੧੦. ਉਪਸ੍ਸਯਸੁਤ੍ਤਵਣ੍ਣਨਾ

੧੫੩. ਦਸਮੇ ਆਯਾਮ, ਭਨ੍ਤੇਤਿ ਕਸ੍ਮਾ ਭਿਕ੍ਖੁਨੀਉਪਸ੍ਸਯਗਮਨਂ ਯਾਚਤਿ? ਨ ਲਾਭਸਕ੍ਕਾਰਹੇਤੁ, ਕਮ੍ਮਟ੍ਠਾਨਤ੍ਥਿਕਾ ਪਨੇਤ੍ਥ ਭਿਕ੍ਖੁਨਿਯੋ ਅਤ੍ਥਿ, ਤਾ ਉਸ੍ਸੁਕ੍ਕਾਪੇਤ੍ਵਾ ਕਮ੍ਮਟ੍ਠਾਨਂ ਕਥਾਪੇਸ੍ਸਾਮੀਤਿ ਯਾਚਤਿ. ਨਨੁ ਚ ਸੋ ਸਯਮ੍ਪਿ ਤੇਪਿਟਕੋ ਬਹੁਸ੍ਸੁਤੋ, ਕਿਂ ਸਯਂ ਕਥੇਤੁਂ ਨ ਸਕ੍ਕੋਤੀਤਿ? ਨੋ ਨ ਸਕ੍ਕੋਤਿ. ਬੁਦ੍ਧਪਟਿਭਾਗਸ੍ਸ ਪਨ ਸਾਵਕਸ੍ਸ ਕਥਂ ਸਦ੍ਧਾਤਬ੍ਬਂ ਮਞ੍ਞਿਸ੍ਸਨ੍ਤੀਤਿ ਯਾਚਤਿ. ਬਹੁਕਿਚ੍ਚੋ ਤ੍ਵਂ ਬਹੁਕਰਣੀਯੋਤਿ ਕਿਂ ਥੇਰੋ ਨਵਕਮ੍ਮਾਦਿਪਸੁਤੋ, ਯੇਨ ਨਂ ਏਵਮਾਹਾਤਿ? ਨੋ, ਸਤ੍ਥਰਿ ਪਨ ਪਰਿਨਿਬ੍ਬੁਤੇ ਚਤਸ੍ਸੋ ਪਰਿਸਾ ਆਨਨ੍ਦਤ੍ਥੇਰਂ ਉਪਸਙ੍ਕਮਿਤ੍ਵਾ, ‘‘ਭਨ੍ਤੇ, ਇਦਾਨਿ ਕਸ੍ਸ ਪਤ੍ਤਚੀਵਰਂ ਗਹੇਤ੍ਵਾ ਚਰਥ, ਕਸ੍ਸ ਪਰਿਵੇਣਂ ਸਮ੍ਮਜ੍ਜਥ, ਕਸ੍ਸ ਮੁਖੋਦਕਂ ਦੇਥਾ’’ਤਿ ਰੋਦਨ੍ਤਿ ਪਰਿਦੇਵਨ੍ਤਿ. ਥੇਰੋ ‘‘ਅਨਿਚ੍ਚਾ ਸਙ੍ਖਾਰਾ, ਵੁਦ੍ਧਸਰੀਰੇਪਿ ਨਿਲ੍ਲਜ੍ਜੋਵ ਮਚ੍ਚੁਰਾਜਾ ਪਹਰਿ. ਏਸਾ ਸਙ੍ਖਾਰਾਨਂ ਧਮ੍ਮਤਾ, ਮਾ ਸੋਚਿਤ੍ਥ, ਮਾ ਪਰਿਦੇਵਿਤ੍ਥਾ’’ਤਿ ਪਰਿਸਂ ਸਞ੍ਞਾਪੇਤਿ. ਇਦਮਸ੍ਸ ਬਹੁਕਿਚ੍ਚਂ. ਤਂ ਸਨ੍ਧਾਯ ਥੇਰੋ ਏਵਮਾਹ. ਸਨ੍ਦਸ੍ਸੇਸੀਤਿ ਪਟਿਪਤ੍ਤਿਗੁਣਂ ਦਸ੍ਸੇਸਿ. ਸਮਾਦਪੇਸੀਤਿ ਗਣ੍ਹਾਪੇਸਿ. ਸਮੁਤ੍ਤੇਜੇਸੀਤਿ ਸਮੁਸ੍ਸਾਹੇਸਿ. ਸਮ੍ਪਹਂਸੇਸੀਤਿ ਪਟਿਲਦ੍ਧਗੁਣੇਨ ਮੋਦਾਪੇਸਿ.

