੮. ਵਾਸੇਟ੍ਠਸੁਤ੍ਤਵਣ੍ਣਨਾ

੪੫੪. ਏਵਂ ਮੇ ਸੁਤਨ੍ਤਿ ਵਾਸੇਟ੍ਠਸੁਤ੍ਤਂ. ਤਤ੍ਥ ਇਚ੍ਛਾਨਙ੍ਗਲਵਨਸਣ੍ਡੇਤਿ ਇਚ੍ਛਾਨਙ੍ਗਲਗਾਮਸ੍ਸ ਅਵਿਦੂਰੇ ਵਨਸਣ੍ਡੇ. ਚਙ੍ਕੀਤਿ ਆਦਯੋ ਪਞ੍ਚਪਿ ਜਨਾ ਰਞ੍ਞੋ ਪਸੇਨਦਿਸ੍ਸ ਕੋਸਲਸ੍ਸ ਪੁਰੋਹਿਤਾ ਏਵ. ਅਞ੍ਞੇ ਚ ਅਭਿਞ੍ਞਾਤਾਤਿ ਅਞ੍ਞੇ ਚ ਬਹੂ ਅਭਿਞ੍ਞਾਤਾ ਬ੍ਰਾਹ੍ਮਣਾ. ਤੇ ਕਿਰ ਛਟ੍ਠੇ ਛਟ੍ਠੇ ਮਾਸੇ ਦ੍ਵੀਸੁ ਠਾਨੇਸੁ ਸਨ੍ਨਿਪਤਨ੍ਤਿ. ਯਦਾ ਜਾਤਿਂ ਸੋਧੇਤੁਕਾਮਾ ਹੋਨ੍ਤਿ, ਤਦਾ ਪੋਕ੍ਖਰਸਾਤਿਸ੍ਸ ਸਨ੍ਤਿਕੇ ਜਾਤਿਸੋਧਨਤ੍ਥਂ ਉਕ੍ਕਟ੍ਠਾਯ ਸਨ੍ਨਿਪਤਨ੍ਤਿ. ਯਦਾ ਮਨ੍ਤੇ ਸੋਧੇਤੁਕਾਮਾ ਹੋਨ੍ਤਿ, ਤਦਾ ਇਚ੍ਛਾਨਙ੍ਗਲੇ ਸਨ੍ਨਿਪਤਨ੍ਤਿ. ਇਮਸ੍ਮਿਂ ਕਾਲੇ ਮਨ੍ਤਸੋਧਨਤ੍ਥਂ ਸਨ੍ਨਿਪਤਿਂਸੁ. ਅਯਮਨ੍ਤਰਾ ਕਥਾਤਿ ਯਂ ਅਤ੍ਤਨੋ ਸਹਾਯਕਭਾਵਾਨੁਰੂਪਂ ਕਥਂ ਕਥੇਨ੍ਤਾ ਅਨੁਵਿਚਰਿਂਸੁ, ਤਸ੍ਸਾ ਕਥਾਯ ਅਨ੍ਤਰਾ ਅਯਮਞ੍ਞਾ ਕਥਾ ਉਦਪਾਦਿ. ਸੀਲਵਾਤਿ ਗੁਣਵਾ. ਵਤ੍ਤਸਮ੍ਪਨ੍ਨੋਤਿ ਆਚਾਰਸਮ੍ਪਨ੍ਨੋ.

੪੫੫. ਅਨੁਞ੍ਞਾਤਪਟਿਞ੍ਞਾਤਾਤਿ ਸਿਕ੍ਖਿਤਾ ਤੁਮ੍ਹੇਤਿ ਏਵਂ ਆਚਰਿਯੇਹਿ ਅਨੁਞ੍ਞਾਤਾ, ਆਮ ਆਚਰਿਯ ਸਿਕ੍ਖਿਤਮ੍ਹਾਤਿ ਏਵਂ ਸਯਞ੍ਚ ਪਟਿਞ੍ਞਾਤਾ. ਅਸ੍ਮਾਤਿ ਭਵਾਮ. ਅਹਂ ਪੋਕ੍ਖਰਸਾਤਿਸ੍ਸ, ਤਾਰੁਕ੍ਖਸ੍ਸਾਯਂ ਮਾਣਵੋਤਿ ਅਹਂ ਪੋਕ੍ਖਰਸਾਤਿਸ੍ਸ ਜੇਟ੍ਠਨ੍ਤੇਵਾਸੀ ਅਗ੍ਗਸਿਸ੍ਸੋ, ਅਯਂ ਤਾਰੁਕ੍ਖਸ੍ਸਾਤਿ ਦੀਪੇਤਿ.

ਤੇਵਿਜ੍ਜਾਨਨ੍ਤਿ ਤਿਵੇਦਾਨਂ ਬ੍ਰਾਹ੍ਮਣਾਨਂ. ਯਦਕ੍ਖਾਤਨ੍ਤਿ ਯਂ ਅਤ੍ਥਤੋ ਚ ਬ੍ਯਞ੍ਜਨਤੋ ਚ ਏਕਂ ਪਦਮ੍ਪਿ ਅਕ੍ਖਾਤਂ. ਤਤ੍ਰ ਕੇਵਲਿਨੋਸ੍ਮਸੇਤਿ ਤਂ ਸਕਲਂ ਜਾਨਨਤੋ ਤਤ੍ਥ ਨਿਟ੍ਠਾਗਤਮ੍ਹਾਤਿ ਅਤ੍ਥੋ. ਇਦਾਨਿ ਤਂ ਕੇਵਲਿਭਾਵਂ ਆਵਿਕਰੋਨ੍ਤੋ ਪਦਕਸ੍ਮਾਤਿਆਦਿਮਾਹ. ਤਤ੍ਥ ਜਪ੍ਪੇ ਆਚਰਿਯਸਾਦਿਸਾਤਿ ਕਥਨਟ੍ਠਾਨੇ ਮਯਂ ਆਚਰਿਯਸਦਿਸਾਯੇਵ.

ਕਮ੍ਮੁਨਾਤਿ ਦਸਕੁਸਲਕਮ੍ਮਪਥਕਮ੍ਮੁਨਾ. ਅਯਞ੍ਹਿ ਪੁਬ੍ਬੇ ਸਤ੍ਤਵਿਧਂ ਕਾਯਵਚੀਕਮ੍ਮਂ ਸਨ੍ਧਾਯ ‘‘ਯਤੋ ਖੋ, ਭੋ, ਸੀਲਵਾ ਹੋਤੀ’’ਤਿ ਆਹ, ਤਿਵਿਧਂ ਮਨੋਕਮ੍ਮਂ ਸਨ੍ਧਾਯ ‘‘ਵਤ੍ਤਸਮ੍ਪਨ੍ਨੋ’’ਤਿ. ਤੇਨ ਸਮਨ੍ਨਾਗਤੋ ਹਿ ਆਚਾਰਸਮ੍ਪਨ੍ਨੋ ਹੋਤਿ. ਚਕ੍ਖੁਮਾਤਿ ਪਞ੍ਚਹਿ ਚਕ੍ਖੂਹਿ ਚਕ੍ਖੁਮਨ੍ਤਭਾਵੇਨ ਭਗਵਨ੍ਤਂ ਆਲਪਤਿ.

ਖਯਾਤੀਤਨ੍ਤਿ ਊਨਭਾਵਂ ਅਤੀਤਂ, ਪਰਿਪੁਣ੍ਣਨ੍ਤਿ ਅਤ੍ਥੋ. ਪੇਚ੍ਚਾਤਿ ਉਪਗਨ੍ਤ੍ਵਾ. ਨਮਸ੍ਸਨ੍ਤੀਤਿ ਨਮੋ ਕਰੋਨ੍ਤਿ.

