੮. ਲਕ੍ਖਣਸਂਯੁਤ੍ਤਂ

੧. ਪਠਮਵਗ੍ਗੋ

੧. ਅਟ੍ਠਿਸੁਤ੍ਤਵਣ੍ਣਨਾ

੨੦੨. ਲਕ੍ਖਣਸਂਯੁਤ੍ਤੇ ਯ੍ਵਾਯਂ ਆਯਸ੍ਮਾ ਚ ਲਕ੍ਖਣੋਤਿ ਲਕ੍ਖਣਤ੍ਥੇਰੋ ਵੁਤ੍ਤੋ, ਏਸ ਜਟਿਲਸਹਸ੍ਸਬ੍ਭਨ੍ਤਰੇ ਏਹਿਭਿਕ੍ਖੂਪਸਮ੍ਪਦਾਯ ਉਪਸਮ੍ਪਨ੍ਨੋ ਆਦਿਤ੍ਤਪਰਿਯਾਯਾਵਸਾਨੇ ਅਰਹਤ੍ਤਂ ਪਤ੍ਤੋ ਏਕੋ ਮਹਾਸਾਵਕੋਤਿ ਵੇਦਿਤਬ੍ਬੋ. ਯਸ੍ਮਾ ਪਨੇਸ ਲਕ੍ਖਣਸਮ੍ਪਨ੍ਨੇਨ ਸਬ੍ਬਾਕਾਰਪਰਿਪੂਰੇਨ ਬ੍ਰਹ੍ਮਸਮੇਨ ਅਤ੍ਤਭਾਵੇਨ ਸਮਨ੍ਨਾਗਤੋ, ਤਸ੍ਮਾ ‘‘ਲਕ੍ਖਣੋ’’ਤਿ ਸਙ੍ਖਂ ਗਤੋ. ਮਹਾਮੋਗ੍ਗਲ੍ਲਾਨੋ ਪਨ ਪਬ੍ਬਜਿਤਦਿਵਸਤੋ ਸਤ੍ਤਮੇ ਦਿਵਸੇ ਅਰਹਤ੍ਤਂ ਪਤ੍ਤੋ ਦੁਤਿਯੋ ਅਗ੍ਗਸਾਵਕੋ.

ਸਿਤਂ ਪਾਤ੍ਵਾਕਾਸੀਤਿ ਮਨ੍ਦਹਸਿਤਂ ਪਾਤੁਅਕਾਸਿ, ਪਕਾਸਯਿ ਦਸ੍ਸੇਸੀਤਿ ਵੁਤ੍ਤਂ ਹੋਤਿ. ਕਿਂ ਪਨ ਦਿਸ੍ਵਾ ਥੇਰੋ ਸਿਤਂ ਪਾਤ੍ਵਾਕਾਸੀਤਿ? ਉਪਰਿ ਪਾਲ਼ਿਯਂ ਆਗਤਂ ਅਟ੍ਠਿਕਸਙ੍ਖਲਿਕਂ ਏਕਂ ਪੇਤਲੋਕੇ ਨਿਬ੍ਬਤ੍ਤਂ ਸਤ੍ਤਂ ਦਿਸ੍ਵਾ. ਤਞ੍ਚ ਖੋ ਦਿਬ੍ਬੇਨ ਚਕ੍ਖੁਨਾ, ਨ ਪਸਾਦਚਕ੍ਖੁਨਾ. ਪਸਾਦਚਕ੍ਖੁਸ੍ਸ ਹਿ ਏਤੇ ਅਤ੍ਤਭਾਵਾ ਨ ਆਪਾਥਂ ਆਗਚ੍ਛਨ੍ਤਿ. ਏਵਰੂਪਂ ਪਨ ਅਤ੍ਤਭਾਵਂ ਦਿਸ੍ਵਾ ਕਾਰੁਞ੍ਞੇ ਕਤ੍ਤਬ੍ਬੇ ਕਸ੍ਮਾ ਸਿਤਂ ਪਾਤ੍ਵਾਕਾਸੀਤਿ? ਅਤ੍ਤਨੋ ਚ ਬੁਦ੍ਧਞਾਣਸ੍ਸ ਚ ਸਮ੍ਪਤ੍ਤਿਂ ਸਮਨੁਸ੍ਸਰਣਤੋ. ਤਞ੍ਹਿ ਦਿਸ੍ਵਾ ਥੇਰੋ ‘‘ਅਦਿਟ੍ਠਸਚ੍ਚੇਨ ਨਾਮ ਪੁਗ੍ਗਲੇਨ ਪਟਿਲਭਿਤਬ੍ਬਾ ਏਵਰੂਪਾ ਅਤ੍ਤਭਾਵਾ ਮੁਤ੍ਤੋ ਅਹਂ, ਲਾਭਾ ਵਤ ਮੇ, ਸੁਲਦ੍ਧਂ ਵਤ ਮੇ’’ਤਿ ਅਤ੍ਤਨੋ ਚ ਸਮ੍ਪਤ੍ਤਿਂ ਅਨੁਸ੍ਸਰਿਤ੍ਵਾ – ‘‘ਅਹੋ ਬੁਦ੍ਧਸ੍ਸ ਭਗਵਤੋ ਞਾਣਸਮ੍ਪਤ੍ਤਿ, ‘ਯੋ ਕਮ੍ਮਵਿਪਾਕੋ, ਭਿਕ੍ਖਵੇ, ਅਚਿਨ੍ਤੇਯ੍ਯੋ ਨ ਚਿਨ੍ਤੇਤਬ੍ਬੋ’ਤਿ ਦੇਸੇਸਿ, ਪਚ੍ਚਕ੍ਖਂ ਵਤ ਕਤ੍ਵਾ ਬੁਦ੍ਧਾ ਦੇਸੇਨ੍ਤਿ, ਸੁਪ੍ਪਟਿਵਿਦ੍ਧਾ ਬੁਦ੍ਧਾਨਂ ਧਮ੍ਮਧਾਤੂ’’ਤਿ ਏਵਂ ਬੁਦ੍ਧਞਾਣਸਮ੍ਪਤ੍ਤਿਞ੍ਚ ਅਨੁਸ੍ਸਰਿਤ੍ਵਾ ਸਿਤਂ ਪਾਤ੍ਵਾਕਾਸੀਤਿ.

