੨. ਦੁਤਿਯਗਮਨਾਦਿਵਗ੍ਗਵਣ੍ਣਨਾ

੨੨੪-੩੦੧. ਦੁਤਿਯਂ ਗਮਨਂ ਦੁਕ੍ਖਵਸੇਨ ਵੁਤ੍ਤਂ. ਤਤ੍ਰਾਪਿ ਅਟ੍ਠਾਰਸੇਵ ਵੇਯ੍ਯਾਕਰਣਾਨਿ, ਤਤੋ ਪਰਾਨਿ ‘‘ਰੂਪੀ ਅਤ੍ਤਾ ਹੋਤੀ’’ਤਿਆਦੀਨਿ ਅਟ੍ਠ ਵੇਯ੍ਯਾਕਰਣਾਨਿ, ਤੇਹਿ ਸਦ੍ਧਿਂ ਤਂ ਦੁਤਿਯਪੇਯ੍ਯਾਲੋਤਿ ਵੁਤ੍ਤੋ.

ਤਤ੍ਥ ਰੂਪੀਤਿ ਆਰਮ੍ਮਣਮੇਵ ‘‘ਅਤ੍ਤਾ’’ਤਿ ਗਹਿਤਦਿਟ੍ਠਿ. ਅਰੂਪੀਤਿ ਝਾਨਂ ‘‘ਅਤ੍ਤਾ’’ਤਿ ਗਹਿਤਦਿਟ੍ਠਿ. ਰੂਪੀ ਚ ਅਰੂਪੀ ਚਾਤਿ ਆਰਮ੍ਮਣਞ੍ਚ ਝਾਨਞ੍ਚ ‘‘ਅਤ੍ਤਾ’’ਤਿ ਗਹਿਤਦਿਟ੍ਠਿ. ਨੇਵ ਰੂਪੀ ਨਾਰੂਪੀਤਿ ਤਕ੍ਕਮਤ੍ਤੇਨ ਗਹਿਤਦਿਟ੍ਠਿ. ਏਕਨ੍ਤਸੁਖੀਤਿ ਲਾਭੀਤਕ੍ਕੀਜਾਤਿਸ੍ਸਰਾਨਂ ਉਪ੍ਪਨ੍ਨਦਿਟ੍ਠਿ. ਝਾਨਲਾਭਿਨੋਪਿ ਹਿ ਅਤੀਤੇ ਏਕਨ੍ਤਸੁਖਂ ਅਤ੍ਤਭਾਵਂ ਮਨਸਿਕਰੋਤੋ ਏਵਂ ਦਿਟ੍ਠਿ ਉਪ੍ਪਜ੍ਜਤਿ. ਤਕ੍ਕਿਨੋਪਿ ‘‘ਯਥਾ ਏਤਰਹਿ ਅਹਂ ਏਕਨ੍ਤਸੁਖੀ, ਏਵਂ ਸਮ੍ਪਰਾਯੇਪਿ ਭਵਿਸ੍ਸਾਮੀ’’ਤਿ ਉਪ੍ਪਜ੍ਜਤਿ. ਜਾਤਿਸ੍ਸਰਸ੍ਸਪਿ ਸਤ੍ਤਟ੍ਠਭਵੇ ਸੁਖਿਤਭਾਵਂ ਪਸ੍ਸਨ੍ਤਸ੍ਸ ਏਵਂ ਉਪ੍ਪਜ੍ਜਤਿ, ਏਕਨ੍ਤਦੁਕ੍ਖੀਤਿਆਦੀਸੁਪਿ ਏਸੇਵ ਨਯੋ.

ਤਤਿਯਪੇਯ੍ਯਾਲੋ ਅਨਿਚ੍ਚਦੁਕ੍ਖਵਸੇਨ ਤੇਹਿਯੇਵ ਛਬ੍ਬੀਸਤਿਯਾ ਸੁਤ੍ਤੇਹਿ ਵੁਤ੍ਤੋ, ਚਤੁਤ੍ਥਪੇਯ੍ਯਾਲੋ ਤਿਪਰਿਵਟ੍ਟਵਸੇਨਾਤਿ.

ਦਿਟ੍ਠਿਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.