੬. ਦੁਕ੍ਖਵਗ੍ਗੋ

੧. ਪਰਿਵੀਮਂਸਨਸੁਤ੍ਤਵਣ੍ਣਨਾ

੫੧. ਦੁਕ੍ਖਵਗ੍ਗਸ੍ਸ ਪਠਮੇ ਪਰਿਵੀਮਂਸਮਾਨੋਤਿ ਉਪਪਰਿਕ੍ਖਮਾਨੋ. ਜਰਾਮਰਣਨ੍ਤਿ ਕਸ੍ਮਾ ਜਰਾਮਰਣਂ ਏਕਮੇਵ ‘‘ਅਨੇਕਵਿਧਂ ਨਾਨਪ੍ਪਕਾਰਕ’’ਨ੍ਤਿ ਵਤ੍ਵਾ ਗਹਿਤਨ੍ਤਿ ਚੇ? ਤਸ੍ਮਿਂ ਗਹਿਤੇ ਸਬ੍ਬਦੁਕ੍ਖਸ੍ਸ ਗਹਿਤਤ੍ਤਾ. ਯਥਾ ਹਿ ਚੂਲ਼ਾਯ ਗਹਿਤੇ ਪੁਰਿਸੇ ਸੋ ਪੁਰਿਸੋ ਗਹਿਤੋਵ ਹੋਤਿ, ਏਵਂ ਜਰਾਮਰਣੇ ਗਹਿਤੇ ਸਬ੍ਬਦੁਕ੍ਖਂ ਗਹਿਤਮੇਵ ਹੋਤਿ. ਤਸ੍ਮਾ ‘‘ਯਂ ਖੋ ਇਦਂ ਅਨੇਕਵਿਧਂ ਨਾਨਪ੍ਪਕਾਰਕਂ ਦੁਕ੍ਖਂ ਲੋਕੇ ਉਪ੍ਪਜ੍ਜਤੀ’’ਤਿ ਨ੍ਹਤ੍ਵਾ ਠਿਤਂ ਪੁਰਿਸਂ ਵਿਯ ਸਬ੍ਬਦੁਕ੍ਖਂ ਦਸ੍ਸੇਤ੍ਵਾ ਤਂ ਚੂਲ਼ਾਯ ਗਣ੍ਹਨ੍ਤੋ ਵਿਯ ਜਰਾਮਰਣਂ ਗਣ੍ਹਿ.

ਜਰਾਮਰਣਨਿਰੋਧਸਾਰੁਪ੍ਪਗਾਮਿਨੀਤਿ ਜਰਾਮਰਣਨਿਰੋਧਸ੍ਸ ਸਾਰੁਪ੍ਪਭਾਵੇਨ ਨਿਕ੍ਕਿਲੇਸਤਾਯ ਪਰਿਸੁਦ੍ਧਤਾਯ ਸਦਿਸਾਵ ਹੁਤ੍ਵਾ ਗਾਮਿਨੀਤਿ ਅਤ੍ਥੋ. ਤਥਾ ਪਟਿਪਨ੍ਨੋ ਚ ਹੋਤੀਤਿ ਯਥਾ ਤਂ ਪਟਿਪਨ੍ਨੋਤਿ ਵੁਚ੍ਚਤਿ, ਏਵਂ ਪਟਿਪਨ੍ਨੋ ਹੋਤਿ. ਅਨੁਧਮ੍ਮਚਾਰੀਤਿ ਨਿਬ੍ਬਾਨਧਮ੍ਮਂ ਅਨੁਗਤਂ ਪਟਿਪਤ੍ਤਿਧਮ੍ਮਂ ਚਰਤਿ, ਪੂਰੇਤੀਤਿ ਅਤ੍ਥੋ. ਦੁਕ੍ਖਕ੍ਖਯਾਯ ਪਟਿਪਨ੍ਨੋਤਿ ਸੀਲਂ ਆਦਿਂ ਕਤ੍ਵਾ ਜਰਾਮਰਣਦੁਕ੍ਖਸ੍ਸ ਨਿਰੋਧਤ੍ਥਾਯ ਪਟਿਪਨ੍ਨੋ. ਸਙ੍ਖਾਰਨਿਰੋਧਾਯਾਤਿ ਸਙ੍ਖਾਰਦੁਕ੍ਖਸ੍ਸ ਨਿਰੋਧਤ੍ਥਾਯ. ਏਤ੍ਤਾਵਤਾ ਯਾਵ ਅਰਹਤ੍ਤਾ ਦੇਸਨਾ ਕਥਿਤਾ.

ਇਦਾਨਿ ਅਰਹਤ੍ਤਫਲਪਚ੍ਚਵੇਕ੍ਖਣਂ ਸਤਤਵਿਹਾਰਞ੍ਚ ਦਸ੍ਸੇਤ੍ਵਾ ਦੇਸਨਾ ਨਿਵਤ੍ਤੇਤਬ੍ਬਾ ਸਿਯਾ, ਤਥਾ ਅਕਤ੍ਵਾ ਅਵਿਜ੍ਜਾਗਤੋਤਿ ਇਦਂ ਕਸ੍ਮਾ ਗਣ੍ਹਾਤੀਤਿ? ਖੀਣਾਸਵਸ੍ਸ ਸਮਤਿਕ੍ਕਨ੍ਤਵਟ੍ਟਦੁਕ੍ਖਦਸ੍ਸਨਤ੍ਥਂ. ਅਪਿਚ ਪੁਨ ਵਟ੍ਟਂ ਆਰਭਿਤ੍ਵਾ ਵਿਵਟ੍ਟੇ ਕਥਿਯਮਾਨੇ ਬੁਜ੍ਝਨਕਸਤ੍ਤੋ ਚੇਤ੍ਥ ਅਤ੍ਥਿ, ਤਸ੍ਸ ਅਜ੍ਝਾਸਯਵਸੇਨਾਪਿ ਇਦਂ ਗਣ੍ਹਾਤੀਤਿ ਵੇਦਿਤਬ੍ਬੋ. ਤਤ੍ਥ ਅਵਿਜ੍ਜਾਗਤੋਤਿ ਅਵਿਜ੍ਜਾਯ ਗਤੋ ਉਪਗਤੋ ਸਮਨ੍ਨਾਗਤੋ. ਪੁਰਿਸਪੁਗ੍ਗਲੋਤਿ ਪੁਰਿਸੋਯੇਵ ਪੁਗ੍ਗਲੋ. ਉਭਯੇਨਾਪਿ ਸਮ੍ਮੁਤਿਕਥਂ ਕਥੇਤਿ. ਬੁਦ੍ਧਾਨਞ੍ਹਿ ਸਮ੍ਮੁਤਿਕਥਾ ਪਰਮਤ੍ਥਕਥਾਤਿ ਦ੍ਵੇ ਕਥਾ ਹੋਨ੍ਤਿ. ਤਤ੍ਥ ‘‘ਸਤ੍ਤੋ ਨਰੋ ਪੁਰਿਸੋ ਪੁਗ੍ਗਲੋ ਤਿਸ੍ਸੋ ਨਾਗੋ’’ਤਿ ਏਵਂ ਪਵਤ੍ਤਾ ਸਮ੍ਮੁਤਿਕਥਾ ਨਾਮ. ‘‘ਖਨ੍ਧਾ ਧਾਤੁਯੋ ਆਯਤਨਾਨੀ’’ਤਿ ਏਵਂ ਪਵਤ੍ਤਾ ਪਰਮਤ੍ਥਕਥਾ ਨਾਮ. ਪਰਮਤ੍ਥਂ ਕਥੇਨ੍ਤਾਪਿ ਸਮ੍ਮੁਤਿਂ ਅਮੁਞ੍ਚਿਤ੍ਵਾ ਕਥੇਨ੍ਤਿ. ਤੇ ਸਮ੍ਮੁਤਿਂ ਕਥੇਨ੍ਤਾਪਿ ਪਰਮਤ੍ਥਂ ਕਥੇਨ੍ਤਾਪਿ ਸਚ੍ਚਮੇਵ ਕਥੇਨ੍ਤਿ. ਤੇਨੇਵ ਵੁਤ੍ਤਂ –

‘‘ਦੁਵੇ ਸਚ੍ਚਾਨਿ ਅਕ੍ਖਾਸਿ, ਸਮ੍ਬੁਦ੍ਧੋ ਵਦਤਂ ਵਰੋ;

ਸਮ੍ਮੁਤਿਂ ਪਰਮਤ੍ਥਞ੍ਚ, ਤਤਿਯਂ ਨੂਪਲਬ੍ਭਤਿ;

ਸਙ੍ਕੇਤਵਚਨਂ ਸਚ੍ਚਂ, ਲੋਕਸਮ੍ਮੁਤਿਕਾਰਣਂ;

ਪਰਮਤ੍ਥਵਚਨਂ ਸਚ੍ਚਂ, ਧਮ੍ਮਾਨਂ ਭੂਤਲਕ੍ਖਣ’’ਨ੍ਤਿ.

ਪੁਞ੍ਞਂ ਚੇ ਸਙ੍ਖਾਰਨ੍ਤਿ ਤੇਰਸਚੇਤਨਾਭੇਦਂ ਪੁਞ੍ਞਾਭਿਸਙ੍ਖਾਰਂ. ਅਭਿਸਙ੍ਖਰੋਤੀਤਿ ਕਰੋਤਿ. ਪੁਞ੍ਞੂਪਗਂ ਹੋਤਿ ਵਿਞ੍ਞਾਣਨ੍ਤਿ ਕਮ੍ਮਵਿਞ੍ਞਾਣਂ ਕਮ੍ਮਪੁਞ੍ਞੇਨ ਉਪਗਤਂ ਸਮ੍ਪਯੁਤ੍ਤਂ ਹੋਤਿ, ਵਿਪਾਕਵਿਞ੍ਞਾਣਂ ਵਿਪਾਕਪੁਞ੍ਞੇਨ. ਅਪੁਞ੍ਞਂ ਚੇ ਸਙ੍ਖਾਰਨ੍ਤਿ ਦ੍ਵਾਦਸਚੇਤਨਾਭੇਦਂ ਅਪੁਞ੍ਞਾਭਿਸਙ੍ਖਾਰਂ ਅਭਿਸਙ੍ਖਰੋਤਿ. ਆਨੇਞ੍ਜਂ ਚੇ ਸਙ੍ਖਾਰਨ੍ਤਿ ਚਤੁਚੇਤਨਾਭੇਦਂ ਆਨੇਞ੍ਜਾਭਿਸਙ੍ਖਾਰਂ. ਆਨੇਞ੍ਜੂਪਗਂ ਹੋਤਿ ਵਿਞ੍ਞਾਣਨ੍ਤਿ ਕਮ੍ਮਾਨੇਞ੍ਜੇਨ ਕਮ੍ਮਵਿਞ੍ਞਾਣਂ, ਵਿਪਾਕਾਨੇਞ੍ਜੇਨ ਵਿਪਾਕਵਿਞ੍ਞਾਣਂ ਉਪਗਤਂ ਹੋਤਿ. ਏਤ੍ਥ ਚ ਤਿਵਿਧਸ੍ਸ ਕਮ੍ਮਾਭਿਸਙ੍ਖਾਰਸ੍ਸ ਗਹਿਤਤ੍ਤਾ ਦ੍ਵਾਦਸਪਦਿਕੋ ਪਚ੍ਚਯਾਕਾਰੋ ਗਹਿਤੋਵ ਹੋਤਿ. ਏਤ੍ਤਾਵਤਾ ਵਟ੍ਟਂ ਦਸ੍ਸਿਤਂ.

ਇਦਾਨਿ ਵਿਵਟ੍ਟਂ ਦਸ੍ਸੇਨ੍ਤੋ ਯਤੋ ਖੋ, ਭਿਕ੍ਖਵੇਤਿਆਦਿਮਾਹ. ਤਤ੍ਥ ਅਵਿਜ੍ਜਾਤਿ ਚਤੂਸੁ ਸਚ੍ਚੇਸੁ ਅਞ੍ਞਾਣਂ. ਵਿਜ੍ਜਾਤਿ ਅਰਹਤ੍ਤਮਗ੍ਗਞਾਣਂ. ਏਤ੍ਥ ਚ ਪਠਮਮੇਵ ਅਵਿਜ੍ਜਾਯ ਪਹੀਨਾਯ ਵਿਜ੍ਜਾ ਉਪ੍ਪਜ੍ਜਤਿ. ਯਥਾ ਪਨ ਚਤੁਰਙ੍ਗੇਪਿ ਤਮੇ ਰਤ੍ਤਿਂ ਪਦੀਪੁਜ੍ਜਲੇਨ ਅਨ੍ਧਕਾਰੋ ਪਹੀਯਤਿ, ਏਵਂ ਵਿਜ੍ਜੁਪ੍ਪਾਦਾ ਅਵਿਜ੍ਜਾਯ ਪਹਾਨਂ ਵੇਦਿਤਬ੍ਬਂ. ਨ ਕਿਞ੍ਚਿ ਲੋਕੇ ਉਪਾਦਿਯਤੀਤਿ ਲੋਕੇ ਕਿਞ੍ਚਿ ਧਮ੍ਮਂ ਨ ਗਣ੍ਹਾਤਿ ਨ ਪਰਾਮਸਤਿ. ਅਨੁਪਾਦਿਯਂ ਨ ਪਰਿਤਸ੍ਸਤੀਤਿ ਅਨੁਪਾਦਿਯਨ੍ਤੋ ਅਗਣ੍ਹਨ੍ਤੋ ਨੇਵ ਤਣ੍ਹਾਪਰਿਤਸ੍ਸਨਾਯ, ਨ ਭਯਪਰਿਤਸ੍ਸਨਾਯ ਪਰਿਤਸ੍ਸਤਿ, ਨ ਤਣ੍ਹਾਯਤਿ ਨ ਭਾਯਤੀਤਿ ਅਤ੍ਥੋ. ਪਚ੍ਚਤ੍ਤਞ੍ਞੇਵਾਤਿ ਸਯਮੇਵ ਅਤ੍ਤਨਾਵ ਪਰਿਨਿਬ੍ਬਾਯਤਿ, ਨ ਅਞ੍ਞਸ੍ਸ ਆਨੁਭਾਵੇਨ.

ਸੋ ਸੁਖਂ ਚੇ ਵੇਦਨਨ੍ਤਿ ਇਦਂ ਕਸ੍ਮਾ ਆਰਭਿ? ਖੀਣਾਸਵਸ੍ਸ ਪਚ੍ਚਵੇਕ੍ਖਣਞਾਣਂ ਦਸ੍ਸੇਤ੍ਵਾ ਸਤਤਵਿਹਾਰਂ ਦਸ੍ਸੇਤੁਂ ਆਰਭਿ. ਅਨਜ੍ਝੋਸਿਤਾਤਿ ਤਣ੍ਹਾਯ ਗਿਲਿਤ੍ਵਾ ਪਰਿਨਿਟ੍ਠਪੇਤ੍ਵਾ ਅਗਹਿਤਾ. ਅਥ ਦੁਕ੍ਖਵੇਦਨਾ ਕਸ੍ਮਾ ਵੁਤ੍ਤਾ, ਕਿਂ ਤਮ੍ਪਿ ਅਭਿਨਨ੍ਦਨ੍ਤੋ ਅਤ੍ਥੀਤਿ? ਆਮ ਅਤ੍ਥਿ. ਸੁਖਂ ਅਭਿਨਨ੍ਦਨ੍ਤੋਯੇਵ ਹਿ ਦੁਕ੍ਖਂ ਅਭਿਨਨ੍ਦਤਿ ਨਾਮ ਦੁਕ੍ਖਂ ਪਤ੍ਵਾ ਸੁਖਂ ਪਤ੍ਥਨਤੋ ਸੁਖਸ੍ਸ ਚ ਵਿਪਰਿਣਾਮਦੁਕ੍ਖਤੋਤਿ. ਕਾਯਪਰਿਯਨ੍ਤਿਕਨ੍ਤਿ ਕਾਯਪਰਿਚ੍ਛਿਨ੍ਨਂ, ਯਾਵ ਪਞ੍ਚਦ੍ਵਾਰਕਾਯੋ ਪਵਤ੍ਤਤਿ, ਤਾਵ ਪਵਤ੍ਤਂ ਪਞ੍ਚਦ੍ਵਾਰਿਕਵੇਦਨਨ੍ਤਿ ਅਤ੍ਥੋ. ਜੀਵਿਤਪਰਿਯਨ੍ਤਿਕਨ੍ਤਿ ਜੀਵਿਤਪਰਿਚ੍ਛਿਨ੍ਨਂ. ਯਾਵ ਜੀਵਿਤਂ ਪਵਤ੍ਤਤਿ, ਤਾਵ ਪਵਤ੍ਤਂ ਮਨੋਦ੍ਵਾਰਿਕਵੇਦਨਨ੍ਤਿ ਅਤ੍ਥੋ.

ਤਤ੍ਥ ਪਞ੍ਚਦ੍ਵਾਰਿਕਵੇਦਨਾ ਪਚ੍ਛਾ ਉਪ੍ਪਜ੍ਜਿਤ੍ਵਾ ਪਠਮਂ ਨਿਰੁਜ੍ਝਤਿ, ਮਨੋਦ੍ਵਾਰਿਕਵੇਦਨਾ ਪਠਮਂ ਉਪ੍ਪਜ੍ਜਿਤ੍ਵਾ ਪਚ੍ਛਾ ਨਿਰੁਜ੍ਝਤਿ. ਸਾ ਹਿ ਪਟਿਸਨ੍ਧਿਕ੍ਖਣੇ ਵਤ੍ਥੁਰੂਪਸ੍ਮਿਂਯੇਵ ਪਤਿਟ੍ਠਾਤਿ. ਪਞ੍ਚਦ੍ਵਾਰਿਕਾ ਪਵਤ੍ਤੇ ਪਞ੍ਚਦ੍ਵਾਰਵਸੇਨ ਪਵਤ੍ਤਮਾਨਾ ਪਠਮਵਯੇ ਵੀਸਤਿਵਸ੍ਸਕਾਲੇ ਰਜ੍ਜਨਦੁਸ੍ਸਨਮੁਯ੍ਹਨਵਸੇਨ ਅਧਿਮਤ੍ਤਾ ਬਲਵਤੀ ਹੋਤਿ, ਪਣ੍ਣਾਸਵਸ੍ਸਕਾਲੇ ਠਿਤਾ ਹੋਤਿ, ਸਟ੍ਠਿਵਸ੍ਸਕਾਲਤੋ ਪਟ੍ਠਾਯ ਪਰਿਹਾਯਮਾਨਾ ਅਸੀਤਿਨਵੁਤਿਵਸ੍ਸਕਾਲੇ ਮਨ੍ਦਾ ਹੋਤਿ. ਤਦਾ ਹਿ ਸਤ੍ਤਾ ‘‘ਚਿਰਰਤ੍ਤਂ ਏਕਤੋ ਨਿਸੀਦਿਮ੍ਹਾ ਨਿਪਜ੍ਜਿਮ੍ਹਾ’’ਤਿ ਵਦਨ੍ਤੇਪਿ ‘‘ਨ ਸਞ੍ਜਾਨਾਮਾ’’ਤਿ ਵਦਨ੍ਤਿ. ਅਧਿਮਤ੍ਤਾਨਿਪਿ ਰੂਪਾਦਿਆਰਮ੍ਮਣਾਨਿ ‘‘ਨ ਪਸ੍ਸਾਮ ਨ ਸੁਣਾਮ’’, ‘‘ਸੁਗਨ੍ਧਂ ਦੁਗ੍ਗਨ੍ਧਂ ਵਾ ਸਾਦੁਂ ਅਸਾਦੁਂ ਵਾ ਥਦ੍ਧਂ ਮੁਦੁਕਨ੍ਤਿ ਵਾ ਨ ਜਾਨਾਮਾ’’ਤਿ ਵਦਨ੍ਤਿ. ਇਤਿ ਨੇਸਂ ਪਞ੍ਚਦ੍ਵਾਰਿਕਵੇਦਨਾ ਭਗ੍ਗਾ ਹੋਤਿ, ਮਨੋਦ੍ਵਾਰਿਕਾਵ ਪਵਤ੍ਤਤਿ. ਸਾਪਿ ਅਨੁਪੁਬ੍ਬੇਨ ਪਰਿਹਾਯਮਾਨਾ ਮਰਣਸਮਯੇ ਹਦਯਕੋਟਿਂਯੇਵ ਨਿਸ੍ਸਾਯ ਪਵਤ੍ਤਤਿ. ਯਾਵ ਪਨੇਸਾ ਪਵਤ੍ਤਤਿ, ਤਾਵ ਸਤ੍ਤੋ ਜੀਵਤੀਤਿ ਵੁਚ੍ਚਤਿ. ਯਦਾ ਨਪ੍ਪਵਤ੍ਤਤਿ, ਤਦਾ ਮਤੋ ਨਿਰੁਦ੍ਧੋਤਿ ਵੁਚ੍ਚਤਿ.

