੬. ਲਾਭਸਕ੍ਕਾਰਸਂਯੁਤ੍ਤਂ
੧. ਪਠਮਵਗ੍ਗੋ
੧. ਦਾਰੁਣਸੁਤ੍ਤਵਣ੍ਣਨਾ
੧੫੭. ਲਾਭਸਕ੍ਕਾਰਸਂਯੁਤ੍ਤਸ੍ਸ ਪਠਮੇ ਦਾਰੁਣੋਤਿ ਥਦ੍ਧੋ. ਲਾਭਸਕ੍ਕਾਰਸਿਲੋਕੋਤਿ ਏਤ੍ਥ ਲਾਭੋ ਨਾਮ ਚਤੁਪਚ੍ਚਯਲਾਭੋ. ਸਕ੍ਕਾਰੋਤਿ ਤੇਸਂਯੇਵ ਸੁਕਤਾਨਂ ਸੁਸਙ੍ਖਤਾਨਂ ਲਾਭੋ. ਸਿਲੋਕੋਤਿ ਵਣ੍ਣਘੋਸੋ. ਕਟੁਕੋਤਿ ਤਿਖਿਣੋ. ਫਰੁਸੋਤਿ ਖਰੋ. ਅਨ੍ਤਰਾਯਿਕੋਤਿ ਅਨ੍ਤਰਾਯਕਰੋ. ਪਠਮਂ.
੨. ਬਲ਼ਿਸਸੁਤ੍ਤਵਣ੍ਣਨਾ
੧੫੮. ਦੁਤਿਯੇ ਬਾਲ਼ਿਸਿਕੋਤਿ ਬਲ਼ਿਸਂ ਗਹੇਤ੍ਵਾ ਚਰਮਾਨੋ ਮਚ੍ਛਘਾਤਕੋ. ਆਮਿਸਗਤਨ੍ਤਿ ਆਮਿਸਮਕ੍ਖਿਤਂ. ਆਮਿਸਚਕ੍ਖੂਤਿ ਆਮਿਸੇ ਚਕ੍ਖੁ ਦਸ੍ਸਨਂ ਅਸ੍ਸਾਤਿ ਆਮਿਸਚਕ੍ਖੁ. ਗਿਲਬਲ਼ਿਸੋਤਿ ਗਿਲਿਤਬਲ਼ਿਸੋ. ਅਨਯਂ ਆਪਨ੍ਨੋਤਿ ਦੁਕ੍ਖਂ ਪਤ੍ਤੋ. ਬ੍ਯਸਨਂ ਆਪਨ੍ਨੋਤਿ ਵਿਨਾਸਂ ਪਤ੍ਤੋ. ਯਥਾਕਾਮਕਰਣੀਯੋਤਿ ਯਥਾਕਾਮੇਨ ਯਥਾਰੁਚਿਯਾ ਯਥੇਵ ਨਂ ਬਾਲ਼ਿਸਿਕੋ ਇਚ੍ਛਤਿ, ਤਥੇਵਸ੍ਸ ਕਤ੍ਤਬ੍ਬੋਤਿ ਅਤ੍ਥੋ. ਯਥਾਕਾਮਕਰਣੀਯੋ ਪਾਪਿਮਤੋਤਿ ਯਥਾ ਕਿਲੇਸਮਾਰਸ੍ਸ ਕਾਮੋ, ਏਵਂ ਕਤ੍ਤਬ੍ਬੋ, ਨਿਰਯਂ ਵਾ ਤਿਰਚ੍ਛਾਨਯੋਨਿਂ ਵਾ ਪੇਤ੍ਤਿਵਿਸਯਂ ਵਾ ਪਾਪੇਤਬ੍ਬੋ. ਦੁਤਿਯਂ.
