੯. ਓਪਮ੍ਮਸਂਯੁਤ੍ਤਂ

੧. ਕੂਟਸੁਤ੍ਤਵਣ੍ਣਨਾ

੨੨੩. ਓਪਮ੍ਮਸਂਯੁਤ੍ਤਸ੍ਸ ਪਠਮੇ ਕੂਟਂ ਗਚ੍ਛਨ੍ਤੀਤਿ ਕੂਟਙ੍ਗਮਾ. ਕੂਟਂ ਸਮੋਸਰਨ੍ਤੀਤਿ ਕੂਟਸਮੋਸਰਣਾ. ਕੂਟਸਮੁਗ੍ਘਾਤਾਤਿ ਕੂਟਸ੍ਸ ਸਮੁਗ੍ਘਾਤੇਨ. ਅਵਿਜ੍ਜਾਸਮੁਗ੍ਘਾਤਾਤਿ ਅਰਹਤ੍ਤਮਗ੍ਗੇਨ ਅਵਿਜ੍ਜਾਯ ਸਮੁਗ੍ਘਾਤੇਨ. ਅਪ੍ਪਮਤ੍ਤਾਤਿ ਸਤਿਯਾ ਅਵਿਪ੍ਪਵਾਸੇ ਠਿਤਾ ਹੁਤ੍ਵਾ. ਪਠਮਂ.

੨. ਨਖਸਿਖਸੁਤ੍ਤਵਣ੍ਣਨਾ

੨੨੪. ਦੁਤਿਯੇ ਮਨੁਸ੍ਸੇਸੁ ਪਚ੍ਚਾਜਾਯਨ੍ਤੀਤਿ ਯੇ ਮਨੁਸ੍ਸਲੋਕਤੋ ਚੁਤਾ ਮਨੁਸ੍ਸੇਸੁ ਜਾਯਨ੍ਤਿ, ਤੇ ਏਵਂ ਅਪ੍ਪਕਾਤਿ ਅਧਿਪ੍ਪਾਯੋ. ਅਞ੍ਞਤ੍ਰ ਮਨੁਸ੍ਸੇਹੀਤਿ ਯੇ ਪਨ ਮਨੁਸ੍ਸਲੋਕਤੋ ਚੁਤਾ ਠਪੇਤ੍ਵਾ ਮਨੁਸ੍ਸਲੋਕਂ ਚਤੂਸੁ ਅਪਾਯੇਸੁ ਪਚ੍ਚਾਜਾਯਨ੍ਤਿ, ਤੇ ਮਹਾਪਥਵਿਯਂ ਪਂਸੁ ਵਿਯ ਬਹੁਤਰਾ. ਇਮਸ੍ਮਿਞ੍ਚ ਸੁਤ੍ਤੇ ਦੇਵਾਪਿ ਮਨੁਸ੍ਸੇਹੇਵ ਸਙ੍ਗਹਿਤਾ. ਤਸ੍ਮਾ ਯਥਾ ਮਨੁਸ੍ਸੇਸੁ ਜਾਯਨ੍ਤਾ ਅਪ੍ਪਕਾ, ਏਵਂ ਦੇਵੇਸੁਪੀਤਿ ਵੇਦਿਤਬ੍ਬਾ. ਦੁਤਿਯਂ.

੩. ਕੁਲਸੁਤ੍ਤਵਣ੍ਣਨਾ

੨੨੫. ਤਤਿਯੇ ਸੁਪ੍ਪਧਂਸਿਯਾਨੀਤਿ ਸੁਵਿਹੇਠਿਯਾਨਿ. ਕੁਮ੍ਭਤ੍ਥੇਨਕੇਹੀਤਿ ਯੇ ਪਰਘਰਂ ਪਵਿਸਿਤ੍ਵਾ ਦੀਪਾਲੋਕੇਨ ਓਲੋਕੇਤ੍ਵਾ ਪਰਭਣ੍ਡਂ ਹਰਿਤੁਕਾਮਾ ਘਟੇ ਦੀਪਂ ਕਤ੍ਵਾ ਪਵਿਸਨ੍ਤਿ, ਤੇ ਕੁਮ੍ਭਤ੍ਥੇਨਕਾ ਨਾਮ, ਤੇਹਿ ਕੁਮ੍ਭਤ੍ਥੇਨਕੇਹਿ. ਸੁਪ੍ਪਧਂਸਿਯੋ ਹੋਤਿ ਅਮਨੁਸ੍ਸੇਹੀਤਿ ਮੇਤ੍ਤਾਭਾਵਨਾਰਹਿਤਂ ਪਂਸੁਪਿਸਾਚਕਾ ਵਿਧਂਸਯਨ੍ਤਿ, ਪਗੇਵ ਉਲ਼ਾਰਾ ਅਮਨੁਸ੍ਸਾ. ਭਾਵਿਤਾਤਿ ਵਡ੍ਢਿਤਾ. ਬਹੁਲੀਕਤਾਤਿ ਪੁਨਪ੍ਪੁਨਂ ਕਤਾ. ਯਾਨੀਕਤਾਤਿ ਯੁਤ੍ਤਯਾਨਂ ਵਿਯ ਕਤਾ. ਵਤ੍ਥੁਕਤਾਤਿ ਪਤਿਟ੍ਠਾਨਟ੍ਠੇਨ ਵਤ੍ਥੁ ਵਿਯ ਕਤਾ. ਅਨੁਟ੍ਠਿਤਾਤਿ ਅਧਿਟ੍ਠਿਤਾ. ਪਰਿਚਿਤਾਤਿ ਸਮਨ੍ਤਤੋ ਚਿਤਾ ਸੁਵਡ੍ਢਿਤਾ. ਸੁਸਮਾਰਦ੍ਧਾਤਿ ਚਿਤ੍ਤੇਨ ਸੁਟ੍ਠੁ ਸਮਾਰਦ੍ਧਾ. ਤਤਿਯਂ.

੪. ਓਕ੍ਖਾਸੁਤ੍ਤਵਣ੍ਣਨਾ

੨੨੬. ਚਤੁਤ੍ਥੇ ਓਕ੍ਖਾਸਤਨ੍ਤਿ ਮਹਾਮੁਖਉਕ੍ਖਲੀਨਂ ਸਤਂ. ਦਾਨਂ ਦਦੇਯ੍ਯਾਤਿ ਪਣੀਤਭੋਜਨਭਰਿਤਾਨਂ ਮਹਾਉਕ੍ਖਲੀਨਂ ਸਤਂ ਦਾਨਂ ਦਦੇਯ੍ਯ. ‘‘ਉਕ੍ਕਾਸਤ’’ਨ੍ਤਿਪਿ ਪਾਠੋ, ਤਸ੍ਸ ਦਣ੍ਡਦੀਪਿਕਾਸਤਨ੍ਤਿ ਅਤ੍ਥੋ. ਏਕਾਯ ਪਨ ਦੀਪਿਕਾਯ ਯਤ੍ਤਕੇ ਠਾਨੇ ਆਲੋਕੋ ਹੋਤਿ, ਤਤੋ ਸਤਗੁਣਂ ਠਾਨਂ ਸਤ੍ਤਹਿ ਰਤਨੇਹਿ ਪੂਰੇਤ੍ਵਾ ਦਾਨਂ ਦਦੇਯ੍ਯਾਤਿ ਅਤ੍ਥੋ. ਗਦ੍ਦੁਹਨਮਤ੍ਤਨ੍ਤਿ ਗੋਦੁਹਨਮਤ੍ਤਂ, ਗਾਵਿਯਾ ਏਕਵਾਰਂ ਅਗ੍ਗਥਨਾਕਡ੍ਢਨਮਤ੍ਤਨ੍ਤਿ ਅਤ੍ਥੋ. ਗਨ੍ਧਊਹਨਮਤ੍ਤਂ ਵਾ, ਦ੍ਵੀਹਿ ਅਙ੍ਗੁਲੀਹਿ ਗਨ੍ਧਪਿਣ੍ਡਂ ਗਹੇਤ੍ਵਾ ਏਕਵਾਰਂ ਘਾਯਨਮਤ੍ਤਨ੍ਤਿ ਅਤ੍ਥੋ. ਏਤ੍ਤਕਮ੍ਪਿ ਹਿ ਕਾਲਂ ਯੋ ਪਨ ਗਬ੍ਭਪਰਿਵੇਣਵਿਹਾਰੂਪਚਾਰ ਪਰਿਚ੍ਛੇਦੇਨ ਵਾ ਚਕ੍ਕਵਾਲ਼ਪਰਿਚ੍ਛੇਦੇਨ ਵਾ ਅਪਰਿਮਾਣਾਸੁ ਲੋਕਧਾਤੂਸੁ ਵਾ ਸਬ੍ਬਸਤ੍ਤੇਸੁ ਹਿਤਫਰਣਂ ਮੇਤ੍ਤਚਿਤ੍ਤਂ ਭਾਵੇਤੁਂ ਸਕ੍ਕੋਤਿ, ਇਦਂ ਤਤੋ ਏਕਦਿਵਸਂ ਤਿਕ੍ਖਤ੍ਤੁਂ ਦਿਨ੍ਨਦਾਨਤੋ ਮਹਪ੍ਫਲਤਰਂ. ਚਤੁਤ੍ਥਂ.

