੬. ਅਵਸ੍ਸੁਤਪਰਿਯਾਯਸੁਤ੍ਤਵਣ੍ਣਨਾ
੨੪੩. ਛਟ੍ਠੇ ਨਵਂ ਸਨ੍ਥਾਗਾਰਨ੍ਤਿ ਅਧੁਨਾ ਕਾਰਿਤਂ ਸਨ੍ਥਾਗਾਰਂ, ਏਕਾ ਮਹਾਸਾਲਾਤਿ ਅਤ੍ਥੋ. ਉਯ੍ਯੋਗਕਾਲਾਦੀਸੁ ਹਿ ਰਾਜਾਨੋ ਤਤ੍ਥ ਠਤ੍ਵਾ, ‘‘ਏਤ੍ਤਕਾ ਪੁਰਤੋ ਗਚ੍ਛਨ੍ਤੁ, ਏਤ੍ਤਕਾ ਪਚ੍ਛਾ, ਏਤ੍ਤਕਾ ਉਭੋਹਿ ਪਸ੍ਸੇਹਿ, ਏਤ੍ਤਕਾ ਹਤ੍ਥੀ ਅਭਿਰੁਹਨ੍ਤੁ, ਏਤ੍ਤਕਾ ਅਸ੍ਸੇ, ਏਤ੍ਤਕਾ ਰਥੇਸੁ ਤਿਟ੍ਠਨ੍ਤੂ’’ਤਿ ਏਵਂ ਸਨ੍ਥਂ ਕਰੋਨ੍ਤਿ, ਮਰਿਯਾਦਂ ਬਨ੍ਧਨ੍ਤਿ, ਤਸ੍ਮਾ ਤਂ ਠਾਨਂ ਸਨ੍ਥਾਗਾਰਨ੍ਤਿ ਵੁਚ੍ਚਤਿ. ਉਯ੍ਯੋਗਟ੍ਠਾਨਤੋ ਚ ਆਗਨ੍ਤ੍ਵਾ ਯਾਵ ਗੇਹੇਸੁ ਅਲ੍ਲਗੋਮਯਪਰਿਭਣ੍ਡਾਦੀਨਿ ਕਾਰੇਨ੍ਤਿ, ਤਾਵ ਦ੍ਵੇ ਤੀਣਿ ਦਿਵਸਾਨਿ ਤੇ ਰਾਜਾਨੋ ਤਤ੍ਥ ਸਨ੍ਥਰਨ੍ਤੀਤਿਪਿ ਸਨ੍ਥਾਗਾਰਂ. ਤੇਸਂ ਰਾਜੂਨਂ ਸਹ ਅਤ੍ਥਾਨੁਸਾਸਨਂ ਅਗਾਰਨ੍ਤਿਪਿ ਸਨ੍ਥਾਗਾਰਂ. ਗਣਰਾਜਾਨੋ ਹਿ ਤੇ, ਤਸ੍ਮਾ ਉਪ੍ਪਨ੍ਨਂ ਕਿਚ੍ਚਂ ਏਕਸ੍ਸ ਵਸੇਨ ਨ ਛਿਜ੍ਜਤਿ, ਸਬ੍ਬੇਸਂ ਛਨ੍ਦੋਪਿ ਲਦ੍ਧੁਂ ਵਟ੍ਟਤਿ, ਤਸ੍ਮਾ ਸਬ੍ਬੇ ਤਤ੍ਥ ਸਨ੍ਨਿਪਤਿਤ੍ਵਾ ਅਨੁਸਾਸਨ੍ਤਿ. ਤੇਨ ਵੁਤ੍ਤਂ ‘‘ਸਹ ਅਤ੍ਥਾਨੁਸਾਸਨਂ ਅਗਾਰਨ੍ਤਿਪਿ ਸਨ੍ਥਾਗਾਰ’’ਨ੍ਤਿ. ਯਸ੍ਮਾ ਪਨ ਤੇ ਤਤ੍ਥ ਸਨ੍ਨਿਪਤਿਤ੍ਵਾ, ‘‘ਇਮਸ੍ਮਿਂ ਕਾਲੇ ਕਸਿਤੁਂ ਵਟ੍ਟਤਿ, ਇਮਸ੍ਮਿਂ ਕਾਲੇ ਵਪਿਤੁ’’ਨ੍ਤਿ ਏਵਮਾਦਿਨਾ ਨਯੇਨ ਘਰਾਵਾਸਕਿਚ੍ਚਾਨਿ ਸਮ੍ਮਨ੍ਤਯਨ੍ਤਿ, ਤਸ੍ਮਾ ਛਿਦ੍ਦਾਵਛਿਦ੍ਦਂ ਘਰਾਵਾਸਂ ਤਤ੍ਥ ਸਨ੍ਥਰਨ੍ਤੀਤਿਪਿ, ਸਨ੍ਥਾਗਾਰਂ. ਅਚਿਰਕਾਰਿਤਂ ਹੋਤੀਤਿ ਇਟ੍ਠਕਕਮ੍ਮਸੁਧਾਕਮ੍ਮਚਿਤ੍ਤਕਮ੍ਮਾਦਿਵਸੇਨ ਸੁਸਜ੍ਜਿਤਂ ਦੇਵਵਿਮਾਨਂ ਵਿਯ ਅਧੁਨਾ ਨਿਟ੍ਠਾਪਿਤਂ. ਸਮਣੇਨ ਵਾਤਿ ਏਤ੍ਥ ਯਸ੍ਮਾ ਘਰਵਤ੍ਥੁਪਰਿਗ੍ਗਹਣਕਾਲੇਯੇਵ ਦੇਵਤਾ ਅਤ੍ਤਨੋ ਵਸਨਟ੍ਠਾਨਂ ਗਣ੍ਹਨ੍ਤਿ, ਤਸ੍ਮਾ ‘‘ਦੇਵੇਨ ਵਾ’’ਤਿ ਅਵਤ੍ਵਾ, ‘‘ਸਮਣੇਨ ਵਾ ਬ੍ਰਾਹ੍ਮਣੇਨ ਵਾ ਕੇਨਚਿ ਵਾ ਮਨੁਸ੍ਸਭੂਤੇਨਾ’’ਤਿ ਵੁਤ੍ਤਂ.
ਯੇਨ ਭਗਵਾ ਤੇਨੁਪਸਙ੍ਕਮਿਂਸੂਤਿ ਸਨ੍ਥਾਗਾਰਂ ਨਿਟ੍ਠਿਤਨ੍ਤਿ ਸੁਤ੍ਵਾ ‘‘ਗਚ੍ਛਾਮ ਨਂ ਪਸ੍ਸਿਸ੍ਸਾਮਾ’’ਤਿ ਗਨ੍ਤ੍ਵਾ ਦ੍ਵਾਰਕੋਟ੍ਠਕਤੋ ਪਟ੍ਠਾਯ ਸਬ੍ਬਂ ਓਲੋਕੇਤ੍ਵਾ ‘‘ਇਦਂ ਸਨ੍ਥਾਗਾਰਂ ਅਤਿਵਿਯ ਮਨੋਰਮਂ ਸਸ੍ਸਿਰਿਕਂ. ਕੇਨ ਪਠਮਂ ਪਰਿਭੁਤ੍ਤਂ ਅਮ੍ਹਾਕਂ ਦੀਘਰਤ੍ਤਂ ਹਿਤਾਯ ਸੁਖਾਯ ਅਸ੍ਸਾ’’ਤਿ ਚਿਨ੍ਤੇਤ੍ਵਾ – ‘‘ਅਮ੍ਹਾਕਂ ਞਾਤਿਸੇਟ੍ਠਸ੍ਸ ਪਠਮਂ ਦਿਯ੍ਯਮਾਨੇਪਿ ਸਤ੍ਥੁਨੋਵ ਅਨੁਚ੍ਛਵਿਕਂ, ਦਕ੍ਖਿਣੇਯ੍ਯਵਸੇਨ ਦਿਯ੍ਯਮਾਨੇਪਿ ਸਤ੍ਥੁਨੋਵ ਅਨੁਚ੍ਛਵਿਕਂ, ਤਸ੍ਮਾ ਸਤ੍ਥਾਰਂ ਪਠਮਂ ਪਰਿਭੁਞ੍ਜਾਪੇਸ੍ਸਾਮ, ਭਿਕ੍ਖੁਸਙ੍ਘਸ੍ਸ ਚ ਆਗਮਨਂ ਕਰਿਸ੍ਸਾਮ, ਭਿਕ੍ਖੁਸਙ੍ਘੇ ਆਗਤੇ ਤੇਪਿਟਕਂ ਬੁਦ੍ਧਵਚਨਂ ਆਗਤਮੇਵ ਭਵਿਸ੍ਸਤਿ, ਸਤ੍ਥਾਰਂ ਤਿਯਾਮਰਤ੍ਤਿਂ ਅਮ੍ਹਾਕਂ ਧਮ੍ਮਕਥਂ ਕਥਾਪੇਸ੍ਸਾਮ, ਇਤਿ ਤੀਹਿ ਰਤਨੇਹਿ ਪਰਿਭੁਤ੍ਤਂ ਪਚ੍ਛਾ ਮਯਂ ਪਰਿਭੁਞ੍ਜਿਸ੍ਸਾਮ, ਏਵਂ ਨੋ ਦੀਘਰਤ੍ਤਂ ਹਿਤਾਯ ਸੁਖਾਯ ਭਵਿਸ੍ਸਤੀ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਉਪਸਙ੍ਕਮਿਂਸੁ.
