੫. ਆਦਿਤ੍ਤਵਗ੍ਗੋ

੧. ਆਦਿਤ੍ਤਸੁਤ੍ਤਵਣ੍ਣਨਾ

੪੧. ਆਦਿਤ੍ਤਵਗ੍ਗਸ੍ਸ ਪਠਮੇ ਜਰਾਯ ਮਰਣੇਨ ਚਾਤਿ ਦੇਸਨਾਸੀਸਮੇਤਂ, ਰਾਗਾਦੀਹਿ ਪਨ ਏਕਾਦਸਹਿ ਅਗ੍ਗੀਹਿ ਲੋਕੋ ਆਦਿਤ੍ਤੋਵ. ਦਾਨੇਨਾਤਿ ਦਾਨਚੇਤਨਾਯ. ਦਿਨ੍ਨਂ ਹੋਤਿ ਸੁਨੀਹਤਨ੍ਤਿ ਦਾਨਪੁਞ੍ਞਚੇਤਨਾਹਿ ਦਾਯਕਸ੍ਸੇਵ ਹੋਤਿ ਘਰਸਾਮਿਕਸ੍ਸ ਵਿਯ ਨੀਹਤਭਣ੍ਡਕਂ, ਤੇਨੇਤਂ ਵੁਤ੍ਤਂ. ਚੋਰਾ ਹਰਨ੍ਤੀਤਿ ਅਦਿਨ੍ਨੇ ਭੋਗੇ ਚੋਰਾਪਿ ਹਰਨ੍ਤਿ ਰਾਜਾਨੋਪਿ, ਅਗ੍ਗਿਪਿ ਡਹਤਿ, ਠਪਿਤਟ੍ਠਾਨੇਪਿ ਨਸ੍ਸਨ੍ਤਿ. ਅਨ੍ਤੇਨਾਤਿ ਮਰਣੇਨ. ਸਰੀਰਂ ਸਪਰਿਗ੍ਗਹਨ੍ਤਿ ਸਰੀਰਞ੍ਚੇਵ ਚੋਰਾਦੀਨਂ ਵਸੇਨ ਅਵਿਨਟ੍ਠਭੋਗੇ ਚ. ਸਗ੍ਗਮੁਪੇਤੀਤਿ ਵੇਸ੍ਸਨ੍ਤਰਮਹਾਰਾਜਾਦਯੋ ਵਿਯ ਸਗ੍ਗੇ ਨਿਬ੍ਬਤ੍ਤਤੀਤਿ. ਪਠਮਂ.

੨. ਕਿਂਦਦਸੁਤ੍ਤਵਣ੍ਣਨਾ

੪੨. ਦੁਤਿਯੇ ਅਨ੍ਨਦੋਤਿ ਯਸ੍ਮਾ ਅਤਿਬਲਵਾਪਿ ਦ੍ਵੇ ਤੀਣਿ ਭਤ੍ਤਾਨਿ ਅਭੁਤ੍ਵਾ ਉਟ੍ਠਾਤੁਂ ਨ ਸਕ੍ਕੋਤਿ, ਭੁਤ੍ਵਾ ਪਨ ਦੁਬ੍ਬਲੋਪਿ ਹੁਤ੍ਵਾ ਬਲਸਮ੍ਪਨ੍ਨੋ ਹੋਤਿ, ਤਸ੍ਮਾ ‘‘ਅਨ੍ਨਦੋ ਬਲਦੋ’’ਤਿ ਆਹ. ਵਤ੍ਥਦੋਤਿ ਯਸ੍ਮਾ ਸੁਰੂਪੋਪਿ ਦੁਚ੍ਚੋਲ਼ੋ ਵਾ ਅਚੋਲ਼ੋ ਵਾ ਵਿਰੂਪੋ ਹੋਤਿ ਓਹੀਲ਼ਿਤੋ ਦੁਦ੍ਦਸਿਕੋ, ਵਤ੍ਥਚ੍ਛਨ੍ਨੋ ਦੇਵਪੁਤ੍ਤੋ ਵਿਯ ਸੋਭਤਿ, ਤਸ੍ਮਾ ‘‘ਵਤ੍ਥਦੋ ਹੋਤਿ ਵਣ੍ਣਦੋ’’ਤਿ ਆਹ. ਯਾਨਦੋਤਿ ਹਤ੍ਥਿਯਾਨਾਦੀਨਂ ਦਾਯਕੋ. ਤੇਸੁ ਪਨ –

‘‘ਨ ਹਤ੍ਥਿਯਾਨਂ ਸਮਣਸ੍ਸ ਕਪ੍ਪਤਿ,

ਨ ਅਸ੍ਸਯਾਨਂ, ਨ ਰਥੇਨ ਯਾਤੁਂ;

ਇਦਞ੍ਚ ਯਾਨਂ ਸਮਣਸ੍ਸ ਕਪ੍ਪਤਿ,

ਉਪਾਹਨਾ ਰਕ੍ਖਤੋ ਸੀਲਖਨ੍ਧ’’ਨ੍ਤਿ.

ਤਸ੍ਮਾ ਛਤ੍ਤੁਪਾਹਨਕਤ੍ਤਰਯਟ੍ਠਿਮਞ੍ਚਪੀਠਾਨਂ ਦਾਯਕੋ, ਯੋ ਚ ਮਗ੍ਗਂ ਸੋਧੇਤਿ, ਨਿਸ੍ਸੇਣਿਂ ਕਰੋਤਿ, ਸੇਤੁਂ ਕਰੋਤਿ, ਨਾਵਂ ਪਟਿਯਾਦੇਤਿ, ਸਬ੍ਬੋਪਿ ਯਾਨਦੋਵ ਹੋਤਿ. ਸੁਖਦੋ ਹੋਤੀਤਿ ਯਾਨਸ੍ਸ ਸੁਖਾਵਹਨਤੋ ਸੁਖਦੋ ਨਾਮ ਹੋਤਿ. ਚਕ੍ਖੁਦੋਤਿ ਅਨ੍ਧਕਾਰੇ ਚਕ੍ਖੁਮਨ੍ਤਾਨਮ੍ਪਿ ਰੂਪਦਸ੍ਸਨਾਭਾਵਤੋ ਦੀਪਦੋ ਚਕ੍ਖੁਦੋ ਨਾਮ ਹੋਤਿ, ਅਨੁਰੁਦ੍ਧਤ੍ਥੇਰੋ ਵਿਯ ਦਿਬ੍ਬਚਕ੍ਖੁ ਸਮ੍ਪਦਮ੍ਪਿ ਲਭਤਿ.

