੬. ਕਿਲੇਸਸਂਯੁਤ੍ਤਵਣ੍ਣਨਾ

੩੨੨-੩੩੧. ਕਿਲੇਸਸਂਯੁਤ੍ਤੇ ਚਿਤ੍ਤਸ੍ਸੇਸੋ ਉਪਕ੍ਕਿਲੇਸੋਤਿ ਕਤਰਚਿਤ੍ਤਸ੍ਸ? ਚਤੁਭੂਮਕਚਿਤ੍ਤਸ੍ਸ. ਤੇਭੂਮਕਚਿਤ੍ਤਸ੍ਸ ਤਾਵ ਹੋਤੁ, ਲੋਕੁਤ੍ਤਰਸ੍ਸ ਕਥਂ ਉਪਕ੍ਕਿਲੇਸੋ ਹੋਤੀਤਿ? ਉਪ੍ਪਤ੍ਤਿਨਿਵਾਰਣਤੋ. ਸੋ ਹਿ ਤਸ੍ਸ ਉਪ੍ਪਜ੍ਜਿਤੁਂ ਅਪ੍ਪਦਾਨੇਨ ਉਪਕ੍ਕਿਲੇਸੋਤਿ ਵੇਦਿਤਬ੍ਬੋ. ਨੇਕ੍ਖਮ੍ਮਨਿਨ੍ਨਨ੍ਤਿ ਨਵਲੋਕੁਤ੍ਤਰਧਮ੍ਮਨਿਨ੍ਨਂ. ਚਿਤ੍ਤਨ੍ਤਿ ਸਮਥਵਿਪਸ੍ਸਨਾਚਿਤ੍ਤਂ. ਅਭਿਞ੍ਞਾ ਸਚ੍ਛਿਕਰਣੀਯੇਸੁ ਧਮ੍ਮੇਸੂਤਿ ਪਚ੍ਚਵੇਕ੍ਖਣਞਾਣੇਨ ਅਭਿਜਾਨਿਤ੍ਵਾ ਸਚ੍ਛਿਕਾਤਬ੍ਬੇਸੁ ਛਲ਼ਭਿਞ੍ਞਾਧਮ੍ਮੇਸੁ, ਏਕਂ ਧਮ੍ਮਂ ਵਾ ਗਣ੍ਹਨ੍ਤੇਨ ਨੇਕ੍ਖਮ੍ਮਨ੍ਤਿ ਗਹੇਤਬ੍ਬਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਕਿਲੇਸਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.