੧੦. ਭਿਕ੍ਖੁਸਂਯੁਤ੍ਤਂ
੧. ਕੋਲਿਤਸੁਤ੍ਤਵਣ੍ਣਨਾ
੨੩੫. ਭਿਕ੍ਖੁਸਂਯੁਤ੍ਤਸ੍ਸ ਪਠਮੇ, ਆਵੁਸੋਤਿ ਸਾਵਕਾਨਂ ਆਲਾਪੋ. ਬੁਦ੍ਧਾ ਹਿ ਭਗਵਨ੍ਤੋ ਸਾਵਕੇ ਆਲਪਨ੍ਤਾ, ‘‘ਭਿਕ੍ਖਵੇ’’ਤਿ ਆਲਪਨ੍ਤਿ, ਸਾਵਕਾ ਪਨ ‘‘ਬੁਦ੍ਧੇਹਿ ਸਦਿਸਾ ਮਾ ਹੋਮਾ’’ਤਿ, ‘‘ਆਵੁਸੋ’’ਤਿ ਪਠਮਂ ਵਤ੍ਵਾ ਪਚ੍ਛਾ, ‘‘ਭਿਕ੍ਖਵੇ’’ਤਿ ਭਣਨ੍ਤਿ. ਬੁਦ੍ਧੇਹਿ ਚ ਆਲਪਿਤੇ ਭਿਕ੍ਖੁਸਙ੍ਘੋ, ‘‘ਭਨ੍ਤੇ’’ਤਿ ਪਟਿਵਚਨਂ ਦੇਤਿ ਸਾਵਕੇਹਿ, ‘‘ਆਵੁਸੋ’’ਤਿ. ਅਯਂ ਵੁਚ੍ਚਤੀਤਿ ਯਸ੍ਮਾ ਦੁਤਿਯਜ੍ਝਾਨੇ ਵਿਤਕ੍ਕਵਿਚਾਰਾ ਨਿਰੁਜ੍ਝਨ੍ਤਿ, ਯੇਸਂ ਨਿਰੋਧਾ ਸਦ੍ਦਾਯਤਨਂ ਅਪ੍ਪਵਤ੍ਤਿਂ ਗਚ੍ਛਤਿ, ਤਸ੍ਮਾ ਯਦੇਤਂ ਦੁਤਿਯਂ ਝਾਨਂ ਨਾਮ, ਅਯਂ ਵੁਚ੍ਚਤਿ ‘‘ਅਰਿਯਾਨਂ ਤੁਣ੍ਹੀਭਾਵੋ’’ਤਿ. ਅਯਮੇਤ੍ਥ ਯੋਜਨਾ. ‘‘ਧਮ੍ਮੀ ਵਾ ਕਥਾ ਅਰਿਯੋ ਵਾ ਤੁਣ੍ਹੀਭਾਵੋ’’ਤਿ ਏਤ੍ਥ ਪਨ ਕਮ੍ਮਟ੍ਠਾਨਮਨਸਿਕਾਰੋਪਿ ਪਠਮਜ੍ਝਾਨਾਦੀਨਿਪਿ ਅਰਿਯੋ ਤੁਣ੍ਹੀਭਾਵੋਤ੍ਵੇਵ ਸਙ੍ਖਂ ਗਤਾਨਿ.
ਵਿਤਕ੍ਕਸਹਗਤਾਤਿ ਵਿਤਕ੍ਕਾਰਮ੍ਮਣਾ. ਸਞ੍ਞਾਮਨਸਿਕਾਰਾਤਿ ਸਞ੍ਞਾ ਚ ਮਨਸਿਕਾਰੋ ਚ. ਸਮੁਦਾਚਰਨ੍ਤੀਤਿ ਪਵਤ੍ਤਨ੍ਤਿ. ਥੇਰਸ੍ਸ ਕਿਰ ਦੁਤਿਯਜ੍ਝਾਨਂ ਨ ਪਗੁਣਂ. ਅਥਸ੍ਸ ਤਤੋ ਵੁਟ੍ਠਿਤਸ੍ਸ ਵਿਤਕ੍ਕਵਿਚਾਰਾ ਨ ਸਨ੍ਤਤੋ ਉਪਟ੍ਠਹਿਂਸੁ. ਇਚ੍ਚਸ੍ਸ ਦੁਤਿਯਜ੍ਝਾਨਮ੍ਪਿ ਸਞ੍ਞਾਮਨਸਿਕਾਰਾਪਿ ਹਾਨਭਾਗਿਯਾਵ ਅਹੇਸੁਂ, ਤਂ ਦਸ੍ਸੇਨ੍ਤੋ ਏਵਮਾਹ. ਸਣ੍ਠਪੇਹੀਤਿ ਸਮ੍ਮਾ ਠਪੇਹਿ. ਏਕੋਦਿਭਾਵਂ ਕਰੋਹੀਤਿ ਏਕਗ੍ਗਂ ਕਰੋਹਿ. ਸਮਾਦਹਾਤਿ ਸਮ੍ਮਾ ਆਦਹ ਆਰੋਪੇਹਿ. ਮਹਾਭਿਞ੍ਞਤਨ੍ਤਿ ਛਲ਼ਭਿਞ੍ਞਤਂ. ਸਤ੍ਥਾ ਕਿਰ ਇਮਿਨਾ ਉਪਾਯੇਨ ਸਤ੍ਤ ਦਿਵਸੇ ਥੇਰਸ੍ਸ ਹਾਨਭਾਗਿਯਂ ਸਮਾਧਿਂ ਵਡ੍ਢੇਤ੍ਵਾ ਥੇਰਂ ਛਲ਼ਭਿਞ੍ਞਤਂ ਪਾਪੇਸਿ. ਪਠਮਂ.
੨. ਉਪਤਿਸ੍ਸਸੁਤ੍ਤਵਣ੍ਣਨਾ
੨੩੬. ਦੁਤਿਯੇ ਅਤ੍ਥਿ ਨੁ ਖੋ ਤਂ ਕਿਞ੍ਚਿ ਲੋਕਸ੍ਮਿਨ੍ਤਿ ਇਦਂ ਅਤਿਉਲ਼ਾਰਮ੍ਪਿ ਸਤ੍ਤਂ ਵਾ ਸਙ੍ਖਾਰਂ ਵਾ ਸਨ੍ਧਾਯ ਵੁਤ੍ਤਂ. ਸਤ੍ਥੁਪਿ ਖੋਤਿ ਇਦਂ ਯਸ੍ਮਾ ਆਨਨ੍ਦਤ੍ਥੇਰਸ੍ਸ ਸਤ੍ਥਰਿ ਅਧਿਮਤ੍ਤੋ ਛਨ੍ਦੋ ਚ ਪੇਮਞ੍ਚ, ਤਸ੍ਮਾ ‘‘ਕਿਂ ਨੁ ਖੋ ਇਮਸ੍ਸ ਥੇਰਸ੍ਸ ਸਤ੍ਥੁ ਵਿਪਰਿਣਾਮੇਨਪਿ ਸੋਕਾਦਯੋ ਨੁਪ੍ਪਜ੍ਜੇਯ੍ਯੁ’’ਨ੍ਤਿ ਜਾਨਨਤ੍ਥਂ ਪੁਚ੍ਛਤਿ? ਦੀਘਰਤ੍ਤਨ੍ਤਿ ਸੂਕਰਖਤਲੇਣਦ੍ਵਾਰੇ ਦੀਘਨਖਪਰਿਬ੍ਬਾਜਕਸ੍ਸ ਵੇਦਨਾਪਰਿਗ੍ਗਹਸੁਤ੍ਤਨ੍ਤਂ ਦੇਸਿਤਦਿਵਸਤੋ ਪਟ੍ਠਾਯ ਅਤਿਕ੍ਕਨ੍ਤਕਾਲਂ ਸਨ੍ਧਾਯਾਹ. ਤਸ੍ਮਿਞ੍ਹਿ ਦਿਵਸੇ ਥੇਰਸ੍ਸ ਇਮੇ ਵਟ੍ਟਾਨੁਗਤਕਿਲੇਸਾ ਸਮੂਹਤਾਤਿ. ਦੁਤਿਯਂ.
੩. ਘਟਸੁਤ੍ਤਵਣ੍ਣਨਾ
੨੩੭. ਤਤਿਯੇ ਏਕਵਿਹਾਰੇਤਿ ਏਕਸ੍ਮਿਂ ਗਬ੍ਭੇ. ਤਦਾ ਕਿਰ ਬਹੂ ਆਗਨ੍ਤੁਕਾ ਭਿਕ੍ਖੂ ਸਨ੍ਨਿਪਤਿਂਸੁ. ਤਸ੍ਮਿਂ ਪਰਿਵੇਣਗ੍ਗੇਨ ਵਾ ਵਿਹਾਰਗ੍ਗੇਨ ਵਾ ਸੇਨਾਸਨੇਸੁ ਅਪਾਪੁਣਨ੍ਤੇਸੁ ਦ੍ਵਿਨ੍ਨਂ ਥੇਰਾਨਂ ਏਕੋ ਗਬ੍ਭੋ ਸਮ੍ਪਤ੍ਤੋ. ਤੇ ਦਿਵਾ ਪਾਟਿਯੇਕ੍ਕੇਸੁ ਠਾਨੇਸੁ ਨਿਸੀਦਨ੍ਤਿ, ਰਤ੍ਤਿਂ ਪਨ ਨੇਸਂ ਅਨ੍ਤਰੇ ਚੀਵਰਸਾਣਿਂ ਪਸਾਰੇਨ੍ਤਿ. ਤੇ ਅਤ੍ਤਨੋ ਅਤ੍ਤਨੋ ਪਤ੍ਤਪਤ੍ਤਟ੍ਠਾਨੇਯੇਵ ਨਿਸੀਦਨ੍ਤਿ. ਤੇਨ ਵੁਤ੍ਤਂ ‘‘ਏਕਵਿਹਾਰੇ’’ਤਿ. ਓਲ਼ਾਰਿਕੇਨਾਤਿ ਇਦਂ ਓਲ਼ਾਰਿਕਾਰਮ੍ਮਣਤਂ ਸਨ੍ਧਾਯ ਵੁਤ੍ਤਂ. ਦਿਬ੍ਬਚਕ੍ਖੁਦਿਬ੍ਬਸੋਤਧਾਤੁਵਿਹਾਰੇਨ ਹਿ ਸੋ ਵਿਹਾਸਿ, ਤੇਸਞ੍ਚ ਰੂਪਾਯਤਨਸਦ੍ਦਾਯਤਨਸਙ੍ਖਾਤਂ ਓਲ਼ਾਰਿਕਂ ਆਰਮ੍ਮਣਂ. ਇਤਿ ਦਿਬ੍ਬਚਕ੍ਖੁਨਾ ਰੂਪਸ੍ਸ ਦਿਟ੍ਠਤ੍ਤਾ ਦਿਬ੍ਬਾਯ ਚ ਸੋਤਧਾਤੁਯਾ ਸਦ੍ਦਸ੍ਸ ਸੁਤਤ੍ਤਾ ਸੋ ਵਿਹਾਰੋ ਓਲ਼ਾਰਿਕੋ ਨਾਮ ਜਾਤੋ. ਦਿਬ੍ਬਚਕ੍ਖੁ ਵਿਸੁਜ੍ਝੀਤਿ ਭਗਵਤੋ ਰੂਪਦਸ੍ਸਨਤ੍ਥਾਯ ਵਿਸੁਦ੍ਧਂ ਅਹੋਸਿ. ਦਿਬ੍ਬਾ ਚ ਸੋਤਧਾਤੂਤਿ ਸਾਪਿ ਭਗਵਤੋ ਸਦ੍ਦਸੁਣਨਤ੍ਥਂ ਵਿਸੁਜ੍ਝਿ. ਭਗਵਤੋਪਿ ਥੇਰਸ੍ਸ ਰੂਪਦਸ੍ਸਨਤ੍ਥਞ੍ਚੇਵ ਸਦ੍ਦਸੁਣਨਤ੍ਥਞ੍ਚ ਤਦੁਭਯਂ ਵਿਸੁਜ੍ਝਿ. ਤਦਾ ਕਿਰ ਥੇਰੋ ‘‘ਕਥਂ ਨੁ ਖੋ ਏਤਰਹਿ ਸਤ੍ਥਾ ਵਿਹਰਤੀ’’ਤਿ ਆਲੋਕਂ ਵਡ੍ਢੇਤ੍ਵਾ ਦਿਬ੍ਬੇਨ ਚਕ੍ਖੁਨਾ ਸਤ੍ਥਾਰਂ ਜੇਤਵਨੇ ਵਿਹਾਰੇ ਗਨ੍ਧਕੁਟਿਯਂ ਨਿਸਿਨ੍ਨਂ ਦਿਸ੍ਵਾ ਤਸ੍ਸ ਦਿਬ੍ਬਾਯ ਸੋਤਧਾਤੁਯਾ ਸਦ੍ਦਂ ਸੁਣਿ. ਸਤ੍ਥਾਪਿ ਤਥੇਵ ਅਕਾਸਿ. ਏਵਂ ਤੇ ਅਞ੍ਞਮਞ੍ਞਂ ਪਸ੍ਸਿਂਸੁ ਚੇਵ, ਸਦ੍ਦਞ੍ਚ ਅਸ੍ਸੋਸੁਂ.
