੫. ਜਿਣ੍ਣਸੁਤ੍ਤਵਣ੍ਣਨਾ

੧੪੮. ਪਞ੍ਚਮੇ ਜਿਣ੍ਣੋਤਿ ਥੇਰੋ ਮਹਲ੍ਲਕੋ. ਗਰੁਕਾਨੀਤਿ ਤਂ ਸਤ੍ਥੁ ਸਨ੍ਤਿਕਾ ਲਦ੍ਧਕਾਲਤੋ ਪਟ੍ਠਾਯ ਛਿਨ੍ਨਭਿਨ੍ਨਟ੍ਠਾਨੇ ਸੁਤ੍ਤਸਂਸਿਬ੍ਬਨੇਨ ਚੇਵ ਅਗ੍ਗਲ਼ਦਾਨੇਨ ਚ ਅਨੇਕਾਨਿ ਪਟਲਾਨਿ ਹੁਤ੍ਵਾ ਗਰੁਕਾਨਿ ਜਾਤਾਨਿ. ਨਿਬ੍ਬਸਨਾਨੀਤਿ ਪੁਬ੍ਬੇ ਭਗਵਤਾ ਨਿਵਾਸੇਤ੍ਵਾ ਅਪਨੀਤਤਾਯ ਏਵਂਲਦ੍ਧਨਾਮਾਨਿ. ਤਸ੍ਮਾਤਿ ਯਸ੍ਮਾ ਤ੍ਵਂ ਜਿਣ੍ਣੋ ਚੇਵ ਗਰੁਪਂਸੁਕੂਲੋ ਚ. ਗਹਪਤਾਨੀਤਿ ਪਂਸੁਕੂਲਿਕਙ੍ਗਂ ਵਿਸ੍ਸਜ੍ਜੇਤ੍ਵਾ ਗਹਪਤੀਹਿ ਦਿਨ੍ਨਚੀਵਰਾਨਿ ਧਾਰੇਹੀਤਿ ਵਦਤਿ. ਨਿਮਨ੍ਤਨਾਨੀਤਿ ਪਿਣ੍ਡਪਾਤਿਕਙ੍ਗਂ ਵਿਸ੍ਸਜ੍ਜੇਤ੍ਵਾ ਸਲਾਕਭਤ੍ਤਾਦੀਨਿ ਨਿਮਨ੍ਤਨਾਨਿ ਭੁਞ੍ਜਾਹੀਤਿ ਵਦਤਿ. ਮਮ ਚ ਸਨ੍ਤਿਕੇਤਿ ਆਰਞ੍ਞਿਕਙ੍ਗਂ ਵਿਸ੍ਸਜ੍ਜੇਤ੍ਵਾ ਗਾਮਨ੍ਤਸੇਨਾਸਨੇਯੇਵ ਵਸਾਹੀਤਿ ਵਦਤਿ.

