੫. ਗਹਪਤਿਵਗ੍ਗੋ

੧. ਪਞ੍ਚਵੇਰਭਯਸੁਤ੍ਤਵਣ੍ਣਨਾ

੪੧. ਗਹਪਤਿਵਗ੍ਗਸ੍ਸ ਪਠਮੇ ਯਤੋਤਿ ਯਦਾ. ਭਯਾਨਿ ਵੇਰਾਨੀਤਿ ਭਯਵੇਰਚੇਤਨਾਯੋ. ਸੋਤਾਪਤ੍ਤਿਯਙ੍ਗੇਹੀਤਿ ਦੁਵਿਧਂ ਸੋਤਾਪਤ੍ਤਿਯਾ ਅਙ੍ਗਂ, (ਸੋਤਾਪਤ੍ਤਿਯਾ ਚ ਅਙ੍ਗਂ,) ਯਂ ਪੁਬ੍ਬਭਾਗੇ ਸੋਤਾਪਤ੍ਤਿਪਟਿਲਾਭਾਯ ਸਂਵਤ੍ਤਤਿ, ‘‘ਸਪ੍ਪੁਰਿਸਸਂਸੇਵੋ ਸਦ੍ਧਮ੍ਮਸ੍ਸਵਨਂ ਯੋਨਿਸੋਮਨਸਿਕਾਰੋ ਧਮ੍ਮਾਨੁਧਮ੍ਮਪ੍ਪਟਿਪਤ੍ਤੀ’’ਤਿ (ਦੀ. ਨਿ. ੩.੩੧੧) ਏਵਂ ਆਗਤਂ, ਪਟਿਲਦ੍ਧਗੁਣਸ੍ਸ ਚ ਸੋਤਾਪਤ੍ਤਿਂ ਪਤ੍ਵਾ ਠਿਤਸ੍ਸ ਅਙ੍ਗਂ, ਯਂ ਸੋਤਾਪਨ੍ਨਸ੍ਸ ਅਙ੍ਗਨ੍ਤਿਪਿ ਵੁਚ੍ਚਤਿ, ਬੁਦ੍ਧੇ ਅਵੇਚ੍ਚਪ੍ਪਸਾਦਾਦੀਨਂ ਏਤਂ ਅਧਿਵਚਨਂ. ਇਦਮਿਧ ਅਧਿਪ੍ਪੇਤਂ. ਅਰਿਯੋਤਿ ਨਿਦ੍ਦੋਸੋ ਨਿਰੁਪਾਰਮ੍ਭੋ. ਞਾਯੋਤਿ ਪਟਿਚ੍ਚਸਮੁਪ੍ਪਨ੍ਨਂ ਞਤ੍ਵਾ ਠਿਤਞਾਣਮ੍ਪਿ ਪਟਿਚ੍ਚਸਮੁਪ੍ਪਾਦੋਪਿ. ਯਥਾਹ – ‘‘ਞਾਯੋ ਵੁਚ੍ਚਤਿ ਪਟਿਚ੍ਚਸਮੁਪ੍ਪਾਦੋ, ਅਰਿਯੋਪਿ ਅਟ੍ਠਙ੍ਗਿਕੋ ਮਗ੍ਗੋ ਞਾਯੋ’’ਤਿ. ਪਞ੍ਞਾਯਾਤਿ ਅਪਰਾਪਰਂ ਉਪ੍ਪਨ੍ਨਾਯ ਵਿਪਸ੍ਸਨਾਪਞ੍ਞਾਯ. ਸੁਦਿਟ੍ਠੋ ਹੋਤੀਤਿ ਅਪਰਾਪਰਂ ਉਪ੍ਪਜ੍ਜਿਤ੍ਵਾ ਦਸ੍ਸਨਵਸੇਨ ਸੁਟ੍ਠੁ ਦਿਟ੍ਠੋ.