੩-੪. ਕੁਮ੍ਮਸੁਤ੍ਤਾਦਿਵਣ੍ਣਨਾ
੧੫੯-੧੬੦. ਤਤਿਯੇ ਮਹਾਕੁਮ੍ਮਕੁਲਨ੍ਤਿ ਮਹਨ੍ਤਂ ਅਟ੍ਠਿਕਚ੍ਛਪਕੁਲਂ. ਅਗਮਾਸੀਤਿ ‘‘ਏਤ੍ਥ ਅਦ੍ਧਾ ਕਿਞ੍ਚਿ ਖਾਦਿਤਬ੍ਬਂ ਅਤ੍ਥਿ, ਤਂ ਮਚ੍ਛਰਾਯਨ੍ਤੋ ਮਂ ਏਸ ਨਿਵਾਰੇਤੀ’’ਤਿ ਸਞ੍ਞਾਯ ਅਗਮਾਸਿ. ਪਪਤਾਯਾਤਿ ਪਪਤਾ ਵੁਚ੍ਚਤਿ ਦੀਘਰਜ੍ਜੁਕਬਦ੍ਧੋ ਅਯਕਨ੍ਤਕੋਸਕੇ ਦਣ੍ਡਕਂ ਪਵੇਸੇਤ੍ਵਾ ਗਹਿਤੋ ਕਣ੍ਣਿਕਸਲ੍ਲਸਣ੍ਠਾਨੋ, ਅਯਕਣ੍ਟਕੋ, ਯਸ੍ਮਿਂ ਵੇਗੇਨ ਪਤਿਤ੍ਵਾ ਕਟਾਹੇ ਲਗ੍ਗਮਤ੍ਤੇ ਦਣ੍ਡਕੋ ਨਿਕ੍ਖਮਤਿ, ਰਜ੍ਜੁਕੋ ਏਕਾਬਦ੍ਧੋ ਗਚ੍ਛਤੇਵ. ਸੋ ਕੁਮ੍ਮੋਤਿ ਸੋ ਵਿਦ੍ਧਕੁਮ੍ਮੋ. ਯੇਨ ਸੋ ਕੁਮ੍ਮੋਤਿ ਉਦਕਸਦ੍ਦਂ ਸੁਤ੍ਵਾ ਸਾਸਙ੍ਕਟ੍ਠਾਨਂ ਭਵਿਸ੍ਸਤੀਤਿ ਨਿਵਤ੍ਤਿਤ੍ਵਾ ਯੇਨ ਸੋ ਅਤ੍ਥਕਾਮੋ ਕੁਮ੍ਮੋ. ਨ ਦਾਨਿ ਤ੍ਵਂ ਅਮ੍ਹਾਕਨ੍ਤਿ ਇਦਾਨਿ ਤ੍ਵਂ ਅਮਿਤ੍ਤਹਤ੍ਥਂ ਗਤੋ, ਨ ਅਮ੍ਹਾਕਂ ਸਨ੍ਤਕੋਤਿ ਅਤ੍ਥੋ. ਏਵਂ ਸਲ੍ਲਪਨ੍ਤਾਨਂਯੇਵ ਚ ਨੇਸਂ ਨਾਵਾਯ ਠਿਤੋ ਲੁਦ੍ਦੋ ਰਜ੍ਜੁਕਂ ਆਕਡ੍ਢਿਤ੍ਵਾ ਕੁਮ੍ਮਂ ਗਹੇਤ੍ਵਾ ਯਥਾਕਾਮਂ ਅਕਾਸਿ. ਸੇਸਮੇਤ੍ਥ ਇਤੋ ਅਨਨ੍ਤਰਸੁਤ੍ਤੇ ਚ ਉਤ੍ਤਾਨਮੇਵ. ਤਤਿਯਚਤੁਤ੍ਥਾਨਿ.
੫. ਮੀਲ਼੍ਹਕਸੁਤ੍ਤਵਣ੍ਣਨਾ
੧੬੧. ਪਞ੍ਚਮੇ ਮੀਲ਼੍ਹਕਾਤਿ ਗੂਥਪਾਣਕਾ. ਗੂਥਾਦੀਤਿ ਗੂਥਭਕ੍ਖਾ. ਗੂਥਪੂਰਾਤਿ ਅਨ੍ਤੋ ਗੂਥੇਨ ਭਰਿਤਾ. ਪੁਣ੍ਣਾ ਗੂਥਸ੍ਸਾਤਿ ਇਦਂ ਪੁਰਿਮਸ੍ਸੇਵ ਅਤ੍ਥਦੀਪਨਂ. ਅਤਿਮਞ੍ਞੇਯ੍ਯਾਤਿ ਪਚ੍ਛਿਮਪਾਦੇ ਭੂਮਿਯਂ ਠਪੇਤ੍ਵਾ ਪੁਰਿਮਪਾਦੇ ਗੂਥਸ੍ਸ ਉਪਰਿ ਆਰੋਪੇਤ੍ਵਾ ਠਿਤਾ ‘‘ਅਹਮ੍ਹਿ ਗੂਥਾਦੀ’’ਤਿ ਭਣਨ੍ਤੀ ਅਤਿਮਞ੍ਞੇਯ੍ਯ. ਪਿਣ੍ਡਪਾਤੋ ਚਸ੍ਸ ਪੂਰੋਤਿ ਅਪਰੋਪਿਸ੍ਸ ਪਤ੍ਤਪੂਰੋ ਪਣੀਤਪਿਣ੍ਡਪਾਤੋ ਭਵੇਯ੍ਯ. ਪਞ੍ਚਮਂ.
