੨. ਅਨੋਤ੍ਤਪ੍ਪੀਸੁਤ੍ਤਵਣ੍ਣਨਾ

੧੪੫. ਦੁਤਿਯੇ ਅਨਾਤਾਪੀਤਿ ਯਂ ਵੀਰਿਯਂ ਕਿਲੇਸੇ ਆਤਪਤਿ, ਤੇਨ ਰਹਿਤੋ. ਅਨੋਤ੍ਤਪ੍ਪੀਤਿ ਨਿਬ੍ਭਯੋ ਕਿਲੇਸੁਪ੍ਪਤ੍ਤਿਤੋ ਕੁਸਲਾਨੁਪ੍ਪਤ੍ਤਿਤੋ ਚ ਭਯਰਹਿਤੋ. ਸਮ੍ਬੋਧਾਯਾਤਿ ਸਮ੍ਬੁਜ੍ਝਨਤ੍ਥਾਯ. ਨਿਬ੍ਬਾਨਾਯਾਤਿ ਨਿਬ੍ਬਾਨਸਚ੍ਛਿਕਿਰਿਯਾਯ. ਅਨੁਤ੍ਤਰਸ੍ਸ ਯੋਗਕ੍ਖੇਮਸ੍ਸਾਤਿ ਅਰਹਤ੍ਤਸ੍ਸ ਤਞ੍ਹਿ ਅਨੁਤ੍ਤਰਞ੍ਚੇਵ ਚਤੂਹਿ ਚ ਯੋਗੇਹਿ ਖੇਮਂ.

ਅਨੁਪ੍ਪਨ੍ਨਾਤਿਆਦੀਸੁ ਯੇ ਪੁਬ੍ਬੇ ਅਪ੍ਪਟਿਲਦ੍ਧਪੁਬ੍ਬਂ ਚੀਵਰਾਦਿਂ ਵਾ ਪਚ੍ਚਯਂ ਉਪਟ੍ਠਾਕਸਦ੍ਧਿਵਿਹਾਰਿਕ-ਅਨ੍ਤੇਵਾਸੀਨਂ ਵਾ ਅਞ੍ਞਤਰਤੋ ਮਨੁਞ੍ਞਵਤ੍ਥੁਂ ਪਟਿਲਭਿਤ੍ਵਾ ਤਂ ਸੁਭਂ ਸੁਖਨ੍ਤਿ ਅਯੋਨਿਸੋ ਗਣ੍ਹਨ੍ਤਸ੍ਸ ਅਞ੍ਞਤਰਂ ਵਾ ਪਨ ਅਨਨੁਭੂਤਪੁਬ੍ਬਂ ਆਰਮ੍ਮਣਂ ਯਥਾ ਤਥਾ ਵਾ ਅਯੋਨਿਸੋ ਆਵਜ੍ਜੇਨ੍ਤਸ੍ਸ ਲੋਭਾਦਯੋ ਪਾਪਕਾ ਅਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤਿ, ਤੇ ਅਨੁਪ੍ਪਨ੍ਨਾਤਿ ਵੇਦਿਤਬ੍ਬਾ. ਅਞ੍ਞਥਾ ਹਿ ਅਨਮਤਗ੍ਗੇ ਸਂਸਾਰੇ ਅਨੁਪ੍ਪਨ੍ਨਾ ਨਾਮ ਪਾਪਕਾ ਧਮ੍ਮਾ ਨਤ੍ਥਿ. ਅਨੁਭੂਤਪੁਬ੍ਬੇਪਿ ਚ ਵਤ੍ਥੁਮ੍ਹਿ ਆਰਮ੍ਮਣੇ ਵਾ ਯਸ੍ਸ ਪਕਤਿਬੁਦ੍ਧਿਯਾ ਵਾ ਉਦ੍ਦੇਸਪਰਿਪੁਚ੍ਛਾਯ ਵਾ ਪਰਿਯਤ੍ਤਿਨਵਕਮ੍ਮਯੋਨਿਸੋਮਨਸਿਕਾਰਾਨਂ ਵਾ ਅਞ੍ਞਤਰਵਸੇਨ ਪੁਬ੍ਬੇ ਅਨੁਪ੍ਪਜ੍ਜਿਤ੍ਵਾ ਪਚ੍ਛਾ ਤਾਦਿਸੇਨ ਪਚ੍ਚਯੇਨ ਸਹਸਾ ਉਪ੍ਪਜ੍ਜਨ੍ਤਿ, ਇਮੇਪਿ ‘‘ਅਨੁਪ੍ਪਨ੍ਨਾ ਉਪ੍ਪਜ੍ਜਮਾਨਾ ਅਨਤ੍ਥਾਯ ਸਂਵਤ੍ਤੇਯ੍ਯੁ’’ਨ੍ਤਿ ਵੇਦਿਤਬ੍ਬਾ. ਤੇਸੁਯੇਵ ਪਨ ਵਤ੍ਥਾਰਮ੍ਮਣੇਸੁ ਪੁਨਪ੍ਪੁਨਂ ਉਪ੍ਪਜ੍ਜਮਾਨਾ ਨਪ੍ਪਹੀਯਨ੍ਤਿ ਨਾਮ, ਤੇ ‘‘ਉਪ੍ਪਨ੍ਨਾ ਅਪ੍ਪਹੀਯਮਾਨਾ ਅਨਤ੍ਥਾਯ ਸਂਵਤ੍ਤੇਯ੍ਯੁ’’ਨ੍ਤਿ ਵੇਦਿਤਬ੍ਬਾ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰਤੋ ਪਨ ਉਪ੍ਪਨ੍ਨਾਨੁਪ੍ਪਨ੍ਨਭੇਦੋ ਚ ਪਹਾਨਪ੍ਪਹਾਨਵਿਧਾਨਞ੍ਚ ਸਬ੍ਬਂ ਵਿਸੁਦ੍ਧਿਮਗ੍ਗੇ ਞਾਣਦਸ੍ਸਨਵਿਸੁਦ੍ਧਿਨਿਦ੍ਦੇਸੇ ਕਥਿਤਂ.

