੧.ਧਾਤੁਨਾਨਤ੍ਤਸੁਤ੍ਤਵਣ੍ਣਨਾ

੮੫. ਧਾਤੁਸਂਯੁਤ੍ਤਸ੍ਸ ਪਠਮੇ ਨਿਸ੍ਸਤ੍ਤਟ੍ਠਸੁਞ੍ਞਤਟ੍ਠਸਙ੍ਖਾਤੇਨ ਸਭਾਵਟ੍ਠੇਨ ਧਾਤੂਤਿ ਲਦ੍ਧਨਾਮਾਨਂ ਧਮ੍ਮਾਨਂ ਨਾਨਾਸਭਾਵੋ ਧਾਤੁਨਾਨਤ੍ਤਂ. ਚਕ੍ਖੁਧਾਤੂਤਿਆਦੀਸੁ ਚਕ੍ਖੁਪਸਾਦੋ ਚਕ੍ਖੁਧਾਤੁ, ਰੂਪਾਰਮ੍ਮਣਂ ਰੂਪਧਾਤੁ, ਚਕ੍ਖੁਪਸਾਦਵਤ੍ਥੁਕਂ ਚਿਤ੍ਤਂ ਚਕ੍ਖੁਵਿਞ੍ਞਾਣਧਾਤੁ. ਸੋਤਪਸਾਦੋ ਸੋਤਧਾਤੁ, ਸਦ੍ਦਾਰਮ੍ਮਣਂ ਸਦ੍ਦਧਾਤੁ, ਸੋਤਪਸਾਦਵਤ੍ਥੁਕਂ ਚਿਤ੍ਤਂ ਸੋਤਵਿਞ੍ਞਾਣਧਾਤੁ. ਘਾਨਪਸਾਦੋ ਘਾਨਧਾਤੁ, ਗਨ੍ਧਾਰਮ੍ਮਣਂ ਗਨ੍ਧਧਾਤੁ, ਘਾਨਪਸਾਦਵਤ੍ਥੁਕਂ ਚਿਤ੍ਤਂ ਘਾਨਵਿਞ੍ਞਾਣਧਾਤੁ. ਜਿਵ੍ਹਾਪਸਾਦੋ ਜਿਵ੍ਹਾਧਾਤੁ, ਰਸਾਰਮ੍ਮਣਂ ਰਸਧਾਤੁ, ਜਿਵ੍ਹਾਪਸਾਦਵਤ੍ਥੁਕਂ ਚਿਤ੍ਤਂ ਜਿਵ੍ਹਾਵਿਞ੍ਞਾਣਧਾਤੁ. ਕਾਯਪਸਾਦੋ ਕਾਯਧਾਤੁ, ਫੋਟ੍ਠਬ੍ਬਾਰਮ੍ਮਣਂ ਫੋਟ੍ਠਬ੍ਬਧਾਤੁ, ਕਾਯਪਸਾਦਵਤ੍ਥੁਕਂ ਚਿਤ੍ਤਂ ਕਾਯਵਿਞ੍ਞਾਣਧਾਤੁ. ਤਿਸ੍ਸੋ ਮਨੋਧਾਤੁਯੋ ਮਨੋਧਾਤੁ, ਵੇਦਨਾਦਯੋ ਤਯੋ ਖਨ੍ਧਾ ਸੁਖੁਮਰੂਪਾਨਿ ਨਿਬ੍ਬਾਨਞ੍ਚ ਧਮ੍ਮਧਾਤੁ, ਸਬ੍ਬਮ੍ਪਿ ਮਨੋਵਿਞ੍ਞਾਣਂ ਮਨੋਵਿਞ੍ਞਾਣਧਾਤੂਤਿ. ਏਤ੍ਥ ਚ ਸੋਲ਼ਸ ਧਾਤੁਯੋ ਕਾਮਾਵਚਰਾ, ਅਵਸਾਨੇ ਦ੍ਵੇ ਚਤੁਭੂਮਿਕਾਤਿ. ਪਠਮਂ.