੬. ਅਸਨਿਸੁਤ੍ਤਵਣ੍ਣਨਾ
੧੬੨. ਛਟ੍ਠੇ ਕਂ, ਭਿਕ੍ਖਵੇ, ਅਸਨਿਵਿਚਕ੍ਕਨ੍ਤਿ, ਭਿਕ੍ਖਵੇ, ਕਂ ਪੁਗ੍ਗਲਂ ਮਤ੍ਥਕੇ ਪਤਿਤ੍ਵਾ ਮਦ੍ਦਮਾਨਂ ਸੁਕ੍ਕਾਸਨਿਚਕ੍ਕਂ ਆਗਚ੍ਛਤੁ. ਅਪ੍ਪਤ੍ਤਮਾਨਸਨ੍ਤਿ ਅਨਧਿਗਤਾਰਹਤ੍ਤਂ. ਇਤਿ ਭਗਵਾ ਨ ਸਤ੍ਤਾਨਂ ਦੁਕ੍ਖਕਾਮਤਾਯ, ਆਦੀਨਵਂ ਪਨ ਦਸ੍ਸੇਤੁਂ ਏਵਮਾਹ. ਅਸਨਿਚਕ੍ਕਞ੍ਹਿ ਮਤ੍ਥਕੇ ਪਤਿਤਂ ਏਕਮੇਵ ਅਤ੍ਤਭਾਵਂ ਨਾਸੇਤਿ, ਲਾਭਸਕ੍ਕਾਰਸਿਲੋਕੇਨ ਪਰਿਯਾਦਿਣ੍ਣਚਿਤ੍ਤੋ ਨਿਰਯਾਦੀਸੁ ਅਨਨ੍ਤਦੁਕ੍ਖਂ ਅਨੁਭੋਤਿ. ਛਟ੍ਠਂ.
੭. ਦਿਦ੍ਧਸੁਤ੍ਤਵਣ੍ਣਨਾ
੧੬੩. ਸਤ੍ਤਮੇ ਦਿਦ੍ਧਗਤੇਨਾਤਿ ਗਤਦਿਦ੍ਧੇਨ. ਵਿਸਲ੍ਲੇਨਾਤਿ ਵਿਸਮਕ੍ਖਿਤੇਨ. ਸਲ੍ਲੇਨਾਤਿ ਸਤ੍ਤਿਯਾ. ਸਤ੍ਤਮਂ.
੮. ਸਿਙ੍ਗਾਲਸੁਤ੍ਤਵਣ੍ਣਨਾ
੧੬੪. ਅਟ੍ਠਮੇ ਸਿਙ੍ਗਾਲੋਤਿ ਜਰਸਿਙ੍ਗਾਲੋ. ਯਥਾ ਹਿ ਸੁਵਣ੍ਣਵਣ੍ਣੋਪਿ ਕਾਯੋ ਪੂਤਿਕਾਯੋ ਤ੍ਵੇਵ, ਤਂਖਣਂ ਗਲ਼ਿਤਮ੍ਪਿ ਚ ਮੁਤ੍ਤਂ ਪੂਤਿਮੁਤ੍ਤਨ੍ਤ੍ਵੇਵ ਵੁਚ੍ਚਤਿ, ਏਵਂ ਤਦਹੁਜਾਤੋਪਿ ਸਿਙ੍ਗਾਲੋ ਜਰਸਿਙ੍ਗਾਲੋਤ੍ਵੇਵ ਵੁਚ੍ਚਤਿ. ਉਕ੍ਕਣ੍ਟਕੇਨ ਨਾਮਾਤਿ ਏਵਂਨਾਮਕੇਨ ਰੋਗੇਨ. ਸੋ ਕਿਰ ਸੀਤਕਾਲੇ ਉਪ੍ਪਜ੍ਜਤਿ. ਤਸ੍ਮਿਂ ਉਪ੍ਪਨ੍ਨੇ ਸਕਲਸਰੀਰਤੋ ਲੋਮਾਨਿ ਪਤਨ੍ਤਿ, ਸਕਲਸਰੀਰਂ ਨਿਲ੍ਲੋਮਂ ਹੁਤ੍ਵਾ, ਸਮਨ੍ਤਤੋ ਫੁਟਤਿ, ਵਾਤਬ੍ਭਾਹਤਾ ਵਣਾ ਰੁਜ੍ਜਨ੍ਤਿ. ਯਥਾ ਉਮ੍ਮਤ੍ਤਕਸੁਨਖੇਨ ਦਟ੍ਠੋ ਪੁਰਿਸੋ ਅਨਵਟ੍ਠਿਤੋਵ ਭਮਤਿ, ਏਵਂ ਤਸ੍ਮਿਂ ਉਪ੍ਪਨ੍ਨੇ ਭਮਿਤਬ੍ਬੋ ਹੋਤਿ, ਅਸੁਕਟ੍ਠਾਨੇ ਸੋਤ੍ਥਿ ਭਵਿਸ੍ਸਤੀਤਿ ਨ ਪਞ੍ਞਾਯਤਿ. ਅਟ੍ਠਮਂ.
