੧. ਨਕੁਲਪਿਤੁਸੁਤ੍ਤਵਣ੍ਣਨਾ

੧. ਖਨ੍ਧਿਯਵਗ੍ਗਸ੍ਸ ਪਠਮੇ ਭਗ੍ਗੇਸੂਤਿ ਏਵਂਨਾਮਕੇ ਜਨਪਦੇ. ਸੁਸੁਮਾਰਗਿਰੇਤਿ ਸੁਸੁਮਾਰਗਿਰਨਗਰੇ. ਤਸ੍ਮਿਂ ਕਿਰ ਮਾਪਿਯਮਾਨੇ ਸੁਸੁਮਾਰੋ ਸਦ੍ਦਮਕਾਸਿ, ਤੇਨਸ੍ਸ ‘‘ਸੁਸੁਮਾਰਗਿਰ’’ਨ੍ਤ੍ਵੇਵ ਨਾਮਂ ਅਕਂਸੁ. ਭੇਸਕਲ਼ਾਵਨੇਤਿ ਭੇਸਕਲ਼ਾਯ ਨਾਮ ਯਕ੍ਖਿਨਿਯਾ ਅਧਿਵੁਤ੍ਥਤ੍ਤਾ ਏਵਂਲਦ੍ਧਨਾਮੇ ਵਨੇ. ਤਦੇਵ ਮਿਗਗਣਸ੍ਸ ਅਭਯਤ੍ਥਾਯ ਦਿਨ੍ਨਤ੍ਤਾ ਮਿਗਦਾਯੋਤਿ ਵੁਚ੍ਚਤਿ. ਭਗਵਾ ਤਸ੍ਮਿਂ ਜਨਪਦੇ ਤਂ ਨਗਰਂ ਨਿਸ੍ਸਾਯ ਤਸ੍ਮਿਂ ਵਨਸਣ੍ਡੇ ਵਿਹਰਤਿ. ਨਕੁਲਪਿਤਾਤਿ ਨਕੁਲਸ੍ਸ ਨਾਮ ਦਾਰਕਸ੍ਸ ਪਿਤਾ.

ਜਿਣ੍ਣੋਤਿ ਜਰਾਜਿਣ੍ਣੋ. ਵੁਡ੍ਢੋਤਿ ਵਯੋਵੁਡ੍ਢੋ. ਮਹਲ੍ਲਕੋਤਿ ਜਾਤਿਮਹਲ੍ਲਕੋ. ਅਦ੍ਧਗਤੋਤਿ ਤਿਯਦ੍ਧਗਤੋ. ਵਯੋਅਨੁਪ੍ਪਤ੍ਤੋਤਿ ਤੇਸੁ ਤੀਸੁ ਅਦ੍ਧੇਸੁ ਪਚ੍ਛਿਮਵਯਂ ਅਨੁਪ੍ਪਤ੍ਤੋ. ਆਤੁਰਕਾਯੋਤਿ ਗਿਲਾਨਕਾਯੋ. ਇਦਞ੍ਹਿ ਸਰੀਰਂ ਸੁਵਣ੍ਣਵਣ੍ਣਮ੍ਪਿ ਨਿਚ੍ਚਪਗ੍ਘਰਣਟ੍ਠੇਨ ਆਤੁਰਂਯੇਵ ਨਾਮ. ਵਿਸੇਸੇਨ ਪਨਸ੍ਸ ਜਰਾਤੁਰਤਾ ਬ੍ਯਾਧਾਤੁਰਤਾ ਮਰਣਾਤੁਰਤਾਤਿ ਤਿਸ੍ਸੋ ਆਤੁਰਤਾ ਹੋਨ੍ਤਿ. ਤਾਸੁ ਕਿਞ੍ਚਾਪਿ ਏਸੋ ਮਹਲ੍ਲਕਤ੍ਤਾ ਜਰਾਤੁਰੋਵ, ਅਭਿਣ੍ਹਰੋਗਤਾਯ ਪਨਸ੍ਸ ਬ੍ਯਾਧਾਤੁਰਤਾ ਇਧ ਅਧਿਪ੍ਪੇਤਾ. ਅਭਿਕ੍ਖਣਾਤਙ੍ਕੋਤਿ ਅਭਿਣ੍ਹਰੋਗੋ ਨਿਰਨ੍ਤਰਰੋਗੋ. ਅਨਿਚ੍ਚਦਸ੍ਸਾਵੀਤਿ ਤਾਯ ਆਤੁਰਤਾਯ ਇਚ੍ਛਿਤਿਚ੍ਛਿਤਕ੍ਖਣੇ ਆਗਨ੍ਤੁਂ ਅਸਕ੍ਕੋਨ੍ਤੋ ਕਦਾਚਿਦੇਵ ਦਟ੍ਠੁਂ ਲਭਾਮਿ, ਨ ਸਬ੍ਬਕਾਲਨ੍ਤਿ ਅਤ੍ਥੋ. ਮਨੋਭਾਵਨੀਯਾਨਨ੍ਤਿ ਮਨਵਡ੍ਢਕਾਨਂ. ਯੇਸੁ ਹਿ ਦਿਟ੍ਠੇਸੁ ਕੁਸਲਵਸੇਨ ਚਿਤ੍ਤਂ ਵਡ੍ਢਤਿ, ਤੇ ਸਾਰਿਪੁਤ੍ਤਮੋਗ੍ਗਲ੍ਲਾਨਾਦਯੋ ਮਹਾਥੇਰਾ ਮਨੋਭਾਵਨੀਯਾ ਨਾਮ. ਅਨੁਸਾਸਤੂਤਿ ਪੁਨਪ੍ਪੁਨਂ ਸਾਸਤੁ. ਪੁਰਿਮਞ੍ਹਿ ਵਚਨਂ ਓਵਾਦੋ ਨਾਮ, ਅਪਰਾਪਰਂ ਅਨੁਸਾਸਨੀ ਨਾਮ. ਓਤਿਣ੍ਣੇ ਵਾ ਵਤ੍ਥੁਸ੍ਮਿਂ ਵਚਨਂ ਓਵਾਦੋ ਨਾਮ, ਅਨੋਤਿਣ੍ਣੇ ਤਨ੍ਤਿਵਸੇਨ ਵਾ ਪਵੇਣਿਵਸੇਨ ਵਾ ਵੁਤ੍ਤਂ ਅਨੁਸਾਸਨੀ ਨਾਮ. ਅਪਿਚ ਓਵਾਦੋਤਿ ਵਾ ਅਨੁਸਾਸਨੀਤਿ ਵਾ ਅਤ੍ਥਤੋ ਏਕਮੇਵ, ਬ੍ਯਞ੍ਜਨਮਤ੍ਤਮੇਵ ਨਾਨਂ.

