੭. ਅਪ੍ਪਟਿਵਿਦਿਤਸੁਤ੍ਤਵਣ੍ਣਨਾ

੭. ਸਤ੍ਤਮੇ ਧਮ੍ਮਾਤਿ ਚਤੁਸਚ੍ਚਧਮ੍ਮਾ. ਅਪ੍ਪਟਿਵਿਦਿਤਾਤਿ ਞਾਣੇਨ ਅਪ੍ਪਟਿਵਿਦ੍ਧਾ. ਪਰਵਾਦੇਸੂਤਿ ਦ੍ਵਾਸਟ੍ਠਿਦਿਟ੍ਠਿਗਤਵਾਦੇਸੁ. ਤੇ ਹਿ ਇਤੋ ਪਰੇਸਂ ਤਿਤ੍ਥਿਯਾਨਂ ਵਾਦਤ੍ਤਾ ਪਰਵਾਦਾ ਨਾਮ. ਨੀਯਰੇਤਿ ਅਤ੍ਤਨੋ ਧਮ੍ਮਤਾਯਪਿ ਗਚ੍ਛਨ੍ਤਿ, ਪਰੇਨਪਿ ਨੀਯਨ੍ਤਿ. ਤਤ੍ਥ ਸਯਮੇਵ ਸਸ੍ਸਤਾਦੀਨਿ ਗਣ੍ਹਨ੍ਤਾ ਗਚ੍ਛਨ੍ਤਿ ਨਾਮ, ਪਰਸ੍ਸ ਵਚਨੇਨ ਤਾਨਿ ਗਣ੍ਹਨ੍ਤਾ ਨੀਯਨ੍ਤਿ ਨਾਮ. ਕਾਲੋ ਤੇਸਂ ਪਬੁਜ੍ਝਿਤੁਨ੍ਤਿ ਤੇਸਂ ਪੁਗ੍ਗਲਾਨਂ ਪਬੁਜ੍ਝਿਤੁਂ ਅਯਂ ਕਾਲੋ. ਲੋਕਸ੍ਮਿਞ੍ਹਿ ਬੁਦ੍ਧੋ ਉਪ੍ਪਨ੍ਨੋ, ਧਮ੍ਮੋ ਦੇਸਿਯਤਿ, ਸਙ੍ਘੋ ਸੁਪ੍ਪਟਿਪਨ੍ਨੋ, ਪਟਿਪਦਾ ਭਦ੍ਦਿਕਾ, ਇਮੇ ਚ ਪਨ ਮਹਾਜਨਾ ਵਟ੍ਟੇ ਸੁਤ੍ਤਾ ਨਪ੍ਪਬੁਜ੍ਝਨ੍ਤੀਤਿ ਦੇਵਤਾ ਆਹ. ਸਮ੍ਬੁਦ੍ਧਾਤਿ ਸਮ੍ਮਾ ਹੇਤੁਨਾ ਕਾਰਣੇਨ ਬੁਦ੍ਧਾ. ਚਤ੍ਤਾਰੋ ਹਿ ਬੁਦ੍ਧਾ – ਸਬ੍ਬਞ੍ਞੁਬੁਦ੍ਧੋ, ਪਚ੍ਚੇਕਬੁਦ੍ਧੋ, ਚਤੁਸਚ੍ਚਬੁਦ੍ਧੋ, ਸੁਤਬੁਦ੍ਧੋਤਿ. ਤਤ੍ਥ ਸਮਤਿਂਸਪਾਰਮਿਯੋ ਪੂਰੇਤ੍ਵਾ ਸਮ੍ਮਾਸਮ੍ਬੋਧਿਂ ਪਤ੍ਤੋ ਸਬ੍ਬਞ੍ਞੁਬੁਦ੍ਧੋ ਨਾਮ. ਕਪ੍ਪਸਤਸਹਸ੍ਸਾਧਿਕਾਨਿ ਦ੍ਵੇ ਅਸਙ੍ਖ੍ਯੇਯ੍ਯਾਨਿ ਪਾਰਮਿਯੋ ਪੂਰੇਤ੍ਵਾ ਸਯਮ੍ਭੁਤਂ ਪਤ੍ਤੋ ਪਚ੍ਚੇਕਬੁਦ੍ਧੋ ਨਾਮ. ਅਵਸੇਸਾ ਖੀਣਾਸਵਾ ਚਤੁਸਚ੍ਚਬੁਦ੍ਧਾ ਨਾਮ. ਬਹੁਸ੍ਸੁਤੋ ਸੁਤਬੁਦ੍ਧੋ ਨਾਮ. ਇਮਸ੍ਮਿਂ ਅਤ੍ਥੇ ਤਯੋਪਿ ਪੁਰਿਮਾ ਵਟ੍ਟਨ੍ਤਿ. ਸਮ੍ਮਦਞ੍ਞਾਤਿ ਸਮ੍ਮਾ ਹੇਤੁਨਾ ਕਾਰਣੇਨ ਜਾਨਿਤ੍ਵਾ. ਚਰਨ੍ਤਿ ਵਿਸਮੇ ਸਮਨ੍ਤਿ ਵਿਸਮੇ ਵਾ ਲੋਕਸਨ੍ਨਿਵਾਸੇ ਵਿਸਮੇ ਵਾ ਸਤ੍ਤਨਿਕਾਯੇ ਵਿਸਮੇ ਵਾ ਕਿਲੇਸਜਾਤੇ ਸਮਂ ਚਰਨ੍ਤੀਤਿ.

ਅਪ੍ਪਟਿਵਿਦਿਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.