੯. ਵੇਰਮ੍ਭਸੁਤ੍ਤਵਣ੍ਣਨਾ
੧੬੫. ਨਵਮੇ ਵੇਰਮ੍ਭਵਾਤਾਤਿ ਏਵਂਨਾਮਕਾ ਮਹਾਵਾਤਾ. ਕੀਦਿਸੇ ਪਨ ਠਾਨੇ ਤੇ ਵਾਤਾ ਵਾਯਨ੍ਤੀਤਿ? ਯਤ੍ਥ ਠਿਤਸ੍ਸ ਚਤ੍ਤਾਰੋ ਦੀਪਾ ਉਪ੍ਪਲਿਨਿਪਤ੍ਤਮਤ੍ਤਾ ਹੁਤ੍ਵਾ ਪਞ੍ਞਾਯਨ੍ਤਿ. ਯੋ ਪਕ੍ਖੀ ਗਚ੍ਛਤੀਤਿ ਨਵਵੁਟ੍ਠੇ ਦੇਵੇ ਵਿਰਵਨ੍ਤੋ ਵਾਤਸਕੁਣੋ ਤਤ੍ਥ ਗਚ੍ਛਤਿ, ਤਂ ਸਨ੍ਧਾਯੇਤਂ ਵੁਤ੍ਤਂ. ਅਰਕ੍ਖਿਤੇਨੇਵ ਕਾਯੇਨਾਤਿਆਦੀਸੁ ਹਤ੍ਥਪਾਦੇ ਕੀਲ਼ਾਪੇਨ੍ਤੋ ਖਨ੍ਧਟ੍ਠਿਂ ਵਾ ਨਾਮੇਨ੍ਤੋ ਕਾਯਂ ਨ ਰਕ੍ਖਤਿ ਨਾਮ, ਨਾਨਾਵਿਧਂ ਦੁਟ੍ਠੁਲ੍ਲਕਥਂ ਕਥੇਨ੍ਤੋ ਵਾਚਂ ਨ ਰਕ੍ਖਤਿ ਨਾਮ, ਕਾਮਵਿਤਕ੍ਕਾਦਯੋ ਵਿਤਕ੍ਕੇਨ੍ਤੋ ਚਿਤ੍ਤਂ ਨ ਰਕ੍ਖਤਿ ਨਾਮ. ਅਨੁਪਟ੍ਠਿਤਾਯ ਸਤਿਯਾਤਿ ਕਾਯਗਤਾਸਤਿਂ ਅਨੁਪਟ੍ਠਪੇਤ੍ਵਾ. ਨਵਮਂ.
੧੦. ਸਗਾਥਕਸੁਤ੍ਤਵਣ੍ਣਨਾ
੧੬੬. ਦਸਮੇ ਅਸਕ੍ਕਾਰੇਨ ਚੂਭਯਨ੍ਤਿ ਅਸਕ੍ਕਾਰੇਨ ਚ ਉਭਯੇਨ. ਸਮਾਧੀਤਿ ਅਰਹਤ੍ਤਫਲਸਮਾਧਿ. ਸੋ ਹਿ ਤੇਨ ਨ ਵਿਕਮ੍ਪਤਿ. ਅਪ੍ਪਮਾਣਵਿਹਾਰਿਨੋਤਿ ਅਪ੍ਪਮਾਣੇਨ ਫਲਸਮਾਧਿਨਾ ਵਿਹਰਨ੍ਤਸ੍ਸ. ਸਾਤਤਿਕਨ੍ਤਿ ਸਤਤਕਾਰਿਂ. ਸੁਖੁਮਂਦਿਟ੍ਠਿਵਿਪਸ੍ਸਕਨ੍ਤਿ ਅਰਹਤ੍ਤਮਗ੍ਗਦਿਟ੍ਠਿਯਾ ਸੁਖੁਮਦਿਟ੍ਠਿਫਲਸਮਾਪਤ੍ਤਿਅਤ੍ਥਾਯ ਵਿਪਸ੍ਸਨਂ ਪਟ੍ਠਪੇਤ੍ਵਾ ਆਗਤਤ੍ਤਾ ਵਿਪਸ੍ਸਕਂ. ਉਪਾਦਾਨਕ੍ਖਯਾਰਾਮਨ੍ਤਿ ਉਪਾਦਾਨਕ੍ਖਯਸਙ੍ਖਾਤੇ ਨਿਬ੍ਬਾਨੇ ਰਤਂ. ਆਹੁ ਸਪ੍ਪੁਰਿਸੋ ਇਤੀਤਿ ਸਪ੍ਪੁਰਿਸੋਤਿ ਕਥੇਨ੍ਤੀਤਿ. ਦਸਮਂ.