੫. ਸਤ੍ਤਿਸੁਤ੍ਤਵਣ੍ਣਨਾ

੨੨੭. ਪਞ੍ਚਮੇ ਪਟਿਲੇਣਿਸ੍ਸਾਮੀਤਿਆਦੀਸੁ ਅਗ੍ਗੇ ਪਹਰਿਤ੍ਵਾ ਕਪ੍ਪਾਸਵਟ੍ਟਿਂ ਵਿਯ ਨਾਮੇਨ੍ਤੋ ਨਿਯ੍ਯਾਸਵਟ੍ਟਿਂ ਵਿਯ ਚ ਏਕਤੋ ਕਤ੍ਵਾ ਅਲ੍ਲਿਯਾਪੇਨ੍ਤੋ ਪਟਿਲੇਣੇਤਿ ਨਾਮ. ਮਜ੍ਝੇ ਪਹਰਿਤ੍ਵਾ ਨਾਮੇਤ੍ਵਾ ਧਾਰਾਯ ਵਾ ਪਹਰਿਤ੍ਵਾ ਦ੍ਵੇਪਿ ਧਾਰਾ ਏਕਤੋ ਅਲ੍ਲਿਯਾਪੇਨ੍ਤੋ ਪਟਿਕੋਟ੍ਟੇਤਿ ਨਾਮ. ਕਪ੍ਪਾਸਵਟ੍ਟਨਕਰਣੀਯਂ ਵਿਯ ਪਵਤ੍ਤੇਨ੍ਤੋ ਚਿਰਕਾਲਂ ਸਂਵੇਲ੍ਲਿਤਕਿਲਞ੍ਜਂ ਪਸਾਰੇਤ੍ਵਾ ਪੁਨ ਸਂਵੇਲ੍ਲੇਨ੍ਤੋ ਵਿਯ ਚ ਪਟਿਵਟ੍ਟੇਤਿ ਨਾਮ. ਪਞ੍ਚਮਂ.

੬. ਧਨੁਗ੍ਗਹਸੁਤ੍ਤਵਣ੍ਣਨਾ

੨੨੮. ਛਟ੍ਠੇ ਦਲ਼੍ਹਧਮ੍ਮਾ ਧਨੁਗ੍ਗਹਾਤਿ ਦਲ਼੍ਹਧਨੁਨੋ ਇਸ੍ਸਾਸਾ. ਦਲ਼੍ਹਧਨੁ ਨਾਮ ਦ੍ਵਿਸਹਸ੍ਸਥਾਮਂ ਵੁਚ੍ਚਤਿ, ਦ੍ਵਿਸਹਸ੍ਸਥਾਮਂ ਨਾਮ ਯਸ੍ਸ ਆਰੋਪਿਤਸ੍ਸ ਜਿਯਾਬਦ੍ਧੋ ਲੋਹਸੀਸਾਦੀਨਂ ਭਾਰੋ ਦਣ੍ਡੇ ਗਹੇਤ੍ਵਾ ਯਾਵ ਕਣ੍ਡਪ੍ਪਮਾਣਾ ਉਕ੍ਖਿਤ੍ਤਸ੍ਸ ਪਥਵਿਤੋ ਮੁਚ੍ਚਤਿ. ਸੁਸਿਕ੍ਖਿਤਾਤਿ ਦਸਦ੍ਵਾਦਸਵਸ੍ਸਾਨਿ ਆਚਰਿਯਕੁਲੇ ਉਗ੍ਗਹਿਤਸਿਪ੍ਪਾ. ਕਤਹਤ੍ਥਾਤਿ ਯੋ ਸਿਪ੍ਪਮੇਵ ਉਗ੍ਗਣ੍ਹਾਤਿ, ਸੋ ਕਤਹਤ੍ਥੋ ਨ ਹੋਤਿ, ਇਮੇ ਪਨ ਕਤਹਤ੍ਥਾ ਚਿਣ੍ਣਵਸੀਭਾਵਾ. ਕਤੂਪਾਸਨਾਤਿ ਰਾਜਕੁਲਾਦੀਸੁ ਦਸ੍ਸਿਤਸਿਪ੍ਪਾ.

