੩. ਚਨ੍ਦੂਪਮਸੁਤ੍ਤਵਣ੍ਣਨਾ

੧੪੬. ਤਤਿਯੇ ਚਨ੍ਦੂਪਮਾਤਿ ਚਨ੍ਦਸਦਿਸਾ ਹੁਤ੍ਵਾ. ਕਿਂ ਪਰਿਮਣ੍ਡਲਤਾਯ? ਨੋ, ਅਪਿਚ ਖੋ ਯਥਾ ਚਨ੍ਦੋ ਗਗਨਤਲਂ ਪਕ੍ਖਨ੍ਦਮਾਨੋ ਨ ਕੇਨਚਿ ਸਦ੍ਧਿਂ ਸਨ੍ਥਵਂ ਵਾ ਸਿਨੇਹਂ ਵਾ ਆਲਯਂ ਵਾ ਨਿਕਨ੍ਤਿਂ ਵਾ ਪਤ੍ਥਨਂ ਵਾ ਪਰਿਯੁਟ੍ਠਾਨਂ ਵਾ ਕਰੋਤਿ, ਨ ਚ ਨ ਹੋਤਿ ਮਹਾਜਨਸ੍ਸ ਪਿਯੋ ਮਨਾਪੋ, ਤੁਮ੍ਹੇਪਿ ਏਵਂ ਕੇਨਚਿ ਸਦ੍ਧਿਂ ਸਨ੍ਥਵਾਦੀਨਂ ਅਕਰਣੇਨ ਬਹੁਜਨਸ੍ਸ ਪਿਯਾ ਮਨਾਪਾ ਚਨ੍ਦੂਪਮਾ ਹੁਤ੍ਵਾ ਖਤ੍ਤਿਯਕੁਲਾਦੀਨਿ ਚਤ੍ਤਾਰਿ ਕੁਲਾਨਿ ਉਪਸਙ੍ਕਮਥਾਤਿ ਅਤ੍ਥੋ. ਅਪਿਚ ਯਥਾ ਚਨ੍ਦੋ ਅਨ੍ਧਕਾਰਂ ਵਿਧਮਤਿ, ਆਲੋਕਂ ਫਰਤਿ, ਏਵਂ ਕਿਲੇਸਨ੍ਧਕਾਰਵਿਧਮਨੇਨ ਞਾਣਾਲੋਕਫਰਣੇਨ ਚਾਪਿ ਚਨ੍ਦੂਪਮਾ ਹੁਤ੍ਵਾਤਿ ਏਵਮਾਦੀਹਿਪਿ ਨਯੇਹਿ ਏਤ੍ਥ ਅਤ੍ਥੋ ਦਟ੍ਠਬ੍ਬੋ.

ਅਪਕਸ੍ਸੇਵ ਕਾਯਂ ਅਪਕਸ੍ਸ ਚਿਤ੍ਤਨ੍ਤਿ ਤੇਨੇਵ ਸਨ੍ਥਵਾਦੀਨਂ ਅਕਰਣੇਨ ਕਾਯਞ੍ਚ ਚਿਤ੍ਤਞ੍ਚ ਅਪਕਸ੍ਸਿਤ੍ਵਾ, ਅਪਨੇਤ੍ਵਾਤਿ ਅਤ੍ਥੋ. ਯੋ ਹਿ ਭਿਕ੍ਖੁ ਅਰਞ੍ਞੇਪਿ ਨ ਵਸਤਿ, ਕਾਮਵਿਤਕ੍ਕਾਦਯੋਪਿ ਵਿਤਕ੍ਕੇਤਿ, ਅਯਂ ਨੇਵ ਕਾਯਂ ਅਪਕਸ੍ਸਤਿ, ਨ ਚਿਤ੍ਤਂ. ਯੋ ਹਿ ਅਰਞ੍ਞੇਪਿ ਖੋ ਵਿਹਰਤਿ, ਕਾਮਵਿਤਕ੍ਕਾਦਯੋ ਪਨ ਵਿਤਕ੍ਕੇਤਿ, ਅਯਂ ਕਾਯਮੇਵ ਅਪਕਸ੍ਸਤਿ, ਨ ਚਿਤ੍ਤਂ. ਯੋ ਗਾਮਨ੍ਤੇ ਵਸਤਿ, ਕਾਮਵਿਤਕ੍ਕਾਦਯੋਪਿ ਖੋ ਨ ਚ ਵਿਤਕ੍ਕੇਤਿ, ਅਯਂ ਚਿਤ੍ਤਮੇਵ ਅਪਕਸ੍ਸਤਿ, ਨ ਕਾਯਂ. ਯੋ ਪਨ ਅਰਞ੍ਞੇ ਚੇਵ ਵਸਤਿ, ਕਾਮਵਿਤਕ੍ਕਾਦਯੋ ਚ ਨ ਵਿਤਕ੍ਕੇਤਿ, ਅਯਂ ਉਭਯਮ੍ਪਿ ਅਪਕਸ੍ਸਤਿ. ਏਵਰੂਪਾ ਹੁਤ੍ਵਾ ਕੁਲਾਨਿ ਉਪਸਙ੍ਕਮਥਾਤਿ ਦੀਪੇਨ੍ਤੋ ‘‘ਅਪਕਸ੍ਸੇਵ ਕਾਯਂ ਅਪਕਸ੍ਸ ਚਿਤ੍ਤ’’ਨ੍ਤਿ ਆਹ.

