੬. ਆਦਿਤ੍ਤਸੁਤ੍ਤਵਣ੍ਣਨਾ

੨੮. ਛਟ੍ਠੇ ਗਯਾਸੀਸੇਤਿ ਗਯਾਗਾਮਸ੍ਸ ਹਿ ਅਵਿਦੂਰੇ ਗਯਾਤਿ ਏਕਾ ਪੋਕ੍ਖਰਣੀਪਿ ਅਤ੍ਥਿ ਨਦੀਪਿ, ਗਯਾਸੀਸਨਾਮਕੋ ਹਤ੍ਥਿਕੁਮ੍ਭਸਦਿਸੋ ਪਿਟ੍ਠਿਪਾਸਾਣੋਪਿ, ਯਤ੍ਥ ਭਿਕ੍ਖੁਸਹਸ੍ਸਸ੍ਸਪਿ ਓਕਾਸੋ ਪਹੋਤਿ, ਭਗਵਾ ਤਤ੍ਥ ਵਿਹਰਤਿ. ਤੇਨ ਵੁਤ੍ਤਂ ‘‘ਗਯਾਸੀਸੇ’’ਤਿ. ਭਿਕ੍ਖੂ ਆਮਨ੍ਤੇਸੀਤਿ ਤੇਸਂ ਸਪ੍ਪਾਯਧਮ੍ਮਦੇਸਨਂ ਵਿਚਿਨਿਤ੍ਵਾ ਤਂ ਦੇਸੇਸ੍ਸਾਮੀਤਿ ਆਮਨ੍ਤੇਸਿ.

ਤਤ੍ਰਾਯਂ ਅਨੁਪੁਬ੍ਬਿਕਥਾ – ਇਤੋ ਕਿਰ ਦ੍ਵਾਨਵੁਤਿਕਪ੍ਪੇ ਮਹਿਨ੍ਦੋ ਨਾਮ ਰਾਜਾ ਅਹੋਸਿ. ਤਸ੍ਸ ਜੇਟ੍ਠਪੁਤ੍ਤੋ ਫੁਸ੍ਸੋ ਨਾਮ. ਸੋ ਪੂਰਿਤਪਾਰਮੀ ਪਚ੍ਛਿਮਭਵਿਕਸਤ੍ਤੋ, ਪਰਿਪਾਕਗਤੇ ਞਾਣੇ ਬੋਧਿਮਣ੍ਡਂ ਆਰੁਯ੍ਹ ਸਬ੍ਬਞ੍ਞੁਤਂ ਪਟਿਵਿਜ੍ਝਿ. ਰਞ੍ਞੋ ਕਨਿਟ੍ਠਪੁਤ੍ਤੋ ਤਸ੍ਸ ਅਗ੍ਗਸਾਵਕੋ ਅਹੋਸਿ, ਪੁਰੋਹਿਤਪੁਤ੍ਤੋ ਦੁਤਿਯਸਾਵਕੋ. ਰਾਜਾ ਚਿਨ੍ਤੇਸਿ – ‘‘ਮਯ੍ਹਂ ਜੇਟ੍ਠਪੁਤ੍ਤੋ ਨਿਕ੍ਖਮਿਤ੍ਵਾ ਬੁਦ੍ਧੋ ਜਾਤੋ, ਕਨਿਟ੍ਠਪੁਤ੍ਤੋ ਅਗ੍ਗਸਾਵਕੋ, ਪੁਰੋਹਿਤਪੁਤ੍ਤੋ ਦੁਤਿਯਸਾਵਕੋ’’ਤਿ. ਸੋ ‘‘ਅਮ੍ਹਾਕਂਯੇਵ ਬੁਦ੍ਧੋ, ਅਮ੍ਹਾਕਂ ਧਮ੍ਮੋ, ਅਮ੍ਹਾਕਂ ਸਙ੍ਘੋ’’ਤਿ ਵਿਹਾਰਂ ਕਾਰੇਤ੍ਵਾ ਵਿਹਾਰਦ੍ਵਾਰਕੋਟ੍ਠਕਤੋ ਯਾਵ ਅਤ੍ਤਨੋ ਘਰਦ੍ਵਾਰਾ ਉਭਤੋ ਵੇਲ਼ੁਭਿਤ੍ਤਿਕੁਟਿਕਾਹਿ ਪਰਿਕ੍ਖਿਪਿਤ੍ਵਾ ਮਤ੍ਥਕੇ ਸੁਵਣ੍ਣਤਾਰਕਖਚਿਤਸਮੋਸਰਿਤਗਨ੍ਧਦਾਮਮਾਲਾਦਾਮਵਿਤਾਨਂ ਬਨ੍ਧਾਪੇਤ੍ਵਾ ਹੇਟ੍ਠਾ ਰਜਤਵਣ੍ਣਂ ਵਾਲੁਕਂ ਸਨ੍ਥਰਿਤ੍ਵਾ ਪੁਪ੍ਫਾਨਿ ਵਿਕਿਰਾਪੇਤ੍ਵਾ ਤੇਨ ਮਗ੍ਗੇਨ ਭਗਵਤੋ ਆਗਮਨਂ ਕਾਰੇਸਿ.