ਸਬ੍ਬਦਦੋ ਹੋਤੀਤਿ ਸਬ੍ਬੇਸਂਯੇਵ ਬਲਾਦੀਨਂ ਦਾਯਕੋ ਹੋਤਿ. ਦ੍ਵੇ ਤਯੋ ਗਾਮੇ ਪਿਣ੍ਡਾਯ ਚਰਿਤ੍ਵਾ ਕਿਞ੍ਚਿ ਅਲਦ੍ਧਾ ਆਗਤਸ੍ਸਾਪਿ ਸੀਤਲਾਯ ਪੋਕ੍ਖਰਣਿਯਾ ਨ੍ਹਾਯਿਤ੍ਵਾ ਪਤਿਸ੍ਸਯਂ ਪਵਿਸਿਤ੍ਵਾ ਮੁਹੁਤ੍ਤਂ ਮਞ੍ਚੇ ਨਿਪਜ੍ਜਿਤ੍ਵਾ ਉਟ੍ਠਾਯ ਨਿਸਿਨ੍ਨਸ੍ਸ ਹਿ ਕਾਯੇ ਬਲਂ ਆਹਰਿਤ੍ਵਾ ਪਕ੍ਖਿਤ੍ਤਂ ਵਿਯ ਹੋਤਿ. ਬਹਿ ਵਿਚਰਨ੍ਤਸ੍ਸ ਚ ਕਾਯੇ ਵਣ੍ਣਾਯਤਨਂ ਵਾਤਾਤਪੇਹਿ ਝਾਯਤਿ, ਪਤਿਸ੍ਸਯਂ ਪਵਿਸਿਤ੍ਵਾ ਦ੍ਵਾਰਂ ਪਿਧਾਯ ਮੁਹੁਤ੍ਤਂ ਨਿਪਨ੍ਨਸ੍ਸ ਚ ਵਿਸਭਾਗਸਨ੍ਤਤਿ ਵੂਪਸਮ੍ਮਤਿ, ਸਭਾਗਸਨ੍ਤਤਿ ਓਕ੍ਕਮਤਿ, ਵਣ੍ਣਾਯਤਨਂ ਆਹਰਿਤ੍ਵਾ ਪਕ੍ਖਿਤ੍ਤਂ ਵਿਯ ਹੋਤਿ. ਬਹਿ ਵਿਚਰਨ੍ਤਸ੍ਸ ਪਾਦੇ ਕਣ੍ਟਕੋ ਵਿਜ੍ਝਤਿ, ਖਾਣੁ ਪਹਰਤਿ, ਸਰੀਸਪਾਦਿਪਰਿਸ੍ਸਯੋ ਚੇਵ ਚੋਰਭਯਞ੍ਚ ਉਪ੍ਪਜ੍ਜਤਿ, ਪਤਿਸ੍ਸਯਂ ਪਵਿਸਿਤ੍ਵਾ ਦ੍ਵਾਰਂ ਪਿਧਾਯ ਨਿਪਨ੍ਨਸ੍ਸ ਸਬ੍ਬੇਤੇ ਪਰਿਸ੍ਸਯਾ ਨ ਹੋਨ੍ਤਿ, ਧਮ੍ਮਂ ਸਜ੍ਝਾਯਨ੍ਤਸ੍ਸ ਧਮ੍ਮਪੀਤਿਸੁਖਂ, ਕਮ੍ਮਟ੍ਠਾਨਂ ਮਨਸਿਕਰੋਨ੍ਤਸ੍ਸ ਉਪਸਮਸੁਖਂ ਉਪ੍ਪਜ੍ਜਤਿ. ਤਥਾ ਬਹਿ ਵਿਚਰਨ੍ਤਸ੍ਸ ਚ ਸੇਦਾ ਮੁਚ੍ਚਨ੍ਤਿ, ਅਕ੍ਖੀਨਿ ਫਨ੍ਦਨ੍ਤਿ, ਸੇਨਾਸਨਂ ਪਵਿਸਨਕ੍ਖਣੇ ਕੂਪੇ ਓਤਿਣ੍ਣੋ ਵਿਯ ਹੋਤਿ, ਮਞ੍ਚਪੀਠਾਦੀਨਿ ਨ ਪਞ੍ਞਾਯਨ੍ਤਿ. ਮੁਹੁਤ੍ਤਂ ਨਿਸਿਨ੍ਨਸ੍ਸ ਪਨ ਅਕ੍ਖਿਪਸਾਦੋ ਆਹਰਿਤ੍ਵਾ ਪਕ੍ਖਿਤ੍ਤੋ ਵਿਯ ਹੋਤਿ, ਦ੍ਵਾਰਕਵਾਟਵਾਤਪਾਨਮਞ੍ਚਪੀਠਾਦੀਨਿ ਪਞ੍ਞਾਯਨ੍ਤਿ. ਤੇਨ ਵੁਤ੍ਤਂ – ‘‘ਸੋ ਚ ਸਬ੍ਬਦਦੋ ਹੋਤਿ, ਯੋ ਦਦਾਤਿ ਉਪਸ੍ਸਯ’’ਨ੍ਤਿ.

ਅਮਤਂਦਦੋ ਚ ਸੋ ਹੋਤੀਤਿ ਪਣੀਤਭੋਜਨਸ੍ਸ ਪਤ੍ਤਂ ਪੂਰੇਨ੍ਤੋ ਵਿਯ ਅਮਰਣਦਾਨਂ ਨਾਮ ਦੇਤਿ. ਯੋ ਧਮ੍ਮਮਨੁਸਾਸਤੀਤਿ ਯੋ ਧਮ੍ਮਂ ਅਨੁਸਾਸਤਿ, ਅਟ੍ਠਕਥਂ ਕਥੇਤਿ, ਪਾਲ਼ਿਂ ਵਾਚੇਤਿ, ਪੁਚ੍ਛਿਤਪਞ੍ਹਂ ਵਿਸ੍ਸਜ੍ਜੇਤਿ, ਕਮ੍ਮਟ੍ਠਾਨਂ ਆਚਿਕ੍ਖਤਿ, ਧਮ੍ਮਸ੍ਸਵਨਂ ਕਰੋਤਿ, ਸਬ੍ਬੋਪੇਸ ਧਮ੍ਮਂ ਅਨੁਸਾਸਤਿ ਨਾਮ. ਸਬ੍ਬਦਾਨਾਨਞ੍ਚ ਇਦਂ ਧਮ੍ਮਦਾਨਮੇਵ ਅਗ੍ਗਨ੍ਤਿ ਵੇਦਿਤਬ੍ਬਂ. ਵੁਤ੍ਤਮ੍ਪਿ ਚੇਤਂ –

‘‘ਸਬ੍ਬਦਾਨਂ ਧਮ੍ਮਦਾਨਂ ਜਿਨਾਤਿ,

ਸਬ੍ਬਰਸਂ ਧਮ੍ਮਰਸੋ ਜਿਨਾਤਿ;

ਸਬ੍ਬਰਤਿਂ ਧਮ੍ਮਰਤਿ ਜਿਨਾਤਿ,

ਤਣ੍ਹਕ੍ਖਯੋ ਸਬ੍ਬਦੁਕ੍ਖਂ ਜਿਨਾਤੀ’’ਤਿ. (ਧ. ਪ. ੩੫੪); ਦੁਤਿਯਂ;

੩. ਅਨ੍ਨਸੁਤ੍ਤਵਣ੍ਣਨਾ

੪੩. ਤਤਿਯੇ ਅਭਿਨਨ੍ਦਨ੍ਤੀਤਿ ਪਤ੍ਥੇਨ੍ਤਿ. ਭਜਤੀਤਿ ਉਪਗਚ੍ਛਤਿ, ਚਿਤ੍ਤਗਹਪਤਿਸੀਵਲਿਤ੍ਥੇਰਾਦਿਕੇ ਵਿਯ ਪਚ੍ਛਤੋ ਅਨੁਬਨ੍ਧਤਿ. ਤਸ੍ਮਾਤਿ ਯਸ੍ਮਾ ਇਧਲੋਕੇ ਪਰਲੋਕੇ ਚ ਅਨ੍ਨਦਾਯਕਮੇਵ ਅਨੁਗਚ੍ਛਤਿ, ਤਸ੍ਮਾ. ਸੇਸਂ ਉਤ੍ਤਾਨਮੇਵਾਤਿ. ਤਤਿਯਂ.

੪. ਏਕਮੂਲਸੁਤ੍ਤਵਣ੍ਣਨਾ

੪੪. ਚਤੁਤ੍ਥੇ ਏਕਮੂਲਨ੍ਤਿ ਅਵਿਜ੍ਜਾ ਤਣ੍ਹਾਯ ਮੂਲਂ, ਤਣ੍ਹਾ ਅਵਿਜ੍ਜਾਯ. ਇਧ ਪਨ ਤਣ੍ਹਾ ਅਧਿਪ੍ਪੇਤਾ. ਦ੍ਵੀਹਿ ਸਸ੍ਸਤੁਚ੍ਛੇਦਦਿਟ੍ਠੀਹਿ ਆਵਟ੍ਟਤੀਤਿ ਦ੍ਵਿਰਾਵਟ੍ਟਾ. ਸਾ ਚ ਰਾਗਾਦੀਹਿ ਤੀਹਿ ਮਲੇਹਿ ਤਿਮਲਾ. ਤਤ੍ਰਾਸ੍ਸਾ ਮੋਹੋ ਸਹਜਾਤਕੋਟਿਯਾ ਮਲਂ ਹੋਤਿ, ਰਾਗਦੋਸਾ ਉਪਨਿਸ੍ਸਯਕੋਟਿਯਾ. ਪਞ੍ਚ ਪਨ ਕਾਮਗੁਣਾ ਅਸ੍ਸਾ ਪਤ੍ਥਰਣਟ੍ਠਾਨਾ, ਤੇਸੁ ਸਾ ਪਤ੍ਥਰਤੀਤਿ ਪਞ੍ਚਪਤ੍ਥਰਾ. ਸਾ ਚ ਅਪੂਰਣੀਯਟ੍ਠੇਨ ਸਮੁਦ੍ਦੋ. ਅਜ੍ਝਤ੍ਤਿਕਬਾਹਿਰੇਸੁ ਪਨੇਸਾ ਦ੍ਵਾਦਸਾਯਤਨੇਸੁ ਆਵਟ੍ਟਤਿ ਪਰਿਵਟ੍ਟਤੀਤਿ ਦ੍ਵਾਦਸਾਵਟ੍ਟਾ. ਅਪਤਿਟ੍ਠਟ੍ਠੇਨ ਪਨ ਪਾਤਾਲੋਤਿ ਵੁਚ੍ਚਤੀਤਿ. ਏਕਮੂਲਂ…ਪੇ… ਪਾਤਾਲਂ, ਅਤਰਿ ਇਸਿ, ਉਤ੍ਤਰਿ ਸਮਤਿਕ੍ਕਮੀਤਿ ਅਤ੍ਥੋ. ਚਤੁਤ੍ਥਂ.