ਨਨੁ ਚ ਯਥਾ ਰਾਜਾ ਸੇਨਾਪਤਿਂ ਸੇਨਾਪਤਿਟ੍ਠਾਨੇ ਠਪੇਤ੍ਵਾ ਤਸ੍ਸ ਰਾਜੂਪਟ੍ਠਾਨਾਦਿਨਾ ਅਤ੍ਤਨੋ ਕਮ੍ਮੇਨ ਆਰਾਧੇਨ੍ਤਸ੍ਸੇਵ ਤਂ ਠਾਨਨ੍ਤਰਂ ਗਹੇਤ੍ਵਾ ਅਞ੍ਞਸ੍ਸ ਦਦਮਾਨੋ ਅਯੁਤ੍ਤਂ ਨਾਮ ਕਰੋਤਿ, ਏਵਂ ਸਤ੍ਥਾ ਮਹਾਕਸ੍ਸਪਤ੍ਥੇਰਸ੍ਸ ਪਚ੍ਚੁਗ੍ਗਮਨਤ੍ਥਾਯ ਤਿਗਾਵੁਤਂ ਮਗ੍ਗਂ ਗਨ੍ਤ੍ਵਾ ਰਾਜਗਹਸ੍ਸ ਚ ਨਾਲ਼ਨ੍ਦਾਯ ਚ ਅਨ੍ਤਰੇ ਬਹੁਪੁਤ੍ਤਕਰੁਕ੍ਖਮੂਲੇ ਨਿਸਿਨ੍ਨੋ ਤੀਹਿ ਓਵਾਦੇਹਿ ਉਪਸਮ੍ਪਾਦੇਤ੍ਵਾ ਤੇਨ ਸਦ੍ਧਿਂ ਅਤ੍ਤਨੋ ਚੀਵਰਂ ਪਰਿਵਤ੍ਤੇਤ੍ਵਾ ਥੇਰਂ ਜਾਤਿਆਰਞ੍ਞਿਕਙ੍ਗਞ੍ਚੇਵ ਜਾਤਿਪਂਸੁਕੂਲਿਕਙ੍ਗਞ੍ਚ ਅਕਾਸਿ, ਸੋ ਤਸ੍ਮਿਂ ਕਤ੍ਤੁਕਮ੍ਯਤਾਛਨ੍ਦੇਨ ਸਤ੍ਥੁ ਚਿਤ੍ਤਂ ਆਰਾਧੇਨ੍ਤਸ੍ਸੇਵ ਪਂਸੁਕੂਲਾਦੀਨਿ ਵਿਸ੍ਸਜ੍ਜਾਪੇਤ੍ਵਾ ਗਹਪਤਿਚੀਵਰਪਟਿਗ੍ਗਹਣਾਦੀਸੁ ਨਿਯੋਜੇਨ੍ਤੋ ਅਯੁਤ੍ਤਂ ਨਾਮ ਕਰੋਤੀਤਿ. ਨ ਕਰੋਤਿ. ਕਸ੍ਮਾ? ਅਤ੍ਤਜ੍ਝਾਸਯਤ੍ਤਾ. ਨ ਹਿ ਸਤ੍ਥਾ ਧੁਤਙ੍ਗਾਨਿ ਵਿਸ੍ਸਜ੍ਜਾਪੇਤੁਕਾਮੋ, ਯਥਾ ਪਨ ਅਘਟ੍ਟਿਤਾ ਭੇਰਿਆਦਯੋ ਸਦ੍ਦਂ ਨ ਵਿਸ੍ਸਜ੍ਜੇਨ੍ਤਿ, ਏਵਂ ਅਘਟ੍ਟਿਤਾ ਏਵਰੂਪਾ ਪੁਗ੍ਗਲਾ ਨ ਸੀਹਨਾਦਂ ਨਦਨ੍ਤੀਤਿ ਨਦਾਪੇਤੁਕਾਮੋ ਸੀਹਨਾਦਜ੍ਝਾਸਯੇਨ ਏਵਮਾਹ. ਥੇਰੋਪਿ ਸਤ੍ਥੁ ਅਜ੍ਝਾਸਯਾਨੁਰੂਪੇਨੇਵ ‘‘ਅਹਂ ਖੋ, ਭਨ੍ਤੇ, ਦੀਘਰਤ੍ਤਂ ਆਰਞ੍ਞਿਕੋ ਚੇਵਾ’’ਤਿਆਦਿਨਾ ਨਯੇਨ ਸੀਹਨਾਦਂ ਨਦਤਿ.

