੬. ਮਲ੍ਲਿਕਾਸੁਤ੍ਤਵਣ੍ਣਨਾ

੧੨੭. ਛਟ੍ਠੇ ਉਪਸਙ੍ਕਮੀਤਿ ਮਲ੍ਲਿਕਾਯ ਦੇਵਿਯਾ ਗਬ੍ਭਵੁਟ੍ਠਾਨਕਾਲੇ ਸੂਤਿਘਰਂ ਪਟਿਜਗ੍ਗਾਪੇਤ੍ਵਾ ਆਰਕ੍ਖਂ ਦਤ੍ਵਾ ਉਪਸਙ੍ਕਮਿ. ਅਨਤ੍ਤਮਨੋ ਅਹੋਸੀਤਿ, ‘‘ਦੁਗ੍ਗਤਕੁਲਸ੍ਸ ਮੇ ਧੀਤੁ ਮਹਨ੍ਤਂ ਇਸ੍ਸਰਿਯਂ ਦਿਨ੍ਨਂ, ਸਚੇ ਪੁਤ੍ਤਂ ਅਲਭਿਸ੍ਸ, ਮਹਨ੍ਤਂ ਸਕ੍ਕਾਰਂ ਅਧਿਗਮਿਸ੍ਸ, ਤਤੋ ਦਾਨਿ ਪਰਿਹੀਨਾ’’ਤਿ ਅਨਤ੍ਤਮਨੋ ਅਹੋਸਿ. ਸੇਯ੍ਯਾਤਿ ਦਨ੍ਧਪਞ੍ਞਸ੍ਮਾ ਏਲਮੂਗਪੁਤ੍ਤਤੋ ਏਕਚ੍ਚਾ ਇਤ੍ਥੀਯੇਵ ਸੇਯ੍ਯਾ. ਪੋਸਾਤਿ ਪੋਸੇਹਿ. ਜਨਾਧਿਪਾਤਿ ਜਨਾਧਿਭੁਂ ਰਾਜਾਨਂ ਆਲਪਤਿ. ਸਸ੍ਸੁਦੇਵਾਤਿ ਸਸ੍ਸੁਸਸੁਰਦੇਵਤਾ. ਦਿਸਮ੍ਪਤੀਤਿ ਦਿਸਾਜੇਟ੍ਠਕਾ. ਤਾਦਿਸਾ ਸੁਭਗਿਯਾਤਿ ਤਾਦਿਸਾਯ ਸੁਭਰਿਯਾਯ. ਛਟ੍ਠਂ.