੧੫. ਨਵਪੁਰਾਣਵਗ੍ਗੋ

੧. ਕਮ੍ਮਨਿਰੋਧਸੁਤ੍ਤਵਣ੍ਣਨਾ

੧੪੬. ਨਵਪੁਰਾਣਵਗ੍ਗਸ੍ਸ ਪਠਮੇ ਨਵਪੁਰਾਣਾਨੀਤਿ ਨਵਾਨਿ ਚ ਪੁਰਾਣਾਨਿ ਚ. ਚਕ੍ਖੁ, ਭਿਕ੍ਖਵੇ, ਪੁਰਾਣਕਮ੍ਮਨ੍ਤਿ ਨ ਚਕ੍ਖੁ ਪੁਰਾਣਂ, ਕਮ੍ਮਮੇਵ ਪੁਰਾਣਂ, ਕਮ੍ਮਤੋ ਪਨ ਨਿਬ੍ਬਤ੍ਤਤ੍ਤਾ ਪਚ੍ਚਯਨਾਮੇਨ ਏਵਂ ਵੁਤ੍ਤਂ. ਅਭਿਸਙ੍ਖਤਨ੍ਤਿ ਪਚ੍ਚਯੇਹਿ ਅਭਿਸਮਾਗਨ੍ਤ੍ਵਾ ਕਤਂ. ਅਭਿਸਞ੍ਚੇਤਯਿਤਨ੍ਤਿ ਚੇਤਨਾਯ ਪਕਪ੍ਪਿਤਂ. ਵੇਦਨਿਯਂ ਦਟ੍ਠਬ੍ਬਨ੍ਤਿ ਵੇਦਨਾਯ ਵਤ੍ਥੂਤਿ ਪਸ੍ਸਿਤਬ੍ਬਂ. ਨਿਰੋਧਾ ਵਿਮੁਤ੍ਤਿਂ ਫੁਸਤੀਤਿ ਇਮਸ੍ਸ ਤਿਵਿਧਸ੍ਸ ਕਮ੍ਮਸ੍ਸ ਨਿਰੋਧੇਨ ਵਿਮੁਤ੍ਤਿਂ ਫੁਸਤਿ. ਅਯਂ ਵੁਚ੍ਚਤੀਤਿ ਅਯਂ ਤਸ੍ਸਾ ਵਿਮੁਤ੍ਤਿਯਾ ਆਰਮ੍ਮਣਭੂਤੋ ਨਿਰੋਧੋ ਕਮ੍ਮਨਿਰੋਧੋਤਿ ਵੁਚ੍ਚਤਿ. ਇਤਿ ਇਮਸ੍ਮਿਂ ਸੁਤ੍ਤੇ ਪੁਬ੍ਬਭਾਗਵਿਪਸ੍ਸਨਾ ਕਥਿਤਾ.

੨-੫. ਅਨਿਚ੍ਚਨਿਬ੍ਬਾਨਸਪ੍ਪਾਯਸੁਤ੍ਤਾਦਿਵਣ੍ਣਨਾ

੧੪੭-੧੫੦. ਦੁਤਿਯੇ ਨਿਬ੍ਬਾਨਸਪ੍ਪਾਯਨ੍ਤਿ ਨਿਬ੍ਬਾਨਸ੍ਸ ਸਪ੍ਪਾਯਂ ਉਪਕਾਰਪਟਿਪਦਂ. ਤਤਿਯਾਦੀਸੁਪਿ ਏਸੇਵ ਨਯੋ. ਪਟਿਪਾਟਿਯਾ ਪਨ ਚਤੂਸੁਪਿ ਏਤੇਸੁ ਸੁਤ੍ਤੇਸੁ ਸਹ ਵਿਪਸ੍ਸਨਾਯ ਚਤ੍ਤਾਰੋ ਮਗ੍ਗਾ ਕਥਿਤਾ.