ਆਤੁਰੋ ਹਾਯਨ੍ਤਿ ਆਤੁਰੋ ਹਿ ਅਯਂ, ਸੁਵਣ੍ਣਵਣ੍ਣੋ ਪਿਯਙ੍ਗੁਸਾਮੋਪਿ ਸਮਾਨੋ ਨਿਚ੍ਚਪਗ੍ਘਰਣਟ੍ਠੇਨ ਆਤੁਰੋਯੇਵ. ਅਣ੍ਡਭੂਤੋਤਿ ਅਣ੍ਡਂ ਵਿਯ ਭੂਤੋ ਦੁਬ੍ਬਲੋ. ਯਥਾ ਕੁਕ੍ਕੁਟਣ੍ਡਂ ਵਾ ਮਯੂਰਣ੍ਡਂ ਵਾ ਗੇਣ੍ਡੁਕਂ ਵਿਯ ਗਹੇਤ੍ਵਾ ਖਿਪਨ੍ਤੇਨ ਵਾ ਪਹਰਨ੍ਤੇਨ ਵਾ ਨ ਸਕ੍ਕਾ ਕੀਲ਼ਿਤੁਂ, ਤਾਵਦੇਵ ਭਿਜ੍ਜਤਿ, ਏਵਮਯਮ੍ਪਿ ਕਾਯੋ ਕਣ੍ਟਕੇਪਿ ਖਾਣੁਕੇਪਿ ਪਕ੍ਖਲਿਤਸ੍ਸ ਭਿਜ੍ਜਤੀਤਿ ਅਣ੍ਡਂ ਵਿਯ ਭੂਤੋਤਿ ਅਣ੍ਡਭੂਤੋ. ਪਰਿਯੋਨਦ੍ਧੋਤਿ ਸੁਖੁਮੇਨ ਛਵਿਮਤ੍ਤੇਨ ਪਰਿਯੋਨਦ੍ਧੋ. ਅਣ੍ਡਞ੍ਹਿ ਸਾਰਤਚੇਨ ਪਰਿਯੋਨਦ੍ਧਂ, ਤੇਨ ਡਂਸਮਕਸਾਦਯੋ ਨਿਲੀਯਿਤ੍ਵਾਪਿ ਛਵਿਂ ਛਿਨ੍ਦਿਤ੍ਵਾ ਯੂਸਂ ਪਗ੍ਘਰਾਪੇਤੁਂ ਨ ਸਕ੍ਕੋਨ੍ਤਿ. ਇਮਸ੍ਮਿਂ ਪਨ ਛਵਿਂ ਛਿਨ੍ਦਿਤ੍ਵਾ ਯਂ ਇਚ੍ਛਨ੍ਤਿ, ਤਂ ਕਰੋਨ੍ਤਿ. ਏਵਂ ਸੁਖੁਮਾਯ ਛਵਿਯਾ ਪਰਿਯੋਨਦ੍ਧੋ. ਕਿਮਞ੍ਞਤ੍ਰ ਬਾਲ੍ਯਾਤਿ ਬਾਲਭਾਵਤੋ ਅਞ੍ਞਂ ਕਿਮਤ੍ਥਿ? ਬਾਲੋਯੇਵ ਅਯਨ੍ਤਿ ਅਤ੍ਥੋ. ਤਸ੍ਮਾਤਿ ਯਸ੍ਮਾ ਅਯਂ ਕਾਯੋ ਏਵਰੂਪੋ, ਤਸ੍ਮਾ.

ਤੇਨੁਪਸਙ੍ਕਮੀਤਿ ਰਞ੍ਞੋ ਚਕ੍ਕਵਤ੍ਤਿਸ੍ਸ ਉਪਟ੍ਠਾਨਂ ਗਨ੍ਤ੍ਵਾ ਅਨਨ੍ਤਰਂ ਪਰਿਣਾਯਕਰਤਨਸ੍ਸ ਉਪਟ੍ਠਾਨਂ ਗਚ੍ਛਨ੍ਤੋ ਰਾਜਪੁਰਿਸੋ ਵਿਯ, ਸਦ੍ਧਮ੍ਮਚਕ੍ਕਵਤ੍ਤਿਸ੍ਸ ਭਗਵਤੋ ਉਪਟ੍ਠਾਨਂ ਗਨ੍ਤ੍ਵਾ, ਅਨਨ੍ਤਰਂ ਧਮ੍ਮਸੇਨਾਪਤਿਸ੍ਸ ਅਪਚਿਤਿਂ ਕਾਤੁਕਾਮੋ ਯੇਨਾਯਸ੍ਮਾ ਸਾਰਿਪੁਤ੍ਤੋ, ਤੇਨੁਪਸਙ੍ਕਮਿ. ਵਿਪ੍ਪਸਨ੍ਨਾਨੀਤਿ ਸੁਟ੍ਠੁ ਪਸਨ੍ਨਾਨਿ. ਇਨ੍ਦ੍ਰਿਯਾਨੀਤਿ ਮਨਚ੍ਛਟ੍ਠਾਨਿ ਇਨ੍ਦ੍ਰਿਯਾਨਿ. ਪਰਿਸੁਦ੍ਧੋਤਿ ਨਿਦ੍ਦੋਸੋ. ਪਰਿਯੋਦਾਤੋਤਿ ਤਸ੍ਸੇਵ ਵੇਵਚਨਂ. ਨਿਰੁਪਕ੍ਕਿਲੇਸਤਾਯੇਵ ਹਿ ਏਸ ਪਰਿਯੋਦਾਤੋਤਿ ਵੁਤ੍ਤੋ, ਨ ਸੇਤਭਾਵੇਨ. ਏਤਸ੍ਸ ਚ ਪਰਿਯੋਦਾਤਤਂ ਦਿਸ੍ਵਾਵ ਇਨ੍ਦ੍ਰਿਯਾਨਂ ਵਿਪ੍ਪਸਨ੍ਨਤਂ ਅਞ੍ਞਾਸਿ. ਨਯਗ੍ਗਾਹਪਞ੍ਞਾ ਕਿਰੇਸਾ ਥੇਰਸ੍ਸ.