ਆਰਦ੍ਧਵੀਰਿਯੋਤਿ ਪਰਿਪੁਣ੍ਣਵੀਰਿਯੋ ਪਗ੍ਗਹਿਤਵੀਰਿਯੋ. ਯਾਵਦੇਵ ਉਪਨਿਕ੍ਖੇਪਨਮਤ੍ਤਾਯਾਤਿ ਤਿਯੋਜਨਸਹਸ੍ਸਵਿਤ੍ਥਾਰਸ੍ਸ ਹਿਮਵਤੋ ਸਨ੍ਤਿਕੇ ਠਪਿਤਾ ਸਾਸਪਮਤ੍ਤਾ ਪਾਸਾਣਸਕ੍ਖਰਾ ‘‘ਹਿਮਵਾ ਨੁ ਖੋ ਮਹਾ, ਅਯਂ ਨੁ ਖੋ ਪਾਸਾਣਸਕ੍ਖਰਾ’’ਤਿ ਏਵਂ ਯਾਵ ਉਪਨਿਕ੍ਖੇਪਨਮਤ੍ਤਸ੍ਸੇਵ ਅਤ੍ਥਾਯ ਭਵੇਯ੍ਯਾਤਿ ਵੁਤ੍ਤਂ ਹੋਤਿ. ਪਰਤੋਪਿ ਏਸੇਵ ਨਯੋ. ਕਪ੍ਪਨ੍ਤਿ ਆਯੁਕਪ੍ਪਂ. ਲੋਣਘਟਾਯਾਤਿ ਚਕ੍ਕਵਾਲ਼ਮੁਖਵਟ੍ਟਿਯਾ ਆਧਾਰਕਂ ਕਤ੍ਵਾ ਮੁਖਵਟ੍ਟਿਯਾ ਬ੍ਰਹ੍ਮਲੋਕਂ ਆਹਚ੍ਚ ਠਿਤਾਯ ਲੋਣਚਾਟਿਯਾਤਿ ਦਸ੍ਸੇਤਿ.
ਇਮੇ ਪਨ ਥੇਰਾ ਉਪਮਂ ਆਹਰਨ੍ਤਾ ਸਰਿਕ੍ਖਕੇਨੇਵ ਚ ਵਿਜ੍ਜਮਾਨਗੁਣੇਨ ਚ ਆਹਰਿਂਸੁ. ਕਥਂ? ਅਯਞ੍ਹਿ ਇਦ੍ਧਿ ਨਾਮ ਅਚ੍ਚੁਗ੍ਗਤਟ੍ਠੇਨ ਚੇਵ ਵਿਪੁਲਟ੍ਠੇਨ ਚ ਹਿਮਵਨ੍ਤਸਦਿਸਾ, ਪਞ੍ਞਾ ਚਤੁਭੂਮਕਧਮ੍ਮੇ ਅਨੁਪਵਿਸਿਤ੍ਵਾ ਠਿਤਟ੍ਠੇਨ ਸਬ੍ਬਬ੍ਯਞ੍ਜਨੇਸੁ ਅਨੁਪਵਿਟ੍ਠਲੋਣਰਸਸਦਿਸਾ. ਏਵਂ ਤਾਵ ਸਰਿਕ੍ਖਕਟ੍ਠੇਨ ਆਹਰਿਂਸੁ. ਸਮਾਧਿਲਕ੍ਖਣਂ ਪਨ ਮਹਾਮੋਗ੍ਗਲ੍ਲਾਨਤ੍ਥੇਰਸ੍ਸ ਵਿਭੂਤਂ ਪਾਕਟਂ. ਕਿਞ੍ਚਾਪਿ ਸਾਰਿਪੁਤ੍ਤਤ੍ਥੇਰਸ੍ਸ ਅਵਿਜ੍ਜਮਾਨਇਦ੍ਧਿ ਨਾਮ ਨਤ੍ਥਿ, ਭਗਵਤਾ ਪਨ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਇਦ੍ਧਿਮਨ੍ਤਾਨਂ ਯਦਿਦਂ ਮਹਾਮੋਗ੍ਗਲ੍ਲਾਨੋ’’ਤਿ ਅਯਮੇਵ ਏਤਦਗ੍ਗੇ ਠਪਿਤੋ. ਵਿਪਸ੍ਸਨਾਲਕ੍ਖਣਂ ਪਨ ਸਾਰਿਪੁਤ੍ਤਤ੍ਥੇਰਸ੍ਸ ਵਿਭੂਤਂ ਪਾਕਟਂ. ਕਿਞ੍ਚਾਪਿ ਮਹਾਮੋਗ੍ਗਲ੍ਲਾਨਤ੍ਥੇਰਸ੍ਸਾਪਿ ਪਞ੍ਞਾ ਅਤ੍ਥਿ, ਭਗਵਤਾ ਪਨ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਮਹਾਪਞ੍ਞਾਨਂ ਯਦਿਦਂ ਸਾਰਿਪੁਤ੍ਤੋ’’ਤਿ (ਅ. ਨਿ. ੧.੧੮੯) ਅਯਮੇਵ ਏਤਦਗ੍ਗੇ ਠਪਿਤੋ. ਤਸ੍ਮਾ ਯਥਾ ਏਤੇ ਅਞ੍ਞਮਞ੍ਞਸ੍ਸ ਧੁਰਂ ਨ ਪਾਪੁਣਨ੍ਤਿ, ਏਵਂ ਵਿਜ੍ਜਮਾਨਗੁਣੇਨ ਆਹਰਿਂਸੁ. ਸਮਾਧਿਲਕ੍ਖਣਸ੍ਮਿਞ੍ਹਿ ਮਹਾਮੋਗ੍ਗਲ੍ਲਾਨੋ ਨਿਪ੍ਫਤ੍ਤਿਂ ਗਤੋ, ਵਿਪਸ੍ਸਨਾਲਕ੍ਖਣੇ ਸਾਰਿਪੁਤ੍ਤਤ੍ਥੇਰੋ, ਦ੍ਵੀਸੁਪਿ ਏਤੇਸੁ ਸਮ੍ਮਾਸਮ੍ਬੁਦ੍ਧੋਤਿ. ਤਤਿਯਂ.
੪. ਨਵਸੁਤ੍ਤਵਣ੍ਣਨਾ
੨੩੮. ਚਤੁਤ੍ਥੇ ਅਪ੍ਪੋਸ੍ਸੁਕ੍ਕੋਤਿ ਨਿਰੁਸ੍ਸੁਕ੍ਕੋ. ਸਙ੍ਕਸਾਯਤੀਤਿ ਵਿਹਰਤਿ. ਵੇਯ੍ਯਾਵਚ੍ਚਨ੍ਤਿ ਚੀਵਰੇ ਕਤ੍ਤਬ੍ਬਕਿਚ੍ਚਂ. ਆਭਿਚੇਤਸਿਕਾਨਨ੍ਤਿ ਅਭਿਚਿਤ੍ਤਂ ਉਤ੍ਤਮਚਿਤ੍ਤਂ ਨਿਸ੍ਸਿਤਾਨਂ. ਨਿਕਾਮਲਾਭੀਤਿ ਇਚ੍ਛਿਤਿਚ੍ਛਿਤਕ੍ਖਣੇ ਸਮਾਪਜ੍ਜਨਸਮਤ੍ਥਤਾਯ ਨਿਕਾਮਲਾਭੀ. ਅਕਿਚ੍ਛਲਾਭੀਤਿ ਝਾਨਪਾਰਿਪਨ੍ਥਿਕੇ ਸੁਖੇਨ ਵਿਕ੍ਖਮ੍ਭੇਤ੍ਵਾ ਸਮਾਪਜ੍ਜਨਸਮਤ੍ਥਤਾਯ ਅਦੁਕ੍ਖਲਾਭੀ. ਅਕਸਿਰਲਾਭੀਤਿ ਯਥਾਪਰਿਚ੍ਛੇਦੇਨ ਵੁਟ੍ਠਾਨਸਮਤ੍ਥਤਾਯ ਵਿਪੁਲਲਾਭੀ, ਪਗੁਣਜ੍ਝਾਨੋਤਿ ਅਤ੍ਥੋ. ਸਿਥਿਲਮਾਰਬ੍ਭਾਤਿ ਸਿਥਿਲਵੀਰਿਯਂ ਪਵਤ੍ਤੇਤ੍ਵਾ. ਚਤੁਤ੍ਥਂ.
੫. ਸੁਜਾਤਸੁਤ੍ਤਵਣ੍ਣਨਾ
੨੩੯. ਪਞ੍ਚਮੇ ਅਭਿਰੂਪੋਤਿ ਅਞ੍ਞਾਨਿ ਰੂਪਾਨਿ ਅਤਿਕ੍ਕਨ੍ਤਰੂਪੋ. ਦਸ੍ਸਨੀਯੋਤਿ ਦਟ੍ਠਬ੍ਬਯੁਤ੍ਤੋ. ਪਾਸਾਦਿਕੋਤਿ ਦਸ੍ਸਨੇਨ ਚਿਤ੍ਤਂ ਪਸਾਦੇਤੁਂ ਸਮਤ੍ਥੋ. ਵਣ੍ਣਪੋਕ੍ਖਰਤਾਯਾਤਿ ਛਵਿਵਣ੍ਣਸੁਨ੍ਦਰਤਾਯ. ਪਞ੍ਚਮਂ.
੬. ਲਕੁਣ੍ਡਕਭਦ੍ਦਿਯਸੁਤ੍ਤਵਣ੍ਣਨਾ
੨੪੦. ਛਟ੍ਠੇ ਦੁਬ੍ਬਣ੍ਣਨ੍ਤਿ ਵਿਰੂਪਸਰੀਰਵਣ੍ਣਂ. ਓਕੋਟਿਮਕਨ੍ਤਿ ਰਸ੍ਸਂ. ਪਰਿਭੂਤਰੂਪਨ੍ਤਿ ਪਮਾਣਵਸੇਨ ਪਰਿਭੂਤਜਾਤਿਕਂ. ਤਂ ਕਿਰ ਛਬ੍ਬਗ੍ਗਿਯਾ ਭਿਕ੍ਖੂ, ‘‘ਆਵੁਸੋ ਭਦ੍ਦਿਯ, ਆਵੁਸੋ, ਭਦ੍ਦਿਯਾ’’ਤਿ ਤਤ੍ਥ ਤਤ੍ਥ ਪਰਾਮਸਿਤ੍ਵਾ ਨਾਨਪ੍ਪਕਾਰਂ ਕੀਲ਼ਨ੍ਤਿ ਆਕਡ੍ਢਨ੍ਤਿ ਪਰਿਕਡ੍ਢਨ੍ਤਿ. ਤੇਨ ਵੁਤ੍ਤਂ ‘‘ਪਰਿਭੂਤਰੂਪ’’ਨ੍ਤਿ. ਕਸ੍ਮਾ ਪਨੇਸ ਏਵਰੂਪੋ ਜਾਤੋ? ਅਯਂ ਕਿਰ ਅਤੀਤੇ ਏਕੋ ਮਹਾਰਾਜਾ ਅਹੋਸਿ, ਤਸ੍ਸ ਮਹਲ੍ਲਕਾ ਚ ਮਹਲ੍ਲਕਿਤ੍ਥਿਯੋ ਚ ਪਟਿਕੂਲਾ ਹੋਨ੍ਤਿ. ਸੋ ਸਚੇ ਮਹਲ੍ਲਕੇ ਪਸ੍ਸਤਿ, ਤੇਸਂ ਚੂਲ਼ਂ ਠਪਾਪੇਤ੍ਵਾ ਕਚ੍ਛਂ ਬਨ੍ਧਾਪੇਤ੍ਵਾ ਯਥਾਰੁਚਿ ਕੀਲ਼ਾਪੇਤਿ. ਮਹਲ੍ਲਕਿਤ੍ਥਿਯੋਪਿ ਦਿਸ੍ਵਾ ਤਾਸਮ੍ਪਿ ਇਚ੍ਛਿਤਿਚ੍ਛਿਤਂ ਵਿਪ੍ਪਕਾਰਂ ਕਤ੍ਵਾ ਯਥਾਰੁਚਿ ਕੀਲ਼ਾਪੇਤਿ. ਤੇਸਂ ਪੁਤ੍ਤਧੀਤਾਦੀਨਂ ਸਨ੍ਤਿਕੇ ਮਹਾਸਾਰਜ੍ਜਂ ਉਪ੍ਪਜ੍ਜਤਿ. ਤਸ੍ਸ ਪਾਪਕਿਰਿਯਾ ਪਥਵਿਤੋ ਪਟ੍ਠਾਯ ਛਦੇਵਲੋਕੇ ਏਕਕੋਲਾਹਲਂ ਅਕਾਸਿ.
ਅਥ ਸਕ੍ਕੋ ਚਿਨ੍ਤੇਸਿ – ‘‘ਅਯਂ ਅਨ੍ਧਬਾਲੋ ਮਹਾਜਨਂ ਵਿਹੇਠੇਤਿ, ਕਰਿਸ੍ਸਾਮਿਸ੍ਸ ਨਿਗ੍ਗਹ’’ਨ੍ਤਿ. ਸੋ ਮਹਲ੍ਲਕਗਾਮਿਯਵਣ੍ਣਂ ਕਤ੍ਵਾ ਯਾਨਕੇ ਏਕਂ ਤਕ੍ਕਚਾਟਿਂ ਆਰੋਪੇਤ੍ਵਾ ਯਾਨਂ ਪੇਸੇਨ੍ਤੋ ਨਗਰਂ ਪਵਿਸਤਿ. ਰਾਜਾਪਿ ਹਤ੍ਥਿਂ ਆਰੁਯ੍ਹ ਨਗਰਤੋ ਨਿਕ੍ਖਨ੍ਤੋ ਤਂ ਦਿਸ੍ਵਾ – ‘‘ਅਯਂ ਮਹਲ੍ਲਕੋ ਤਕ੍ਕਯਾਨਕੇਨ ਅਮ੍ਹਾਕਂ ਅਭਿਮੁਖੋ ਆਗਚ੍ਛਤਿ, ਵਾਰੇਥ ਵਾਰੇਥਾ’’ਤਿ ਆਹ. ਮਨੁਸ੍ਸਾ ਇਤੋ ਚਿਤੋ ਚ ਪਕ੍ਖਨ੍ਦਨ੍ਤਾਪਿ ਨ ਪਸ੍ਸਨ੍ਤਿ. ਸਕ੍ਕੋ ਹਿ ‘‘ਰਾਜਾਵ ਮਂ ਪਸ੍ਸਤੁ, ਮਾ ਅਞ੍ਞੇ’’ਤਿ ਏਵਂ ਅਧਿਟ੍ਠਹਿ. ਅਥ ਤੇਸੁ ਮਨੁਸ੍ਸੇਸੁ ‘‘ਕਹਂ, ਦੇਵ, ਕਹਂ ਦੇਵਾ’’ਤਿ ਵਦਨ੍ਤੇਸੁ ਏਵ ਰਾਜਾ ਸਹ ਹਤ੍ਥਿਨਾ ਵਚ੍ਛੋ ਵਿਯ ਧੇਨੁਯਾ ਯਾਨਸ੍ਸ ਹੇਟ੍ਠਾ ਪਾਵਿਸਿ. ਸਕ੍ਕੋ ਤਕ੍ਕਚਾਟਿਂ ਭਿਨ੍ਦਿ.
