੭. ਮਹਾਸਲ਼ਾਯਤਨਿਕਸੁਤ੍ਤਵਣ੍ਣਨਾ

੪੨੮. ਏਵਂ ਮੇ ਸੁਤਨ੍ਤਿ ਮਹਾਸਲ਼ਾਯਤਨਿਕਸੁਤ੍ਤਂ. ਤਤ੍ਥ ਮਹਾਸਲ਼ਾਯਤਨਿਕਨ੍ਤਿ ਮਹਨ੍ਤਾਨਂ ਛਨ੍ਨਂ ਆਯਤਨਾਨਂ ਜੋਤਕਂ ਧਮ੍ਮਪਰਿਯਾਯਂ.

੪੨੯. ਅਜਾਨਨ੍ਤਿ ਸਹਵਿਪਸ੍ਸਨੇਨ ਮਗ੍ਗੇਨ ਅਜਾਨਨ੍ਤੋ. ਉਪਚਯਂ ਗਚ੍ਛਨ੍ਤੀਤਿ ਵੁਡ੍ਢਿਂ ਗਚ੍ਛਨ੍ਤਿ, ਵਸਿਭਾਵਂ ਗਚ੍ਛਨ੍ਤੀਤਿ ਅਤ੍ਥੋ. ਕਾਯਿਕਾਤਿ ਪਞ੍ਚਦ੍ਵਾਰਿਕਦਰਥਾ. ਚੇਤਸਿਕਾਤਿ ਮਨੋਦ੍ਵਾਰਿਕਦਰਥਾ. ਸਨ੍ਤਾਪਾਦੀਸੁਪਿ ਏਸੇਵ ਨਯੋ.

੪੩੦. ਕਾਯਸੁਖਨ੍ਤਿ ਪਞ੍ਚਦ੍ਵਾਰਿਕਸੁਖਂ. ਚੇਤੋਸੁਖਨ੍ਤਿ ਮਨੋਦ੍ਵਾਰਿਕਸੁਖਂ. ਏਤ੍ਥ ਚ ਪਞ੍ਚਦ੍ਵਾਰਿਕਜਵਨੇਨ ਸਮਾਪਜ੍ਜਨਂ ਵਾ ਵੁਟ੍ਠਾਨਂ ਵਾ ਨਤ੍ਥਿ, ਉਪ੍ਪਨ੍ਨਮਤ੍ਤਕਮੇਵ ਹੋਤਿ. ਮਨੋਦ੍ਵਾਰਿਕੇਨ ਸਬ੍ਬਂ ਹੋਤਿ. ਅਯਞ੍ਚ ਮਗ੍ਗਵੁਟ੍ਠਾਨਸ੍ਸ ਪਚ੍ਚਯਭੂਤਾ ਬਲਵਵਿਪਸ੍ਸਨਾ, ਸਾਪਿ ਮਨੋਦ੍ਵਾਰਿਕੇਨੇਵ ਹੋਤਿ.

੪੩੧. ਤਥਾਭੂਤਸ੍ਸਾਤਿ ਕੁਸਲਚਿਤ੍ਤਸਮ੍ਪਯੁਤ੍ਤਚੇਤੋਸੁਖਸਮਙ੍ਗੀਭੂਤਸ੍ਸ. ਪੁਬ੍ਬੇਵ ਖੋ ਪਨਸ੍ਸਾਤਿ ਅਸ੍ਸ ਭਿਕ੍ਖੁਨੋ ਵਾਚਾਕਮ੍ਮਨ੍ਤਾਜੀਵਾ ਪੁਬ੍ਬਸੁਦ੍ਧਿਕਾ ਨਾਮ ਆਦਿਤੋ ਪਟ੍ਠਾਯ ਪਰਿਸੁਦ੍ਧਾਵ ਹੋਨ੍ਤਿ. ਦਿਟ੍ਠਿਸਙ੍ਕਪ੍ਪਵਾਯਾਮਸਤਿਸਮਾਧਿਸਙ੍ਖਾਤਾਨਿ ਪਨ ਪਞ੍ਚਙ੍ਗਾਨਿ ਸਬ੍ਬਤ੍ਥਕਕਾਰਾਪਕਙ੍ਗਾਨਿ ਨਾਮ. ਏਵਂ ਲੋਕੁਤ੍ਤਰਮਗ੍ਗੋ ਅਟ੍ਠਙ੍ਗਿਕੋ ਵਾ ਸਤ੍ਤਙ੍ਗਿਕੋ ਵਾ ਹੋਤਿ.