੬-੭. ਅਨ੍ਤੇਵਾਸਿਕਸੁਤ੍ਤਾਦਿਵਣ੍ਣਨਾ

੧੫੧-੧੫੨. ਛਟ੍ਠੇ ਅਨਨ੍ਤੇਵਾਸਿਕਨ੍ਤਿ ਅਨ੍ਤੋ ਵਸਨਕਕਿਲੇਸਵਿਰਹਿਤਂ. ਅਨਾਚਰਿਯਕਨ੍ਤਿ ਆਚਰਣਕਕਿਲੇਸਵਿਰਹਿਤਂ. ਅਨ੍ਤਸ੍ਸ ਵਸਨ੍ਤੀਤਿ ਅਨ੍ਤੋ ਅਸ੍ਸ ਵਸਨ੍ਤਿ. ਤੇ ਨਂ ਸਮੁਦਾਚਰਨ੍ਤੀਤਿ ਤੇ ਏਤਂ ਅਧਿਭਵਨ੍ਤਿ ਅਜ੍ਝੋਤ੍ਥਰਨ੍ਤਿ ਸਿਕ੍ਖਾਪੇਨ੍ਤਿ ਵਾ. ‘‘ਏਵਂ ਵੇਜ੍ਜਕਮ੍ਮਂ ਕਰੋਹਿ, ਏਵਂ ਦੂਤਕਮ੍ਮ’’ਨ੍ਤਿ ਇਤਿ ਸਿਕ੍ਖਾਪਨਸਙ੍ਖਾਤੇਨ ਸਮੁਦਾਚਰਣਤ੍ਥੇਨਸ੍ਸ ਤੇ ਆਚਰਿਯਾ ਨਾਮ ਹੋਨ੍ਤਿ, ਤੇਹਿ ਆਚਰਿਯੇਹਿ ਸਾਚਰਿਯਕੋਤਿ ਵੁਚ੍ਚਤਿ. ਸੇਸਮੇਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਸਤ੍ਤਮਂ ਹੇਟ੍ਠਾ ਕਥਿਤਨਯਮੇਵ.

੮. ਅਤ੍ਥਿਨੁਖੋਪਰਿਯਾਯਸੁਤ੍ਤਵਣ੍ਣਨਾ

੧੫੩. ਅਟ੍ਠਮੇ ਯਂ ਪਰਿਯਾਯਂ ਆਗਮ੍ਮਾਤਿ ਯਂ ਕਾਰਣਂ ਆਗਮ੍ਮ. ਅਞ੍ਞਤ੍ਰੇਵ ਸਦ੍ਧਾਯਾਤਿ ਵਿਨਾ ਸਦ੍ਧਾਯ ਸਦ੍ਧਂ ਅਪਨੇਤ੍ਵਾ. ਏਤ੍ਥ ਚ ਸਦ੍ਧਾਤਿ ਨ ਪਚ੍ਚਕ੍ਖਾ ਸਦ੍ਧਾ. ਯੋ ਪਨ ਪਰਸ੍ਸ ਏਵਂ ਕਿਰ ਏਵਂ ਕਿਰਾਤਿ ਕਥੇਨ੍ਤਸ੍ਸ ਸੁਤ੍ਵਾ ਉਪ੍ਪਨ੍ਨੋ ਸਦ੍ਦਹਨਾਕਾਰੋ, ਤਂ ਸਨ੍ਧਾਯੇਤਂ ਵੁਤ੍ਤਂ. ਰੁਚਿਆਦੀਸੁਪਿ ਰੁਚਾਪੇਤ੍ਵਾ ਖਮਾਪੇਤ੍ਵਾ ਅਤ੍ਥੇਤਨ੍ਤਿ ਗਹਣਾਕਾਰੋ ਰੁਚਿ ਨਾਮ, ਏਵਂ ਕਿਰ ਭਵਿਸ੍ਸਤੀਤਿ ਅਨੁਸ੍ਸਵਨਂ ਅਨੁਸ੍ਸਵੋ, ਨਿਸੀਦਿਤ੍ਵਾ ਏਕਂ ਕਾਰਣਂ ਚਿਨ੍ਤੇਨ੍ਤਸ੍ਸ ਕਾਰਣਂ ਉਪਟ੍ਠਾਤਿ, ਏਵਂ ਉਪਟ੍ਠਿਤਸ੍ਸ ਅਤ੍ਥੇਤਨ੍ਤਿ ਗਹਣਂ ਆਕਾਰਪਰਿਵਿਤਕ੍ਕੋ ਨਾਮ, ਕਾਰਣਵਿਤਕ੍ਕੋਤਿ ਅਤ੍ਥੋ. ਕਾਰਣਂ ਚਿਨ੍ਤੇਨ੍ਤਸ੍ਸ ਪਾਪਿਕਾ ਲਦ੍ਧਿ ਉਪ੍ਪਜ੍ਜਤਿ, ਤਂ ਅਤ੍ਥੇਸਾਤਿ ਗਹਣਾਕਾਰੋ ਦਿਟ੍ਠਿਨਿਜ੍ਝਾਨਕ੍ਖਨ੍ਤਿ ਨਾਮ. ਅਞ੍ਞਂ ਬ੍ਯਾਕਰੇਯ੍ਯਾਤਿ ਇਮਾਨਿ ਪਞ੍ਚ ਠਾਨਾਨਿ ਮੁਞ੍ਚਿਤ੍ਵਾ ਅਰਹਤ੍ਤਂ ਬ੍ਯਾਕਰੇਯ੍ਯ. ਇਮਸ੍ਮਿਂ ਸੁਤ੍ਤੇ ਸੇਖਾਸੇਖਾਨਂ ਪਚ੍ਚਵੇਕ੍ਖਣਾ ਕਥਿਤਾ.