ਪਠਮੋ ਵਗ੍ਗੋ.
੨. ਦੁਤਿਯਵਗ੍ਗੋ
੧-੨. ਸੁਵਣ੍ਣਪਾਤਿਸੁਤ੍ਤਾਦਿਵਣ੍ਣਨਾ
੧੬੭-੧੬੮. ਦੁਤਿਯਵਗ੍ਗਸ੍ਸ ਪਠਮੇ ਸਮ੍ਪਜਾਨਮੁਸਾ ਭਾਸਨ੍ਤਨ੍ਤਿ ਅਪ੍ਪਮਤ੍ਤਕੇਨਪਿ ਕਾਰਣੇਨ ਸਮ੍ਪਜਾਨਮੇਵ ਮੁਸਾ ਭਾਸਨ੍ਤਂ. ‘‘ਸੀਲਂ ਪੂਰੇਸ੍ਸਾਮੀ’’ਤਿ ਸਂਵਿਹਿਤਭਿਕ੍ਖੁਂ ਸਿਨੇਰੁਮਤ੍ਤੋਪਿ ਪਚ੍ਚਯਰਾਸਿ ਚਾਲੇਤੁਂ ਨ ਸਕ੍ਕੋਤਿ. ਯਦਾ ਪਨ ਸੀਲਂ ਪਹਾਯ ਸਕ੍ਕਾਰਨਿਸ੍ਸਿਤੋ ਹੋਤਿ, ਤਦਾ ਕੁਣ੍ਡਕਮੁਟ੍ਠਿਹੇਤੁਪਿ ਮੁਸਾ ਭਾਸਤਿ, ਅਞ੍ਞਂ ਵਾ ਅਕਿਚ੍ਚਂ ਕਰੋਤਿ. ਦੁਤਿਯਂ ਉਤ੍ਤਾਨਮੇਵਾਤਿ. ਪਠਮਦੁਤਿਯਾਨਿ.
੩-੧੦. ਸੁਵਣ੍ਣਨਿਕ੍ਖਸੁਤ੍ਤਾਦਿਵਣ੍ਣਨਾ
੧੬੯. ਤਤਿਯਾਦੀਸੁ ਸੁਵਣ੍ਣਨਿਕ੍ਖਸ੍ਸਾਤਿ ਏਕਸ੍ਸ ਕਞ੍ਚਨਨਿਕ੍ਖਸ੍ਸ. ਸਿਙ੍ਗੀਨਿਕ੍ਖਸ੍ਸਾਤਿ ਸਿਙ੍ਗੀਸੁਵਣ੍ਣਨਿਕ੍ਖਸ੍ਸ. ਪਥਵਿਯਾਤਿ ਚਕ੍ਕਵਾਲ਼ਬ੍ਭਨ੍ਤਰਾਯ ਮਹਾਪਥਵਿਯਾ. ਆਮਿਸਕਿਞ੍ਚਿਕ੍ਖਹੇਤੂਤਿ ਕਸ੍ਸਚਿਦੇਵ ਆਮਿਸਸ੍ਸ ਹੇਤੁ ਅਨ੍ਤਮਸੋ ਕੁਣ੍ਡਕਮੁਟ੍ਠਿਨੋਪਿ. ਜੀਵਿਤਹੇਤੂਤਿ ਅਟਵਿਯਂ ਚੋਰੇਹਿ ਗਹੇਤ੍ਵਾ ਜੀਵਿਤੇ ਵੋਰੋਪਿਯਮਾਨੇ ਤਸ੍ਸਪਿ ਹੇਤੁ. ਜਨਪਦਕਲ੍ਯਾਣਿਯਾਤਿ ਜਨਪਦੇ ਉਤ੍ਤਮਿਤ੍ਥਿਯਾ. ਤਤਿਯਾਦੀਨਿ.
