੧. ਪਠਮਵਗ੍ਗੋ

੧. ਬ੍ਰਹ੍ਮਾਯਾਚਨਸੁਤ੍ਤਵਣ੍ਣਨਾ

੧੭੨. ਬ੍ਰਹ੍ਮਸਂਯੁਤ੍ਤਸ੍ਸ ਪਠਮੇ ਪਰਿਵਿਤਕ੍ਕੋ ਉਦਪਾਦੀਤਿ ਸਬ੍ਬਬੁਦ੍ਧਾਨਂ ਆਚਿਣ੍ਣਸਮਾਚਿਣ੍ਣੋ ਅਯਂ ਚੇਤਸੋ ਵਿਤਕ੍ਕੋ ਉਦਪਾਦਿ. ਕਦਾ ਉਦਪਾਦੀਤਿ? ਬੁਦ੍ਧਭੂਤਸ੍ਸ ਅਟ੍ਠਮੇ ਸਤ੍ਤਾਹੇ ਰਾਜਾਯਤਨਮੂਲੇ ਸਕ੍ਕੇਨ ਦੇਵਾਨਮਿਨ੍ਦੇਨ ਆਭਤਂ ਦਨ੍ਤਕਟ੍ਠਞ੍ਚ ਓਸਧਹਰੀਤਕਞ੍ਚ ਖਾਦਿਤ੍ਵਾ ਮੁਖਂ ਧੋਵਿਤ੍ਵਾ ਚਤੂਹਿ ਲੋਕਪਾਲੇਹਿ ਉਪਨੀਤੇ ਪਚ੍ਚਗ੍ਘੇ ਸੇਲਮਯਪਤ੍ਤੇ ਤਪੁਸ੍ਸਭਲ੍ਲਿਕਾਨਂ ਪਿਣ੍ਡਪਾਤਂ ਪਰਿਭੁਞ੍ਜਿਤ੍ਵਾ ਪੁਨ ਪਚ੍ਚਾਗਨ੍ਤ੍ਵਾ ਅਜਪਾਲਨਿਗ੍ਰੋਧੇ ਨਿਸਿਨ੍ਨਮਤ੍ਤਸ੍ਸ.

ਅਧਿਗਤੋਤਿ ਪਟਿਵਿਦ੍ਧੋ. ਧਮ੍ਮੋਤਿ ਚਤੁਸਚ੍ਚਧਮ੍ਮੋ. ਗਮ੍ਭੀਰੋਤਿ ਉਤ੍ਤਾਨਪਟਿਕ੍ਖੇਪਵਚਨਮੇਤਂ. ਦੁਦ੍ਦਸੋਤਿ ਗਮ੍ਭੀਰਤ੍ਤਾਵ ਦੁਦ੍ਦਸੋ ਦੁਕ੍ਖੇਨ ਦਟ੍ਠਬ੍ਬੋ, ਨ ਸਕ੍ਕਾ ਸੁਖੇਨ ਦਟ੍ਠੁਂ. ਦੁਦ੍ਦਸਤ੍ਤਾਵ ਦੁਰਨੁਬੋਧੋ ਦੁਕ੍ਖੇਨ ਅਵਬੁਜ੍ਝਿਤਬ੍ਬੋ, ਨ ਸਕ੍ਕਾ ਸੁਖੇਨ ਅਵਬੁਜ੍ਝਿਤੁਂ. ਸਨ੍ਤੋਤਿ ਨਿਬ੍ਬੁਤੋ. ਪਣੀਤੋਤਿ ਅਤਪ੍ਪਕੋ. ਇਦਂ ਦ੍ਵਯਂ ਲੋਕੁਤ੍ਤਰਮੇਵ ਸਨ੍ਧਾਯ ਵੁਤ੍ਤਂ. ਅਤਕ੍ਕਾਵਚਰੋਤਿ ਤਕ੍ਕੇਨ ਅਵਚਰਿਤਬ੍ਬੋ ਓਗਾਹਿਤਬ੍ਬੋ ਨ ਹੋਤਿ, ਞਾਣੇਨੇਵ ਅਵਚਰਿਤਬ੍ਬੋ. ਨਿਪੁਣੋਤਿ ਸਣ੍ਹੋ. ਪਣ੍ਡਿਤਵੇਦਨੀਯੋਤਿ ਸਮ੍ਮਾਪਟਿਪਦਂ ਪਟਿਪਨ੍ਨੇਹਿ ਪਣ੍ਡਿਤੇਹਿ ਵੇਦਿਤਬ੍ਬੋ. ਆਲਯਰਾਮਾਤਿ ਸਤ੍ਤਾ ਪਞ੍ਚਸੁ ਕਾਮਗੁਣੇਸੁ ਅਲ੍ਲੀਯਨ੍ਤਿ, ਤਸ੍ਮਾ ਤੇ ਆਲਯਾਤਿ ਵੁਚ੍ਚਨ੍ਤਿ. ਅਟ੍ਠਸਤਤਣ੍ਹਾਵਿਚਰਿਤਾਨਿ ਵਾ ਅਲ੍ਲੀਯਨ੍ਤਿ, ਤਸ੍ਮਾਪਿ ਆਲਯਾਤਿ ਵੁਚ੍ਚਨ੍ਤਿ. ਤੇਹਿ ਆਲਯੇਹਿ ਰਮਨ੍ਤੀਤਿ ਆਲਯਰਾਮਾ. ਆਲਯੇਸੁ ਰਤਾਤਿ ਆਲਯਰਤਾ. ਆਲਯੇਸੁ ਸੁਟ੍ਠੁ ਮੁਦਿਤਾਤਿ ਆਲਯਸਮ੍ਮੁਦਿਤਾ. ਯਥੇਵ ਹਿ ਸੁਸਜ੍ਜਿਤਂ ਪੁਪ੍ਫਫਲਭਰਿਤਰੁਕ੍ਖਾਦਿਸਮ੍ਪਨ੍ਨਂ ਉਯ੍ਯਾਨਂ ਪਵਿਟ੍ਠੋ ਰਾਜਾ ਤਾਯ ਤਾਯ ਸਮ੍ਪਤ੍ਤਿਯਾ ਰਮਤਿ, ਸਮ੍ਮੁਦਿਤੋ ਆਮੋਦਿਤਪਮੋਦਿਤੋ ਹੋਤਿ, ਨ ਉਕ੍ਕਣ੍ਠਤਿ, ਸਾਯਮ੍ਪਿ ਨਿਕ੍ਖਮਿਤੁਂ ਨ ਇਚ੍ਛਤਿ, ਏਵਮਿਮੇਹਿਪਿ ਕਾਮਾਲਯਤਣ੍ਹਾਲਯੇਹਿ ਸਤ੍ਤਾ ਰਮਨ੍ਤਿ, ਸਂਸਾਰਵਟ੍ਟੇ ਸਮ੍ਮੁਦਿਤਾ ਅਨੁਕ੍ਕਣ੍ਠਿਤਾ ਵਸਨ੍ਤਿ. ਤੇਨ ਤੇਸਂ ਭਗਵਾ ਦੁਵਿਧਂ ਆਲਯਂ ਉਯ੍ਯਾਨਭੂਮਿਂ ਵਿਯ ਦਸ੍ਸੇਨ੍ਤੋ ‘‘ਆਲਯਰਾਮਾ’’ਤਿਆਦਿਮਾਹ.

ਤਤ੍ਥ ਯਦਿਦਨ੍ਤਿ ਨਿਪਾਤੋ, ਤਸ੍ਸ ਠਾਨਂ ਸਨ੍ਧਾਯ ‘‘ਯਂ ਇਦ’’ਨ੍ਤਿ, ਪਟਿਚ੍ਚਸਮੁਪ੍ਪਾਦਂ ਸਨ੍ਧਾਯ ‘‘ਯੋ ਅਯ’’ਨ੍ਤਿ ਏਵਮਤ੍ਥੋ ਦਟ੍ਠਬ੍ਬੋ. ਇਦਪ੍ਪਚ੍ਚਯਤਾਪਟਿਚ੍ਚਸਮੁਪ੍ਪਾਦੋਤਿ ਇਮੇਸਂ ਪਚ੍ਚਯਾ ਇਦਪ੍ਪਚ੍ਚਯਾ, ਇਦਪ੍ਪਚ੍ਚਯਾ ਏਵ ਇਦਪ੍ਪਚ੍ਚਯਤਾ, ਇਦਪ੍ਪਚ੍ਚਯਤਾ ਚ ਸਾ ਪਟਿਚ੍ਚਸਮੁਪ੍ਪਾਦੋ ਚਾਤਿ ਇਦਪ੍ਪਚ੍ਚਯਤਾਪਟਿਚ੍ਚਸਮੁਪ੍ਪਾਦੋ. ਸਙ੍ਖਾਰਾਦਿਪਚ੍ਚਯਾਨਂ ਏਤਂ ਅਧਿਵਚਨਂ. ਸਬ੍ਬਸਙ੍ਖਾਰਸਮਥੋਤਿਆਦਿ ਸਬ੍ਬਂ ਨਿਬ੍ਬਾਨਮੇਵ. ਯਸ੍ਮਾ ਹਿ ਤਂ ਆਗਮ੍ਮ ਸਬ੍ਬਸਙ੍ਖਾਰਵਿਪ੍ਫਨ੍ਦਿਤਾਨਿ ਸਮਨ੍ਤਿ, ਵੂਪਸਮ੍ਮਨ੍ਤਿ, ਤਸ੍ਮਾ ਸਬ੍ਬਸਙ੍ਖਾਰਸਮਥੋਤਿ ਵੁਚ੍ਚਤਿ. ਯਸ੍ਮਾ ਚ ਤਂ ਆਗਮ੍ਮ ਸਬ੍ਬੇ ਉਪਧਯੋ ਪਟਿਨਿਸ੍ਸਟ੍ਠਾ ਹੋਨ੍ਤਿ, ਸਬ੍ਬਾ ਤਣ੍ਹਾ ਖੀਯਨ੍ਤਿ, ਸਬ੍ਬੇ ਕਿਲੇਸਰਾਗਾ ਵਿਰਜ੍ਜਨ੍ਤਿ, ਸਬ੍ਬਂ ਦੁਕ੍ਖਂ ਨਿਰੁਜ੍ਝਤਿ, ਤਸ੍ਮਾ ਸਬ੍ਬੂਪਧਿਪਟਿਨਿਸ੍ਸਗ੍ਗੋ ਤਣ੍ਹਾਕ੍ਖਯੋ ਵਿਰਾਗੋ ਨਿਰੋਧੋਤਿ ਵੁਚ੍ਚਤਿ. ਯਾ ਪਨੇਸਾ ਤਣ੍ਹਾ ਭਵੇਨ ਭਵਂ, ਫਲੇਨ ਵਾ ਸਦ੍ਧਿਂ ਕਮ੍ਮਂ ਵਿਨਤਿ ਸਂਸਿਬ੍ਬਤੀਤਿ ਕਤ੍ਵਾ ਵਾਨਨ੍ਤਿ ਵੁਚ੍ਚਤਿ, ਤਤੋ ਨਿਕ੍ਖਨ੍ਤਂ ਵਾਨਤੋਤਿ ਨਿਬ੍ਬਾਨਂ. ਸੋ ਮਮਸ੍ਸ ਕਿਲਮਥੋਤਿ ਯਾ ਅਜਾਨਨ੍ਤਾਨਂ ਦੇਸਨਾ ਨਾਮ, ਸੋ ਮਮ ਕਿਲਮਥੋ ਅਸ੍ਸ, ਸਾ ਮਮ ਵਿਹੇਸਾ ਅਸ੍ਸਾਤਿ ਅਤ੍ਥੋ. ਕਾਯਕਿਲਮਥੋ ਚੇਵ ਕਾਯਵਿਹੇਸਾ ਚ ਅਸ੍ਸਾਤਿ ਵੁਤ੍ਤਂ ਹੋਤਿ. ਚਿਤ੍ਤੇ ਪਨ ਉਭਯਮ੍ਪੇਤਂ ਬੁਦ੍ਧਾਨਂ ਨਤ੍ਥਿ. ਅਪਿਸ੍ਸੂਤਿ ਅਨੁਬ੍ਰੂਹਨਤ੍ਥੇ ਨਿਪਾਤੋ. ਸੋ ‘‘ਨ ਕੇਵਲਂ ਅਯਂ ਪਰਿਵਿਤਕ੍ਕੋ ਉਦਪਾਦਿ, ਇਮਾਪਿ ਗਾਥਾ ਪਟਿਭਂਸੂ’’ਤਿ ਦੀਪੇਤਿ. ਅਨਚ੍ਛਰਿਯਾਤਿ ਅਨੁਅਚ੍ਛਰਿਯਾ. ਪਟਿਭਂਸੂਤਿ ਪਟਿਭਾਨਸਙ੍ਖਾਤਸ੍ਸ ਞਾਣਸ੍ਸ ਗੋਚਰਾ ਅਹੇਸੁਂ, ਪਰਿਵਿਤਕ੍ਕਯਿਤਬ੍ਬਤਂ ਪਾਪੁਣਿਂਸੁ.

ਕਿਚ੍ਛੇਨਾਤਿ ਦੁਕ੍ਖੇਨ, ਨ ਦੁਕ੍ਖਾਯ ਪਟਿਪਦਾਯ. ਬੁਦ੍ਧਾਨਂ ਹਿ ਚਤ੍ਤਾਰੋਪਿ ਮਗ੍ਗਾ ਸੁਖਪਟਿਪਦਾਵ ਹੋਨ੍ਤਿ. ਪਾਰਮੀਪੂਰਣਕਾਲੇ ਪਨ ਸਰਾਗਸਦੋਸਸਮੋਹਸ੍ਸੇਵ ਸਤੋ ਆਗਤਾਗਤਾਨਂ ਯਾਚਕਾਨਂ ਅਲਙ੍ਕਤਪਟਿਯਤ੍ਤਂ ਸੀਸਂ ਕਨ੍ਤਿਤ੍ਵਾ ਗਲਲੋਹਿਤਂ ਨੀਹਰਿਤ੍ਵਾ ਸੁਅਞ੍ਜਿਤਾਨਿ ਅਕ੍ਖੀਨਿ ਉਪ੍ਪਾਟੇਤ੍ਵਾ ਕੁਲਵਂਸਪ੍ਪਦੀਪਂ ਪੁਤ੍ਤਂ ਮਨਾਪਚਾਰਿਨਿਂ ਭਰਿਯਨ੍ਤਿ ਏਵਮਾਦੀਨਿ ਦੇਨ੍ਤਸ੍ਸ ਅਞ੍ਞਾਨਿ ਚ ਖਨ੍ਤਿਵਾਦਿਸਦਿਸੇਸੁ ਅਤ੍ਤਭਾਵੇਸੁ ਛੇਜ੍ਜਭੇਜ੍ਜਾਦੀਨਿ ਪਾਪੁਣਨ੍ਤਸ੍ਸ ਆਗਮਨੀਯਪਟਿਪਦਂ ਸਨ੍ਧਾਯੇਤਂ ਵੁਤ੍ਤਂ. ਹਲਨ੍ਤਿ ਏਤ੍ਥ ਹ-ਕਾਰੋ ਨਿਪਾਤਮਤ੍ਤੋ, ਅਲਨ੍ਤਿ ਅਤ੍ਥੋ. ਪਕਾਸਿਤੁਨ੍ਤਿ ਦੇਸਿਤੁਂ, ਏਵਂ ਕਿਚ੍ਛੇਨ ਅਧਿਗਤਸ੍ਸ ਅਲਂ ਦੇਸਿਤੁਂ ਪਰਿਯਤ੍ਤਂ ਦੇਸਿਤੁਂ. ਕੋ ਅਤ੍ਥੋ ਦੇਸਿਤੇਨਾਤਿ ਵੁਤ੍ਤਂ ਹੋਤਿ? ਰਾਗਦੋਸਪਰੇਤੇਹੀਤਿ ਰਾਗਦੋਸਫੁਟ੍ਠੇਹਿ ਰਾਗਦੋਸਾਨੁਗਤੇਹਿ ਵਾ.

ਪਟਿਸੋਤਗਾਮਿਨ੍ਤਿ ਨਿਚ੍ਚਾਦੀਨਂ ਪਟਿਸੋਤਂ, ‘‘ਅਨਿਚ੍ਚਂ ਦੁਕ੍ਖਮਨਤ੍ਤਾ ਅਸੁਭ’’ਨ੍ਤਿ ਏਵਂ ਗਤਂ ਚਤੁਸਚ੍ਚਧਮ੍ਮਂ. ਰਾਗਰਤ੍ਤਾਤਿ ਕਾਮਰਾਗੇਨ ਭਵਰਾਗੇਨ ਦਿਟ੍ਠਿਰਾਗੇਨ ਚ ਰਤ੍ਤਾ. ਨ ਦਕ੍ਖਨ੍ਤੀਤਿ ਅਨਿਚ੍ਚਂ ਦੁਕ੍ਖਮਨਤ੍ਤਾ ਅਸੁਭਨ੍ਤਿ ਇਮਿਨਾ ਸਭਾਵੇਨ ਨ ਪਸ੍ਸਿਸ੍ਸਨ੍ਤਿ, ਤੇ ਅਪਸ੍ਸਨ੍ਤੇ ਕੋ ਸਕ੍ਖਿਸ੍ਸਤਿ ਏਵਂ ਗਾਹਾਪੇਤੁਂ. ਤਮੋਖਨ੍ਧੇਨ ਆਵੁਟਾਤਿ ਅਵਿਜ੍ਜਾਰਾਸਿਨਾ ਅਜ੍ਝੋਤ੍ਥਟਾ.

ਅਪ੍ਪੋਸ੍ਸੁਕ੍ਕਤਾਯਾਤਿ ਨਿਰੁਸ੍ਸੁਕ੍ਕਭਾਵੇਨ, ਅਦੇਸੇਤੁਕਾਮਤਾਯਾਤਿ ਅਤ੍ਥੋ. ਕਸ੍ਮਾ ਪਨਸ੍ਸ ਏਵਂ ਚਿਤ੍ਤਂ ਨਮਿ? ਨਨੁ ਏਸ ਮੁਤ੍ਤੋ ਮੋਚੇਸ੍ਸਾਮਿ, ਤਿਣ੍ਣੋ ਤਾਰੇਸ੍ਸਾਮਿ –

‘‘ਕਿਂ ਮੇ ਅਞ੍ਞਾਤਵੇਸੇਨ, ਧਮ੍ਮਂ ਸਚ੍ਛਿਕਤੇਨਿਧ;

ਸਬ੍ਬਞ੍ਞੁਤਂ ਪਾਪੁਣਿਤ੍ਵਾ, ਤਾਰਯਿਸ੍ਸਂ ਸਦੇਵਕ’’ਨ੍ਤਿ. (ਬੁ. ਵਂ. ੨.੫੬) –

ਪਤ੍ਥਨਂ ਕਤ੍ਵਾ ਪਾਰਮਿਯੋ ਪੂਰੇਤ੍ਵਾ ਸਬ੍ਬਞ੍ਞੁਤਂ ਪਤ੍ਤੋਤਿ? ਸਚ੍ਚਮੇਤਂ, ਤਦੇਵਂ ਪਚ੍ਚਵੇਕ੍ਖਣਾਨੁਭਾਵੇਨ ਪਨਸ੍ਸ ਏਵਂ ਚਿਤ੍ਤਂ ਨਮਿ. ਤਸ੍ਸ ਹਿ ਸਬ੍ਬਞ੍ਞੁਤਂ ਪਤ੍ਵਾ ਸਤ੍ਤਾਨਂ ਕਿਲੇਸਗਹਨਤਂ, ਧਮ੍ਮਸ੍ਸ ਚ ਗਮ੍ਭੀਰਤਂ ਪਚ੍ਚਵੇਕ੍ਖਨ੍ਤਸ੍ਸ ਸਤ੍ਤਾਨਂ ਕਿਲੇਸਗਹਨਤਾ ਚ ਧਮ੍ਮਗਮ੍ਭੀਰਤਾ ਚ ਸਬ੍ਬਾਕਾਰੇਨ ਪਾਕਟਾ ਜਾਤਾ. ਅਥਸ੍ਸ – ‘‘ਇਮੇ ਸਤ੍ਤਾ ਕਞ੍ਜਿਯਪੁਣ੍ਣਾ ਲਾਬੁ ਵਿਯ, ਤਕ੍ਕਭਰਿਤਾ ਚਾਟਿ ਵਿਯ, ਵਸਾਤੇਲਪੀਤਪਿਲੋਤਿਕਾ ਵਿਯ, ਅਞ੍ਜਨਮਕ੍ਖਿਤਹਤ੍ਥੋ ਵਿਯ ਚ ਕਿਲੇਸਭਰਿਤਾ ਅਤਿਸਂਕਿਲਿਟ੍ਠਾ ਰਾਗਰਤ੍ਤਾ ਦੋਸਦੁਟ੍ਠਾ ਮੋਹਮੂਲ਼੍ਹਾ, ਤੇ ਕਿਂ ਨਾਮ ਪਟਿਵਿਜ੍ਝਿਸ੍ਸਨ੍ਤੀ’’ਤਿ? ਚਿਨ੍ਤਯਤੋ ਕਿਲੇਸਗਹਨਪਚ੍ਚਵੇਕ੍ਖਣਾਨੁਭਾਵੇਨਾਪਿ ਏਵਂ ਚਿਤ੍ਤਂ ਨਮਿ.