ਕਥਞ੍ਹਿ ਨੋ ਸਿਯਾਤਿ ਕੇਨ ਕਾਰਣੇਨ ਨ ਲਦ੍ਧਾ ਭਵਿਸ੍ਸਤਿ? ਲਦ੍ਧਾਯੇਵਾਤਿ ਅਤ੍ਥੋ. ਇਮਿਨਾ ਕਿਂ ਦੀਪੇਤਿ? ਸਤ੍ਥੁਵਿਸ੍ਸਾਸਿਕਭਾਵਂ. ਅਯਂ ਕਿਰ ਸਤ੍ਥੁ ਦਿਟ੍ਠਕਾਲਤੋ ਪਟ੍ਠਾਯ ਪਿਤਿਪੇਮਂ, ਉਪਾਸਿਕਾ ਚਸ੍ਸ ਮਾਤਿਪੇਮਂ ਪਟਿਲਭਤਿ. ਉਭੋਪਿ ‘‘ਮਮ ਪੁਤ੍ਤੋ’’ਤਿ ਸਤ੍ਥਾਰਂ ਵਦਨ੍ਤਿ. ਭਵਨ੍ਤਰਗਤੋ ਹਿ ਨੇਸਂ ਸਿਨੇਹੋ. ਸਾ ਕਿਰ ਉਪਾਸਿਕਾ ਪਞ੍ਚ ਜਾਤਿਸਤਾਨਿ ਤਥਾਗਤਸ੍ਸ ਮਾਤਾਵ, ਸੋ ਚ, ਗਹਪਤਿ, ਪਿਤਾਵ ਅਹੋਸਿ. ਪੁਨ ਪਞ੍ਚ ਜਾਤਿਸਤਾਨਿ ਉਪਾਸਿਕਾ ਮਹਾਮਾਤਾ, ਉਪਾਸਕੋ ਮਹਾਪਿਤਾ, ਤਥਾ ਚੂਲ਼ਾਮਾਤਾ ਚੂਲ਼ਪਿਤਾਤਿ. ਏਵਂ ਸਤ੍ਥਾ ਦਿਯਡ੍ਢਅਤ੍ਤਭਾਵਸਹਸ੍ਸਂ ਤੇਸਂਯੇਵ ਹਤ੍ਥੇ ਵਡ੍ਢਿਤੋ. ਤੇਨੇਵ ਤੇ ਯਂ ਨੇਵ ਪੁਤ੍ਤਸ੍ਸ, ਨ ਪਿਤੁ ਸਨ੍ਤਿਕੇ ਕਥੇਤੁਂ ਸਕ੍ਕਾ, ਤਂ ਸਤ੍ਥੁ ਸਨ੍ਤਿਕੇ ਨਿਸਿਨ੍ਨਾ ਕਥੇਨ੍ਤਿ. ਇਮਿਨਾਯੇਵ ਚ ਕਾਰਣੇਨ ਭਗਵਾ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਉਪਾਸਕਾਨਂ ਵਿਸ੍ਸਾਸਿਕਾਨਂ ਯਦਿਦਂ ਨਕੁਲਪਿਤਾ ਗਹਪਤਿ, ਯਦਿਦਂ ਨਕੁਲਮਾਤਾ ਗਹਪਤਾਨੀ’’ਤਿ (ਅ. ਨਿ. ੧.੨੫੭) ਤੇ ਏਤਦਗ੍ਗੇ ਠਪੇਸਿ. ਇਤਿ ਸੋ ਇਮਂ ਵਿਸ੍ਸਾਸਿਕਭਾਵਂ ਪਕਾਸੇਨ੍ਤੋ ਕਥਞ੍ਹਿ ਨੋ ਸਿਯਾਤਿ ਆਹ. ਅਮਤੇਨ ਅਭਿਸਿਤ੍ਤੋਤਿ ਨਸ੍ਸਿਧ ਅਞ੍ਞਂ ਕਿਞ੍ਚਿ ਝਾਨਂ ਵਾ ਵਿਪਸ੍ਸਨਾ ਵਾ ਮਗ੍ਗੋ ਵਾ ਫਲਂ ਵਾ ‘‘ਅਮਤਾਭਿਸੇਕੋ’’ਤਿ ਦਟ੍ਠਬ੍ਬੋ, ਮਧੁਰਧਮ੍ਮਦੇਸਨਾਯੇਵ ਪਨ ‘‘ਅਮਤਾਭਿਸੇਕੋ’’ਤਿ ਵੇਦਿਤਬ੍ਬੋ. ਦੂਰਤੋਪੀਤਿ ਤਿਰੋਰਟ੍ਠਾਪਿ ਤਿਰੋਜਨਪਦਾਪਿ.

ਅਸ੍ਸੁਤਵਾ ਪੁਥੁਜ੍ਜਨੋਤਿ ਇਦਂ ਵੁਤ੍ਤਤ੍ਥਮੇਵ. ਅਰਿਯਾਨਂ ਅਦਸ੍ਸਾਵੀਤਿਆਦੀਸੁ ਅਰਿਯਾਤਿ ਆਰਕਤ੍ਤਾ ਕਿਲੇਸੇਹਿ, ਅਨਯੇ ਨ ਇਰਿਯਨਤੋ, ਅਯੇ ਇਰਿਯਨਤੋ, ਸਦੇਵਕੇਨ ਚ ਲੋਕੇਨ ਅਰਣੀਯਤੋ ਬੁਦ੍ਧਾ ਚ ਪਚ੍ਚੇਕਬੁਦ੍ਧਾ ਚ ਬੁਦ੍ਧਸਾਵਕਾ ਚ ਵੁਚ੍ਚਨ੍ਤਿ. ਬੁਦ੍ਧਾ ਏਵ ਵਾ ਇਧ ਅਰਿਯਾ. ਯਥਾਹ – ‘‘ਸਦੇਵਕੇ, ਭਿਕ੍ਖਵੇ, ਲੋਕੇ…ਪੇ… ਤਥਾਗਤੋ ਅਰਿਯੋ’’ਤਿ ਵੁਚ੍ਚਤੀਤਿ (ਸਂ. ਨਿ. ੫.੧੦੯੮). ਸਪ੍ਪੁਰਿਸਾਨਨ੍ਤਿ ਏਤ੍ਥ ਪਨ ਪਚ੍ਚੇਕਬੁਦ੍ਧਾ ਤਥਾਗਤਸਾਵਕਾ ਚ ਸਪ੍ਪੁਰਿਸਾਤਿ ਵੇਦਿਤਬ੍ਬਾ. ਤੇ ਹਿ ਲੋਕੁਤ੍ਤਰਗੁਣਯੋਗੇਨ ਸੋਭਨਾ ਪੁਰਿਸਾਤਿ ਸਪ੍ਪੁਰਿਸਾ. ਸਬ੍ਬੇਵ ਵਾ ਏਤੇ ਦ੍ਵੇਧਾਪਿ ਵੁਤ੍ਤਾ. ਬੁਦ੍ਧਾਪਿ ਹਿ ਅਰਿਯਾ ਚ ਸਪ੍ਪੁਰਿਸਾ ਚ, ਪਚ੍ਚੇਕਬੁਦ੍ਧਾ ਬੁਦ੍ਧਸਾਵਕਾਪਿ. ਯਥਾਹ –