ਦਿਟ੍ਠਧਮ੍ਮਸੁਖਵਿਹਾਰਨ੍ਤਿ ਦਿਟ੍ਠਧਮ੍ਮਸੁਖਵਿਹਾਰੋ ਨਾਮ ਆਰਞ੍ਞਿਕਸ੍ਸੇਵ ਲਬ੍ਭਤਿ, ਨੋ ਗਾਮਨ੍ਤਵਾਸਿਨੋ. ਗਾਮਨ੍ਤਸ੍ਮਿਞ੍ਹਿ ਵਸਨ੍ਤੋ ਦਾਰਕਸਦ੍ਦਂ ਸੁਣਾਤਿ, ਅਸਪ੍ਪਾਯਰੂਪਾਨਿ ਪਸ੍ਸਤਿ, ਅਸਪ੍ਪਾਯੇ ਸਦ੍ਦੇ ਸੁਣਾਤਿ, ਤੇਨਸ੍ਸ ਅਨਭਿਰਤਿ ਉਪ੍ਪਜ੍ਜਤਿ. ਆਰਞ੍ਞਿਕੋ ਪਨ ਗਾਵੁਤਂ ਵਾ ਅਡ੍ਢਯੋਜਨਂ ਵਾ ਅਤਿਕ੍ਕਮਿਤ੍ਵਾ ਅਰਞ੍ਞਂ ਅਜ੍ਝੋਗਾਹੇਤ੍ਵਾ ਵਸਨ੍ਤੋ ਦੀਪਿਬ੍ਯਗ੍ਘਸੀਹਾਦੀਨਂ ਸਦ੍ਦੇ ਸੁਣਾਤਿ, ਯੇਸਂ ਸਵਨਪਚ੍ਚਯਾ ਅਮਾਨੁਸਿਕਾਸਵਨਰਤਿ ਉਪ੍ਪਜ੍ਜਤਿ. ਯਂ ਸਨ੍ਧਾਯ ਵੁਤ੍ਤਂ –

‘‘ਸੁਞ੍ਞਾਗਾਰਂ ਪਵਿਟ੍ਠਸ੍ਸ, ਸਨ੍ਤਚਿਤ੍ਤਸ੍ਸ ਭਿਕ੍ਖੁਨੋ;

ਅਮਾਨੁਸੀ ਰਤੀ ਹੋਤਿ, ਸਮ੍ਮਾ ਧਮ੍ਮਂ ਵਿਪਸ੍ਸਤੋ.

‘‘ਯਤੋ ਯਤੋ ਸਮ੍ਮਸਤਿ, ਖਨ੍ਧਾਨਂ ਉਦਯਬ੍ਬਯਂ;

ਲਭਤੀ ਪੀਤਿਪਾਮੋਜ੍ਜਂ, ਅਮਤਂ ਤਂ ਵਿਜਾਨਤਂ. (ਧ. ਪ. ੩੭੩-੩੭੪);

‘‘ਪੁਰਤੋ ਪਚ੍ਛਤੋ ਵਾਪਿ, ਅਪਰੋ ਚੇ ਨ ਵਿਜ੍ਜਤਿ;

ਤਤ੍ਥੇਵ ਫਾਸੁ ਭਵਤਿ, ਏਕਸ੍ਸ ਰਮਤੋ ਵਨੇ’’ਤਿ.

ਤਥਾ ਪਿਣ੍ਡਪਾਤਿਕਸ੍ਸੇਵ ਲਬ੍ਭਤਿ, ਨੋ ਅਪਿਣ੍ਡਪਾਤਿਕਸ੍ਸ. ਅਪਿਣ੍ਡਪਾਤਿਕੋ ਹਿ ਅਕਾਲਚਾਰੀ ਹੋਤਿ, ਤੁਰਿਤਚਾਰਂ ਗਚ੍ਛਤਿ, ਪਰਿਵਤ੍ਤੇਤਿ, ਪਲਿਬੁਦ੍ਧੋਵ ਗਚ੍ਛਤਿ, ਤਤ੍ਥ ਚ ਬਹੁਸਂਸਯੋ ਹੋਤਿ. ਪਿਣ੍ਡਪਾਤਿਕੋ ਪਨ ਨ ਅਕਾਲਚਾਰੀ ਹੋਤਿ, ਨ ਤੁਰਿਤਚਾਰਂ ਗਚ੍ਛਤਿ, ਨ ਪਰਿਵਤ੍ਤੇਤਿ, ਅਪਲਿਬੁਦ੍ਧੋਵ ਗਚ੍ਛਤਿ, ਤਤ੍ਥ ਚ ਨ ਬਹੁਸਂਸਯੋ ਹੋਤਿ.