‘‘ਅਯਞ੍ਚ ਧਮ੍ਮੋ ਪਥਵੀਸਨ੍ਧਾਰਕਉਦਕਕ੍ਖਨ੍ਧੋ ਵਿਯ ਗਮ੍ਭੀਰੋ, ਪਬ੍ਬਤੇਨ ਪਟਿਚ੍ਛਾਦੇਤ੍ਵਾ ਠਪਿਤੋ ਸਾਸਪੋ ਵਿਯ ਦੁਦ੍ਦਸੋ, ਸਤਧਾ ਭਿਨ੍ਨਸ੍ਸ ਵਾਲਸ੍ਸ ਕੋਟਿਯਾ ਕੋਟਿਪਟਿਪਾਦਨਂ ਵਿਯ ਦੁਰਨੁਬੋਧੋ. ਨਨੁ ਮਯਾ ਹਿ ਇਮਂ ਧਮ੍ਮਂ ਪਟਿਵਿਜ੍ਝਿਤੁਂ ਵਾਯਮਨ੍ਤੇਨ ਅਦਿਨ੍ਨਂ ਦਾਨਂ ਨਾਮ ਨਤ੍ਥਿ, ਅਰਕ੍ਖਿਤਂ ਸੀਲਂ ਨਾਮ ਨਤ੍ਥਿ, ਅਪਰਿਪੂਰਿਤਾ ਕਾਚਿ ਪਾਰਮੀ ਨਾਮ ਨਤ੍ਥਿ, ਤਸ੍ਸ ਮੇ ਨਿਰੁਸ੍ਸਾਹਂ ਵਿਯ ਮਾਰਬਲਂ ਵਿਧਮਨ੍ਤਸ੍ਸਾਪਿ ਪਥਵੀ ਨ ਕਮ੍ਪਿਤ੍ਥ, ਪਠਮਯਾਮੇ ਪੁਬ੍ਬੇਨਿਵਾਸਂ ਅਨੁਸ੍ਸਰਨ੍ਤਸ੍ਸਾਪਿ ਨ ਕਮ੍ਪਿਤ੍ਥ, ਮਜ੍ਝਿਮਯਾਮੇ ਦਿਬ੍ਬਚਕ੍ਖੁਂ ਵਿਸੋਧੇਨ੍ਤਸ੍ਸਾਪਿ ਨ ਕਮ੍ਪਿਤ੍ਥ, ਪਚ੍ਛਿਮਯਾਮੇ ਪਨ ਪਟਿਚ੍ਚਸਮੁਪ੍ਪਾਦਂ ਪਟਿਵਿਜ੍ਝਨ੍ਤਸ੍ਸੇਵ ਮੇ ਦਸਸਹਸ੍ਸਿਲੋਕਧਾਤੁ ਕਮ੍ਪਿਤ੍ਥ. ਇਤਿ ਮਾਦਿਸੇਨਾਪਿ ਤਿਕ੍ਖਞਾਣੇਨ ਕਿਚ੍ਛੇਨੇਵਾਯਂ ਧਮ੍ਮੋ ਪਟਿਵਿਦ੍ਧੋ. ਤਂ ਲੋਕਿਯਮਹਾਜਨਾ ਕਥਂ ਪਟਿਵਿਜ੍ਝਿਸ੍ਸਨ੍ਤੀ’’ਤਿ? ਧਮ੍ਮਗਮ੍ਭੀਰਪਚ੍ਚਵੇਕ੍ਖਣਾਨੁਭਾਵੇਨਾਪਿ ਏਵਂ ਚਿਤ੍ਤਂ ਨਮੀਤਿ ਵੇਦਿਤਬ੍ਬਂ.

ਅਪਿਚ ਬ੍ਰਹ੍ਮੁਨਾ ਯਾਚਿਤੇ ਦੇਸੇਤੁਕਾਮਤਾਯਪਿਸ੍ਸ ਏਵਂ ਚਿਤ੍ਤਂ ਨਮਿ. ਜਾਨਾਤਿ ਹਿ ਭਗਵਾ – ‘‘ਮਮ ਅਪ੍ਪੋਸ੍ਸੁਕ੍ਕਤਾਯ ਚਿਤ੍ਤੇ ਨਮਮਾਨੇ ਮਂ ਮਹਾਬ੍ਰਹ੍ਮਾ ਧਮ੍ਮਦੇਸਨਂ ਯਾਚਿਸ੍ਸਤਿ, ਇਮੇ ਚ ਸਤ੍ਤਾ ਬ੍ਰਹ੍ਮਗਰੁਕਾ. ਤੇ ‘ਸਤ੍ਥਾ ਕਿਰ ਧਮ੍ਮਂ ਨ ਦੇਸੇਤੁਕਾਮੋ ਅਹੋਸਿ. ਅਥ ਨਂ ਮਹਾਬ੍ਰਹ੍ਮਾ ਯਾਚਿਤ੍ਵਾ ਦੇਸਾਪੇਸਿ. ਸਨ੍ਤੋ ਵਤ ਭੋ ਧਮ੍ਮੋ, ਪਣੀਤੋ ਵਤ ਭੋ ਧਮ੍ਮੋ’ਤਿ ਮਞ੍ਞਮਾਨਾ ਸੁਸ੍ਸੂਸਿਸ੍ਸਨ੍ਤੀ’’ਤਿ. ਇਦਮ੍ਪਿਸ੍ਸ ਕਾਰਣਂ ਪਟਿਚ੍ਚ ਅਪ੍ਪੋਸ੍ਸੁਕ੍ਕਤਾਯ ਚਿਤ੍ਤਂ ਨਮਿ, ਨੋ ਧਮ੍ਮਦੇਸਨਾਯਾਤਿ ਵੇਦਿਤਬ੍ਬਂ.

ਸਹਮ੍ਪਤਿਸ੍ਸਾਤਿ ਸੋ ਕਿਰ ਕਸ੍ਸਪਸ੍ਸ ਭਗਵਤੋ ਸਾਸਨੇ ਸਹਕੋ ਨਾਮ ਥੇਰੋ ਪਠਮਜ੍ਝਾਨਂ ਨਿਬ੍ਬਤ੍ਤੇਤ੍ਵਾ ਪਠਮਜ੍ਝਾਨਭੂਮਿਯਂ ਕਪ੍ਪਾਯੁਕਬ੍ਰਹ੍ਮਾ ਹੁਤ੍ਵਾ ਨਿਬ੍ਬਤ੍ਤੋ. ਤਤ੍ਰ ਨਂ ‘‘ਸਹਮ੍ਪਤਿਬ੍ਰਹ੍ਮਾ’’ਤਿ ਪਟਿਸਞ੍ਜਾਨਨ੍ਤਿ. ਤਂ ਸਨ੍ਧਾਯਾਹ ‘‘ਬ੍ਰਹ੍ਮੁਨੋ ਸਹਮ੍ਪਤਿਸ੍ਸਾ’’ਤਿ. ਨਸ੍ਸਤਿ ਵਤ ਭੋਤਿ ਸੋ ਕਿਰ ਇਮਂ ਸਦ੍ਦਂ ਤਥਾ ਨਿਚ੍ਛਾਰੇਸਿ, ਯਥਾ ਦਸਸਹਸ੍ਸਿਲੋਕਧਾਤੁਬ੍ਰਹ੍ਮਾਨੋ ਸੁਤ੍ਵਾ ਸਬ੍ਬੇ ਸਨ੍ਨਿਪਤਿਂਸੁ. ਯਤ੍ਰ ਹਿ ਨਾਮਾਤਿ ਯਸ੍ਮਿਂ ਨਾਮ ਲੋਕੇ. ਪੁਰਤੋ ਪਾਤੁਰਹੋਸੀਤਿ ਤੇਹਿ ਦਸਹਿ ਬ੍ਰਹ੍ਮਸਹਸ੍ਸੇਹਿ ਸਦ੍ਧਿਂ ਪਾਤੁਰਹੋਸਿ. ਅਪ੍ਪਰਜਕ੍ਖਜਾਤਿਕਾਤਿ ਪਞ੍ਞਾਮਯੇ ਅਕ੍ਖਿਮ੍ਹਿ ਅਪ੍ਪਂ ਪਰਿਤ੍ਤਂ ਰਾਗਦੋਸਮੋਹਰਜਂ ਏਤੇਸਂ ਏਵਂਸਭਾਵਾਤਿ ਅਪ੍ਪਰਜਕ੍ਖਜਾਤਿਕਾ. ਅਸ੍ਸਵਨਤਾਤਿ ਅਸ੍ਸਵਨਤਾਯ. ਭਵਿਸ੍ਸਨ੍ਤੀਤਿ ਪੁਰਿਮਬੁਦ੍ਧੇਸੁ ਦਸਪੁਞ੍ਞਕਿਰਿਯਵਸੇਨ ਕਤਾਧਿਕਾਰਾ ਪਰਿਪਾਕਗਤਾ ਪਦੁਮਾਨਿ ਵਿਯ ਸੂਰਿਯਰਸ੍ਮਿਸਮ੍ਫਸ੍ਸਂ, ਧਮ੍ਮਦੇਸਨਂਯੇਵ ਆਕਙ੍ਖਮਾਨਾ ਚਤੁਪ੍ਪਦਿਕਗਾਥਾਵਸਾਨੇ ਅਰਿਯਭੂਮਿਂ ਓਕ੍ਕਮਨਾਰਹਾ ਨ ਏਕੋ, ਨ ਦ੍ਵੇ, ਅਨੇਕਸਤਸਹਸ੍ਸਾ ਧਮ੍ਮਸ੍ਸ ਅਞ੍ਞਾਤਾਰੋ ਭਵਿਸ੍ਸਨ੍ਤੀਤਿ ਦਸ੍ਸੇਤਿ.

ਪਾਤੁਰਹੋਸੀਤਿ ਪਾਤੁਭਵਿ. ਸਮਲੇਹਿ ਚਿਨ੍ਤਿਤੋਤਿ ਸਮਲੇਹਿ ਛਹਿ ਸਤ੍ਥਾਰੇਹਿ ਚਿਨ੍ਤਿਤੋ. ਤੇ ਹਿ ਪੁਰੇਤਰਂ ਉਪ੍ਪਜ੍ਜਿਤ੍ਵਾ ਸਕਲਜਮ੍ਬੁਦੀਪੇ ਕਣ੍ਟਕੇ ਪਤ੍ਥਰਮਾਨਾ ਵਿਯ, ਵਿਸਂ ਸਿਞ੍ਚਮਾਨਾ ਵਿਯ ਚ ਸਮਲਂ ਮਿਚ੍ਛਾਦਿਟ੍ਠਿਧਮ੍ਮਂ ਦੇਸਯਿਂਸੁ. ਅਪਾਪੁਰੇਤਨ੍ਤਿ ਵਿਵਰਂ ਏਤਂ. ਅਮਤਸ੍ਸ ਦ੍ਵਾਰਨ੍ਤਿ ਅਮਤਸ੍ਸ ਨਿਬ੍ਬਾਨਸ੍ਸ ਦ੍ਵਾਰਭੂਤਂ ਅਰਿਯਮਗ੍ਗਂ. ਸੁਣਨ੍ਤੁ ਧਮ੍ਮਂ ਵਿਮਲੇਨਾਨੁਬੁਦ੍ਧਨ੍ਤਿ ਇਮੇ ਸਤ੍ਤਾ ਰਾਗਾਦਿਮਲਾਨਂ ਅਭਾਵਤੋ ਵਿਮਲੇਨ ਸਮ੍ਮਾਸਮ੍ਬੁਦ੍ਧੇਨ ਅਨੁਬੁਦ੍ਧਂ ਚਤੁਸਚ੍ਚਧਮ੍ਮਂ ਸੁਣਨ੍ਤੁ ਤਾਵ ਭਗਵਾਤਿ ਯਾਚਤਿ.

ਸੇਲੇ ਯਥਾ ਪਬ੍ਬਤਮੁਦ੍ਧਨਿਟ੍ਠਿਤੋਤਿ ਸੇਲਮਯੇ ਏਕਗ੍ਘਨੇ ਪਬ੍ਬਤਮੁਦ੍ਧਨਿ ਯਥਾਠਿਤੋਵ. ਨ ਹਿ ਤਸ੍ਸ ਠਿਤਸ੍ਸ ਦਸ੍ਸਨਤ੍ਥਂ ਗੀਵੁਕ੍ਖਿਪਨਪਸਾਰਣਾਦਿਕਿਚ੍ਚਂ ਅਤ੍ਥਿ. ਤਥੂਪਮਨ੍ਤਿ ਤਪ੍ਪਟਿਭਾਗਂ ਸੇਲਪਬ੍ਬਤੂਪਮਂ. ਅਯਂ ਪਨੇਤ੍ਥ ਸਙ੍ਖੇਪਤ੍ਥੋ – ਯਥਾ ਸੇਲਪਬ੍ਬਤਮੁਦ੍ਧਨਿ ਠਿਤੋਵ ਚਕ੍ਖੁਮਾ ਪੁਰਿਸੋ ਸਮਨ੍ਤਤੋ ਜਨਤਂ ਪਸ੍ਸੇਯ੍ਯ, ਤਥਾ ਤ੍ਵਮ੍ਪਿ ਸੁਮੇਧ ਸੁਨ੍ਦਰਪਞ੍ਞ ਸਬ੍ਬਞ੍ਞੁਤਞਾਣੇਨ ਸਮਨ੍ਤਚਕ੍ਖੁ ਭਗਵਾ ਧਮ੍ਮਮਯਂ ਪਾਸਾਦਮਾਰੁਯ੍ਹ ਸਯਂ ਅਪੇਤਸੋਕੋ ਸੋਕਾਵਤਿਣ੍ਣਂ ਜਾਤਿਜਰਾਭਿਭੂਤਂ ਜਨਤਂ ਅਵੇਕ੍ਖਸ੍ਸੁ ਉਪਧਾਰਯ ਉਪਪਰਿਕ੍ਖ. ਅਯਂ ਪਨੇਤ੍ਥ ਅਧਿਪ੍ਪਾਯੋ – ਯਥਾ ਹਿ ਪਬ੍ਬਤਪਾਦੇ ਸਮਨ੍ਤਾ ਮਹਨ੍ਤਂ ਖੇਤ੍ਤਂ ਕਤ੍ਵਾ, ਤਤ੍ਥ ਕੇਦਾਰਪਾਲ਼ੀਸੁ ਕੁਟਿਕਾਯੋ ਕਤ੍ਵਾ ਰਤ੍ਤਿਂ ਅਗ੍ਗਿਂ ਜਾਲੇਯ੍ਯੁਂ, ਚਤੁਰਙ੍ਗਸਮਨ੍ਨਾਗਤਞ੍ਚ ਅਨ੍ਧਕਾਰਂ ਅਸ੍ਸ, ਅਥ ਤਸ੍ਸ ਪਬ੍ਬਤਸ੍ਸ ਮਤ੍ਥਕੇ ਠਤ੍ਵਾ ਚਕ੍ਖੁਮਤੋ ਪੁਰਿਸਸ੍ਸ ਭੂਮਿਂ ਓਲੋਕਯਤੋ ਨੇਵ ਖੇਤ੍ਤਂ ਨ ਕੇਦਾਰਪਾਲ਼ਿਯੋ ਨ ਕੁਟਿਯੋ ਨ ਤਤ੍ਥ ਸਯਿਤਮਨੁਸ੍ਸਾ ਪਞ੍ਞਾਯੇਯ੍ਯੁਂ. ਕੁਟਿਕਾਸੁ ਪਨ ਅਗ੍ਗਿਜਾਲਾਮਤ੍ਤਕਮੇਵ ਪਞ੍ਞਾਯੇਯ੍ਯ, ਏਵਂ ਧਮ੍ਮਪਾਸਾਦਂ ਆਰੁਯ੍ਹ ਸਤ੍ਤਨਿਕਾਯਂ ਓਲੋਕਯਤੋ ਤਥਾਗਤਸ੍ਸ ਯੇ ਤੇ ਅਕਤਕਲ੍ਯਾਣਾ ਸਤ੍ਤਾ, ਤੇ ਏਕਵਿਹਾਰੇ ਦਕ੍ਖਿਣਜਾਣੁਪਸ੍ਸੇ ਨਿਸਿਨ੍ਨਾਪਿ ਬੁਦ੍ਧਚਕ੍ਖੁਸ੍ਸ ਆਪਾਥਂ ਨਾਗਚ੍ਛਨ੍ਤਿ, ਰਤ੍ਤਿਂ ਖਿਤ੍ਤਾ ਸਰਾ ਵਿਯ ਹੋਨ੍ਤਿ. ਯੇ ਪਨ ਕਤਕਲ੍ਯਾਣਾ ਵੇਨੇਯ੍ਯਪੁਗ੍ਗਲਾ, ਤੇ ਏਵਸ੍ਸ ਦੂਰੇਪਿ ਠਿਤਾ ਆਪਾਥਂ ਆਗਚ੍ਛਨ੍ਤਿ ਸੋ ਅਗ੍ਗਿ ਵਿਯ ਹਿਮਵਨ੍ਤਪਬ੍ਬਤੋ ਵਿਯ ਚ. ਵੁਤ੍ਤਮ੍ਪਿ ਚੇਤਂ –

‘‘ਦੂਰੇ ਸਨ੍ਤੋ ਪਕਾਸੇਨ੍ਤਿ, ਹਿਮਵਨ੍ਤੋਵ ਪਬ੍ਬਤੋ;

ਅਸਨ੍ਤੇਤ੍ਥ ਨ ਦਿਸ੍ਸਨ੍ਤਿ, ਰਤ੍ਤਿਂ ਖਿਤ੍ਤਾ ਯਥਾ ਸਰਾ’’ਤਿ. (ਧ. ਪ. ੩੦੪);

ਅਜ੍ਝੇਸਨਨ੍ਤਿ ਯਾਚਨਂ. ਬੁਦ੍ਧਚਕ੍ਖੁਨਾਤਿ ਇਨ੍ਦ੍ਰਿਯਪਰੋਪਰਿਯਤ੍ਤਞਾਣੇਨ ਚ ਆਸਯਾਨੁਸਯਞਾਣੇਨ ਚ. ਇਮੇਸਂ ਹਿ ਦ੍ਵਿਨ੍ਨਂ ਞਾਣਾਨਂ ‘‘ਬੁਦ੍ਧਚਕ੍ਖੂ’’ਤਿ ਨਾਮਂ, ਸਬ੍ਬਞ੍ਞੁਤਞ੍ਞਾਣਸ੍ਸ ‘‘ਸਮਨ੍ਤਚਕ੍ਖੂ’’ਤਿ, ਤਿਣ੍ਣਂ ਮਗ੍ਗਞਾਣਾਨਂ ‘‘ਧਮ੍ਮਚਕ੍ਖੂ’’ਤਿ. ਅਪ੍ਪਰਜਕ੍ਖੇਤਿਆਦੀਸੁ ਯੇਸਂ ਵੁਤ੍ਤਨਯੇਨੇਵ ਪਞ੍ਞਾਚਕ੍ਖੁਮ੍ਹਿ ਰਾਗਾਦਿਰਜਂ ਅਪ੍ਪਂ, ਤੇ ਅਪ੍ਪਰਜਕ੍ਖਾ. ਯੇਸਂ ਤਂ ਮਹਨ੍ਤਂ, ਤੇ ਮਹਾਰਜਕ੍ਖਾ. ਯੇਸਂ ਸਦ੍ਧਾਦੀਨਿ ਇਨ੍ਦ੍ਰਿਯਾਨਿ ਤਿਕ੍ਖਾਨਿ, ਤੇ ਤਿਕ੍ਖਿਨ੍ਦ੍ਰਿਯਾ. ਯੇਸਂ ਤਾਨਿ ਮੁਦੂਨਿ, ਤੇ ਮੁਦਿਨ੍ਦ੍ਰਿਯਾ. ਯੇਸਂ ਤੇਯੇਵ ਸਦ੍ਧਾਦਯੋ ਆਕਾਰਾ ਸੁਨ੍ਦਰਾ, ਤੇ ਸ੍ਵਾਕਾਰਾ. ਯੇ ਕਥਿਤਕਾਰਣਂ ਸਲ੍ਲਕ੍ਖੇਨ੍ਤਿ, ਸੁਖੇਨ ਸਕ੍ਕਾ ਹੋਨ੍ਤਿ ਵਿਞ੍ਞਾਪੇਤੁਂ, ਤੇ ਸੁਵਿਞ੍ਞਾਪਯਾ. ਯੇ ਪਰਲੋਕਞ੍ਚੇਵ ਵਜ੍ਜਞ੍ਚ ਭਯਤੋ ਪਸ੍ਸਨ੍ਤਿ, ਤੇ ਪਰਲੋਕਵਜ੍ਜਭਯਦਸ੍ਸਾਵਿਨੋ ਨਾਮ.

ਅਯਂ ਪਨੇਤ੍ਥ ਪਾਲ਼ਿ – ‘‘ਸਦ੍ਧੋ ਪੁਗ੍ਗਲੋ ਅਪ੍ਪਰਜਕ੍ਖੋ, ਅਸ੍ਸਦ੍ਧੋ ਪੁਗ੍ਗਲੋ ਮਹਾਰਜਕ੍ਖੋ. ਆਰਦ੍ਧਵੀਰਿਯੋ, ਕੁਸੀਤੋ. ਉਪਟ੍ਠਿਤਸ੍ਸਤਿ, ਮੁਟ੍ਠਸ੍ਸਤਿ. ਸਮਾਹਿਤੋ, ਅਸਮਾਹਿਤੋ. ਪਞ੍ਞਵਾ, ਦੁਪ੍ਪਞ੍ਞੋ ਪੁਗ੍ਗਲੋ ਮਹਾਰਜਕ੍ਖੋ. ਤਥਾ ਸਦ੍ਧੋ ਪੁਗ੍ਗਲੋ ਤਿਕ੍ਖਿਨ੍ਦ੍ਰਿਯੋ…ਪੇ… ਪਞ੍ਞਵਾ ਪੁਗ੍ਗਲੋ ਪਰਲੋਕਵਜ੍ਜਭਯਦਸ੍ਸਾਵੀ, ਦੁਪ੍ਪਞ੍ਞੋ ਪੁਗ੍ਗਲੋ ਨ ਪਰਲੋਕਵਜ੍ਜਭਯਦਸ੍ਸਾਵੀ. ਲੋਕੋਤਿ ਖਨ੍ਧਲੋਕੋ, ਆਯਤਨਲੋਕੋ, ਧਾਤੁਲੋਕੋ, ਸਮ੍ਪਤ੍ਤਿਭਵਲੋਕੋ, ਸਮ੍ਪਤ੍ਤਿਸਮ੍ਭਵਲੋਕੋ, ਵਿਪਤ੍ਤਿਭਵਲੋਕੋ, ਵਿਪਤ੍ਤਿਸਮ੍ਭਵਲੋਕੋ. ਏਕੋ ਲੋਕੋ ਸਬ੍ਬੇ ਸਤ੍ਤਾ ਆਹਾਰਟ੍ਠਿਤਿਕਾ. ਦ੍ਵੇ ਲੋਕਾ ਨਾਮਞ੍ਚ ਰੂਪਞ੍ਚ. ਤਯੋ ਲੋਕਾ ਤਿਸ੍ਸੋ ਵੇਦਨਾ. ਚਤ੍ਤਾਰੋ ਲੋਕਾ ਚਤ੍ਤਾਰੋ ਆਹਾਰਾ. ਪਞ੍ਚ ਲੋਕਾ ਪਞ੍ਚੁਪਾਦਾਨਕ੍ਖਨ੍ਧਾ. ਛ ਲੋਕਾ ਛ ਅਜ੍ਝਤ੍ਤਿਕਾਨਿ ਆਯਤਨਾਨਿ. ਸਤ੍ਤ ਲੋਕਾ ਸਤ੍ਤ ਵਿਞ੍ਞਾਣਟ੍ਠਿਤਿਯੋ. ਅਟ੍ਠ ਲੋਕਾ ਅਟ੍ਠ ਲੋਕਧਮ੍ਮਾ. ਨਵ ਲੋਕਾ ਨਵ ਸਤ੍ਤਾਵਾਸਾ. ਦਸ ਲੋਕਾ ਦਸਾਯਤਨਾਨਿ. ਦ੍ਵਾਦਸ ਲੋਕਾ ਦ੍ਵਾਦਸਾਯਤਨਾਨਿ. ਅਟ੍ਠਾਰਸ ਲੋਕਾ ਅਟ੍ਠਾਰਸ ਧਾਤੁਯੋ. ਵਜ੍ਜਨ੍ਤਿ ਸਬ੍ਬੇ ਕਿਲੇਸਾ ਵਜ੍ਜਾ, ਸਬ੍ਬੇ ਦੁਚ੍ਚਰਿਤਾ ਵਜ੍ਜਾ, ਸਬ੍ਬੇ ਅਭਿਸਙ੍ਖਾਰਾ ਵਜ੍ਜਾ, ਸਬ੍ਬੇ ਭਵਗਾਮਿਕਮ੍ਮਾ ਵਜ੍ਜਾ, ਇਤਿ ਇਮਸ੍ਮਿਞ੍ਚ ਲੋਕੇ ਇਮਸ੍ਮਿਞ੍ਚ ਵਜ੍ਜੇ ਤਿਬ੍ਬਾ ਭਯਸਞ੍ਞਾ ਪਚ੍ਚੁਪਟ੍ਠਿਤਾ ਹੋਤਿ, ਸੇਯ੍ਯਥਾਪਿ ਉਕ੍ਖਿਤ੍ਤਾਸਿਕੇ ਵਧਕੇ. ਇਮੇਹਿ ਪਞ੍ਞਾਸਾਯ ਆਕਾਰੇਹਿ ਇਮਾਨਿ ਪਞ੍ਚਿਨ੍ਦ੍ਰਿਯਾਨਿ ਜਾਨਾਤਿ ਪਸ੍ਸਤਿ ਅਞ੍ਞਾਸਿ ਪਟਿਵਿਜ੍ਝਿ. ਇਦਂ ਤਥਾਗਤਸ੍ਸ ਇਨ੍ਦ੍ਰਿਯਪਰੋਪਰਿਯਤ੍ਤੇ ਞਾਣ’’ਨ੍ਤਿ (ਪਟਿ. ਮ. ੧.੧੧੨).