ਥੁਲ੍ਲਤਿਸ੍ਸਾਤਿ ਸਰੀਰੇਨ ਥੂਲਾ, ਨਾਮੇਨ ਤਿਸ੍ਸਾ. ਵੇਦੇਹਮੁਨਿਨੋਤਿ ਪਣ੍ਡਿਤਮੁਨਿਨੋ. ਪਣ੍ਡਿਤੋ ਹਿ ਞਾਣਸਙ੍ਖਾਤੇਨ ਵੇਦੇਨ ਈਹਤਿ ਸਬ੍ਬਕਿਚ੍ਚਾਨਿ ਕਰੋਤਿ, ਤਸ੍ਮਾ ‘‘ਵੇਦੇਹੋ’’ਤਿ ਵੁਚ੍ਚਤਿ. ਵੇਦੇਹੋ ਚ ਸੋ ਮੁਨਿ ਚਾਤਿ, ਵੇਦੇਹਮੁਨਿ. ਧਮ੍ਮਂ ਭਾਸਿਤਬ੍ਬਂ ਮਞ੍ਞਤੀਤਿ ਤਿਪਿਟਕਧਰਸ੍ਸ ਧਮ੍ਮਭਣ੍ਡਾਗਾਰਿਕਸ੍ਸ ਸਮ੍ਮੁਖੇ ਸਯਂ ਅਰਞ੍ਞਵਾਸੀ ਪਂਸੁਕੂਲਿਕੋ ਸਮਾਨੋ ‘‘ਧਮ੍ਮਕਥਿਕੋ ਅਹ’’ਨ੍ਤਿ ਧਮ੍ਮਂ ਭਾਸਿਤਬ੍ਬਂ ਮਞ੍ਞਤਿ. ਇਦਂ ਕਿਂ ਪਨ, ਕਥਂ ਪਨਾਤਿ? ਅਵਜਾਨਮਾਨਾ ਭਣਤਿ. ਅਸ੍ਸੋਸੀਤਿ ਅਞ੍ਞੇਨ ਆਗਨ੍ਤ੍ਵਾ ਆਰੋਚਿਤਵਸੇਨ ਅਸ੍ਸੋਸਿ. ਆਗਮੇਹਿ ਤ੍ਵਂ, ਆਵੁਸੋਤਿ ਤਿਟ੍ਠ ਤ੍ਵਂ, ਆਵੁਸੋ. ਮਾ ਤੇ ਸਙ੍ਘੋ ਉਤ੍ਤਰਿ ਉਪਪਰਿਕ੍ਖੀਤਿ ਮਾ ਭਿਕ੍ਖੁਸਙ੍ਘੋ ਅਤਿਰੇਕਓਕਾਸੇ ਤਂ ਉਪਪਰਿਕ੍ਖੀਤਿ. ਇਦਂ ਵੁਤ੍ਤਂ ਹੋਤਿ – ‘‘ਆਨਨ੍ਦੇਨ ਬੁਦ੍ਧਪਟਿਭਾਗੋ ਸਾਵਕੋ ਵਾਰਿਤੋ, ਏਕਾ ਭਿਕ੍ਖੁਨੀ ਨ ਵਾਰਿਤਾ, ਤਾਯ ਸਦ੍ਧਿਂ ਸਨ੍ਥਵੋ ਵਾ ਸਿਨੇਹੋ ਵਾ ਭਵਿਸ੍ਸਤੀ’’ਤਿ ਮਾ ਤਂ ਸਙ੍ਘੋ ਏਵਂ ਅਮਞ੍ਞੀਤਿ.

ਇਦਾਨਿ ਅਤ੍ਤਨੋ ਬੁਦ੍ਧਪਟਿਭਾਗਭਾਵਂ ਦੀਪੇਨ੍ਤੋ ਤਂ ਕਿਂ ਮਞ੍ਞਸਿ, ਆਵੁਸੋਤਿਆਦਿਮਾਹ? ਸਤ੍ਤਰਤਨਨ੍ਤਿ ਸਤ੍ਤਹਤ੍ਥਪ੍ਪਮਾਣਂ. ਨਾਗਨ੍ਤਿ ਹਤ੍ਥਿਂ. ਅਡ੍ਢਟ੍ਠਰਤਨਂ ਵਾਤਿ ਅਡ੍ਢਰਤਨੇਨ ਊਨਅਟ੍ਠਰਤਨਂ, ਪੁਰਿਮਪਾਦਤੋ ਪਟ੍ਠਾਯ ਯਾਵ ਕੁਮ੍ਭਾ ਵਿਦਤ੍ਥਾਧਿਕਸਤ੍ਤਹਤ੍ਥੁਬ੍ਬੇਧਨ੍ਤਿ ਅਤ੍ਥੋ. ਤਾਲਪਤ੍ਤਿਕਾਯਾਤਿ ਤਰੁਣਤਾਲਪਣ੍ਣੇਨ. ਚਵਿਤ੍ਥਾਤਿ ਚੁਤਾ, ਨ ਮਤਾ ਵਾ ਨਟ੍ਠਾ ਵਾ, ਬੁਦ੍ਧਪਟਿਭਾਗਸ੍ਸ ਪਨ ਸਾਵਕਸ੍ਸ ਉਪਵਾਦਂ ਵਤ੍ਵਾ ਮਹਾਕਸ੍ਸਪਤ੍ਥੇਰੇ ਛਹਿ ਅਭਿਞ੍ਞਾਹਿ ਸੀਹਨਾਦਂ ਨਦਨ੍ਤੇ ਤਸ੍ਸਾ ਕਾਸਾਵਾਨਿ ਕਣ੍ਟਕਸਾਖਾ ਵਿਯ ਕਚ੍ਛੁਸਾਖਾ ਵਿਯ ਚ ਸਰੀਰਂ ਖਾਦਿਤੁਂ ਆਰਦ੍ਧਾਨਿ, ਤਾਨਿ ਹਾਰੇਤ੍ਵਾ ਸੇਤਕਾਨਿ ਨਿਵਤ੍ਥਕ੍ਖਣੇਯੇਵਸ੍ਸਾ ਚਿਤ੍ਤਸ੍ਸਾਦੋ ਉਦਪਾਦੀਤਿ. ਦਸਮਂ.