੯-੧੦. ਇਨ੍ਦ੍ਰਿਯਸਮ੍ਪਨ੍ਨਸੁਤ੍ਤਾਦਿਵਣ੍ਣਨਾ

੧੫੪-੧੫੫. ਨਵਮੇ ਇਨ੍ਦ੍ਰਿਯਸਮ੍ਪਨ੍ਨੋਤਿ ਪਰਿਪੁਣ੍ਣਿਨ੍ਦ੍ਰਿਯੋ. ਤਤ੍ਥ ਯੇਨ ਛ ਇਨ੍ਦ੍ਰਿਯਾਨਿ ਸਮ੍ਮਸਿਤ੍ਵਾ ਅਰਹਤ੍ਤਂ ਪਤ੍ਤਂ, ਸੋ ਤੇਹਿ ਨਿਬ੍ਬਿਸੇਵਨੇਹਿ ਇਨ੍ਦ੍ਰਿਯੇਹਿ ਸਮਨ੍ਨਾਗਤਤ੍ਤਾ, ਚਕ੍ਖਾਦੀਨਿ ਵਾ ਛ ਇਨ੍ਦ੍ਰਿਯਾਨਿ ਸਮ੍ਮਸਨ੍ਤਸ੍ਸ ਉਪ੍ਪਨ੍ਨੇਹਿ ਸਦ੍ਧਾਦੀਹਿ ਇਨ੍ਦ੍ਰਿਯੇਹਿ ਸਮਨ੍ਨਾਗਤਤ੍ਤਾ ਪਰਿਪੁਣ੍ਣਿਨ੍ਦ੍ਰਿਯੋ ਨਾਮ ਹੋਤਿ, ਤਂ ਸਨ੍ਧਾਯ ਭਗਵਾ ਚਕ੍ਖੁਨ੍ਦ੍ਰਿਯੇ ਚੇਤਿਆਦਿਨਾ ਨਯੇਨ ਦੇਸਨਂ ਵਿਤ੍ਥਾਰੇਤ੍ਵਾ ਏਤ੍ਤਾਵਤਾ ਖੋ ਭਿਕ੍ਖੁ ਇਨ੍ਦ੍ਰਿਯਸਮ੍ਪਨ੍ਨੋ ਹੋਤੀਤਿ ਆਹ. ਦਸਮਂ ਹੇਟ੍ਠਾ ਵੁਤ੍ਤਨਯਮੇਵਾਤਿ.

ਨਵਪੁਰਾਣਵਗ੍ਗੋ ਪਞ੍ਚਦਸਮੋ.

ਤਤਿਯੋ ਪਣ੍ਣਾਸਕੋ.