ਸਤ੍ਥਾ ਵਿਹਾਰਸ੍ਮਿਂਯੇਵ ਠਿਤੋ ਚੀਵਰਂ ਪਾਰੁਪਿਤ੍ਵਾ ਅਨ੍ਤੋਸਾਣਿਯਾਵ ਸਦ੍ਧਿਂ ਭਿਕ੍ਖੁਸਙ੍ਘੇਨ ਰਾਜਗੇਹਂ ਆਗਚ੍ਛਤਿ, ਕਤਭਤ੍ਤਕਿਚ੍ਚੋ ਅਨ੍ਤੋਸਾਣਿਯਾਵ ਗਚ੍ਛਤਿ. ਕੋਚਿ ਕਟਚ੍ਛੁਭਿਕ੍ਖਾਮਤ੍ਤਮ੍ਪਿ ਦਾਤੁਂ ਨ ਲਭਤਿ. ਤਤੋ ਨਾਗਰਾ ਉਜ੍ਝਾਯਿਂਸੁ, ‘‘ਬੁਦ੍ਧੋ ਲੋਕੇ ਉਪ੍ਪਨ੍ਨੋ, ਨ ਚ ਮਯਂ ਪੁਞ੍ਞਾਨਿ ਕਾਤੁਂ ਲਭਾਮ. ਯਥਾ ਹਿ ਚਨ੍ਦਿਮਸੂਰਿਯਾ ਸਬ੍ਬੇਸਂ ਆਲੋਕਂ ਕਰੋਨ੍ਤਿ, ਏਵਂ ਬੁਦ੍ਧਾ ਨਾਮ ਸਬ੍ਬੇਸਂ ਹਿਤਤ੍ਥਾਯ ਉਪ੍ਪਜ੍ਜਨ੍ਤਿ, ਅਯਂ ਪਨ ਰਾਜਾ ਸਬ੍ਬੇਸਂ ਪੁਞ੍ਞਚੇਤਨਂ ਅਤ੍ਤਨੋਯੇਵ ਅਨ੍ਤੋ ਪਵੇਸੇਤੀ’’ਤਿ.