ਤਸ੍ਸ ਪੁਰਿਸਸ੍ਸ ਜਵੋਤਿ ਏਵਰੂਪੋ ਅਞ੍ਞੋ ਪੁਰਿਸੋ ਨਾਮ ਨ ਭੂਤਪੁਬ੍ਬੋ, ਬੋਧਿਸਤ੍ਤਸ੍ਸੇਵ ਪਨ ਜਵਨਹਂਸਕਾਲੋ ਨਾਮ ਆਸਿ. ਤਦਾ ਬੋਧਿਸਤ੍ਤੋ ਚਤ੍ਤਾਰਿ ਕਣ੍ਡਾਨਿ ਆਹਰਿ. ਤਦਾ ਕਿਰਸ੍ਸ ਕਨਿਟ੍ਠਭਾਤਰੋ ‘‘ਮਯਂ, ਭਾਤਿਕ, ਸੂਰਿਯੇਨ ਸਦ੍ਧਿਂ ਜਵਿਸ੍ਸਾਮਾ’’ਤਿ ਆਰੋਚੇਸੁਂ. ਬੋਧਿਸਤ੍ਤੋ ਆਹ – ‘‘ਸੂਰਿਯੋ ਸੀਘਜਵੋ, ਨ ਸਕ੍ਖਿਸ੍ਸਥ ਤੁਮ੍ਹੇ ਤੇਨ ਸਦ੍ਧਿਂ ਜਵਿਤੁ’’ਨ੍ਤਿ. ਤੇ ਦੁਤਿਯਂ ਤਤਿਯਮ੍ਪਿ ਤਥੇਵ ਵਤ੍ਵਾ ਏਕਦਿਵਸਂ ‘‘ਗਚ੍ਛਾਮਾ’’ਤਿ ਯੁਗਨ੍ਧਰਪਬ੍ਬਤਂ ਆਰੁਹਿਤ੍ਵਾ ਨਿਸੀਦਿਂਸੁ. ਬੋਧਿਸਤ੍ਤੋ ‘‘ਕਹਂ ਮੇ ਭਾਤਰੋ’’ਤਿ? ਪੁਚ੍ਛਿਤ੍ਵਾ, ‘‘ਸੂਰਿਯੇਨ ਸਦ੍ਧਿਂ ਜਵਿਤੁਂ ਗਤਾ’’ਤਿ ਵੁਤ੍ਤੇ, ‘‘ਵਿਨਸ੍ਸਿਸ੍ਸਨ੍ਤਿ ਤਪਸ੍ਸਿਨੋ’’ਤਿ ਤੇ ਅਨੁਕਮ੍ਪਮਾਨੋ ਸਯਮ੍ਪਿ ਗਨ੍ਤ੍ਵਾ ਤੇਸਂ ਸਨ੍ਤਿਕੇ ਨਿਸੀਦਿ. ਅਥ ਸੂਰਿਯੇ ਉਗ੍ਗਚ੍ਛਨ੍ਤੇ ਦ੍ਵੇਪਿ ਭਾਤਰੋ ਸੂਰਿਯੇਨ ਸਦ੍ਧਿਂਯੇਵ ਆਕਾਸਂ ਪਕ੍ਖਨ੍ਤਾ, ਬੋਧਿਸਤ੍ਤੋਪਿ ਤੇਹਿ ਸਦ੍ਧਿਂਯੇਵ ਪਕ੍ਖਨ੍ਤੋ. ਤੇਸੁ ਏਕਸ੍ਸ ਅਪਤ੍ਤੇਯੇਵ ਅਨ੍ਤਰਭਤ੍ਤਸਮਯੇ ਪਕ੍ਖਨ੍ਤਰੇਸੁ ਅਗ੍ਗਿ ਉਟ੍ਠਹਿ, ਸੋ ਭਾਤਰਂ ਪਕ੍ਕੋਸਿਤ੍ਵਾ ‘‘ਨ ਸਕ੍ਕੋਮੀ’’ਤਿ ਆਹ. ਤਮੇਨਂ ਬੋਧਿਸਤ੍ਤੋ ‘‘ਮਾ ਭਾਯੀ’’ਤਿ ਸਮਸ੍ਸਾਸੇਤ੍ਵਾ ਪਕ੍ਖਪਞ੍ਜਰੇਨ ਪਲਿਵੇਠੇਤ੍ਵਾ ਦਰਥਂ ਵਿਨੋਦੇਤ੍ਵਾ ‘‘ਗਚ੍ਛਾ’’ਤਿ ਪੇਸੇਸਿ.

ਦੁਤਿਯੋ ਯਾਵ ਅਨ੍ਤਰਭਤ੍ਤਾ ਜਵਿਤ੍ਵਾ ਪਕ੍ਖਨ੍ਤਰੇਸੁ ਅਗ੍ਗਿਮ੍ਹਿ ਉਟ੍ਠਹਿਤੇ ਤਥੇਵਾਹ. ਤਮ੍ਪਿ ਸੋ ਤਥੇਵ ਕਤ੍ਵਾ ‘‘ਗਚ੍ਛਾ’’ਤਿ ਪੇਸੇਸਿ. ਸਯਂ ਪਨ ਯਾਵ ਮਜ੍ਝਨ੍ਹਿਕਾ ਜਵਿਤ੍ਵਾ, ‘‘ਏਤੇ ਬਾਲਾਤਿ ਮਯਾਪਿ ਬਾਲੇਨ ਨ ਭਵਿਤਬ੍ਬ’’ਨ੍ਤਿ ਨਿਵਤ੍ਤਿਤ੍ਵਾ – ‘‘ਅਦਿਟ੍ਠਸਹਾਯਕਂ ਬਾਰਾਣਸਿਰਾਜਂ ਪਸ੍ਸਿਸ੍ਸਾਮੀ’’ਤਿ ਬਾਰਾਣਸਿਂ ਅਗਮਾਸਿ. ਤਸ੍ਮਿਂ ਨਗਰਮਤ੍ਥਕੇ ਪਰਿਬ੍ਭਮਨ੍ਤੇ ਦ੍ਵਾਦਸਯੋਜਨਂ ਨਗਰਂ ਪਤ੍ਤਕਟਾਹੇਨ ਓਤ੍ਥਟਪਤ੍ਤੋ ਵਿਯ ਅਹੋਸਿ. ਅਥ ਪਰਿਬ੍ਭਮਨ੍ਤਸ੍ਸ ਪਰਿਬ੍ਭਮਨ੍ਤਸ੍ਸ ਤਤ੍ਥ ਤਤ੍ਥ ਛਿਦ੍ਦਾਨਿ ਪਞ੍ਞਾਯਿਂਸੁ. ਸਯਮ੍ਪਿ ਅਨੇਕਹਂਸਸਹਸ੍ਸਸਦਿਸੋ ਪਞ੍ਞਾਯਿ. ਸੋ ਵੇਗਂ ਪਟਿਸਂਹਰਿਤ੍ਵਾ ਰਾਜਗੇਹਾਭਿਮੁਖੋ ਅਹੋਸਿ. ਰਾਜਾ ਓਲੋਕੇਤ੍ਵਾ – ‘‘ਆਗਤੋ ਕਿਰ ਮੇ ਪਿਯਸਹਾਯੋ ਜਵਨਹਂਸੋ’’ਤਿ ਵਾਤਪਾਨਂ ਵਿਵਰਿਤ੍ਵਾ ਰਤਨਪੀਠਂ ਪਞ੍ਞਾਪੇਤ੍ਵਾ ਓਲੋਕੇਨ੍ਤੋ ਅਟ੍ਠਾਸਿ. ਬੋਧਿਸਤ੍ਤੋ ਰਤਨਪੀਠੇ ਨਿਸੀਦਿ.