ਖੀਣਨਿਰਯੋਤਿਆਦੀਸੁ ਆਯਤਿਂ ਤਤ੍ਥ ਅਨੁਪ੍ਪਜ੍ਜਨਤਾਯ ਖੀਣੋ ਨਿਰਯੋ ਮਯ੍ਹਨ੍ਤਿ ਸੋ ਅਹਂ ਖੀਣਨਿਰਯੋ. ਏਸ ਨਯੋ ਸਬ੍ਬਤ੍ਥ. ਸੋਤਾਪਨ੍ਨੋਤਿ ਮਗ੍ਗਸੋਤਂ ਆਪਨ੍ਨੋ. ਅਵਿਨਿਪਾਤਧਮ੍ਮੋਤਿ ਨ ਵਿਨਿਪਾਤਸਭਾਵੋ. ਨਿਯਤੋਤਿ ਪਠਮਮਗ੍ਗਸਙ੍ਖਾਤੇਨ ਸਮ੍ਮਤ੍ਤਨਿਯਾਮੇਨ ਨਿਯਤੋ. ਸਮ੍ਬੋਧਿਪਰਾਯਨੋਤਿ ਉਤ੍ਤਰਿਮਗ੍ਗਤ੍ਤਯਸਙ੍ਖਾਤੋ ਸਮ੍ਬੋਧਿ ਪਰਂ ਅਯਨਂ ਮਯ੍ਹਨ੍ਤਿ ਸੋਹਂ ਸਮ੍ਬੋਧਿਪਰਾਯਨੋ, ਤਂ ਸਮ੍ਬੋਧਿਂ ਅਵਸ੍ਸਂ ਅਭਿਸਮ੍ਬੁਜ੍ਝਨਕੋਤਿ ਅਤ੍ਥੋ.

ਪਾਣਾਤਿਪਾਤਪਚ੍ਚਯਾਤਿ ਪਾਣਾਤਿਪਾਤਕਮ੍ਮਕਾਰਣਾ. ਭਯਂ ਵੇਰਨ੍ਤਿ ਅਤ੍ਥਤੋ ਏਕਂ. ਵੇਰਞ੍ਚ ਨਾਮੇਤਂ ਦੁਵਿਧਂ ਹੋਤਿ ਬਾਹਿਰਂ ਅਜ੍ਝਤ੍ਤਿਕਨ੍ਤਿ. ਏਕੇਨ ਹਿ ਏਕਸ੍ਸ ਪਿਤਾ ਮਾਰਿਤੋ ਹੋਤਿ, ਸੋ ਚਿਨ੍ਤੇਸਿ ‘‘ਏਤੇਨ ਕਿਰ ਮੇ ਪਿਤਾ ਮਾਰਿਤੋ, ਅਹਮ੍ਪਿ ਤਂਯੇਵ ਮਾਰੇਸ੍ਸਾਮੀ’’ਤਿ ਨਿਸਿਤਂ ਸਤ੍ਥਂ ਆਦਾਯ ਚਰਤਿ. ਯਾ ਤਸ੍ਸ ਅਬ੍ਭਨ੍ਤਰੇ ਉਪ੍ਪਨ੍ਨਵੇਰਚੇਤਨਾ, ਇਦਂ ਬਾਹਿਰਂ ਵੇਰਂ ਨਾਮ. ਯਾ ਪਨ ਇਤਰਸ੍ਸ ‘‘ਅਯਂ ਕਿਰ ਮਂ ਮਾਰੇਸ੍ਸਾਮੀਤਿ ਚਰਤਿ, ਅਹਮੇਵ ਨਂ ਪਠਮਤਰਂ ਮਾਰੇਸ੍ਸਾਮੀ’’ਤਿ ਚੇਤਨਾ ਉਪ੍ਪਜ੍ਜਤਿ, ਇਦਂ ਅਜ੍ਝਤ੍ਤਿਕਂ ਵੇਰਂ ਨਾਮ. ਇਦਂ ਤਾਵ ਉਭਯਮ੍ਪਿ ਦਿਟ੍ਠਧਮ੍ਮਿਕਮੇਵ. ਯਾ ਪਨ ਤਂ ਨਿਰਯੇ ਉਪ੍ਪਨ੍ਨਂ ਦਿਸ੍ਵਾ ‘‘ਏਤਂ ਪਹਰਿਸ੍ਸਾਮੀ’’ਤਿ ਜਲਿਤਂ ਅਯਮੁਗ੍ਗਰਂ ਗਣ੍ਹਤੋ ਨਿਰਯਪਾਲਸ੍ਸ ਚੇਤਨਾ ਉਪ੍ਪਜ੍ਜਤਿ, ਇਦਮਸ੍ਸ ਸਮ੍ਪਰਾਯਿਕਂ ਬਾਹਿਰਵੇਰਂ. ਯਾ ਚਸ੍ਸ ‘‘ਅਯਂ ਨਿਦ੍ਦੋਸਂ ਮਂ ਪਹਰਿਸ੍ਸਾਮੀਤਿ ਆਗਚ੍ਛਤਿ, ਅਹਮੇਵ ਨਂ ਪਠਮਤਰਂ ਪਹਰਿਸ੍ਸਾਮੀ’’ਤਿ ਚੇਤਨਾ ਉਪ੍ਪਜ੍ਜਤਿ, ਇਦਮਸ੍ਸ ਸਮ੍ਪਰਾਯਿਕਂ ਅਜ੍ਝਤ੍ਤਵੇਰਂ. ਯਂ ਪਨੇਤਂ ਬਾਹਿਰਵੇਰਂ, ਤਂ ਅਟ੍ਠਕਥਾਯਂ ‘‘ਪੁਗ੍ਗਲਵੇਰ’’ਨ੍ਤਿ ਵੁਤ੍ਤਂ. ਦੁਕ੍ਖਂ ਦੋਮਨਸ੍ਸਨ੍ਤਿ ਅਤ੍ਥਤੋ ਏਕਮੇਵ. ਯਥਾ ਚੇਤ੍ਥ, ਏਵਂ ਸੇਸਪਦੇਸੁਪਿ ‘‘ਇਮਿਨਾ ਮਮ ਭਣ੍ਡਂ ਹਟਂ, ਮਯ੍ਹਂ ਦਾਰੇਸੁ ਚਾਰਿਤ੍ਤਂ ਆਪਨ੍ਨਂ, ਮੁਸਾ ਵਤ੍ਵਾ ਅਤ੍ਥੋ ਭਗ੍ਗੋ, ਸੁਰਾਮਦਮਤ੍ਤੇਨ ਇਦਂ ਨਾਮ ਕਤ’’ਨ੍ਤਿਆਦਿਨਾ ਨਯੇਨ ਵੇਰੁਪ੍ਪਤ੍ਤਿ ਵੇਦਿਤਬ੍ਬਾ. ਅਵੇਚ੍ਚਪ੍ਪਸਾਦੇਨਾਤਿ ਅਧਿਗਤੇਨ ਅਚਲਪ੍ਪਸਾਦੇਨ. ਅਰਿਯਕਨ੍ਤੇਹੀਤਿ ਪਞ੍ਚਹਿ ਸੀਲੇਹਿ. ਤਾਨਿ ਹਿ ਅਰਿਯਾਨਂ ਕਨ੍ਤਾਨਿ ਪਿਯਾਨਿ. ਭਵਨ੍ਤਰਗਤਾਪਿ ਅਰਿਯਾ ਤਾਨਿ ਨ ਵਿਜਹਨ੍ਤਿ, ਤਸ੍ਮਾ ‘‘ਅਰਿਯਕਨ੍ਤਾਨੀ’’ਤਿ ਵੁਚ੍ਚਨ੍ਤਿ. ਸੇਸਮੇਤ੍ਥ ਯਂ ਵਤ੍ਤਬ੍ਬਂ ਸਿਯਾ, ਤਂ ਸਬ੍ਬਂ ਵਿਸੁਦ੍ਧਿਮਗ੍ਗੇ ਅਨੁਸ੍ਸਤਿਨਿਦ੍ਦੇਸੇ ਵੁਤ੍ਤਮੇਵ. ਪਠਮਂ.

