੧੮. ਸਮੁਦ੍ਦਵਗ੍ਗੋ

੧. ਪਠਮਸਮੁਦ੍ਦਸੁਤ੍ਤਵਣ੍ਣਨਾ

੨੨੮. ਸਮੁਦ੍ਦਵਗ੍ਗਸ੍ਸ ਪਠਮੇ ਚਕ੍ਖੁ, ਭਿਕ੍ਖਵੇ, ਪੁਰਿਸਸ੍ਸ ਸਮੁਦ੍ਦੋਤਿ ਯਦਿ ਦੁਪ੍ਪੂਰਣਟ੍ਠੇਨ ਯਦਿ ਵਾ ਸਮੁਦ੍ਦਨਟ੍ਠੇਨ ਸਮੁਦ੍ਦੋ, ਚਕ੍ਖੁਮੇਵ ਸਮੁਦ੍ਦੋ. ਤਸ੍ਸ ਹਿ ਪਥਵਿਤੋ ਯਾਵ ਅਕਨਿਟ੍ਠਬ੍ਰਹ੍ਮਲੋਕਾ ਨੀਲਾਦਿਆਰਮ੍ਮਣਂ ਸਮੋਸਰਨ੍ਤਂ ਪਰਿਪੁਣ੍ਣਭਾਵਂ ਕਾਤੁਂ ਨ ਸਕ੍ਕੋਤਿ, ਏਵਂ ਦੁਪ੍ਪੂਰਣਟ੍ਠੇਨਪਿ ਸਮੁਦ੍ਦੋ. ਚਕ੍ਖੁ ਚ ਤੇਸੁ ਤੇਸੁ ਨੀਲਾਦੀਸੁ ਆਰਮ੍ਮਣੇਸੁ ਸਮੁਦ੍ਦਤਿ, ਅਸਂਵੁਤਂ ਹੁਤ੍ਵਾ ਓਸਰਮਾਨਂ ਕਿਲੇਸੁਪ੍ਪਤ੍ਤਿਯਾ ਕਾਰਣਭਾਵੇਨ ਸਦੋਸਗਮਨੇਨ ਗਚ੍ਛਤੀਤਿ ਸਮੁਦ੍ਦਨਟ੍ਠੇਨਪਿ ਸਮੁਦ੍ਦੋ. ਤਸ੍ਸ ਰੂਪਮਯੋ ਵੇਗੋਤਿ ਸਮੁਦ੍ਦਸ੍ਸ ਅਪ੍ਪਮਾਣੋ ਊਮਿਮਯੋ ਵੇਗੋ ਵਿਯ ਤਸ੍ਸਾਪਿ ਚਕ੍ਖੁਸਮੁਦ੍ਦਸ੍ਸ ਸਮੋਸਰਨ੍ਤਸ੍ਸ ਨੀਲਾਦਿਭੇਦਸ੍ਸ ਆਰਮ੍ਮਣਸ੍ਸ ਵਸੇਨ ਅਪ੍ਪਮੇਯ੍ਯੋ ਰੂਪਮਯੋ ਵੇਗੋ ਵੇਦਿਤਬ੍ਬੋ. ਯੋ ਤਂ ਰੂਪਮਯਂ ਵੇਗਂ ਸਹਤੀਤਿ ਯੋ ਤਂ ਚਕ੍ਖੁਸਮੁਦ੍ਦੇ ਸਮੋਸਟਂ ਰੂਪਮਯਂ ਵੇਗਂ, ਮਨਾਪੇ ਰੂਪੇ ਰਾਗਂ, ਅਮਨਾਪੇ ਦੋਸਂ, ਅਸਮਪੇਕ੍ਖਿਤੇ ਮੋਹਨ੍ਤਿ ਏਵਂ ਰਾਗਾਦਿਕਿਲੇਸੇ ਅਨੁਪ੍ਪਾਦੇਨ੍ਤੋ ਉਪੇਕ੍ਖਕਭਾਵੇਨ ਸਹਤਿ.

