੧੦. ਸਲ਼ਵਗ੍ਗੋ
੧. ਅਦਨ੍ਤਅਗੁਤ੍ਤਵਣ੍ਣਨਾ
੯੪. ਸਲ਼ਵਗ੍ਗਸ੍ਸ ਪਠਮੇ ਅਦਨ੍ਤਾਤਿ ਅਦਮਿਤਾ. ਅਗੁਤ੍ਤਾਤਿ ਅਗੋਪਿਤਾ. ਅਰਕ੍ਖਿਤਾਤਿ ਨ ਰਕ੍ਖਿਤਾ. ਅਸਂਵੁਤਾਤਿ ਅਪਿਹਿਤਾ. ਦੁਕ੍ਖਾਧਿਵਾਹਾ ਹੋਨ੍ਤੀਤਿ ਨੇਰਯਿਕਾਦਿਭੇਦਂ ਅਧਿਕਦੁਕ੍ਖਂ ਆਵਹਨਕਾ ਹੋਨ੍ਤਿ. ਸੁਖਾਧਿਵਾਹਾ ਹੋਨ੍ਤੀਤਿ ਝਾਨਮਗ੍ਗਫਲਪਭੇਦਂ ਅਧਿਕਸੁਖਂ ਆਵਹਨਕਾ ਹੋਨ੍ਤਿ. ਅਧਿਵਹਾਤਿਪਿ ਪਾਠੋ, ਏਸੇਵਤ੍ਥੋ.
ਸਲ਼ੇਵਾਤਿ ਛ ਏਵ. ਅਸਂਵੁਤੋ ਯਤ੍ਥ ਦੁਕ੍ਖਂ ਨਿਗਚ੍ਛਤੀਤਿ ਯੇਸੁ ਆਯਤਨੇਸੁ ਸਂਵਰਵਿਰਹਿਤੋ ਦੁਕ੍ਖਂ ਪਾਪੁਣਾਤਿ. ਤੇਸਞ੍ਚ ਯੇ ਸਂਵਰਣਂ ਅਵੇਦਿਸੁਨ੍ਤਿ ਯੇ ਤੇਸਂ ਆਯਤਨਾਨਂ ਸਂਵਰਂ ਵਿਨ੍ਦਿਂਸੁ ਪਟਿਲਭਿਂਸੁ. ਵਿਹਰਨ੍ਤਾਨਵਸ੍ਸੁਤਾਤਿ ਵਿਹਰਨ੍ਤਿ ਅਨਵਸ੍ਸੁਤਾ ਅਤਿਨ੍ਤਾ.
ਅਸਾਦਿਤਞ੍ਚ ਸਾਦੁਨ੍ਤਿ ਅਸ੍ਸਾਦਵਨ੍ਤਞ੍ਚ ਮਧੁਰਞ੍ਚ. ਫਸ੍ਸਦ੍ਵਯਂ ਸੁਖਦੁਕ੍ਖੇ ਉਪੇਕ੍ਖੇਤਿ ਸੁਖਫਸ੍ਸਞ੍ਚ ਦੁਕ੍ਖਫਸ੍ਸਞ੍ਚਾਤਿ ਇਦਂ ਫਸ੍ਸਦ੍ਵਯਂ ਉਪੇਕ੍ਖੇ, ਉਪੇਕ੍ਖਾਮੇਵੇਤ੍ਥ ਉਪ੍ਪਾਦੇਯ੍ਯਾਤਿ ਅਤ੍ਥੋ. ਫਸ੍ਸਦ੍ਵਯਂ ਸੁਖਦੁਕ੍ਖਂ ਉਪੇਕ੍ਖੋਤਿ ਵਾ ਪਾਠੋ, ਫਸ੍ਸਹੇਤੁਕਂ ਸੁਖਦੁਕ੍ਖਂ ਉਪੇਕ੍ਖੋ, ਸੁਖੇ ਅਨੁਰੋਧਂ ਦੁਕ੍ਖੇ ਚ ਵਿਰੋਧਂ ਅਨੁਪ੍ਪਾਦੇਨ੍ਤੋ ਉਪੇਕ੍ਖਕੋ ਭਵੇਯ੍ਯਾਤਿਪਿ ਅਤ੍ਥੋ. ਅਨਾਨੁਰੁਦ੍ਧੋ ਅਵਿਰੁਦ੍ਧੋ ਕੇਨਚੀਤਿ ਕੇਨਚਿ ਸਦ੍ਧਿਂ ਨੇਵ ਅਨੁਰੁਦ੍ਧੋ ਨ ਵਿਰੁਦ੍ਧੋ ਭਵੇਯ੍ਯ.