ਯੇਨ ਨਵਂ ਸਨ੍ਥਾਗਾਰਂ ਤੇਨੁਪਸਙ੍ਕਮਿਂਸੂਤਿ ਤਂਦਿਵਸਂ ਕਿਰ ਸਨ੍ਥਾਗਾਰਂ ਕਿਞ੍ਚਾਪਿ ਰਾਜਕੁਲਾਨਂ ਦਸ੍ਸਨਤ੍ਥਾਯ ਦੇਵਵਿਮਾਨਂ ਵਿਯ ਸੁਸਜ੍ਜਿਤਂ ਹੋਤਿ ਸੁਪਟਿਜਗ੍ਗਿਤਂ, ਬੁਦ੍ਧਾਰਹਂ ਪਨ ਕਤ੍ਵਾ ਅਪਞ੍ਞਤ੍ਤਂ. ਬੁਦ੍ਧਾ ਹਿ ਨਾਮ ਅਰਞ੍ਞਜ੍ਝਾਸਯਾ ਅਰਞ੍ਞਾਰਾਮਾ ਅਨ੍ਤੋਗਾਮੇ ਵਸੇਯ੍ਯੁਂ ਵਾ ਨੋ ਵਾ, ਤਸ੍ਮਾ ‘‘ਭਗਵਤੋ ਮਨਂ ਜਾਨਿਤ੍ਵਾਵ, ਪਞ੍ਞਾਪੇਸ੍ਸਾਮਾ’’ਤਿ ਚਿਨ੍ਤੇਤ੍ਵਾ, ਤੇ ਭਗਵਨ੍ਤਂ ਉਪਸਙ੍ਕਮਿਂਸੁ, ਇਦਾਨਿ ਪਨ ਮਨਂ ਲਭਿਤ੍ਵਾ ਪਞ੍ਞਾਪੇਤੁਕਾਮਾ ਯੇਨ ਸਨ੍ਥਾਗਾਰਂ ਤੇਨੁਪਸਙ੍ਕਮਿਂਸੁ.
ਸਬ੍ਬਸਨ੍ਥਰਿਂ ਸਨ੍ਥਾਗਾਰਂ ਸਨ੍ਥਰਿਤ੍ਵਾਤਿ ਯਥਾ ਸਬ੍ਬਮੇਵ ਸਨ੍ਥਤਂ ਹੋਤਿ, ਏਵਂ ਤਂ ਸਨ੍ਥਰਾਪੇਤ੍ਵਾ. ਸਬ੍ਬਪਠਮਂ ਤਾਵ ‘‘ਗੋਮਯਂ ਨਾਮ ਸਬ੍ਬਮਙ੍ਗਲੇਸੁ ਵਟ੍ਟਤੀ’’ਤਿ ਸੁਧਾਪਰਿਕਮ੍ਮਕਤਮ੍ਪਿ ਭੂਮਿਂ ਅਲ੍ਲਗੋਮਯੇਨ ਓਪੁਞ੍ਜਾਪੇਤ੍ਵਾ, ਪਰਿਸੁਕ੍ਖਭਾਵਂ ਞਤ੍ਵਾ, ਯਥਾ ਅਕ੍ਕਨ੍ਤਟ੍ਠਾਨੇ ਪਦਂ ਪਞ੍ਞਾਯਤਿ, ਏਵਂ ਚਤੁਜ੍ਜਾਤਿਯਗਨ੍ਧੇਹਿ ਲਿਮ੍ਪਾਪੇਤ੍ਵਾ ਉਪਰਿ ਨਾਨਾਵਣ੍ਣਕਟਸਾਰਕੇ ਸਨ੍ਥਰਿਤ੍ਵਾ ਤੇਸਂ ਉਪਰਿ ਮਹਾਪਿਟ੍ਠਿਕਕੋਜਵੇ ਆਦਿਂ ਕਤ੍ਵਾ ਹਤ੍ਥਤ੍ਥਰਅਸ੍ਸਤ੍ਥਰਸੀਹਤ੍ਥਰਬ੍ਯਗ੍ਘਤ੍ਥਰਚਨ੍ਦਤ੍ਥਰਕਸੂਰਿਯਤ੍ਥਰਕਚਿਤ੍ਤਤ੍ਥਰਕਾਦੀਹਿ ਨਾਨਾਵਣ੍ਣੇਹਿ ਅਤ੍ਥਰਕੇਹਿ ਸਨ੍ਥਰਿਤਬ੍ਬਯੁਤ੍ਤਕਂ ਸਬ੍ਬੋਕਾਸਂ ਸਨ੍ਥਰਾਪੇਸੁਂ. ਤੇਨ ਵੁਤ੍ਤਂ ‘‘ਸਬ੍ਬਸਨ੍ਥਰਿਂ ਸਨ੍ਥਾਗਾਰਂ ਸਨ੍ਥਰਿਤ੍ਵਾ’’ਤਿ.
ਆਸਨਾਨਿ ਪਞ੍ਞਾਪੇਤ੍ਵਾਤਿ ਮਜ੍ਝਟ੍ਠਾਨੇ ਤਾਵ ਮਙ੍ਗਲਥਮ੍ਭਂ ਨਿਸ੍ਸਾਯ ਮਹਾਰਹਂ ਬੁਦ੍ਧਾਸਨਂ ਪਞ੍ਞਾਪੇਤ੍ਵਾ, ਤਤ੍ਥ ਤਤ੍ਥ ਯਂ ਯਂ ਮੁਦੁਕਞ੍ਚ ਮਨੋਰਮਞ੍ਚ ਪਚ੍ਚਤ੍ਥਰਣਂ, ਤਂ ਤਂ ਪਚ੍ਚਤ੍ਥਰਿਤ੍ਵਾ ਉਭਤੋਲੋਹਿਤਕਂ ਮਨੁਞ੍ਞਦਸ੍ਸਨਂ ਉਪਧਾਨਂ ਉਪਦਹਿਤ੍ਵਾ ਉਪਰਿ ਸੁਵਣ੍ਣਰਜਤਤਾਰਕਵਿਚਿਤ੍ਤਵਿਤਾਨਂ ਬਨ੍ਧਿਤ੍ਵਾ ਗਨ੍ਧਦਾਮਪੁਪ੍ਫਦਾਮਪਤ੍ਤਦਾਮਾਦੀਹਿ ਅਲਙ੍ਕਰਿਤ੍ਵਾ ਸਮਨ੍ਤਾ ਦ੍ਵਾਦਸਹਤ੍ਥੇ ਠਾਨੇ ਪੁਪ੍ਫਜਾਲਂ ਕਾਰੇਤ੍ਵਾ, ਤਿਂਸਹਤ੍ਥਮਤ੍ਤਂ ਠਾਨਂ ਪਟਸਾਣਿਯਾ ਪਰਿਕ੍ਖਿਪਾਪੇਤ੍ਵਾ ਪਚ੍ਛਿਮਭਿਤ੍ਤਿਂ ਨਿਸ੍ਸਾਯ ਭਿਕ੍ਖੁਸਙ੍ਘਸ੍ਸ ਪਲ੍ਲਙ੍ਕਪੀਠਅਪਸ੍ਸਯਪੀਠਮੁਣ੍ਡਪੀਠਾਨਿ ਪਞ੍ਞਾਪੇਤ੍ਵਾ ਉਪਰਿ ਸੇਤਪਚ੍ਚਤ੍ਥਰਣੇਹਿ ਪਚ੍ਚਤ੍ਥਰਾਪੇਤ੍ਵਾ ਪਾਚੀਨਭਿਤ੍ਤਿਂ ਨਿਸ੍ਸਾਯ ਅਤ੍ਤਨੋ ਅਤ੍ਤਨੋ ਮਹਾਪਿਟ੍ਠਿਕਕੋਜਵੇ ਪਞ੍ਞਾਪੇਤ੍ਵਾ ਮਨੋਰਮਾਨਿ ਹਂਸਲੋਮਾਦਿਪੂਰਿਤਾਨਿ ਉਪਧਾਨਾਨਿ ਠਪਾਪੇਸੁਂ ‘‘ਏਵਂ ਅਕਿਲਮਮਾਨਾ ਸਬ੍ਬਰਤ੍ਤਿਂ ਧਮ੍ਮਂ ਸੁਣਿਸ੍ਸਾਮਾ’’ਤਿ. ਇਦਂ ਸਨ੍ਧਾਯ ਵੁਤ੍ਤਂ ‘‘ਆਸਨਾਨਿ ਪਞ੍ਞਾਪੇਤ੍ਵਾ’’ਤਿ.
ਉਦਕਮਣਿਕਂ ਪਤਿਟ੍ਠਾਪੇਤ੍ਵਾਤਿ ਮਹਾਕੁਚ੍ਛਿਕਂ ਉਦਕਚਾਟਿਂ ਪਤਿਟ੍ਠਾਪੇਤ੍ਵਾ ‘‘ਏਵਂ ਭਗਵਾ ਚ ਭਿਕ੍ਖੁਸਙ੍ਘੋ ਚ ਯਥਾਰੁਚਿਯਾ ਹਤ੍ਥੇ ਵਾ ਧੋਵਿਸ੍ਸਨ੍ਤਿ ਪਾਦੇ ਵਾ, ਮੁਖਂ ਵਾ ਵਿਕ੍ਖਾਲੇਸ੍ਸਨ੍ਤੀ’’ਤਿ ਤੇਸੁ ਤੇਸੁ ਠਾਨੇਸੁ ਮਣਿਵਣ੍ਣਸ੍ਸ ਉਦਕਸ੍ਸ ਪੂਰਾਪੇਤ੍ਵਾ ਵਾਸਤ੍ਥਾਯ ਨਾਨਾਪੁਪ੍ਫਾਨਿ ਚੇਵ ਉਦਕਵਾਸਚੁਣ੍ਣਾਨਿ ਚ ਪਕ੍ਖਿਪਿਤ੍ਵਾ ਕਦਲਿਪਣ੍ਣੇਹਿ ਪਿਦਹਿਤ੍ਵਾ ਪਤਿਟ੍ਠਾਪੇਸੁਂ. ਇਦਂ ਸਨ੍ਧਾਯ ਵੁਤ੍ਤਂ ‘‘ਉਦਕਮਣਿਕਂ ਪਤਿਟ੍ਠਾਪੇਤ੍ਵਾ’’ਤਿ.
ਤੇਲਪ੍ਪਦੀਪਂ ਆਰੋਪੇਤ੍ਵਾਤਿ ਰਜਤਸੁਵਣ੍ਣਾਦਿਮਯਦਣ੍ਡਦੀਪਿਕਾਸੁ ਯੋਨਕਰੂਪਕਿਰਾਤਰੂਪਕਾਦੀਨਂ ਹਤ੍ਥੇ ਠਪਿਤਸੁਵਣ੍ਣਰਜਤਾਦਿਮਯਕਪਲ੍ਲਿਕਾਸੁ ਚ ਤੇਲਪ੍ਪਦੀਪਂ ਜਾਲਾਪੇਤ੍ਵਾਤਿ ਅਤ੍ਥੋ. ਯੇਨ ਭਗਵਾ ਤੇਨੁਪਸਙ੍ਕਮਿਂਸੂਤਿ ਏਤ੍ਥ ਪਨ ਤੇ ਸਕ੍ਯਰਾਜਾਨੋ ਨ ਕੇਵਲਂ ਸਨ੍ਥਾਗਾਰਮੇਵ, ਅਥ ਖੋ ਯੋਜਨਾਵਟ੍ਟੇ ਕਪਿਲਵਤ੍ਥੁਸ੍ਮਿਂ ਨਗਰਵੀਥਿਯੋਪਿ ਸਮ੍ਮਜ੍ਜਾਪੇਤ੍ਵਾ ਧਜੇ ਉਸ੍ਸਾਪੇਤ੍ਵਾ ਗੇਹਦ੍ਵਾਰੇਸੁ ਪੁਣ੍ਣਘਟੇ ਚ ਕਦਲਿਯੋ ਚ ਠਪਾਪੇਤੇਵਾ ਸਕਲਨਗਰਂ ਦੀਪਮਾਲਾਦੀਹਿ ਵਿਪ੍ਪਕਿਣ੍ਣਤਾਰਕਂ ਵਿਯ ਕਤ੍ਵਾ ‘‘ਖੀਰੂਪਗੇ ਦਾਰਕੇ ਖੀਰਂ ਪਾਯੇਥ, ਦਹਰੇ ਕੁਮਾਰੇ ਲਹੁਂ ਲਹੁਂ ਭੋਜੇਤ੍ਵਾ ਸਯਾਪੇਥ, ਉਚ੍ਚਾਸਦ੍ਦਂ ਮਾ ਕਰਿਤ੍ਥ, ਅਜ੍ਜ ਏਕਰਤ੍ਤਿਂ ਸਤ੍ਥਾ ਅਨ੍ਤੋਗਾਮੇ ਵਸਿਸ੍ਸਤਿ, ਬੁਦ੍ਧਾ ਨਾਮ ਅਪ੍ਪਸਦ੍ਦਕਾਮਾ ਹੋਨ੍ਤੀ’’ਤਿ ਭੇਰਿਂ ਚਰਾਪੇਤ੍ਵਾ ਸਯਂ ਦਣ੍ਡਦੀਪਿਕਾ ਆਦਾਯ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ.
ਅਥ ਖੋ ਭਗਵਾ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਸਦ੍ਧਿਂ ਭਿਕ੍ਖੁਸਙ੍ਘੇਨ ਯੇਨ ਨਵਂ ਸਨ੍ਥਾਗਾਰਂ ਤੇਨੁਪਸਙ੍ਕਮੀਤਿ ‘‘ਯਸ੍ਸ ਦਾਨਿ, ਭਨ੍ਤੇ, ਭਗਵਾ ਕਾਲਂ ਮਞ੍ਞਤੀ’’ਤਿ ਏਵਂ ਕਿਰ ਕਾਲੇ ਆਰੋਚਿਤੇ ਭਗਵਾ ਲਾਖਾਰਸਤਿਨ੍ਤਰਤ੍ਤਕੋਵਿਲ਼ਾਰਪੁਪ੍ਫਵਣ੍ਣਂ ਰਤ੍ਤਦੁਪਟ੍ਟਂ ਕਤ੍ਤਰਿਯਾ ਪਦੁਮਂ ਕਨ੍ਤੇਨ੍ਤੋ ਵਿਯ, ਸਂਵਿਧਾਯ ਤਿਮਣ੍ਡਲਂ ਪਟਿਚ੍ਛਾਦੇਨ੍ਤੋ ਨਿਵਾਸੇਤ੍ਵਾ ਸੁਵਣ੍ਣਪਾਮਙ੍ਗੇਨ ਪਦੁਮਕਲਾਪਂ ਪਰਿਕ੍ਖਿਪਨ੍ਤੋ ਵਿਯ, ਵਿਜ੍ਜੁਲਤਾਸਸ੍ਸਿਰਿਕਂ ਕਾਯਬਨ੍ਧਨਂ ਬਨ੍ਧਿਤ੍ਵਾ ਰਤ੍ਤਕਮ੍ਬਲੇਨ ਗਜਕੁਮ੍ਭਂ ਪਰਿਯੋਨਨ੍ਧਨ੍ਤੋ ਵਿਯ, ਰਤਨਸਤੁਬ੍ਬੇਧੇ ਸੁਵਣ੍ਣਗ੍ਘਿਕੇ ਪਵਾਲ਼ਜਾਲਂ ਖਿਪਮਾਨੋ ਵਿਯ ਸੁਵਣ੍ਣਚੇਤਿਯੇ ਰਤ੍ਤਕਮ੍ਬਲਕਞ੍ਚੁਕਂ ਪਟਿਮੁਞ੍ਚਨ੍ਤੋ ਵਿਯ, ਗਚ੍ਛਨ੍ਤਂ ਪੁਣ੍ਣਚਨ੍ਦਂ ਰਤ੍ਤਵਣ੍ਣਵਲਾਹਕੇਨ ਪਟਿਚ੍ਛਾਦਯਮਾਨੋ ਵਿਯ, ਕਞ੍ਚਨਪਬ੍ਬਤਮਤ੍ਥਕੇ ਸੁਪਕ੍ਕਲਾਖਾਰਸਂ ਪਰਿਸਿਞ੍ਚਨ੍ਤੋ ਵਿਯ, ਚਿਤ੍ਤਕੂਟਪਬ੍ਬਤਮਤ੍ਥਕਂ ਵਿਜ੍ਜੁਲਤਾਯ ਪਰਿਕ੍ਖਿਪਨ੍ਤੋ ਵਿਯ ਚ ਸਚਕ੍ਕਵਾਲ਼ਸਿਨੇਰੁਯੁਗਨ੍ਧਰਂ ਮਹਾਪਥਵਿਂ ਸਞ੍ਚਾਲੇਤ੍ਵਾ ਗਹਿਤਂ ਨਿਗ੍ਰੋਧਪਲ੍ਲਵਸਮਾਨਵਣ੍ਣਂ ਰਤ੍ਤਵਰਪਂਸੁਕੂਲਂ ਪਾਰੁਪਿਤ੍ਵਾ, ਗਨ੍ਧਕੁਟਿਦ੍ਵਾਰਤੋ ਨਿਕ੍ਖਮਿ ਕਞ੍ਚਨਗੁਹਤੋ ਸੀਹੋ ਵਿਯ ਉਦਯਪਬ੍ਬਤਕੂਟਤੋ ਪੁਣ੍ਣਚਨ੍ਦੋ ਵਿਯ ਚ. ਨਿਕ੍ਖਮਿਤ੍ਵਾ ਪਨ ਗਨ੍ਧਕੁਟਿਪਮੁਖੇ ਅਟ੍ਠਾਸਿ.