ਅਥ ਲਕ੍ਖਣਤ੍ਥੇਰੋ ਕਸ੍ਮਾ ਨ ਅਦ੍ਦਸ, ਕਿਮਸ੍ਸ ਦਿਬ੍ਬਚਕ੍ਖੁ ਨਤ੍ਥੀਤਿ? ਨੋ ਨਤ੍ਥਿ, ਮਹਾਮੋਗ੍ਗਲ੍ਲਾਨੋ ਪਨ ਆਵਜ੍ਜੇਨ੍ਤੋ ਅਦ੍ਦਸ, ਇਤਰੋ ਪਨ ਅਨਾਵਜ੍ਜਨੇਨ ਨ ਅਦ੍ਦਸ. ਯਸ੍ਮਾ ਪਨ ਖੀਣਾਸਵਾ ਨਾਮ ਨ ਅਕਾਰਣਾ ਸਿਤਂ ਕਰੋਨ੍ਤਿ, ਤਸ੍ਮਾ ਤਂ ਲਕ੍ਖਣਤ੍ਥੇਰੋ ਪੁਚ੍ਛਿ ਕੋ ਨੁ ਖੋ, ਆਵੁਸੋ ਮੋਗ੍ਗਲ੍ਲਾਨ, ਹੇਤੁ, ਕੋ ਪਚ੍ਚਯੋ ਸਿਤਸ੍ਸ ਪਾਤੁਕਮ੍ਮਾਯਾਤਿ? ਥੇਰੋ ਪਨ ਯਸ੍ਮਾ ਯੇਹਿ ਅਯਂ ਉਪਪਤ੍ਤਿ ਸਾਮਂ ਅਦਿਟ੍ਠਾ, ਤੇ ਦੁਸ੍ਸਦ੍ਧਾਪਯਾ ਹੋਨ੍ਤਿ, ਤਸ੍ਮਾ ਭਗਵਨ੍ਤਂ ਸਕ੍ਖਿਂ ਕਤ੍ਵਾ ਬ੍ਯਾਕਾਤੁਕਾਮਤਾਯ ਅਕਾਲੋ ਖੋ, ਆਵੁਸੋਤਿਆਦਿਮਾਹ. ਤਤੋ ਭਗਵਤੋ ਸਨ੍ਤਿਕੇ ਪੁਟ੍ਠੋ ਇਧਾਹਂ, ਆਵੁਸੋਤਿਆਦਿਨਾ ਨਯੇਨ ਬ੍ਯਾਕਾਸਿ.

ਤਤ੍ਥ ਅਟ੍ਠਿਕਸਙ੍ਖਲਿਕਨ੍ਤਿ ਸੇਤਂ ਨਿਮ੍ਮਂਸਲੋਹਿਤਂ ਅਟ੍ਠਿਸਙ੍ਘਾਤਂ. ਗਿਜ੍ਝਾਪਿ ਕਾਕਾਪਿ ਕੁਲਲਾਪੀਤਿ ਏਤੇਪਿ ਯਕ੍ਖਗਿਜ੍ਝਾ ਚੇਵ ਯਕ੍ਖਕਾਕਾ ਚ ਯਕ੍ਖਕੁਲਲਾ ਚ ਪਚ੍ਚੇਤਬ੍ਬਾ. ਪਾਕਤਿਕਾਨਂ ਪਨ ਗਿਜ੍ਝਾਦੀਨਂ ਆਪਾਥਮ੍ਪਿ ਏਤਂ ਰੂਪਂ ਨਾਗਚ੍ਛਤਿ. ਅਨੁਪਤਿਤ੍ਵਾ ਅਨੁਪਤਿਤ੍ਵਾਤਿ ਅਨੁਬਨ੍ਧਿਤ੍ਵਾ ਅਨੁਬਨ੍ਧਿਤ੍ਵਾ. ਵਿਤੁਦੇਨ੍ਤੀਤਿ ਅਸਿਧਾਰੂਪਮੇਹਿ ਤਿਖਿਣੇਹਿ ਲੋਹਤੁਣ੍ਡਕੇਹਿ ਵਿਜ੍ਝਿਤ੍ਵਾ ਵਿਜ੍ਝਿਤ੍ਵਾ ਇਤੋ ਚਿਤੋ ਚ ਚਰਨ੍ਤਿ ਗਚ੍ਛਨ੍ਤਿ. ਸਾ ਸੁਦਂ ਅਟ੍ਟਸ੍ਸਰਂ ਕਰੋਤੀਤਿ ਏਤ੍ਥ ਸੁਦਨ੍ਤਿ ਨਿਪਾਤੋ, ਸਾ ਅਟ੍ਠਿਕਸਙ੍ਖਲਿਕਾ ਅਟ੍ਟਸ੍ਸਰਂ ਆਤੁਰਸ੍ਸਰਂ ਕਰੋਤੀਤਿ ਅਤ੍ਥੋ. ਅਕੁਸਲਵਿਪਾਕਾਨੁਭਵਨਤ੍ਥਂ ਕਿਰ ਯੋਜਨਪ੍ਪਮਾਣਾਪਿ ਤਾਦਿਸਾ ਅਤ੍ਤਭਾਵਾ ਨਿਬ੍ਬਤ੍ਤਨ੍ਤਿ, ਪਸਾਦੁਸ੍ਸਦਾ ਚ ਹੋਨ੍ਤਿ ਪਕ੍ਕਗਣ੍ਡਸਦਿਸਾ. ਤਸ੍ਮਾ ਸਾ ਅਟ੍ਠਿਕਸਙ੍ਖਲਿਕਾ ਬਲਵਵੇਦਨਾਤੁਰਾ ਤਾਦਿਸਂ ਸਦ੍ਦਮਕਾਸੀਤਿ.