ਤਸ੍ਸ ਚ ਰਞ੍ਞੋ ਅਞ੍ਞੇ ਤਯੋ ਪੁਤ੍ਤਾ ਅਤ੍ਥਿ. ਨਾਗਰਾ ਤੇਹਿ ਸਦ੍ਧਿਂ ਏਕਤੋ ਹੁਤ੍ਵਾ ਸਮ੍ਮਨ੍ਤਯਿਂਸੁ, ‘‘ਰਾਜਕੁਲੇਹਿ ਸਦ੍ਧਿਂ ਅਟ੍ਟੋ ਨਾਮ ਨਤ੍ਥਿ, ਏਕਂ ਉਪਾਯਂ ਕਰੋਮਾ’’ਤਿ. ਤੇ ਪਚ੍ਚਨ੍ਤੇ ਚੋਰੇ ਉਟ੍ਠਾਪੇਤ੍ਵਾ, ‘‘ਕਤਿਪਯਾ ਗਾਮਾ ਪਹਟਾ’’ਤਿ ਸਾਸਨਂ ਆਹਰਾਪੇਤ੍ਵਾ ਰਞ੍ਞੋ ਆਰੋਚਯਿਂਸੁ. ਰਾਜਾ ਪੁਤ੍ਤੇ ਪਕ੍ਕੋਸਾਪੇਤ੍ਵਾ‘‘ਤਾਤਾ, ਅਹਂ ਮਹਲ੍ਲਕੋ, ਗਚ੍ਛਥ ਚੋਰੇ ਵੂਪਸਮੇਥਾ’’ਤਿ ਪੇਸੇਸਿ. ਪਯੁਤ੍ਤਚੋਰਾ ਇਤੋ ਚਿਤੋ ਚ ਅਵਿਪ੍ਪਕਿਰਿਤ੍ਵਾ ਤੇਸਂ ਸਨ੍ਤਿਕਮੇਵ ਆਗਚ੍ਛਿਂਸੁ. ਤੇ ਅਨਾਵਾਸੇ ਗਾਮੇ ਵਾਸੇਤ੍ਵਾ ‘‘ਵੂਪਸਮਿਤਾ ਚੋਰਾ’’ਤਿ ਆਗਨ੍ਤ੍ਵਾ ਰਾਜਾਨਂ ਵਨ੍ਦਿਤ੍ਵਾ ਅਟ੍ਠਂਸੁ.

ਰਾਜਾ ਤੁਟ੍ਠੋ ‘‘ਤਾਤਾ, ਵਰਂ ਵੋ ਦੇਮੀ’’ਤਿ ਆਹ. ਤੇ ਅਧਿਵਾਸੇਤ੍ਵਾ ਗਨ੍ਤ੍ਵਾ ਨਾਗਰੇਹਿ ਸਦ੍ਧਿਂ ਮਨ੍ਤਯਿਂਸੁ, ‘‘ਰਞ੍ਞਾ ਅਮ੍ਹਾਕਂ ਵਰੋ ਦਿਨ੍ਨੋ. ਕਿਂ ਗਣ੍ਹਾਮਾ’’ਤਿ? ਅਯ੍ਯਪੁਤ੍ਤਾ, ਤੁਮ੍ਹਾਕਂ ਹਤ੍ਥਿਅਸ੍ਸਾਦਯੋ ਨ ਦੁਲ੍ਲਭਾ, ਬੁਦ੍ਧਰਤਨਂ ਪਨ ਦੁਲ੍ਲਭਂ, ਨ ਸਬ੍ਬਕਾਲਂ ਉਪ੍ਪਜ੍ਜਤਿ, ਤੁਮ੍ਹਾਕਂ ਜੇਟ੍ਠਭਾਤਿਕਸ੍ਸ ਫੁਸ੍ਸਬੁਦ੍ਧਸ੍ਸ ਪਟਿਜਗ੍ਗਨਵਰਂ ਗਣ੍ਹਥਾਤਿ. ਤੇ ‘‘ਏਵਂ ਕਰਿਸ੍ਸਾਮਾ’’ਤਿ ਨਾਗਰਾਨਂ ਪਟਿਸ੍ਸੁਣਿਤ੍ਵਾ ਕਤਮਸ੍ਸੁਕਮ੍ਮਾ ਸੁਨ੍ਹਾਤਾ ਸੁਵਿਲਿਤ੍ਤਾ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ, ‘‘ਦੇਵ, ਨੋ ਵਰਂ ਦੇਥਾ’’ਤਿ ਯਾਚਿਂਸੁ. ਕਿਂ ਗਣ੍ਹਿਸ੍ਸਥ ਤਾਤਾਤਿ? ਦੇਵ, ਅਮ੍ਹਾਕਂ ਹਤ੍ਥਿਅਸ੍ਸਾਦੀਹਿ ਅਤ੍ਥੋ ਨਤ੍ਥਿ, ਜੇਟ੍ਠਭਾਤਿਕਸ੍ਸ ਨੋ ਫੁਸ੍ਸਬੁਦ੍ਧਸ੍ਸ ਪਟਿਜਗ੍ਗਨਵਰਂ ਦੇਥਾਤਿ. ‘‘ਅਯਂ ਵਰੋ ਨ ਸਕ੍ਕਾ ਮਯਾ ਜੀਵਮਾਨੇਨ ਦਾਤੁ’’ਨ੍ਤਿ ਦ੍ਵੇ ਕਣ੍ਣੇ ਪਿਦਹਿ. ‘‘ਦੇਵ, ਨ ਤੁਮ੍ਹੇ ਅਮ੍ਹੇਹਿ ਬਲਕ੍ਕਾਰੇਨ ਵਰਂ ਦਾਪਿਤਾ, ਤੁਮ੍ਹੇਹਿ ਅਤ੍ਤਨੋ ਰੁਚਿਯਾ ਤੁਟ੍ਠੇਹਿ ਦਿਨ੍ਨੋ. ਕਿਂ, ਦੇਵ, ਰਾਜਕੁਲਸ੍ਸ ਦ੍ਵੇ ਕਥਾ ਵਟ੍ਟਨ੍ਤੀ’’ਤਿ? ਸਚ੍ਚਵਾਦਿਤਾਯ ਭਣਿਂਸੁ.