ਚਕ੍ਖੁਂ ਲੋਕੇ ਸਮੁਪ੍ਪਨ੍ਨਨ੍ਤਿ ਅਵਿਜ੍ਜਨ੍ਧਕਾਰੇ ਲੋਕੇ ਤਂ ਅਨ੍ਧਕਾਰਂ ਵਿਧਮਿਤ੍ਵਾ ਲੋਕਸ੍ਸ ਦਿਟ੍ਠਧਮ੍ਮਿਕਾਦਿਅਤ੍ਥਦਸ੍ਸਨੇਨ ਚਕ੍ਖੁ ਹੁਤ੍ਵਾ ਸਮੁਪ੍ਪਨ੍ਨਂ.

੪੫੬. ਏਵਂ ਵਾਸੇਟ੍ਠੇਨ ਥੋਮੇਤ੍ਵਾ ਯਾਚਿਤੋ ਭਗਵਾ ਦ੍ਵੇਪਿ ਜਨੇ ਸਙ੍ਗਣ੍ਹਨ੍ਤੋ ਤੇਸਂ ਵੋ ਅਹਂ ਬ੍ਯਕ੍ਖਿਸ੍ਸਨ੍ਤਿਆਦਿਮਾਹ. ਤਤ੍ਥ ਬ੍ਯਕ੍ਖਿਸ੍ਸਨ੍ਤਿ ਬ੍ਯਾਕਰਿਸ੍ਸਾਮਿ. ਅਨੁਪੁਬ੍ਬਨ੍ਤਿ ਤਿਟ੍ਠਤੁ ਤਾਵ ਬ੍ਰਾਹ੍ਮਣਚਿਨ੍ਤਾ, ਤਿਣਰੁਕ੍ਖਕੀਟਪਟਙ੍ਗਤੋ ਪਟ੍ਠਾਯ ਅਨੁਪਟਿਪਾਟਿਯਾ ਆਚਿਕ੍ਖਿਸ੍ਸਾਮੀਤਿ ਅਤ੍ਥੋ. ਜਾਤਿਵਿਭਙ੍ਗਨ੍ਤਿ ਜਾਤਿਵਿਤ੍ਥਾਰਂ. ਅਞ੍ਞਮਞ੍ਞਾ ਹਿ ਜਾਤਿਯੋਤਿ ਤੇਸਂ ਤੇਸਞ੍ਹਿ ਪਾਣਾਨਂ ਜਾਤਿਯੋ ਅਞ੍ਞਮਞ੍ਞਾ ਨਾਨਪ੍ਪਕਾਰਾਤਿ ਅਤ੍ਥੋ.

ਤਿਣਰੁਕ੍ਖੇਤਿ ਅਨੁਪਾਦਿਨ੍ਨਕਜਾਤਿਂ ਕਤ੍ਵਾ ਪਚ੍ਛਾ ਉਪਾਦਿਨ੍ਨਕਜਾਤਿਂ ਕਥੇਸ੍ਸਾਮਿ, ਏਵਂ ਤਸ੍ਸ ਜਾਤਿਭੇਦੋ ਪਾਕਟੋ ਭਵਿਸ੍ਸਤੀਤਿ ਇਮਂ ਦੇਸਨਂ ਆਰਭਿ. ਮਹਾਸੀਵਤ੍ਥੇਰੋ ਪਨ ‘‘ਕਿਂ, ਭਨ੍ਤੇ, ਅਨੁਪਾਦਿਨ੍ਨਕਂ ਬੀਜਨਾਨਤਾਯ ਨਾਨਂ, ਉਪਾਦਿਨ੍ਨਂ ਕਮ੍ਮਨਾਨਤਾਯਾਤਿ? ਏਵਂ ਵਤ੍ਤੁਂ ਨ ਵਟ੍ਟਤੀ’’ਤਿ ਪੁਚ੍ਛਿਤੋ ਆਮ ਨ ਵਟ੍ਟਤਿ. ਕਮ੍ਮਞ੍ਹਿ ਯੋਨਿਯਂ ਖਿਪਤਿ. ਯੋਨਿਸਿਦ੍ਧਾ ਇਮੇ ਸਤ੍ਤਾ ਨਾਨਾਵਣ੍ਣਾ ਹੋਨ੍ਤੀਤਿ. ਤਿਣਰੁਕ੍ਖੇਤਿ ਏਤ੍ਥ ਅਨ੍ਤੋਫੇਗ੍ਗੂ ਬਹਿਸਾਰਾ ਅਨ੍ਤਮਸੋ ਤਾਲਨਾਲ਼ਿਕੇਰਾਦਯੋਪਿ ਤਿਣਾਨੇਵ, ਅਨ੍ਤੋਸਾਰਾ ਪਨ ਬਹਿਫੇਗ੍ਗੂ ਸਬ੍ਬੇ ਰੁਕ੍ਖਾ ਨਾਮ. ਨ ਚਾਪਿ ਪਟਿਜਾਨਰੇਤਿ ਮਯਂ ਤਿਣਾ ਮਯਂ ਰੁਕ੍ਖਾਤਿ ਵਾ, ਅਹਂ ਤਿਣਂ, ਅਹਂ ਰੁਕ੍ਖੋਤਿ ਵਾ ਏਵਂ ਨ ਜਾਨਨ੍ਤਿ. ਲਿਙ੍ਗਂ ਜਾਤਿਮਯਨ੍ਤਿ ਅਜਾਨਨ੍ਤਾਨਮ੍ਪਿ ਚ ਤੇਸਂ ਜਾਤਿਮਯਮੇਵ ਸਣ੍ਠਾਨਂ ਅਤ੍ਤਨੋ ਮੂਲਭੂਤਤਿਣਾਦਿਸਦਿਸਮੇਵ ਹੋਤਿ. ਕਿਂ ਕਾਰਣਾ? ਅਞ੍ਞਮਞ੍ਞਾ ਹਿ ਜਾਤਿਯੋ. ਯਸ੍ਮਾ ਅਞ੍ਞਾ ਤਿਣਜਾਤਿ, ਅਞ੍ਞਾ ਰੁਕ੍ਖਜਾਤਿ. ਤਿਣੇਸੁਪਿ ਅਞ੍ਞਾ ਤਾਲਜਾਤਿ, ਅਞ੍ਞਾ ਨਾਲ਼ਿਕੇਰਜਾਤਿ, ਏਵਂ ਵਿਤ੍ਥਾਰੇਤਬ੍ਬਂ. ਇਮਿਨਾ ਇਦਂ ਦਸ੍ਸੇਤਿ – ਯਂ ਜਾਤਿਵਸੇਨ ਨਾਨਾ ਹੋਤਿ, ਤਂ ਅਤ੍ਤਨੋ ਪਟਿਞ੍ਞਂ ਪਰੇਸਂ ਵਾ ਉਪਦੇਸਂ ਵਿਨਾਪਿ ਅਞ੍ਞਜਾਤਿਤੋ ਵਿਸੇਸੇਨ ਗਯ੍ਹਤਿ. ਯਦਿ ਚ ਜਾਤਿਯਾ ਬ੍ਰਾਹ੍ਮਣੋ ਭਵੇਯ੍ਯ, ਸੋਪਿ ਅਤ੍ਤਨੋ ਪਟਿਞ੍ਞਂ ਪਰੇਸਂ ਵਾ ਉਪਦੇਸਂ ਵਿਨਾ ਖਤ੍ਤਿਯਤੋ ਵੇਸ੍ਸਤੋ ਸੁਦ੍ਦਤੋ ਵਾ ਵਿਸੇਸੇਨ ਗਯ੍ਹੇਯ੍ਯ, ਨ ਚ ਗਯ੍ਹਤਿ. ਤਸ੍ਮਾ ਨ ਜਾਤਿਯਾ ਬ੍ਰਾਹ੍ਮਣੋਤਿ. ਪਰਤੋ ਪਨ ‘‘ਯਥਾ ਏਤਾਸੁ ਜਾਤੀਸੂ’’ਤਿ ਗਾਥਾਯ ਏਤਮਤ੍ਥਂ ਵਚੀਭੇਦੇਨੇਵ ਆਵਿਕਰਿਸ੍ਸਤਿ.

