੮. ਤਤਿਯਓਵਾਦਸੁਤ੍ਤਵਣ੍ਣਨਾ

੧੫੧. ਅਟ੍ਠਮੇ ਤਥਾ ਹਿ ਪਨਾਤਿ ਪੁਬ੍ਬੇ ਸੋਵਚਸ੍ਸਤਾਯ, ਏਤਰਹਿ ਚ ਦੋਵਚਸ੍ਸਤਾਯ ਕਾਰਣਪਟ੍ਠਪਨੇ ਨਿਪਾਤੋ. ਤਤ੍ਰਾਤਿ ਤੇਸੁ ਥੇਰੇਸੁ. ਕੋ ਨਾਮਾਯਂ ਭਿਕ੍ਖੂਤਿ ਕੋ ਨਾਮੋ ਅਯਂ ਭਿਕ੍ਖੁ? ਕਿਂ ਤਿਸ੍ਸਤ੍ਥੇਰੋ ਕਿਂ ਨਾਗਤ੍ਥੇਰੋਤਿ? ਤਤ੍ਰਾਤਿ ਤਸ੍ਮਿਂ ਏਵਂ ਸਕ੍ਕਾਰੇ ਕਯਿਰਮਾਨੇ. ਤਥਤ੍ਤਾਯਾਤਿ ਤਥਾਭਾਵਾਯ, ਆਰਞ੍ਞਿਕਾਦਿਭਾਵਾਯਾਤਿ ਅਤ੍ਥੋ. ਸਬ੍ਰਹ੍ਮਚਾਰਿਕਾਮੋਤਿ ‘‘ਇਮੇ ਮਂ ਪਰਿਵਾਰੇਤ੍ਵਾ ਚਰਨ੍ਤੂ’’ਤਿ ਏਵਂ ਕਾਮੇਤਿ ਇਚ੍ਛਤਿ ਪਤ੍ਥੇਤੀਤਿ ਸਬ੍ਰਹ੍ਮਚਾਰਿਕਾਮੋ. ਤਥਤ੍ਤਾਯਾਤਿ ਲਾਭਸਕ੍ਕਾਰਨਿਬ੍ਬਤ੍ਤਨਤ੍ਥਾਯ. ਬ੍ਰਹ੍ਮਚਾਰੁਪਦ੍ਦਵੇਨਾਤਿ ਯੋ ਸਬ੍ਰਹ੍ਮਚਾਰੀਨਂ ਚਤੂਸੁ ਪਚ੍ਚਯੇਸੁ ਅਧਿਮਤ੍ਤਚ੍ਛਨ੍ਦਰਾਗੋ ਉਪਦ੍ਦਵੋਤਿ ਵੁਚ੍ਚਤਿ, ਤੇਨ ਉਪਦ੍ਦੁਤਾ. ਅਭਿਪਤ੍ਥਨਾਤਿ ਅਧਿਮਤ੍ਤਪਤ੍ਥਨਾ. ਬ੍ਰਹ੍ਮਚਾਰਿਅਭਿਪਤ੍ਥਨੇਨਾਤਿ ਬ੍ਰਹ੍ਮਚਾਰੀਨਂ ਅਧਿਮਤ੍ਤਪਤ੍ਥਨਾਸਙ੍ਖਾਤੇਨ ਚਤੁਪਚ੍ਚਯਭਾਵੇਨ. ਅਟ੍ਠਮਂ.