿ ਉਟ੍ਠਿਤਰਜੇਨ ਚਤੁਮਹਾਪਥੇ ਠਪਿਤਆਦਾਸੋ ਵਿਯ. ਯਥਾ ਪਨ ਥਵਿਕਾਯ ਪਕ੍ਖਿਪਿਤ੍ਵਾ ਮਞ੍ਜੂਸਾਦੀਸੁ ਠਪਿਤੋ ਆਦਾਸੋ ਅਨ੍ਤੋਯੇਵ ਵਿਰੋਚਤਿ, ਏਵਂ ਨਿਰੋਧਸਮਾਪਨ੍ਨਸ੍ਸ ਭਿਕ੍ਖੁਨੋ ਅਨ੍ਤੋਨਿਰੋਧੇ ਪਞ੍ਚ ਪਸਾਦਾ ਅਤਿਵਿਯ ਵਿਰੋਚਨ੍ਤਿ. ਤੇਨ ਵੁਤ੍ਤਂ ‘‘ਇਨ੍ਦ੍ਰਿਯਾਨਿ ਵਿਪ੍ਪਸਨ੍ਨਾਨੀ’’ਤਿ.

ਵੁਟ੍ਠਹਿਸ੍ਸਨ੍ਤਿ ਵਾ ਵੁਟ੍ਠਹਾਮੀਤਿ ਵਾ ਪਦਦ੍ਵਯੇਨ ਅਨ੍ਤੋਨਿਰੋਧਕਾਲੋ ਕਥਿਤੋ, ਵੁਟ੍ਠਿਤੋਤਿ ਪਦੇਨ ਫਲਸਮਾਪਤ੍ਤਿਕਾਲੋ. ਤਥਾ ਪੁਰਿਮੇਹਿ ਦ੍ਵੀਹਿ ਪਦੇਹਿ ਅਚਿਤ੍ਤਕਕਾਲੋ ਕਥਿਤੋ, ਪਚ੍ਛਿਮੇਨ ਸਚਿਤ੍ਤਕਕਾਲੋ. ਪੁਬ੍ਬੇਵ ਤਥਾ ਚਿਤ੍ਤਂ ਭਾਵਿਤਂ ਹੋਤੀਤਿ ਨਿਰੋਧਸਮਾਪਤ੍ਤਿਤੋ ਪੁਬ੍ਬੇ ਅਦ੍ਧਾਨਪਰਿਚ੍ਛੇਦਕਾਲੇਯੇਵ ‘‘ਏਤ੍ਤਕਂ ਕਾਲਂ ਅਚਿਤ੍ਤਕੋ ਹੁਤ੍ਵਾ ਤਤੋ ਪਰਂ ਸਚਿਤ੍ਤਕੋ ਭਵਿਸ੍ਸਾਮੀ’’ਤਿ ਅਦ੍ਧਾਨਪਰਿਚ੍ਛੇਦਂ ਚਿਤ੍ਤਂ ਭਾਵਿਤਂ ਹੋਤਿ. ਯਂ ਤਂ ਤਥਤ੍ਤਾਯ ਉਪਨੇਤੀਤਿ ਯਂ ਏਵਂ ਭਾਵਿਤਂ ਚਿਤ੍ਤਂ, ਤਂ ਪੁਗ੍ਗਲਂ ਤਥਤ੍ਤਾਯ ਸਚਿਤ੍ਤਕਭਾਵਾਯ ਉਪਨੇਤਿ. ਇਤਿ ਹੇਟ੍ਠਾ ਨਿਰੋਧਸਮਾਪਜ੍ਜਨ੍ਨਕਾਲੋ ਗਹਿਤੋ, ਇਧ ਨਿਰੋਧਤੋ ਵੁਟ੍ਠਾਨਕਾਲੋ.

ਇਦਾਨਿ ਨਿਰੋਧਕਥਂ ਕਥੇਤੁਂ ਕਾਲੋਤਿ ਨਿਰੋਧਕਥਾ ਕਥੇਤਬ੍ਬਾ ਸਿਯਾ. ਸਾ ਪਨੇਸਾ ‘‘ਦ੍ਵੀਹਿ ਬਲੇਹਿ ਸਮਨ੍ਨਾਗਤਤ੍ਤਾ ਤਯੋ ਚ ਸਙ੍ਖਾਰਾਨਂ ਪਟਿਪਸ੍ਸਦ੍ਧਿਯਾ ਸੋਲ਼ਸਹਿ ਞਾਣਚਰਿਯਾਹਿ ਨਵਹਿ ਸਮਾਧਿਚਰਿਯਾਹਿ ਵਸੀਭਾਵਤਾਪਞ੍ਞਾ ਨਿਰੋਧਸਮਾਪਤ੍ਤਿਯਂ ਞਾਣ’’ਨ੍ਤਿ ਮਾਤਿਕਂ ਠਪੇਤ੍ਵਾ ਸਬ੍ਬਾਕਾਰੇਨ ਵਿਸੁਦ੍ਧਿਮਗ੍ਗੇ ਕਥਿਤਾ, ਤਸ੍ਮਾ ਤਤ੍ਥ ਕਥਿਤਨਯੇਨੇਵ ਗਹੇਤਬ੍ਬਾ. ਕੋ ਪਨਾਯਂ ਨਿਰੋਧੋ ਨਾਮ? ਚਤੁਨ੍ਨਂ ਖਨ੍ਧਾਨਂ ਪਟਿਸਙ੍ਖਾ ਅਪ੍ਪਵਤ੍ਤਿ. ਅਥ ਕਿਮਤ੍ਥਮੇਤਂ ਸਮਾਪਜ੍ਜਨ੍ਤੀਤਿ? ਸਙ੍ਖਾਰਾਨਂ ਪਵਤ੍ਤੇ ਉਕ੍ਕਣ੍ਠਿਤਾ ਸਤ੍ਤਾਹਂ ਅਚਿਤ੍ਤਕਾ ਹੁਤ੍ਵਾ ਸੁਖਂ ਵਿਹਰਿਸ੍ਸਾਮ, ਦਿਟ੍ਠਧਮ੍ਮਨਿਬ੍ਬਾਨਂ ਨਾਮੇਤਂ ਯਦਿਦਂ ਨਿਰੋਧੋਤਿ ਏਤਦਤ੍ਥਂ ਸਮਾਪਜ੍ਜਨ੍ਤਿ.