ਏਵਞ੍ਚ ਪਨ ਵਤ੍ਵਾ ਪੁਨ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ‘‘ਵਟ੍ਟਗਾਮਿਸਤ੍ਤਾ ਨਾਮ ਏਵਰੂਪਾ ਅਤ੍ਤਭਾਵਾ ਨ ਮੁਚ੍ਚਨ੍ਤੀ’’ਤਿ ਸਤ੍ਤੇਸੁ ਕਾਰੁਞ੍ਞਂ ਪਟਿਚ੍ਚ ਉਪ੍ਪਨ੍ਨਂ ਧਮ੍ਮਸਂਵੇਗਂ ਦਸ੍ਸੇਨ੍ਤੋ ਤਸ੍ਸ ਮਯ੍ਹਂ, ਆਵੁਸੋ, ਏਤਦਹੋਸਿ ਅਚ੍ਛਰਿਯਂ ਵਤ ਭੋਤਿਆਦਿਮਾਹ. ਤਤੋ ਭਗਵਾ ਥੇਰਸ੍ਸ ਆਨੁਭਾਵਂ ਪਕਾਸੇਨ੍ਤੋ ਚਕ੍ਖੁਭੂਤਾ ਵਤ, ਭਿਕ੍ਖਵੇ, ਸਾਵਕਾ ਵਿਹਰਨ੍ਤੀਤਿਆਦਿਮਾਹ. ਤਤ੍ਥ ਚਕ੍ਖੁ ਭੂਤਂ ਜਾਤਂ ਉਪ੍ਪਨ੍ਨਂ ਏਤੇਸਨ੍ਤਿ ਚਕ੍ਖੁਭੂਤਾ, ਭੂਤਚਕ੍ਖੁਕਾ ਉਪ੍ਪਨ੍ਨਚਕ੍ਖੁਕਾ ਚਕ੍ਖੁਂ ਉਪ੍ਪਾਦੇਤ੍ਵਾ ਵਿਹਰਨ੍ਤੀਤਿ ਅਤ੍ਥੋ. ਦੁਤਿਯਪਦੇਪਿ ਏਸੇਵ ਨਯੋ. ਯਤ੍ਰ ਹਿ ਨਾਮਾਤਿ ਏਤ੍ਥ ਯਤ੍ਰਾਤਿ ਕਾਰਣਵਚਨਂ. ਤਤ੍ਰਾਯਂ ਅਤ੍ਥਯੋਜਨਾ – ਯਸ੍ਮਾ ਨਾਮ ਸਾਵਕੋਪਿ ਏਵਰੂਪਂ ਞਸ੍ਸਤਿ ਵਾ ਦਕ੍ਖਤਿ ਵਾ ਸਕ੍ਖਿਂ ਵਾ ਕਰਿਸ੍ਸਤਿ, ਤਸ੍ਮਾ ਅਵੋਚੁਮ੍ਹ – ‘‘ਚਕ੍ਖੁਭੂਤਾ ਵਤ, ਭਿਕ੍ਖਵੇ, ਸਾਵਕਾ ਵਿਹਰਨ੍ਤਿ, ਞਾਣਭੂਤਾ ਵਤ, ਭਿਕ੍ਖਵੇ, ਸਾਵਕਾ ਵਿਹਰਨ੍ਤੀ’’ਤਿ. ਪੁਬ੍ਬੇਵ ਮੇ ਸੋ, ਭਿਕ੍ਖਵੇ, ਸਤ੍ਤੋ ਦਿਟ੍ਠੋਤਿ ਬੋਧਿਮਣ੍ਡੇ ਸਬ੍ਬਞ੍ਞੁਤਞ੍ਞਾਣਪਟਿਵੇਧੇਨ ਅਪ੍ਪਮਾਣੇਸੁ ਚਕ੍ਕਵਾਲ਼ੇਸੁ ਅਪ੍ਪਮਾਣੇ ਸਤ੍ਤਨਿਕਾਯੇ ਭਵਗਤਿਯੋਨਿਠਿਤਿਨਿਵਾਸੇ ਚ ਪਚ੍ਚਕ੍ਖਂ ਕਰੋਨ੍ਤੇਨ ਮਯਾ ਪੁਬ੍ਬੇਵ ਸੋ ਸਤ੍ਤੋ ਦਿਟ੍ਠੋਤਿ ਵਦਤਿ.