ਉਪ੍ਪਲਿਨਿਯਨ੍ਤਿ ਉਪ੍ਪਲਵਨੇ. ਇਤਰੇਸੁਪਿ ਏਸੇਵ ਨਯੋ. ਅਨ੍ਤੋਨਿਮੁਗ੍ਗਪੋਸੀਨੀਤਿ ਯਾਨਿ ਅਨ੍ਤੋ ਨਿਮੁਗ੍ਗਾਨੇਵ ਪੋਸਿਯਨ੍ਤਿ. ਉਦਕਂ ਅਚ੍ਚੁਗ੍ਗਮ੍ਮ ਠਿਤਾਨੀ ਤਿ ਉਦਕਂ ਅਤਿਕ੍ਕਮਿਤ੍ਵਾ ਠਿਤਾਨਿ. ਤਤ੍ਥ ਯਾਨਿ ਅਚ੍ਚੁਗ੍ਗਮ੍ਮ ਠਿਤਾਨਿ, ਤਾਨਿ ਸੂਰਿਯਰਸ੍ਮਿਸਮ੍ਫਸ੍ਸਂ ਆਗਮਯਮਾਨਾਨਿ ਠਿਤਾਨਿ ਅਜ੍ਜ ਪੁਪ੍ਫਨਕਾਨਿ. ਯਾਨਿ ਪਨ ਸਮੋਦਕਂ ਠਿਤਾਨਿ, ਤਾਨਿ ਸ੍ਵੇ ਪੁਪ੍ਫਨਕਾਨਿ. ਯਾਨਿ ਉਦਕਾਨੁਗ੍ਗਤਾਨਿ ਅਨ੍ਤੋਨਿਮੁਗ੍ਗਪੋਸੀਨਿ, ਤਾਨਿ ਤਤਿਯਦਿਵਸੇ ਪੁਪ੍ਫਨਕਾਨਿ. ਉਦਕਾ ਪਨ ਅਨੁਗ੍ਗਤਾਨਿ ਅਞ੍ਞਾਨਿਪਿ ਸਰੋਗਉਪ੍ਪਲਾਦੀਨਿ ਨਾਮ ਅਤ੍ਥਿ, ਯਾਨਿ ਨੇਵ ਪੁਪ੍ਫਿਸ੍ਸਨ੍ਤਿ, ਮਚ੍ਛਕਚ੍ਛਪਭਕ੍ਖਾਨੇਵ ਭਵਿਸ੍ਸਨ੍ਤਿ, ਤਾਨਿ ਪਾਲ਼ਿਂ ਨਾਰੁਲ਼੍ਹਾਨਿ. ਆਹਰਿਤ੍ਵਾ ਪਨ ਦੀਪੇਤਬ੍ਬਾਨੀਤਿ ਦੀਪਿਤਾਨਿ. ਯਥੇਵ ਹਿ ਤਾਨਿ ਚਤੁਬ੍ਬਿਧਾਨਿ ਪੁਪ੍ਫਾਨਿ, ਏਵਮੇਵਂ ਉਗ੍ਘਟਿਤਞ੍ਞੂ ਵਿਪਞ੍ਚਿਤਞ੍ਞੂ ਨੇਯ੍ਯੋ ਪਦਪਰਮੋਤਿ ਚਤ੍ਤਾਰੋ ਪੁਗ੍ਗਲਾ.

ਤਤ੍ਥ ‘‘ਯਸ੍ਸ ਪੁਗ੍ਗਲਸ੍ਸ ਸਹ ਉਦਾਹਟਵੇਲਾਯ ਧਮ੍ਮਾਭਿਸਮਯੋ ਹੋਤਿ, ਅਯਂ ਵੁਚ੍ਚਤਿ ਪੁਗ੍ਗਲੋ ਉਗ੍ਘਟਿਤਞ੍ਞੂ. ਯਸ੍ਸ ਪੁਗ੍ਗਲਸ੍ਸ ਸਂਖਿਤ੍ਤੇਨ ਭਾਸਿਤਸ੍ਸ ਵਿਤ੍ਥਾਰੇਨ ਅਤ੍ਥੇ ਵਿਭਜਿਯਮਾਨੇ ਧਮ੍ਮਾਭਿਸਮਯੋ ਹੋਤਿ, ਅਯਂ ਵੁਚ੍ਚਤਿ ਪੁਗ੍ਗਲੋ ਵਿਪਞ੍ਚਿਤਞ੍ਞੂ. ਯਸ੍ਸ ਪੁਗ੍ਗਲਸ੍ਸ ਉਦ੍ਦੇਸਤੋ ਪਰਿਪੁਚ੍ਛਤੋ ਯੋਨਿਸੋ ਮਨਸਿਕਰੋਤੋ ਕਲ੍ਯਾਣਮਿਤ੍ਤੇ ਸੇਵਤੋ ਭਜਤੋ ਪਯਿਰੁਪਾਸਤੋ ਅਨੁਪੁਬ੍ਬੇਨ ਧਮ੍ਮਾਭਿਸਮਯੋ ਹੋਤਿ, ਅਯਂ ਵੁਚ੍ਚਤਿ ਪੁਗ੍ਗਲੋ ਨੇਯ੍ਯੋ. ਯਸ੍ਸ ਪੁਗ੍ਗਲਸ੍ਸ ਬਹੁਮ੍ਪਿ ਸੁਣਤੋ ਬਹੁਮ੍ਪਿ ਭਣਤੋ ਬਹੁਮ੍ਪਿ ਧਾਰਯਤੋ ਬਹੁਮ੍ਪਿ ਵਾਚਯਤੋ ਨ ਤਾਯ ਜਾਤਿਯਾ ਧਮ੍ਮਾਭਿਸਮਯੋ ਹੋਤਿ, ਅਯਂ ਵੁਚ੍ਚਤਿ ਪੁਗ੍ਗਲੋ ਪਦਪਰਮੋ (ਪੁ. ਪ. ੧੪੮-੧੫੧). ਤਤ੍ਥ ਭਗਵਾ ਉਪ੍ਪਲਵਨਾਦਿਸਦਿਸਂ ਦਸਸਹਸ੍ਸਿਲੋਕਧਾਤੁਂ ਓਲੋਕੇਨ੍ਤੋ – ‘‘ਅਜ੍ਜ ਪੁਪ੍ਫਨਕਾਨਿ ਵਿਯ ਉਗ੍ਘਟਿਤਞ੍ਞੂ, ਸ੍ਵੇ ਪੁਪ੍ਫਨਕਾਨਿ ਵਿਯ ਵਿਪਞ੍ਚਿਤਞ੍ਞੂ, ਤਤਿਯਦਿਵਸੇ ਪੁਪ੍ਫਨਕਾਨਿ ਵਿਯ ਨੇਯ੍ਯੋ, ਮਚ੍ਛਕਚ੍ਛਪਭਕ੍ਖਾਨਿ ਪੁਪ੍ਫਾਨਿ ਵਿਯ ਪਦਪਰਮੋ’’ਤਿ ਅਦ੍ਦਸ੍ਸ. ਪਸ੍ਸਨ੍ਤੋ ਚ ‘‘ਏਤ੍ਤਕਾ ਅਪ੍ਪਰਜਕ੍ਖਾ, ਏਤ੍ਤਕਾ ਮਹਾਰਜਕ੍ਖਾ, ਤਤ੍ਰਾਪਿ ਏਤ੍ਤਕਾ ਉਗ੍ਘਟਿਤਞ੍ਞੂ’’ਤਿ ਏਵਂ ਸਬ੍ਬਾਕਾਰਤੋਵ ਅਦ੍ਦਸ.

ਤਤ੍ਥ ਤਿਣ੍ਣਂ ਪੁਗ੍ਗਲਾਨਂ ਇਮਸ੍ਮਿਂਯੇਵ ਅਤ੍ਤਭਾਵੇ ਭਗਵਤੋ ਧਮ੍ਮਦੇਸਨਾ ਅਤ੍ਥਂ ਸਾਧੇਤਿ. ਪਦਪਰਮਾਨਂ ਅਨਾਗਤਤ੍ਥਾਯ ਵਾਸਨਾ ਹੋਤਿ. ਅਥ ਭਗਵਾ ਇਮੇਸਂ ਚਤੁਨ੍ਨਂ ਪੁਗ੍ਗਲਾਨਂ ਅਤ੍ਥਾਵਹਂ ਧਮ੍ਮਦੇਸਨਂ ਵਿਦਿਤ੍ਵਾ ਦੇਸੇਤੁਕਮ੍ਯਤਂ ਉਪ੍ਪਾਦੇਤ੍ਵਾ ਪੁਨ ਸਬ੍ਬੇਪਿ ਤੀਸੁ ਭਵੇਸੁ ਸਤ੍ਤੇ ਭਬ੍ਬਾਭਬ੍ਬਵਸੇਨ ਦ੍ਵੇ ਕੋਟ੍ਠਾਸੇ ਅਕਾਸਿ. ਯੇ ਸਨ੍ਧਾਯ ਵੁਤ੍ਤਂ – ‘‘ਕਤਮੇ ਸਤ੍ਤਾ ਅਭਬ੍ਬਾ? ਯੇ ਤੇ ਸਤ੍ਤਾ ਕਮ੍ਮਾਵਰਣੇਨ ਸਮਨ੍ਨਾਗਤਾ ਕਿਲੇਸਾਵਰਣੇਨ ਸਮਨ੍ਨਾਗਤਾ ਵਿਪਾਕਾਵਰਣੇਨ ਸਮਨ੍ਨਾਗਤਾ ਅਸ੍ਸਦ੍ਧਾ ਅਚ੍ਛਨ੍ਦਿਕਾ ਦੁਪ੍ਪਞ੍ਞਾ ਅਭਬ੍ਬਾ ਨਿਯਾਮਂ ਓਕ੍ਕਮਿਤੁਂ ਕੁਸਲੇਸੁ ਧਮ੍ਮੇਸੁ ਸਮ੍ਮਤ੍ਤਂ, ਇਮੇ ਤੇ ਸਤ੍ਤਾ ਅਭਬ੍ਬਾ. ਕਤਮੇ ਸਤ੍ਤਾ ਭਬ੍ਬਾ? ਯੇ ਤੇ ਸਤ੍ਤਾ ਨ ਕਮ੍ਮਾਵਰਣੇਨ…ਪੇ… ਇਮੇ ਤੇ ਸਤ੍ਤਾ ਭਬ੍ਬਾ’’ਤਿ (ਵਿਭ. ੮੨੭; ਪਟਿ. ਮ. ੧.੧੧੫). ਤਤ੍ਥ ਸਬ੍ਬੇਪਿ ਅਭਬ੍ਬਪੁਗ੍ਗਲੇ ਪਹਾਯ ਭਬ੍ਬਪੁਗ੍ਗਲੇਯੇਵ ਞਾਣੇਨ ਪਰਿਗ੍ਗਹੇਤ੍ਵਾ, ‘‘ਏਤ੍ਤਕਾ ਰਾਗਚਰਿਤਾ ਏਤ੍ਤਕਾ ਦੋਸ-ਮੋਹਚਰਿਤਾ ਵਿਤਕ੍ਕ-ਸਦ੍ਧਾ-ਬੁਦ੍ਧਿਚਰਿਤਾ’’ਤਿ ਛ ਕੋਟ੍ਠਾਸੇ ਅਕਾਸਿ. ਏਵਂ ਕਤ੍ਵਾ ਧਮ੍ਮਂ ਦੇਸੇਸ੍ਸਾਮੀਤਿ ਚਿਨ੍ਤੇਸਿ.

ਪਚ੍ਚਭਾਸੀਤਿ ਪਤਿਅਭਾਸਿ. ਅਪਾਰੁਤਾਤਿ ਵਿਵਟਾ. ਅਮਤਸ੍ਸ ਦ੍ਵਾਰਾਤਿ ਅਰਿਯਮਗ੍ਗੋ. ਸੋ ਹਿ ਅਮਤਸਙ੍ਖਾਤਸ੍ਸ ਨਿਬ੍ਬਾਨਸ੍ਸ ਦ੍ਵਾਰਂ, ਸੋ ਮਯਾ ਵਿਵਰਿਤ੍ਵਾ ਠਪਿਤੋਤਿ ਦਸ੍ਸੇਤਿ. ਪਮੁਞ੍ਚਨ੍ਤੁ ਸਦ੍ਧਨ੍ਤਿ ਸਬ੍ਬੇ ਅਤ੍ਤਨੋ ਸਦ੍ਧਂ ਪਮੁਞ੍ਚਨ੍ਤੁ ਵਿਸ੍ਸਜ੍ਜੇਨ੍ਤੁ. ਪਚ੍ਛਿਮਪਦਦ੍ਵਯੇ ਅਯਮਤ੍ਥੋ – ਅਹਞ੍ਹਿ ਅਤ੍ਤਨੋ ਪਗੁਣਂ ਸੁਪ੍ਪਵਤ੍ਤਿਤਮ੍ਪਿ ਇਮਂ ਪਣੀਤਂ ਉਤ੍ਤਮਂ ਧਮ੍ਮਂ ਕਾਯਵਾਚਾਕਿਲਮਥਸਞ੍ਞੀ ਹੁਤ੍ਵਾ ਨ ਭਾਸਿਂ. ਇਦਾਨਿ ਪਨ ਸਬ੍ਬੋ ਜਨੋ ਸਦ੍ਧਾਭਾਜਨਂ ਉਪਨੇਤੁ, ਪੂਰੇਸ੍ਸਾਮਿ ਤੇਸਂ ਸਙ੍ਕਪ੍ਪਨ੍ਤਿ.

ਅਨ੍ਤਰਧਾਯੀਤਿ ਸਤ੍ਥਾਰਂ ਗਨ੍ਧਮਾਲਾਦੀਹਿ ਪੂਜੇਤ੍ਵਾ ਅਨ੍ਤਰਹਿਤੋ, ਸਕਟ੍ਠਾਨਮੇਵ ਗਤੋਤਿ ਅਤ੍ਥੋ. ਗਤੇ ਚ ਪਨ ਤਸ੍ਮਿਂ ਭਗਵਾ ‘‘ਕਸ੍ਸ ਨੁ ਖੋ ਅਹਂ ਪਠਮਂ ਧਮ੍ਮਂ ਦੇਸੇਯ੍ਯ’’ਨ੍ਤਿ? ਆਲ਼ਾਰੁਦਕਾਨਂ ਕਾਲਙ੍ਕਤਭਾਵਂ, ਪਞ੍ਚਵਗ੍ਗਿਯਾਨਞ੍ਚ ਬਹੂਪਕਾਰਭਾਵਂ ਞਤ੍ਵਾ ਤੇਸਂ ਧਮ੍ਮਂ ਦੇਸੇਤੁਕਾਮੋ ਬਾਰਾਣਸਿਯਂ ਇਸਿਪਤਨਂ ਗਨ੍ਤ੍ਵਾ ਧਮ੍ਮਚਕ੍ਕਂ ਪਵਤ੍ਤੇਸੀਤਿ. ਪਠਮਂ.

੨. ਗਾਰਵਸੁਤ੍ਤਵਣ੍ਣਨਾ

੧੭੩. ਦੁਤਿਯੇ ਉਦਪਾਦੀਤਿ ਅਯਂ ਵਿਤਕ੍ਕੋ ਪਞ੍ਚਮੇ ਸਤ੍ਤਾਹੇ ਉਦਪਾਦਿ. ਅਗਾਰਵੋਤਿ ਅਞ੍ਞਸ੍ਮਿਂ ਗਾਰਵਰਹਿਤੋ, ਕਞ੍ਚਿ ਗਰੁਟ੍ਠਾਨੇ ਅਟ੍ਠਪੇਤ੍ਵਾਤਿ ਅਤ੍ਥੋ. ਅਪ੍ਪਤਿਸ੍ਸੋਤਿ ਪਤਿਸ੍ਸਯਰਹਿਤੋ, ਕਞ੍ਚਿ ਜੇਟ੍ਠਕਟ੍ਠਾਨੇ ਅਟ੍ਠਪੇਤ੍ਵਾਤਿ ਅਤ੍ਥੋ.

ਸਦੇਵਕੇਤਿਆਦੀਸੁ ਸਦ੍ਧਿਂ ਦੇਵੇਹਿ ਸਦੇਵਕੇ. ਦੇਵਗ੍ਗਹਣੇਨ ਚੇਤ੍ਥ ਮਾਰਬ੍ਰਹ੍ਮੇਸੁ ਗਹਿਤੇਸੁਪਿ ਮਾਰੋ ਨਾਮ ਵਸਵਤ੍ਤੀ ਸਬ੍ਬੇਸਂ ਉਪਰਿ ਵਸਂ ਵਤ੍ਤੇਤਿ, ਬ੍ਰਹ੍ਮਾ ਨਾਮ ਮਹਾਨੁਭਾਵੋ ਏਕਙ੍ਗੁਲਿਯਾ ਏਕਸ੍ਮਿਂ ਚਕ੍ਕਵਾਲ਼ਸਹਸ੍ਸੇ ਆਲੋਕਂ ਫਰਤਿ. ਦ੍ਵੀਹਿ ਦ੍ਵੀਸੁ…ਪੇ… ਦਸਹਿ ਅਙ੍ਗੁਲੀਹਿ ਦਸਸੁਪਿ ਚਕ੍ਕਵਾਲ਼ਸਹਸ੍ਸੇਸੁ ਆਲੋਕਂ ਫਰਤਿ, ਸੋ ਇਮਿਨਾ ਸੀਲਸਮ੍ਪਨ੍ਨਤਰੋਤਿ ਵਤ੍ਤੁਂ ਮਾ ਲਭਤੂਤਿ ਸਮਾਰਕੇ ਸਬ੍ਰਹ੍ਮਕੇਤਿ ਵਿਸੁਂ ਵੁਤ੍ਤਂ. ਤਥਾ ਸਮਣਾ ਨਾਮ ਏਕਨਿਕਾਯਾਦਿਵਸੇਨ ਬਹੁਸ੍ਸੁਤਾ ਸੀਲਵਨ੍ਤੋ ਪਣ੍ਡਿਤਾ, ਬ੍ਰਾਹ੍ਮਣਾਪਿ ਵਤ੍ਥੁਵਿਜ੍ਜਾਦਿਵਸੇਨ ਬਹੁਸ੍ਸੁਤਾ ਪਣ੍ਡਿਤਾ, ਤੇ ਇਮਿਨਾ ਸੀਲਸਮ੍ਪਨ੍ਨਤਰਾਤਿ ਵਤ੍ਤੁਂ ਮਾ ਲਭਨ੍ਤੂਤਿ ਸਸ੍ਸਮਣਬ੍ਰਾਹ੍ਮਣਿਯਾ ਪਜਾਯਾਤਿ ਵੁਤ੍ਤਂ. ਸਦੇਵਮਨੁਸ੍ਸਾਯਾਤਿ ਇਦਂ ਪਨ ਨਿਪ੍ਪਦੇਸਤੋ ਦਸ੍ਸਨਤ੍ਥਂ ਗਹਿਤਮੇਵ ਗਹੇਤ੍ਵਾ ਵੁਤ੍ਤਂ. ਅਪਿਚੇਤ੍ਥ ਪੁਰਿਮਾਨਿ ਤੀਣਿ ਪਦਾਨਿ ਲੋਕਵਸੇਨ ਵੁਤ੍ਤਾਨਿ, ਪਚ੍ਛਿਮਾਨਿ ਦ੍ਵੇ ਪਜਾਵਸੇਨ. ਸੀਲਸਮ੍ਪਨ੍ਨਤਰਨ੍ਤਿ ਸੀਲੇਨ ਸਮ੍ਪਨ੍ਨਤਰਂ, ਅਧਿਕਤਰਨ੍ਤਿ ਅਤ੍ਥੋ. ਸੇਸੇਸੁਪਿ ਏਸੇਵ ਨਯੋ. ਏਤ੍ਥ ਚ ਸੀਲਾਦਯੋ ਚਤ੍ਤਾਰੋ ਧਮ੍ਮਾ ਲੋਕਿਯਲੋਕੁਤ੍ਤਰਾ ਕਥਿਤਾ, ਵਿਮੁਤ੍ਤਿਞਾਣਦਸ੍ਸਨਂ ਲੋਕਿਯਮੇਵ. ਪਚ੍ਚਵੇਕ੍ਖਣਞਾਣਂ ਹੇਤਂ.