ਸਊਮਿਨ੍ਤਿਆਦੀਸੁ ਕਿਲੇਸਊਮੀਹਿ ਸਊਮਿਂ. ਕਿਲੇਸਾਵਟ੍ਟੇਹਿ ਸਾਵਟ੍ਟਂ. ਕਿਲੇਸਗਾਹੇਹਿ ਸਗਾਹਂ. ਕਿਲੇਸਰਕ੍ਖਸੇਹਿ ਸਰਕ੍ਖਸਂ. ਕੋਧੂਪਾਯਾਸਸ੍ਸ ਚ ਵਸੇਨ ਸਊਮਿਂ. ਵੁਤਞ੍ਹੇਤਂ ‘‘ਊਮਿਭਯਨ੍ਤਿ ਖੋ, ਭਿਕ੍ਖਵੇ, ਕੋਧੂਪਾਯਾਸਸ੍ਸੇਤਂ ਅਧਿਵਚਨ’’ਨ੍ਤਿ (ਇਤਿਵੁ. ੧੦੯; ਮ. ਨਿ. ੨.੧੬੨; ਅ. ਨਿ. ੪.੧੨੨). ਕਾਮਗੁਣਵਸੇਨ ਸਾਵਟ੍ਟਂ. ਵੁਤਞ੍ਹੇਤਂ ‘‘ਆਵਟ੍ਟਗ੍ਗਾਹੋਤਿ ਖੋ, ਭਿਕ੍ਖਵੇ, ਪਞ੍ਚਨ੍ਨੇਤਂ ਕਾਮਗੁਣਾਨਂ ਅਧਿਵਚਨ’’ਨ੍ਤਿ (ਸਂ. ਨਿ. ੪.੨੪੧). ਮਾਤੁਗਾਮਵਸੇਨ ਸਗਾਹਂ ਸਰਕ੍ਖਸਂ. ਵੁਤ੍ਤਞ੍ਹੇਤਂ ‘‘ਗਾਹਰਕ੍ਖਸੋਤਿ ਖੋ, ਭਿਕ੍ਖਵੇ, ਮਾਤੁਗਾਮਸ੍ਸੇਤਂ ਅਧਿਵਚਨ’’ਨ੍ਤਿ (ਇਤਿਵੁ. ੧੦੯). ਸੇਸਵਾਰੇਸੁਪਿ ਏਸੇਵ ਨਯੋ. ਸਭਯਂ ਦੁਤ੍ਤਰਂ ਅਚ੍ਚਤਰੀਤਿ ਊਮਿਭਯੇਨ ਸਭਯਂ ਦੁਰਤਿਕ੍ਕਮਂ ਅਤਿਕ੍ਕਮਿ. ਲੋਕਨ੍ਤਗੂਤਿ ਸਙ੍ਖਾਰਲੋਕਸ੍ਸ ਅਨ੍ਤਂ ਗਤੋ. ਪਾਰਗਤੋਤਿ ਵੁਚ੍ਚਤੀਤਿ ਨਿਬ੍ਬਾਨਂ ਗਤੋਤਿ ਕਥੀਯਤਿ.

੨-੩. ਦੁਤਿਯਸਮੁਦ੍ਦਸੁਤ੍ਤਾਦਿਵਣ੍ਣਨਾ

੨੨੯-੨੩੦. ਦੁਤਿਯੇ ਸਮੁਦ੍ਦੋਤਿ ਸਮੁਦ੍ਦਨਟ੍ਠੇਨ ਸਮੁਦ੍ਦੋ, ਕਿਲੇਦਨਟ੍ਠੇਨ ਤੇਮਨਟ੍ਠੇਨਾਤਿ ਵੁਤ੍ਤਂ ਹੋਤਿ. ਯੇਭੁਯ੍ਯੇਨਾਤਿ ਠਪੇਤ੍ਵਾ ਅਰਿਯਸਾਵਕੇ. ਸਮੁਨ੍ਨਾਤਿ ਕਿਲਿਨ੍ਨਾ ਤਿਨ੍ਤਾ ਨਿਮੁਗ੍ਗਾ. ਤਨ੍ਤਾਕੁਲਕਜਾਤਾਤਿਆਦਿ ਹੇਟ੍ਠਾ ਵਿਤ੍ਥਾਰਿਤਮੇਵ. ਮਚ੍ਚੁਜਹੋਤਿ ਤਯੋ ਮਚ੍ਚੂ ਜਹਿਤ੍ਵਾ ਠਿਤੋ. ਨਿਰੁਪਧੀਤਿ ਤੀਹਿ ਉਪਧੀਹਿ ਅਨੁਪਧਿ. ਅਪੁਨਬ੍ਭਵਾਯਾਤਿ ਨਿਬ੍ਬਾਨਤ੍ਥਾਯ. ਅਮੋਹਯੀ ਮਚ੍ਚੁਰਾਜਨ੍ਤਿ ਯਥਾ ਤਸ੍ਸ ਗਤਿਂ ਨ ਜਾਨਾਤਿ, ਏਵਂ ਮਚ੍ਚੁਰਾਜਾਨਂ ਮੋਹੇਤ੍ਵਾ ਗਤੋ. ਤਤਿਯਂ ਵੁਤ੍ਤਨਯਮੇਵ.

੪-੬. ਖੀਰਰੁਕ੍ਖੋਪਮਸੁਤ੍ਤਾਦਿਵਣ੍ਣਨਾ

੨੩੧-੨੩੩. ਚਤੁਤ੍ਥੇ ਅਪ੍ਪਹੀਨਟ੍ਠੇਨ ਅਤ੍ਥਿ, ਤੇਨੇਵਾਹ ਸੋ ਅਪ੍ਪਹੀਨੋਤਿ. ਪਰਿਤ੍ਤਾਤਿ, ਪਬ੍ਬਤਮਤ੍ਤਮ੍ਪਿ ਰੂਪਂ ਅਨਿਟ੍ਠਂ ਅਰਜਨੀਯਂ ਪਰਿਤ੍ਤਂ ਨਾਮ ਹੋਤਿ, ਏਵਰੂਪਾਪਿਸ੍ਸ ਰੂਪਾ ਚਿਤ੍ਤਂ ਪਰਿਯਾਦਿਯਨ੍ਤੀਤਿ ਦਸ੍ਸੇਤਿ. ਕੋ ਪਨ ਵਾਦੋ ਅਧਿਮਤ੍ਤਾਨਨ੍ਤਿ ਇਟ੍ਠਾਰਮ੍ਮਣਂ ਪਨਸ੍ਸ ਰਜਨੀਯਂ ਵਤ੍ਥੁ ਚਿਤ੍ਤਂ ਪਰਿਯਾਦਿਯਤੀਤਿ ਏਤ੍ਥ ਕਾ ਕਥਾ? ਏਤ੍ਥ ਚ ਨਖਪਿਟ੍ਠਿਪਮਾਣਮ੍ਪਿ ਮਣਿਮੁਤ੍ਤਾਦਿ ਰਜਨੀਯਂ ਵਤ੍ਥੁ ਅਧਿਮਤ੍ਤਾਰਮ੍ਮਣਮੇਵਾਤਿ ਵੇਦਿਤਬ੍ਬਂ. ਦਹਰੋਤਿਆਦੀਨਿ ਤੀਣਿਪਿ ਅਞ੍ਞਮਞ੍ਞਵੇਵਚਨਾਨੇਵ. ਆਭਿਨ੍ਦੇਯ੍ਯਾਤਿ ਪਹਰੇਯ੍ਯ ਪਦਾਲੇਯ੍ਯ ਵਾ. ਪਞ੍ਚਮੇ ਤਦੁਭਯਨ੍ਤਿ ਤਂ ਉਭਯਂ. ਛਟ੍ਠਂ ਉਤ੍ਤਾਨਮੇਵ.

੭. ਉਦਾਯੀਸੁਤ੍ਤਵਣ੍ਣਨਾ

੨੩੪. ਸਤ੍ਤਮੇ ਅਨੇਕਪਰਿਯਾਯੇਨਾਤਿ ਅਨੇਕੇਹਿ ਕਾਰਣੇਹਿ. ਇਤਿਪਾਯਨ੍ਤਿ ਇਤਿਪਿ ਅਯਂ. ਇਮਸ੍ਮਿਂ ਸੁਤ੍ਤੇ ਅਨਿਚ੍ਚੇਨ ਅਨਤ੍ਤਲਕ੍ਖਣਂ ਕਥਿਤਂ.