ਅਥਸ੍ਸ ਰਾਜਾ ਸਹਸ੍ਸਪਾਕੇਨ ਤੇਲੇਨ ਪਕ੍ਖਨ੍ਤਰਾਨਿ ਮਕ੍ਖੇਤ੍ਵਾ, ਮਧੁਲਾਜੇ ਚੇਵ ਮਧੁਰਪਾਨਕਞ੍ਚ ਅਦਾਸਿ. ਤਤੋ ਨਂ ਕਤਪਰਿਭੋਗਂ ‘‘ਸਮ੍ਮ, ਕਹਂ ਅਗਮਾਸੀ’’ਤਿ? ਪੁਚ੍ਛਿ. ਸੋ ਤਂ ਪਵਤ੍ਤਿਂ ਆਰੋਚੇਤ੍ਵਾ ‘‘ਅਥਾਹਂ, ਮਹਾਰਾਜ, ਯਾਵ ਮਜ੍ਝਨ੍ਹਿਕਾ ਜਵਿਤ੍ਵਾ – ‘ਨਤ੍ਥਿ ਜਵਿਤੇਨ ਅਤ੍ਥੋ’ਤਿ ਨਿਵਤ੍ਤੋ’’ਤਿ ਆਚਿਕ੍ਖਿ. ਅਥ ਰਾਜਾ ਆਹ – ‘‘ਅਹਂ, ਸਾਮਿ, ਤੁਮ੍ਹਾਕਂ ਸੂਰਿਯੇਨ ਸਦ੍ਧਿਂ ਜਵਨਵੇਗਂ ਪਸ੍ਸਿਤੁਕਾਮੋ’’ਤਿ. ਦੁਕ੍ਕਰਂ, ਮਹਾਰਾਜ, ਨ ਸਕ੍ਕਾ ਤਯਾ ਪਸ੍ਸਿਤੁਨ੍ਤਿ. ਤੇਨ ਹਿ, ਸਾਮਿ, ਸਰਿਕ੍ਖਕਮਤ੍ਤਮ੍ਪਿ ਦਸ੍ਸੇਹੀਤਿ. ਆਮ, ਮਹਾਰਾਜ, ਧਨੁਗ੍ਗਹੇ ਸਨ੍ਨਿਪਾਤੇਹੀਤਿ. ਰਾਜਾ ਸਨ੍ਨਿਪਾਤੇਸਿ. ਹਂਸੋ ਤਤੋ ਚਤ੍ਤਾਰੋ ਗਹੇਤ੍ਵਾ ਨਗਰਮਜ੍ਝੇ ਤੋਰਣਂ ਕਾਰੇਤ੍ਵਾ ਅਤ੍ਤਨੋ ਗੀਵਾਯ ਘਣ੍ਡਂ ਪਿਲ਼ਨ੍ਧਾਪੇਤ੍ਵਾ ਤੋਰਣਸ੍ਸ ਉਪਰਿ ਨਿਸੀਦਿਤ੍ਵਾ – ‘‘ਚਤ੍ਤਾਰੋ ਜਨਾ ਤੋਰਣਂ ਨਿਸ੍ਸਾਯ ਚਤੁਦਿਸਾਭਿਮੁਖਾ ਏਕੇਕਂ ਕਣ੍ਡਂ ਖਿਪਨ੍ਤੂ’’ਤਿ ਵਤ੍ਵਾ, ਸਯਂ ਪਠਮਕਣ੍ਡੇਨੇਵ ਸਦ੍ਧਿਂ ਉਪ੍ਪਤਿਤ੍ਵਾ, ਤਂ ਕਣ੍ਡਂ ਅਗ੍ਗਹੇਤ੍ਵਾਵ, ਦਕ੍ਖਿਣਾਭਿਮੁਖਂ ਗਤਕਣ੍ਡਂ ਧਨੁਤੋ ਰਤਨਮਤ੍ਤਾਪਗਤਂ ਗਣ੍ਹਿ. ਦੁਤਿਯਂ ਦ੍ਵਿਰਤਨਮਤ੍ਤਾਪਗਤਂ, ਤਤਿਯਂ ਤਿਰਤਨਮਤ੍ਤਾਪਗਤਂ, ਚਤੁਤ੍ਥਂ ਭੂਮਿਂ ਅਪ੍ਪਤ੍ਤਮੇਵ ਗਣ੍ਹਿ. ਅਥ ਨਂ ਚਤ੍ਤਾਰਿ ਕਣ੍ਡਾਨਿ ਗਹੇਤ੍ਵਾ ਤੋਰਣੇ ਨਿਸਿਨ੍ਨਕਾਲੇਯੇਵ ਅਦ੍ਦਸਂਸੁ. ਸੋ ਰਾਜਾਨਂ ਆਹ – ‘‘ਪਸ੍ਸ, ਮਹਾਰਾਜ, ਏਵਂਸੀਘੋ ਅਮ੍ਹਾਕਂ ਜਵੋ’’ਤਿ. ਏਵਂ ਬੋਧਿਸਤ੍ਤੇਨੇਵ ਜਵਨਹਂਸਕਾਲੇ ਤਾਨਿ ਕਣ੍ਡਾਨਿ ਆਹਰਿਤਾਨੀਤਿ ਵੇਦਿਤਬ੍ਬਾਨਿ.

ਪੁਰਤੋ ਧਾਵਨ੍ਤੀਤਿ ਅਗ੍ਗਤੋ ਜਵਨ੍ਤਿ. ਨ ਪਨੇਤਾ ਸਬ੍ਬਕਾਲਂ ਪੁਰਤੋਵ ਹੋਨ੍ਤਿ, ਕਦਾਚਿ ਪੁਰਤੋ, ਕਦਾਚਿ ਪਚ੍ਛਤੋ ਹੋਨ੍ਤਿ. ਆਕਾਸਟ੍ਠਕਵਿਮਾਨੇਸੁ ਹਿ ਉਯ੍ਯਾਨਾਨਿਪਿ ਹੋਨ੍ਤਿ ਪੋਕ੍ਖਰਣਿਯੋਪਿ, ਤਾ ਤਤ੍ਥ ਨਹਾਯਨ੍ਤਿ, ਉਦਕਕੀਲ਼ਂ ਕੀਲ਼ਮਾਨਾ ਪਚ੍ਛਤੋਪਿ ਹੋਨ੍ਤਿ, ਵੇਗੇਨ ਪਨ ਗਨ੍ਤ੍ਵਾ ਪੁਨ ਪੁਰਤੋਵ ਧਾਵਨ੍ਤਿ. ਆਯੁਸਙ੍ਖਾਰਾਤਿ ਰੂਪਜੀਵਿਤਿਨ੍ਦ੍ਰਿਯਂ ਸਨ੍ਧਾਯ ਵੁਤ੍ਤਂ. ਤਞ੍ਹਿ ਤਤੋ ਸੀਘਤਰਂ ਖੀਯਤਿ. ਅਰੂਪਧਮ੍ਮਾਨਂ ਪਨ ਭੇਦੋ ਨ ਸਕ੍ਕਾ ਪਞ੍ਞਾਪੇਤੁਂ. ਛਟ੍ਠਂ.

੭. ਆਣਿਸੁਤ੍ਤਵਣ੍ਣਨਾ

੨੨੯. ਸਤ੍ਤਮੇ ਦਸਾਰਹਾਨਨ੍ਤਿ ਏਵਂਨਾਮਕਾਨਂ ਖਤ੍ਤਿਯਾਨਂ. ਤੇ ਕਿਰ ਸਤਤੋ ਦਸਭਾਗਂ ਗਣ੍ਹਿਂਸੁ, ਤਸ੍ਮਾ ‘‘ਦਸਾਰਹਾ’’ਤਿ ਪਞ੍ਞਾਯਿਂਸੁ. ਆਨਕੋਤਿ ਏਵਂਲਦ੍ਧਨਾਮੋ ਮੁਦਿਙ੍ਗੋ. ਹਿਮਵਨ੍ਤੇ ਕਿਰ ਮਹਾਕੁਲ਼ੀਰਦਹੋ ਅਹੋਸਿ. ਤਤ੍ਥ ਮਹਨ੍ਤੋ ਕੁਲ਼ੀਰੋ ਓਤਿਣ੍ਣੋਤਿਣ੍ਣਂ ਹਤ੍ਥਿਂ ਖਾਦਤਿ. ਅਥ ਹਤ੍ਥੀ ਉਪਦ੍ਦੁਤਾ ਏਕਂ ਕਰੇਣੁਂ ਸਕ੍ਕਰਿਂਸੁ ‘‘ਇਮਿਸ੍ਸਾ ਪੁਤ੍ਤਂ ਨਿਸ੍ਸਾਯ ਅਮ੍ਹਾਕਂ ਸੋਤ੍ਥਿ ਭਵਿਸ੍ਸਤੀ’’ਤਿ. ਸਾਪਿ ਮਹੇਸਕ੍ਖਂ ਪੁਤ੍ਤਂ ਵਿਜਾਯਿ. ਤੇ ਤਮ੍ਪਿ ਸਕ੍ਕਰਿਂਸੁ. ਸੋ ਵੁਦ੍ਧਿਪ੍ਪਤ੍ਤੋ ਮਾਤਰਂ ਪੁਚ੍ਛਿ, ‘‘ਕਸ੍ਮਾ ਮਂ ਏਤੇ ਸਕ੍ਕਰੋਨ੍ਤੀ’’ਤਿ? ਸਾ ਤਂ ਪਵਤ੍ਤਿਮਾਚਿਕ੍ਖਿ. ਸੋ ‘‘ਕਿਂ ਮਯ੍ਹਂ ਕੁਲ਼ੀਰੋ ਪਹੋਤਿ? ਏਥ ਗਚ੍ਛਾਮਾ’’ਤਿ ਮਹਾਹਤ੍ਥਿਪਰਿਵਾਰੋ ਤਤ੍ਥ ਗਨ੍ਤ੍ਵਾ ਪਠਮਮੇਵ ਓਤਰਿ. ਕੁਲ਼ੀਰੋ ਉਦਕਸਦ੍ਦੇਨੇਵ ਆਗਨ੍ਤ੍ਵਾ ਤਂ ਅਗ੍ਗਹੇਸਿ. ਮਹਨ੍ਤੋ ਕੁਲ਼ੀਰਸ੍ਸ ਅਲ਼ੋ, ਸੋ ਤਂ ਇਤੋ ਵਾ ਏਤ੍ਤੋ ਵਾ ਚਾਲੇਤੁਂ ਅਸਕ੍ਕੋਨ੍ਤੋ ਮੁਖੇ ਸੋਣ੍ਡਂ ਪਕ੍ਖਿਪਿਤ੍ਵਾ ਵਿਰਵਿ. ਹਤ੍ਥਿਨੋ ‘‘ਯਂਨਿਸ੍ਸਾਯ ਮਯਂ ‘ਸੋਤ੍ਥਿ ਭਵਿਸ੍ਸਤੀ’ਤਿ ਅਮਞ੍ਞਿਮ੍ਹਾ, ਸੋ ਪਠਮਤਰਂ ਗਹਿਤੋ’’ਤਿ ਤਤੋ ਤਤੋ ਪਲਾਯਿਂਸੁ.

