੧੨. ਧਮ੍ਮਕਥਿਕਵਗ੍ਗੋ
੧-੨. ਅਵਿਜ੍ਜਾਸੁਤ੍ਤਾਦਿਵਣ੍ਣਨਾ
੧੧੩-੧੧੪. ਧਮ੍ਮਕਥਿਕਵਗ੍ਗਸ੍ਸ ਪਠਮੇ ਏਤ੍ਤਾਵਤਾ ਚ ਅਵਿਜ੍ਜਾਗਤੋ ਹੋਤੀਤਿ ਯਾਵਤਾ ਇਮਾਯ ਚਤੂਸੁ ਸਚ੍ਚੇਸੁ ਅਞ੍ਞਾਣਭੂਤਾਯ ਅਵਿਜ੍ਜਾਯ ਸਮਨ੍ਨਾਗਤੋ, ਏਤ੍ਤਾਵਤਾ ਅਵਿਜ੍ਜਾਗਤੋ ਹੋਤੀਤਿ ਅਤ੍ਥੋ. ਦੁਤਿਯੇਪਿ ਏਸੇਵ ਨਯੋ. ਪਠਮਦੁਤਿਯਾਨਿ.
੩. ਧਮ੍ਮਕਥਿਕਸੁਤ੍ਤਵਣ੍ਣਨਾ
੧੧੫. ਤਤਿਯੇ ਪਠਮੇਨ ਧਮ੍ਮਕਥਿਕੋ, ਦੁਤਿਯੇਨ ਸੇਖਭੂਮਿ, ਤਤਿਯੇਨ ਅਸੇਖਭੂਮੀਤਿ ਏਵਂ ਧਮ੍ਮਕਥਿਕਂ ਪੁਚ੍ਛਿਤੇਨ ਵਿਸੇਸੇਤ੍ਵਾ ਦ੍ਵੇ ਭੂਮਿਯੋ ਕਥਿਤਾ. ਤਤਿਯਂ.
੪. ਦੁਤਿਯਧਮ੍ਮਕਥਿਕਸੁਤ੍ਤਵਣ੍ਣਨਾ
੧੧੬. ਚਤੁਤ੍ਥੇ ਤਿਸ੍ਸਨ੍ਨਮ੍ਪਿ ਪੁਚ੍ਛਾਨਂ ਤੀਣਿ ਵਿਸ੍ਸਜ੍ਜਨਾਨਿ ਕਥਿਤਾਨਿ. ਚਤੁਤ੍ਥਂ.
੫-੯. ਬਨ੍ਧਨਸੁਤ੍ਤਾਦਿਵਣ੍ਣਨਾ
੧੧੭-੧੨੧. ਪਞ੍ਚਮੇ ਅਤੀਰਦਸ੍ਸੀਤਿ ਤੀਰਂ ਵੁਚ੍ਚਤਿ ਵਟ੍ਟਂ, ਤਂ ਨ ਪਸ੍ਸਤਿ. ਅਪਾਰਦਸ੍ਸੀਤਿ ਪਾਰਂ ਵੁਚ੍ਚਤਿ ਨਿਬ੍ਬਾਨਂ, ਤਂ ਨ ਪਸ੍ਸਤਿ. ਬਦ੍ਧੋਤਿ ਕਿਲੇਸਬਨ੍ਧਨੇਨ ਬਦ੍ਧੋ ਹੁਤ੍ਵਾ ਜੀਯਤਿ ਚ ਮੀਯਤਿ ਚ ਅਸ੍ਮਾ ਲੋਕਾ ਪਰਂ ਲੋਕਂ ਗਚ੍ਛਤੀਤਿ. ਇਮਸ੍ਮਿਂ ਸੁਤ੍ਤੇ ਵਟ੍ਟਦੁਕ੍ਖਂ ਕਥਿਤਨ੍ਤਿ. ਛਟ੍ਠਾਦੀਨਿ ਉਤ੍ਤਾਨਤ੍ਥਾਨੇਵ. ਪਞ੍ਚਮਾਦੀਨਿ.
