੭. ਸਞ੍ਞਾਨਾਨਤ੍ਤਸੁਤ੍ਤਵਣ੍ਣਨਾ

੯੧. ਸਤ੍ਤਮੇ ਰੂਪਧਾਤੂਤਿ ਆਪਾਥੇ ਪਤਿਤਂ ਅਤ੍ਤਨੋ ਵਾ ਪਰਸ੍ਸ ਵਾ ਸਾਟਕਵੇਠਨਾਦਿਵਤ੍ਥੁਕਂ ਰੂਪਾਰਮ੍ਮਣਂ. ਰੂਪਸਞ੍ਞਾਤਿ ਚਕ੍ਖੁਵਿਞ੍ਞਾਣਸਮ੍ਪਯੁਤ੍ਤਾ ਸਞ੍ਞਾ. ਰੂਪਸਙ੍ਕਪ੍ਪੋਤਿ ਸਮ੍ਪਟਿਚ੍ਛਨਾਦੀਹਿ ਤੀਹਿ ਚਿਤ੍ਤੇਹਿ ਸਮ੍ਪਯੁਤ੍ਤੋ ਸਙ੍ਕਪ੍ਪੋ. ਰੂਪਚ੍ਛਨ੍ਦੋਤਿ ਰੂਪੇ ਛਨ੍ਦਿਕਤਟ੍ਠੇਨ ਛਨ੍ਦੋ. ਰੂਪਪਰਿਲ਼ਾਹੋਤਿ ਰੂਪੇ ਅਨੁਡਹਨਟ੍ਠੇਨ ਪਰਿਲ਼ਾਹੋ. ਰੂਪਪਰਿਯੇਸਨਾਤਿ ਪਰਿਲ਼ਾਹੇ ਉਪ੍ਪਨ੍ਨੇ ਸਨ੍ਦਿਟ੍ਠਸਮ੍ਭਤ੍ਤੇ ਗਹੇਤ੍ਵਾ ਤਸ੍ਸ ਰੂਪਸ੍ਸ ਪਟਿਲਾਭਤ੍ਥਾਯ ਪਰਿਯੇਸਨਾ. ਏਤ੍ਥ ਚ ਸਞ੍ਞਾਸਙ੍ਕਪ੍ਪਛਨ੍ਦਾ ਏਕਜਵਨਵਾਰੇਪਿ ਨਾਨਾਜਵਨਵਾਰੇਪਿ ਲਬ੍ਭਨ੍ਤਿ, ਪਰਿਲ਼ਾਹਪਰਿਯੇਸਨਾ ਪਨ ਨਾਨਾਜਵਨਵਾਰੇਯੇਵ ਲਬ੍ਭਨ੍ਤੀਤਿ. ਏਵਂ ਖੋ, ਭਿਕ੍ਖਵੇ, ਧਾਤੁਨਾਨਤ੍ਤਨ੍ਤਿ ਏਤ੍ਥ ਚ ਏਵਂ ਰੂਪਾਦਿਨਾਨਾਸਭਾਵਂ ਧਾਤੁਂ ਪਟਿਚ੍ਚ ਰੂਪਸਞ੍ਞਾਦਿਨਾਨਾਸਭਾਵਸਞ੍ਞਾ ਉਪ੍ਪਜ੍ਜਤੀਤਿ ਇਮਿਨਾ ਨਯੇਨ ਅਤ੍ਥੋ ਵੇਦਿਤਬ੍ਬੋ. ਸਤ੍ਤਮਂ.