ਵਿਤਣ੍ਡਵਾਦੀ ਪਨ ‘‘ਯਾ ਯਥਾਭੂਤਸ੍ਸ ਦਿਟ੍ਠੀ’’ਤਿ ਇਮਮੇਵ ਸੁਤ੍ਤਪਦੇਸਂ ਗਹੇਤ੍ਵਾ ‘‘ਲੋਕੁਤ੍ਤਰਮਗ੍ਗੋ ਪਞ੍ਚਙ੍ਗਿਕੋ’’ਤਿ ਵਦਤਿ. ਸੋ – ‘‘ਏਵਮਸ੍ਸਾਯਂ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ ਭਾਵਨਾਪਾਰਿਪੂਰਿਂ ਗਚ੍ਛਤੀ’’ਤਿ ਇਮਿਨਾ ਅਨਨ੍ਤਰਵਚਨੇਨੇਵ ਪਟਿਸੇਧਿਤਬ੍ਬੋ. ਉਤ੍ਤਰਿ ਚ ਏਵਂ ਸਞ੍ਞਾਪੇਤਬ੍ਬੋ – ਲੋਕੁਤ੍ਤਰਮਗ੍ਗੋ ਪਞ੍ਚਙ੍ਗਿਕੋ ਨਾਮ ਨਤ੍ਥਿ, ਇਮਾਨਿ ਪਨ ਪਞ੍ਚ ਸਬ੍ਬਤ੍ਥਕਕਾਰਾਪਕਙ੍ਗਾਨਿ ਮਗ੍ਗਕ੍ਖਣੇ ਵਿਰਤਿਵਸੇਨ ਪੂਰੇਨ੍ਤਿ. ‘‘ਯਾ ਚਤੂਹਿ ਵਚੀਦੁਚ੍ਚਰਿਤੇਹਿ ਆਰਤਿ ਵਿਰਤੀ’’ਤਿ ਏਵਂ ਵੁਤ੍ਤਵਿਰਤੀਸੁ ਹਿ ਮਿਚ੍ਛਾਵਾਚਂ ਪਜਹਤਿ, ਸਮ੍ਮਾਵਾਚਂ ਭਾਵੇਤਿ, ਏਵਂ ਸਮ੍ਮਾਵਾਚਂ ਭਾਵੇਨ੍ਤਸ੍ਸ ਇਮਾਨਿ ਪਞ੍ਚਙ੍ਗਿਕਾਨਿ ਨ ਵਿਨਾ, ਸਹੇਵ ਵਿਰਤਿਯਾ ਪੂਰੇਨ੍ਤਿ. ਸਮ੍ਮਾਕਮ੍ਮਨ੍ਤਾਜੀਵੇਸੁਪਿ ਏਸੇਵ ਨਯੋ. ਇਤਿ ਵਚੀਕਮ੍ਮਾਦੀਨਿ ਆਦਿਤੋ ਪਟ੍ਠਾਯ ਪਰਿਸੁਦ੍ਧਾਨੇਵ ਵਟ੍ਟਨ੍ਤਿ. ਇਮਾਨਿ ਪਨ ਪਞ੍ਚ ਸਬ੍ਬਤ੍ਥਕਕਾਰਾਪਕਙ੍ਗਾਨਿ ਵਿਰਤਿਵਸੇਨ ਪਰਿਪੂਰੇਨ੍ਤੀਤਿ ਪਞ੍ਚਙ੍ਗਿਕੋ ਮਗ੍ਗੋ ਨਾਮ ਨਤ੍ਥਿ. ਸੁਭਦ੍ਦਸੁਤ੍ਤੇਪਿ (ਦੀ. ਨਿ. ੨.੨੧੪) ਚੇਤਂ ਵੁਤ੍ਤਂ – ‘‘ਯਸ੍ਮਿਂ ਖੋ, ਸੁਭਦ੍ਦ, ਧਮ੍ਮਵਿਨਯੇ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ’’ਤਿ. ਅਞ੍ਞੇਸੁ ਚ ਅਨੇਕੇਸੁ ਸੁਤ੍ਤਸਤੇਸੁ ਅਟ੍ਠਙ੍ਗਿਕੋਵ ਮਗ੍ਗੋ ਆਗਤੋਤਿ.

੪੩੩. ਚਤ੍ਤਾਰੋਪਿ ਸਤਿਪਟ੍ਠਾਨਾਤਿ ਮਗ੍ਗਸਮ੍ਪਯੁਤ੍ਤਾਵ ਚਤ੍ਤਾਰੋ ਸਤਿਪਟ੍ਠਾਨਾ. ਸਮ੍ਮਪ੍ਪਧਾਨਾਦੀਸੁਪਿ ਏਸੇਵ ਨਯੋ. ਯੁਗਨਨ੍ਧਾਤਿ ਏਕਕ੍ਖਣਿਕਯੁਗਨਨ੍ਧਾ. ਏਤੇਹਿ ਅਞ੍ਞਸ੍ਮਿਂ ਖਣੇ ਸਮਾਪਤ੍ਤਿ, ਅਞ੍ਞਸ੍ਮਿਂ ਵਿਪਸ੍ਸਨਾਤਿ. ਏਵਂ ਨਾਨਾਖਣਿਕਾਪਿ ਹੋਨ੍ਤਿ, ਅਰਿਯਮਗ੍ਗੇ ਪਨ ਏਕਕ੍ਖਣਿਕਾ.

ਵਿਜ੍ਜਾ ਚ ਵਿਮੁਤ੍ਤਿ ਚਾਤਿ ਅਰਹਤ੍ਤਮਗ੍ਗਵਿਜ੍ਜਾ ਚ ਫਲਵਿਮੁਤ੍ਤਿ ਚ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਮਹਾਸਲ਼ਾਯਤਨਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.