ਰਾਜਾ ਵਿਨਿਵਤ੍ਤਿਤੁਂ ਅਲਭਨ੍ਤੋ – ‘‘ਤਾਤਾ, ਸਤ੍ਤ ਸਂਵਚ੍ਛਰੇ ਸਤ੍ਤ ਮਾਸੇ ਸਤ੍ਤ ਚ ਦਿਵਸੇ ਉਪਟ੍ਠਹਿਤ੍ਵਾ ਤੁਮ੍ਹਾਕਂ ਦਸ੍ਸਾਮੀ’’ਤਿ ਆਹ. ‘‘ਸੁਨ੍ਦਰਂ, ਦੇਵ, ਪਾਟਿਭੋਗਂ ਦੇਥਾ’’ਤਿ. ‘‘ਕਿਸ੍ਸ ਪਾਟਿਭੋਗਂ ਤਾਤਾ’’ਤਿ? ‘‘ਏਤ੍ਤਕਂ ਕਾਲਂ ਅਮਰਣਪਾਟਿਭੋਗਂ ਦੇਵਾ’’ਤਿ. ‘‘ਤਾਤਾ, ਅਯੁਤ੍ਤਂ ਪਾਟਿਭੋਗਂ ਦਾਪੇਥ, ਨ ਸਕ੍ਕਾ ਏਵਂ ਪਾਟਿਭੋਗਂ ਦਾਤੁਂ, ਤਿਣਗ੍ਗੇ ਉਸ੍ਸਾਵਬਿਨ੍ਦੁਸਦਿਸਂ ਸਤ੍ਤਾਨਂ ਜੀਵਿਤ’’ਨ੍ਤਿ. ‘‘ਨੋ ਚੇ, ਦੇਵ, ਪਾਟਿਭੋਗਂ ਦੇਥ, ਮਯਂ ਅਨ੍ਤਰਾ ਮਤਾ ਕਿਂ ਕੁਸਲਂ ਕਰਿਸ੍ਸਾਮਾ’’ਤਿ? ‘‘ਤੇਨ ਹਿ, ਤਾਤਾ, ਛ ਸਂਵਚ੍ਛਰਾਨਿ ਦੇਥਾ’’ਤਿ. ‘‘ਨ ਸਕ੍ਕਾ, ਦੇਵਾ’’ਤਿ. ‘‘ਤੇਨ ਹਿ ਪਞ੍ਚ, ਚਤ੍ਤਾਰਿ, ਤੀਣਿ, ਦ੍ਵੇ, ਏਕਂ ਸਂਵਚ੍ਛਰਂ ਦੇਥ’’. ‘‘ਸਤ੍ਤ, ਛ ਮਾਸੇ ਦੇਥ…ਪੇ… ਮਾਸਡ੍ਢਮਤ੍ਤਂ ਦੇਥਾ’’ਤਿ. ‘‘ਨ ਸਕ੍ਕਾ, ਦੇਵਾ’’ਤਿ. ‘‘ਤੇਨ ਹਿ ਸਤ੍ਤਦਿਵਸਮਤ੍ਤਂ ਦੇਥਾ’’ਤਿ. ‘‘ਸਾਧੁ, ਦੇਵਾਤਿ ਸਤ੍ਤ ਦਿਵਸੇ ਸਮ੍ਪਟਿਚ੍ਛਿਂਸੁ’’. ਰਾਜਾ ਸਤ੍ਤ ਸਂਵਚ੍ਛਰੇ ਸਤ੍ਤ ਮਾਸੇ ਸਤ੍ਤ ਦਿਵਸੇ ਕਤ੍ਤਬ੍ਬਸਕ੍ਕਾਰਂ ਸਤ੍ਤਸੁਯੇਵ ਦਿਵਸੇਸੁ ਅਕਾਸਿ.