‘‘ਯੋ ਵੇ ਕਤਞ੍ਞੂ ਕਤਵੇਦਿ ਧੀਰੋ,

ਕਲ੍ਯਾਣਮਿਤ੍ਤੋ ਦਲ਼੍ਹਭਤ੍ਤਿ ਚ ਹੋਤਿ;

ਦੁਖਿਤਸ੍ਸ ਸਕ੍ਕਚ੍ਚ ਕਰੋਤਿ ਕਿਚ੍ਚਂ,

ਤਥਾਵਿਧਂ ਸਪ੍ਪੁਰਿਸਂ ਵਦਨ੍ਤੀ’’ਤਿ. (ਜਾ. ੨.੧੭.੭੮);

‘‘ਕਲ੍ਯਾਣਮਿਤ੍ਤੋ ਦਲ਼੍ਹਭਤ੍ਤਿ ਚ ਹੋਤੀ’’ਤਿ ਏਤ੍ਤਾਵਤਾ ਹਿ ਬੁਦ੍ਧਸਾਵਕੋ ਵੁਤ੍ਤੋ, ਕਤਞ੍ਞੁਤਾਦੀਹਿ ਪਚ੍ਚੇਕਬੁਦ੍ਧਬੁਦ੍ਧਾਤਿ. ਇਦਾਨਿ ਯੋ ਤੇਸਂ ਅਰਿਯਾਨਂ ਅਦਸ੍ਸਨਸੀਲੋ, ਨ ਚ ਦਸ੍ਸਨੇ ਸਾਧੁਕਾਰੀ, ਸੋ ‘‘ਅਰਿਯਾਨਂ ਅਦਸ੍ਸਾਵੀ’’ਤਿ ਵੇਦਿਤਬ੍ਬੋ. ਸੋ ਚ ਚਕ੍ਖੁਨਾ ਅਦਸ੍ਸਾਵੀ, ਞਾਣੇਨ ਅਦਸ੍ਸਾਵੀਤਿ ਦੁਵਿਧੋ. ਤੇਸੁ ਞਾਣੇਨ ਅਦਸ੍ਸਾਵੀ ਇਧ ਅਧਿਪ੍ਪੇਤੋ. ਮਂਸਚਕ੍ਖੁਨਾ ਹਿ ਦਿਬ੍ਬਚਕ੍ਖੁਨਾ ਵਾ ਅਰਿਯਾ ਦਿਟ੍ਠਾਪਿ ਅਦਿਟ੍ਠਾਵ ਹੋਨ੍ਤਿ ਤੇਸਂ ਚਕ੍ਖੂਨਂ ਵਣ੍ਣਮਤ੍ਤਗ੍ਗਹਣਤੋ ਨ ਅਰਿਯਭਾਵਗੋਚਰਤੋ. ਸੋਣਸਿਙ੍ਗਾਲਾਦਯੋਪਿ ਚਕ੍ਖੁਨਾ ਅਰਿਯੇ ਪਸ੍ਸਨ੍ਤਿ, ਨ ਚੇਤੇ ਅਰਿਯਾਨਂ ਦਸ੍ਸਾਵਿਨੋ ਨਾਮ.

ਤਤ੍ਰਿਦਂ ਵਤ੍ਥੁ – ਚਿਤ੍ਤਲਪਬ੍ਬਤਵਾਸਿਨੋ ਕਿਰ ਖੀਣਾਸਵਤ੍ਥੇਰਸ੍ਸ ਉਪਟ੍ਠਾਕੋ ਵੁਡ੍ਢਪਬ੍ਬਜਿਤੋ ਏਕਦਿਵਸਂ ਥੇਰੇਨ ਸਦ੍ਧਿਂ ਪਿਣ੍ਡਾਯ ਚਰਿਤ੍ਵਾ, ਥੇਰਸ੍ਸ ਪਤ੍ਤਚੀਵਰਂ ਗਹੇਤ੍ਵਾ, ਪਿਟ੍ਠਿਤੋ ਆਗਚ੍ਛਨ੍ਤੋ ਥੇਰਂ ਪੁਚ੍ਛਿ – ‘‘ਅਰਿਯਾ ਨਾਮ, ਭਨ੍ਤੇ, ਕੀਦਿਸਾ’’ਤਿ? ਥੇਰੋ ਆਹ – ‘‘ਇਧੇਕਚ੍ਚੋ ਮਹਲ੍ਲਕੋ ਅਰਿਯਾਨਂ ਪਤ੍ਤਚੀਵਰਂ ਗਹੇਤ੍ਵਾ ਵਤ੍ਤਪਟਿਵਤ੍ਤਂ ਕਤ੍ਵਾ ਸਹਚਰਨ੍ਤੋਪਿ ਨੇਵ ਅਰਿਯੇ ਜਾਨਾਤਿ, ਏਵਂ ਦੁਜ੍ਜਾਨਾਵੁਸੋ, ਅਰਿਯਾ’’ਤਿ. ਏਵਂ ਵੁਤ੍ਤੇਪਿ ਸੋ ਨੇਵ ਅਞ੍ਞਾਸਿ. ਤਸ੍ਮਾ ਨ ਚਕ੍ਖੁਨਾ ਦਸ੍ਸਨਂ ਦਸ੍ਸਨਂ, ਞਾਣੇਨ ਦਸ੍ਸਨਮੇਵ ਦਸ੍ਸਨਂ. ਯਥਾਹ – ‘‘ਕਿਂ ਤੇ, ਵਕ੍ਕਲਿ, ਇਮਿਨਾ ਪੂਤਿਕਾਯੇਨ ਦਿਟ੍ਠੇਨ? ਯੋ ਖੋ, ਵਕ੍ਕਲਿ, ਧਮ੍ਮਂ ਪਸ੍ਸਤਿ, ਸੋ ਮਂ ਪਸ੍ਸਤਿ. ਯੋ ਮਂ ਪਸ੍ਸਤਿ, ਸੋ ਧਮ੍ਮਂ ਪਸ੍ਸਤੀ’’ਤਿ (ਸਂ. ਨਿ. ੩.੮੭). ਤਸ੍ਮਾ ਚਕ੍ਖੁਨਾ ਪਸ੍ਸਨ੍ਤੋਪਿ ਞਾਣੇਨ ਅਰਿਯੇਹਿ ਦਿਟ੍ਠਂ ਅਨਿਚ੍ਚਾਦਿਲਕ੍ਖਣਂ ਅਪਸ੍ਸਨ੍ਤੋ, ਅਰਿਯਾਧਿਗਤਞ੍ਚ ਧਮ੍ਮਂ ਅਨਧਿਗਚ੍ਛਨ੍ਤੋ ਅਰਿਯਕਰਧਮ੍ਮਾਨਂ ਅਰਿਯਭਾਵਸ੍ਸ ਚ ਅਦਿਟ੍ਠਤ੍ਤਾ ‘‘ਅਰਿਯਾਨਂ ਅਦਸ੍ਸਾਵੀ’’ਤਿ ਵੇਦਿਤਬ੍ਬੋ.