ਚਿਤ੍ਤਸਙ੍ਖਾਰੋ ਪਠਮਂ ਉਪ੍ਪਜ੍ਜਤੀਤਿ ਨਿਰੋਧਾ ਵੁਟ੍ਠਹਨ੍ਤਸ੍ਸ ਹਿ ਫਲਸਮਾਪਤ੍ਤਿਚਿਤ੍ਤਂ ਪਠਮਂ ਉਪ੍ਪਜ੍ਜਤਿ. ਤਂਸਮ੍ਪਯੁਤ੍ਤਂ ਸਞ੍ਞਞ੍ਚ ਵੇਦਨਞ੍ਚ ਸਨ੍ਧਾਯ ‘‘ਚਿਤ੍ਤਸਙ੍ਖਾਰੋ ਪਠਮਂ ਉਪ੍ਪਜ੍ਜਤੀ’’ਤਿ ਆਹ. ਤਤੋ ਕਾਯਸਙ੍ਖਾਰੋਤਿ ਤਤੋ ਪਰਂ ਭਵਙ੍ਗਸਮਯੇ ਕਾਯਸਙ੍ਖਾਰੋ ਉਪ੍ਪਜ੍ਜਤਿ.

ਕਿਂ ਪਨ ਫਲਸਮਾਪਤ੍ਤਿ ਅਸ੍ਸਾਸਪਸ੍ਸਾਸੇ ਨ ਸਮੁਟ੍ਠਾਪੇਤੀਤਿ? ਸਮੁਟ੍ਠਾਪੇਤਿ. ਇਮਸ੍ਸ ਪਨ ਚਤੁਤ੍ਥਜ੍ਝਾਨਿਕਾ ਫਲਸਮਾਪਤ੍ਤਿ, ਸਾ ਨ ਸਮੁਟ੍ਠਾਪੇਤਿ. ਕਿਂ ਵਾ ਏਤੇਨ? ਫਲਸਮਾਪਤ੍ਤਿ ਪਠਮਜ੍ਝਾਨਿਕਾ ਵਾ ਹੋਤੁ ਦੁਤਿਯਤਤਿਯਚਤੁਤ੍ਥਜ੍ਝਾਨਿਕਾ ਵਾ, ਸਨ੍ਤਸਮਾਪਤ੍ਤਿਤੋ ਵੁਟ੍ਠਿਤਸ੍ਸ ਭਿਕ੍ਖੁਨੋ ਅਸ੍ਸਾਸਪਸ੍ਸਾਸਾ ਅਬ੍ਬੋਹਾਰਿਕਾ ਹੋਨ੍ਤਿ, ਤੇਸਂ ਅਬ੍ਬੋਹਾਰਿਕਭਾਵੋ ਸਞ੍ਜੀਵਤ੍ਥੇਰਵਤ੍ਥੁਨਾ ਵੇਦਿਤਬ੍ਬੋ. ਸਞ੍ਜੀਵਤ੍ਥੇਰਸ੍ਸ ਹਿ ਸਮਾਪਤ੍ਤਿਤੋ ਵੁਟ੍ਠਾਯ ਕਿਂਸੁਕਪੁਪ੍ਫਸਦਿਸੇ ਵੀਤਚ੍ਚਿਤਙ੍ਗਾਰੇ ਮਦ੍ਦਮਾਨਸ੍ਸ ਗਚ੍ਛਤੋ ਚੀਵਰੇ ਅਂਸੁਮਤ੍ਤਮ੍ਪਿ ਨ ਝਾਯਿ, ਉਸ੍ਮਾਕਾਰਮਤ੍ਤਮ੍ਪਿ ਨਾਹੋਸਿ. ਸਮਾਪਤ੍ਤਿਬਲਂ ਨਾਮੇਤਨ੍ਤਿ ਵਦਨ੍ਤਿ. ਏਵਮੇਵ ਸਨ੍ਤਾਯ ਫਲਸਮਾਪਤ੍ਤਿਯਾ ਵੁਟ੍ਠਿਤਸ੍ਸ ਭਿਕ੍ਖੁਨੋ ਅਸ੍ਸਾਸਪਸ੍ਸਾਸਾ ਅਬ੍ਬੋਹਾਰਿਕਾ ਹੋਨ੍ਤੀਤਿ ਭਵਙ੍ਗਸਮਯੇਨੇਵੇਤਂ ਕਥਿਤਨ੍ਤਿ ਵੇਦਿਤਬ੍ਬਂ.

ਤਤੋ ਵਚੀਸਙ੍ਖਾਰੋਤਿ ਤਤੋ ਪਰਂ ਕਿਰਿਯਮਯਪਵਤ੍ਤਵਲਞ੍ਜਨਕਾਲੇ ਵਚੀਸਙ੍ਖਾਰੋ ਉਪ੍ਪਜ੍ਜਤਿ. ਕਿਂ ਭਵਙ੍ਗਂ ਵਿਤਕ੍ਕਵਿਚਾਰੇ ਨ ਸਮੁਟ੍ਠਾਪੇਤੀਤਿ? ਸਮੁਟ੍ਠਾਪੇਤਿ. ਤਂਸਮੁਟ੍ਠਾਨਾ ਪਨ ਵਿਤਕ੍ਕਵਿਚਾਰਾ ਵਾਚਂ ਅਭਿਸਙ੍ਖਾਤੁਂ ਨ ਸਕ੍ਕੋਨ੍ਤੀਤਿ ਕਿਰਿਯਮਯਪਵਤ੍ਤਵਲਞ੍ਜਨਕਾਲੇਨੇਵੇਤਂ ਕਥਿਤਂ.