ਪਾਤੁਰਹੋਸੀਤਿ – ‘‘ਅਯਂ ਸਤ੍ਥਾ ਅਵੀਚਿਤੋ ਯਾਵ ਭਵਗ੍ਗਾ ਸੀਲਾਦੀਹਿ ਅਤ੍ਤਨਾ ਅਧਿਕਤਰਂ ਅਪਸ੍ਸਨ੍ਤੋ ‘ਮਯਾ ਪਟਿਵਿਦ੍ਧਂ ਨਵਲੋਕੁਤ੍ਤਰਧਮ੍ਮਮੇਵ ਸਕ੍ਕਤ੍ਵਾ ਗਰੁਂ ਕਤ੍ਵਾ ਉਪਨਿਸ੍ਸਾਯ ਵਿਹਰਿਸ੍ਸਾਮੀ’ਤਿ ਚਿਨ੍ਤੇਤਿ, ਕਾਰਣਂ ਭਗਵਾ ਚਿਨ੍ਤੇਤਿ, ਅਤ੍ਥਂ ਵੁਡ੍ਢਿਵਿਸੇਸਂ ਚਿਨ੍ਤੇਤਿ, ਗਚ੍ਛਾਮਿਸ੍ਸ ਉਸ੍ਸਾਹਂ ਜਨੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਪੁਰਤੋ ਪਾਕਟੋ ਅਹੋਸਿ, ਅਭਿਮੁਖੇ ਅਟ੍ਠਾਸੀਤਿ ਅਤ੍ਥੋ.

ਵਿਹਰਨ੍ਤਿ ਚਾਤਿ ਏਤ੍ਥ ਯੋ ਵਦੇਯ੍ਯ ‘‘ਵਿਹਰਨ੍ਤੀਤਿ ਵਚਨਤੋ ਪਚ੍ਚੁਪ੍ਪਨ੍ਨੇਪਿ ਬਹੂ ਬੁਦ੍ਧਾ’’ਤਿ, ਸੋ ‘‘ਭਗਵਾਪਿ, ਭਨ੍ਤੇ, ਏਤਰਹਿ ਅਰਹਂ ਸਮ੍ਮਾਸਮ੍ਬੁਦ੍ਧੋ’’ਤਿ ਇਮਿਨਾ ਵਚਨੇਨ ਪਟਿਬਾਹਿਤਬ੍ਬੋ.

‘‘ਨ ਮੇ ਆਚਰਿਯੋ ਅਤ੍ਥਿ, ਸਦਿਸੋ ਮੇ ਨ ਵਿਜ੍ਜਤਿ;

ਸਦੇਵਕਸ੍ਮਿਂ ਲੋਕਸ੍ਮਿਂ, ਨਤ੍ਥਿ ਮੇ ਪਟਿਪੁਗ੍ਗਲੋ’’ਤਿ. (ਮਹਾਵ. ੧੧; ਮ. ਨਿ. ੧.੨੮੫) –

ਆਦੀਹਿ ਚਸ੍ਸ ਸੁਤ੍ਤੇਹਿ ਅਞ੍ਞੇਸਂ ਬੁਦ੍ਧਾਨਂ ਅਭਾਵੋ ਦੀਪੇਤਬ੍ਬੋ. ਤਸ੍ਮਾਤਿ ਯਸ੍ਮਾ ਸਬ੍ਬੇਪਿ ਬੁਦ੍ਧਾ ਸਦ੍ਧਮ੍ਮਗਰੁਨੋ, ਤਸ੍ਮਾ. ਮਹਤ੍ਤਮਭਿਕਙ੍ਖਤਾਤਿ ਮਹਨ੍ਤਭਾਵਂ ਪਤ੍ਥਯਮਾਨੇਨ. ਸਰਂ ਬੁਦ੍ਧਾਨ-ਸਾਸਨਨ੍ਤਿ ਬੁਦ੍ਧਾਨਂ ਸਾਸਨਂ ਸਰਨ੍ਤੇਨ. ਦੁਤਿਯਂ.

੩. ਬ੍ਰਹ੍ਮਦੇਵਸੁਤ੍ਤਵਣ੍ਣਨਾ

੧੭੪. ਤਤਿਯੇ ਏਕੋਤਿ ਠਾਨਾਦੀਸੁ ਇਰਿਯਾਪਥੇਸੁ ਏਕਕੋ, ਏਕਵਿਹਾਰੀਤਿ ਅਤ੍ਥੋ. ਵੂਪਕਟ੍ਠੋਤਿ ਕਾਯੇਨ ਵੂਪਕਟ੍ਠੋ ਨਿਸ੍ਸਟੋ. ਅਪ੍ਪਮਤ੍ਤੋਤਿ ਸਤਿਯਾ ਅਵਿਪ੍ਪਵਾਸੇ ਠਿਤੋ. ਆਤਾਪੀਤਿ ਵੀਰਿਯਾਤਾਪੇਨ ਸਮਨ੍ਨਾਗਤੋ. ਪਹਿਤਤ੍ਤੋਤਿ ਪੇਸਿਤਤ੍ਤੋ. ਕੁਲਪੁਤ੍ਤਾਤਿ ਆਚਾਰਕੁਲਪੁਤ੍ਤਾ. ਸਮ੍ਮਦੇਵਾਤਿ ਨ ਇਣਟ੍ਟਾ ਨ ਭਯਟ੍ਟਾ ਨ ਜੀਵਿਤਪਕਤਾ ਹੁਤ੍ਵਾ, ਯਥਾ ਵਾ ਤਥਾ ਵਾ ਪਬ੍ਬਜਿਤਾਪਿ ਯੇ ਅਨੁਲੋਮਪਟਿਪਦਂ ਪੂਰੇਨ੍ਤਿ, ਤੇ ਸਮ੍ਮਦੇਵ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਨ੍ਤਿ ਨਾਮ. ਬ੍ਰਹ੍ਮਚਰਿਯਪਰਿਯੋਸਾਨਨ੍ਤਿ ਮਗ੍ਗਬ੍ਰਹ੍ਮਚਰਿਯਸ੍ਸ ਪਰਿਯੋਸਾਨਭੂਤਂ ਅਰਿਯਫਲਂ. ਦਿਟ੍ਠੇਵ ਧਮ੍ਮੇਤਿ ਇਮਸ੍ਮਿਂਯੇਵ ਅਤ੍ਤਭਾਵੇ. ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾਤਿ ਸਾਮਂ ਜਾਨਿਤ੍ਵਾ ਪਚ੍ਚਕ੍ਖਂ ਕਤ੍ਵਾ. ਉਪਸਮ੍ਪਜ੍ਜਾਤਿ ਪਟਿਲਭਿਤ੍ਵਾ ਸਮ੍ਪਾਦੇਤ੍ਵਾ ਵਿਹਾਸਿ. ਏਵਂ ਵਿਹਰਨ੍ਤੋ ਚ ਖੀਣਾ ਜਾਤਿ…ਪੇ… ਅਬ੍ਭਞ੍ਞਾਸੀਤਿ. ਏਤੇਨਸ੍ਸ ਪਚ੍ਚਵੇਕ੍ਖਣਭੂਮਿ ਦਸ੍ਸਿਤਾ.

ਕਤਮਾ ਪਨਸ੍ਸ ਜਾਤਿ ਖੀਣਾ, ਕਥਞ੍ਚ ਨਂ ਅਬ੍ਭਞ੍ਞਾਸੀਤਿ? ਵੁਚ੍ਚਤੇ, ਨ ਤਾਵਸ੍ਸ ਅਤੀਤਾ ਜਾਤਿ ਖੀਣਾ ਪੁਬ੍ਬੇਵ ਖੀਣਤ੍ਤਾ, ਨ ਅਨਾਗਤਾ ਤਤ੍ਥ ਵਾਯਾਮਾਭਾਵਤੋ, ਨ ਪਚ੍ਚੁਪ੍ਪਨ੍ਨਾ ਵਿਜ੍ਜਮਾਨਤ੍ਤਾ. ਮਗ੍ਗਸ੍ਸ ਪਨ ਅਭਾਵਿਤਤ੍ਤਾ ਯਾ ਉਪ੍ਪਜ੍ਜੇਯ੍ਯ ਏਕਚਤੁਪਞ੍ਚਵੋਕਾਰਭਵੇਸੁ ਏਕਚਤੁਪਞ੍ਚਕ੍ਖਨ੍ਧਪ੍ਪਭੇਦਾ ਜਾਤਿ. ਸਾ ਮਗ੍ਗਸ੍ਸ ਭਾਵਿਤਤ੍ਤਾ ਅਨੁਪ੍ਪਾਦਧਮ੍ਮਤਂ ਆਪਜ੍ਜਨੇਨ ਖੀਣਾ. ਤਂ ਸੋ ਮਗ੍ਗਭਾਵਨਾਯ ਪਹੀਨਕਿਲੇਸੇ ਪਚ੍ਚਵੇਕ੍ਖਿਤ੍ਵਾ – ‘‘ਕਿਲੇਸਾਭਾਵੇ ਵਿਜ੍ਜਮਾਨਮ੍ਪਿ ਕਮ੍ਮਂ ਆਯਤਿਂ ਅਪ੍ਪਟਿਸਨ੍ਧਿਕਂ ਹੋਤੀ’’ਤਿ ਜਾਨਨ੍ਤੋ ਜਾਨਾਤਿ.

ਵੁਸਿਤਨ੍ਤਿ ਵੁਤ੍ਥਂ ਪਰਿਵੁਤ੍ਥਂ, ਕਤਂ ਚਰਿਤਂ ਨਿਟ੍ਠਾਪਿਤਨ੍ਤਿ ਅਤ੍ਥੋ. ਬ੍ਰਹ੍ਮਚਰਿਯਨ੍ਤਿ ਮਗ੍ਗਬ੍ਰਹ੍ਮਚਰਿਯਂ. ਕਤਂ ਕਰਣੀਯਨ੍ਤਿ ਚਤੂਸੁ ਸਚ੍ਚੇਸੁ ਚਤੂਹਿ ਮਗ੍ਗੇਹਿ ਪਰਿਞ੍ਞਾਪਹਾਨਸਚ੍ਛਿਕਿਰਿਯਭਾਵਨਾਵਸੇਨ ਸੋਲ਼ਸਵਿਧਮ੍ਪਿ ਕਿਚ੍ਚਂ ਨਿਟ੍ਠਾਪਿਤਨ੍ਤਿ ਅਤ੍ਥੋ. ਨਾਪਰਂ ਇਤ੍ਥਤ੍ਤਾਯਾਤਿ ਇਦਾਨਿ ਪੁਨ ਇਤ੍ਥਭਾਵਾਯ, ਏਵਂ ਸੋਲ਼ਸਕਿਚ੍ਚਭਾਵਾਯ, ਕਿਲੇਸਕ੍ਖਯਾਯ ਵਾ ਕਤਮਗ੍ਗਭਾਵਨਾ ਨਤ੍ਥੀਤਿ. ਅਥ ਵਾ ਇਤ੍ਥਤ੍ਤਾਯਾਤਿ ਇਤ੍ਥਤ੍ਤਭਾਵਤੋ, ਇਮਸ੍ਮਾ ਏਵਂਪਕਾਰਾ ਇਦਾਨਿ ਵਤ੍ਤਮਾਨਕ੍ਖਨ੍ਧਸਨ੍ਤਾਨਾ ਅਪਰਂ ਖਨ੍ਧਸਨ੍ਤਾਨਂ ਨਤ੍ਥਿ, ਇਮੇ ਪਨ ਪਞ੍ਚਕ੍ਖਨ੍ਧਾ ਪਰਿਞ੍ਞਾਤਾ ਤਿਟ੍ਠਨ੍ਤਿ ਛਿਨ੍ਨਮੂਲਕੋ ਰੁਕ੍ਖੋ ਵਿਯਾਤਿ ਅਬ੍ਭਞ੍ਞਾਸਿ. ਅਞ੍ਞਤਰੋਤਿ ਏਕੋ. ਅਰਹਤਨ੍ਤਿ ਅਰਹਨ੍ਤਾਨਂ, ਭਗਵਤੋ ਸਾਵਕਾਨਂ ਅਰਹਤਂ ਅਬ੍ਭਨ੍ਤਰੋ ਅਹੋਸਿ.

ਸਪਦਾਨਨ੍ਤਿ ਸਪਦਾਨਚਾਰਂ, ਸਮ੍ਪਤ੍ਤਘਰਂ ਅਨੁਕ੍ਕਮ੍ਮ ਪਟਿਪਾਟਿਯਾ ਚਰਨ੍ਤੋ. ਉਪਸਙ੍ਕਮੀਤਿ ਉਪਸਙ੍ਕਮਨ੍ਤੋ. ਮਾਤਾ ਪਨਸ੍ਸ ਪੁਤ੍ਤਂ ਦਿਸ੍ਵਾਵ ਘਰਾ ਨਿਕ੍ਖਮ੍ਮ ਪਤ੍ਤਂ ਗਹੇਤ੍ਵਾ ਅਨ੍ਤੋਨਿਵੇਸਨਂ ਪਵੇਸੇਤ੍ਵਾ ਪਞ੍ਞਤ੍ਤਾਸਨੇ ਨਿਸੀਦਾਪੇਸਿ.

ਆਹੁਤਿਂ ਨਿਚ੍ਚਂ ਪਗ੍ਗਣ੍ਹਾਤੀਤਿ ਨਿਚ੍ਚਕਾਲੇ ਆਹੁਤਿਪਿਣ੍ਡਂ ਪਗ੍ਗਣ੍ਹਾਤਿ. ਤਂ ਦਿਵਸਂ ਪਨ ਤਸ੍ਮਿਂ ਘਰੇ ਭੂਤਬਲਿਕਮ੍ਮਂ ਹੋਤਿ. ਸਬ੍ਬਗੇਹਂ ਹਰਿਤੁਪਲਿਤ੍ਤਂ ਵਿਪ੍ਪਕਿਣ੍ਣਲਾਜਂ ਵਨਮਾਲਪਰਿਕ੍ਖਿਤ੍ਤਂ ਉਸ੍ਸਿਤਦ੍ਧਜਪਟਾਕਂ ਤਤ੍ਥ ਤਤ੍ਥ ਪੁਣ੍ਣਘਰੇ ਠਪੇਤ੍ਵਾ ਦਣ੍ਡਦੀਪਿਕਾ ਜਾਲੇਤ੍ਵਾ ਗਨ੍ਧਚੁਣ੍ਣਮਾਲਾਦੀਹਿ ਅਲਙ੍ਕਤਂ, ਸਮਨ੍ਤਤੋ ਸਞ੍ਛਾਦਿਯਮਾਨਾ ਧੂਮਕਟਚ੍ਛੁ ਅਹੋਸਿ. ਸਾਪਿ ਬ੍ਰਾਹ੍ਮਣੀ ਕਾਲਸ੍ਸੇਵ ਵੁਟ੍ਠਾਯ ਸੋਲ਼ਸਹਿ ਗਨ੍ਧੋਦਕਘਟੇਹਿ ਨ੍ਹਾਯਿਤ੍ਵਾ ਸਬ੍ਬਾਲਙ੍ਕਾਰੇਨ ਅਤ੍ਤਭਾਵਂ ਅਲਙ੍ਕਰਿ. ਸਾ ਤਸ੍ਮਿਂ ਸਮਯੇ ਮਹਾਖੀਣਾਸਵਂ ਨਿਸੀਦਾਪੇਤ੍ਵਾ, ਯਾਗੁਉਲ਼ੁਙ੍ਕਮਤ੍ਤਮ੍ਪਿ ਅਦਤ੍ਵਾ, ‘‘ਮਹਾਬ੍ਰਹ੍ਮਂ ਭੋਜੇਸ੍ਸਾਮੀ’’ਤਿ ਸੁਵਣ੍ਣਪਾਤਿਯਂ ਪਾਯਾਸਂ ਪੂਰੇਤ੍ਵਾ ਸਪ੍ਪਿਮਧੁਸਕ੍ਖਰਾਦੀਹਿ ਯੋਜੇਤ੍ਵਾ ਨਿਵੇਸਨਸ੍ਸ ਪਚ੍ਛਾਭਾਗੇ ਹਰਿਤੁਪਲਿਤ੍ਤਭਾਵਾਦੀਹਿ ਅਲਙ੍ਕਤਾ ਭੂਤਪੀਠਿਕਾ ਅਤ੍ਥਿ. ਸਾ ਤਂ ਪਾਤਿਂ ਆਦਾਯ, ਤਤ੍ਥ ਗਨ੍ਤ੍ਵਾ, ਚਤੂਸੁ ਕੋਣੇਸੁ ਮਜ੍ਝੇ ਚ ਏਕੇਕਂ ਪਾਯਾਸਪਿਣ੍ਡਂ ਠਪੇਤ੍ਵਾ, ਏਕਂ ਪਿਣ੍ਡਂ ਹਤ੍ਥੇਨ ਗਹੇਤ੍ਵਾ, ਯਾਵ ਕਪ੍ਪਰਾ ਸਪ੍ਪਿਨਾ ਪਗ੍ਘਰਨ੍ਤੇਨ ਪਥਵਿਯਂ ਜਾਣੁਮਣ੍ਡਲਂ ਪਤਿਟ੍ਠਾਪੇਤ੍ਵਾ ‘‘ਭੁਞ੍ਜਤੁ ਭਵਂ ਮਹਾਬ੍ਰਹ੍ਮਾ, ਸਾਯਤੁ ਭਵਂ ਮਹਾਬ੍ਰਹ੍ਮਾ, ਤਪ੍ਪੇਤੁ ਭਵਂ ਮਹਾਬ੍ਰਹ੍ਮਾ’’ਤਿ ਵਦਮਾਨਾ ਬ੍ਰਹ੍ਮਾਨਂ ਭੋਜੇਤਿ.

ਏਤਦਹੋਸੀਤਿ ਮਹਾਖੀਣਾਸਵਸ੍ਸ ਸੀਲਗਨ੍ਧਂ ਛਦੇਵਲੋਕੇ ਅਜ੍ਝੋਤ੍ਥਰਿਤ੍ਵਾ ਬ੍ਰਹ੍ਮਲੋਕਂ ਉਪਗਤਂ ਘਾਯਮਾਨਸ੍ਸ ਏਤਂ ਅਹੋਸਿ. ਸਂਵੇਜੇਯ੍ਯਨ੍ਤਿ ਚੋਦੇਯ੍ਯਂ, ਸਮ੍ਮਾਪਟਿਪਤ੍ਤਿਯਂ ਯੋਜੇਯ੍ਯਂ. ‘ਅਯਂ ਹਿ ਏਵਰੂਪਂ ਅਗ੍ਗਦਕ੍ਖਿਣੇਯ੍ਯਂ ਮਹਾਖੀਣਾਸਵਂ ਨਿਸੀਦਾਪੇਤ੍ਵਾ ਯਾਗੁਉਲ਼ੁਙ੍ਕਮਤ੍ਤਮ੍ਪਿ ਅਦਤ੍ਵਾ, ‘‘ਮਹਾਬ੍ਰਹ੍ਮਂ ਭੋਜੇਸ੍ਸਾਮੀ’’ਤਿ ਤੁਲਂ ਪਹਾਯ ਹਤ੍ਥੇਨ ਤੁਲਯਨ੍ਤੀ ਵਿਯ, ਭੇਰਿਂ ਪਹਾਯ ਕੁਚ੍ਛਿਂ ਵਾਦੇਨ੍ਤੀ ਵਿਯ, ਅਗ੍ਗਿਂ ਪਹਾਯ ਖਜ੍ਜੋਪਨਕਂ ਧਮਮਾਨਾ ਵਿਯ ਭੂਤਬਲਿਂ ਕੁਰੁਮਾਨਾ ਆਹਿਣ੍ਡਤਿ. ਗਚ੍ਛਾਮਿਸ੍ਸਾ ਮਿਚ੍ਛਾਦਸ੍ਸਨਂ ਭਿਨ੍ਦਿਤ੍ਵਾ ਅਪਾਯਮਗ੍ਗਤੋ ਉਦ੍ਧਰਿਤ੍ਵਾ ਯਥਾ ਅਸੀਤਿਕੋਟਿਧਨਂ ਬੁਦ੍ਧਸਾਸਨੇ ਵਿਪ੍ਪਕਿਰਿਤ੍ਵਾ ਸਗ੍ਗਮਗ੍ਗਂ ਆਰੋਹਤਿ, ਤਥਾ ਕਰੋਮੀਤਿ ਵੁਤ੍ਤਂ ਹੋਤਿ.

ਦੂਰੇ ਇਤੋਤਿ ਇਮਮ੍ਹਾ ਠਾਨਾ ਦੂਰੇ ਬ੍ਰਹ੍ਮਲੋਕੋ. ਤਤੋ ਹਿ ਕੂਟਾਗਾਰਮਤ੍ਤਾ ਸਿਲਾ ਪਾਤਿਤਾ ਏਕੇਨ ਅਹੋਰਤ੍ਤੇਨ ਅਟ੍ਠਚਤ੍ਤਾਲੀਸਯੋਜਨਸਹਸ੍ਸਾਨਿ ਖੇਪਯਮਾਨਾ ਚਤੂਹਿ ਮਾਸੇਹਿ ਪਥਵਿਯਂ ਪਤਿਟ੍ਠਹੇਯ੍ਯ, ਸਬ੍ਬਹੇਟ੍ਠਿਮੋਪਿ ਬ੍ਰਹ੍ਮਲੋਕੋ ਏਵਂ ਦੂਰੇ. ਯਸ੍ਸਾਹੁਤਿਨ੍ਤਿ ਯਸ੍ਸ ਬ੍ਰਹ੍ਮੁਨੋ ਆਹੁਤਿਂ ਪਗ੍ਗਣ੍ਹਾਸਿ, ਤਸ੍ਸ ਬ੍ਰਹ੍ਮਲੋਕੋ ਦੂਰੇਤਿ ਅਤ੍ਥੋ. ਬ੍ਰਹ੍ਮਪਥਨ੍ਤਿ ਏਤ੍ਥ ਬ੍ਰਹ੍ਮਪਥੋ ਨਾਮ ਚਤ੍ਤਾਰਿ ਕੁਸਲਜ੍ਝਾਨਾਨਿ, ਵਿਪਾਕਜ੍ਝਾਨਾਨਿ ਪਨ ਨੇਸਂ ਜੀਵਿਤਪਥੋ ਨਾਮ, ਤਂ ਬ੍ਰਹ੍ਮਪਥਂ ਅਜਾਨਨ੍ਤੀ ਤ੍ਵਂ ਕਿਂ ਜਪ੍ਪਸਿ ਵਿਪ੍ਪਲਪਸਿ? ਬ੍ਰਹ੍ਮਾਨੋ ਹਿ ਸਪ੍ਪੀਤਿਕਜ੍ਝਾਨੇਨ ਯਾਪੇਨ੍ਤਿ, ਨ ਏਤਂ ਤਿਣਬੀਜਾਨਿ ਪਕ੍ਖਿਪਿਤ੍ਵਾ ਰਨ੍ਧਂ ਗੋਯੂਸਂ ਖਾਦਨ੍ਤਿ, ਮਾ ਅਕਾਰਣਾ ਕਿਲਮਸੀਤਿ.