੫. ਅਨੋਮਸੁਤ੍ਤਵਣ੍ਣਨਾ

੪੫. ਪਞ੍ਚਮੇ ਅਨੋਮਨਾਮਨ੍ਤਿ ਸਬ੍ਬਗੁਣਸਮਨ੍ਨਾਗਤਤ੍ਤਾ ਅਵੇਕਲ੍ਲਨਾਮਂ, ਪਰਿਪੂਰਨਾਮਨ੍ਤਿ ਅਤ੍ਥੋ. ਨਿਪੁਣਤ੍ਥਦਸ੍ਸਿਨ੍ਤਿ ਭਗਵਾ ਸਣ੍ਹਸੁਖੁਮੇ ਖਨ੍ਧਨ੍ਤਰਾਦਯੋ ਅਤ੍ਥੇ ਪਸ੍ਸਤੀਤਿ ਨਿਪੁਣਤ੍ਥਦਸ੍ਸੀ. ਪਞ੍ਞਾਦਦਨ੍ਤਿ ਅਨ੍ਵਯਪਞ੍ਞਾਧਿਗਮਾਯ ਪਟਿਪਦਂ ਕਥਨਵਸੇਨ ਪਞ੍ਞਾਯ ਦਾਯਕਂ. ਕਾਮਾਲਯੇ ਅਸਤ੍ਤਨ੍ਤਿ ਪਞ੍ਚਕਾਮਗੁਣਾਲਯੇ ਅਲਗ੍ਗਂ. ਕਮਮਾਨਨ੍ਤਿ ਭਗਵਾ ਮਹਾਬੋਧਿਮਣ੍ਡੇਯੇਵ ਅਰਿਯਮਗ੍ਗੇਨ ਗਤੋ, ਨ ਇਦਾਨਿ ਗਚ੍ਛਤਿ, ਅਤੀਤਂ ਪਨ ਉਪਾਦਾਯ ਇਦਂ ਵੁਤ੍ਤਂ. ਮਹੇਸਿਨ੍ਤਿ ਮਹਨ੍ਤਾਨਂ ਸੀਲਕ੍ਖਨ੍ਧਾਦੀਨਂ ਏਸਿਤਾਰਂ ਪਰਿਯੇਸਿਤਾਰਨ੍ਤਿ. ਪਞ੍ਚਮਂ.

੬. ਅਚ੍ਛਰਾਸੁਤ੍ਤਵਣ੍ਣਨਾ

੪੬. ਛਟ੍ਠੇ ਅਚ੍ਛਰਾਗਣਸਙ੍ਘੁਟ੍ਠਨ੍ਤਿ ਅਯਂ ਕਿਰ ਦੇਵਪੁਤ੍ਤੋ ਸਤ੍ਥੁਸਾਸਨੇ ਪਬ੍ਬਜਿਤ੍ਵਾ ਵਤ੍ਤਪਟਿਪਤ੍ਤਿਂ ਪੂਰਯਮਾਨੋ ਪਞ੍ਚਵਸ੍ਸਕਾਲੇ ਪਵਾਰੇਤ੍ਵਾ ਦ੍ਵੇਮਾਤਿਕਂ ਪਗੁਣਂ ਕਤ੍ਵਾ ਕਮ੍ਮਾਕਮ੍ਮਂ ਉਗ੍ਗਹੇਤ੍ਵਾ ਚਿਤ੍ਤਰੁਚਿਤਂ ਕਮ੍ਮਟ੍ਠਾਨਂ ਉਗ੍ਗਣ੍ਹਿਤ੍ਵਾ ਸਲ੍ਲਹੁਕਵੁਤ੍ਤਿਕੋ ਅਰਞ੍ਞਂ ਪਵਿਸਿਤ੍ਵਾ ਯੋ ਭਗਵਤਾ ਮਜ੍ਝਿਮਯਾਮੋ ਸਯਨਸ੍ਸ ਕੋਟ੍ਠਾਸੋਤਿ ਅਨੁਞ੍ਞਾਤੋ. ਤਸ੍ਮਿਮ੍ਪਿ ਸਮ੍ਪਤ੍ਤੇ ‘‘ਪਮਾਦਸ੍ਸ ਭਾਯਾਮੀ’’ਤਿ ਮਞ੍ਚਕਂ ਉਕ੍ਖਿਪਿਤ੍ਵਾ ਰਤ੍ਤਿਞ੍ਚ ਦਿਵਾ ਚ ਨਿਰਾਹਾਰੋ ਕਮ੍ਮਟ੍ਠਾਨਮੇਵ ਮਨਸਾਕਾਸਿ.

ਅਥਸ੍ਸ ਅਬ੍ਭਨ੍ਤਰੇ ਸਤ੍ਥਕਵਾਤਾ ਉਪ੍ਪਜ੍ਜਿਤ੍ਵਾ ਜੀਵਿਤਂ ਪਰਿਯਾਦਿਯਿਂਸੁ. ਸੋ ਧੁਰਸ੍ਮਿਂਯੇਵ ਕਾਲਮਕਾਸਿ. ਯੋ ਹਿ ਕੋਚਿ ਭਿਕ੍ਖੁ ਚਙ੍ਕਮੇ ਚਙ੍ਕਮਮਾਨੋ ਵਾ ਆਲਮ੍ਬਨਤ੍ਥਮ੍ਭਂ ਨਿਸ੍ਸਾਯ ਠਿਤੋ ਵਾ ਚਙ੍ਕਮਕੋਟਿਯਂ ਚੀਵਰਂ ਸੀਸੇ ਠਪੇਤ੍ਵਾ ਨਿਸਿਨ੍ਨੋ ਵਾ ਨਿਪਨ੍ਨੋ ਵਾ ਪਰਿਸਮਜ੍ਝੇ ਅਲਙ੍ਕਤਧਮ੍ਮਾਸਨੇ ਧਮ੍ਮਂ ਦੇਸੇਨ੍ਤੋ ਵਾ ਕਾਲਂ ਕਰੋਤਿ, ਸਬ੍ਬੋ ਸੋ ਧੁਰਸ੍ਮਿਂ ਕਾਲਂ ਕਰੋਤਿ ਨਾਮ. ਇਤਿ ਅਯਂ ਚਙ੍ਕਮਨੇ ਕਾਲਂ ਕਤ੍ਵਾ ਉਪਨਿਸ੍ਸਯਮਨ੍ਦਤਾਯ ਆਸਵਕ੍ਖਯਂ ਅਪ੍ਪਤ੍ਤੋ ਤਾਵਤਿਂਸਭਵਨੇ ਮਹਾਵਿਮਾਨਦ੍ਵਾਰੇ ਨਿਦ੍ਦਾਯਿਤ੍ਵਾ ਪਬੁਜ੍ਝਨ੍ਤੋ ਵਿਯ ਪਟਿਸਨ੍ਧਿਂ ਅਗ੍ਗਹੇਸਿ. ਤਾਵਦੇਵਸ੍ਸ ਸੁਵਣ੍ਣਤੋਰਣਂ ਵਿਯ ਤਿਗਾਵੁਤੋ ਅਤ੍ਤਭਾਵੋ ਨਿਬ੍ਬਤ੍ਤਿ.