ਅਰਿਯਧਮ੍ਮਸ੍ਸ ਅਕੋਵਿਦੋਤਿ, ਸਤਿਪਟ੍ਠਾਨਾਦਿਭੇਦੇ ਅਰਿਯਧਮ੍ਮੇ ਅਕੁਸਲੋ. ਅਰਿਯਧਮ੍ਮੇ ਅਵਿਨੀਤੋਤਿ ਏਤ੍ਥ ਪਨ –

‘‘ਦੁਵਿਧੋ ਵਿਨਯੋ ਨਾਮ, ਏਕਮੇਕੇਤ੍ਥ ਪਞ੍ਚਧਾ;

ਅਭਾਵਤੋ ਤਸ੍ਸ ਅਯਂ, ਅਵਿਨੀਤੋਤਿ ਵੁਚ੍ਚਤਿ’’.

ਅਯਞ੍ਹਿ ਸਂਵਰਵਿਨਯੋ ਪਹਾਨਵਿਨਯੋਤਿ ਦੁਵਿਧੋ ਵਿਨਯੋ. ਏਤ੍ਥ ਚ ਦੁਵਿਧੇਪਿ ਵਿਨਯੇ ਏਕਮੇਕੋ ਵਿਨਯੋ ਪਞ੍ਚਧਾ ਭਿਜ੍ਜਤਿ. ਸਂਵਰਵਿਨਯੋਪਿ ਹਿ ਸੀਲਸਂਵਰੋ ਸਤਿਸਂਵਰੋ ਞਾਣਸਂਵਰੋ ਖਨ੍ਤਿਸਂਵਰੋ ਵੀਰਿਯਸਂਵਰੋਤਿ ਪਞ੍ਚਵਿਧੋ. ਪਹਾਨਵਿਨਯੋਪਿ ਤਦਙ੍ਗਪ੍ਪਹਾਨਂ, ਵਿਕ੍ਖਮ੍ਭਨਪ੍ਪਹਾਨਂ ਸਮੁਚ੍ਛੇਦਪ੍ਪਹਾਨਂ ਪਟਿਪ੍ਪਸ੍ਸਦ੍ਧਿਪ੍ਪਹਾਨਂ ਨਿਸ੍ਸਰਣਪ੍ਪਹਾਨਨ੍ਤਿ ਪਞ੍ਚਵਿਧੋ.

ਤਤ੍ਥ ‘‘ਇਮਿਨਾ ਪਾਤਿਮੋਕ੍ਖਸਂਵਰੇਨ ਉਪੇਤੋ ਹੋਤਿ ਸਮੁਪੇਤੋ’’ਤਿ (ਵਿਭ. ੫੧੧) ਅਯਂ ਸੀਲਸਂਵਰੋ. ‘‘ਰਕ੍ਖਤਿ ਚਕ੍ਖੁਨ੍ਦ੍ਰਿਯਂ, ਚਕ੍ਖੁਨ੍ਦ੍ਰਿਯੇ ਸਂਵਰਂ ਆਪਜ੍ਜਤੀ’’ਤਿ ਅਯਂ (ਦੀ. ਨਿ. ੧.੨੧੩; ਮ. ਨਿ. ੧.੨੯੫; ਸਂ. ਨਿ. ੪.੨੩੯; ਅ. ਨਿ. ੩.੧੬) ਸਤਿਸਂਵਰੋ.

‘‘ਯਾਨਿ ਸੋਤਾਨਿ ਲੋਕਸ੍ਮਿਂ, (ਅਜਿਤਾਤਿ ਭਗਵਾ)

ਸਤਿ ਤੇਸਂ ਨਿਵਾਰਣਂ;

ਸੋਤਾਨਂ ਸਂਵਰਂ ਬ੍ਰੂਮਿ,

ਪਞ੍ਞਾਯੇਤੇ ਪਿਧੀਯਰੇ’’ਤਿ. (ਸੁ. ਨਿ. ੧੦੪੧; ਚੂਲ਼ਨਿ. ਅਜਿਤਮਾਣਵਪੁਚ੍ਛਾਨਿਦ੍ਦੇਸ.੪) –

ਅਯਂ ਞਾਣਸਂਵਰੋ. ‘‘ਖਮੋ ਹੋਤਿ ਸੀਤਸ੍ਸ ਉਣ੍ਹਸ੍ਸਾ’’ਤਿ (ਮ. ਨਿ. ੧.੨੪; ਅ. ਨਿ. ੪.੧੧੪; ੬.੫੮) ਅਯਂ ਖਨ੍ਤਿਸਂਵਰੋ. ‘‘ਉਪ੍ਪਨ੍ਨਂ ਕਾਮਵਿਤਕ੍ਕਂ ਨਾਧਿਵਾਸੇਤੀ’’ਤਿ (ਮ. ਨਿ. ੧.੨੬; ਅ. ਨਿ. ੪.੧੧੪; ੬.੫੮) ਅਯਂ ਵੀਰਿਯਸਂਵਰੋ. ਸਬ੍ਬੋਪਿ ਚਾਯਂ ਸਂਵਰੋ ਯਥਾਸਕਂ ਸਂਵਰਿਤਬ੍ਬਾਨਂ ਵਿਨੇਤਬ੍ਬਾਨਞ੍ਚ ਕਾਯਦੁਚ੍ਚਰਿਤਾਦੀਨਂ ਸਂਵਰਣਤੋ ‘‘ਸਂਵਰੋ’’ ਵਿਨਯਨਤੋ ‘‘ਵਿਨਯੋ’’ਤਿ ਵੁਚ੍ਚਤਿ. ਏਵਂ ਤਾਵ ਸਂਵਰਵਿਨਯੋ ਪਞ੍ਚਧਾ ਭਿਜ੍ਜਤੀਤਿ ਵੇਦਿਤਬ੍ਬੋ.