ਏਵਂ ਅਨੁਪਾਦਿਨ੍ਨਕੇਸੁ ਜਾਤਿਂ ਦਸ੍ਸੇਤ੍ਵਾ ਉਪਾਦਿਨ੍ਨਕੇਸੁ ਦਸ੍ਸੇਨ੍ਤੋ ਤਤੋ ਕੀਟੇਤਿਆਦਿਮਾਹ. ਯਾਵ ਕੁਨ੍ਥਕਿਪਿਲ੍ਲਿਕੇਤਿ ਕੁਨ੍ਥਕਿਪਿਲ੍ਲਿਕਂ ਪਰਿਯਨ੍ਤਂ ਕਤ੍ਵਾਤਿ ਅਤ੍ਥੋ. ਏਤ੍ਥ ਚ ਯੇ ਉਪ੍ਪਤਿਤ੍ਵਾ ਗਚ੍ਛਨ੍ਤਿ, ਤੇ ਪਟਙ੍ਗਾ ਨਾਮ. ਅਞ੍ਞਮਞ੍ਞਾ ਹਿ ਜਾਤਿਯੋਤਿ ਤੇਸਮ੍ਪਿ ਨੀਲਰਤ੍ਤਾਦਿਵਣ੍ਣਵਸੇਨ ਜਾਤਿਯੋ ਨਾਨਪ੍ਪਕਾਰਾਵ ਹੋਨ੍ਤਿ.

ਖੁਦ੍ਦਕੇਤਿ ਕਾਲ਼ਕਾਦਯੋ. ਮਹਲ੍ਲਕੇਤਿ ਸਸਬਿਲ਼ਾਰਾਦਯੋ.

ਪਾਦੂਦਰੇਤਿ ਉਦਰਪਾਦੇ, ਉਦਰਂਯੇਵ ਨੇਸਂ ਪਾਦਾਤਿ ਵੁਤ੍ਤਂ ਹੋਤਿ. ਦੀਘਪਿਟ੍ਠਿਕੇਤਿ ਸਪ੍ਪਾਨਞ੍ਹਿ ਸੀਸਤੋ ਯਾਵ ਨਙ੍ਗੁਟ੍ਠਾ ਪਿਟ੍ਠਿਯੇਵ ਹੋਤਿ, ਤੇਨ ਤੇ ‘‘ਦੀਘਪਿਟ੍ਠਿਕਾ’’ਤਿ ਵੁਚ੍ਚਨ੍ਤਿ.

ਉਦਕੇਤਿ ਓਦਕੇ, ਉਦਕਮ੍ਹਿ ਜਾਤੇ.

ਪਕ੍ਖੀਤਿ ਸਕੁਣੇ. ਤੇ ਹਿ ਪਤ੍ਤੇਹਿ ਯਨ੍ਤੀਤਿ ਪਤ੍ਤਯਾਨਾ, ਵੇਹਾਸਂ ਗਚ੍ਛਨ੍ਤੀਤਿ ਵਿਹਙ੍ਗਮਾ.

ਏਵਂ ਥਲਜਲਾਕਾਸਗੋਚਰਾਨਂ ਪਾਣਾਨਂ ਜਾਤਿਭੇਦਂ ਦਸ੍ਸੇਤ੍ਵਾ ਇਦਾਨਿ ਯੇਨਾਧਿਪ੍ਪਾਯੇਨ ਤਂ ਦਸ੍ਸੇਤਿ, ਤਂ ਆਵਿਕਰੋਨ੍ਤੋ ਯਥਾ ਏਤਾਸੂਤਿ ਗਾਥਮਾਹ. ਤਸ੍ਸਤ੍ਥੋ ਸਙ੍ਖੇਪੇਨ ਵੁਤ੍ਤੋਵ. ਵਿਤ੍ਥਾਰਤੋ ਪਨੇਤ੍ਥ ਯਂ ਵਤ੍ਤਬ੍ਬਂ, ਤਂ ਸਯਮੇਵ ਦਸ੍ਸੇਨ੍ਤੋ ਨ ਕੇਸੇਹੀਤਿਆਦਿਮਾਹ. ਤਤ੍ਰਾਯਂ ਯੋਜਨਾ – ਯਂ ਵੁਤ੍ਤਂ ‘‘ਨਤ੍ਥਿ ਮਨੁਸ੍ਸੇਸੁ ਲਿਙ੍ਗਜਾਤਿਮਯਂ ਪੁਥੂ’’ਤਿ, ਤਂ ਏਵਂ ਨਤ੍ਥੀਤਿ ਵੇਦਿਤਬ੍ਬਂ. ਸੇਯ੍ਯਥਿਦਂ? ਨ ਕੇਸੇਹੀਤਿ. ਨ ਹਿ – ‘‘ਬ੍ਰਾਹ੍ਮਣਾਨਂ ਏਦਿਸਾ ਕੇਸਾ ਹੋਨ੍ਤਿ, ਖਤ੍ਤਿਯਾਨਂ ਏਦਿਸਾ’’ਤਿ ਨਿਯਮੋ ਅਤ੍ਥਿ ਯਥਾ ਹਤ੍ਥਿਅਸ੍ਸਮਿਗਾਦੀਨਨ੍ਤਿ ਇਮਿਨਾ ਨਯੇਨ ਸਬ੍ਬਂ ਯੋਜੇਤਬ੍ਬਂ.

ਲਿਙ੍ਗਂ ਜਾਤਿਮਯਂ ਨੇਵ, ਯਥਾ ਅਞ੍ਞਾਸੁ ਜਾਤਿਸੂਤਿ ਇਦਂ ਪਨ ਵੁਤ੍ਤਸ੍ਸੇਵਤ੍ਥਸ੍ਸ ਨਿਗਮਨਨ੍ਤਿ ਵੇਦਿਤਬ੍ਬਂ. ਤਸ੍ਸਾਯਂ ਯੋਜਨਾ – ਏਵਂ ਯਸ੍ਮਾ ਇਮੇਹਿ ਕੇਸਾਦੀਹਿ ਨਤ੍ਥਿ ਮਨੁਸ੍ਸੇਸੁ ਲਿਙ੍ਗਂ ਜਾਤਿਮਯਂ ਪੁਥੁ, ਤਸ੍ਮਾ ਵੇਦਿਤਬ੍ਬਮੇਤਂ ‘‘ਬ੍ਰਾਹ੍ਮਣਾਦਿਭੇਦੇਸੁ ਮਨੁਸ੍ਸੇਸੁ ਲਿਙ੍ਗਂ ਜਾਤਿਮਯਂ ਨੇਵ, ਯਥਾ ਅਞ੍ਞਾਸੁ ਜਾਤਿਸੂ’’ਤਿ.

੪੫੭. ਇਦਾਨਿ ਏਵਂ ਜਾਤਿਭੇਦੇ ਅਸਤਿਪਿ ‘‘ਬ੍ਰਾਹ੍ਮਣੋ ਖਤ੍ਤਿਯੋ’’ਤਿ ਇਦਂ ਨਾਨਤ੍ਤਂ ਯਥਾ ਜਾਤਂ, ਤਂ ਦਸ੍ਸੇਤੁਂ ਪਚ੍ਚਤ੍ਤਨ੍ਤਿ ਗਾਥਮਾਹ. ਤਤ੍ਥ ਵੋਕਾਰਨ੍ਤਿ ਨਾਨਤ੍ਤਂ. ਅਯਂ ਪਨੇਤ੍ਥ ਸਙ੍ਖੇਪਤ੍ਥੋ – ਯਥਾ ਹਿ ਤਿਰਚ੍ਛਾਨਾਨਂ ਯੋਨਿਸਿਦ੍ਧਮੇਵ ਕੇਸਾਦਿਸਣ੍ਠਾਨੇਨ ਨਾਨਤ੍ਤਂ, ਤਥਾ ਬ੍ਰਾਹ੍ਮਣਾਦੀਨਂ ਅਤ੍ਤਨੋ ਅਤ੍ਤਨੋ ਸਰੀਰੇ ਤਂ ਨਤ੍ਥਿ. ਏਵਂ ਸਨ੍ਤੇਪਿ ਯਦੇਤਂ ‘‘ਬ੍ਰਾਹ੍ਮਣੋ ਖਤ੍ਤਿਯੋ’’ਤਿ ਵੋਕਾਰਂ, ਤਂ ਵੋਕਾਰਞ੍ਚ ਮਨੁਸ੍ਸੇਸੁ ਸਮਞ੍ਞਾਯ ਪਵੁਚ੍ਚਤਿ, ਵੋਹਾਰਮਤ੍ਤੇਨੇਵ ਪਵੁਚ੍ਚਤੀਤਿ.