ਅਨ੍ਤੋਵਿਮਾਨੇ ਸਹਸ੍ਸਮਤ੍ਤਾ ਅਚ੍ਛਰਾ ਤਂ ਦਿਸ੍ਵਾ, ‘‘ਵਿਮਾਨਸਾਮਿਕੋ ਦੇਵਪੁਤ੍ਤੋ ਆਗਤੋ, ਰਮਯਿਸ੍ਸਾਮ ਨ’’ਨ੍ਤਿ ਤੂਰਿਯਾਨਿ ਗਹੇਤ੍ਵਾ ਪਰਿਵਾਰਯਿਂਸੁ. ਦੇਵਪੁਤ੍ਤੋ ਨ ਤਾਵ ਚੁਤਭਾਵਂ ਜਾਨਾਤਿ, ਪਬ੍ਬਜਿਤਸਞ੍ਞੀਯੇਵ ਅਚ੍ਛਰਾ ਓਲੋਕੇਤ੍ਵਾ ਵਿਹਾਰਚਾਰਿਕਂ ਆਗਤਂ ਮਾਤੁਗਾਮਂ ਦਿਸ੍ਵਾ ਲਜ੍ਜੀ. ਪਂਸੁਕੂਲਿਕੋ ਵਿਯ ਉਪਰਿ ਠਿਤਂ ਘਨਦੁਕੂਲਂ ਏਕਂਸਂ ਕਰੋਨ੍ਤੋ ਅਂਸਕੂਟਂ ਪਟਿਚ੍ਛਾਦੇਤ੍ਵਾ ਇਨ੍ਦ੍ਰਿਯਾਨਿ ਓਕ੍ਖਿਪਿਤ੍ਵਾ ਅਧੋਮੁਖੋ ਅਟ੍ਠਾਸਿ. ਤਸ੍ਸ ਕਾਯਵਿਕਾਰੇਨੇਵ ਤਾ ਦੇਵਤਾ ‘‘ਸਮਣਦੇਵਪੁਤ੍ਤੋ ਅਯ’’ਨ੍ਤਿ ਞਤ੍ਵਾ ਏਵਮਾਹਂਸੁ – ‘‘ਅਯ੍ਯ, ਦੇਵਪੁਤ੍ਤ, ਦੇਵਲੋਕੋ ਨਾਮਾਯਂ, ਨ ਸਮਣਧਮ੍ਮਸ੍ਸ ਕਰਣੋਕਾਸੋ, ਸਮ੍ਪਤ੍ਤਿਂ ਅਨੁਭਵਨੋਕਾਸੋ’’ਤਿ. ਸੋ ਤਥੇਵ ਅਟ੍ਠਾਸਿ. ਦੇਵਤਾ ‘‘ਨ ਤਾਵਾਯਂ ਸਲ੍ਲਕ੍ਖੇਤੀ’’ਤਿ ਤੂਰਿਯਾਨਿ ਪਗ੍ਗਣ੍ਹਿਂਸੁ. ਸੋ ਤਥਾਪਿ ਅਨੋਲੋਕੇਨ੍ਤੋਵ ਅਟ੍ਠਾਸਿ.

ਅਥਸ੍ਸ ਸਬ੍ਬਕਾਯਿਕਂ ਆਦਾਸਂ ਪੁਰਤੋ ਠਪਯਿਂਸੁ. ਸੋ ਛਾਯਂ ਦਿਸ੍ਵਾ ਚੁਤਭਾਵਂ ਞਤ੍ਵਾ, ‘‘ਨ ਮਯਾ ਇਮਂ ਠਾਨਂ ਪਤ੍ਥੇਤ੍ਵਾ ਸਮਣਧਮ੍ਮੋ ਕਤੋ, ਉਤ੍ਤਮਤ੍ਥਂ ਅਰਹਤ੍ਤਂ ਪਤ੍ਥੇਤ੍ਵਾ ਕਤੋ’’ਤਿ ਸਮ੍ਪਤ੍ਤਿਯਾ ਵਿਪ੍ਪਟਿਸਾਰੀ ਅਹੋਸਿ, ‘‘ਸੁਵਣ੍ਣਪਟਂ ਪਟਿਲਭਿਸ੍ਸਾਮੀ’’ਤਿ ਤਕ੍ਕਯਿਤ੍ਵਾ ਯੁਦ੍ਧਟ੍ਠਾਨਂ ਓਤਿਣ੍ਣਮਲ੍ਲੋ ਮੂਲਕਮੁਟ੍ਠਿਂ ਲਭਿਤ੍ਵਾ ਵਿਯ. ਸੋ – ‘‘ਅਯਂ ਸਗ੍ਗਸਮ੍ਪਤ੍ਤਿ ਨਾਮ ਸੁਲਭਾ, ਬੁਦ੍ਧਾਨਂ ਪਾਤੁਭਾਵੋ ਦੁਲ੍ਲਭੋ’’ਤਿ ਚਿਨ੍ਤੇਤ੍ਵਾ ਵਿਮਾਨਂ ਅਪਵਿਸਿਤ੍ਵਾਵ ਅਸਮ੍ਭਿਨ੍ਨੇਨੇਵ ਸੀਲੇਨ ਅਚ੍ਛਰਾਸਙ੍ਘਪਰਿਵੁਤੋ ਦਸਬਲਸ੍ਸ ਸਨ੍ਤਿਕਂ ਆਗਮ੍ਮ ਅਭਿਵਾਦੇਤ੍ਵਾ ਏਕਮਨ੍ਤਂ ਠਿਤੋ ਇਮਂ ਗਾਥਂ ਅਭਾਸਿ.

ਤਤ੍ਥ ਅਚ੍ਛਰਾਗਣਸਙ੍ਘੁਟ੍ਠਨ੍ਤਿ ਅਚ੍ਛਰਾਗਣੇਨ ਗੀਤਵਾਦਿਤਸਦ੍ਦੇਹਿ ਸਙ੍ਘੋਸਿਤਂ. ਪਿਸਾਚਗਣਸੇਵਿਤਨ੍ਤਿ ਤਮੇਵ ਅਚ੍ਛਰਾਗਣਂ ਪਿਸਾਚਗਣਂ ਕਤ੍ਵਾ ਵਦਤਿ. ਵਨਨ੍ਤਿ ਨਨ੍ਦਨਵਨਂ ਸਨ੍ਧਾਯ ਵਦਤਿ. ਅਯਞ੍ਹਿ ਨਿਯਾਮਚਿਤ੍ਤਤਾਯ ਅਤ੍ਤਨੋ ਗਰੁਭਾਵੇਨ ਦੇਵਗਣਂ ‘‘ਦੇਵਗਣੋ’’ਤਿ ਵਤ੍ਤੁਂ ਨ ਰੋਚੇਤਿ. ‘‘ਪਿਸਾਚਗਣੋ’’ਤਿ ਵਦਤਿ. ਨਨ੍ਦਨਵਨਞ੍ਚ ‘‘ਨਨ੍ਦਨ’’ਨ੍ਤਿ ਅਵਤ੍ਵਾ ‘‘ਮੋਹਨ’’ਨ੍ਤਿ ਵਦਤਿ. ਕਥਂ ਯਾਤ੍ਰਾ ਭਵਿਸ੍ਸਤੀਤਿ ਕਥਂ ਨਿਗ੍ਗਮਨਂ ਭਵਿਸ੍ਸਤਿ, ਕਥਂ ਅਤਿਕ੍ਕਮੋ ਭਵਿਸ੍ਸਤਿ, ਅਰਹਤ੍ਤਸ੍ਸ ਮੇ ਪਦਟ੍ਠਾਨਭੂਤਂ ਵਿਪਸ੍ਸਨਂ ਆਚਿਕ੍ਖਥ ਭਗਵਾਤਿ ਵਦਤਿ.

ਅਥ ਭਗਵਾ ‘‘ਅਤਿਸਲ੍ਲਿਖਤੇਵ ਅਯਂ ਦੇਵਪੁਤ੍ਤੋ, ਕਿਂ ਨੁ ਖੋ ਇਦ’’ਨ੍ਤਿ? ਆਵਜ੍ਜੇਨ੍ਤੋ ਅਤ੍ਤਨੋ ਸਾਸਨੇ ਪਬ੍ਬਜਿਤਭਾਵਂ ਞਤ੍ਵਾ – ‘‘ਅਯਂ ਅਚ੍ਚਾਰਦ੍ਧਵੀਰਿਯਤਾਯ ਕਾਲਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤੋ, ਅਜ੍ਜਾਪਿਸ੍ਸ ਚਙ੍ਕਮਨਸ੍ਮਿਂਯੇਵ ਅਤ੍ਤਭਾਵੋ ਅਸਮ੍ਭਿਨ੍ਨੇਨ ਸੀਲੇਨ ਆਗਤੋ’’ਤਿ ਚਿਨ੍ਤੇਸਿ. ਬੁਦ੍ਧਾ ਚ ਅਕਤਾਭਿਨਿਵੇਸਸ੍ਸ ਆਦਿਕਮ੍ਮਿਕਸ੍ਸ ਅਕਤਪਰਿਕਮ੍ਮਸ੍ਸ ਅਨ੍ਤੇਵਾਸਿਨੋ ਚਿਤ੍ਤਕਾਰੋ ਭਿਤ੍ਤਿਪਰਿਕਮ੍ਮਂ ਵਿਯ – ‘‘ਸੀਲਂ ਤਾਵ ਸੋਧੇਹਿ, ਸਮਾਧਿਂ ਭਾਵੇਹਿ, ਕਮ੍ਮਸ੍ਸਕਤਪਞ੍ਞਂ ਉਜੁਂ ਕਰੋਹੀ’’ਤਿ ਪਠਮਂ ਪੁਬ੍ਬਭਾਗਪ੍ਪਟਿਪਦਂ ਆਚਿਕ੍ਖਨ੍ਤਿ, ਕਾਰਕਸ੍ਸ ਪਨ ਯੁਤ੍ਤਪਯੁਤ੍ਤਸ੍ਸ ਅਰਹਤ੍ਤਮਗ੍ਗਪਦਟ੍ਠਾਨਭੂਤਂ ਸਣ੍ਹਸੁਖੁਮਂ ਸੁਞ੍ਞਤਾਵਿਪਸ੍ਸਨਂਯੇਵ ਆਚਿਕ੍ਖਨ੍ਤਿ, ਅਯਞ੍ਚ ਦੇਵਪੁਤ੍ਤੋ ਕਾਰਕੋ ਅਭਿਨ੍ਨਸੀਲੋ, ਏਕੋ ਮਗ੍ਗੋ ਅਸ੍ਸ ਅਨਾਗਤੋਤਿ ਸੁਞ੍ਞਤਾਵਿਪਸ੍ਸਨਂ ਆਚਿਕ੍ਖਨ੍ਤੋ ਉਜੁਕੋ ਨਾਮਾਤਿਆਦਿਮਾਹ.