ਰਾਜਾ ਸੀਸਤੋ ਪਟ੍ਠਾਯ ਤਕ੍ਕੇਨ ਕਿਲਿਨ੍ਨਸਰੀਰੋ ਅਹੋਸਿ. ਸੋ ਸਰੀਰਂ ਉਬ੍ਬਟ੍ਟਾਪੇਤ੍ਵਾ ਉਯ੍ਯਾਨਪੋਕ੍ਖਰਣਿਯਂ ਨ੍ਹਤ੍ਵਾ ਅਲਙ੍ਕਤਸਰੀਰੋ ਨਗਰਂ ਪਵਿਸਨ੍ਤੋ ਪੁਨ ਤਂ ਅਦ੍ਦਸ. ਦਿਸ੍ਵਾ ‘‘ਅਯਂ ਸੋ ਅਮ੍ਹੇਹਿ ਦਿਟ੍ਠਮਹਲ੍ਲਕੋ ਪੁਨ ਦਿਸ੍ਸਤਿ. ਵਾਰੇਥ ਵਾਰੇਥ ਨ’’ਨ੍ਤਿ ਆਹ. ਮਨੁਸ੍ਸਾ ‘‘ਕਹਂ, ਦੇਵ, ਕਹਂ, ਦੇਵਾ’’ਤਿ ਇਤੋ ਚਿਤੋ ਚ ਵਿਧਾਵਿਂਸੁ. ਸੋ ਪਠਮਵਿਪ੍ਪਕਾਰਮੇਵ ਪੁਨ ਪਾਪੁਣਿ. ਤਸ੍ਮਿਂ ਖਣੇ ਸਕ੍ਕੋ ਗੋਣੇ ਚ ਯਾਨਞ੍ਚ ਅਨ੍ਤਰਧਾਪੇਤ੍ਵਾ ਆਕਾਸੇ ਠਤ੍ਵਾ ਆਹ, ‘‘ਅਨ੍ਧਬਾਲ, ਤ੍ਵਂ ਮਯਿ ਤਕ੍ਕਵਾਣਿਜਕੋ ਏਸੋ’’ਤਿ ਸਞ੍ਞਂ ਕਰੋਸਿ, ਸਕ੍ਕੋਹਂ ਦੇਵਰਾਜਾ, ‘‘ਤਵੇਤਂ ਪਾਪਕਿਰਿਯਂ ਨਿਵਾਰੇਸ੍ਸਾਮੀ’’ਤਿ ਆਗਤੋ, ‘‘ਮਾ ਪੁਨ ਏਵਰੂਪਂ ਅਕਾਸੀ’’ਤਿ ਸਨ੍ਤਜ੍ਜੇਤ੍ਵਾ ਅਗਮਾਸਿ. ਇਮਿਨਾ ਕਮ੍ਮੇਨ ਸੋ ਦੁਬ੍ਬਣ੍ਣੋ ਅਹੋਸਿ.
ਵਿਪਸ੍ਸੀਸਮ੍ਮਾਸਮ੍ਬੁਦ੍ਧਕਾਲੇ ਪਨੇਸ ਚਿਤ੍ਤਪਤ੍ਤਕੋਕਿਲੋ ਨਾਮ ਹੁਤ੍ਵਾ ਖੇਮੇ ਮਿਗਦਾਯੇ ਵਸਨ੍ਤੋ ਏਕਦਿਵਸਂ ਹਿਮਵਨ੍ਤਂ ਗਨ੍ਤ੍ਵਾ ਮਧੁਰਂ ਅਮ੍ਬਫਲਂ ਤੁਣ੍ਡੇਨ ਗਹੇਤ੍ਵਾ ਆਗਚ੍ਛਨ੍ਤੋ ਭਿਕ੍ਖੁਸਙ੍ਘਪਰਿਵਾਰਂ ਸਤ੍ਥਾਰਂ ਦਿਸ੍ਵਾ ਚਿਨ੍ਤੇਸਿ – ‘‘ਅਹਂ ਅਞ੍ਞੇਸੁ ਦਿਵਸੇਸੁ ਰਿਤ੍ਤਕੋ ਤਥਾਗਤਂ ਪਸ੍ਸਾਮਿ. ਅਜ੍ਜ ਪਨ ਮੇ ਇਮਂ ਅਮ੍ਬਪਕ੍ਕਂ ਅਤ੍ਥਿ, ਦਸਬਲਸ੍ਸ ਤਂ ਦਸ੍ਸਾਮੀ’’ਤਿ ਓਤਰਿਤ੍ਵਾ ਆਕਾਸੇ ਚਰਤਿ. ਸਤ੍ਥਾ ਤਸ੍ਸ ਚਿਤ੍ਤਂ ਞਤ੍ਵਾ ਉਪਟ੍ਠਾਕਂ ਓਲੋਕੇਸਿ. ਸੋ ਪਤ੍ਤਂ ਨੀਹਰਿਤ੍ਵਾ ਦਸਬਲਂ ਵਨ੍ਦਿਤ੍ਵਾ ਸਤ੍ਥੁ ਹਤ੍ਥੇ ਠਪੇਸਿ. ਕੋਕਿਲੋ ਦਸਬਲਸ੍ਸ ਪਤ੍ਤੇ ਅਮ੍ਬਪਕ੍ਕਂ ਪਤਿਟ੍ਠਾਪੇਸਿ. ਸਤ੍ਥਾ ਤਤ੍ਥੇਵ ਨਿਸੀਦਿਤ੍ਵਾ ਤਂ ਪਰਿਭੁਞ੍ਜਿ. ਕੋਕਿਲੋ ਪਸਨ੍ਨਚਿਤ੍ਤੋ ਪੁਨਪ੍ਪੁਨਂ ਦਸਬਲਸ੍ਸ ਗੁਣੇ ਆਵਜ੍ਜੇਤ੍ਵਾ ਦਸਬਲਂ ਵਨ੍ਦਿਤ੍ਵਾ ਅਤ੍ਤਨੋ ਕੁਲਾਵਕਂ ਗਨ੍ਤ੍ਵਾ ਸਤ੍ਤਾਹਂ ਪੀਤਿਸੁਖੇਨੇਵ ਵੀਤਿਨਾਮੇਸਿ. ਇਮਿਨਾ ਕਮ੍ਮੇਨ ਸਰੋ ਮਧੁਰੋ ਅਹੋਸਿ.
ਕਸ੍ਸਪਸਮ੍ਮਾਸਮ੍ਬੁਦ੍ਧਕਾਲੇ ਪਨ ਚੇਤਿਯੇ ਆਰਦ੍ਧੇ ‘‘ਕਿਂਪਮਾਣਂ ਕਰੋਮ? ਸਤ੍ਤਯੋਜਨਪ੍ਪਮਾਣਂ. ਅਤਿਮਹਨ੍ਤਂ ਏਤਂ, ਛਯੋਜਨਪ੍ਪਮਾਣਂ ਕਰੋਮ. ਇਦਮ੍ਪਿ ਅਤਿਮਹਨ੍ਤਂ, ਪਞ੍ਚਯੋਜਨਂ ਕਰੋਮ, ਚਤੁਯੋਜਨਂ, ਤਿਯੋਜਨਂ, ਦ੍ਵਿਯੋਜਨ’’ਨ੍ਤਿ. ਅਯਂ ਤਦਾ ਜੇਟ੍ਠਕਵਡ੍ਢਕੀ ਹੁਤ੍ਵਾ, ‘‘ਏਵਂ, ਭੋ, ਅਨਾਗਤੇ ਸੁਖਪਟਿਜਗ੍ਗਿਤਂ ਕਾਤੁਂ ਵਟ੍ਟਤੀ’’ਤਿ ਵਤ੍ਵਾ ਰਜ੍ਜੁਂ ਆਦਾਯ ਪਰਿਕ੍ਖਿਪਨ੍ਤੋ ਗਾਵੁਤਮਤ੍ਤਕੇ ਠਤ੍ਵਾ, ‘‘ਏਕੇਕਂ ਮੁਖਂ ਗਾਵੁਤਂ ਹੋਤੁ, ਚੇਤਿਯਂ ਯੋਜਨਾਵਟ੍ਟਂ ਯੋਜਨੁਬ੍ਬੇਧਂ ਭਵਿਸ੍ਸਤੀ’’ਤਿ ਆਹ. ਤੇ ਤਸ੍ਸ ਵਚਨੇ ਅਟ੍ਠਂਸੁ. ਚੇਤਿਯਂ ਸਤ੍ਤਦਿਵਸਸਤ੍ਤਮਾਸਾਧਿਕੇਹਿ ਸਤ੍ਤਹਿ ਸਂਵਚ੍ਛਰੇਹਿ ਨਿਟ੍ਠਿਤਂ. ਇਤਿ ਅਪ੍ਪਮਾਣਸ੍ਸ ਬੁਦ੍ਧਸ੍ਸ ਪਮਾਣਂ ਅਕਾਸੀਤਿ. ਤੇਨ ਕਮ੍ਮੇਨ ਓਕੋਟਿਮਕੋ ਜਾਤੋ.
ਹਤ੍ਥਯੋ ਪਸਦਾ ਮਿਗਾਤਿ ਹਤ੍ਥਿਨੋ ਚ ਪਸਦਮਿਗਾ ਚ. ਨਤ੍ਥਿ ਕਾਯਸ੍ਮਿਂ ਤੁਲ੍ਯਤਾਤਿ ਕਾਯਸ੍ਮਿਂ ਪਮਾਣਂ ਨਾਮ ਨਤ੍ਥਿ, ਅਕਾਰਣਂ ਕਾਯਪਮਾਣਨ੍ਤਿ ਅਤ੍ਥੋ. ਛਟ੍ਠਂ.
੭. ਵਿਸਾਖਸੁਤ੍ਤਵਣ੍ਣਨਾ
੨੪੧. ਸਤ੍ਤਮੇ ਪੋਰਿਯਾ ਵਾਚਾਯਾਤਿ ਪੁਰਵਾਸੀਨਂ ਨਗਰਮਨੁਸ੍ਸਾਨਂ ਵਾਚਾਸਦਿਸਾਯ ਅਪਰਿਹੀਨਕ੍ਖਰਪਦਾਯ ਮਧੁਰਵਾਚਾਯ. ਵਿਸ੍ਸਟ੍ਠਾਯਾਤਿ ਅਸਨ੍ਦਿਦ੍ਧਾਯ ਅਪਲਿਬੁਦ੍ਧਾਯ, ਪਿਤ੍ਤਸੇਮ੍ਹੇਹਿ ਅਨੁਪਹਤਾਯਾਤਿ ਅਤ੍ਥੋ. ਅਨੇਲਗਲਾਯਾਤਿ ਯਥਾ ਦਨ੍ਧਮਨੁਸ੍ਸਾ ਮੁਖੇਨ ਖੇਲ਼ਂ ਗਲ਼ਨ੍ਤੇਨ ਵਾਚਂ ਭਾਸਨ੍ਤਿ, ਨ ਏਵਰੂਪਾਯ, ਅਥ ਖੋ ਨਿਦ੍ਦੋਸਾਯ ਵਿਸਦਵਾਚਾਯ. ਪਰਿਯਾਪਨ੍ਨਾਯਾਤਿ ਚਤੁਸਚ੍ਚਪਰਿਯਾਪਨ੍ਨਾਯ ਚਤ੍ਤਾਰਿ ਸਚ੍ਚਾਨਿ ਅਮੁਞ੍ਚਿਤ੍ਵਾ ਪਵਤ੍ਤਾਯ. ਅਨਿਸ੍ਸਿਤਾਯਾਤਿ ਵਟ੍ਟਨਿਸ੍ਸਿਤਂ ਕਤ੍ਵਾ ਅਕਥਿਤਾਯ. ਧਮ੍ਮੋ ਹਿ ਇਸਿਨਂ ਧਜੋਤਿ ਨਵਵਿਧਲੋਕੁਤ੍ਤਰਧਮ੍ਮੋ ਇਸੀਨਂ ਧਜੋ ਨਾਮਾਤਿ. ਸਤ੍ਤਮਂ.