ਅਥਸ੍ਸ ਮਾਤਾ ਅਵਿਦੂਰੇ ਠਤ੍ਵਾ ‘‘ਮਯਂ ਥਲਨਾਗਾ, ਤੁਮ੍ਹੇ ਉਦਕਨਾਗਾ ਨਾਮ, ਨਾਗੇਹਿ ਨਾਗੋ ਨ ਵਿਹੇਠੇਤਬ੍ਬੋ’’ਤਿ ਕੁਲ਼ੀਰਂ ਪਿਯਵਚਨੇਨ ਵਤ੍ਵਾ ਇਮਂ ਗਾਥਮਾਹ –

‘‘ਯੇ ਕੁਲ਼ੀਰਾ ਸਮੁਦ੍ਦਸ੍ਮਿਂ, ਗਙ੍ਗਾਯ ਯਮੁਨਾਯ ਚ;

ਤੇਸਂ ਤ੍ਵਂ ਵਾਰਿਜੋ ਸੇਟ੍ਠੋ, ਮੁਞ੍ਚ ਰੋਦਨ੍ਤਿਯਾ ਪਜ’’ਨ੍ਤਿ.

ਮਾਤੁਗਾਮਸਦ੍ਦੋ ਨਾਮ ਪੁਰਿਸੇ ਖੋਭੇਤ੍ਵਾ ਤਿਟ੍ਠਤਿ, ਤਸ੍ਮਾ ਸੋ ਗਹਣਂ ਸਿਥਿਲਮਕਾਸਿ. ਹਤ੍ਥਿਪੋਤੋ ਵੇਗੇਨ ਉਭੋ ਪਾਦੇ ਉਕ੍ਖਿਪਿਤ੍ਵਾ ਤਂ ਪਿਟ੍ਠਿਯਂ ਅਕ੍ਕਮਿ. ਸਹ ਅਕ੍ਕਮਨਾ ਪਿਟ੍ਠਿ ਮਤ੍ਤਿਕਭਾਜਨਂ ਵਿਯ ਭਿਜ੍ਜਿ. ਅਥ ਨਂ ਦਨ੍ਤੇਹਿ ਵਿਜ੍ਝਿਤ੍ਵਾ ਉਕ੍ਖਿਪਿਤ੍ਵਾ ਥਲੇ ਛਡ੍ਡੇਤ੍ਵਾ ਤੁਟ੍ਠਰਵਂ ਰਵਿ. ਅਥ ਨਂ ਹਤ੍ਥੀ ਇਤੋ ਚਿਤੋ ਚ ਆਗਨ੍ਤ੍ਵਾ ਮਦ੍ਦਿਂਸੁ. ਤਸ੍ਸ ਏਕੋ ਅਲ਼ੋ ਪਟਿਕ੍ਕਮਿਤ੍ਵਾ ਪਤਿ, ਤਂ ਸਕ੍ਕੋ ਦੇਵਰਾਜਾ ਗਹੇਤ੍ਵਾ ਗਤੋ.

ਇਤਰੋ ਪਨ ਅਲ਼ੋ ਵਾਤਾਤਪੇਨ ਸੁਕ੍ਖਿਤ੍ਵਾ ਪਕ੍ਕਲਾਖਾਰਸਵਣ੍ਣੋ ਅਹੋਸਿ, ਸੋ ਦੇਵੇ ਵੁਟ੍ਠੇ ਉਦਕੋਘੇਨ ਵੁਯ੍ਹਨ੍ਤੋ ਦਸਭਾਤਿਕਾਨਂ ਰਾਜੂਨਂ ਉਪਰਿਸੋਤੇ ਜਾਲਂ ਪਸਾਰਾਪੇਤ੍ਵਾ ਗਙ੍ਗਾਯ ਕੀਲ਼ਨ੍ਤਾਨਂ ਆਗਨ੍ਤ੍ਵਾ ਜਾਲੇ ਲਗ੍ਗਿ. ਤੇ ਕੀਲ਼ਾਪਰਿਯੋਸਾਨੇ ਜਾਲਮ੍ਹਿ ਉਕ੍ਖਿਪਿਯਮਾਨੇ ਤਂ ਦਿਸ੍ਵਾ ਪੁਚ੍ਛਿਂਸੁ ‘‘ਕਿਂ ਏਤ’’ਨ੍ਤਿ? ‘‘ਕੁਲ਼ੀਰਅਲ਼ੋ ਸਾਮੀ’’ਤਿ. ‘‘ਨ ਸਕ੍ਕਾ ਏਸ ਆਭਰਣਤ੍ਥਾਯ ਉਪਨੇਤੁਂ, ਪਰਿਯੋਨਨ੍ਧਾਪੇਤ੍ਵਾ ਭੇਰਿਂ ਕਰਿਸ੍ਸਾਮਾ’’ਤਿ? ਪਰਿਯੋਨਨ੍ਧਾਪੇਤ੍ਵਾ ਪਹਰਿਂਸੁ. ਸਦ੍ਦੋ ਦ੍ਵਾਦਸਯੋਜਨਂ ਨਗਰਂ ਅਵਤ੍ਥਰਿ. ਤਤੋ ਆਹਂਸੁ – ‘‘ਨ ਸਕ੍ਕਾ ਇਦਂ ਦਿਵਸੇ ਦਿਵਸੇ ਵਾਦੇਤੁਂ, ਛਣਦਿਵਸਤ੍ਥਾਯ ਮਙ੍ਗਲਭੇਰੀ ਹੋਤੂ’’ਤਿ ਮਙ੍ਗਲਭੇਰਿਂ ਅਕਂਸੁ. ਤਸ੍ਮਿਂ ਵਾਦਿਤੇ ਮਹਾਜਨੋ ਅਨ੍ਹਾਯਿਤ੍ਵਾ ਅਪਿਲ਼ਨ੍ਧਿਤ੍ਵਾ ਹਤ੍ਥਿਯਾਨਾਦੀਨਿ ਆਰੁਯ੍ਹ ਸੀਘਂ ਸਨ੍ਨਿਪਤਨ੍ਤਿ. ਇਤਿ ਮਹਾਜਨਂ ਪਕ੍ਕੋਸਿਤ੍ਵਾ ਵਿਯ ਆਨੇਤੀਤਿ ਆਨਕੋ ਤ੍ਵੇਵਸ੍ਸ ਨਾਮਂ ਅਹੋਸਿ.