ਪਪਞ੍ਚਸਞ੍ਞਾਤਿ ਕਿਲੇਸਸਞ੍ਞਾਯ ਪਪਞ੍ਚਸਞ੍ਞਾ ਨਾਮ ਹੁਤ੍ਵਾ. ਇਤਰੀਤਰਾ ਨਰਾਤਿ ਲਾਮਕਸਤ੍ਤਾ ਪਪਞ੍ਚਯਨ੍ਤਾ ਉਪਯਨ੍ਤੀਤਿ ਪਪਞ੍ਚਯਮਾਨਾ ਵਟ੍ਟਂ ਉਪਗਚ੍ਛਨ੍ਤਿ. ਸਞ੍ਞਿਨੋਤਿ ਸਸਞ੍ਞਾ ਸਤ੍ਤਾ. ਮਨੋਮਯਂ ਗੇਹਸਿਤਞ੍ਚ ਸਬ੍ਬਨ੍ਤਿ ਸਬ੍ਬਮੇਵ ਪਞ੍ਚਕਾਮਗੁਣਗੇਹਨਿਸ੍ਸਿਤਂ ਮਨੋਮਯਂ ਵਿਤਕ੍ਕਂ. ਪਨੁਜ੍ਜਾਤਿ ਪਨੁਦਿਤ੍ਵਾ ਨੀਹਰਿਤ੍ਵਾ. ਨੇਕ੍ਖਮ੍ਮਸਿਤਂ ਇਰੀਯਤੀਤਿ ਦਬ੍ਬਜਾਤਿਕੋ ਭਿਕ੍ਖੁ ਨੇਕ੍ਖਮ੍ਮਸਿਤਂ ਇਰਿਯੇਨ ਇਰੀਯਤਿ.
ਛਸ੍ਸੁ ਯਦਾ ਸੁਭਾਵਿਤੋਤਿ ਛਸੁ ਆਰਮ੍ਮਣੇਸੁ ਯਦਾ ਸੁਟ੍ਠੁ ਭਾਵਿਤੋ. ਫੁਟ੍ਠਸ੍ਸ ਚਿਤ੍ਤਂ ਨ ਵਿਕਮ੍ਪਤੇ ਕ੍ਵਚੀਤਿ ਸੁਖਫਸ੍ਸੇਨ ਵਾ ਦੁਕ੍ਖਫਸ੍ਸੇਨ ਵਾ ਫੁਟ੍ਠਸ੍ਸ ਕਿਸ੍ਮਿਞ੍ਚਿ ਚਿਤ੍ਤਂ ਨ ਕਮ੍ਪਤਿ ਨ ਵੇਧਤਿ. ਭਵਤ੍ਥ ਜਾਤਿਮਰਣਸ੍ਸ ਪਾਰਗਾਤਿ ਜਾਤਿਮਰਣਾਨਂ ਪਾਰਂ ਨਿਬ੍ਬਾਨਂ ਗਮਕਾ ਹੋਥ.
੨. ਮਾਲੁਕ੍ਯਪੁਤ੍ਤਸੁਤ੍ਤਵਣ੍ਣਨਾ
੯੫. ਦੁਤਿਯੇ ਮਾਲੁਕ੍ਯਪੁਤ੍ਤੋਤਿ ਮਾਲੁਕ੍ਯਬ੍ਰਾਹ੍ਮਣਿਯਾ ਪੁਤ੍ਤੋ. ਏਤ੍ਥਾਤਿ ਏਤਸ੍ਮਿਂ ਤਵ ਓਵਾਦਾਯਾਚਨੇ. ਇਮਿਨਾ ਥੇਰਂ ਅਪਸਾਦੇਤਿਪਿ ਉਸ੍ਸਾਦੇਤਿਪਿ. ਕਥਂ? ਅਯਂ ਕਿਰ ਦਹਰਕਾਲੇ ਰੂਪਾਦੀਸੁ ਪਮਜ੍ਜਿਤ੍ਵਾ ਪਚ੍ਛਾ ਮਹਲ੍ਲਕਕਾਲੇ ਅਰਞ੍ਞਵਾਸਂ ਪਤ੍ਥੇਨ੍ਤੋ ਕਮ੍ਮਟ੍ਠਾਨਂ ਯਾਚਤਿ. ਅਥ ਭਗਵਾ ‘‘ਏਤ੍ਥ ਦਹਰੇ ਕਿਂ ਵਕ੍ਖਾਮ? ਮਾਲੁਕ੍ਯਪੁਤ੍ਤੋ ਵਿਯ ਤੁਮ੍ਹੇਪਿ ਤਰੁਣਕਾਲੇ ਪਮਜ੍ਜਿਤ੍ਵਾ ਮਹਲ੍ਲਕਕਾਲੇ ਅਰਞ੍ਞਂ ਪਵਿਸਿਤ੍ਵਾ ਸਮਣਧਮ੍ਮਂ ਕਰੇਯ੍ਯਾਥਾ’’ਤਿ ਇਮਿਨਾ ਅਧਿਪ੍ਪਾਯੇਨ ਭਣਨ੍ਤੋ ਥੇਰਂ ਅਪਸਾਦੇਤਿ ਨਾਮ.