੮. ਨਨ੍ਦਸੁਤ੍ਤਵਣ੍ਣਨਾ
੨੪੨. ਅਟ੍ਠਮੇ ਆਕੋਟਿਤਪਚ੍ਚਾਕੋਟਿਤਾਨੀਤਿ ਏਕਸ੍ਮਿਂ ਪਸ੍ਸੇ ਪਾਣਿਨਾ ਵਾ ਮੁਗ੍ਗਰੇਨ ਵਾ ਆਕੋਟਨੇਨ ਆਕੋਟਿਤਾਨਿ, ਪਰਿਵਤ੍ਤੇਤ੍ਵਾ ਆਕੋਟਨੇਨ ਪਚ੍ਚਾਕੋਟਿਤਾਨਿ. ਅਞ੍ਜੇਤ੍ਵਾਤਿ ਅਞ੍ਜਨੇਨ ਪੂਰੇਤ੍ਵਾ. ਅਚ੍ਛਂ ਪਤ੍ਤਨ੍ਤਿ ਵਿਪ੍ਪਸਨ੍ਨਵਣ੍ਣਂ ਮਤ੍ਤਿਕਾਪਤ੍ਤਂ. ਕਸ੍ਮਾ ਪਨ ਥੇਰੋ ਏਵਮਕਾਸੀਤਿ? ਸਤ੍ਥੁ ਅਜ੍ਝਾਸਯਜਾਨਨਤ੍ਥਂ. ਏਵਂ ਕਿਰਸ੍ਸ ਅਹੋਸਿ ‘‘ਸਚੇ ਸਤ੍ਥਾ ‘ਸੋਭਤਿ ਵਤ ਮੇ ਅਯਂ ਕਨਿਟ੍ਠਭਾਤਿਕੋ’ਤਿ ਵਕ੍ਖਤਿ, ਯਾਵਜੀਵਂ ਇਮਿਨਾ ਵਾਕਾਰੇਨ ਚਰਿਸ੍ਸਾਮਿ. ਸਚੇ ਏਤ੍ਥ ਦੋਸਂ ਦਸ੍ਸਤਿ, ਇਮਂ ਆਕਾਰਂ ਪਹਾਯ ਸਙ੍ਕਾਰਚੋਲ਼ਂ ਗਹੇਤ੍ਵਾ ਚੀਵਰਂ ਕਤ੍ਵਾ ਧਾਰੇਨ੍ਤੋ ਪਰਿਯਨ੍ਤਸੇਨਾਸਨੇ ਵਸਨ੍ਤੋ ਚਰਿਸ੍ਸਾਮੀ’’ਤਿ. ਅਸ੍ਸਸੀਤਿ ਭਵਿਸ੍ਸਸਿ.
ਅਞ੍ਞਾਤੁਞ੍ਛੇਨਾਤਿ ਅਭਿਲਕ੍ਖਿਤੇਸੁ ਇਸ੍ਸਰਜਨਗੇਹੇਸੁ ਕਟੁਕਭਣ੍ਡਸਮ੍ਭਾਰਂ ਸੁਗਨ੍ਧਂ ਭੋਜਨਂ ਪਰਿਯੇਸਨ੍ਤਸ੍ਸ ਉਞ੍ਛੋ ਞਾਤੁਞ੍ਛੋ ਨਾਮ. ਘਰਪਟਿਪਾਟਿਯਾ ਪਨ ਦ੍ਵਾਰੇ ਠਿਤੇਨ ਲਦ੍ਧਂ ਮਿਸ੍ਸਕਭੋਜਨਂ ਅਞ੍ਞਾਤੁਞ੍ਛੋ ਨਾਮ. ਅਯਮਿਧ ਅਧਿਪ੍ਪੇਤੋ. ਕਾਮੇਸੁ ਅਨਪੇਕ੍ਖਿਨਨ੍ਤਿ ਵਤ੍ਥੁਕਾਮਕਿਲੇਸਕਾਮੇਸੁ ਨਿਰਪੇਕ੍ਖਂ. ਆਰਞ੍ਞਿਕੋ ਚਾਤਿਆਦਿ ਸਬ੍ਬਂ ਸਮਾਦਾਨਵਸੇਨੇਵ ਵੁਤ੍ਤਂ. ਕਾਮੇਸੁ ਚ ਅਨਪੇਕ੍ਖੋਤਿ ਇਦਂ ਸੁਤ੍ਤਂ ਦੇਵਲੋਕੇ ਅਚ੍ਛਰਾਯੋ ਦਸ੍ਸੇਤ੍ਵਾ ਆਗਤੇਨ ਅਪਰਭਾਗੇ ਕਥਿਤਂ. ਇਮਸ੍ਸ ਕਥਿਤਦਿਵਸਤੋ ਪਟ੍ਠਾਯ ਥੇਰੋ ਘਟੇਨ੍ਤੋ ਵਾਯਮਨ੍ਤੋ ਕਤਿਪਾਹੇਨੇਵ ਅਰਹਤ੍ਤੇ ਪਤਿਟ੍ਠਾਯ ਸਦੇਵਕੇ ਲੋਕੇ ਅਗ੍ਗਦਕ੍ਖਿਣੇਯ੍ਯੋ ਜਾਤੋ. ਅਟ੍ਠਮਂ.
੯. ਤਿਸ੍ਸਸੁਤ੍ਤਵਣ੍ਣਨਾ
੨੪੩. ਨਵਮੇ ਦੁਮ੍ਮਨੋਤਿ ਉਪ੍ਪਨ੍ਨਦੋਮਨਸ੍ਸੋ. ਕਸ੍ਮਾ ਪਨਾਯਂ ਏਵਂ ਦੁਕ੍ਖੀ ਦੁਮ੍ਮਨੋ ਜਾਤੋਤਿ? ਖਤ੍ਤਿਯਪਬ੍ਬਜਿਤੋ ਹੇਸ, ਤੇਨ ਨਂ ਪਬ੍ਬਾਜੇਤ੍ਵਾ ਦੁਪਟ੍ਟਸਾਟਕਂ ਨਿਵਾਸਾਪੇਤ੍ਵਾ ਵਰਚੀਵਰਂ ਪਾਰੁਪੇਤ੍ਵਾ ਅਕ੍ਖੀਨਿ ਅਞ੍ਜੇਤ੍ਵਾ ਮਨੋਸਿਲਾਤੇਲੇਨ ਸੀਸਂ ਮਕ੍ਖੇਸੁਂ. ਸੋ ਭਿਕ੍ਖੂਸੁ ਰਤ੍ਤਿਟ੍ਠਾਨਦਿਵਾਟ੍ਠਾਨਂ ਗਤੇਸੁ ‘‘ਭਿਕ੍ਖੁਨਾ ਨਾਮ ਵਿਵਿਤ੍ਤੋਕਾਸੇ ਨਿਸੀਦਿਤਬ੍ਬ’’ਨ੍ਤਿ ਅਜਾਨਨ੍ਤੋ ਭੋਜਨਸਾਲਂ ਗਨ੍ਤ੍ਵਾ ਮਹਾਪੀਠਂ ਆਰੁਹਿਤ੍ਵਾ ਨਿਸੀਦਿ. ਦਿਸਾਵਚਰਾ ਆਗਨ੍ਤੁਕਾ ਪਂਸੁਕੂਲਿਕਾ ਭਿਕ੍ਖੂ ਆਗਨ੍ਤ੍ਵਾ, ‘‘ਇਮਿਨਾਵ ਨੀਹਾਰੇਨ ਰਜੋਕਿਣ੍ਣੇਹਿ ਗਤ੍ਤੇਹਿ ਨ ਸਕ੍ਕਾ ਦਸਬਲਂ ਪਸ੍ਸਿਤੁਂ. ਭਣ੍ਡਕਂ ਤਾਵ ਠਪੇਸ੍ਸਾਮਾ’’ਤਿ ਭੋਜਨਸਾਲਂ ਅਗਮਂਸੁ. ਸੋ ਤੇਸੁ ਮਹਾਥੇਰੇਸੁ ਆਗਚ੍ਛਨ੍ਤੇਸੁ ਨਿਚ੍ਚਲੋ ਨਿਸੀਦਿਯੇਵ. ਅਞ੍ਞੇ ਭਿਕ੍ਖੂ ‘‘ਪਾਦਵਤ੍ਤਂ ਕਰੋਮ, ਤਾਲਵਣ੍ਟੇਨ ਬੀਜਾਮਾ’’ਤਿ ਆਪੁਚ੍ਛਨ੍ਤਿ. ਅਯਂ ਪਨ ਨਿਸਿਨ੍ਨਕੋਵ ‘‘ਕਤਿਵਸ੍ਸਤ੍ਥਾ’’ਤਿ? ਪੁਚ੍ਛਿਤ੍ਵਾ, ‘‘ਮਯਂ ਅਵਸ੍ਸਿਕਾ. ਤੁਮ੍ਹੇ ਪਨ ਕਤਿਵਸ੍ਸਤ੍ਥਾ’’ਤਿ? ਵੁਤ੍ਤੇ, ‘‘ਮਯਂ ਅਜ੍ਜ ਪਬ੍ਬਜਿਤਾ’’ਤਿ ਆਹ. ਅਥ ਨਂ ਭਿਕ੍ਖੂ, ‘‘ਆਵੁਸੋ, ਅਧੁਨਾ ਛਿਨ੍ਨਚੂਲ਼ੋਸਿ, ਅਜ੍ਜਾਪਿ ਤੇ ਸੀਸਮੂਲੇ ਊਕਾਗਨ੍ਧੋ ਵਾਯਤਿਯੇਵ, ਤ੍ਵਂ ਨਾਮ ਏਤ੍ਤਕੇਸੁ ਵੁਡ੍ਢਤਰੇਸੁ ਵਤ੍ਤਂ ਆਪੁਚ੍ਛਨ੍ਤੇਸੁ ਨਿਸ੍ਸਦ੍ਦੋ ਨਿਚ੍ਚਲੋ ਨਿਸਿਨ੍ਨੋ, ਅਪਚਿਤਿਮਤ੍ਤਮ੍ਪਿ ਤੇ ਨਤ੍ਥਿ, ਕਸ੍ਸ ਸਾਸਨੇ ਪਬ੍ਬਜਿਤੋਸੀ’’ਤਿ? ਪਰਿਵਾਰੇਤ੍ਵਾ ਤਂ ਵਾਚਾਸਤ੍ਤੀਹਿ ਪਹਰਨ੍ਤਾ ‘‘ਕਿਂ ਤ੍ਵਂ ਇਣਟ੍ਟੋ ਵਾ ਭਯਟ੍ਟੋ ਵਾ ਜੀਵਿਤੁਂ ਅਸਕ੍ਕੋਨ੍ਤੋ ਪਬ੍ਬਜਿਤੋ’’ਤਿ? ਆਹਂਸੁ. ਸੋ ਏਕਮ੍ਪਿ ਥੇਰਂ ਓਲੋਕੇਸਿ, ਤੇਨ ‘‘ਕਿਂ ਮਂ ਓਲੋਕੇਸਿ ਮਹਲ੍ਲਕਾ’’ਤਿ? ਵੁਤ੍ਤੇ ਅਞ੍ਞਂ ਓਲੋਕੇਸਿ, ਤੇਨਪਿ ਤਥੇਵ ਵੁਤ੍ਤੇ ਅਥਸ੍ਸ ‘‘ਇਮੇ ਮਂ ਪਰਿਵਾਰੇਤ੍ਵਾ ਵਾਚਾਸਤ੍ਤੀਹਿ ਵਿਜ੍ਝਨ੍ਤੀ’’ਤਿ ਖਤ੍ਤਿਯਮਾਨੋ ਉਪ੍ਪਜ੍ਜਿ. ਅਕ੍ਖੀਸੁ ਮਣਿਵਣ੍ਣਾਨਿ ਅਸ੍ਸੂਨਿ ਸਞ੍ਚਰਿਂਸੁ. ਤਤੋ ਨੇ ਆਹ – ‘‘ਕਸ੍ਸ ਸਨ੍ਤਿਕਂ ਆਗਤਤ੍ਥਾ’’ਤਿ. ਤੇ ‘‘ਕਿਂ ਪਨ ਤ੍ਵਂ ‘ਮਯ੍ਹਂ ਸਨ੍ਤਿਕਂ ਆਗਤਾ’ਤਿ? ਅਮ੍ਹੇ ਮਞ੍ਞਸਿ ਗਿਹਿਬ੍ਯਞ੍ਜਨਭਟ੍ਠਕਾ’’ਤਿ ਵਤ੍ਵਾ, ‘‘ਸਦੇਵਕੇ ਲੋਕੇ ਅਗ੍ਗਪੁਗ੍ਗਲਸ੍ਸ ਸਤ੍ਥੁ ਸਨ੍ਤਿਕਂ ਆਗਤਮ੍ਹਾ’’ਤਿ ਆਹਂਸੁ. ਸੋ ‘‘ਮਯ੍ਹਂ ਭਾਤੁ ਸਨ੍ਤਿਕੇ ਆਗਤਾ ਤੁਮ੍ਹੇ, ਯਦਿ ਏਵਂ ਇਦਾਨਿ ਵੋ ਆਗਤਮਗ੍ਗੇਨੇਵ ਗਮਨਂ ਕਰਿਸ੍ਸਾਮੀ’’ਤਿ ਕੁਜ੍ਝਿਤ੍ਵਾ ਨਿਕ੍ਖਨ੍ਤੋ ਅਨ੍ਤਰਾਮਗ੍ਗੇ ਚਿਨ੍ਤੇਸਿ – ‘‘ਮਯਿ ਇਮਿਨਾਵ ਨੀਹਾਰੇਨ ਗਤੇ ਸਤ੍ਥਾ ਏਤੇ ਨ ਨੀਹਰਾਪੇਸ੍ਸਤੀ’’ਤਿ ਦੁਕ੍ਖੀ ਦੁਮ੍ਮਨੋ ਅਸ੍ਸੂਨਿ ਪਵਤ੍ਤਯਮਾਨੋ ਅਗਮਾਸਿ. ਇਮਿਨਾ ਕਾਰਣੇਨ ਏਸ ਏਵਂ ਜਾਤੋਤਿ.