ਸ੍ਵਾਯਮਤ੍ਥੋ ਵਾਪਿਯਾ ਦੀਪੇਤਬ੍ਬੋ –

ਯਥਾ ਹਿ ਪੁਰਿਸੋ ਪਞ੍ਚਉਦਕਮਗ੍ਗਸਮ੍ਪਨ੍ਨਂ ਵਾਪਿਂ ਕਰੇਯ੍ਯ, ਪਠਮਂ ਦੇਵੇ ਵੁਟ੍ਠੇ ਪਞ੍ਚਹਿ ਉਦਕਮਗ੍ਗੇਹਿ ਉਦਕਂ ਪਵਿਸਿਤ੍ਵਾ ਅਨ੍ਤੋਵਾਪਿਯਂ ਆਵਾਟੇ ਪੂਰੇਯ੍ਯ, ਪੁਨਪ੍ਪੁਨਂ ਦੇਵੇ ਵਸ੍ਸਨ੍ਤੇ ਉਦਕਮਗ੍ਗੇ ਪੂਰੇਤ੍ਵਾ ਗਾਵੁਤਡ੍ਢਯੋਜਨਮਤ੍ਤਂ ਓਤ੍ਥਰਿਤ੍ਵਾ ਉਦਕਂ ਤਿਟ੍ਠੇਯ੍ਯ ਤਤੋ ਤਤੋ ਵਿਸ੍ਸਨ੍ਦਮਾਨਂ, ਅਥ ਨਿਦ੍ਧਮਨਤੁਮ੍ਬੇ ਵਿਵਰਿਤ੍ਵਾ ਖੇਤ੍ਤੇਸੁ ਕਮ੍ਮੇ ਕਰਿਯਮਾਨੇ ਉਦਕਂ ਨਿਕ੍ਖਮਨ੍ਤਂ, ਸਸ੍ਸਪਾਕਕਾਲੇ (ਉਦਕਂ ਨਿਕ੍ਖਮਨ੍ਤਂ,) ਉਦਕਂ ਪਰਿਹੀਨਂ ‘‘ਮਚ੍ਛੇ ਗਣ੍ਹਾਮਾ’’ਤਿ ਵਤ੍ਤਬ੍ਬਤਂ ਆਪਜ੍ਜੇਯ੍ਯ, ਤਤੋ ਕਤਿਪਾਹੇਨ ਆਵਾਟੇਸੁਯੇਵ ਉਦਕਂ ਸਣ੍ਠਹੇਯ੍ਯ. ਯਾਵ ਪਨ ਤਂ ਆਵਾਟੇਸੁ ਹੋਤਿ, ਤਾਵ ‘‘ਮਹਾਵਾਪਿਯਂ ਉਦਕਂ ਅਤ੍ਥੀ’’ਤਿ ਸਙ੍ਖਂ ਗਚ੍ਛਤਿ. ਯਦਾ ਪਨ ਤਤ੍ਥ ਛਿਜ੍ਜਤਿ, ਤਦਾ ‘‘ਵਾਪਿਯਂ ਉਦਕਂ ਨਤ੍ਥੀ’’ਤਿ ਵੁਚ੍ਚਤਿ, ਏਵਂਸਮ੍ਪਦਮਿਦਂ ਵੇਦਿਤਬ੍ਬਂ.

ਪਠਮਂ ਦੇਵੇ ਵਸ੍ਸਨ੍ਤੇ ਪਞ੍ਚਹਿ ਮਗ੍ਗੇਹਿ ਉਦਕੇ ਪਵਿਸਨ੍ਤੇ ਆਵਾਟਾਨਂ ਪੂਰਣਕਾਲੋ ਵਿਯ ਹਿ ਪਠਮਮੇਵ ਪਟਿਸਨ੍ਧਿਕ੍ਖਣੇ ਮਨੋਦ੍ਵਾਰਿਕਵੇਦਨਾਯ ਵਤ੍ਥੁਰੂਪੇ ਪਤਿਟ੍ਠਿਤਕਾਲੋ, ਪੁਨਪ੍ਪੁਨਂ ਦੇਵੇ ਵਸ੍ਸਨ੍ਤੇ ਪਞ੍ਚਨ੍ਨਂ ਮਗ੍ਗਾਨਂ ਪੂਰਿਤਕਾਲੋ ਵਿਯ ਪਵਤ੍ਤੇ ਪਞ੍ਚਦ੍ਵਾਰਿਕਵੇਦਨਾਯ ਪਵਤ੍ਤਿਕਾਲੋ, ਗਾਵੁਤਡ੍ਢਯੋਜਨਮਤ੍ਤਂ ਅਜ੍ਝੋਤ੍ਥਰਣਂ ਵਿਯ ਪਠਮਵਯੇ ਵੀਸਤਿਵਸ੍ਸਕਾਲੇ ਰਜ੍ਜਨਾਦਿਵਸੇਨ ਤਸ੍ਸਾ ਅਧਿਮਤ੍ਤਬਲਵਭਾਵੋ, ਯਾਵ ਵਾਪਿਤੋ ਉਦਕਂ ਨ ਨਿਗ੍ਗਚ੍ਛਤਿ, ਤਾਵ ਪੂਰਾਯ ਵਾਪਿਯਾ ਠਿਤਕਾਲੋ ਵਿਯ ਪਞ੍ਞਾਸਵਸ੍ਸਕਾਲੇ ਤਸ੍ਸਾ ਠਿਤਕਾਲੋ, ਨਿਦ੍ਧਮਨਤੁਮ੍ਬੇਸੁ ਵਿਵਟੇਸੁ ਕਮ੍ਮਨ੍ਤੇ ਕਰਿਯਮਾਨੇ ਉਦਕਸ੍ਸ ਨਿਕ੍ਖਮਨਕਾਲੋ ਵਿਯ ਸਟ੍ਠਿਵਸ੍ਸਕਾਲਤੋ ਪਟ੍ਠਾਯ ਤਸ੍ਸਾ ਪਰਿਹਾਨਿ, ਉਦਕੇ ਭਟ੍ਠੇ ਉਦਕਮਗ੍ਗੇਸੁ ਪਰਿਤ੍ਤੋਦਕਸ੍ਸ ਠਿਤਕਾਲੋ ਵਿਯ ਅਸੀਤਿਨਵੁਤਿਵਸ੍ਸਕਾਲੇ ਪਞ੍ਚਦ੍ਵਾਰਿਕਵੇਦਨਾਯ ਮਨ੍ਦਕਾਲੋ, ਆਵਾਟੇਸੁਯੇਵ ਉਦਕਸ੍ਸ ਪਤਿਟ੍ਠਾਨਕਾਲੋ ਵਿਯ ਹਦਯਵਤ੍ਥੁਕੋਟਿਂ ਨਿਸ੍ਸਾਯ ਮਨੋਦ੍ਵਾਰਿਕਵੇਦਨਾਯ ਪਵਤ੍ਤਿਕਾਲੋ, ਆਵਾਟੇਸੁ ਪਰਿਤ੍ਤੇਪਿ ਉਦਕੇ ਸਤਿ ‘‘ਵਾਪਿਯਂ ਉਦਕਂ ਅਤ੍ਥੀ’’ਤਿ ਵਤ੍ਤਬ੍ਬਕਾਲੋ ਵਿਯ ਯਾਵ ਸਾ ਪਵਤ੍ਤਤਿ, ਤਾਵ ‘‘ਸਤ੍ਤੋ ਜੀਵਤੀ’’ਤਿ ਵੁਚ੍ਚਤਿ. ਯਥਾ ਪਨ ਆਵਾਟੇਸੁ ਉਦਕੇ ਛਿਨ੍ਨੇ ‘‘ਨਤ੍ਥਿ ਵਾਪਿਯਂ ਉਦਕ’’ਨ੍ਤਿ ਵੁਚ੍ਚਤਿ, ਏਵਂ ਮਨੋਦ੍ਵਾਰਿਕਵੇਦਨਾਯ ਅਪ੍ਪਵਤ੍ਤਮਾਨਾਯ ‘‘ਸਤ੍ਤੋ ਮਤੋ’’ਤਿ ਵੁਚ੍ਚਤਿ. ਇਮਂ ਵੇਦਨਂ ਸਨ੍ਧਾਯ ਵੁਤ੍ਤਂ ‘‘ਜੀਵਿਤਪਰਿਯਨ੍ਤਿਕਂ ਵੇਦਨਂ ਵੇਦਿਯਮਾਨੋ’’ਤਿ.

ਕਾਯਸ੍ਸ ਭੇਦਾਤਿ ਕਾਯਸ੍ਸ ਭੇਦੇਨ. ਜੀਵਿਤਪਰਿਯਾਦਾਨਾ ਉਦ੍ਧਨ੍ਤਿ ਜੀਵਿਤਕ੍ਖਯਤੋ ਉਦ੍ਧਂ. ਇਧੇਵਾਤਿ ਪਟਿਸਨ੍ਧਿਵਸੇਨ ਪਰਤੋ ਅਗਨ੍ਤ੍ਵਾ ਇਧੇਵ. ਸੀਤੀਭਵਿਸ੍ਸਨ੍ਤੀਤਿ ਪਵਤ੍ਤਿਵਿਪ੍ਫਨ੍ਦਦਰਥਰਹਿਤਾਨਿ ਸੀਤਾਨਿ ਅਪ੍ਪਵਤ੍ਤਨਧਮ੍ਮਾਨਿ ਭਵਿਸ੍ਸਨ੍ਤਿ. ਸਰੀਰਾਨੀਤਿ ਧਾਤੁਸਰੀਰਾਨਿ. ਅਵਸਿਸ੍ਸਨ੍ਤੀਤਿ ਅਵਸਿਟ੍ਠਾਨਿ ਭਵਿਸ੍ਸਨ੍ਤਿ.

ਕੁਮ੍ਭਕਾਰਪਾਕਾਤਿ ਕੁਮ੍ਭਕਾਰਸ੍ਸ ਭਾਜਨਪਚਨਟ੍ਠਾਨਤੋ. ਪਟਿਸਿਸ੍ਸੇਯ੍ਯਾਤਿ ਠਪੇਯ੍ਯ. ਕਪਲ੍ਲਾਨੀਤਿ ਸਹ ਮੁਖਵਟ੍ਟਿਯਾ ਏਕਾਬਦ੍ਧਾਨਿ ਕੁਮ੍ਭਕਪਲ੍ਲਾਨਿ. ਅਵਸਿਸ੍ਸੇਯ੍ਯੁਨ੍ਤਿ ਤਿਟ੍ਠੇਯ੍ਯੁਂ. ਏਵਮੇਵ ਖੋਤਿ ਏਤ੍ਥ ਇਦਂ ਓਪਮ੍ਮਸਂਸਨ੍ਦਨਂ – ਆਦਿਤ੍ਤਕੁਮ੍ਭਕਾਰਪਾਕੋ ਵਿਯ ਹਿ ਤਯੋ ਭਵਾ ਦਟ੍ਠਬ੍ਬਾ, ਕੁਮ੍ਭਕਾਰੋ ਵਿਯ ਯੋਗਾਵਚਰੋ, ਪਾਕਤੋ ਕੁਮ੍ਭਕਾਰਭਾਜਨਾਨਂ ਨੀਹਰਣਦਣ੍ਡਕੋ ਵਿਯ ਅਰਹਤ੍ਤਮਗ੍ਗਞਾਣਂ, ਸਮੋ ਭੂਮਿਭਾਗੋ ਵਿਯ ਅਸਙ੍ਖਤਂ ਨਿਬ੍ਬਾਨਤਲਂ, ਦਣ੍ਡਕੇਨ ਉਣ੍ਹਕੁਮ੍ਭਂ ਆਕਡ੍ਢਿਤ੍ਵਾ ਸਮੇ ਭੂਮਿਭਾਗੇ ਕੁਮ੍ਭਸ੍ਸ ਠਪਿਤਕਾਲੋ ਵਿਯ ਆਰਦ੍ਧਵਿਪਸ੍ਸਕਸ੍ਸ ਰੂਪਸਤ੍ਤਕਂ ਅਰੂਪਸਤ੍ਤਕਂ ਵਿਪਸ੍ਸਨ੍ਤਸ੍ਸ ਕਮ੍ਮਟ੍ਠਾਨੇ ਚ ਪਗੁਣੇ ਵਿਭੂਤੇ ਉਪਟ੍ਠਹਮਾਨੇ ਤਥਾਰੂਪਂ ਉਤੁਸਪ੍ਪਾਯਾਦਿਂ ਲਭਿਤ੍ਵਾ ਏਕਾਸਨੇ ਨਿਸਿਨ੍ਨਸ੍ਸ ਵਿਪਸ੍ਸਨਂ ਵਡ੍ਢੇਤ੍ਵਾ ਅਗ੍ਗਫਲਂ ਅਰਹਤ੍ਤਂ ਪਤ੍ਵਾ ਚਤੂਹਿ ਅਪਾਯੇਹਿ ਅਤ੍ਤਭਾਵਂ ਉਦ੍ਧਰਿਤ੍ਵਾ ਫਲਸਮਾਪਤ੍ਤਿਵਸੇਨ ਅਸਙ੍ਖਤੇ ਨਿਬ੍ਬਾਨਤਲੇ ਠਿਤਕਾਲੋ ਦਟ੍ਠਬ੍ਬੋ. ਖੀਣਾਸਵੋ ਪਨ ਉਣ੍ਹਕੁਮ੍ਭੋ ਵਿਯ ਅਰਹਤ੍ਤਪ੍ਪਤ੍ਤਦਿਵਸੇਯੇਵ ਨ ਪਰਿਨਿਬ੍ਬਾਤਿ, ਸਾਸਨਪ੍ਪਵੇਣਿਂ ਪਨ ਘਟਯਮਾਨੋ ਪਣ੍ਣਾਸਸਟ੍ਠਿਵਸ੍ਸਾਨਿ ਠਤ੍ਵਾ ਚਰਿਮਕਚਿਤ੍ਤਪ੍ਪਤ੍ਤਿਯਾ ਉਪਾਦਿਣ੍ਣਕਕ੍ਖਨ੍ਧਭੇਦਾ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਤਿ. ਅਥਸ੍ਸ ਕੁਮ੍ਭਸ੍ਸ ਵਿਯ ਕਪਲ੍ਲਾਨਿ ਅਨੁਪਾਦਿਣ੍ਣਕਸਰੀਰਾਨੇਵ ਅਵਸਿਸ੍ਸਨ੍ਤੀਤਿ. ਸਰੀਰਾਨਿ ਅਵਸਿਸ੍ਸਨ੍ਤੀਤਿ ਪਜਾਨਾਤੀਤਿ ਇਦਂ ਪਨ ਖੀਣਾਸਵਸ੍ਸ ਅਨੁਯੋਗਾਰੋਪਨਤ੍ਥਂ ਵੁਤ੍ਤਂ.

ਵਿਞ੍ਞਾਣਂ ਪਞ੍ਞਾਯੇਥਾਤਿ ਪਟਿਸਨ੍ਧਿਵਿਞ੍ਞਾਣਂ ਪਞ੍ਞਾਯੇਥ. ਸਾਧੁ ਸਾਧੂਤਿ ਥੇਰਾਨਂ ਬ੍ਯਾਕਰਣਂ ਸਮ੍ਪਹਂਸਤਿ. ਏਵਮੇਤਨ੍ਤਿ ਯਦੇਤਂ ਤਿਵਿਧੇ ਅਭਿਸਙ੍ਖਾਰੇ ਅਸਤਿ ਪਟਿਸਨ੍ਧਿਵਿਞ੍ਞਾਣਸ੍ਸ ਅਪ੍ਪਞ੍ਞਾਣਨ੍ਤਿਆਦਿ, ਏਵਮੇਵ ਏਤਂ. ਅਧਿਮੁਚ੍ਚਥਾਤਿ ਸਨ੍ਨਿਟ੍ਠਾਨਸਙ੍ਖਾਤਂ ਅਧਿਮੋਕ੍ਖਂ ਪਟਿਲਭਥ. ਏਸੇਵਨ੍ਤੋ ਦੁਕ੍ਖਸ੍ਸਾਤਿ ਅਯਮੇਵ ਵਟ੍ਟਦੁਕ੍ਖਸ੍ਸ ਅਨ੍ਤੋ ਅਯਂ ਪਰਿਚ੍ਛੇਦੋ, ਯਦਿਦਂ ਨਿਬ੍ਬਾਨਨ੍ਤਿ. ਪਠਮਂ.