ਅਥਸ੍ਸ ਕਾਯਤੋ ਮੇਘਮੁਖੇਹਿ ਵਿਜ੍ਜੁਕਲਾਪਾ ਵਿਯ ਰਸ੍ਮਿਯੋ ਨਿਕ੍ਖਮਿਤ੍ਵਾ ਸੁਵਣ੍ਣਰਸਧਾਰਾਪਰਿਸੇਕਪਿਞ੍ਜਰਪਤ੍ਤਪੁਪ੍ਫਫਲਵਿਟਪੇ ਵਿਯ ਆਰਾਮਰੁਕ੍ਖੇ ਕਰਿਂਸੁ. ਤਾਵਦੇਵ ਚ ਅਤ੍ਤਨੋ ਅਤ੍ਤਨੋ ਪਤ੍ਤਚੀਵਰਮਾਦਾਯ ਮਹਾਭਿਕ੍ਖੁਸਙ੍ਘੋ ਭਗਵਨ੍ਤਂ ਪਰਿਵਾਰੇਸਿ. ਤੇ ਪਨ ਪਰਿਵਾਰੇਤ੍ਵਾ ਠਿਤਾ ਭਿਕ੍ਖੂ ਏਵਰੂਪਾ ਅਹੇਸੁਂ – ਅਪ੍ਪਿਚ੍ਛਾ ਸਨ੍ਤੁਟ੍ਠਾ ਪਵਿਵਿਤ੍ਤਾ ਅਸਂਸਟ੍ਠਾ ਆਰਦ੍ਧਵੀਰਿਯਾ ਵਤ੍ਤਾਰੋ ਵਚਨਕ੍ਖਮਾ ਚੋਦਕਾ ਪਾਪਗਰਹਿਨੋ ਸੀਲਸਮ੍ਪਨ੍ਨਾ ਸਮਾਧਿਸਮ੍ਪਨ੍ਨਾ ਪਞ੍ਞਾਵਿਮੁਤ੍ਤਿਵਿਮੁਤ੍ਤਿਞਾਣਦਸ੍ਸਨਸਮ੍ਪਨ੍ਨਾ. ਤੇਹਿ ਪਰਿਵਾਰਿਤੋ ਭਗਵਾ ਰਤ੍ਤਕਮ੍ਬਲਪਰਿਕ੍ਖਿਤ੍ਤੋ ਵਿਯ ਸੁਵਣ੍ਣਕ੍ਖਨ੍ਧੋ, ਰਤ੍ਤਪਦੁਮਸਣ੍ਡਮਜ੍ਝਗਤਾ ਵਿਯ ਸੁਵਣ੍ਣਨਾਵਾ, ਪਵਾਲ਼ਵੇਦਿਕਾਪਰਿਕ੍ਖਿਤ੍ਤੋ ਵਿਯ ਸੁਵਣ੍ਣਪਾਸਾਦੋ ਵਿਰੋਚਿਤ੍ਥ. ਸਾਰਿਪੁਤ੍ਤਮੋਗ੍ਗਲ੍ਲਾਨਾਦਯੋ ਮਹਾਥੇਰਾਪਿ ਨਂ ਮੇਘਵਣ੍ਣਂ ਪਂਸੁਕੂਲਂ ਪਾਰੁਪਿਤ੍ਵਾ ਮਣਿਵਮ੍ਮਵਮ੍ਮਿਕਾ ਵਿਯ ਮਹਾਨਾਗਾ ਪਰਿਵਾਰਯਿਂਸੁ ਵਨ੍ਤਰਾਗਾ ਭਿਨ੍ਨਕਿਲੇਸਾ ਵਿਜਟਿਤਜਟਾ ਛਿਨ੍ਨਬਨ੍ਧਨਾ ਕੁਲੇ ਵਾ ਗਣੇ ਵਾ ਅਲਗ੍ਗਾ.
ਇਤਿ ਭਗਵਾ ਸਯਂ ਵੀਤਰਾਗੋ ਵੀਤਰਾਗੇਹਿ, ਵੀਤਦੋਸੋ ਵੀਤਦੋਸੇਹਿ, ਵੀਤਮੋਹੋ ਵੀਤਮੋਹੇਹਿ, ਨਿਤ੍ਤਣ੍ਹੋ ਨਿਤ੍ਤਣ੍ਹੇਹਿ, ਨਿਕ੍ਕਿਲੇਸੋ ਨਿਕ੍ਕਿਲੇਸੇਹਿ, ਸਯਂ ਬੁਦ੍ਧੋ ਬਹੁਸ੍ਸੁਤਬੁਦ੍ਧੇਹਿ ਪਰਿਵਾਰਿਤੋ ਪਤ੍ਤਪਰਿਵਾਰਿਤਂ ਵਿਯ ਕੇਸਰਂ, ਕੇਸਰਪਰਿਵਾਰਿਤਾ ਵਿਯ ਕਣ੍ਣਿਕਾ, ਅਟ੍ਠਨਾਗਸਹਸ੍ਸਪਰਿਵਾਰਿਤੋ ਵਿਯ ਛਦ੍ਦਨ੍ਤੋ ਨਾਗਰਾਜਾ, ਨਵੁਤਿਹਂਸਸਹਸ੍ਸਪਰਿਵਾਰਿਤੋ ਵਿਯ ਧਤਰਟ੍ਠੋ ਹਂਸਰਾਜਾ, ਸੇਨਙ੍ਗਪਰਿਵਾਰਿਤੋ ਵਿਯ ਚਕ੍ਕਵਤ੍ਤਿਰਾਜਾ, ਮਰੁਗਣਪਰਿਵਾਰਿਤੋ ਵਿਯ ਸਕ੍ਕੋ ਦੇਵਰਾਜਾ, ਬ੍ਰਹ੍ਮਗਣਪਰਿਵਾਰਿਤੋ ਵਿਯ ਹਾਰਿਤਮਹਾਬ੍ਰਹ੍ਮਾ, ਤਾਰਾਗਣਪਰਿਵਾਰਿਤੋ ਵਿਯ ਪੁਣ੍ਣਚਨ੍ਦੋ ਅਸਮੇਨ ਬੁਦ੍ਧਵੇਸੇਨ ਅਪਰਿਮਾਣੇਨ ਬੁਦ੍ਧਵਿਲਾਸੇਨ ਕਪਿਲਵਤ੍ਥੁਗਾਮਿਮਗ੍ਗਂ ਪਟਿਪਜ੍ਜਿ.
ਅਥਸ੍ਸ ਪੁਰਤ੍ਥਿਮਕਾਯਤੋ ਸੁਵਣ੍ਣਵਣ੍ਣਾ ਰਸ੍ਮਿ ਉਟ੍ਠਹਿਤ੍ਵਾ ਅਸੀਤਿਹਤ੍ਥਟ੍ਠਾਨਂ ਅਗ੍ਗਹੇਸਿ ਪਚ੍ਛਿਮ-ਕਾਯਤੋ, ਦਕ੍ਖਿਣਹਤ੍ਥਤੋ, ਵਾਮਹਤ੍ਥਤੋ ਸੁਵਣ੍ਣਵਣ੍ਣਾ ਰਸ੍ਮਿ ਉਟ੍ਠਹਿਤ੍ਵਾ ਅਸੀਤਿਹਤ੍ਥਟ੍ਠਾਨਂ ਅਗ੍ਗਹੇਸਿ. ਉਪਰਿ ਕੇਸਨ੍ਤਤੋ ਪਟ੍ਠਾਯ ਸਬ੍ਬਕੇਸਾਵਟ੍ਟੇਹਿ ਮੋਰਗੀਵਵਣ੍ਣਾ ਰਸ੍ਮਿ ਉਟ੍ਠਹਿਤ੍ਵਾ ਗਗਨਤਲੇ ਅਸੀਤਿਹਤ੍ਥਟ੍ਠਾਨਂ ਅਗ੍ਗਹੇਸਿ. ਹੇਟ੍ਠਾ ਪਾਦਤਲੇਹਿ ਪਵਾਲ਼ਵਣ੍ਣਾ ਰਸ੍ਮਿ ਉਟ੍ਠਹਿਤ੍ਵਾ ਘਨਪਥਵਿਂ ਅਸੀਤਿਹਤ੍ਥਟ੍ਠਾਨਂ ਅਗ੍ਗਹੇਸਿ. ਏਵਂ ਸਮਨ੍ਤਾ ਅਸੀਤਿਹਤ੍ਥਟ੍ਠਾਨਂ ਛਬ੍ਬਣ੍ਣਾ ਬੁਦ੍ਧਰਸ੍ਮਿਯੋ ਵਿਜ੍ਜੋਤਮਾਨਾ ਵਿਪ੍ਫਨ੍ਦਮਾਨਾ ਕਞ੍ਚਨਦਣ੍ਡਦੀਪਿਕਾਹਿ ਨਿਚ੍ਛਰਿਤ੍ਵਾ ਆਕਾਸਂ ਪਕ੍ਖਨ੍ਦਜਾਲਾ ਵਿਯ ਚਾਤੁਦ੍ਦੀਪਿਕਮਹਾਮੇਘਤੋ ਨਿਕ੍ਖਨ੍ਤਵਿਜ੍ਜੁਲਤਾ ਵਿਯ ਵਿਧਾਵਿਂਸੁ. ਸਬ੍ਬਦਿਸਾਭਾਗਾ ਸੁਵਣ੍ਣਚਮ੍ਪਕਪੁਪ੍ਫੇਹਿ ਵਿਕਿਰਿਯਮਾਨਾ ਵਿਯ, ਸੁਵਣ੍ਣਘਟਤੋ ਨਿਕ੍ਖਨ੍ਤਸੁਵਣ੍ਣਰਸਧਾਰਾਹਿ ਸਿਞ੍ਚਮਾਨਾ ਵਿਯ, ਪਸਾਰਿਤਸੁਵਣ੍ਣਪਟਪਰਿਕ੍ਖਿਤ੍ਤਾ ਵਿਯ, ਵੇਰਮ੍ਭਵਾਤਸਮੁਟ੍ਠਿਤਕਿਂਸੁਕਕਣਿਕਾਰਪੁਪ੍ਫਚੁਣ੍ਣਸਮੋਕਿਣ੍ਣਾ ਵਿਯ ਵਿਪ੍ਪਭਾਸਿਂਸੁ.