ਦੁਤਿਯੋ ਵਗ੍ਗੋ.
੩. ਤਤਿਯਵਗ੍ਗੋ
੧-੨. ਮਾਤੁਗਾਮਸੁਤ੍ਤਾਦਿਵਣ੍ਣਨਾ
੧੭੦-੧੭੧. ਤਤਿਯਵਗ੍ਗਸ੍ਸ ਪਠਮੇ ਨ ਤਸ੍ਸ, ਭਿਕ੍ਖਵੇ, ਮਾਤੁਗਾਮੋਤਿ ਨ ਤਸ੍ਸ ਰਹੋ ਏਕਕਸ੍ਸ ਨਿਸਿਨ੍ਨਸ੍ਸ ਤੇਨ ਧਮ੍ਮੇਨ ਅਤ੍ਥਿਕੋਪਿ ਮਾਤੁਗਾਮੋ ਚਿਤ੍ਤਂ ਪਰਿਯਾਦਾਤੁਂ ਸਕ੍ਕੋਤਿ, ਯਸ੍ਸ ਲਾਭਸਕ੍ਕਾਰਸਿਲੋਕੋ ਚਿਤ੍ਤਂ ਪਰਿਯਾਦਾਤੁਂ ਸਕ੍ਕੋਤੀਤਿ, ਅਤ੍ਥੋ. ਦੁਤਿਯਂ ਉਤ੍ਤਾਨਮੇਵਾਤਿ. ਪਠਮਦੁਤਿਯਾਨਿ.
੩-੬. ਏਕਪੁਤ੍ਤਕਸੁਤ੍ਤਾਦਿਵਣ੍ਣਨਾ
੧੭੨-੧੭੫. ਤਤਿਯੇ ਸਦ੍ਧਾਤਿ ਸੋਤਾਪਨ੍ਨਾ. ਸੇਸਮੇਤ੍ਥ ਉਤ੍ਤਾਨਮੇਵ. ਤਥਾ ਚਤੁਤ੍ਥੇ ਪਞ੍ਚਮੇ ਛਟ੍ਠੇ ਚ. ਤਤਿਯਾਦੀਨਿ.
੭. ਤਤਿਯਸਮਣਬ੍ਰਾਹ੍ਮਣਸੁਤ੍ਤਵਣ੍ਣਨਾ
੧੭੬. ਸਤ੍ਤਮੇ ਸਮੁਦਯਨ੍ਤਿਆਦੀਸੁ ਸਹ ਪੁਬ੍ਬਕਮ੍ਮੇਨ ਅਤ੍ਤਭਾਵੋ ਕੋਲਪੁਤ੍ਤਿਯਂ ਵਣ੍ਣਪੋਕ੍ਖਰਤਾ ਕਲ੍ਯਾਣਵਾਕ੍ਕਰਣਤਾ ਧੁਤਗੁਣਾਵੀਕਰਣਂ ਚੀਵਰਧਾਰਣਂ ਪਰਿਵਾਰਸਮ੍ਪਤ੍ਤੀਤਿ ਏਵਮਾਦਿ ਲਾਭਸਕ੍ਕਾਰਸ੍ਸ ਸਮੁਦਯੋ ਨਾਮ, ਤਂ ਸਮੁਦਯਸਚ੍ਚਵਸੇਨ ਨਪ੍ਪਜਾਨਾਤਿ, ਨਿਰੋਧੋ ਚ ਪਟਿਪਦਾ ਚ ਨਿਰੋਧਸਚ੍ਚਮਗ੍ਗਸਚ੍ਚਵਸੇਨੇਵ ਵੇਦਿਤਬ੍ਬਾ. ਸਤ੍ਤਮਂ.
੮. ਛਵਿਸੁਤ੍ਤਵਣ੍ਣਨਾ
੧੭੭. ਅਟ੍ਠਮੇ ਯਸ੍ਮਾ ਲਾਭਸਕ੍ਕਾਰਸਿਲੋਕੋ ਨਰਕਾਦੀਸੁ, ਨਿਬ੍ਬਤ੍ਤੇਨ੍ਤੋ ਸਕਲਮ੍ਪਿ ਇਮਂ ਅਤ੍ਤਭਾਵਂ ਨਾਸੇਤਿ, ਇਧਾਪਿ ਮਰਣਮ੍ਪਿ ਮਰਣਮਤ੍ਤਮ੍ਪਿ ਦੁਕ੍ਖਂ ਆਵਹਤਿ, ਤਸ੍ਮਾ ਛਵਿਂ ਛਿਨ੍ਦਤੀਤਿਆਦਿ ਵੁਤ੍ਤਂ. ਅਟ੍ਠਮਂ.