ਵਾਚਾਸਨ੍ਨਿਤੋਦਕੇਨਾਤਿ ਵਚਨਪਤੋਦੇਨ. ਸਞ੍ਜਮ੍ਭਰਿਮਕਂਸੂਤਿ ਸਞ੍ਜਮ੍ਭਰਿਤਂ ਨਿਰਨ੍ਤਰਂ ਫੁਟਂ ਅਕਂਸੁ, ਉਪਰਿ ਵਿਜ੍ਝਿਂਸੂਤਿ ਵੁਤ੍ਤਂ ਹੋਤਿ. ਵਤ੍ਤਾਤਿ ਪਰੇ ਯਦਿਚ੍ਛਕਂ ਵਦਤਿਯੇਵ. ਨੋ ਚ ਵਚਨਕ੍ਖਮੋਤਿ ਪਰੇਸਂ ਵਚਨਂ ਖਮਿਤੁਂ ਨ ਸਕ੍ਕੋਤਿ. ਇਦਾਨਿ ਤਾਵ ਤ੍ਵਂ ਇਮਿਨਾ ਕੋਪੇਨ ਇਮਿਨਾ ਵੁਤ੍ਤਵਾਚਾਸਨ੍ਨਿਤੋਦਕੇਨ ਵਿਦ੍ਧੋ. ਅਤੀਤੇ ਪਨ ਰਟ੍ਠਤੋ ਚ ਪਬ੍ਬਾਜਿਤੋਤਿ. ਏਵਂ ਵੁਤ੍ਤੇ, ‘‘ਕਤਰਸ੍ਮਿਂ ਕਾਲੇ ਭਗਵਾ’’ਤਿ? ਭਿਕ੍ਖੂ ਭਗਵਨ੍ਤਂ ਯਾਚਿਂਸੁ.
ਸਤ੍ਥਾ ਆਹ – ਅਤੀਤੇ ਬਾਰਾਣਸਿਯਂ ਬਾਰਾਣਸਿਰਾਜਾ ਰਜ੍ਜਂ ਕਾਰੇਸਿ. ਅਥੇਕੋ ਜਾਤਿਮਾ, ਏਕੋ ਮਾਤਙ੍ਗੋਤਿ ਦ੍ਵੇ ਇਸਯੋ ਬਾਰਾਣਸਿਂ ਅਗਮਂਸੁ. ਤੇਸੁ ਜਾਤਿਮਾ ਪੁਰੇਤਰਂ ਗਨ੍ਤ੍ਵਾ ਕੁਮ੍ਭਕਾਰਸਾਲਾਯਂ ਨਿਸੀਦਿ. ਮਾਤਙ੍ਗੋ ਤਾਪਸੋ ਪਚ੍ਛਾ ਗਨ੍ਤ੍ਵਾ ਤਤ੍ਥ ਓਕਾਸਂ ਯਾਚਿ ਕੁਮ੍ਭਕਾਰੋ ‘‘ਅਤ੍ਥੇਤ੍ਥ ਪਠਮਤਰਂ ਪਵਿਟ੍ਠੋ ਪਬ੍ਬਜਿਤੋ, ਤਂ ਪੁਚ੍ਛਾ’’ਤਿ ਆਹ. ਸੋ ਅਤ੍ਤਨੋ ਪਰਿਕ੍ਖਾਰਂ ਗਹੇਤ੍ਵਾ ਸਾਲਾਯ ਦ੍ਵਾਰਮੂਲੇ ਠਤ੍ਵਾ, ‘‘ਅਮ੍ਹਾਕਮ੍ਪਿ ਆਚਰਿਯ ਏਕਰਤ੍ਤਿਵਾਸਾਯ ਓਕਾਸਂ ਦੇਥਾ’’ਤਿ ਆਹ. ‘‘ਪਵਿਸ, ਭੋ’’ਤਿ. ਪਵਿਸਿਤ੍ਵਾ ਨਿਸਿਨ੍ਨਂ, ‘‘ਭੋ, ਕਿਂ ਗੋਤ੍ਤੋਸੀ’’ਤਿ? ਪੁਚ੍ਛਿ. ‘‘ਚਣ੍ਡਾਲਗੋਤ੍ਤੋਮ੍ਹੀ’’ਤਿ. ‘‘ਨ ਸਕ੍ਕਾ ਤਯਾ ਸਦ੍ਧਿਂ ਏਕਟ੍ਠਾਨੇ ਨਿਸੀਦਿਤੁਂ, ਏਕਮਨ੍ਤਂ ਗਚ੍ਛਾ’’ਤਿ. ਸੋ ਚ ਤਤ੍ਥੇਵ ਤਿਣਸਨ੍ਥਾਰਕਂ ਪਤ੍ਥਰਿਤ੍ਵਾ ਨਿਪਜ੍ਜਿ, ਜਾਤਿਮਾ ਦ੍ਵਾਰਂ ਨਿਸ੍ਸਾਯ ਨਿਪਜ੍ਜਿ. ਇਤਰੋ ਪਸ੍ਸਾਵਤ੍ਥਾਯ ਨਿਕ੍ਖਮਨ੍ਤੋ ਤਂ ਉਰਸ੍ਮਿਂ ਅਕ੍ਕਮਿ. ‘‘ਕੋ ਏਸੋ’’ਤਿ ਚ ਵੁਤ੍ਤੇ? ‘‘ਅਹਂ ਆਚਰਿਯਾ’’ਤਿ ਆਹ. ‘‘ਰੇ ਚਣ੍ਡਾਲ, ਕਿਂ ਅਞ੍ਞਤੋ ਮਗ੍ਗਂ ਨ ਪਸ੍ਸਸਿ? ਅਥ ਮੇ ਆਗਨ੍ਤ੍ਵਾ ਅਕ੍ਕਮਸੀ’’ਤਿ. ‘‘ਆਚਰਿਯ, ਅਦਿਸ੍ਵਾ ਮੇ ਅਕ੍ਕਨ੍ਤੋਸਿ, ਖਮ ਮਯ੍ਹ’’ਨ੍ਤਿ. ਸੋ ਮਹਾਪੁਰਿਸੇ ਬਹਿ ਨਿਕ੍ਖਨ੍ਤੇ ਚਿਨ੍ਤੇਸਿ – ‘‘ਅਯਂ ਪਚ੍ਚਾਗਚ੍ਛਨ੍ਤੋਪਿ ਇਤੋਵ ਆਗਮਿਸ੍ਸਤੀ’’ਤਿ ਪਰਿਵਤ੍ਤੇਤ੍ਵਾ ਨਿਪਜ੍ਜਿ. ਮਹਾਪੁਰਿਸੋਪਿ ‘‘ਆਚਰਿਯੋ ਇਤੋ ਸੀਸਂ ਕਤ੍ਵਾ ਨਿਪਨ੍ਨੋ, ਪਾਦਸਮੀਪੇਨ ਗਮਿਸ੍ਸਾਮੀ’’ਤਿ ਪਵਿਸਨ੍ਤੋ ਪੁਨ ਉਰਸ੍ਮਿਂਯੇਵ ਅਕ੍ਕਮਿ. ‘‘ਕੋ ਏਸੋ’’ਤਿ ਚ ਵੁਤ੍ਤੇ? ‘‘ਅਹਂ ਆਚਰਿਯਾ’’ਤਿ ਆਹ. ‘‘ਪਠਮਂ ਤਾਵ ਤੇ ਅਜਾਨਨ੍ਤੇਨ ਕਤਂ, ਇਦਾਨਿ ਮਂ ਘਟੇਨ੍ਤੋਵ ਅਕਾਸਿ, ਸੂਰਿਯੇ ਤੇ ਉਗ੍ਗਚ੍ਛਨ੍ਤੇ ਸਤ੍ਤਧਾ ਮੁਦ੍ਧਾ ਫਲਤੂ’’ਤਿ ਸਪਿ. ਮਹਾਪੁਰਿਸੋ ਕਿਞ੍ਚਿ ਅਵਤ੍ਵਾ ਪੁਰੇਅਰੁਣੇਯੇਵ ਸੂਰਿਯਂ ਗਣ੍ਹਿ, ਨਾਸ੍ਸ ਉਗ੍ਗਨ੍ਤੁਂ ਅਦਾਸਿ. ਮਨੁਸ੍ਸਾ ਚ ਹਤ੍ਥਿਅਸ੍ਸਾਦਯੋ ਚ ਪਬੁਜ੍ਝਿਂਸੁ.
ਮਨੁਸ੍ਸਾ ਰਾਜਕੁਲਂ ਗਨ੍ਤ੍ਵਾ, ‘‘ਦੇਵ, ਸਕਲਨਗਰੇ ਅਪ੍ਪਬੁਦ੍ਧੋ ਨਾਮ ਨਤ੍ਥਿ, ਨ ਚ ਅਰੁਣੁਗ੍ਗਂ ਪਞ੍ਞਾਯਤਿ, ਕਿਨ੍ਨੁ ਖੋ ਏਤ’’ਨ੍ਤਿ? ਤੇਨ ਹਿ ਨਗਰਂ ਪਰਿਵੀਮਂਸਥਾਤਿ. ਤੇ ਪਰਿਵੀਮਂਸਨ੍ਤਾ ਕੁਮ੍ਭਕਾਰਸਾਲਾਯਂ ਦ੍ਵੇ ਤਾਪਸੇ ਦਿਸ੍ਵਾ, ‘‘ਇਮੇਸਂ ਏਤਂ ਕਮ੍ਮਂ ਭਵਿਸ੍ਸਤੀ’’ਤਿ ਗਨ੍ਤ੍ਵਾ ਰਞ੍ਞੋ ਆਰੋਚੇਸੁਂ. ਰਞ੍ਞਾ ਚ ‘‘ਪੁਚ੍ਛਥ ਨੇ’’ਤਿ ਵੁਤ੍ਤਾ ਆਗਨ੍ਤ੍ਵਾ ਜਾਤਿਮਨ੍ਤਂ ਪੁਚ੍ਛਿਂਸੁ – ‘‘ਤੁਮ੍ਹੇਹਿ ਅਨ੍ਧਕਾਰਂ ਕਤ’’ਨ੍ਤਿ. ‘‘ਨ ਮਯਾ ਕਤਂ, ਏਸ ਪਨ ਕੂਟਜਟਿਲੋ ਛਵੋ ਅਨਨ੍ਤਮਾਯੋ, ਤਂ ਪੁਚ੍ਛਥਾ’’ਤਿ. ਤੇ ਆਗਨ੍ਤ੍ਵਾ ਮਹਾਪੁਰਿਸਂ ਪੁਚ੍ਛਿਂਸੁ – ‘‘ਤੁਮ੍ਹੇਹਿ, ਭਨ੍ਤੇ, ਅਨ੍ਧਕਾਰਂ ਕਤ’’ਨ੍ਤਿ. ‘‘ਆਮ ਅਯਂ ਆਚਰਿਯੋ ਮਂ ਅਭਿਸਪਿ, ਤਸ੍ਮਾ ਮਯਾ ਕਤ’’ਨ੍ਤਿ. ਤੇ ਗਨ੍ਤ੍ਵਾ ਰਞ੍ਞੋ ਆਰੋਚੇਸੁਂ. ਰਾਜਾਪਿ ਆਗਨ੍ਤ੍ਵਾ ਮਹਾਪੁਰਿਸਂ ‘‘ਤੁਮ੍ਹੇਹਿ ਕਤਂ, ਭਨ੍ਤੇ’’ਤਿ? ਪੁਚ੍ਛਿ. ‘‘ਆਮ, ਮਹਾਰਾਜਾ’’ਤਿ. ‘‘ਕਸ੍ਮਾ ਭਨ੍ਤੇ’’ਤਿ? ‘‘ਇਮਿਨਾ ਅਭਿਸਪਿਤੋਮ੍ਹਿ, ਸਚੇ ਮਂ ਏਸੋ ਖਮਾਪੇਸ੍ਸਤਿ, ਸੂਰਿਯਂ ਵਿਸ੍ਸਜ੍ਜੇਸ੍ਸਾਮੀ’’ਤਿ. ਰਾਜਾ ‘‘ਖਮਾਪੇਥ, ਭਨ੍ਤੇ, ਏਤ’’ਨ੍ਤਿ ਆਹ. ਇਤਰੋ ‘‘ਮਾਦਿਸੋ ਜਾਤਿਮਾ ਕਿਂ ਏਵਰੂਪਂ ਚਣ੍ਡਾਲਂ ਖਮਾਪੇਸ੍ਸਤਿ? ਨ ਖਮਾਪੇਮੀ’’ਤਿ.
ਅਥ ਨਂ ਮਨੁਸ੍ਸਾ ‘‘ਨ ਕਿਂ ਤ੍ਵਂ ਅਤ੍ਤਨੋ ਰੁਚਿਯਾ ਖਮਾਪੇਸ੍ਸਸੀ’’ਤਿ? ਵਤ੍ਵਾ ਹਤ੍ਥੇਸੁ ਚ ਪਾਦੇਸੁ ਚ ਗਹੇਤ੍ਵਾ ਪਾਦਮੂਲੇ ਨਿਪਜ੍ਜਾਪੇਤ੍ਵਾ ‘‘ਖਮਾਪੇਹੀ’’ਤਿ ਆਹਂਸੁ. ਸੋ ਨਿਸ੍ਸਦ੍ਦੋ ਨਿਪਜ੍ਜਿ. ਪੁਨਪਿ ਨਂ ‘‘ਖਮਾਪੇਹੀ’’ਤਿ ਆਹਂਸੁ. ਤਤੋ ‘‘ਖਮ ਮਯ੍ਹਂ, ਆਚਰਿਯਾ’’ਤਿ ਆਹ. ਮਹਾਪੁਰਿਸੋ ‘‘ਅਹਂ ਤਾਵ ਤੁਯ੍ਹਂ ਖਮਿਤ੍ਵਾ ਸੂਰਿਯਂ ਵਿਸ੍ਸਜ੍ਜੇਸ੍ਸਾਮਿ, ਸੂਰਿਯੇ ਪਨ ਉਗ੍ਗਤੇ ਤਵ ਸੀਸਂ ਸਤ੍ਤਧਾ ਫਲਿਸ੍ਸਤੀ’’ਤਿ ਵਤ੍ਵਾ, ‘‘ਇਮਸ੍ਸ ਸੀਸਪ੍ਪਮਾਣਂ ਮਤ੍ਤਿਕਾਪਿਣ੍ਡਂ ਮਤ੍ਥਕੇ ਠਪੇਤ੍ਵਾ ਏਤਂ ਨਦਿਯਾ ਗਲਪ੍ਪਮਾਣੇ ਉਦਕੇ ਠਪੇਥਾ’’ਤਿ ਆਹ. ਮਨੁਸ੍ਸਾ ਤਥਾ ਅਕਂਸੁ. ਏਤ੍ਤਾਵਤਾ ਸਰਟ੍ਠਕਂ ਰਾਜਬਲਂ ਸਨ੍ਨਿਪਤਿ. ਮਹਾਪੁਰਿਸੋ ਸੂਰਿਯਂ ਮੁਞ੍ਚਿ. ਸੂਰਿਯਰਸ੍ਮਿ ਆਗਨ੍ਤ੍ਵਾ ਮਤ੍ਤਿਕਾਪਿਣ੍ਡਂ ਪਹਰਿ. ਸੋ ਸਤ੍ਤਧਾ ਭਿਜ੍ਜਿ. ਤਾਵਦੇਵ ਸੋ ਨਿਮੁਜ੍ਜਿਤ੍ਵਾ ਏਕੇਨ ਤਿਤ੍ਥੇਨ ਉਤ੍ਤਰਿਤ੍ਵਾ ਪਲਾਯਿ. ਸਤ੍ਥਾ ਇਮਂ ਵਤ੍ਥੁਂ ਆਹਰਿਤ੍ਵਾ, ‘‘ਇਦਾਨਿ ਤਾਵ ਤ੍ਵਂ ਭਿਕ੍ਖੂਨਂ ਸਨ੍ਤਿਕੇ ਪਰਿਭਾਸਂ ਲਭਸਿ, ਪੁਬ੍ਬੇਪਿ ਇਮਂ ਕੋਧਂ ਨਿਸ੍ਸਾਯ ਰਟ੍ਠਤੋ ਪਬ੍ਬਾਜਿਤੋ’’ਤਿ ਅਨੁਸਨ੍ਧਿਂ ਘਟੇਤ੍ਵਾ ਅਥ ਨਂ ਓਵਦਨ੍ਤੋ ਨ ਖੋ ਤੇ ਤਂ ਤਿਸ੍ਸ ਪਤਿਰੂਪਨ੍ਤਿਆਦਿਮਾਹ. ਨਵਮਂ.