ਭਗਵਤੋਪਿ ਅਸੀਤਿਅਨੁਬ੍ਯਞ੍ਜਨਬ੍ਯਾਮਪ੍ਪਭਾਦ੍ਵਤ੍ਤਿਂਸਵਰਲਕ੍ਖਣਸਮੁਜ੍ਜਲਸਰੀਰਂ ਸਮੁਗ੍ਗਤਤਾਰਕਂ ਵਿਯ ਗਗਨਤਲਂ, ਵਿਕਸਿਤਮਿਵ ਪਦੁਮਵਨਂ, ਸਬ੍ਬਪਾਲਿਫੁਲ੍ਲੋ ਵਿਯ ਯੋਜਨਸਤਿਕੋ ਪਾਰਿਚ੍ਛਤ੍ਤਕੋ, ਪਟਿਪਾਟਿਯਾ ਠਪਿਤਾਨਂ ਦ੍ਵਤ੍ਤਿਂਸਚਨ੍ਦਾਨਂ ਦ੍ਵਤ੍ਤਿਂਸਸੂਰਿਯਾਨਂ ਦ੍ਵਤ੍ਤਿਂਸਚਕ੍ਕਵਤ੍ਤੀਨਂ ਦ੍ਵਤ੍ਤਿਂਸਦੇਵਰਾਜਾਨਂ ਦ੍ਵਤ੍ਤਿਂਸਮਹਾਬ੍ਰਹ੍ਮਾਨਂ ਸਿਰਿਯਾ ਸਿਰਿਂ ਅਭਿਭਵਮਾਨਂ ਵਿਯ ਵਿਰੋਚਿਤ੍ਥ, ਯਥਾ ਤਂ ਦਸਹਿ ਪਾਰਮੀਹਿ ਦਸਹਿ ਉਪਪਾਰਮੀਹਿ ਦਸਹਿ ਪਰਮਤ੍ਥਪਾਰਮੀਹਿ ਸਮ੍ਮਦੇਵ ਪੂਰਿਤਾਹਿ ਸਮਤਿਂਸਪਾਰਮਿਤਾਹਿ ਅਲਙ੍ਕਤਂ. ਕਪ੍ਪਸਤਸਹਸ੍ਸਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਦਿਨ੍ਨਦਾਨਂ ਰਕ੍ਖਿਤਸੀਲਂ ਕਤਕਲ੍ਯਾਣਕਮ੍ਮਂ ਏਕਸ੍ਮਿਂ ਅਤ੍ਤਭਾਵੇ ਓਤਰਿਤ੍ਵਾ ਵਿਪਾਕਂ ਦਾਤੁਂ ਠਾਨਂ ਅਲਭਮਾਨਂ ਸਮ੍ਬਾਧਪਤ੍ਤਂ ਵਿਯ ਅਹੋਸਿ. ਨਾਵਾਸਹਸ੍ਸਭਣ੍ਡਂ ਏਕਨਾਵਂ ਆਰੋਪਨਕਾਲੋ ਵਿਯ, ਸਕਟਸਹਸ੍ਸਭਣ੍ਡਂ ਏਕਸਕਟਂ ਆਰੋਪਨਕਾਲੋ ਵਿਯ, ਪਞ੍ਚਵੀਸਤਿਯਾ ਗਙ੍ਗਾਨਂ ਓਘਸ੍ਸ ਸਮ੍ਭਿਜ੍ਜ ਮੁਖਦ੍ਵਾਰੇ ਏਕਤੋ ਰਾਸਿਭੂਤਕਾਲੋ ਵਿਯ ਅਹੋਸਿ.
ਇਮਾਯ ਬੁਦ੍ਧਸਿਰਿਯਾ ਓਭਾਸਮਾਨਸ੍ਸਾਪਿ ਚ ਭਗਵਤੋ ਪੁਰਤੋ ਅਨੇਕਾਨਿ ਦਣ੍ਡਦੀਪਿਕਾਸਹਸ੍ਸਾਨਿ ਉਕ੍ਖਿਪਿਂਸੁ, ਤਥਾ ਪਚ੍ਛਤੋ, ਵਾਮਪਸ੍ਸੇ, ਦਕ੍ਖਿਣਪਸ੍ਸੇ. ਜਾਤਿਸੁਮਨਚਮ੍ਪਕਵਨਮਲ੍ਲਿਕਾਰਤ੍ਤੁਪ੍ਪਲ-ਨੀਲੁਪ੍ਪਲ-ਬਕੁਲਸਿਨ੍ਦੁਵਾਰਪੁਪ੍ਫਾਨਿ ਚੇਵ ਨੀਲਪੀਤਾਦਿਵਣ੍ਣਸੁਗਨ੍ਧਗਨ੍ਧਚੁਣ੍ਣਾਨਿ ਚ ਚਾਤੁਦ੍ਦੀਪਿਕਮੇਘਵਿਸ੍ਸਟ੍ਠਾ ਉਦਕਵੁਟ੍ਠਿਯੋ ਵਿਯ ਵਿਪ੍ਪਕਿਰਿਯਿਂਸੁ. ਪਞ੍ਚਙ੍ਗਿਕਤੂਰਿਯਨਿਗ੍ਘੋਸਾ ਚੇਵ ਬੁਦ੍ਧਧਮ੍ਮਸਙ੍ਘਗੁਣਪਟਿਸਂਯੁਤ੍ਤਾ ਥੁਤਿਘੋਸਾ ਚ ਸਬ੍ਬਾ ਦਿਸਾ ਪੂਰਯਿਂਸੁ. ਦੇਵਮਨੁਸ੍ਸਨਾਗਸੁਪਣ੍ਣਗਨ੍ਧਬ੍ਬਯਕ੍ਖਾਦੀਨਂ ਅਕ੍ਖੀਨਿ ਅਮਤਪਾਨਂ ਵਿਯ ਲਭਿਂਸੁ. ਇਮਸ੍ਮਿਂ ਪਨ ਠਾਨੇ ਠਤ੍ਵਾ ਪਦਸਹਸ੍ਸੇਨ ਗਮਨਵਣ੍ਣਂ ਵਤ੍ਤੁਂ ਵਟ੍ਟਤਿ. ਤਤ੍ਰਿਦਂ ਮੁਖਮਤ੍ਤਂ –
‘‘ਏਵਂ ਸਬ੍ਬਙ੍ਗਸਮ੍ਪਨ੍ਨੋ, ਕਮ੍ਪਯਨ੍ਤੋ ਵਸੁਨ੍ਧਰਂ;
ਅਹੇਠਯਨ੍ਤੋ ਪਾਣਾਨਿ, ਯਾਤਿ ਲੋਕਵਿਨਾਯਕੋ.
‘‘ਦਕ੍ਖਿਣਂ ਪਠਮਂ ਪਾਦਂ, ਉਦ੍ਧਰਨ੍ਤੋ ਨਰਾਸਭੋ
ਗਚ੍ਛਨ੍ਤੋ ਸਿਰਿਸਮ੍ਪਨ੍ਨੋ, ਸੋਭਤੇ ਦ੍ਵਿਪਦੁਤ੍ਤਮੋ.
‘‘ਗਚ੍ਛਤੋ ਬੁਦ੍ਧਸੇਟ੍ਠਸ੍ਸ, ਹੇਟ੍ਠਾਪਾਦਤਲਂ ਮੁਦੁ;
ਸਮਂ ਸਮ੍ਫੁਸਤੇ ਭੂਮਿਂ, ਰਜਸਾ ਨੁਪਲਿਪ੍ਪਤਿ.
‘‘ਨਿਨ੍ਨਟ੍ਠਾਨਂ ਉਨ੍ਨਮਤਿ, ਗਚ੍ਛਨ੍ਤੇ ਲੋਕਨਾਯਕੇ;
ਉਨ੍ਨਤਞ੍ਚ ਸਮਂ ਹੋਤਿ, ਪਥਵੀ ਚ ਅਚੇਤਨਾ.
‘‘ਪਾਸਾਣਾ ਸਕ੍ਖਰਾ ਚੇਵ, ਕਥਲਾ ਖਾਣੁਕਣ੍ਟਕਾ;
ਸਬ੍ਬੇ ਮਗ੍ਗਾ ਵਿਵਜ੍ਜਨ੍ਤਿ, ਗਚ੍ਛਨ੍ਤੇ ਲੋਕਨਾਯਕੇ.
‘‘ਨਾਤਿਦੂਰੇ ਉਦ੍ਧਰਤਿ, ਨਚ੍ਚਾਸਨ੍ਨੇ ਚ ਨਿਕ੍ਖਿਪਂ;
ਅਘਟ੍ਟਯਨ੍ਤੋ ਨਿਯ੍ਯਾਤਿ, ਉਭੋ ਜਾਣੂ ਚ ਗੋਪ੍ਫਕੇ.
‘‘ਨਾਤਿਸੀਘਂ ਪਕ੍ਕਮਤਿ, ਸਮ੍ਪਨ੍ਨਚਰਣੋ ਮੁਨਿ;
ਨ ਚਾਪਿ ਸਣਿਕਂ ਯਾਤਿ, ਗਚ੍ਛਮਾਨੋ ਸਮਾਹਿਤੋ.
‘‘ਉਦ੍ਧਂ ਅਧੋ ਚ ਤਿਰਿਯਞ੍ਚ, ਦਿਸਞ੍ਚ ਵਿਦਿਸਂ ਤਥਾ;
ਨ ਪੇਕ੍ਖਮਾਨੋ ਸੋ ਯਾਤਿ, ਯੁਗਮਤ੍ਤਞ੍ਹਿ ਪੇਕ੍ਖਤਿ.
‘‘ਨਾਗਵਿਕ੍ਕਨ੍ਤਚਾਰੋ ਸੋ, ਗਮਨੇ ਸੋਭਤੇ ਜਿਨੋ;
ਚਾਰੁਂ ਗਚ੍ਛਤਿ ਲੋਕਗ੍ਗੋ, ਹਾਸਯਨ੍ਤੋ ਸਦੇਵਕੇ.