ਸੁਞ੍ਞਤੋ ਫਸ੍ਸੋਤਿਆਦਯੋ ਸਗੁਣੇਨਾਪਿ ਆਰਮ੍ਮਣੇਨਾਪਿ ਕਥੇਤਬ੍ਬਾ. ਸਗੁਣੇਨ ਤਾਵ ਸੁਞ੍ਞਤਾ ਨਾਮ ਫਲਸਮਾਪਤ੍ਤਿ, ਤਾਯ ਸਹਜਾਤਫਸ੍ਸਂ ਸਨ੍ਧਾਯ ‘‘ਸੁਞ੍ਞਤੋ ਫਸ੍ਸੋ’’ਤਿ ਵੁਤ੍ਤਂ. ਅਨਿਮਿਤ੍ਤਪ੍ਪਣਿਹਿਤੇਸੁਪਿ ਏਸੇਵ ਨਯੋ. ਆਰਮ੍ਮਣੇਨ ਪਨ ਨਿਬ੍ਬਾਨਂ ਰਾਗਾਦੀਹਿ ਸੁਞ੍ਞਤ੍ਤਾ ਸੁਞ੍ਞਤਾ ਨਾਮ, ਰਾਗਨਿਮਿਤ੍ਤਾਦੀਨਂ ਅਭਾਵਾ ਅਨਿਮਿਤ੍ਤਂ, ਰਾਗਦੋਸਮੋਹਪ੍ਪਣਿਧੀਨਂ ਅਭਾਵਾ ਅਪ੍ਪਣਿਹਿਤਂ, ਸੁਞ੍ਞਤਂ ਨਿਬ੍ਬਾਨਂ ਆਰਮ੍ਮਣਂ ਕਤ੍ਵਾ ਉਪ੍ਪਨ੍ਨਫਲਸਮਾਪਤ੍ਤਿਸਮ੍ਫਸ੍ਸੋ ਸੁਞ੍ਞਤੋ ਨਾਮ. ਅਨਿਮਿਤ੍ਤਪ੍ਪਣਿਹਿਤੇਸੁਪਿ ਏਸੇਵ ਨਯੋ.

ਅਪਰਾ ਆਗਮਨਿਯਕਥਾ ਨਾਮ ਹੋਤਿ. ਸੁਞ੍ਞਤਅਨਿਮਿਤ੍ਤਅਪ੍ਪਣਿਹਿਤਾਤਿ ਹਿ ਵਿਪਸ੍ਸਨਾਪਿ ਵੁਚ੍ਚਤਿ. ਤਤ੍ਥ ਯੋ ਭਿਕ੍ਖੁ ਸਙ੍ਖਾਰੇ ਅਨਿਚ੍ਚਤੋ ਪਰਿਗ੍ਗਹੇਤ੍ਵਾ ਅਨਿਚ੍ਚਤੋ ਦਿਸ੍ਵਾ ਅਨਿਚ੍ਚਤੋ ਵੁਟ੍ਠਾਤਿ, ਤਸ੍ਸ ਵੁਟ੍ਠਾਨਗਾਮਿਨਿਵਿਪਸ੍ਸਨਾ ਅਨਿਮਿਤ੍ਤਾ ਨਾਮ ਹੋਤਿ. ਯੋ ਦੁਕ੍ਖਤੋ ਪਰਿਗ੍ਗਹੇਤ੍ਵਾ ਦੁਕ੍ਖਤੋ ਦਿਸ੍ਵਾ ਦੁਕ੍ਖਤੋ ਵੁਟ੍ਠਾਤਿ, ਤਸ੍ਸ ਅਪ੍ਪਣਿਹਿਤਾ ਨਾਮ. ਯੋ ਅਨਤ੍ਤਤੋ ਪਰਿਗ੍ਗਹੇਤ੍ਵਾ ਅਨਤ੍ਤਤੋ ਦਿਸ੍ਵਾ ਅਨਤ੍ਤਤੋ ਵੁਟ੍ਠਾਤਿ, ਤਸ੍ਸ ਸੁਞ੍ਞਤਾ ਨਾਮ. ਤਤ੍ਥ ਅਨਿਮਿਤ੍ਤਵਿਪਸ੍ਸਨਾਯ ਮਗ੍ਗੋ ਅਨਿਮਿਤ੍ਤੋ ਨਾਮ, ਅਨਿਮਿਤ੍ਤਮਗ੍ਗਸ੍ਸ ਫਲਂ ਅਨਿਮਿਤ੍ਤਂ ਨਾਮ, ਅਨਿਮਿਤ੍ਤਫਲਸਮਾਪਤ੍ਤਿਸਹਜਾਤੇ ਫਸ੍ਸੇ ਫੁਸਨ੍ਤੇ ‘‘ਅਨਿਮਿਤ੍ਤੋ ਫਸ੍ਸੋ ਫੁਸਤੀ’’ਤਿ ਵੁਚ੍ਚਤਿ. ਅਪ੍ਪਣਿਹਿਤਸੁਞ੍ਞਤੇਸੁਪਿ ਏਸੇਵ ਨਯੋ. ਆਗਮਨਿਯੇਨ ਕਥਿਤੇ ਪਨ ਸੁਞ੍ਞਤੋ ਵਾ ਫਸ੍ਸੋ ਅਨਿਮਿਤ੍ਤੋ ਵਾ ਫਸ੍ਸੋ ਅਪ੍ਪਣਿਹਿਤੋ ਵਾ ਫਸ੍ਸੋਤਿ ਵਿਕਪ੍ਪੋ ਆਪਜ੍ਜੇਯ੍ਯ, ਤਸ੍ਮਾ ਸਗੁਣੇਨ ਚੇਵ ਆਰਮ੍ਮਣੇਨ ਚ ਕਥੇਤਬ੍ਬਂ. ਏਵਞ੍ਹਿ ਤਯੋ ਫਸ੍ਸਾ ਫੁਸਨ੍ਤੀਤਿ ਸਮੇਤਿ.