ਤਥਾ ਯਂ ਨਾਮਰੂਪਪਰਿਚ੍ਛੇਦਾਦੀਸੁ ਵਿਪਸ੍ਸਨਾਞਾਣੇਸੁ ਪਟਿਪਕ੍ਖਭਾਵਤੋ ਦੀਪਾਲੋਕੇਨੇਵ ਤਮਸ੍ਸ, ਤੇਨ ਤੇਨ ਵਿਪਸ੍ਸਨਾਞਾਣੇਨ ਤਸ੍ਸ ਤਸ੍ਸ ਅਨਤ੍ਥਸ੍ਸ ਪਹਾਨਂ. ਸੇਯ੍ਯਥਿਦਂ – ਨਾਮਰੂਪਵਵਤ੍ਥਾਨੇਨ ਸਕ੍ਕਾਯਦਿਟ੍ਠਿਯਾ, ਪਚ੍ਚਯਪਰਿਗ੍ਗਹੇਨ ਅਹੇਤੁਵਿਸਮਹੇਤੁਦਿਟ੍ਠੀਨਂ, ਤਸ੍ਸੇਵ ਅਪਰਭਾਗੇਨ ਕਙ੍ਖਾਵਿਤਰਣੇਨ ਕਥਂਕਥੀਭਾਵਸ੍ਸ, ਕਲਾਪਸਮ੍ਮਸਨੇਨ ‘‘ਅਹਂ ਮਮਾ’’ਤਿ ਗਾਹਸ੍ਸ, ਮਗ੍ਗਾਮਗ੍ਗਵਵਤ੍ਥਾਨੇਨ ਅਮਗ੍ਗੇ ਮਗ੍ਗਸਞ੍ਞਾਯ, ਉਦਯਦਸ੍ਸਨੇਨ ਉਚ੍ਛੇਦਦਿਟ੍ਠਿਯਾ, ਵਯਦਸ੍ਸਨੇਨ ਸਸ੍ਸਤਦਿਟ੍ਠਿਯਾ, ਭਯਦਸ੍ਸਨੇਨ ਸਭਯੇ ਅਭਯਸਞ੍ਞਾਯ, ਆਦੀਨਵਦਸ੍ਸਨੇਨ ਅਸ੍ਸਾਦਸਞ੍ਞਾਯ, ਨਿਬ੍ਬਿਦਾਨੁਪਸ੍ਸਨਾਯ ਅਭਿਰਤਿਸਞ੍ਞਾਯ, ਮੁਚ੍ਚਿਤੁਕਮ੍ਯਤਾਞਾਣੇਨ ਅਮੁਚ੍ਚਿਤੁਕਾਮਤਾਯ. ਉਪੇਕ੍ਖਾਞਾਣੇਨ ਅਨੁਪੇਕ੍ਖਾਯ, ਅਨੁਲੋਮੇਨ ਧਮ੍ਮਟ੍ਠਿਤਿਯਂ ਨਿਬ੍ਬਾਨੇ ਚ ਪਟਿਲੋਮਭਾਵਸ੍ਸ, ਗੋਤ੍ਰਭੁਨਾ ਸਙ੍ਖਾਰਨਿਮਿਤ੍ਤਗਾਹਸ੍ਸ ਪਹਾਨਂ, ਏਤਂ ਤਦਙ੍ਗਪ੍ਪਹਾਨਂ ਨਾਮ.

ਯਂ ਪਨ ਉਪਚਾਰਪ੍ਪਨਾਭੇਦੇਨ ਸਮਾਧਿਨਾ ਪਵਤ੍ਤਿਭਾਵਨਿਵਾਰਣਤੋ ਘਟਪ੍ਪਹਾਰੇਨੇਵ ਉਦਕਪਿਟ੍ਠੇ ਸੇਵਾਲਸ੍ਸ, ਤੇਸਂ ਤੇਸਂ ਨੀਵਰਣਾਦਿਧਮ੍ਮਾਨਂ ਪਹਾਨਂ, ਏਤਂ ਵਿਕ੍ਖਮ੍ਭਨਪ੍ਪਹਾਨਂ ਨਾਮ. ਯਂ ਚਤੁਨ੍ਨਂ ਅਰਿਯਮਗ੍ਗਾਨਂ ਭਾਵਿਤਤ੍ਤਾ ਤਂਤਂਮਗ੍ਗਵਤੋ ਅਤ੍ਤਨੋ ਸਨ੍ਤਾਨੇ ‘‘ਦਿਟ੍ਠਿਗਤਾਨਂ ਪਹਾਨਾਯਾ’’ਤਿਆਦਿਨਾ ਨਯੇਨ (ਧ. ਸ. ੨੭੭; ਵਿਭ. ੬੨੮) ਵੁਤ੍ਤਸ੍ਸ ਸਮੁਦਯਪਕ੍ਖਿਕਸ੍ਸ ਕਿਲੇਸਗਣਸ੍ਸ ਅਚ੍ਚਨ੍ਤਂ ਅਪ੍ਪਵਤ੍ਤਿਭਾਵੇਨ ਪਹਾਨਂ, ਇਦਂ ਸਮੁਚ੍ਛੇਦਪ੍ਪਹਾਨਂ ਨਾਮ. ਯਂ ਪਨ ਫਲਕ੍ਖਣੇ ਪਟਿਪ੍ਪਸ੍ਸਦ੍ਧਤ੍ਤਂ ਕਿਲੇਸਾਨਂ, ਏਤਂ ਪਟਿਪ੍ਪਸ੍ਸਦ੍ਧਿਪ੍ਪਹਾਨਂ ਨਾਮ.

ਯਂ ਸਬ੍ਬਸਙ੍ਖਤਨਿਸ੍ਸਟਤ੍ਤਾ ਪਹੀਨਸਬ੍ਬਸਙ੍ਖਤਂ ਨਿਬ੍ਬਾਨਂ, ਏਤਂ ਨਿਸ੍ਸਰਣਪ੍ਪਹਾਨਂ ਨਾਮ. ਸਬ੍ਬਮ੍ਪਿ ਚੇਤਂ ਪਹਾਨਂ ਯਸ੍ਮਾ ਚਾਗਟ੍ਠੇਨ ਪਹਾਨਂ, ਵਿਨਯਟ੍ਠੇਨ ਵਿਨਯੋ, ਤਸ੍ਮਾ ‘‘ਪਹਾਨਵਿਨਯੋ’’ਤਿ ਵੁਚ੍ਚਤਿ. ਤਂਤਂਪਹਾਨਵਤੋ ਵਾ ਤਸ੍ਸ ਤਸ੍ਸ ਵਿਨਯਸ੍ਸ ਸਮ੍ਭਵਤੋਪੇਤਂ ‘‘ਪਹਾਨਵਿਨਯੋ’’ਤਿ ਵੁਚ੍ਚਤਿ. ਏਵਂ ਪਹਾਨਵਿਨਯੋਪਿ ਪਞ੍ਚਧਾ ਭਿਜ੍ਜਤੀਤਿ ਵੇਦਿਤਬ੍ਬੋ.