ਏਵਂ ਵਤ੍ਵਾ ਪੁਨ ਸੋ ਮਹਾਬ੍ਰਹ੍ਮਾ ਅਞ੍ਜਲਿਂ ਪਗ੍ਗਯ੍ਹ ਅਵਕੁਜ੍ਜੋ ਹੁਤ੍ਵਾ ਥੇਰਂ ਉਪਦਿਸਨ੍ਤੋ ਏਸੋ ਹਿ ਤੇ ਬ੍ਰਾਹ੍ਮਣਿ ਬ੍ਰਹ੍ਮਦੇਵੋਤਿਆਦਿਮਾਹ. ਤਤ੍ਥ ਨਿਰੂਪਧਿਕੋਤਿ ਕਿਲੇਸਾਭਿਸਙ੍ਖਾਰਕਾਮਗੁਣੋਪਧੀਹਿ ਵਿਰਹਿਤੋ. ਅਤਿਦੇਵਪਤ੍ਤੋਤਿ ਦੇਵਾਨਂ ਅਤਿਦੇਵਭਾਵਂ ਬ੍ਰਹ੍ਮਾਨਂ ਅਤਿਬ੍ਰਹ੍ਮਭਾਵਂ ਪਤ੍ਤੋ. ਅਨਞ੍ਞਪੋਸੀਤਿ ਠਪੇਤ੍ਵਾ ਇਮਂ ਅਤ੍ਤਭਾਵਂ ਅਞ੍ਞਸ੍ਸ ਅਤ੍ਤਭਾਵਸ੍ਸ ਵਾ ਪੁਤ੍ਤਦਾਰਸ੍ਸ ਵਾ ਅਪੋਸਨਤਾਯ ਅਨਞ੍ਞਪੋਸੀ.

ਆਹੁਨੇਯ੍ਯੋਤਿ ਆਹੁਨਪਿਣ੍ਡਂ ਪਟਿਗ੍ਗਹੇਤੁਂ ਯੁਤ੍ਤੋ. ਵੇਦਗੂਤਿ ਚਤੁਮਗ੍ਗਸਙ੍ਖਾਤੇਹਿ ਵੇਦੇਹਿ ਦੁਕ੍ਖਸ੍ਸਨ੍ਤਂ ਗਤੋ. ਭਾਵਿਤਤ੍ਤੋਤਿ ਅਤ੍ਤਾਨਂ ਭਾਵੇਤ੍ਵਾ ਵਡ੍ਢੇਤ੍ਵਾ ਠਿਤੋ. ਅਨੂਪਲਿਤ੍ਤੋਤਿ ਤਣ੍ਹਾਦੀਹਿ ਲੇਪੇਹਿ ਆਲਿਤ੍ਤੋ. ਘਾਸੇਸਨਂ ਇਰਿਯਤੀਤਿ ਆਹਾਰਪਰਿਯੇਸਨਂ ਚਰਤਿ.

ਨ ਤਸ੍ਸ ਪਚ੍ਛਾ ਨ ਪੁਰਤ੍ਥਮਤ੍ਥੀਤਿ ਪਚ੍ਛਾ ਵੁਚ੍ਚਤਿ ਅਤੀਤਂ, ਪੁਰਤ੍ਥਂ ਵੁਚ੍ਚਤਿ ਅਨਾਗਤਂ, ਅਤੀਤਾਨਾਗਤੇਸੁ ਖਨ੍ਧੇਸੁ ਛਨ੍ਦਰਾਗਵਿਰਹਿਤਸ੍ਸ ਪਚ੍ਛਾ ਵਾ ਪੁਰਤ੍ਥਂ ਵਾ ਨਤ੍ਥੀਤਿ ਵਦਤਿ. ਸਨ੍ਤੋਤਿਆਦੀਸੁ ਰਾਗਾਦਿਸਨ੍ਤਤਾਯ ਸਨ੍ਤੋ. ਕੋਧਧੂਮਵਿਗਮਾ ਵਿਧੂਮੋ, ਦੁਕ੍ਖਾਭਾਵਾ ਅਨੀਘੋ, ਕਤ੍ਤਰਦਣ੍ਡਾਦੀਨਿ ਗਹੇਤ੍ਵਾ ਵਿਚਰਨ੍ਤੋਪਿ ਵਧਕਚੇਤਨਾਯ ਅਭਾਵਾ ਨਿਕ੍ਖਿਤ੍ਤਦਣ੍ਡੋ. ਤਸਥਾਵਰੇਸੂਤਿ ਏਤ੍ਥ ਪਨ ਪੁਥੁਜ੍ਜਨਾ ਤਸਾ ਨਾਮ, ਖੀਣਾਸਵਾ ਥਾਵਰਾ ਨਾਮ. ਸਤ੍ਤ ਪਨ ਸੇਖਾ ਤਸਾਤਿ ਵਤ੍ਤੁਂ ਨ ਸਕ੍ਕਾ, ਥਾਵਰਾ ਨ ਹੋਨ੍ਤਿ, ਭਜਮਾਨਾ ਪਨ ਥਾਵਰਪਕ੍ਖਮੇਵ ਭਜਨ੍ਤਿ. ਸੋ ਤ੍ਯਾਹੁਤਿਨ੍ਤਿ ਸੋ ਤੇ ਆਹੁਤਿਂ.

ਵਿਸੇਨਿਭੂਤੋਤਿ ਕਿਲੇਸਸੇਨਾਯ ਵਿਸੇਨੋ ਜਾਤੋ. ਅਨੇਜੋਤਿ ਨਿਤ੍ਤਣ੍ਹੋ. ਸੁਸੀਲੋਤਿ ਖੀਣਾਸਵਸੀਲੇਨ ਸੁਸੀਲੋ. ਸੁਵਿਮੁਤ੍ਤਚਿਤ੍ਤੋਤਿ ਫਲਵਿਮੁਤ੍ਤਿਯਾ ਸੁਟ੍ਠੁ ਵਿਮੁਤ੍ਤਚਿਤ੍ਤੋ. ਓਘਤਿਣ੍ਣਨ੍ਤਿ ਚਤ੍ਤਾਰੋ ਓਘੇ ਤਿਣ੍ਣਂ. ਏਤ੍ਤਕੇਨ ਕਥਾਮਗ੍ਗੇਨ ਬ੍ਰਹ੍ਮਾ ਥੇਰਸ੍ਸ ਵਣ੍ਣਂ ਕਥੇਨ੍ਤੋ ਆਯਤਨੇ ਬ੍ਰਾਹ੍ਮਣਿਂ ਨਿਯੋਜੇਸਿ. ਅਵਸਾਨਗਾਥਾ ਪਨ ਸਙ੍ਗੀਤਿਕਾਰੇਹਿ ਠਪਿਤਾ. ਪਤਿਟ੍ਠਪੇਸਿ ਦਕ੍ਖਿਣਨ੍ਤਿ ਚਤੁਪਚ੍ਚਯਦਕ੍ਖਿਣਂ ਪਤਿਟ੍ਠਪੇਸਿ. ਸੁਖਮਾਯਤਿਕਨ੍ਤਿ ਸੁਖਾਯਤਿਕਂ ਆਯਤਿਂ ਸੁਖਵਿਪਾਕਂ, ਸੁਖਾਵਹਨ੍ਤਿ ਅਤ੍ਥੋ. ਤਤਿਯਂ.

੪. ਬਕਬ੍ਰਹ੍ਮਸੁਤ੍ਤਵਣ੍ਣਨਾ

੧੭੫. ਚਤੁਤ੍ਥੇ ਪਾਪਕਂ ਦਿਟ੍ਠਿਗਤਨ੍ਤਿ ਲਾਮਿਕਾ ਸਸ੍ਸਤਦਿਟ੍ਠਿ. ਇਦਂ ਨਿਚ੍ਚਨ੍ਤਿ ਇਦਂ ਸਹ ਕਾਯੇਨ ਬ੍ਰਹ੍ਮਟ੍ਠਾਨਂ ਅਨਿਚ੍ਚਂ ‘‘ਨਿਚ੍ਚ’’ਨ੍ਤਿ ਵਦਤਿ. ਧੁਵਾਦੀਨਿ ਤਸ੍ਸੇਵ ਵੇਵਚਨਾਨਿ. ਤਤ੍ਥ ਧੁਵਨ੍ਤਿ ਥਿਰਂ. ਸਸ੍ਸਤਨ੍ਤਿ ਸਦਾ ਵਿਜ੍ਜਮਾਨਂ. ਕੇਵਲਨ੍ਤਿ ਅਖਣ੍ਡਂ ਸਕਲਂ. ਅਚਵਨਧਮ੍ਮਨ੍ਤਿ ਅਚਵਨਸਭਾਵਂ. ਇਦਂ ਹਿ ਨ ਜਾਯਤੀਤਿਆਦੀਸੁ ਇਮਸ੍ਮਿਂ ਠਾਨੇ ਕੋਚਿ ਜਾਯਨਕੋ ਵਾ ਜੀਯਨਕੋ ਵਾ ਮੀਯਨਕੋ ਵਾ ਚਵਨਕੋ ਵਾ ਉਪਪਜ੍ਜਨਕੋ ਵਾ ਨਤ੍ਥਿ, ਤਂ ਸਨ੍ਧਾਯ ਵਦਤਿ. ਇਤੋ ਚ ਪਨਞ੍ਞਨ੍ਤਿ ਇਤੋ ਸਹਕਾਯਾ ਬ੍ਰਹ੍ਮਟ੍ਠਾਨਾ ਉਤ੍ਤਰਿ ਅਞ੍ਞਂ ਨਿਸ੍ਸਰਣਂ ਨਾਮ ਨਤ੍ਥੀਤਿ. ਏਵਮਸ੍ਸ ਥਾਮਗਤਾ ਸਸ੍ਸਤਦਿਟ੍ਠਿ ਉਪ੍ਪਨ੍ਨਾ ਹੋਤਿ. ਏਵਂਵਾਦੀ ਚ ਪਨ ਸੋ ਉਪਰਿ ਤਿਸ੍ਸੋ ਝਾਨਭੂਮਿਯੋ ਚਤ੍ਤਾਰੋ ਮਗ੍ਗੇ ਚਤ੍ਤਾਰਿ ਫਲਾਨਿ ਨਿਬ੍ਬਾਨਨ੍ਤਿ ਸਬ੍ਬਂ ਪਟਿਬਾਹਤਿ. ਕਦਾ ਪਨਸ੍ਸ ਸਾ ਦਿਟ੍ਠਿ ਉਪ੍ਪਨ੍ਨਾਤਿ? ਪਠਮਜ੍ਝਾਨਭੂਮਿਯਂ ਨਿਬ੍ਬਤ੍ਤਕਾਲੇ. ਦੁਤਿਯਜ੍ਝਾਨਭੂਮਿਯਨ੍ਤਿ ਏਕੇ.

ਤਤ੍ਰਾਯਂ ਅਨੁਪੁਬ੍ਬਿਕਥਾ – ਹੇਟ੍ਠੁਪਪਤ੍ਤਿਕੋ ਕਿਰੇਸ ਬ੍ਰਹ੍ਮਾ ਅਨੁਪ੍ਪਨ੍ਨੇ ਬੁਦ੍ਧੁਪ੍ਪਾਦੇ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਕਸਿਣਪਰਿਕਮ੍ਮਂ ਕਤ੍ਵਾ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਅਪਰਿਹੀਨਜ੍ਝਾਨੋ ਕਾਲਂ ਕਤ੍ਵਾ ਚਤੁਤ੍ਥਜ੍ਝਾਨਭੂਮਿਯਂ ਵੇਹਪ੍ਫਲਬ੍ਰਹ੍ਮਲੋਕੇ ਪਞ੍ਚਕਪ੍ਪਸਤਿਕਂ ਆਯੁਂ ਗਹੇਤ੍ਵਾ ਨਿਬ੍ਬਤ੍ਤਿ. ਤਤ੍ਥ ਯਾਵਤਾਯੁਕਂ ਠਤ੍ਵਾ ਹੇਟ੍ਠੁਪਪਤ੍ਤਿਕਂ ਕਤ੍ਵਾ ਤਤਿਯਜ੍ਝਾਨਂ ਪਣੀਤਂ ਭਾਵੇਤ੍ਵਾ ਸੁਭਕਿਣ੍ਹਬ੍ਰਹ੍ਮਲੋਕੇ ਚਤੁਸਟ੍ਠਿਕਪ੍ਪਂ ਆਯੁਂ ਗਹੇਤ੍ਵਾ ਨਿਬ੍ਬਤ੍ਤਿ. ਤਤ੍ਥ ਦੁਤਿਯਜ੍ਝਾਨਂ ਭਾਵੇਤ੍ਵਾ ਆਭਸ੍ਸਰੇ ਅਟ੍ਠ ਕਪ੍ਪੇ ਆਯੁਂ ਗਹੇਤ੍ਵਾ ਨਿਬ੍ਬਤ੍ਤਿ. ਤਤ੍ਥ ਪਠਮਜ੍ਝਾਨਂ ਭਾਵੇਤ੍ਵਾ, ਪਠਮਜ੍ਝਾਨਭੂਮਿਯਂ ਕਪ੍ਪਾਯੁਕੋ ਹੁਤ੍ਵਾ ਨਿਬ੍ਬਤ੍ਤਿ. ਸੋ ਪਠਮਕਾਲੇ ਅਤ੍ਤਨਾ ਕਤਕਮ੍ਮਞ੍ਚ ਨਿਬ੍ਬਤ੍ਤਟ੍ਠਾਨਞ੍ਚ ਅਞ੍ਞਾਸਿ, ਕਾਲੇ ਪਨ ਗਚ੍ਛਨ੍ਤੇ ਗਚ੍ਛਨ੍ਤੇ ਉਭਯਂ ਪਮੁਸ੍ਸਿਤ੍ਵਾ ਸਸ੍ਸਤਦਿਟ੍ਠਿਂ ਉਪ੍ਪਾਦੇਸਿ.

ਅਵਿਜ੍ਜਾਗਤੋਤਿ ਅਵਿਜ੍ਜਾਯ ਗਤੋ ਸਮਨ੍ਨਾਗਤੋ ਅਞ੍ਞਾਣੀ ਅਨ੍ਧੀਭੂਤੋ. ਯਤ੍ਰ ਹਿ ਨਾਮਾਤਿ ਯੋ ਨਾਮ. ਵਕ੍ਖਤੀਤਿ ਭਣਤਿ. ‘‘ਯਤ੍ਰਾ’’ਤਿ ਨਿਪਾਤਯੋਗੇਨ ਪਨ ਅਨਾਗਤਵਚਨਂ ਕਤਂ.

ਏਵਂ ਵੁਤ੍ਤੇ ਸੋ ਬ੍ਰਹ੍ਮਾ ਯਥਾ ਨਾਮ ਮਗ੍ਗਚੋਰੋ ਦ੍ਵੇ ਤਯੋ ਪਹਾਰੇ ਅਧਿਵਾਸੇਨ੍ਤੋ ਸਹਾਯੇ ਅਨਾਚਿਕ੍ਖਿਤ੍ਵਾਪਿ ਉਤ੍ਤਰਿਂ ਪਹਾਰਂ ਪਹਰਿਯਮਾਨੋ ‘‘ਅਸੁਕੋ ਚ ਅਸੁਕੋ ਚ ਮਯ੍ਹਂ ਸਹਾਯੋ’’ਤਿ ਆਚਿਕ੍ਖਤਿ, ਏਵਮੇਵ ਭਗਵਤਾ ਸਨ੍ਤਜ੍ਜਿਯਮਾਨੋ ਸਤਿਂ ਲਭਿਤ੍ਵਾ, ‘‘ਭਗਵਾ ਮਯ੍ਹਂ ਪਦਾਨੁਪਦਂ ਪੇਕ੍ਖਨ੍ਤੋ ਮਂ ਨਿਪ੍ਪੀਲ਼ਿਤੁਕਾਮੋ’’ਤਿ ਭੀਤੋ ਅਤ੍ਤਨੋ ਸਹਾਯੇ ਆਚਿਕ੍ਖਨ੍ਤੋ ਦ੍ਵਾਸਤ੍ਤਤੀਤਿਆਦਿਮਾਹ. ਤਸ੍ਸਤ੍ਥੋ – ਭੋ ਗੋਤਮ, ਮਯਂ ਦ੍ਵਾਸਤ੍ਤਤਿ ਜਨਾ ਪੁਞ੍ਞਕਮ੍ਮਾ ਤੇਨ ਪੁਞ੍ਞਕਮ੍ਮੇਨ ਇਧ ਨਿਬ੍ਬਤ੍ਤਾ. ਵਸਵਤ੍ਤਿਨੋ ਸਯਂ ਅਞ੍ਞੇਸਂ ਵਸੇ ਅਵਤ੍ਤਿਤ੍ਵਾ ਪਰੇ ਅਤ੍ਤਨੋ ਵਸੇ ਵਤ੍ਤੇਮ, ਜਾਤਿਞ੍ਚ ਜਰਞ੍ਚ ਅਤੀਤਾ, ਅਯਂ ਨੋ ਵੇਦੇਹਿ ਗਤਤ੍ਤਾ ‘‘ਵੇਦਗੂ’’ਤਿ ਸਙ੍ਖਂ ਗਤਾ ਭਗਵਾ ਅਨ੍ਤਿਮਾ ਬ੍ਰਹ੍ਮੁਪਪਤ੍ਤਿ. ਅਸ੍ਮਾਭਿਜਪ੍ਪਨ੍ਤਿ ਜਨਾ ਅਨੇਕਾਤਿ ਅਨੇਕਜਨਾ ਅਮ੍ਹੇ ਅਭਿਜਪ੍ਪਨ੍ਤਿ. ‘‘ਅਯਂ ਖੋ ਭਵਂ ਬ੍ਰਹ੍ਮਾ, ਮਹਾਬ੍ਰਹ੍ਮਾ, ਅਭਿਭੂ, ਅਨਭਿਭੂਤੋ, ਅਞ੍ਞਦਤ੍ਥੁਦਸੋ, ਵਸਵਤ੍ਤੀ, ਇਸ੍ਸਰੋ, ਕਤ੍ਤਾ, ਨਿਮ੍ਮਾਤਾ, ਸੇਟ੍ਠੋ, ਸਜਿਤਾ, ਵਸੀ, ਪਿਤਾ ਭੂਤਭਬ੍ਯਾਨ’’ਨ੍ਤਿ ਏਵਂ ਪਤ੍ਥੇਨ੍ਤਿ ਪਿਹੇਨ੍ਤੀਤਿ.

ਅਥ ਨਂ ਭਗਵਾ ਅਪ੍ਪਂ ਹਿ ਏਤਨ੍ਤਿਆਦਿਮਾਹ. ਤਤ੍ਥ ਏਤਨ੍ਤਿ ਯਂ ਤ੍ਵਂ ਇਧ ਤਵ ਆਯੁਂ ‘‘ਦੀਘ’’ਨ੍ਤਿ ਮਞ੍ਞਸਿ, ਏਤਂ ਅਪ੍ਪਂ ਪਰਿਤ੍ਤਕਂ. ਸਤਂ ਸਹਸ੍ਸਾਨਂ ਨਿਰਬ੍ਬੁਦਾਨਨ੍ਤਿ ਨਿਰਬ੍ਬੁਦਗਣਨਾਯ ਸਤਸਹਸ੍ਸਨਿਰਬ੍ਬੁਦਾਨਂ. ਆਯੁਂ ਪਜਾਨਾਮੀਤਿ, ‘‘ਇਦਾਨਿ ਤਵ ਅਵਸਿਟ੍ਠਂ ਏਤ੍ਤਕਂ ਆਯੂ’’ਤਿ ਅਹਂ ਜਾਨਾਮਿ. ਅਨਨ੍ਤਦਸ੍ਸੀ ਭਗਵਾ ਹਮਸ੍ਮੀਤਿ, ਭਗਵਾ, ਤੁਮ੍ਹੇ ‘‘ਅਹਂ ਅਨਨ੍ਤਦਸ੍ਸੀ ਜਾਤਿਆਦੀਨਿ ਉਪਾਤਿਵਤ੍ਤੋ’’ਤਿ ਵਦਥ. ਕਿਂ ਮੇ ਪੁਰਾਣਨ੍ਤਿ, ਯਦਿ ਤ੍ਵਂ ਅਨਨ੍ਤਦਸ੍ਸੀ, ਏਵਂ ਸਨ੍ਤੇ ਇਦਂ ਮੇ ਆਚਿਕ੍ਖ, ਕਿਂ ਮਯ੍ਹਂ ਪੁਰਾਣਂ? ਵਤਸੀਲਵਤ੍ਤਨ੍ਤਿ ਸੀਲਮੇਵ ਵੁਚ੍ਚਤਿ. ਯਮਹਂ ਵਿਜਞ੍ਞਾਤਿ ਯਂ ਅਹਂ ਤਯਾ ਕਥਿਤਂ ਜਾਨੇਯ੍ਯਂ, ਤਂ ਮੇ ਆਚਿਕ੍ਖਾਤਿ ਵਦਤਿ.

ਇਦਾਨਿਸ੍ਸ ਆਚਿਕ੍ਖਨ੍ਤੋ ਭਗਵਾ ਯਂ ਤ੍ਵਂ ਅਪਾਯੇਸੀਤਿਆਦਿਮਾਹ. ਤਤ੍ਰਾਯਂ ਅਧਿਪ੍ਪਾਯੋ – ਪੁਬ੍ਬੇ ਕਿਰੇਸ ਕੁਲਘਰੇ ਨਿਬ੍ਬਤ੍ਤਿਤ੍ਵਾ ਕਾਮੇਸੁ ਆਦੀਨਵਂ ਦਿਸ੍ਵਾ – ‘‘ਜਾਤਿਜਰਾਮਰਣਸ੍ਸ ਅਨ੍ਤਂ ਕਰਿਸ੍ਸਾਮੀ’’ਤਿ ਨਿਕ੍ਖਮ੍ਮ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਅਭਿਞ੍ਞਾਪਾਦਕਜ੍ਝਾਨਸ੍ਸ ਲਾਭੀ ਹੁਤ੍ਵਾ ਗਙ੍ਗਾਤੀਰੇ ਪਣ੍ਣਸਾਲਂ ਕਾਰੇਤ੍ਵਾ ਝਾਨਰਤਿਯਾ ਵੀਤਿਨਾਮੇਤਿ. ਤਦਾ ਚ ਕਾਲੇਨਕਾਲਂ ਸਤ੍ਥਵਾਹਾ ਪਞ੍ਚਹਿ ਸਕਟਸਤੇਹਿ ਮਰੁਕਨ੍ਤਾਰਂ ਪਟਿਪਜ੍ਜਨ੍ਤਿ. ਮਰੁਕਨ੍ਤਾਰੇ ਪਨ ਦਿਵਾ ਨ ਸਕ੍ਕਾ ਗਨ੍ਤੁਂ, ਰਤ੍ਤਿਂ ਗਮਨਂ ਹੋਤਿ. ਅਥ ਪੁਰਿਮਸਕਟਸ੍ਸ ਅਗ੍ਗਯੁਗੇ ਯੁਤ੍ਤਬਲਿਬਦ੍ਦਾ ਗਚ੍ਛਨ੍ਤਾ ਗਚ੍ਛਨ੍ਤਾ ਨਿਵਤ੍ਤਿਤ੍ਵਾ ਆਗਤਮਗ੍ਗਾਭਿਮੁਖਾ ਅਹੇਸੁਂ, ਸਬ੍ਬਸਕਟਾਨਿ ਤਥੇਵ ਨਿਵਤ੍ਤਿਤ੍ਵਾ ਅਰੁਣੇ ਉਗ੍ਗਤੇ ਨਿਵਤ੍ਤਿਤਭਾਵਂ ਜਾਨਿਂਸੁ. ਤੇਸਞ੍ਚ ਤਦਾ ਕਨ੍ਤਾਰਂ ਅਤਿਕ੍ਕਮਨਦਿਵਸੋ ਅਹੋਸਿ. ਸਬ੍ਬਂ ਦਾਰੁਦਕਂ ਪਰਿਕ੍ਖੀਣਂ – ਤਸ੍ਮਾ ‘‘ਨਤ੍ਥਿ ਦਾਨਿ ਅਮ੍ਹਾਕਂ ਜੀਵਿਤ’’ਨ੍ਤਿ ਚਿਨ੍ਤੇਤ੍ਵਾ, ਗੋਣੇ ਚਕ੍ਕੇਸੁ ਬਨ੍ਧਿਤ੍ਵਾ, ਮਨੁਸ੍ਸਾ ਸਕਟਚ੍ਛਾਯਂ ਪਵਿਸਿਤ੍ਵਾ ਨਿਪਜ੍ਜਿਂਸੁ.

