੩. ਸਮ੍ਬਰਿਮਾਯਾਸੁਤ੍ਤਵਣ੍ਣਨਾ

੨੬੯. ਤਤਿਯੇ ਆਬਾਧਿਕੋਤਿ ਇਸਿਗਣੇਨ ਅਭਿਸਪਕਾਲੇ ਉਪ੍ਪਨ੍ਨਾਬਾਧੇਨ ਆਬਾਧਿਕੋ. ਵਾਚੇਹਿ ਮਨ੍ਤਿ ਸਚੇ ਮਂ ਸਮ੍ਬਰਿਮਾਯਂ ਵਾਚੇਸਿ, ਏਵਮਹਂ ਤਮ੍ਪਿ ਤਿਕਿਚ੍ਛਿਸ੍ਸਾਮੀਤਿ ਵਦਤਿ. ਮਾ ਖੋ ਤ੍ਵਂ, ਮਾਰਿਸ, ਵਾਚੇਸੀਤਿ ਵਿਨਾਪਿ ਤਾਵ ਸਮ੍ਬਰਿਮਾਯਂ ਸਕ੍ਕੋ ਅਮ੍ਹੇ ਬਾਧਤਿ, ਯਦਿ ਪਨ ਤਂ ਜਾਨਿਸ੍ਸਤਿ, ਨਟ੍ਠਾ ਮਯਂ, ਮਾ ਅਤ੍ਤਨੋ ਏਕਸ੍ਸ ਅਤ੍ਥਾਯ ਅਮ੍ਹੇ ਨਾਸੇਹੀਤਿ ਵਤ੍ਵਾ ਨਿਵਾਰਯਿਂਸੁ. ਸਮ੍ਬਰੋਵ ਸਤਂ ਸਮਨ੍ਤਿ ਯਥਾ ਸਮ੍ਬਰੋ ਅਸੁਰਿਨ੍ਦੋ ਮਾਯਾਵੀ ਮਾਯਂ ਪਯੋਜੇਤ੍ਵਾ ਵਸ੍ਸਸਤਂ ਨਿਰਯੇ ਪਕ੍ਕੋ, ਏਵਂ ਪਚ੍ਚਤਿ. ਤੁਮ੍ਹੇ ਧਮ੍ਮਿਕਾਵ, ਅਲਂ ਵੋ ਮਾਯਾਯਾਤਿ ਵਦਤਿ. ਕਿਂ ਪਨ ਸਕ੍ਕੋ ਤਸ੍ਸ ਕੋਧਂ ਤਿਕਿਚ੍ਛਿਤੁਂ ਸਕ੍ਕੁਣੇਯ੍ਯਾਤਿ? ਆਮ ਸਕ੍ਕੁਣੇਯ੍ਯ. ਕਥਂ? ਤਦਾ ਕਿਰ ਸੋ ਇਸਿਗਣੋ ਧਰਤਿਯੇਵ, ਤਸ੍ਮਾ ਨਂ ਇਸੀਨਂ ਸਨ੍ਤਿਕਂ ਨੇਤ੍ਵਾ ਖਮਾਪੇਯ੍ਯ, ਏਵਮਸ੍ਸ ਫਾਸੁ ਭਵੇਯ੍ਯ. ਤੇਨ ਪਨ ਵਞ੍ਚਿਤਤ੍ਤਾ ਤਥਾ ਅਕਤ੍ਵਾ ਪਕ੍ਕਨ੍ਤੋਵ. ਤਤਿਯਂ.