ਏਵਮਯਂ ਸਙ੍ਖੇਪਤੋ ਦੁਵਿਧੋ, ਭੇਦਤੋ ਚ ਦਸਵਿਧੋ ਵਿਨਯੋ ਭਿਨ੍ਨਸਂਵਰਤ੍ਤਾ ਪਹਾਤਬ੍ਬਸ੍ਸ ਚ ਅਪ੍ਪਹੀਨਤ੍ਤਾ ਯਸ੍ਮਾ ਏਤਸ੍ਸ ਅਸ੍ਸੁਤਵਤੋ ਪੁਥੁਜ੍ਜਨਸ੍ਸ ਨਤ੍ਥਿ, ਤਸ੍ਮਾ ਅਭਾਵਤੋ ਤਸ੍ਸ ਅਯਂ ‘‘ਅਵਿਨੀਤੋ’’ਤਿ ਵੁਚ੍ਚਤੀਤਿ. ਏਸ ਨਯੋ ਸਪ੍ਪੁਰਿਸਾਨਂ ਅਦਸ੍ਸਾਵੀ ਸਪ੍ਪੁਰਿਸਧਮ੍ਮਸ੍ਸ ਅਕੋਵਿਦੋ ਸਪ੍ਪੁਰਿਸਧਮ੍ਮੇ ਅਵਿਨੀਤੋਤਿ ਏਤ੍ਥਾਪਿ. ਨਿਨ੍ਨਾਨਾਕਰਣਞ੍ਹਿ ਏਤਂ ਅਤ੍ਥਤੋ. ਯਥਾਹ –

‘‘ਯੇਵ ਤੇ ਅਰਿਯਾ, ਤੇਵ ਤੇ ਸਪ੍ਪੁਰਿਸਾ. ਯੇਵ ਤੇ ਸਪ੍ਪੁਰਿਸਾ, ਤੇਵ ਤੇ ਅਰਿਯਾ. ਯੋ ਏਵ ਸੋ ਅਰਿਯਾਨਂ ਧਮ੍ਮੋ, ਸੋ ਏਵ ਸੋ ਸਪ੍ਪੁਰਿਸਾਨਂ ਧਮ੍ਮੋ. ਯੋ ਏਵ ਸੋ ਸਪ੍ਪੁਰਿਸਾਨਂ ਧਮ੍ਮੋ, ਸੋ ਏਵ ਸੋ ਅਰਿਯਾਨਂ ਧਮ੍ਮੋ. ਯੇਵ ਤੇ ਅਰਿਯਵਿਨਯਾ, ਤੇਵ ਤੇ ਸਪ੍ਪੁਰਿਸਵਿਨਯਾ. ਯੇਵ ਤੇ ਸਪ੍ਪੁਰਿਸਵਿਨਯਾ, ਤੇਵ ਤੇ ਅਰਿਯਵਿਨਯਾ. ਅਰਿਯੇਤਿ ਵਾ ਸਪ੍ਪੁਰਿਸੇਤਿ ਵਾ, ਅਰਿਯਧਮ੍ਮੇਤਿ ਵਾ ਸਪ੍ਪੁਰਿਸਧਮ੍ਮੇਤਿ ਵਾ, ਅਰਿਯਵਿਨਯੇਤਿ ਵਾ ਸਪ੍ਪੁਰਿਸਵਿਨਯੇਤਿ ਵਾ ਏਸੇਸੇ ਏਕੇ ਏਕਟ੍ਠੇ ਸਮੇ ਸਮਭਾਗੇ ਤਜ੍ਜਾਤੇ ਤਞ੍ਞੇਵਾ’’ਤਿ.

ਰੂਪਂ ਅਤ੍ਤਤੋ ਸਮਨੁਪਸ੍ਸਤੀਤਿ ਇਧੇਕਚ੍ਚੋ ਰੂਪਂ ਅਤ੍ਤਤੋ ਸਮਨੁਪਸ੍ਸਤਿ, ‘‘ਯਂ ਰੂਪਂ, ਸੋ ਅਹਂ, ਯੋ ਅਹਂ, ਤਂ ਰੂਪ’’ਨ੍ਤਿ ਰੂਪਞ੍ਚ ਅਤ੍ਤਞ੍ਚ ਅਦ੍ਵਯਂ ਸਮਨੁਪਸ੍ਸਤਿ. ਸੇਯ੍ਯਥਾਪਿ ਨਾਮ ਤੇਲਪ੍ਪਦੀਪਸ੍ਸ ਝਾਯਤੋ ਯਾ ਅਚ੍ਚਿ, ਸੋ ਵਣ੍ਣੋ. ਯੋ ਵਣ੍ਣੋ, ਸਾ ਅਚ੍ਚੀਤਿ ਅਚ੍ਚਿਞ੍ਚ ਵਣ੍ਣਞ੍ਚ ਅਦ੍ਵਯਂ ਸਮਨੁਪਸ੍ਸਤਿ, ਏਵਮੇਵ ਇਧੇਕਚ੍ਚੋ ਰੂਪਂ ਅਤ੍ਤਤੋ ਸਮਨੁਪਸ੍ਸਤਿ…ਪੇ… ਅਦ੍ਵਯਂ ਸਮਨੁਪਸ੍ਸਤੀਤਿ ਏਵਂ ਰੂਪਂ ‘‘ਅਤ੍ਤਾ’’ਤਿ ਦਿਟ੍ਠਿਪਸ੍ਸਨਾਯ ਪਸ੍ਸਤਿ. ਰੂਪਵਨ੍ਤਂ ਵਾ ਅਤ੍ਤਾਨਨ੍ਤਿ ਅਰੂਪਂ ‘‘ਅਤ੍ਤਾ’’ਤਿ ਗਹੇਤ੍ਵਾ ਛਾਯਾਵਨ੍ਤਂ ਰੁਕ੍ਖਂ ਵਿਯ ਤਂ ਰੂਪਵਨ੍ਤਂ ਸਮਨੁਪਸ੍ਸਤਿ. ਅਤ੍ਤਨਿ ਵਾ ਰੂਪਨ੍ਤਿ ਅਰੂਪਮੇਵ ‘‘ਅਤ੍ਤਾ’’ਤਿ ਗਹੇਤ੍ਵਾ ਪੁਪ੍ਫਸ੍ਮਿਂ ਗਨ੍ਧਂ ਵਿਯ ਅਤ੍ਤਨਿ ਰੂਪਂ ਸਮਨੁਪਸ੍ਸਤਿ. ਰੂਪਸ੍ਮਿਂ ਵਾ ਅਤ੍ਤਾਨਨ੍ਤਿ ਅਰੂਪਮੇਵ ‘‘ਅਤ੍ਤਾ’’ਤਿ ਗਹੇਤ੍ਵਾ ਕਰਣ੍ਡਕੇ ਮਣਿਂ ਵਿਯ ਤਂ ਅਤ੍ਤਾਨਂ ਰੂਪਸ੍ਮਿਂ ਸਮਨੁਪਸ੍ਸਤਿ. ਪਰਿਯੁਟ੍ਠਟ੍ਠਾਯੀਤਿ ਪਰਿਯੁਟ੍ਠਾਨਾਕਾਰੇਨ ਅਭਿਭਵਨਾਕਾਰੇਨ ਠਿਤੋ, ‘‘ਅਹਂ ਰੂਪਂ, ਮਮ ਰੂਪ’’ਨ੍ਤਿ ਏਵਂ ਤਣ੍ਹਾਦਿਟ੍ਠੀਹਿ ਗਿਲਿਤ੍ਵਾ ਪਰਿਨਿਟ੍ਠਪੇਤ੍ਵਾ ਗਣ੍ਹਨਕੋ ਨਾਮ ਹੋਤੀਤਿ ਅਤ੍ਥੋ. ਤਸ੍ਸ ਤਂ ਰੂਪਨ੍ਤਿ ਤਸ੍ਸ ਤਂ ਏਵਂ ਗਹਿਤਂ ਰੂਪਂ. ਵੇਦਨਾਦੀਸੁਪਿ ਏਸੇਵ ਨਯੋ.