ਯਸ੍ਮਾ ਪਨ ਥੇਰੋ ਮਹਲ੍ਲਕਕਾਲੇਪਿ ਅਰਞ੍ਞਂ ਪਵਿਸਿਤ੍ਵਾ ਸਮਣਧਮ੍ਮਂ ਕਾਤੁਕਾਮੋ, ਤਸ੍ਮਾ ਭਗਵਾ ‘‘ਏਤ੍ਥ ਦਹਰੇ ਕਿਂ ਵਕ੍ਖਾਮ? ਅਯਂ ਅਮ੍ਹਾਕਂ ਮਾਲੁਕ੍ਯਪੁਤ੍ਤੋ ਮਹਲ੍ਲਕਕਾਲੇਪਿ ਅਰਞ੍ਞਂ ਪਵਿਸਿਤ੍ਵਾ ਸਮਣਧਮ੍ਮਂ ਕਤ੍ਤੁਕਾਮੋ ਕਮ੍ਮਟ੍ਠਾਨਂ ਯਾਚਤਿ, ਤੁਮ੍ਹੇ ਨਾਮ ਤਰੁਣਕਾਲੇਪਿ ਵੀਰਿਯਂ ਨ ਕਰੋਥਾ’’ਤਿ ਇਮਿਨਾ ਅਧਿਪ੍ਪਾਯੇਨ ਭਣਨ੍ਤੋ ਥੇਰਂ ਉਸ੍ਸਾਦੇਤਿ ਨਾਮ.
ਯਤ੍ਰ ਹਿ ਨਾਮਾਤਿ ਯੋ ਨਾਮ. ਕਿਞ੍ਚਾਪਾਹਨ੍ਤਿ ਕਿਞ੍ਚਾਪਿ ‘‘ਅਹਂ ਮਹਲ੍ਲਕੋ’’ਤਿ ਞਾਤਂ. ਯਦਿ ਅਹਂ ਮਹਲ੍ਲਕੋ, ਮਹਲ੍ਲਕੋ ਸਮਾਨੋਪਿ ਸਕ੍ਖਿਸ੍ਸਾਮਿ ਸਮਣਧਮ੍ਮਂ ਕਾਤੁਂ, ਦੇਸੇਤੁ ਮੇ, ਭਨ੍ਤੇ, ਭਗਵਾਤਿ ਅਧਿਪ੍ਪਾਯੇਨ ਮਹਲ੍ਲਕਭਾਵਂ ਅਨੁਗ੍ਗਣ੍ਹਨ੍ਤੋ ਓਵਾਦਞ੍ਚ ਪਸਂਸਨ੍ਤੋ ਏਵਮਾਹ.
ਅਦਿਟ੍ਠਾ ਅਦਿਟ੍ਠਪੁਬ੍ਬਾਤਿ ਇਮਸ੍ਮਿਂ ਅਤ੍ਤਭਾਵੇ ਅਦਿਟ੍ਠਾ ਅਤੀਤੇਪਿ ਅਦਿਟ੍ਠਪੁਬ੍ਬਾ. ਨ ਚ ਪਸ੍ਸਸੀਤਿ ਏਤਰਹਿਪਿ ਨ ਪਸ੍ਸਸਿ. ਨ ਚ ਤੇ ਹੋਤਿ ਪਸ੍ਸੇਯ੍ਯਨ੍ਤਿ ਏਵਂ ਸਮਨ੍ਨਾਹਾਰੋਪਿ ਤੇ ਯਤ੍ਥ ਨਤ੍ਥਿ, ਅਪਿ ਨੁ ਤੇ ਤਤ੍ਥ ਛਨ੍ਦਾਦਯੋ ਉਪ੍ਪਜ੍ਜੇਯ੍ਯੁਨ੍ਤਿ ਪੁਚ੍ਛਤਿ.
ਦਿਟ੍ਠੇ ਦਿਟ੍ਠਮਤ੍ਤਨ੍ਤਿ ਰੂਪਾਯਤਨੇ ਚਕ੍ਖੁਵਿਞ੍ਞਾਣੇਨ ਦਿਟ੍ਠੇ ਦਿਟ੍ਠਮਤ੍ਤਂ ਭਵਿਸ੍ਸਤਿ. ਚਕ੍ਖੁਵਿਞ੍ਞਾਣਞ੍ਹਿ ਰੂਪੇ ਰੂਪਮਤ੍ਤਮੇਵ ਪਸ੍ਸਤਿ, ਨ ਨਿਚ੍ਚਾਦਿਸਭਾਵਂ, ਇਤਿ ਸੇਸਵਿਞ੍ਞਾਣੇਹਿਪਿ ਮੇ ਏਤ੍ਥ ਦਿਟ੍ਠਮਤ੍ਤਮੇਵ ਚਿਤ੍ਤਂ ਭਵਿਸ੍ਸਤੀਤਿ ਅਤ੍ਥੋ. ਅਥ ਵਾ ਦਿਟ੍ਠੇ ਦਿਟ੍ਠਂ ਨਾਮ ਚਕ੍ਖੁਵਿਞ੍ਞਾਣਂ, ਰੂਪੇ ਰੂਪਵਿਜਾਨਨਨ੍ਤਿ ਅਤ੍ਥੋ. ਮਤ੍ਤਾਤਿ ਪਮਾਣਂ, ਦਿਟ੍ਠਂ ਮਤ੍ਤਾ ਅਸ੍ਸਾਤਿ ਦਿਟ੍ਠਮਤ੍ਤਂ, ਚਿਤ੍ਤਂ, ਚਕ੍ਖੁਵਿਞ੍ਞਾਣਮਤ੍ਤਮੇਵ ਮੇ ਚਿਤ੍ਤਂ ਭਵਿਸ੍ਸਤੀਤਿ ਅਤ੍ਥੋ. ਇਦਂ ਵੁਤ੍ਤਂ ਹੋਤਿ – ਯਥਾ ਆਪਾਥਗਤਰੂਪੇ ਚਕ੍ਖੁਵਿਞ੍ਞਾਣਂ ਨ ਰਜ੍ਜਤਿ ਨ ਦੁਸ੍ਸਤਿ ਨ ਮੁਯ੍ਹਤਿ, ਏਵਂ ਰਾਗਾਦਿਵਿਰਹੇਨ ਚਕ੍ਖੁਵਿਞ੍ਞਾਣਮਤ੍ਤਮੇਵ ਜਵਨਂ ਭਵਿਸ੍ਸਤਿ, ਚਕ੍ਖੁਵਿਞ੍ਞਾਣਪਮਾਣੇਨੇਵ ਜਵਨਂ ਠਪੇਸ੍ਸਾਮੀਤਿ. ਅਥ ਵਾ ਦਿਟ੍ਠਂ ਨਾਮ ਚਕ੍ਖੁਵਿਞ੍ਞਾਣੇਨ ਦਿਟ੍ਠਰੂਪਂ, ਦਿਟ੍ਠੇ ਦਿਟ੍ਠਮਤ੍ਤਂ ਨਾਮ ਤਤ੍ਥੇਵ ਉਪ੍ਪਨ੍ਨਂ ਸਮ੍ਪਟਿਚ੍ਛਨਸਨ੍ਤੀਰਣਵੋਟ੍ਠਬ੍ਬਨਸਙ੍ਖਾਤਂ ਚਿਤ੍ਤਤ੍ਤਯਂ. ਯਥਾ ਤਂ ਨ ਰਜ੍ਜਤਿ, ਨ ਦੁਸ੍ਸਤਿ, ਨ ਮੁਯ੍ਹਤਿ, ਏਵਂ ਆਪਾਥਗਤੇ ਰੂਪੇ ਤੇਨੇਵ ਸਮ੍ਪਟਿਚ੍ਛਨਾਦਿਪ੍ਪਮਾਣੇਨ ਜਵਨਂ ਉਪ੍ਪਾਦੇਸ੍ਸਾਮਿ, ਨਾਹਂ ਤਂ ਪਮਾਣਂ ਅਤਿਕ੍ਕਮਿਤ੍ਵਾ ਰਜ੍ਜਨਾਦਿਵਸੇਨ ਉਪ੍ਪਜ੍ਜਿਤੁਂ ਦਸ੍ਸਾਮੀਤਿ ਅਯਮੇਤ੍ਥ ਅਤ੍ਥੋ. ਏਸੇਵ ਨਯੋ ਸੁਤਮੁਤੇਸੁ.
ਵਿਞ੍ਞਾਤੇ ਵਿਞ੍ਞਾਤਮਤ੍ਤਨ੍ਤਿ ਏਤ੍ਥ ਪਨ ਵਿਞ੍ਞਾਤਂ ਨਾਮ ਮਨੋਦ੍ਵਾਰਾਵਜ੍ਜਨੇਨ ਵਿਞ੍ਞਾਤਾਰਮ੍ਮਣਂ, ਤਸ੍ਮਿਂ ਵਿਞ੍ਞਾਤੇ ਵਿਞ੍ਞਾਤਮਤ੍ਤਨ੍ਤਿ ਆਵਜ੍ਜਨਪਮਾਣਂ. ਯਥਾ ਆਵਜ੍ਜਨੇਨ ਨ ਰਜ੍ਜਤਿ ਨ ਦੁਸ੍ਸਤਿ ਨ ਮੁਯ੍ਹਤਿ, ਏਵਂ ਰਜ੍ਜਨਾਦਿਵਸੇਨ ਉਪ੍ਪਜ੍ਜਿਤੁਂ ਅਦਤ੍ਵਾ ਆਵਜ੍ਜਨਪਮਾਣੇਨੇਵ ਚਿਤ੍ਤਂ ਠਪੇਸ੍ਸਾਮੀਤਿ ਅਯਮੇਤ੍ਥ ਅਤ੍ਥੋ.