ਤਤੋ ਪੁਤ੍ਤਾਨਂ ਵਸਨਟ੍ਠਾਨਂ ਸਤ੍ਥਾਰਂ ਪੇਸੇਤੁਂ ਅਟ੍ਠਉਸਭਵਿਤ੍ਥਤਂ ਮਗ੍ਗਂ ਅਲਙ੍ਕਾਰਾਪੇਸਿ, ਮਜ੍ਝਟ੍ਠਾਨੇ ਚਤੁਉਸਭਪ੍ਪਮਾਣਂ ਪਦੇਸਂ ਹਤ੍ਥੀਹਿ ਮਦ੍ਦਾਪੇਤ੍ਵਾ ਕਸਿਣਮਣ੍ਡਲਸਦਿਸਂ ਕਤ੍ਵਾ ਵਾਲੁਕਾਯ ਸਨ੍ਥਰਾਪੇਤ੍ਵਾ ਪੁਪ੍ਫਾਭਿਕਿਣ੍ਣਮਕਾਸਿ, ਤਤ੍ਥ ਤਤ੍ਥ ਕਦਲਿਯੋ ਚ ਪੁਣ੍ਣਘਟੇ ਚ ਠਪਾਪੇਤ੍ਵਾ ਧਜਪਟਾਕਾ ਉਕ੍ਖਿਪਾਪੇਸਿ. ਉਸਭੇ ਉਸਭੇ ਪੋਕ੍ਖਰਣਿਂ ਖਣਾਪੇਸਿ, ਅਪਰਭਾਗੇ ਦ੍ਵੀਸੁ ਪਸ੍ਸੇਸੁ ਗਨ੍ਧਮਾਲਾਪੁਪ੍ਫਾਪਣੇ ਪਸਾਰਾਪੇਸਿ. ਮਜ੍ਝਟ੍ਠਾਨੇ ਚਤੁਉਸਭਵਿਤ੍ਥਾਰਸ੍ਸ ਅਲਙ੍ਕਤਮਗ੍ਗਸ੍ਸ ਉਭੋਸੁ ਪਸ੍ਸੇਸੁ ਦ੍ਵੇ ਦ੍ਵੇ ਉਸਭਵਿਤ੍ਥਾਰੇ ਮਗ੍ਗੇ ਖਾਣੁਕਣ੍ਟਕੇ ਹਰਾਪੇਤ੍ਵਾ ਦਣ੍ਡਦੀਪਿਕਾਯੋ ਕਾਰਾਪੇਸਿ. ਰਾਜਪੁਤ੍ਤਾਪਿ ਅਤ੍ਤਨੋ ਆਣਾਪਵਤ੍ਤਿਟ੍ਠਾਨੇ ਸੋਲ਼ਸਉਸਭਮਗ੍ਗਂ ਤਥੇਵ ਅਲਙ੍ਕਾਰਾਪੇਸੁਂ.