੨. ਉਪਾਦਾਨਸੁਤ੍ਤਵਣ੍ਣਨਾ

੫੨. ਦੁਤਿਯੇ ਉਪਾਦਾਨਿਯੇਸੂਤਿ ਚਤੁਨ੍ਨਂ ਉਪਾਦਾਨਾਨਂ ਪਚ੍ਚਯੇਸੁ ਤੇਭੂਮਕਧਮ੍ਮੇਸੁ. ਅਸ੍ਸਾਦਾਨੁਪਸ੍ਸਿਨੋਤਿ ਅਸ੍ਸਾਦਂ ਅਨੁਪਸ੍ਸਨ੍ਤਸ੍ਸ. ਤਤ੍ਰਾਤਿ ਤਸ੍ਮਿਂ ਅਗ੍ਗਿਕ੍ਖਨ੍ਧੇ. ਤਦਾਹਾਰੋਤਿ ਤਂਪਚ੍ਚਯੋ. ਤਦੁਪਾਦਾਨੋਤਿ ਤਸ੍ਸੇਵ ਵੇਵਚਨਂ. ਏਵਮੇਵ ਖੋਤਿ ਏਤ੍ਥ ਅਗ੍ਗਿਕ੍ਖਨ੍ਧੋ ਵਿਯ ਹਿ ਤਯੋ ਭਵਾ, ਤੇਭੂਮਕਵਟ੍ਟਨ੍ਤਿਪਿ ਏਤਦੇਵ, ਅਗ੍ਗਿਜਗ੍ਗਕਪੁਰਿਸੋ ਵਿਯ ਵਟ੍ਟਨਿਸ੍ਸਿਤੋ ਬਾਲਪੁਥੁਜ੍ਜਨੋ, ਸੁਕ੍ਖਤਿਣਗੋਮਯਾਦਿਪਕ੍ਖਿਪਨਂ ਵਿਯ ਅਸ੍ਸਾਦਾਨੁਪਸ੍ਸਿਨੋ ਪੁਥੁਜ੍ਜਨਸ੍ਸ ਤਣ੍ਹਾਦਿਵਸੇਨ ਛਹਿ ਦ੍ਵਾਰੇਹਿ ਕੁਸਲਾਕੁਸਲਕਮ੍ਮਕਰਣਂ. ਤਿਣਗੋਮਯਾਦੀਸੁ ਖੀਣੇਸੁ ਪੁਨਪ੍ਪੁਨਂ ਤੇਸਂ ਪਕ੍ਖਿਪਨੇਨ ਅਗ੍ਗਿਕ੍ਖਨ੍ਧਸ੍ਸ ਵਡ੍ਢਨਂ ਵਿਯ ਬਾਲਪੁਥੁਜ੍ਜਨਸ੍ਸ ਉਟ੍ਠਾਯ ਸਮੁਟ੍ਠਾਯ ਯਥਾਵੁਤ੍ਤਕਮ੍ਮਾਯੂਹਨੇਨ ਅਪਰਾਪਰਂ ਵਟ੍ਟਦੁਕ੍ਖਨਿਬ੍ਬਤ੍ਤਨਂ.

ਨ ਕਾਲੇਨ ਕਾਲਂ ਸੁਕ੍ਖਾਨਿ ਚੇਵ ਤਿਣਾਨਿ ਪਕ੍ਖਿਪੇਯ੍ਯਾਤਿ ਤਞ੍ਹਿ ਕੋਚਿ ਅਤ੍ਥਕਾਮੋ ਏਵਂ ਵਦੇਯ੍ਯ – ‘‘ਭੋ ਕਸ੍ਮਾ ਉਟ੍ਠਾਯ ਸਮੁਟ੍ਠਾਯ ਕਲਾਪੇ ਬਨ੍ਧਿਤ੍ਵਾ ਸੁਕ੍ਖਤਿਣਕਟ੍ਠਾਨਂ ਪਚ੍ਛਿਯਞ੍ਚ ਪੂਰੇਤ੍ਵਾ ਸੁਕ੍ਖਗੋਮਯਾਨਿ ਪਕ੍ਖਿਪਨ੍ਤੋ ਏਤਂ ਅਗ੍ਗਿਂ ਜਾਲੇਸਿ? ਅਪਿ ਨੁ ਤੇ ਅਤ੍ਥਿ ਇਤੋਨਿਦਾਨਂ ਕਾਚਿ ਵਡ੍ਢੀਤਿ? ਵਂਸਾਗਤਮੇਤਂ ਭੋ ਅਮ੍ਹਾਕਂ, ਇਤੋਨਿਦਾਨਂ ਪਨ ਮੇ ਅਵਡ੍ਢਿਯੇਵ, ਕੁਤੋ ਵਡ੍ਢਿ? ਅਹਞ੍ਹਿ ਇਮਂ ਅਗ੍ਗਿਂ ਜਗ੍ਗਨ੍ਤੋ ਨੇਵ ਨ੍ਹਾਯਿਤੁਂ ਨ ਭੁਞ੍ਜਿਤੁਂ ਨ ਨਿਪਜ੍ਜਿਤੁਂ ਲਭਾਮੀਤਿ. ਤੇਨ ਹਿ ਭੋ ਕਿਂ ਤੇ ਇਮਿਨਾ ਨਿਰਤ੍ਥਕੇਨ ਅਗ੍ਗਿਜਾਲਨੇਨ? ਏਹਿ ਤ੍ਵਂ ਏਤਾਨਿ ਆਭਤਾਨਿ ਤਿਣਾਦੀਨਿ ਏਤ੍ਥ ਨਿਕ੍ਖਿਪ, ਤਾਨਿ ਸਯਮੇਵ ਝਾਯਿਸ੍ਸਨ੍ਤਿ, ਤ੍ਵਂ ਪਨ ਅਸੁਕਸ੍ਮਿਂ ਠਾਨੇ ਸੀਤੋਦਕਾ ਪੋਕ੍ਖਰਣੀ ਅਤ੍ਥਿ, ਤਤ੍ਥ ਨ੍ਹਤ੍ਵਾ, ਮਾਲਾਗਨ੍ਧਵਿਲੇਪਨੇਹਿ ਅਤ੍ਤਾਨਂ ਮਣ੍ਡੇਤ੍ਵਾ ਸੁਨਿਵਤ੍ਥੋ ਸੁਪਾਰੁਤੋਵ ਪਾਦੁਕਾਹਿ ਨਗਰਂ ਪਵਿਸਿਤ੍ਵਾ ਪਾਸਾਦਵਰਮਾਰੁਯ੍ਹ ਵਾਤਪਾਨਂ ਵਿਵਰਿਤ੍ਵਾ ਮਹਾਵੀਥਿਯਂ ਵਿਰੋਚਮਾਨੋ ਨਿਸੀਦ ਏਕਗ੍ਗੋ ਸੁਖਸਮਪ੍ਪਿਤੋ ਹੁਤ੍ਵਾ, ਤਤ੍ਥ ਤੇ ਨਿਸਿਨ੍ਨਸ੍ਸ ਤਿਣਾਦੀਨਂ ਖਯੇਨ ਸਯਮੇਵ ਅਯਂ ਅਗ੍ਗਿ ਅਪ੍ਪਣ੍ਣਤ੍ਤਿਭਾਵਂ ਗਮਿਸ੍ਸਤੀ’’ਤਿ. ਸੋ ਤਥਾ ਕਰੇਯ੍ਯ. ਤਥੇਵ ਚ ਤਤ੍ਥ ਨਿਸਿਨ੍ਨਸ੍ਸ ਸੋ ਅਗ੍ਗਿ ਉਪਾਦਾਨਕ੍ਖਯੇਨ ਅਪ੍ਪਣ੍ਣਤ੍ਤਿਭਾਵਂ ਗਚ੍ਛੇਯ੍ਯ. ਇਦਂ ਸਨ੍ਧਾਯੇਤਂ ‘‘ਨ ਕਾਲੇਨ ਕਾਲ’’ਨ੍ਤਿਆਦਿ ਵੁਤ੍ਤਂ.

ਏਵਮੇਵ ਖੋਤਿ ਏਤ੍ਥ ਪਨ ਇਦਂ ਓਪਮ੍ਮਸਂਸਨ੍ਦਨਂ – ਚਤ੍ਤਾਲੀਸਾਯ ਕਟ੍ਠਵਾਹਾਨਂ ਜਲਮਾਨੋ ਮਹਾਅਗ੍ਗਿਕ੍ਖਨ੍ਧੋ ਵਿਯ ਹਿ ਤੇਭੂਮਕਵਟ੍ਟਂ ਦਟ੍ਠਬ੍ਬਂ, ਅਗ੍ਗਿਜਗ੍ਗਨਕਪੁਰਿਸੋ ਵਿਯ ਵਟ੍ਟਸਨ੍ਨਿਸ੍ਸਿਤਕੋ ਯੋਗਾਵਚਰੋ, ਅਤ੍ਥਕਾਮੋ ਪੁਰਿਸੋ ਵਿਯ ਸਮ੍ਮਾਸਮ੍ਬੁਦ੍ਧੋ, ਤੇਨ ਪੁਰਿਸੇਨ ਤਸ੍ਸ ਦਿਨ੍ਨਓਵਾਦੋ ਵਿਯ ਤਥਾਗਤੇਨ ‘‘ਏਹਿ ਤ੍ਵਂ, ਭਿਕ੍ਖੁ, ਤੇਭੂਮਕਧਮ੍ਮੇਸੁ ਨਿਬ੍ਬਿਨ੍ਦ, ਏਵਂ ਵਟ੍ਟਦੁਕ੍ਖਾ ਮੁਚ੍ਚਿਸ੍ਸਸੀ’’ਤਿ ਤਸ੍ਸ ਤੇਭੂਮਕਧਮ੍ਮੇਸੁ ਕਮ੍ਮਟ੍ਠਾਨਸ੍ਸ ਕਥਿਤਕਾਲੋ, ਤਸ੍ਸ ਪੁਰਿਸਸ੍ਸ ਯਥਾਨੁਸਿਟ੍ਠਂ ਪਟਿਪਜ੍ਜਿਤ੍ਵਾ ਪਾਸਾਦੇ ਨਿਸਿਨ੍ਨਕਾਲੋ ਵਿਯ ਯੋਗਿਨੋ ਸੁਗਤੋਵਾਦਂ ਸਮ੍ਪਟਿਚ੍ਛਿਤ੍ਵਾ ਸੁਞ੍ਞਾਗਾਰਂ ਪਵਿਟ੍ਠਸ੍ਸ ਤੇਭੂਮਕਧਮ੍ਮੇਸੁ ਵਿਪਸ੍ਸਨਂ ਪਟ੍ਠਪੇਤ੍ਵਾ ਅਨੁਕ੍ਕਮੇਨ ਯਥਾਨੁਰੂਪਂ ਆਹਾਰਸਪ੍ਪਾਯਾਦਿਂ ਲਭਿਤ੍ਵਾ, ਏਕਾਸਨੇ ਨਿਸਿਨ੍ਨਸ੍ਸ ਅਗ੍ਗਫਲੇ ਪਤਿਟ੍ਠਿਤਕਾਲੋ, ਤਸ੍ਸ ਨ੍ਹਾਨਵਿਲੇਪਨਾਦੀਹਿ ਸੁਧੋਤਮਣ੍ਡਿਤਕਾਯਤ੍ਤਾ ਤਸ੍ਮਿਂ ਨਿਸਿਨ੍ਨਸ੍ਸ ਏਕਗ੍ਗਸੁਖਸਮਪ੍ਪਿਤਕਾਲੋ ਵਿਯ ਯੋਗਿਨੋ ਅਰਿਯਮਗ੍ਗਪੋਕ੍ਖਰਣਿਯਂ ਮਗ੍ਗਞਾਣੋਦਕੇਨ ਸੁਨ੍ਹਾਤਸੁਧੋਤਕਿਲੇਸਮਲਸ੍ਸ ਹਿਰੋਤ੍ਤਪ੍ਪਸਾਟਕੇ ਨਿਵਾਸੇਤ੍ਵਾ ਸੀਲਵਿਲੇਪਨਾਨੁਲਿਤ੍ਤਸ੍ਸ ਅਰਹਤ੍ਤਮਣ੍ਡਨੇਨ ਅਤ੍ਤਭਾਵਂ ਮਣ੍ਡੇਤ੍ਵਾ ਵਿਮੁਤ੍ਤਿਪੁਪ੍ਫਦਾਮਂ ਪਿਲ਼ਨ੍ਧਿਤ੍ਵਾ ਇਦ੍ਧਿਪਾਦਪਾਦੁਕਾ ਆਰੁਯ੍ਹ ਨਿਬ੍ਬਾਨਨਗਰਂ ਪਵਿਸਿਤ੍ਵਾ ਧਮ੍ਮਪਾਸਾਦਂ ਆਰੁਯ੍ਹ ਸਤਿਪਟ੍ਠਾਨਮਹਾਵੀਥਿਯਂ ਵਿਰੋਚਮਾਨਸ੍ਸ ਨਿਬ੍ਬਾਨਾਰਮ੍ਮਣਂ ਫਲਸਮਾਪਤ੍ਤਿਂ ਅਪ੍ਪੇਤ੍ਵਾ ਨਿਸਿਨ੍ਨਕਾਲੋ. ਤਸ੍ਸ ਪਨ ਪੁਰਿਸਸ੍ਸ ਤਸ੍ਮਿਂ ਨਿਸਿਨ੍ਨਸ੍ਸ ਤਿਣਾਦੀਨਂ ਖਯੇਨ ਅਗ੍ਗਿਕ੍ਖਨ੍ਧਸ੍ਸ ਅਪ੍ਪਣ੍ਣਤ੍ਤਿਗਮਨਕਾਲੋ ਵਿਯ ਖੀਣਾਸਵਸ੍ਸ ਯਾਵਤਾਯੁਕਂ ਠਤ੍ਵਾ ਉਪਾਦਿਣ੍ਣਕਕ੍ਖਨ੍ਧਭੇਦੇਨ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬੁਤਸ੍ਸ ਮਹਾਵਟ੍ਟਵੂਪਸਮੋ ਦਟ੍ਠਬ੍ਬੋ. ਦੁਤਿਯਂ.

੩. ਸਂਯੋਜਨਸੁਤ੍ਤਵਣ੍ਣਨਾ

੫੩. ਤਤਿਯੇ ਸਂਯੋਜਨਿਯੇਸੂਤਿ ਦਸਨ੍ਨਂ ਸਂਯੋਜਨਾਨਂ ਪਚ੍ਚਯੇਸੁ. ਝਾਯੇਯ੍ਯਾਤਿ ਜਲੇਯ੍ਯ. ਤੇਲਂ ਆਸਿਞ੍ਚੇਯ੍ਯ ਵਟ੍ਟਿਂ ਉਪਸਂਹਰੇਯ੍ਯਾਤਿ ਦੀਪਪਟਿਜਗ੍ਗਨਤ੍ਥਂ ਤੇਲਭਾਜਨਞ੍ਚ ਮਹਨ੍ਤਞ੍ਚ ਵਟ੍ਟਿਕਪਾਲਂ ਗਹੇਤ੍ਵਾ ਸਮੀਪੇ ਨਿਚ੍ਚਂ ਠਿਤੋਵ ਤੇਲੇ ਖੀਣੇ ਤੇਲਂ ਆਸਿਞ੍ਚੇਯ੍ਯ, ਵਟ੍ਟਿਯਾ ਖੀਣਾਯ ਵਟ੍ਟਿਂ ਉਪਸਂਹਰੇਯ੍ਯ. ਸੇਸਮੇਤ੍ਥ ਸਦ੍ਧਿਂ ਓਪਮ੍ਮਸਂਸਨ੍ਦਨੇਨ ਪੁਰਿਮਨਯੇਨੇਵ ਵੇਦਿਤਬ੍ਬਂ. ਤਤਿਯਂ.

੪. ਦੁਤਿਯਸਂਯੋਜਨਸੁਤ੍ਤਵਣ੍ਣਨਾ

੫੪. ਚਤੁਤ੍ਥੇ ਉਪਮਂ ਪਠਮਂ ਕਤ੍ਵਾ ਪਚ੍ਛਾ ਅਤ੍ਥੋ ਵੁਤ੍ਤੋ. ਸੇਸਂ ਤਾਦਿਸਮੇਵ. ਚਤੁਤ੍ਥਂ.

੫. ਮਹਾਰੁਕ੍ਖਸੁਤ੍ਤਵਣ੍ਣਨਾ

੫੫. ਪਞ੍ਚਮੇ ਉਦ੍ਧਂ ਓਜਂ ਅਭਿਹਰਨ੍ਤੀਤਿ ਪਥਵੀਰਸਞ੍ਚ ਆਪੋਰਸਞ੍ਚ ਉਪਰਿ ਆਰੋਪੇਨ੍ਤਿ. ਓਜਾਯ ਆਰੋਪਿਤਤ੍ਤਾ ਹਤ੍ਥਸਤੁਬ੍ਬੇਧਸ੍ਸ ਰੁਕ੍ਖਸ੍ਸ ਅਙ੍ਕੁਰਗ੍ਗੇਸੁ ਬਿਨ੍ਦੁਬਿਨ੍ਦੂਨਿ ਵਿਯ ਹੁਤ੍ਵਾ ਸਿਨੇਹੋ ਤਿਟ੍ਠਤਿ. ਇਦਂ ਪਨੇਤ੍ਥ ਓਪਮ੍ਮਸਂਸਨ੍ਦਨਂ – ਮਹਾਰੁਕ੍ਖੋ ਵਿਯ ਹਿ ਤੇਭੂਮਕਵਟ੍ਟਂ, ਮੂਲਾਨਿ ਵਿਯ ਆਯਤਨਾਨਿ, ਮੂਲੇਹਿ ਓਜਾਯ ਆਰੋਹਨਂ ਵਿਯ ਛਹਿ ਦ੍ਵਾਰੇਹਿ ਕਮ੍ਮਾਰੋਹਨਂ, ਓਜਾਯ ਅਭਿਰੁਲ਼੍ਹਤ੍ਤਾ ਮਹਾਰੁਕ੍ਖਸ੍ਸ ਯਾਵਕਪ੍ਪਟ੍ਠਾਨਂ ਵਿਯ ਵਟ੍ਟਨਿਸ੍ਸਿਤਬਾਲਪੁਥੁਜ੍ਜਨਸ੍ਸ ਛਹਿ ਦ੍ਵਾਰੇਹਿ ਕਮ੍ਮਂ ਆਯੂਹਨ੍ਤਸ੍ਸ ਅਪਰਾਪਰਂ ਵਟ੍ਟਸ੍ਸ ਵਡ੍ਢਨਵਸੇਨ ਦੀਘਰਤ੍ਤਂ ਠਾਨਂ.