‘‘ਉਲ਼ੁਰਾਜਾਵ ਸੋਭਨ੍ਤੋ, ਚਤੁਚਾਰੀਵ ਕੇਸਰੀ;
ਤੋਸਯਨ੍ਤੋ ਬਹੂ ਸਤ੍ਤੇ, ਪੁਰਂ ਸੇਟ੍ਠਂ ਉਪਾਗਮੀ’’ਤਿ.
ਵਣ੍ਣਕਾਲੋ ਨਾਮ ਕਿਰੇਸ, ਏਵਂਵਿਧੇਸੁ ਕਾਲੇਸੁ ਬੁਦ੍ਧਸ੍ਸ ਸਰੀਰਵਣ੍ਣੇ ਵਾ ਗੁਣਵਣ੍ਣੇ ਵਾ ਧਮ੍ਮਕਥਿਕਸ੍ਸ ਥਾਮੋਯੇਵ ਪਮਾਣਂ. ਚੁਣ੍ਣਿਯਪਦੇਹਿ ਵਾ ਗਾਥਾਬਨ੍ਧੇਨ ਵਾ ਯਤ੍ਤਕਂ ਸਕ੍ਕੋਤਿ, ਤਤ੍ਤਕਂ ਵਤ੍ਤਬ੍ਬਂ. ਦੁਕ੍ਕਥਿਤਨ੍ਤਿ ਨ ਵਤ੍ਤਬ੍ਬਂ. ਅਪ੍ਪਮਾਣਵਣ੍ਣਾ ਹਿ ਬੁਦ੍ਧਾ. ਤੇਸਂ ਬੁਦ੍ਧਾਪਿ ਅਨਵਸੇਸਤੋ ਵਣ੍ਣਂ ਵਤ੍ਤੁਂ ਅਸਮਤ੍ਥਾ, ਪਗੇਵ ਇਤਰਾ ਪਜਾਤਿ. ਇਮਿਨਾ ਸਿਰਿਵਿਲਾਸੇਨ ਅਲਙ੍ਕਤਪਟਿਯਤ੍ਤਂ ਸਕ੍ਯਰਾਜਕੁਲਂ ਪਵਿਸਿਤ੍ਵਾ ਭਗਵਾ ਪਸਨ੍ਨਚਿਤ੍ਤੇਨ ਜਨੇਨ ਗਨ੍ਧਧੂਮਵਾਸਚੁਣ੍ਣਾਦੀਹਿ ਪੂਜਿਯਮਾਨੋ ਸਨ੍ਥਾਗਾਰਂ ਪਾਵਿਸਿ. ਤੇਨ ਵੁਤ੍ਤਂ ‘‘ਅਥ ਖੋ ਭਗਵਾ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਸਦ੍ਧਿਂ ਭਿਕ੍ਖੁਸਙ੍ਘੇਨ ਯੇਨ ਨਵਂ ਸਨ੍ਥਾਗਾਰਂ ਤੇਨੁਪਸਙ੍ਕਮੀ’’ਤਿ.
ਭਗਵਨ੍ਤਂਯੇਵ ਪੁਰਕ੍ਖਤ੍ਵਾਤਿ ਭਗਵਨ੍ਤਂ ਪੁਰਤੋ ਕਤ੍ਵਾ. ਤਤ੍ਥ ਭਗਵਾ ਭਿਕ੍ਖੂਨਞ੍ਚੇਵ ਉਪਾਸਕਾਨਞ੍ਚ ਮਜ੍ਝੇ ਨਿਸਿਨ੍ਨੋ ਗਨ੍ਧੋਦਕੇਨ ਨ੍ਹਾਪੇਤ੍ਵਾ ਦੁਕੂਲਚੁਮ੍ਬਟਕੇਨ ਵੋਦਕਂ ਕਤ੍ਵਾ ਜਾਤਿਹਿਙ੍ਗੁਲਕੇਨ ਮਜ੍ਜਿਤ੍ਵਾ ਰਤ੍ਤਕਮ੍ਬਲਪਲਿਵੇਠਿਤੇ ਪੀਠੇ ਠਪਿਤਰਤ੍ਤਸੁਵਣ੍ਣਘਨਪਟਿਮਾ ਵਿਯ ਅਤਿਵਿਰੋਚਿਤ੍ਥ. ਅਯਂ ਪਨੇਤ੍ਥ ਪੋਰਾਣਾਨਂ ਵਣ੍ਣਭਣਨਮਗ੍ਗੋ –
‘‘ਗਨ੍ਤ੍ਵਾਨ ਮਣ੍ਡਲਮਾਲ਼ਂ, ਨਾਗਵਿਕ੍ਕਨ੍ਤਚਾਰਣੋ;
ਓਭਾਸਯਨ੍ਤੋ ਲੋਕਗ੍ਗੋ, ਨਿਸੀਦਿ ਵਰਮਾਸਨੇ.
‘‘ਤਹਿਂ ਨਿਸਿਨ੍ਨੋ ਨਰਦਮ੍ਮਸਾਰਥਿ,
ਦੇਵਾਤਿਦੇਵੋ ਸਤਪੁਞ੍ਞਲਕ੍ਖਣੋ;
ਬੁਦ੍ਧਾਸਨੇ ਮਜ੍ਝਗਤੋ ਵਿਰੋਚਤਿ,
ਸੁਵਣ੍ਣਨੇਕ੍ਖਂ ਵਿਯ ਪਣ੍ਡੁਕਮ੍ਬਲੇ.
‘‘ਨੇਕ੍ਖਂ ਜਮ੍ਬੋਨਦਸ੍ਸੇਵ, ਨਿਕ੍ਖਿਤ੍ਤਂ ਪਣ੍ਡੁਕਮ੍ਬਲੇ;
ਵਿਰੋਚਤਿ ਵੀਤਮਲੋ, ਮਣਿਵੇਰੋਚਨੋ ਯਥਾ.
‘‘ਮਹਾਸਾਲੋਵ ਸਮ੍ਫੁਲ੍ਲੋ, ਨੇਰੁਰਾਜਾਵ’ਲਙ੍ਕਤੋ;
ਸੁਵਣ੍ਣਯੂਪਸਙ੍ਕਾਸੋ, ਪਦੁਮੋ ਕੋਕਨਦੋ ਯਥਾ.
‘‘ਜਲਨ੍ਤੋ ਦੀਪਰੁਕ੍ਖੋਵ, ਪਬ੍ਬਤਗ੍ਗੇ ਯਥਾ ਸਿਖੀ;
ਦੇਵਾਨਂ ਪਾਰਿਚ੍ਛਤ੍ਤੋਵ, ਸਬ੍ਬਫੁਲ੍ਲੋ ਵਿਰੋਚਤੀ’’ਤਿ.
ਕਾਪਿਲਵਤ੍ਥਵੇ ਸਕ੍ਯੇ ਬਹੁਦੇਵ ਰਤ੍ਤਿਂ ਧਮ੍ਮਿਯਾ ਕਥਾਯਾਤਿ ਏਤ੍ਥ ਧਮ੍ਮਕਥਾ ਨਾਮ ਸਨ੍ਥਾਗਾਰਾਨੁਮੋਦਨਾਪਟਿਸਂਯੁਤ੍ਤਾ ਪਕਿਣ੍ਣਕਕਥਾ ਵੇਦਿਤਬ੍ਬਾ. ਤਦਾ ਹਿ ਭਗਵਾ ਆਕਾਸਗਙ੍ਗਂ ਓਤਾਰੇਨ੍ਤੋ ਵਿਯ ਪਥਵੋਜਂ ਆਕਡ੍ਢਨ੍ਤੋ ਵਿਯ ਮਹਾਜਮ੍ਬੁਂ ਮਤ੍ਥਕੇ ਗਹੇਤ੍ਵਾ ਚਾਲੇਨ੍ਤੋ ਵਿਯ ਯੋਜਨਿਕਂ ਮਧੁਭਣ੍ਡਂ ਚਕ੍ਕਯਨ੍ਤੇਨ ਪੀਲ਼ੇਤ੍ਵਾ ਮਧੁਪਾਨਂ ਪਾਯਮਾਨੋ ਵਿਯ ਕਪਿਲਵਤ੍ਥੁਵਾਸੀਨਂ ਸਕ੍ਯਾਨਂ ਹਿਤਸੁਖਾਵਹਂ ਪਕਿਣ੍ਣਕਕਥਂ ਕਥੇਸਿ. ‘‘ਆਵਾਸਦਾਨਂ ਨਾਮੇਤਂ, ਮਹਾਰਾਜ, ਮਹਨ੍ਤਂ, ਤੁਮ੍ਹਾਕਂ ਆਵਾਸੋ ਮਯਾ ਪਰਿਭੁਤ੍ਤੋ, ਭਿਕ੍ਖੁਸਙ੍ਘੇਨ ਚ ਪਰਿਭੁਤ੍ਤੋ, ਮਯਾ ਚ ਭਿਕ੍ਖੁਸਙ੍ਘੇਨ ਚ ਪਰਿਭੁਤ੍ਤੋ ਪਨ ਧਮ੍ਮਰਤਨੇਨ ਪਰਿਭੁਤ੍ਤੋਯੇਵਾਤਿ ਤੀਹਿ ਰਤਨੇਹਿ ਪਰਿਭੁਤ੍ਤੋ ਨਾਮ ਹੋਤਿ. ਆਵਾਸਦਾਨਸ੍ਮਿਞ੍ਹਿ ਦਿਨ੍ਨੇ ਸਬ੍ਬਦਾਨਂ ਦਿਨ੍ਨਮੇਵ ਹੋਤਿ. ਭੁਮ੍ਮਟ੍ਠਕਪਣ੍ਣਸਾਲਾਯ ਵਾ ਸਾਖਾਮਣ੍ਡਪਸ੍ਸ ਵਾਪਿ ਆਨਿਸਂਸੋ ਨਾਮ ਪਰਿਚ੍ਛਿਨ੍ਦਿਤੁਂ ਨ ਸਕ੍ਕਾ. ਆਵਾਸਦਾਨਾਨੁਭਾਵੇਨ ਹਿ ਭਵੇ ਭਵੇ ਨਿਬ੍ਬਤ੍ਤਸ੍ਸਾਪਿ ਸਮ੍ਬਾਧਿਤਗਬ੍ਭਵਾਸੋ ਨ ਹੋਤਿ, ਦ੍ਵਾਦਸਹਤ੍ਥੋ ਓਵਰਕੋ ਵਿਯ ਮਾਤੁਕੁਚ੍ਛਿ ਅਸਮ੍ਬਾਧੋਵ ਹੋਤੀ’’ਤਿ. ਏਵਂ ਨਾਨਾਨਯਵਿਚਿਤ੍ਤਂ ਬਹੁਂ ਧਮ੍ਮਿਂ ਕਥਂ ਕਥੇਤ੍ਵਾ –
‘‘ਸੀਤਂ ਉਣ੍ਹਂ ਪਟਿਹਨ੍ਤਿ, ਤਤੋ ਵਾਲ਼ਮਿਗਾਨਿ ਚ;
ਸਿਰੀਸਪੇ ਚ ਮਕਸੇ, ਸਿਸਿਰੇ ਚਾਪਿ ਵੁਟ੍ਠਿਯੋ.
