੨. ਅਭਿਸਮਯਸਂਯੁਤ੍ਤਂ

੧. ਨਖਸਿਖਾਸੁਤ੍ਤਵਣ੍ਣਨਾ

੭੪. ਅਭਿਸਮਯਸਂਯੁਤ੍ਤਸ੍ਸ ਪਠਮੇ ਨਖਸਿਖਾਯਨ੍ਤਿ ਮਂਸਟ੍ਠਾਨੇਨ ਵਿਮੁਤ੍ਤੇ ਨਖਗ੍ਗੇ. ਨਖਸਿਖਾ ਚ ਨਾਮ ਲੋਕਿਯਾਨਂ ਮਹਤੀਪਿ ਹੋਤਿ, ਸਤ੍ਥੁ ਪਨ ਰਤ੍ਤੁਪ੍ਪਲਪਤ੍ਤਕੋਟਿ ਵਿਯ ਸੁਖੁਮਾ. ਕਥਂ ਪਨੇਤ੍ਥ ਪਂਸੁ ਪਤਿਟ੍ਠਿਤੋਤਿ? ਅਧਿਟ੍ਠਾਨਬਲੇਨ. ਭਗਵਤਾ ਹਿ ਅਤ੍ਥਂ ਞਾਪੇਤੁਕਾਮੇਨ ਅਧਿਟ੍ਠਾਨਬਲੇਨ ਤਤ੍ਥ ਪਤਿਟ੍ਠਾਪਿਤੋ. ਸਤਿਮਂ ਕਲਨ੍ਤਿ ਮਹਾਪਥਵਿਯਾ ਪਂਸੁਂ ਸਤਕੋਟ੍ਠਾਸੇ ਕਤ੍ਵਾ ਤਤੋ ਏਕਕੋਟ੍ਠਾਸਂ. ਪਰਤੋਪਿ ਏਸੇਵ ਨਯੋ. ਅਭਿਸਮੇਤਾਵਿਨੋਤਿ ਪਞ੍ਞਾਯ ਅਰਿਯਸਚ੍ਚਾਨਿ ਅਭਿਸਮੇਤ੍ਵਾ ਠਿਤਸ੍ਸ. ਪੁਰਿਮਂ ਦੁਕ੍ਖਕ੍ਖਨ੍ਧਂ ਪਰਿਕ੍ਖੀਣਂ ਪਰਿਯਾਦਿਣ੍ਣਂ ਉਪਨਿਧਾਯਾਤਿ ਏਤਦੇਵ ਬਹੁਤਰਂ ਦੁਕ੍ਖਂ, ਯਦਿਦਂ ਪਰਿਕ੍ਖੀਣਨ੍ਤਿ ਏਵਂ ਪਠਮਂ ਵੁਤ੍ਤਂ ਦੁਕ੍ਖਕ੍ਖਨ੍ਧਂ ਉਪਨਿਧਾਯ, ਞਾਣੇਨ ਤਂ ਤਸ੍ਸ ਸਨ੍ਤਿਕੇ ਠਪੇਤ੍ਵਾ ਉਪਪਰਿਕ੍ਖਿਯਮਾਨੇਤਿ ਅਤ੍ਥੋ. ਕਤਮਂ ਪਨੇਤ੍ਥ ਪੁਰਿਮਦੁਕ੍ਖਂ ਨਾਮ? ਯਂ ਪਰਿਕ੍ਖੀਣਂ. ਕਤਮਂ ਪਨ ਪਰਿਕ੍ਖੀਣਂ? ਯਂ ਪਠਮਮਗ੍ਗਸ੍ਸ ਅਭਾਵਿਤਤ੍ਤਾ ਉਪ੍ਪਜ੍ਜੇਯ੍ਯ. ਕਤਮਂ ਪਨ ਉਪਨਿਧਾਯ? ਯਂ ਸਤ੍ਤਸੁ ਅਤ੍ਤਭਾਵੇਸੁ ਅਪਾਯੇ ਅਟ੍ਠਮਞ੍ਚ ਪਟਿਸਨ੍ਧਿਂ ਆਦਿਂ ਕਤ੍ਵਾ ਯਤ੍ਥ ਕਤ੍ਥਚਿ ਉਪ੍ਪਜ੍ਜੇਯ੍ਯ, ਸਬ੍ਬਂ ਤਂ ਪਰਿਕ੍ਖੀਣਨ੍ਤਿ ਵੇਦਿਤਬ੍ਬਂ. ਸਤ੍ਤਕ੍ਖਤ੍ਤੁਨ੍ਤਿ ਸਤ੍ਤ ਵਾਰੇ, ਸਤ੍ਤਸੁ ਅਤ੍ਤਭਾਵੇਸੂਤਿ ਅਤ੍ਥੋ. ਪਰਮਤਾਤਿ ਇਦਮਸ੍ਸ ਪਰਂ ਪਮਾਣਨ੍ਤਿ ਦਸ੍ਸੇਤਿ. ਮਹਤ੍ਥਿਯੋਤਿ ਮਹਤੋ ਅਤ੍ਥਸ੍ਸ ਨਿਪ੍ਫਾਦਕੋ. ਪਠਮਂ.

