੯. ਝਾਨਾਭਿਞ੍ਞਸੁਤ੍ਤਵਣ੍ਣਨਾ
੧੫੨. ਨਵਮੇ ਯਾਵਦੇਵ ਆਕਙ੍ਖਾਮੀਤਿ ਯਾਵਦੇਵ ਇਚ੍ਛਾਮਿ. ਯਾਨਿ ਪਨ ਇਤੋ ਪਰਂ ਵਿਵਿਚ੍ਚੇਵ ਕਾਮੇਹੀਤਿਆਦਿਨਾ ਨਯੇਨ ਚਤ੍ਤਾਰਿ ਰੂਪਾਵਚਰਜ੍ਝਾਨਾਨਿ, ਸਬ੍ਬਸੋ ਰੂਪਸਞ੍ਞਾਨਂ ਸਮਤਿਕ੍ਕਮਾਤਿਆਦਿਨਾ ਨਯੇਨ ਚਤਸ੍ਸੋ ਅਰੂਪਸਮਾਪਤ੍ਤਿਯੋ, ਸਬ੍ਬਸੋ ਨੇਵਸਞ੍ਞਾਨਾਸਞ੍ਞਾਯਤਨਂ ਸਮਤਿਕ੍ਕਮ੍ਮ ਸਞ੍ਞਾਵੇਦਯਿਤਨਿਰੋਧਨ੍ਤਿ ਏਵਂ ਨਿਰੋਧਸਮਾਪਤ੍ਤਿ, ਅਨੇਕਵਿਹਿਤਂ ਇਦ੍ਧਿਵਿਧਨ੍ਤਿਆਦਿਨਾ ਨਯੇਨ ਪਞ੍ਚ ਲੋਕਿਕਾਭਿਞ੍ਞਾ ਚ ਵੁਤ੍ਤਾ. ਤਤ੍ਥ ਯਂ ਵਤ੍ਤਬ੍ਬਂ ਸਿਯਾ, ਤਂ ਸਬ੍ਬਂ ਅਨੁਪਦਵਣ੍ਣਨਾਯ ਚੇਵ ਭਾਵਨਾਵਿਧਾਨੇਨ ਚ ਸਦ੍ਧਿਂ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੬੯) ਵਿਤ੍ਥਾਰਿਤਮੇਵ. ਛਲ਼ਭਿਞ੍ਞਾਯ ਪਨ ਆਸਵਾਨਂ ਖਯਾਤਿ ਆਸਵਾਨਂ ਖਯੇਨ. ਅਨਾਸਵਨ੍ਤਿ ਆਸਵਾਨਂ ਅਪਚ੍ਚਯਭੂਤਂ. ਚੇਤੋਵਿਮੁਤ੍ਤਿਨ੍ਤਿ ਅਰਹਤ੍ਤਫਲਸਮਾਧਿਂ. ਪਞ੍ਞਾਵਿਮੁਤ੍ਤਿਨ੍ਤਿ ਅਰਹਤ੍ਤਫਲਪਞ੍ਞਂ. ਨਵਮਂ.