ਯਤੋਤਿ ਯਦਾ. ਤਤੋਤਿ ਤਦਾ. ਨ ਤੇਨਾਤਿ ਤੇਨ ਰਾਗੇਨ ਵਾ ਰਤ੍ਤੋ, ਦੋਸੇਨ ਵਾ ਦੁਟ੍ਠੋ, ਮੋਹੇਨ ਵਾ ਮੂਲ਼੍ਹੋ ਨ ਭਵਿਸ੍ਸਤਿ. ਤਤੋ ਤ੍ਵਂ ਮਾਲੁਕ੍ਯਪੁਤ੍ਤ ਨ ਤਤ੍ਥਾਤਿ ਯਦਾ ਤ੍ਵਂ ਤੇਨ ਰਾਗੇਨ ਵਾ ਦੋਸਮੋਹੇਹਿ ਵਾ ਰਤ੍ਤੋ ਵਾ ਦੁਟ੍ਠੋ ਵਾ ਮੂਲ਼੍ਹੋ ਵਾ ਨ ਭਵਿਸ੍ਸਸਿ, ਤਦਾ ਤ੍ਵਂ ਨ ਤਤ੍ਥ ਤਸ੍ਮਿਂ ਦਿਟ੍ਠੇ ਵਾ ਸੁਤਮੁਤਵਿਞ੍ਞਾਤੇ ਵਾ ਪਟਿਬਦ੍ਧੋ ਅਲ੍ਲੀਨੋ ਪਤਿਟ੍ਠਿਤੋ ਨਾਮ ਭਵਿਸ੍ਸਸਿ. ਨੇਵਿਧਾਤਿਆਦਿ ਵੁਤ੍ਤਤ੍ਥਮੇਵ.
ਸਤਿ ਮੁਟ੍ਠਾਤਿ ਸਤਿ ਨਟ੍ਠਾ. ਤਞ੍ਚ ਅਜ੍ਝੋਸਾਤਿ ਤਂ ਆਰਮ੍ਮਣਂ ਗਿਲਿਤ੍ਵਾ. ਅਭਿਜ੍ਝਾ ਚ ਵਿਹੇਸਾ ਚਾਤਿ ਅਭਿਜ੍ਝਾਯ ਚ ਵਿਹਿਂਸਾਯ ਚ. ਅਥ ਵਾ ‘‘ਤਸ੍ਸ ਵਡ੍ਢਨ੍ਤੀ’’ਤਿ ਪਦੇਨਾਪਿ ਸਦ੍ਧਿਂ ਯੋਜੇਤਬ੍ਬਂ, ਅਭਿਜ੍ਝਾ ਚ ਵਿਹੇਸਾ ਚਾਤਿ ਇਮੇਪਿ ਦ੍ਵੇ ਧਮ੍ਮਾ ਤਸ੍ਸ ਵਡ੍ਢਨ੍ਤੀਤਿ ਅਤ੍ਥੋ.
ਚਿਤ੍ਤਮਸ੍ਸੂਪਹਞ੍ਞਤੀਤਿ ਅਭਿਜ੍ਝਾਵਿਹੇਸਾਹਿ ਅਸ੍ਸ ਚਿਤ੍ਤਂ ਉਪਹਞ੍ਞਤਿ. ਆਚਿਨਤੋਤਿ ਆਚਿਨਨ੍ਤਸ੍ਸ. ਆਰਾ ਨਿਬ੍ਬਾਨ ਵੁਚ੍ਚਤੀਤਿ ਏਵਰੂਪਸ੍ਸ ਪੁਗ੍ਗਲਸ੍ਸ ਨਿਬ੍ਬਾਨਂ ਨਾਮ ਦੂਰੇ ਪਵੁਚ੍ਚਤਿ. ਘਤ੍ਵਾਤਿ ਘਾਯਿਤ੍ਵਾ. ਭੋਤ੍ਵਾਤਿ ਭੁਤ੍ਵਾ ਸਾਯਿਤ੍ਵਾ ਲੇਹਿਤ੍ਵਾ. ਫੁਸ੍ਸਾਤਿ ਫੁਸਿਤ੍ਵਾ. ਪਟਿਸ੍ਸਤੋਤਿ ਪਟਿਸ੍ਸਤਿਸਙ੍ਖਾਤਾਯ ਸਤਿਯਾ ਯੁਤ੍ਤੋ. ਸੇਵਤੋ ਚਾਪਿ ਵੇਦਨਨ੍ਤਿ ਚਤੁਮਗ੍ਗਸਮ੍ਪਯੁਤ੍ਤਂ ਨਿਬ੍ਬਤ੍ਤਿਤਲੋਕੁਤ੍ਤਰਵੇਦਨਂ ਸੇਵਨ੍ਤਸ੍ਸ. ਖੀਯਤੀਤਿ ਖਯਂ ਗਚ੍ਛਤਿ. ਕਿਂ ਤਂ? ਦੁਕ੍ਖਮ੍ਪਿ ਕਿਲੇਸਜਾਤਮ੍ਪਿ. ਅਞ੍ਞਤਰੋਤਿ ਅਸੀਤਿਯਾ ਮਹਾਸਾਵਕਾਨਂ ਅਬ੍ਭਨ੍ਤਰੋ ਏਕੋ. ਇਤਿ ਇਮਸ੍ਮਿਂ ਸੁਤ੍ਤੇ ਗਾਥਾਹਿਪਿ ਵਟ੍ਟਵਿਵਟ੍ਟਮੇਵ ਕਥਿਤਂ.