ਅਞ੍ਞਂ ਆਣਿਂ ਓਦਹਿਂਸੂਤਿ ਅਞ੍ਞਂ ਸੁਵਣ੍ਣਰਜਤਾਦਿਮਯਂ ਆਣਿਂ ਘਟਯਿਂਸੁ. ਆਣਿਸਙ੍ਘਾਟੋਵ ਅਵਸਿਸ੍ਸੀਤਿ ਸੁਵਣ੍ਣਾਦਿਮਯਾਨਂ ਆਣੀਨਂ ਸਙ੍ਘਾਟਮਤ੍ਤਮੇਵ ਅਵਸੇਸਂ ਅਹੋਸਿ. ਅਥਸ੍ਸ ਦ੍ਵਾਦਸਯੋਜਨਪ੍ਪਮਾਣੋ ਸਦ੍ਦੋ ਅਨ੍ਤੋਸਾਲਾਯਮ੍ਪਿ ਦੁਕ੍ਖੇਨ ਸੁਯ੍ਯਿਤ੍ਥ.

ਗਮ੍ਭੀਰਾਤਿ ਪਾਲ਼ਿਵਸੇਨ ਗਮ੍ਭੀਰਾ ਸਲ੍ਲਸੁਤ੍ਤਸਦਿਸਾ. ਗਮ੍ਭੀਰਤ੍ਥਾਤਿ ਅਤ੍ਥਵਸੇਨ ਗਮ੍ਭੀਰਾ ਮਹਾਵੇਦਲ੍ਲਸੁਤ੍ਤਸਦਿਸਾ (ਮ. ਨਿ. ੧.੪੪੯ ਆਦਯੋ). ਲੋਕੁਤ੍ਤਰਾਤਿ ਲੋਕੁਤ੍ਤਰਅਤ੍ਥਦੀਪਕਾ. ਸੁਞ੍ਞਤਪ੍ਪਟਿਸਂਯੁਤ੍ਤਾਤਿ ਸਤ੍ਤਸੁਞ੍ਞਤਧਮ੍ਮਮਤ੍ਤਮੇਵ ਪਕਾਸਕਾ ਸਂਖਿਤ੍ਤਸਂਯੁਤ੍ਤਸਦਿਸਾ. ਉਗ੍ਗਹੇਤਬ੍ਬਂ ਪਰਿਯਾਪੁਣਿਤਬ੍ਬਨ੍ਤਿ ਉਗ੍ਗਹੇਤਬ੍ਬੇ ਚ ਪਰਿਯਾਪੁਣਿਤਬ੍ਬੇ ਚ. ਕਵਿਕਤਾਤਿ ਕਵੀਹਿ ਕਤਾ. ਇਤਰਂ ਤਸ੍ਸੇਵ ਵੇਵਚਨਂ. ਚਿਤ੍ਤਕ੍ਖਰਾਤਿ ਵਿਚਿਤ੍ਰਅਕ੍ਖਰਾ. ਇਤਰਂ ਤਸ੍ਸੇਵ ਵੇਵਚਨਂ. ਬਾਹਿਰਕਾਤਿ ਸਾਸਨਤੋ ਬਹਿਭੂਤਾ. ਸਾਵਕਭਾਸਿਤਾਤਿ ਤੇਸਂ ਤੇਸਂ ਸਾਵਕੇਹਿ ਭਾਸਿਤਾ. ਸੁਸ੍ਸੂਸਿਸ੍ਸਨ੍ਤੀਤਿ ਅਕ੍ਖਰਚਿਤ੍ਤਤਾਯ ਚੇਵ ਸਵਨਸਮ੍ਪਤ੍ਤਿਯਾ ਚ ਅਤ੍ਤਮਨਾ ਹੁਤ੍ਵਾ ਸਾਮਣੇਰਦਹਰਭਿਕ੍ਖੁਮਾਤੁਗਾਮਮਹਾਗਹਪਤਿਕਾਦਯੋ ‘‘ਏਸ ਧਮ੍ਮਕਥਿਕੋ’’ਤਿ ਸਨ੍ਨਿਪਤਿਤ੍ਵਾ ਸੋਤੁਕਾਮਾ ਭਵਿਸ੍ਸਨ੍ਤਿ. ਤਸ੍ਮਾਤਿ ਯਸ੍ਮਾ ਤਥਾਗਤਭਾਸਿਤਾ ਸੁਤ੍ਤਨ੍ਤਾ ਅਨੁਗ੍ਗਯ੍ਹਮਾਨਾ ਅਨ੍ਤਰਧਾਯਨ੍ਤਿ, ਤਸ੍ਮਾ. ਸਤ੍ਤਮਂ.

੮. ਕਲਿਙ੍ਗਰਸੁਤ੍ਤਵਣ੍ਣਨਾ

੨੩੦. ਅਟ੍ਠਮੇ ਕਲਿਙ੍ਗਰੂਪਧਾਨਾਤਿ ਕਲਿਙ੍ਗਰਘਟਿਕਂ ਸੀਸੂਪਧਾਨਞ੍ਚੇਵ ਪਾਦੂਪਧਾਨਞ੍ਚ ਕਤ੍ਵਾ. ਅਪ੍ਪਮਤ੍ਤਾਤਿ ਸਿਪ੍ਪੁਗ੍ਗਹਣੇ ਅਪ੍ਪਮਤ੍ਤਾ. ਆਤਾਪਿਨੋਤਿ ਉਟ੍ਠਾਨਵੀਰਿਯਾਤਾਪੇਨ ਯੁਤ੍ਤਾ. ਉਪਾਸਨਸ੍ਮਿਨ੍ਤਿ ਸਿਪ੍ਪਾਨਂ ਅਭਿਯੋਗੇ ਆਚਰਿਯਾਨਞ੍ਚ ਪਯਿਰੁਪਾਸਨੇ. ਤੇ ਕਿਰ ਤਦਾ ਪਾਤੋਵ ਉਟ੍ਠਾਯ ਸਿਪ੍ਪਸਾਲਂ ਗਚ੍ਛਨ੍ਤਿ, ਤਤ੍ਥ ਸਿਪ੍ਪਂ ਉਗ੍ਗਹੇਤ੍ਵਾ ਸਜ੍ਝਾਯਾਦੀਹਿ ਅਭਿਯੋਗਂ ਕਤ੍ਵਾ ਮੁਖਂ ਧੋਵਿਤ੍ਵਾ ਯਾਗੁਪਾਨਾਯ ਗਚ੍ਛਨ੍ਤਿ. ਯਾਗੁਂ ਪਿਵਿਤ੍ਵਾ ਪੁਨ ਸਿਪ੍ਪਸਾਲਂ ਗਨ੍ਤ੍ਵਾ ਸਿਪ੍ਪਂ ਗਣ੍ਹਿਤ੍ਵਾ ਸਜ੍ਝਾਯਂ ਕਰੋਨ੍ਤਾ ਪਾਤਰਾਸਾਯ ਗਚ੍ਛਨ੍ਤਿ. ਕਤਪਾਤਰਾਸਾ ਸਮਾਨਾ ‘‘ਮਾ ਪਮਾਦੇਨ ਚਿਰਂ ਨਿਦ੍ਦੋਕ੍ਕਮਨਂ ਅਹੋਸੀ’’ਤਿ ਖਦਿਰਘਟਿਕਾਸੁ ਸੀਸੇ ਚ ਪਾਦੇ ਚ ਉਪਦਹਿਤ੍ਵਾ ਥੋਕਂ ਨਿਪਜ੍ਜਿਤ੍ਵਾ ਪੁਨ ਸਿਪ੍ਪਸਾਲਂ ਗਨ੍ਤ੍ਵਾ ਸਿਪ੍ਪਂ ਗਹੇਤ੍ਵਾ ਸਜ੍ਝਾਯਨ੍ਤਿ. ਸਾਯਂ ਸਜ੍ਝਾਯਂ ਕਰੋਨ੍ਤਾ ਚ ਗੇਹਂ ਗਨ੍ਤ੍ਵਾ ਭੁਤ੍ਤਸਾਯਮਾਸਾ ਪਠਮਯਾਮਂ ਸਜ੍ਝਾਯਂ ਕਤ੍ਵਾ ਸਯਨਕਾਲੇ ਤਥੇਵ ਕਲਿਙ੍ਗਰਂ ਉਪਧਾਨਂ ਕਤ੍ਵਾ ਸਯਨ੍ਤਿ. ਏਵਂ ਤੇ ਅਕ੍ਖਣਵੇਧਿਨੋ ਵਾਲਵੇਧਿਨੋ ਚ ਅਹੇਸੁਂ. ਇਦਂ ਸਨ੍ਧਾਯੇਤਂ ਵੁਤ੍ਤਂ.

