੨. ਅਯ੍ਯਿਕਾਸੁਤ੍ਤਵਣ੍ਣਨਾ

੧੩੩. ਦੁਤਿਯੇ ਜਿਣ੍ਣਾਤਿ ਜਰਾਜਿਣ੍ਣਾ. ਵੁਡ੍ਢਾਤਿ ਵਯੋਵੁਡ੍ਢਾ. ਮਹਲ੍ਲਿਕਾਤਿ ਜਾਤਿਮਹਲ੍ਲਿਕਾ. ਅਦ੍ਧਗਤਾਤਿ ਅਦ੍ਧਂ ਚਿਰਕਾਲਂ ਅਤਿਕ੍ਕਨ੍ਤਾ. ਵਯੋਅਨੁਪ੍ਪਤ੍ਤਾਤਿ ਪਚ੍ਛਿਮਵਯਂ ਸਮ੍ਪਤ੍ਤਾ. ਪਿਯਾ ਮਨਾਪਾਤਿ ਰਞ੍ਞੋ ਕਿਰ ਮਾਤਰਿ ਮਤਾਯ ਅਯ੍ਯਿਕਾ ਮਾਤੁਟ੍ਠਾਨੇ ਠਤ੍ਵਾ ਪਟਿਜਗ੍ਗਿ, ਤੇਨਸ੍ਸ ਅਯ੍ਯਿਕਾਯ ਬਲਵਪੇਮਂ ਉਪ੍ਪਜ੍ਜਿ. ਤਸ੍ਮਾ ਏਵਮਾਹ. ਹਤ੍ਥਿਰਤਨੇਨਾਤਿ ਸਤਸਹਸ੍ਸਗ੍ਘਨਕੋ ਹਤ੍ਥੀ ਸਤਸਹਸ੍ਸਗ੍ਘਨਕੇਨ ਅਲਙ੍ਕਾਰੇਨ ਅਲਙ੍ਕਤੋ ਹਤ੍ਥਿਰਤਨਂ ਨਾਮ. ਅਸ੍ਸਰਤਨੇਪਿ ਏਸੇਵ ਨਯੋ. ਗਾਮਵਰੋਪਿ ਸਤਸਹਸ੍ਸੁਟ੍ਠਾਨਕਗਾਮੋਵ. ਸਬ੍ਬਾਨਿ ਤਾਨਿ ਭੇਦਨਧਮ੍ਮਾਨੀਤਿ ਤੇਸੁ ਹਿ ਕਿਞ੍ਚਿ ਕਰਿਯਮਾਨਮੇਵ ਭਿਜ੍ਜਤਿ, ਕਿਞ੍ਚਿ ਕਤਪਰਿਯੋਸਿਤਂ ਚਕ੍ਕਤੋ ਅਨਪਨੀਤਮੇਵ, ਕਿਞ੍ਚਿ ਅਪਨੇਤ੍ਵਾ ਭੂਮਿਯਂ ਠਪਿਤਮਤ੍ਤਂ, ਕਿਞ੍ਚਿ ਤਤੋ ਪਰਂ, ਏਵਮੇਵ ਸਤ੍ਤੇਸੁਪਿ ਕੋਚਿ ਪਟਿਸਨ੍ਧਿਂ ਗਹੇਤ੍ਵਾ ਮਰਤਿ, ਕੋਚਿ ਮੂਲ਼੍ਹਗਬ੍ਭਾਯ ਮਾਤਰਿ ਮਾਤੁਕੁਚ੍ਛਿਤੋ ਅਨਿਕ੍ਖਨ੍ਤੋਵ, ਕੋਚਿ ਨਿਕ੍ਖਨ੍ਤਮਤ੍ਤੋ, ਕੋਚਿ ਤਤੋ ਪਰਨ੍ਤਿ. ਤਸ੍ਮਾ ਏਵਮਾਹ. ਦੁਤਿਯਂ.

੧੩੪. ਤਤਿਯੇ ਸਬ੍ਬਂ ਉਤ੍ਤਾਨਮੇਵ. ਤਤਿਯਂ.