੩. ਪਰਿਹਾਨਧਮ੍ਮਸੁਤ੍ਤਵਣ੍ਣਨਾ
੯੬. ਤਤਿਯੇ ਪਰਿਹਾਨਧਮ੍ਮਨ੍ਤਿ ਪਰਿਹਾਨਸਭਾਵਂ. ਅਭਿਭਾਯਤਨਾਨੀਤਿ ਅਭਿਭਵਿਤਾਨਿ ਆਯਤਨਾਨਿ. ਸਰਸਙ੍ਕਪ੍ਪਾਤਿ ਏਤ੍ਥ ਸਰਨ੍ਤੀਤਿ ਸਰਾ, ਧਾਵਨ੍ਤੀਤਿ ਅਤ੍ਥੋ. ਸਰਾ ਚ ਤੇ ਸਙ੍ਕਪ੍ਪਾ ਚ ਸਰਸਙ੍ਕਪ੍ਪਾ. ਸਂਯੋਜਨਿਯਾਤਿ ਬਨ੍ਧਨਿਯਾ ਬਨ੍ਧਨਸ੍ਸ ਪਚ੍ਚਯਭੂਤਾ. ਤਞ੍ਚੇ ਭਿਕ੍ਖੂਤਿ ਤਂ ਏਵਂ ਉਪ੍ਪਨ੍ਨਂ ਕਿਲੇਸਜਾਤਂ, ਤਂ ਵਾ ਆਰਮ੍ਮਣਂ. ਅਧਿਵਾਸੇਤੀਤਿ ਚਿਤ੍ਤੇ ਆਰੋਪੇਤ੍ਵਾ ਵਾਸੇਤਿ. ਨਪ੍ਪਜਹਤੀਤਿ ਛਨ੍ਦਰਾਗਪ੍ਪਹਾਨੇਨ ਨ ਪਜਹਤਿ. ਏਵਂ ਸਬ੍ਬਪਦੇਹਿ ਯੋਜੇਤਬ੍ਬਂ. ਅਭਿਭਾਯਤਨਞ੍ਹੇਤਂ ਵੁਤ੍ਤਂ ਭਗਵਤਾਤਿ ਏਤਂ ਬੁਦ੍ਧੇਨ ਭਗਵਤਾ ਅਭਿਭਵਿਤਂ ਆਯਤਨਨ੍ਤਿ ਕਥਿਤਂ. ਇਧ ਧਮ੍ਮਂ ਪੁਚ੍ਛਿਤ੍ਵਾ ਵਿਭਜਨ੍ਤੇਨ ਪੁਗ੍ਗਲੇਨ ਧਮ੍ਮੋ ਦਸ੍ਸਿਤੋ.
੪. ਪਮਾਦਵਿਹਾਰੀਸੁਤ੍ਤਵਣ੍ਣਨਾ
੯੭. ਚਤੁਤ੍ਥੇ ਅਸਂਵੁਤਸ੍ਸਾਤਿ ਅਪਿਹਿਤਸ੍ਸ ਨ ਪਿਦਹਿਤ੍ਵਾ ਸਞ੍ਛਾਦਿਤ੍ਵਾ ਠਪਿਤਸ੍ਸ. ਬ੍ਯਾਸਿਞ੍ਚਤੀਤਿ ਵਿਆਸਿਞ੍ਚਤਿ, ਕਿਲੇਸਤਿਨ੍ਤਂ ਹੁਤ੍ਵਾ ਵਤ੍ਤਤਿ. ਪਾਮੋਜ੍ਜਨ੍ਤਿ ਦੁਬ੍ਬਲਪੀਤਿ. ਪੀਤੀਤਿ ਬਲਵਪੀਤਿ. ਪਸ੍ਸਦ੍ਧੀਤਿ ਦਰਥਪਸ੍ਸਦ੍ਧਿ. ਧਮ੍ਮਾ ਨ ਪਾਤੁਭਵਨ੍ਤੀਤਿ ਸਮਥਵਿਪਸ੍ਸਨਾਧਮ੍ਮਾ ਨ ਉਪ੍ਪਜ੍ਜਨ੍ਤਿ. ਇਮਸ੍ਮਿਂ ਸੁਤ੍ਤੇ ਪੁਗ੍ਗਲਂ ਪੁਚ੍ਛਿਤ੍ਵਾ ਵਿਭਜਨ੍ਤੇਨ ਧਮ੍ਮੇਨ ਪੁਗ੍ਗਲੋ ਦਸ੍ਸਿਤੋ.