‘‘ਤਤੋ ਵਾਤਾਤਪੋ ਘੋਰੋ, ਸਞ੍ਜਾਤੋ ਪਟਿਹਞ੍ਞਤਿ;
ਲੇਣਤ੍ਥਞ੍ਚ ਸੁਖਤ੍ਥਞ੍ਚ, ਝਾਯਿਤੁਞ੍ਚ ਵਿਪਸ੍ਸਿਤੁਂ.
‘‘ਵਿਹਾਰਦਾਨਂ ਸਙ੍ਘਸ੍ਸ, ਅਗ੍ਗਂ ਬੁਦ੍ਧੇਨ ਵਣ੍ਣਿਤਂ;
ਤਸ੍ਮਾ ਹਿ ਪਣ੍ਡਿਤੋ ਪੋਸੋ, ਸਮ੍ਪਸ੍ਸਂ ਅਤ੍ਥਮਤ੍ਤਨੋ.
‘‘ਵਿਹਾਰੇ ਕਾਰਯੇ ਰਮ੍ਮੇ, ਵਾਸਯੇਤ੍ਥ ਬਹੁਸ੍ਸੁਤੇ;
ਤੇਸਂ ਅਨ੍ਨਞ੍ਚ ਪਾਨਞ੍ਚ, ਵਤ੍ਥਸੇਨਾਸਨਾਨਿ ਚ.
‘‘ਦਦੇਯ੍ਯ ਉਜੁਭੂਤੇਸੁ, ਵਿਪ੍ਪਸਨ੍ਨੇਨ ਚੇਤਸਾ;
ਤੇ ਤਸ੍ਸ ਧਮ੍ਮਂ ਦੇਸੇਨ੍ਤਿ, ਸਬ੍ਬਦੁਕ੍ਖਾਪਨੂਦਨਂ;
ਯਂ ਸੋ ਧਮ੍ਮਂ ਇਧਞ੍ਞਾਯ, ਪਰਿਨਿਬ੍ਬਾਤਿ ਅਨਾਸਵੋ’’ਤਿ. (ਚੂਲ਼ਵ. ੨੯੫) –
ਏਵਂ ‘‘ਅਯਮ੍ਪਿ ਆਵਾਸੇ ਆਨਿਸਂਸੋ, ਅਯਮ੍ਪਿ ਆਵਾਸੇ ਆਨਿਸਂਸੋ’’ਤਿ ਬਹੁਦੇਵ ਰਤ੍ਤਿਂ ਅਤਿਰੇਕਤਰਂ ਦਿਯਡ੍ਢਯਾਮਂ ਆਵਾਸਾਨਿਸਂਸਕਥਂ ਕਥੇਸਿ. ਤਤ੍ਥ ਇਮਾ ਤਾਵ ਗਾਥਾਵ ਸਙ੍ਗਹਂ ਆਰੁਲ਼੍ਹਾ, ਪਕਿਣ੍ਣਕਧਮ੍ਮਦੇਸਨਾ ਪਨ ਸਙ੍ਗਹਂ ਨਾਰੋਹਤਿ. ਸਨ੍ਦਸ੍ਸੇਤ੍ਵਾਤਿਆਦੀਨਿ ਵੁਤ੍ਤਤ੍ਥਾਨੇਵ.
ਅਭਿਕ੍ਕਨ੍ਤਾਤਿ ਅਤਿਕ੍ਕਨ੍ਤਾ ਦ੍ਵੇ ਯਾਮਾ ਗਤਾ. ਯਸ੍ਸ ਦਾਨਿ ਕਾਲਂ ਮਞ੍ਞਥਾਤਿ ਯਸ੍ਸ ਤੁਮ੍ਹੇ ਗਮਨਸ੍ਸ ਕਾਲਂ ਮਞ੍ਞਥ, ਗਮਨਕਾਲੋ ਤੁਮ੍ਹਾਕਂ, ਗਚ੍ਛਥਾਤਿ ਵੁਤ੍ਤਂ ਹੋਤਿ. ਕਸ੍ਮਾ ਪਨ ਭਗਵਾ ਤੇ ਉਯ੍ਯੋਜੇਸੀਤਿ? ਅਨੁਕਮ੍ਪਾਯ. ਸੁਖੁਮਾਲਾ ਹਿ ਤੇ, ਤਿਯਾਮਰਤ੍ਤਿਂ ਨਿਸੀਦਿਤ੍ਵਾ ਵੀਤਿਨਾਮੇਨ੍ਤਾਨਂ ਸਰੀਰੇ ਆਬਾਧੋ ਉਪ੍ਪਜ੍ਜੇਯ੍ਯ. ਭਿਕ੍ਖੁਸਙ੍ਘੋਪਿ ਮਹਾ, ਤਸ੍ਸ ਠਾਨਨਿਸਜ੍ਜਾਨਂ ਓਕਾਸੋ ਲਦ੍ਧੁਂ ਵਟ੍ਟਤੀਤਿ ਉਭਯਾਨੁਕਮ੍ਪਾਯ ਉਯ੍ਯੋਜੇਸਿ.
ਵਿਗਤਥਿਨਮਿਦ੍ਧੋਤਿ ਤਤ੍ਰ ਕਿਰ ਭਿਕ੍ਖੂ ਯਾਮਦ੍ਵਯਂ ਠਿਤਾਪਿ ਨਿਸਿਨ੍ਨਾਪਿ ਅਚਾਲਯਿਂਸੁ, ਪਚ੍ਛਿਮਯਾਮੇ ਪਨ ਆਹਾਰੋ ਪਰਿਣਮਤਿ, ਤਸ੍ਸ ਪਰਿਣਤਤ੍ਤਾ ਭਿਕ੍ਖੁਸਙ੍ਘੋ ਵਿਗਤਥਿਨਮਿਦ੍ਧੋ ਜਾਤੋਤਿ ਅਕਾਰਣਮੇਤਂ. ਬੁਦ੍ਧਾਨਞ੍ਹਿ ਕਥਂ ਸੁਣਨ੍ਤਸ੍ਸ ਕਾਯਿਕਚੇਤਸਿਕਦਰਥਾ ਨ ਹੋਨ੍ਤਿ, ਕਾਯਚਿਤ੍ਤਲਹੁਤਾਦਯੋ ਉਪ੍ਪਜ੍ਜਨ੍ਤਿ, ਤੇਨ ਤੇਸਂ ਦ੍ਵੇ ਯਾਮੇ ਠਿਤਾਨਮ੍ਪਿ ਨਿਸਿਨ੍ਨਾਨਮ੍ਪਿ ਧਮ੍ਮਂ ਸੁਣਨ੍ਤਾਨਂ ਥਿਨਮਿਦ੍ਧਂ ਵਿਗਤਂ, ਪਚ੍ਛਿਮਯਾਮੇਪਿ ਸਮ੍ਪਤ੍ਤੇ ਤਥਾ ਵਿਗਤਮੇਵ ਜਾਤਂ. ਤੇਨਾਹ ‘‘ਵਿਗਤਥਿਨਮਿਦ੍ਧੋ’’ਤਿ.