ਅਨੁਪ੍ਪਨ੍ਨਾ ਮੇ ਕੁਸਲਾ ਧਮ੍ਮਾਤਿ ਅਪ੍ਪਟਿਲਦ੍ਧਾਪਿ ਸੀਲਸਮਾਧਿਮਗ੍ਗਫਲਸਙ੍ਖਾਤਾ ਅਨਵਜ੍ਜਧਮ੍ਮਾ. ਉਪ੍ਪਨ੍ਨਾਤਿ ਤੇਯੇਵ ਪਟਿਲਦ੍ਧਾ. ਨਿਰੁਜ੍ਝਮਾਨਾ ਅਨਤ੍ਥਾਯ ਸਂਵਤ੍ਤੇਯ੍ਯੁਨ੍ਤਿ ਤੇ ਸੀਲਾਦਿਧਮ੍ਮਾ ਪਰਿਹਾਨਿਵਸੇਨ ਪੁਨ ਅਨੁਪ੍ਪਤ੍ਤਿਯਾ ਨਿਰੁਜ੍ਝਮਾਨਾ ਅਨਤ੍ਥਾਯ ਸਂਵਤ੍ਤੇਯ੍ਯੁਨ੍ਤਿ ਵੇਦਿਤਬ੍ਬਾ. ਏਤ੍ਥ ਚ ਲੋਕਿਯਾ ਪਰਿਹਾਯਨ੍ਤਿ, ਲੋਕੁਤ੍ਤਰਾਨਂ ਪਰਿਹਾਨਿ ਨਤ੍ਥੀਤਿ. ‘‘ਉਪ੍ਪਨ੍ਨਾਨਂ ਕੁਸਲਾਨਂ ਧਮ੍ਮਾਨਂ ਠਿਤਿਯਾ’’ਤਿ ਇਮਸ੍ਸ ਪਨ ਸਮ੍ਮਪ੍ਪਧਾਨਸ੍ਸ ਵਸੇਨਾਯਂ ਦੇਸਨਾ ਕਤਾ. ਦੁਤਿਯਮਗ੍ਗੋ ਵਾ ਸੀਘਂ ਅਨੁਪ੍ਪਜ੍ਜਮਾਨੋ, ਪਠਮਮਗ੍ਗੋ ਨਿਰੁਜ੍ਝਮਾਨੋ ਅਨਤ੍ਥਾਯ ਸਂਵਤ੍ਤੇਯ੍ਯਾਤਿ ਏਵਮ੍ਪੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਇਤਿ ਇਮਸ੍ਮਿਂ ਸੁਤ੍ਤੇ ਇਮੇ ਚਤ੍ਤਾਰੋ ਸਮ੍ਮਪ੍ਪਧਾਨਾ ਪੁਬ੍ਬਭਾਗਵਿਪਸ੍ਸਨਾਵਸੇਨ ਕਥਿਤਾਤਿ. ਦੁਤਿਯਂ.