੧੦. ਸੀਲਵਨ੍ਤਸੁਤ੍ਤਵਣ੍ਣਨਾ
੧੨੨. ਦਸਮੇ ਅਨਿਚ੍ਚਤੋਤਿਆਦੀਸੁ ਹੁਤ੍ਵਾ ਅਭਾਵਾਕਾਰੇਨ ਅਨਿਚ੍ਚਤੋ, ਪਟਿਪੀਲ਼ਨਾਕਾਰੇਨ ਦੁਕ੍ਖਤੋ, ਆਬਾਧਟ੍ਠੇਨ ਰੋਗਤੋ, ਅਨ੍ਤੋਦੋਸਟ੍ਠੇਨ ਗਣ੍ਡਤੋ, ਤੇਸਂ ਤੇਸਂ ਗਣ੍ਡਾਨਂ ਪਚ੍ਚਯਭਾਵੇਨ ਵਾ ਖਣਨਟ੍ਠੇਨ ਵਾ ਸਲ੍ਲਤੋ ਦੁਕ੍ਖਟ੍ਠੇਨ ਅਘਤੋ, ਵਿਸਭਾਗਮਹਾਭੂਤਸਮੁਟ੍ਠਾਨਆਬਾਧਪਚ੍ਚਯਟ੍ਠੇਨ ਆਬਾਧਤੋ, ਅਸਕਟ੍ਠੇਨ ਪਰਤੋ, ਪਲੁਜ੍ਜਨਟ੍ਠੇਨ ਪਲੋਕਤੋ, ਸਤ੍ਤਸੁਞ੍ਞਤਟ੍ਠੇਨ ਸੁਞ੍ਞਤੋ, ਅਤ੍ਤਾਭਾਵੇਨ ਅਨਤ੍ਤਤੋ. ਏਵਮੇਤ੍ਥ ‘‘ਅਨਿਚ੍ਚਤੋ ਪਲੋਕਤੋ’’ਤਿ ਦ੍ਵੀਹਿ ਪਦੇਹਿ ਅਨਿਚ੍ਚਮਨਸਿਕਾਰੋ, ‘‘ਸੁਞ੍ਞਤੋ ਅਨਤ੍ਤਤੋ’’ਤਿ ਦ੍ਵੀਹਿ ਅਨਤ੍ਤਮਨਸਿਕਾਰੋ, ਸੇਸੇਹਿ ਦੁਕ੍ਖਮਨਸਿਕਾਰੋ ਵੁਤ੍ਤੋਤਿ ਵੇਦਿਤਬ੍ਬੋ. ਸੇਸਮੇਤ੍ਥ ਉਤ੍ਤਾਨਮੇਵ. ਦਸਮਂ.
੧੧. ਸੁਤਵਨ੍ਤਸੁਤ੍ਤਵਣ੍ਣਨਾ
੧੨੩. ਤਥਾ ਏਕਾਦਸਮੇ. ਦਸਮਸ੍ਮਿਞ੍ਹਿ ‘‘ਸੀਲਵਤਾ’’ਤਿ ਚਤੁਪਾਰਿਸੁਦ੍ਧਿਸੀਲਂ ਵੁਤ੍ਤਂ, ਇਧ ਸੁਤਵਤਾਤਿ ਕਮ੍ਮਟ੍ਠਾਨਸੁਤਂ ਇਦਮੇਵ ਨਾਨਾਕਰਣਂ. ਏਕਾਦਸਮਂ.
੧੨-੧੩. ਕਪ੍ਪਸੁਤ੍ਤਾਦਿਵਣ੍ਣਨਾ
੧੨੪-੧੨੫. ਦ੍ਵਾਦਸਮਤੇਰਸਮਾਨਿ ਰਾਹੁਲੋਵਾਦਸਦਿਸਾਨੇਵਾਤਿ. ਦ੍ਵਾਦਸਮਤੇਰਸਮਾਨਿ.
ਧਮ੍ਮਕਥਿਕਵਗ੍ਗੋ ਦ੍ਵਾਦਸਮੋ.