੨. ਦੁਤਿਯਪਞ੍ਚਵੇਰਭਯਸੁਤ੍ਤਵਣ੍ਣਨਾ

੪੨. ਦੁਤਿਯੇ ਭਿਕ੍ਖੂਨਂ ਕਥਿਤਭਾਵਮਤ੍ਤਮੇਵ ਵਿਸੇਸੋ. ਦੁਤਿਯਂ.

੩. ਦੁਕ੍ਖਸੁਤ੍ਤਵਣ੍ਣਨਾ

੪੩. ਤਤਿਯੇ ਦੁਕ੍ਖਸ੍ਸਾਤਿ ਵਟ੍ਟਦੁਕ੍ਖਸ੍ਸ. ਸਮੁਦਯਨ੍ਤਿ ਦ੍ਵੇ ਸਮੁਦਯਾ ਖਣਿਕਸਮੁਦਯੋ ਚ ਪਚ੍ਚਯਸਮੁਦਯੋ ਚ. ਪਚ੍ਚਯਸਮੁਦਯਂ ਪਸ੍ਸਨ੍ਤੋਪਿ ਭਿਕ੍ਖੁ ਖਣਿਕਸਮੁਦਯਂ ਪਸ੍ਸਤਿ, ਖਣਿਕਸਮੁਦਯਂ ਪਸ੍ਸਨ੍ਤੋਪਿ ਪਚ੍ਚਯਸਮੁਦਯਂ ਪਸ੍ਸਤਿ. ਅਤ੍ਥਙ੍ਗਮੋਪਿ ਅਚ੍ਚਨ੍ਤਤ੍ਥਙ੍ਗਮੋ ਭੇਦਤ੍ਥਙ੍ਗਮੋਤਿ ਦੁਵਿਧੋ. ਅਚ੍ਚਨ੍ਤਤ੍ਥਙ੍ਗਮਂ ਪਸ੍ਸਨ੍ਤੋਪਿ ਭੇਦਤ੍ਥਙ੍ਗਮਂ ਪਸ੍ਸਤਿ, ਭੇਦਤ੍ਥਙ੍ਗਮਂ ਪਸ੍ਸਨ੍ਤੋਪਿ ਅਚ੍ਚਨ੍ਤਤ੍ਥਙ੍ਗਮਂ ਪਸ੍ਸਤਿ. ਦੇਸੇਸ੍ਸਾਮੀਤਿ ਇਦਂ ਵਟ੍ਟਦੁਕ੍ਖਸ੍ਸ ਸਮੁਦਯਅਤ੍ਥਙ੍ਗਮਂ ਨਿਬ੍ਬਤ੍ਤਿਭੇਦਂ ਨਾਮ ਦੇਸੇਸ੍ਸਾਮਿ, ਤਂ ਸੁਣਾਥਾਤਿ ਅਤ੍ਥੋ. ਪਟਿਚ੍ਚਾਤਿ ਨਿਸ੍ਸਯਵਸੇਨ ਚੇਵ ਆਰਮ੍ਮਣਵਸੇਨ ਚ ਪਚ੍ਚਯਂ ਕਤ੍ਵਾ. ਤਿਣ੍ਣਂ ਸਙ੍ਗਤਿ ਫਸ੍ਸੋਤਿ ਤਿਣ੍ਣਂ ਸਙ੍ਗਤਿਯਾ ਫਸ੍ਸੋ. ਅਯਂ ਖੋ, ਭਿਕ੍ਖਵੇ, ਦੁਕ੍ਖਸ੍ਸ ਸਮੁਦਯੋਤਿ ਅਯਂ ਵਟ੍ਟਦੁਕ੍ਖਸ੍ਸ ਨਿਬ੍ਬਤ੍ਤਿ ਨਾਮ. ਅਤ੍ਥਙ੍ਗਮੋਤਿ ਭੇਦੋ. ਏਵਞ੍ਹਿ ਵਟ੍ਟਦੁਕ੍ਖਂ ਭਿਨ੍ਨਂ ਹੋਤਿ ਅਪ੍ਪਟਿਸਨ੍ਧਿਯਂ. ਤਤਿਯਂ.

੪. ਲੋਕਸੁਤ੍ਤਵਣ੍ਣਨਾ

੪੪. ਚਤੁਤ੍ਥੇ ਲੋਕਸ੍ਸਾਤਿ ਸਙ੍ਖਾਰਲੋਕਸ੍ਸ. ਅਯਮੇਤ੍ਥ ਵਿਸੇਸੋ. ਚਤੁਤ੍ਥਂ.