ਕੁਦ੍ਦਾਲਪਿਟਕਨ੍ਤਿ ਕੁਦ੍ਦਾਲਞ੍ਚੇਵ ਪਚ੍ਛਿਭਾਜਨਞ੍ਚ. ਖਣ੍ਡਾਖਣ੍ਡਿਕਂ ਛਿਨ੍ਦੇਯ੍ਯਾਤਿ ਖੁਦ੍ਦਕਮਹਨ੍ਤਾਨਿ ਖਣ੍ਡਾਖਣ੍ਡਾਨਿ ਕਰੋਨ੍ਤੋ ਛਿਨ੍ਦੇਯ੍ਯ. ਇਦਂ ਪਨੇਤ੍ਥ ਓਪਮ੍ਮਸਂਸਨ੍ਦਨਂ – ਇਧਾਪਿ ਹਿ ਮਹਾਰੁਕ੍ਖੋ ਵਿਯ ਤੇਭੂਮਕਵਟ੍ਟਂ, ਰੁਕ੍ਖਂ ਨਾਸੇਤੁਕਾਮੋ ਪੁਰਿਸੋ ਵਿਯ ਯੋਗਾਵਚਰੋ, ਕੁਦ੍ਦਾਲੋ ਵਿਯ ਞਾਣਂ, ਪਚ੍ਛਿ ਵਿਯ ਸਮਾਧਿ, ਰੁਕ੍ਖਚ੍ਛੇਦਨਫਰਸੁ ਵਿਯ ਞਾਣਂ, ਰੁਕ੍ਖਸ੍ਸ ਮੂਲੇ ਛਿਨ੍ਨਕਾਲੋ ਵਿਯ ਯੋਗਿਨੋ ਆਚਰਿਯਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਮਨਸਿਕਰੋਨ੍ਤਸ੍ਸ ਪਞ੍ਞਾ, ਖਣ੍ਡਾਖਣ੍ਡਿਕਂ ਛਿਨ੍ਦਨਕਾਲੋ ਵਿਯ ਸਙ੍ਖੇਪਤੋ ਚਤੁਨ੍ਨਂ ਮਹਾਭੂਤਾਨਂ ਮਨਸਿਕਾਰੋ, ਫਾਲਨਂ ਵਿਯ ਦ੍ਵੇਚਤ੍ਤਾਲੀਸਾਯ ਕੋਟ੍ਠਾਸੇਸੁ ਵਿਤ੍ਥਾਰਮਨਸਿਕਾਰੋ, ਸਕਲਿਕਂ ਸਕਲਿਕਂ ਕਰਣਕਾਲੋ ਵਿਯ ਉਪਾਦਾਰੂਪਸ੍ਸ ਚੇਵ ਰੂਪਕ੍ਖਨ੍ਧਾਰਮ੍ਮਣਸ੍ਸ ਵਿਞ੍ਞਾਣਸ੍ਸ ਚਾਤਿ ਇਮੇਸਂ ਵਸੇਨ ਨਾਮਰੂਪਪਰਿਗ੍ਗਹੋ, ਮੂਲਾਨਂ ਉਪਚ੍ਛੇਦਨਂ ਵਿਯ ਤਸ੍ਸੇਵ ਨਾਮਰੂਪਸ੍ਸ ਪਚ੍ਚਯਪਰਿਯੇਸਨਂ, ਵਾਤਾਤਪੇ ਵਿਸੋਸੇਤ੍ਵਾ ਅਗ੍ਗਿਨਾ ਡਹਨਕਾਲੋ ਵਿਯ ਅਨੁਪੁਬ੍ਬੇਨ ਵਿਪਸ੍ਸਨਂ ਵਡ੍ਢੇਤ੍ਵਾ ਅਞ੍ਞਤਰਂ ਸਪ੍ਪਾਯਂ ਲਭਿਤ੍ਵਾ ਕਮ੍ਮਟ੍ਠਾਨੇ ਵਿਭੂਤੇ ਉਪਟ੍ਠਹਮਾਨੇ ਏਕਪਲ੍ਲਙ੍ਕੇ ਨਿਸਿਨ੍ਨਸ੍ਸ ਸਮਣਧਮ੍ਮਂ ਕਰੋਨ੍ਤਸ੍ਸ ਅਗ੍ਗਫਲਪ੍ਪਤ੍ਤਿ, ਮਸਿਕਰਣਂ ਵਿਯ ਅਰਹਤ੍ਤਪ੍ਪਤ੍ਤਦਿਵਸੇਯੇਵ ਅਪਰਿਨਿਬ੍ਬਾਯਨ੍ਤਸ੍ਸ ਯਾਵਤਾਯੁਕਂ ਠਿਤ ਕਾਲੋ, ਮਹਾਵਾਤੇ ਓਪੁਨਨਂ ਨਦਿਯਾ ਪਵਾਹਨਂ ਵਿਯ ਚ ਉਪਾਦਿਣ੍ਣਕਕ੍ਖਨ੍ਧਭੇਦੇਨ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬੁਤਸ੍ਸ ਵਟ੍ਟਵੂਪਸਮੋ ਵੇਦਿਤਬ੍ਬੋ. ਪਞ੍ਚਮਂ.

੬. ਦੁਤਿਯਮਹਾਰੁਕ੍ਖਸੁਤ੍ਤਵਣ੍ਣਨਾ

੫੬. ਛਟ੍ਠੇਪਿ ਉਪਮਂ ਪਠਮਂ ਵਤ੍ਵਾ ਪਚ੍ਛਾ ਅਤ੍ਥੋ ਵੁਤ੍ਤੋ, ਇਦਮੇਵ ਨਾਨਤ੍ਤਂ. ਛਟ੍ਠਂ.

੭. ਤਰੁਣਰੁਕ੍ਖਸੁਤ੍ਤਵਣ੍ਣਨਾ

੫੭-੫੯. ਸਤ੍ਤਮੇ ਤਰੁਣੋਤਿ ਅਜਾਤਫਲੋ. ਪਲਿਮਜ੍ਜੇਯ੍ਯਾਤਿ ਸੋਧੇਯ੍ਯ. ਪਂਸੁਂ ਦਦੇਯ੍ਯਾਤਿ ਥਦ੍ਧਫਰੁਸਪਂਸੁਂ ਹਰਿਤ੍ਵਾ ਮੁਦੁਗੋਮਯਚੁਣ੍ਣਮਿਸ੍ਸਂ ਮਧੁਰਪਂਸੁਂ ਪਕ੍ਖਿਪੇਯ੍ਯ. ਵੁਦ੍ਧਿਨ੍ਤਿ ਵੁਦ੍ਧਿਂ ਆਪਜ੍ਜਿਤ੍ਵਾ ਪੁਪ੍ਫੂਪਗੋ ਪੁਪ੍ਫਂ, ਫਲੂਪਗੋ ਫਲਂ ਗਣ੍ਹੇਯ੍ਯ. ਇਦਂ ਪਨੇਤ੍ਥ ਓਪਮ੍ਮਸਂਸਨ੍ਦਨਂ – ਤਰੁਣਰੁਕ੍ਖੋ ਵਿਯ ਹਿ ਤੇਭੂਮਕਵਟ੍ਟਂ, ਰੁਕ੍ਖਜਗ੍ਗਕੋ ਪੁਰਿਸੋ ਵਿਯ ਵਟ੍ਟਨਿਸ੍ਸਿਤੋ ਪੁਥੁਜ੍ਜਨੋ, ਮੂਲਫਲਸਨ੍ਤਾਨਾਦੀਨਿ ਵਿਯ ਤੀਹਿ ਦ੍ਵਾਰੇਹਿ ਕੁਸਲਾਕੁਸਲਕਮ੍ਮਾਯੂਹਨਂ, ਰੁਕ੍ਖਸ੍ਸ ਵੁਡ੍ਢਿਆਪਜ੍ਜਨਂ ਵਿਯ ਪੁਥੁਜ੍ਜਨਸ੍ਸ ਤੀਹਿ ਦ੍ਵਾਰੇਹਿ ਕਮ੍ਮਂ ਆਯੂਹਤੋ ਅਪਰਾਪਰਂ ਵਟ੍ਟਪ੍ਪਵਤ੍ਤਿ. ਵਿਵਟ੍ਟਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਅਟ੍ਠਮਨਵਮਾਨਿ ਉਤ੍ਤਾਨਤ੍ਥਾਨੇਵ. ਸਤ੍ਤਮਾਦੀਨਿ.

੧੦. ਨਿਦਾਨਸੁਤ੍ਤਵਣ੍ਣਨਾ

੬੦. ਦਸਮੇ ਕੁਰੂਸੁ ਵਿਹਰਤੀਤਿ ਕੁਰੂਤਿ ਏਵਂ ਬਹੁਵਚਨਵਸੇਨ ਲਦ੍ਧਵੋਹਾਰੇ ਜਨਪਦੇ ਵਿਹਰਤਿ. ਕਮ੍ਮਾਸਧਮ੍ਮਂ ਨਾਮ ਕੁਰੂਨਂ ਨਿਗਮੋਤਿ ਏਵਂਨਾਮਕੋ ਕੁਰੂਨਂ ਨਿਗਮੋ, ਤਂ ਗੋਚਰਗਾਮਂ ਕਤ੍ਵਾਤਿ ਅਤ੍ਥੋ. ਆਯਸ੍ਮਾਤਿ ਪਿਯਵਚਨਮੇਤਂ ਗਰੁਵਚਨਮੇਤਂ. ਆਨਨ੍ਦੋਤਿ ਤਸ੍ਸ ਥੇਰਸ੍ਸ ਨਾਮਂ. ਏਕਮਨ੍ਤਂ ਨਿਸੀਦੀਤਿ ਛ ਨਿਸਜ੍ਜਦੋਸੇ ਵਿਵਜ੍ਜੇਨ੍ਤੋ ਦਕ੍ਖਿਣਜਾਣੁਮਣ੍ਡਲਸ੍ਸ ਅਭਿਮੁਖਟ੍ਠਾਨੇ ਛਬ੍ਬਣ੍ਣਾਨਂ ਬੁਦ੍ਧਰਸ੍ਮੀਨਂ ਅਨ੍ਤੋ ਪਵਿਸਿਤ੍ਵਾ ਪਸਨ੍ਨਲਾਖਾਰਸਂ ਵਿਗਾਹਨ੍ਤੋ ਵਿਯ ਸੁਵਣ੍ਣਪਟਂ ਪਾਰੁਪਨ੍ਤੋ ਵਿਯ ਰਤ੍ਤਕਮ੍ਬਲਵਿਤਾਨਮਜ੍ਝਂ ਪਵਿਸਨ੍ਤੋ ਵਿਯ ਧਮ੍ਮਭਣ੍ਡਾਗਾਰਿਕੋ ਆਯਸ੍ਮਾ ਆਨਨ੍ਦੋ ਨਿਸੀਦਿ. ਤੇਨ ਵੁਤ੍ਤਂ ‘‘ਏਕਮਨ੍ਤਂ ਨਿਸੀਦੀ’’ਤਿ.

ਕਾਯ ਪਨ ਵੇਲਾਯ ਕੇਨ ਕਾਰਣੇਨ ਅਯਮਾਯਸ੍ਮਾ ਭਗਵਨ੍ਤਂ ਉਪਸਙ੍ਕਮਨ੍ਤੋਤਿ? ਸਾਯਨ੍ਹਵੇਲਾਯ ਪਚ੍ਚਯਾਕਾਰਪਞ੍ਹਂ ਪੁਚ੍ਛਨਕਾਰਣੇਨ. ਤਂ ਦਿਵਸਂ ਕਿਰ ਅਯਮਾਯਸ੍ਮਾ ਕੁਲਸਙ੍ਗਹਤ੍ਥਾਯ ਘਰਦ੍ਵਾਰੇ ਘਰਦ੍ਵਾਰੇ ਸਹਸ੍ਸਭਣ੍ਡਿਕਂ ਨਿਕ੍ਖਿਪਨ੍ਤੋ ਵਿਯ ਕਮ੍ਮਾਸਧਮ੍ਮਂ ਪਿਣ੍ਡਾਯ ਚਰਿਤ੍ਵਾ ਪਿਣ੍ਡਪਾਤਪਟਿਕ੍ਕਨ੍ਤੋ ਸਤ੍ਥੁ ਵਤ੍ਤਂ ਦਸ੍ਸੇਤ੍ਵਾ ਸਤ੍ਥਰਿ ਗਨ੍ਧਕੁਟਿਂ ਪਵਿਟ੍ਠੇ ਸਤ੍ਥਾਰਂ ਵਨ੍ਦਿਤ੍ਵਾ ਅਤ੍ਤਨੋ ਦਿਵਾਟ੍ਠਾਨਂ ਗਨ੍ਤ੍ਵਾ ਅਨ੍ਤੇਵਾਸਿਕੇਸੁ ਵਤ੍ਤਂ ਦਸ੍ਸੇਤ੍ਵਾ ਪਟਿਕ੍ਕਨ੍ਤੇਸੁ ਦਿਵਾਟ੍ਠਾਨਂ ਪਟਿਸਮ੍ਮਜ੍ਜਿਤ੍ਵਾ ਚਮ੍ਮਕ੍ਖਣ੍ਡਂ ਪਞ੍ਞਪੇਤ੍ਵਾ ਉਦਕਤੁਮ੍ਬਤੋ ਉਦਕੇਨ ਹਤ੍ਥਪਾਦੇ ਸੀਤਲਂ ਕਤ੍ਵਾ ਪਲ੍ਲਙ੍ਕਂ ਆਭੁਜਿਤ੍ਵਾ ਨਿਸਿਨ੍ਨੋ ਸੋਤਾਪਤ੍ਤਿਫਲਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ. ਅਥ ਪਰਿਚ੍ਛਿਨ੍ਨਕਾਲਵਸੇਨ ਸਮਾਪਤ੍ਤਿਤੋ ਵੁਟ੍ਠਾਯ ਪਚ੍ਚਯਾਕਾਰੇ ਞਾਣਂ ਓਤਾਰੇਸਿ. ਸੋ ‘‘ਅਵਿਜ੍ਜਾਪਚ੍ਚਯਾ ਸਙ੍ਖਾਰਾ’’ਤਿਆਦਿਤੋ ਪਟ੍ਠਾਯ ਅਨ੍ਤਂ, ਅਨ੍ਤਤੋ ਪਟ੍ਠਾਯ ਆਦਿਂ, ਉਭਯਨ੍ਤਤੋ ਪਟ੍ਠਾਯ ਮਜ੍ਝਂ, ਮਜ੍ਝਤੋ ਪਟ੍ਠਾਯ ਉਭੋ ਅਨ੍ਤੇ ਪਾਪੇਨ੍ਤੋ ਤਿਕ੍ਖਤ੍ਤੁਂ ਦ੍ਵਾਦਸਪਦਂ ਪਚ੍ਚਯਾਕਾਰਂ ਸਮ੍ਮਸਿ. ਤਸ੍ਸੇਵਂ ਸਮ੍ਮਸਨ੍ਤਸ੍ਸ ਪਚ੍ਚਯਾਕਾਰੋ ਵਿਭੂਤੋ ਹੁਤ੍ਵਾ ਉਤ੍ਤਾਨਕੁਤ੍ਤਾਨਕੋ ਵਿਯ ਉਪਟ੍ਠਾਸਿ. ਤਤੋ ਚਿਨ੍ਤੇਸਿ – ‘‘ਅਯਂ ਪਚ੍ਚਯਾਕਾਰੋ ਸਬ੍ਬਬੁਦ੍ਧੇਹਿ ਗਮ੍ਭੀਰੋ ਚੇਵ ਗਮ੍ਭੀਰਾਵਭਾਸੋ ਚਾਤਿ ਕਥਿਤੋ, ਮਯ੍ਹਂ ਖੋ ਪਨ ਪਦੇਸਞਾਣੇ ਠਿਤਸ੍ਸ ਸਾਵਕਸ੍ਸ ਸਤੋ ਉਤ੍ਤਾਨੋ ਵਿਯ ਵਿਭੂਤੋ ਪਾਕਟੋ ਹੁਤ੍ਵਾ ਉਪਟ੍ਠਾਤਿ, ਮਯ੍ਹਂਯੇਵ ਨੁ ਖੋ ਏਸ ਉਤ੍ਤਾਨਕੋ ਵਿਯ ਉਪਟ੍ਠਾਤਿ, ਉਦਾਹੁ ਅਞ੍ਞੇਸਮ੍ਪੀਤਿ ਅਤ੍ਤਨੋ ਉਪਟ੍ਠਾਨਕਾਰਣਂ ਸਤ੍ਥੁ ਆਰੋਚੇਸ੍ਸਾਮੀ’’ਤਿ ਨਿਸਿਨ੍ਨਟ੍ਠਾਨਤੋ ਉਟ੍ਠਾਯ ਚਮ੍ਮਕ੍ਖਣ੍ਡਂ ਪਪ੍ਫੋਟੇਤ੍ਵਾ ਆਦਾਯ ਸਾਯਨ੍ਹਸਮਯੇ ਭਗਵਨ੍ਤਂ ਉਪਸਙ੍ਕਮਿ. ਤੇਨ ਵੁਤ੍ਤਂ – ‘‘ਸਾਯਨ੍ਹਵੇਲਾਯਂ ਪਚ੍ਚਯਾਕਾਰਪਞ੍ਹਂ ਪੁਚ੍ਛਨਕਾਰਣੇਨ ਉਪਸਙ੍ਕਮਨ੍ਤੋ’’ਤਿ.

ਯਾਵ ਗਮ੍ਭੀਰੋਤਿ ਏਤ੍ਥ ਯਾਵਸਦ੍ਦੋ ਪਮਾਣਾਤਿਕ੍ਕਮੇ. ਅਤਿਕ੍ਕਮ੍ਮ ਪਮਾਣਂ ਗਮ੍ਭੀਰੋ, ਅਤਿਗਮ੍ਭੀਰੋਤਿ ਅਤ੍ਥੋ. ਗਮ੍ਭੀਰਾਵਭਾਸੋਤਿ ਗਮ੍ਭੀਰੋਵ ਹੁਤ੍ਵਾ ਅਵਭਾਸਤਿ, ਦਿਸ੍ਸਤੀਤਿ ਅਤ੍ਥੋ. ਏਕਞ੍ਹਿ ਉਤ੍ਤਾਨਮੇਵ ਗਮ੍ਭੀਰਾਵਭਾਸਂ ਹੋਤਿ ਪੂਤਿਪਣ੍ਣਰਸਵਸੇਨ ਕਾਲ਼ਵਣ੍ਣਂ ਪੁਰਾਣਉਦਕਂ ਵਿਯ. ਤਞ੍ਹਿ ਜਾਣੁਪ੍ਪਮਾਣਮ੍ਪਿ ਸਤਪੋਰਿਸਂ ਵਿਯ ਦਿਸ੍ਸਤਿ. ਏਕਂ ਗਮ੍ਭੀਰਂ ਉਤ੍ਤਾਨਾਵਭਾਸਂ ਹੋਤਿ ਮਣਿਭਾਸਂ ਵਿਪ੍ਪਸਨ੍ਨਉਦਕਂ ਵਿਯ. ਤਞ੍ਹਿ ਸਤਪੋਰਿਸਮ੍ਪਿ ਜਾਣੁਪ੍ਪਮਾਣਂ ਵਿਯ ਖਾਯਤਿ. ਏਕਂ ਉਤ੍ਤਾਨਂ ਉਤ੍ਤਾਨਾਵਭਾਸਂ ਹੋਤਿ ਪਾਤਿਆਦੀਸੁ ਉਦਕਂ ਵਿਯ. ਏਕਂ ਗਮ੍ਭੀਰਂ ਗਮ੍ਭੀਰਾਵਭਾਸਂ ਹੋਤਿ ਸਿਨੇਰੁਪਾਦਕਮਹਾਸਮੁਦ੍ਦੇ ਉਦਕਂ ਵਿਯ. ਏਵਂ ਉਦਕਮੇਵ ਚਤ੍ਤਾਰਿ ਨਾਮਾਨਿ ਲਭਤਿ. ਪਟਿਚ੍ਚਸਮੁਪ੍ਪਾਦੇ ਪਨੇਤਂ ਨਤ੍ਥਿ. ਅਯਞ੍ਹਿ ਗਮ੍ਭੀਰੋ ਚ ਗਮ੍ਭੀਰਾਵਭਾਸੋ ਚਾਤਿ ਏਕਮੇਵ ਨਾਮਂ ਲਭਤਿ. ਏਵਰੂਪੋ ਸਮਾਨੋਪਿ ਅਥ ਚ ਪਨ ਮੇ ਉਤ੍ਤਾਨਕੁਤ੍ਤਾਨਕੋ ਵਿਯ ਖਾਯਤਿ, ਤਦਿਦਂ ਅਚ੍ਛਰਿਯਂ, ਭਨ੍ਤੇ, ਅਬ੍ਭੁਤਂ, ਭਨ੍ਤੇਤਿ ਏਵਂ ਅਤ੍ਤਨੋ ਵਿਮ੍ਹਯਂ ਪਕਾਸੇਨ੍ਤੋ ਪਞ੍ਹਂ ਪੁਚ੍ਛਿਤ੍ਵਾ ਤੁਣ੍ਹੀਭੂਤੋ ਨਿਸੀਦਿ.