ਰਾਜਾ ਅਤ੍ਤਨੋ ਆਣਾਪਵਤ੍ਤਿਟ੍ਠਾਨਸ੍ਸ ਕੇਦਾਰਸੀਮਂ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਪਰਿਦੇਵਮਾਨੋ, ‘‘ਤਾਤਾ, ਮਯ੍ਹਂ ਦਕ੍ਖਿਣਕ੍ਖਿਂ ਉਪ੍ਪਾਟੇਤ੍ਵਾ ਗਣ੍ਹਨ੍ਤਾ ਵਿਯ ਗਚ੍ਛਥ, ਏਵਂ ਗਣ੍ਹਿਤ੍ਵਾ ਗਤਾ ਪਨ ਬੁਦ੍ਧਾਨਂ ਅਨੁਚ੍ਛਵਿਕਂ ਕਰੇਯ੍ਯਾਥ. ਮਾ ਸੁਰਾਸੋਣ੍ਡਾ ਵਿਯ ਪਮਤ੍ਤਾ ਵਿਚਰਿਤ੍ਥਾ’’ਤਿ ਆਹ. ਤੇ ‘‘ਜਾਨਿਸ੍ਸਾਮ ਮਯਂ, ਦੇਵਾ’’ਤਿ ਸਤ੍ਥਾਰਂ ਗਹੇਤ੍ਵਾ ਗਤਾ, ਵਿਹਾਰਂ ਕਾਰੇਤ੍ਵਾ ਸਤ੍ਥੁ ਨਿਯ੍ਯਾਤੇਤ੍ਵਾ ਤਤ੍ਥ ਸਤ੍ਥਾਰਂ ਪਟਿਜਗ੍ਗਨ੍ਤਾ ਕਾਲੇਨ ਥੇਰਾਸਨੇ, ਕਾਲੇਨ ਮਜ੍ਝਿਮਾਸਨੇ, ਕਾਲੇਨ ਸਙ੍ਘਨਵਕਾਸਨੇ ਤਿਟ੍ਠਨ੍ਤਿ. ਦਾਨਂ ਉਪਪਰਿਕ੍ਖਮਾਨਾਨਂ ਤਿਣ੍ਣਮ੍ਪਿ ਜਨਾਨਂ ਏਕਸਦਿਸਮੇਵ ਅਹੋਸਿ. ਤੇ ਉਪਕਟ੍ਠਾਯ ਵਸ੍ਸੂਪਨਾਯਿਕਾਯ ਚਿਨ੍ਤਯਿਂਸੁ – ‘‘ਕਥਂ ਨੁ ਖੋ ਸਤ੍ਥੁ ਅਜ੍ਝਾਸਯਂ ਗਣ੍ਹੇਯ੍ਯਾਮਾ’’ਤਿ? ਅਥ ਨੇਸਂ ਏਤਦਹੋਸਿ – ‘‘ਬੁਦ੍ਧਾ ਨਾਮ ਧਮ੍ਮਗਰੁਨੋ, ਨ ਆਮਿਸਗਰੁਨੋ, ਸੀਲੇ ਪਤਿਟ੍ਠਮਾਨਾ ਮਯਂ ਸਤ੍ਥੁ ਅਜ੍ਝਾਸਯਂ ਗਹੇਤੁਂ ਸਕ੍ਖਿਸ੍ਸਾਮਾ’’ਤਿ ਦਾਨਸਂਵਿਧਾਯਕੇ ਮਨੁਸ੍ਸੇ ਪਕ੍ਕੋਸਾਪੇਤ੍ਵਾ, ‘‘ਤਾਤਾ, ਇਮਿਨਾਵ ਨੀਹਾਰੇਨ ਯਾਗੁਭਤ੍ਤਖਾਦਨੀਯਾਦੀਨਿ ਸਮ੍ਪਾਦੇਨ੍ਤਾ ਦਾਨਂ ਪਵਤ੍ਤੇਥਾ’’ਤਿ ਵਤ੍ਵਾ ਦਾਨਸਂਵਿਦਹਨਪਲਿਬੋਧਂ ਛਿਨ੍ਦਿਂਸੁ.