੫. ਞਾਤਿਕਸੁਤ੍ਤਵਣ੍ਣਨਾ

੪੫. ਪਞ੍ਚਮੇ ਞਾਤਿਕੇਤਿ ਦ੍ਵਿਨ੍ਨਂ ਞਾਤਕਾਨਂ ਗਾਮੇ. ਗਿਞ੍ਜਕਾਵਸਥੇਤਿ ਇਟ੍ਠਕਾਹਿ ਕਤੇ ਮਹਾਪਾਸਾਦੇ. ਧਮ੍ਮਪਰਿਯਾਯਨ੍ਤਿ ਧਮ੍ਮਕਾਰਣਂ. ਉਪਸ੍ਸੁਤੀਤਿ ਉਪਸ੍ਸੁਤਿਟ੍ਠਾਨਂ, ਯਂ ਠਾਨਂ ਉਪਗਤੇਨ ਸਕ੍ਕਾ ਹੋਤਿ ਭਗਵਤੋ ਸਦ੍ਦਂ ਸੋਤੁਂ, ਤਤ੍ਥ ਠਿਤੋਤਿ ਅਤ੍ਥੋ. ਸੋ ਕਿਰ ਗਨ੍ਧਕੁਟਿਪਰਿਵੇਣਸਮ੍ਮਜ੍ਜਨਤ੍ਥਂ ਆਗਤੋ ਅਤ੍ਤਨੋ ਕਮ੍ਮਂ ਪਹਾਯ ਭਗਵਤੋ ਧਮ੍ਮਘੋਸਂ ਸੁਣਨ੍ਤੋ ਅਟ੍ਠਾਸਿ. ਅਦ੍ਦਸਾਤਿ ਤਦਾ ਕਿਰ ਭਗਵਤੋ ਆਦਿਤੋਵ ਪਚ੍ਚਯਾਕਾਰਂ ਮਨਸਿਕਰੋਨ੍ਤਸ੍ਸ ‘‘ਇਦਂ ਇਮਿਨਾ ਪਚ੍ਚਯੇਨ ਹੋਤਿ, ਇਦਂ ਇਮਿਨਾ’’ਤਿ ਆਵਜ੍ਜਤੋ ਯਾਵ ਭਵਗ੍ਗਾ ਏਕਙ੍ਗਣਂ ਅਹੋਸਿ, ਸਤ੍ਥਾ ਮਨਸਿਕਾਰਂ ਪਹਾਯ ਵਚਸਾ ਸਜ੍ਝਾਯਂ ਕਰੋਨ੍ਤੋ ਯਥਾਨੁਸਨ੍ਧਿਨਾ ਦੇਸਨਂ ਨਿਟ੍ਠਪੇਤ੍ਵਾ, ‘‘ਅਪਿ ਨੁ ਖੋ ਇਮਂ ਧਮ੍ਮਪਰਿਯਾਯਂ ਕੋਚਿ ਅਸ੍ਸੋਸੀ’’ਤਿ ਆਵਜ੍ਜੇਨ੍ਤੋ ਤਂ ਭਿਕ੍ਖੁਮਦ੍ਦਸ. ਤੇਨ ਵੁਤ੍ਤਂ ‘‘ਅਦ੍ਦਸਾ ਖੋ ਭਗਵਾ’’ਤਿ.

ਅਸ੍ਸੋਸਿ ਨੋਤਿ ਅਸ੍ਸੋਸਿ ਨੁ. ਅਥ ਵਾ ਅਸ੍ਸੋਸਿ ਨੋਤਿ ਅਮ੍ਹਾਕਂ ਭਾਸਨ੍ਤਾਨਂ ਅਸ੍ਸੋਸੀਤਿ. ਉਗ੍ਗਣ੍ਹਾਹੀਤਿਆਦੀਸੁ ਸੁਤ੍ਵਾ ਤੁਣ੍ਹੀਭੂਤੋਵ ਪਗੁਣਂ ਕਰੋਨ੍ਤੋ ਉਗ੍ਗਣ੍ਹਾਤਿ ਨਾਮ. ਪਦਾਨੁਪਦਂ ਘਟੇਤ੍ਵਾ ਵਾਚਾਯ ਪਰਿਚਿਤਂ ਕਰੋਨ੍ਤੋ ਪਰਿਯਾਪੁਣਾਤਿ ਨਾਮ. ਉਭਯਥਾਪਿ ਪਗੁਣਂ ਆਧਾਰਪ੍ਪਤ੍ਤਂ ਕਰੋਨ੍ਤੋ ਧਾਰੇਤਿ ਨਾਮ. ਅਤ੍ਥਸਂਹਿਤੋਤਿ ਕਾਰਣਨਿਸ੍ਸਿਤੋ. ਆਦਿਬ੍ਰਹ੍ਮਚਰਿਯਕੋਤਿ ਮਗ੍ਗਬ੍ਰਹ੍ਮਚਰਿਯਸ੍ਸ ਆਦਿ ਪਤਿਟ੍ਠਾਨਭੂਤੋ. ਇਤਿ ਤੀਸੁਪਿ ਇਮੇਸੁ ਸੁਤ੍ਤੇਸੁ ਵਟ੍ਟਵਿਵਟ੍ਟਮੇਵ ਕਥਿਤਂ. ਪਞ੍ਚਮਂ.

੬. ਅਞ੍ਞਤਰਬ੍ਰਾਹ੍ਮਣਸੁਤ੍ਤਵਣ੍ਣਨਾ

੪੬. ਛਟ੍ਠੇ ਅਞ੍ਞਤਰੋਤਿ ਨਾਮਵਸੇਨ ਅਪਾਕਟੋ ਅਞ੍ਞਤਰੋ ਬ੍ਰਾਹ੍ਮਣੋ. ਛਟ੍ਠਂ.