ਤਾਪਸੋਪਿ ਕਾਲਸ੍ਸੇਵ ਪਣ੍ਣਸਾਲਤੋ ਨਿਕ੍ਖਮਿਤ੍ਵਾ ਪਣ੍ਣਸਾਲਦ੍ਵਾਰੇ ਨਿਸਿਨ੍ਨੋ ਗਙ੍ਗਂ ਓਲੋਕਯਮਾਨੋ ਅਦ੍ਦਸ ਗਙ੍ਗਂ ਮਹਤਾ ਉਦਕੋਘੇਨ ਪੂਰਿਯਮਾਨਂ ਪਵਤ੍ਤਿਤਮਣਿਕ੍ਖਨ੍ਧਂ ਵਿਯ ਆਗਚ੍ਛਨ੍ਤਂ, ਦਿਸ੍ਵਾ ਚਿਨ੍ਤੇਸਿ – ‘‘ਅਤ੍ਥਿ ਨੁ ਖੋ ਇਮਸ੍ਮਿਂ ਲੋਕੇ ਏਵਰੂਪਸ੍ਸ ਮਧੁਰੋਦਕਸ੍ਸ ਅਲਾਭੇਨ ਕਿਲਿਸ੍ਸਮਾਨਾ ਸਤ੍ਤਾ’’ਤਿ? ਸੋ ਏਵਂ ਆਵਜ੍ਜੇਨ੍ਤੋ ਮਰੁਕਨ੍ਤਾਰੇ ਤਂ ਸਤ੍ਥਂ ਦਿਸ੍ਵਾ ‘ਇਮੇ ਸਤ੍ਤਾ ਮਾ ਨਸ੍ਸਨ੍ਤੂ’ਤਿ ‘‘ਇਤੋ ਚਿਤੋ ਚ ਮਹਾਉਦਕਕ੍ਖਨ੍ਧੋ ਛਿਜ੍ਜਿਤ੍ਵਾ ਮਰੁਕਨ੍ਤਾਰੇ ਸਤ੍ਥਾਭਿਮੁਖੋ ਗਚ੍ਛਤੂ’’ਤਿ ਅਭਿਞ੍ਞਾਚਿਤ੍ਤੇਨ ਅਧਿਟ੍ਠਾਸਿ. ਸਹ ਚਿਤ੍ਤੁਪ੍ਪਾਦੇਨ ਮਾਤਿਕਾਰੁਲ਼੍ਹਂ ਵਿਯ ਉਦਕਂ ਤਤ੍ਥ ਅਗਮਾਸਿ. ਮਨੁਸ੍ਸਾ ਉਦਕਸਦ੍ਦੇਨ ਵੁਟ੍ਠਾਯ ਉਦਕਂ ਦਿਸ੍ਵਾ ਹਟ੍ਠਤੁਟ੍ਠਾ ਨ੍ਹਾਯਿਤ੍ਵਾ ਪਿਵਿਤ੍ਵਾ ਗੋਣੇਪਿ ਪਾਯੇਤ੍ਵਾ ਸੋਤ੍ਥਿਨਾ ਇਚ੍ਛਿਤਟ੍ਠਾਨਂ ਅਗਮਂਸੁ. ਸਤ੍ਥਾ ਤਂ ਬ੍ਰਹ੍ਮੁਨੋ ਪੁਬ੍ਬਕਮ੍ਮਂ ਦਸ੍ਸੇਨ੍ਤੋ ਪਠਮਂ ਗਾਥਮਾਹ. ਤਤ੍ਥ ਅਪਾਯੇਸੀਤਿ ਪਾਯੇਸਿ. ਅ-ਕਾਰੋ ਨਿਪਾਤਮਤ੍ਤਂ. ਗਮ੍ਮਨੀਤਿ ਗਿਮ੍ਹੇ. ਸਮ੍ਪਰੇਤੇਤਿ ਗਿਮ੍ਹਾਤਪੇਨ ਫੁਟ੍ਠੇ ਅਨੁਗਤੇ.

ਅਪਰਸ੍ਮਿਮ੍ਪਿ ਸਮਯੇ ਤਾਪਸੋ ਗਙ੍ਗਾਤੀਰੇ ਪਣ੍ਣਸਾਲਂ ਮਾਪੇਤ੍ਵਾ ਅਰਞ੍ਞਗਾਮਕਂ ਨਿਸ੍ਸਾਯ ਵਸਤਿ. ਤੇਨ ਚ ਸਮਯੇਨ ਚੋਰਾ ਤਂ ਗਾਮਂ ਪਹਰਿਤ੍ਵਾ ਹਤ੍ਥਸਾਰਂ ਗਹੇਤ੍ਵਾ ਗਾਵਿਯੋ ਚ ਕਰਮਰੇ ਚ ਗਹੇਤ੍ਵਾ ਗਚ੍ਛਨ੍ਤਿ. ਗਾਵੋਪਿ ਸੁਨਖਾਪਿ ਮਨੁਸ੍ਸਾਪਿ ਮਹਾਵਿਰਵਂ ਵਿਰਵਨ੍ਤਿ. ਤਾਪਸੋ ਤਂ ਸਦ੍ਦਂ ਸੁਤ੍ਵਾ ‘‘ਕਿਨ੍ਨੁ ਖੋ ਏਤ’’ਨ੍ਤਿ? ਆਵਜ੍ਜੇਨ੍ਤੋ ‘‘ਮਨੁਸ੍ਸਾਨਂ ਭਯਂ ਉਪ੍ਪਨ੍ਨ’’ਨ੍ਤਿ ਞਤ੍ਵਾ ‘‘ਮਯਿ ਪਸ੍ਸਨ੍ਤੇ ਇਮੇ ਸਤ੍ਤਾ ਮਾ ਨਸ੍ਸਨ੍ਤੂ’’ਤਿ ਅਭਿਞ੍ਞਾਪਾਦਕਜ੍ਝਾਨਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਅਭਿਞ੍ਞਾਚਿਤ੍ਤੇਨ ਚੋਰਾਨਂ ਪਟਿਪਥੇ ਚਤੁਰਙ੍ਗਿਨਿਂ ਸੇਨਂ ਮਾਪੇਸਿ. ਕਮ੍ਮਸਜ੍ਜਾ ਆਗਚ੍ਛਨ੍ਤਾ ਚੋਰਾ ਦਿਸ੍ਵਾ, ‘‘ਰਾਜਾ ਮਞ੍ਞੇ ਆਗਤੋ’’ਤਿ ਵਿਲੋਪਂ ਛਡ੍ਡੇਤ੍ਵਾ ਪਕ੍ਕਮਿਂਸੁ. ਤਾਪਸੋ ‘‘ਯਂ ਯਸ੍ਸ ਸਨ੍ਤਕਂ, ਤਂ ਤਸ੍ਸੇਵ ਹੋਤੂ’’ਤਿ ਅਧਿਟ੍ਠਾਸਿ, ਤਂ ਤਥੇਵ ਅਹੋਸਿ. ਮਹਾਜਨੋ ਸੋਤ੍ਥਿਭਾਵਂ ਪਾਪੁਣਿ. ਸਤ੍ਥਾ ਇਦਮ੍ਪਿ ਤਸ੍ਸ ਪੁਬ੍ਬਕਮ੍ਮਂ ਦਸ੍ਸੇਨ੍ਤੋ ਦੁਤਿਯਂ ਗਾਥਮਾਹ. ਤਤ੍ਥ ਏਣਿਕੂਲਸ੍ਮਿਨ੍ਤਿ ਗਙ੍ਗਾਤੀਰੇ. ਗਯ੍ਹਕਂ ਨੀਯਮਾਨਨ੍ਤਿ ਗਹੇਤ੍ਵਾ ਨੀਯਮਾਨਂ, ਕਰਮਰਂ ਨੀਯਮਾਨਨ੍ਤਿਪਿ ਅਤ੍ਥੋ.

ਪੁਨ ਏਕਸ੍ਮਿਂ ਸਮਯੇ ਉਪਰਿਗਙ੍ਗਾਵਾਸਿਕਂ ਏਕਂ ਕੁਲਂ ਹੇਟ੍ਠਾਗਙ੍ਗਾਵਾਸਿਕੇਨ ਕੁਲੇਨ ਸਦ੍ਧਿਂ ਮਿਤ੍ਤਸਨ੍ਥਵਂ ਕਤ੍ਵਾ, ਨਾਵਾਸਙ੍ਘਾਟਂ ਬਨ੍ਧਿਤ੍ਵਾ, ਬਹੁਂ ਖਾਦਨੀਯਞ੍ਚੇਵ ਭੋਜਨੀਯਞ੍ਚ ਗਨ੍ਧਮਾਲਾਦੀਨਿ ਚ ਆਰੋਪੇਤ੍ਵਾ ਗਙ੍ਗਾਸੋਤੇਨ ਆਗਚ੍ਛਤਿ. ਮਨੁਸ੍ਸਾ ਖਾਦਮਾਨਾ ਭੁਞ੍ਜਮਾਨਾ ਨਚ੍ਚਨ੍ਤਾ ਗਾਯਨ੍ਤਾ ਦੇਵਵਿਮਾਨੇਨ ਗਚ੍ਛਨ੍ਤਾ ਵਿਯ ਬਲਵਸੋਮਨਸ੍ਸਾ ਅਹੇਸੁਂ. ਗਙ੍ਗੇਯ੍ਯਕੋ ਨਾਗੋ ਦਿਸ੍ਵਾ ਕੁਪਿਤੋ ‘‘ਇਮੇ ਮਯਿ ਸਞ੍ਞਮ੍ਪਿ ਨ ਕਰੋਨ੍ਤਿ. ਇਦਾਨਿ ਨੇ ਸਮੁਦ੍ਦਮੇਵ ਪਾਪੇਸ੍ਸਾਮੀ’’ਤਿ ਮਹਨ੍ਤਂ ਅਤ੍ਤਭਾਵਂ ਮਾਪੇਤ੍ਵਾ ਉਦਕਂ ਦ੍ਵਿਧਾ ਭਿਨ੍ਦਿਤ੍ਵਾ ਉਟ੍ਠਾਯ ਫਣਂ ਕਤ੍ਵਾ, ਸੁਸੁਕਾਰਂ ਕਰੋਨ੍ਤੋ ਅਟ੍ਠਾਸਿ. ਮਹਾਜਨੋ ਦਿਸ੍ਵਾ ਭੀਤੋ ਵਿਸ੍ਸਰਮਕਾਸਿ. ਤਾਪਸੋ ਪਣ੍ਣਸਾਲਾਯਂ ਨਿਸਿਨ੍ਨੋ ਸੁਤ੍ਵਾ, ‘‘ਇਮੇ ਗਾਯਨ੍ਤਾ ਨਚ੍ਚਨ੍ਤਾ ਸੋਮਨਸ੍ਸਜਾਤਾ ਆਗਚ੍ਛਨ੍ਤਿ. ਇਦਾਨਿ ਪਨ ਭਯਰਵਂ ਰਵਿਂਸੁ, ਕਿਨ੍ਨੁ ਖੋ’’ਤਿ? ਆਵਜ੍ਜੇਨ੍ਤੋ ਨਾਗਰਾਜਂ ਦਿਸ੍ਵਾ, ‘‘ਮਯਿ ਪਸ੍ਸਨ੍ਤੇ ਸਤ੍ਤਾ ਮਾ ਨਸ੍ਸਨ੍ਤੂ’’ਤਿ ਅਭਿਞ੍ਞਾਪਾਦਕਜ੍ਝਾਨਂ ਸਮਾਪਜ੍ਜਿਤ੍ਵਾ ਅਤ੍ਤਭਾਵਂ ਪਜਹਿਤ੍ਵਾ ਸੁਪਣ੍ਣਵਣ੍ਣਂ ਮਾਪੇਤ੍ਵਾ ਨਾਗਰਾਜਸ੍ਸ ਦਸ੍ਸੇਸਿ. ਨਾਗਰਾਜਾ ਭੀਤੋ ਫਣਂ ਸਂਹਰਿਤ੍ਵਾ ਉਦਕਂ ਪਵਿਟ੍ਠੋ, ਮਹਾਜਨੋ ਸੋਤ੍ਥਿਭਾਵਂ ਪਾਪੁਣਿ. ਸਤ੍ਥਾ ਇਦਮ੍ਪਿ ਤਸ੍ਸ ਪੁਬ੍ਬਕਮ੍ਮਂ ਦਸ੍ਸੇਨ੍ਤੋ ਤਤਿਯਂ ਗਾਥਮਾਹ. ਤਤ੍ਥ ਲੁਦ੍ਦੇਨਾਤਿ ਦਾਰੁਣੇਨ. ਮਨੁਸ੍ਸਕਮ੍ਯਾਤਿ ਮਨੁਸ੍ਸਕਾਮਤਾਯ, ਮਨੁਸ੍ਸੇ ਵਿਹੇਠੇਤੁਕਾਮਤਾਯਾਤਿ ਅਤ੍ਥੋ.

ਅਪਰਸ੍ਮਿਮ੍ਪਿ ਸਮਯੇ ਏਸ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਕੇਸਵੋ ਨਾਮ ਤਾਪਸੋ ਅਹੋਸਿ. ਤੇਨ ਸਮਯੇਨ ਅਮ੍ਹਾਕਂ ਬੋਧਿਸਤ੍ਤੋ ਕਪ੍ਪੋ ਨਾਮ ਮਾਣਵੋ ਕੇਸਵਸ੍ਸ ਬਦ੍ਧਚਰੋ ਅਨ੍ਤੇਵਾਸਿਕੋ ਹੁਤ੍ਵਾ ਆਚਰਿਯਸ੍ਸ ਕਿਂਕਾਰਪਟਿਸ੍ਸਾਵੀ ਮਨਾਪਚਾਰੀ ਬੁਦ੍ਧਿਸਮ੍ਪਨ੍ਨੋ ਅਤ੍ਥਚਰੋ ਅਹੋਸਿ. ਕੇਸਵੋ ਤੇਨ ਵਿਨਾ ਵਸਿਤੁਂ ਨ ਸਕ੍ਕੋਤਿ, ਤਂ ਨਿਸ੍ਸਾਯੇਵ ਜੀਵਿਕਂ ਕਪ੍ਪੇਸਿ. ਸਤ੍ਥਾ ਇਦਮ੍ਪਿ ਤਸ੍ਸ ਪੁਬ੍ਬਕਮ੍ਮਂ ਦਸ੍ਸੇਨ੍ਤੋ ਚਤੁਤ੍ਥਂ ਗਾਥਮਾਹ.

ਤਤ੍ਥ ਬਦ੍ਧਚਰੋਤਿ ਅਨ੍ਤੇਵਾਸਿਕੋ, ਸੋ ਪਨ ਜੇਟ੍ਠਨ੍ਤੇਵਾਸਿਕੋ ਅਹੋਸਿ. ਸਮ੍ਬੁਦ੍ਧਿਮਨ੍ਤਂ ਵਤਿਨਂ ਅਮਞ੍ਞੀਤਿ, ‘‘ਸਮ੍ਮਾ ਬੁਦ੍ਧਿਮਾ ਵਤਸਮ੍ਪਨ੍ਨੋ ਅਯ’’ਨ੍ਤਿ ਏਵਂ ਮਞ੍ਞਮਾਨੋ ਕਪ੍ਪੋ ਤਵ ਅਨ੍ਤੇਵਾਸਿਕੋ ਅਹੋਸਿਂ ਅਹਂ ਸੋ ਤੇਨ ਸਮਯੇਨਾਤਿ ਦਸ੍ਸੇਤਿ. ਅਞ੍ਞੇਪਿ ਜਾਨਾਸੀਤਿ ਨ ਕੇਵਲਂ ਮਯ੍ਹਂ ਆਯੁਮੇਵ, ਅਞ੍ਞੇਪਿ ਤ੍ਵਂ ਜਾਨਾਸਿਯੇਵ. ਤਥਾ ਹਿ ਬੁਦ੍ਧੋਤਿ ਤਥਾ ਹਿ ਤ੍ਵਂ ਬੁਦ੍ਧੋ, ਯਸ੍ਮਾ ਬੁਦ੍ਧੋ, ਤਸ੍ਮਾ ਜਾਨਾਸੀਤਿ ਅਤ੍ਥੋ. ਤਥਾ ਹਿ ਤ੍ਯਾਯਂ ਜਲਿਤਾਨੁਭਾਵੋਤਿ ਯਸ੍ਮਾ ਚ ਤ੍ਵਂ ਬੁਦ੍ਧੋ, ਤਸ੍ਮਾ ਤੇ ਅਯਂ ਜਲਿਤੋ ਆਨੁਭਾਵੋ. ਓਭਾਸਯਂ ਤਿਟ੍ਠਤੀਤਿ ਸਬ੍ਬਂ ਬ੍ਰਹ੍ਮਲੋਕਂ ਓਭਾਸਯਨ੍ਤੋ ਤਿਟ੍ਠਤਿ. ਚਤੁਤ੍ਥਂ.

੫. ਅਞ੍ਞਤਰਬ੍ਰਹ੍ਮਸੁਤ੍ਤਵਣ੍ਣਨਾ

੧੭੬. ਪਞ੍ਚਮੇ ਤੇਜੋਧਾਤੁਂ ਸਮਾਪਜ੍ਜਿਤ੍ਵਾਤਿ ਤੇਜੋਕਸਿਣਪਰਿਕਮ੍ਮਂ ਕਤ੍ਵਾ ਪਾਦਕਜ੍ਝਾਨਤੋ ਵੁਟ੍ਠਾਯ, ‘‘ਸਰੀਰਤੋ ਜਾਲਾ ਨਿਕ੍ਖਮਨ੍ਤੂ’’ਤਿ ਅਧਿਟ੍ਠਹਨ੍ਤੋ ਅਧਿਟ੍ਠਾਨਚਿਤ੍ਤਾਨੁਭਾਵੇਨ ਸਕਲਸਰੀਰਤੋ ਜਾਲਾ ਨਿਕ੍ਖਮਨ੍ਤਿ, ਏਵਂ ਤੇਜੋਧਾਤੁਂ ਸਮਾਪਨ੍ਨੋ ਨਾਮ ਹੋਤਿ, ਤਥਾ ਸਮਾਪਜ੍ਜਿਤ੍ਵਾ. ਤਸ੍ਮਿਂ ਬ੍ਰਹ੍ਮਲੋਕੇਤਿ ਕਸ੍ਮਾ ਥੇਰੋ ਤਤ੍ਥ ਅਗਮਾਸਿ? ਥੇਰਸ੍ਸ ਕਿਰ ਤੇਜੋਧਾਤੁਂ ਸਮਾਪਜ੍ਜਿਤ੍ਵਾ ਤਸ੍ਸ ਬ੍ਰਹ੍ਮੁਨੋ ਉਪਰਿ ਨਿਸਿਨ੍ਨਂ ਤਥਾਗਤਂ ਦਿਸ੍ਵਾ ‘‘ਅਟ੍ਠਿਵੇਧੀ ਅਯਂ ਪੁਗ੍ਗਲੋ, ਮਯਾਪੇਤ੍ਥ ਗਨ੍ਤਬ੍ਬ’’ਨ੍ਤਿ ਅਹੋਸਿ, ਤਸ੍ਮਾ ਅਗਮਾਸਿ. ਸੇਸਾਨਂ ਗਮਨੇਪਿ ਏਸੇਵ ਨਯੋ. ਸੋ ਹਿ ਬ੍ਰਹ੍ਮਾ ਤਥਾਗਤਸ੍ਸ ਚੇਵ ਤਥਾਗਤਸਾਵਕਾਨਞ੍ਚ ਆਨੁਭਾਵਂ ਅਦਿਸ੍ਵਾ ਅਭਬ੍ਬੋ ਵਿਨਯਂ ਉਪਗਨ੍ਤੁਂ, ਤੇਨ ਸੋ ਸਨ੍ਨਿਪਾਤੋ ਅਹੋਸਿ. ਤਤ੍ਥ ਤਥਾਗਤਸ੍ਸ ਸਰੀਰਤੋ ਉਗ੍ਗਤਜਾਲਾ ਸਕਲਬ੍ਰਹ੍ਮਲੋਕਂ ਅਤਿਕ੍ਕਮਿਤ੍ਵਾ ਅਜਟਾਕਾਸੇ ਪਕ੍ਖਨ੍ਦਾ, ਤਾ ਚ ਪਨ ਛਬ੍ਬਣ੍ਣਾ ਅਹੇਸੁਂ, ਤਥਾਗਤਸ੍ਸ ਸਾਵਕਾਨਂ ਆਭਾ ਪਕਤਿਵਣ੍ਣਾਵ.