ਤਤ੍ਥ ‘‘ਰੂਪਂ ਅਤ੍ਤਤੋ ਸਮਨੁਪਸ੍ਸਤੀ’’ਤਿ ਸੁਦ੍ਧਰੂਪਮੇਵ ਅਤ੍ਤਾਤਿ ਕਥਿਤਂ. ‘‘ਰੂਪਵਨ੍ਤਂ ਵਾ ਅਤ੍ਤਾਨਂ, ਅਤ੍ਤਨਿ ਵਾ ਰੂਪਂ, ਰੂਪਸ੍ਮਿਂ ਵਾ ਅਤ੍ਤਾਨਂ, ਵੇਦਨਂ ਅਤ੍ਤਤੋ…ਪੇ… ਸਞ੍ਞਂ… ਸਙ੍ਖਾਰੇ… ਵਿਞ੍ਞਾਣਂ ਅਤ੍ਤਤੋ ਸਮਨੁਪਸ੍ਸਤੀ’’ਤਿ ਇਮੇਸੁ ਸਤ੍ਤਸੁ ਠਾਨੇਸੁ ਅਰੂਪਂ ਅਤ੍ਤਾਤਿ ਕਥਿਤਂ. ‘‘ਵੇਦਨਾਵਨ੍ਤਂ ਵਾ ਅਤ੍ਤਾਨਂ, ਅਤ੍ਤਨਿ ਵਾ ਵੇਦਨਂ, ਵੇਦਨਾਯ ਵਾ ਅਤ੍ਤਾਨ’’ਨ੍ਤਿ ਏਵਂ ਚਤੂਸੁ ਖਨ੍ਧੇਸੁ ਤਿਣ੍ਣਂ ਤਿਣ੍ਣਂ ਵਸੇਨ ਦ੍ਵਾਦਸਸੁ ਠਾਨੇਸੁ ਰੂਪਾਰੂਪਮਿਸ੍ਸਕੋ ਅਤ੍ਤਾ ਕਥਿਤੋ. ਤਤ੍ਥ ‘‘ਰੂਪਂ ਅਤ੍ਤਤੋ ਸਮਨੁਪਸ੍ਸਤਿ, ਵੇਦਨਂ… ਸਞ੍ਞਂ… ਸਙ੍ਖਾਰੇ… ਵਿਞ੍ਞਾਣਂ ਅਤ੍ਤਤੋ ਸਮਨੁਪਸ੍ਸਤੀ’’ਤਿ ਇਮੇਸੁ ਪਞ੍ਚਸੁ ਠਾਨੇਸੁ ਉਚ੍ਛੇਦਦਿਟ੍ਠਿ ਕਥਿਤਾ, ਅਵਸੇਸੇਸੁ ਸਸ੍ਸਤਦਿਟ੍ਠੀਤਿ ਏਵਮੇਤ੍ਥ ਪਨ੍ਨਰਸ ਭਵਦਿਟ੍ਠਿਯੋ ਪਞ੍ਚ ਵਿਭਵਦਿਟ੍ਠਿਯੋ ਹੋਨ੍ਤਿ, ਤਾ ਸਬ੍ਬਾਪਿ ਮਗ੍ਗਾਵਰਣਾ, ਨ ਸਗ੍ਗਾਵਰਣਾ, ਪਠਮਮਗ੍ਗਵਜ੍ਝਾਤਿ ਵੇਦਿਤਬ੍ਬਾ.

ਏਵਂ ਖੋ, ਗਹਪਤਿ, ਆਤੁਰਕਾਯੋ ਚੇਵ ਹੋਤਿ ਆਤੁਰਚਿਤ੍ਤੋ ਚਾਤਿ ਕਾਯੋ ਨਾਮ ਬੁਦ੍ਧਾਨਮ੍ਪਿ ਆਤੁਰੋਯੇਵ. ਚਿਤ੍ਤਂ ਪਨ ਰਾਗਦੋਸਮੋਹਾਨੁਗਤਂ ਆਤੁਰਂ ਨਾਮ, ਤਂ ਇਧ ਦਸ੍ਸਿਤਂ. ਨੋ ਚ ਆਤੁਰਚਿਤ੍ਤੋਤਿ ਇਧ ਨਿਕ੍ਕਿਲੇਸਤਾਯ ਚਿਤ੍ਤਸ੍ਸ ਅਨਾਤੁਰਭਾਵੋ ਦਸ੍ਸਿਤੋ. ਇਤਿ ਇਮਸ੍ਮਿਂ ਸੁਤ੍ਤੇ ਲੋਕਿਯਮਹਾਜਨੋ ਆਤੁਰਕਾਯੋ ਚੇਵ ਆਤੁਰਚਿਤ੍ਤੋ ਚਾਤਿ ਦਸ੍ਸਿਤੋ, ਖੀਣਾਸਵਾ ਆਤੁਰਕਾਯਾ ਅਨਾਤੁਰਚਿਤ੍ਤਾ, ਸਤ੍ਤ ਸੇਖਾ ਨੇਵ ਆਤੁਰਚਿਤ੍ਤਾ, ਨ ਅਨਾਤੁਰਚਿਤ੍ਤਾਤਿ ਵੇਦਿਤਬ੍ਬਾ. ਭਜਮਾਨਾ ਪਨ ਅਨਾਤੁਰਚਿਤ੍ਤਤਂਯੇਵ ਭਜਨ੍ਤੀਤਿ. ਪਠਮਂ.