ਓਤਾਰਨ੍ਤਿ ਵਿਵਰਂ. ਆਰਮ੍ਮਣਨ੍ਤਿ ਪਚ੍ਚਯਂ. ਪਧਾਨਸ੍ਮਿਨ੍ਤਿ ਪਧਾਨਭੂਮਿਯਂ ਵੀਰਿਯਂ ਕੁਰੁਮਾਨਾ. ਪਠਮਬੋਧਿਯਂ ਕਿਰ ਭਿਕ੍ਖੂ ਭਤ੍ਤਕਿਚ੍ਚਂ ਕਤ੍ਵਾਵ ਕਮ੍ਮਟ੍ਠਾਨਂ ਮਨਸਿ ਕਰੋਨ੍ਤਿ. ਤੇਸਂ ਮਨਸਿਕਰੋਨ੍ਤਾਨਂਯੇਵ ਸੂਰਿਯੋ ਅਤ੍ਥਂ ਗਚ੍ਛਤਿ. ਤੇ ਨ੍ਹਾਯਿਤ੍ਵਾ ਪੁਨ ਚਙ੍ਕਮਂ ਓਤਰਿਤ੍ਵਾ ਪਠਮਯਾਮਂ ਚਙ੍ਕਮਨ੍ਤਿ. ਤਤੋ ‘‘ਮਾ ਚਿਰਂ ਨਿਦ੍ਦਾਯਿਮ੍ਹਾ’’ਤਿ ਸਰੀਰਦਰਥਵਿਨੋਦਨਤ੍ਥਂ ਨਿਪਜ੍ਜਨ੍ਤਾ ਕਟ੍ਠਖਣ੍ਡਂ ਉਪਦਹਿਤ੍ਵਾ ਨਿਪਜ੍ਜਨ੍ਤਿ, ਤੇ ਪੁਨ ਪਚ੍ਛਿਮਯਾਮੇ ਵੁਟ੍ਠਾਯ ਚਙ੍ਕਮਂ ਓਤਰਨ੍ਤਿ. ਤੇ ਸਨ੍ਧਾਯ ਇਦਂ ਵੁਤ੍ਤਂ. ਅਯਮ੍ਪਿ ਦੀਪੋ ਤਿਣ੍ਣਂ ਰਾਜੂਨਂ ਕਾਲੇ ਏਕਘਣ੍ਡਿਨਿਗ੍ਘੋਸੋ ਏਕਪਧਾਨਭੂਮਿ ਅਹੋਸਿ. ਨਾਨਾਮੁਖੇ ਪਹਟਘਣ੍ਡਿ ਪਿਲਿਚ੍ਛਿਕੋਲ਼ਿਯਂ ਓਸਰਤਿ, ਕਲ੍ਯਾਣਿਯਂ ਪਹਟਘਣ੍ਡਿ ਨਾਗਦੀਪੇ ਓਸਰਤਿ. ‘‘ਅਯਂ ਭਿਕ੍ਖੁ ਪੁਥੁਜ੍ਜਨੋ, ਅਯਂ ਪੁਥੁਜ੍ਜਨੋ’’ਤਿ ਅਙ੍ਗੁਲਿਂ ਪਸਾਰੇਤ੍ਵਾ ਦਸ੍ਸੇਤਬ੍ਬੋ ਅਹੋਸਿ. ਏਕਦਿਵਸਂ ਸਬ੍ਬੇ ਅਰਹਨ੍ਤੋਵ ਅਹੇਸੁਂ. ਤਸ੍ਮਾਤਿ ਯਸ੍ਮਾ ਕਲਿਙ੍ਗਰੂਪਧਾਨਾਨਂ ਮਾਰੋ ਆਰਮ੍ਮਣਂ ਨ ਲਭਤਿ, ਤਸ੍ਮਾ. ਅਟ੍ਠਮਂ.

੯. ਨਾਗਸੁਤ੍ਤਵਣ੍ਣਨਾ

੨੩੧. ਨਵਮੇ ਅਤਿਵੇਲਨ੍ਤਿ ਅਤਿਕ੍ਕਨ੍ਤਵੇਲਂ ਕਾਲਂ ਅਤਿਕ੍ਕਨ੍ਤਪ੍ਪਮਾਣਂ ਕਾਲਂ. ਕਿਮਙ੍ਗਂ ਪਨਾਹਨ੍ਤਿ ਅਹਂ ਪਨ ਕਿਂਕਾਰਣਾ ਨ ਉਪਸਙ੍ਕਮਿਸ੍ਸਾਮਿ? ਭਿਸਮੁਲ਼ਾਲਨ੍ਤਿ ਭਿਸਞ੍ਚੇਵ ਮੁਲ਼ਾਲਞ੍ਚ. ਅਬ੍ਬੁਹੇਤ੍ਵਾਤਿ ਉਦ੍ਧਰਿਤ੍ਵਾ. ਭਿਙ੍ਕਚ੍ਛਾਪਾਤਿ ਹਤ੍ਥਿਪੋਤਕਾ. ਤੇ ਕਿਰ ਅਭਿਣ੍ਹਂ ਭਿਙ੍ਕਾਰਸਦ੍ਦਂ ਕਰੋਨ੍ਤਿ, ਤਸ੍ਮਾ ਭਿਙ੍ਕਚ੍ਛਾਪਾਤਿ ਵੁਚ੍ਚਨ੍ਤਿ. ਪਸਨ੍ਨਾਕਾਰਂ ਕਰੋਨ੍ਤੀਤਿ ਪਸਨ੍ਨੇਹਿ ਕਤ੍ਤਬ੍ਬਾਕਾਰਂ ਕਰੋਨ੍ਤਿ, ਚਤ੍ਤਾਰੋ ਪਚ੍ਚਯੇ ਦੇਨ੍ਤਿ. ਧਮ੍ਮਂ ਭਾਸਨ੍ਤੀਤਿ ਏਕਂ ਦ੍ਵੇ ਜਾਤਕਾਨਿ ਵਾ ਸੁਤ੍ਤਨ੍ਤੇ ਵਾ ਉਗ੍ਗਣ੍ਹਿਤ੍ਵਾ ਅਸਮ੍ਭਿਨ੍ਨੇਨ ਸਰੇਨ ਧਮ੍ਮਂ ਦੇਸੇਨ੍ਤਿ. ਪਸਨ੍ਨਾਕਾਰਂ ਕਰੋਨ੍ਤੀਤਿ ਤੇਸਂ ਤਾਯ ਦੇਸਨਾਯ ਪਸਨ੍ਨਾ ਗਿਹੀ ਪਚ੍ਚਯੇ ਦੇਨ੍ਤਿ. ਨੇਵ ਵਣ੍ਣਾਯ ਹੋਤਿ ਨ ਬਲਾਯਾਤਿ ਨੇਵ ਗੁਣਵਣ੍ਣਾਯ, ਨ ਞਾਣਬਲਾਯ ਹੋਤਿ, ਗੁਣਵਣ੍ਣੇ ਪਨ ਪਰਿਹਾਯਨ੍ਤੇ ਸਰੀਰਵਣ੍ਣੋਪਿ ਸਰੀਰਬਲਮ੍ਪਿ ਪਰਿਹਾਯਤਿ, ਤਸ੍ਮਾ ਸਰੀਰਸ੍ਸ ਨੇਵ ਵਣ੍ਣਾਯ ਨ ਬਲਾਯ ਹੋਤਿ. ਨਵਮਂ.