ਗੋਘਾਤਕੋਤਿ ਗਾਵੋ ਵਧਿਤ੍ਵਾ ਅਟ੍ਠਿਤੋ ਮਂਸਂ ਮੋਚੇਤ੍ਵਾ ਵਿਕ੍ਕਿਣਿਤ੍ਵਾ ਜੀਵਿਕਂ ਕਪ੍ਪਨਕਸਤ੍ਤੋ. ਤਸ੍ਸੇਵ ਕਮ੍ਮਸ੍ਸ ਵਿਪਾਕਾਵਸੇਸੇਨਾਤਿ ਤਸ੍ਸ ਨਾਨਾਚੇਤਨਾਹਿ ਆਯੂਹਿਤਸ੍ਸ ਅਪਰਾਪਰਿਯਕਮ੍ਮਸ੍ਸ. ਤਤ੍ਰ ਹਿ ਯਾਯ ਚੇਤਨਾਯ ਨਰਕੇ ਪਟਿਸਨ੍ਧਿ ਜਨਿਤਾ, ਤਸ੍ਸਾ ਵਿਪਾਕੇ ਪਰਿਕ੍ਖੀਣੇ ਅਵਸੇਸਕਮ੍ਮਂ ਵਾ ਕਮ੍ਮਨਿਮਿਤ੍ਤਂ ਵਾ ਆਰਮ੍ਮਣਂ ਕਤ੍ਵਾ ਪੁਨ ਪੇਤਾਦੀਸੁ ਪਟਿਸਨ੍ਧਿ ਨਿਬ੍ਬਤ੍ਤਤਿ, ਤਸ੍ਮਾ ਸਾ ਪਟਿਸਨ੍ਧਿ ਕਮ੍ਮਸਭਾਗਤਾਯ ਆਰਮ੍ਮਣਸਭਾਗਤਾਯ ਵਾ ‘‘ਤਸ੍ਸੇਵ ਕਮ੍ਮਸ੍ਸ ਵਿਪਾਕਾਵਸੇਸੋ’’ਤਿ ਵੁਚ੍ਚਤਿ. ਅਯਞ੍ਚ ਸਤ੍ਤੋ ਏਵਂ ਉਪ੍ਪਨ੍ਨੋ. ਤੇਨਾਹ – ‘‘ਤਸ੍ਸੇਵ ਕਮ੍ਮਸ੍ਸ ਵਿਪਾਕਾਵਸੇਸੇਨਾ’’ਤਿ. ਤਸ੍ਸ ਕਿਰ ਨਰਕਾ ਚਵਨਕਾਲੇ ਨਿਮ੍ਮਂਸਕਤਾਨਂ ਗੁਨ੍ਨਂ ਅਟ੍ਠਿਰਾਸਿਯੇਵ ਨਿਮਿਤ੍ਤਂ ਅਹੋਸਿ. ਸੋ ਪਟਿਚ੍ਛਨ੍ਨਮ੍ਪਿ ਤਂ ਕਮ੍ਮਂ ਵਿਞ੍ਞੂਨਂ ਪਾਕਟਂ ਵਿਯ ਕਰੋਨ੍ਤੋ ਅਟ੍ਠਿਸਙ੍ਖਲਿਕਪੇਤੋ ਜਾਤੋ. ਪਠਮਂ.

੨. ਪੇਸਿਸੁਤ੍ਤਵਣ੍ਣਨਾ

੨੦੩. ਮਂਸਪੇਸਿਵਤ੍ਥੁਸ੍ਮਿਂ ਗੋਘਾਤਕੋਤਿ ਗੋਮਂਸਪੇਸਿਯੋ ਕਤ੍ਵਾ ਸੁਕ੍ਖਾਪੇਤ੍ਵਾ ਵਲ੍ਲੂਰਵਿਕ੍ਕਯੇਨ ਅਨੇਕਾਨਿ ਵਸ੍ਸਾਨਿ ਜੀਵਿਕਂ ਕਪ੍ਪੇਸਿ, ਤੇਨਸ੍ਸ ਨਰਕਾ ਚਵਨਕਾਲੇ ਮਂਸਪੇਸਿਯੇਵ ਨਿਮਿਤ੍ਤਂ ਅਹੋਸਿ. ਸੋ ਮਂਸਪੇਸਿਪੇਤੋ ਜਾਤੋ. ਦੁਤਿਯਂ.

੩. ਪਿਣ੍ਡਸੁਤ੍ਤਵਣ੍ਣਨਾ

੨੦੪. ਮਂਸਪਿਣ੍ਡਵਤ੍ਥੁਸ੍ਮਿਂ ਸਾਕੁਣਿਕੋਤਿ ਸਕੁਣੇ ਗਹੇਤ੍ਵਾ ਵਿਕ੍ਕਿਣਨਕਾਲੇ ਨਿਪ੍ਪਕ੍ਖਚਮ੍ਮੇ ਮਂਸਪਿਣ੍ਡਮਤ੍ਤੇ ਕਤ੍ਵਾ ਵਿਕ੍ਕਿਣਨ੍ਤੋ ਜੀਵਿਕਂ ਕਪ੍ਪੇਸਿ, ਤੇਨਸ੍ਸ ਨਰਕਾ ਚਵਨਕਾਲੇ ਮਂਸਪਿਣ੍ਡੋਵ ਨਿਮਿਤ੍ਤਂ ਅਹੋਸਿ. ਸੋ ਮਂਸਪਿਣ੍ਡਪੇਤੋ ਜਾਤੋ. ਤਤਿਯਂ.

