੮. ਗਹਟ੍ਠਵਨ੍ਦਨਾਸੁਤ੍ਤਵਣ੍ਣਨਾ

੨੬੪. ਅਟ੍ਠਮੇ ਪੁਥੁਦ੍ਦਿਸਾਤਿ ਚਤਸ੍ਸੋ ਦਿਸਾ ਚਤਸ੍ਸੋ ਅਨੁਦਿਸਾ ਚ. ਭੁਮ੍ਮਾਤਿ ਭੂਮਿਵਾਸਿਨੋ. ਚਿਰਰਤ੍ਤਸਮਾਹਿਤੇਤਿ ਉਪਚਾਰਪ੍ਪਨਾਹਿ ਚਿਰਰਤ੍ਤਸਮਾਹਿਤਚਿਤ੍ਤੇ. ਵਨ੍ਦੇਤਿ ਵਨ੍ਦਾਮਿ. ਬ੍ਰਹ੍ਮਚਰਿਯਪਰਾਯਣੇਤਿ ਦਸਪਿ ਵਸ੍ਸਾਨਿ ਵੀਸਤਿਪਿ ਵਸ੍ਸਾਨਿ…ਪੇ… ਸਟ੍ਠਿਪਿ ਵਸ੍ਸਾਨਿ ਆਪਾਣਕੋਟਿਕਂ ਏਕਸੇਯ੍ਯਂ ਏਕਭਤ੍ਤਨ੍ਤਿਆਦਿਕਂ ਸੇਟ੍ਠਚਰਿਯਂ ਬ੍ਰਹ੍ਮਚਰਿਯਂ ਚਰਮਾਨੇਤਿ ਅਤ੍ਥੋ. ਪੁਞ੍ਞਕਰਾਤਿ ਚਤੁਪਚ੍ਚਯਦਾਨਂ ਕੁਸੁਮ੍ਭਸੁਮਨਪੂਜਾ ਦੀਪਸਹਸ੍ਸਜਾਲਨ੍ਤਿ ਏਵਮਾਦਿਪੁਞ੍ਞਕਾਰਕਾ. ਸੀਲਵਨ੍ਤੋਤਿ ਉਪਾਸਕਤ੍ਤੇ ਪਤਿਟ੍ਠਾਯ ਪਞ੍ਚਹਿਪਿ ਦਸਹਿਪਿ ਸੀਲੇਹਿ ਸਮਨ੍ਨਾਗਤਾ. ਧਮ੍ਮੇਨ ਦਾਰਂ ਪੋਸੇਨ੍ਤੀਤਿ ਉਮਙ੍ਗਭਿਨ੍ਦਨਾਦੀਨਿ ਅਕਤ੍ਵਾ ਧਮ੍ਮਿਕੇਹਿ ਕਸਿਗੋਰਕ੍ਖਵਣਿਜ੍ਜਾਦੀਹਿ ਪੁਤ੍ਤਦਾਰਂ ਪੋਸੇਨ੍ਤਿ. ਪਮੁਖੋ ਰਥਮਾਰੁਹੀਤਿ ਦੇਵਾਨਂ ਪਮੁਖੋ ਸੇਟ੍ਠੋ ਰਥਂ ਆਰੁਹਿ. ਅਟ੍ਠਮਂ.