੮. ਸਿਙ੍ਗਾਲਸੁਤ੍ਤਵਣ੍ਣਨਾ

੧੬੪. ਅਟ੍ਠਮੇ ਸਿਙ੍ਗਾਲੋਤਿ ਜਰਸਿਙ੍ਗਾਲੋ. ਯਥਾ ਹਿ ਸੁਵਣ੍ਣਵਣ੍ਣੋਪਿ ਕਾਯੋ ਪੂਤਿਕਾਯੋ ਤ੍ਵੇਵ, ਤਂਖਣਂ ਗਲ਼ਿਤਮ੍ਪਿ ਚ ਮੁਤ੍ਤਂ ਪੂਤਿਮੁਤ੍ਤਨ੍ਤ੍ਵੇਵ ਵੁਚ੍ਚਤਿ, ਏਵਂ ਤਦਹੁਜਾਤੋਪਿ ਸਿਙ੍ਗਾਲੋ ਜਰਸਿਙ੍ਗਾਲੋਤ੍ਵੇਵ ਵੁਚ੍ਚਤਿ. ਉਕ੍ਕਣ੍ਟਕੇਨ ਨਾਮਾਤਿ ਏਵਂਨਾਮਕੇਨ ਰੋਗੇਨ. ਸੋ ਕਿਰ ਸੀਤਕਾਲੇ ਉਪ੍ਪਜ੍ਜਤਿ. ਤਸ੍ਮਿਂ ਉਪ੍ਪਨ੍ਨੇ ਸਕਲਸਰੀਰਤੋ ਲੋਮਾਨਿ ਪਤਨ੍ਤਿ, ਸਕਲਸਰੀਰਂ ਨਿਲ੍ਲੋਮਂ ਹੁਤ੍ਵਾ, ਸਮਨ੍ਤਤੋ ਫੁਟਤਿ, ਵਾਤਬ੍ਭਾਹਤਾ ਵਣਾ ਰੁਜ੍ਜਨ੍ਤਿ. ਯਥਾ ਉਮ੍ਮਤ੍ਤਕਸੁਨਖੇਨ ਦਟ੍ਠੋ ਪੁਰਿਸੋ ਅਨਵਟ੍ਠਿਤੋਵ ਭਮਤਿ, ਏਵਂ ਤਸ੍ਮਿਂ ਉਪ੍ਪਨ੍ਨੇ ਭਮਿਤਬ੍ਬੋ ਹੋਤਿ, ਅਸੁਕਟ੍ਠਾਨੇ ਸੋਤ੍ਥਿ ਭਵਿਸ੍ਸਤੀਤਿ ਨ ਪਞ੍ਞਾਯਤਿ. ਅਟ੍ਠਮਂ.