੮. ਨਨ੍ਦਸੁਤ੍ਤਵਣ੍ਣਨਾ

੨੪੨. ਅਟ੍ਠਮੇ ਆਕੋਟਿਤਪਚ੍ਚਾਕੋਟਿਤਾਨੀਤਿ ਏਕਸ੍ਮਿਂ ਪਸ੍ਸੇ ਪਾਣਿਨਾ ਵਾ ਮੁਗ੍ਗਰੇਨ ਵਾ ਆਕੋਟਨੇਨ ਆਕੋਟਿਤਾਨਿ, ਪਰਿਵਤ੍ਤੇਤ੍ਵਾ ਆਕੋਟਨੇਨ ਪਚ੍ਚਾਕੋਟਿਤਾਨਿ. ਅਞ੍ਜੇਤ੍ਵਾਤਿ ਅਞ੍ਜਨੇਨ ਪੂਰੇਤ੍ਵਾ. ਅਚ੍ਛਂ ਪਤ੍ਤਨ੍ਤਿ ਵਿਪ੍ਪਸਨ੍ਨਵਣ੍ਣਂ ਮਤ੍ਤਿਕਾਪਤ੍ਤਂ. ਕਸ੍ਮਾ ਪਨ ਥੇਰੋ ਏਵਮਕਾਸੀਤਿ? ਸਤ੍ਥੁ ਅਜ੍ਝਾਸਯਜਾਨਨਤ੍ਥਂ. ਏਵਂ ਕਿਰਸ੍ਸ ਅਹੋਸਿ ‘‘ਸਚੇ ਸਤ੍ਥਾ ‘ਸੋਭਤਿ ਵਤ ਮੇ ਅਯਂ ਕਨਿਟ੍ਠਭਾਤਿਕੋ’ਤਿ ਵਕ੍ਖਤਿ, ਯਾਵਜੀਵਂ ਇਮਿਨਾ ਵਾਕਾਰੇਨ ਚਰਿਸ੍ਸਾਮਿ. ਸਚੇ ਏਤ੍ਥ ਦੋਸਂ ਦਸ੍ਸਤਿ, ਇਮਂ ਆਕਾਰਂ ਪਹਾਯ ਸਙ੍ਕਾਰਚੋਲ਼ਂ ਗਹੇਤ੍ਵਾ ਚੀਵਰਂ ਕਤ੍ਵਾ ਧਾਰੇਨ੍ਤੋ ਪਰਿਯਨ੍ਤਸੇਨਾਸਨੇ ਵਸਨ੍ਤੋ ਚਰਿਸ੍ਸਾਮੀ’’ਤਿ. ਅਸ੍ਸਸੀਤਿ ਭਵਿਸ੍ਸਸਿ.

ਅਞ੍ਞਾਤੁਞ੍ਛੇਨਾਤਿ ਅਭਿਲਕ੍ਖਿਤੇਸੁ ਇਸ੍ਸਰਜਨਗੇਹੇਸੁ ਕਟੁਕਭਣ੍ਡਸਮ੍ਭਾਰਂ ਸੁਗਨ੍ਧਂ ਭੋਜਨਂ ਪਰਿਯੇਸਨ੍ਤਸ੍ਸ ਉਞ੍ਛੋ ਞਾਤੁਞ੍ਛੋ ਨਾਮ. ਘਰਪਟਿਪਾਟਿਯਾ ਪਨ ਦ੍ਵਾਰੇ ਠਿਤੇਨ ਲਦ੍ਧਂ ਮਿਸ੍ਸਕਭੋਜਨਂ ਅਞ੍ਞਾਤੁਞ੍ਛੋ ਨਾਮ. ਅਯਮਿਧ ਅਧਿਪ੍ਪੇਤੋ. ਕਾਮੇਸੁ ਅਨਪੇਕ੍ਖਿਨਨ੍ਤਿ ਵਤ੍ਥੁਕਾਮਕਿਲੇਸਕਾਮੇਸੁ ਨਿਰਪੇਕ੍ਖਂ. ਆਰਞ੍ਞਿਕੋ ਚਾਤਿਆਦਿ ਸਬ੍ਬਂ ਸਮਾਦਾਨਵਸੇਨੇਵ ਵੁਤ੍ਤਂ. ਕਾਮੇਸੁ ਚ ਅਨਪੇਕ੍ਖੋਤਿ ਇਦਂ ਸੁਤ੍ਤਂ ਦੇਵਲੋਕੇ ਅਚ੍ਛਰਾਯੋ ਦਸ੍ਸੇਤ੍ਵਾ ਆਗਤੇਨ ਅਪਰਭਾਗੇ ਕਥਿਤਂ. ਇਮਸ੍ਸ ਕਥਿਤਦਿਵਸਤੋ ਪਟ੍ਠਾਯ ਥੇਰੋ ਘਟੇਨ੍ਤੋ ਵਾਯਮਨ੍ਤੋ ਕਤਿਪਾਹੇਨੇਵ ਅਰਹਤ੍ਤੇ ਪਤਿਟ੍ਠਾਯ ਸਦੇਵਕੇ ਲੋਕੇ ਅਗ੍ਗਦਕ੍ਖਿਣੇਯ੍ਯੋ ਜਾਤੋ. ਅਟ੍ਠਮਂ.