ਵਿਵੇਕਨਿਨ੍ਨਨ੍ਤਿਆਦੀਸੁ ਨਿਬ੍ਬਾਨਂ ਵਿਵੇਕੋ ਨਾਮ. ਤਸ੍ਮਿਂ ਵਿਵੇਕੇ ਨਿਨ੍ਨਂ ਓਨਤਨ੍ਤਿ ਵਿਵੇਕਨਿਨ੍ਨਂ. ਵਿਵੇਕਪੋਣਨ੍ਤਿ ਅਞ੍ਞਤੋ ਅਗਨ੍ਤ੍ਵਾ ਯੇਨ ਵਿਵੇਕੋ, ਤੇਨ ਵਙ੍ਕਂ ਵਿਯ ਹੁਤ੍ਵਾ ਠਿਤਨ੍ਤਿ ਵਿਵੇਕਪੋਣਂ. ਯੇਨ ਵਿਵੇਕੋ, ਤੇਨ ਪਤਮਾਨਂ ਵਿਯ ਠਿਤਨ੍ਤਿ ਵਿਵੇਕਪਬ੍ਭਾਰਂ.

੭. ਗੋਦਤ੍ਤਸੁਤ੍ਤਵਣ੍ਣਨਾ

੩੪੯. ਸਤ੍ਤਮੇ ਨਾਨਤ੍ਥਾ ਚੇਵ ਨਾਨਾਬ੍ਯਞ੍ਜਨਾ ਚਾਤਿ ਬ੍ਯਞ੍ਜਨਮ੍ਪਿ ਨੇਸਂ ਨਾਨਂ, ਅਤ੍ਥੋਪਿ. ਤਤ੍ਥ ਬ੍ਯਞ੍ਜਨਸ੍ਸ ਨਾਨਤਾ ਪਾਕਟਾ. ਅਤ੍ਥੋ ਪਨ ਅਪ੍ਪਮਾਣਾ ਚੇਤੋਵਿਮੁਤ੍ਤਿ ਭੂਮਨ੍ਤਰਤੋ ਮਹਗ੍ਗਤਾ ਹੋਤਿ ਰੂਪਾਵਚਰਾ, ਆਰਮ੍ਮਣਤੋ ਸਤ੍ਤਪਣ੍ਣਤ੍ਤਿਆਰਮ੍ਮਣਾ. ਆਕਿਞ੍ਚਞ੍ਞਾ ਭੂਮਨ੍ਤਰਤੋ ਮਹਗ੍ਗਤਾ ਅਰੂਪਾਵਚਰਾ, ਆਰਮ੍ਮਣਤੋ ਨਵਤ੍ਤਬ੍ਬਾਰਮ੍ਮਣਾ. ਸੁਞ੍ਞਤਾ ਭੂਮਨ੍ਤਰਤੋ ਕਾਮਾਵਚਰਾ, ਆਰਮ੍ਮਣਤੋ ਸਙ੍ਖਾਰਾਰਮ੍ਮਣਾ. ਵਿਪਸ੍ਸਨਾ ਹਿ ਏਤ੍ਥ ਸੁਞ੍ਞਤਾਤਿ ਅਧਿਪ੍ਪੇਤਾ. ਅਨਿਮਿਤ੍ਤਾ ਭੂਮਨ੍ਤਰਤੋ ਲੋਕੁਤ੍ਤਰਾ, ਆਰਮ੍ਮਣਤੋ ਨਿਬ੍ਬਾਨਾਰਮ੍ਮਣਾ.

ਰਾਗੋ ਖੋ ਭਨ੍ਤੇ ਪਮਾਣਕਰਣੋਤਿਆਦੀਸੁ ਯਥਾ ਪਬ੍ਬਤਪਾਦੇ ਪੂਤਿਪਣ੍ਣਕਸਟਉਦਕਂ ਨਾਮ ਹੋਤਿ ਕਾਲ਼ਵਣ੍ਣਂ, ਓਲੋਕੇਨ੍ਤਾਨਂ ਬ੍ਯਾਮਸਤਗਮ੍ਭੀਰਂ ਵਿਯ ਖਾਯਤਿ, ਯਟ੍ਠਿਂ ਵਾ ਰਜ੍ਜੁਂ ਵਾ ਗਹੇਤ੍ਵਾ ਮਿਨਨ੍ਤਸ੍ਸ ਪਿਟ੍ਠਿਪਾਦੋਤ੍ਥਰਣਮਤ੍ਤਮ੍ਪਿ ਨ ਹੋਤਿ; ਏਵਮੇਵ ਯਾਵ ਰਾਗਾਦਯੋ ਨੁਪ੍ਪਜ੍ਜਨ੍ਤਿ, ਤਾਵ ਪੁਗ੍ਗਲਂ ਸਞ੍ਜਾਨਿਤੁਂ ਨ ਸਕ੍ਕਾ ਹੋਤਿ, ਸੋਤਾਪਨ੍ਨੋ ਵਿਯ ਸਕਦਾਗਾਮੀ ਵਿਯ ਅਨਾਗਾਮੀ ਵਿਯ ਚ ਖਾਯਤਿ. ਯਦਾ ਪਨਸ੍ਸ ਰਾਗਾਦਯੋ ਉਪ੍ਪਜ੍ਜਨ੍ਤਿ, ਤਦਾ ਰਤ੍ਤੋ ਦੁਟ੍ਠੋ ਮੂਲ਼੍ਹੋਤਿ ਪਞ੍ਞਾਯਤਿ. ਇਤਿ ਤੇ ‘‘ਏਤ੍ਤਕੋ ਅਯ’’ਨ੍ਤਿ ਪੁਗ੍ਗਲਸ੍ਸ ਪਮਾਣਂ ਦਸ੍ਸੇਨ੍ਤਾਵ ਉਪ੍ਪਜ੍ਜਨ੍ਤੀਤਿ ਪਮਾਣਕਰਣਾ ਨਾਮ ਵੁਤ੍ਤਾ.

