੧੦. ਅਨਿਚ੍ਚਸਞ੍ਞਾਸੁਤ੍ਤਵਣ੍ਣਨਾ

੧੦੨. ਦਸਮੇ ਅਨਿਚ੍ਚਸਞ੍ਞਾਤਿ ਅਨਿਚ੍ਚਂ ਅਨਿਚ੍ਚਨ੍ਤਿ ਭਾਵੇਨ੍ਤਸ੍ਸ ਉਪ੍ਪਨ੍ਨਸਞ੍ਞਾ. ਪਰਿਯਾਦਿਯਤੀਤਿ ਖੇਪਯਤਿ. ਸਬ੍ਬਂ ਅਸ੍ਮਿਮਾਨਨ੍ਤਿ ਨਵਵਿਧਂ ਅਸ੍ਮਿਮਾਨਂ. ਮੂਲਸਨ੍ਤਾਨਕਾਨੀਤਿ ਸਨ੍ਤਾਨੇਤ੍ਵਾ ਠਿਤਮੂਲਾਨਿ. ਮਹਾਨਙ੍ਗਲਂ ਵਿਯ ਹਿ ਅਨਿਚ੍ਚਸਞ੍ਞਾ, ਖੁਦ੍ਦਾਨੁਖੁਦ੍ਦਕਾਨਿ ਮੂਲਸਨ੍ਤਾਨਕਾਨਿ ਵਿਯ ਕਿਲੇਸਾ, ਯਥਾ ਕਸ੍ਸਕੋ ਕਸਨ੍ਤੋ ਨਙ੍ਗਲੇਨ ਤਾਨਿ ਪਦਾਲੇਤਿ, ਏਵਂ ਯੋਗੀ ਅਨਿਚ੍ਚਸਞ੍ਞਂ ਭਾਵੇਨ੍ਤੋ ਅਨਿਚ੍ਚਸਞ੍ਞਾਞਾਣੇਨ ਕਿਲੇਸੇ ਪਦਾਲੇਤੀਤਿ ਇਦਮੇਤ੍ਥ ਓਪਮ੍ਮਸਂਸਨ੍ਦਨਂ.

ਓਧੁਨਾਤੀਤਿ ਹੇਟ੍ਠਾ ਧੁਨਾਤਿ. ਨਿਦ੍ਧੁਨਾਤੀਤਿ ਪਪ੍ਫੋਟੇਤਿ. ਨਿਚ੍ਛੋਟੇਤੀਤਿ ਪਪ੍ਫੋਟੇਤ੍ਵਾ ਛਡ੍ਡੇਤਿ. ਇਧਾਪਿ ਪਬ੍ਬਜਾਨਿ ਵਿਯ ਕਿਲੇਸਾ, ਲਾਯਨਂ ਨਿਚ੍ਛੋਟਨਂ ਵਿਯ ਅਨਿਚ੍ਚਸਞ੍ਞਾਞਾਣਨ੍ਤਿ ਇਮਿਨਾ ਅਤ੍ਥੇਨ ਉਪਮਾ ਸਂਸਨ੍ਦੇਤਬ੍ਬਾ.