੧੦. ਥੇਰਨਾਮਕਸੁਤ੍ਤਵਣ੍ਣਨਾ
੨੪੪. ਦਸਮੇ ਵਣ੍ਣਵਾਦੀਤਿ ਆਨਿਸਂਸਵਾਦੀ. ਯਂ ਅਤੀਤਂ ਤਂ ਪਹੀਨਨ੍ਤਿ ਅਤੀਤੇ ਖਨ੍ਧਪਞ੍ਚਕੇ ਛਨ੍ਦਰਾਗਪ੍ਪਹਾਨੇਨ ਤਂ ਪਹੀਨਂ ਨਾਮ ਹੋਤਿ. ਅਨਾਗਤਨ੍ਤਿ ਅਨਾਗਤਮ੍ਪਿ ਖਨ੍ਧਪਞ੍ਚਕਂ ਤਤ੍ਥ ਛਨ੍ਦਰਾਗਪਟਿਨਿਸ੍ਸਗ੍ਗੇਨ ਪਟਿਨਿਸ੍ਸਟ੍ਠਂ ਨਾਮ ਹੋਤਿ. ਸਬ੍ਬਾਭਿਭੁਨ੍ਤਿ ਸਬ੍ਬਾ ਖਨ੍ਧਾਯਤਨਧਾਤੁਯੋ ਚ ਤਯੋ ਭਵੇ ਚ ਅਭਿਭਵਿਤ੍ਵਾ ਠਿਤਂ. ਸਬ੍ਬਵਿਦੁਨ੍ਤਿ ਤਂ ਵੁਤ੍ਤਪ੍ਪਕਾਰਂ ਸਬ੍ਬਂ ਵਿਦਿਤਂ ਪਾਕਟਂ ਕਤ੍ਵਾ ਠਿਤਂ. ਸਬ੍ਬੇਸੁ ਧਮ੍ਮੇਸੂਤਿ ਤੇਸ੍ਵੇਵ ਧਮ੍ਮੇਸੁ ਤਣ੍ਹਾਦਿਟ੍ਠਿਲੇਪੇਹਿ ਅਨੁਪਲਿਤ੍ਤਂ. ਸਬ੍ਬਞ੍ਜਹਨ੍ਤਿ ਤਦੇਵ ਸਬ੍ਬਂ ਤਤ੍ਥ ਛਨ੍ਦਰਾਗਪ੍ਪਹਾਨੇਨ ਜਹਿਤ੍ਵਾ ਠਿਤਂ. ਤਣ੍ਹਕ੍ਖਯੇ ਵਿਮੁਤ੍ਤਨ੍ਤਿ ਤਣ੍ਹਕ੍ਖਯਸਙ੍ਖਾਤੇ ਨਿਬ੍ਬਾਨੇ ਤਦਾਰਮ੍ਮਣਾਯ ਵਿਮੁਤ੍ਤਿਯਾ ਵਿਮੁਤ੍ਤਂ. ਦਸਮਂ.
੧੧. ਮਹਾਕਪ੍ਪਿਨਸੁਤ੍ਤਵਣ੍ਣਨਾ
੨੪੫. ਏਕਾਦਸਮੇ ਮਹਾਕਪ੍ਪਿਨੋਤਿ ਏਵਂਨਾਮਕੋ ਅਭਿਞ੍ਞਾਬਲਪ੍ਪਤ੍ਤੋ ਅਸੀਤਿਮਹਾਸਾਵਕਾਨਂ ਅਬ੍ਭਨ੍ਤਰੋ ਮਹਾਥੇਰੋ. ਸੋ ਕਿਰ ਗਿਹਿਕਾਲੇ ਕੁਕ੍ਕੁਟਵਤੀਨਗਰੇ ਤਿਯੋਜਨਸਤਿਕਂ ਰਜ੍ਜਂ ਅਕਾਸਿ. ਪਚ੍ਛਿਮਭਵਿਕਤ੍ਤਾ ਪਨ ਤਥਾਰੂਪਂ ਸਾਸਨਂ ਸੋਤੁਂ ਓਹਿਤਸੋਤੋ ਵਿਚਰਤਿ. ਅਥੇਕਦਿਵਸਂ ਅਮਚ੍ਚਸਹਸ੍ਸਪਰਿਵੁਤੋ ਉਯ੍ਯਾਨਕੀਲ਼ਿਕਂ ਅਗਮਾਸਿ. ਤਦਾ ਚ ਮਜ੍ਝਿਮਦੇਸਤੋ ਜਙ੍ਘਵਾਣਿਜਾ ਤਂ ਨਗਰਂ ਗਨ੍ਤ੍ਵਾ, ਭਣ੍ਡਂ ਪਟਿਸਾਮੇਤ੍ਵਾ, ‘‘ਰਾਜਾਨਂ ਪਸ੍ਸਿਸ੍ਸਾਮਾ’’ਤਿ ਪਣ੍ਣਾਕਾਰਹਤ੍ਥਾ ਰਾਜਕੁਲਦ੍ਵਾਰਂ ਗਨ੍ਤ੍ਵਾ, ‘‘ਰਾਜਾ ਉਯ੍ਯਾਨਂ ਗਤੋ’’ਤਿ ਸੁਤ੍ਵਾ, ਉਯ੍ਯਾਨਂ ਗਨ੍ਤ੍ਵਾ, ਦ੍ਵਾਰੇ ਠਿਤਾ, ਪਟਿਹਾਰਸ੍ਸ ਆਰੋਚਯਿਂਸੁ. ਅਥ ਰਞ੍ਞੋ ਨਿਵੇਦਿਤੇ ਰਾਜਾ ਪਕ੍ਕੋਸਾਪੇਤ੍ਵਾ ਨਿਯ੍ਯਾਤਿਤਪਣ੍ਣਾਕਾਰੇ ਵਨ੍ਦਿਤ੍ਵਾ ਠਿਤੇ, ‘‘ਤਾਤਾ, ਕੁਤੋ ਆਗਤਤ੍ਥਾ’’ਤਿ? ਪੁਚ੍ਛਿ. ‘‘ਸਾਵਤ੍ਥਿਤੋ ਦੇਵਾ’’ਤਿ. ‘‘ਕਚ੍ਚਿ ਵੋ ਰਟ੍ਠਂ ਸੁਭਿਕ੍ਖਂ, ਧਮ੍ਮਿਕੋ ਰਾਜਾ’’ਤਿ? ‘‘ਆਮ, ਦੇਵਾ’’ਤਿ. ‘‘ਅਤ੍ਥਿ ਪਨ ਤੁਮ੍ਹਾਕਂ ਦੇਸੇ ਕਿਞ੍ਚਿ ਸਾਸਨ’’ਨ੍ਤਿ? ‘‘ਅਤ੍ਥਿ, ਦੇਵ, ਨ ਪਨ ਸਕ੍ਕਾ ਉਚ੍ਛਿਟ੍ਠਮੁਖੇਹਿ ਕਥੇਤੁ’’ਨ੍ਤਿ. ਰਾਜਾ ਸੁਵਣ੍ਣਭਿਙ੍ਗਾਰੇਨ ਉਦਕਂ ਦਾਪੇਸਿ. ਤੇ ਮੁਖਂ ਵਿਕ੍ਖਾਲੇਤ੍ਵਾ ਦਸਬਲਾਭਿਮੁਖਾ ਅਞ੍ਜਲਿਂ ਪਗ੍ਗਣ੍ਹਿਤ੍ਵਾ, ‘‘ਦੇਵ, ਅਮ੍ਹਾਕਂ ਦੇਸੇ ਬੁਦ੍ਧਰਤਨਂ ਨਾਮ ਉਪ੍ਪਨ੍ਨ’’ਨ੍ਤਿ ਆਹਂਸੁ. ਰਞ੍ਞੋ ‘‘ਬੁਦ੍ਧੋ’’ਤਿ ਵਚਨੇ ਸੁਤਮਤ੍ਤੇ ਸਕਲਸਰੀਰਂ ਫਰਮਾਨਾ ਪੀਤਿ ਉਪ੍ਪਜ੍ਜਿ. ਤਤੋ ‘‘ਬੁਦ੍ਧੋਤਿ, ਤਾਤਾ, ਵਦਥਾ’’ਤਿ? ਆਹ. ‘‘ਬੁਦ੍ਧੋਤਿ ਦੇਵ ਵਦਾਮਾ’’ਤਿ. ਏਵਂ ਤਿਕ੍ਖਤ੍ਤੁਂ ਵਦਾਪੇਤ੍ਵਾ, ‘‘ਬੁਦ੍ਧੋਤਿ ਪਦਂ ਅਪਰਿਮਾਣਂ, ਨਾਸ੍ਸ ਸਕ੍ਕਾ ਪਰਿਮਾਣਂ ਕਾਤੁ’’ਨ੍ਤਿ ਤਸ੍ਮਿਂਯੇਵ ਪਸਨ੍ਨੋ ਸਤਸਹਸ੍ਸਂ ਦਤ੍ਵਾ ਪੁਨ ‘‘ਅਞ੍ਞਂ ਕਿਂ ਸਾਸਨ’’ਨ੍ਤਿ? ਪੁਚ੍ਛਿ. ‘‘ਦੇਵ ਧਮ੍ਮਰਤਨਂ ਨਾਮ ਉਪ੍ਪਨ੍ਨ’’ਨ੍ਤਿ. ਤਮ੍ਪਿ ਸੁਤ੍ਵਾ ਤਥੇਵ ਤਿਕ੍ਖਤ੍ਤੁਂ ਪਟਿਞ੍ਞਂ ਗਹੇਤ੍ਵਾ ਅਪਰਮ੍ਪਿ ਸਤਸਹਸ੍ਸਂ ਦਤ੍ਵਾ ਪੁਨ ‘‘ਅਞ੍ਞਂ ਕਿਂ ਸਾਸਨ’’ਨ੍ਤਿ? ਪੁਚ੍ਛਿ. ‘‘ਸਙ੍ਘਰਤਨਂ ਦੇਵ ਉਪ੍ਪਨ੍ਨ’’ਨ੍ਤਿ. ਤਮ੍ਪਿ ਸੁਤ੍ਵਾ ਤਥੇਵ ਤਿਕ੍ਖਤ੍ਤੁਂ ਪਟਿਞ੍ਞਂ ਗਹੇਤ੍ਵਾ ਅਪਰਮ੍ਪਿ ਸਤਸਹਸ੍ਸਂ ਦਤ੍ਵਾ ਦਿਨ੍ਨਭਾਵਂ ਪਣ੍ਣੇ ਲਿਖਿਤ੍ਵਾ, ‘‘ਤਾਤਾ, ਦੇਵਿਯਾ ਸਨ੍ਤਿਕਂ ਗਚ੍ਛਥਾ’’ਤਿ ਪੇਸੇਸਿ. ਤੇਸੁ ਗਤੇਸੁ ਅਮਚ੍ਚੇ ਪੁਚ੍ਛਿ, ‘‘ਤਾਤਾ, ਬੁਦ੍ਧੋ ਲੋਕੇ ਉਪ੍ਪਨ੍ਨੋ, ਤੁਮ੍ਹੇ ਕਿਂ ਕਰਿਸ੍ਸਥਾ’’ਤਿ? ‘‘ਦੇਵ ਤੁਮ੍ਹੇ ਕਿਂ ਕਤ੍ਤੁਕਾਮਾ’’ਤਿ? ‘‘ਅਹਂ ਪਬ੍ਬਜਿਸ੍ਸਾਮੀ’’ਤਿ. ‘‘ਮਯਮ੍ਪਿ ਪਬ੍ਬਜਿਸ੍ਸਾਮਾ’’ਤਿ. ਤੇ ਸਬ੍ਬੇਪਿ ਘਰਂ ਵਾ ਕੁਟੁਮ੍ਬਂ ਵਾ ਅਨਪਲੋਕੇਤ੍ਵਾ ਯੇ ਅਸ੍ਸੇ ਆਰੁਯ੍ਹ ਗਤਾ, ਤੇਹੇਵ ਨਿਕ੍ਖਮਿਂਸੁ.