ਤਤ੍ਥ ਉਜੁਕੋਤਿ ਕਾਯਵਙ੍ਕਾਦੀਨਂ ਅਭਾਵਤੋ ਅਟ੍ਠਙ੍ਗਿਕੋ ਮਗ੍ਗੋ ਉਜੁਕੋ ਨਾਮ. ਅਭਯਾ ਨਾਮ ਸਾ ਦਿਸਾਤਿ ਨਿਬ੍ਬਾਨਂ ਸਨ੍ਧਾਯਾਹ. ਤਸ੍ਮਿਂ ਹਿ ਕਿਞ੍ਚਿ ਭਯਂ ਨਤ੍ਥਿ, ਤਂ ਵਾ ਪਤ੍ਤਸ੍ਸ ਭਯਂ ਨਤ੍ਥੀਤਿ ‘‘ਅਭਯਾ ਨਾਮ ਸਾ ਦਿਸਾ’’ਤਿ ਵੁਤ੍ਤਂ. ਰਥੋ ਅਕੂਜਨੋਤਿ ਅਟ੍ਠਙ੍ਗਿਕੋ ਮਗ੍ਗੋਵ ਅਧਿਪ੍ਪੇਤੋ. ਯਥਾ ਹਿ ਪਾਕਤਿਕਰਥੋ ਅਕ੍ਖੇ ਵਾ ਅਨਬ੍ਭਞ੍ਜਿਤੇ ਅਤਿਰੇਕੇਸੁ ਵਾ ਮਨੁਸ੍ਸੇਸੁ ਅਭਿਰੁਲ਼੍ਹੇਸੁ ਕੂਜਤਿ ਵਿਰਵਤਿ, ਨ ਏਵਂ ਅਰਿਯਮਗ੍ਗੋ. ਸੋ ਹਿ ਏਕਪ੍ਪਹਾਰੇਨ ਚਤੁਰਾਸੀਤਿਯਾਪਿ ਪਾਣਸਹਸ੍ਸੇਸੁ ਅਭਿਰੁਹਨ੍ਤੇਸੁ ਨ ਕੂਜਤਿ ਨ ਵਿਰਵਤਿ. ਤਸ੍ਮਾ ‘‘ਅਕੂਜਨੋ’’ਤਿ ਵੁਤ੍ਤੋ. ਧਮ੍ਮਚਕ੍ਕੇਹਿ ਸਂਯੁਤੋਤਿ ਕਾਯਿਕਚੇਤਸਿਕਵੀਰਿਯਸਙ੍ਖਾਤੇਹਿ ਧਮ੍ਮਚਕ੍ਕੇਹਿ ਸਂਯੁਤ੍ਤੋ.

ਹਿਰੀਤਿ ਏਤ੍ਥ ਹਿਰਿਗ੍ਗਹਣੇਨ ਓਤ੍ਤਪ੍ਪਮ੍ਪਿ ਗਹਿਤਮੇਵ ਹੋਤਿ. ਤਸ੍ਸ ਅਪਾਲਮ੍ਬੋਤਿ ਯਥਾ ਬਾਹਿਰਕਰਥਸ੍ਸ ਰਥੇ ਠਿਤਾਨਂ ਯੋਧਾਨਂ ਅਪਤਨਤ੍ਥਾਯ ਦਾਰੁਮਯਂ ਅਪਾਲਮ੍ਬਨਂ ਹੋਤਿ, ਏਵਂ ਇਮਸ੍ਸ ਮਗ੍ਗਰਥਸ੍ਸ ਅਜ੍ਝਤ੍ਤਬਹਿਦ੍ਧਾਸਮੁਟ੍ਠਾਨਂ ਹਿਰੋਤ੍ਤਪ੍ਪਂ ਅਪਾਲਮ੍ਬਨਂ. ਸਤ੍ਯਸ੍ਸ ਪਰਿਵਾਰਣਨ੍ਤਿ ਰਥਸ੍ਸ ਸੀਹਚਮ੍ਮਾਦਿਪਰਿਵਾਰੋ ਵਿਯ ਇਮਸ੍ਸਾਪਿ ਮਗ੍ਗਰਥਸ੍ਸ ਸਮ੍ਪਯੁਤ੍ਤਾ ਸਤਿ ਪਰਿਵਾਰਣਂ. ਧਮ੍ਮਨ੍ਤਿ ਲੋਕੁਤ੍ਤਰਮਗ੍ਗਂ. ਸਮ੍ਮਾਦਿਟ੍ਠਿਪੁਰੇਜਵਨ੍ਤਿ ਵਿਪਸ੍ਸਨਾਸਮ੍ਮਾਦਿਟ੍ਠਿਪੁਰੇਜਵਾ ਅਸ੍ਸ ਪੁਬ੍ਬਯਾਯਿਕਾਤਿ ਸਮ੍ਮਾਦਿਟ੍ਠਿਪੁਰੇਜਵੋ, ਤਂ ਸਮ੍ਮਾਦਿਟ੍ਠਿਪੁਰੇਜਵਂ. ਯਥਾ ਹਿ ਪਠਮਤਰਂ ਰਾਜਪੁਰਿਸੇਹਿ ਕਾਣਕੁਣਿਆਦੀਨਂਨੀਹਰਣੇਨ ਮਗ੍ਗੇ ਸੋਧਿਤੇ ਪਚ੍ਛਾ ਰਾਜਾ ਨਿਕ੍ਖਮਤਿ, ਏਵਮੇਵਂ ਵਿਪਸ੍ਸਨਾ ਸਮ੍ਮਾਦਿਟ੍ਠਿਯਾ ਅਨਿਚ੍ਚਾਦਿਵਸੇਨ ਖਨ੍ਧਾਦੀਸੁ ਸੋਧਿਤੇਸੁ ਪਚ੍ਛਾ ਭੂਮਿਲਦ੍ਧਵਟ੍ਟਂ ਪਰਿਜਾਨਮਾਨਾ ਮਗ੍ਗਸਮ੍ਮਾਦਿਟ੍ਠਿ ਉਪ੍ਪਜ੍ਜਤਿ. ਤੇਨ ਵੁਤ੍ਤਂ ‘‘ਧਮ੍ਮਾਹਂ ਸਾਰਥਿਂ ਬ੍ਰੂਮਿ, ਸਮ੍ਮਾਦਿਟ੍ਠਿਪੁਰੇਜਵ’’ਨ੍ਤਿ.