੮. ਆਦਿਤ੍ਤਪਰਿਯਾਯਸੁਤ੍ਤਵਣ੍ਣਨਾ

੨੩੫. ਅਟ੍ਠਮੇ ਅਨੁਬ੍ਯਞ੍ਜਨਸੋ ਨਿਮਿਤ੍ਤਗ੍ਗਾਹੋਤਿ ‘‘ਹਤ੍ਥਾ ਸੋਭਨਾ ਪਾਦਾ ਸੋਭਨਾ’’ਤਿ ਏਵਂ ਅਨੁਬ੍ਯਞ੍ਜਨਵਸੇਨ ਨਿਮਿਤ੍ਤਗ੍ਗਾਹੋ. ਨਿਮਿਤ੍ਤਗ੍ਗਾਹੋਤਿ ਹਿ ਸਂਸਨ੍ਦੇਤ੍ਵਾ ਗਹਣਂ, ਅਨੁਬ੍ਯਞ੍ਜਨਗ੍ਗਾਹੋਤਿ ਵਿਭਤ੍ਤਿਗਹਣਂ. ਨਿਮਿਤ੍ਤਗ੍ਗਾਹੋ ਕੁਮ੍ਭੀਲਸਦਿਸੋ ਸਬ੍ਬਮੇਵ ਗਣ੍ਹਾਤਿ, ਅਨੁਬ੍ਯਞ੍ਜਨਗ੍ਗਾਹੋ ਰਤ੍ਤਪਾਸਦਿਸੋ ਵਿਭਜਿਤ੍ਵਾ ਹਤ੍ਥਪਾਦਾਦੀਸੁ ਤਂ ਤਂ ਕੋਟ੍ਠਾਸਂ. ਇਮੇ ਪਨ ਦ੍ਵੇ ਗਾਹਾ ਏਕਜਵਨਵਾਰੇਪਿ ਲਬ੍ਭਨ੍ਤਿ, ਨਾਨਾਜਵਨਵਾਰੇ ਵਤ੍ਤਬ੍ਬਮੇਵ ਨਤ੍ਥਿ.

ਨਿਮਿਤ੍ਤਸ੍ਸਾਦਗਥਿਤਨ੍ਤਿ ਨਿਮਿਤ੍ਤਸ੍ਸਾਦੇਨ ਗਨ੍ਥਿਤਂ ਬਦ੍ਧਂ. ਵਿਞ੍ਞਾਣਨ੍ਤਿ ਕਮ੍ਮਵਿਞ੍ਞਾਣਂ. ਤਸ੍ਮਿਂ ਚੇ ਸਮਯੇ ਕਾਲਂ ਕਰੇਯ੍ਯਾਤਿ ਨ ਕੋਚਿ ਸਂਕਿਲਿਟ੍ਠੇਨ ਚਿਤ੍ਤੇਨ ਕਾਲਂ ਕਰੋਨ੍ਤੋ ਨਾਮ ਅਤ੍ਥਿ. ਸਬ੍ਬਸਤ੍ਤਾਨਞ੍ਹਿ ਭਵਙ੍ਗੇਨੇਵ ਕਾਲਕਿਰਿਯਾ ਹੋਤਿ. ਕਿਲੇਸਭਯਂ ਪਨ ਦਸ੍ਸੇਨ੍ਤੋ ਏਵਮਾਹ. ਸਮਯਵਸੇਨ ਵਾ ਏਵਂ ਵੁਤ੍ਤਂ. ਚਕ੍ਖੁਦ੍ਵਾਰਸ੍ਮਿਞ੍ਹਿ ਆਪਾਥਗਤੇ ਆਰਮ੍ਮਣੇ ਰਤ੍ਤਚਿਤ੍ਤਂ ਵਾ ਦੁਟ੍ਠਚਿਤ੍ਤਂ ਵਾ ਮੂਲ਼੍ਹਚਿਤ੍ਤਂ ਵਾ ਆਰਮ੍ਮਣਰਸਂ ਅਨੁਭਵਿਤ੍ਵਾ ਭਵਙ੍ਗਂ ਓਤਰਤਿ, ਭਵਙ੍ਗੇ ਠਤ੍ਵਾ ਕਾਲਕਿਰਿਯਂ ਕਰੋਤਿ. ਤਸ੍ਮਿਂ ਸਮਯੇ ਕਾਲਂ ਕਰੋਨ੍ਤਸ੍ਸ ਦ੍ਵੇਵ ਗਤਿਯੋ ਪਾਟਿਕਙ੍ਖਾ, ਇਮਸ੍ਸ ਸਮਯਸ੍ਸ ਵਸੇਨੇਤਂ ਵੁਤ੍ਤਂ.