ਪਿਟ੍ਠਿ ਮੇ ਆਗਿਲਾਯਤੀਤਿ ਕਸ੍ਮਾ ਆਗਿਲਾਯਤਿ? ਭਗਵਤੋ ਹਿ ਛਬ੍ਬਸ੍ਸਾਨਿ ਮਹਾਪਧਾਨਂ ਪਦਹਨ੍ਤਸ੍ਸ ਮਹਨ੍ਤਂ ਕਾਯਦੁਕ੍ਖਂ ਅਹੋਸਿ, ਅਥਸ੍ਸ ਅਪਰਭਾਗੇ ਮਹਲ੍ਲਕਕਾਲੇ ਪਿਟ੍ਠਿਵਾਤੋ ਉਪ੍ਪਜ੍ਜੀਤਿ. ਅਕਾਰਣਂ ਵਾ ਏਤਂ. ਪਹੋਤਿ ਹਿ ਭਗਵਾ ਉਪ੍ਪਨ੍ਨਂ ਵੇਦਨਂ ਵਿਕ੍ਖਮ੍ਭੇਤ੍ਵਾ ਏਕਮ੍ਪਿ ਦ੍ਵੇਪਿ ਸਤ੍ਤਾਹਾਨਿ ਏਕਪਲ੍ਲਙ੍ਕੇਨ ਨਿਸੀਦਿਤੁਂ. ਸਨ੍ਥਾਗਾਰਸਾਲਂ ਪਨ ਚਤੂਹਿ ਇਰਿਯਾਪਥੇਹਿ ਪਰਿਭੁਞ੍ਜਿਤੁਕਾਮੋ ਅਹੋਸਿ. ਤਤ੍ਥ ਪਾਦਧੋਵਨਟ੍ਠਾਨਤੋ ਯਾਵ ਧਮ੍ਮਾਸਨਾ ਅਗਮਾਸਿ, ਏਤ੍ਤਕੇ ਠਾਨੇ ਗਮਨਂ ਨਿਪ੍ਫਨ੍ਨਂ. ਧਮ੍ਮਾਸਨਂ ਪਤ੍ਤਂ ਥੋਕਂ ਠਤ੍ਵਾ ਨਿਸੀਦਿ, ਏਤ੍ਤਕੇ ਠਾਨੇ ਠਾਨਂ ਨਿਪ੍ਫਨ੍ਨਂ. ਦ੍ਵੇਯਾਮਂ ਧਮ੍ਮਾਸਨੇ ਨਿਸੀਦਿ, ਏਤ੍ਤਕੇ ਠਾਨੇ ਨਿਸਜ੍ਜਾ ਨਿਪ੍ਫਨ੍ਨਾ. ਇਦਾਨਿ ਦਕ੍ਖਿਣੇਨ ਪਸ੍ਸੇਨ ਥੋਕਂ ਨਿਪਨ੍ਨੇ ਸਯਨਂ ਨਿਪ੍ਫਜ੍ਜਿਸ੍ਸਤੀਤਿ ਏਵਂ ਚਤੂਹਿ ਇਰਿਯਾਪਥੇਹਿ ਪਰਿਭੁਞ੍ਜਿਤੁਕਾਮੋ ਅਹੋਸਿ. ਉਪਾਦਿਨ੍ਨਕਸਰੀਰਞ੍ਚ ਨਾਮ ‘‘ਨੋ ਆਗਿਲਾਯਤੀ’’ਤਿ ਨ ਵਤ੍ਤਬ੍ਬਂ, ਤਸ੍ਮਾ ਚਿਰਨਿਸਜ੍ਜਾਯ ਸਞ੍ਜਾਤਂ ਅਪ੍ਪਕਮ੍ਪਿ ਆਗਿਲਾਯਨਂ ਗਹੇਤ੍ਵਾ ਏਵਮਾਹ.
ਸਙ੍ਘਾਟਿਂ ਪਞ੍ਞਾਪੇਤ੍ਵਾਤਿ ਸਨ੍ਥਾਗਾਰਸ੍ਸ ਕਿਰ ਏਕਪਸ੍ਸੇ ਤੇ ਰਾਜਾਨੋ ਪਟਸਾਣਿਂ ਪਰਿਕ੍ਖਿਪਾਪੇਤ੍ਵਾ ਕਪ੍ਪਿਯਮਞ੍ਚਕਂ ਪਞ੍ਞਾਪੇਤ੍ਵਾ ਕਪ੍ਪਿਯਪਚ੍ਚਤ੍ਥਰਣੇਨ ਅਤ੍ਥਰਿਤ੍ਵਾ ਉਪਰਿ ਸੁਵਣ੍ਣਤਾਰਕਗਨ੍ਧਮਾਲਾਦਿਦਾਮਪਟਿਮਣ੍ਡਿਤਂ ਵਿਤਾਨਂ ਬਨ੍ਧਿਤ੍ਵਾ ਗਨ੍ਧਤੇਲਪ੍ਪਦੀਪਂ ਆਰੋਪਯਿਂਸੁ, ‘‘ਅਪ੍ਪੇਵ ਨਾਮ ਸਤ੍ਥਾ ਧਮ੍ਮਾਸਨਤੋ ਵੁਟ੍ਠਾਯ ਥੋਕਂ ਵਿਸ੍ਸਮਨ੍ਤੋ ਇਧ ਨਿਪਜ੍ਜੇਯ੍ਯ, ਏਵਂ ਨੋ ਇਮਂ ਸਨ੍ਥਾਗਾਰਂ ਭਗਵਤਾ ਚਤੂਹਿ ਇਰਿਯਾਪਥੇਹਿ ਪਰਿਭੁਤ੍ਤਂ ਦੀਘਰਤ੍ਤਂ ਹਿਤਾਯ ਸੁਖਾਯ ਭਵਿਸ੍ਸਤੀ’’ਤਿ. ਸਤ੍ਥਾਪਿ ਤਦੇਵ ਸਨ੍ਧਾਯ ਤਤ੍ਥ ਸਙ੍ਘਾਟਿਂ ਪਞ੍ਞਾਪੇਤ੍ਵਾ ਨਿਪਜ੍ਜਿ. ਉਟ੍ਠਾਨਸਞ੍ਞਂ ਮਨਸਿ ਕਰਿਤ੍ਵਾਤਿ ‘‘ਏਤ੍ਤਕਂ ਕਾਲਂ ਅਤਿਕ੍ਕਮਿਤ੍ਵਾ ਵੁਟ੍ਠਹਿਸ੍ਸਾਮੀ’’ਤਿ ਵੁਟ੍ਠਾਨਸਞ੍ਞਂ ਚਿਤ੍ਤੇ ਠਪੇਤ੍ਵਾ, ਤਞ੍ਚ ਖੋ ਅਨਿਦ੍ਦਾਯਨ੍ਤੋਵ ਥੇਰਸ੍ਸ ਧਮ੍ਮਕਥਂ ਸੁਣਮਾਨੋ.
ਅਵਸ੍ਸੁਤਪਰਿਯਾਯਨ੍ਤਿ ਅਵਸ੍ਸੁਤਸ੍ਸ ਪਰਿਯਾਯਂ, ਅਵਸ੍ਸੁਤਸ੍ਸ ਕਾਰਣਨ੍ਤਿ ਅਤ੍ਥੋ. ਅਧਿਮੁਚ੍ਚਤੀਤਿ ਕਿਲੇਸਾਧਿਮੁਚ੍ਚਨੇਨ ਅਧਿਮੁਚ੍ਚਤਿ, ਗਿਦ੍ਧੋ ਹੋਤਿ. ਬ੍ਯਾਪਜ੍ਜਤੀਤਿ ਬ੍ਯਾਪਾਦਵਸੇਨ ਪੂਤਿਚਿਤ੍ਤੋ ਹੋਤਿ. ਚਕ੍ਖੁਤੋਤਿ ਚਕ੍ਖੁਭਾਵੇਨ. ਮਾਰੋਤਿ ਕਿਲੇਸਮਾਰੋਪਿ ਦੇਵਪੁਤ੍ਤਮਾਰੋਪਿ. ਓਤਾਰਨ੍ਤਿ ਵਿਵਰਂ. ਆਰਮ੍ਮਣਨ੍ਤਿ ਪਚ੍ਚਯਂ. ਨਲ਼ਾਗਾਰਤਿਣਾਗਾਰਂ ਵਿਯ ਹਿ ਸਵਿਸੇਵਨਾਨਿ ਆਯਤਨਾਨਿ, ਤਿਣੁਕ੍ਕਾ ਵਿਯ ਕਿਲੇਸੁਪ੍ਪਤ੍ਤਿਰਹਂ ਆਰਮ੍ਮਣਂ, ਤਿਣੁਕ੍ਕਾਯ ਠਪਿਤਠਪਿਤਟ੍ਠਾਨੇ ਅਙ੍ਗਾਰਸ੍ਸੁਜ੍ਜਲਨਂ ਵਿਯ ਆਰਮ੍ਮਣੇ ਆਪਾਥਮਾਗਤੇ ਕਿਲੇਸਾਨਂ ਉਪ੍ਪਤ੍ਤਿ. ਤੇਨ ਵੁਤ੍ਤਂ ਲਭੇਥ ਮਾਰੋ ਓਤਾਰਨ੍ਤਿ.
ਸੁਕ੍ਕਪਕ੍ਖੇ ਬਹਲਮਤ੍ਤਿਕਪਿਣ੍ਡਾਵਲੇਪਨਂ ਕੂਟਾਗਾਰਂ ਵਿਯ ਨਿਬ੍ਬਿਸੇਵਨਾਨਿ ਆਯਤਨਾਨਿ, ਤਿਣੁਕ੍ਕਾ ਵਿਯ ਵੁਤ੍ਤਪਕਾਰਾਰਮ੍ਮਣਂ, ਤਿਣੁਕ੍ਕਾਯ ਠਪਿਤਠਪਿਤਟ੍ਠਾਨੇ ਨਿਬ੍ਬਾਪਨਂ ਵਿਯ ਨਿਬ੍ਬਿਸੇਵਨਾਨਂ ਆਯਤਨਾਨਂ ਆਰਮ੍ਮਣੇ ਆਪਾਥਮਾਗਤੇ ਕਿਲੇਸਪਰਿਲ਼ਾਹਸ੍ਸ ਅਨੁਪ੍ਪਤ੍ਤਿ. ਤੇਨ ਵੁਤ੍ਤਂ ਨੇਵ ਲਭੇਥ ਮਾਰੋ ਓਤਾਰਨ੍ਤਿ.