੧੧. ਵਲਾਹਕਸਂਯੁਤ੍ਤਵਣ੍ਣਨਾ

੫੫੦-੬੦੬. ਵਲਾਹਕਸਂਯੁਤ੍ਤੇ ਵਲਾਹਕਕਾਯਿਕਾਤਿ ਵਲਾਹਕਨਾਮਕੇ ਦੇਵਕਾਯੇ ਉਪ੍ਪਨ੍ਨਾ ਆਕਾਸਚਾਰਿਕਦੇਵਾ. ਸੀਤਵਲਾਹਕਾਤਿ ਸੀਤਕਰਣਵਲਾਹਕਾ. ਸੇਸਪਦੇਸੁਪਿ ਏਸੇਵ ਨਯੋ. ਚੇਤੋਪਣਿਧਿਮਨ੍ਵਾਯਾਤਿ ਚਿਤ੍ਤਟ੍ਠਪਨਂ ਆਗਮ੍ਮ. ਸੀਤਂ ਹੋਤੀਤਿ ਯਂ ਵਸ੍ਸਾਨੇ ਵਾ ਹੇਮਨ੍ਤੇ ਵਾ ਸੀਤਂ ਹੋਤਿ, ਤਂ ਉਤੁਸਮੁਟ੍ਠਾਨਮੇਵ. ਯਂ ਪਨ ਸੀਤੇਪਿ ਅਤਿਸੀਤਂ, ਗਿਮ੍ਹੇ ਚ ਉਪ੍ਪਨ੍ਨਂ ਸੀਤਂ, ਤਂ ਦੇਵਤਾਨੁਭਾਵੇਨ ਨਿਬ੍ਬਤ੍ਤਂ ਸੀਤਂ ਨਾਮ. ਉਣ੍ਹਂ ਹੋਤੀਤਿ ਯਂ ਗਿਮ੍ਹਾਨੇ ਉਣ੍ਹਂ, ਤਂ ਉਤੁਸਮੁਟ੍ਠਾਨਿਕਂ ਪਾਕਤਿਕਮੇਵ. ਯਂ ਪਨ ਉਣ੍ਹੇਪਿ ਅਤਿਉਣ੍ਹਂ, ਸੀਤਕਾਲੇ ਚ ਉਪ੍ਪਨ੍ਨਂ ਉਣ੍ਹਂ, ਤਂ ਦੇਵਤਾਨੁਭਾਵੇਨ ਨਿਬ੍ਬਤ੍ਤਂ ਉਣ੍ਹਂ ਨਾਮ. ਅਬ੍ਭਂ ਹੋਤੀਤਿ ਅਬ੍ਭਮਣ੍ਡਪੋ ਹੋਤਿ. ਇਧਾਪਿ ਯਂ ਵਸ੍ਸਾਨੇ ਚ ਸਿਸਿਰੇ ਚ ਅਬ੍ਭਂ ਉਪ੍ਪਜ੍ਜਤਿ, ਤਂ ਉਤੁਸਮੁਟ੍ਠਾਨਿਕਂ ਪਾਕਤਿਕਮੇਵ. ਯਂ ਪਨ ਅਬ੍ਭੇਯੇਵ ਅਤਿਅਬ੍ਭਂ, ਸਤ੍ਤਸਤ੍ਤਾਹਮ੍ਪਿ ਚਨ੍ਦਸੂਰਿਯੇ ਛਾਦੇਤ੍ਵਾ ਏਕਨ੍ਧਕਾਰਂ ਕਰੋਤਿ, ਯਞ੍ਚ ਚਿਤ੍ਤਵੇਸਾਖਮਾਸੇਸੁ ਅਬ੍ਭਂ, ਤਂ ਦੇਵਤਾਨੁਭਾਵੇਨ ਉਪ੍ਪਨ੍ਨਂ ਅਬ੍ਭਂ ਨਾਮ. ਵਾਤੋ ਹੋਤੀਤਿ ਯੋ ਤਸ੍ਮਿਂ ਤਸ੍ਮਿਂ ਉਤੁਮ੍ਹਿ ਉਤ੍ਤਰਦਕ੍ਖਿਣਾਦਿਪਕਤਿਵਾਤੋ ਹੋਤਿ, ਅਯਂ ਉਤੁਸਮੁਟ੍ਠਾਨੋਵ. ਯੋਪਿ ਪਨ ਰੁਕ੍ਖਕ੍ਖਨ੍ਧਾਦਿਪਦਾਲਨੋ ਅਤਿਵਾਤੋ ਨਾਮ ਅਤ੍ਥਿ, ਅਯਞ੍ਚੇਵ, ਯੋ ਚ ਅਞ੍ਞੋਪਿ ਅਕਾਲਵਾਤੋ, ਅਯਂ ਦੇਵਤਾਨੁਭਾਵਨਿਬ੍ਬਤ੍ਤੋ ਨਾਮ. ਦੇਵੋ ਵਸ੍ਸਤੀਤਿ ਯਂ ਵਸ੍ਸਿਕੇ ਚਤ੍ਤਾਰੋ ਮਾਸੇ ਵਸ੍ਸਂ, ਤਂ ਉਤੁਸਮੁਟ੍ਠਾਨਮੇਵ. ਯਂ ਪਨ ਵਸ੍ਸੇਯੇਵ ਅਤਿਵਸ੍ਸਂ, ਯਞ੍ਚ ਚਿਤ੍ਤਵੇਸਾਖਮਾਸੇਸੁ ਵਸ੍ਸਂ, ਤਂ ਦੇਵਤਾਨੁਭਾਵਨਿਬ੍ਬਤ੍ਤਂ ਨਾਮ.