ਨਿਚ੍ਚਨਵਕਾਤਿ ਨਿਚ੍ਚਂ ਨਵਕਾਵ, ਆਗਨ੍ਤੁਕਸਦਿਸਾ ਏਵ ਹੁਤ੍ਵਾਤਿ ਅਤ੍ਥੋ. ਆਗਨ੍ਤੁਕੋ ਹਿ ਪਟਿਪਾਟਿਯਾ ਸਮ੍ਪਤ੍ਤਗੇਹਂ ਪਵਿਸਿਤ੍ਵਾ ਸਚੇ ਨਂ ਘਰਸਾਮਿਕਾ ਦਿਸ੍ਵਾ, ‘‘ਅਮ੍ਹਾਕਂ ਪੁਤ੍ਤਭਾਤਰੋ ਵਿਪ੍ਪਵਾਸਂ ਗਤਾ ਏਵਂ ਵਿਚਰਿਂਸੂ’’ਤਿ ਅਨੁਕਮ੍ਪਮਾਨਾ ਨਿਸੀਦਾਪੇਤ੍ਵਾ ਭੋਜੇਨ੍ਤਿ, ਭੁਤ੍ਤਮਤ੍ਤੋਯੇਵ ‘‘ਤੁਮ੍ਹਾਕਂ ਭਾਜਨਂ ਗਣ੍ਹਥਾ’’ਤਿ ਉਟ੍ਠਾਯ ਪਕ੍ਕਮਤਿ, ਨ ਤੇਹਿ ਸਦ੍ਧਿਂ ਸਨ੍ਥਵਂ ਵਾ ਕਰੋਤਿ, ਨ ਕਿਚ੍ਚਕਰਣੀਯਾਨਿ ਵਾ ਸਂਵਿਦਹਤਿ, ਏਵਂ ਤੁਮ੍ਹੇਪਿ ਪਟਿਪਾਟਿਯਾ ਸਮ੍ਪਤ੍ਤਘਰਂ ਪਵਿਸਿਤ੍ਵਾ ਯਂ ਇਰਿਯਾਪਥੇਸੁ ਪਸਨ੍ਨਾ ਮਨੁਸ੍ਸਾ ਦੇਨ੍ਤਿ, ਤਂ ਗਹੇਤ੍ਵਾ ਛਿਨ੍ਨਸਨ੍ਥਵਾ, ਤੇਸਂ ਕਿਚ੍ਚਕਰਣੀਯੇ ਅਬ੍ਯਾਵਟਾ ਹੁਤ੍ਵਾ ਨਿਕ੍ਖਮਥਾਤਿ ਦੀਪੇਤਿ.