ਅਥ ਨੇਸਂ ਜੇਟ੍ਠਭਾਤਾ ਪਞ੍ਚਸਤੇ ਪੁਰਿਸੇ ਆਦਾਯ ਦਸਸੁ ਸੀਲੇਸੁ ਪਤਿਟ੍ਠਾਯ ਦ੍ਵੇ ਕਾਸਾਯਾਨਿ ਅਚ੍ਛਾਦੇਤ੍ਵਾ ਕਪ੍ਪਿਯਂ ਉਦਕਂ ਪਰਿਭੁਞ੍ਜਮਾਨੋ ਵਾਸਂ ਕਪ੍ਪੇਸਿ. ਮਜ੍ਝਿਮੋ ਤੀਹਿ, ਕਨਿਟ੍ਠੋ ਦ੍ਵੀਹਿ ਪੁਰਿਸਸਤੇਹਿ ਸਦ੍ਧਿਂ ਤਥੇਵ ਪਟਿਪਜ੍ਜਿ. ਤੇ ਯਾਵਜੀਵਂ ਸਤ੍ਥਾਰਂ ਉਪਟ੍ਠਹਿਂਸੁ. ਸਤ੍ਥਾ ਤੇਸਂਯੇਵ ਸਨ੍ਤਿਕੇ ਪਰਿਨਿਬ੍ਬਾਯਿ.

ਤੇਪਿ ਕਾਲਂ ਕਤ੍ਵਾ ਤਤੋ ਪਟ੍ਠਾਯ ਦ੍ਵਾਨਵੁਤਿਕਪ੍ਪੇ ਮਨੁਸ੍ਸਲੋਕਤੋ ਦੇਵਲੋਕਂ, ਦੇਵਲੋਕਤੋ ਚ ਮਨੁਸ੍ਸਲੋਕਂ ਸਂਸਰਨ੍ਤਾ ਅਮ੍ਹਾਕਂ ਸਤ੍ਥੁਕਾਲੇ ਦੇਵਲੋਕਾ ਚਵਿਤ੍ਵਾ ਮਨੁਸ੍ਸਲੋਕੇ ਨਿਬ੍ਬਤ੍ਤਿਂਸੁ. ਤੇਸਂ ਦਾਨਗ੍ਗੇ ਬ੍ਯਾਵਟੋ ਮਹਾਅਮਚ੍ਚੋ ਅਙ੍ਗਮਗਧਾਨਂ ਰਾਜਾ ਬਿਮ੍ਬਿਸਾਰੋ ਹੁਤ੍ਵਾ ਨਿਬ੍ਬਤ੍ਤਿ. ਤੇ ਤਸ੍ਸੇਵ ਰਞ੍ਞੋ ਰਟ੍ਠੇ ਬ੍ਰਾਹ੍ਮਣਮਹਾਸਾਲਕੁਲੇ ਨਿਬ੍ਬਤ੍ਤਿਂਸੁ. ਜੇਟ੍ਠਭਾਤਾ ਜੇਟ੍ਠੋਵ ਜਾਤੋ, ਮਜ੍ਝਿਮਕਨਿਟ੍ਠਾ ਮਜ੍ਝਿਮਕਨਿਟ੍ਠਾਯੇਵ. ਯੇਪਿ ਤੇਸਂ ਪਰਿਵਾਰਮਨੁਸ੍ਸਾ, ਤੇ ਪਰਿਵਾਰਮਨੁਸ੍ਸਾਵ ਜਾਤਾ. ਤੇ ਵੁਦ੍ਧਿਮਨ੍ਵਾਯ ਤਯੋਪਿ ਜਨਾ ਤਂ ਪੁਰਿਸਸਹਸ੍ਸਂ ਆਦਾਯ ਨਿਕ੍ਖਮਿਤ੍ਵਾ ਤਾਪਸਾ ਹੁਤ੍ਵਾ ਉਰੁਵੇਲਾਯਂ ਨਦੀਤੀਰੇਯੇਵ ਵਸਿਂਸੁ. ਅਙ੍ਗਮਗਧਵਾਸਿਨੋ ਮਾਸੇ ਮਾਸੇ ਤੇਸਂ ਮਹਾਸਕ੍ਕਾਰਂ ਅਭਿਹਰਨ੍ਤਿ.