ਏਤ੍ਤਾਵਤਾ ਭਗਵਾ ਭਾਰਦ੍ਵਾਜਸ੍ਸ ਵਾਦਂ ਨਿਗ੍ਗਣ੍ਹਿਤ੍ਵਾ ਇਦਾਨਿ ਯਦਿ ਜਾਤਿਯਾ ਬ੍ਰਾਹ੍ਮਣੋ ਭਵੇਯ੍ਯ, ਆਜੀਵਸੀਲਾਚਾਰਵਿਪਨ੍ਨੋਪਿ ਬ੍ਰਾਹ੍ਮਣੋ ਭਵੇਯ੍ਯ. ਯਸ੍ਮਾ ਪਨ ਪੋਰਾਣਾ ਬ੍ਰਾਹ੍ਮਣਾ ਤਸ੍ਸ ਬ੍ਰਾਹ੍ਮਣਭਾਵਂ ਨ ਇਚ੍ਛਨ੍ਤਿ, ਲੋਕੇ ਚ ਅਞ੍ਞੇਪਿ ਪਣ੍ਡਿਤਮਨੁਸ੍ਸਾ, ਤਸ੍ਮਾ ਵਾਸੇਟ੍ਠਸ੍ਸ ਵਾਦਂ ਪਗ੍ਗਣ੍ਹਨ੍ਤੋ ਯੋ ਹਿ ਕੋਚਿ ਮਨੁਸ੍ਸੇਸੂਤਿ ਅਟ੍ਠ ਗਾਥਾ ਆਹ. ਤਤ੍ਥ ਗੋਰਕ੍ਖਨ੍ਤਿ ਖੇਤ੍ਤਰਕ੍ਖਂ, ਕਸਿਕਮ੍ਮਨ੍ਤਿ ਵੁਤ੍ਤਂ ਹੋਤਿ. ਗੋਤਿ ਹਿ ਪਥਵਿਯਾ ਨਾਮਂ, ਤਸ੍ਮਾ ਏਵਮਾਹ. ਪੁਥੁਸਿਪ੍ਪੇਨਾਤਿ ਤਨ੍ਤਵਾਯਕਮ੍ਮਾਦਿਨਾਨਾਸਿਪ੍ਪੇਨ. ਵੋਹਾਰਨ੍ਤਿ ਵਣਿਜ੍ਜਂ. ਪਰਪੇਸ੍ਸੇਨਾਤਿ ਪਰੇਸਂ ਵੇਯ੍ਯਾਵਚ੍ਚਕਮ੍ਮੇਨ. ਇਸ੍ਸਤ੍ਥਨ੍ਤਿ ਆਵੁਧਜੀਵਿਕਂ, ਉਸੁਞ੍ਚ ਸਤ੍ਤਿਂ ਚਾਤਿ ਵੁਤ੍ਤਂ ਹੋਤਿ. ਪੋਰੋਹਿਚ੍ਚੇਨਾਤਿ ਪੁਰੋਹਿਤਕਮ੍ਮੇਨ.

ਏਵਂ ਬ੍ਰਾਹ੍ਮਣਸਮਯੇਨ ਚ ਲੋਕਵੋਹਾਰੇਨ ਚ ਆਜੀਵਸੀਲਾਚਾਰਵਿਪਨ੍ਨਸ੍ਸ ਅਬ੍ਰਾਹ੍ਮਣਭਾਵਂ ਸਾਧੇਤ੍ਵਾ ਏਵਂ ਸਨ੍ਤੇ ਨ ਜਾਤਿਯਾ ਬ੍ਰਾਹ੍ਮਣੋ, ਗੁਣੇਹਿ ਪਨ ਬ੍ਰਾਹ੍ਮਣੋ ਹੋਤਿ. ਤਸ੍ਮਾ ਯਤ੍ਥ ਕਤ੍ਥਚਿ ਕੁਲੇ ਜਾਤੋ ਯੋ ਗੁਣਵਾ, ਸੋ ਬ੍ਰਾਹ੍ਮਣੋ, ਅਯਮੇਤ੍ਥ ਞਾਯੋਤਿ ਏਵਮੇਤਂ ਞਾਯਂ ਅਤ੍ਥਤੋ ਆਪਾਦੇਤ੍ਵਾ ਇਦਾਨਿ ਨਂ ਵਚੀਭੇਦੇਨ ਪਕਾਸੇਨ੍ਤੋ ਨ ਚਾਹਂ ਬ੍ਰਾਹ੍ਮਣਨ੍ਤਿਆਦਿਮਾਹ. ਤਸ੍ਸਤ੍ਥੋ – ਅਹਞ੍ਹਿ ਯ੍ਵਾਯਂ ਚਤੁਨ੍ਨਂ ਯੋਨੀਨਂ ਯਤ੍ਥ ਕਤ੍ਥਚਿ ਜਾਤੋ, ਤਤ੍ਰਾਪਿ ਵਿਸੇਸੇਨ ਯੋ ਬ੍ਰਾਹ੍ਮਣਸ੍ਸ ਸਂਵਣ੍ਣਿਤਾਯ ਮਾਤਰਿ ਸਮ੍ਭੂਤੋ, ਤਂ ਯੋਨਿਜਂ ਮਤ੍ਤਿਸਮ੍ਭਵਂ, ਯਾ ਚਾਯਂ ਉਭਤੋ ਸੁਜਾਤੋਤਿਆਦਿਨਾ ਨਯੇਨ ਬ੍ਰਾਹ੍ਮਣੇਹਿ ਬ੍ਰਾਹ੍ਮਣਸ੍ਸ ਪਰਿਸੁਦ੍ਧਉਪ੍ਪਤ੍ਤਿਮਗ੍ਗਸਙ੍ਖਾਤਾ ਯੋਨਿ ਵੁਤ੍ਤਾ, ਸਂਸੁਦ੍ਧਗਹਣਿਕੋਤਿ ਇਮਿਨਾ ਚ ਮਾਤਿਸਮ੍ਪਤ੍ਤਿ, ਤਤੋਪਿ ਜਾਤਸਮ੍ਭੂਤਤ੍ਤਾ ਯੋਨਿਜੋ ਮਤ੍ਤਿਸਮ੍ਭਵੋਤਿ ਵੁਚ੍ਚਤਿ, ਤਂ ਯੋਨਿਜਂ ਮਤ੍ਤਿਸਮ੍ਭਵਂ ਇਮਿਨਾ ਚ ਯੋਨਿਜਮਤ੍ਤਿਸਮ੍ਭਵਮਤ੍ਤੇਨ ਨ ਬ੍ਰਾਹ੍ਮਣਂ ਬ੍ਰੂਮਿ. ਕਸ੍ਮਾ? ਯਸ੍ਮਾ, ਭੋ ਭੋਤਿ, ਵਚਨਮਤ੍ਤੇਨ ਅਞ੍ਞੇਹਿ ਸਕਿਞ੍ਚਨੇਹਿ ਵਿਸਿਟ੍ਠਤ੍ਤਾ ਭੋਵਾਦਿ ਨਾਮ ਸੋ ਹੋਤਿ, ਸਚੇ ਹੋਤਿ ਸਕਿਞ੍ਚਨੋ ਸਪਲਿਬੋਧੋ. ਯੋ ਪਨਾਯਂ ਯਤ੍ਥ ਕਤ੍ਥਚਿ ਜਾਤੋਪਿ ਰਾਗਾਦਿਕਿਞ੍ਚਨਾਭਾਵੇਨ ਅਕਿਞ੍ਚਨੋ, ਸਬ੍ਬਗਹਣਪਟਿਨਿਸ੍ਸਗ੍ਗੇਨ ਅਨਾਦਾਨੋ, ਅਕਿਞ੍ਚਨਂ ਅਨਾਦਾਨਂ, ਤਮਹਂ ਬ੍ਰੂਮਿ ਬ੍ਰਾਹ੍ਮਣਂ. ਕਸ੍ਮਾ? ਯਸ੍ਮਾ ਬਾਹਿਤਪਾਪੋਤਿ.

੪੫੮. ਕਿਞ੍ਚਭਿਯ੍ਯੋ ਸਬ੍ਬਸਂਯੋਜਨਂ ਛੇਤ੍ਵਾਤਿਆਦਿ ਸਤ੍ਤਵੀਸਤਿ ਗਾਥਾ. ਤਤ੍ਥ ਸਬ੍ਬਸਂਯੋਜਨਨ੍ਤਿ ਦਸਵਿਧਸਂਯੋਜਨਂ. ਨ ਪਰਿਤਸ੍ਸਤੀਤਿ ਤਣ੍ਹਾਪਰਿਤਸ੍ਸਨਾਯ ਨ ਪਰਿਤਸ੍ਸਤਿ. ਸਙ੍ਗਾਤਿਗਨ੍ਤਿ ਰਾਗਸਙ੍ਗਾਦਯੋ ਅਤਿਕ੍ਕਨ੍ਤਂ. ਵਿਸਂਯੁਤ੍ਤਨ੍ਤਿ ਚਤੂਹਿ ਯੋਨੀਹਿ ਸਬ੍ਬਕਿਲੇਸੇਹਿ ਵਾ ਵਿਸਂਯੁਤ੍ਤਂ.

ਨਦ੍ਧਿਨ੍ਤਿ ਉਪਨਾਹਂ. ਵਰਤ੍ਤਨ੍ਤਿ ਤਣ੍ਹਂ. ਸਨ੍ਦਾਨਨ੍ਤਿ ਯੁਤ੍ਤਪਾਸਂ, ਦਿਟ੍ਠਿਪਰਿਯੁਟ੍ਠਾਨਸ੍ਸੇਤਂ ਅਧਿਵਚਨਂ. ਸਹਨੁਕ੍ਕਮਨ੍ਤਿ ਅਨੁਕ੍ਕਮੋ ਵੁਚ੍ਚਤਿ ਪਾਸੇ ਪਵੇਸਨਗਣ੍ਠਿ, ਦਿਟ੍ਠਾਨੁਸਯਸ੍ਸੇਤਂ ਨਾਮਂ. ਉਕ੍ਖਿਤ੍ਤਪਲਿਘਨ੍ਤਿ ਏਤ੍ਥ ਪਲਿਘੋਤਿ ਅਵਿਜ੍ਜਾ. ਬੁਦ੍ਧਨ੍ਤਿ ਚਤੁਸਚ੍ਚਬੁਦ੍ਧਂ. ਤਿਤਿਕ੍ਖਤੀਤਿ ਖਮਤਿ.

ਖਨ੍ਤਿਬਲਨ੍ਤਿ ਅਧਿਵਾਸਨਖਨ੍ਤਿਬਲਂ. ਸਾ ਪਨ ਸਕਿਂ ਉਪ੍ਪਨ੍ਨਾ ਬਲਾਨੀਕਂ ਨਾਮ ਨ ਹੋਤਿ, ਪੁਨਪ੍ਪੁਨਂ ਉਪ੍ਪਨ੍ਨਾ ਪਨ ਹੋਤਿ. ਤਸ੍ਸਾ ਅਤ੍ਥਿਤਾਯ ਬਲਾਨੀਕਂ.

ਵਤਵਨ੍ਤਨ੍ਤਿ ਧੁਤਙ੍ਗਵਨ੍ਤਂ. ਸੀਲਵਨ੍ਤਨ੍ਤਿ ਗੁਣਵਨ੍ਤਂ. ਅਨੁਸ੍ਸਦਨ੍ਤਿ ਰਾਗਾਦਿਉਸ੍ਸਦਵਿਰਹਿਤਂ. ‘‘ਅਨੁਸ੍ਸੁਤ’’ਨ੍ਤਿਪਿ ਪਾਠੋ, ਅਨਵਸ੍ਸੁਤਨ੍ਤਿ ਅਤ੍ਥੋ. ਦਨ੍ਤਨ੍ਤਿ ਨਿਬ੍ਬਿਸੇਵਨਂ.

ਨ ਲਿਮ੍ਪਤੀਤਿ ਨ ਅਲ੍ਲੀਯਤਿ. ਕਾਮੇਸੂਤਿ ਕਿਲੇਸਕਾਮਵਤ੍ਥੁਕਾਮੇਸੁ.

ਦੁਕ੍ਖਸ੍ਸ ਪਜਾਨਾਤਿ, ਇਧੇਵ ਖਯਨ੍ਤਿ ਏਤ੍ਥ ਅਰਹਤ੍ਤਫਲਂ ਦੁਕ੍ਖਕ੍ਖਯੋਤਿ ਅਧਿਪ੍ਪੇਤਂ. ਪਜਾਨਾਤੀਤਿ ਅਧਿਗਮਵਸੇਨ ਜਾਨਾਤਿ. ਪਨ੍ਨਭਾਰਨ੍ਤਿ ਓਹਿਤਭਾਰਂ, ਖਨ੍ਧਕਿਲੇਸਅਭਿਸਙ੍ਖਾਰਕਾਮਗੁਣਭਾਰੇ ਓਤਾਰੇਤ੍ਵਾ ਠਿਤਂ. ਵਿਸਂਯੁਤ੍ਤਪਦਂ ਵੁਤ੍ਤਤ੍ਥਮੇਵ.

ਗਮ੍ਭੀਰਪਞ੍ਞਨ੍ਤਿ ਗਮ੍ਭੀਰੇਸੁ ਆਰਮ੍ਮਣੇਸੁ ਪਵਤ੍ਤਪਞ੍ਞਂ. ਮੇਧਾਵਿਨ੍ਤਿ ਪਕਤਿਪਞ੍ਞਾਯ ਪਞ੍ਞਵਨ੍ਤਂ.

ਅਨਾਗਾਰੇਹਿ ਚੂਭਯਨ੍ਤਿ ਅਨਾਗਾਰੇਹਿ ਚ ਵਿਸਂਸਟ੍ਠਂ ਉਭਯਞ੍ਚ, ਦ੍ਵੀਹਿਪਿ ਚੇਤੇਹਿ ਵਿਸਂਸਟ੍ਠਮੇਵਾਤਿ ਅਤ੍ਥੋ. ਅਨੋਕਸਾਰਿਨ੍ਤਿ ਓਕਂ ਵੁਚ੍ਚਤਿ ਪਞ੍ਚਕਾਮਗੁਣਾਲਯੋ, ਤਂ ਅਨਲ੍ਲੀਯਮਾਨਨ੍ਤਿ ਅਤ੍ਥੋ. ਅਪ੍ਪਿਚ੍ਛਨ੍ਤਿ ਅਨਿਚ੍ਛਂ.