ਇਮਸ੍ਸ ਪਨ ਨਿਚ੍ਚਨਵਕਭਾਵਸ੍ਸ ਆਵਿਭਾਵਤ੍ਥਂ ਦ੍ਵੇਭਾਤਿਕਵਤ੍ਥੁ ਕਥੇਤਬ੍ਬਂ – ਵਸਾਲ਼ਨਗਰਗਾਮਤੋ ਕਿਰ ਦ੍ਵੇ ਭਾਤਿਕਾ ਨਿਕ੍ਖਮਿਤ੍ਵਾ ਪਬ੍ਬਜਿਤਾ, ਤੇ ਚੂਲ਼ਨਾਗਤ੍ਥੇਰੋ ਚ ਮਹਾਨਾਗਤ੍ਥੇਰੋ ਚਾਤਿ ਪਞ੍ਞਾਯਿਂਸੁ. ਤੇ ਚਿਤ੍ਤਲਪਬ੍ਬਤੇ ਤਿਂਸ ਵਸ੍ਸਾਨਿ ਵਸਿਤ੍ਵਾ ਅਰਹਤ੍ਤਂ ਪਤ੍ਤਾ ‘‘ਮਾਤਰਂ ਪਸ੍ਸਿਸ੍ਸਾਮਾ’’ਤਿ ਆਗਨ੍ਤ੍ਵਾ ਵਸਾਲ਼ਨਗਰਵਿਹਾਰੇ ਵਸਿਤ੍ਵਾ ਪੁਨਦਿਵਸੇ ਮਾਤੁਗਾਮਂ ਪਿਣ੍ਡਾਯ ਪਵਿਸਿਂਸੁ. ਮਾਤਾਪਿ ਤੇਸਂ ਉਲ਼ੁਙ੍ਕੇਨ ਯਾਗੁਂ ਨੀਹਰਿਤ੍ਵਾ ਏਕਸ੍ਸ ਪਤ੍ਤੇ ਆਕਿਰਿ. ਤਸ੍ਸਾ ਤਂ ਓਲੋਕਯਮਾਨਾਯ ਪੁਤ੍ਤਸਿਨੇਹੋ ਉਪ੍ਪਜ੍ਜਿ. ਅਥ ਨਂ ਆਹ – ‘‘ਤ੍ਵਂ, ਤਾਤ, ਮਯ੍ਹਂ ਪੁਤ੍ਤੋ ਮਹਾਨਾਗੋ’’ਤਿ. ਥੇਰੋ ‘‘ਪਚ੍ਛਿਮਂ ਥੇਰਂ ਪੁਚ੍ਛ ਉਪਾਸਿਕੇ’’ਤਿ ਵਤ੍ਵਾ ਪਕ੍ਕਾਮਿ. ਪਚ੍ਛਿਮਥੇਰਸ੍ਸਪਿ ਯਾਗੁਂ ਦਤ੍ਵਾ, ‘‘ਤਾਤ, ਤ੍ਵਂ ਮਯ੍ਹਂ ਪੁਤ੍ਤੋ ਚੂਲ਼ਨਾਗੋ’’ਤਿ ਪੁਚ੍ਛਿ? ਥੇਰੋ ‘‘ਕਿਂ, ਉਪਾਸਿਕੇ, ਪੁਰਿਮਂ ਥੇਰਂ ਨ ਪੁਚ੍ਛਸੀ’’ਤਿ? ਵਤ੍ਵਾ ਪਕ੍ਕਾਮਿ. ਏਵਂ ਮਾਤਰਾਪਿ ਸਦ੍ਧਿਂ ਛਿਨ੍ਨਸਨ੍ਥਵੋ ਭਿਕ੍ਖੁ ਨਿਚ੍ਚਨਵਕੋ ਨਾਮ ਹੋਤਿ.