ਵਾਣਿਜਾ ਅਨੋਜਾਦੇਵਿਯਾ ਸਨ੍ਤਿਕਂ ਗਨ੍ਤ੍ਵਾ ਪਣ੍ਣਂ ਦਸ੍ਸੇਸੁਂ. ਸਾ ਵਾਚੇਤ੍ਵਾ ‘‘ਰਞ੍ਞਾ ਤੁਮ੍ਹਾਕਂ ਬਹੂ ਕਹਾਪਣਾ ਦਿਨ੍ਨਾ, ਕਿਂ ਤੁਮ੍ਹੇਹਿ ਕਤਂ, ਤਾਤਾ’’ਤਿ? ਪੁਚ੍ਛਿ. ‘‘ਪਿਯਸਾਸਨਂ ਦੇਵਿ ਆਨੀਤ’’ਨ੍ਤਿ. ‘‘ਅਮ੍ਹੇਪਿ ਸਕ੍ਕਾ, ਤਾਤਾ, ਸੁਣਾਪੇਤੁ’’ਨ੍ਤਿ. ‘‘ਸਕ੍ਕਾ ਦੇਵਿ, ਉਚ੍ਛਿਟ੍ਠਮੁਖੇਹਿ ਪਨ ਵਤ੍ਤੁਂ ਨ ਸਕ੍ਕਾ’’ਤਿ. ਸਾ ਸੁਵਣ੍ਣਭਿਙ੍ਗਾਰੇਨ ਉਦਕਂ ਦਾਪੇਸਿ. ਤੇ ਮੁਖਂ ਵਿਕ੍ਖਾਲੇਤ੍ਵਾ ਰਞ੍ਞੋ ਆਰੋਚਿਤਨਯੇਨੇਵ ਆਰੋਚੇਸੁਂ. ਸਾਪਿ ਸੁਤ੍ਵਾ ਉਪ੍ਪਨ੍ਨਪਾਮੋਜ੍ਜਾ ਤੇਨੇਵ ਨਯੇਨ ਏਕੇਕਸ੍ਮਿਂ ਪਦੇ ਤਿਕ੍ਖਤ੍ਤੁਂ ਪਟਿਞ੍ਞਂ ਗਹੇਤ੍ਵਾ ਪਟਿਞ੍ਞਾਗਣਨਾਯ ਤੀਣਿ ਤੀਣਿ ਕਤ੍ਵਾ ਨਵਸਤਸਹਸ੍ਸਾਨਿ ਅਦਾਸਿ. ਵਾਣਿਜਾ ਸਬ੍ਬਾਨਿਪਿ ਦ੍ਵਾਦਸਸਤਸਹਸ੍ਸਾਨਿ ਲਭਿਂਸੁ. ਅਥ ਨੇ ‘‘ਰਾਜਾ ਕਹਂ, ਤਾਤਾ’’ਤਿ, ਪੁਚ੍ਛਿ. ‘‘ਪਬ੍ਬਜਿਸ੍ਸਾਮੀਤਿ ਨਿਕ੍ਖਨ੍ਤੋ ਦੇਵੀ’’ਤਿ. ‘‘ਤੇਨ ਹਿ, ਤਾਤਾ, ਤੁਮ੍ਹੇ ਗਚ੍ਛਥਾ’’ਤਿ ਤੇ ਉਯ੍ਯੋਜੇਤ੍ਵਾ ਰਞ੍ਞਾ ਸਦ੍ਧਿਂ ਗਤਾਨਂ ਅਮਚ੍ਚਾਨਂ ਮਾਤੁਗਾਮੇ ਪਕ੍ਕੋਸਾਪੇਤ੍ਵਾ, ‘‘ਤੁਮ੍ਹੇ ਅਤ੍ਤਨੋ ਸਾਮਿਕਾਨਂ ਗਤਟ੍ਠਾਨਂ ਜਾਨਾਥ ਅਮ੍ਮਾ’’ਤਿ ਪੁਚ੍ਛਿ. ‘‘ਜਾਨਾਮ ਅਯ੍ਯੇ, ਰਞ੍ਞਾ ਸਦ੍ਧਿਂ ਉਯ੍ਯਾਨਕੀਲ਼ਿਕਂ ਗਤਾ’’ਤਿ. ਆਮ ਗਤਾ, ਤਤ੍ਥ ਪਨ ਗਨ੍ਤ੍ਵਾ, ‘‘ਬੁਦ੍ਧੋ ਉਪ੍ਪਨ੍ਨੋ, ਧਮ੍ਮੋ ਉਪ੍ਪਨ੍ਨੋ, ਸਙ੍ਘੋ ਉਪ੍ਪਨ੍ਨੋ’’ਤਿ ਸੁਤ੍ਵਾ, ‘‘ਦਸਬਲਸ੍ਸ ਸਨ੍ਤਿਕੇ ਪਬ੍ਬਜਿਸ੍ਸਾਮਾ’’ਤਿ ਗਤਾ. ‘‘ਤੁਮ੍ਹੇ ਕਿਂ ਕਰਿਸ੍ਸਥਾ’’ਤਿ? ‘‘ਤੁਮ੍ਹੇ ਪਨ ਅਯ੍ਯੇ ਕਿਂ ਕਤ੍ਤੁਕਾਮਾ’’ਤਿ? ‘‘ਅਹਂ ਪਬ੍ਬਜਿਸ੍ਸਾਮਿ, ਨ ਤੇਹਿ ਵਨ੍ਤਵਮਨਂ ਜਿਵ੍ਹਗ੍ਗੇ ਠਪੇਯ੍ਯ’’ਨ੍ਤਿ. ‘‘ਯਦਿ ਏਵਂ, ਮਯਮ੍ਪਿ ਪਬ੍ਬਜਿਸ੍ਸਾਮਾ’’ਤਿ ਸਬ੍ਬਾ ਰਥੇ ਯੋਜਾਪੇਤ੍ਵਾ ਨਿਕ੍ਖਮਿਂਸੁ.
ਰਾਜਾਪਿ ਅਮਚ੍ਚਸਹਸ੍ਸੇਨ ਸਦ੍ਧਿਂ ਗਙ੍ਗਾਯ ਤੀਰਂ ਪਾਪੁਣਿ. ਤਸ੍ਮਿਞ੍ਚ ਸਮਯੇ ਗਙ੍ਗਾ ਪੂਰਾ ਹੋਤਿ. ਅਥ ਨਂ ਦਿਸ੍ਵਾ, ‘‘ਅਯਂ ਗਙ੍ਗਾ ਪੂਰਾ ਚਣ੍ਡਮਚ੍ਛਾਕਿਣ੍ਣਾ, ਅਮ੍ਹੇਹਿ ਸਦ੍ਧਿਂ ਆਗਤਾ ਦਾਸਾ ਵਾ ਮਨੁਸ੍ਸਾ ਵਾ ਨਤ੍ਥਿ, ਯੇ ਨੋ ਨਾਵਂ ਵਾ ਉਲ਼ੁਮ੍ਪਂ ਵਾ ਕਤ੍ਵਾ ਦਦੇਯ੍ਯੁਂ, ਏਤਸ੍ਸ ਪਨ ਸਤ੍ਥੁ ਗੁਣਾ ਨਾਮ ਹੇਟ੍ਠਾ ਅਵੀਚਿਤੋ ਉਪਰਿ ਯਾਵ ਭਵਗ੍ਗਾ ਪਤ੍ਥਟਾ, ਸਚੇ ਏਸ ਸਤ੍ਥਾ ਸਮ੍ਮਾਸਮ੍ਬੁਦ੍ਧੋ, ਇਮੇਸਂ ਅਸ੍ਸਾਨਂ ਖੁਰਪਿਟ੍ਠਾਨਿ ਮਾ ਤੇਮੇਨ੍ਤੂ’’ਤਿ ਉਦਕਪਿਟ੍ਠੇਨ ਅਸ੍ਸੇ ਪਕ੍ਖਨ੍ਦਾਪੇਸੁਂ. ਏਕਅਸ੍ਸਸ੍ਸਾਪਿ ਖੁਰਪਿਟ੍ਠਮਤ੍ਤਂ ਨ ਤੇਮਿ, ਰਾਜਮਗ੍ਗੇਨ ਗਚ੍ਛਨ੍ਤਾ ਵਿਯ ਪਰਤੀਰਂ ਪਤ੍ਵਾ ਪੁਰਤੋ ਅਞ੍ਞਂ ਮਹਾਨਦਿਂ ਪਾਪੁਣਿਂਸੁ. ਤਤ੍ਥ ਅਞ੍ਞਾ ਸਚ੍ਚਕਿਰਿਯਾ ਨਤ੍ਥਿ, ਤਾਯ ਏਵ ਸਚ੍ਚਕਿਰਿਯਾਯ ਤਮ੍ਪਿ ਅਡ੍ਢਯੋਜਨਵਿਤ੍ਥਾਰਂ ਨਦਿਂ ਅਤਿਕ੍ਕਮਿਂਸੁ. ਅਥ ਤਤਿਯਂ ਚਨ੍ਦਭਾਗਂ ਨਾਮ ਮਹਾਨਦਿਂ ਪਤ੍ਵਾ ਤਮ੍ਪਿ ਤਾਯ ਏਵ ਸਚ੍ਚਕਿਰਿਯਾਯ ਅਤਿਕ੍ਕਮਿਂਸੁ.
ਸਤ੍ਥਾਪਿ ਤਂਦਿਵਸਂ ਪਚ੍ਚੂਸਸਮਯੇ ਮਹਾਕਰੁਣਾਸਮਾਪਤ੍ਤਿਤੋ ਵੁਟ੍ਠਾਯ ਲੋਕਂ ਓਲੋਕੇਨ੍ਤੋ ‘‘ਅਜ੍ਜ ਮਹਾਕਪ੍ਪਿਨੋ ਤਿਯੋਜਨਸਤਿਕਂ ਰਜ੍ਜਂ ਪਹਾਯ ਅਮਚ੍ਚਸਹਸ੍ਸਪਰਿਵਾਰੋ ਮਮ ਸਨ੍ਤਿਕੇ ਪਬ੍ਬਜਿਤੁਂ ਆਗਚ੍ਛਤੀ’’ਤਿ ਦਿਸ੍ਵਾ, ‘‘ਮਯਾ ਤੇਸਂ ਪਚ੍ਚੁਗ੍ਗਮਨਂ ਕਾਤੁਂ ਯੁਤ੍ਤ’’ਨ੍ਤਿ ਪਾਤੋਵ ਸਰੀਰਪਟਿਜਗ੍ਗਨਂ ਕਤ੍ਵਾ, ਭਿਕ੍ਖੁਸਙ੍ਘਪਰਿਵਾਰੋ ਸਾਵਤ੍ਥਿਯਂ ਪਿਣ੍ਡਾਯ ਚਰਿਤ੍ਵਾ, ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤੋ ਸਯਮੇਵ ਪਤ੍ਤਚੀਵਰਂ ਗਹੇਤ੍ਵਾ, ਆਕਾਸੇ ਉਪ੍ਪਤਿਤ੍ਵਾ ਚਨ੍ਦਭਾਗਾਯ ਨਦਿਯਾ ਤੀਰੇ ਤੇਸਂ ਉਤ੍ਤਰਣਤਿਤ੍ਥਸ੍ਸ ਅਭਿਮੁਖੇ ਠਾਨੇ ਮਹਾਨਿਗ੍ਰੋਧਰੁਕ੍ਖੋ ਅਤ੍ਥਿ, ਤਤ੍ਥ ਪਲ੍ਲਙ੍ਕੇਨ ਨਿਸੀਦਿਤ੍ਵਾ ਪਰਿਮੁਖਂ ਸਤਿਂ ਉਪਟ੍ਠਪੇਤ੍ਵਾ ਛਬ੍ਬਣ੍ਣਬੁਦ੍ਧਰਸ੍ਮਿਯੋ ਵਿਸ੍ਸਜ੍ਜੇਸਿ. ਤੇ ਤੇਨ ਤਿਤ੍ਥੇਨ ਉਤ੍ਤਰਨ੍ਤਾ ਚ ਛਬ੍ਬਣ੍ਣਬੁਦ੍ਧਰਸ੍ਮਿਯੋ ਇਤੋ ਚਿਤੋ ਚ ਵਿਧਾਵਨ੍ਤਿਯੋ ਓਲੋਕੇਨ੍ਤਾ ਦਸਬਲਸ੍ਸ ਪੁਣ੍ਣਚਨ੍ਦਸਸ੍ਸਿਰਿਕਂ ਮੁਖਂ ਦਿਸ੍ਵਾ, ‘‘ਯਂ ਸਤ੍ਥਾਰਂ ਉਦ੍ਦਿਸ੍ਸ ਮਯਂ ਪਬ੍ਬਜਿਤਾ, ਅਦ੍ਧਾ ਸੋ ਏਸੋ’’ਤਿ ਦਸ੍ਸਨੇਨੇਵ ਨਿਟ੍ਠਂ ਗਨ੍ਤ੍ਵਾ ਦਿਟ੍ਠਟ੍ਠਾਨਤੋ ਪਟ੍ਠਾਯ ਓਨਤਾ ਵਨ੍ਦਮਾਨਾ ਆਗਮ੍ਮ ਸਤ੍ਥਾਰਂ ਵਨ੍ਦਿਂਸੁ. ਰਾਜਾ ਗੋਪ੍ਫਕੇਸੁ ਗਹੇਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ ਸਦ੍ਧਿਂ ਅਮਚ੍ਚਸਹਸ੍ਸੇਨ. ਸਤ੍ਥਾ ਤੇਸਂ ਧਮ੍ਮਂ ਕਥੇਸਿ. ਦੇਸਨਾਪਰਿਯੋਸਾਨੇ ਸਬ੍ਬੇ ਅਰਹਤ੍ਤੇ ਪਤਿਟ੍ਠਾਯ ਸਤ੍ਥਾਰਂ ਪਬ੍ਬਜ੍ਜਂ ਯਾਚਿਂਸੁ. ਸਤ੍ਥਾ ‘‘ਪੁਬ੍ਬੇ ਇਮੇ ਚੀਵਰਦਾਨਸ੍ਸ ਦਿਨ੍ਨਤ੍ਤਾ ਅਤ੍ਤਨੋ ਚੀਵਰਾਨਿ ਗਹੇਤ੍ਵਾਵ ਆਗਤਾ’’ਤਿ ਸੁਵਣ੍ਣਵਣ੍ਣਂ ਹਤ੍ਥਂ ਪਸਾਰੇਤ੍ਵਾ, ‘‘ਏਥ ਭਿਕ੍ਖਵੋ ਸ੍ਵਾਕ੍ਖਾਤੋ ਧਮ੍ਮੋ, ਚਰਥ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ ਆਹ. ਸਾਵ ਤੇਸਂ ਆਯਸ੍ਮਨ੍ਤਾਨਂ ਪਬ੍ਬਜ੍ਜਾ ਚ ਉਪਸਮ੍ਪਦਾ ਚ ਅਹੋਸਿ, ਵਸ੍ਸਸਟ੍ਠਿਕਤ੍ਥੇਰਾ ਵਿਯ ਸਤ੍ਥਾਰਂ ਪਰਿਵਾਰਯਿਂਸੁ.