ਤਸੇਸੂਤਿ ਸਤਣ੍ਹੇਸੁ. ਥਾਵਰੇਸੂਤਿ ਨਿਤ੍ਤਣ੍ਹੇਸੁ.

ਅਤ੍ਤਦਣ੍ਡੇਸੂਤਿ ਗਹਿਤਦਣ੍ਡੇਸੁ. ਨਿਬ੍ਬੁਤਨ੍ਤਿ ਕਿਲੇਸਨਿਬ੍ਬਾਨੇਨ ਨਿਬ੍ਬੁਤਂ. ਸਾਦਾਨੇਸੂਤਿ ਸਉਪਾਦਾਨੇਸੁ.

ਓਹਿਤੋਤਿ ਪਤਿਤੋ.

੪੫੯. ਅਕਕ੍ਕਸਨ੍ਤਿ ਨਿਦ੍ਦੋਸਂ. ਸਦੋਸੋ ਹਿ ਰੁਕ੍ਖੋਪਿ ਸਕਕ੍ਕਸੋਤਿ ਵੁਚ੍ਚਤਿ. ਵਿਞ੍ਞਾਪਨਿਨ੍ਤਿ ਅਤ੍ਥਵਿਞ੍ਞਾਪਨਿਕਂ. ਸਚ੍ਚਨ੍ਤਿ ਅਵਿਸਂਵਾਦਿਕਂ. ਉਦੀਰਯੇਤਿ ਭਣਤਿ. ਯਾਯ ਨਾਭਿਸਜ੍ਜੇਤਿ ਯਾਯ ਗਿਰਾਯ ਪਰਸ੍ਸ ਸਜ੍ਜਨਂ ਵਾ ਲਗ੍ਗਨਂ ਵਾ ਨ ਕਰੋਤਿ, ਤਾਦਿਸਂ ਅਫਰੁਸਂ ਗਿਰਂ ਭਾਸਤੀਤਿ ਅਤ੍ਥੋ.

ਦੀਘਨ੍ਤਿ ਸੁਤ੍ਤਾਰੁਲ਼੍ਹਭਣ੍ਡਂ. ਰਸ੍ਸਨ੍ਤਿ ਵਿਪ੍ਪਕਿਣ੍ਣਭਣ੍ਡਂ. ਅਣੁਨ੍ਤਿ ਖੁਦ੍ਦਕਂ. ਥੂਲਨ੍ਤਿ ਮਹਨ੍ਤਂ. ਸੁਭਾਸੁਭਨ੍ਤਿ ਸੁਨ੍ਦਰਾਸੁਨ੍ਦਰਂ. ਦੀਘਭਣ੍ਡਞ੍ਹਿ ਅਪ੍ਪਗ੍ਘਮ੍ਪਿ ਹੋਤਿ ਮਹਗ੍ਘਮ੍ਪਿ. ਰਸ੍ਸਾਦੀਸੁਪਿ ਏਸੇਵ ਨਯੋ. ਇਤਿ ਏਤ੍ਤਾਵਤਾ ਨ ਸਬ੍ਬਂ ਪਰਿਯਾਦਿਣ੍ਣਂ, ‘‘ਸੁਭਾਸੁਭ’’ਨ੍ਤਿ ਇਮਿਨਾ ਪਨ ਪਰਿਯਾਦਿਣ੍ਣਂ ਹੋਤਿ.

ਨਿਰਾਸਯਨ੍ਤਿ ਨਿਤ੍ਤਣ੍ਹਂ.

ਆਲਯਾਤਿ ਤਣ੍ਹਾਲਯਾ. ਅਞ੍ਞਾਯਾਤਿ ਜਾਨਿਤ੍ਵਾ. ਅਮਤੋਗਧਨ੍ਤਿ ਅਮਤਬ੍ਭਨ੍ਤਰਂ. ਅਨੁਪ੍ਪਤ੍ਤਨ੍ਤਿ ਅਨੁਪਵਿਟ੍ਠਂ.

ਉਭੋ ਸਙ੍ਗਨ੍ਤਿ ਉਭਯਮ੍ਪੇਤਂ ਸਙ੍ਗਂ. ਪੁਞ੍ਞਞ੍ਹਿ ਸਗ੍ਗੇ ਲਗ੍ਗਾਪੇਤਿ, ਅਪੁਞ੍ਞਂ ਅਪਾਯੇ, ਤਸ੍ਮਾ ਉਭਯਮ੍ਪੇਤਂ ਸਙ੍ਗਨ੍ਤਿ ਆਹ. ਉਪਚ੍ਚਗਾਤਿ ਅਤੀਤੋ.

ਅਨਾਵਿਲਨ੍ਤਿ ਆਵਿਲਕਰਣਕਿਲੇਸਵਿਰਹਿਤਂ. ਨਨ੍ਦੀਭਵਪਰਿਕ੍ਖੀਣਨ੍ਤਿ ਪਰਿਕ੍ਖੀਣਨਨ੍ਦਿਂ ਪਰਿਕ੍ਖੀਣਭਵਂ.

‘‘ਯੋ ਇਮ’’ਨ੍ਤਿ ਗਾਥਾਯ ਅਵਿਜ੍ਜਾਯੇਵ ਵਿਸਂਵਾਦਕਟ੍ਠੇਨ ਪਲਿਪਥੋ, ਮਹਾਵਿਦੁਗ੍ਗਤਾਯ ਦੁਗ੍ਗਂ, ਸਂਸਰਣਟ੍ਠੇਨ ਸਂਸਾਰੋ, ਮੋਹਨਟ੍ਠੇਨ ਮੋਹੋਤਿ ਵੁਤ੍ਤੋ. ਤਿਣ੍ਣੋਤਿ ਚਤੁਰੋਘਤਿਣ੍ਣੋ. ਪਾਰਙ੍ਗਤੋਤਿ ਨਿਬ੍ਬਾਨਂ ਗਤੋ. ਝਾਯੀਤਿ ਆਰਮ੍ਮਣਲਕ੍ਖਣੂਪਨਿਜ੍ਝਾਨਵਸੇਨ ਝਾਯੀ. ਅਨੇਜੋਤਿ ਨਿਤ੍ਤਣ੍ਹੋ. ਅਨੁਪਾਦਾਯ ਨਿਬ੍ਬੁਤੋਤਿ ਕਿਞ੍ਚਿ ਗਹਣਂ ਅਗ੍ਗਹੇਤ੍ਵਾ ਸਬ੍ਬਕਿਲੇਸਨਿਬ੍ਬਾਨੇਨ ਨਿਬ੍ਬੁਤੋ.

ਕਾਮੇਤਿ ਦੁਵਿਧੇਪਿ ਕਾਮੇ. ਅਨਾਗਾਰੋਤਿ ਅਨਾਗਾਰੋ ਹੁਤ੍ਵਾ. ਪਰਿਬ੍ਬਜੇਤਿ ਪਰਿਬ੍ਬਜਤਿ. ਕਾਮਭਵਪਰਿਕ੍ਖੀਣਨ੍ਤਿ ਖੀਣਕਾਮਂ ਖੀਣਭਵਂ.

ਮਾਨੁਸਕਂ ਯੋਗਨ੍ਤਿ ਮਾਨੁਸਕਂ ਪਞ੍ਚਕਾਮਗੁਣਯੋਗਂ. ਦਿਬ੍ਬਂ ਯੋਗਨ੍ਤਿ ਦਿਬ੍ਬਂ ਪਞ੍ਚਕਾਮਗੁਣਯੋਗਂ. ਸਬ੍ਬਯੋਗਵਿਸਂਯੁਤ੍ਤਨ੍ਤਿ ਸਬ੍ਬਕਿਲੇਸਯੋਗਵਿਸਂਯੁਤ੍ਤਂ.