ਯਾਵਤਾ ਖੋ ਭਨ੍ਤੇ ਅਪ੍ਪਮਾਣਾ ਚੇਤੋਵਿਮੁਤ੍ਤਿਯੋਤਿ ਯਤ੍ਤਕਾ ਅਪ੍ਪਮਾਣਾ ਚੇਤੋਵਿਮੁਤ੍ਤਿਯੋ. ਕਿਤ੍ਤਕਾ ਪਨ ਤਾ? ਚਤ੍ਤਾਰੋ ਬ੍ਰਹ੍ਮਵਿਹਾਰਾ, ਚਤ੍ਤਾਰੋ ਮਗ੍ਗਾ, ਚਤ੍ਤਾਰਿ ਫਲਾਨੀਤਿ ਦ੍ਵਾਦਸ. ਤਤ੍ਰ ਬ੍ਰਹ੍ਮਵਿਹਾਰਾ ਫਰਣਅਪ੍ਪਮਾਣਤਾਯ ਅਪ੍ਪਮਾਣਾ, ਸੇਸਾ ਪਮਾਣਕਾਰਕਾਨਂ ਕਿਲੇਸਾਨਂ ਅਭਾਵੇਨ ਨਿਬ੍ਬਾਨਮ੍ਪਿ ਅਪ੍ਪਮਾਣਮੇਵ, ਚੇਤੋਵਿਮੁਤ੍ਤਿ ਪਨ ਨ ਹੋਤਿ, ਤਸ੍ਮਾ ਨ ਗਹਿਤਂ. ਅਕੁਪ੍ਪਾਤਿ ਅਰਹਤ੍ਤਫਲਚੇਤੋਵਿਮੁਤ੍ਤਿ. ਸਾ ਹਿ ਤਾਸਂ ਸਬ੍ਬਜੇਟ੍ਠਿਕਾ, ਤਸ੍ਮਾ ‘‘ਅਗ੍ਗਮਕ੍ਖਾਯਤੀ’’ਤਿ ਵੁਤ੍ਤਾ. ਰਾਗੋ ਖੋ ਭਨ੍ਤੇ ਕਿਞ੍ਚਨਨ੍ਤਿ ਰਾਗੋ ਉਪ੍ਪਜ੍ਜਿਤ੍ਵਾ ਪੁਗ੍ਗਲਂ ਕਿਞ੍ਚਤਿ ਮਦ੍ਦਤਿ ਪਲਿਬੁਨ੍ਧਤਿ, ਤਸ੍ਮਾ ਕਿਞ੍ਚਨਨ੍ਤਿ ਵੁਤ੍ਤੋ. ਮਨੁਸ੍ਸਾ ਕਿਰ ਗੋਣੇਹਿ ਖਲਂ ਮਦ੍ਦਾਪੇਨ੍ਤਾ ‘‘ਕਿਞ੍ਚੇਹਿ ਕਪਿਲ ਕਿਞ੍ਚੇਹਿ ਕਾਲ਼ਕਾ’’ਤਿ ਵਦਨ੍ਤਿ. ਏਵਂ ਮਦ੍ਦਨਟ੍ਠੋ ਕਿਞ੍ਚਨਟ੍ਠੋਤਿ ਵੇਦਿਤਬ੍ਬੋ. ਦੋਸਮੋਹੇਸੁਪਿਏਸੇਵ ਨਯੋ.

ਆਕਿਞ੍ਚਞ੍ਞਾ ਚੇਤੋਵਿਮੁਤ੍ਤਿਯੋ ਨਾਮ ਨਵ ਧਮ੍ਮਾ ਆਕਿਞ੍ਚਞ੍ਞਾਯਤਨਂ ਮਗ੍ਗਫਲਾਨਿ ਚ. ਤਤ੍ਥ ਆਕਿਞ੍ਚਞ੍ਞਾਯਤਨਂ ਕਿਞ੍ਚਨਂ ਆਰਮ੍ਮਣਂ ਅਸ੍ਸ ਨਤ੍ਥੀਤਿ ਆਕਿਞ੍ਚਞ੍ਞਂ. ਮਗ੍ਗਫਲਾਨਿ ਕਿਞ੍ਚਨਾਨਂ ਮਦ੍ਦਨਪਲਿਬੁਨ੍ਧਨਕਿਲੇਸਾਨਂ ਨਤ੍ਥਿਤਾਯ ਆਕਿਞ੍ਚਞ੍ਞਾਨਿ, ਨਿਬ੍ਬਾਨਮ੍ਪਿ ਆਕਿਞ੍ਚਞ੍ਞਂ, ਚੇਤੋਵਿਮੁਤ੍ਤਿ ਪਨ ਨ ਹੋਤਿ, ਤਸ੍ਮਾ ਨ ਗਹਿਤਂ.