੫. ਸਂਵਰਸੁਤ੍ਤਵਣ੍ਣਨਾ
੯੮. ਪਞ੍ਚਮੇ ਕਥਞ੍ਚ, ਭਿਕ੍ਖਵੇ, ਅਸਂਵਰੋਤਿ ਇਦਂ ਮਗ੍ਗਕੁਸਲਸ੍ਸ ਵਾਮਂ ਮੁਞ੍ਚਿਤ੍ਵਾ ਦਕ੍ਖਿਣਂ ਗਣ੍ਹੇਯ੍ਯਾਸੀਤਿ ਪਠਮਂ ਪਹਾਤਬ੍ਬਮਗ੍ਗਕ੍ਖਾਨਂ ਵਿਯ ਉਦ੍ਦੇਸਕ੍ਕਮੇਨ ਅਵਤ੍ਵਾ ਦੇਸਨਾਕੁਸਲਤਾਯ ਪਠਮਂ ਪਹਾਤਬ੍ਬਧਮ੍ਮਕ੍ਖਾਨਵਸੇਨ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਇਧ ਧਮ੍ਮਂ ਪੁਚ੍ਛਿਤ੍ਵਾ ਧਮ੍ਮੋਵ ਵਿਭਤ੍ਤੋ.
੬. ਸਮਾਧਿਸੁਤ੍ਤਵਣ੍ਣਨਾ
੯੯. ਛਟ੍ਠੇ ਸਮਾਧਿਨ੍ਤਿ ਚਿਤ੍ਤੇਕਗ੍ਗਤਂ. ਇਦਞ੍ਹਿ ਸੁਤ੍ਤਂ ਚਿਤ੍ਤੇਕਗ੍ਗਤਾਯ ਪਰਿਹਾਯਮਾਨੇ ਦਿਸ੍ਵਾ, ‘‘ਇਮੇਸਂ ਚਿਤ੍ਤੇਕਗ੍ਗਤਂ ਲਭਨ੍ਤਾਨਂ ਕਮ੍ਮਟ੍ਠਾਨਂ ਫਾਤਿਂ ਗਮਿਸ੍ਸਤੀ’’ਤਿ ਞਤ੍ਵਾ ਕਥਿਤਂ.
੭. ਪਟਿਸਲ੍ਲਾਨਸੁਤ੍ਤਵਣ੍ਣਨਾ
੧੦੦. ਸਤ੍ਤਮੇ ਪਟਿਸਲ੍ਲਾਨਨ੍ਤਿ ਕਾਯਵਿਵੇਕਂ. ਇਦਞ੍ਹਿ ਸੁਤ੍ਤਂ ਕਾਯਵਿਵੇਕੇਨ ਪਰਿਹਾਯਮਾਨੇ ਦਿਸ੍ਵਾ, ‘‘ਇਮੇਸਂ ਕਾਯਵਿਵੇਕਂ ਲਭਨ੍ਤਾਨਂ ਕਮ੍ਮਟ੍ਠਾਨਂ ਫਾਤਿਂ ਗਮਿਸ੍ਸਤੀ’’ਤਿ ਞਤ੍ਵਾ ਕਥਿਤਂ.
੮-੯. ਪਠਮਨਤੁਮ੍ਹਾਕਂਸੁਤ੍ਤਾਦਿਵਣ੍ਣਨਾ
੧੦੧-੧੦੨. ਅਟ੍ਠਮਂ ਉਪਮਾਯ ਪਰਿਵਾਰੇਤ੍ਵਾ ਕਥਿਤੇ ਬੁਜ੍ਝਨਕਾਨਂ, ਨਵਮਂ ਸੁਦ੍ਧਿਕਵਸੇਨੇਵ ਬੁਜ੍ਝਨਕਾਨਂ ਅਜ੍ਝਾਸਯਵਸੇਨ ਵੁਤ੍ਤਂ. ਅਤ੍ਥੋ ਪਨ ਉਭਯਤ੍ਥਾਪਿ ਖਨ੍ਧਿਯਵਗ੍ਗੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.
੧੦. ਉਦਕਸੁਤ੍ਤਵਣ੍ਣਨਾ
੧੦੩. ਦਸਮੇ ਉਦਕੋ ਸੁਦਨ੍ਤਿ ਏਤ੍ਥ ਸੁਦਨ੍ਤਿ ਨਿਪਾਤਮਤ੍ਤਂ. ਉਦਕੋਤਿ ਤਸ੍ਸ ਨਾਮਂ. ਇਦਂ ਜਾਤੁ ਵੇਦਗੂਤਿ ਏਤ੍ਥ ਇਦਨ੍ਤਿ ਨਿਪਾਤਮਤ੍ਤਂ. ਅਥ ਵਾ ਇਦਂ ਮਮ ਵਚਨਂ ਸੁਣਾਥਾਤਿ ਦੀਪੇਨ੍ਤੋ ਏਵਮਾਹ. ਜਾਤੁ ਵੇਦਗੂਤਿ ਅਹਂ ਏਕਂਸੇਨੇਵ ਵੇਦਗੂ, ਵੇਦਸਙ੍ਖਾਤੇਨ ਞਾਣੇਨ ਨੇਯ੍ਯੇਸੁ ਗਤੋ, ਵੇਦਂ ਵਾ ਗਤੋ ਅਧਿਗਤੋ, ਪਣ੍ਡਿਤੋਹਮਸ੍ਮੀਤਿ ਅਤ੍ਥੋ. ਸਬ੍ਬਜੀਤਿ ਏਕਂਸੇਨ ਸਬ੍ਬਵਟ੍ਟਂ ਜਿਨਿਤ੍ਵਾ ਅਭਿਭਵਿਤ੍ਵਾ ਠਿਤੋਸ੍ਮੀਤਿ ਵਦਤਿ. ਅਪਲਿਖਤਂ ਗਣ੍ਡਮੂਲਨ੍ਤਿ ਅਪਲਿਖਤਂ ਦੁਕ੍ਖਮੂਲਂ. ਪਲਿਖਣਿਨ੍ਤਿ ਪਲਿਖਤਂ ਮਯਾ, ਖਨਿਤ੍ਵਾ ਠਿਤੋਸ੍ਮੀਤਿ ਦੀਪੇਤਿ.