ਰਤਿਨ੍ਤਿ ਪਞ੍ਚਕਾਮਗੁਣਰਤਿਂ. ਅਰਤਿਨ੍ਤਿ ਕੁਸਲਭਾਵਨਾਯ ਉਕ੍ਕਣ੍ਠਿਤਂ. ਵੀਰਨ੍ਤਿ ਵੀਰਿਯਵਨ੍ਤਂ.

ਸੁਗਤਨ੍ਤਿ ਸੁਨ੍ਦਰਂ ਠਾਨਂ ਗਤਂ, ਸੁਨ੍ਦਰਾਯ ਵਾ ਪਟਿਪਤ੍ਤਿਯਾ ਗਤਂ.

ਗਤਿਨ੍ਤਿ ਨਿਬ੍ਬਤ੍ਤਿਂ. ਪੁਰੇਤਿ ਅਤੀਤੇ. ਪਚ੍ਛਾਤਿ ਅਨਾਗਤੇ. ਮਜ੍ਝੇਤਿ ਪਚ੍ਚੁਪ੍ਪਨ੍ਨੇ. ਕਿਞ੍ਚਨਨ੍ਤਿ ਕਿਞ੍ਚਨਕਾਰਕੋ ਕਿਲੇਸੋ.

ਮਹੇਸਿਨ੍ਤਿ ਮਹਨ੍ਤੇ ਗੁਣੇ ਪਰਿਯੇਸਨਟ੍ਠੇਨ ਮਹੇਸਿਂ. ਵਿਜਿਤਾਵਿਨਨ੍ਤਿ ਵਿਜਿਤਵਿਜਯਂ.

੪੬੦. ਏਵਂ ਭਗਵਾ ਗੁਣਤੋ ਖੀਣਾਸਵਂਯੇਵ ਬ੍ਰਾਹ੍ਮਣਂ ਦਸ੍ਸੇਤ੍ਵਾ ਯੇ ਜਾਤਿਤੋ ਬ੍ਰਾਹ੍ਮਣੋਤਿ ਅਭਿਨਿਵੇਸਂ ਕਰੋਨ੍ਤਿ, ਤੇ ਇਦਂ ਅਜਾਨਨ੍ਤਾ, ਸਾਵ ਨੇਸਂ ਦਿਟ੍ਠਿ ਦੁਦ੍ਦਿਟ੍ਠੀਤਿ ਦਸ੍ਸੇਨ੍ਤੋ ਸਮਞ੍ਞਾ ਹੇਸਾਤਿ ਗਾਥਾਦ੍ਵਯਮਾਹ. ਤਸ੍ਸਤ੍ਥੋ – ਯਦਿਦਂ ਬ੍ਰਾਹ੍ਮਣੋ ਖਤ੍ਤਿਯੋ ਭਾਰਦ੍ਵਾਜੋ ਵਾਸੇਟ੍ਠੋਤਿ ਨਾਮਗੋਤ੍ਤਂ ਪਕਪ੍ਪਿਤਂ ਕਤਂ ਅਭਿਸਙ੍ਖਤਂ, ਸਮਞ੍ਞਾ ਹੇਸਾ ਲੋਕਸ੍ਮਿਂ, ਵੋਹਾਰਮਤ੍ਤਨ੍ਤਿ ਅਤ੍ਥੋ. ਕਸ੍ਮਾ? ਯਸ੍ਮਾ ਸਮੁਚ੍ਚਾ ਸਮੁਦਾਗਤਂ ਸਮਞ੍ਞਾਯ ਆਗਤਂ. ਏਤਞ੍ਹਿ ਤਤ੍ਥ ਤਤ੍ਥ ਜਾਤਕਾਲੇਯੇਵਸ੍ਸ ਞਾਤਿਸਾਲੋਹਿਤੇਹਿ ਪਕਪ੍ਪਿਤਂ ਕਤਂ. ਨੋ ਚੇ ਨਂ ਏਵਂ ਪਕਪ੍ਪੇਯ੍ਯੁਂ, ਨ ਕੋਚਿ ਕਿਞ੍ਚਿ ਦਿਸ੍ਵਾ ਅਯਂ ਬ੍ਰਾਹ੍ਮਣੋਤਿ ਵਾ ਭਾਰਦ੍ਵਾਜੋਤਿ ਵਾ ਜਾਨੇਯ੍ਯ. ਏਵਂ ਪਕਪ੍ਪਿਤਂ ਪੇਤਂ ਦੀਘਰਤ੍ਤਾਨੁਸਯਿਤਂ, ਦਿਟ੍ਠਿਗਤਮਜਾਨਤਂ, ਤਂ ਪਕਪ੍ਪਿਤਂ ਨਾਮਗੋਤ੍ਤਂ ‘‘ਨਾਮਗੋਤ੍ਤਮਤ੍ਤਮੇਤਂ, ਵੋਹਾਰਤ੍ਥਂ ਪਕਪ੍ਪਿਤ’’ਨ੍ਤਿ, ਅਜਾਨਨ੍ਤਾਨਂ ਸਤ੍ਤਾਨਂ ਹਦਯੇ ਦੀਘਰਤ੍ਤਂ ਦਿਟ੍ਠਿਗਤਮਨੁਸਯਿਤਂ. ਤਸ੍ਸ ਅਨੁਸਯਿਤਤ੍ਤਾ ਤਂ ਨਾਮਗੋਤ੍ਤਂ ਅਜਾਨਨ੍ਤਾ ਨੋ ਪਬ੍ਰੁਨ੍ਤਿ, ‘‘ਜਾਤਿਯਾ ਹੋਤਿ ਬ੍ਰਾਹ੍ਮਣੋ’’ਤਿ ਅਜਾਨਨ੍ਤਾਵ ਏਵਂ ਵਦਨ੍ਤੀਤਿ ਵੁਤ੍ਤਂ ਹੋਤਿ.

ਏਵਂ ‘‘ਯੇ ‘ਜਾਤਿਤੋ ਬ੍ਰਾਹ੍ਮਣੋ’ਤਿ ਅਭਿਨਿਵੇਸਂ ਕਰੋਨ੍ਤਿ, ਤੇ ਇਦਂ ਵੋਹਾਰਮਤ੍ਤਂ ਅਜਾਨਨ੍ਤਾ, ਸਾਵ ਨੇਸਂ ਦਿਟ੍ਠਿ ਦੁਦ੍ਦਿਟ੍ਠੀ’’ਤਿ ਦਸ੍ਸੇਤ੍ਵਾ ਇਦਾਨਿ ਨਿਪ੍ਪਰਿਯਾਯਮੇਵ ਜਾਤਿਵਾਦਂ ਪਟਿਕ੍ਖਿਪਨ੍ਤੋ ਕਮ੍ਮਵਾਦਞ੍ਚ ਪਤਿਟ੍ਠਪੇਨ੍ਤੋ ਨ ਜਚ੍ਚਾਤਿਆਦਿਮਾਹ. ਤਤ੍ਥ ‘‘ਕਮ੍ਮੁਨਾ’’ਤਿ ਉਪਡ੍ਢਗਾਥਾਯ ਵਿਤ੍ਥਾਰਣਤ੍ਥਂ ਕਸ੍ਸਕੋ ਕਮ੍ਮੁਨਾਤਿਆਦਿ ਵੁਤ੍ਤਂ. ਤਤ੍ਥ ਕਮ੍ਮੁਨਾਤਿ ਪਚ੍ਚੁਪ੍ਪਨ੍ਨੇਨ ਕਸਿਕਮ੍ਮਾਦਿਨਿਬ੍ਬਤ੍ਤਕਚੇਤਨਾਕਮ੍ਮੁਨਾ.