ਪਸ੍ਸਸਿ ਵੀਤਿਵਤ੍ਤਨ੍ਤਨ੍ਤਿ ਇਮਸ੍ਮਿਂ ਬ੍ਰਹ੍ਮਲੋਕੇ ਅਞ੍ਞਬ੍ਰਹ੍ਮਸਰੀਰਵਿਮਾਨਾਲਙ੍ਕਾਰਾਦੀਨਂ ਪਭਾ ਅਤਿਕ੍ਕਮਮਾਨਂ ਬੁਦ੍ਧਸ੍ਸ ਭਗਵਤੋ ਪਭਸ੍ਸਰਂ ਪਭਂ ਪਸ੍ਸਸੀਤਿ ਪੁਚ੍ਛਤਿ. ਨ ਮੇ, ਮਾਰਿਸ, ਸਾ ਦਿਟ੍ਠੀਤਿ ਯਾ ਮੇਸਾ, ‘‘ਇਧਾਗਨ੍ਤੁਂ ਸਮਤ੍ਥੋ ਅਞ੍ਞੋ ਸਮਣੋ ਵਾ ਬ੍ਰਾਹ੍ਮਣੋ ਵਾ ਨਤ੍ਥੀ’’ਤਿ ਪੁਰੇ ਦਿਟ੍ਠਿ, ਨਤ੍ਥਿ ਮੇ ਸਾ. ਕਥਂ ਵਜ੍ਜਨ੍ਤਿ ਕੇਨ ਕਾਰਣੇਨ ਵਦੇਯ੍ਯਂ. ਨਿਚ੍ਚੋਮ੍ਹਿ ਸਸ੍ਸਤੋਤਿ ਇਮਸ੍ਸ ਕਿਰ ਬ੍ਰਹ੍ਮੁਨੋ ਲਦ੍ਧਿਦਿਟ੍ਠਿ ਸਸ੍ਸਤਦਿਟ੍ਠਿ ਚਾਤਿ ਦ੍ਵੇ ਦਿਟ੍ਠਿਯੋ. ਤਤ੍ਰਾਸ੍ਸ ਤਥਾਗਤਞ੍ਚੇਵ ਤਥਾਗਤਸਾਵਕੇ ਚ ਪਸ੍ਸਤੋ ਲਦ੍ਧਿਦਿਟ੍ਠਿ ਪਹੀਨਾ. ਭਗਵਾ ਪਨੇਤ੍ਥ ਮਹਨ੍ਤਂ ਧਮ੍ਮਦੇਸਨਂ ਦੇਸੇਸਿ. ਬ੍ਰਹ੍ਮਾ ਦੇਸਨਾਪਰਿਯੋਸਾਨੇ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਇਤਿਸ੍ਸ ਮਗ੍ਗੇਨ ਸਸ੍ਸਤਦਿਟ੍ਠਿ ਪਹੀਨਾ, ਤਸ੍ਮਾ ਏਵਮਾਹ.

ਬ੍ਰਹ੍ਮਪਾਰਿਸਜ੍ਜਨ੍ਤਿ ਬ੍ਰਹ੍ਮਪਾਰਿਚਾਰਿਕਂ. ਥੇਰਾਨਞ੍ਹਿ ਭਣ੍ਡਗਾਹਕਦਹਰਾ ਵਿਯ ਬ੍ਰਹ੍ਮਾਨਮ੍ਪਿ ਪਾਰਿਸਜ੍ਜਾ ਬ੍ਰਹ੍ਮਾਨੋ ਨਾਮ ਹੋਨ੍ਤਿ. ਤੇਨੁਪਸਙ੍ਕਮਾਤਿ ਕਸ੍ਮਾ ਥੇਰਸ੍ਸੇਵ ਸਨ੍ਤਿਕਂ ਪੇਸੇਸਿ? ਥੇਰੇ ਕਿਰਸ੍ਸ ਤਤ੍ਤਕੇਨੇਵ ਕਥਾਸਲ੍ਲਾਪੇਨ ਵਿਸ੍ਸਾਸੋ ਉਦਪਾਦਿ, ਤਸ੍ਮਾ ਤਸ੍ਸੇਵ ਸਨ੍ਤਿਕਂ ਪੇਸੇਸਿ ਅਞ੍ਞੇਪੀਤਿ ਯਥਾ ਤੁਮ੍ਹੇ ਚਤ੍ਤਾਰੋ ਜਨਾ, ਕਿਨ੍ਨੁ ਖੋ ਏਵਰੂਪਾ ਅਞ੍ਞੇਪਿ ਅਤ੍ਥਿ, ਉਦਾਹੁ ਤੁਮ੍ਹੇ ਚਤ੍ਤਾਰੋ ਏਵ ਮਹਿਦ੍ਧਿਕਾਤਿ? ਤੇਵਿਜ੍ਜਾਤਿ ਪੁਬ੍ਬੇਨਿਵਾਸਦਿਬ੍ਬਚਕ੍ਖੁਆਸਵਕ੍ਖਯਸਙ੍ਖਾਤਾਹਿ ਤੀਹਿ ਵਿਜ੍ਜਾਹਿ ਸਮਨ੍ਨਾਗਤਾ. ਇਦ੍ਧਿਪਤ੍ਤਾਤਿ ਇਦ੍ਧਿਵਿਧਞਾਣਂ ਪਤ੍ਤਾ. ਚੇਤੋਪਰਿਯਾਯਕੋਵਿਦਾਤਿ ਪਰੇਸਂ ਚਿਤ੍ਤਾਚਾਰੇ ਕੁਸਲਾ. ਏਵਮੇਤ੍ਥ ਪਞ੍ਚ ਅਭਿਞ੍ਞਾਪਿ ਸਰੂਪੇਨ ਵੁਤ੍ਤਾ. ਦਿਬ੍ਬਸੋਤਂ ਪਨ ਤਾਸਂ ਵਸੇਨ ਆਗਤਮੇਵ ਹੋਤਿ. ਬਹੂਤਿ ਏਵਰੂਪਾ ਛਲ਼ਭਿਞ੍ਞਾ ਬੁਦ੍ਧਸਾਵਕਾ ਬਹੂ ਗਣਨਪਥਂ ਅਤਿਕ੍ਕਨ੍ਤਾ, ਸਕਲਂ ਜਮ੍ਬੁਦੀਪਂ ਕਾਸਾਵਪਜ੍ਜੋਤਂ ਕਤ੍ਵਾ ਵਿਚਰਨ੍ਤੀਤਿ. ਪਞ੍ਚਮਂ.

੬. ਬ੍ਰਹ੍ਮਲੋਕਸੁਤ੍ਤਵਣ੍ਣਨਾ

੧੭੭. ਛਟ੍ਠੇ ਪਚ੍ਚੇਕਂ ਦ੍ਵਾਰਬਾਹਨ੍ਤਿ ਏਕੇਕੋ ਏਕੇਕਂ ਦ੍ਵਾਰਬਾਹਂ ਨਿਸ੍ਸਾਯ ਦ੍ਵਾਰਪਾਲਾ ਵਿਯ ਅਟ੍ਠਂਸੁ. ਇਦ੍ਧੋਤਿ ਝਾਨਸੁਖੇਨ ਸਮਿਦ੍ਧੋ. ਫੀਤੋਤਿ ਅਭਿਞ੍ਞਾਪੁਪ੍ਫੇਹਿ ਸੁਪੁਪ੍ਫਿਤੋ. ਅਨਧਿਵਾਸੇਨ੍ਤੋਤਿ ਅਸਹਨ੍ਤੋ. ਏਤਦਵੋਚਾਤਿ ਏਤੇਸਂ ਨਿਮ੍ਮਿਤਬ੍ਰਹ੍ਮਾਨਂ ਮਜ੍ਝੇ ਨਿਸਿਨ੍ਨੋ ਏਤਂ ‘‘ਪਸ੍ਸਸਿ ਮੇ’’ਤਿਆਦਿਵਚਨਂ ਅਵੋਚ.

ਤਯੋ ਸੁਪਣ੍ਣਾਤਿ ਗਾਥਾਯ ਪਞ੍ਚਸਤਾਤਿ ਸਤਪਦਂ ਰੂਪਵਸੇਨ ਵਾ ਪਨ੍ਤਿਵਸੇਨ ਵਾ ਯੋਜੇਤਬ੍ਬਂ. ਰੂਪਵਸੇਨ ਤਾਵ ਤਯੋ ਸੁਪਣ੍ਣਾਤਿ ਤੀਣਿ ਸੁਪਣ੍ਣਰੂਪਸਤਾਨਿ. ਚਤੁਰੋ ਚ ਹਂਸਾਤਿ ਚਤ੍ਤਾਰਿਹਂਸਰੂਪਸਤਾਨਿ. ਬੁਗ੍ਘੀਨਿਸਾ ਪਞ੍ਚਸਤਾਤਿ ਬ੍ਯਗ੍ਘਸਦਿਸਾ ਏਕਚ੍ਚੇ ਮਿਗਾ ਬ੍ਯਗ੍ਘੀਨਿਸਾ ਨਾਮ, ਤੇਸਂ ਬ੍ਯਗ੍ਘੀਨਿਸਾਰੂਪਕਾਨਂ ਪਞ੍ਚਸਤਾਨਿ, ਪਨ੍ਤਿਵਸੇਨ ਤਯੋ ਸੁਪਣ੍ਣਾਤਿ ਤੀਣਿ ਸੁਪਣ੍ਣਪਨ੍ਤਿਸਤਾਨਿ, ਚਤੁਰੋ ਹਂਸਾਤਿ ਚਤ੍ਤਾਰਿ ਹਂਸਪਨ੍ਤਿਸਤਾਨਿ. ਬ੍ਯਗ੍ਘੀਨਿਸਾ ਪਞ੍ਚਸਤਾਤਿ ਪਞ੍ਚ ਬ੍ਯਗ੍ਘੀਨਿਸਾ ਪਨ੍ਤਿਸਤਾਨਿ. ਝਾਯਿਨੋਤਿ ਝਾਯਿਸ੍ਸ ਮਯ੍ਹਂ ਵਿਮਾਨੇ ਅਯਂ ਵਿਭੂਤੀਤਿ ਦਸ੍ਸੇਤਿ. ਓਭਾਸਯਨ੍ਤਿ ਓਭਾਸਯਮਾਨਂ. ਉਤ੍ਤਰਸ੍ਸਂ ਦਿਸਾਯਨ੍ਤਿ ਤਂ ਕਿਰ ਕਨਕਵਿਮਾਨਂ ਤੇਸਂ ਮਹਾਬ੍ਰਹ੍ਮਾਨਂ ਠਿਤਟ੍ਠਾਨਤੋ ਉਤ੍ਤਰਦਿਸਾਯਂ ਹੋਤਿ. ਤਸ੍ਮਾ ਏਵਮਾਹ. ਅਯਂ ਪਨਸ੍ਸ ਅਧਿਪ੍ਪਾਯੋ – ਏਵਰੂਪੇ ਕਨਕਵਿਮਾਨੇ ਵਸਨ੍ਤੋ ਅਹਂ ਕਸ੍ਸ ਅਞ੍ਞਸ੍ਸ ਉਪਟ੍ਠਾਨਂ ਗਮਿਸ੍ਸਾਮੀਤਿ. ਰੂਪੇ ਰਣਂ ਦਿਸ੍ਵਾਤਿ ਰੂਪਮ੍ਹਿ ਜਾਤਿਜਰਾਭਙ੍ਗਸਙ੍ਖਾਤਂ ਦੋਸਂ ਦਿਸ੍ਵਾ. ਸਦਾ ਪਵੇਧਿਤਨ੍ਤਿ ਸੀਤਾਦੀਹਿ ਚ ਨਿਚ੍ਚਂ ਪਵੇਧਿਤਂ ਚਲਿਤਂ ਘਟ੍ਟਿਤਂ ਰੂਪਂ ਦਿਸ੍ਵਾ. ਤਸ੍ਮਾ ਨ ਰੂਪੇ ਰਮਤਿ ਸੁਮੇਧੋਤਿ ਯਸ੍ਮਾ ਰੂਪੇ ਰਣਂ ਪਸ੍ਸਤਿ, ਸਦਾ ਪਵੇਧਿਤਞ੍ਚ ਰੂਪਂ ਪਸ੍ਸਤਿ, ਤਸ੍ਮਾ ਸੁਮੇਧੋ ਸੁਨ੍ਦਰਪਞ੍ਞੋ ਸੋ ਸਤ੍ਥਾ ਰੂਪੇ ਨ ਰਮਤੀਤਿ. ਛਟ੍ਠਂ.

੭. ਕੋਕਾਲਿਕਸੁਤ੍ਤਵਣ੍ਣਨਾ

੧੭੮. ਸਤ੍ਤਮੇ ਅਪ੍ਪਮੇਯ੍ਯਂ ਪਮਿਨਨ੍ਤੋਤਿ ਅਪ੍ਪਮੇਯ੍ਯਂ ਖੀਣਾਸਵਪੁਗ੍ਗਲਂ ‘‘ਏਤ੍ਤਕਂ ਸੀਲਂ, ਏਤ੍ਤਕੋ ਸਮਾਧਿ, ਏਤ੍ਤਕਾ ਪਞ੍ਞਾ’’ਤਿ ਏਵਂ ਮਿਨਨ੍ਤੋ. ਕੋਧਵਿਦ੍ਵਾ ਵਿਕਪ੍ਪਯੇਤਿ ਕੋ ਇਧ ਵਿਦ੍ਵਾ ਮੇਧਾਵੀ ਵਿਕਪ੍ਪੇਯ੍ਯ, ਖੀਣਾਸਵੋਵ ਖੀਣਾਸਵਂ ਮਿਨਨ੍ਤੋ ਕਪ੍ਪੇਯ੍ਯਾਤਿ ਦੀਪੇਤਿ. ਨਿਵੁਤਂ ਤਂ ਮਞ੍ਞੇਤਿ ਯੋ ਪਨ ਪੁਥੁਜ੍ਜਨੋ ਤਂ ਪਮੇਤੁਂ ਆਰਭਤਿ, ਤਂ ਨਿਵੁਤਂ ਅਵਕੁਜ੍ਜਪਞ੍ਞਂ ਮਞ੍ਞਾਮੀਤਿ. ਸਤ੍ਤਮਂ.

੮. ਕਤਮੋਦਕਤਿਸ੍ਸਸੁਤ੍ਤਵਣ੍ਣਨਾ

੧੭੯. ਅਟ੍ਠਮੇ ਅਕਿਸ੍ਸਵਨ੍ਤਿ ਕਿਸ੍ਸਵਾ ਵੁਚ੍ਚਤਿ ਪਞ੍ਞਾ, ਨਿਪ੍ਪਞ੍ਞੋਤਿ ਅਤ੍ਥੋ. ਅਟ੍ਠਮਂ.

੯. ਤੁਰੂਬ੍ਰਹ੍ਮਸੁਤ੍ਤਵਣ੍ਣਨਾ

੧੮੦. ਨਵਮੇ ਆਬਾਧਿਕੋਤਿ ‘‘ਸਾਸਪਮਤ੍ਤੀਹਿ ਪੀਲ਼ਕਾਹੀ’’ਤਿਆਦਿਨਾ ਨਯੇਨ ਅਨਨ੍ਤਰਸੁਤ੍ਤੇ ਆਗਤੇਨ ਆਬਾਧੇਨ ਆਬਾਧਿਕੋ. ਬਾਲ਼੍ਹਗਿਲਾਨੋਤਿ ਅਧਿਮਤ੍ਤਗਿਲਾਨੋ. ਤੁਰੂਤਿ ਕੋਕਾਲਿਕਸ੍ਸ ਉਪਜ੍ਝਾਯੋ ਤੁਰੁਤ੍ਥੇਰੋ ਨਾਮ ਅਨਾਗਾਮਿਫਲਂ ਪਤ੍ਵਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤੋ. ਸੋ ਭੂਮਟ੍ਠਕਦੇਵਤਾ ਆਦਿਂ ਕਤ੍ਵਾ, ‘‘ਅਯੁਤ੍ਤਂ ਕੋਕਾਲਿਕੇਨ ਕਤਂ ਅਗ੍ਗਸਾਵਕੇ ਅਨ੍ਤਿਮਵਤ੍ਥੁਨਾ ਅਬ੍ਭਾਚਿਕ੍ਖਨ੍ਤੇਨਾ’’ਤਿ ਪਰਮ੍ਪਰਾਯ ਬ੍ਰਹ੍ਮਲੋਕਸਮ੍ਪਤ੍ਤਂ ਕੋਕਾਲਿਕਸ੍ਸ ਪਾਪਕਮ੍ਮਂ ਸੁਤ੍ਵਾ – ‘‘ਮਾ ਮਯ੍ਹਂ ਪਸ੍ਸਨ੍ਤਸ੍ਸੇਵ ਵਰਾਕੋ ਨਸ੍ਸਿ, ਓਵਦਿਸ੍ਸਾਮਿ ਨਂ ਥੇਰੇਸੁ ਚਿਤ੍ਤਪਸਾਦਤ੍ਥਾਯਾ’’ਤਿ ਆਗਨ੍ਤ੍ਵਾ ਤਸ੍ਸ ਪੁਰਤੋ ਅਟ੍ਠਾਸਿ. ਤਂ ਸਨ੍ਧਾਯ ਵੁਤ੍ਤਂ ‘‘ਤੁਰੂ ਪਚ੍ਚੇਕਬ੍ਰਹ੍ਮਾ’’ਤਿ. ਪੇਸਲਾਤਿ ਪਿਯਸੀਲਾ. ਕੋਸਿ ਤ੍ਵਂ, ਆਵੁਸੋਤਿ ਨਿਪਨ੍ਨਕੋਵ ਕਬਰਕ੍ਖੀਨਿ ਉਮ੍ਮੀਲੇਤ੍ਵਾ ਏਵਮਾਹ. ਪਸ੍ਸ ਯਾਵਞ੍ਚ ਤੇਤਿ ਪਸ੍ਸ ਯਤ੍ਤਕਂ ਤਯਾ ਅਪਰਦ੍ਧਂ, ਅਤ੍ਤਨੋ ਨਲਾਟੇ ਮਹਾਗਣ੍ਡਂ ਅਪਸ੍ਸਨ੍ਤੋ ਸਾਸਪਮਤ੍ਤਾਯ ਪੀਲ਼ਕਾਯ ਮਂ ਚੋਦੇਤਬ੍ਬਂ ਮਞ੍ਞਸੀਤਿ ਆਹ.

ਅਥ ਨਂ ‘‘ਅਦਿਟ੍ਠਿਪ੍ਪਤ੍ਤੋ ਅਯਂ ਵਰਾਕੋ, ਗਿਲਵਿਸੋ ਵਿਯ ਕਸ੍ਸਚਿ ਵਚਨਂ ਨ ਕਰਿਸ੍ਸਤੀ’’ਤਿ ਞਤ੍ਵਾ ਪੁਰਿਸਸ੍ਸ ਹੀਤਿਆਦਿਮਾਹ. ਤਤ੍ਥ ਕੁਠਾਰੀਤਿ ਕੁਠਾਰਿਸਦਿਸਾ ਫਰੁਸਾ ਵਾਚਾ. ਛਿਨ੍ਦਤੀਤਿ ਕੁਸਲਮੂਲਸਙ੍ਖਾਤੇ ਮੂਲੇਯੇਵ ਨਿਕਨ੍ਤਤਿ. ਨਿਨ੍ਦਿਯਨ੍ਤਿ ਨਿਨ੍ਦਿਤਬ੍ਬਂ ਦੁਸ੍ਸੀਲਪੁਗ੍ਗਲਂ. ਪਸਂਸਤੀਤਿ ਉਤ੍ਤਮਤ੍ਥੇ ਸਮ੍ਭਾਵੇਤ੍ਵਾ ਖੀਣਾਸਵੋਤਿ ਵਦਤਿ. ਤਂ ਵਾ ਨਿਨ੍ਦਤਿ ਯੋ ਪਸਂਸਿਯੋਤਿ, ਯੋ ਵਾ ਪਸਂਸਿਤਬ੍ਬੋ ਖੀਣਾਸਵੋ, ਤਂ ਅਨ੍ਤਿਮਵਤ੍ਥੁਨਾ ਚੋਦੇਨ੍ਤੋ ‘‘ਦੁਸ੍ਸੀਲੋ ਅਯ’’ਨ੍ਤਿ ਵਦਤਿ. ਵਚਿਨਾਤਿ ਮੁਖੇਨ ਸੋ ਕਲਿਨ੍ਤਿ, ਸੋ ਤਂ ਅਪਰਾਧਂ ਮੁਖੇਨ ਵਿਚਿਨਾਤਿ ਨਾਮ. ਕਲਿਨਾ ਤੇਨਾਤਿ ਤੇਨ ਅਪਰਾਧੇਨ ਸੁਖਂ ਨ ਵਿਨ੍ਦਤਿ. ਨਿਨ੍ਦਿਯਪਸਂਸਾਯ ਹਿ ਪਸਂਸਿਯਨਿਨ੍ਦਾਯ ਚ ਸਮਕੋਵ ਵਿਪਾਕੋ.

ਸਬ੍ਬਸ੍ਸਾਪਿ ਸਹਾਪਿ ਅਤ੍ਤਨਾਤਿ ਸਬ੍ਬੇਨ ਸਕੇਨਪਿ ਅਤ੍ਤਨਾਪਿ ਸਦ੍ਧਿਂ ਯੋ ਅਕ੍ਖੇਸੁ ਧਨਪਰਾਜਯੋ ਨਾਮ, ਅਯਂ ਅਪ੍ਪਮਤ੍ਤਕੋ ਅਪਰਾਧੋ. ਯੋ ਸੁਗਤੇਸੂਤਿ ਯੋ ਪਨ ਸਮ੍ਮਗ੍ਗਤੇਸੁ ਪੁਗ੍ਗਲੇਸੁ ਚਿਤ੍ਤਂ ਪਦੁਸ੍ਸੇਯ੍ਯ, ਅਯਂ ਚਿਤ੍ਤਪਦੋਸੋਵ ਤਤੋ ਕਲਿਤੋ ਮਹਨ੍ਤਤਰੋ ਕਲਿ.

ਇਦਾਨਿ ਤਸ੍ਸ ਮਹਨ੍ਤਤਰਭਾਵਂ ਦਸ੍ਸੇਨ੍ਤੋ ਸਤਂ ਸਹਸ੍ਸਾਨਨ੍ਤਿਆਦਿਮਾਹ. ਤਤ੍ਥ ਸਤਂ ਸਹਸ੍ਸਾਨਨ੍ਤਿ ਨਿਰਬ੍ਬੁਦਗਣਨਾਯ ਸਤਸਹਸ੍ਸਂ. ਛਤ੍ਤਿਂਸਤੀਤਿ ਅਪਰਾਨਿ ਛਤ੍ਤਿਂਸਤਿ ਨਿਰਬ੍ਬੁਦਾਨਿ. ਪਞ੍ਚ ਚਾਤਿ ਅਬ੍ਬੁਦਗਣਨਾਯ ਪਞ੍ਚ ਅਬ੍ਬੁਦਾਨਿ. ਯਮਰਿਯਗਰਹੀਤਿ ਯਂ ਅਰਿਯੇ ਗਰਹਨ੍ਤੋ ਨਿਰਯਂ ਉਪਪਜ੍ਜਤਿ, ਤਤ੍ਥ ਏਤ੍ਤਕਂ ਆਯੁਪ੍ਪਮਾਣਨ੍ਤਿ. ਨਵਮਂ.

