੯. ਅਰਞ੍ਞਾਯਤਨਇਸਿਸੁਤ੍ਤਵਣ੍ਣਨਾ

੨੫੫. ਨਵਮੇ ਪਣ੍ਣਕੁਟੀਸੁ ਸਮ੍ਮਨ੍ਤੀਤਿ ਹਿਮਵਨ੍ਤਪਦੇਸੇ ਰਮਣੀਯੇ ਅਰਞ੍ਞਾਯਤਨੇ ਰਤ੍ਤਿਟ੍ਠਾਨਦਿਵਾਟ੍ਠਾਨਚਙ੍ਕਮਨਾਦੀਹਿ ਸਮ੍ਪਨ੍ਨਾਸੁ ਪਣ੍ਣਸਾਲਾਸੁ ਵਸਨ੍ਤਿ. ਸਕ੍ਕੋ ਚ ਦੇਵਾਨਮਿਨ੍ਦੋ ਵੇਪਚਿਤ੍ਤਿ ਚਾਤਿ ਇਮੇ ਦ੍ਵੇ ਜਨਾ ਜਾਮਾਤਿਕਸਸੁਰਾ ਕਾਲੇਨ ਕਲਹਂ ਕਰੋਨ੍ਤਿ, ਕਾਲੇਨ ਏਕਤੋ ਚਰਨ੍ਤਿ, ਇਮਸ੍ਮਿਂ ਪਨ ਕਾਲੇ ਏਕਤੋ ਚਰਨ੍ਤਿ. ਪਟਲਿਯੋਤਿ ਗਣਙ੍ਗਣੂਪਾਹਨਾ. ਖਗ੍ਗਂ ਓਲਗ੍ਗੇਤ੍ਵਾਤਿ ਖਗ੍ਗਂ ਅਂਸੇ ਓਲਗ੍ਗੇਤ੍ਵਾ. ਛਤ੍ਤੇਨਾਤਿ ਦਿਬ੍ਬਸੇਤਚ੍ਛਤ੍ਤੇਨ ਮਤ੍ਥਕੇ ਧਾਰਯਮਾਨੇਨ. ਅਪਬ੍ਯਾਮਤੋ ਕਰਿਤ੍ਵਾਤਿ ਬ੍ਯਾਮਤੋ ਅਕਤ੍ਵਾ. ਚਿਰਦਿਕ੍ਖਿਤਾਨਨ੍ਤਿ ਚਿਰਸਮਾਦਿਣ੍ਣਵਤਾਨਂ. ਇਤੋ ਪਟਿਕ੍ਕਮ੍ਮਾਤਿ ‘‘ਇਤੋ ਪਕ੍ਕਮ ਪਰਿਵਜ੍ਜਯ, ਮਾ ਉਪਰਿਵਾਤੇ ਤਿਟ੍ਠਾ’’ਤਿ ਵਦਨ੍ਤਿ. ਨ ਹੇਤ੍ਥ ਦੇਵਾਤਿ ਏਤਸ੍ਮਿਂ ਸੀਲਵਨ੍ਤਾਨਂ ਗਨ੍ਧੇ ਦੇਵਾ ਨ ਪਟਿਕ੍ਕੂਲਸਞ੍ਞਿਨੋ, ਇਟ੍ਠਕਨ੍ਤਮਨਾਪਸਞ੍ਞਿਨੋਯੇਵਾਤਿ ਦੀਪੇਤਿ. ਨਵਮਂ.