੨. ਪੋਕ੍ਖਰਣੀਸੁਤ੍ਤਵਣ੍ਣਨਾ

੭੫. ਦੁਤਿਯੇ ਪੋਕ੍ਖਰਣੀਤਿ ਵਾਪੀ. ਉਬ੍ਬੇਧੇਨਾਤਿ ਗਮ੍ਭੀਰਤਾਯ. ਸਮਤਿਤ੍ਤਿਕਾਤਿ ਮੁਖਵਟ੍ਟਿਸਮਾ. ਕਾਕਪੇਯ੍ਯਾਤਿ ਸਕ੍ਕਾ ਹੋਤਿ ਤੀਰੇ ਠਿਤੇਨ ਕਾਕੇਨ ਪਕਤਿਯਾਪਿ ਮੁਖਤੁਣ੍ਡਿਕਂ ਓਤਾਰੇਤ੍ਵਾ ਪਾਤੁਂ. ਦੁਤਿਯਂ.

੩. ਸਂਭੇਜ੍ਜਉਦਕਸੁਤ੍ਤਾਦਿਵਣ੍ਣਨਾ

੭੬-੭੭. ਤਤਿਯੇ ਯਤ੍ਥਿਮਾਤਿ ਯਸ੍ਮਿਂ ਸਮ੍ਭਿਜ੍ਜਟ੍ਠਾਨੇ ਇਮਾ. ਸਂਸਨ੍ਦਨ੍ਤੀਤਿ ਸਮਾਗਨ੍ਤ੍ਵਾ ਸਨ੍ਦਨ੍ਤਿ. ਸਮੇਨ੍ਤੀਤਿ ਸਮਾਗਚ੍ਛਨ੍ਤਿ. ਦ੍ਵੇ ਵਾ ਤਿ ਵਾਤਿ ਦ੍ਵੇ ਵਾ ਤੀਣਿ ਵਾ. ਉਦਕਫੁਸਿਤਾਨੀਤਿ ਉਦਕਬਿਨ੍ਦੂਨਿ. ਸਂਭੇਜ੍ਜਉਦਕਨ੍ਤਿ ਅਞ੍ਞਾਹਿ ਨਦੀਹਿ ਸਦ੍ਧਿਂ ਸਮ੍ਭਿਨ੍ਨਟ੍ਠਾਨੇ ਉਦਕਂ. ਚਤੁਤ੍ਥਂ ਉਤ੍ਤਾਨਤ੍ਥਮੇਵ. ਤਤਿਯਚਤੁਤ੍ਥਾਨਿ.

੫. ਪਥਵੀਸੁਤ੍ਤਾਦਿਵਣ੍ਣਨਾ

੭੮-੮੪. ਪਞ੍ਚਮੇ ਮਹਾਪਥਵਿਯਾਤਿ ਚਕ੍ਕਵਾਲ਼ਬ੍ਭਨ੍ਤਰਾਯ ਮਹਾਪਥਵਿਯਾ ਉਦ੍ਧਰਿਤ੍ਵਾ. ਕੋਲਟ੍ਠਿਮਤ੍ਤਿਯੋਤਿ ਪਦਰਟ੍ਠਿਪਮਾਣਾ. ਗੁਲ਼ਿਕਾਤਿ ਮਤ੍ਤਿਕਗੁਲ਼ਿਕਾ. ਉਪਨਿਕ੍ਖਿਪੇਯ੍ਯਾਤਿ ਏਕਸ੍ਮਿਂ ਠਾਨੇ ਠਪੇਯ੍ਯ. ਛਟ੍ਠਾਦੀਸੁ ਵੁਤ੍ਤਨਯੇਨੇਵ ਅਤ੍ਥੋ ਵੇਦਿਤਬ੍ਬੋ. ਪਰਿਯੋਸਾਨੇ ਪਨ ਅਞ੍ਞਤਿਤ੍ਥਿਯਸਮਣਬ੍ਰਾਹ੍ਮਣਪਰਿਬ੍ਬਾਜਕਾਨਂ ਅਧਿਗਮੋਤਿ ਬਾਹਿਰਕਾਨਂ ਸਬ੍ਬੋਪਿ ਗੁਣਾਧਿਗਮੋ ਪਠਮਮਗ੍ਗੇਨ ਅਧਿਗਤਗੁਣਾਨਂ ਸਤਭਾਗਮ੍ਪਿ ਸਹਸ੍ਸਭਾਗਮ੍ਪਿ ਸਤਸਹਸ੍ਸਭਾਗਮ੍ਪਿ ਨ ਉਪਗਚ੍ਛਤੀਤਿ. ਪਞ੍ਚਮਾਦੀਨਿ.

ਅਭਿਸਮਯਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.