ਮਾਤਾਪੇਤ੍ਤਿਕਸਮ੍ਭਵਸ੍ਸਾਤਿ ਮਾਤਿਤੋ ਚ ਪਿਤਿਤੋ ਚ ਨਿਬ੍ਬਤ੍ਤੇਨ ਮਾਤਾਪੇਤ੍ਤਿਕੇਨ ਸੁਕ੍ਕਸੋਣਿਤੇਨ ਸਮ੍ਭੂਤਸ੍ਸ. ਓਦਨਕੁਮ੍ਮਾਸੂਪਚਯਸ੍ਸਾਤਿ ਓਦਨੇਨ ਚੇਵ ਕੁਮ੍ਮਾਸੇਨ ਚ ਉਪਚਿਤਸ੍ਸ ਵਡ੍ਢਿਤਸ੍ਸ. ਅਨਿਚ੍ਚੁਚ੍ਛਾਦਨਪਰਿਮਦ੍ਦਨਭੇਦਨਵਿਦ੍ਧਂਸਨਧਮ੍ਮਸ੍ਸਾਤਿ ਏਤ੍ਥ ਅਯਂ ਕਾਯੋ ਹੁਤ੍ਵਾ ਅਭਾਵਟ੍ਠੇਨ ਅਨਿਚ੍ਚਧਮ੍ਮੋ, ਦੁਗ੍ਗਨ੍ਧਵਿਘਾਤਤ੍ਥਾਯ ਤਨੁਵਿਲੇਪਨੇਨ ਉਚ੍ਛਾਦਨਧਮ੍ਮੋ, ਅਙ੍ਗਪਚ੍ਚਙ੍ਗਾਬਾਧਵਿਨੋਦਨਤ੍ਥਾਯ ਖੁਦ੍ਦਕਸਮ੍ਬਾਹਨੇਨ ਪਰਿਮਦ੍ਦਨਧਮ੍ਮੋ, ਦਹਰਕਾਲੇ ਵਾ ਊਰੂਸੁ ਸਯਾਪੇਤ੍ਵਾ ਗਬ੍ਭਵਾਸੇਨ ਦੁਸ੍ਸਣ੍ਠਿਤਾਨਂ ਤੇਸਂ ਤੇਸਂ ਅਙ੍ਗਾਨਂ ਸਣ੍ਠਾਨਸਮ੍ਪਾਦਨਤ੍ਥਂ ਅਞ੍ਛਨਪੀਲ਼ਨਾਦੀਨਂ ਵਸੇਨ ਪਰਿਮਦ੍ਦਨਧਮ੍ਮੋ, ਏਵਂ ਪਰਿਹਰਿਤੋਪਿ ਚ ਭੇਦਨਵਿਦ੍ਧਂਸਨਧਮ੍ਮੋ ਭਿਜ੍ਜਤਿ ਚੇਵ ਵਿਕਿਰਤਿ ਚ, ਏਵਂ ਸਭਾਵੋਤਿ ਅਤ੍ਥੋ.
ਤਤ੍ਥ ਮਾਤਾਪੇਤ੍ਤਿਕਸਮ੍ਭਵਓਦਨਕੁਮ੍ਮਾਸੂਪਚਯਪਰਿਮਦ੍ਦਨਪਦੇਹਿ ਵਡ੍ਢਿ ਕਥਿਤਾ, ਅਨਿਚ੍ਚਭੇਦਨਵਿਦ੍ਧਂਸਨਪਦੇਹਿ ਪਰਿਹਾਨਿ. ਪੁਰਿਮੇਹਿ ਵਾ ਤੀਹਿ ਸਮੁਦਯੋ, ਪਚ੍ਛਿਮੇਹਿ ਅਤ੍ਥਙ੍ਗਮੋਤਿ. ਏਵਂ ਚਾਤੁਮਹਾਭੂਤਿਕਸ੍ਸ ਕਾਯਸ੍ਸ ਵਡ੍ਢਿਪਰਿਹਾਨਿਨਿਬ੍ਬਤ੍ਤਿਭੇਦਾ ਦਸ੍ਸਿਤਾ. ਸੇਸਂ ਉਤ੍ਤਾਨਤ੍ਥਮੇਵਾਤਿ.
ਸਲ਼ਵਗ੍ਗੋ ਦਸਮੋ.
ਦੁਤਿਯੋ ਪਣ੍ਣਾਸਕੋ.