ਰਾਗੋ ਖੋ ਭਨ੍ਤੇ ਨਿਮਿਤ੍ਤਕਰਣੋਤਿਆਦੀਸੁ ਯਥਾ ਨਾਮ ਦ੍ਵਿਨ੍ਨਂ ਕੁਲਾਨਂ ਸਦਿਸਾ ਦ੍ਵੇ ਵਚ੍ਛਕਾ ਹੋਨ੍ਤਿ. ਯਾਵ ਤੇਸਂ ਲਕ੍ਖਣਂ ਨ ਕਤਂ ਹੋਤਿ, ਤਾਵ ‘‘ਅਯਂ ਅਸੁਕਕੁਲਸ੍ਸ ਵਚ੍ਛਕੋ, ਅਯਂ ਅਸੁਕਕੁਲਸ੍ਸਾ’’ਤਿ ਨ ਸਕ੍ਕਾ ਹੋਤਿ ਜਾਨਿਤੁਂ. ਯਦਾ ਪਨ ਤੇਸਂ ਤਿਸੂਲਾਦੀਸੁ ਅਞ੍ਞਤਰਂ ਲਕ੍ਖਣਂ ਕਤਂ ਹੋਤਿ, ਤਦਾ ਸਕ੍ਕਾ ਹੋਤਿ ਜਾਨਿਤੁਂ. ਏਵਮੇਵ ਯਾਵ ਪੁਗ੍ਗਲਸ੍ਸ ਰਾਗੋ ਨੁਪ੍ਪਜ੍ਜਤਿ, ਤਾਵ ਨ ਸਕ੍ਕਾ ਹੋਤਿ ਜਾਨਿਤੁਂ ‘‘ਅਰਿਯੋ ਵਾ ਪੁਥੁਜ੍ਜਨੋ ਵਾ’’ਤਿ. ਰਾਗੋ ਪਨਸ੍ਸ ਉਪ੍ਪਜ੍ਜਮਾਨੋਵ ‘‘ਸਰਾਗੋ ਨਾਮ ਅਯਂ ਪੁਗ੍ਗਲੋ’’ਤਿ ਸਞ੍ਜਾਨਨਨਿਮਿਤ੍ਤਂ ਕਰੋਨ੍ਤੋ ਵਿਯ ਉਪ੍ਪਜ੍ਜਤਿ, ਤਸ੍ਮਾ ਨਿਮਿਤ੍ਤਕਰਣੋਤਿ ਵੁਤ੍ਤੋ. ਦੋਸਮੋਹੇਸੁਪਿ ਏਸੇਵ ਨਯੋ.

ਅਨਿਮਿਤ੍ਤਾ ਚੇਤੋਵਿਮੁਤ੍ਤਿਯੋ ਨਾਮ ਤੇਰਸ ਧਮ੍ਮਾ ਵਿਪਸ੍ਸਨਾ, ਚਤ੍ਤਾਰੋ ਆਰੁਪ੍ਪਾ, ਚਤ੍ਤਾਰੋ ਮਗ੍ਗਾ, ਚਤ੍ਤਾਰਿ ਫਲਾਨਿ. ਤਤ੍ਥ ਵਿਪਸ੍ਸਨਾ ਨਿਚ੍ਚਨਿਮਿਤ੍ਤਂ ਸੁਖਨਿਮਿਤ੍ਤਂ ਅਤ੍ਤਨਿਮਿਤ੍ਤਂ ਉਗ੍ਘਾਟੇਤੀਤਿ ਅਨਿਮਿਤ੍ਤਾ ਨਾਮ. ਚਤ੍ਤਾਰੋ ਆਰੁਪ੍ਪਾ ਰੂਪਨਿਮਿਤ੍ਤਸ੍ਸ ਅਭਾਵਾ ਅਨਿਮਿਤ੍ਤਾ ਨਾਮ. ਮਗ੍ਗਫਲਾਨਿ ਨਿਮਿਤ੍ਤਕਰਾਨਂ ਕਿਲੇਸਾਨਂ ਅਭਾਵੇਨ ਅਨਿਮਿਤ੍ਤਾਨਿ, ਨਿਬ੍ਬਾਨਮ੍ਪਿ ਅਨਿਮਿਤ੍ਤਮੇਵ, ਤਂ ਪਨ ਚੇਤੋਵਿਮੁਤ੍ਤਿ ਨ ਹੋਤਿ, ਤਸ੍ਮਾ ਨ ਗਹਿਤਂ. ਅਥ ਕਸ੍ਮਾ ਸੁਞ੍ਞਤਾ ਚੇਤੋਵਿਮੁਤ੍ਤਿ ਨ ਗਹਿਤਾਤਿ? ਸਾ ‘‘ਸੁਞ੍ਞਾ ਰਾਗੇਨਾ’’ਤਿਆਦਿਵਚਨਤੋ ਸਬ੍ਬਤ੍ਥ ਅਨੁਪਵਿਟ੍ਠਾਵ, ਤਸ੍ਮਾ ਵਿਸੁਂ ਨ ਗਹਿਤਾਤਿ.

ਏਕਤ੍ਥਾਤਿ ਆਰਮ੍ਮਣਵਸੇਨ ਏਕਤ੍ਥਾ ‘‘ਅਪ੍ਪਮਾਣਂ ਆਕਿਞ੍ਚਞ੍ਞਂ ਸੁਞ੍ਞਤਂ ਅਨਿਮਿਤ੍ਤ’’ਨ੍ਤਿ ਹਿ ਸਬ੍ਬਾਨੇਤਾਨਿ ਨਿਬ੍ਬਾਨਸ੍ਸੇਵ ਨਾਮਾਨਿ. ਇਤਿ ਇਮਿਨਾ ਪਰਿਯਾਯੇਨ ਏਕਤ੍ਥਾ. ਅਞ੍ਞਸ੍ਮਿਂ ਪਨ ਠਾਨੇ ਅਪ੍ਪਮਾਣਾਪਿ ਹੋਤਿ, ਅਞ੍ਞਸ੍ਮਿਂ ਆਕਿਞ੍ਚਞ੍ਞਾ, ਅਞ੍ਞਸ੍ਮਿਂ ਸੁਞ੍ਞਤਾ, ਅਞ੍ਞਸ੍ਮਿਂ ਅਨਿਮਿਤ੍ਤਾਤਿ ਇਮਿਨਾ ਪਰਿਯਾਯੇਨ ਨਾਨਾਬ੍ਯਞ੍ਜਨਾਤਿ.

