੧. ਰਹੋਗਤਸੁਤ੍ਤਵਣ੍ਣਨਾ

੨੫੯. ਰਹੋਗਤਵਗ੍ਗਸ੍ਸ ਪਠਮੇ ਯਂ ਕਿਞ੍ਚਿ ਵੇਦਯਿਤਂ, ਤਂ ਦੁਕ੍ਖਸ੍ਮਿਨ੍ਤਿ ਯਂ ਕਿਞ੍ਚਿ ਵੇਦਯਿਤਂ, ਤਂ ਸਬ੍ਬਂ ਦੁਕ੍ਖਨ੍ਤਿ ਅਤ੍ਥੋ. ਸਙ੍ਖਾਰਾਨਂਯੇਵ ਅਨਿਚ੍ਚਤਨ੍ਤਿਆਦੀਸੁ ਯਾ ਏਸਾ ਸਙ੍ਖਾਰਾਨਂ ਅਨਿਚ੍ਚਤਾ ਖਯਧਮ੍ਮਤਾ ਵਯਧਮ੍ਮਤਾ ਵਿਪਰਿਣਾਮਧਮ੍ਮਤਾ, ਏਤਂ ਸਨ੍ਧਾਯ ਯਂ ਕਿਞ੍ਚਿ ਵੇਦਯਿਤਂ, ਤਂ ਦੁਕ੍ਖਨ੍ਤਿ ਮਯਾ ਭਾਸਿਤਨ੍ਤਿ ਦੀਪੇਤਿ. ਯਾ ਹਿ ਸਙ੍ਖਾਰਾਨਂ ਅਨਿਚ੍ਚਤਾ, ਵੇਦਨਾਨਮ੍ਪਿ ਸਾ ਅਨਿਚ੍ਚਤਾ ਏਵ. ਅਨਿਚ੍ਚਤਾ ਚ ਨਾਮੇਸਾ ਮਰਣਂ, ਮਰਣਤੋ ਉਤ੍ਤਰਿ ਦੁਕ੍ਖਂ ਨਾਮ ਨਤ੍ਥੀਤਿ ਇਮਿਨਾ ਅਧਿਪ੍ਪਾਯੇਨ ਸਬ੍ਬਾ ਵੇਦਨਾ ਦੁਕ੍ਖਾਤਿ ਵੁਤ੍ਤਾ. ਅਥ ਖੋ ਪਨ ਭਿਕ੍ਖੁ ਮਯਾਤਿ ਇਦਂ ਨ ਕੇਵਲਂ ਅਹਂ ਵੇਦਨਾਨਂਯੇਵ ਨਿਰੋਧਂ ਪਞ੍ਞਾਪੇਮਿ, ਇਮੇਸਮ੍ਪਿ ਧਮ੍ਮਾਨਂ ਨਿਰੋਧਂ ਪਞ੍ਞਾਪੇਮੀਤਿ ਦਸ੍ਸਨਤ੍ਥਂ ਆਰਦ੍ਧਂ. ਵੂਪਸਮੋ ਚ ਪਸ੍ਸਦ੍ਧਿਯੋ ਚ ਏਵਰੂਪਾਯ ਦੇਸਨਾਯ ਬੁਜ੍ਝਨਕਾਨਂ ਅਜ੍ਝਾਸਯੇਨ ਵੁਤ੍ਤਾ. ਸਞ੍ਞਾਵੇਦਯਿਤਨਿਰੋਧਗ੍ਗਹਣੇਨ ਚੇਤ੍ਥ ਚਤ੍ਤਾਰੋ ਆਰੁਪ੍ਪਾ ਗਹਿਤਾਵ ਹੋਨ੍ਤੀਤਿ ਵੇਦਿਤਬ੍ਬਾ.