ਭਗਵਾ ਤਸ੍ਸ ਵਚਨਂ ਸੁਤ੍ਵਾ ‘‘ਆਨਨ੍ਦੋ ਭਵਗ੍ਗਗਹਣਾਯ ਹਤ੍ਥਂ ਪਸਾਰੇਨ੍ਤੋ ਵਿਯ ਸਿਨੇਰੁਂ ਭਿਨ੍ਦਿਤ੍ਵਾ ਮਿਞ੍ਜਂ ਨੀਹਰਿਤੁਂ ਵਾਯਮਮਾਨੋ ਵਿਯ ਵਿਨਾ ਨਾਵਾਯ ਮਹਾਸਮੁਦ੍ਦਂ ਤਰਿਤੁਕਾਮੋ ਵਿਯ ਪਥਵਿਂ ਪਰਿਵਤ੍ਤੇਤ੍ਵਾ ਪਥਵੋਜਂ ਗਹੇਤੁਂ ਵਾਯਮਮਾਨੋ ਵਿਯ ਬੁਦ੍ਧਵਿਸਯਂ ਪਞ੍ਹਂ ਅਤ੍ਤਨੋ ਉਤ੍ਤਾਨੁਤ੍ਤਾਨਨ੍ਤਿ ਵਦਤਿ, ਹਨ੍ਦਸ੍ਸ ਗਮ੍ਭੀਰਭਾਵਂ ਆਚਿਕ੍ਖਾਮੀ’’ਤਿ ਚਿਨ੍ਤੇਤ੍ਵਾ ਮਾ ਹੇਵਨ੍ਤਿਆਦਿਮਾਹ.

ਤਤ੍ਥ ਮਾ ਹੇਵਨ੍ਤਿ ਹ-ਕਾਰੋ ਨਿਪਾਤਮਤ੍ਤਂ, ਏਵਂ ਮਾ ਭਣੀਤਿ ਅਤ੍ਥੋ. ‘‘ਮਾ ਹੇਵ’’ਨ੍ਤਿ ਚ ਇਦਂ ਵਚਨਂ ਭਗਵਾ ਆਯਸ੍ਮਨ੍ਤਂ ਆਨਨ੍ਦਂ ਉਸ੍ਸਾਦੇਨ੍ਤੋਪਿ ਭਣਤਿ ਅਪਸਾਦੇਨ੍ਤੋਪਿ. ਤਤ੍ਥ ਉਸ੍ਸਾਦੇਨ੍ਤੋਪੀਤਿ, ਆਨਨ੍ਦ, ਤ੍ਵਂ ਮਹਾਪਞ੍ਞੋ ਵਿਸਦਞਾਣੋ, ਤੇਨ ਤੇ ਗਮ੍ਭੀਰੋਪਿ ਪਟਿਚ੍ਚਸਮੁਪ੍ਪਾਦੋ ਉਤ੍ਤਾਨਕੋ ਵਿਯ ਖਾਯਤਿ, ਅਞ੍ਞੇਸਂ ਪਨੇਸ ਉਤ੍ਤਾਨਕੋਤਿ ਨ ਸਲ੍ਲਕ੍ਖੇਤਬ੍ਬੋ, ਗਮ੍ਭੀਰੋਯੇਵ ਚ ਸੋ ਗਮ੍ਭੀਰਾਵਭਾਸੋ ਚ.

ਤਤ੍ਥ ਚਤਸ੍ਸੋ ਉਪਮਾ ਵਦਨ੍ਤਿ – ਛ ਮਾਸੇ ਸੁਭੋਜਨਰਸਪੁਟ੍ਠਸ੍ਸ ਕਿਰ ਕਤਯੋਗਸ੍ਸ ਮਹਾਮਲ੍ਲਸ੍ਸ ਸਮਜ੍ਜਸਮਯੇ ਕਤਮਲ੍ਲਪਾਸਾਣਪਰਿਚਯਸ੍ਸ ਯੁਦ੍ਧਭੂਮਿਂ ਗਚ੍ਛਨ੍ਤਸ੍ਸ ਅਨ੍ਤਰਾ ਮਲ੍ਲਪਾਸਾਣਂ ਦਸ੍ਸੇਸੁਂ. ਸੋ ‘‘ਕਿਂ ਏਤ’’ਨ੍ਤਿ ਆਹ. ਮਲ੍ਲਪਾਸਾਣੋਤਿ. ਆਹਰਥ ਨਨ੍ਤਿ. ‘‘ਉਕ੍ਖਿਪਿਤੁਂ ਨ ਸਕ੍ਕੋਮਾ’’ਤਿ ਵੁਤ੍ਤੇ ਸਯਂ ਗਨ੍ਤ੍ਵਾ ‘‘ਕੁਹਿਂ ਇਮਸ੍ਸ ਭਾਰਿਯਟ੍ਠਾਨ’’ਨ੍ਤਿ ਵਤ੍ਵਾ ਦ੍ਵੀਹਿ ਹਤ੍ਥੇਹਿ ਦ੍ਵੇ ਪਾਸਾਣੇ ਉਕ੍ਖਿਪਿਤ੍ਵਾ ਕੀਲ਼ਾਗੁਲ਼ੇ ਵਿਯ ਖਿਪਿਤ੍ਵਾ ਅਗਮਾਸਿ. ਤਤ੍ਥ ਮਲ੍ਲਸ੍ਸ ਮਲ੍ਲਪਾਸਾਣੋ ਲਹੁਕੋਤਿ ਨ ਅਞ੍ਞੇਸਮ੍ਪਿ ਲਹੁਕੋਤਿ ਵਤ੍ਤਬ੍ਬੋ. ਛ ਮਾਸੇ ਸੁਭੋਜਨਰਸਪੁਟ੍ਠੋ ਮਲ੍ਲੋ ਵਿਯ ਹਿ ਕਪ੍ਪਸਤਸਹਸ੍ਸਂ ਅਭਿਨੀਹਾਰਸਮ੍ਪਨ੍ਨੋ ਆਯਸ੍ਮਾ ਆਨਨ੍ਦੋ. ਯਥਾ ਮਲ੍ਲਸ੍ਸ ਮਹਾਬਲਤਾਯ ਮਲ੍ਲਪਾਸਾਣੋ ਲਹੁਕੋ, ਏਵਂ ਥੇਰਸ੍ਸ ਮਹਾਪਞ੍ਞਤਾਯ ਪਟਿਚ੍ਚਸਮੁਪ੍ਪਾਦੋ ਉਤ੍ਤਾਨੋਤਿ ਵਤ੍ਤਬ੍ਬੋ, ਸੋ ਅਞ੍ਞੇਸਂ ਉਤ੍ਤਾਨੋਤਿ ਨ ਵਤ੍ਤਬ੍ਬੋ.

ਮਹਾਸਮੁਦ੍ਦੇ ਚ ਤਿਮਿ ਨਾਮ ਮਹਾਮਚ੍ਛੋ ਦ੍ਵਿਯੋਜਨਸਤਿਕੋ, ਤਿਮਿਙ੍ਗਲੋ ਤਿਯੋਜਨਸਤਿਕੋ, ਤਿਮਿਰਪਿਙ੍ਗਲੋ ਪਞ੍ਚਯੋਜਨਸਤਿਕੋ, ਆਨਨ੍ਦੋ ਤਿਮਿਨਨ੍ਦੋ ਅਜ੍ਝਾਰੋਹੋ ਮਹਾਤਿਮੀਤਿ ਇਮੇ ਚਤ੍ਤਾਰੋ ਯੋਜਨਸਹਸ੍ਸਿਕਾ. ਤਤ੍ਥ ਤਿਮਿਰਪਿਙ੍ਗਲੇਨੇਵ ਦੀਪੇਨ੍ਤਿ. ਤਸ੍ਸ ਕਿਰ ਦਕ੍ਖਿਣਕਣ੍ਣਂ ਚਾਲੇਨ੍ਤਸ੍ਸ ਪਞ੍ਚਯੋਜਨਸਤੇ ਪਦੇਸੇ ਉਦਕਂ ਚਲਤਿ, ਤਥਾ ਵਾਮਕਣ੍ਣਂ, ਤਥਾ ਨਙ੍ਗੁਟ੍ਠਂ, ਤਥਾ ਸੀਸਂ. ਦ੍ਵੇ ਪਨ ਕਣ੍ਣੇ ਚਾਲੇਤ੍ਵਾ ਨਙ੍ਗੁਟ੍ਠੇਨ ਪਹਰਿਤ੍ਵਾ ਸੀਸਂ ਅਪਰਾਪਰਂ ਕਤ੍ਵਾ ਕੀਲ਼ਿਤੁਂ ਆਰਦ੍ਧਸ੍ਸ ਸਤ੍ਤਟ੍ਠਯੋਜਨਸਤੇ ਠਾਨੇ ਭਾਜਨੇ ਪਕ੍ਖਿਪਿਤ੍ਵਾ ਉਦ੍ਧਨੇ ਆਰੋਪਿਤਂ ਵਿਯ ਉਦਕਂ ਪਕ੍ਕੁਥਤਿ. ਯੋਜਨਸਤਮਤ੍ਤੇ ਪਦੇਸੇ ਉਦਕਂ ਪਿਟ੍ਠਿਂ ਛਾਦੇਤੁਂ ਨ ਸਕ੍ਕੋਤਿ. ਸੋ ਏਵਂ ਵਦੇਯ੍ਯ – ‘‘ਅਯਂ ਮਹਾਸਮੁਦ੍ਦੋ ਗਮ੍ਭੀਰੋਤਿ ਵਦਨ੍ਤਿ, ਕੁਤਸ੍ਸ ਗਮ੍ਭੀਰਤਾ, ਮਯਂ ਪਿਟ੍ਠਿਮਤ੍ਤਚ੍ਛਾਦਨਮ੍ਪਿ ਉਦਕਂ ਨ ਲਭਾਮਾ’’ਤਿ. ਤਤ੍ਥ ਕਾਯੂਪਪਨ੍ਨਸ੍ਸ ਤਿਮਿਰਪਿਙ੍ਗਲਸ੍ਸ ਮਹਾਸਮੁਦ੍ਦੋ ਉਤ੍ਤਾਨੋਤਿ ਅਞ੍ਞੇਸਞ੍ਚ ਖੁਦ੍ਦਕਮਚ੍ਛਾਨਂ ਉਤ੍ਤਾਨੋਤਿ ਨ ਵਤ੍ਤਬ੍ਬੋ, ਏਵਮੇਵ ਞਾਣੂਪਪਨ੍ਨਸ੍ਸ ਥੇਰਸ੍ਸ ਪਟਿਚ੍ਚਸਮੁਪ੍ਪਾਦੋ ਉਤ੍ਤਾਨੋਤਿ ਅਞ੍ਞੇਸਮ੍ਪਿ ਉਤ੍ਤਾਨੋਤਿ ਨ ਵਤ੍ਤਬ੍ਬੋ. ਸੁਪਣ੍ਣਰਾਜਾ ਚ ਦਿਯਡ੍ਢਯੋਜਨਸਤਿਕੋ ਹੋਤਿ. ਤਸ੍ਸ ਦਕ੍ਖਿਣਪਕ੍ਖੋ ਪਞ੍ਞਾਸਯੋਜਨਿਕੋ ਹੋਤਿ, ਤਥਾ ਵਾਮਪਕ੍ਖੋ, ਪਿਞ੍ਛਵਟ੍ਟਿ ਚ ਸਟ੍ਠਿਯੋਜਨਿਕਾ, ਗੀਵਾ ਤਿਂਸਯੋਜਨਿਕਾ, ਮੁਖਂ ਨਵਯੋਜਨਂ, ਪਾਦਾ ਦ੍ਵਾਦਸਯੋਜਨਿਕਾ, ਤਸ੍ਮਿਂ ਸੁਪਣ੍ਣਵਾਤਂ ਦਸ੍ਸੇਤੁਂ ਆਰਦ੍ਧੇ ਸਤ੍ਤਟ੍ਠਯੋਜਨਸਤਂ ਠਾਨਂ ਨਪ੍ਪਹੋਤਿ. ਸੋ ਏਵਂ ਵਦੇਯ੍ਯ – ‘‘ਅਯਂ ਆਕਾਸੋ ਅਨਨ੍ਤੋਤਿ ਵਦਨ੍ਤਿ, ਕੁਤਸ੍ਸ ਅਨਨ੍ਤਤਾ, ਮਯਂ ਪਕ੍ਖਵਾਤਪ੍ਪਤ੍ਥਰਣੋਕਾਸਮ੍ਪਿ ਨ ਲਭਾਮਾ’’ਤਿ. ਤਤ੍ਥ ਕਾਯੂਪਪਨ੍ਨਸ੍ਸ ਸੁਪਣ੍ਣਰਞ੍ਞੋ ਆਕਾਸੋ ਪਰਿਤ੍ਤੋਤਿ ਅਞ੍ਞੇਸਞ੍ਚ ਖੁਦ੍ਦਕਪਕ੍ਖੀਨਂ ਪਰਿਤ੍ਤੋਤਿ ਨ ਵਤ੍ਤਬ੍ਬੋ, ਏਵਮੇਵ ਞਾਣੂਪਪਨ੍ਨਸ੍ਸ ਥੇਰਸ੍ਸ ਪਟਿਚ੍ਚਸਮੁਪ੍ਪਾਦੋ ਉਤ੍ਤਾਨੋਤਿ ਅਞ੍ਞੇਸਮ੍ਪਿ ਉਤ੍ਤਾਨੋਤਿ ਨ ਵਤ੍ਤਬ੍ਬੋ.

ਰਾਹੁ ਅਸੁਰਿਨ੍ਦੋ ਪਨ ਪਾਦਨ੍ਤਤੋ ਯਾਵ ਕੇਸਨ੍ਤਾ ਯੋਜਨਾਨਂ ਚਤ੍ਤਾਰਿ ਸਹਸ੍ਸਾਨਿ ਅਟ੍ਠ ਚ ਸਤਾਨਿ ਹੋਨ੍ਤਿ. ਤਸ੍ਸ ਦ੍ਵਿਨ੍ਨਂ ਬਾਹਾਨਂ ਅਨ੍ਤਰੇ ਦ੍ਵਾਦਸਯੋਜਨਸਤਿਕਂ, ਬਹਲਤ੍ਤੇਨ ਛਯੋਜਨਸਤਿਕਂ, ਹਤ੍ਥਪਾਦਤਲਾਨਿ ਤਿਯੋਜਨਸਤਿਕਾਨਿ, ਤਥਾ ਮੁਖਂ, ਏਕਙ੍ਗੁਲਿਪਬ੍ਬਂ ਪਞ੍ਞਾਸਯੋਜਨਂ, ਤਥਾ ਭਮੁਕਨ੍ਤਰਂ, ਨਲਾਟਂ ਤਿਯੋਜਨਸਤਿਕਂ, ਸੀਸਂ ਨਵਯੋਜਨਸਤਿਕਂ. ਤਸ੍ਸ ਮਹਾਸਮੁਦ੍ਦਂ ਓਤਿਣ੍ਣਸ੍ਸ ਗਮ੍ਭੀਰਂ ਉਦਕਂ ਜਾਣੁਪ੍ਪਮਾਣਂ ਹੋਤਿ. ਸੋ ਏਵਂ ਵਦੇਯ੍ਯ – ‘‘ਅਯਂ ਮਹਾਸਮੁਦ੍ਦੋ ਗਮ੍ਭੀਰੋਤਿ ਵਦਨ੍ਤਿ. ਕੁਤਸ੍ਸ ਗਮ੍ਭੀਰਤਾ? ਮਯਂ ਜਾਣੁਪ੍ਪਟਿਚ੍ਛਾਦਨਮਤ੍ਤਮ੍ਪਿ ਉਦਕਂ ਨ ਲਭਾਮਾ’’ਤਿ. ਤਤ੍ਥ ਕਾਯੂਪਪਨ੍ਨਸ੍ਸ ਰਾਹੁਨੋ ਮਹਾਸਮੁਦ੍ਦੋ ਉਤ੍ਤਾਨੋਤਿ ਅਞ੍ਞੇਸਞ੍ਚ ਉਤ੍ਤਾਨੋਤਿ ਨ ਵਤ੍ਤਬ੍ਬੋ. ਏਵਮੇਵ ਞਾਣੂਪਪਨ੍ਨਸ੍ਸ ਥੇਰਸ੍ਸ ਪਟਿਚ੍ਚਸਮੁਪ੍ਪਾਦੋ ਉਤ੍ਤਾਨੋਤਿ ਅਞ੍ਞੇਸਮ੍ਪਿ ਉਤ੍ਤਾਨੋਤਿ ਨ ਵਤ੍ਤਬ੍ਬੋ. ਏਤਮਤ੍ਥਂ ਸਨ੍ਧਾਯ ਭਗਵਾ ਮਾ ਹੇਵਂ, ਆਨਨ੍ਦ, ਮਾ ਹੇਵਂ, ਆਨਨ੍ਦਾਤਿ ਆਹ.

ਥੇਰਸ੍ਸ ਹਿ ਚਤੂਹਿ ਕਾਰਣੇਹਿ ਗਮ੍ਭੀਰੋ ਪਟਿਚ੍ਚਸਮੁਪ੍ਪਾਦੋ ਉਤ੍ਤਾਨੋਤਿ ਉਪਟ੍ਠਾਸਿ. ਕਤਮੇਹਿ ਚਤੂਹਿ? ਪੁਬ੍ਬੂਪਨਿਸ੍ਸਯਸਮ੍ਪਤ੍ਤਿਯਾ ਤਿਤ੍ਥਵਾਸੇਨ ਸੋਤਾਪਨ੍ਨਤਾਯ ਬਹੁਸ੍ਸੁਤਭਾਵੇਨਾਤਿ.

ਇਤੋ ਕਿਰ ਸਤਸਹਸ੍ਸਿਮੇ ਕਪ੍ਪੇ ਪਦੁਮੁਤ੍ਤਰੋ ਨਾਮ ਸਤ੍ਥਾ ਲੋਕੇ ਉਪ੍ਪਜ੍ਜਿ. ਤਸ੍ਸ ਹਂਸਵਤੀ ਨਾਮ ਨਗਰਂ ਅਹੋਸਿ, ਆਨਨ੍ਦੋ ਨਾਮ ਰਾਜਾ ਪਿਤਾ, ਸੁਮੇਧਾ ਨਾਮ ਦੇਵੀ ਮਾਤਾ, ਬੋਧਿਸਤ੍ਤੋ ਉਤ੍ਤਰਕੁਮਾਰੋ ਨਾਮ ਅਹੋਸਿ. ਸੋ ਪੁਤ੍ਤਸ੍ਸ ਜਾਤਦਿਵਸੇ ਮਹਾਭਿਨਿਕ੍ਖਮਨਂ ਨਿਕ੍ਖਮ੍ਮ ਪਬ੍ਬਜਿਤ੍ਵਾ ਪਧਾਨਮਨੁਯੁਤ੍ਤੋ ਅਨੁਕ੍ਕਮੇਨ ਸਬ੍ਬਞ੍ਞੁਤਂ ਪਤ੍ਵਾ, ‘‘ਅਨੇਕਜਾਤਿਸਂਸਾਰ’’ਨ੍ਤਿ ਉਦਾਨਂ ਉਦਾਨੇਤ੍ਵਾ ਸਤ੍ਤਾਹਂ ਬੋਧਿਪਲ੍ਲਙ੍ਕੇ ਵੀਤਿਨਾਮੇਤ੍ਵਾ ‘‘ਪਥਵਿਯਂ ਪਾਦਂ ਠਪੇਸ੍ਸਾਮੀ’’ਤਿ ਪਾਦਂ ਅਭਿਨੀਹਰਿ. ਅਥ ਪਥਵਿਂ ਭਿਨ੍ਦਿਤ੍ਵਾ ਮਹਨ੍ਤਂ ਪਦੁਮਂ ਉਟ੍ਠਾਸਿ. ਤਸ੍ਸ ਧੁਰਪਤ੍ਤਾਨਿ ਨਵੁਤਿਹਤ੍ਥਾਨਿ, ਕੇਸਰਂ ਤਿਂਸਹਤ੍ਥਂ, ਕਣ੍ਣਿਕਾ ਦ੍ਵਾਦਸਹਤ੍ਥਾ, ਨਵਘਟਪ੍ਪਮਾਣਾ ਰੇਣੁ ਅਹੋਸਿ.