ਅਥ ਅਮ੍ਹਾਕਂ ਬੋਧਿਸਤ੍ਤੋ ਕਤਾਭਿਨਿਕ੍ਖਮਨੋ ਅਨੁਪੁਬ੍ਬੇਨ ਸਬ੍ਬਞ੍ਞੁਤਂ ਪਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੋ ਯਸਾਦਯੋ ਕੁਲਪੁਤ੍ਤੇ ਵਿਨੇਤ੍ਵਾ ਸਟ੍ਠਿ ਅਰਹਨ੍ਤੇ ਧਮ੍ਮਦੇਸਨਤ੍ਥਾਯ ਦਿਸਾਸੁ ਉਯ੍ਯੋਜੇਤ੍ਵਾ ਸਯਂ ਪਤ੍ਤਚੀਵਰਮਾਦਾਯ – ‘‘ਤੇ ਤਯੋ ਜਟਿਲਭਾਤਿਕੇ ਦਮੇਸ੍ਸਾਮੀ’’ਤਿ ਉਰੁਵੇਲਂ ਗਨ੍ਤ੍ਵਾ ਅਨੇਕੇਹਿ ਪਾਟਿਹਾਰਿਯਸਤੇਹਿ ਤੇਸਂ ਦਿਟ੍ਠਿਂ ਭਿਨ੍ਦਿਤ੍ਵਾ ਤੇ ਪਬ੍ਬਾਜੇਸਿ. ਸੋ ਤਂ ਇਦ੍ਧਿਮਯਪਤ੍ਤਚੀਵਰਧਰਂ ਸਮਣਸਹਸ੍ਸਂ ਆਦਾਯ ਗਯਾਸੀਸਂ ਗਨ੍ਤ੍ਵਾ ਤੇਹਿ ਪਰਿਵਾਰਿਤੋ ਨਿਸੀਦਿਤ੍ਵਾ, – ‘‘ਕਤਰਾ ਨੁ ਖੋ ਏਤੇਸਂ ਧਮ੍ਮਕਥਾ ਸਪ੍ਪਾਯਾ’’ਤਿ ਚਿਨ੍ਤੇਨ੍ਤੋ, ‘‘ਇਮੇ ਸਾਯਂਪਾਤਂ ਅਗ੍ਗਿਂ ਪਰਿਚਰਨ੍ਤਿ. ਇਮੇਸਂ ਦ੍ਵਾਦਸਾਯਤਨਾਨਿ ਆਦਿਤ੍ਤਾਨਿ ਸਮ੍ਪਜ੍ਜਲਿਤਾਨਿ ਵਿਯ ਕਤ੍ਵਾ ਦੇਸੇਸ੍ਸਾਮਿ, ਏਵਂ ਇਮੇ ਅਰਹਤ੍ਤਂ ਪਾਪੁਣਿਤੁਂ ਸਕ੍ਖਿਸ੍ਸਨ੍ਤੀ’’ਤਿ ਸਨ੍ਨਿਟ੍ਠਾਨਮਕਾਸਿ. ਅਥ ਨੇਸਂ ਤਥਾ ਧਮ੍ਮਂ ਦੇਸੇਤੁਂ ਇਮਂ ਆਦਿਤ੍ਤਪਰਿਯਾਯਂ ਅਭਾਸਿ. ਤੇਨ ਵੁਤ੍ਤਂ – ‘‘ਭਿਕ੍ਖੂ ਆਮਨ੍ਤੇਸੀਤਿ ਤੇਸਂ ਸਪ੍ਪਾਯਧਮ੍ਮਦੇਸਨਂ ਵਿਚਿਨਿਤ੍ਵਾ ਤਂ ਦੇਸੇਸ੍ਸਾਮੀਤਿ ਆਮਨ੍ਤੇਸੀ’’ਤਿ. ਤਤ੍ਥ ਆਦਿਤ੍ਤਨ੍ਤਿ ਪਦਿਤ੍ਤਂ ਸਮ੍ਪਜ੍ਜਲਿਤਂ. ਸੇਸਂ ਵੁਤ੍ਤਨਯਮੇਵ. ਇਤਿ ਇਮਸ੍ਮਿਂ ਸੁਤ੍ਤੇ ਦੁਕ੍ਖਲਕ੍ਖਣਂ ਕਥਿਤਂ.