ਕਥਂ? ਅਪਿਣ੍ਡਪਾਤਿਕੋ ਹਿ ਗਾਮਤੋ ਦੂਰਵਿਹਾਰੇ ਵਸਮਾਨੋ ਕਾਲਸ੍ਸੇਵ ‘‘ਯਾਗੁਂ ਵਾ ਪਾਰਿਵਾਸਿਕਭਤ੍ਤਂ ਵਾ ਲਚ੍ਛਾਮਿ, ਆਸਨਸਾਲਾਯ ਵਾ ਪਨ ਉਦ੍ਦੇਸਭਤ੍ਤਾਦੀਸੁ ਕਿਞ੍ਚਿਦੇਵ ਮਯ੍ਹਂ ਪਾਪੁਣਿਸ੍ਸਤੀ’’ਤਿ ਮਕ੍ਕਟਕਸੁਤ੍ਤਾਨਿ ਛਿਨ੍ਦਨ੍ਤੋ ਸਯਿਤਗੋਰੂਪਾਨਿ ਉਟ੍ਠਾਪੇਨ੍ਤੋ ਪਾਤੋਵ ਗਚ੍ਛਨ੍ਤੋ ਅਕਾਲਚਾਰੀ ਹੋਤਿ. ਮਨੁਸ੍ਸੇ ਖੇਤ੍ਤਕਮ੍ਮਾਦੀਨਂ ਅਤ੍ਥਾਯ ਗੇਹਾ ਨਿਕ੍ਖਨ੍ਤੇਯੇਵ ਸਮ੍ਪਾਪੁਣਿਤੁਂ ਮਿਗਂ ਅਨੁਬਨ੍ਧਨ੍ਤੋ ਵਿਯ ਵੇਗੇਨ ਗਚ੍ਛਨ੍ਤੋ ਤੁਰਿਤਚਾਰੀ ਹੋਤਿ. ਅਨ੍ਤਰਾ ਕਿਞ੍ਚਿਦੇਵ ਦਿਸ੍ਵਾ ‘‘ਅਸੁਕਉਪਾਸਕੋ ਵਾ ਅਸੁਕਉਪਾਸਿਕਾ ਵਾ ਗੇਹੇ, ਨੋ ਗੇਹੇ’’ਤਿ ਪੁਚ੍ਛਤਿ, ‘‘ਨੋ ਗੇਹੇ’’ਤਿ ਸੁਤ੍ਵਾ ‘‘ਇਦਾਨਿ ਕੁਤੋ ਲਭਿਸ੍ਸਾਮੀ’’ਤਿ? ਅਗ੍ਗਿਦਡ੍ਢੋ ਵਿਯ ਪਵੇਧਤਿ, ਸਯਂ ਪਚ੍ਛਿਮਦਿਸਂ ਗਨ੍ਤੁਕਾਮੋ ਪਾਚੀਨਦਿਸਾਯ ਸਲਾਕਂ ਲਭਿਤ੍ਵਾ ਅਞ੍ਞਂ ਪਚ੍ਛਿਮਦਿਸਾਯ ਲਦ੍ਧਸਲਾਕਂ ਉਪਸਙ੍ਕਮਿਤ੍ਵਾ, ‘‘ਭਨ੍ਤੇ, ਅਹਂ ਪਚ੍ਛਿਮਦਿਸਂ ਗਮਿਸ੍ਸਾਮਿ, ਮਮ ਸਲਾਕਂ ਤੁਮ੍ਹੇ ਗਣ੍ਹਥ, ਤੁਮ੍ਹਾਕਂ ਸਲਾਕਂ ਮਯ੍ਹਂ ਦੇਥਾ’’ਤਿ ਸਲਾਕਂ ਪਰਿਵਤ੍ਤੇਤਿ. ਏਕਂ ਵਾ ਪਨ ਸਲਾਕਭਤ੍ਤਂ ਆਹਰਿਤ੍ਵਾ ਪਰਿਭੁਞ੍ਜਨ੍ਤੋ ‘‘ਅਪਰਸ੍ਸਾਪਿ ਸਲਾਕਭਤ੍ਤਸ੍ਸ ਪਤ੍ਤਂ ਦੇਥਾ’’ਤਿ ਮਨੁਸ੍ਸੇਹਿ ਵੁਤ੍ਤੇ, ‘‘ਭਨ੍ਤੇ, ਤੁਮ੍ਹਾਕਂ ਪਤ੍ਤਂ ਦੇਥ, ਅਹਂ ਮਯ੍ਹਂ ਪਤ੍ਤੇ ਭਤ੍ਤਂ ਪਕ੍ਖਿਪਿਤ੍ਵਾ ਤੁਮ੍ਹਾਕਂ ਪਤ੍ਤਂ ਦਸ੍ਸਾਮੀ’’ਤਿ ਅਞ੍ਞਸ੍ਸ ਪਤ੍ਤਂ ਦਾਪੇਤ੍ਵਾ ਭਤ੍ਤੇ ਆਹਟੇ ਅਤ੍ਤਨੋ ਪਤ੍ਤੇ ਪਕ੍ਖਿਪਿਤ੍ਵਾ ਪਤ੍ਤਂ ਪਟਿਦੇਨ੍ਤੋ ਪਤ੍ਤਂ ਪਰਿਵਤ੍ਤੇਤਿ ਨਾਮ. ਵਿਹਾਰੇ ਰਾਜਰਾਜਮਹਾਮਤ੍ਤਾਦਯੋ ਮਹਾਦਾਨਂ ਦੇਨ੍ਤਿ, ਇਮਿਨਾ ਚ ਭਿਯ੍ਯੋ ਦੂਰਗਾਮੇ ਸਲਾਕਾ ਲਦ੍ਧਾ, ਤਤ੍ਥ ਅਗਚ੍ਛਨ੍ਤੋ ਪੁਨ ਸਤ੍ਤਾਹਂ ਸਲਾਕਂ ਨ ਲਭਤੀਤਿ ਅਲਾਭਭਯੇਨ ਗਚ੍ਛਤਿ, ਏਵਂ ਗਚ੍ਛਨ੍ਤੋ ਪਲਿਬੁਦ੍ਧੋ ਹੁਤ੍ਵਾ ਗਚ੍ਛਤਿ ਨਾਮ. ਯਸ੍ਸ ਚੇਸ ਸਲਾਕਭਤ੍ਤਾਦਿਨੋ ਅਤ੍ਥਾਯ ਗਚ੍ਛਤਿ, ‘‘ਤਂ ਦਸ੍ਸਨ੍ਤਿ ਨੁ ਖੋ ਮੇ, ਉਦਾਹੁ ਨ ਦਸ੍ਸਨ੍ਤਿ, ਪਣੀਤਂ ਨੁ ਖੋ ਦਸ੍ਸਨ੍ਤਿ, ਉਦਾਹੁ ਲੂਖਂ, ਥੋਕਂ ਨੁ ਖੋ, ਉਦਾਹੁ ਬਹੁਕਂ, ਸੀਤਲਂ ਨੁ ਖੋ, ਉਦਾਹੁ ਉਣ੍ਹ’’ਨ੍ਤਿ ਏਵਂ ਤਤ੍ਥ ਚ ਬਹੁਸਂਸਯੋ ਹੋਤਿ.