ਸਤ੍ਥਾ ਪਨ ਉਬ੍ਬੇਧਤੋ ਅਟ੍ਠਪਞ੍ਞਾਸਹਤ੍ਥੋ ਅਹੋਸਿ, ਤਸ੍ਸ ਉਭਿਨ੍ਨਂ ਬਾਹਾਨਮਨ੍ਤਰਂ ਅਟ੍ਠਾਰਸਹਤ੍ਥਂ, ਨਲਾਟਂ ਪਞ੍ਚਹਤ੍ਥਂ, ਹਤ੍ਥਪਾਦਾ ਏਕਾਦਸਹਤ੍ਥਾ. ਤਸ੍ਸ ਏਕਾਦਸਹਤ੍ਥੇਨ ਪਾਦੇਨ ਦ੍ਵਾਦਸਹਤ੍ਥਾਯ ਕਣ੍ਣਿਕਾਯ ਅਕ੍ਕਨ੍ਤਮਤ੍ਤਾਯ ਨਵਘਟਪ੍ਪਮਾਣਾ ਰੇਣੁ ਉਟ੍ਠਾਯ ਅਟ੍ਠਪਞ੍ਞਾਸਹਤ੍ਥਂ ਪਦੇਸਂ ਉਗ੍ਗਨ੍ਤ੍ਵਾ ਓਕਿਣ੍ਣਮਨੋਸਿਲਾਚੁਣ੍ਣਂ ਵਿਯ ਪਚ੍ਚੋਕਿਣ੍ਣਂ. ਤਦੁਪਾਦਾਯ ਭਗਵਾ ‘‘ਪਦੁਮੁਤ੍ਤਰੋ’’ਤ੍ਵੇਵ ਪਞ੍ਞਾਯਿਤ੍ਥ. ਤਸ੍ਸ ਦੇਵਿਲੋ ਚ ਸੁਜਾਤੋ ਚ ਦ੍ਵੇ ਅਗ੍ਗਸਾਵਕਾ ਅਹੇਸੁਂ, ਅਮਿਤਾ ਚ ਅਸਮਾ ਚ ਦ੍ਵੇ ਅਗ੍ਗਸਾਵਿਕਾ, ਸੁਮਨੋ ਨਾਮ ਉਪਟ੍ਠਾਕੋ. ਪਦੁਮੁਤ੍ਤਰੋ ਭਗਵਾ ਪਿਤੁਸਙ੍ਗਹਂ ਕੁਰੁਮਾਨੋ ਭਿਕ੍ਖੁਸਤਸਹਸ੍ਸਪਰਿਵਾਰੋ ਹਂਸਵਤਿਯਾ ਰਾਜਧਾਨਿਯਾ ਵਸਤਿ.

ਕਨਿਟ੍ਠਭਾਤਾ ਪਨਸ੍ਸ ਸੁਮਨਕੁਮਾਰੋ ਨਾਮ. ਤਸ੍ਸ ਰਾਜਾ ਹਂਸਵਤਿਤੋ ਵੀਸਯੋਜਨਸਤੇ ਭੋਗਂ ਅਦਾਸਿ. ਸੋ ਕਦਾਚਿ ਆਗਨ੍ਤ੍ਵਾ ਪਿਤਰਞ੍ਚ ਸਤ੍ਥਾਰਞ੍ਚ ਪਸ੍ਸਤਿ. ਅਥੇਕਦਿਵਸਂ ਪਚ੍ਚਨ੍ਤੋ ਕੁਪਿਤੋ. ਸੁਮਨੋ ਰਞ੍ਞੋ ਸਾਸਨਂ ਪੇਸੇਸਿ. ਰਾਜਾ ‘‘ਤ੍ਵਂ ਮਯਾ, ਤਾਤ, ਕਸ੍ਮਾ ਠਪਿਤੋ’’ਤਿ ਪਟਿਪੇਸੇਸਿ. ਸੋ ਚੋਰੇ ਵੂਪਸਮੇਤ੍ਵਾ ‘‘ਉਪਸਨ੍ਤੋ, ਦੇਵ, ਜਨਪਦੋ’’ਤਿ ਰਞ੍ਞੋ ਪੇਸੇਸਿ. ਰਾਜਾ ਤੁਟ੍ਠੋ ‘‘ਸੀਘਂ ਮਮ ਪੁਤ੍ਤੋ ਆਗਚ੍ਛਤੂ’’ਤਿ ਆਹ. ਤਸ੍ਸ ਸਹਸ੍ਸਮਤ੍ਤਾ ਅਮਚ੍ਚਾ ਹੋਨ੍ਤਿ. ਸੋ ਤੇਹਿ ਸਦ੍ਧਿਂ ਅਨ੍ਤਰਾਮਗ੍ਗੇ ਮਨ੍ਤੇਸਿ – ‘‘ਮਯ੍ਹਂ ਪਿਤਾ ਤੁਟ੍ਠੋ ਸਚੇ ਮੇ ਵਰਂ ਦੇਤਿ, ਕਿਂ ਗਣ੍ਹਾਮੀ’’ਤਿ? ਅਥ ਨਂ ਏਕਚ੍ਚੇ ‘‘ਹਤ੍ਥਿਂ ਗਣ੍ਹਥ, ਅਸ੍ਸਂ ਗਣ੍ਹਥ, ਜਨਪਦਂ ਗਣ੍ਹਥ, ਸਤ੍ਤਰਤਨਾਨਿ ਗਣ੍ਹਥਾ’’ਤਿ ਆਹਂਸੁ. ਅਪਰੇ ‘‘ਤੁਮ੍ਹੇ ਪਥਵਿਸ੍ਸਰਸ੍ਸ ਪੁਤ੍ਤਾ, ਨ ਤੁਮ੍ਹਾਕਂ ਧਨਂ ਦੁਲ੍ਲਭਂ, ਲਦ੍ਧਮ੍ਪਿ ਚੇਤਂ ਸਬ੍ਬਂ ਪਹਾਯ ਗਮਨੀਯਂ, ਪੁਞ੍ਞਮੇਵ ਏਕਂ ਆਦਾਯ ਗਮਨੀਯਂ, ਤਸ੍ਮਾ ਦੇਵੇ ਵਰਂ ਦਦਮਾਨੇ ਤੇਮਾਸਂ ਪਦੁਮੁਤ੍ਤਰਂ ਭਗਵਨ੍ਤਂ ਉਪਟ੍ਠਾਤੁਂ ਵਰਂ ਗਣ੍ਹਥਾ’’ਤਿ. ਸੋ ‘‘ਤੁਮ੍ਹੇ ਮਯ੍ਹਂ ਕਲ੍ਯਾਣਮਿਤ੍ਤਾ ਨਾਮ, ਮਮੇਤਂ ਚਿਤ੍ਤਂ ਨਤ੍ਥਿ, ਤੁਮ੍ਹੇਹਿ ਪਨ ਉਪ੍ਪਾਦਿਤਂ, ਏਵਂ ਕਰਿਸ੍ਸਾਮੀ’’ਤਿ, ਗਨ੍ਤ੍ਵਾ ਪਿਤਰਂ ਵਨ੍ਦਿਤ੍ਵਾ ਪਿਤਰਾ ਆਲਿਙ੍ਗੇਤ੍ਵਾ, ਮਤ੍ਥਕੇ ਚੁਮ੍ਬਿਤ੍ਵਾ ‘‘ਵਰਂ ਤੇ, ਪੁਤ੍ਤ, ਦੇਮੀ’’ਤਿ ਵੁਤ੍ਤੇ ‘‘ਇਚ੍ਛਾਮਹਂ, ਮਹਾਰਾਜ, ਭਗਵਨ੍ਤਂ ਤੇਮਾਸਂ ਚਤੂਹਿ ਪਚ੍ਚਯੇਹਿ ਉਪਟ੍ਠਹਨ੍ਤੋ ਜੀਵਿਤਂ ਅਵਞ੍ਝਂ ਕਾਤੁਂ, ਇਦਂ ਮੇ ਵਰਂ ਦੇਹੀ’’ਤਿ ਆਹ. ਨ ਸਕ੍ਕਾ, ਤਾਤ, ਅਞ੍ਞਂ ਵਰੇਹੀਤਿ. ਦੇਵ, ਖਤ੍ਤਿਯਾਨਂ ਨਾਮ ਦ੍ਵੇਕਥਾ ਨਤ੍ਥਿ, ਏਤਮੇਵ ਮੇ ਦੇਹਿ, ਨ ਮਮਞ੍ਞੇਨ ਅਤ੍ਥੋਤਿ. ਤਾਤ, ਬੁਦ੍ਧਾਨਂ ਨਾਮ ਚਿਤ੍ਤਂ ਦੁਜ੍ਜਾਨਂ, ਸਚੇ ਭਗਵਾ ਨ ਇਚ੍ਛਿਸ੍ਸਤਿ, ਮਯਾ ਦਿਨ੍ਨਮ੍ਪਿ ਕਿਂ ਭਵਿਸ੍ਸਤੀਤਿ? ‘‘ਸਾਧੁ, ਦੇਵ, ਅਹਂ ਭਗਵਤੋ ਚਿਤ੍ਤਂ ਜਾਨਿਸ੍ਸਾਮੀ’’ਤਿ ਵਿਹਾਰਂ ਗਤੋ.

ਤੇਨ ਚ ਸਮਯੇਨ ਭਤ੍ਤਕਿਚ੍ਚਂ ਨਿਟ੍ਠਾਪੇਤ੍ਵਾ ਭਗਵਾ ਗਨ੍ਧਕੁਟਿਂ ਪਵਿਟ੍ਠੋ ਹੋਤਿ. ਸੋ ਮਣ੍ਡਲਮਾਲ਼ੇ ਸਨ੍ਨਿਸਿਨ੍ਨਾਨਂ ਭਿਕ੍ਖੂਨਂ ਸਨ੍ਤਿਕਂ ਅਗਮਾਸਿ. ਤੇ ਨਂ ਆਹਂਸੁ – ‘‘ਰਾਜਪੁਤ੍ਤ ਕਸ੍ਮਾ ਆਗਤੋਸੀ’’ਤਿ? ਭਗਵਨ੍ਤਂ ਦਸ੍ਸਨਾਯ, ਦਸ੍ਸੇਥ ਮੇ ਭਗਵਨ੍ਤਨ੍ਤਿ. ‘‘ਨ ਮਯਂ, ਰਾਜਪੁਤ੍ਤ, ਇਚ੍ਛਿਤਿਚ੍ਛਿਤਕ੍ਖਣੇ ਸਤ੍ਥਾਰਂ ਦਟ੍ਠੁਂ ਲਭਾਮਾ’’ਤਿ. ਕੋ ਪਨ, ਭਨ੍ਤੇ, ਲਭਤੀਤਿ? ਸੁਮਨਤ੍ਥੇਰੋ ਨਾਮ ਰਾਜਪੁਤ੍ਤਾਤਿ. ਸੋ ‘‘ਕੁਹਿਂ ਭਨ੍ਤੇ ਥੇਰੋ’’ਤਿ? ਥੇਰਸ੍ਸ ਨਿਸਿਨ੍ਨਟ੍ਠਾਨਂ ਪੁਚ੍ਛਿਤ੍ਵਾ ਗਨ੍ਤ੍ਵਾ ਵਨ੍ਦਿਤ੍ਵਾ – ‘‘ਇਚ੍ਛਾਮਹਂ, ਭਨ੍ਤੇ, ਭਗਵਨ੍ਤਂ ਪਸ੍ਸਿਤੁਂ, ਦਸ੍ਸੇਥ ਮੇ ਭਗਵਨ੍ਤ’’ਨ੍ਤਿ ਆਹ. ਥੇਰੋ ‘‘ਏਹਿ, ਰਾਜਪੁਤ੍ਤਾ’’ਤਿ ਤਂ ਗਹੇਤ੍ਵਾ ਗਨ੍ਧਕੁਟਿਪਰਿਵੇਣੇ ਠਪੇਤ੍ਵਾ ਗਨ੍ਧਕੁਟਿਂ ਆਰੁਹਿ. ਅਥ ਨਂ ਭਗਵਾ ‘‘ਸੁਮਨ, ਕਸ੍ਮਾ ਆਗਤੋਸੀ’’ਤਿ ਆਹ. ਰਾਜਪੁਤ੍ਤੋ, ਭਨ੍ਤੇ, ਭਗਵਨ੍ਤਂ ਦਸ੍ਸਨਾਯ ਆਗਤੋਤਿ. ਤੇਨ ਹਿ ਭਿਕ੍ਖੁ ਆਸਨਂ ਪਞ੍ਞਪੇਹੀਤਿ. ਥੇਰੋ ਆਸਨਂ ਪਞ੍ਞਪੇਸਿ. ਨਿਸੀਦਿ ਭਗਵਾ ਪਞ੍ਞਤ੍ਤੇ ਆਸਨੇ. ਰਾਜਪੁਤ੍ਤੋ ਭਗਵਨ੍ਤਂ ਵਨ੍ਦਿਤ੍ਵਾ ਪਟਿਸਨ੍ਥਾਰਂ ਅਕਾਸਿ, ‘‘ਕਦਾ ਆਗਤੋਸਿ ਰਾਜਪੁਤ੍ਤਾ’’ਤਿ? ਭਨ੍ਤੇ, ਤੁਮ੍ਹੇਸੁ ਗਨ੍ਧਕੁਟਿਂ ਪਵਿਟ੍ਠੇਸੁ, ਭਿਕ੍ਖੂ ਪਨ ‘‘ਨ ਮਯਂ ਇਚ੍ਛਿਤਿਚ੍ਛਿਤਕ੍ਖਣੇ ਭਗਵਨ੍ਤਂ ਦਟ੍ਠੁਂ ਲਭਾਮਾ’’ਤਿ ਮਂ ਥੇਰਸ੍ਸ ਸਨ੍ਤਿਕਂ ਪਾਹੇਸੁਂ, ਥੇਰੋ ਪਨ ਏਕਵਚਨੇਨੇਵ ਦਸ੍ਸੇਸਿ, ਥੇਰੋ, ਭਨ੍ਤੇ, ਤੁਮ੍ਹਾਕਂ ਸਾਸਨੇ ਵਲ੍ਲਭੋ ਮਞ੍ਞੇਤਿ. ਆਮ, ਰਾਜਕੁਮਾਰ, ਵਲ੍ਲਭੋ ਏਸ ਭਿਕ੍ਖੁ ਮਯ੍ਹਂ ਸਾਸਨੇਤਿ. ਭਨ੍ਤੇ, ਬੁਦ੍ਧਾਨਂ ਸਾਸਨੇ ਕਿਂ ਕਤ੍ਵਾ ਵਲ੍ਲਭੋ ਹੋਤੀਤਿ? ਦਾਨਂ ਦਤ੍ਵਾ ਸੀਲਂ ਸਮਾਦਿਯਿਤ੍ਵਾ ਉਪੋਸਥਕਮ੍ਮਂ ਕਤ੍ਵਾ, ਕੁਮਾਰਾਤਿ. ਭਗਵਾ ਅਹਮ੍ਪਿ ਥੇਰੋ ਵਿਯ ਬੁਦ੍ਧਸਾਸਨੇ ਵਲ੍ਲਭੋ ਹੋਤੁਕਾਮੋ, ਤੇਮਾਸਂ ਮੇ ਵਸ੍ਸਾਵਾਸਂ ਅਧਿਵਾਸੇਥਾਤਿ. ਭਗਵਾ, ‘‘ਅਤ੍ਥਿ ਨੁ ਖੋ ਗਤੇਨ ਅਤ੍ਥੋ’’ਤਿ ਓਲੋਕੇਤ੍ਵਾ ‘‘ਅਤ੍ਥੀ’’ਤਿ ਦਿਸ੍ਵਾ ‘‘ਸੁਞ੍ਞਾਗਾਰੇ ਖੋ, ਰਾਜਕੁਮਾਰ, ਤਥਾਗਤਾ ਅਭਿਰਮਨ੍ਤੀ’’ਤਿ ਆਹ. ਕੁਮਾਰੋ ‘‘ਅਞ੍ਞਾਤਂ ਭਗਵਾ, ਅਞ੍ਞਾਤਂ ਸੁਗਤਾ’’ਤਿ ਵਤ੍ਵਾ – ‘‘ਅਹਂ, ਭਨ੍ਤੇ, ਪੁਰਿਮਤਰਂ ਗਨ੍ਤ੍ਵਾ ਵਿਹਾਰਂ ਕਾਰੇਮਿ, ਮਯਾ ਪੇਸਿਤੇ ਭਿਕ੍ਖੁਸਤਸਹਸ੍ਸੇਨ ਸਦ੍ਧਿਂ ਆਗਚ੍ਛਥਾ’’ਤਿ ਪਟਿਞ੍ਞਂ ਗਹੇਤ੍ਵਾ ਪਿਤੁ ਸਨ੍ਤਿਕਂ ਗਨ੍ਤ੍ਵਾ, ‘‘ਦਿਨ੍ਨਾ ਮੇ, ਦੇਵ, ਭਗਵਤਾ ਪਟਿਞ੍ਞਾ, ਮਯਾ ਪਹਿਤੇ ਤੁਮ੍ਹੇ ਭਗਵਨ੍ਤਂ ਪੇਸੇਯ੍ਯਾਥਾ’’ਤਿ ਪਿਤਰਂ ਵਨ੍ਦਿਤ੍ਵਾ ਨਿਕ੍ਖਮਿਤ੍ਵਾ ਯੋਜਨੇ ਯੋਜਨੇ ਵਿਹਾਰਂ ਕਾਰੇਤ੍ਵਾ ਵੀਸਯੋਜਨਸਤਂ ਅਦ੍ਧਾਨਂ ਗਤੋ. ਗਨ੍ਤ੍ਵਾ ਅਤ੍ਤਨੋ ਨਗਰੇ ਵਿਹਾਰਟ੍ਠਾਨਂ ਵਿਚਿਨਨ੍ਤੋ ਸੋਭਨਸ੍ਸ ਨਾਮ ਕੁਟੁਮ੍ਬਿਕਸ੍ਸ ਉਯ੍ਯਾਨਂ ਦਿਸ੍ਵਾ ਸਤਸਹਸ੍ਸੇਨ ਕਿਣਿਤ੍ਵਾ ਸਤਸਹਸ੍ਸਂ ਵਿਸ੍ਸਜ੍ਜੇਤ੍ਵਾ ਵਿਹਾਰਂ ਕਾਰੇਸਿ. ਤਤ੍ਥ ਭਗਵਤੋ ਗਨ੍ਧਕੁਟਿਂ, ਸੇਸਭਿਕ੍ਖੂਨਞ੍ਚ ਰਤ੍ਤਿਟ੍ਠਾਨਦਿਵਾਟ੍ਠਾਨਤ੍ਥਾਯ ਕੁਟਿਲੇਣਮਣ੍ਡਪੇ ਕਾਰਾਪੇਤ੍ਵਾ ਪਾਕਾਰਪਰਿਕ੍ਖੇਪਂ ਦ੍ਵਾਰਕੋਟ੍ਠਕਞ੍ਚ ਨਿਟ੍ਠਾਪੇਤ੍ਵਾ ਪਿਤੁ ਸਨ੍ਤਿਕਂ ਪੇਸੇਸਿ ‘‘ਨਿਟ੍ਠਿਤਂ ਮਯ੍ਹਂ ਕਿਚ੍ਚਂ, ਸਤ੍ਥਾਰਂ ਪਹਿਣਥਾ’’ਤਿ.