ਇਤਿ ਭਗਵਾ ਦੇਸਨਂ ਨਿਟ੍ਠਾਪੇਤ੍ਵਾ ਅਵਸਾਨੇ ਚਤ੍ਤਾਰਿ ਸਚ੍ਚਾਨਿ ਦੀਪੇਸਿ. ਦੇਸਨਾਪਰਿਯੋਸਾਨੇ ਦੇਵਪੁਤ੍ਤੋ ਸੋਤਾਪਤ੍ਤਿਫਲੇ ਪਤਿਟ੍ਠਾਸਿ. ਯਥਾ ਹਿ ਰਞ੍ਞੋ ਭੋਜਨਕਾਲੇ ਅਤ੍ਤਨੋ ਮੁਖਪ੍ਪਮਾਣੇ ਕਬਲ਼ੇ ਉਕ੍ਖਿਤ੍ਤੇ ਅਙ੍ਕੇ ਨਿਸਿਨ੍ਨੋ ਪੁਤ੍ਤੋ ਅਤ੍ਤਨੋ ਮੁਖਪ੍ਪਮਾਣੇਨੇਵ ਤਤੋ ਕਬਲ਼ਂ ਕਰੋਤਿ, ਏਵਮੇਵਂ ਭਗਵਤਿ ਅਰਹਤ੍ਤਨਿਕੂਟੇਨ ਦੇਸਨਂ ਦੇਸੇਨ੍ਤੇਪਿ ਸਤ੍ਤਾ ਅਤ੍ਤਨੋ ਉਪਨਿਸ੍ਸਯਾਨੁਰੂਪੇਨ ਸੋਤਾਪਤ੍ਤਿਫਲਾਦੀਨਿ ਪਾਪੁਣਨ੍ਤਿ. ਅਯਮ੍ਪਿ ਦੇਵਪੁਤ੍ਤੋ ਸੋਤਾਪਤ੍ਤਿਫਲਂ ਪਤ੍ਵਾ ਭਗਵਨ੍ਤਂ ਗਨ੍ਧਾਦੀਹਿ ਪੂਜੇਤ੍ਵਾ ਪਕ੍ਕਾਮੀਤਿ. ਛਟ੍ਠਂ.

੭. ਵਨਰੋਪਸੁਤ੍ਤਵਣ੍ਣਨਾ

੪੭. ਸਤ੍ਤਮੇ ਧਮ੍ਮਟ੍ਠਾ ਸੀਲਸਮ੍ਪਨ੍ਨਾਤਿ ਕੇ ਧਮ੍ਮਟ੍ਠਾ, ਕੇ ਸੀਲਸਮ੍ਪਨ੍ਨਾਤਿ ਪੁਚ੍ਛਤਿ. ਭਗਵਾ ਇਮਂ ਪਞ੍ਹਂ ਥਾਵਰਵਤ੍ਥੁਨਾ ਦੀਪੇਨ੍ਤੋ ਆਰਾਮਰੋਪਾਤਿਆਦਿਮਾਹ. ਤਤ੍ਥ ਆਰਾਮਰੋਪਾਤਿ ਪੁਪ੍ਫਾਰਾਮਫਲਾਰਾਮਰੋਪਕਾ. ਵਨਰੋਪਾਤਿ ਸਯਂਜਾਤੇ ਅਰੋਪਿਮਵਨੇ ਸੀਮਂ ਪਰਿਕ੍ਖਿਪਿਤ੍ਵਾ ਚੇਤਿਯਬੋਧਿਚਙ੍ਕਮਨਮਣ੍ਡਪਕੁਟਿਲੇਣਰਤ੍ਤਿਟ੍ਠਾਨਦਿਵਾਟ੍ਠਾਨਾਨਂ ਕਾਰਕਾ ਛਾਯੂਪਗੇ ਰੁਕ੍ਖੇ ਰੋਪੇਤ੍ਵਾ ਦਦਮਾਨਾਪਿ ਵਨਰੋਪਾਯੇਵ ਨਾਮ. ਸੇਤੁਕਾਰਕਾਤਿ ਵਿਸਮੇ ਸੇਤੁਂ ਕਰੋਨ੍ਤਿ, ਉਦਕੇ ਨਾਵਂ ਪਟਿਯਾਦੇਨ੍ਤਿ. ਪਪਨ੍ਤਿ ਪਾਨੀਯਦਾਨਸਾਲਂ. ਉਦਪਾਨਨ੍ਤਿ ਯਂਕਿਞ੍ਚਿ ਪੋਕ੍ਖਰਣੀਤਲ਼ਾਕਾਦਿਂ. ਉਪਸ੍ਸਯਨ੍ਤਿ ਵਾਸਾਗਾਰਂ. ‘‘ਉਪਾਸਯ’’ਨ੍ਤਿਪਿ ਪਾਠੋ.

ਸਦਾ ਪੁਞ੍ਞਂ ਪਵਡ੍ਢਤੀਤਿ ਨ ਅਕੁਸਲਵਿਤਕ੍ਕਂ ਵਾ ਵਿਤਕ੍ਕੇਨ੍ਤਸ੍ਸ ਨਿਦ੍ਦਾਯਨ੍ਤਸ੍ਸ ਵਾ ਪਵਡ੍ਢਤਿ. ਯਦਾ ਯਦਾ ਪਨ ਅਨੁਸ੍ਸਰਤਿ, ਤਦਾ ਤਦਾ ਤਸ੍ਸ ਵਡ੍ਢਤਿ. ਇਮਮਤ੍ਥਂ ਸਨ੍ਧਾਯ ‘‘ਸਦਾ ਪੁਞ੍ਞਂ ਪਵਡ੍ਢਤੀ’’ਤਿ ਵੁਤ੍ਤਂ. ਧਮ੍ਮਟ੍ਠਾ ਸੀਲਸਮ੍ਪਨ੍ਨਾਤਿ ਤਸ੍ਮਿਂ ਧਮ੍ਮੇ ਠਿਤਤ੍ਤਾ ਤੇਨਪਿ ਸੀਲੇਨ ਸਮ੍ਪਨ੍ਨਤ੍ਤਾ ਧਮ੍ਮਟ੍ਠਾ ਸੀਲਸਮ੍ਪਨ੍ਨਾ. ਅਥ ਵਾ ਏਵਰੂਪਾਨਿ ਪੁਞ੍ਞਾਨਿ ਕਰੋਨ੍ਤਾਨਂ ਦਸ ਕੁਸਲਾ ਧਮ੍ਮਾ ਪੂਰੇਨ੍ਤਿ, ਤੇਸੁ ਠਿਤਤ੍ਤਾ ਧਮ੍ਮਟ੍ਠਾ. ਤੇਨੇਵ ਚ ਸੀਲੇਨ ਸਮ੍ਪਨ੍ਨਤ੍ਤਾ ਸੀਲਸਮ੍ਪਨ੍ਨਾਤਿ. ਸਤ੍ਤਮਂ.

੮. ਜੇਤਵਨਸੁਤ੍ਤਵਣ੍ਣਨਾ

੪੮. ਅਟ੍ਠਮੇ ਇਦਂ ਹਿ ਤਂ ਜੇਤਵਨਨ੍ਤਿ ਅਨਾਥਪਿਣ੍ਡਿਕੋ ਦੇਵਪੁਤ੍ਤੋ ਜੇਤਵਨਸ੍ਸ ਚੇਵ ਬੁਦ੍ਧਾਦੀਨਞ੍ਚ ਵਣ੍ਣਭਣਨਤ੍ਥਂ ਆਗਤੋ ਏਵਮਾਹ. ਇਸਿਸਙ੍ਘਨਿਸੇਵਿਤਨ੍ਤਿ ਭਿਕ੍ਖੁਸਙ੍ਘਨਿਸੇਵਿਤਂ.

ਏਵਂ ਪਠਮਗਾਥਾਯ ਜੇਤਵਨਸ੍ਸ ਵਣ੍ਣਂ ਕਥੇਤ੍ਵਾ ਇਦਾਨਿ ਅਰਿਯਮਗ੍ਗਸ੍ਸ ਕਥੇਨ੍ਤੋ ਕਮ੍ਮਂ ਵਿਜ੍ਜਾਤਿਆਦਿਮਾਹ. ਤਤ੍ਥ ਕਮ੍ਮਨ੍ਤਿ ਮਗ੍ਗਚੇਤਨਾ. ਵਿਜ੍ਜਾਤਿ ਮਗ੍ਗਪਞ੍ਞਾ. ਧਮ੍ਮੋਤਿ ਸਮਾਧਿਪਕ੍ਖਿਕਾ ਧਮ੍ਮਾ. ਸੀਲਂ ਜੀਵਿਤਮੁਤ੍ਤਮਨ੍ਤਿ ਸੀਲੇ ਪਤਿਟ੍ਠਿਤਸ੍ਸ ਜੀਵਿਤਂ ਉਤ੍ਤਮਨ੍ਤਿ ਦਸ੍ਸੇਤਿ. ਅਥ ਵਾ ਵਿਜ੍ਜਾਤਿ ਦਿਟ੍ਠਿਸਙ੍ਕਪ੍ਪਾ. ਧਮ੍ਮੋਤਿ ਵਾਯਾਮਸਤਿਸਮਾਧਯੋ. ਸੀਲਨ੍ਤਿ ਵਾਚਾਕਮ੍ਮਨ੍ਤਾਜੀਵਾ. ਜੀਵਿਤਮੁਤ੍ਤਮਨ੍ਤਿ ਏਤਸ੍ਮਿਂ ਸੀਲੇ ਠਿਤਸ੍ਸ ਜੀਵਿਤਂ ਨਾਮ ਉਤ੍ਤਮਂ. ਏਤੇਨ ਮਚ੍ਚਾ ਸੁਜ੍ਝਨ੍ਤੀਤਿ ਏਤੇਨ ਅਟ੍ਠਙ੍ਗਿਕਮਗ੍ਗੇਨ ਸਤ੍ਤਾ ਵਿਸੁਜ੍ਝਨ੍ਤਿ.