ਤਤ੍ਰਿਦਂ ਵਤ੍ਥੁ – ਏਕੋ ਕਿਰ ਵਸ੍ਸਵਲਾਹਕਦੇਵਪੁਤ੍ਤੋ ਤਲਕੂਟਕਵਾਸਿ ਖੀਣਾਸਵਤ੍ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਅਟ੍ਠਾਸਿ. ਥੇਰੋ ‘‘ਕੋਸਿ ਤ੍ਵ’’ਨ੍ਤਿ ਪੁਚ੍ਛਿ. ‘‘ਅਹਂ, ਭਨ੍ਤੇ, ਵਸ੍ਸਵਲਾਹਕਦੇਵਪੁਤ੍ਤੋ’’ਤਿ. ‘‘ਤੁਮ੍ਹਾਕਂ ਕਿਰ ਚਿਤ੍ਤੇਨ ਦੇਵੋ ਵਸ੍ਸਤੀ’’ਤਿ? ‘‘ਆਮ, ਭਨ੍ਤੇ’’ਤਿ. ‘‘ਪਸ੍ਸਿਤੁਕਾਮਾ ਮਯ’’ਨ੍ਤਿ. ‘‘ਤੇਮਿਸ੍ਸਥ, ਭਨ੍ਤੇ’’ਤਿ. ‘‘ਮੇਘਸੀਸਂ ਵਾ ਗਜ੍ਜਿਤਂ ਵਾ ਨ ਪਞ੍ਞਾਯਤਿ, ਕਥਂ ਤੇਮਿਸ੍ਸਾਮਾ’’ਤਿ? ‘‘ਭਨ੍ਤੇ, ਅਮ੍ਹਾਕਂਚਿਤ੍ਤੇਨ ਦੇਵੋ ਵਸ੍ਸਤਿ, ਤੁਮ੍ਹੇ ਪਣ੍ਣਸਾਲਂ ਪਵਿਸਥਾ’’ਤਿ. ‘‘ਸਾਧੁ ਦੇਵਪੁਤ੍ਤਾ’’ਤਿ ਸੋ ਪਾਦੇ ਧੋਵਿਤ੍ਵਾ ਪਣ੍ਣਸਾਲਂ ਪਾਵਿਸਿ. ਦੇਵਪੁਤ੍ਤੋ ਤਸ੍ਮਿਂ ਪਵਿਸਨ੍ਤੇਯੇਵ ਏਕਂ ਗੀਤਂ ਗਾਯਿਤ੍ਵਾ ਹਤ੍ਥਂ ਉਕ੍ਖਿਪਿ. ਸਮਨ੍ਤਾ ਤਿਯੋਜਨਟ੍ਠਾਨਂ ਏਕਮੇਘਂ ਅਹੋਸਿ. ਥੇਰੋ ਅਦ੍ਧਤਿਨ੍ਤੋ ਪਣ੍ਣਸਾਲਂ ਪਵਿਟ੍ਠੋਤਿ. ਅਪਿਚ ਦੇਵੋ ਨਾਮੇਸ ਅਟ੍ਠਹਿ ਕਾਰਣੇਹਿ ਵਸ੍ਸਤਿ ਨਾਗਾਨੁਭਾਵੇਨ ਸੁਪਣ੍ਣਾਨੁਭਾਵੇਨ ਦੇਵਤਾਨੁਭਾਵੇਨ ਸਚ੍ਚਕਿਰਿਯਾਯ ਉਤੁਸਮੁਟ੍ਠਾਨੇਨ ਮਾਰਾਵਟ੍ਟਨੇਨ ਇਦ੍ਧਿਬਲੇਨ ਵਿਨਾਸਮੇਘੇਨਾਤਿ.

ਵਲਾਹਕਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.