੮. ਨਿਗਣ੍ਠਨਾਟਪੁਤ੍ਤਸੁਤ੍ਤਵਣ੍ਣਨਾ

੩੫੦. ਅਟ੍ਠਮੇ ਤੇਨੁਪਸਙ੍ਕਮੀਤਿ ਸਯਂ ਆਗਤਾਗਮੋ ਵਿਞ੍ਞਾਤਸਾਸਨੋ ਅਨਾਗਾਮੀ ਅਰਿਯਸਾਵਕੋ ਸਮਾਨੋ ਕਸ੍ਮਾ ਨਗ੍ਗਭੋਗ੍ਗਂ ਨਿਸ੍ਸਿਰਿਕਂ ਨਿਗਣ੍ਠਂ ਉਪਸਙ੍ਕਮੀਤਿ? ਉਪਵਾਦਮੋਚਨਤ੍ਥਞ੍ਚੇਵ ਵਾਦਾਰੋਪਨਤ੍ਥਞ੍ਚ. ਨਿਗਣ੍ਠਾ ਕਿਰ ‘‘ਸਮਣਸ੍ਸ ਗੋਤਮਸ੍ਸ ਸਾਵਕਾ ਥਦ੍ਧਖਦਿਰਖਾਣੁਕਸਦਿਸਾ, ਕੇਨਚਿ ਸਦ੍ਧਿਂ ਪਟਿਸਨ੍ਥਾਰਮ੍ਪਿ ਨ ਕਰੋਨ੍ਤੀ’’ਤਿ ਉਪਵਦਨ੍ਤਿ, ਤਸ੍ਸ ਉਪਵਾਦਸ੍ਸ ਮੋਚਨਤ੍ਥਞ੍ਚ, ‘‘ਵਾਦਞ੍ਚਸ੍ਸ ਆਰੋਪੇਸ੍ਸਾਮੀ’’ਤਿ ਉਪਸਙ੍ਕਮਿ. ਨ ਖ੍ਵਾਹਂ ਏਤ੍ਥ ਭਨ੍ਤੇ ਭਗਵਤੋ ਸਦ੍ਧਾਯ ਗਚ੍ਛਾਮੀਤਿ ਯਸ੍ਸ ਞਾਣੇਨ ਅਸਚ੍ਛਿਕਤਂ ਹੋਤਿ. ਸੋ ‘‘ਏਵਂ ਕਿਰੇਤ’’ਨ੍ਤਿ ਅਞ੍ਞਸ੍ਸ ਸਦ੍ਧਾਯ ਗਚ੍ਛੇਯ੍ਯ, ਮਯਾ ਪਨ ਞਾਣੇਨੇਤਂ ਸਚ੍ਛਿਕਤਂ, ਤਸ੍ਮਾ ਨਾਹਂ ਏਤ੍ਥ ਭਗਵਤੋ ਸਦ੍ਧਾਯ ਗਚ੍ਛਾਮੀਤਿ ਦੀਪੇਨ੍ਤੋ ਏਵਮਾਹ.

ਉਲ੍ਲੋਕੇਤ੍ਵਾਤਿ ਕਾਯਂ ਉਨ੍ਨਾਮੇਤ੍ਵਾ ਕੁਚ੍ਛਿਂ ਨੀਹਰਿਤ੍ਵਾ ਗੀਵਂ ਪਗ੍ਗਯ੍ਹ ਸਬ੍ਬਂ ਦਿਸਂ ਪੇਕ੍ਖਮਾਨੋ ਉਲ੍ਲੋਕੇਤ੍ਵਾ. ਬਾਧੇਤਬ੍ਬਂ ਮਞ੍ਞੇਯ੍ਯਾਤਿ ਯਥਾ ਵਿਨਿਵਿਜ੍ਝਿਤ੍ਵਾ ਨ ਨਿਕ੍ਖਮਤਿ, ਏਵਂ ਪਟਿਬਾਹਿਤਬ੍ਬਂ ਮਞ੍ਞੇਯ੍ਯ ਬਨ੍ਧਿਤਬ੍ਬਂ ਵਾ. ਸਹਧਮ੍ਮਿਕਾਤਿ ਸਕਾਰਣਾ. ਅਥ ਮਂ ਪਟਿਹਰੇਯ੍ਯਾਸਿ ਸਦ੍ਧਿਂ ਨਿਗਣ੍ਠਪਰਿਸਾਯਾਤਿ ਏਤੇਸਂ ਅਤ੍ਥੇ ਞਾਤੇ ਅਥ ਮੇ ਨਿਗਣ੍ਠਪਰਿਸਾਯ ਸਦ੍ਧਿਂ ਅਭਿਗਚ੍ਛੇਯ੍ਯਾਸਿ, ਪਤੀਹਾਰਸ੍ਸ ਮੇ ਸਨ੍ਤਿਕਂ ਆਗਨ੍ਤ੍ਵਾ ਅਤ੍ਤਨੋ ਆਗਤਭਾਵਂ ਜਾਨਾਪੇਯ੍ਯਾਸੀਤਿ ਅਤ੍ਥੋ. ਏਕੋ ਪਞ੍ਹੋਤਿ ਏਕੋ ਪਞ੍ਹਮਗ੍ਗੋ, ਏਕਂ ਪਞ੍ਹਗਵੇਸਨਨ੍ਤਿ ਅਤ੍ਥੋ. ਏਕੋ ਉਦ੍ਦੇਸੋਤਿ ਏਕਂ ਨਾਮ ਕਿਨ੍ਤਿ? ਅਯਂ ਏਕੋ ਉਦ੍ਦੇਸੋ. ਏਕਂ ਵੇਯ੍ਯਾਕਰਣਨ੍ਤਿ ‘‘ਸਬ੍ਬੇ ਸਤ੍ਤਾ ਆਹਾਰਟ੍ਠਿਤਿਕਾ’’ਤਿ (ਖੁ. ਪਾ. ੪.੧; ਅ. ਨਿ. ੧੦.੨੭) ਇਦਂ ਏਕਂ ਵੇਯ੍ਯਾਕਰਣਂ. ਏਵਂ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ.