ਅਪ੍ਪਗਬ੍ਭਾਤਿ ਨ ਪਗਬ੍ਭਾ, ਅਟ੍ਠਟ੍ਠਾਨੇਨ ਕਾਯਪਾਗਬ੍ਭਿਯੇਨ, ਚਤੁਟ੍ਠਾਨੇਨ ਵਚੀਪਾਗਬ੍ਭਿਯੇਨ, ਅਨੇਕਟ੍ਠਾਨੇਨ ਮਨੋਪਾਗਬ੍ਭਿਯੇਨ ਚ ਵਿਰਹਿਤਾਤਿ ਅਤ੍ਥੋ. ਅਟ੍ਠਟ੍ਠਾਨਂ ਕਾਯਪਾਗਬ੍ਭਿਯਂ ਨਾਮ ਸਙ੍ਘਗਣਪੁਗ੍ਗਲ-ਭੋਜਨਸਾਲਾ-ਜਨ੍ਤਾਘਰਨਹਾਨਤਿਤ੍ਥ-ਭਿਕ੍ਖਾਚਾਰਮਗ੍ਗ-ਅਨ੍ਤਰਘਰਪ੍ਪਵੇਸਨੇਸੁ ਕਾਯੇਨ ਅਪ੍ਪਤਿਰੂਪਕਰਣਂ. ਸੇਯ੍ਯਥਿਦਂ – ਇਧੇਕਚ੍ਚੋ ਸਙ੍ਘਮਜ੍ਝੇ ਪਲ੍ਲਤ੍ਥਿਕਾਯ ਵਾ ਨਿਸੀਦਤਿ ਪਾਦੇ ਪਾਦਂ ਆਧਾਯਿਤ੍ਵਾ ਵਾਤਿ ਏਵਮਾਦਿ (ਮਹਾਨਿ. ੧੬੫). ਤਥਾ ਗਣਮਜ੍ਝੇ. ਗਣਮਜ੍ਝੇਤਿ ਚਤੁਪਰਿਸਸਨ੍ਨਿਪਾਤੇ ਵਾ ਸੁਤ੍ਤਨ੍ਤਿਕਗਣਾਦਿਸਨ੍ਨਿਪਾਤੇ ਵਾ. ਤਥਾ ਵੁਡ੍ਢਤਰੇ ਪੁਗ੍ਗਲੇ. ਭੋਜਨਸਾਲਾਯ ਪਨ ਵੁਡ੍ਢਾਨਂ ਆਸਨਂ ਨ ਦੇਤਿ, ਨਵਾਨਂ ਆਸਨਂ ਪਟਿਬਾਹਤਿ. ਤਥਾ ਜਨ੍ਤਾਘਰੇ. ਵੁਡ੍ਢੇ ਚੇਤ੍ਥ ਅਨਾਪੁਚ੍ਛਾ ਅਗ੍ਗਿਜਲਨਾਦੀਨਿ ਕਰੋਤਿ. ਨ੍ਹਾਨਤਿਤ੍ਥੇ ਚ ਯਦਿਦਂ ‘‘ਦਹਰੋ ਵੁਡ੍ਢੋਤਿ ਪਮਾਣਂ ਅਕਤ੍ਵਾ ਆਗਤਪਟਿਪਾਟਿਯਾ ਨ੍ਹਾਯਿਤਬ੍ਬ’’ਨ੍ਤਿ ਵੁਤ੍ਤਂ, ਤਮ੍ਪਿ ਅਨਾਦਿਯਨ੍ਤੋ ਪਚ੍ਛਾ ਆਗਨ੍ਤ੍ਵਾ ਉਦਕਂ ਓਤਰਿਤ੍ਵਾ ਵੁਡ੍ਢੇ ਚ ਨਵੇ ਚ ਬਾਧਤਿ. ਭਿਕ੍ਖਾਚਾਰਮਗ੍ਗੇ ਪਨ ਅਗ੍ਗਾਸਨਅਗ੍ਗੋਦਕਅਗ੍ਗਪਿਣ੍ਡਾਨਂ ਅਤ੍ਥਾਯ ਪੁਰਤੋ ਗਚ੍ਛਤਿ ਬਾਹਾਯ ਬਾਹਂ ਪਹਰਨ੍ਤੋ. ਅਨ੍ਤਰਘਰਪ੍ਪਵੇਸਨੇ ਵੁਡ੍ਢੇਹਿ ਪਠਮਤਰਂ ਪਵਿਸਤਿ, ਦਹਰੇਹਿ ਸਦ੍ਧਿਂ ਕਾਯਕੀਲ਼ਨਕਂ ਕਰੋਤੀਤਿ ਏਵਮਾਦਿ.