ਪਟਿਚ੍ਚਸਮੁਪ੍ਪਾਦਦਸ੍ਸਾਤਿ ਇਮਿਨਾ ਪਚ੍ਚਯੇਨ ਏਵਂ ਹੋਤੀਤਿ ਏਵਂ ਪਟਿਚ੍ਚਸਮੁਪ੍ਪਾਦਦਸ੍ਸਾਵਿਨੋ. ਕਮ੍ਮਵਿਪਾਕਕੋਵਿਦਾਤਿ ਸਮ੍ਮਾਨਾਵਮਾਨਾਰਹਕੁਲੇ ਕਮ੍ਮਵਸੇਨ ਉਪ੍ਪਤ੍ਤਿ ਹੋਤਿ, ਅਞ੍ਞਾਪਿ ਹੀਨਪਣੀਤਤਾ ਹੀਨਪਣੀਤੇ ਕਮ੍ਮੇ ਵਿਪਚ੍ਚਮਾਨੇ ਹੋਤੀਤਿ. ਏਵਂ ਕਮ੍ਮਵਿਪਾਕਕੁਸਲਾ.

ਕਮ੍ਮੁਨਾ ਵਤ੍ਤਤੀਤਿ ਗਾਥਾਯ ਪਨ ਲੋਕੋਤਿ ਵਾ ਪਜਾਤਿ ਵਾ ਸਤ੍ਤੋਤਿ ਵਾ ਏਕੋਯੇਵਤ੍ਥੋ, ਵਚਨਮਤ੍ਤਭੇਦੋ. ਪੁਰਿਮਪਦੇਨ ਚੇਤ੍ਥ ‘‘ਅਤ੍ਥਿ ਬ੍ਰਹ੍ਮਾ ਮਹਾਬ੍ਰਹ੍ਮਾ ਸੇਟ੍ਠੋ ਸਜਿਤਾ’’ਤਿ ਦਿਟ੍ਠਿਯਾ ਪਟਿਸੇਧੋ ਵੇਦਿਤਬ੍ਬੋ. ਕਮ੍ਮੁਨਾ ਹਿ ਤਾਸੁ ਤਾਸੁ ਗਤੀਸੁ ਵਤ੍ਤਤਿ ਲੋਕੋ, ਤਸ੍ਸ ਕੋ ਸਜਿਤਾਤਿ. ਦੁਤਿਯਪਦੇਨ ‘‘ਏਵਂ ਕਮ੍ਮੁਨਾ ਨਿਬ੍ਬਤ੍ਤੋਪਿ ਚ ਪਵਤ੍ਤੇਪਿ ਅਤੀਤਪਚ੍ਚੁਪ੍ਪਨ੍ਨਭੇਦੇਨ ਕਮ੍ਮੁਨਾ ਵਤ੍ਤਤਿ, ਸੁਖਦੁਕ੍ਖਾਨਿ ਪਚ੍ਚਨੁਭੋਨ੍ਤੋ ਹੀਨਪਣੀਤਾਦਿਭੇਦਞ੍ਚ ਆਪਜ੍ਜਨ੍ਤੋ ਪਵਤ੍ਤਤੀ’’ਤਿ ਦਸ੍ਸੇਤਿ. ਤਤਿਯੇਨ ਤਮੇਵਤ੍ਥਂ ਨਿਗਮੇਤਿ ‘‘ਏਵਂ ਸਬ੍ਬਥਾਪਿ ਕਮ੍ਮਨਿਬਨ੍ਧਨਾ ਸਤ੍ਤਾ ਕਮ੍ਮੇਨੇਵ ਬਦ੍ਧਾ ਹੁਤ੍ਵਾ ਪਵਤ੍ਤਨ੍ਤਿ, ਨ ਅਞ੍ਞਥਾ’’ਤਿ. ਚਤੁਤ੍ਥੇਨ ਤਮੇਤ੍ਥਂ ਉਪਮਾਯ ਵਿਭਾਵੇਤਿ. ਯਥਾ ਹਿ ਰਥਸ੍ਸ ਯਾਯਤੋ ਆਣਿ ਨਿਬਨ੍ਧਨਂ ਹੋਤਿ, ਨ ਤਾਯ ਅਨਿਬਦ੍ਧੋ ਯਾਤਿ, ਏਵਂ ਲੋਕਸ੍ਸ ਨਿਬ੍ਬਤ੍ਤਤੋ ਚ ਪਵਤ੍ਤਤੋ ਚ ਕਮ੍ਮਂ ਨਿਬਨ੍ਧਨਂ, ਨ ਤੇਨ ਅਨਿਬਦ੍ਧੋ ਨਿਬ੍ਬਤ੍ਤਤਿ ਨ ਪਵਤ੍ਤਤਿ.

ਇਦਾਨਿ ਯਸ੍ਮਾ ਏਵਂ ਕਮ੍ਮਨਿਬਨ੍ਧਨੋ ਲੋਕੋ, ਤਸ੍ਮਾ ਸੇਟ੍ਠੇਨ ਕਮ੍ਮੁਨਾ ਸੇਟ੍ਠਭਾਵਂ ਦਸ੍ਸੇਨ੍ਤੋ ਤਪੇਨਾਤਿ ਗਾਥਾਦ੍ਵਯਮਾਹ. ਤਤ੍ਥ ਤਪੇਨਾਤਿ ਧੁਤਙ੍ਗਤਪੇਨ. ਬ੍ਰਹ੍ਮਚਰਿਯੇਨਾਤਿ ਮੇਥੁਨਵਿਰਤਿਯਾ. ਸਂਯਮੇਨਾਤਿ ਸੀਲੇਨ. ਦਮੇਨਾਤਿ ਇਨ੍ਦ੍ਰਿਯਦਮੇਨ. ਏਤੇਨਾਤਿ ਏਤੇਨ ਸੇਟ੍ਠੇਨ ਪਰਿਸੁਦ੍ਧੇਨ ਬ੍ਰਹ੍ਮਭੂਤੇਨ ਕਮ੍ਮੁਨਾ ਬ੍ਰਾਹ੍ਮਣੋ ਹੋਤਿ. ਕਸ੍ਮਾ? ਯਸ੍ਮਾ ਏਤਂ ਬ੍ਰਾਹ੍ਮਣਮੁਤ੍ਤਮਂ, ਯਸ੍ਮਾ ਏਤਂ ਕਮ੍ਮਂ ਉਤ੍ਤਮੋ ਬ੍ਰਾਹ੍ਮਣਗੁਣੋਤਿ ਵੁਤ੍ਤਂ ਹੋਤਿ. ‘‘ਬ੍ਰਹ੍ਮਾਨ’’ਨ੍ਤਿਪਿ ਪਾਠੋ. ਅਯਂ ਪਨੇਤ੍ਥ ਵਚਨਤ੍ਥੋ – ਬ੍ਰਹ੍ਮਂ ਆਨੇਤੀਤਿ ਬ੍ਰਹ੍ਮਾਨਂ, ਬ੍ਰਾਹ੍ਮਣਭਾਵਂ ਆਵਹਤੀਤਿ ਵੁਤ੍ਤਂ ਹੋਤਿ.

ਦੁਤਿਯਗਾਥਾਯ ਸਨ੍ਤੋਤਿ ਸਨ੍ਤਕਿਲੇਸੋ. ਬ੍ਰਹ੍ਮਾ ਸਕ੍ਕੋਤਿ ਬ੍ਰਹ੍ਮਾ ਚ ਸਕ੍ਕੋ ਚ, ਯੋ ਏਵਰੂਪੋ, ਸੋ ਨ ਕੇਵਲਂ ਬ੍ਰਾਹ੍ਮਣੋ, ਅਥ ਖੋ ਬ੍ਰਹ੍ਮਾ ਚ ਸਕ੍ਕੋ ਚ ਸੋ ਵਿਜਾਨਤਂ ਪਣ੍ਡਿਤਾਨਂ, ਏਵਂ ਵਾਸੇਟ੍ਠ, ਜਾਨਾਹੀਤਿ ਵੁਤ੍ਤਂ ਹੋਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਵਾਸੇਟ੍ਠਸੁਤ੍ਤਵਣ੍ਣਨਾ ਨਿਟ੍ਠਿਤਾ.