੧੦. ਬਿਲ਼ਾਰਸੁਤ੍ਤਵਣ੍ਣਨਾ

੨੩੨. ਦਸਮੇ ਸਨ੍ਧਿਸਮਲਸਂਕਟੀਰੇਤਿ ਏਤ੍ਥ ਸਨ੍ਧੀਤਿ ਭਿਨ੍ਨਘਰਾਨਂ ਸਨ੍ਧਿ, ਸਮਲੋਤਿ ਗਾਮਤੋ ਗੂਥਨਿਕ੍ਖਮਨਮਗ੍ਗੋ, ਸਂਕਟੀਰਨ੍ਤਿ ਸਙ੍ਕਾਰਟ੍ਠਾਨਂ. ਮੁਦੁਮੂਸਿਨ੍ਤਿ ਮੁਦੁਕਂ ਮੂਸਿਕਂ. ਵੁਟ੍ਠਾਨਂ ਪਞ੍ਞਾਯਤੀਤਿ ਦੇਸਨਾ ਪਞ੍ਞਾਯਤਿ. ਦਸਮਂ.

੧੧. ਸਿਙ੍ਗਾਲਸੁਤ੍ਤਵਣ੍ਣਨਾ

੨੩੩. ਏਕਾਦਸਮੇ ਯੇਨ ਯੇਨ ਇਚ੍ਛਤੀਤਿ ਸੋ ਜਰਸਿਙ੍ਗਾਲੋ ਇਚ੍ਛਿਤਿਚ੍ਛਿਤਟ੍ਠਾਨੇ ਇਰਿਯਾਪਥਕਪ੍ਪਨੇਨ ਸੀਤਵਾਤੂਪਵਾਯਨੇਨ ਚ ਅਨ੍ਤਰਨ੍ਤਰਾ ਚਿਤ੍ਤਸ੍ਸਾਦਮ੍ਪਿ ਲਭਤੀਤਿ ਦਸ੍ਸੇਤਿ. ਸਕ੍ਯਪੁਤ੍ਤਿਯਪਟਿਞ੍ਞੋਤਿ ਇਦਂ ਦੇਵਦਤ੍ਤਂ ਸਨ੍ਧਾਯ ਵੁਤ੍ਤਂ. ਸੋ ਹਿ ਏਤ੍ਤਕਮ੍ਪਿ ਚਿਤ੍ਤਸ੍ਸਾਦਂ ਅਨਾਗਤੇ ਅਤ੍ਤਭਾਵੇ ਨ ਲਭਿਸ੍ਸਤੀਤਿ. ਏਕਾਦਸਮਂ.

੧੨. ਦੁਤਿਯਸਿਙ੍ਗਾਲਸੁਤ੍ਤਵਣ੍ਣਨਾ

੨੩੪. ਦ੍ਵਾਦਸਮੇ ਕਤਞ੍ਞੁਤਾਤਿ ਕਤਜਾਨਨਂ. ਕਤਵੇਦਿਤਾਤਿ ਕਤਵਿਸੇਸਜਾਨਨਂ. ਤਤ੍ਰਿਦਂ ਜਰਸਿਙ੍ਗਾਲਸ੍ਸ ਕਤਞ੍ਞੁਤਾਯ ਵਤ੍ਥੁ – ਸਤ੍ਤ ਕਿਰ ਭਾਤਰੋ ਖੇਤ੍ਤਂ ਕਸਨ੍ਤਿ. ਤੇਸਂ ਸਬ੍ਬਕਨਿਟ੍ਠੋ ਖੇਤ੍ਤਪਰਿਯਨ੍ਤੇ ਠਤ੍ਵਾ ਗਾਵੋ ਰਕ੍ਖਤਿ. ਅਥੇਕਂ ਜਰਸਿਙ੍ਗਾਲਂ ਅਜਗਰੋ ਗਣ੍ਹਿ, ਸੋ ਤਂ ਦਿਸ੍ਵਾ ਯਟ੍ਠਿਯਾ ਪੋਥੇਤ੍ਵਾ ਵਿਸ੍ਸਜ੍ਜਾਪੇਸਿ. ਅਜਗਰੋ ਸਿਙ੍ਗਾਲਂ ਵਿਸ੍ਸਜ੍ਜੇਤ੍ਵਾ ਤਮੇਵ ਗਣ੍ਹਿ. ਸਿਙ੍ਗਾਲੋ ਚਿਨ੍ਤੇਸਿ – ‘‘ਮਯ੍ਹਂ ਇਮਿਨਾ ਜੀਵਿਤਂ ਦਿਨ੍ਨਂ, ਅਹਮ੍ਪਿ ਇਮਸ੍ਸ ਦਸ੍ਸਾਮੀ’’ਤਿ ਯਾਗੁਘਟਸ੍ਸ ਉਪਰਿ ਠਪਿਤਂ ਵਾਸਿਂ ਮੁਖੇਨ ਡਂਸਿਤ੍ਵਾ ਤਸ੍ਸ ਸਨ੍ਤਿਕਂ ਅਗਮਾਸਿ. ਇਤਰੇ ਭਾਤਰੋ ਦਿਸ੍ਵਾ, ‘‘ਸਿਙ੍ਗਾਲੋ ਵਾਸਿਂ ਹਰਤੀ’’ਤਿ ਅਨੁਬਨ੍ਧਿਂਸੁ. ਸੋ ਤੇਹਿ ਦਿਟ੍ਠਭਾਵਂ ਞਤ੍ਵਾ ਵਾਸਿਂ ਤਸ੍ਸ ਸਨ੍ਤਿਕੇ ਛਡ੍ਡੇਤ੍ਵਾ ਪਲਾਯਿ. ਇਤਰੇ ਆਗਨ੍ਤ੍ਵਾ ਕਨਿਟ੍ਠਂ ਅਜਗਰੇਨ ਗਹਿਤਂ ਦਿਸ੍ਵਾ ਵਾਸਿਯਾ ਅਜਗਰਂ ਛਿਨ੍ਦਿਤ੍ਵਾ ਤਂ ਗਹੇਤ੍ਵਾ ਅਗਮਂਸੁ. ਏਵਂ ਜਰਸਿਙ੍ਗਾਲੇ ਸਿਯਾ ਯਾ ਕਾਚਿ ਕਤਞ੍ਞੁਤਾ ਕਤਵੇਦਿਤਾ. ਸਕ੍ਯਪੁਤ੍ਤਿਯਪਟਿਞ੍ਞੇਤਿ ਇਦਮ੍ਪਿ ਦੇਵਦਤ੍ਤਸ੍ਸ ਆਚਾਰਮੇਵ ਸਨ੍ਧਾਯ ਵੁਤ੍ਤਨ੍ਤਿ. ਦ੍ਵਾਦਸਮਂ.

ਓਪਮ੍ਮਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.