ਚਤੁਟ੍ਠਾਨਂ ਵਚੀਪਾਗਬ੍ਭਿਯਂ ਨਾਮ ਸਙ੍ਘਗਣਪੁਗ੍ਗਲਅਨ੍ਤਰਘਰੇਸੁ ਅਪ੍ਪਤਿਰੂਪਵਾਚਾਨਿਚ੍ਛਾਰਣਂ. ਸੇਯ੍ਯਥਿਦਂ – ਇਧੇਕਚ੍ਚੋ ਸਙ੍ਘਮਜ੍ਝੇ ਅਨਾਪੁਚ੍ਛਾ ਧਮ੍ਮਂ ਭਾਸਤਿ. ਤਥਾ ਪੁਬ੍ਬੇ ਵੁਤ੍ਤਪ੍ਪਕਾਰਸ੍ਸ ਗਣਸ੍ਸ ਮਜ੍ਝੇ ਪੁਗ੍ਗਲਸ੍ਸ ਚ ਸਨ੍ਤਿਕੇ, ਤਤ੍ਥੇਵ ਮਨੁਸ੍ਸੇਹਿ ਪਞ੍ਹਂ ਪੁਟ੍ਠੋ ਵੁਡ੍ਢਤਰਂ ਅਨਾਪੁਚ੍ਛਾ ਵਿਸ੍ਸਜ੍ਜੇਤਿ. ਅਨ੍ਤਰਘਰੇ ਪਨ ‘‘ਇਤ੍ਥਨ੍ਨਾਮੇ ਕਿਂ ਅਤ੍ਥਿ? ਕਿਂ ਯਾਗੁ, ਉਦਾਹੁ ਖਾਦਨੀਯਂ ਭੋਜਨੀਯਂ? ਕਿਂ ਮੇ ਦਸ੍ਸਸਿ? ਕਿਂ ਅਜ੍ਜ ਖਾਦਿਸ੍ਸਾਮ? ਕਿਂ ਭੁਞ੍ਜਿਸ੍ਸਾਮ? ਕਿਂ ਪਿਵਿਸ੍ਸਾਮਾ’’ਤਿਆਦੀਨਿ ਭਾਸਤਿ.

ਅਨੇਕਟ੍ਠਾਨਂ ਮਨੋਪਾਗਬ੍ਭਿਯਂ ਨਾਮ ਤੇਸੁ ਤੇਸੁ ਠਾਨੇਸੁ ਕਾਯਵਾਚਾਹਿ ਅਜ੍ਝਾਚਾਰਂ ਅਨਾਪਜ੍ਜਿਤ੍ਵਾਪਿ ਮਨਸਾਵ ਕਾਮਵਿਤਕ੍ਕਾਦੀਨਂ ਵਿਤਕ੍ਕਨਂ. ਅਪਿਚ ਦੁਸ੍ਸੀਲਸ੍ਸੇਵ ਸਤੋ ‘‘ਸੀਲਵਾਤਿ ਮਂ ਜਨੋ ਜਾਨਾਤੂ’’ਤਿ ਏਵਂ ਪਵਤ੍ਤਾ ਪਾਪਿਚ੍ਛਤਾਪਿ ਮਨੋਪਾਗਬ੍ਭਿਯਂ. ਇਤਿ ਸਬ੍ਬੇਸਮ੍ਪਿ ਇਮੇਸਂ ਪਾਗਬ੍ਭਿਯਾਨਂ ਅਭਾਵੇਨ ਅਪ੍ਪਗਬ੍ਭਾ ਹੁਤ੍ਵਾ ਉਪਸਙ੍ਕਮਥਾਤਿ ਵਦਤਿ.