੭. ਜਾਣੁਸ੍ਸੋਣਿਸੁਤ੍ਤਵਣ੍ਣਨਾ

੪੭. ਸਤ੍ਤਮੇ ਜਾਣੁਸ੍ਸੋਣੀਤਿ ਠਾਨਨ੍ਤਰਵਸੇਨ ਏਵਂਲਦ੍ਧਨਾਮੋ ਅਸੀਤਿਕੋਟਿਵਿਭਵੋ ਮਹਾਪੁਰੋਹਿਤੋ. ਸਤ੍ਤਮਂ.

੮. ਲੋਕਾਯਤਿਕਸੁਤ੍ਤਵਣ੍ਣਨਾ

੪੮. ਅਟ੍ਠਮੇ ਲੋਕਾਯਤਿਕੋਤਿ ਵਿਤਣ੍ਡਸਤ੍ਥੇ ਲੋਕਾਯਤੇ ਕਤਪਰਿਚਯੋ. ਜੇਟ੍ਠਮੇਤਂ ਲੋਕਾਯਤਨ੍ਤਿ ਪਠਮਂ ਲੋਕਾਯਤਂ. ਲੋਕਾਯਤਨ੍ਤਿ ਚ ਲੋਕਸ੍ਸੇਵ ਆਯਤਂ, ਬਾਲਪੁਥੁਜ੍ਜਨਲੋਕਸ੍ਸ ਆਯਤਂ, ਮਹਨ੍ਤਂ ਗਮ੍ਭੀਰਨ੍ਤਿ ਉਪਧਾਰਿਤਬ੍ਬਂ ਪਰਿਤ੍ਤਂ ਭਾਵਂ ਦਿਟ੍ਠਿਗਤਂ. ਏਕਤ੍ਤਨ੍ਤਿ ਏਕਸਭਾਵਂ, ਨਿਚ੍ਚਸਭਾਵਮੇਵਾਤਿ ਪੁਚ੍ਛਤਿ. ਪੁਥੁਤ੍ਤਨ੍ਤਿ ਪੁਰਿਮਸਭਾਵੇਨ ਨਾਨਾਸਭਾਵਂ, ਦੇਵਮਨੁਸ੍ਸਾਦਿਭਾਵੇਨ ਪਠਮਂ ਹੁਤ੍ਵਾ ਪਚ੍ਛਾ ਨ ਹੋਤੀਤਿ ਉਚ੍ਛੇਦਂ ਸਨ੍ਧਾਯ ਪੁਚ੍ਛਤਿ. ਏਵਮੇਤ੍ਥ ‘‘ਸਬ੍ਬਮਤ੍ਥਿ, ਸਬ੍ਬਮੇਕਤ੍ਤ’’ਨ੍ਤਿ ਇਮਾ ਦ੍ਵੇਪਿ ਸਸ੍ਸਤਦਿਟ੍ਠਿਯੋ, ‘‘ਸਬ੍ਬਂ ਨਤ੍ਥਿ, ਸਬ੍ਬਂ ਪੁਥੁਤ੍ਤ’’ਨ੍ਤਿ ਇਮਾ ਦ੍ਵੇ ਉਚ੍ਛੇਦਦਿਟ੍ਠਿਯੋਤਿ ਵੇਦਿਤਬ੍ਬਾ. ਅਟ੍ਠਮਂ.

੯. ਅਰਿਯਸਾਵਕਸੁਤ੍ਤਵਣ੍ਣਨਾ

੪੯. ਨਵਮੇ ਕਿਂ ਨੁ ਖੋਤਿ ਸਂਸਯੁਪ੍ਪਤ੍ਤਿਆਕਾਰਦਸ੍ਸਨਂ. ਸਮੁਦਯਤੀਤਿ ਉਪ੍ਪਜ੍ਜਤਿ. ਨਵਮਂ.

੧੦. ਦੁਤਿਯਅਰਿਯਸਾਵਕਸੁਤ੍ਤਵਣ੍ਣਨਾ

੫੦. ਦਸਮੇ ਦ੍ਵੇਪਿ ਨਯਾ ਏਕਤੋ ਵੁਤ੍ਤਾ. ਇਦਮੇਵ ਪੁਰਿਮੇਨ ਨਾਨਤ੍ਤਂ, ਸੇਸਂ ਤਾਦਿਸਮੇਵਾਤਿ. ਦਸਮਂ.

ਗਹਪਤਿਵਗ੍ਗੋ ਪਞ੍ਚਮੋ.