ਪਿਣ੍ਡਪਾਤਿਕੋ ਪਨ ਕਾਲਸ੍ਸੇਵ ਵੁਟ੍ਠਾਯ ਵਤ੍ਤਪਟਿਵਤ੍ਤਂ ਕਤ੍ਵਾ ਸਰੀਰਂ ਪਟਿਜਗ੍ਗਿਤ੍ਵਾ ਵਸਨਟ੍ਠਾਨਂ ਪਵਿਸਿਤ੍ਵਾ ਕਮ੍ਮਟ੍ਠਾਨਂ ਮਨਸਿਕਤ੍ਵਾ ਕਾਲਂ ਸਲ੍ਲਕ੍ਖੇਤ੍ਵਾ ਮਹਾਜਨਸ੍ਸ ਉਲ਼ੁਙ੍ਕਭਿਕ੍ਖਾਦੀਨਿ ਦਾਤੁਂ ਪਹੋਨਕਕਾਲੇ ਗਚ੍ਛਤੀਤਿ ਨ ਅਕਾਲਚਾਰੀ ਹੋਤਿ, ਏਕੇਕਂ ਪਦਵਾਰਂ ਛ ਕੋਟ੍ਠਾਸੇ ਕਤ੍ਵਾ ਵਿਪਸ੍ਸਨ੍ਤੋ ਗਚ੍ਛਤੀਤਿ ਨ ਤੁਰਿਤਚਾਰੀ ਹੋਤਿ, ਅਤ੍ਤਨੋ ਗਰੁਭਾਵੇਨ ‘‘ਅਸੁਕੋ ਗੇਹੇ, ਨ ਗੇਹੇ’’ਤਿ ਨ ਪੁਚ੍ਛਤਿ, ਸਲਾਕਭਤ੍ਤਾਦੀਨਿਯੇਵ ਨ ਗਣ੍ਹਾਤਿ. ਅਗਣ੍ਹਨ੍ਤੋ ਕਿਂ ਪਰਿਵਤ੍ਤੇਸ੍ਸਤਿ? ਨ ਅਞ੍ਞਸ੍ਸ ਵਸੇਨ ਪਲਿਬੁਦ੍ਧੋਵ ਹੋਤਿ, ਕਮ੍ਮਟ੍ਠਾਨਂ ਮਨਸਿਕਰੋਨ੍ਤੋ ਯਥਾਰੁਚਿ ਗਚ੍ਛਤਿ, ਇਤਰੋ ਵਿਯ ਨ ਬਹੁਸਂਸਯੋ ਹੋਤਿ. ਏਕਸ੍ਮਿਂ ਗਾਮੇ ਵਾ ਵੀਥਿਯਾ ਵਾ ਅਲਭਿਤ੍ਵਾ ਅਞ੍ਞਤ੍ਥ ਚਰਤਿ. ਤਸ੍ਮਿਮ੍ਪਿ ਅਲਭਿਤ੍ਵਾ ਅਞ੍ਞਤ੍ਥ ਚਰਨ੍ਤੋ ਮਿਸ੍ਸਕੋਦਨਂ ਸਙ੍ਕਡ੍ਢਿਤ੍ਵਾ ਅਮਤਂ ਵਿਯ ਪਰਿਭੁਞ੍ਜਿਤ੍ਵਾ ਗਚ੍ਛਤਿ.