ਰਾਜਾ ਭਗਵਨ੍ਤਂ ਭੋਜੇਤ੍ਵਾ ‘‘ਭਗਵਾ ਸੁਮਨਸ੍ਸ ਕਿਚ੍ਚਂ ਨਿਟ੍ਠਿਤਂ, ਤੁਮ੍ਹਾਕਂ ਆਗਮਨਂ ਪਚ੍ਚਾਸੀਸਤੀ’’ਤਿ. ਭਗਵਾ ਸਤਸਹਸ੍ਸਭਿਕ੍ਖੁਪਰਿਵਾਰੋ ਯੋਜਨੇ ਯੋਜਨੇ ਵਿਹਾਰੇਸੁ ਵਸਮਾਨੋ ਅਗਮਾਸਿ. ਕੁਮਾਰੋ ‘‘ਸਤ੍ਥਾ ਆਗਚ੍ਛਤੀ’’ਤਿ ਸੁਤ੍ਵਾ ਯੋਜਨਂ ਪਚ੍ਚੁਗ੍ਗਨ੍ਤ੍ਵਾ ਗਨ੍ਧਮਾਲਾਦੀਹਿ ਪੂਜਯਮਾਨੋ ਵਿਹਾਰਂ ਪਵੇਸੇਤ੍ਵਾ –

‘‘ਸਤਸਹਸ੍ਸੇਨ ਮੇ ਕੀਤਂ, ਸਤਸਹਸ੍ਸੇਨ ਮਾਪਿਤਂ;

ਸੋਭਨਂ ਨਾਮ ਉਯ੍ਯਾਨਂ ਪਟਿਗ੍ਗਣ੍ਹ, ਮਹਾਮੁਨੀ’’ਤਿ. –

ਵਿਹਾਰਂ ਨਿਯ੍ਯਾਤੇਸਿ. ਸੋ ਵਸ੍ਸੂਪਨਾਯਿਕਦਿਵਸੇ ਦਾਨਂ ਦਤ੍ਵਾ ਅਤ੍ਤਨੋ ਪੁਤ੍ਤਦਾਰੇ ਚ ਅਮਚ੍ਚੇ ਚ ਪਕ੍ਕੋਸਾਪੇਤ੍ਵਾ ਆਹ –‘‘ਸਤ੍ਥਾ ਅਮ੍ਹਾਕਂ ਸਨ੍ਤਿਕਂ ਦੂਰਤੋ ਆਗਤੋ, ਬੁਦ੍ਧਾ ਚ ਨਾਮ ਧਮ੍ਮਗਰੁਨੋਵ, ਨਾਮਿਸਗਰੁਕਾ. ਤਸ੍ਮਾ ਅਹਂ ਇਮਂ ਤੇਮਾਸਂ ਦ੍ਵੇ ਸਾਟਕੇ ਨਿਵਾਸੇਤ੍ਵਾ ਦਸ ਸੀਲਾਨਿ ਸਮਾਦਿਯਿਤ੍ਵਾ ਇਧੇਵ ਵਸਿਸ੍ਸਾਮਿ, ਤੁਮ੍ਹੇ ਖੀਣਾਸਵਸਤਸਹਸ੍ਸਸ੍ਸ ਇਮਿਨਾਵ ਨੀਹਾਰੇਨ ਤੇਮਾਸਂ ਦਾਨਂ ਦਦੇਯ੍ਯਾਥਾ’’ਤਿ.

ਸੋ ਸੁਮਨਤ੍ਥੇਰਸ੍ਸ ਵਸਨਟ੍ਠਾਨਸਭਾਗੇਯੇਵ ਠਾਨੇ ਵਸਨ੍ਤੋ ਯਂ ਥੇਰੋ ਭਗਵਤੋ ਵਤ੍ਤਂ ਕਰੋਤਿ, ਤਂ ਸਬ੍ਬਂ ਦਿਸ੍ਵਾ, ‘‘ਇਮਸ੍ਮਿਂ ਠਾਨੇ ਏਕਨ੍ਤਵਲ੍ਲਭੋ ਏਸ ਥੇਰੋ, ਏਤਸ੍ਸੇਵ ਠਾਨਨ੍ਤਰਂ ਪਤ੍ਥੇਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ, ਉਪਕਟ੍ਠਾਯ ਪਵਾਰਣਾਯ ਗਾਮਂ ਪਵਿਸਿਤ੍ਵਾ ਸਤ੍ਤਾਹਂ ਮਹਾਦਾਨਂ ਦਤ੍ਵਾ ਸਤ੍ਤਮੇ ਦਿਵਸੇ ਭਿਕ੍ਖੂਸਤਸਹਸ੍ਸਸ੍ਸ ਪਾਦਮੂਲੇ ਤਿਚੀਵਰਂ ਠਪੇਤ੍ਵਾ ਭਗਵਨ੍ਤਂ ਵਨ੍ਦਿਤ੍ਵਾ, ‘‘ਭਨ੍ਤੇ, ਯਦੇਤਂ ਮਯਾ ਮਗ੍ਗੇ ਯੋਜਨਨ੍ਤਰਿਕਵਿਹਾਰਕਾਰਾਪਨਤੋ ਪਟ੍ਠਾਯ ਪੁਞ੍ਞਂ ਕਤਂ, ਤਂ ਨੇਵ ਸਕ੍ਕਸਮ੍ਪਤ੍ਤਿਂ, ਨ ਮਾਰਬ੍ਰਹ੍ਮਸਮ੍ਪਤ੍ਤਿਂ ਪਤ੍ਥਯਨ੍ਤੇਨ, ਬੁਦ੍ਧਸ੍ਸ ਪਨ ਉਪਟ੍ਠਾਕਭਾਵਂ ਪਤ੍ਥੇਨ੍ਤੇਨ ਕਤਂ. ਤਸ੍ਮਾ ਅਹਮ੍ਪਿ ਭਗਵਾ ਅਨਾਗਤੇ ਸੁਮਨਤ੍ਥੇਰੋ ਵਿਯ ਏਕਸ੍ਸ ਬੁਦ੍ਧਸ੍ਸ ਉਪਟ੍ਠਾਕੋ ਹੋਮੀ’’ਤਿ ਪਞ੍ਚਪਤਿਟ੍ਠਿਤੇਨ ਪਤਿਤ੍ਵਾ ਵਨ੍ਦਿਤ੍ਵਾ ਨਿਪਨ੍ਨੋ. ਭਗਵਾ ‘‘ਮਹਨ੍ਤਂ ਕੁਲਪੁਤ੍ਤਸ੍ਸ ਚਿਤ੍ਤਂ, ਇਜ੍ਝਿਸ੍ਸਤਿ ਨੁ ਖੋ, ਨੋ’’ਤਿ ਓਲੋਕੇਨ੍ਤੋ, ‘‘ਅਨਾਗਤੇ ਇਤੋ ਸਤਸਹਸ੍ਸਿਮੇ ਕਪ੍ਪੇ ਗੋਤਮੋ ਨਾਮ ਬੁਦ੍ਧੋ ਉਪ੍ਪਜ੍ਜਿਸ੍ਸਤਿ, ਤਸ੍ਸੇਵ ਉਪਟ੍ਠਾਕੋ ਭਵਿਸ੍ਸਤੀ’’ਤਿ ਞਤ੍ਵਾ –

‘‘ਇਚ੍ਛਿਤਂ ਪਤ੍ਥਿਤਂ ਤੁਯ੍ਹਂ, ਸਬ੍ਬਮੇਵ ਸਮਿਜ੍ਝਤੁ;

ਸਬ੍ਬੇ ਪੂਰੇਨ੍ਤੁ ਸਙ੍ਕਪ੍ਪਾ, ਚਨ੍ਦੋ ਪਨ੍ਨਰਸੋ ਯਥਾ’’ਤਿ. –

ਆਹ. ਕੁਮਾਰੋ ਸੁਤ੍ਵਾ ‘‘ਬੁਦ੍ਧਾ ਨਾਮ ਅਦ੍ਵੇਜ੍ਝਕਥਾ ਹੋਨ੍ਤੀ’’ਤਿ ਦੁਤਿਯਦਿਵਸੇਯੇਵ ਤਸ੍ਸ ਭਗਵਤੋ ਪਤ੍ਤਚੀਵਰਂ ਗਹੇਤ੍ਵਾ ਪਿਟ੍ਠਿਤੋ ਪਿਟ੍ਠਿਤੋ ਗਚ੍ਛਨ੍ਤੋ ਵਿਯ ਅਹੋਸਿ. ਸੋ ਤਸ੍ਮਿਂ ਬੁਦ੍ਧੁਪ੍ਪਾਦੇ ਵਸ੍ਸਸਤਸਹਸ੍ਸਂ ਦਾਨਂ ਦਤ੍ਵਾ ਸਗ੍ਗੇ ਨਿਬ੍ਬਤ੍ਤਿਤ੍ਵਾ ਕਸ੍ਸਪਬੁਦ੍ਧਕਾਲੇਪਿ ਪਿਣ੍ਡਾਯ ਚਰਤੋ ਥੇਰਸ੍ਸ ਪਤ੍ਤਗ੍ਗਹਣਤ੍ਥਂ ਉਤ੍ਤਰਿਸਾਟਕਂ ਦਤ੍ਵਾ ਪੂਜਂ ਅਕਾਸਿ. ਪੁਨ ਸਗ੍ਗੇ ਨਿਬ੍ਬਤ੍ਤਿਤ੍ਵਾ ਤਤੋ ਚੁਤੋ ਬਾਰਾਣਸਿਰਾਜਾ ਹੁਤ੍ਵਾ ਅਟ੍ਠਨ੍ਨਂ ਪਚ੍ਚੇਕਬੁਦ੍ਧਾਨਂ ਪਣ੍ਣਸਾਲਾਯੋ ਕਾਰੇਤ੍ਵਾ ਮਣਿਆਧਾਰਕੇ ਉਪਟ੍ਠਪੇਤ੍ਵਾ ਚਤੂਹਿ ਪਚ੍ਚਯੇਹਿ ਦਸਵਸ੍ਸਸਹਸ੍ਸਾਨਿ ਉਪਟ੍ਠਾਨਂ ਅਕਾਸਿ. ਏਤਾਨਿ ਪਾਕਟਟ੍ਠਾਨਾਨਿ.

ਕਪ੍ਪਸਤਸਹਸ੍ਸਂ ਪਨ ਦਾਨਂ ਦਦਮਾਨੋਵ ਅਮ੍ਹਾਕਂ ਬੋਧਿਸਤ੍ਤੇਨ ਸਦ੍ਧਿਂ ਤੁਸਿਤਪੁਰੇ ਨਿਬ੍ਬਤ੍ਤਿਤ੍ਵਾ ਤਤੋ ਚੁਤੋ ਅਮਿਤੋਦਨਸਕ੍ਕਸ੍ਸ ਗੇਹੇ ਪਟਿਸਨ੍ਧਿਂ ਗਹੇਤ੍ਵਾ ਅਨੁਪੁਬ੍ਬੇਨ ਕਤਾਭਿਨਿਕ੍ਖਮਨੋ ਸਮ੍ਮਾਸਮ੍ਬੋਧਿਂ ਪਤ੍ਵਾ ਪਠਮਗਮਨੇਨ ਕਪਿਲਵਤ੍ਥੁਂ ਆਗਨ੍ਤ੍ਵਾ ਤਤੋ ਨਿਕ੍ਖਮਨ੍ਤੇ ਭਗਵਤਿ ਭਗਵਤੋ ਪਰਿਵਾਰਤ੍ਥਂ ਰਾਜਕੁਮਾਰੇਸੁ ਪਬ੍ਬਜਨ੍ਤੇਸੁ ਭਦ੍ਦਿਯਾਦੀਹਿ ਸਦ੍ਧਿਂ ਨਿਕ੍ਖਮਿਤ੍ਵਾ ਭਗਵਤੋ ਸਨ੍ਤਿਕੇ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਆਯਸ੍ਮਤੋ ਪੁਣ੍ਣਸ੍ਸ ਮਨ੍ਤਾਣਿਪੁਤ੍ਤਸ੍ਸ ਸਨ੍ਤਿਕੇ ਧਮ੍ਮਕਥਂ ਸੁਤ੍ਵਾ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਏਵਮੇਸ ਆਯਸ੍ਮਾ ਪੁਬ੍ਬੂਪਨਿਸ੍ਸਯਸਮ੍ਪਨ੍ਨੋ, ਤਸ੍ਸਿਮਾਯ ਪੁਬ੍ਬੂਪਨਿਸ੍ਸਯਸਮ੍ਪਤ੍ਤਿਯਾ ਗਮ੍ਭੀਰੋਪਿ ਪਟਿਚ੍ਚਸਮੁਪ੍ਪਾਦੋ ਉਤ੍ਤਾਨਕੋ ਵਿਯ ਉਪਟ੍ਠਾਸਿ.

ਤਿਤ੍ਥਵਾਸੋਤਿ ਪਨ ਗਰੂਨਂ ਸਨ੍ਤਿਕੇ ਉਗ੍ਗਹਣਸਵਨਪਰਿਪੁਚ੍ਛਨਧਾਰਣਾਨਿ ਵੁਚ੍ਚਨ੍ਤਿ. ਸੋ ਥੇਰਸ੍ਸ ਅਤਿਵਿਯ ਪਰਿਸੁਦ੍ਧੋ. ਤੇਨਾਪਿਸ੍ਸਾਯਂ ਗਮ੍ਭੀਰੋਪਿ ਉਤ੍ਤਾਨਕੋ ਵਿਯ ਉਪਟ੍ਠਾਸਿ. ਸੋਤਾਪਨ੍ਨਾਨਞ੍ਚ ਨਾਮ ਪਚ੍ਚਯਾਕਾਰੋ ਉਤ੍ਤਾਨਕੋ ਹੁਤ੍ਵਾ ਉਪਟ੍ਠਾਤਿ, ਅਯਞ੍ਚ ਆਯਸ੍ਮਾ ਸੋਤਾਪਨ੍ਨੋ. ਬਹੁਸ੍ਸੁਤਾਨਂ ਚਤੁਹਤ੍ਥੇ ਓਵਰਕੇ ਪਦੀਪੇ ਜਲਮਾਨੇ ਮਞ੍ਚਪੀਠਂ ਵਿਯ ਨਾਮਰੂਪਪਰਿਚ੍ਛੇਦੋ ਪਾਕਟੋ ਹੋਤਿ, ਅਯਞ੍ਚ ਆਯਸ੍ਮਾ ਬਹੁਸ੍ਸੁਤਾਨਂ ਅਗ੍ਗੋ. ਇਤਿ ਬਾਹੁਸਚ੍ਚਭਾਵੇਨਪਿਸ੍ਸ ਗਮ੍ਭੀਰੋਪਿ ਪਚ੍ਚਯਾਕਾਰੋ ਉਤ੍ਤਾਨਕੋ ਵਿਯ ਉਪਟ੍ਠਾਸਿ. ਪਟਿਚ੍ਚਸਮੁਪ੍ਪਾਦੋ ਚਤੂਹਿ ਗਮ੍ਭੀਰਤਾਹਿ ਗਮ੍ਭੀਰੋ. ਸਾ ਪਨਸ੍ਸ ਗਮ੍ਭੀਰਤਾ ਵਿਸੁਦ੍ਧਿਮਗ੍ਗੇ ਵਿਤ੍ਥਾਰਿਤਾਵ. ਸਾ ਸਬ੍ਬਾਪਿ ਥੇਰਸ੍ਸ ਉਤ੍ਤਾਨਕਾ ਵਿਯ ਉਪਟ੍ਠਾਸਿ. ਤੇਨ ਭਗਵਾ ਆਯਸ੍ਮਨ੍ਤਂ ਆਨਨ੍ਦਂ ਉਸ੍ਸਾਦੇਨ੍ਤੋ ਮਾ ਹੇਵਨ੍ਤਿਆਦਿਮਾਹ. ਅਯਞ੍ਹੇਤ੍ਥ ਅਧਿਪ੍ਪਾਯੋ – ਆਨਨ੍ਦ, ਤ੍ਵਂ ਮਹਾਪਞ੍ਞੋ ਵਿਸਦਞਾਣੋ, ਤੇਨ ਤੇ ਗਮ੍ਭੀਰੋਪਿ ਪਟਿਚ੍ਚਸਮੁਪ੍ਪਾਦੋ ਉਤ੍ਤਾਨਕੋ ਵਿਯ ਖਾਯਤਿ. ਤਸ੍ਮਾ ‘‘ਮਯ੍ਹਮੇਵ ਨੁ ਖੋ ਏਸ ਉਤ੍ਤਾਨਕੋ ਵਿਯ ਹੁਤ੍ਵਾ ਉਪਟ੍ਠਾਤਿ, ਉਦਾਹੁ ਅਞ੍ਞੇਸਮ੍ਪੀ’’ਤਿ ਮਾ ਏਵਂ ਅਵਚ.