੯. ਰਜ੍ਜੁਸੁਤ੍ਤਵਣ੍ਣਨਾ
੧੭੮. ਨਵਮੇ ਵਾਲ਼ਰਜ੍ਜੁਯਾਤਿ ਸੁਤ੍ਤਾਦਿਮਯਾ ਰਜ੍ਜੁ ਮੁਦੁਕਾ ਹੋਤਿ ਵਾਲ਼ਰਜ੍ਜੁ ਖਰਾ ਫਰੁਸਾ, ਤਸ੍ਮਾ ਅਯਮੇਵ ਗਹਿਤਾ. ਨਵਮਂ.
੧੦. ਭਿਕ੍ਖੁਸੁਤ੍ਤਵਣ੍ਣਨਾ
੧੭੯. ਦਸਮੇ ਦਿਟ੍ਠਧਮ੍ਮਸੁਖਵਿਹਾਰਾਤਿ ਫਲਸਮਾਪਤ੍ਤਿਸੁਖਵਿਹਾਰਾ. ਤੇਸਾਹਮਸ੍ਸਾਤਿ ਤੇਸਂ ਅਹਂ ਅਸ੍ਸ. ਖੀਣਾਸਵੋ ਹਿ ਲਾਭੀ ਪੁਞ੍ਞਸਮ੍ਪਨ੍ਨੋ ਯਾਗੁਖਜ੍ਜਕਾਦੀਨਿ ਗਹੇਤ੍ਵਾ ਆਗਤਾਗਤਾਨਂ ਅਨੁਮੋਦਨਂ ਕਰੋਨ੍ਤੋ ਧਮ੍ਮਂ ਦੇਸੇਨ੍ਤੋ ਪਞ੍ਹਂ ਵਿਸ੍ਸਜ੍ਜੇਨ੍ਤੋ ਫਲਸਮਾਪਤ੍ਤਿਂ ਅਪ੍ਪੇਤ੍ਵਾ ਨਿਸੀਦਿਤੁਂ ਓਕਾਸਂ ਨ ਲਭਤਿ, ਤਂ ਸਨ੍ਧਾਯ ਵੁਤ੍ਤਨ੍ਤਿ. ਦਸਮਂ.
ਤਤਿਯੋ ਵਗ੍ਗੋ.
੪. ਚਤੁਤ੍ਥਵਗ੍ਗੋ
੧-੪. ਭਿਨ੍ਦਿਸੁਤ੍ਤਾਦਿਵਣ੍ਣਨਾ
੧੮੦-੧੮੩. ਚਤੁਤ੍ਥਵਗ੍ਗਸ੍ਸ ਪਠਮਂ ਉਤ੍ਤਾਨਮੇਵ. ਦੁਤਿਯਾਦੀਸੁ ਕੁਸਲਮੂਲਨ੍ਤਿ ਅਲੋਭਾਦਿਤਿਵਿਧਕੁਸਲਧਮ੍ਮੋ. ਸੁਕ੍ਕੋ ਧਮ੍ਮੋਤਿ ਤਸ੍ਸੇਵ ਪਰਿਯਾਯਦੇਸਨਾ. ਅਯਂ ਪਨੇਤ੍ਥ ਸਙ੍ਖੇਪਤ੍ਥੋ – ਯਸ੍ਸ ਕੁਸਲਮੂਲਾਦਿਸਙ੍ਖਾਤਸ੍ਸ ਅਨਵਜ੍ਜਧਮ੍ਮਸ੍ਸ ਅਸਮੁਚ੍ਛਿਨ੍ਨਤ੍ਤਾ ਦੇਵਦਤ੍ਤੋ ਸਗ੍ਗੇ ਵਾ ਨਿਬ੍ਬਤ੍ਤੇਯ੍ਯ, ਮਗ੍ਗਫਲਾਨਿ ਵਾ ਅਧਿਗਚ੍ਛੇਯ੍ਯ, ਸ੍ਵਾਸ੍ਸ ਸਮੁਚ੍ਛੇਦਮਗਮਾ ਸਬ੍ਬਸੋ ਸਮੁਚ੍ਛਿਨ੍ਨੋ ਵਿਨਟ੍ਠੋ. ਪਠਮਾਦੀਨਿ.