ਪਂਸੁਕੂਲਿਕਸ੍ਸੇਵ ਲਬ੍ਭਤਿ, ਨੋ ਅਪਂਸੁਕੂਲਿਕਸ੍ਸ. ਅਪਂਸੁਕੂਲਿਕੋ ਹਿ ਵਸ੍ਸਾਵਾਸਿਕਂ ਪਰਿਯੇਸਨ੍ਤੋ ਚਰਤਿ, ਨ ਸੇਨਾਸਨਸਪ੍ਪਾਯਂ ਪਰਿਯੇਸਤਿ. ਪਂਸੁਕੂਲਿਕੋ ਪਨ ਨ ਵਸ੍ਸਾਵਾਸਿਕਂ ਪਰਿਯੇਸਨ੍ਤੋ ਚਰਤਿ, ਸੇਨਾਸਨਸਪ੍ਪਾਯਮੇਵ ਪਰਿਯੇਸਤਿ. ਤੇਚੀਵਰਿਕਸ੍ਸੇਵ ਲਬ੍ਭਤਿ, ਨ ਇਤਰਸ੍ਸ. ਅਤੇਚੀਵਰਿਕੋ ਹਿ ਬਹੁਭਣ੍ਡੋ ਬਹੁਪਰਿਕ੍ਖਾਰੋ ਹੋਤਿ, ਤੇਨਸ੍ਸ ਫਾਸੁਵਿਹਾਰੋ ਨਤ੍ਥਿ. ਅਪ੍ਪਿਚ੍ਛਾਦੀਨਞ੍ਚੇਵ ਲਬ੍ਭਤਿ, ਨ ਇਤਰੇਸਨ੍ਤਿ. ਤੇਨ ਵੁਤ੍ਤਂ – ‘‘ਅਤ੍ਤਨੋ ਚ ਦਿਟ੍ਠਧਮ੍ਮਸੁਖਵਿਹਾਰਂ ਸਮ੍ਪਸ੍ਸਮਾਨੋ’’ਤਿ. ਪਞ੍ਚਮਂ.