ਵਣ੍ਟਚ੍ਛਿਨ੍ਨਾਯਾਤਿ ਤਿਣ੍ਹੇਨ ਖੁਰਪ੍ਪੇਨ ਵਣ੍ਟਚ੍ਛਿਨ੍ਨਾਯ. ਤਦਨ੍ਵਯਾਨਿ ਭਵਨ੍ਤੀਤਿ ਤਂ ਅਮ੍ਬਪਿਣ੍ਡਿਂ ਅਨੁਗਚ੍ਛਨ੍ਤਿ, ਤਸ੍ਸਾ ਪਤਮਾਨਾਯ ਅਮ੍ਬਾਨਿ ਭੂਮਿਯਂ ਪਤਨ੍ਤਿ. ਇਧਾਪਿ ਅਮ੍ਬਪਿਣ੍ਡਿ ਵਿਯ ਕਿਲੇਸਾ, ਤਿਣ੍ਹਖੁਰਪ੍ਪੋ ਵਿਯ ਅਨਿਚ੍ਚਸਞ੍ਞਾ, ਯਥਾ ਖੁਰਪ੍ਪੇਨ ਛਿਨ੍ਨਾਯ ਅਮ੍ਬਪਿਣ੍ਡਿਯਾ ਸਬ੍ਬਾਨਿ ਅਮ੍ਬਾਨਿ ਭੂਮਿਯਂ ਪਤਨ੍ਤਿ, ਏਵਂ ਅਨਿਚ੍ਚਸਞ੍ਞਾਞਾਣੇਨ ਕਿਲੇਸਾਨਂ ਮੂਲਭੂਤਾਯ ਅਵਿਜ੍ਜਾਯ ਛਿਨ੍ਨਾਯ ਸਬ੍ਬਕਿਲੇਸਾ ਸਮੁਗ੍ਘਾਤਂ ਗਚ੍ਛਨ੍ਤੀਤਿ, ਇਦਂ ਓਪਮ੍ਮਸਂਸਨ੍ਦਨਂ.

ਕੂਟਙ੍ਗਮਾਤਿ ਕੂਟਂ ਗਚ੍ਛਨ੍ਤਿ. ਕੂਟਨਿਨ੍ਨਾਤਿ ਕੂਟਂ ਪਵਿਸਨਭਾਵੇਨ ਕੂਟੇ ਨਿਨ੍ਨਾ. ਕੂਟਸਮੋਸਰਣਾਤਿ ਕੂਟੇ ਸਮੋਸਰਿਤ੍ਵਾ ਠਿਤਾ. ਇਧਾਪਿ ਕੂਟਂ ਵਿਯ ਅਨਿਚ੍ਚਸਞ੍ਞਾ, ਗੋਪਾਨਸਿਯੋ ਵਿਯ ਚਤੁਭੂਮਕਕੁਸਲਧਮ੍ਮਾ, ਯਥਾ ਸਬ੍ਬਗੋਪਾਨਸੀਨਂ ਕੂਟਂ ਅਗ੍ਗਂ, ਏਵਂ ਕੁਸਲਧਮ੍ਮਾਨਂ ਅਨਿਚ੍ਚਸਞ੍ਞਾ ਅਗ੍ਗਾ. ਨਨੁ ਚ ਅਨਿਚ੍ਚਸਞ੍ਞਾ ਲੋਕਿਯਾ, ਸਾ ਲੋਕਿਯਕੁਸਲਾਨਂ ਤਾਵ ਅਗ੍ਗਂ ਹੋਤੁ, ਲੋਕੁਤ੍ਤਰਾਨਂ ਕਥਂ ਅਗ੍ਗਨ੍ਤਿ? ਤੇਸਮ੍ਪਿ ਪਟਿਲਾਭਕਰਣਤ੍ਥੇਨ ਅਗ੍ਗਨ੍ਤਿ ਵੇਦਿਤਬ੍ਬਾ. ਇਮਿਨਾ ਉਪਾਯੇਨ ਸਬ੍ਬਾਸੁ ਉਪਮਾਸੁ ਓਪਮ੍ਮਸਂਸਨ੍ਦਨਂ ਵੇਦਿਤਬ੍ਬਂ. ਪੁਰਿਮਾਹਿ ਪਨੇਤ੍ਥ ਤੀਹਿ ਅਨਿਚ੍ਚਸਞ੍ਞਾਯ ਕਿਚ੍ਚਂ, ਪਚ੍ਛਿਮਾਹਿ ਬਲਨ੍ਤਿ. ਦਸਮਂ.

ਪੁਪ੍ਫਵਗ੍ਗੋ ਦਸਮੋ.

ਮਜ੍ਝਿਮਪਣ੍ਣਾਸਕੋ ਸਮਤ੍ਤੋ.