੯. ਅਚੇਲਕਸ੍ਸਪਸੁਤ੍ਤਵਣ੍ਣਨਾ

੩੫੧. ਨਵਮੇ ਕੀਵਚਿਰਂ ਪਬ੍ਬਜਿਤਸ੍ਸਾਤਿ ਕੀਵਚਿਰੋ ਕਾਲੋ ਪਬ੍ਬਜਿਤਸ੍ਸਾਤਿ ਅਤ੍ਥੋ. ਉਤ੍ਤਰਿ ਮਨੁਸ੍ਸਧਮ੍ਮਾਤਿ ਮਨੁਸ੍ਸਧਮ੍ਮੋ ਨਾਮ ਦਸਕੁਸਲਕਮ੍ਮਪਥਾ, ਤਤੋ ਮਨੁਸ੍ਸਧਮ੍ਮਤੋ ਉਤ੍ਤਰਿ. ਅਲਮਰਿਯਞਾਣਦਸ੍ਸਨਵਿਸੇਸੋਤਿ ਅਰਿਯਭਾਵਂ ਕਾਤੁਂ ਸਮਤ੍ਥਤਾਯ ਅਲਮਰਿਯੋਤਿ ਸਙ੍ਖਾਤੋ ਞਾਣਦਸ੍ਸਨਵਿਸੇਸੋ. ਨਗ੍ਗੇਯ੍ਯਾਤਿ ਨਗ੍ਗਭਾਵਤੋ. ਮੁਣ੍ਡੇਯ੍ਯਾਤਿ ਮੁਣ੍ਡਭਾਵਤੋ. ਪਵਾਲ਼ਨਿਪ੍ਫੋਟਨਾਯਾਤਿ ਪਾਵਲ਼ਨਿਪ੍ਫੋਟਨਤੋ, ਭੂਮਿਯਂ ਨਿਸੀਦਨ੍ਤਸ੍ਸ ਆਨਿਸਦਟ੍ਠਾਨੇ ਲਗ੍ਗਾਨਂ ਪਂਸੁਰਜਵਾਲਿਕਾਨਂ ਫੋਟਨਤ੍ਥਂ ਗਹਿਤਮੋਰਪਿਞ੍ਛਮਤ੍ਤਤੋਤਿ ਅਤ੍ਥੋ.

੧੦. ਗਿਲਾਨਦਸ੍ਸਨਸੁਤ੍ਤਵਣ੍ਣਨਾ

੩੫੨. ਦਸਮੇ ਆਰਾਮਦੇਵਤਾਤਿ ਪੁਪ੍ਫਾਰਾਮਫਲਾਰਾਮੇਸੁ ਅਧਿਵਤ੍ਥਾ ਦੇਵਤਾ. ਵਨਦੇਵਤਾਤਿ ਵਨਸਣ੍ਡੇਸੁ ਅਧਿਵਤ੍ਥਾ ਦੇਵਤਾ. ਰੁਕ੍ਖਦੇਵਤਾਤਿ ਮਤ੍ਤਰਾਜਕਾਲੇ ਵੇਸ੍ਸਵਣੋ ਚ ਦੇਵਤਾਤਿ ਏਵਂ ਤੇਸੁ ਤੇਸੁ ਰੁਕ੍ਖੇਸੁ ਅਧਿਵਤ੍ਥਾ ਦੇਵਤਾ. ਓਸਧਿਤਿਣਵਨਪ੍ਪਤੀਸੂਤਿ ਹਰੀਤਕਾਮਲਕੀਆਦੀਸੁ ਮੁਞ੍ਜਪਬ੍ਬਜਾਦੀਸੁ ਵਨਜੇਟ੍ਠਰੁਕ੍ਖੇਸੁ ਚ ਅਧਿਵਤ੍ਥਾ ਦੇਵਤਾ. ਸਂਗਮ੍ਮਾਤਿ ਸਨ੍ਨਿਪਤਿਤ੍ਵਾ. ਸਮਾਗਮ੍ਮਾਤਿ ਤਤੋ ਤਤੋ ਸਮਾਗਨ੍ਤ੍ਵਾ. ਪਣਿਧੇਹੀਤਿ ਪਤ੍ਥਨਾਵਸੇਨ ਠਪੇਹਿ. ਇਜ੍ਝਿਸ੍ਸਤਿ ਸੀਲਵਤੋ ਚੇਤੋਪਣਿਧੀਤਿ ਸਮਿਜ੍ਝਿਸ੍ਸਤਿ ਸੀਲਵਨ੍ਤਸ੍ਸ ਚਿਤ੍ਤਪਤ੍ਥਨਾ. ਧਮ੍ਮਿਕੋਤਿ ਦਸਕੁਸਲਧਮ੍ਮਸਮਨ੍ਨਾਗਤੋ ਅਗਤਿਗਮਨਰਹਿਤੋ. ਧਮ੍ਮਰਾਜਾਤਿ ਤਸ੍ਸੇਵ ਵੇਵਚਨਂ, ਧਮ੍ਮੇਨ ਵਾ ਲਦ੍ਧਰਜ੍ਜਤ੍ਤਾ ਧਮ੍ਮਰਾਜਾ. ਤਸ੍ਮਾਤਿ ‘‘ਯਸ੍ਮਾ ਤੇਨ ਹਿ, ਅਯ੍ਯਪੁਤ੍ਤ, ਅਮ੍ਹੇਪਿ ਓਵਦਾਹੀ’’ਤਿ ਵਦਥ, ਤਸ੍ਮਾ. ਅਪ੍ਪਟਿਵਿਭਤ੍ਤਨ੍ਤਿ ‘‘ਇਦਂ ਭਿਕ੍ਖੂਨਂ ਦਸ੍ਸਾਮ, ਇਦਂ ਅਤ੍ਤਨਾ ਭੁਞ੍ਜਿਸ੍ਸਾਮਾ’’ਤਿ ਏਵਂ ਅਵਿਭਤ੍ਤਂ ਭਿਕ੍ਖੂਹਿ ਸਦ੍ਧਿਂ ਸਾਧਾਰਣਮੇਵ ਭਵਿਸ੍ਸਤੀਤਿ.

ਚਿਤ੍ਤਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.