੪. ਨਿਚ੍ਛਵਿਸੁਤ੍ਤਵਣ੍ਣਨਾ

੨੦੫. ਨਿਚ੍ਛਵਿਵਤ੍ਥੁਸ੍ਮਿਂ ਤਸ੍ਸ ਓਰਬ੍ਭਿਕਸ੍ਸ ਏਲ਼ਕੇ ਵਧਿਤ੍ਵਾ ਵਧਿਤ੍ਵਾ ਨਿਚ੍ਚਮ੍ਮੇ ਕਤ੍ਵਾ ਕਪ੍ਪਿਤਜੀਵਿਕਸ੍ਸ ਪੁਰਿਮਨਯੇਨੇਵ ਨਿਚ੍ਚਮ੍ਮਂ ਏਲ਼ਕਸਰੀਰਂ ਨਿਮਿਤ੍ਤਂ ਅਹੋਸਿ. ਸੋ ਨਿਚ੍ਛਵਿਪੇਤੋ ਜਾਤੋ. ਚਤੁਤ੍ਥਂ.

੫. ਅਸਿਲੋਮਸੁਤ੍ਤਵਣ੍ਣਨਾ

੨੦੬. ਅਸਿਲੋਮਵਤ੍ਥੁਸ੍ਮਿਂ ਸੋ ਸੂਕਰਿਕੋ ਦੀਘਰਤ੍ਤਂ ਨਿਵਾਪਪੁਟ੍ਠੇ ਸੂਕਰੇ ਅਸਿਨਾ ਵਧਿਤ੍ਵਾ ਵਧਿਤ੍ਵਾ ਦੀਘਰਤ੍ਤਂ ਜੀਵਿਕਂ ਕਪ੍ਪੇਸਿ, ਤਸ੍ਸ ਉਕ੍ਖਿਤ੍ਤਾਸਿਕਭਾਵੋਵ ਨਿਮਿਤ੍ਤਂ ਅਹੋਸਿ. ਤਸ੍ਮਾ ਅਸਿਲੋਮਪੇਤੋ ਜਾਤੋ. ਪਞ੍ਚਮਂ.

੬. ਸਤ੍ਤਿਸੁਤ੍ਤਵਣ੍ਣਨਾ

੨੦੭. ਸਤ੍ਤਿਲੋਮਵਤ੍ਥੁਸ੍ਮਿਂ ਸੋ ਮਾਗਵਿਕੋ ਏਕਂ ਮਿਗਞ੍ਚ ਸਤ੍ਤਿਞ੍ਚ ਗਹੇਤ੍ਵਾ ਵਨਂ ਗਨ੍ਤ੍ਵਾ ਤਸ੍ਸ ਮਿਗਸ੍ਸ ਸਮੀਪਂ ਆਗਤਾਗਤੇ ਮਿਗੇ ਸਤ੍ਤਿਯਾ ਵਿਜ੍ਝਿਤ੍ਵਾ ਮਾਰੇਸਿ, ਤਸ੍ਸ ਸਤ੍ਤਿਯਾ ਵਿਜ੍ਝਨਕਭਾਵੋਯੇਵ ਨਿਮਿਤ੍ਤਂ ਅਹੋਸਿ. ਤਸ੍ਮਾ ਸਤ੍ਤਿਲੋਮਪੇਤੋ ਜਾਤੋ. ਛਟ੍ਠਂ.

੭. ਉਸੁਲੋਮਸੁਤ੍ਤਵਣ੍ਣਨਾ

੨੦੮. ਉਸੁਲੋਮਵਤ੍ਥੁਸ੍ਮਿਂ ਕਾਰਣਿਕੋਤਿ ਰਾਜਾਪਰਾਧਿਕੇ ਅਨੇਕਾਹਿ ਕਾਰਣਾਹਿ ਪੀਲ਼ੇਤ੍ਵਾ ਅਵਸਾਨੇ ਕਣ੍ਡੇਨ ਵਿਜ੍ਝਿਤ੍ਵਾ ਮਾਰਣਕਪੁਰਿਸੋ. ਸੋ ਕਿਰ ‘‘ਅਮੁਕਸ੍ਮਿਂ ਪਦੇਸੇ ਵਿਦ੍ਧੋ ਮਰਤੀ’’ਤਿ ਞਤ੍ਵਾਵ ਵਿਜ੍ਝਤਿ. ਤਸ੍ਸੇਵਂ ਜੀਵਿਕਂ ਕਪ੍ਪੇਤ੍ਵਾ ਨਰਕੇ ਉਪ੍ਪਨ੍ਨਸ੍ਸ ਤਤੋ ਪਕ੍ਕਾਵਸੇਸੇਨ ਇਧੂਪਪਤ੍ਤਿਕਾਲੇ ਉਸੁਨਾ ਵਿਜ੍ਝਨਭਾਵੋਯੇਵ ਨਿਮਿਤ੍ਤਂ ਅਹੋਸਿ. ਤਸ੍ਮਾ ਉਸੁਲੋਮਪੇਤੋ ਜਾਤੋ. ਸਤ੍ਤਮਂ.

੮. ਸੂਚਿਲੋਮਸੁਤ੍ਤਵਣ੍ਣਨਾ

੨੦੯. ਸੂਚਿਲੋਮਵਤ੍ਥੁਸ੍ਮਿਂ ਸੂਤੋਤਿ ਅਸ੍ਸਦਮਕੋ. ਗੋਦਮਕੋਤਿਪਿ ਵਦਨ੍ਤਿਯੇਵ. ਤਸ੍ਸ ਪਤੋਦਸੂਚਿਯਾ ਵਿਜ੍ਝਨਭਾਵੋਯੇਵ ਨਿਮਿਤ੍ਤਂ ਅਹੋਸਿ. ਤਸ੍ਮਾ ਸੂਚਿਲੋਮਪੇਤੋ ਜਾਤੋ. ਅਟ੍ਠਮਂ.