ਜਰੁਦਪਾਨਨ੍ਤਿ ਜਿਣ੍ਣਕੂਪਂ. ਪਬ੍ਬਤਵਿਸਮਨ੍ਤਿ ਪਬ੍ਬਤੇ ਵਿਸਮਂ ਪਪਾਤਟ੍ਠਾਨਂ. ਨਦੀਵਿਦੁਗ੍ਗਨ੍ਤਿ ਨਦਿਯਾ ਵਿਦੁਗ੍ਗਂ ਛਿਨ੍ਨਤਟਟ੍ਠਾਨਂ. ਅਪਕਸ੍ਸੇਵ ਕਾਯਨ੍ਤਿ ਤਾਦਿਸਾਨਿ ਠਾਨਾਨਿ ਯੋ ਖਿਡ੍ਡਾਦਿਪਸੁਤੋ ਕਾਯਂ ਅਨਪਕਸ੍ਸ ਏਕਤੋਭਾਰਿਯਂ ਅਕਤ੍ਵਾਵ ਵਾਯੁਪਤ੍ਥਮ੍ਭਕਂ ਅਗ੍ਗਾਹਾਪੇਤ੍ਵਾ ਚਿਤ੍ਤਮ੍ਪਿ ਅਨਪਕਸ੍ਸ ‘‘ਏਤ੍ਥ ਪਤਿਤੋ ਹਤ੍ਥਪਾਦਭਞ੍ਜਨਾਦੀਨਿ ਪਾਪੁਣਾਤੀ’’ਤਿ ਅਨਾਦੀਨਵਦਸ੍ਸਾਵਿਤਾਯ ਅਨੁਬ੍ਬੇਜੇਤ੍ਵਾ ਸਮ੍ਪਿਯਾਯਮਾਨੋ ਓਲੋਕੇਤਿ, ਸੋ ਪਤਿਤ੍ਵਾ ਹਤ੍ਥਪਾਦਭਞ੍ਜਨਾਦਿਅਨਤ੍ਥਂ ਪਾਪੁਣਾਤਿ. ਯੋ ਪਨ ਉਦਕਤ੍ਥਿਕੋ ਵਾ ਅਞ੍ਞੇਨ ਵਾ ਕੇਨਚਿ ਕਿਚ੍ਚੇਨ ਓਲੋਕੇਤੁਕਾਮੋ ਕਾਯਂ ਅਪਕਸ੍ਸ ਏਕਤੋ ਭਾਰਿਯਂ ਕਤ੍ਵਾ ਵਾਯੁਪਤ੍ਥਮ੍ਭਕਂ ਗਾਹਾਪੇਤ੍ਵਾ, ਚਿਤ੍ਤਮ੍ਪਿ ਅਪਕਸ੍ਸ ਆਦੀਨਵਦਸ੍ਸਨੇਨ ਸਂਵੇਜੇਤ੍ਵਾ ਓਲੋਕੇਤਿ, ਸੋ ਨ ਪਤਤਿ, ਯਥਾਰੁਚਿਂ ਓਲੋਕੇਤ੍ਵਾ ਸੁਖੀ ਯੇਨਕਾਮਂ ਪਕ੍ਕਮਤਿ.

ਏਵਮੇਵ ਖੋਤਿ ਏਤ੍ਥ ਇਦਂ ਓਪਮ੍ਮਸਂਸਨ੍ਦਨਂ – ਜਰੁਦਪਾਨਾਦਯੋ ਵਿਯ ਹਿ ਚਤ੍ਤਾਰਿ ਕੁਲਾਨਿ, ਓਲੋਕਨਪੁਰਿਸੋ ਵਿਯ ਭਿਕ੍ਖੁ. ਯਥਾ ਅਨਪਕਟ੍ਠਕਾਯਚਿਤ੍ਤੋ ਤਾਨਿ ਓਲੋਕੇਨ੍ਤੋ ਪੁਰਿਸੋ ਤਤ੍ਥ ਪਤਤਿ, ਏਵਂ ਅਰਕ੍ਖਿਤੇਹਿ ਕਾਯਾਦੀਹਿ ਕੁਲਾਨਿ ਉਪਸਙ੍ਕਮਨ੍ਤੋ ਭਿਕ੍ਖੁ ਕੁਲੇਸੁ ਬਜ੍ਝਤਿ, ਤਤੋ ਨਾਨਪ੍ਪਕਾਰਂ ਸੀਲਪਾਦਭਞ੍ਜਨਾਦਿਅਨਤ੍ਥਂ ਪਾਪੁਣਾਤਿ. ਯਥਾ ਪਨ ਅਪਕਟ੍ਠਕਾਯਚਿਤ੍ਤੋ ਪੁਰਿਸੋ ਤਤ੍ਥ ਨ ਪਤਤਿ, ਏਵਂ ਰਕ੍ਖਿਤੇਨੇਵ ਕਾਯੇਨ ਰਕ੍ਖਿਤੇਹਿ ਚਿਤ੍ਤੇਹਿ ਰਕ੍ਖਿਤਾਯ ਵਾਚਾਯ ਸੁਪ੍ਪਟ੍ਠਿਤਾਯ ਸਤਿਯਾ ਅਪਕਟ੍ਠਕਾਯਚਿਤ੍ਤੋ ਹੁਤ੍ਵਾ ਕੁਲਾਨਿ ਉਪਸਙ੍ਕਮਨ੍ਤੋ ਭਿਕ੍ਖੁ ਕੁਲੇਸੁ ਨ ਬਜ੍ਝਤਿ. ਅਥਸ੍ਸ ਯਥਾ ਤਤ੍ਥ ਅਪਤਿਤਸ੍ਸ ਪੁਰਿਸਸ੍ਸ, ਨ ਪਾਦਾ ਭਞ੍ਜਨ੍ਤਿ, ਏਵਂ ਸੀਲਪਾਦੋ ਨ ਭਿਜ੍ਜਤਿ. ਯਥਾ ਹਤ੍ਥਾ ਨ ਭਞ੍ਜਨ੍ਤਿ, ਏਵਂ ਸਦ੍ਧਾਹਤ੍ਥੋ ਨ ਭਿਜ੍ਜਤਿ. ਯਥਾ ਕੁਚ੍ਛਿ ਨ ਭਿਜ੍ਜਤਿ, ਏਵਂ ਸਮਾਧਿਕੁਚ੍ਛਿ ਨ ਭਿਜ੍ਜਤਿ. ਯਥਾ ਸੀਸਂ ਨ ਭਿਜ੍ਜਤਿ, ਏਵਂ ਞਾਣਸੀਸਂ ਨ ਭਿਜ੍ਜਤਿ, ਯਥਾ ਚ ਤਂ ਖਾਣੁਕਣ੍ਟਕਾਦਯੋ ਨ ਵਿਜ੍ਝਨ੍ਤਿ, ਏਵਮਿਮਂ ਰਾਗਕਣ੍ਟਕਾਦਯੋ ਨ ਵਿਜ੍ਝਨ੍ਤਿ. ਯਥਾ ਸੋ ਨਿਰੁਪਦ੍ਦਵੋ ਯਥਾਰੁਚਿ ਓਲੋਕੇਤ੍ਵਾ ਸੁਖੀ ਯੇਨਕਾਮਂ ਪਕ੍ਕਮਤਿ, ਏਵਂ ਭਿਕ੍ਖੁ ਕੁਲਾਨਿ ਨਿਸ੍ਸਾਯ ਚੀਵਰਾਦਯੋ ਪਚ੍ਚਯੇ ਪਟਿਸੇਵਨ੍ਤੋ ਕਮ੍ਮਟ੍ਠਾਨਂ ਵਡ੍ਢੇਤ੍ਵਾ ਸਙ੍ਖਾਰੇ ਸਮ੍ਮਸਨ੍ਤੋ ਅਰਹਤ੍ਤਂ ਪਤ੍ਵਾ ਲੋਕੁਤ੍ਤਰਸੁਖੇਨ ਸੁਖਿਤੋ ਯੇਨਕਾਮਂ ਅਗਤਪੁਬ੍ਬਂ ਨਿਬ੍ਬਾਨਦਿਸਂ ਗਚ੍ਛਤਿ.

ਇਦਾਨਿ ਯੋ ਹੀਨਾਧਿਮੁਤ੍ਤਿਕੋ ਮਿਚ੍ਛਾਪਟਿਪਨ੍ਨੋ ਏਵਂ ਵਦੇਯ੍ਯ ‘‘ਸਮ੍ਮਾਸਮ੍ਬੁਦ੍ਧੋ ‘ਤਿਵਿਧਂ ਪਾਗਬ੍ਭਿਯਂ ਪਹਾਯ ਨਿਚ੍ਚਨਵਕਤ੍ਤੇਨ ਚਨ੍ਦੂਪਮਾ ਕੁਲਾਨਿ ਉਪਸਙ੍ਕਮਥਾ’ਤਿ ਵਦਨ੍ਤੋ ਅਟ੍ਠਾਨੇ ਠਪੇਤਿ, ਅਸਯ੍ਹਂ ਭਾਰਂ ਆਰੋਪੇਤਿ, ਯਂ ਨ ਸਕ੍ਕਾ ਕਾਤੁਂ ਤਂ ਕਾਰੇਤੀ’’ਤਿ, ਤਸ੍ਸ ਵਾਦਪਥਂ ਪਚ੍ਛਿਨ੍ਦਿਤ੍ਵਾ, ‘‘ਸਕ੍ਕਾ ਏਵਂ ਕਾਤੁਂ, ਅਤ੍ਥਿ ਏਵਰੂਪੋ ਭਿਕ੍ਖੂ’’ਤਿ ਦਸ੍ਸੇਨ੍ਤੋ ਕਸ੍ਸਪੋ, ਭਿਕ੍ਖਵੇਤਿਆਦਿਮਾਹ.