ਤਸ੍ਮਾਤਿ ਯਸ੍ਮਾ ਮਗ੍ਗੇਨ ਸੁਜ੍ਝਨ੍ਤਿ, ਨ ਗੋਤ੍ਤਧਨੇਹਿ, ਤਸ੍ਮਾ. ਯੋਨਿਸੋ ਵਿਚਿਨੇ ਧਮ੍ਮਨ੍ਤਿ ਉਪਾਯੇਨ ਸਮਾਧਿਪਕ੍ਖਿਯਧਮ੍ਮਂ ਵਿਚਿਨੇਯ੍ਯ. ਏਵਂ ਤਤ੍ਥ ਵਿਸੁਜ੍ਝਤੀਤਿ ਏਵਂ ਤਸ੍ਮਿਂ ਅਰਿਯਮਗ੍ਗੇ ਵਿਸੁਜ੍ਝਤਿ. ਅਥ ਵਾ ਯੋਨਿਸੋ ਵਿਚਿਨੇ ਧਮ੍ਮਨ੍ਤਿ ਉਪਾਯੇਨ ਪਞ੍ਚਕ੍ਖਨ੍ਧਧਮ੍ਮਂ ਵਿਚਿਨੇਯ੍ਯ. ਏਵਂ ਤਤ੍ਥ ਵਿਸੁਜ੍ਝਤੀਤਿ ਏਵਂ ਤੇਸੁ ਚਤੂਸੁ ਸਚ੍ਚੇਸੁ ਵਿਸੁਜ੍ਝਤਿ.

ਇਦਾਨਿ ਸਾਰਿਪੁਤ੍ਤਤ੍ਥੇਰਸ੍ਸ ਵਣ੍ਣਂ ਕਥੇਨ੍ਤੋ ਸਾਰਿਪੁਤ੍ਤੋਵਾਤਿਆਦਿਮਾਹ. ਤਤ੍ਥ ਸਾਰਿਪੁਤ੍ਤੋਵਾਤਿ ਅਵਧਾਰਣਵਚਨਂ, ਏਤੇਹਿ ਪਞ੍ਞਾਦੀਹਿ ਸਾਰਿਪੁਤ੍ਤੋਵ ਸੇਯ੍ਯੋਤਿ ਵਦਤਿ. ਉਪਸਮੇਨਾਤਿ ਕਿਲੇਸਉਪਸਮੇਨ. ਪਾਰਂ ਗਤੋਤਿ ਨਿਬ੍ਬਾਨਂ ਗਤੋ. ਯੋ ਕੋਚਿ ਨਿਬ੍ਬਾਨਂ ਪਤ੍ਤੋ ਭਿਕ੍ਖੁ, ਸੋ ਏਤਾਵਪਰਮੋ ਸਿਯਾ, ਨ ਥੇਰੇਨ ਉਤ੍ਤਰਿਤਰੋ ਨਾਮ ਅਤ੍ਥੀਤਿ ਵਦਤਿ. ਸੇਸਂ ਉਤ੍ਤਾਨਮੇਵਾਤਿ. ਅਟ੍ਠਮਂ.

੯. ਮਚ੍ਛਰਿਸੁਤ੍ਤਵਣ੍ਣਨਾ

੪੯. ਨਵਮੇ ਮਚ੍ਛਰਿਨੋਤਿ ਮਚ੍ਛੇਰੇਨ ਸਮਨ੍ਨਾਗਤਾ. ਏਕਚ੍ਚੋ ਹਿ ਅਤ੍ਤਨੋ ਵਸਨਟ੍ਠਾਨੇ ਭਿਕ੍ਖੁਂ ਹਤ੍ਥਂ ਪਸਾਰੇਤ੍ਵਾਪਿ ਨ ਵਨ੍ਦਤਿ, ਅਞ੍ਞਤ੍ਥ ਗਤੋ ਵਿਹਾਰਂ ਪਵਿਸਿਤ੍ਵਾ ਸਕ੍ਕਚ੍ਚਂ ਵਨ੍ਦਿਤ੍ਵਾ ਮਧੁਰਪਟਿਸਨ੍ਥਾਰਂ ਕਰੋਤਿ – ‘‘ਭਨ੍ਤੇ, ਅਮ੍ਹਾਕਂ ਵਸਨਟ੍ਠਾਨਂ ਨਾਗਚ੍ਛਥ, ਸਮ੍ਪਨ੍ਨੋ ਪਦੇਸੋ, ਪਟਿਬਲਾ ਮਯਂ ਅਯ੍ਯਾਨਂ ਯਾਗੁਭਤ੍ਤਾਦੀਹਿ ਉਪਟ੍ਠਾਨਂ ਕਾਤੁ’’ਨ੍ਤਿ. ਭਿਕ੍ਖੂ ‘‘ਸਦ੍ਧੋ ਅਯਂ ਉਪਾਸਕੋ’’ਤਿ ਯਾਗੁਭਤ੍ਤਾਦੀਹਿ ਸਙ੍ਗਣ੍ਹਨ੍ਤਿ. ਅਥੇਕੋ ਥੇਰੋ ਤਸ੍ਸ ਗਾਮਂ ਗਨ੍ਤ੍ਵਾ ਪਿਣ੍ਡਾਯ ਚਰਤਿ. ਸੋ ਤਂ ਦਿਸ੍ਵਾ ਅਞ੍ਞੇਨ ਵਾ ਗਚ੍ਛਤਿ, ਘਰਂ ਵਾ ਪਵਿਸਤਿ. ਸਚੇਪਿ ਸਮ੍ਮੁਖੀਭਾਵਂ ਆਗਚ੍ਛਤਿ, ਹਤ੍ਥੇਨ ਵਨ੍ਦਿਤ੍ਵਾ – ‘‘ਅਯ੍ਯਸ੍ਸ ਭਿਕ੍ਖਂ ਦੇਥ, ਅਹਂ ਏਕੇਨ ਕਮ੍ਮੇਨ ਗਚ੍ਛਾਮੀ’’ਤਿ ਪਕ੍ਕਮਤਿ. ਥੇਰੋ ਸਕਲਗਾਮਂ ਚਰਿਤ੍ਵਾ ਤੁਚ੍ਛਪਤ੍ਤੋਵ ਨਿਕ੍ਖਮਤਿ. ਇਦਂ ਤਾਵ ਮੁਦੁਮਚ੍ਛਰਿਯਂ ਨਾਮ, ਯੇਨ ਸਮਨ੍ਨਾਗਤੋ ਅਦਾਯਕੋਪਿ ਦਾਯਕੋ ਵਿਯ ਪਞ੍ਞਾਯਤਿ. ਇਧ ਪਨ ਥਦ੍ਧਮਚ੍ਛਰਿਯਂ ਅਧਿਪ੍ਪੇਤਂ, ਯੇਨ ਸਮਨ੍ਨਾਗਤੋ ਭਿਕ੍ਖੂਸੁ ਪਿਣ੍ਡਾਯ ਪਵਿਟ੍ਠੇਸੁ, ‘‘ਥੇਰਾ ਠਿਤਾ’’ਤਿ ਵੁਤ੍ਤੇ, ‘‘ਕਿਂ ਮਯ੍ਹਂ ਪਾਦਾ ਰੁਜ੍ਜਨ੍ਤੀ’’ਤਿਆਦੀਨਿ ਵਤ੍ਵਾ ਸਿਲਾਥਮ੍ਭੋ ਵਿਯ ਖਾਣੁਕੋ ਵਿਯ ਚ ਥਦ੍ਧੋ ਹੁਤ੍ਵਾ ਤਿਟ੍ਠਤਿ, ਸਾਮੀਚਿਮ੍ਪਿ ਨ ਕਰੋਤਿ. ਕਦਰਿਯਾਤਿ ਇਦਂ ਮਚ੍ਛਰਿਨੋਤਿ ਪਦਸ੍ਸੇਵ ਵੇਵਚਨਂ. ਮੁਦੁਕਮ੍ਪਿ ਹਿ ਮਚ੍ਛਰਿਯਂ ‘‘ਮਚ੍ਛਰਿਯ’’ਨ੍ਤੇਵ ਵੁਚ੍ਚਤਿ, ਥਦ੍ਧਂ ਪਨ ਕਦਰਿਯਂ ਨਾਮ. ਪਰਿਭਾਸਕਾਤਿ ਭਿਕ੍ਖੂ ਘਰਦ੍ਵਾਰੇ ਠਿਤੇ ਦਿਸ੍ਵਾ, ‘‘ਕਿਂ ਤੁਮ੍ਹੇ ਕਸਿਤ੍ਵਾ ਆਗਤਾ, ਵਪਿਤ੍ਵਾ, ਲਾਯਿਤ੍ਵਾ? ਮਯਂ ਅਤ੍ਤਨੋਪਿ ਨ ਲਭਾਮ, ਕੁਤੋ ਤੁਮ੍ਹਾਕਂ, ਸੀਘਂ ਨਿਕ੍ਖਮਥਾ’’ਤਿਆਦੀਹਿ ਸਂਤਜ੍ਜਕਾ. ਅਨ੍ਤਰਾਯਕਰਾਤਿ ਦਾਯਕਸ੍ਸ ਸਗ੍ਗਨ੍ਤਰਾਯੋ, ਪਟਿਗ੍ਗਾਹਕਾਨਂ ਲਾਭਨ੍ਤਰਾਯੋ, ਅਤ੍ਤਨੋ ਉਪਘਾਤੋਤਿ ਇਮੇਸਂ ਅਨ੍ਤਰਾਯਾਨਂ ਕਾਰਕਾ.