੯. ਦੁਤਿਯਸੂਚਿਲੋਮਸੁਤ੍ਤਵਣ੍ਣਨਾ

੨੧੦. ਦੁਤਿਯੇ ਸੂਚਿਲੋਮਵਤ੍ਥੁਸ੍ਮਿਂ ਸੂਚਕੋਤਿ ਪੇਸੁਞ੍ਞਕਾਰਕੋ. ਸੋ ਕਿਰ ਮਨੁਸ੍ਸੇ ਅਞ੍ਞਮਞ੍ਞਞ੍ਚ ਭਿਨ੍ਦਿ, ਰਾਜਕੁਲੇ ਚ ‘‘ਇਮਸ੍ਸ ਇਮਂ ਨਾਮ ਅਤ੍ਥਿ, ਇਮਿਨਾ ਇਦਂ ਨਾਮ ਕਤ’’ਨ੍ਤਿ ਸੂਚੇਤ੍ਵਾ ਸੂਚੇਤ੍ਵਾ ਅਨਯਬ੍ਯਸਨਂ ਪਾਪੇਸਿ. ਤਸ੍ਮਾ ਯਥਾ ਤੇਨ ਸੂਚੇਤ੍ਵਾ ਮਨੁਸ੍ਸਾ ਭਿਨ੍ਨਾ, ਤਥਾ ਸੂਚੀਹਿ ਭੇਦਨਦੁਕ੍ਖਂ ਪਚ੍ਚਨੁਭੋਤੁਂ ਕਮ੍ਮਮੇਵ ਨਿਮਿਤ੍ਤਂ ਕਤ੍ਵਾ ਸੂਚਿਲੋਮਪੇਤੋ ਜਾਤੋ. ਨਵਮਂ.

੧੦. ਕੁਮ੍ਭਣ੍ਡਸੁਤ੍ਤਵਣ੍ਣਨਾ

੨੧੧. ਅਣ੍ਡਭਾਰਿਵਤ੍ਥੁਸ੍ਮਿਂ ਗਾਮਕੂਟਕੋਤਿ ਵਿਨਿਚ੍ਛਯਾਮਚ੍ਚੋ. ਤਸ੍ਸ ਕਮ੍ਮਸਭਾਗਤਾਯ ਕੁਮ੍ਭਮਤ੍ਤਾ ਮਹਾਘਟਪ੍ਪਮਾਣਾ ਅਣ੍ਡਾ ਅਹੇਸੁਂ. ਸੋ ਹਿ ਯਸ੍ਮਾ ਰਹੋ ਪਟਿਚ੍ਛਨ੍ਨੇ ਠਾਨੇ ਲਞ੍ਜਂ ਗਹੇਤ੍ਵਾ ਕੂਟਵਿਨਿਚ੍ਛਯੇਨ ਪਾਕਟਂ ਦੋਸਂ ਕਰੋਨ੍ਤੋ ਸਾਮਿਕੇ ਅਸ੍ਸਾਮਿਕੇ ਅਕਾਸਿ, ਤਸ੍ਮਾਸ੍ਸ ਰਹਸ੍ਸਂ ਅਙ੍ਗਂ ਪਾਕਟਂ ਨਿਬ੍ਬਤ੍ਤਂ. ਯਸ੍ਮਾ ਦਣ੍ਡਂ ਪਟ੍ਠਪੇਨ੍ਤੋ ਪਰੇਸਂ ਅਸਯ੍ਹਂ ਭਾਰਂ ਆਰੋਪੇਸਿ, ਤਸ੍ਮਾਸ੍ਸ ਰਹਸ੍ਸਂ ਅਙ੍ਗਂ ਅਸਯ੍ਹਭਾਰੋ ਹੁਤ੍ਵਾ ਨਿਬ੍ਬਤ੍ਤਂ. ਯਸ੍ਮਾ ਯਸ੍ਮਿਂ ਠਾਨੇ ਠਿਤੇਨ ਸਮੇਨ ਭਵਿਤਬ੍ਬਂ, ਤਸ੍ਮਿਂ ਠਤ੍ਵਾ ਵਿਸਮੋ ਅਹੋਸਿ, ਤਸ੍ਮਾਸ੍ਸ ਰਹਸ੍ਸਙ੍ਗੇ ਵਿਸਮਾ ਨਿਸਜ੍ਜਾਵ ਅਹੋਸੀਤਿ. ਦਸਮਂ.

ਪਠਮੋ ਵਗ੍ਗੋ.

੨. ਦੁਤਿਯਵਗ੍ਗੋ

੧. ਸਸੀਸਕਸੁਤ੍ਤਵਣ੍ਣਨਾ

੨੧੨. ਪਾਰਦਾਰਿਕਵਤ੍ਥੁਸ੍ਮਿਂ ਸੋ ਸਤ੍ਤੋ ਪਰਸ੍ਸ ਰਕ੍ਖਿਤਗੋਪਿਤਂ ਸਸ੍ਸਾਮਿਕਂ ਫਸ੍ਸਂ ਫੁਸਨ੍ਤੋ ਮੀਲ਼੍ਹਸੁਖੇਨ ਕਾਮਸੁਖੇਨ ਚਿਤ੍ਤਂ ਰਮਯਿਤ੍ਵਾ ਕਮ੍ਮਸਭਾਗਤਾਯ ਗੂਥਫਸ੍ਸਂ ਫੁਸਨ੍ਤੋ ਦੁਕ੍ਖਮਨੁਭਵਿਤੁਂ ਤਤ੍ਥ ਨਿਬ੍ਬਤ੍ਤੋ. ਪਠਮਂ.