੧੦. ਕੋਕਾਲਿਕਸੁਤ੍ਤਵਣ੍ਣਨਾ

੧੮੧. ਦਸਮੇ ਕੋਕਾਲਿਕੋ ਭਿਕ੍ਖੁ ਯੇਨ ਭਗਵਾ ਤੇਨੁਪਸਙ੍ਕਮੀਤਿ, ਕੋ ਅਯਂ ਕੋਕਾਲਿਕੋ, ਕਸ੍ਮਾ ਚ ਉਪਸਙ੍ਕਮਿ? ਅਯਂ ਕਿਰ ਕੋਕਾਲਿਕਰਟ੍ਠੇ ਕੋਕਾਲਿਕਨਗਰੇ ਕੋਕਾਲਿਕਸੇਟ੍ਠਿਸ੍ਸ ਪੁਤ੍ਤੋ ਪਬ੍ਬਜਿਤ੍ਵਾ ਪਿਤਰਾ ਕਾਰਾਪਿਤੇ ਵਿਹਾਰੇ ਪਟਿਵਸਤਿ ਚੂਲ਼ਕੋਕਾਲਿਕੋਤਿ ਨਾਮੇਨ, ਨ ਦੇਵਦਤ੍ਤਸ੍ਸ ਸਿਸ੍ਸੋ. ਸੋ ਹਿ ਬ੍ਰਾਹ੍ਮਣਪੁਤ੍ਤੋ ਮਹਾਕੋਕਾਲਿਕੋ ਨਾਮ. ਭਗਵਤਿ ਪਨ ਸਾਵਤ੍ਥਿਯਂ ਵਿਹਰਨ੍ਤੇ ਦ੍ਵੇ ਅਗ੍ਗਸਾਵਕਾ ਪਞ੍ਚਮਤ੍ਤੇਹਿ ਭਿਕ੍ਖੁਸਤੇਹਿ ਸਦ੍ਧਿਂ ਜਨਪਦਚਾਰਿਕਂ ਚਰਮਾਨਾ ਉਪਕਟ੍ਠਾਯ ਵਸ੍ਸੂਪਨਾਯਿਕਾਯ ਵਿਵੇਕਾਵਾਸਂ ਵਸਿਤੁਕਾਮਾ ਤੇ ਭਿਕ੍ਖੂ ਉਯ੍ਯੋਜੇਤ੍ਵਾ ਅਤ੍ਤਨੋ ਪਤ੍ਤਚੀਵਰਮਾਦਾਯ ਤਸ੍ਮਿਂ ਜਨਪਦੇ ਤਂ ਨਗਰਂ ਪਤ੍ਵਾ ਤਂ ਵਿਹਾਰਂ ਅਗਮਂਸੁ. ਤਤ੍ਥ ਨੇਸਂ ਕੋਕਾਲਿਕੋ ਵਤ੍ਤਂ ਦਸ੍ਸੇਸਿ. ਤੇ ਤੇਨ ਸਦ੍ਧਿਂ ਸਮ੍ਮੋਦਿਤ੍ਵਾ, ‘‘ਆਵੁਸੋ, ਮਯਂ ਇਧ ਤੇਮਾਸਂ ਵਸਿਸ੍ਸਾਮ, ਮਾ ਕਸ੍ਸਚਿ ਆਰੋਚੇਹੀ’’ਤਿ ਪਟਿਞ੍ਞਂ ਗਹੇਤ੍ਵਾ ਵਸਿਂਸੁ. ਵਸਿਤ੍ਵਾ ਪਵਾਰਣਾਦਿਵਸੇ ਪਵਾਰੇਤ੍ਵਾ, ‘‘ਗਚ੍ਛਾਮ ਮਯਂ, ਆਵੁਸੋ’’ਤਿ ਕੋਕਾਲਿਕਂ ਆਪੁਚ੍ਛਿਂਸੁ. ਕੋਕਾਲਿਕੋ ‘‘ਅਜ੍ਜੇਕਦਿਵਸਂ, ਆਵੁਸੋ, ਵਸਿਤ੍ਵਾ ਸ੍ਵੇ ਗਮਿਸ੍ਸਥਾ’’ਤਿ ਵਤ੍ਵਾ ਦੁਤਿਯਦਿਵਸੇ ਨਗਰਂ ਪਵਿਸਿਤ੍ਵਾ ਮਨੁਸ੍ਸੇ ਆਮਨ੍ਤੇਸਿ – ‘‘ਆਵੁਸੋ, ਤੁਮ੍ਹੇ ਅਗ੍ਗਸਾਵਕੇ ਇਧਾਗਨ੍ਤ੍ਵਾ ਵਸਮਾਨੇਪਿ ਨ ਜਾਨਾਥ, ਨ ਨੇ ਕੋਚਿ ਪਚ੍ਚਯੇਨਾਪਿ ਨਿਮਨ੍ਤੇਤੀ’’ਤਿ. ਨਗਰਵਾਸਿਨੋ, ‘‘ਕਹਂ, ਭਨ੍ਤੇ, ਥੇਰਾ, ਕਸ੍ਮਾ ਨੋ ਨ ਆਰੋਚਯਿਤ੍ਥਾ’’ਤਿ? ਕਿਂ ਆਵੁਸੋ ਆਰੋਚਿਤੇਨ, ਕਿਂ ਨ ਪਸ੍ਸਥ ਦ੍ਵੇ ਭਿਕ੍ਖੂ ਥੇਰਾਸਨੇ ਨਿਸੀਦਨ੍ਤੇ, ਏਤੇ ਅਗ੍ਗਸਾਵਕਾਤਿ. ਤੇ ਖਿਪ੍ਪਂ ਸਨ੍ਨਿਪਤਿਤ੍ਵਾ ਸਪ੍ਪਿਫਾਣਿਤਾਦੀਨਿ ਚੇਵ ਚੀਵਰਦੁਸ੍ਸਾਨਿ ਚ ਸਂਹਰਿਂਸੁ.

ਕੋਕਾਲਿਕੋ ਚਿਨ੍ਤੇਸਿ – ‘‘ਪਰਮਪ੍ਪਿਚ੍ਛਾ ਅਗ੍ਗਸਾਵਕਾ ਪਯੁਤ੍ਤਵਾਚਾਯ ਉਪ੍ਪਨ੍ਨਂ ਲਾਭਂ ਨ ਸਾਦਿਯਿਸ੍ਸਨ੍ਤਿ, ਅਸਾਦਿਯਨ੍ਤਾ ‘ਆਵਾਸਿਕਸ੍ਸ ਦੇਥਾ’ਤਿ ਵਕ੍ਖਨ੍ਤੀ’’ਤਿ. ਤਂ ਤਂ ਲਾਭਂ ਗਾਹਾਪੇਤ੍ਵਾ ਥੇਰਾਨਂ ਸਨ੍ਤਿਕਂ ਅਗਮਾਸਿ. ਥੇਰਾ ਦਿਸ੍ਵਾਵ ‘‘ਇਮੇ ਪਚ੍ਚਯਾ ਨੇਵ ਅਮ੍ਹਾਕਂ, ਨ ਕੋਕਾਲਿਕਸ੍ਸ ਕਪ੍ਪਨ੍ਤੀ’’ਤਿ ਪਟਿਕ੍ਖਿਪਿਤ੍ਵਾ ਪਕ੍ਕਮਿਂਸੁ. ਕੋਕਾਲਿਕੋ ‘‘ਕਥਂ ਹਿ ਨਾਮ ਅਤ੍ਤਨਾ ਅਗਣ੍ਹਨ੍ਤਾ ਮਯ੍ਹਮ੍ਪਿ ਅਦਾਪੇਤ੍ਵਾ ਪਕ੍ਕਮਿਸ੍ਸਨ੍ਤੀ’’ਤਿ? ਆਘਾਤਂ ਉਪ੍ਪਾਦੇਸਿ. ਤੇਪਿ ਭਗਵਤੋ ਸਨ੍ਤਿਕਂ ਗਨ੍ਤ੍ਵਾ ਭਗਵਨ੍ਤਂ ਵਨ੍ਦਿਤ੍ਵਾ ਪੁਨ ਅਤ੍ਤਨੋ ਪਰਿਸਂ ਆਦਾਯ ਜਨਪਦਚਾਰਿਕਂ ਚਰਨ੍ਤਾ ਅਨੁਪੁਬ੍ਬੇਨ ਤਸ੍ਮਿਂ ਰਟ੍ਠੇ ਤਮੇਵ ਨਗਰਂ ਪਚ੍ਚਾਗਮਿਂਸੁ. ਨਾਗਰਾ ਥੇਰੇ ਸਞ੍ਜਾਨਿਤ੍ਵਾ ਸਹ ਪਰਿਕ੍ਖਾਰੇਹਿ ਦਾਨਂ ਸਜ੍ਜਿਤ੍ਵਾ ਨਗਰਮਜ੍ਝੇ ਮਣ੍ਡਪਂ ਕਤ੍ਵਾ ਦਾਨਂ ਅਦਂਸੁ, ਥੇਰਾਨਞ੍ਚ ਪਰਿਕ੍ਖਾਰੇ ਉਪਨਾਮੇਸੁਂ. ਥੇਰਾ ਭਿਕ੍ਖੁਸਙ੍ਘਸ੍ਸ ਨਿਯ੍ਯਾਦਯਿਂਸੁ. ਤਂ ਦਿਸ੍ਵਾ ਕੋਕਾਲਿਕੋ ਚਿਨ੍ਤੇਸਿ – ‘‘ਇਮੇ ਪੁਬ੍ਬੇ ਅਪ੍ਪਿਚ੍ਛਾ ਅਹੇਸੁਂ, ਇਦਾਨਿ ਪਾਪਿਚ੍ਛਾ ਜਾਤਾ, ਪੁਬ੍ਬੇਪਿ ਅਪ੍ਪਿਚ੍ਛਸਨ੍ਤੁਟ੍ਠਪਵਿਵਿਤ੍ਤਸਦਿਸਾ ਮਞ੍ਞੇ’’ਤਿ ਥੇਰੇ ਉਪਸਙ੍ਕਮਿਤ੍ਵਾ, ‘‘ਆਵੁਸੋ, ਤੁਮ੍ਹੇ ਪੁਬ੍ਬੇ ਅਪ੍ਪਿਚ੍ਛਾ ਵਿਯ, ਇਦਾਨਿ ਪਨ ਪਾਪਭਿਕ੍ਖੂ ਜਾਤਾ’’ਤਿ ਵਤ੍ਵਾ ‘‘ਮੂਲਟ੍ਠਾਨੇਯੇਵ ਨੇਸਂ ਪਤਿਟ੍ਠਂ ਭਿਨ੍ਦਿਸ੍ਸਾਮੀ’’ਤਿ ਤਰਮਾਨਰੂਪੋ ਨਿਕ੍ਖਮਿਤ੍ਵਾ ਸਾਵਤ੍ਥਿਂ ਗਨ੍ਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ. ਅਯਮੇਵ ਕੋਕਾਲਿਕੋ ਇਮਿਨਾ ਚ ਕਾਰਣੇਨ ਉਪਸਙ੍ਕਮੀਤਿ ਵੇਦਿਤਬ੍ਬੋ.

ਭਗਵਾ ਤਂ ਤੁਰਿਤਤੁਰਿਤਂ ਆਗਚ੍ਛਨ੍ਤਂ ਦਿਸ੍ਵਾਵ ਆਵਜ੍ਜੇਨ੍ਤੋ ਅਞ੍ਞਾਸਿ – ‘‘ਅਯਂ ਅਗ੍ਗਸਾਵਕੇ ਅਕ੍ਕੋਸਿਤੁਕਾਮੋ ਆਗਤੋ’’ਤਿ. ‘‘ਸਕ੍ਕਾ ਨੁ ਖੋ ਪਟਿਸੇਧੇਤੁ’’ਨ੍ਤਿ ਚ ਆਵਜ੍ਜੇਨ੍ਤੋ, ‘‘ਨ ਸਕ੍ਕਾ ਪਟਿਸੇਧੇਤੁਂ, ਥੇਰੇਸੁ ਅਪਰਜ੍ਝਿਤ੍ਵਾ ਕਾਲਙ੍ਕਤੋ ਏਕਂਸੇਨ ਪਦੁਮਨਿਰਯੇ ਨਿਬ੍ਬਤ੍ਤਿਸ੍ਸਤੀ’’ਤਿ ਦਿਸ੍ਵਾ, ‘‘ਸਾਰਿਪੁਤ੍ਤਮੋਗ੍ਗਲ੍ਲਾਨੇਪਿ ਨਾਮ ਗਰਹਨ੍ਤਂ ਸੁਤ੍ਵਾ ਨ ਨਿਸੇਧੇਤੀ’’ਤਿ ਵਾਦਮੋਚਨਤ੍ਥਂ ਅਰਿਯੂਪਵਾਦਸ੍ਸ ਚ ਮਹਾਸਾਵਜ੍ਜਭਾਵਦਸ੍ਸਨਤ੍ਥਂ ਮਾ ਹੇਵਨ੍ਤਿ ਤਿਕ੍ਖਤ੍ਤੁਂ ਪਟਿਸੇਧੇਸਿ. ਤਤ੍ਥ ਮਾ ਹੇਵਨ੍ਤਿ ਮਾ ਏਵਂ ਅਭਣਿ. ਸਦ੍ਧਾਯਿਕੋਤਿ ਸਦ੍ਧਾਯ ਆਕਰੋ ਪਸਾਦਾਵਹੋ ਸਦ੍ਧਾਤਬ੍ਬਵਚਨੋ ਵਾ. ਪਚ੍ਚਯਿਕੋਤਿ ਪਤ੍ਤਿਯਾਯਿਤਬ੍ਬਵਚਨੋ.

ਪਕ੍ਕਾਮੀਤਿ ਕਮ੍ਮਾਨੁਭਾਵੇਨ ਚੋਦਿਯਮਾਨੋ ਪਕ੍ਕਾਮਿ. ਓਕਾਸਕਤਂ ਹਿ ਕਮ੍ਮਂ ਨ ਸਕ੍ਕਾ ਪਟਿਬਾਹਿਤੁਂ, ਤਂ ਤਸ੍ਸ ਤਤ੍ਥ ਠਾਤੁਂ ਨ ਅਦਾਸਿ. ਅਚਿਰਪਕ੍ਕਨ੍ਤਸ੍ਸਾਤਿ ਪਕ੍ਕਨ੍ਤਸ੍ਸ ਸਤੋ ਨ ਚਿਰੇਨੇਵ. ਸਬ੍ਬੋ ਕਾਯੋ ਫੁਟੋ ਅਹੋਸੀਤਿ ਕੇਸਗ੍ਗਮਤ੍ਤਮ੍ਪਿ ਓਕਾਸਂ ਆਵਜ੍ਜੇਤ੍ਵਾ ਸਕਲਸਰੀਰਂ ਅਟ੍ਠੀਨਿ ਭਿਨ੍ਦਿਤ੍ਵਾ ਉਗ੍ਗਤਾਹਿ ਪੀਲ਼ਕਾਹਿ ਅਜ੍ਝੋਤ੍ਥਟਂ ਅਹੋਸਿ. ਯਸ੍ਮਾ ਪਨ ਬੁਦ੍ਧਾਨੁਭਾਵੇਨ ਤਥਾਰੂਪਂ ਕਮ੍ਮਂ ਬੁਦ੍ਧਾਨਂ ਸਮ੍ਮੁਖੀਭਾਵੇ ਵਿਪਾਕਂ ਨ ਦੇਤਿ, ਦਸ੍ਸਨੂਪਚਾਰੇ ਵਿਜਹਿਤਮਤ੍ਤੇ ਦੇਤਿ, ਤਸ੍ਮਾ ਤਸ੍ਸ ਅਚਿਰਪਕ੍ਕਨ੍ਤਸ੍ਸ ਪੀਲ਼ਕਾ ਉਟ੍ਠਹਿਂਸੁ. ਕਲਾਯਮਤ੍ਤਿਯੋਤਿ ਚਣਕਮਤ੍ਤਿਯੋ. ਬੇਲੁਵਸਲਾਟੁਕਮਤ੍ਤਿਯੋਤਿ ਤਰੁਣਬੇਲੁਵਮਤ੍ਤਿਯੋ. (ਬਿਲ੍ਲਮਤ੍ਤਿਯੋਤਿ ਮਹਾਬੇਲੁਵਮਤ੍ਤਿਯੋ.) ਪਭਿਜ੍ਜਿਂਸੂਤਿ ਭਿਜ੍ਜਿਂਸੁ. ਤਾਸੁ ਭਿਨ੍ਨਾਸੁ ਸਕਲਸਰੀਰਂ ਪਨਸਪਕ੍ਕਂ ਵਿਯ ਅਹੋਸਿ. ਸੋ ਪਕ੍ਕੇਨ ਗਤ੍ਤੇਨ ਜੇਤਵਨਦ੍ਵਾਰਕੋਟ੍ਠਕੇ ਵਿਸਗਿਲਿਤੋ ਮਚ੍ਛੋ ਵਿਯ ਕਦਲਿਪਤ੍ਤੇਸੁ ਸਯਿ. ਅਥ ਧਮ੍ਮਸਵਨਤ੍ਥਂ ਆਗਤਾਗਤਾ ਮਨੁਸ੍ਸਾ – ‘‘ਧਿ ਕੋਕਾਲਿਕ, ਧਿ ਕੋਕਾਲਿਕ, ਅਯੁਤ੍ਤਮਕਾਸਿ, ਅਤ੍ਤਨੋਯੇਵ ਮੁਖਂ ਨਿਸ੍ਸਾਯ ਅਨਯਬ੍ਯਸਨਂ ਪਤ੍ਤੋ’’ਤਿ ਆਹਂਸੁ. ਤੇਸਂ ਸੁਤ੍ਵਾ ਆਰਕ੍ਖਦੇਵਤਾ ਧਿ-ਕਾਰਂ ਅਕਂਸੁ. ਆਰਕ੍ਖਕਦੇਵਤਾਨਂ ਆਕਾਸਦੇਵਤਾਤਿ ਇਮਿਨਾ ਉਪਾਯੇਨ ਯਾਵ ਅਕਨਿਟ੍ਠਭਵਨਾ ਏਕਧਿਕਾਰੋ ਉਦਪਾਦਿ. ਅਥਸ੍ਸ ਉਪਜ੍ਝਾਯੋ ਆਗਨ੍ਤ੍ਵਾ ਓਵਾਦਂ ਅਗਣ੍ਹਨ੍ਤਂ ਞਤ੍ਵਾ ਗਰਹਿਤ੍ਵਾ ਪਕ੍ਕਾਮਿ.

ਕਾਲਮਕਾਸੀਤਿ ਉਪਜ੍ਝਾਯੇ ਪਕ੍ਕਨ੍ਤੇ ਕਾਲਮਕਾਸਿ. ਪਦੁਮਂ ਨਿਰਯਨ੍ਤਿ ਪਾਟਿਯੇਕ੍ਕੋ ਪਦੁਮਨਿਰਯੋ ਨਾਮ ਨਤ੍ਥਿ, ਅਵੀਚਿਮਹਾਨਿਰਯਮ੍ਹਿਯੇਵ ਪਨ ਪਦੁਮਗਣਨਾਯ ਪਚ੍ਚਿਤਬ੍ਬੇ ਏਕਸ੍ਮਿਂ ਠਾਨੇ ਨਿਬ੍ਬਤ੍ਤਿ.

ਵੀਸਤਿਖਾਰਿਕੋਤਿ ਮਾਗਧਕੇਨ ਪਤ੍ਥੇਨ ਚਤ੍ਤਾਰੋ ਪਤ੍ਥਾ ਕੋਸਲਰਟ੍ਠੇ ਏਕਪਤ੍ਥੋ ਹੋਤਿ, ਤੇਨ ਪਤ੍ਥੇਨ ਚਤ੍ਤਾਰੋ ਪਤ੍ਥਾ ਆਲ਼੍ਹਕਂ, ਚਤ੍ਤਾਰਿ ਆਲ਼੍ਹਕਾਨਿ ਦੋਣਂ, ਚਤੁਦੋਣਾ ਮਾਨਿਕਾ, ਚਤੁਮਾਨਿਕਾ ਖਾਰੀ, ਤਾਯ ਖਾਰਿਯਾ ਵੀਸਤਿਖਾਰਿਕੋ. ਤਿਲਵਾਹੋਤਿ ਮਾਗਧਕਾਨਂ ਸੁਖੁਮਤਿਲਾਨਂ ਤਿਲਸਕਟਂ. ਅਬ੍ਬੁਦੋ ਨਿਰਯੋਤਿ ਅਬ੍ਬੁਦੋ ਨਾਮ ਪਾਟਿਯੇਕ੍ਕੋ ਨਿਰਯੋ ਨਤ੍ਥਿ. ਅਵੀਚਿਮ੍ਹਿਯੇਵ ਪਨ ਅਬ੍ਬੁਦਗਣਨਾਯ ਪਚ੍ਚਿਤਬ੍ਬਟ੍ਠਾਨਸ੍ਸੇਤਂ ਨਾਮਂ. ਨਿਰਬ੍ਬੁਦਾਦੀਸੁਪਿ ਏਸੇਵ ਨਯੋ.

ਵਸ੍ਸਗਣਨਾਪਿ ਪਨੇਤ੍ਥ ਏਵਂ ਵੇਦਿਤਬ੍ਬਾ – ਯਥੇਵ ਹਿ ਸਤਂ ਸਤਸਹਸ੍ਸਾਨਿ ਕੋਟਿ ਹੋਤਿ, ਏਵਂ ਸਤਂ ਸਤਸਹਸ੍ਸਕੋਟਿਯੋ ਪਕੋਟਿ ਨਾਮ ਹੋਤਿ, ਸਤਂ ਸਤਸਹਸ੍ਸਪਕੋਟਿਯੋ ਕੋਟਿਪਕੋਟਿ ਨਾਮ, ਸਤਂ ਸਤਸਹਸ੍ਸਕੋਟਿਪਕੋਟਿਯੋ ਨਹੁਤਂ, ਸਤਂ ਸਤਸਹਸ੍ਸਨਹੁਤਾਨਿ ਨਿਨ੍ਨਹੁਤਂ, ਸਤਂ ਸਤਸਹਸ੍ਸਨਿਨ੍ਨਹੁਤਾਨਿ ਏਕਂ ਅਬ੍ਬੁਦਂ, ਤਤੋ ਵੀਸਤਿਗੁਣਂ ਨਿਰਬ੍ਬੁਦਂ. ਏਸੇਵ ਨਯੋ ਸਬ੍ਬਤ੍ਥਾਤਿ. ਦਸਮਂ.

ਪਠਮੋ ਵਗ੍ਗੋ.