ਅਨੋਜਾਪਿ ਦੇਵੀ ਰਥਸਹਸ੍ਸਪਰਿਵਾਰਾ ਗਙ੍ਗਾਤੀਰਂ ਪਤ੍ਵਾ ਰਞ੍ਞੋ ਅਤ੍ਥਾਯ ਆਭਤਂ ਨਾਵਂ ਵਾ ਉਲ਼ੁਮ੍ਪਂ ਵਾ ਅਦਿਸ੍ਵਾ ਅਤ੍ਤਨੋ ਬ੍ਯਤ੍ਤਤਾਯ ਚਿਨ੍ਤੇਸਿ – ‘‘ਰਾਜਾ ਸਚ੍ਚਕਿਰਿਯਂ ਕਤ੍ਵਾ ਗਤੋ ਭਵਿਸ੍ਸਤਿ, ਸੋ ਪਨ ਸਤ੍ਥਾ ਨ ਕੇਵਲਂ ਤੇਸਂਯੇਵ ਅਤ੍ਥਾਯ ਨਿਬ੍ਬਤ੍ਤੋ, ਸਚੇ ਸੋ ਸਤ੍ਥਾ ਸਮ੍ਮਾਸਮ੍ਬੁਦ੍ਧੋ, ਅਮ੍ਹਾਕਂ ਰਥਾ ਮਾ ਉਦਕੇ ਨਿਮੁਜ੍ਜਿਂਸੂ’’ਤਿ ਉਦਕਪਿਟ੍ਠੇ ਰਥੇ ਪਕ੍ਖਨ੍ਦਾਪੇਸਿ. ਰਥਾਨਂ ਨੇਮਿਵਟ੍ਟਿਮਤ੍ਤਮ੍ਪਿ ਨ ਤੇਮਿ. ਦੁਤਿਯਤਤਿਯਨਦੀਪਿ ਤੇਨੇਵ ਸਚ੍ਚਕਾਰੇਨ ਉਤ੍ਤਰਮਾਨਾਯੇਵ ਨਿਗ੍ਰੋਧਰੁਕ੍ਖਮੂਲੇ ਸਤ੍ਥਾਰਂ ਅਦ੍ਦਸ. ਸਤ੍ਥਾ ‘‘ਇਮਾਸਂ ਅਤ੍ਤਨੋ ਸਾਮਿਕੇ ਪਸ੍ਸਨ੍ਤੀਨਂ ਛਨ੍ਦਰਾਗੋ ਉਪ੍ਪਜ੍ਜਿਤ੍ਵਾ ਮਗ੍ਗਫਲਾਨਂ ਅਨ੍ਤਰਾਯਂ ਕਰੇਯ੍ਯ, ਸੋ ਏਵਂ ਕਾਤੁਂ ਨ ਸਕ੍ਖਿਸ੍ਸਤੀ’’ਤਿ ਯਥਾ ਅਞ੍ਞਮਞ੍ਞੇ ਨ ਪਸ੍ਸਨ੍ਤਿ, ਤਥਾ ਅਕਾਸਿ. ਤਾ ਸਬ੍ਬਾਪਿ ਤਿਤ੍ਥਤੋ ਉਤ੍ਤਰਿਤ੍ਵਾ ਦਸਬਲਂ ਵਨ੍ਦਿਤ੍ਵਾ ਨਿਸੀਦਿਂਸੁ. ਸਤ੍ਥਾ ਤਾਸਂ ਧਮ੍ਮਂ ਕਥੇਸਿ, ਦੇਸਨਾਪਰਿਯੋਸਾਨੇ ਸਬ੍ਬਾਪਿ ਸੋਤਾਪਤ੍ਤਿਫਲੇ ਪਤਿਟ੍ਠਾਯ ਅਞ੍ਞਮਞ੍ਞੇ ਪਸ੍ਸਿਂਸੁ. ਸਤ੍ਥਾ ‘‘ਉਪ੍ਪਲਵਣ੍ਣਾ ਆਗਚ੍ਛਤੂ’’ਤਿ ਚਿਨ੍ਤੇਸਿ. ਥੇਰੀ ਆਗਨ੍ਤ੍ਵਾ ਸਬ੍ਬਾ ਪਬ੍ਬਾਜੇਤ੍ਵਾ ਆਦਾਯ ਭਿਕ੍ਖੁਨੀਨਂ ਉਪਸ੍ਸਯਂ ਗਤਾ. ਸਤ੍ਥਾ ਭਿਕ੍ਖੁਸਹਸ੍ਸਂ ਗਹੇਤ੍ਵਾ ਆਕਾਸੇਨ ਜੇਤਵਨਂ ਅਗਮਾਸਿ. ਇਮਂ ਸਨ੍ਧਾਯੇਤਂ ਵੁਤ੍ਤਂ – ‘‘ਮਹਾਕਪ੍ਪਿਨੋਤਿ ਏਵਂ ਨਾਮਕੋ ਅਭਿਞ੍ਞਾਬਲਪ੍ਪਤ੍ਤੋ ਅਸੀਤਿਮਹਾਸਾਵਕਾਨਂ ਅਬ੍ਭਨ੍ਤਰੋ ਮਹਾਥੇਰੋ’’ਤਿ.
ਜਨੇਤਸ੍ਮਿਨ੍ਤਿ ਜਨਿਤੇ ਪਜਾਯਾਤਿ ਅਤ੍ਥੋ. ਯੇ ਗੋਤ੍ਤਪਟਿਸਾਰਿਨੋਤਿ ਯੇ ‘‘ਮਯਂ ਵਾਸੇਟ੍ਠਾ ਗੋਤਮਾ’’ਤਿ ਗੋਤ੍ਤਂ ਪਟਿਸਰਨ੍ਤਿ ਪਟਿਜਾਨਨ੍ਤਿ, ਤੇਸਂ ਖਤ੍ਤਿਯੋ ਸੇਟ੍ਠੋਤਿ ਅਤ੍ਥੋ. ਵਿਜ੍ਜਾਚਰਣਸਮ੍ਪਨ੍ਨੋਤਿ ਅਟ੍ਠਹਿ ਵਿਜ੍ਜਾਹਿ ਚੇਵ ਪਨ੍ਨਰਸਧਮ੍ਮਭੇਦੇਨ ਚਰਣੇਨ ਚ ਸਮਨ੍ਨਾਗਤੋ. ਤਪਤੀਤਿ ਵਿਰੋਚਤਿ. ਝਾਯੀ ਤਪਤਿ ਬ੍ਰਾਹ੍ਮਣੋਤਿ ਖੀਣਾਸਵਬ੍ਰਾਹ੍ਮਣੋ ਦੁਵਿਧੇਨ ਝਾਨੇਨ ਝਾਯਮਾਨੋ ਤਪਤਿ ਵਿਰੋਚਤਿ. ਤਸ੍ਮਿਂ ਪਨ ਖਣੇ ਕਾਲੁਦਾਯਿਤ੍ਥੇਰੋ ਦੁਵਿਧੇਨ ਝਾਨੇਨ ਝਾਯਮਾਨੋ ਅਵਿਦੂਰੇ ਨਿਸਿਨ੍ਨੋ ਹੋਤਿ. ਬੁਦ੍ਧੋ ਤਪਤੀਤਿ ਸਬ੍ਬਞ੍ਞੁਬੁਦ੍ਧੋ ਵਿਰੋਚਤਿ. ਸਬ੍ਬਮਙ੍ਗਲਗਾਥਾ ਕਿਰੇਸਾ. ਭਾਤਿਕਰਾਜਾ ਕਿਰ ਏਕਂ ਪੂਜਂ ਕਾਰੇਤ੍ਵਾ ਆਚਰਿਯਕਂ ਆਹ – ‘‘ਤੀਹਿ ਰਤਨੇਹਿ ਅਮੁਤ੍ਤਂ ਏਕਂ ਜਯਮਙ੍ਗਲਂ ਵਦਥਾ’’ਤਿ. ਸੋ ਤੇਪਿਟਕਂ ਬੁਦ੍ਧਵਚਨਂ ਸਮ੍ਮਸਿਤ੍ਵਾ ਇਮਂ ਗਾਥਂ ਵਦਨ੍ਤੋ ‘‘ਦਿਵਾ ਤਪਤਿ ਆਦਿਚ੍ਚੋ’’ਤਿ ਵਤ੍ਵਾ ਅਤ੍ਥਙ੍ਗਮੇਨ੍ਤਸ੍ਸ ਸੂਰਿਯਸ੍ਸ ਅਞ੍ਜਲਿਂ ਪਗ੍ਗਣ੍ਹਿ. ‘‘ਰਤ੍ਤਿਮਾਭਾਤਿ ਚਨ੍ਦਿਮਾ’’ਤਿ, ਉਟ੍ਠਹਨ੍ਤਸ੍ਸ ਚਨ੍ਦਸ੍ਸ ਅਞ੍ਜਲਿਂ ਪਗ੍ਗਣ੍ਹਿ. ‘‘ਸਨ੍ਨਦ੍ਧੋ ਖਤ੍ਤਿਯੋ ਤਪਤੀ’’ਤਿ ਰਞ੍ਞੋ ਅਞ੍ਜਲਿਂ ਪਗ੍ਗਣ੍ਹਿ. ‘‘ਝਾਯੀ ਤਪਤਿ ਬ੍ਰਾਹ੍ਮਣੋ’’ਤਿ ਭਿਕ੍ਖੁਸਙ੍ਘਸ੍ਸ ਅਞ੍ਜਲਿਂ ਪਗ੍ਗਣ੍ਹਿ. ‘‘ਬੁਦ੍ਧੋ ਤਪਤਿ ਤੇਜਸਾ’’ਤਿ ਵਤ੍ਵਾ ਪਨ ਮਹਾਚੇਤਿਯਸ੍ਸ ਅਞ੍ਜਲਿਂ ਪਗ੍ਗਣ੍ਹਿ. ਅਥ ਨਂ ਰਾਜਾ ‘‘ਮਾ ਹਤ੍ਥਂ ਓਤਾਰੇਹੀ’’ਤਿ ਉਕ੍ਖਿਤ੍ਤਸ੍ਮਿਂਯੇਵ ਹਤ੍ਥੇ ਸਹਸ੍ਸਂ ਠਪੇਸਿ. ਏਕਾਦਸਮਂ.
੧੨. ਸਹਾਯਕਸੁਤ੍ਤਵਣ੍ਣਨਾ
੨੪੬. ਦ੍ਵਾਦਸਮੇ ਚਿਰਰਤ੍ਤਂਸਮੇਤਿਕਾਤਿ ਦੀਘਰਤ੍ਤਂ ਸਂਸਨ੍ਦਿਤ੍ਵਾ ਸਮੇਤ੍ਵਾ ਠਿਤਲਦ੍ਧਿਨੋ. ਤੇ ਕਿਰ ਪਞ੍ਚਜਾਤਿਸਤਾਨਿ ਏਕਤੋਵ ਵਿਚਰਿਂਸੁ. ਸਮੇਤਿ ਨੇਸਂ ਸਦ੍ਧਮ੍ਮੋਤਿ ਇਦਾਨਿ ਇਮੇਸਂ ਅਯਂ ਸਾਸਨਧਮ੍ਮੋ ਸਂਸਨ੍ਦਤਿ ਸਮੇਤਿ. ਧਮ੍ਮੇ ਬੁਦ੍ਧਪ੍ਪਵੇਦਿਤੇਤਿ ਬੁਦ੍ਧੇਨ ਪਵੇਦਿਤੇ ਧਮ੍ਮੇ ਏਤੇਸਂ ਸਾਸਨਧਮ੍ਮੋ ਸੋਭਤੀਤਿ ਅਤ੍ਥੋ. ਸੁਵਿਨੀਤਾ ਕਪ੍ਪਿਨੇਨਾਤਿ ਅਤ੍ਤਨੋ ਉਪਜ੍ਝਾਯੇਨ ਅਰਿਯਪ੍ਪਵੇਦਿਤੇ ਧਮ੍ਮੇ ਸੁਟ੍ਠੁ ਵਿਨੀਤਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ. ਦ੍ਵਾਦਸਮਂ.
ਭਿਕ੍ਖੁਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.
ਇਤਿ ਸਾਰਤ੍ਥਪ੍ਪਕਾਸਿਨਿਯਾ ਸਂਯੁਤ੍ਤਨਿਕਾਯ-ਅਟ੍ਠਕਥਾਯ
ਨਿਦਾਨਵਗ੍ਗਵਣ੍ਣਨਾ ਨਿਟ੍ਠਿਤਾ.