੫. ਅਚਿਰਪਕ੍ਕਨ੍ਤਸੁਤ੍ਤਵਣ੍ਣਨਾ
੧੮੪. ਪਞ੍ਚਮੇ ਪਰਾਭਵਾਯਾਤਿ ਅਵਡ੍ਢਿਯਾ ਵਿਨਾਸਾਯ. ਅਸ੍ਸਤਰੀਤਿ ਵਲ਼ਵਾਯ ਕੁਚ੍ਛਿਸ੍ਮਿਂ ਗਦ੍ਰਭਸ੍ਸ ਜਾਤਾ. ਅਤ੍ਤਵਧਾਯ ਗਬ੍ਭਂ ਗਣ੍ਹਾਤੀਤਿ ਤਂ ਅਸ੍ਸੇਨ ਸਦ੍ਧਿਂ ਸਮ੍ਪਯੋਜੇਨ੍ਤਿ, ਸਾ ਗਬ੍ਭਂ ਗਣ੍ਹਿਤ੍ਵਾ ਕਾਲੇ ਸਮ੍ਪਤ੍ਤੇ ਵਿਜਾਯਿਤੁਂ ਨ ਸਕ੍ਕੋਤਿ, ਪਾਦੇਹਿ ਭੂਮਿਯਂ ਪਹਰਨ੍ਤੀ ਤਿਟ੍ਠਤਿ, ਅਥਸ੍ਸਾ ਚਤ੍ਤਾਰੋ ਪਾਦੇ ਚਤੂਸੁ ਖਾਣੁਕੇਸੁ ਬਨ੍ਧਿਤ੍ਵਾ ਕੁਚ੍ਛਿਂ ਫਾਲੇਤ੍ਵਾ ਪੋਤਂ ਨੀਹਰਨ੍ਤਿ, ਸਾ ਤਤ੍ਥੇਵ ਮਰਤਿ. ਤੇਨੇਤਂ ਵੁਤ੍ਤਂ. ਪਞ੍ਚਮਂ.
੬. ਪਞ੍ਚਰਥਸਤਸੁਤ੍ਤਵਣ੍ਣਨਾ
੧੮੫. ਛਟ੍ਠੇ ਭਤ੍ਤਾਭਿਹਾਰੋਤਿ ਅਭਿਹਰਿਤਬ੍ਬਂ ਭਤ੍ਤਂ. ਤਸ੍ਸ ਪਨ ਪਮਾਣਂ ਦਸ੍ਸੇਤੁਂ ਪਞ੍ਚ ਚ ਥਾਲਿਪਾਕਸਤਾਨੀਤਿ ਵੁਤ੍ਤਂ. ਤਤ੍ਥ ਏਕੋ ਥਾਲਿਪਾਕੋ ਦਸਨ੍ਨਂ ਪੁਰਿਸਾਨਂ ਭਤ੍ਤਂ ਗਣ੍ਹਾਤਿ. ਨਾਸਾਯ ਪਿਤ੍ਤਂ ਭਿਨ੍ਦੇਯ੍ਯੁਨ੍ਤਿ ਅਚ੍ਛਪਿਤ੍ਤਂ ਵਾ ਮਚ੍ਛਪਿਤ੍ਤਂ ਵਾਸ੍ਸ ਨਾਸਪੁਟੇ ਪਕ੍ਖਿਪੇਯ੍ਯਂ. ਛਟ੍ਠਂ.
੭-੧੩. ਮਾਤੁਸੁਤ੍ਤਾਦਿਵਣ੍ਣਨਾ
੧੮੬-੧੮੭. ਸਤ੍ਤਮੇ ਮਾਤੁਪਿ ਹੇਤੂਤਿ ‘‘ਸਚੇ ਮੁਸਾ ਭਣਸਿ, ਮਾਤਰਂ ਤੇ ਵਿਸ੍ਸਜ੍ਜੇਸ੍ਸਾਮ. ਨੋ ਚੇ ਭਣਸਿ, ਨ ਵਿਸ੍ਸਜ੍ਜੇਸ੍ਸਾਮਾ’’ਤਿ ਏਵਂ ਚੋਰੇਹਿ ਅਟਵਿਯਂ ਪੁਚ੍ਛਮਾਨੋ ਤਸ੍ਸਾ ਚੋਰਹਤ੍ਥਗਤਾਯ ਮਾਤੁਯਾਪਿ ਹੇਤੁ ਸਮ੍ਪਜਾਨਮੁਸਾ ਨ ਭਾਸੇਯ੍ਯਾਤਿ ਅਤ੍ਥੋ. ਇਤੋ ਪਰੇਸੁਪਿ ਏਸੇਵ ਨਯੋਤਿ. ਸਤ੍ਤਮਾਦੀਨਿ.
ਲਾਭਸਕ੍ਕਾਰਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.