੨. ਗੂਥਖਾਦਸੁਤ੍ਤਵਣ੍ਣਨਾ

੨੧੩. ਦੁਟ੍ਠਬ੍ਰਾਹ੍ਮਣਵਤ੍ਥੁ ਪਾਕਟਮੇਵ. ਦੁਤਿਯਂ.

੩. ਨਿਚ੍ਛਵਿਤ੍ਥਿਸੁਤ੍ਤਵਣ੍ਣਨਾ

੨੧੪. ਨਿਚ੍ਛਵਿਤ੍ਥਿਵਤ੍ਥੁਸ੍ਮਿਂ ਯਸ੍ਮਾ ਮਾਤੁਗਾਮੋ ਨਾਮ ਅਤ੍ਤਨੋ ਫਸ੍ਸੇ ਅਨਿਸ੍ਸਰੋ, ਸਾ ਚ ਤਂ ਸਾਮਿਕਸ੍ਸ ਸਨ੍ਤਕਂ ਫਸ੍ਸਂ ਥੇਨੇਤ੍ਵਾ ਪਰੇਸਂ ਅਭਿਰਤਿਂ ਉਪ੍ਪਾਦੇਸਿ, ਤਸ੍ਮਾ ਕਮ੍ਮਸਭਾਗਤਾਯ ਸੁਖਸਮ੍ਫਸ੍ਸਾ ਵਟ੍ਟਿਤ੍ਵਾ ਦੁਕ੍ਖਸਮ੍ਫਸ੍ਸਂ ਅਨੁਭਵਿਤੁਂ ਨਿਚ੍ਛਵਿਤ੍ਥੀ ਹੁਤ੍ਵਾ ਉਪ੍ਪਨ੍ਨਾ. ਤਤਿਯਂ.

੪. ਮਙ੍ਗੁਲਿਤ੍ਥਿਸੁਤ੍ਤਵਣ੍ਣਨਾ

੨੧੫. ਮਙ੍ਗੁਲਿਤ੍ਥਿਵਤ੍ਥੁਸ੍ਮਿਂ ਮਙ੍ਗੁਲਿਨ੍ਤਿ ਵਿਰੂਪਂ ਦੁਦ੍ਦਸਿਕਂ ਬੀਭਚ੍ਛਂ. ਸਾ ਕਿਰ ਯਕ੍ਖਦਾਸਿਕਮ੍ਮਂ ਕਰੋਨ੍ਤੀ ‘‘ਇਮਿਨਾ ਚ ਇਮਿਨਾ ਚ ਏਵਂ ਬਲਿਕਮ੍ਮੇ ਕਤੇ ਅਯਂ ਨਾਮ ਤੁਮ੍ਹਾਕਂ ਵਡ੍ਢਿ ਭਵਿਸ੍ਸਤੀ’’ਤਿ ਮਹਾਜਨਸ੍ਸ ਗਨ੍ਧਪੁਪ੍ਫਾਦੀਨਿ ਵਞ੍ਚਨਾਯ ਗਹੇਤ੍ਵਾ ਮਹਾਜਨਂ ਦੁਦ੍ਦਿਟ੍ਠਿਂ ਮਿਚ੍ਛਾਦਿਟ੍ਠਿਂ ਗਣ੍ਹਾਪੇਸਿ, ਤਸ੍ਮਾ ਤਾਯ ਕਮ੍ਮਸਭਾਗਤਾਯ ਗਨ੍ਧਪੁਪ੍ਫਾਦੀਨਂ ਥੇਨਿਤਤ੍ਤਾ ਦੁਗ੍ਗਨ੍ਧਾ, ਦੁਦ੍ਦਸ੍ਸਨਸ੍ਸ ਗਾਹਿਤਤ੍ਤਾ ਦੁਦ੍ਦਸਿਕਾ ਵਿਰੂਪਾ ਬੀਭਚ੍ਛਾ ਹੁਤ੍ਵਾ ਨਿਬ੍ਬਤ੍ਤਾ. ਚਤੁਤ੍ਥਂ.