ਇਮਂ ਖ੍ਵਾਹਂ, ਭਿਕ੍ਖਵੇ, ਆਦੀਨਵਨ੍ਤਿ ਇਮਂ ਅਨੇਕਾਨਿ ਵਸ੍ਸਸਤਸਹਸ੍ਸਾਨਿ ਨਿਰਯੇ ਅਨੁਭਵਿਤਬ੍ਬਂ ਦੁਕ੍ਖਂ ਸਮ੍ਪਸ੍ਸਮਾਨੋ ਏਵਂ ਵਦਾਮਿ ਤਤ੍ਤਾਯ ਅਯੋਸਲਾਕਾਯ ਅਕ੍ਖੀਨਿ ਅਞ੍ਜਾਪੇਤੁਕਾਮੋਤਿ. ਇਮਿਨਾ ਨਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ. ਅਯੋਸਙ੍ਕੁਨਾਤਿ ਅਯਸੂਲੇਨ. ਸਮ੍ਪਲਿਮਟ੍ਠਨ੍ਤਿ ਦ੍ਵੇਪਿ ਕਣ੍ਣਚ੍ਛਿਦ੍ਦਾਨਿ ਵਿਨਿਵਿਜ੍ਝਿਤ੍ਵਾ ਪਥਵਿਯਂ ਆਕੋਟਨਵਸੇਨ ਸਮ੍ਪਲਿਮਟ੍ਠਂ.

ਤਤਿਯਵਾਰੇ ਸਮ੍ਪਲਿਮਟ੍ਠਨ੍ਤਿ ਨਖਚ੍ਛੇਦਨਂ ਪਵੇਸੇਤ੍ਵਾ ਉਕ੍ਖਿਪਿਤ੍ਵਾ ਸਹਧੁਨਟ੍ਠੇਨ ਛਿਨ੍ਦਿਤ੍ਵਾ ਪਾਤਨਵਸੇਨ ਸਮ੍ਪਲਿਮਟ੍ਠਂ. ਚਤੁਤ੍ਥਵਾਰੇ ਸਮ੍ਪਲਿਮਟ੍ਠਨ੍ਤਿ ਬਨ੍ਧਨਮੂਲਂ ਛੇਤ੍ਵਾ ਪਾਤਨਵਸੇਨ ਸਮ੍ਪਲਿਮਟ੍ਠਂ. ਪਞ੍ਚਮਵਾਰੇ ਸਮ੍ਪਲਿਮਟ੍ਠਨ੍ਤਿ ਤਿਖਿਣਾਯ ਸਤ੍ਤਿਯਾ ਕਾਯਪਸਾਦਂ ਉਪ੍ਪਾਟੇਤ੍ਵਾ ਪਤਨਵਸੇਨ ਸਮ੍ਪਲਿਮਟ੍ਠਂ. ਸਤ੍ਤਿਯਾਤਿ ਏਤ੍ਥ ਮਹਤੀ ਦਣ੍ਡਕਵਾਸਿ ਵੇਦਿਤਬ੍ਬਾ. ਸੋਤ੍ਤਨ੍ਤਿ ਨਿਪਜ੍ਜਿਤ੍ਵਾ ਨਿਦ੍ਦੋਕ੍ਕਮਨਂ. ਯਥਾਰੂਪਾਨਂ ਵਿਤਕ੍ਕਾਨਂ ਵਸਂ ਗਤੋ ਸਙ੍ਘਂ ਭਿਨ੍ਦੇਯ੍ਯਾਤਿ ਇਮਿਨਾ ਵਿਤਕ੍ਕਾਨਂ ਯਾਵ ਸਙ੍ਘਭੇਦਾ ਪਾਪਕਮ੍ਮਾਵਹਨਤਾ ਦਸ੍ਸਿਤਾ. ਸੇਸਮੇਤ੍ਥ ਉਤ੍ਤਾਨਮੇਵ.

੯-੧੦. ਪਠਮਹਤ੍ਥਪਾਦੋਪਮਸੁਤ੍ਤਾਦਿਵਣ੍ਣਨਾ

੨੩੬-੨੩੭. ਨਵਮੇ ਹਤ੍ਥੇਸੁ, ਭਿਕ੍ਖਵੇ, ਸਤੀਤਿ ਹਤ੍ਥੇਸੁ ਵਿਜ੍ਜਮਾਨੇਸੁ. ਦਸਮੇ ਨ ਹੋਤੀਤਿ ਵੁਚ੍ਚਮਾਨੇ ਬੁਜ੍ਝਨਕਾਨਂ ਅਜ੍ਝਾਸਯਵਸੇਨ ਵੁਤ੍ਤਂ. ਦ੍ਵੀਸੁਪਿ ਚੇਤੇਸੁ ਵਿਪਾਕਸੁਖਦੁਕ੍ਖਮੇਵ ਦਸ੍ਸੇਤ੍ਵਾ ਵਟ੍ਟਵਿਵਟ੍ਟਂ ਕਥਿਤਨ੍ਤਿ.

ਸਮੁਦ੍ਦਵਗ੍ਗੋ ਨਿਟ੍ਠਿਤੋ.