ਸਮ੍ਪਰਾਯੋਤਿ ਪਰਲੋਕੋ. ਰਤੀਤਿ ਪਞ੍ਚਕਾਮਗੁਣਰਤਿ. ਖਿਡ੍ਡਾਤਿ ਕਾਯਿਕਖਿਡ੍ਡਾਦਿਕਾ ਤਿਵਿਧਾ ਖਿਡ੍ਡਾ. ਦਿਟ੍ਠੇ ਧਮ੍ਮੇਸ ਵਿਪਾਕੋਤਿ ਤਸ੍ਮਿਂ ਨਿਬ੍ਬਤ੍ਤਭਵਨੇ ਦਿਟ੍ਠੇ ਧਮ੍ਮੇ ਏਸ ਵਿਪਾਕੋ. ਸਮ੍ਪਰਾਯੇ ਚ ਦੁਗ੍ਗਤੀਤਿ ‘‘ਯਮਲੋਕਂ ਉਪਪਜ੍ਜਰੇ’’ਤਿ ਵੁਤ੍ਤੇ ਸਮ੍ਪਰਾਯੇ ਚ ਦੁਗ੍ਗਤਿ.

ਵਦਞ੍ਞੂਤਿ ਭਿਕ੍ਖੂ ਘਰਦ੍ਵਾਰੇ ਠਿਤਾ ਕਿਞ੍ਚਾਪਿ ਤੁਣ੍ਹੀਵ ਹੋਨ੍ਤਿ, ਅਤ੍ਥਤੋ ਪਨ – ‘‘ਭਿਕ੍ਖਂ ਦੇਥਾ’’ਤਿ ਵਦਨ੍ਤਿ ਨਾਮ. ਤਤ੍ਰ ਯੇ ‘‘ਮਯਂ ਪਚਾਮ, ਇਮੇ ਪਨ ਨ ਪਚਨ੍ਤਿ, ਪਚਮਾਨੇ ਪਤ੍ਵਾ ਅਲਭਨ੍ਤਾ ਕੁਹਿਂ ਲਭਿਸ੍ਸਨ੍ਤੀ’’ਤਿ? ਦੇਯ੍ਯਧਮ੍ਮਂ ਸਂਵਿਭਜਨ੍ਤਿ, ਤੇ ਵਦਞ੍ਞੂ ਨਾਮ. ਪਕਾਸਨ੍ਤੀਤਿ ਵਿਮਾਨਪ੍ਪਭਾਯ ਜੋਤਨ੍ਤਿ. ਪਰਸਮ੍ਭਤੇਸੂਤਿ ਪਰੇਹਿ ਸਮ੍ਪਿਣ੍ਡਿਤੇਸੁ. ਸਮ੍ਪਰਾਯੇ ਚ ਸੁਗ੍ਗਤੀਤਿ, ‘‘ਏਤੇ ਸਗ੍ਗਾ’’ਤਿ ਏਵਂ ਵੁਤ੍ਤਸਮ੍ਪਰਾਯੇ ਸੁਗਤਿ. ਉਭਿਨ੍ਨਮ੍ਪਿ ਵਾ ਏਤੇਸਂ ਤਤੋ ਚਵਿਤ੍ਵਾ ਪੁਨ ਸਮ੍ਪਰਾਯੇਪਿ ਦੁਗ੍ਗਤਿਸੁਗਤਿਯੇਵ ਹੋਤੀਤਿ. ਨਵਮਂ.

੧੦. ਘਟੀਕਾਰਸੁਤ੍ਤਵਣ੍ਣਨਾ

੫੦. ਦਸਮੇ ਉਪਪਨ੍ਨਾਸੇਤਿ ਨਿਬ੍ਬਤ੍ਤਿਵਸੇਨ ਉਪਗਤਾ. ਵਿਮੁਤ੍ਤਾਤਿ ਅਵਿਹਾਬ੍ਰਹ੍ਮਲੋਕਸ੍ਮਿਂ ਉਪਪਤ੍ਤਿਸਮਨਨ੍ਤਰਮੇਵ ਅਰਹਤ੍ਤਫਲਵਿਮੁਤ੍ਤਿਯਾ ਵਿਮੁਤ੍ਤਾ. ਮਾਨੁਸਂ ਦੇਹਨ੍ਤਿ ਇਧ ਪਞ੍ਚੋਰਮ੍ਭਾਗਿਯਸਂਯੋਜਨਾਨਿ ਏਵ ਵੁਤ੍ਤਾਨਿ. ਦਿਬ੍ਬਯੋਗਨ੍ਤਿ ਪਞ੍ਚ ਉਦ੍ਧਮ੍ਭਾਗਿਯਸਂਯੋਜਨਾਨਿ. ਉਪਚ੍ਚਗੁਨ੍ਤਿ ਅਤਿਕ੍ਕਮਿਂਸੁ. ਉਪਕੋਤਿਆਦੀਨਿ ਤੇਸਂ ਥੇਰਾਨਂ ਨਾਮਾਨਿ. ਕੁਸਲੀ ਭਾਸਸੀ ਤੇਸਨ੍ਤਿ, ‘‘ਕੁਸਲ’’ਨ੍ਤਿ ਇਦਂ ਵਚਨਂ ਇਮਸ੍ਸ ਅਤ੍ਥੀਤਿ ਕੁਸਲੀ, ਤੇਸਂ ਥੇਰਾਨਂ ਤ੍ਵਂ ਕੁਸਲਂ ਅਨਵਜ੍ਜਂ ਭਾਸਸਿ, ਥੋਮੇਸਿ ਪਸਂਸਸਿ, ਪਣ੍ਡਿਤੋਸਿ ਦੇਵਪੁਤ੍ਤਾਤਿ ਵਦਤਿ. ਤਂ ਤੇ ਧਮ੍ਮਂ ਇਧਞ੍ਞਾਯਾਤਿ ਤੇ ਥੇਰਾ ਤਂ ਧਮ੍ਮਂ ਇਧ ਤੁਮ੍ਹਾਕਂ ਸਾਸਨੇ ਜਾਨਿਤ੍ਵਾ. ਗਮ੍ਭੀਰਨ੍ਤਿ ਗਮ੍ਭੀਰਤ੍ਥਂ. ਬ੍ਰਹ੍ਮਚਾਰੀ ਨਿਰਾਮਿਸੋਤਿ ਨਿਰਾਮਿਸਬ੍ਰਹ੍ਮਚਾਰੀ ਨਾਮ ਅਨਾਗਾਮੀ, ਅਨਾਗਾਮੀ ਅਹੋਸਿਨ੍ਤਿ ਅਤ੍ਥੋ. ਅਹੁਵਾਤਿ ਅਹੋਸਿ. ਸਗਾਮੇਯ੍ਯੋਤਿ ਏਕਗਾਮਵਾਸੀ. ਪਰਿਯੋਸਾਨਗਾਥਾ ਸਙ੍ਗੀਤਿਕਾਰੇਹਿ ਠਪਿਤਾਤਿ. ਦਸਮਂ.

ਆਦਿਤ੍ਤਵਗ੍ਗੋ ਪਞ੍ਚਮੋ.