੫. ਓਕਿਲਿਨੀਸੁਤ੍ਤਵਣ੍ਣਨਾ

੨੧੬. ਓਕਿਲਿਨੀਵਤ੍ਥੁਸ੍ਮਿਂ ਉਪ੍ਪਕ੍ਕਂ ਓਕਿਲਿਨਿਂ ਓਕਿਰਿਨਿਨ੍ਤਿ ਸਾ ਕਿਰ ਅਙ੍ਗਾਰਚਿਤਕੇ ਨਿਪਨ੍ਨਾ ਵਿਪ੍ਫਨ੍ਦਮਾਨਾ ਵਿਪਰਿਵਤ੍ਤਮਾਨਾ ਪਚ੍ਚਤਿ, ਤਸ੍ਮਾ ਉਪ੍ਪਕ੍ਕਾ ਚੇਵ ਹੋਤਿ ਉਣ੍ਹੇਨ ਅਗ੍ਗਿਨਾ ਪਕ੍ਕਸਰੀਰਾ, ਓਕਿਲਿਨੀ ਚ ਕਿਲਿਨ੍ਨਸਰੀਰਾ, ਬਿਨ੍ਦੂਨਿਸ੍ਸਾ ਸਰੀਰਤੋ ਪਗ੍ਘਰਨ੍ਤਿ, ਓਕਿਰਿਨੀ ਚ ਅਙ੍ਗਾਰਸਮ੍ਪਰਿਕਿਣ੍ਣਾ. ਤਸ੍ਸਾ ਹਿ ਹੇਟ੍ਠਤੋਪਿ ਕਿਂਸੁਕਪੁਪ੍ਫਵਣ੍ਣਾ ਅਙ੍ਗਾਰਾ, ਉਭਯਪਸ੍ਸੇਸੁਪਿ, ਆਕਾਸਤੋਪਿਸ੍ਸਾ ਉਪਰਿ ਪਤਨ੍ਤਿ. ਤੇਨ ਵੁਤ੍ਤਂ – ‘‘ਉਪ੍ਪਕ੍ਕਂ ਓਕਿਲਿਨਿਂ ਓਕਿਰਿਨਿ’’ਨ੍ਤਿ. ਸਾ ਇਸ੍ਸਾਪਕਤਾ ਸਪਤ੍ਤਿਂ ਅਙ੍ਗਾਰਕਟਾਹੇਨ ਓਕਿਰੀਤਿ ਤਸ੍ਸ ਕਿਰ ਰਞ੍ਞੋ ਏਕਾ ਨਾਟਕਿਨੀ ਅਙ੍ਗਾਰਕਟਾਹਂ ਸਮੀਪੇ ਠਪੇਤ੍ਵਾ ਗਤ੍ਤਤੋ ਉਦਕਂ ਪੁਞ੍ਛਤਿ, ਪਾਣਿਨਾ ਚ ਸੇਦਂ ਕਰੋਤਿ. ਰਾਜਾਪਿ ਤਾਯ ਸਦ੍ਧਿਂ ਕਥਞ੍ਚ ਕਰੋਤਿ, ਪਰਿਤੁਟ੍ਠਾਕਾਰਞ੍ਚ ਦਸ੍ਸੇਤਿ. ਅਗ੍ਗਮਹੇਸੀ ਤਂ ਅਸਹਮਾਨਾ ਇਸ੍ਸਾਪਕਤਾ ਹੁਤ੍ਵਾ ਅਚਿਰਪਕ੍ਕਨ੍ਤਸ੍ਸ ਰਞ੍ਞੋ ਤਂ ਅਙ੍ਗਾਰਕਟਾਹਂ ਗਹੇਤ੍ਵਾ ਤਸ੍ਸਾ ਉਪਰਿ ਅਙ੍ਗਾਰੇ ਓਕਿਰਿ. ਸਾ ਤਂ ਕਮ੍ਮਂ ਕਤ੍ਵਾ ਤਾਦਿਸਂਯੇਵ ਵਿਪਾਕਂ ਪਚ੍ਚਨੁਭਵਿਤੁਂ ਪੇਤਲੋਕੇ ਨਿਬ੍ਬਤ੍ਤਾ. ਪਞ੍ਚਮਂ.

੬. ਅਸੀਸਕਸੁਤ੍ਤਵਣ੍ਣਨਾ

੨੧੭. ਚੋਰਘਾਤਵਤ੍ਥੁਸ੍ਮਿਂ ਸੋ ਰਞ੍ਞੋ ਆਣਾਯ ਦੀਘਰਤ੍ਤਂ ਚੋਰਾਨਂ ਸੀਸਾਨਿ ਛਿਨ੍ਦਿਤ੍ਵਾ ਪੇਤਲੋਕੇ ਨਿਬ੍ਬਤ੍ਤਨ੍ਤੋ ਅਸੀਸਕਂ ਕਬਨ੍ਧਂ ਹੁਤ੍ਵਾ ਨਿਬ੍ਬਤ੍ਤਿ. ਛਟ੍ਠਂ.

੭-੧੧. ਪਾਪਭਿਕ੍ਖੁਸੁਤ੍ਤਾਦਿਵਣ੍ਣਨਾ

੨੧੮-੨੨੨. ਭਿਕ੍ਖੁਵਤ੍ਥੁਸ੍ਮਿਂ ਪਾਪਭਿਕ੍ਖੂਤਿ ਲਾਮਕਭਿਕ੍ਖੁ. ਸੋ ਕਿਰ ਲੋਕਸ੍ਸ ਸਦ੍ਧਾਦੇਯ੍ਯੇ ਚਤ੍ਤਾਰੋ ਪਚ੍ਚਯੇ ਪਰਿਭੁਞ੍ਜਿਤ੍ਵਾ ਕਾਯਵਚੀਦ੍ਵਾਰੇਹਿ ਅਸਂਯਤੋ ਭਿਨ੍ਨਾਜੀਵੋ ਚਿਤ੍ਤਕੇਲ਼ਿਂ ਕੀਲ਼ਨ੍ਤੋ ਵਿਚਰਿ. ਤਤੋ ਏਕਂ ਬੁਦ੍ਧਨ੍ਤਰਂ ਨਿਰਯੇ ਪਚ੍ਚਿਤ੍ਵਾ ਪੇਤਲੋਕੇ ਨਿਬ੍ਬਤ੍ਤਨ੍ਤੋ ਭਿਕ੍ਖੁਸਦਿਸੇਨੇਵ ਅਤ੍ਤਭਾਵੇਨ ਨਿਬ੍ਬਤ੍ਤਿ. ਭਿਕ੍ਖੁਨੀਸਿਕ੍ਖਮਾਨਾਸਾਮਣੇਰਸਾਮਣੇਰੀਵਤ੍ਥੂਸੁਪਿ ਅਯਮੇਵ ਵਿਨਿਚ੍ਛਯੋ. ਸਤ੍ਤਮਾਦੀਨਿ.

ਲਕ੍ਖਣਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.