ਆਕਾਸੇ ਪਾਣਿਂ ਚਾਲੇਸੀਤਿ ਨੀਲੇ ਗਗਨਨ੍ਤਰੇ ਯਮਕਵਿਜ੍ਜੁਤਂ ਚਾਰਯਮਾਨੋ ਵਿਯ ਹੇਟ੍ਠਾਭਾਗਂ ਉਪਰਿਭਾਗਂ ਉਭਤੋਪਸ੍ਸੇਸੁ ਪਾਣਿਂ ਸਞ੍ਚਾਰੇਸਿ. ਇਦਞ੍ਚ ਪਨ ਤੇਪਿਟਕੇ ਬੁਦ੍ਧਵਚਨੇ ਅਸਮ੍ਭਿਨ੍ਨਪਦਂ ਨਾਮ. ਅਤ੍ਤਮਨੋਤਿ ਤੁਟ੍ਠਚਿਤ੍ਤੋ ਸਕਮਨੋ, ਨ ਦੋਮਨਸ੍ਸੇਨ ਪਚ੍ਛਿਨ੍ਦਿਤ੍ਵਾ ਗਹਿਤਮਨੋ. ਕਸ੍ਸਪਸ੍ਸ, ਭਿਕ੍ਖਵੇਤਿ ਇਦਮ੍ਪਿ ਪੁਰਿਮਨਯੇਨੇਵ ਪਰਵਾਦਂ ਪਚ੍ਛਿਨ੍ਦਿਤ੍ਵਾ ਅਤ੍ਥਿ ਏਵਰੂਪੋ ਭਿਕ੍ਖੂਤਿ ਦਸ੍ਸਨਤ੍ਥਂ ਵੁਤ੍ਤਂ.

ਪਸਨ੍ਨਾਕਾਰਂ ਕਰੇਯ੍ਯੁਨ੍ਤਿ ਚੀਵਰਾਦਯੋ ਪਚ੍ਚਯੇ ਦਦੇਯ੍ਯੁਂ. ਤਥਤ੍ਤਾਯ ਪਟਿਪਜ੍ਜੇਯ੍ਯੁਨ੍ਤਿ ਸੀਲਸ੍ਸ ਆਗਤਟ੍ਠਾਨੇ ਸੀਲਂ ਪੂਰਯਮਾਨਾ, ਸਮਾਧਿਵਿਪਸ੍ਸਨਾ ਮਗ੍ਗਫਲਾਨਂ ਆਗਤਟ੍ਠਾਨੇ ਤਾਨਿ ਤਾਨਿ ਸਮ੍ਪਾਦਯਮਾਨਾ ਤਥਾਭਾਵਾਯ ਪਟਿਪਜ੍ਜੇਯ੍ਯੁਂ. ਅਨੁਦਯਨ੍ਤਿ ਰਕ੍ਖਣਭਾਵਂ. ਅਨੁਕਮ੍ਪਨ੍ਤਿ ਮੁਦੁਚਿਤ੍ਤਤਂ. ਉਭਯਞ੍ਚੇਤਂ ਕਾਰੁਞ੍ਞਸ੍ਸੇਵ ਵੇਵਚਨਂ. ਕਸ੍ਸਪੋ, ਭਿਕ੍ਖਵੇਤਿ ਇਦਮ੍ਪਿ ਪੁਰਿਮਨਯੇਨੇਵ ਪਰਵਾਦਂ ਪਚ੍ਛਿਨ੍ਦਿਤ੍ਵਾ ਅਤ੍ਥਿ ਏਵਰੂਪੋ ਭਿਕ੍ਖੂਤਿ ਦਸ੍ਸਨਤ੍ਥਂ ਵੁਤ੍ਤਂ. ਕਸ੍ਸਪੇਨ ਵਾਤਿ ਏਤ੍ਥ ਚਨ੍ਦੋਪਮਾਦਿਵਸੇਨ ਯੋਜਨਂ ਕਤ੍ਵਾ ਪੁਰਿਮਨਯੇਨੇਵ ਅਤ੍ਥੋ ਵੇਦਿਤਬ੍ਬੋ. ਤਤਿਯਂ.