ਯਂ ਪਨ ਵੁਤ੍ਤਂ ‘‘ਅਪਸਾਦੇਨ੍ਤੋ’’ਤਿ, ਤਤ੍ਥਾਯਮਧਿਪ੍ਪਾਯੋ – ਆਨਨ੍ਦ, ‘‘ਅਥ ਚ ਪਨ ਮੇ ਉਤ੍ਤਾਨਕੁਤ੍ਤਾਨਕੋ ਵਿਯ ਖਾਯਤੀ’’ਤਿ ਮਾ ਹੇਵਂ ਅਵਚ. ਯਦਿ ਹਿ ਤੇ ਏਸ ਉਤ੍ਤਾਨਕੁਤ੍ਤਾਨਕੋ ਵਿਯ ਖਾਯਤਿ, ਕਸ੍ਮਾ ਤ੍ਵਂ ਅਤ੍ਤਨੋ ਧਮ੍ਮਤਾਯ ਸੋਤਾਪਨ੍ਨੋ ਨਾਹੋਸਿ, ਮਯਾ ਦਿਨ੍ਨਨਯੇ ਠਤ੍ਵਾ ਸੋਤਾਪਤ੍ਤਿਮਗ੍ਗਂ ਪਟਿਵਿਜ੍ਝਿ? ਆਨਨ੍ਦ, ਇਦਂ ਨਿਬ੍ਬਾਨਮੇਵ ਗਮ੍ਭੀਰਂ, ਪਚ੍ਚਯਾਕਾਰੋ ਪਨ ਉਤ੍ਤਾਨਕੋ ਜਾਤੋ, ਅਥ ਕਸ੍ਮਾ ਓਲ਼ਾਰਿਕਂ ਕਾਮਰਾਗਸਂਯੋਜਨਂ ਪਟਿਘਸਂਯੋਜਨਂ ਓਲ਼ਾਰਿਕਂ ਕਾਮਰਾਗਾਨੁਸਯਂ ਪਟਿਘਾਨੁਸਯਨ੍ਤਿ ਇਮੇ ਚਤ੍ਤਾਰੋ ਕਿਲੇਸੇ ਸਮੁਗ੍ਘਾਤੇਤ੍ਵਾ ਸਕਦਾਗਾਮਿਫਲਂ ਨ ਸਚ੍ਛਿਕਰੋਸਿ, ਤੇਯੇਵ ਅਣੁਸਹਗਤੇ ਚਤ੍ਤਾਰੋ ਕਿਲੇਸੇ ਸਮੁਗ੍ਘਾਤੇਤ੍ਵਾ ਅਨਾਗਾਮਿਫਲਂ ਨ ਸਚ੍ਛਿਕਰੋਸਿ, ਰੂਪਰਾਗਾਦੀਨਿ ਪਞ੍ਚ ਸਂਯੋਜਨਾਨਿ, ਮਾਨਾਨੁਸਯਂ ਭਵਰਾਗਾਨੁਸਯਂ ਅਵਿਜ੍ਜਾਨੁਸਯਨ੍ਤਿ ਇਮੇ ਅਟ੍ਠ ਕਿਲੇਸੇ ਸਮੁਗ੍ਘਾਤੇਤ੍ਵਾ ਅਰਹਤ੍ਤਂ ਨ ਸਚ੍ਛਿਕਰੋਸਿ? ਕਸ੍ਮਾ ਵਾ ਸਤਸਹਸ੍ਸਕਪ੍ਪਾਧਿਕਂ ਏਕਂ ਅਸਙ੍ਖ੍ਯੇਯ੍ਯਂ ਪੂਰਿਤਪਾਰਮਿਨੋ ਸਾਰਿਪੁਤ੍ਤਮੋਗ੍ਗਲ੍ਲਾਨਾ ਵਿਯ ਸਾਵਕਪਾਰਮੀਞਾਣਂ ਨ ਪਟਿਵਿਜ੍ਝਸਿ, ਸਤਸਹਸ੍ਸਕਪ੍ਪਾਧਿਕਾਨਿ ਦ੍ਵੇ ਅਸਙ੍ਖ੍ਯੇਯ੍ਯਾਨਿ ਪੂਰਿਤਪਾਰਮਿਨੋ ਪਚ੍ਚੇਕਬੁਦ੍ਧਾ ਵਿਯ ਚ ਪਚ੍ਚੇਕਬੋਧਿਞਾਣਂ ਨ ਪਟਿਵਿਜ੍ਝਸਿ? ਯਦਿ ਵਾ ਤੇ ਸਬ੍ਬਥਾਵ ਏਸ ਉਤ੍ਤਾਨਕੋ ਹੁਤ੍ਵਾ ਉਪਟ੍ਠਾਸਿ. ਅਥ ਕਸ੍ਮਾ ਸਤਸਹਸ੍ਸਕਪ੍ਪਾਧਿਕਾਨਿ ਚਤ੍ਤਾਰਿ ਅਟ੍ਠ ਸੋਲ਼ਸ ਵਾ ਅਸਙ੍ਖ੍ਯੇਯ੍ਯਾਨਿ ਪੂਰਿਤਪਾਰਮਿਨੋ ਬੁਦ੍ਧਾ ਵਿਯ ਸਬ੍ਬਞ੍ਞੁਤਞ੍ਞਾਣਂ ਨ ਸਚ੍ਛਿਕਰੋਸਿ? ਕਿਂ ਅਨਤ੍ਥਿਕੋਸਿ ਏਤੇਹਿ ਵਿਸੇਸਾਧਿਗਮੇਹਿ? ਪਸ੍ਸ ਯਾਵ ਚ ਤੇ ਅਪਰਦ੍ਧਂ, ਤ੍ਵਂ ਨਾਮ ਸਾਵਕਪਦੇਸਞਾਣੇ ਠਿਤੋ ਅਤਿਗਮ੍ਭੀਰਂ ਪਚ੍ਚਯਾਕਾਰਂ ‘‘ਉਤ੍ਤਾਨਕੋ ਵਿਯ ਮੇ ਉਪਟ੍ਠਾਤੀ’’ਤਿ ਵਦਸਿ. ਤਸ੍ਸ ਤੇ ਇਦਂ ਵਚਨਂ ਬੁਦ੍ਧਾਨਂ ਕਥਾਯ ਪਚ੍ਚਨੀਕਂ ਹੋਤਿ. ਤਾਦਿਸੇਨ ਨਾਮ ਭਿਕ੍ਖੁਨਾ ਬੁਦ੍ਧਾਨਂ ਕਥਾਯ ਪਚ੍ਚਨੀਕਂ ਕਥੇਤਬ੍ਬਨ੍ਤਿ ਨ ਯੁਤ੍ਤਮੇਤਂ. ਨਨੁ ਮਯ੍ਹਂ, ਆਨਨ੍ਦ, ਇਮਂ ਪਚ੍ਚਯਾਕਾਰਂ ਪਟਿਵਿਜ੍ਝਿਤੁਂ ਵਾਯਮਨ੍ਤਸ੍ਸੇਵ ਕਪ੍ਪਸਤਸਹਸ੍ਸਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਅਤਿਕ੍ਕਨ੍ਤਾਨਿ. ਪਚ੍ਚਯਾਕਾਰਪਟਿਵਿਜ੍ਝਨਤ੍ਥਾਯ ਚ ਪਨ ਮੇ ਅਦਿਨ੍ਨਦਾਨਂ ਨਾਮ ਨਤ੍ਥਿ, ਅਪੂਰਿਤਪਾਰਮੀ ਨਾਮ ਨਤ੍ਥਿ. ‘‘ਅਜ੍ਜ ਪਚ੍ਚਯਾਕਾਰਂ ਪਟਿਵਿਜ੍ਝਿਸ੍ਸਾਮੀ’’ਤਿ ਪਨ ਮੇ ਨਿਰੁਸ੍ਸਾਹਂ ਵਿਯ ਮਾਰਬਲਂ ਵਿਧਮਨ੍ਤਸ੍ਸ ਅਯਂ ਮਹਾਪਥਵੀ ਦ੍ਵਙ੍ਗੁਲਮਤ੍ਤਮ੍ਪਿ ਨਾਕਮ੍ਪਿ, ਤਥਾ ਪਠਮਯਾਮੇ ਪੁਬ੍ਬੇਨਿਵਾਸਂ, ਮਜ੍ਝਿਮਯਾਮੇ ਦਿਬ੍ਬਚਕ੍ਖੁਂ ਸਮ੍ਪਾਦੇਨ੍ਤਸ੍ਸ. ਪਚ੍ਛਿਮਯਾਮੇ ਪਨ ਮੇ ਬਲਵਪਚ੍ਚੂਸਸਮਯੇ, ‘‘ਅਵਿਜ੍ਜਾ ਸਙ੍ਖਾਰਾਨਂ ਨਵਹਿ ਆਕਾਰੇਹਿ ਪਚ੍ਚਯੋ ਹੋਤੀ’’ਤਿ ਦਿਟ੍ਠਮਤ੍ਤੇਯੇਵ ਦਸਸਹਸ੍ਸਿਲੋਕਧਾਤੁ ਅਯਦਣ੍ਡੇਨ ਆਕੋਟਿਤਕਂਸਥਾਲੋ ਵਿਯ ਵਿਰਵਸਤਂ ਵਿਰਵਸਹਸ੍ਸਂ ਮੁਞ੍ਚਮਾਨਾ ਵਾਤਾਹਤੇ ਪਦੁਮਿਨਿਪਣ੍ਣੇ ਉਦਕਬਿਨ੍ਦੁ ਵਿਯ ਪਕਮ੍ਪਿਤ੍ਥ. ਏਵਂ ਗਮ੍ਭੀਰੋ ਚਾਯਂ, ਆਨਨ੍ਦ, ਪਟਿਚ੍ਚਸਮੁਪ੍ਪਾਦੋ ਗਮ੍ਭੀਰਾਵਭਾਸੋ ਚ, ਏਤਸ੍ਸ, ਆਨਨ੍ਦ, ਧਮ੍ਮਸ੍ਸ ਅਨਨੁਬੋਧਾ…ਪੇ… ਨਾਤਿਵਤ੍ਤਤੀਤਿ.

ਏਤਸ੍ਸ ਧਮ੍ਮਸ੍ਸਾਤਿ ਏਤਸ੍ਸ ਪਚ੍ਚਯਧਮ੍ਮਸ੍ਸ. ਅਨਨੁਬੋਧਾਤਿ ਞਾਤਪਰਿਞ੍ਞਾਵਸੇਨ ਅਨਨੁਬੁਜ੍ਝਨਾ. ਅਪ੍ਪਟਿਵੇਧਾਤਿ ਤੀਰਣਪ੍ਪਹਾਨਪਰਿਞ੍ਞਾਵਸੇਨ ਅਪ੍ਪਟਿਵਿਜ੍ਝਨਾ. ਤਨ੍ਤਾਕੁਲਕਜਾਤਾਤਿ ਤਨ੍ਤਂ ਵਿਯ ਆਕੁਲਜਾਤਾ. ਯਥਾ ਨਾਮ ਦੁਨ੍ਨਿਕ੍ਖਿਤ੍ਤਂ ਮੂਸਿਕਚ੍ਛਿਨ੍ਨਂ ਪੇਸਕਾਰਾਨਂ ਤਨ੍ਤਂ ਤਹਿਂ ਤਹਿਂ ਆਕੁਲਂ ਹੋਤਿ, ‘‘ਇਦਂ ਅਗ੍ਗਂ, ਇਦਂ ਮੂਲ’’ਨ੍ਤਿ ਅਗ੍ਗੇਨ ਵਾ ਅਗ੍ਗਂ, ਮੂਲੇਨ ਵਾ ਮੂਲਂ ਸਮਾਨੇਤੁਂ ਦੁਕ੍ਕਰਂ ਹੋਤਿ. ਏਵਮੇਵ ਸਤ੍ਤਾ ਇਮਸ੍ਮਿਂ ਪਚ੍ਚਯਾਕਾਰੇ ਖਲਿਤਾ ਆਕੁਲਾ ਬ੍ਯਾਕੁਲਾ ਹੋਨ੍ਤਿ, ਨ ਸਕ੍ਕੋਨ੍ਤਿ ਪਚ੍ਚਯਾਕਾਰਂ ਉਜੁਂ ਕਾਤੁਂ. ਤਤ੍ਥ ਤਨ੍ਤਂ ਪਚ੍ਚਤ੍ਤਪੁਰਿਸਕਾਰੇ ਠਤ੍ਵਾ ਸਕ੍ਕਾਪਿ ਭਵੇਯ੍ਯ ਉਜੁਂ ਕਾਤੁਂ, ਠਪੇਤ੍ਵਾ ਪਨ ਦ੍ਵੇ ਬੋਧਿਸਤ੍ਤੇ ਅਞ੍ਞੋ ਸਤ੍ਤੋ ਅਤ੍ਤਨੋ ਧਮ੍ਮਤਾਯ ਪਚ੍ਚਯਾਕਾਰਂ ਉਜੁਂ ਕਾਤੁਂ ਸਮਤ੍ਥੋ ਨਾਮ ਨਤ੍ਥਿ. ਯਥਾ ਪਨ ਆਕੁਲਂ ਤਨ੍ਤਂ ਕਞ੍ਜਿਯਂ ਦਤ੍ਵਾ ਕੋਚ੍ਛੇਨ ਪਹਟਂ ਤਤ੍ਥ ਤਤ੍ਥ ਗੁਲ਼ਕਜਾਤਂ ਹੋਤਿ ਗਣ੍ਠਿਬਦ੍ਧਂ, ਏਵਮਿਮੇ ਸਤ੍ਤਾ ਪਚ੍ਚਯੇਸੁ ਪਕ੍ਖਲਿਤ੍ਵਾ ਪਚ੍ਚਯੇ ਉਜੁਂ ਕਾਤੁਂ ਅਸਕ੍ਕੋਨ੍ਤਾ ਦ੍ਵਾਸਟ੍ਠਿਦਿਟ੍ਠਿਗਤਵਸੇਨ ਗੁਲ਼ਕਜਾਤਾ ਹੋਨ੍ਤਿ ਗਣ੍ਠਿਬਦ੍ਧਾ. ਯੇ ਹਿ ਕੇਚਿ ਦਿਟ੍ਠਿਯੋ ਸਨ੍ਨਿਸ੍ਸਿਤਾ, ਸਬ੍ਬੇ ਤੇ ਪਚ੍ਚਯਂ ਉਜੁਂ ਕਾਤੁਂ ਅਸਕ੍ਕੋਨ੍ਤਾਯੇਵ.

ਕੁਲਾਗਣ੍ਠਿਕਜਾਤਾਤਿ ਕੁਲਾਗਣ੍ਠਿਕਂ ਵੁਚ੍ਚਤਿ ਪੇਸਕਾਰਕਞ੍ਜਿਯਸੁਤ੍ਤਂ. ਕੁਲਾ ਨਾਮ ਸਕੁਣਿਕਾ, ਤਸ੍ਸਾ ਕੁਲਾਵਕੋਤਿਪਿ ਏਕੇ. ਯਥਾ ਹਿ ਤਦੁਭਯਮ੍ਪਿ ਆਕੁਲਂ ਅਗ੍ਗੇਨ ਵਾ ਅਗ੍ਗਂ, ਮੂਲੇਨ ਵਾ ਮੂਲਂ ਸਮਾਨੇਤੁਂ ਦੁਕ੍ਕਰਨ੍ਤਿ ਪੁਰਿਮਨਯੇਨੇਵ ਯੋਜੇਤਬ੍ਬਂ.

ਮੁਞ੍ਜਪਬ੍ਬਜਭੂਤਾਤਿ ਮੁਞ੍ਜਤਿਣਂ ਵਿਯ ਪਬ੍ਬਜਤਿਣਂ ਵਿਯ ਚ ਭੂਤਾ ਤਾਦਿਸਾ ਜਾਤਾ. ਯਥਾ ਹਿ ਤਾਨਿ ਤਿਣਾਨਿ ਕੋਟ੍ਟੇਤ੍ਵਾ ਕਤਰਜ੍ਜੁ ਜਿਣ੍ਣਕਾਲੇ ਕਤ੍ਥਚਿ ਪਤਿਤਂ ਗਹੇਤ੍ਵਾ ਤੇਸਂ ਤਿਣਾਨਂ ‘‘ਇਦਂ ਅਗ੍ਗਂ, ਇਦਂ ਮੂਲ’’ਨ੍ਤਿ ਅਗ੍ਗੇਨ ਵਾ ਅਗ੍ਗਂ, ਮੂਲੇਨ ਵਾ ਮੂਲਂ ਸਮਾਨੇਤੁਂ ਦੁਕ੍ਕਰਂ, ਤਮ੍ਪਿ ਪਚ੍ਚਤ੍ਤਪੁਰਿਸਕਾਰੇ ਠਤ੍ਵਾ ਸਕ੍ਕਾ ਭਵੇਯ੍ਯ ਉਜੁਂ ਕਾਤੁਂ, ਠਪੇਤ੍ਵਾ ਪਨ ਦ੍ਵੇ ਬੋਧਿਸਤ੍ਤੇ ਅਞ੍ਞੋ ਸਤ੍ਤੋ ਅਤ੍ਤਨੋ ਧਮ੍ਮਤਾਯ ਪਚ੍ਚਯਾਕਾਰਂ ਉਜੁਂ ਕਾਤੁਂ ਸਮਤ੍ਥੋ ਨਾਮ ਨਤ੍ਥਿ, ਏਵਮਯਂ ਪਜਾ ਪਚ੍ਚਯਂ ਉਜੁਂ ਕਾਤੁਂ ਅਸਕ੍ਕੋਨ੍ਤੀ ਦਿਟ੍ਠਿਗਤਵਸੇਨ ਗਣ੍ਠਿਕਜਾਤਾ ਹੁਤ੍ਵਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਸਂਸਾਰਂ ਨਾਤਿਵਤ੍ਤਤਿ.

ਤਤ੍ਥ ਅਪਾਯੋਤਿ ਨਿਰਯਤਿਰਚ੍ਛਾਨਯੋਨਿਪੇਤ੍ਤਿਵਿਸਯਅਸੁਰਕਾਯਾ. ਸਬ੍ਬੇਪਿ ਹਿ ਤੇ ਵਡ੍ਢਿਸਙ੍ਖਾਤਸ੍ਸ ਅਯਸ੍ਸ ਅਭਾਵਤੋ ‘‘ਅਪਾਯੋ’’ਤਿ ਵੁਚ੍ਚਤਿ, ਤਥਾ ਦੁਕ੍ਖਸ੍ਸ ਗਤਿਭਾਵਤੋ ਦੁਗ੍ਗਤਿ, ਸੁਖਸਮੁਸ੍ਸਯਤੋ ਵਿਨਿਪਤਿਤਤ੍ਤਾ ਵਿਨਿਪਾਤੋ. ਇਤਰੋ ਪਨ –

‘‘ਖਨ੍ਧਾਨਞ੍ਚ ਪਟਿਪਾਟਿ, ਧਾਤੁਆਯਤਨਾਨ ਚ;

ਅਬ੍ਭੋਚ੍ਛਿਨ੍ਨਂ ਵਤ੍ਤਮਾਨਾ, ਸਂਸਾਰੋਤਿ ਪਵੁਚ੍ਚਤਿ’’.

ਤਂ ਸਬ੍ਬਮ੍ਪਿ ਨਾਤਿਵਤ੍ਤਤਿ ਨਾਤਿਕ੍ਕਮਤਿ, ਅਥ ਖੋ ਚੁਤਿਤੋ ਪਟਿਸਨ੍ਧਿਂ, ਪਟਿਸਨ੍ਧਿਤੋ ਚੁਤਿਨ੍ਤਿ ਏਵਂ ਪੁਨਪ੍ਪੁਨਂ ਚੁਤਿਪਟਿਸਨ੍ਧਿਯੋ ਗਣ੍ਹਮਾਨਾ ਤੀਸੁ ਭਵੇਸੁ ਚਤੂਸੁ ਯੋਨੀਸੁ ਪਞ੍ਚਸੁ ਗਤੀਸੁ ਸਤ੍ਤਸੁ ਵਿਞ੍ਞਾਣਟ੍ਠਿਤੀਸੁ ਨਵਸੁ ਸਤ੍ਤਾਵਾਸੇਸੁ ਮਹਾਸਮੁਦ੍ਦੇ ਵਾਤਕ੍ਖਿਤ੍ਤਾ ਨਾਵਾ ਵਿਯ ਯਨ੍ਤੇ ਯੁਤ੍ਤਗੋਣੋ ਵਿਯ ਚ ਪਰਿਬ੍ਭਮਤਿਯੇਵ. ਇਤਿ ਸਬ੍ਬਮੇਤਂ ਭਗਵਾ ਆਯਸ੍ਮਨ੍ਤਂ ਆਨਨ੍ਦਂ ਅਪਸਾਦੇਨ੍ਤੋ ਆਹ. ਸੇਸਮੇਤ੍ਥ ਵੁਤ੍ਤਨਯਮੇਵਾਤਿ. ਦਸਮਂ.

ਦੁਕ੍ਖਵਗ੍ਗੋ ਛਟ੍ਠੋ.